Коринф-2

КОРИНФДИЪ АЙИ ХЪУГЪРУДАРИЗ 2-ПИ КАГЪАЗ

Коринфдиъ хъугърудариз вуйи Павелин сабпи кагъзи вари месэлйир гьуркІну гьял гъапІундайи. Думу кагъзин хъугърудариз вуйи тясир мянфяаьтлуб вуди гъабхьну, аммаки гьял дапІну ккуни жара суаларра арайиз удучІвнийи ва дурарра гьял дапІну ккундийи, гьаддиз кьюбпи кагъаз чарасуз лазим вуйи. Кагъзиан рябкъюрайиси, Павел Исайин вакил вуйивалихьна гьацІари сабан чпин тереф ачухъди улупнадайи. Коринфдиъ, Исайин вакилар вуча кІури, уччву улхбар-рахбар апІури лицурайи иблисари хъугърударикан сакьюдар чпин терефназдира кмиди хъчІюхнийи. Му кагъзиъ, сабан алахьу кучІлин вакиларихъди мягъянай, хъа дурари Исайикан ва хъугъуваликан кІуруб дикъатнаан ахтармиш апІинай, хъасин дурар фужар вуш, аьгъю хьибди, кІурайи Павели му Коринфдин хъугърударин гизаф гьяйифар зигурайивал рябкъюра. Гьатму терефнаан, сабпи кагъзиъ улупнайи насигьятар хъугънайидари фикриз гъадагъган, Павел разира духьнайи. Коринф агьлариз чан уьмрикан ктибтури, Павели Аллагьдин рягьимлувал кІваин хура, фицики, ляхнар фукьан гъагъидар ва писдар вушра, Агъайи дурар ужувлариз илтІикІуру.

Павели, Агъайиз баркаллагь кІури, Дугъан ад за апІура

¹ Аллагьдин амриинди Иса Месигьдин вакил духьнайи Павелихьан ва Тимофей гъардшихьан – Коринфдиъ Аллагьдихъ хъугърудариз ва Ахаяйин варишвариъ яшамиш шулайи Аллагьдин гирами халкьдиз.

² Аллагьдихьан, ихь Адашдихьан ва Агъа Иса Месигьдихьан мясляаьт ва уж’вал ибшричвуз!

³ Рягьимлувалин Адаш, ухьу ккаарцурайи Аллагь, ихь Агъа Иса Месигьдин Адаш ва Аллагь, гъит ужувлан аднаъ ишри. ⁴ Ихь гьарсаб читинвалиъ Дугъу ухьу ккарцура. Дердериъ ахьнайи жара адмийир ухьура гьаци ккарцбан бадали, Аллагьди ккарцурахьу. ⁵ Гьаз гъапиш, Месигь бадали ухь’ин алахьурайи аьзабар фукьан аьхюдар вуш, Месигьдиланмина вуйи ккарцувалра гьадму кьадар артухъ шулахьуз. ⁶ Уьмриъ уч’ин алахьурайи читинвалар, учву ккарцбан ва уьрхбан бадали аьгь апІурайидар вуйич. Учуз дурубкьнайи ккарцувал, учвура ккарцбан бадали, туврайиб вучуз. Диди, учу аьгь апІурайидарстар учв’инра алахьру аьзабар учвура кІубанди аьгь апІбан бадали, кюмек апІидичвуз. ⁷ Учвук ижми миж кайич, ва аьгъячуз: ич аьзабарин пай гъадабгъурайиси, учву ич ккарцувалинра пай гъадабгъурачва.

⁸ Узуз, гъардшар, Азияйиъ айиган уч’ин улукьу читинваларикан учвузра аьгъю дубхьну ккундузуз. Дурар гьадмукьан аьгь апІуз даршлукьандар вуйики, сарун учу чІивиди гъузур кІури, миж кимдайич. ⁹ Учу сарун чІивиди гъитур кІури хиял дайич, аьжал гьадабтІнайчуз, аммаки мици, учу учук ваъ, хъа гъачІидар чІиви апІру Аллагьдик миж кади гъузбан бадали, гъабхьиб вуйи. ¹⁰ Гьадгъу аьжалин хатІайиккан ккадаунчу, ва гьамусдихъантинара ккадаиди! Ич Гьадгъак миж кайич, учу уьрхиди кІури. ¹¹ Учву, ккарагури, учуз кюмек апІурачва. Гизафдар ккарагну, Аллагьди багъишар учуз гъапІган, гизафдари учхъанди чухсагъул пиди.

¹² Учу, гьаму дюн’яйиндарихъди, иллагьки учвухъди ич аьлакьйир, намуслуди ва дугъриди дерккри гъахьунча, – ич марцци намуснура гьаци кІура, – учу гьамдиинди тяриф апІурача. Му учуз Аллагьдихьан дурубкьнайиб ву. ¹³ Учу гъибикІубдик, дурхну, гъавриъ адрахъуб, гьич фукІара гъабхьундаричв. Ич гьубкІну гъавриъ ахъну, – хъа саб кьадар учву гьамустІанра ич гъавриъ ачва, – Агъа Иса Месигь хъадакну гъюру Йигъан, учу учв’инди тяриф апІурайиси, учвура уч’инди апІур кІури, йиз миж кайиз.

¹⁵ Гьаци шлуб аьгъяди, учвуз кьюбан уж’вал хьузди, сифте учвухьна гъюз ккунди азуз. ¹⁶ Македонияйиз гъягъюрайир учв’ин улукьуз ккайза, хъасин – кьяляхъ гъюрурра, ва гьадмуган узуз Ягьудияйиз гъягъюз кюмек апІидийчва. ¹⁷ Учву, узу мици фикир дарапІди дапІна, кІури, хиял апІурайчва? Ясана, фагьумсузди, узу гьадму саб гагьди «авра» «ваъра» кІурайиси?

¹⁸ Аллагьдин улихь тасдикь апІураза: узу учвуз кІурайиб саб гагьди «авра» «ваъра» кІури кІурадарза. ¹⁹ Учвуз узу, Сильванди ва Тимофейи хабар дебкку Аллагьдин Бали, Иса Месигьди саб гагьди «авра» «ваъра» кІурадар, Дугъаъ айиб гьарган «ав» ву! ²⁰ Аллагьди тувнайи вари гаф Иса Месигьдиъ тамам гъабхьну! Гьаддиз Аллагьдин ад бадали Гьадгъахъди сатІи духьнайидари «Амин» кІурача. ²¹ Учвура учура Месигьдиъ саб духьнайивал ижми АпІурайир Аллагь ву. Гьадгъан гъуллугънаъ хьуз Аллагьди ухькан ччим кадатна ²² ва Чан лишан уч’ин йивна. Ихь юкІвариъ Дугъу, гъюз имбубдин тасдикьвал вуди, Гирами Рюгь аъна.

²³ Узу гьамусдиз Коринфдиз, ичв язухъ апІури, гъафундайза, Аллагь шагьид ву. ²⁴ Учуз, ичв хъугъувалиин агъавал апІуз ккунди адарчуз, ваъ, учу апІурайиб вари, ичв шадвализ вуйич, гьаз гъапиш учву хъугъувалиъ мюгькамди дийигъначва.

