Тимофейиз-2

ТИМОФЕЙИЗ 2-ПИ КАГЪАЗ

Гирами Рюгьнуланмина Павели гъибикІу му кагъаз, гъилигу гьялариан, аьхиримжинуб ву. Му кагъаз Римдиъ гъибикІганси ву. Му кагъзиъра чаз аьгьтлу вуйи гъардаш Тимофейин ччвур кІваин апІура. Хъергуваларикк ккахъну, дустагъдиъ деънайи Павел суддихьна ва аьжалин жазайихьна гьязур шулайи. Иллагьки гьамциб вахтна дугъу чаз кюмек гъапІу ва чан вари уьмриъ хъугъвал алди гъахьи Аллагьдикан ктибтуз хъюгънийи. Павелиз аьжаликан гучІ ктайи, думу Месигьдихъди чазра гьаргандин уьмур ккилибгурайивалихъ ижмишнаан хъугънайи. Аммаки Исайин вакилиз хъугърударин гъюз имбу гележегдиз кюмекар дарапІди гъитуз ккундайи, фицики чаин улуркьстар аьзабарна хъергувалар дурариз ккилигурайиб дугъаз аьгъяйи. Гирами Рюгьну улихьмиди, гизафдар гьякьвалихъан хътакиди ва жвуван зиин Аллагьди аьхювал апІури дурариз ккун хьибдар, кІурайи. Гьаддиз Аллагьдин Рюгьну Исайихъ хъугънайидариз Месигь вари гьюкмартІан зиина вуйивал ва вари аьхюдарин Паччагь вуйивал кІваин уьрхюб, гьацира, улукьуз ккайи хъергуваларизна гучІар ккаъбаз дилигди, аьгьтлуди гъузуз дих апІура: «аьжал терг ГъапІуриинди, Ужувлан хабарниинди дюн’яйиз уьмур ва аьжалсузвал Гъабхуриинди, ухьу Уьрхрур – Месигь Иса гъюб’инди думу багъиш рябкъюри гъабхьну» (1:10).

¹ Аллагьди гаф тувнайи Месигь Исайиъди сатІи вуйи уьмур рабгъуз Аллагьдин ниятниинди гьаънайи Месигь Исайин вакил Павелихьан ² йиз ккуни вуйи бай Тимофейиз – уж’вал, рягьимлувал ва мясляаьт Адаш Аллагьдихьан ва ихь Агъа Месигь Исайихьан!

Баркаллагь пуб

³ Йиз абйириси марцци намусниинди узу гъуллугъ апІурайи Аллагьдиз, гьарсаб йиз ккарагбаъ уву кІваин апІруган, баркаллагь кІураза. Узу уву, ккарагури, зат сикин дарди, йигънура йишвнура уву кІваин апІураза. ⁴ Узхъанди уву удурзу нивгъар кІваин илмийиз, ва уву дяркъну, юкІв шадвали абцІуз ккунди, ктисурадарзу. ⁵ Сифте яв баб Лоидайин, хъа яв дада Евникайин кІваз гъафибсиб марцци яв хъугъувал кІваин апІураза. Му мициб хъугъувал увуз айивалин саб шак адарзуз. ⁶ Магьа гьамци, кІваин апІуразавуз: Аллагьди увуз тувнайи, ва узу хилар иливган, увуъ кабхьу гъуллугънан багъиш, чІиви цІа кади, убгури гъит. ⁷ Аллагьдин Рюгьну ухьуз гучІ туврадар, хъа кьувват, масанвал ва сагъ фикир тувру.

