Колосс

КОЛОССДИЪ ХЪУГЪДАРИЗ КАГЪАЗ

Римдин дустагъдиъ айи Павелихьди Рюгьну му кагъаз Колоссдиъ дугъаз аьгъдру хъугърудариз бикІуз гъитру. Колоссдиъ хъугърударин арайиъ, Иса Месигь Аллагьдин Бай дар, хъа малайикдиз ухшар адми ву, кІуру каламар удучІвуру. Дурарин арайиъ итІру хурагариз, машкврариз ва жугьдарин законар тамам апІбаз фикир туври шулу. Мидиз жаваб вуди, Гирами Рюгьну, Иса Месигь Фуж вуш ва Дугъу гьапІнуш, кІура: Думу Аллагьдин Бай ву; Думу вари хъугърударин, яни Чан Бедендин КІул ву; Думу варибдин ккергъувал ва ккудукІувал ву; Дугъу вари инсанарин тахсир Чаина гъадабгъну; Думу хачриин гъакІну ва ихь гунгьар себеб вуди ухьуз гьадабтІру жазайиккан Дугъу ккадаунхьу. Гьаму жюрейиинди Гирами Рюгь, Аллагьдихьан вуйи уьрхювал Къанундин ва диндин аьдатарихь дибтІру ва гьадрар хъаъру гьарсариз къаршу удучІвура. Месигьдихъ хъугънайир ичІи улхбар-рахбарихъ, кучІлин фикрарихъ хъугъну ккундар. Исайихъ хъугънайи адми Агъайиз ккуниси яшамиш хьуз Аллагьдин рягьимлували гъитра.

Месигьдиз лигурайиган, Аллагь рякъюрухьуз

¹ Аллагьдин амриинди Месигь Исайин вакил Павелихьан ва Тимофей гъардшихьан ² Колосс шагьриъ айи Месигьдихъди гьякь гъардшар вуйи Аллагьдин гирами халкьдиз – саламар. Адаш Аллагьдихьан учвуз уж’вал ва мясляаьт ибшри!

³ Учу гьаммишан учвхъан Аллагьдиз ккарагурайиган, ихь Агъа Иса Месигьдин Адашдиз баркалла кІурача. ⁴ Учуз Месигь Исайихъ ичв хъугъуваликан ва Аллагьдин вари гирами халкьдихьна вуйи ичв ккуниваликан деебхьначуз. ⁵ Учвуз аьршариъ ккилибгурайи умудну хъугъувал ва ккунивал арайиз хуру. Улихьди учвуз дидкан гьякьвалин гаф – Ужувлан хабар гъеебхьунчвуз. ⁶ Ужувлан хабар учвухьна гъафну. Учву, гьякьвали абцІнайи Аллагьдин уж’вал деебхьну, гъавриъ ахъунчву. Думу йигъхъанмина Ужувлан хабар, ичв арайиъси, вари дюн’яйиъ рабгъура ва диди чан бегьер хура. ⁷ Учвуз дидкан Эпафрасди гъапунчвуз. Эпафрас, ич масан гъуллугъчи, юкІв хъипну, учву бадали Месигьдин гъуллугънаъ айир ву. ⁸ Дугъу учвуз Рюгьну багъиш дапІнайи ичв масанваликан ктибтунчуз.

⁹ Магьа гьаддиз, учуз учвкан гъеебхьу йигъхъанмина, учвхъанди гьаммишан ккарагурача. Ккарагруган, Аллагьдин ният учвуз гьубкІну аьгъю хьуб ва Гирами Рюгьну туврайи гьарсаб фагьумлувалин учву гъаври ахъуб, ккун апІури шулча. ¹⁰ Учу гьацира, учву Агъайиз лайикьлуди яшамиш хьпан бадали, вари Гьадгъаз хуш вуйиси апІбан бадали, учву апІурайи гьарсаб ужувлан ляхниъ ужуб бегьер хьпан бадали ва учвуз Аллагьдикан аьгъюб артухътІан артухъ ибшри кІури, ккарагури шулча: ¹¹ гъит, учву гьаци хьпан бадали, Чан зурбавалина кьудратну учвуз сабурна ижмивал туври ва вари терефарихъанди учву мюгькам апІри; ¹² гъит Адашдиз, Дугъу учвузра Чан гирами халкьдихъди сабси аквнан Паччагьлугъдиъ йишв улупбаз, шадди чухсагъул йипри. ¹³ Дугъу ухьу мучІушнан гьюкмиккан ккадаъну, Чан масан Балин Паччагьлугъдиз гьаъну. ¹⁴ Гьадгъу ухьуз, гунгьарилан хил алдабгъну, азадвал тувунхьуз.

