ГАЛАТДИЪ ХЪУГЪДАРИЗ КАГЪАЗ
«Марцци вакиларин ляхнар» Китабдиан рябкъюрайиси (16:6; 18:23), Ужувлан хабар рабгъури, Павел Галат шагьриз кьюб ражари гъушну. Исайихъ хъугърудар думу шагьриъ 50-пи йисари арайиз гъафиси рябкъюра. Къураматарин кьялаъ айи гьюлин гъирагъарихъ хъайи юкьуб тереф вари уьлкйириъси, Месигьдикан вуйи Ужувлан хабарнан кьяляхъ, Галатдиъ хъугърударинра Къанундиъ улупнайи аьдатар хъаъбан месэлйир улихь дийигънайи. Гьаму месэлйир себеб вуди, Гирами Рюгьну Павелихьди Аллагьдихъ хъугърудариз Галат шагьриз кагъаз бикІуз мажбур апІуру. Рябкъюрайиси, дина Исайихъ хъугънайи жугьдарра гъафнийи. Дурари жугьдарин диндин вари аьдатар тамам дапІну ккуниваликан ктибтуйи. Дурари, диндин аьдатар тамам апІдарш, уьрхюз шлуб дар кІуйи. Павелилантина Аллагьдин Рюгь дицдар фикрариз ижмиди къаршу удучІвуру. Дугъу, адмийир, чпин ляхнариинди гьякь хьуз ккунди Къанундин ва диндин аьдатар хъайи-хъайиси хъаъру кІури, ваъ, хъа дурар Иса Месигьдихъ хъугъну кІури, Аллагьдиз масанди ву, кІура. Гьаму ву Месигьдикан вуйи Ужувлан хабарнаъ варитІан мяналу мутму. Аллагьдин Рюгьназ Галат агьлари гьарган гьамдикан кІваинди гъибтну ккунду: «Месигьди ухьу, азад хьуз кІури ккадаъну. Гьаддиз ижмиди дийигъай, хъана лукІ’валин юрккгъиъ ичв кІул мииванай!» (5:1).
1Гьякь – саб Ужувлан хабартІан дар
1 Адмийири гьял дапІну ваъ, я адмийин кюмекниинди ваъ, хъа Иса Месигьдин ва Думу гъачІидаригъян за гъапІу Адаш Аллагьдин кюмекниинди вакил гъахьи Павелихьан ва 2 гьамшваъ узухъди хъайи вари гъардшарихьан – Галатдиъ айи хъугърударин жямяаьтриз саламар.
3 Уж’вал ва мясляаьт учвуз, ихь Адаш Аллагьдихьан ва Агъа Иса Месигьдихьан. 4 Дугъу, Адаш Аллагьдин ният тамам гъапІну, писвали агъавал апІурайи гьаму дюн’яйин гьюкмиккан ухьу азад апІбан бадали ихь гунгьарихъанди Чан жан тувну. 5 Гьадгъан ад – аьсрариан аьсрариз ибшри. Амин.
6 Учву гьамкьан ухди, Чан зурба вуйи ужувлиинди учвуз дих ДапІнайирихьан гьидицну, саб жара ужувлан хабарнахъ хъергуз кьаст дапІнайивалиин гъах духьназа. 7 Ужувлан хабар сарун жараб айиб дар! Ичв ара бикьурайи, Месигьдикан вуйи хабар айтІлан апІуз ккуни адмийир а. 8 Эгер шли ичв арайиъ, учвуз дебккнайи Ужувлан хабарналан гъайри, сарун жара гьациб хабар ипраш, гьациб хабар ипрайир, узу вушра, завариан малайикди гьаци апІурашра – гъит гьаци апІурайир, жегьеннемдин цІигъ гъяхъри! 9 Улихьнаси узу гъапнийзаки ва гьамус хъана текрар апІураза: гьарсар, учвуз тувнайи Ужувлан хабарналан гъайри фукІа-мукІа жараб кІуру кас жегьеннемдин цІигъ гъяхъри!
10 Узуз гьапІуз ккунди а: адмийири йиз тереф бисуз гъитуз, даршиш – Аллагьди? Хъа узу, адмийириз ккуниб апІуз хъюгънайир вуйинхъа? Эгер узу адмийириз ккуниб апІурайир вуйиш, узу Месигьдин лукІ хьидайза.