⁸ Гьаддиз, ихь Агъайикан ктибтуз нач мапІан, ва Гьадму бадали дустагъдиъ айи узхьан нач мапІан, хъа узухъди Ужувлан хабар бадали, уз’ин улукьнайи аьзабарин пай гъадабгъ. Фицики Аллагьди ухьуз Чан ужувлакан ктибтуз кІури кьувват тувна. ⁹ Дугъу ухьу ихь ляхнариз лигну дюрхнадар ва Чан гирами вуйи дихниинди ухьуз дих дапІнадар, хъа, Чан гьаци апІуз ккайивалин кьувватназ ва Чан зурба вуйи ужувлаз дилигну гьаци дапІна. Дугъу ухьуз, Месигь Исайиланмина думу багъиш, вахтар ккергъайиз улихьна дапІнайи. ¹⁰ Гьамус, аьжал терг ГъапІуриинди, Ужувлан хабарниинди дюн’яйиз уьмур ва аьжалсузвал Гъабхуриинди, ухьу Уьрхрур – Месигь Иса гъюб’инди думу багъиш рябкъюри гъабхьну. ¹¹ Гьадму Ужувлан хабар ктибтру вакилди, аьгъювалар улупрурди ва мялимди Аллагьди узу дерккну! ¹² Магьа гьамдиз дилигну, узу гьацдар аьзабар аьгь апІураза. Хъа узуз начди дарзуз! Узуз узу Шлихъ хъугънаш, аьгъязуз. Дугъу уз’ин илипнайи гьадму ляхин Аьхиримжи йигъ гъяйизкьан вари уьбхрувалик йиз гьич саб шакра кадариз.

¹³ Хъугъувал ади ва масанвал ади узкан увуз гъеерхьу дюз аьгъювалар увуз дарсар ишри. Дурар учуз Месигь Исайиъ гъидихъдар вучуз. ¹⁴ Яв хилиъ ивнайи вари ужуб ухьуъ яшамиш шулайи Гирами Рюгьнан кьувватниинди уьбх.

¹⁵ Асия уьлкейиъ, Гермогенна Фигелра кади, узхьан вари гьидицнайиваликан аьгъявуз.

¹⁶ Гъит Агъайи Чан рягьимлувал Онисефордин вари хуландариз улупри. Дугъу гагь-гагьнак йиз кІваз архаинвал хури гъахьну ва узу йитІнайи зунжрарихьан нач гъапІундар! ¹⁷ Учв Римдиъ айиган, дугъу узу, дихъайизкьан, гизаф агури гъахьну. ¹⁸ Гъит, Агъайи дугъаз гьадму Йигъан Чан уж’вал туври! Хъа дугъу узуз Эфесдиъ фукьан кюмек гъапІнуш, варидаризтІан увуз ужуйи аьгъявуз.

Хъугъувал али Месигь Исайин адми

¹ Гьаци, йиз бай, Аллагьдин ужувлаан кьувват адабцІ, думу ухьуз, Месигь Исайиъ сатІи вуйиган, туврайиб ву. ² Увуз узкан гъеебхьуб гизаф адмийирин улихь жарадаризра гьаци улупуз удубкьру хъугъвал али касарин арайиъ кидибт. ³ Месигь Исайин дугъри эскерси, яв пай аьзаб гъадабгъуз гьязурди гъуз. ⁴ Гьич сар эскерра хулан ляхнарихъ шулдар – дугъан вазифа, чан аьхюри гъапиб апІуб ву. ⁵ Я гьич сар талитчийиз, талитнан къайдйир гъючІюргъиш, пешкеш тувидар. ⁶ Гьаци нежберра ву: амкІ ккудубзури гъилиху дугъаз чан пай мягьсул сифте ражну дурубкьну ккунду. ⁷ Узу гъапибдикан фикир апІин – Агъайи варибдин гъавриъ ахъуз кюмек апІидивуз.

⁸ Давуддин тухмиан удучІву, дукІну чІиви гъахьи Иса Месигь кІваин апІин. Узу рабгъурайи Хабарнан мяна гьаддиъ а. ⁹ Гьадму Ужувлан хабар бадали узу балайикк ккахъназа, тахсиркарси, зунжрариъ аза. Хъа Аллагьдин Хабар зунжрариъ дибтІуз шлуб дар! ¹⁰ Гьаддиз узу, кадагънайидар бадали, Месигь Исайихъди сатІи вуйидариз, гьаммишандин адлувалра хъади, чпиз уьрхювал рубкьбан бадали вари аьгь апІураза.