Павелин насигьятар

¹ Гьаддиз, учву пашман апІуз кІури, сарун учвухьна дарфуз, кьаст гъапІунза. ² Эгер узу учву пашман гъапІиш, узлан пашман гъахьири узу шад дарапІди, сарун шли апІиди? ³ Узу гьатмунуб кагъаз, учвухьна гъафиган узу рази ктауз ккайидарилантина пашман дархьуз, гъибикІнийза. Йиз шадвал – ихь вардин шадвал вуйивалик саб шак кадариз. ⁴ Учвуз думу кагъаз нивгъар рузури, юкІв гъагъиди, кІваъ дерд ади гъибикІнийза. Йиз метлеб учву пашман апІуб дайиз, хъа узуз учву фукьан масанди вуш, учвуз аьгъю хьпан бадали, гъибикІнийза.

⁵ Узу пашман гъапІури, неинки узу, хъа, сацІиб вушра (му йиз заанвал дариз), учву вари пашман гъапІну. ⁶ Сарун дугъаз гизафдарихьан гъурубкьу жаза чІяаьн ву. ⁷ Хъа гьамус, хил алдабгъну, думу ккарцай, дердну ккагъуз мигъитанай. ⁸ Миннат вуйиз, дугъаз ичв масанвал улупай. ⁹ Гьацира узу думу учвуз, варибдиъ учву хъпехъури шулуш, ахтармиш апІури, гъибикІуб вуйиз. ¹⁰ Учву хил алдабгъурилан узура алдабгъидиза. Хъа узу хил алдабгъурилан, эгер думу касдиз хил алдабгъуз ужуб фукІа аш, Месигьдин улихь учву бадали алдабгъуб вуйиз, ¹¹ иблисди ухьу алдатмиш апІуз гъидритузди, хъа дидин ниятар ухьуз ужуйи аьгъяхьуз.

¹² Узу Троадайиз Месигьдикан Ужувлан хабар рабгъури гъафиган, Агъайи душваъ ляхин апІуз раккнар арццунзуз. ¹³ Аммаки узхьан архаинди гъузуз гъабхьундарзухьан, фицики душваъ хъугъвалиъ йиз гъардаш вуйи Тит адарди гъахьну. Магьа гьаддиз Троадайиъ хъугърудариз баркаллагь дупну, Македонияйиз гъушунза.

¹⁴ Учу, Месигьдиъ саб духьнайидар, хъуркьувалиинди гьаммишан улихь гъахурайи ва варишвариъ учлантина ширин ниар адаурайи аьгъювалар Дугъкан рагъурайи Аллагьдиз чухсагъул. ¹⁵ Гьаз гъапиш, уьрхювалин ва аьжалин рякъюъди гъярайидарин арайиъ, Месигьди Аллагьдиз ургурайи гьадму ширин ниар, ари учу вуча. ¹⁶ ГьацІариз учу – аьжал хурайи, хъа гьацІариз – чІививал хурайи ширин ниар вуча. Гьаци ляхин шлихьан апІуз шул?! ¹⁷ Учу, гизафдарси, хайир бадали, Аллагьдин Гафнак камк кипрадарча. Месигьдихъди саб гъахьихъанмина, учу, Аллагьди гьаънайидари, Аллагьдин улихь марцци кІваан, ктибтурача.

ЦІийи Йикьрарнан гъуллугъчйир

¹ Учу ич тяриф апІури, хъана таниш хьухьахъа? Имбударизси учузра, учвухьна гъюз ясана учвхьан гъягъюз учу лайикьлу адмийир ву, кІуру кагъзар гъадагъуб, рубкьурайинхъа? ² Учву вучва ич кагъаз – ич кІваъ дибикІнайи, вардиз аьгъю ва варди урхурайи кагъаз. ³ Учву, чернилиинди ваъ, хъа Аллагьдиз вуйи ич гъуллугъниинди, чІиви Аллагьдин Рюгьниинди, гъванарикра ваъ, хъа инсанарин юкІварик дибикІнайи Месигьдин кагъаз вуйиб, варидариз рябкъюра.

⁴ Месигьдилантина Аллагьдин улихь вари якьин гьаци вуйибдик саб шак кадарич. ⁵ Му мици, ич гьунарниинди гъабхьиб ва учу гьаци кІурайиб дарич. Ич гьунар вари Аллагьдихьан вуйич. ⁶ Дугъу учкан, ЦІийи Йикьрарнан гъуллугънаъ хьуз, гъуллугъчйир ктаъну. Думу Йикьрар – дидикІнайи гьярфар дар, ваъ, хъа Рюгьнахьан ву. Фицики гьярфну йикІуру, хъа Рюгьну уьмур хуру.

⁷ Гъвандиъ гьярфариинди адабтІнайи Къанундиз апІури гъахьи гъуллугъ кІваин апІинай. Думу гьациб адниинди дебккнайиб вуйики, Израиларихьан Мусайин нур туврайи машназ, гьеле нур кьаназ гъубзундаршра, лигузкьан гъабхьундайи. Аьхириъ аьжал гъабхи му гъуллугънаъ хьувал гьамкьан адлу ляхин вуйиш, ⁸ хъа Рюгьну гъуллугъ апІрувал фукьан адлу шул? ⁹ Эгер инсан тахсиркар апІру гъуллугъ гьациб адлу вуйиш, хъа инсандикан тахсир ктипурайи гъуллугъ фукьан адлуб шул! ¹⁰ Думугандин адлувал швнубсаб ражари артухъ вуйи адлувалихь тевиган, гьамус думукьан адлуди гьибгърикьан дар. ¹¹ Эгер вахтназ вуйи ад гьаци аьхюб вуш, хъа фукьан аьхюб шул гьаргакдиз вуйи ад!

¹² Гьаци вуйиган, ухьуз ухьук кІубанвал капІру умуд ахьуз ¹³ ва ухьу, Израилариз ктІубшвурайи адлувал дярябкъбан бадали, Мусайиси маш элебкну, лицурадархьа. ¹⁴ Хъа дурарин фагьумра элебкнайи. Гьамусра, Йирси Йикьрар урхруган, гьадму чарч кІул’ин илипурами, гьаз гъапиш думу чарч МесигьдихьантІан алдабгъуз шлуб дар. ¹⁵ Гъийин йигъазкьан, Мусайилантина дебккнайи Къанун урхруган, жугьдарин юкІвар элеркну ими. ¹⁶ Хъа адми Агъайихьна илтІикІруган, дугълан думу чарч алдабхъуру. ¹⁷ Агъа – Рюгь ву, хъа Агъайин Рюгь наан аш, гьадушваъ азадвалра а! ¹⁸ Ухьуз варидариз ачухъ машнаан гюзгдианси Агъайин адлувалин нур рябкъюрахьуз ва Гьадгъаз ухшар дигишра шулахьа. Дугъан ад ухьуъ артухъ-артухъ шула, фицики думу Агъайихьан гъюрайиб ву, хъа Думу – Рюгь ву!