Павелиз кьувват Аллагьди тувну
11 Гъардшар, узуз учвуз аьгъю дубхьну ккундузуз: узу учвуз ктибту Ужувлан хабар адмийирихьан гъафиб дар. 12 Узуз думу адмийирихьан гъебхьуб дариз, я адмийири улупуб дариз, хъа Иса Месигьди узуз думу ачмиш гъапІунзуз.
13 Учвуз, узу Къанун гьярф-гьярфди тамам апІру жугьуд вуйиган, гьич саб инсаф адарди, Аллагьдихъ хъугърударихъ, терг апІури, хъергрур вуди хьуваликан, гъеебхьунчвуз. 14 Йиз таярик узукьан жугьуд дин улихь гъабхру кас адайи, абйирин аьдатар алдарди тамам апІуйза. 15 Хъа Аллагьди Чан ужувлиинди Чан гъуллугънаъ хьуз узу ктагъну. Дугъан гьациб ният узу бабкан хьайиз айи. 16 Дугъу Чан Бай узуз ачмиш апІуру ва Гьадгъукан Аллагь аьгъдру халкьариз Хабар дебккуз гъитру. Думуган узу гьич сар касдихьнакьан, насигьят ккун апІури, гъушундарза. 17 Узу Ерусалимдиз узутІан ухди вакилар гъахьидарихьнакьан гъушундайза, хъа Аравияйиз гъушунза, хъасин Дамаскдиз кьяляхъ хътакунза.
18 Хъасин, шубуд йис гъубшиган, узу Ерусалимдиз Петр рякъюз гъафунза. Дугъахь йицІихьуд йигъан гъузунза. 19 Хъа имбу вакиларикан узуз, Агъайин гъардаш Якьубдилан гъайри, фужкІара гъяркъюндарзуз. 20 Узу учвуз бикІурайиб кучІал дариз, Аллагь шагьид ишри!
21 Хъасин узу Сирияйизна Киликияйиз гъушунза. 22 Ягьудияйиъ айи Месигьдихъ хъугърудариз машна-машди узу таниш дар. 23 Узкан дурариз аьгъюб: «учухъ мугагьназ хъергрури улихьди чав тІанкь апІурайи хъугъуваликан ктибтура» кІурубтІан дайи. 24 Узу гьаци гъахьну, кІури, дурари Аллагь адлу апІуйи.
2Имбу вакилари Павелра вакил вуйиб гьисаб апІура
1 Хъасин, йицІиюкьуд йислан, узухъди Варнавна Тит гъадагъну, хъана Ерусалимдиз гъафунза. 2 Хъа узу дина, Аллагьди амур гъапІиган, гъушур вуйза. Хъугънайидарин кІулиъ айидарихъди, жаради гюрюшмиш гъахьиган, узу дурариз, йиз гъубшу ва гьамусдин жафа давди гъюдудубчІвбан бадали, узу жугьуд дарудариз ктибтурайи Хабарнан мяна-метлебнакан гъапунза. 3 Дурари узухъди хъайи грекжви Титдиин, аьдатниинди суннат апІин кІури, гуж илипундайи. 4 Сакьюдар кІучІлин гъардшариз дугъахьди гьаци апІуз ккун гъабхьну. Дурари ич арайиъ, хъана лукІ’валиъ ахъру аьдатарихьна учу кьяляхъ апІуз ккунди, Месигь Исайиланмина айи ич азадвал шпионариси абгури гъахьну. 5 Хъа учу, Ужувлан хабарнан гьякь мяна-метлеб учвуз уьбхбан бадали, саб гагьдизкьан, дурари зигрушвахъинди хъипундарча. 6 Хъа хъугънайидарин кІулиъ айидар, фужар вуш ва фужар вуди гъахьнуш, саб вузуз – Аллагьдин улихь вари адмийир саб ву. Дурари узкан йиз Хабарналан артухъ вуйиб фукІара тІалаб гъапІундайи. 7 Дурариз, Ужувлан хабарнакан жугьдариз ктибтуб Петриин илипнайиганси, жугьуд дарудариз ктибтуб уз’ин илипнайиб, гъябкънийи. 8 Фицики, Петри вакилвалин гъуллугънаъ жугьдарин арайиъ Дерккури, узура, Аллагь аьгъдрударин арайиъ гъуллугънаъ дерккунзу. 9 Узуз вакилвалин багъиш тувнайиб дурариз аьгъю гъабхьиган, хъугърударин гъваикк ккудукьнайи мурхьлар вуйи Якьубдина, Петрина, Югьанди, узузна Варнавдиз чпин хилар гьачІарккунчуз. Му дурарин чпихъди учура саб ляхин апІурайивалин лишан вуйи. Учу – Аллагь аьгъдрудариз, хъа чпи – жугьдариз Ужувлан хабарнакан ктибтуз гъягъюз дурар рази гъаши. 10 Дурари учкан саб тІалаб гъапІнийи: Ерусалимдиъ хъугърударин касибар кІваин апІуб. Йизра гьадрариз кюмек апІуз лап яманди тямягь хъайиз.