¹⁵ Гьадгъу дярякърайи Аллагь рякъюри ачмиш гъапІунхьуз. Думу Сарпир ву. Думу арайиз гъабхи варибдин Зииналир ву. ¹⁶ Фицики завариъ ва жилариин алиб, рябкъюрайиб ва дярябкърайиб: Паччгьарин тахтар, агъаваликк ккайидар, гьякимар ва гьюкмар – вари Гьадгъу халкь гъапІну, арайиз гъабхиб вари Гьадгъулантина гъабхьну ва Гьадгъаз кІури айиб ву. ¹⁷ Думу фукІа-мукІа хьайиз Айир ву. Гьадгъаъ варибдин сабвал ва къайда гъабхьну. ¹⁸ Гьадму ву Бедендин кІул, яна Аллагьдихъ хъугърударин Аьхюр. Варибдин эвел – Гьадму ву. Варибдиъ сарпирди хьпан бадали, гъачІидарикан чІиви гъахьи Сарпир Гьадму ву, ¹⁹ фицики Аллагьдиз, вари тамамвал Гьадгъаъ ади хьуб ккун гъабхьну. ²⁰ Дугъу, хачриин Чан аьжалилантина вари жилинубдихъди ва аьршаринубдихъди мясляаьт йибтІну, Чалантина Аллагьдихъди аьлакьайиъ тІаъну.

²¹ Ичв чІуру ляхнариланмина ухди гъярхьрайидар ва ул’ан идитнайидар, ²² гьамус Дугъу учву, жилиин гъабхьи Чан бедендилантина, Чан аьжалилантина учву Аллагьдин улихь гирамиди, тахсир ктарди, марцциди дерккбан бадали, Аллагьдихъди албагунчву. ²³ Учву мици, хъугъувалин ижми ва мюгькам бинайиин дугъужвну ва Ужувлан хабарну учвуз бахш дапІнайи умуднахъ хъади гъузиш, хьидичва. Думу Ужувлан хабарнакан учвуз гъеебхьунчвуз – аьршарин кІанакк вари халкь дапІнайибдиз дидкан хабар дебккна, ва узу, Павел, гьаддин гъайгъушнаъ айир вуза.

Павелин ляхнар – хъугърударин ужувлаз

²⁴ Гьамус узу учву бадали аьзабарикк ккуркьбиин шад вуза. Узу Месигьдин Беден бадали кьадар адру аьзабар аьгь апІурайир вуза. Дугъан думу Беден – Чахъ хъугърудар ву. ²⁵ Аллагьдин ният тамам апІбан бадали, узу думу хъугърударин гъуллугънаъ гъахьунза. Узуз Аллагьдин гафнакан гьубкІну учвуз хабар дебккуз амур дапІназуз. ²⁶ Думу Гаф агъзрар йисариъ вари насларихьан жиниди дюбхнайиб вуйи. Хъа гьамус думу Дугъан гирами халкьдиз ачмиш дапІна. ²⁷ Аллагьди думу сирнан вари хазна ва ад Аллагь аьгъдру халкьариз улупуз кІури ачмиш гъапІну. Дидин сир Месигь ухьуъ яшамиш хьувалиъ а. Месигь ихь гъюз ккайи адлувалин умуд ву. ²⁸ Ари Гьадгъукан учвуз, Аллагьдин улихь Месигьдихъди гьуркІну дугъужвуз шлуси, учхьан удубкьру фагьумлувалиинди, насигьят туври, аьгъювалар улупури, хабар дебккрача. ²⁹ Гьациб метлеб бадали узу, узуъ бегьемди артмиш шулайи Месигьди тувнайи кьувватниинди дяви гъабхури, жафа зигураза.

