Эфес

ЭФЕСДИЪ АЙИ ХЪУГЪРУДАРИЗ КАГЪАЗ

Му кагъаз Эфес шагьриндариз дибикІнайиб вушра, БицІи Азияйин вари хъугърудариз кІури, Гирами Рюгьну Павелихьди бикІуз гъитна. Мумкин ву кагъаз Павел Римдиъ дустагъдиъ айи вахтна дибикІнайиб хьузра. Му кагъзиъ Аллагьди адмийир уьрхбаъ Месигьдин важиблуваликан ктибтура. Гьаму шибритІиин али Исайихъ хъугънайидарин саб хизандин уьмрикан ктибтура: Аллагьди дурариз, Иса Месигьдихъ хъугърудар вари саб хилси хьуз, дих гъапІну. Дурарин хъугъувалин бин хачрак карсу, хъасин чІиви гъаши Иса Месигь духьну ккунду. Исайихъ хъугърудар инсандин бедендихь тевра: бедендин паярихьан, саб хътарди, тмунубдихьан фукІа апІуз даршлуси, Исайихъ хъугънайи адмира гьаци ву – сар чан-чаз яшамиш духьну ккундар. Хъугънайидарин арайиъ гьарсариз чан йишв ва ляхин а, гьаддиз сарин гъуллугъ тмунуринубтІан артухъ вуди гьисаб дапІну ккундар. Хъугънайидарихьан сатІидитІан гьаму дюн’яйиъ айи писвализ къаршу дугъужвуз шлуб дар. Кагъзин аьхириъ хъугърударин гьар йигъандин месэлйирихьна фикир жалб апІура: мушваъ жиларин ва хпарин, абйир-бабарин ва бицІидарин, гъуллугъарихь хьайидарин ва дурарин хиликк ккайидарин аьлакьйирикан ктибтура. Душваъ, юкьвнаан гьякьвал идибтІну, дюзвалин рукьан палатдиъ учІвну, ижмиди дийигъуз дих апІура.

Месигь – ухьуз тувнайи уж’вал ву

¹ Эфесдиъ айи Аллагьдин гирами халкьдиз, Месигь Исайихъ хъугъну яшамиш шулайидариз Аллагьдин амриинди Месигь Исайин вакил Павелин терефнаан – ² уж’вал ва мясляаьт учвуз, ихь Адаш Аллагьдихьан ва Агъа Иса Месигьдихьан!

³ Гъит адлу ишри ихь Агъа Иса Месигьдин Адаш, Аллагь. Дугъу аьршариъ ухьуз, Месигьдихъди ухьу саб гъашиган, рюгьнан вари ужувлар тувунхьуз: ⁴ Дугъу ухьу, Месигьдиъ саб духьну, Аллагьдин улихь гирамиди ва тахсир ктарди яшамиш хьуз дюн’я халкь апІайиз улихьна ктагъну. Дугъу Чан масанвалиинди, ⁵ Чан хушнииндина ниятниинди, Иса Месигьдилантина ухькан Чаз веледар ктауз улихьмиди кьаст дапІнади гъахьну. ⁶ Чав ккун гъапІу Месигьдилантина ухьуз туву Дугъан ужувлан вари ад магьа гьамдиъ а. ⁷ Гьадгъахъди саб гъахьиган, Дугъан ифди ухьу дюрхна ва Аллагьдин аьхир адру уж’вали ихь гунгьарилан хил алдабгъна. ⁸ Думу уж’вал Дугъу ухьуз жумартди тувну. Вари фагьмиинди ва аьгъювалиинди ⁹ Дугъу ухьуз Чан хушниинди Чан ниятнан сир ачухъ гъапІну. Думу ният Месигьдиланмина арайиз хуз ккайиб вуйи. ¹⁰ Дугъан му ляхнар улупнайи вахтна завариин ва жилариин халкь дапІнайиб вари Месигьдин гьюкмиккна сатІи апІбан бадали вуйидар вуйи.

