Петрин-2

ВАРИ ХЪУГЪРУДАРИЗ ПЕТРИН КЬЮБПИ КАГЪАЗ

Кьюбпи кагъазра Гирами Рюгьну Петриинди БицІи Азияйиъ Исайихъ хъугърудариз дибикІнайиб ву. Душваъ кучІлин вакилар ачмиш духьнайи, ва дурарин фурслу улхбар-рахбари хъугърудар гьаму дюняйин тямягьярихьна зигурайи, дурар буш апІурайи. Дурари Исайихъ хъугърудариз тувнайи азадвал чпин чІуру ниятариз ишлетмиш апІурайи. Дурари гьаци Исайин ччвур биябур апІурайи ва Аллагьдикан кучІлях ктаурайи. Чахъ хъугърудар Чахъди гъахуз Иса кьюбпи ражарира гъиди кІури, Аллагьди тувнайи гаф дурари ибак апІурадайи. Гирами Рюгьназ БицІи Азияйиъ Аллагьдихъ хъугърайидар кучІлин вакиларихьан уьрхюз ва дурарин каламариз аьхир дивуз ккунди айи. Дугъу хъугърудариз шаклу дархьуз дих апІура, гьаз гъапиш кІвахънивалари хъугъвал ебцІуз гъитру. Гьамусдихъантина, Аллагьдиз ккуни уьмур хъапІри, дурари чпин умуд Месигьдик кади гъибтри.

Аллагьди ухьуз лазим вуйиб вари тувна

¹ ЛукІвал апІурайи Иса Месигьдин вакил Петрихьан – Аллагьди гьякь апІбиинди ва Уьрхрурин – Иса Месигьдин кюмекниинди ухьуз гъабхьибсиб багьа хъугъувал гъабхьидариз – саламар.

² Учвуз Аллагь ва ихь Агъа Иса аьгъю апІувалилантина гизаф ужувлар ва мясляаьтар ишричвуз!

³ Исайин Аллагьвалин кьувватну ихь уьмриз гьарсаб лазим вуйиб ва лап кІваантІан Аллагьдин гьюрмат уьбхрувал тувнахьуз. Му Чан хусуси адниинди ва Чав ужувлан ляхнар апІбиинди Учв ухьуз аьгъю хьувалилантина гъурубкьунхьуз. ⁴ Гьаму Касдиланмина ухьуз, гаф тувнайиси, варитІан багьа ва варитІан зурба ужувлар дурукьнахьуз. Дурар ухьуз, гьаму дюн’яйин тямягьяриланмина гъюру аьжалнахьан гьадрарин кюмекниинди учву ярхла духьну, Аллагьдин хасиятнак ктикьбан бадали, багъиш дапІнайидар вухьуз.

⁵ Гьаму себеб вуди, ичв хъугъувал – ужудар ляхнариинди, ужудар ляхнар – аьгъювалариинди, аьгъювалар – аьгь апІбиинди, аьгь апІуб – ижмишниинди, ижмишин – ужуб гьюрматниинди, ужуб гьюрмат – чвевалин дуствалиинди, дуствал – масанвалиинди мюгькам апІбан бадали, ичв вари кьувват жалб апІинай. ⁸ Эгер учвуъ гьамцдар хасиятар аш ва учву дурар зарб апІуруш, ихь Агъа Иса Месигьдикан вуйи ичв аьгъювалар дурари мянфяаьтсузди ва бегьерсузди гъитдар. ⁹ Хъа гьацдар хасиятар кадрур улихьишв дярябкърайир ва кур ву, чан мугагьназ кайи гунгьарихьан марцц духьнайивал кІваълан гьапІнайир ву. ¹⁰ Магьа гьамдиз, гъардшар, хъана аьхю кьувватниинди учвуз дих дапІнайивал ва учву кадагънайивал тасдикь апІинай. Гьамци апІури гъашиш, гьич саркьан алдакидарчва! ¹¹ Гьадмуган учвуз ихь Агъа ва Уьрхрур Иса Месигьдин гьаммишандиз вуйи Паччагьлугъдиъ учІвуз ихтияр жумартлуди багъиш дапІну хьибди, аьхир. ¹² Магьа гьаддиз йиз ният вуйиз учвуз гьамдикан гьаммишан кІваин алапІуз, гьеле учвуз гьаму варибдикан аьгъяшра ва учвуз дурубкьнайи гьаму гьякьвалиин учву мюгькам духьнашра.