Месигьдихъди яшамиш йихьай

¹ Узу учвхъанди, Лаодикияйин хъугърударихъанди ва узу чпин улариз рякъюзкьан дяряркъдарихъанди фициб ижми дяви гъабхураш, учвуз аьгъяди ккундузуз. ² Йиз метлеб ичв юкІвариъ масанвалин сатІивал ва кІубанвал тІапІуб вуйиз. Масанвалин сатІивал ва кІубанвал аш, учвуз Аллагьдин сир, яна Месигьдикан вуйи аьгъюваларин гьубкІу девлет хьибдичвуз. ³ Хъа вари аькьюллувалин ва фагьмин девлетар Месигьдиъ а. ⁴ Узу учвуз му, гьич сарира уччву гафариинди учву ичв рякълан алдауз гъидритуз, кІурайиб вуйиз. ⁵ Бедендиинди учвухъди хътаршра, рюгьниинди учвухъди хъаза ва, Месигьдихъди ичв албагувал ва хъугъувал узуз рябкъруган, шад шулуза.

⁶ Гьаци вуйиган, эгер учву Месигь Иса ичв Агъади кьабул гъапІнуш, Гьадгъахъди сатІиди яшамиш йихьай. ⁷ Гьадгъаъ ччивар деетай, жвуван уьмур Гьадгъахъди хъапІай, учву айи хъугъвалиъ мюгькам йихьай ва учвуз гъапІу ужувлан гъадри кади гъузай.

⁸ Лигайгьа, гьич сарира, Месигьдихьан ваъ, хъа адмийирин аьдатарихьан ва гьаму дюн’яйин кьудратарихьан гъюру ичІи ва кучІлин фикрари учву чпин чулиинди дисуз мигъитанай. ⁹ Гьаз гъапиш вари Аллагьдин тамамвал Гьадгъаъ рябкъюри а. ¹⁰ Учвузра тамамвал гьякимарин ва гьюкмарин КІул вуйи Гьадгъаъди дурубкьначвуз. ¹¹ Гунагьнан хасият учвлан, палатси, уьлчІюбгъю Месигьди ичв суннат Чаъ гъапІну. Думу адмийин хилари апІурайибсиб суннат дар. ¹² Учву штуан хьувал учву Гьадгъахъди накьвдиъ иву мисал ву. Думу чІиви гъапІу Аллагьдин кьувватнахъ хъугъували Дугъахъди учвура чІиви гъапІунчву.

Адмийири дерккнайи къайдйирихъди мягъянай

¹³ Ухди учву, ичв гунгьариз ва суннат дапІну адрувализ дилигну, дийихнайидар, Аллагьдин халкьдик кахьри адайчва. Хъа гьамус Аллагьди учву Гьадгъахъди уьмрихьна кьяляхъ хътаъну. Дугъу ихь вари тахсрарилан хил алдабгъну. ¹⁴ Дугъу ухьуз къаршу вуйи къайдйир кайи китаб, хачрак кьумарихьди кабсну, жвартІ гъапІну. ¹⁵ Гьамци Думу, гьякимарихьан гьюкум, яракь тадабгъну, варидарин улихь беябур дапІну, дурариин Чан хачрахьди гъалиб гъахьну.

¹⁶ Гьаци вуйиган, гъит, гьич сарира учву ипІрубдиз ва убхърубдиз тягьнийир дириври ва учвхьан, машкврар, ваз цІийи алаувалар ва султ йигъар къайд апІури гъахьунчва, кІури, гьедрерхри. ¹⁷ Фицики му вари гъюз ккимбубдин гъарантутІан дар, хъа улариз рябкъювал Месигь ву! ¹⁸ МютІюгълуди хьуз ккунидари, малайикариз икрам апІрудари учвук тахсир кипруси мапІанай. Дурар чпин гьугъужвувалариъ ахьна. Давди, чпин фагьмиин элеъну, фурс апІура – думу гьаму дюн’яйинуб ву! ¹⁹ Аллагьдин ниятниинди вари беден аьхю хьпан бадали, табар-дюгьберихьди думу либхуз ва сатІи апІуз гъитрайиб – КІул ву. Сарун дицдар адмийирин КІулихъди аьлакьа имдар.

²⁰ Учву, Месигьдихъди дукІнайидар, му дюн’яйин кьудратарихьан азад вуйиган, дюн’яйиндариси, гьамци кІури, къайдйир гьаз уьрхюрачва: ²¹ «Мидик мукуркьан!», «Мунуб мипІан!», «Гьамунубдик мукучан!» ²² Гьаму вари гъадагъа дапІнайиб ишлетмиш апІруган, жвартІ шлу мутмйирикан къайдйирна аьдатар арайиз дуфнадарин? ²³ Диндин аьдатариз мютІюгъваликан, жвув гьадатІуваликан, бедендиз ккуниб дарапІуваликан кІуру гьамцдар къайдйир, зиълан гъилигган, фагьумлударси рякъюру. Амма дурари бедендин тямягьариз къаршу дийигъуз кюмек апІдар!