¹¹ Гьаму гафар гьякь ву:

эгер ухьу Дугъахъди гъийихнуш, Гьадгъахъди яшамишра хьидихьа.

¹² Эгер аьгь апІураш, Дугъахъди паччагьвалра апІидихьа.

Эгер ухьу Дугъхьан гьудучІвиш, Думура ухьхьан гьудучІвиди.

¹³ Эгер ухьу дугъриди гъудрузиш, Думу дугъриди гъузди, фицики

Думу Учв Чахьан гьудучІвидар!

Аллагьди кадагънайи гъуллугъчи

¹⁴ Гьаму вариб адмийириз кІваин апІбаъ яваш ва инжик махьан. Аллагьдин улихь дурарикан гьюжаткарвал дебккуб ккун апІин. Дурарихъ хъпехърудариз, аьжалихъна хувалтІан, хайир адар. ¹⁵ Аллагь увкан разиди гъитруси, диш рякъди гъярайи касси, гьич сабдихьанра нач даршлу гьякьвалин гаф деебтури, яв хил’ан удубкьруб вари апІин. ¹⁶ Хъа ичІи ва аллагьсуз лягълягъярихьан гьудучІв. Фицики дурари адмийир Аллагьдихьан ярхла апІура. Чпин хътругърувалариъ дурарин хъуркьувалар артухъ хьиди. ¹⁷ Дурарин каламарра, кубчІвру аьзарси, даргъиди. Дицдарин арайиъ Филетна Гименейра ахьна. ¹⁸ Дурар гьякь рякълан улдугна. Дурари, гъийихдар чІиви духьна, кІура. Гьамци кІури, дурари сакьюдарин хъугъувал чІюбгъюра. ¹⁹ Хъа Аллагьди ккивнайи бин мюгькамди дийибгъна, ижмиб ву. Дид’ин гьамци кІури, лишан алабсна: «Аллагьдиз Чандар аьгъя». Ва хъана: «Гьарсари, Агъайин ччвур бисрури, гьич чІуруб дарапІри!»

²⁰ Аьхю хулаъ, гъизилинна арсранси, гакІвлинна ругдин гъабарра а. Гьюрматлуди ишлетмиш апІру багьа гъабарра а, аьдатнан гьяжатназ – ужуз гъабарра. ²¹ Вари чІурубдихьан марцц гъахьир гьюрматлу гъаб хьиди: дицир кас гирами дапІна; Эйсийи гьадму ишлетмиш апІиди, думу гьаммишан гьарсаб ужувлан ляхниз гьязурди гъубзди.

²² Жигьилвализ хас вуйи тямягьярихьан ярхла йихь ва, Агъайихьна марцци юкІвариинди илтІикІрударихъди сабси, дюзвалихьна, хъугъувалихьна, масанвалихьна, мясляаьтнахьна варидарихъди гьачІаркк. ²³ Ахмакъ ва абдал гьюжатарихьан ярхла йихь, увуз аьгъявуз: дицдар гьюжатар элегбариинди ккудукІуру. ²⁴ Агъайин гъуллугъчийиз гьюжатаригъ гъючІвуб лайикь дар. Думу варидариз гъюдлир ва ужур, аьгъювалар улупуз аьгъюр духьну ккунду. ЧІурувал кІваъ гъибтну ккундар, ²⁵ жвуваз къаршу удучІврур гъюдалди дюз алаъ. Белки Аллагьди дурариз гьякь’вал аьгъю хьпан бадали чпи гъапІубдиин швумал хьуз хъана мумкинвал тувур, ²⁶ дурарра хъиргди, ва, чан ниятназ мютІюгъ дапІну, иблисди йисирвализ гъадагънайи гьарсар азад хьиди.