¹¹ Гьадгъахъди саб гъахьиган, Аллагьди Чан вари хушниинди ва ниятниинди улихьмиди апІурайи ниятнаъ айиси, учу ктагъну. ¹² Му мици учу, Месигьдик сифте миж кивну, адлу духьнайи Аллагьдин тярифар апІуз гъабхьиб ву. ¹³ Гьаци учвура, учвуз уьрхювал тувру гьякьвалин гаф – Ужувлан хабар гъеебхьиган, Месигьдик ктикьунчва. Дугъахъ хъугъиган, Аллагьдин печать гъивунчвуин – гаф тувну гъафи Гирами Рюгь. ¹⁴ Гьадму Гирами Рюгь ухьуз тувнайиган, адлу духьнайи Аллагьдин тярифар апІуз ухьуз ирс рубкьруб ва ухькан Чан адмийир ктаъруб аьгъяхьуз.

Павел хъугърударихъан ккарагура

¹⁵ Магьа гьаддиз, Агъа Исайихьна айи ичв хъугъуваликан ва Аллагьдин вари гирами халкьдихьна айи ичв масанваликан узуз гъеебхьиган, ¹⁶ йиз ккарагбариъ учву кІваин апІури, Аллагьдиз гьаммишан учвхъанди баркаллагь кІураза. ¹⁷ Ихь Агъа Иса Месигьдин Аллагьди, адлу Адашди, фагьум туврайи Рюгь ва Чан гъавриъ ахъуз шлу ачмиш’вал учвуз тувуз кІури, узу сикин дарди ккарагураза. ¹⁸ Узу, Аллагьди ичв юкІвариз гьякь рябкъювал туври, кІури, ккарагураза. Гьадмуган, Чав дих дапІну, учвуз тувнайи гьадму умуд фу вуш, Аллагьдин гирами халкьдиз ирсди рубкьру аднан девлет фукьан зурбади вуш, ва ухьуъ, Дугъан кьадарсуз кьувватнан кюмекниинди хъугънайи адмийириъ айи ебцуз даршлу Дугъан кьудратнан зурбавал фукьануб вуш, агъю хьибдичвуз. ²⁰ Гьадму кьувватнан кюмекниинди Аллагьди Месигьдиъ, Думу чІиви гъапІган, гьяракат ипнийи ва аьршариъ Чан арччул хилихъинди, ²¹ рюгьнан дюн’яйин вари аьхюдартІан, гьюкумдрартІан, агъйиртІан, ва неинки гьаму, хъа гъюз ккимбу уьмрариъра кІваина хру заан ччвурартІан зиина дитнийи. ²² Аллагьди вари Месигьдин ликариккна гъабхну. Думу, вари гъурдаъ Дибиснайир, вари дюн’яйиъ хъугънайидарин Аьхюрди дерккну. ²³ Дурар сатІиди Гьадгъан беден, варишвариъ ва варибдиъ вуйи Гьадгъан тамамвал ву.