Рюгьнан хазна

¹ Му гъуллугъ учуз Аллагьди Чан ужувлиинди тувнайиб ву ва юкІв дар гъабхьундарич. ² Учу нач шлу, намус ктру ляхнар тина апІурача. Учу сабанра аьмалдар тІулар ва Аллагьдин гаф дацІабкну апІдарча. Учу гьякьнакан хабар дебккрача, ва гъит гьарсар касди, чан намусназ дилигну, Аллагьдин улихь учуз кьимат туври. ³ Эгер учу туврайи Хабар шлихьна рубкьурадарш, думу аьжалихьна гъягъюрайихьна рубкьурадар. ⁴ Гьаму дюн’яйин аллагь-иблисди хътругърударин фагьум, Чаъ Аллагь ачмиш апІурайи Месигьдин адлуваликан вуйи Ужувлан хабарнан акв дярябкъюз, кур апІура. ⁵ Учу ичуб ктибтури адарча, хъа Иса Месигь Агъайин Хабар ктибтурача, ва Месигь бадали ичв гъуллугънаъ айидар вуча. ⁶ Гьаз гъапиш «МучІушнаан, гъит, акв удубчІври», – гъапи Аллагьди, Иса Месигьдин машниин рябкъюрайи Аллагьдин аднакан аьгъювалар туври, ич юкІвар аку апІура.

⁷ Учу гьамциб хазна ругдин гъабариъси, уьбхюрача. Му ккудудубкІру кьувват, ич ваъ, хъа Аллагьдин вуйиб улупурача. ⁸ Вари терефарихъанди учу чІюркьюра, амма дюргънадарча. Учу миж кимдру гьялнаъ ача, амма умуд кадабтІнадарич. ⁹ Учухъ хъергри шулу, амма ул’ан идитнадарчу. Бегьем дурччвначу, амма йивну дукІнадар. ¹⁰ Исайин уьмур учуъ арайиз гъюбан бадали, Дугъан аьжал гьаммишан ич бедендиъ айич. ¹¹ Учу чІивидимиди Исайилантина гьарган аьжализ туврачу. Исайин уьмур ич аьжал хъайи жанариз гъюбан бадали аьжалин улихь дийигънача. ¹² Уьмри учвуъ чан ляхин тамам апІбан бадали, аьжали учуъ чан ляхин апІура.

¹³ Учуъ хъугъвалин рюгь айиган, «Узу хъугъунза ва кІурира аза» дибикІнайиси, учу хъугърача ва гьаддиз кІурира ача. ¹⁴ Учуз аьгъячуз: Агъа Иса Месигь чІиви ГъапІури, Исаси учура чІиви апІиди ва учвухъди сабси учура Чан улихь дерккди. ¹⁵ Му вари, артухътІан артухъ инсанар ужувлакк ккаърайи уж’вали Аллагьдин адлувализ хъана артухъ чухсагъул пубан бадали, учвуз вуйи уж’вал ву.

¹⁶ Гьаддиз учу ккагънадарчу. Гьеле учу ликрилан алдахънашра, хъа айтІан йигълан-йигъаз таза шулача. ¹⁷ Фицики ич пчІу ва вахтназтІан дару аьзабари учуз артухъ ва гьаммишандиз вуйи адлувал хура. ¹⁸ Учу рябкърубдиз лигурадарча, хъа – дярябкърубдиз, гьаз гъапиш улариз рябкъруб вахтназтІан дар, хъа дярябкърайиб – гьаммишандиз.

Хъугъувалин табшуругъарихъди яшамиш йихьай

¹ Учуз, жилин уьмрин паж терг гъапІиган, аьршариъ гьаргандин хал – адмийирин хилари ваъ, хъа Аллагьди арайиз хру хал ккилибгурайиб аьгъячуз. ² Сабан, ухьу гьамушв’ин илмиди, ухьу аьршарин гьадму палтар фила алахьуйкІан кІури, гъагъи угьтар алдахьури, ккилигурайидар вухьа! ³ Думу палтар алахьган, ухьу гъяцІалди гъузидархьа. ⁴ Хъа сабан ухьу, ихь гьаму жилин пажакк ккимиди, гъагъи угьтар алдахьури гъуздихьа. Ухьуз читинди вухьуз, гьаз гъапиш ухьуз гъяцІалди гъузуз ккундархьуз, аьжал хъайиб вари уьмри хътІюбкьбан бадали, палтар алахьуз ккундухьуз. ⁵ Гьаци апІбан бадали Аллагьди ухьу халкь дапІна. Дугъу Чан гаф тамам апІрувалин лишан вуди ухьуз Чан Рюгь тувнахьуз.

⁶ Гьаддиз, гьеле сабан ухьу жвуван хулаъси бедендиъди Агъайихьан ярхлади ашра, архаин вухьа, ⁷ фицики ухьу улариз рябкъюри ваъ, хъа хъугъну яшамиш шулахьа. ⁸ Гьаци вуйивал аьгъяди, архаин вуча ва, жвуван беден дипну, Агъайихьна гъягъюз ккундийчуз. ⁹ Гьаддиз ич метлеб, учу бедендиъ ашра – адаршра, Агъайиз ккуниб апІуб вуйич. ¹⁰ Фицики Месигьдин Суддиз гъюб ухьуз варидариз алабхъиди ва бедендиъ имиди ухьу гъапІу гъяни ва пис ляхнариз дилигну, гьаруриз рубкьруб тувди.

¹¹ Гьаддиз лигну, Агъайихьан гучІурачуз ва думу гучІ жарадаризра улупурача. Учу фужар вуш Аллагьдиз ужуйи аьгъя. Ичв намусназра учу фужар вуш, гьаци ужуйи аьгъя, кІури, хиял вуйиз. ¹² Учу ичв улихь ич тяриф апІури хъана таниш шуладарча, хъа учвхьан, айтІанубдикан дарди, зиъланубдикан тяриф апІрударин улихь, саб гучІ адарди, учкан тяриф апІуз шулучвхьан. ¹³ Шли учу фикрихъан душна, кІураш, Аллагь бадали гьаци духьнача. Хъа эгер учу ужуйи фикир апІураш, мици учву бадали апІурача. ¹⁴ Месигьдин масанвали гьяракатнак китнайидар вуча, варидарихъанди Месигь гъакІнуш, гунгьар дарапІуз вари дийихнайивалин саб шак адарич. ¹⁵ Думу варидарихъанди, гьамус яшамиш шулайидар чпи бадали ваъ, хъа чпихъанди жан Тувур ва чІиви Гъахьир бадали яшамиш хьуз, гъакІну.

¹⁶ Гьаци вуйиган, сарун учу адмийин фагьмиинди саризра лигури имдарча. Мугагьназ Месигьдиз гьаци лигуйча, сарун – ваъ. ¹⁷ Гьаддиз, Месигьдик кидикьнайир, цІийиди бабкан духьнайир ву. Йирсивал имдар, цІийиб дуфна! ¹⁸ Хъа му вари Месигьдиланмина учу Чахъди албагу Аллагьдихьан ву, ва имбударра Чахъди албагбан гъуллугъ Дугъу учуз тувна. ¹⁹ Яни Аллагьди, Месигьдиланмина Чаинди вари дюн’я чпи гъапІу гунгьариз дилигди, албагну. Ари гьаму албагбакан Хабар дебкк дупначуз. ²⁰ Гьаддиз лигну учу Месигьди кадагъну гьаънайидар вуча, фицики учлантина Аллагь адмийирихъди улхура. Гьаддиз Месигьдин ччвурнахъан миннат апІурача: Аллагьдихъди албагай! ²¹ Гунагь ктру Месигь Аллагьди ихь гунгьарихъанди гъурбан гъапІну. Аллагьди гьаци, Чан улихь ухьу, Месигьдихъди саб духьну, гьякь хьуз кІури, гъапІну.

