Тимофейиз-1

ТИМОФЕЙИЗ 1-ПИ КАГЪАЗ

Тимофейиз дибикІнайи сабпи кагъзиъ, кьюбпибдиъси, Аллагьдин гъуллугънаъ айи хъугърударин хасиятарикан ва буржйирикан кІура. Гьаз дибикІнаш ва бикІбан метлеб фу вуш, Гирами Рюгьнулан ачухъди рябкъюра: «Аллагьдин хизандиъ жвув фици духьну ккундуш, увуз аьгъю хьпан бадали бикІураза. Думу хизан – хъугъру гирами халкь ву. Думу халкь – чІиви Аллагьдинуб ву. Думу халкь – мюгькам бин ва дебккрайи гьякь’вал ву» (3:15). Му кагъаз, гъилигу гьялариан, Павел Македонияйиз дуфнайиган дибикІнайиб ву. Павели, Эфесдиъ даргъурайи каламариз къаршуди дийигъуз, чан дуст вуйи ва чахъди Аллагьдин гъуллугънаъ айи Тимофейикан душваъ гъузуб тІалаб апІура. Павелиз чаз Эфесдиз гъягъюз ккун дубхьнайи, хъа дугъаз садар гьядисйири машат гъапІнийи. Гьаддиз дугъу Тимофейиз, сабдизра дилигди ва ижми хъугъвалиинди ккебгънайи ляхин ккудубкІ кІури, кагъаз бикІуру. Тимофейи Эфесдиъ хъугърударихъди аьлакьалу вуйи сакьюдар суалар гьял дапІну ккундийи: гьацІари хъугънайидариз я швушвар духну, я швуваз душну ккундар, кІурайи, жарадари ипІру-ухру шей’арикан ишлетмиш апІуз ихтияр айидарра, адрударра а, кІурайи. Гирами Рюгь Чан кагъзиъ Исайихъ хъугърударин уьмрин гизаф суалариин дийигънайи. Дугъан фикрари ва насигьятари Эфесдиъ хъугънайидариз Ужувлан хабарнан гьаммишандин гьякьикьатвалихьна, яни Иса Месигьдихьна, Гьадгъу инсанариз дебккнайи уьрхювалихьна кьяляхъ хътакуз кюмек дапІну ккундийи. Ихь Агъайиз вари адмийир дюрхну ва Чан гьякьвалин гъавриъ ахъну ккунду. Гьаддиз Исайихъ хъугънайидари му гьякьвал жиниди гъибтну ккундар, хъа дурар, чпин хъугъували Аллагьдин дигиш апІру рягьимлуваликан ачухъди шагьидвал апІруси, яшамиш духьну ккунду. Кагъзиъ артухъси фикир хъугърударин аьхюр кипуз саб тягьна ктру уьмрин адми духьну ккунивалихьна жалб апІура.

КучІлин аьгъюваларикан

¹ Ухьу уьрхру Аллагьдин ва ихь умуд кайи Месигь Исайин амриинди кадагънайи Иса Месигьдин вакил Павелихьан ² хъугъувалиъ йиз гьякь бай Тимофейиз – уж’вал, рягьим ва мясляаьт увуз Адаш Аллагьдихьан ва Иса Месигь ихь Агъайихьан!

³ Македонияйиз гъярайири, увкан Эфесдиъ гъузуз ижмиди ккун гъапІнийза. Уву душваъ кучІлин аьгъювалар рагъурайи сакьюдар касар дерккну ккундийзуз. ⁴ Чпин вахт дурари гьубкьу жюрейин махъварихъди ва ккудудукІру архйир агури гьадрапІри. Миди арайиз хрудар гьюжатартІан дар, хъа хъугъували арайиз хурайи Аллагьдин ляхин улихь гъабхурадар. ⁵ Гьаму йиз тІалабнан метлеб – марцци кІваан, гъяни намуснаан ва дугъри хъугъувалиан удубчІвурайи масанвал вуйиз. ⁶ Сакьюдар, гьаму вари дипну, файдасуз гьюжатариъ ахъна. ⁷ Дурариз Къанун кивру мялимар хьуз ккунди а, аммаки дурар я чпи кІурайибдин, я чпи гьадмукьан ижмиди ктибтурайибдин гъавриъ ахънадар.