Аьжалихьан уьмрихьна

¹ Учву ичв тахсрарна гунгьарилантина дийихнайидар вуйчва ² ва, гьаму дюн’яйиъ фици апІури гъахьнуш, учвура Аллагьдиз къаршуди удучІвнайидариъ айи рюгьнан гьавайиъ айи чІуру кьувватарин аьхюрин хиликкди гьаци апІуйчва. ³ Саб вахтназ ухьура гьацдар вуйхьа ва, бедендиз ккуниси, ихь тямягьярин ва ихь чІуру ниятарин ляхнар апІуйхьа. Варидарихъди ухьузра, ихь хасиятназ дилигну, Аллагьдин хъял ккилибгурайи. ⁴ Хъа, зурба рягьим айи Аллагьди Чан зурба масанвалиинди ккун гъапІунхьу. ⁵ Гьаддиз ухьу ихь тахсрарилантина дийихнайидар вуйишра, Месигьдихъди чІиви гъапІунхьу. Гьадгъан ужувлиинди дюрхнайидар вучва. ⁶ Аллагьди ухьу Месигьдихъди чІиви гъапІну ва Иса Месигьдиъ саб духьнайи ухьу аьршариъ дитну. ⁷ Гьаци Дугъаз Иса Месигьдилантина гъюз ккимбу вахтари ухьуз тувру Чан ужувлан кІан-кІул адру девлет варидариз улупуз ккун гъабхьну. ⁸ Гьаддиз Аллагьди учвуз Чан уж’вал тувну, ичв хъугъувалилантина гъюрхюнчву. Ичв дюрхнайивал ичв гьунар дар, хъа – Аллагьдин багъиш ву. ⁹ Учву, учву гъапІу ляхнариз дилигну, дюрхнадар. Гьаддиз, ич ляхнариз лигну, гъюрхюнча, кІури, фурс мапІанай! ¹⁰ Аллагьди ухьуз дерккнайи ужувлан ляхнар тамам апІуз, ухьу Иса Месигьдиъ саб дапІну, халкь дапІнайидар вухьа.

Месигьдиъ сатІи вуйидар

¹¹ Гьаддиз кІваинди гъитай: учву бабкан аллагьсузарди гъахьунчва. Адмийирин хилари бедендин суннат апІру аьдат гъапІдари учвуз «кададабтІдар» кІури шуйчвуз. ¹² Думу вахтари учву Месигь хътарди гъахьунчва. Учву Аллагьдин халкь вуйи Израиларик кахьрайидар дайчва. Гирами Йикьрариъ Аллагьди тувнайи гаф учвуз кайиб дайи. Учву му дюн’яйиъ миж ктарди, я Аллагь адарди яшамиш шулайидар вуйчва. ¹³ Хъа гьамус учву, Месигь Исайикди ктикьган, саб вахтна Аллагьдихьан ярхла айидар, Месигьдин учвхъанди удубзу ифдиинди багахь гъахьунчва.

¹⁴ Месигьди ухьу, жугьдар ва жара халкьар, саб мясляаьтназ гъахну ва кьюбдикан саб гъапІну; Чан жан гъурбан дапІну, ихь арайиъ дийибгънайи цал, яни ухьу жара апІурайи душманвал адабгъну. ¹⁵ Дугъу аьдатарна къайдйир хъайи Къанун арайиан идипну. Дугъан метлеб – Чаъ сатІи дапІну, кьюбдикан цІийи халкь дапІну, мясляаьт ипуб ву, ¹⁶ кьюридра саб халкьси, хачриин гъабхьи ккадаъру Чан аьжалилантина Чаинди душманвал терг дапІну, Аллагьдихъди мясляаьтназ хуб ву. ¹⁷ Думу дуфну, учвуз, Аллагьдихьан ярхла айидариз, ва Дугъаз багахь хьайидариз мясляаьтнакан хабар дебккну. ¹⁸ Гьаддиз Гьадгъулантина ухьуз, жугьдариз ва миди вуйи халкьариз, сар Рюгьну сатІи дапІну, аьршарин Адашдихьна гъюз ихтияр дубхьнахьуз.

¹⁹ Гьаци вуйиган, учву сарун жарадар ва гъирагъдилан дарчва. Учву Аллагьдин гирами халкьдизстар ихтиярар айи саб пай вучва ва Дугъан хизандин адмийир вучва. ²⁰ Учву вакиларина пайгъамбрари ккивнайи шибритІиин бина ккебгънайидар вучва. Гьадму шибритІин сабпи ва мурччван Гъван – Месигь Иса Учв ву. ²¹ Дид’ин ягъал-ягъал шулайи ва Агъайиз бахш вуйи, гирами дараматдиз илтІибкІурайи мюгькам хал дийибгъна. ²² Дидиъ учвкан Чан Рюгьниинди Аллагь яшамиш шлу ужагъ шула.