Уьрхюз шлувалин вахт дуфна

¹ Аллагьдин гъуллугъчйири, учу, учвкан ккун апІурача: учвуз багъиш дапІнайи Аллагьдин уж’вал, гьавайиб дарибшри. ² Дугъу гьамци кІура, аьхир:

«Ужуб вахтна Узуз яв дих гъеебхьунзуз,

ва уьрхру йигъан Узу увуз кюмек гъапІунза».

Лигай, гьаму вахт ужуб вахт ву, гъийин йигъ уьрхру йигъ ву!

³ Учу, ич гъуллугънаъ тягьна шлуси, шлиз-вуш лик хъипрадарча. ⁴ Учу Аллагьдин гъуллугъчйир вуйивал варибдиъ улупурача: зурба сабурнаъ, бедбахтвалиъ, фукІа гьубкІну адрувалиъ, читинвалиъ, ⁵ учу урччвруган, дустгъариъ итруган вая гъалабулугъариъ уч’ин жарадар алаъруган, гъагъи ляхнариъ, йишвну нивкІ адрувалиъ, гаш’валиъ, ⁶ марццивалиъ, аьгъювалариъ, гъюдливалиъ, уж’вал апІбаъ, Гирами Рюгьнан хиликк хьувалиъ ва кІваантІан вуйи ккунивалиъ, ⁷ гьякь гафнаъ, Аллагьдин кьувватнаъ, гьякьвалин яракь гагул ва арччул хилиъ, ⁸ ич аднаъ ва беябурвалиъ ккунивалинси даккнивалинра тягьнийириъ. Учкан кучІляхяр кадаъна, хъа дугъри вуча. ⁹ Учу саризра аьгъдрударси гьисаб апІура, хъа варидариз учу аьгъя. Учу дийихна, кІури, гьисаб апІура, хъа чІивиди ача. Учуз жазйир гьадатІури шулу, хъа йивну дийихнадар. ¹⁰ Учу дердерикк ккитри шулу, хъа гьарган шадди вуча. Касибди вуча, хъа гизафдар девлетлу апІурача. ФукІа адарчуз, хъа вари хилиъ айич.

¹¹ Коринф агьлар, учу учвуз варибдикан ачухъди гъапунча. Учу ичв улихь юкІвар арццунча. ¹² Учуз учву гьаци ккундучузки, хъа учву учу ккун апІурадарчва. ¹³ Узу учвуз йиз гъахи веледаризси кІураза: учву учуз ичв юкІварра арццай!

¹⁴ Хътругърударихъди саб юрккгъиъ кІул мииванай. Гьякьлувална нягьякьвал сатІи шулин? Аквна мучІушин сатІи шулин? ¹⁵ Месигьдин Велиарихъди (иблисдин ччвур) аьлакьа хьуз мумкин вуйин? Ясана хъугърурна хътругърур саб шулин? ¹⁶ Аллагьдин хална идолар саб вуйин? Ухьу – чІиви Аллагьдин хал вухьа, фицики Аллагьди ухькан гьамци гъапну:

«Узу дураригъ яшамиш хьидиза,

Узу дурарин арайиъ лицидиза,

Узу дурарин Аллагь хьидиза,

хъа дурарикан Узуз халкь хьиди».

¹⁷ «Гьаддиз дураригъян гъюдучІвай

ва жара йихьай, – кІура Агъайи, –

чиркинубдик мукучанай,

хъа Узу учву кьабул апІидизачву».

¹⁸ «Узкан ичв Адаш хьиди,

ва учвкан Йиз баярна шубар хьиди», –

кІура вари Чан хилиъ айи Агъайи.

Павелин шадвал

¹ Гьаци вуйиган, йиз ккунидар, гъачай, ухьуз ужувлар хьуз гьамциб гаф тувнайиган, ихь беденна рюгь чиркин апІру варибдихьан марцц дапІну, Аллагьдин улихь аьхю гукІнивал ади, гирамиди яшамиш хьуз улихь гъягъидихьа.

² Учуз ичв юкІвар арццай! Учу саризра гиран ктапІундарча, саризра зарар тувундарча, сариканкьан ич хайирназ мянфяаьт ктабгъундарча. ³ Узу му учвуз тягьна вуди кІурайиб дариз, ваъ, учву ич юкІвариъ ачва, учу учвухъди яшамиш хьузра, йикІузра гьязур вуча кІури, улихьна гъапунзачвузки. ⁴ Йиз учвук гизаф миж кайиз ва учв’ин дамахлу вуза! Учву узук гьаци юкІв капІри шулчваки, йиз вари бедбахтвалариз дилигди, узу бегьем шадвали ацІразу.

⁵ Гьеле учу Македонияйиз гъафнушра, душваъ архаинвал гъабхьундарчуз. Вари терефарихъанди балйир алахьунчуин: чІатан уч’ина гьюжмар апІуйи, хъа айитІ жандиъ гукІнишин абхъуйи. ⁶ Пашманвалиъ ахьдар ккарцру Аллагьди, учухьна Тит гьаъну, ккаарцунчу. ⁷ Думу учухьна гъафну кІури ваъ, хъа учву думу фици кьабул гъапІнуш, гьаддикан вуйи ихтилатниин гизаф рази гъахьунча. Дугъу, учвуз узу фукьан дяркъну ккунди аш, узуз гъабшибдин учву фукьан дердер гъизигнуш ва фициб гьяракатниинди учву узхъан хъюгънуш, ктибтунчуз – миди узуз зурба шадвал тувунзуз.

⁸ Йиз кагъзи учвуз гиран ктапІнушра, думу бикІбиин швумал дарза. ИкибаштІан, сифте швумал гъахьнийза, фицики йиз кагъзи учвуз цІиб вахтназ вушра гиран ктапІуб, гъябкънийиз, ⁹ хъа гьамус шад вуза. Учвуз учву тахсиркрар вуйиб аьгъю дубхьна кІури ваъ, хъа ичв пашманвали учву швумал гъапІган, шад гъахьунзу. Ичв пашманвал Аллагьдихьан вуйи, гьаддиз учкан харжиб фукІа гъабхьундарчвуз! ¹⁰ Аллагьдихьан вуйи пашманвали швумал хьуб арайиз хуру, гьаддихъди – уьрхювалра, гьяйифар зигбакк ккуркьдар. Хъа му дюн’яйин пашманвали аьжал хуру. ¹¹ Аллагьдихьан вуйи пашманвали учвуъ фу арайиз гъабхнуш лигай: аьшкь кади лихуб, гьякьвалихъна гъюб, тахсиркриина алжагъуб, гучІ’вал кади хьуб, рякъюз юкІв хъади хьуб, кІван сикинсузвал, тахсиркрин суд апІуз гьязурди хьуб. Учвук му ляхниъ сарун тахсир кимдруб гьубкІну улупунчва. ¹² Узу учвуз, беябур апІрур дерккну ясана беябур гъахьирихъан хъюгъну гъузузтІан кІури дибикІнадарза, хъа, Аллагьдин улихь учву учухъ фукьан хъпехъури гъузну ккундуш, учву гъавриъ ахъбан бадали, гъибикІуб вуйиз. ¹³ Аьхириъ миди учу шад апІура.