⁸ Къанун ухьуз агъяхьуз: думу ужуб ву, эгер дюзди ишлетмиш апІури гъашиш. ⁹ Ухьуз гьацира аьгъяхьуз: Къанун дугъридариз ваъ, хъа – гьадму законар чІюргърудариз ва мютІюгъ даршлудариз, аллагьсузариз ва гунагькрариз, фукІара гирамиб адрудариз ва хътругърудариз, адашдин вая дадайин уьмриин хил иливрудариз, йивну йикІрудариз, ¹⁰ кьяппавалиъ айидариз, жилир жилирихъ хъайидариз, адмийир лукІ’вализ масу туврудариз, кучІляхяриз, кучІалди шагьидвал апІрудариз ва дюз аьгъювалариз къаршуди удучІврудариз ву. ¹¹ Му аьгъювалар гьарсаб тярифназ лайикь вуйи Аллагьди уз’ин илипнайи Ужувлан хабарнахъди сабси гъюру.

Аллагьдин ужувлаз баркаллагь

¹² Узуз кьувват туву ихь Агъайиз, Месигь Исайиз чухсагъул кІураза. Дугъу уз’ин ихтибар дапІну, гъуллугъ илипунзуин. ¹³ Мугагьназ Агъайиз люкьнар апІуйза, хъугърударихъ хъергуйза, вягьшисир вуйза. Аллагьди узлан хил алдабгъну, гьаз гъапиш, узу йиз аьгъдрувалиан ва хътругърувалиан гьаци апІури гъахьунза. ¹⁴ Хъа, Иса Месигьдик ктикьхъан, рябкъру масанвална хъугъвал хъайи ихь Агъайин уж’вал Аллагьди уз’ин бегьем улубзну. ¹⁵ Дюз ва гьякь ву гьаму гафар: гунагькрар уьрхбан бадали, Месигь Иса дюн’яйиз гъафну, хъа дурарикан вартІан аьхю гунагькар узу вуйза. ¹⁶ Аммаки Иса Месигьди гьамциб уж’вал узуз, сарпирди, Чан сабурлувал фукьан зурба вуш дябкъну, имбударра хъугъуз ва дурариз гьаргандин уьмур рубкьуз, улупну. ¹⁷ Гьаци вуйиган, гъит гьаргандин Паччагьдиз, аьжал Хътруриз, Дярякъруриз ва Сар вуйи Аллагьдиз аьсрариан аьсрариз гьюрмат ва ад ибшри! Амин.

¹⁸ Тимофей, йиз бай, увкан дупнайи пайгъамбарвалин гафар кІваин алди, магьа гьамцдар насигьятар дикІуразавуз; гьадрарихъди гъяри гьякьвал бадали ¹⁹ жвуван хъугъувал ва марцци намус уьбхюри, уву хай кайи дяви дубхну ккундузуз. Сакьюдар намуснахьан гьидицну, ва ахириъ дурарин хъугъувалин гими ккабхъну. ²⁰ Гьацдарин арайиъ Гименейна Эскендер а; узу дурар, Аллагь беябур дарапІди яшайиш дубгъуз, иблисин хилиъ ивунза.