Аллагьсузарин арайиъ Павелин ляхнар

¹ Магьа гьаддиз узу, Павел, учву, аллагьсузар бадали, Месигь Исайиланмина дустагъдиъ аза.

² Учвуз, икибаштІан, Аллагьди узуз Чан уж’вал учвуз улупуз табшурмиш дапІнайиваликан деебхьначвуз. ³ Дугъу узуз Чан сир ачухъ гъапІунзуз, узу дидкан учвуз жикьиди гъибикІнийза. ⁴ Гьаму гъурхиган, Месигьдин сирнакан узуз фу аьгъяш, йиз аьгъюваларикан учвхьанра аьгъю апІуз шулчвухьан. ⁵ Му сир аьгъю хьуб гьамусдизкьан айи инсаниятдиз тувнайиб дайи. Хъа гьамус Рюгьну Аллагьдин гирами вакиларизна пайгъамбрариз думу аьгъю гъапІну. ⁶ Думу сир магьа гьаму ву: жугьдарихъди сабси жугьуд дарударра, Ужувлан хабарнахъ хъугъну, Аллагьдин ужувлан ирсчйир ву ва дурарихъди сабси саб бедендик ктикьура. Иса Месигьдик ктикьрудариз тувнайи гафнакан гьадраризра ка.

⁷ Аллагьдин кьувватну узуз тувнайи ужувлиинди гьадму Ужувлан хабар рабгъру гъуллугъчи духьназукан. ⁸ Узуз, Аллагьдин халкьдин арайиъ варитІан асккануриз, гьаму багъиш тувназуз: Аллагь аьгъдрудариз ебцуз удудубкьру Месигьдин девлетнакан Ужувлан хабар дебккуб. ⁹ Вари халкь гъапІу Аллагьди сифте бинайиан жиниди уьбхюрайи гьадму ляхнин гьякьнаан варидариз аьгъювалар арццру багъиш тувназуз. ¹⁰ Гьадму ляхнин метлеб: гьарсаб жюрейиинди арайиз удубчІвру Аллагьдин фагьум вари дюн’яйиъ айи Месигьдихъ хъугънайидарилантина аьршариъ айи аьхюдариз ва гьюкмариз гьамус ачмиш дубхьну ккунду. ¹¹ Му Дугъан ихь Агъа Иса Месигьдиинди тамам гъапІу гьаммишандин ният ву. ¹² Месигьдиъ саб духьну ва Гьадгъахъ хъугъну, ухьхьан, гучІ ктарди ва саб шак адарди, Аллагьдихьна гъюз шулу. ¹³ Гьаддиз, учву бадали узу аьзабарикк ккахъна кІури, ккун апІураза, юкІв макадабтІанай, дурар ичв адлувализ ву.

Месигьдин масанвал

¹⁴ Гьаддин бадали узу Адашдин улихь, кьамкьариинди ккарагури, дийигъназа. ¹⁵ Гьадгъухьан завариин ва жилариин гьарсаб тухми ччивар дисура. ¹⁶ Узу, Аллагьди Чан аднан булвалиан Чан Рюгьниинди ичв рюгь кьувватлу апІуз, ¹⁷ хъугъувалиинди ичв кІваъ Месигь учІвуз, ичв уьмрин ччивна шибритІ масанвал хьуз, ¹⁸ Аллагьдин вари гирами халкьдихъди учвура Месигьдин масанвалин яркьушнан, ярхишнан, ягълишнан ва деринвалин гъавриъ ахъуз, ¹⁹ учвуз инсандин фагьмиъ удрубшру гьадму масанвал аьгъю хьуз, ичв уьмур Аллагьдин тамамвалихьди абцІуз ккарагураза.

²⁰ Хъа, ухьуъ Чан кьувват гьяракатнаъ ипну, ухьу ккун апІрубтІан вая ккунийкІан, кІурубтІан гизаф артухъ тувуз Шлуриз, ²¹ гъит, Иса Месигьдилантина ва вари дюн’яйин хъугърударилантина гьаммишандиз наслариан наслариз ад ибшри! Амин.