Павели Петр дюз дарувал улупура
11 Хъа Петр Антиохияйиз гъафиган, узу ачухъди дугъаз къаршуди удучІвунза. Думу дюз дайи. 12 Якьубди дина адмийир гьаайиз улихьна думу, жугьуд дарударихъди деъну, ипІури вердиш вуйи. Хъа Якьубдихьан вуйидар Антиохияйиз гъафиган, Петр жугьуд дарударихьан гьудучІвнийи. Дугъу дици, аьдатариинди суннат дапІну ккунду, кІурударихьан гучІ кайивалиан гъапІнийи. 13 Гьадгъуси, имбу жугьдарира кью-кьюб маш гъиву. Гьеле Варнавдира, гьаци, кьюб маш гъивнийи.
14 Узуз дурар Ужувлан хабарнан гьякь мяна-метлебнахьан гьудучІвури гъяркъган, вари хьайишвахь Петриз гъапунза: «Эгер, уву, жугьуд, жугьуд дарурси яшамиш шулаш, уву гьаз жугьуд дарудариз, жугьдарси яшамиш йихь, кІурава?»
15 Ухьуз, жугьдарди бабкан гъахьидариз, «жара гунагькар халкьаризси» 16 дарди, агъяхьуз, гьич сар адмийихьанра, Къанундиъ улупнайи аьдатар хъаъну кІури, гьякь хьуз шлуб дар, хъа анжагъ Иса Месигьдихъ хъугъигантІан. Гьаддиз, ухьура Месигь Исайихъ хъугънахьа, Месигьдихъ хъугънайивалиинди ухьу гьякь апІруси, хъа Къанундин аьдатариинди гьякь хьуз шулдар, фицики, Къанундин аьдатариинди «яшамиш шулайидарикан гьич фужкІара гьякь хьидар».
17 Эгер, Месигьдик кидикьну, гьякь духьнайиганра ухьу имбударси гунагькрар вуш, Месигь, гунгьар апІинай, кІури, дуфнайир вуйинхъа? ИкибаштІан ваъ! 18 Эгер узу, мугагьназ гатІахьу аьдатар, хъана хъаай кІури хъюгъиш, узу Къанун чІюбгъюрайи гьисаб ву.
19 Къанунди узу йивну гъакІну, ва узу, Аллагьдиз яшамиш хьузди, Къанундиз дукІнайир вуза. Месигьдихъди узура хачрак карсназу, 20 сарун яшамиш шулайир узу дарза, хъа узуъ яшамиш шулайир Месигь ву. Ва, узу жилиин илмикьан гагьди, Аллагьдин Балихъ хъугъну яшамиш шулайир вуза. Гьаци узу яшамиш хьузди Дугъу, узу ккун дапІну, Чан жан узхъанди тувну. 21 Дугъу узуз гьамци дапІнайиган, фици узу Аллагьдин му багъиш гатІабхьуза?! Эгер Къанундихьан адми гьякь апІуз шуйиш, Месигь давди гъакІнуки?!
3Хъугъували Аллагьдин уж’вал хуру
1 Галатлуйир, ахмакьар, шли ичв фагьум гъибикьну?! Узу учвуз Хабарнакан ктибтруган, учвуз ичв улариинди хачрак карснайи Месигь гъяркъну кІури, хиял вуйизки!