Сакьюдар ляхнарикан

¹ Сифтена-сифте увкан ккун апІурайиб гьаму вуйиз: вари адмийирихъанди ккарагай, тІалаб апІинай, гаф хъипай, Аллагьдиз чухсагъул йипай. ² Ухьу мясляаьт ади ва ужувлаъ архаинди, лайикьлуди яшамиш шлуси, пачгьарихъанди ва гьюкмихь хьайи варидарихъанди ккарагай. ³ Мици апІуб дюзди ва ухьу уьрхру Аллагьдиз кьабулди ву. ⁴ Фицики Дугъаз вари адмийир дюрхну ва гьякьвалихъна дуфну ккунду. ⁵ Аллагь сар ву, ва Аллагьдинна адмийин ара сатІи АпІурайирра сар ву. Думу Кас – Месигь Иса ву. ⁶ Дугъу вари адмийирихъанди кайи буржнан ерина Учв тувну. Думу Аллагьди, вахт гъафиган, дюн’яйиз гьау шагьидвал ву. ⁷ Гьаддиз узу, Хабар рабгърурди, Месигьдин вакилди ва жугьуд дару халкьариз гьякь хъугъувалин мялимди дерккнайир вузун; кучІлар апІурадарза, гьякь кІураза.

⁸ Гьаци вуйиган жилари, хъял ва гьюжатар гъитну, гьарсаб йишвахь ккарагури, марцци хилар заргури ккундузуз.

⁹ Гьаци дишагьлийирира палат абурлуди ва жвуваз балгруси, къайдайиинди алабхьри; гъит дурари, аьжайибди кушар дерккри, гъизилар, жавагьирар, багьа палат алабхьури ваъ, ¹⁰ хъа Аллагьдиз бахш духьнайи дишагьлийириз лайикь вуйиси гъяни ляхнариинди чпи кабалгри. ¹¹ Гъит дишагьлийири, артухъ гаф дарди, саб наразивал улулупди, аьгъювалар аьгъю апІри. ¹² Дишагьлийиз жили-жвуван зиин аьхювал апІуз ва аьгъювалар улупуз гъидритарза; думу ккебехъну гъузри. ¹³ Фицики сифте – Адам, хъа Ева халкь гъапІнийи. ¹⁴ Алдатмиш гъапІурра Адам дайи, хъа, кІучІлихъ хъебехъну, гунагь гъапІур учв вуйи. ¹⁵ Аммаки дишагьлира уьрхиди, бицІидар апІури, эгер хъугъувал, масанвал, гирамивал ва намуслувал ади яшамиш шулуш.

Хъугърударин аьхюдар

¹ Дишди кІура: шлиз хъугърударин аьхюр хьуз ккундуш – баркаллагь чаз! ² Аммаки аьхюр кипуз саб тягьна ктру уьмрин адми духьну ккунду: саб ражаритІан швушв дархир, сабурлур, аькьюллур, намус кайир, хялар ккунир, аьгъювалар улупуз удукьрур, ³ дурубхърур, элелегрур, хъа гаф-чІалнаъ гъюдлир, хъюхъ дазрабгрур, пулиъ ул адрур. ⁴ Дугъу чан хал-хизан ужуйи гьюле гъабхури ккунду, хъпехъру ва чан гьюрмат уьбхру баяр-шубар ади ккунду. ⁵ Хъа чан хулан эйвал апІузкьан даршлурихьан Аллагьдин хъугърударин гъайгъу зигуз шулин? ⁶ Тазади хъугъну имбударикан аьхюр ктагъну ккундар: дицир адмийик фурс кубчІвди ва, иблисдинси, дугъанра суд апІиди. ⁷ Хътругърудар дицир касдикан, кьяляхъ тягьнийир дархьуз ва иблисди ккиву чулиъ адрахъуз, ужуйи улхури ккунду.

⁸ Гьаму дурарин кюмекчйиризра кайиб ву. Дурар гьюрмат айи, кьюб маш гъядру, чяхрихъ юкІв хъадру ва пулиъ ул адру касар духьну ккунду. ⁹ Дурари, марцци намус ади, хъугъувалин сирар дидисну ккунду. ¹⁰ Сифте дурарра ахтармиш дапІну ккунду, ва, эгер дурарихъ «рижв» хътрибшиш, гъит кюмекчивалин гъуллугънаъ гъузри.