Рюгьнан сабвал

¹ Узу, Агъайин тереф дибисна кІури дустагъдиъ айири, миннат апІуразачвуз: Аллагьди учвуз дих дапІнайи гъуллугъназ лайикь вуйиси яшамиш йихьай. ² Дамагъсузди ва гъюдалди гъузай, чиб-чпихьна сабурлуди ва масанди йихьай. ³ Вари кьувват жалб дапІну мясляаьтнахьди рюгьнан ичв сабвал йибтІай. ⁴ Рюгь сар ву, Месигьдин беденра саб ву ва, гьадрарси, Аллагьди учвуз дих дапІнайи умудра саб ву. ⁵ Сар Агъа, саб хъугъувал, ухьу вари штуан хьувалин метлебра саб ву. ⁶ Айир – сар Аллагь. Думу варидарин Адаш ву. Думу ихь варидарин зиин Алир ву, Дугъан ляхнар ухь’инди варидариинди ву, ва Думу ухьуъ варидариъ яшамиш шула.

⁷ Месигьди улупнайи кьадарниинди ухьуз гьарсариз хъуркьувал гъазанмиш апІуз шлу багъиш тувнахьуз. ⁸ Гьаддиз дибикІнура а:

«Чахъди кьадарсуз йисирар хъади,

Думу гъалибвалиинди кІакІназ удучІвну,

ва Чан адмийириз багъишар тувну».

⁹ «КІакІназ удучІвну» кІуру гафну мугагьназ Думу исина, жилин кІанакк йишвариз гъювал улупура. ¹⁰ Чахьди вари дюн’я абцІбан бадали аьршартІан зиина за Гъашир, гьадму исина Гъушур ву. ¹¹ Ари Гьадму ву багъишар Тувур: фужариз – вакилар хьуб, фужариз – пайгъамбрар, фужариз – Ужувлан хабар ктибтрудар, фужариз – хъугърударин аьхюдар ва мялимар хьуб. ¹² Мици, Аллагьдин гирами халкь, Месигьдин беден артмиш апІуз гъуллугъназ гьязур апІбан бадали, гъабхьну. ¹³ Му мици, ихь хъугъувалиъ ухьу вари саб хьайизкьан, Аллагьдин Бай аьгъю апІайизкьан, рюгьнаъ хъуркьувалихъна гъяйизкьан ва вари тамамвал Айириз – Месигьдиз ухьу ухшар шайизкьан хьибди.

¹⁴ Хъа думуган ухьу сарун лепйири ккалакьурайи ва гьар жюре каламарин микІарихь гьитнайи, инсанар улдугуз гъитри, аьмалдар кучІляхярикк ккахъру бицІидарси хьидархьа. ¹⁵ Эгер ккунивалиинди гьякь’вал кІури гъабхьиш, варибдин кІул вуйи Месигьдин хасиятназ ухшарди ухьу аьхю хьидихьа. ¹⁶ Гьадгъан кюмекниинди вари беден саб дубхьна ва гьар жюре аьлакьйири кибтІна, дидин вари паяри гьарсабди чаз улупнайиб тамам апІура. Гьамци вари беден аьхю ва масанвалиъ артмиш шула.

Йирси ва цІийи уьмур

¹⁷ Гьаци вуйиган узу Агъайин ччвурнахъан кІураза, тІалаб апІураза: ичІи фикрар айи аллагьсузарси яшамиш хьуб дипай. ¹⁸ Дурарин фагьум рюгьнан курвалиан ва юкІвар дициркънайивалиан мучІу дубхьна, дурар Аллагьди тувру уьмрихьан гьадатІна. ¹⁹ Дурар, инсанвалин лишан дудубгну, адрацІди, гьубкьу чиркишнаъ арсри, кьяппавалиъ ахьра.