2 Учвхьан сабдикан гьерхуз ккунди азуз: учвуъ Гирами Рюгь, Къанун тамам гъапІну кІури, учІвунчвуъ, даршиш, Ужувлан хабарнакан деебхьну, хъугъиган? 3 Учву гьадмукьан ахмакьар вунчвахъа, ккебгъруган – Рюгьнахъди ккебгъну, хъа ккудубкІруган – адмийири чпикан ктагъдариинди ккудубкІуз?! 4 Ясана, учвуз гъахьи ва учву апІури гъахьи ляхнар, гьаци, ичІи сес вуйинхъа? Хьуз мумкин дар! 5 Аллагьди учвуз Рюгь багъиш ва ичв арайиъ аьламатнан ляхнар, учву Къанундин къайдйир хъаъра кІури, гъапІну кІурачва, даршиш, Гьадгъан хабарнакан деебхьну, учву хъугъиган?
6 Мисалназ, Ибрагьимдиз лигай. Думу «Аллагьдихъ хъугъру, ва Аллагьди думу, чан хъугъувализ дилигну, гьякь апІуру». 7 Гьаци вуйиган, гъавриъ ахъай, Ибрагьимдин баяр фужар вуш – хъугърудар ву. 8 Гирами китабариъра, хъугъу халкьар Аллагьди гьякь апІиди кІури, улихьмиди дупнайи. Ибрагьимдиз, «Увлантина жугьуд дару халкьариз Аллагьдин уж’вал хьибди», кІури, Ужувлан хабарнакан сифте хабар гьадмугантІан дебккнийи. 9 Гьаддиз Аллагьдихъ фужар хъугъруш, гьадрариз варидиз Ибрагьимдихъди сабси, чпин хъугъувализ дилигну, ужувлар хьиди.
10 Къанундихъ йирфар хъирчну, дидин аьдатар тамам апІуз ккунидар агьнакк ккахъуз мумкин ву, гьаз гъапиш «Къанундин китабдиъ дибикІнайиб вари, сабкьан гъидидипди, тамам дарапІрур, агьнакк ккахъна» кІури, дибикІна. 11 Хъа Къанундиинди Аллагьдин улихь гьич фужкІара гьякь даршлуб гьаму гафариан ачухъ шула: «Чан хъугъувализ дилигну гьякь гъапІуртІан яшамиш хьидар». 12 Къанундин хъугъувалихъди айиб гьич фукІара адар. Дидиъ дупна: «Анжагъ му къайдйир вари тамам апІруртІан яшамиш хьидар».
13 Месигьди ухьу, Къанун тамам дарапІруган, ухь’ин улубкьру агьнаккан ккадаъну. Дугъу Чав Къанундиъ улупнайи кьаза-балйир ухьу бадали Чаина гъадагъну, гьаз гъапиш гьамци дупна: «гьарикк ккерхнайир агьнакк ккахъна». 14 Ибрагьимдиз тувурза дупнайи уж’вал Иса Месигьдилантина вари халкьариз хьпан бадали ва ихь хъугъувализ дилигну тувурза гъапи Рюгь ухьуз рукьбан бадали, Къанундиъ улупнайи кьаза-балйир Дугъу Чаина гъадагъну.
Къанун ва тувнайи гаф
15 Гъардшар, ихь гьар йигъандин уьмриан мисал хибдизачвуз: эгер адмийи дюз гъюруси васиятнан кагъаз дибикІнаш, думу гьясбикк ккадрапІуз вая дидик жараб капІуз хьибдар. Ари гьамшваъра гьаци ву. 16 Ибрагьимдиз ва дугъан наслиз Аллагьди гаф тувнайи. Фикир тувай, фици дупнаш: «наслариз» дупнадар – мици, гизафдарикан улхураш, кІуру, хъа, «яв наслиз» – мици сарикан улхруган кІурайиб ву. Ари гьадму насил – Месигь ву. 17 Узуз гьамци пуз ккундузузки: юкьудваржна сумчІур йислан арайиз гъафи Къанундихьан Аллагьди дебккнайи йикьрар арайиан адабгъуз шлуб дар ва дидиъ тувнайи гаф тамам дарапІди гъибтуз хьибдар. 18 Эгер ирс Къанундилан асиллу вуйиш, думу тувнайи гафналан асиллу хьибдайи. Хъа Аллагьди, Чан гаф тувну, Ибрагьимдиз гьаму ирс тувна.