Учу шад, неинки учвуъ гъахьи дигиш’валари, хъа гьацира Титдин шадвали шад гъапІунчу, фицики учву вариди дугъан кІваълан гъагъ алдабгъунчва. ¹⁴ Узу дугъан улихь ичв тяриф гъапІунза, ва йиз учв’ин али хъугъ’вал пуч гъапІундарчва. Учу учвуз кІурайибра вари диш ву, ва учу Титдиз учвкан гъапІу тярифар вари дишдар гъахьну. ¹⁵ Дугъаз учву, чахъ фици хъпехънийиш ва фициб гукІнивалиинди ва жандиъ зириз ади думу учву кьабул гъапІнийиш, кІваин апІрукьан, гизафтІан гизаф ккун шула. ¹⁶ Узхьан учвухъ йирфар хъирчуз шлубдиин шад вуза.

Аллагьдин терефкрарин ачухъ хил

¹ Гъардшар, Македонияйиъ айи хъугърудариз Аллагьди фициб уж’вал улупнуш, учвуз ктибтуз ккундучуз. ² Дурар гъагъи гьялнаъ ади гъахьну, дурариз учІвру касибвал, дарвал гъябкъну, амма дурарин шадвалина жумартвали вари читинвалар ккагъну. ³ Магьа узу шагьид: чпин хушниинди дурари удубкьру кюмек, гьеле чпихьан шлубтІан артухъра кади, гъапІнийи. ⁴ Дурари, Ерусалимдиъ айи Аллагьдин гирами халкьдиз кюмек апІуз ихтияр тувуб учкан ижмиди ккун гъапІнийи. ⁵ Дурари гьамкьан кюмек апІур, кІури, хиял дайич. Фицики дурар вари, сифтена сифте Агъайин хилиз бахш гъахьнийи, хъасин, Аллагьдин амриинди – ич. ⁶ Гьаддиз учу Титдикан, гъардшариз кюмек апІури, чав ккебгъу гьадму ужуб ляхин учвухьра кІулиз адабгъуб, тІалаб гъапІнийча. ⁷ Учвуз вари артухъра кади айивализ дилигну: хъугъувал, уччвуб гаф-чІал, аьгъювалар, ляхнихъ юкІв хъайивал, учвуз учу ккунивал – гьаму ужуб ляхниъ учву заан хасият улупну ккундийчуз.

⁸ Му буйругъ вуди кІурадарзачвуз, хъа имбудари юкІв хъипну улупру гьяракатнакан кІури гъабшиш, гьадму ляхнилантина узуз ичв дугъри ккунивал ахтармиш апІуз ккундузуз. ⁹ Ихь Агъа Иса Месигьдин уж’вал аьгъячвуз. Думу, Учв девлетлу вуйи, хъа Чан касибвалиланзина учву девлетлу хьуз кІури, касиб гъахьну.

¹⁰ Гьаддиз дилигну, ичв хайирназ саб насигьят тувуз ккундузуз. Гъубшу йисан сарпидарди вуди учву ужуб ляхин ккебгъунчва, ва сифте гьадму фикирназ гъабхидарра учву вучва. ¹¹ Учву думу ляхин сифте ккебгънамиди фициб аьшкьниинди ккебгънуш, гьациб аьшкьниинди ккудубкІузра ккудубкІай. Учвхьан шлу кьадарниинди тувай! ¹² Эгер учвуъ аьшкь аш, адрубдиз ваъ, хъа ичв айибдиз дилигну, тувну ккунду.

¹³ Мушваъ улхуб вари гъагъар учв’ин иличну жарадарин гьял ужу апІбакан дар, хъа вари сабси хьуваликан. ¹⁴ Гьаму ражари, учвуз артухъ вуйиб адрудариз тувну, гьудрубкІрайиб гъубкІуз шулучвхьан, хъасин, учвуз адарди дурариз артухъ айиган, дурари учвуз адруб тувдичвуз. Гьамциб жюрейиинди вари сабси хьиди, ¹⁵ Гирами китабариъ дупнайиси:

«Гизаф уч гъапІуриз артухъ адайи,

ва цІиб гъабхьириз гьудрубкІруб адайи».

¹⁶ Учу ичв гъайгъушнаъ фициб жюрейиинди аш, гьаци хьуб Титдин кІваъра иву Аллагьдиз чухсагъул. ¹⁷ Тит, учу тІалаб гъапІнушра, чан хушниинди, учв улихь гьучІвну, учвухьна гъюрайир ву. ¹⁸ Дугъахъди Ужувлан хабарнан ужур гъуллугъчиси варишвариъ айи хъугърудариз аьгъю сарсана гъардаш гьаърача. ¹⁹ Мидланра гъайри думу кас варишвариъ айи хъугърудари, учу ич хушниинди Агъайин ад бадали апІурайи гьадму ужуб ляхниъ кюмекчиди ктагъур ву. ²⁰ Учу, хъугънайидари, гьамкьан уч дапІнайи аьхю пулар дюз дарди харж апІурачва, кІури, гьич сарихьанра учуз тягьна йивуз даршлуси, ихтиятди ача. ²¹ Учу, неинки Аллагьдин, хъа гьацира адмийирин улихьра, гьич саб тахсир ктарди ляхин апІурача.

²² Учу учвухьна гизаф ляхнариъ гизаф ражари кІубанвал улупу сарсана ич гъардаш гьаърача. Гьамус дугъак хъа гизаф юкІв ка, гьаз гъапиш дугъан учв’ин лап ижми хъугъвал ал. ²³ Титдикан кІури гъабшиш, учвуз вуйи кюмекнан вари ляхнариъ ва рякъяриъ думу йиз юлдаш вуйиз, хъа имбу кьюр гъардшикан кІури гъабшиш, дурар хъугърударин жямяаьтари гьаънайидар ва Месигьдин ад за апІурайидар ву. ²⁴ Гьаддиз, хъугърударин жямяаьтариз учу учв’ин дав дамахлу даруб рябкъбан бадали, учвуз дурар багьа вуйиб дурариз улупай.

Месигьдихъ хъугърайи гъардшариз кюмек апІури гъузай

¹ Дугъри гъапиш, учу, Ерусалимдиъ айи Аллагьдин гирами касариз вуйи кюмекнакан учвуз бикІубра рубкьурдар. ² Дурариз кюмек апІуз ичв ижмиди юкІв хъайиваликан аьгъязуз. Македонияйин хъугърударин улихь ичв тярифарра гъапІунза. Узу дурариз учву Ахаяйиъ кюмек апІуз гьеле гъубшу йис’анмина гьязурди айиваликан гъапунза ва ичв юкІв хъайивали дурарикра гьяракат кипнийи. ³ Узу учвухьна гъардшар гьаъраза, амма узу ичв тярифар дапІну, арайиъ ляхин адарди дарибшригьа. Узу учвуз, вари гьязур дапІнади ибшри, улихьмиди гъапунзачвуз, ⁴ нагагь Македонияйин агьлар узухъди гъафиш, дурариз учву гьязурди адарди дярябкъригьа. Дарди гъабшиш, учу ичв гьамкьан тярифар дапІну, дурарин улихь, гьеле учвкан улхурикьан адарза, хъа ич машар уьру даришри. ⁵ Гьаддиз узу, гъардшар, учву гаф тувнайиси, багъиш уч дапІну, гьязурди гъибтбан бадали, учвухьна улихьмиди душну ккунивалин, гъавриъ аунза. Гьадмуган, му ляхин, учву алаъну апІурайивал ваъ, хъа ичв хушниинди апІурайивал, рябкъиди.