²⁰ Хъа учвуз Месигь дици аьгъю гъахьундарчвуз. ²¹ Саб шак адарди, Дугъкан учвуз гъеебхьунчвуз ва, Гьадгъан терефкрар вуйивализ дилигну, учвуз гьякь’вал улупунчвуз, фицики гьякь’вал Исайиъ а. ²² Ичв йирси табиаьтдиз хас вуйи, улар йитІру кучІлин тямягьяри пуч апІурайи мугагьназдин уьмур гъибтуз учвуз улупнийи. ²³ Ичв фикир апІбан саягъ цІийи алапІай, ²⁴ Аллагьдин хасият – гьякь вуйи дюзвал ва гирамивал улупурайи цІийи табиаьт «алабхьай».

²⁵ Гъит гьарсари кучІал дипри ва жвуван багахь хьайидариз дюзвал йипри, гьаз гъапиш ухьу вари саб бедендин паяр вухьа. ²⁶ Хъял кубчІвнади гунагь мапІанай. Гъит ичв хъял ригъ алабхъайиз ккядябхъри, ²⁷ ичв уьмриъ иблисдиз йишв мутуванай. ²⁸ Шли гьитІибкІуйиш, сарун мигьитІибкІан, жвуван хилари гъазанмиш апІин ва адрудариз капІ.

²⁹ Гьич сабкьан ахмакь гаф мапІанай, ужуб рякъюхъ хъаъру ва хъпехърудариз хайирлу гафар йипай. ³⁰ Ккадаъру Йигъ гъяйиз учв’ин печать йивнайи Аллагьдин Гирами Рюгьназ гиран макадапІанай. ³¹ КІван гьарсаб кьутІкьливалихьан, хъял гъювалихьан, тюнтвалихьан, чІигъарихьан, люкьнар-агьрарихьан, гьар жюре хъял бисувалихьан азад йихьай. ³² Сар-сарихьна гьюрмат ади йихьай, учву Месигьдиъ саб гъахьиган Аллагьди учвлан фици хил алдабгънуш, учвура чиб-чпилан хил алдабгъури гъузай.

Аквнахь яшамиш шулайиси гъузай

¹ Аллагьдин ккуни веледарси, Гьадгъаз ухшар йихьай. ² Кабалгру ицци ниар адаури, Аллагьдиз Месигь Учв фици гъурбан гъахьнуш ва фици ухьу ккун гъапІнуш, гьаци масанди яшамиш йихьай.

³ Ичв арайиъ кьяппаваликан, вая жара чиркинваликан, ясана тямягькарваликан гафаркьан даришри – мурар Аллагьдин гирами халкьдиз хас дар. ⁴ Ичв ушвниъ гьич фицикІа лайикь даруб, ичІи улхуб вая кацІу зарафтар духьну ккундар, Аллагьдиз чухсагъул кІури гъабшиш, ужу шул! ⁵ Кьяппавалиъ ахъру гьич сар кас, я чиркин кас, я тямягькар (мицир идолариз икрам апІрурик гьисаб ву) Аллагьдинна Месигьдин Паччагьлугъдиъ ирснан эйси хьидар.

⁶ Гъит, зиихъ дупнайибдиз къаршу удучІвну, гьич сарира учву алдатмиш дарапІри, гьаз гъапиш мютІюгъ дарудари чпиина Аллагьдин хъял алапІура. ⁷ Мицдар адмийирихъди ичв фукІа уртахъуб дарибшри.

Аквнан баяр

⁸ Саб ухди учву мучІушин вуйчва, хъа гьамус, учву Агъайиъ саб вуйиган, акв вучва. Аквнан баярси яшамиш йихьай. ⁹ Хъа аквнан бегьер – гъянивал, дугъривал ва гьякьвал ву. ¹⁰ Агъайиз фу кьабулди шулуш, аьгъю апІури йихьай. ¹¹ МучІушнан бегьерсуз ляхнариъ иштирак махьанай, хъа дурар дюз дарувал улупай. ¹² Дурари жиниди апІурайидарикан пуз гьеле начра шулу. ¹³ Хъа вари жиниб аквнахь ачухъ хьибди. ¹⁴ Вари рябкъюри апІруб акв ву, гьаддиз гьамци кІурира а:

«Даахнайир, хъирг!