Ичв цІийи уьмур Месигьдихъди ву

¹ Аллагьди учву Месигьдихъди чІиви дапІнайиган, Аллагьдин арччул хилихъинди деънайи Месигьдихьинди, заваринубдихьна, ял апІинай. ² Заваринубдикан фикрар апІинай, хъа му дюн’яйинубдикан – ваъ. ³ Фицики учву дийихначва, хъа ичв уьмур, Месигьдихъди сабси, Аллагьдиъ жиниди а. ⁴ Ичв уьмур – Гьадму Иса ву. Думу гъафиган, учвура Дугъахъди адлуди гъидичва.

⁵ Гьаддиз, учву гьаму дюн’яйихьан дибиснайи учвуъ айиб вари: кьяппавал, чиркинвал, ктирсуз даршлу тямягьяр, асккан тямягьяр, кьискьисвал – гатІахьай. Мицдар тІулар идолариз икрам апІувал ву. ⁶ Вари гьамцдар тІулари чпиина Аллагьдин хъял зигура. ⁷ Улихьди, гьаци яшамиш шлуган, учвура гьацдар вуйчва.

⁸ Хъа гьамус думу вари: хъял, гъизгъинвал, даккнивал, люкьнар, лайикьсуз гафар – гатІахьай! ⁹ Чиб-чпиз кучІлар мапІанай, фицики учв’лан ичв йирсивал илдипунчва. ¹⁰ Учву ГъапІуриз ухшар айи, Аллагьдин гьякьвал аьгъяди, цІийитІан цІийи алапІурайи адмивалин цІийи халиъ учІвначва. ¹¹ Гьаци гъахьиган, грекна жугьуд миллетдин, суннат дапІнайиринна адрурин, варваринна скифдин, лукІранна азад вуйирин арайиъ фаркьвал адар. Месигь вариб ву, ва варибдиъ айир Гьадму ву!

Аллагьдихъ хъугърударин хизан

¹² Гьаддиз, Аллагьдин кадагънайи гирами ва масан вуйидариз лайикь вуйиси, учвура рягьимлувалин, язухъ зигувалин, юкІв айивалин, гъянивалин ва сабурлувалин палтар алахьай. ¹³ Эгер учвуз сар-сарикан гиран каш, сабурлуди аьгь апІури гъузай ва Агъайи учвлан хил алдабгъиганси, учвура хил алдабгъури йихьай! ¹⁴ Хъа гьацдар палтарин зиълан масанвалиндар алахьай. Фицики масанвали варибдикан тамам вуйи сатІивал апІуру.

¹⁵ Гъит, Месигьдин мясляаьтну ичв юкІвариз рякъ улупри, фицики Аллагьди учвуз дих гъапІунчвуз ва саб Бедендик, мясляаьт бадали, ктикьунчву. Гьаци апІузди баркаллагь кІури йихьай!

¹⁶ Гъит, учвуъ Месигьдин гаф булди яшамиш ибшри. Хъа гьадмуган учвхьан вари фагьум хъади чиб-чпиз аьгъювалар улупуз ва насигьятар тувуз хьибдичвухьан ва, рюгь баркаллагьну абцІну, Аллагьдиз юкІв абцІнайивалин Аллагьдиз мяълийир, тярифнан ва рюгьнан мяълийир апІуз хьибдичвухьан. ¹⁷ Вари ичв улхбарра, ичв ляхнарра Гьадгъулантина, Адаш Аллагьдиз чухсагъул кІури, Агъа Иса бадали апІинай.

Жарадарихъди цІийиди яшамиш йихьай

¹⁸ Хпар, ичв жилариз мютІюгъ йихьай, му Агъайин улихь ичв буржи ву.

¹⁹ Жилар, ичв хпар ккун апІинай ва дурариз писдар махьанай.

²⁰ БицІидар, варибдиъ ичв абйир-бабарихъ хъпехъури гъузай, фицики учву гьаци апІувал Агъайиз ккуниб ву.