19 Дици вуйиган, Къанун гьаз ву? Думу, тахсрар артухъ хьувализ дилигну, гьадму гаф тувну гъюру «Насил» гъяйизкьан адабгънайиб вуйи. Къанун малайикариланмина ва ара сатІи апІрурин кюмекниинди дебккнайиб ву. 20 Ара сатІи апІрур, аьлакьа йибтІуз ккайи кьюб тереф айигантІан шлур дар. Хъа Аллагь сартІан дар, аьхир.
Мусайин Къанундин ляхин
21 Дици вуш, Къанун, Аллагьди тувнайи гафназ къаршу вуйинхъа? ИкибаштІан, ваъ! Эгер адмийириз, уьмур тувуз шлу Къанун гъабхьнийиш, икибаштІан, дурар гьякь апІувал гьациб Къанундилан асиллу хьибдийи. 22 Аммаки Гирами китабари дюн’яйиин алиб вари, Иса Месигьдихъ хъугъувалиланмина, хъугънайириз тувнайи гаф тамам апІбан бадали, гунгьин гьюкмикк кка, кІура.
23 Хъугъувал ачмиш хьайиз Къанундин дустагъдиъ, хъугърувалин вахт гъяйиз, итнайхьа. 24 Гьаци вуйиган, Къанун ухьуз, ихь хъугъувалиинди ухьу гьякь апІбан бадали Месигьдихьна гъахру тербиячи вуйхьуз. 25 Хъугъувалин вахт гъафиган, ухьу тербиячийин хилккан ккадаунхьу.
26 Учву вари Месигь Исайихъ хъугърувалилантина Аллагьдин баяр вучва. 27 Фицики, Месигьдик ктикьбан бадали штуан гъахьидар, учву Месигьдин гъаравликк ккачва. 28 Сарун жугьдаринна жара миллетарин фаркьлувал имдар, лукІранна азад вуйирин фаркьлувал имдар, жилижвуванна дишагьлийин фаркьлувал имдар. Гьаз гъапиш учву вари, Месигь Исайихъди саб вучва. 29 Сарун учву Месигьдиндар вуш, Ибрагьимдин наслар вучва ва, гаф тувнайиси, ирс рубкьрудар вучва.
4Павелиз Галатдин хъугърудар ккунивал
1 Учвуз сабсана мисал хибдиза: ирс рубкьуз ккайир, васиятниинди вари ирснан аьхюр учв вушра, бицІиди имиди, лукІрахьан сабдинра артухъ дар. 2 Думу чан адашдин васиятнаъ улупнайи вахт гъяйизкьан, чан хулаз лигурайидарин ва чан гъайгъу зигрударин хиликк ккади шулу.
3 Ари гьаци ухьура ахьа: ухьу бицІиди айиган, гьаму дюн’яйин кьудратарин хиликк ккайхьа. 4 Аммаки Аллагьди, вахт гъабхьиган, Къанундиккди яшамиш шулайи дишагьлийи гъахи Чан Бай гьаъру. 5 Думу му дюн’яйиз, Къанундин гьюкмиккди яшамиш шулайидар азад апІбан бадали ва Аллагьди ухькан Чаз веледар ктаъбан бадали, гъафну.
6 Учву Чан веледар вуйиган, Аллагьди ичв кІваъ, «Авва! Адаш!», кІури, дих апІру Чан Балин Рюгь аъну. 7 Гьаддиз, сарун уву лукІди имдарва, хъа Дугъан бай духьнава. Хъа эгер уву Дугъан бай вуш, Дугъу увкан ирс рубкьурайир ктаъну.
8 Мугагьназ, учвуз Аллагь аьгъдру вахтари, учву аллагьар дару кучІлин аллагьарин лукІар вуйчва. 9 Гьамус, учвуз Аллагь аьгъю гъахьиган, яна дюзди гъапиш – Аллагьдиз учву аьгъю гъахьиган, гьаз учву хъана гьадму зяиф ва касиб дюн’яйин кьудратарихьна хътакурачва? Гьадрарин лукІвалиъ учІвуз ккунди анчвуз? 10 Учву, саспи йигъар, вазар, йисан паяр ва йисар къайд апІурачва. 11 Амма учвуз ужувлаз вуйи йиз ляхнар, учвухь дав шул, кІури, гучІ казуз.