⁶ КІваинди гъибтай: кьискьисди убзрури, гьаци ккадабцІидира ву, булди убзрури булди ккадабцІиди. ⁷ Гъит гьар касди, гьяйифсузди ва гужа-гуж дарди, чан кІваъ айибкьан туври, гьаз гъапиш Аллагьдиз шадди туврур ккунду. ⁸ Аллагьдихьан вари учвуз лазим вуйиб гьаммишан артухъра кади хьпан бадали ва вари гъяни ляхнаризра гьубкІну шлуси, фу вушра тувуз шулу, ⁹ дибикІнадарин:

«Дугъу чан девлет юкьуб тереф касибариз пай гъапІнийи,

дугъан гьякьвал гьаргандиз гъубзруб ву».

¹⁰ Убзруриз тум Туврури, ипІуз уьл Туврури учву гъубзуб зарб апІиди ва ичв гьякьвалин бегьер артухъ апІиди. ¹¹ Учву варибдихьди гьаци девлетлу хьидичваки, гьяйиф дарди, гьарган адмийириз кюмекар апІуз хьибдичвухьан, ва учву, гьяйиф дарди, учлан чпиз гъапІу багъишарилантина дурари Аллагьдизра чухсагъул пиди.

¹² Му учву апІурайи гъуллугъну Аллагьдин гирами халкьдиз неинки кюмек тувди, хъа гьацира Аллагьдихьна вуйи ккунивал артухъ-артухъ хьуз гъибтди. ¹³ Ва ичв гьаму гъуллугънан бегьер рябкъюри, учвлантина адмийири Аллагьдин ад апІиди, гьаз гъапиш учву рабгъурайи Месигьдин Ужувлан хабарнакк кІул ккиврачва ва учвуз айибдикан шадди дураризра, имбударизра туврачва. ¹⁴ Учвуз Аллагьди тувнайи кьадар адру уж’валилантина дурар учвхъандира ккарагиди ва учвуз багахь хьиди. ¹⁵ Аллагьдиз, Чан ктибтуз даршлу багъишназ дилигну, чухсагъул!

Павели, чан гъуллугъ тягьнийирихьан уьбхюра

¹ Узу, Павел, учву кІуруганси, ичв багахь гьарган «начур», учвхьан ярхла айиган, «кІубнир», Месигьси гъюдалди ва фурс ктарди учвухьна илтІикІураза. ² Учвуз миннат апІураза: учвухьна гъафиган, дюн’яйин ляхнариз дилигну, учу ич гъуллугъ ккебгъна кІурайидарихьна узу кІваан ижми шлуси, мапІанай. ³ Ухьу гьаму дюн’яйиъ яшамиш шулашра, гьаму дюн’яйин яракьниинди дяви апІурадархьа. ⁴ Учу аьдати яракьнахьди ваъ, хъа мютІюгъ даршлу гъалйир ккидирчру Аллагьдин яракьнахьди дяви гъабхурча ⁵ ва Аллагьдин фагьмиз къаршу дяви гъабхрудар ккидирчурача. Учу гьарсаб фикир, Месигьдихъ хъпехъруси, йисирвализ гъадабгъурача. ⁶ Учу Месигьдихъ хъпебехърайидариз, ичв хъпехърувал заан дережайиз гъафиган, жаза гьадабтІуз гьязур вуча.

⁷ Учву шей’арин зиъланди лигурачва! Месигьдинур вуза кІури, саб шак адарди фикир апІурайириз гъит аьгъю ибшри, думуси учура Месигьдин адмийир вуча. ⁸ Агъайи учуз, учву чІур апІуз ваъ, хъа артмиш апІуз тувнайи гьюкмиъ узу хъа гизаф фурс апІуйишра, узуз нач апІуб рубкьдайи. ⁹ Узуз йиз кагъзариинди учвуз гучІар ккауз ккунди а, кІуру, фикир дарибшри. ¹⁰ Садари, кагъзариъ узу ижмир ва кьувватлур ву, хъа учвухь хьайиган зяифур, йиз гафар фукІа дарудар ву, кІури ашул. ¹¹ Гъит гьаци кІурудариз аьгъю ибшри, ярхлаъ учу ич кагъзариъ фицдар вуш, багахьна гъафиган, ляхнариъра гьацдар вуча.

¹² Учхьан, чиб-чпин тярифар апІру адмийириз ухшар хьуз ясана гьадрарихь тевуз, хьибдарчухьан. Дурари гьаци, чпи чиб-чпихь теври, ахмакьвал апІура. ¹³ Хъа алдарди ич тяриф апІидарча, аммаки Аллагьди учуз дерккнайи терефариъ учу ич тяриф апІидича, му терефар учвухьнакьан рукьура. ¹⁴ Фицики учуз улупнайи терефарилан улдучІвурадарча, аьхир, гьаци хьибдийи, эгер учу учвухьна гъафундайиш. Хъа учу учвухьна Месигьдикан вуйи Ужувлан хабар хьади гъафунча! ¹⁵ Учу кьадар адрубкьан ич тярифар апІурадарча, гьаз гъапиш учу гъапІу ляхин – думу ичуб ву, хъа жарадарин хъуркьувал дар. Ичв хъугъувал артухъ шул кІури, умуд кайич, ва дидихъди сабси ичв арайиъ апІру ич ляхинра артухъ хьибди. ¹⁶ Хъа гьадмуган учхьан дилинтина гъягъюз ва душваъра Ужувлан хабар рабгъуз хьибдичухьан. Чпиз улупнайи йишвариъ гъапІу ляхнарин, жарадариси, ич тярифар апІидарча.

¹⁷ «Шлиз тярифар дапІну ккундуш, гъит дугъу

Агъайин тярифар апІри!»

¹⁸ Чан тяриф чав апІурайирин гаф Агъайи кьабул апІидар. Агъайин тяриф апІурайирин – апІиди.

КучІлин вакилариз къаршу Павел

¹ Учву сацІиб йиз «ахмакьвал» аьгь апІур кІури, умуд кайиз. СацІибсана аьгь апІиначва. ² Узу учвхъан Аллагь хъюгъруси хъюгъраза. Узу учвук, сар Жилириз – Месигьдиз, Дугъан улихь тахсир ктру швушвси дугъужвбан бадали, лишан кипунзачвук. ³ Аммаки, Ева, иблис битІру алдатмиш гъапІси, ичв фикирра Месигьдиз дугъриди ва марцциди бахш шлувалихьан гьадапІур кІури, гучІуразуз. ⁴ Сари, учвухьна дуфну, учу дарпи жара Исайикан ктибтруган, ясана учу тутруву жара рюгь вая учву кьабул дарапІу жара хабар кьабул апІруган – му вари учву рягьятди кьабул апІуручва. ⁵ Узу, йиз фикриан, гьадму «варитІан заан вакилар вуча» кІурайидарин кьяляхъ хътарза. ⁶ Мумкин ву, узу гаф-чІалнан уста дарди хьузра, хъа узуз аьгъювалар азуз ва учу дурар учвуз рябкъюри-рябкъюри варибдиъ улупунча.