ДукІнайир, гъудужв!

Месигьди уву аквнакк ккаъди».

¹⁵ Лигайгьа, ахмакьарси яшамиш махьанай, хъа фагьумлуйирси. ¹⁶ Жвуван вахт ужуйи гьапІуз ял апІинай, гьаз гъапиш му йигъариъ гизаф писвал а. ¹⁷ ПчІу юкІв ади махьанай, хъа Агъа Аллагьдин ният фу вуш, гъавриъ ахъуз чалишмиш йихьай. ¹⁸ Ички гизаф мубхъанай, диди ягь-намус дубгуз гъитру, хъа Рюгьнахьди ацІай. ¹⁹ Чиб-чпихъди Мяълийирин китабдиан тярифнан ва рюгьнан мяълийириинди сюгьбатар апІинай. Ичв юкІвариъ Агъайиз мяълийир апІури, Дугъан ад апІинай. ²⁰ Ихь Агъа Иса Месигьдин ччвур дибисну, Адаш Аллагьдиз гьаммишан ва варибдихъан чухсагъул йипай.

Жилиринна хпирин аьлакьйир

²¹ Месигьдиз айи лап дерин гьюрматнаан чиб-чпиз мютІюгъ йихьай.

²² Учву, хпар, Агъайизси, ичв жиларизра мютІюгъ йихьай. ²³ Гьаз гъапиш Месигь фици Чан бедендин – вари хъугърударин – КІул ва дурар Уьрхрур вуш, жилирра чан хпирин кІул ву. ²⁴ Месигьдиз хъугърудар фици мютІюгъ вуш, ари хпарра чпин жилариз гьаци мютІюгъ духьну ккунду.

²⁵ Хъа учву, жилар, Месигьди Чахъ хъугърудар фици ккун гъапІнуш, ичв хпарра гьаци ккун апІинай. Дугъу, гафналантина штуъ марцц дапІну, гирами апІбан бадали, я миж, я камивал, ясана жара фукІа гьациб ктарди, швушвси, чпин вари аднаъди Чан улихь дерккну Чаз бахш апІбан бадали, тахсир ктру хъугърударин гирами Жямяаьт хьпан бадали, хъугърударихъанди Чан жан тувну. ²⁸ Гьаци жиларра, чпин жанар фици ккундуш, чпин хпарра гьаци ккун апІуз буржлу ву. Шлиз чан хпир ккундуш, дугъаз учв ккунду. ²⁹ Хъа мегьел чан жан даккнир гъахьундар, адми дидин гъайгъушнаъ шулу, думу тухъ апІури шулу. Гьаци Месигьра хъугърударин гъайгъушнаъ а, ³⁰ гьаз гъапиш ухьу Дугъан бедендин паяр вухьа. ³¹ «Гьаддиз адми, чан адашна дада гъитну, чан хпирик карсди, ва кьюрикан саб жан хьибди». ³² Мушваъ зурба вуйи сир а, узу кІурайиси, думу сир Месигьдинна вари хъугърударин аьлакьйирикан ву. ³³ Хъа учвуз кайиб, гъит гьар жилири, чаз учв ккуниси, чан хпир ккун апІри ва хпирира чан жилирин гьюрмат уьбхри.

Абйир-бабар ва бицІидар

¹ БицІидар, Агъайихъди гъягърудариз лайикь вуйиси, ичв абйир-бабарихъ хъпехъури апІинай – му дюзвал ву.

² «Уву бахтлу хьпан ва жилиин ярхи уьмур

хъапІбан бадали,

яв адаш-дадайиз гьюрмат апІин» –

му Аллагьди гаф тувнайи сабпи табшуругъ ву.

⁴ Адшар, ичв бицІидарик хъял макапІанай, хъа Агъайин тербияйихъдина насигьятарихъди ижмиди вердиш апІинай.