12 Гъардшар, учвуз миннат вуйиз, узу фицир вуш, учвура гьацдар йихьай! Фицики узура учвусир даринхъа? Учву узуз гьич зат фукІара чІуруб гъапІундарчва. 13 Учвуз аьгъячвуз: узу учвухьна сифте ражари гъафиган, иццурашра, учвуз Ужувлан хабарнакан ктибтуз гъабхьунзухьан. 14 Йиз уьзри учву узхьан ярхла гъапІундайи. Узу даккун дапІну, учву узхьан гьидицундайчва, хъа Аллагьдин малайикси, Месигь Иса Учвси, узу кьабул гъапІнийчва. 15 Гьамус ичв думугандин гьевес-шадвал набши? Думуган, саб шак адарди кІураза, лазим гъабхьнийиш, ичв ул узуз тувуз гьяйиф хьибдайчвуз! 16 Гьамус фу дубхьна? Учвуз гьякьнакан гъапну кІури, узкан ичв душман духьнайин?
17 Пис хиялар ади ичв кІул’ин аьхювал апІуз ккуни адмийириз учву учхьан гьадатІуз, хъасин учву, чипкан каркар ктатури дерккуз ккунди а. 18 Жвуван тереф бисуз гъитбаъ фукІара чІуруб адар, эгер ниятар ужудар вуш. Гьаци узу учвухъди гъузу йигъазтІан дархьиди дарибшригьа. 19 Йиз ккуни веледар! Узу хъана уьзур-аьзиятниинди, учву тазатІан бабкан шулайиси, Месигьдиз ухшар айидар шайизкьан, цІийи алаидизачву! 20 Гьаму ражари, узу учвухъди хъади, жараси улхуз ккунди айзуз! Узу учв’ин мюгьтал духьназа!
21 Учвуз Къанундиз мютІюгъ хьуз ккунди анчвуз? Дици вуйиган, узуз йипай: Къанундиъ фу кІураш, гъавриъ анчва? 22 Душваъ, Ибрагьимдихъ кьюр бай хъайи, кІури, дупнаки, сар – гъараваш дишагьлийикан, тмунур 23 – Аллагьди гаф тувнайиган – азад дишагьлийикан. 24 Му ихтилатнаъ саб жини мяна а: кьюр дишагьли кьюб йикьрар вуди гьисаб апІура. Дурарикан сар – Агар, Синай дагъдиин гъийитІу йикьрар ву. Ари гьадму Агар лукІ вуйи ва дугъан веледарра лукІарди бабкан шули гъахьну. 25 Агар Аравияйи айи Синай дагъ гьисаб ву, ва гьацира гьадму вахтари чан веледарра хъади лукІвалиъ абхънайи Ерусалим. 26 Хъа аьршарин Ерусалим – азадуб ву, ва гьадму – ихь дада вуйихь! 27 Гирами китабариъ дибикІна:
«Шад йихь, бицІидар даршлур ва бицІидар дархир!
ЧІигъар апІин ва гьарай ип, бицІир апІруган шлу аьзиятарикан хабар адрур!
Фицики, ялгъуз дишагьлийин бицІидар жилирихь хьайиринтІан гизаф ву!»
28 Учвура, гъардшар, гаф тувну бабкан духьнайи веледарси, Исакьдиз ухшар вучва. 29 Аммаки, аьдати жюрейиинди бабкан духьнайир Гирами Рюгьниинди бабкан гъахьирихъ хъерграйиси, гьаму вахтарира гьаци шула. 30 Гирами китабариъ фу кІура? – «Азад дишагьлийин балихъди ирснан пай ккудрубкьбан бадали, лукІ дишагьли, чан байра хъади, утІукк». 31 Гьаддиз, гъардшар, ухьу лукІран веледар дархьа, хъа – азад дишагьлийиндар!
5Ичв азадвал уьбхяй
1 Месигьди ухьу, азад хьуз кІури, ккадаъну. Гьаддиз ижмиди дийигъай, хъана лукІ’валин юрккгъиъ ичв кІул мииванай!
