ЮГЬАНДИН ШУБУБПИ КАГЪАЗ
Вакил Югьанди жикъи шубубпи кагъзиъ чан дуст Гайикан Ужувлан хабар рабгъури сиягьятназ удучІвнайидариз кюмек апІуб ккун апІурайи. Югьанди гьаму чан тІалабнаъ, кІваантІан Исайихъ хъугънайир, тмуну хъугърурихь тевиган, жвув заанди дидисну даккнивал улупура. Хъугърудар чпин вари ляхнариъ, иллагьки Иса Месигьдикан Ужувлан хабар рабгъбаъ, чиб-чпиз кюмек дапІну ккунду, кІуру фикир му Гирами Рюгьнан кагъзиъ кІулинуб ву.
11 Яшлу аьхюрихьан – узуз гьякьвалиъди ккун гъахьи, йиз багьа вуйи дуст Гайдиз.
2 Йиз масан дуст, увуз варибдиъ хъуркьувалар ва мюгькам сагъвал хьпан бадали ккарагураза, хъа уву Рюгьниинди сагъ вуйивал узуз аьгъязуз. 3 Гьамина гъафи гъардшари увкан, гьякьвализ яв аьгьтлу вуйиваликан ва яв дугъри уьмрикан ктибтиган, узу гизаф шад гъахьунза. 4 Узуз йиз веледар гьякь рякъюъди гъярайиваликан ебхьубтІан артухъ жара шад хабар адарзуз.
Пешкеш ва тягьна
5 Йиз масан дуст, уву гъардшарихъ зигурайи зегьметну, гьеле дурарин арайиъ мушв’ан дарудар ашра, яв дугъриваликан кІура. 6 Гъардшари яв масанваликан хъугънайидарин жямяаьтдин улихь ктибтнийи. Уву ужуб ляхин апІидийва, эгер дурарихьди чпин рякъ давам апІуз Аллагьдиз лайикь вуйи рякъ’ин алаънийиш.
7 Дурар Месигьдин ччвур бадали рякъюъ учІвна, ва хътругърударихьан фукІара кьабул гъапІундар. 8 Гьаци вуйиган, гьацдар касариз, гьякьвалин гъуллугънаъ хьпан бадали, ухьу хил гьачІабккну ккунду.
9 Узу хъугърударин жямяаьтдиз кагъаз гъибикІунза, хъа дурарин аьхюр хьуз ккуни Диотрефди, учу кІурайиб кьабул апІурадар. 10 Гьаддиз, эгер узу гъафиш, дугъу гьапІраш, ктибтидиза. Дугъу кьутІкьли гафариинди учук тахсрар кирчра, аммаки мидканра дугъаз гьубкІрадар. Дугъу ихь гъардшар хяларди кьабул апІурадар ва апІуз ккунидарихьди гъитрадар, дурар хъугърударин жямяаьтлугъдианра кмиди утІурккура!
11 Багьа вуйи дуст, писвалихьна магьачІаккан, хъа – ужувлахьна. Ужувлан ляхнар апІрур Аллагьдинур ву. Шли чІурувал апІураш, думу зат Аллагь аьгъю гъахьир дар.
12 Деметрикан варидари, гьякь рякъ’ин аливаликанра, ужуйи кІура. Гьацдар гафар дугъкан учура кІурача, хъа ич шагьидвал, увуз аьгъюганси, гьякь вуйич.
13 Хъана гизафубдикан узхьан увуз ктибтуз шуйзухьан, хъа кьалмииндина чернилиинди дици апІуз ккундарзуз. 14 Багарихьди уву машна-машди рякъюр кІури умуд кайиз, ва гьадмуган гафар апІидихьа. 15 Саламат ишриву. Вари дустари увуз саламар хътаура. Увура, ччвурар дидисну, вари дустариз саламар йип.