²¹ Адашар, ичв бицІидарик хъял капІри махьанай, даршиш дурар аьжуз юкІвар айидар хьиди.

²² ЛукІар, ичв жилин агъйирихъ варибдиъ, кьюб маш гъяйидарси имбударин улхьан ваъ, хъа марцци кІваан ва Агъайин улихь гучІ кайивалиан хъпехъури апІинай. ²³ Учву фу апІури гъахьишра, вари ичв марцци кІваан, адмийиризси ваъ, хъа Агъайиз апІурайиси, апІинай. ²⁴ Фицики, Агъайи пешкешди ирс тувруб учвуз аьгъячвуз. Учву Агъа Месигьдин гъуллугънаъ ачва. ²⁵ Хъа шли чІурувал апІуруш, дугъаз, гъапІу чІурувализ дилигну, тувди. Аллагьдин улихь вари саб ву.

Насигьятар

¹ Учвура, агъйир, лукІарихъди дугъриди ва намуслуди гъузай. КІваинди гъибтай, ичв Агъара завариин ал.

² Гьаммишан ккарагури йихьай, ккарагруган, кІубанди йихьай ва чухсагъул кІури йихьай! ³ Гьацира, Аллагьди учуз Месигьдин сирнакан гаф рабгъбан урчІар арццбан бадали, учхъанди ккарагай. Гьадму сир ктибтруган, узу зунжрариъ аза. ⁴ Узуз дидкан аьгъювалар, узхьан удубкьрубкьан ужуди, ачухъди ва тамамди улупбан бадали, узхъанди ккарагай. ⁵ Жарадарихъди фагьумлуди гъузай, гьубкьу жюрейин мумкинвал ишлетмиш апІинай. ⁶ Гъит, ичв сюгьбатар гьаммишан кабалгрудар ва фагьумлудар ишри ва, гъит, гьардиз лазим вуйи жаваб бихъри.

⁷ Узкан вари хабрар Тихикди пидичвуз. Думу ихтибар али гъуллугъчи, узухъди Агъа бадали лихурайи йиз ккуни гъардаш вуйиз. ⁸ Узу думу учвухьна, ич ляхнарин хабрар кидитну, ичв юкІвар шад апІуз, гьаъраза. ⁹ Узу дугъахъди дугъри ва ккуни вуйи гъардаш Онесимра гьаъраза – думу ичвдарикан сар ву. Дурари учвуз, гьамшваъ шулайи варибдикан ктибтидичвуз.

¹⁰ Учвуз узухъди дустагъдиъ айи йиз юлдаш Аристархди, Варнавайин халуйин бай Маркди саламар хътаура. Дугъкан учвухьна тІалаб дурубкьначвухьна: эгер думу учвухьна гъафиш, думу кьабул апІуб ккун апІурача. ¹¹ Учвуз гьацира саламар хътаура Юстус кІуру лакІам хъайи Исайи. Аллагьдин Паччагьлугъ бадали жафа зигурайи жугьдарикан гьадрартІан хътарзухъ. Дурар узуз аьхю кюмек вузуз. ¹² Ичвдарикан саламар Месигь Исайин гъуллугънаъ айи Эпафрасди хътаура. Думу гьарган учвхъанди, учву тамамвалинна дугъривалин мюгькамвалиинди Аллагьдин ниятнахъ хъпехъури гъузри кІури, ижмиди ккарагура. ¹³ Думу учвхъанди ва Иерапольна Лаодикия шагьрарин хъугърударихъанди, гьяйиф дарди, аьхю жафайиинди лихбан узу шагьид вуза. ¹⁴ Учвуз ихь ккуни духтир Лукайи ва Демасди саламар хътаура.

¹⁵ Лаодикияйиъ айи гъардшариз, гьацира Нимфандиз ва дугъан хулаъ уч шлу хъугърудариз саламар йипай. ¹⁶ Му кагъаз учвухь гъурхиган, Лаодикияйин хъугърударизра урхуз шлуганси апІинай. Хъа учву Лаодикияйиан вуйи кагъаз урхай. ¹⁷ Ва Архипдиз йипай: «Лиг, увуз Агъайихьан гъабхьи гъуллугъ тамам апІури гъуз!»

¹⁸ Йиз хусуси хил’инди бикІураза: Павелихьан саламар. Йиз зунжрарикан кІваинди гъибтай. Гъит учвухъди Аллагьдин уж’вал ибшри!