Эйсйир ва лукІар

⁵ ЛукІар, учву Месигьдиз мютІюгъ шлуси, вари юкІв хъипну, гьюрмат ади ва гучІ кади жилин ичв агъйириз мютІюгъ йихьай. ⁶ Дурариз учву ккун хьпан бадали, зиълан апІруси мапІанай, хъа юкІв хъипну, Аллагьдин ният тамам апІурайи Месигьдин лукІарси лихай. ⁷ Адмийирихъ лихурайиси ваъ, хъа аьршарин Агъайихъ лихурайиси юкІв хъади лихай. ⁸ Учвуз аьгъюганси, учв лукІ вушра – даршра, шли ужуб ляхин гъапІиш, гьарсаб ляхниз Агъайи пешкеш тувди.

⁹ Учвура, агъйир, лукІарихьна гьаци йихьай. ГучІар ккауб гъибтай. Учвуз аьгъюганси, ичвра, дураринра сар Агъа ву аьршариъ Айир, хъа Думу гьич саринра тереф бисрур дар.

Аллагьдин рукьан палат алабхьай

¹⁰ Аьхирки, Агъайиъ саб хьувалиъ, Дугъан удукьувалиъ ва кьувватнаъ ижми йихьай. ¹¹ Аллагьди учвуз тувнайи вари яракъ, иблисдин тІулариз къаршу дугъужвуз, алабхьай. ¹² Фицики ухьу дяви йиккканна ифдикан вуйи адмийирихъди гъабхурадархьа, хъа аьхюдарихъдина гьюкумдрарихъди, гьаму мучІушнан дюн’я хилиъ дибиснайидарихъди ва завариъ писвалин рюгьярихъди гъабхурахьа. ¹³ Ари гьаддиз, писвал алжабгъуз хъюбгъю йигъан учвхьан къаршу дийигъуз, ва кІул адабгъну гъузуз, Аллагьдин вари яракъ учвухьна бисай. ¹⁴ Юкьвнаан гьякьвал идибтІну ва дюзвалин рукьан палатдиъ учІвну, ижмиди дийигъай. ¹⁵ Ичв ликариин алахьрударра, дюн’яйиз Ужувлан хабар гъабхуз, гьязурди ишри. ¹⁶ Варибдилан гъайри, иблисдин цІа кайи чІимрар ктІуршвуз, хъугъвалин гъалхан ижмиди бисай. ¹⁷ Уьрхрувалин рукьан баккара улубкІай ва Рюгьнан ханжалра, яни Аллагьдин Гаф гъадабгъай. ¹⁸ Гьубкьу жюрейиинди ккарагай ва Рюгьнаъди учвуз ккуни вахтна Аллагьдикан тІалаб апІинай. Гьаци хьуз гьязурди ва Аллагьдин вари гирами халкьдихъан гьаммишан ккарагури гъузай.

¹⁹ Узу ушв абццубси, лазим гафар тувбан бадали ва Ужувлан хабарнан сир улихь гучІ ктарди ктибтбан бадали, узхъандира ккарагай. ²⁰ Узу гьеле гьаму зунжрариъ ашра, гьаддин гьякьнаан гьаънайир вуза. Узу лазим вуйибси дирбашди дидкан хабар дебккбан бадали, узхъан ккарагай.

²¹ Узу гьапІраш, Агъайиз дугъривалиинди гъуллугъ апІурайи йиз ккуни гъардаш Тихикди узкан вари пидичвуз. ²² Думу гьаддиз учвухьна, ич ляхнарикан ктибтуз ва ичв юкІварик аьшкь капІуз гьаърайир вуйиз.

²³ Гъит, гъардшар, мясляаьт, масанвал ва хъугъвал Адаш Аллагьдихьан ва Агъа Иса Месигьдихьан ибшричвуз. ²⁴ Зат аьхир адарди ихь Агъа Иса Месигь ккуни варидариз уж’вал ибшри.