Месигьдин аднан шагьидар

¹³ Сабан узу йиз гьаму бедендин халиъ яшамиш шули имбукьан гагьди, ичв фагьмиз мидкан кІваин алапІури, думу гьарган уягъ апІуз узу йиз буржи вуди гьисаб апІураза. ¹⁴ Узуз аьгъязуз, аьхир, гьаму йиз хал узхъан хътибтру вахт багахь шула – му узуз ихь Агъа Иса Месигьди ачмиш гъапІунзуз. ¹⁵ Узу гъушхъантинара ккуни вахтна учвхьан, гьамдикан кІваин алапІуз шлуганси, узу йиз хил’ан удубкьруб вари апІидиза.

¹⁶ Учу учвуз, ихь Агъа Иса Месигь кьудрат хъади кьяляхъ гъиди, гъапиган, учу шлин-вуш аьмалдар махъвар текрар гъапІундайча. Ваъ, Дугъан зурбавал учуз ич улариинди гъябкъюнчуз! ¹⁷ Дугъахьна «Му Йиз масан Бай вуйиз, Гьадгъаъ Йиз шадвал айиз» кІуру зурбавалин Аднан дих гъабхьиган, Дугъу Аллагь Адашдихьан гьюрмат ва ад кьабул гъапІну. ¹⁸ Ва гьаму дих завариан гъафнийи – учуз, Дугъахъди гирами дагъдиин алиган, ич ибариинди гъеебхьунчуз. ¹⁹ Миди ухьуз пайгъамбри гъапи гафар дюз вуйивал хъана артухъди улупура. Учву дурарин гафарихьна, Йигъ аку дубхьну ичв юкІвариъ гвачІиндин Хяд гьудудубчІвкьан гагьди мучІушнакк убгурайи чирагъдихьнаси янашмиш шулаш, ужуб апІурачва. ²⁰ Хъа сифтена-сифте кІваин гъибтну ккундуки, Гирами бикІбарин гьич сабкьан гъюз имбубдикан гаф адмийи ачмиш апІуз хъюгъну ккундар, ²¹ фицики адмийин ниятниинди гьич саб вахтнара пайгъамбрарихьан вуйи гъюз имбубдикан гафар гъахьидар дар. Ваъ, адмийири Аллагьдихьан гъюруб кІуйи ва дурар гьаддихъна Гирами Рюгьну хуйи.

КучІлин мялимар

¹ Мидлан савайи, халкьдин арайиъ кучІлин пайгъамбрар ачмиш гъахьиганси, ичв арайиъра кучІлин мялимар ачмиш хьидивучв. Дурарихьан аьжалихъна гъахру чпин кучІлин каламар арайиз адагъуз хьиди. Дурари чпи азадвал бадали кадагънайи Гьюкумдар (Агъа) тина апІиди. Дурар, Агъа кьабул дарапІбиинди, багарихьди чпи тІанкь апІувалихъна гъиди. ² Гизафдари дурари апІрусдар ягьсуз ва намуссуз тІулар апІуз дубгъиди ва гьацдариинди гьякь рякъ биябур апІуз йишв тувди. ³ Дурар ацІру касар дар. Дурар чпин иблис ва аьмалдар каламариинди учвлантина гизаф девлетлу хьиди. Аммаки, дурариз ухдитІан жаза гьадабтІну гьязурди а, диди кьан апІидар, ва дурарин аьжал даабхнадар!

⁴ Аллагьди гьеле малайикаркьан гьяйиф гъапІундар; дурари гунагь гъапІиган, жегьеннемдиъ дурар уржнийи ва гьаммишандин мучІушнан зунжрарихьди суддин Йигъ гъяйиз дитІнийи. ⁵ Дугъу лап кюгьне дюн’яра гьяйиф гъапІундар; гьякь’валикан хабар дебккри гъахьи Нюгьдилан ва дугъахъди хъайи ургур касдилан гъайри, гьюрмат адрударин дюн’я штухьди ккапІнийи. ⁶ Содом ва Гомора шагьрарра, гъюз ккимбу гьюрматсузариз мисал вуди, ккидирчну, рюкъдиз илтІикІну. ⁷ Хъа Дугъу дугъривалиинди яшамиш шулайи, ягьсуз уьмур хъапІрайи законсузариккан аьсси духьнайи Лут, гъюрхну. ⁸ Гьаму гьялал касдиз, гьамгъан дугъри гъяназ гьадрари апІурайи тІулар ерхьуб ва рякъюб гьар йигъан чакан кчІикьурайи зивзиварси гьугъужвуйи. ⁹ Намус ва гъир’ят айи касар Агъайиз читинвалариккан уьрхюз аьгъя, хъа гьякьсузар – суд апІру Йигъаз жаза адабтІуз уьрхюз аьгъя. ¹⁰ Дурарикан гизафна-гизафси, Агъайин гьюкум гьясбикк ккадарди, чпин жанариз ккунибси апІру чиркин тямягьярихъди гъягърударин язухъ ву!