2 Узу, Павели, учвуз кІуразачвуз: эгер аьдатариз дилигну, суннатар апІури, Къанундиъ кІурайибдихьна учву кьяляхъ хътакуруш, учвуз Месигьдикан вуйи гьич саб хайирра адарчвуз. 3 Узу учвуз хъана текрар апІураза: аьдат бадали шли чан суннат апІуз гъитиш, гьадгъу Къанундиъ улупнайи вари къайдйирна аьдатар тамам дапІну ккунду. 4 Эгер Къанундиинди гьякь хьуз ичв умуд каш, гьамусдихъантина Месигьдихъди вуйиб гьич фукІара адаричв ва Аллагьдин ужувлихьан жара гъахьунчва. 5 Хъа ухьу гьякь хьуз ихь умуд хъугъувалик кайихь ва Рюгьну ккилигуз кюмек апІурахьуз. 6 Эгер Месигь Исайихъди ухьу саб вуш, адмийин суннат дапІну а – адар, дурар сар сарихьан жара дар. Мушваъ айи метлеб – масанвалиланмина арайиз удубчІвурайи хъугъвал ву.
7 Учву жаргъуб ужуди ккебгънийчва. Думуган учвуз шли машат гъапІунчвуз ва гьякьнахъ хъпебехърудар шли ктаунчвукан? 8 Мидхъан шли хътаунчву? Учвуз дих ГъапІури дици дарапІур! 9 «Вари хямир утуз сацІиб дун чІяаьн ву» 10 Узу, Агъайихъди сабси, учву жара фикрариъ адрахърубдихъ, хъугъурза. Хъа ичв ара бикьурайидариз, чпи фужар вушра, жаза гьадабтІиди. 11 Гъардшар, эгер узу гьамусра суннатнакан ктибтуйиш, гьаз узухъ хъергуйихъа? Эгер узу гьамусра гьаци ктибтури имийиш, хачракан вуйи йиз аьгъювалари къаршувалар арайиз хидайи. 12 Хъа ичв арайиъ гъипрайи футнакрари, неинки суннат, хъа чпин вари ккадатІузра ккадатІри!
13 Учвуз Аллагьди азадди яшамиш хьуз дих дапІна, гъардшар. Аммаки, лигайгьа, ичв азадвал, ичв жандиз ккуниб апІури хъаъру гунгьариз ишлетмиш апІуз мигъитанай! Хъа учву чиб-чпин гъайгъушнаъ, масанди йихьай. 14 Гьаз гъапиш, мушваъ вари Къанун гьаму саб гафнаъ а: «Яв багахь хьайир, увуз увуси, ккун апІин». 15 Хъа эгер учву, чиб-чпи кчІвукьури ва чиб-чпин йикк ипІури гъашиш, лигайгьа, учву чиб-чпи тІанкь апІуз мумкин ву!
Рюгь ва беден
16 Узу учвуз кІураза: Рюгьну кІурайиси яшамиш йихьай, ва гьадмуган, ичв жандин тямягьяриъ кІулихъди ахъидарчва. 17 Ихь гунагькар бедендиз ккуниб – Рюгьназ ккуниб дар, хъа Рюгьназ ккуниб – ихь гунагькар бедендиз ккуниб дар. Дурар чиб-чпиз къаршу ву. Учвхьан учвуз ккуниб гьаддиз апІуз шулдарчвухьан. 18 Эгер учву Рюгьну хъаъраш, ичв зиин Къанундин гьюкум гъубзрадар.
19 Гунагькар бедендин ляхнар варидариз рякъюрайидар ву. Дурарик кьяппавал, чиркинвал, хил’ан адахънайивал, 20 идолариз икрам апІувал, фал китувал, душманвал, гьюжатар, жарадариин хъугъвал алдрувал, хъял, учвтІан даккнивал, гъярхьувалар, къаршувалар, 21 бахилвал, пиянвал, шадлугъар-кьяппавалар ва гьацдар жарадар кахьра. Узу учвуз улихьнасира гъапунза ва гьамусра кІуразачвуз: гьаци апІрударикан гьич саризра Аллагьдин Паччагьлугъдиъ ирс ккубкьидар.