¹¹ Аьхюдарин кюмекчйирин хпарра гьюрматназ лайикьдар духьну ккунду, футнийир дарагърудар, тямягьяриъ адрахърудар, варибдиин хъугъвал алидар.

¹² Аьхюрин кюмекчира саб ражаритІан швушв духну адрур ва чан хал-хизан ужуди кІули гъабхрур духьну ккунду. ¹³ Гьаз гъапиш чан гъуллугъ ужуди тамам апІрури гьюрматра гъазанмиш апІуру, ва Иса Месигьдикан вуйи чан хъугъуваликан дугъхьан, саб гучІ адарди, ктибтузра шулу.

¹⁴ Багарихьди увухьна гъюз кказа, хъа му узу увуз, ¹⁵ нагагь узу кьан апІруси гъабшиш, Аллагьдин хизандиъ жвув фици духьну ккундуш, увуз аьгъю хьпан бадали бикІураза. Думу хизан – чІиви Аллагьдихъ хъугъру гирами халкь ву. Думу халкь – мюгькам бин ва дебккрайи гьякьвал ву. ¹⁶ Саб гаф адарди ихь хъугъувалин сир зурба ву:

Думу бедендиъди гъафну,

Рюгьну гьякь гъапІну,

Думу малайикариз гъяркъну,

Дугъкан халкьариз ктибтну,

Думу дюн’яйиъ хъугъувалиинди кьабул гъапІну,

Думу адлуди завариз за гъахьну.

Тимофейиз насигьятар

¹ Аллагьдин Рюгьну ачухъди кІура, аьхиримжи вахтари, хъугъувал дипну, гьацІар гьудучІвиди, дурари кучІлин рюгьярин ва жинарин каламарин тереф бисиди. ² Дицдар каламар, намус дудубгнайи, кью-кьюбди машар гъивнайи кучІляхяриланмина гъиди. ³ Дурари швушвар хуз гъадагъа апІура. Дурар, гьякьвал агъюдарина хъугърудари баркаллагь кІури, ипІбан бадали Аллагьди халкь дапІнайи саб жюре итІрудар митІанай, кІури, хъюгъна. ⁴ Аллагьди арайиз дубхнайиб вари ужу ву. Баркаллагь кІураш, вари кьабул апІуз шулу. ⁵ Гьаз гъапиш думу вари Аллагьдин гафну ва ккарагбу гирами апІура.

⁶ Эгер уву, Тимофей, гъардшариз гьацдар кІури гъабшиш, уву хъахънайи сагъ аьгъюваларин ва хъугъувалин гафари ацІрайи Иса Месигьдин ужур гъуллугъчи хьидивукан. ⁷ Кьаби хпариз лайикь вуйи махъварихъди вахт давди маадапІан, хъа гьарган хъугъувалин тІалабарихъ йихь. ⁸ Бедендиз вуйи гьяракатарикан сацІиб мянфяаьт а, хъа хъугъувалин тІалабарихъ хьуб варибдиъ мянфяаьтлу ву, фицики диди, гьамусси, гъюру вахтариъра уьмур тувди.

⁹ Му гаф дюз апІуб ва кьабул апІуб лайикь ву. ¹⁰ Гьаддин бадали ухьу лихурира ахьа, гьаддихьна гьачІарккурира ахьа, гьаз гъапиш умуд чІиви Аллагьдик кайихь, хъа Думу вари адмийир Уьрхрур ву, иллагьки – Чаин хъугъвал алидар.