Гьясбикк ккадру тІулар апІрудар ва эдеб адрудар, чпи аьршарин кьудратар биябур апІурайивалихьан гукІнидикьан адар. ¹¹ Агъайин улихь тахсрар кирчри, дурарилан улхурайи малайикарикьана, гьеле дурар адмийиртІан фукьан гизаф кьувватлудар ва удукьрудар вушра, дурар биябур апІурадар. ¹² Дурар сабдизтІан хай дару – дисуз ва йихуз пну бабкан шлу, чпин нефстІан аьгъдру фагьумсуз гьяйванатарсдар ву. Дурари варибдиз чпин фагьмихьан аннамиш апІуз даршлу агьрар апІуру. Гьадму гьяйванатарси дурарра йихиди. ¹³ Дурарин чпи гъапІу чІурувалариз – чІурувал’инди тувди. Дурариз йигъандин аквнахьди кефер хъауз меэлди ву. Дурар чпи ву кфирвал ва ужузвал. Дурари, учвуз кучІлин чулар ургъбиинди учвухъди саб суфрайихъ деъну, кьукьар апІура. ¹⁴ Дишагьли гъяркъюбси, дурарин улар кьяппавали ацІра, ва гьациб гунагьнахьан гьудучІвуз ккундар. Дурари, чпин дисру рукьариъ итуз, зяиф гъян айидар хъчІюхюри шулу. Дурарин юкІвар иблисвалихьди дидиржна. Дурарин кьисмат – пуч хьувал ву. ¹⁵ Дурар диш рякълан улдучІвну ва ургну. Дурар гунагькар ляхнар апІузди тувру пешкешнаъ ул абхъну гъушу Боросдин бай Валаамдин рякъюъди гъушну. ¹⁶ Думу Валаам, писвалар апІурайиган, чІал аьгъдру дажди, инсандин чІалназ дуфну, гъидиснийи, ва гьадму пайгъамбрин фагьумсузвал дебккнийи.

¹⁷ Дурар дерццнайи булагъар ву. Дурар, гужал микІари гьирчнайи кІару кьюкь-дифар ву! Дурариз гьаммишандин жегьеннемдин мучІушин ккилибгура. ¹⁸ Дурари чпин кьил ктру гафариинди, ичІи улхбариинди, гьуркІну удудукьру жандиз ккуни тямягьярин кюмекниинди, кучІлариъди яшамиш шулайидарихьан ярхла хьуз хъюгънайидар, чпихьна хъчІюхюру ва чпин бацаригъ чІюркьюру. ¹⁹ Дурари, чпи пуч шулайи лукІ’валиъ ахънайидари, дурариз азадвал тувуз гаф туври шулу. Фуж фтиз мютІюгъ шулаш, думу гьаддин лукІ шула. ²⁰ Эгер ихь Агъа ва Уьрхрур – Иса Месигь аьгъю хьувалиинди гьаму дюн’яйин чиркинваларихьан гьудучІвнайидар хъана гьадму чиркинвалариъ ахьиш, дурар хъана гьадрарин лукІ’валиъ ахьра. Сифте чпин чиркинвалариъ айибтІан, гьамус хъадахъну ахъуб – хъа яман ляхин ву. ²¹ Дурариз, гьякь Рякъкан аьгъю дубхьну, чпин хилиъ ивнайи гирами табшуругъарихьан гьудучІвайиз, дидкан зат аьгъю гъабхьундайиш ужу хьибдийи! ²² Дурарихъди гъабхьибди гьаму мисалнаъ дупнайиб дюз вуйиб улупура:

«Ху хъана чан ибичубдихьна хътабкуру»

ва

«Сил жибкІ – думу хъана батІриан идибгъиди».