⁷ Узу, учву заъбан бадали, жвув асккан дисури, гунагь гъапІнушул гьа, гьаз гъапиш Аллагьдин Ужувлан хабар учвуз кьимат дарди ктибтунза? ⁸ Учвуз гъуллугънаъ хьузди, жара йишвариъ хъугърударихьан пул гъибисну кІури, узу дурар тІарашра гъапІну, пуз шулу. ⁹ Узу учвухьна дуфнайиган, гьеле узуз вари гьубкІну адайишра, гьич саринра кІул’ин алахъундарза. Вари лазим вуйиб узуз Македонияйин гъардшари тувунзуз. Узу гьамусдихъантинара учв’ин алахъидарза. ¹⁰ Му йиз дамах – узу узуъ яшамиш шулайи Месигьдин гьякьвалиинди гаф тувраза – гьич сарихьанра вари Ахая вуйибси гъилицишра, батІул апІуз хьибдар! ¹¹ Гьаз? Учву даккниган? Узуз учву фукьан масанди вуш, Аллагьдиз ужуйи аьгъя!

¹² Гьамусдихъантинара узу ляхин гьаци давам апІидизаки, узу апІурайиси Аллагьдин ляхин чпира апІурача, кІури, къуру тярифар апІуз ккунидарихьан дици апІуз даршлуси.

¹³ Думу адмийир, кІучІлин вакилар, марцци хил хьтру гъуллугъчйир Месигьдин вакилар вуча кІурайи кІучІляхяр ву. ¹⁴ Му аьламат вуйин хъа? Иблисра учв аквнан малайикси улупури гъабхьну! ¹⁵ Гьаци вуйиган дидин гъуллугъчйири чпи гьякьлу гъуллугъчйирси улупуз чалишмиш хьувалиин мюгьтал хьуз хай даршул. Дурарин аьхирра чпин ляхнариз гъилигуб хьибди.

Павелиз алахьурайи читинвалар

¹⁶ Хъана текрар апІураза: узу ахмакьси мидисанай, хъа эгер дисураш, узухьди, ахмакьриси, сацІибсана тярифар апІуз гъитай. ¹⁷ Гьаму ражари узуз пуз ккуниб, Агъайиси дарди кІурза. Узу ахмакьуриси йиз тяриф апІидиза. ¹⁸ Гьаму дюн’яйиъ гизафдари чпин тярифар апІура, гьаддиз гъитай узухьдира йиз тяриф апІуз. ¹⁹ Учву, гьаци фикирлуйир вуйидари, ахмакъар ичв арайиъ хушниинди гъитрачва! ²⁰ Учву, учву лукІар апІрудар ва учв’инди яшамиш шлудар, учвхьан тадабгърудар, ичв зиин фурсар апІрудар, ичв машнагъян йиврудар ичв багахь гъитрачва. ²¹ Йиз нач’валиан кІураза, учвуз гьаци апІуз гъабхьундарчухьан.

Дурари фтин вушра чпин тяриф апІураш, узхьанра йиз тяриф апІуз шулзухьан ва му, йиз «ахмакьвалси» гьисаб апІуз шулучвхьан. ²² Дурар жугьдар вуйин? Узура вуза. Израилин баяр? – узура, Ибригьимдин наслар? – узура! ²³ Дурар Месигьдин гъуллугънаъ айин? Мици гьерхуб ахмакьвал вушра, узу хъа гизаф Месигьдин гъуллугънаъ айир вуза! Узу артухъ гъилихунза, узу гагь-гагьнак дустгъариъ итуйзу, гагь-гагьнак урччвуйзу, аьжаликкан швнуб-сабан ккутІурччвури гъахьунза. ²⁴ Жугьдарихьан хьуб ражари сумчІурна урчІвуб гъирмаж гъитІунза, ²⁵ шубуб ражари римлуйири маргъарихьди гъурччвунзу, саб ражари гъванарин жварра уьлюбхюнзуин, шубуб ражари саб нуфт ккахьрайи гимйириккан ккутІурччвунзу ва ярхи йигъди гьюлерин кьялаъ ади гъахьунза. ²⁶ Узу гьаммишан рякъяриъ аза, гьаммишан нирарин, гъачгъарин, жвуван миллетарин ва аллагьсузарин хатІайикк ккахъразу; шагьрарин, чІурарин, гьюлин, кучІлин гъардшарин хатІйирикк кказа. ²⁷ Узу, нивкІ адарди, гашди, убхъруб адарди, хураг адарди, аьхълу аргъури, палат алдарди, жандихъан хътахъайиз лихури гъахьунза. ²⁸ Гьаму варибдилан артухъ, варишвариъ айи хъугърударин гъайгъу хяртІахъ хъайиз. ²⁹ Гьарсар зяифурин язухъ зигури шулза, гьарсар гунгьиъ ахъру адмийин язухъшну кІваз аьзият шулиз.

³⁰ Узуз йиз тяриф апІруси гъабшиш, узу фтиъ зяифди вуш, гьаддин тяриф апІидиза. ³¹ Агъа Исайин Аллагь ва Адашдиз – гъит Дугъан ад гьаммишандиз ибшри! – узу кучІал дарапІрайивал аьгъя. ³² Арет паччагьди, Дамаскдин аьхюрди дерккнайири, узу дисбан бадали, шагьур уликк уьбхюри гъахьну, аммаки узу жагваъди шагьрилан илбицнайи цалиъ айи урхъ’ансина ирхнийзу, ва дугъан хилккан ккутІурччвнийза.

Павелиин улубкьуб

¹ Узу йиз тяриф апІуз, гьеле дидкан айи хайир адаршра, буржлу духьназу. Агъайи улупубдихьинди, ачухъ гъапІубдихьинди илтІикІидиза. ² Узуз сар хъугъру кас аьгъязуз, йицІиюкьуд йис мидиз улихьна, чан бедендиъди вуш, ясана беден хътарди вуш, аьгъдарзуз, Аллагьдиз ужуйи аьгъя, думу, дидисну, шубубпи зав’ина гъурхну. ³ Думу адми, чан бедендиъди вуш, ясана беден хътарди вуш, аьгъдарзуз, Аллагьдиз ужуйи аьгъя, женнетдиз гъахбакан ва душваъ дугъаз пуз даршлударстар гафар ерхьбакан аьгъязуз. Думу гафар ктитуз ихтияр айидар дар. ⁵ Гьацир адмийиинди тяриф апІуз шулзухьан, хъа жвуван тяриф, жвуван зяиф терефарилан гъайри апІидарза. ⁶ Гьеле узуз тяриф апІуз ккун гъабхьнийишра, думу фагьумлу ляхин шуйи, гьаз гъапиш узу гьякьтІан пидарза. Хъа узу, узу дяркъну вая йиз гафар деерхьну, дугъу учв заанди улупура, кІури, сарира фикир дарапІбан бадали, дици апІидарза.