Аьхиримжи йигъар

¹ Ва сабсана аьгъю йибхь, аьхиримжи вахтари гъагъи йигъар улуркьиди. ² Адмийириз, чпина пултІан ккунди гъубзидар, чпин тярифар апІрудар хьиди, хъюхъ дазабгну лицрудар хьиди, ушвниин чІуру гафар алидар хьиди; абйир-бабарихьна гьюрмат гъубзидар, чухсагъул кІурудар хьидар, инсанарин юкІвариъ гирамивал гъубзидар. ³ Адмийир юкІв адрудар, мясляаьтнахъна дяргърудар, футнакрар, сабур адрудар, инсафсузар, ужувлан душмнар, ⁴ масу туврудар, фикирсузди гьяракат кайидар, ацІу гафар кайидар хьиди, дурариз АллагьтІан кьукьар апІуб артухъ ккун хьибди. ⁵ Зиълан чпи Аллагьдихъ хъайиганси улупиди, хъа айтІан дурар Аллагьдин кьувватну дигиш апІидар. Гьацдарихьан ярхлади гъуз.

⁶ Дурарин арайиъ гьацдар адмийир аки, чпиина хъугъ’вал дубхну, жара хизанариъ учІврудар, дурари гъавриъ адру, гунгьари ккачІакІнайи дишагьлийир алдатмиш апІиди, хъа дишагьлийири гьадрарин гьубкьу жюрейин тямягьар гьуркІри хьиди. ⁷ Думу дишагьлийирихьан, дурарин дарсар гьаммишан урхури шулушра, гьич фицикІа гьякь абгуз хьибдар. ⁸ Мусайиз къаршу удучІву Янесна Янбресси, гьаму адмийирра маар адрудар, кучІлин хъугъувал айидар, гьякь’валихъди гьюжатариз гъудужврудар ву. ⁹ Хъа дурар чпин метлебарихъ хъуркьидар: дурар вари (Мусайихъди гьюжатнаъ гъахьидарси), ахмакьар вуйивал ачухъ хьибди!

Аьхиримжи насигьятар

¹⁰ Гьамус уву гьам урхбаъ, гьам уьмриъ, гьам метлебар кІулиз адагъбаъ, гьам хъугъувалиъ, гьам аьгь апІбаъ, гьам масанвалиъ, гьам ижмивалиъ, уз’ин Антиохияйиъ, Иконияйиъ ва Листрайиъ алахьу хъергувалариъ ва аьзабариъ узу кІуруб апІури гъахьунва. Гьаму вари хъергувалар узу аьгь гъапІунза, ва варибдиккан Агъайи узу ккадаъну! ¹² Месигь Исайихъди гирамиди яшамиш хьуз ккуни гьарсариз гьацдар хъергувалар ккилигура. ¹³ Хъа пис адмийирна алдатмиш апІрудар исина-исина кучІлин кьарнаъ арсди, дурари чпихъди имбударра алдатмиш апІиди.

¹⁴ Уву гьарган яв хъугъувал алибдихъди ва увуз улупубдихъди гъуз. Увуз аьгъявуз му вари увуз Шли улупнуш. ¹⁵ Гьеле бицІидимиди увуз Гирами китабар аьгъявуз, ва гьадму Китабари Месигь Исайихъ хъугъувалилантина уьрхювалихьна гъахру аькьюл тувунвуз. ¹⁶ Гьарсаб Гирами китаб Аллагьдин Рюгьниинди вуйиб вуйиган, думу хайирназ ву: Китабари, Аллагьдин адми ужувлан гьарсаб ляхниз гьуркІну гьязур хьпан бадали, аьгъювалар гъадагъуз, жиниди айи писвалар ачухъ апІуз, гъалатІар ктагъуз, дюз рякъюхъ хъауз кюмек апІура.