¹¹ Адмийириз магьа гьамдихьна дих апІин ва гьамдикан аьгъювалар улуп. ¹² Увухьинди, уву жигьил ву кІури, гьясппикк ккадру саягъниинди, фужкІара лигуз мигъитан. хъугънайидариз уву гьам гафариъ, уьмриъ, масанвалиъ, хъугъувалиъ ва гьам марццишнаъ чешнеди гъуз. ¹³ Узу гъяйиз хъугърударин улихь Гирами китабар ерхьури урх, Ужувлан хабар ктибтури апІин, аьгъювалар улупру мялим йихь. ¹⁴ Хъугърударин аьхюдари ув’ин хилар иливуйрайиган увуз гъапи пайгъамбарвалин гафариланмина гъабхьи багъиш увхьан ярхла мапІан.

¹⁵ Яв гъуллугъ юкІв хъади апІин, дидиз гьуркІну бахш йихь, ва гьадмуган варидариз яв хъуркьувалар рякъиди. ¹⁶ Яв ув’ин ва уву улупурайибдиин ул алди гъуз. Гьаму аьгъюваларихъан ижмиди хъичІих, фицики гьамци апІури, увура ва увухъ хъпехъурайидарра уьрхидиву.

Вазифйир, яни жвуву гьапІну ккундуш

¹ Яшлу адмийириз хъжагъру саягъниинди макІан, яв адашси, гъавриъ тІаъ. Жигьил адмийирихъди, яв гъардшарихъдиси, гафар апІури йихь. ² Аьхю дишагьлийир – дадйирси; жигьилдар чйирси дис, дурарихъди вуйи яв аьлакьйир лап марццидар шлуси гъуз.

³ Гьич саб терефнаанкьан кюмек имдру ачІни дишагьлийирин гъайгъу зиг. ⁴ Эгер ачІни дишагьлийиз баяр-шубар, ясана хтулар аш, дурари чпин хъугъувал ляхниъ улупри, чпин хизандинна абайир-бабарин гъайгъу зигури. Му Аллагьдиз кбалгру ляхин ву. ⁵ Хъа гьякь ачІни дишагьли, яни фужкІа хътрур сар Аллагьдихъ йирфар хъирчнайир ва, йигъ-йишв ккарагури, Дугъкан кюмек ккун апІурайир ву. ⁶ Хъа кефер апІурайи ачІни дишагьли чІивидимиди дукІнайи гьисаб ву. ⁷ Гьич саб жюрейин тягьнийир дархьбан бадали, хъугърудариъ тІапІ. ⁸ Жвуван багахьлуйирин, сифтена-сифте жвуван хизандин гъайгъу ктрур, хъугъувалихьан гьудучІвнайир ву ва хътругъруртІан ужуз ву.

⁹ ЙирхьцІур йислан зиина яш дубхьнайи ва саб ражаритІан швувахь дархьи ачІни дишагьлийиртІан хъугърударин гъайгъушнаъ махьан. ¹⁰ Думу дишагьлийин ужудар ляхнар аьгъю ишри: бицІидар вердиш гъапІу ва хялар кьабул гъапІу, хъугъру гъардшарин ликар гъижикІу, читинвал алабхъдариз кюмекнаъ ва гьарсаб ужудар ляхнариз бахш гъашир.

¹¹ Жигьил ачІни дишагьлийир думу гьисабнак макаан, гьаз гъапиш чпин юкІв хъипнайивал Месигьдихьан ярхла шлурихъ дурариз швуваз гъягъюз ккун хьибди, ¹² ва, чпи сифте Аллагьдин улихь туву гаф чІюбгъюри, дурари чпин суд апІура. ¹³ Мидихъди сабси, лихурира адруган дурар гагь-гагьнак давди вахт адапІуз вердиш шула, хулариан-хулариз ккажагъуз хъюгъра, футна либхура, жарадарин ляхнаригъ гъючІвра, лазим дарубдикан улхури шулу. ¹⁴ Гьаци вуйиган, узу жигьил ачІни дишагьлийирикан швуваз гъягъюб, бицІидар апІуб, чан хулахъ зегьмет зигуб ва душмнар чпикан чІуруди дулухруси апІуб ккун апІураза. ¹⁵ Гьаз гъапиш гьацдарикан сакьюдар, жвуван хъугъувал дипну, иблисихъди гъушну.