Иса кьяляхъ гъиди

¹ Йиз ккунидар, узу бикІурайи кагъаз кьюбпиб вуйиз. Гьадму кагъзариъ узуз учву марцци фикрарихъна хуз ккунди азуз. ² Гьаци гъабхьиган, саб фила-вуш гирами пайгъамбрари гъапи гафар ва ичв вакилари учвухьна дурубкьнайи Агъайин ва Уьрхрурин табшуругъ кІваинди уьрхидичва.

³ Сифтена-сифте учвуз аьгъю дубхьну ккундуки, аьхиримжи йигъари чпин хусуси тямягьярихъди гъягъру рихшанд апІувалар арайиз гъиди. ⁴ Дурари, кялхъри, пиди: «Набши Дугъан, гаф тувнайиси, гъюрайивал? Магьа ич абйирра кивну архаин гъахьну, хъа вариб дюн’я халкь гъапІхъанмина чан гьаци ими». ⁵ Дурариз саб фила-вуш Аллагьдин Гафниинди жилар ва аьршар штукан ва штуинди халкь гъапІубдикан кІваълан гьархна. ⁶ Гьадму штариинди ккапІну дюн’я терг гъапІнийи. ⁷ Хъа гьамусдин аьршарна жилар, Аллагьдин гьадму Гафниинди цІа йивну ккидирчуз ва Месигьдихъ хътругъдар йихуз, суддин Йигъ хьайиз уьрхюра.

⁸ Йиз ккунидар, магьа фу учву кІваълан гьархну ккундарш: Агъайиз сад йигъ – агъзур йисси ву ва агъзур йис – сад йигъси. ⁹ Агъайи Чав гъапиб тамам апІуз, гьеле сакьюдари кьан апІура кІурашра, кьан апІидар. Гьатци, Думу ухьуз гъилигиган гизаф сабур айир ву, Дугъаз ухькан фужкІа дукІну ккундар, хъа вари, чпи гъапибдиин ва гъапІубдиин швумал духьну, Чахьна илтІикІну ккунду. ¹⁰ Хъа Агъайин Йигъ, тІафалси, хабарсузди гъибди. Гьадму йигъан аьршар-завар рахру гъугърумарин дихарихъди дургди; заварин табиаьтар даргъиди ва ургиди; дюн’яра, чан ляхнар улихь гьаъну, тахсирназ хибди. ¹¹ Ва эгер вари гьамци ккадахьуруш, хъа учву фицдар духьну ккунду, фициб гирамиб ва Аллагьдиз бахш дапІнайиб вуди ккунду ичв уьмур?! ¹² ЦІа алабхънайи аьршар ккадахьруган ва завариъ айи ригъар-хядар цІиъ ерцІруган, аьгь дарапІди ва тямягьниинди Аллагь гъюру Йигъаз, учву, гьацдар, фици ккилигуз ккачва?! ¹³ Ухьу, Дугъу гаф тувиганси, дугъривалтІан адру цІийи аьршариз ва цІийи дюн’яйиз ккилигурахьа.

¹⁴ Магьа гьаддиз, йиз ккунидар, учву Аллагьдихъди мясляаьтнаъ хьпан бадали, гьамци шлувализ ккилигбиинди марццидар ва гаф ктрудар хьуз чара зигай. ¹⁵ Хъанара, Аллагьдин гьадмукьан зурба сабур – учву уьрхюз мумкинвал туврайивал – ичв хайирназ вуди гьисаб апІинай. Мидкан Аллагьди чаз тувнайи фагьумлувалиинди вари чан кагъзариъ ихь масан гъардаш Павелира гъапнийи. ¹⁶ Дугъу мидкан чан вари кагъзариъ гъибикІнийи. Дурариъ гъавриъ ахъуз читин шей’арра а. Дицдар йишвар аькьюлсуз ва мюгькам дару адмийири, Гирами бикІбарин имбуну йишварси, чпин аьжалназ, айтІлан апІуру. ¹⁷ Хъа, йиз ккунидар, учвуз мидкан мугагьназра хабар айиган, намус адру адмийирин кучІлари учву чпихьинди хъчІючІюхюз ва ичв ижми бин ккидидипуз, ихтиятди гъузай. ¹⁸ АйибтІан артухъ ихь Агъа, Уьрхрур – Иса Месигь, ва Дугъан уж’вал аьгъю апІури, гьаддиъ аьхю йихьай. Дугъан ад ибшри гьамусси, гьаммишандин Йигъ гъафиганра. Амин!