¹ ЧІивидаринна гъийихдарин суд апІуз гъюру Месигь Исайин ва Аллагьдин улихь ккун апІуразавукан (узу мици, Месигьдиз Паччагьлугъ айиган ва Думу багарихьди гъюрайир вуйиган, кІураза): ² Аллагьдин гаф рабгъ, рягьят вуйи ва рягьят дару вахтнара ижмиди гъуз, гъалатІар ктагъури апІин, жинивалар ашкар апІури гъуз, инсанарин рюгь за апІин ва сабурлуди аьгъювалар тув. ³ Гьациб вахт гъибдики: гьякь аьгъювалар улупбахьан гьудучІвиди ва, чпиз фу деебхьну ккундуш, гьаддихъ хъпехъуз тямягь ади, мялимар чпилан илтІикІуз гъитди. ⁴ Гьякь’вализна дюзвализ чпин ибар гьеркну, дурар, махъварихъ хъпехъбан бадали, дурарихьан гьидициди.

⁵ Хъа уву варибдикан марцци саягъниинди фикир апІин, гъагъивалар аьгь апІуз дубгъ, яв ляхин апІин – Ужувлан хабарнакан кидибт, яв гъуллугъ гьубкІну тамам апІури гъуз. ⁶ Хъа узкан хабар гъадабгъуруш, сарун йиз уьмур гъурбан апІрушв’ина дубхнайиси алиб ву. Йиз гъягъру вахт ву сарун. ⁷ Узу ужуйи женг гъубхунза ва узуз улупнайи вари манзил ккадапІунза, хъугъувал гъюбхюнза. ⁸ Гьамус узуз Агъайи, дюзвалин Судьяйи, гьадму Йигъан пешкеш тувди – узу гьякь апІиди, неинки узу, хъа Думу хъадакну гъюру Йигъаз масанвалиинди ккилигурайи гьарсар гьякь апІиди.

⁹ Узухьна ухди гъюз чарйир аг! ¹⁰ Фицики Демас узухъди гъузундар. Думу, чан юкІв гьаму дюн’яйиз тувну, Фессалоникдиз гъушну. Креск Галатияйиз гъушну, Тит – Далматияйиз. ¹¹ Узухъди сар ЛукатІан хътар. Увухъди Маркра хъади гъач, гьаз гъапиш, дугъу узуз йиз гъуллугънаъ гизаф кюмек апІури шулу. ¹² Тихик узу Эфесдиз гьаунза. ¹³ Уву гъюруган, йиз валжагъра гъадабгъ – думу Троадайиъ айи Карпдихь гъубзниз, йиз китабарра гъадагъ, гизафси гъидкьиндар.

¹⁴ Рукьан уста Эскендери узуз гизаф чІуруб гъапІунзуз. Гъит, Агъайи дугъаз, чан ляхнариз лигну, туври! ¹⁵ Хъа уву дугъхьан ихтиятди гъуз, думу яманди ухьу тувру вари аьгъювалариз къаршу гъедергури гъахьну.

¹⁶ Суддиъ узуз йиз тереф уьбхюри улхуз сабпи ражну мумкинвал тувиган, кюмекназ сар касра гъафундайи, варидари узу гатІахьну. Гъит му дурарин тахсир гьисаб дарапІри! ¹⁷ Хъа йиз кьяляхъ Агъа дугъужвнайиз. Ари Гьадгъу узуз, узлантина Ужувлан хабарнакан жугьуд дарудариз ктибтбан бадали, варидариз ебхьуз гъитруси кьувват тувунзуз. Дугъу узу асландин кІанччаригъян гъядягъну. ¹⁸ Агъайи узу гьарсаб чІурубдиккан ккадаиди ва, Чан Аьршарин Паччагьлугъдиз гъахуз кІури, уьрхиди. Гьадгъаз ибшри ад аьсрариан-аьсрариз! Амин.

¹⁹ Прискилайизна Акилайиз саламар йип, ва гьацира Анесифордин вари хуландариз. ²⁰ Эраст Коринфдиъ гъузну. Трофим, иццру гъахьир, Милетдиъ гъитунза. ²¹ Кьюрд хьайиз гъюз чара апІин! Увуз саламар хътаура Эвбули, Пудди, Линди, Клавдияйи ва вари гъардшари. ²² Гъит, яв рюгьнахъди ишри Агъа! Гъит, учвухъди Аллагьдин уж’вал ибшри!