⁷ Гьациб зурба сир узухьна гъурубкьган, узуз узу заанди дярякъюз, йиз жандиъ аьзаб тувуз галам, иблисдин малайик, ивна. ⁸ Шубуб ражари Агъайиз узу дидхьан азад апІин гъапунза. ⁹ Хъа Дугъу гъапунзуз: «Йиз уж’вал увуз чІяаьн ибшри, фицики Йиз кьувват зяифвалилан ужуйи гъюру». Гьаддиз, узуъ Месигьдин кьувват хьуз, шадди йиз зяифвалин тяриф апІури шулза. ¹⁰ Гьаддиз узу зяифди вуйиган, гиран ктапІруган, гьубкІну фукІа адруган, хъергруган, читинвалариъ итруган, Месигь бадали разиди гъузраза, гьаз гъапиш йиз зяифвалиъ кьувватлу вуза.

¹¹ Узу бегьемди ахмакь духьназа, амма узкан гьаци гъапІдар учву вучва. Йиз тярифар учву дапІну ккундийи, фицики узу гьадму «заан вакилар вуча» кІурайидартІан, гьич сабдииндира асккан дайза. ¹² Учвуз Месигьдин гьякь вакил жара апІру лишнар улупначвуз: аьхю сабур, аьжайиб лишнар, аьламатар ва кьудратлу ляхнар. ¹³ Жара йишвариъ хъугърудариз, учв’лан гъайри, узхьан гьациб фу гъурубкьну? Дициб фукІа адар, сабдилан гъайри: узу учв’ин алалахъувал. Гьаму йиз тахсирналан хил алдабгъай!

¹⁴ Учвухьна шубубпи ражарира гъюз ккунди азуз, амма ичв кІул’ин гъагъ хьидарза. Узуз ккуниб, учвуз айиб ваъ, хъа учву вузуз! Абйир-бабар веледари ацІруб дар, хъа абйир-бабари – веледар. ¹⁵ Вари узуз айиб шадвалиинди, гьеле жвувра кмиди учву бадали учвуз харж апІуз кказа. Узуз учву артухъ ккуниган, узу камди гьаз ккун апІурачва?

¹⁶ Фици вушра узу ичв кІул’ина гъагъ гъахьундарза, аммаки узу саб аьмлиинди учву алдатмиш гъапІну, кІурачва? ¹⁷ Белки, узу учвухьна гьау адмийирилантина учвхьан пул гъибисну шул? ¹⁸ Узу учвухьна сар гъардашра хъади Тит гьаунза. Белки, Титди учвхьан фукІа гъибисну шул? Учу ич гъуллугъ учвухь сар рюгьнаъди ва саб метлеб ади гъапІундайинхъа?

¹⁹ Учву ухдитІан, учу ичв улихь ич тахсрар кжикурайидар ву, кІури, фикир дапІнашалчва. Ваъ! Учу, Иса Месигьдин терефкрари, Аллагьдин улихь кІурача: йиз ккунидар, учу апІурайиб вари ичв мюгькамвализ вуйич. ²⁰ Узу учвухьна гъафиш, учву узуз ккуниси дярякъюр кІури, гучІ кайиз ва гьадмуган учвухъди вуйи йиз ляхнар учвуз ккуниси ваъ, хъа жараси хьиди. Ичв арайиъ узуз гьюжатар, бахилвал, хъял, гъярхьувалар, кІучІлар, футнийир, къуру дамагъар, къайдасузвал рябкъюр, кІури, гучІ кайиз. ²¹ Узу учвухьна хъана гъафиш, Аллагьди узу асккан апІур, кІури, гучІуразуз ва чпин намус адрувалилантина, кьяппавалилантина, хил’ан адахънайивалилантина гунагь дапІну, чпин гунгьариин швумал дархьи гизафдарихъанди ишлар апІуб алабхъидизуз.

ЦІийи гюрюшмишназ гьязур йихьай

¹ Учвухьна шубубпи ражари гъюраза. «Тахсир кипруган, кьюр вая шубур шагьид ади ккунду». ² Узу кьюбпи ражари учвухь хьайиган, учвуз улихьмиди гъапнийза, хъа гьамус, учвхьан ярхла айири, мугагьназ гунгьар гъапІдариз варидариз кІураза: гьаму ражари ичв язухъ зигидарза. ³ Учвуз Месигьди йиз мелзниинди гафар апІури аш, адарш, аьгъю апІуз ккунди анчвуз? Дугъан кьувват зяиф дубхьнадар, Дугъу думу ичв арайиъ улупура! ⁴ Гьеле Месигь зяифди айиган хачрак карснийишра, Думу Аллагьдин кьудратниинди чІивиди а! Учура Дугъахъди саб вуди зяифдар вуча, аммаки ичв гъуллугънаъ хьпан бадали Аллагьдин кьудратниинди Гьадгъахъди яшамишра хьидича.

⁵ Учвуъ хъугъувал имиш лигай; жвув ахтармиш апІури гъузай. Ясана учвуъ Иса Месигь айибдикан аьгъдарди айчвуз, икибаштІан, учву эгер вари аьгь апІури гъашиш? ⁶ Хъа учкан улхуруш, йиз умуд кайиз, учвуз рябкъюр, кІури, учу фужар духьну ккундийиш, гьадрар вуча. ⁷ Учву писвал дарапІуз Аллагьдиз ккарагурача. Учу фужар духьну ккундуш, гьацдар хьузди, му ляхнар учвуз улупуз апІурайиб дарич, хъа, учу фужар духьну ккундуш, гьацдар вуди учвуз гъяркъюндаршра, учву гьякьвалиинди ичв ляхнар апІбан бадали, апІурайиб вуйич. ⁸ Гьякьвал гъибтну, учхьан фукІара апІуз шулдарчухьан, хъа апІруб вари гьякьвал бадали вуйич. ⁹ Эгер учву дугъриданра кьувватлу шулуш, учу зяиф хьуз шад вуча. Ва учву гьуркІдар хьузди ккарагурача. ¹⁰ Гьаму ражари узу ярхлаан, учвухьна гъафиган, учвухъди ижми дархьуз бикІураза. Агъайи, пуч апІуз ваъ, яратмиш апІуз, гьюкум тувназуз.

¹¹ Гъардшар, кІуразачвуз: шадвал хъапІай, уьмриъ улихь гъарахай, чиб-чпик юкІв капІай, гъит ичв арайиъ сабвал ибшри, мясляаьтниинди яшамиш йихьай, ва Аллагь, масанвалинна мясляаьтнан Булагъ, учвухъди хьиди.

Баркаллагь кІуругандин саламар

¹² Чиб-чпиз салам, гирамивалин мак апІури, тувай. Мушваъ яшамиш шулайи Аллагьдин вари гирами халкьди учвуз саламар хътаура.

¹³ Агъа Иса Месигьдин уж’вал, Аллагьдин масанвал ва Гирами Рюгьнахъди вуйи гаф-чІал, гъит, учвухъ варидарихъ хъади ибшри.