22 Хъа Рюгьнан ляхнарик – масанвал, шадвал, мясляаьт, сабур, уж’вал, хил ачухъвал, хъугъвал алди хьуб, 23 гъянивал, жвув хилиъ дисувал кахьра. Гьамцдар ляхнариз закон лазим дар. 24 Месигь Исайиндари, чпин гунагькар бедендин вари дерккуз даршлу ва чиркин тямягьяр хачрак карсна. 25 Ухьу гьамус Рюгьнахъ хъайиган, гъачай, Рюгьну кІурайиси, апІурхьа! 26 Гьаддиз, фурс кубчІвуз гъузидархьа, чиб-чпик хъял капІидархьа, чиб-чп’ин бахил шули хьидархьа!
6Чиб-чпиз кюмек апІури йихьай
1 Гъардшар, эгер шли гунагь гъапІиш, учву, рюгьнахъ хъайидари, тахсир гъапІур гъяниди дюз рякъюхъна духну ккунду. Лиггьа, жвувканра гьациб тахсир ктудубчІвбан бадали, жвув’ин ул алди гъуз! 2 Гьардиз чаин алиб апІуз кюмек апІури гъузай, гьаци учву Месигьдин закон кІулиз адабгъидичва. 3 Шлиз, чав фукІа дарапІишра, учв заанди рякъюраш, дугъу учв алдатмиш апІура. 4 Гъит, гьарсари аькьюллуди чпин ляхнарикан фикир апІри, ва гьадмуган дугъхьан, чан хъуркьувалариз дилигну, фурс апІуз хьибди, ва дугъу чан ляхнар жарадариндарихь тевдар, 5 фицики, гьарди чаин алиб апІиди.
6 Шли Аллагьдин гафнан аьгъювалар гъадагъураш, гъит, гьадгъу, чаз айи вари хазнайикан, чаз улупурайиризра капІри.
7 Жвуву жвув алдатмиш мапІанай: Аллагь ахмакь апІуз хьибдарчвухьан! Адмийи, фу гъубзиш, гьадму ккадабцІиди! 8 Чан гунагькар беден бадали убзрури, ккадабцІруб аьжал хьибди. Хъа Рюгь бадали убзрури, Рюгьнахьан гьаргандин уьмур ккадабцІиди. 9 Гьаци вуйиган, уж’вал апІуру кІури эргувалиъ кІул ипдархьа, ва гьадмуган, эгер хътадахъиш, ухьуз улупнайи вахтна бегьер ккадабцІидихьа. 10 Магьа гьаддиз, вахт имиди, варидариз уж’вал апІидихьа, иллагьки, хъугъувалиъ саб хизан гъашидариз.
Павели чан кагъаз ккудубкІура
11 Гьамус узу учвуз йиз хусуси хил’инди бикІураза – гьаму аьхю гьярфар рякъюрачвузки? 12 Хъа учвухьди суннатнан аьдатар хъауз гъитрудари, чпи адмийириз ккун хьузди гьаци апІура, фицики дурариз Месигьдин хачралантина чпихъ хъергри ккундар. 13 Дурари, аьдатниинди чпин суннат дапІнашра, Къанундиъ улупнайи аьдатар хъаъри шулдар. Дурариз, аьдатназ дилигну, ичв суннат апІуз ккунди а. Гьаци дурариз чпин тяриф за апІуз ккунду. 14 Хъа узуз, ихь Агъа Месигь Исайин хачрииндитІан гъайри, жарабдиинди фурс апІуз ккундарзуз. Узуз – дюн’я думу хачрак кабсна ва дюн’яйиз – узу думу хачрак карсна. 15 Суннат дапІну ашра – адаршра, мидлан фукІара шулайиб адар. Мушваъ ккундайиб: жвув Аллагьдиз цІийи кас хьувал ву. 16 Мясляаьт ва уж’вал ибшри гьамци апІрудариз ва Аллагьдин Израилиз!
17 Гъит, гьамусдихъантина узу гьич сарира пашман дарапІри, фицики йиз бедендиин Исайин лишнар ал.
18 Ихь Агъа Иса Месигьдин уж’вал ичв рюгьнахъди ибшри, гъардшар. Амин!