¹⁶ Эгер ачІни дишагьлийириз хъугъру багахьлуйир аш, хъугърудариз артухъ гъагъ дархьуз, дурарин гъайгъу багахьлуйири зигри. Гьадмуган дугъридан кюмек адру ачІни дишагьлийириз хъугърударихьан кюмек апІуз хьибди.

¹⁷ Ужуди аьхювал апІру касариз хъугърударин артухъ гьюрмат ади ккунду, иллагьки Ужувлан хабар рабгърудариз вая аьгъювалар улупрудариз. ¹⁸ Гьаз гъапиш Гирами китабари кІура:

«Гад апІури, рацц’ин али йицран ушв миилибтІан» ва

«Лихрур кьиматназ лайикь ву».

¹⁹ Хъугърударин аьхюрилан аьрз апІуради гъабшиш, кьюр вая шубур шагьид хътарди, кьабул мапІан. ²⁰ Хъа гунгьар апІрур, имбударизра дарс хьузди, варидарин улихьна адагъ.

²¹ Аллагьдин, Иса Месигьдин ва кадагънайи малайикарин улихь увкан ижмиди ккун апІураза: гьаму узу гъапидар кьабул дапІну, саризра майил мапІан; сарин тереф дибисну, тмунуриз миилзиган.

²² Жарадарин гунгьарин иштиракчи махьан. Хъугърударин аьхюдарин жергйириз гьялакди фужкІара макадагъан. Марцциди гъуз.

²³ Саб шидтІан дурубхъди мугъузан, яв фунин уьзриз ва кми-кмиди шлу иццрушнариз цІибди чяхирра ишлетмиш апІури йихь.

²⁴ ГьацІарин гунгьар, суддин Йигъ гъяйиз гьамустІанра рякъюра, хъа гьацІарин – кьяляхъна ачмиш хьиди. ²⁵ Гьаци ужудар ляхнарра ву: гьацІар гьамустІанра рякъюра, хъа дярякърайидар кьанди арайиз удучІвиди.

¹ ЛукІвалиъ айидари Аллагьдин ччвур ва учу улупу аьгъювалар беябур дарапІбан бадали, гъит чпин аьхюдарин гьюрмат уьбхри. ² Хъа аьхюдар хъугърудар вуш, дурар чпин гъардшар вуйивализ дилигну, фурс дарапІри. Хъа гьаци, гъит имбубтІан хъана уччвуйи чпин аьхюрихъ хъпехъури ишри, гьаз гъапиш чпи гъуллугъ апІурайидариз дурарра дугъри ва ккуни гъардшар ву. Адмийириз уву гьамци улупну ва гьаддихьна дих дапІну ккунду.

КучІлин улупбар ва гьякь девлет

³ Шли, Аллагьдиз лайикь вуйи гьюрмат хурайи ихь Агъа Иса Месигьдин сагъ гафар ва аьгъювалар тина гьадаъну, фу-вуш жараб улупураш, ⁴ думу хъюхъ забгурайир, амма фукІа аьгъдрур ву. Дицир адми, гьюжатарин ва люкьнарин кчІихбарин уьзри гъадагънайир ву. Гьацдарилантина бахилвал, гъярхьувалар, агьрар-люкьнар, хъугъвалиан адахъувал ⁵ ва кІулиъ маъ адарди гьякьвал кІваълан гъубшдарин гъанихвали, зат ккудудукІру гьюжат арайиз хура. Аллагьдин ляхнар дурариз чпи ацІузтІан вуйидар дар.

⁶ Хъугъувалин тІалабар тамам апІуб ва варибдиин рази хьуб зурба хъуркьувал ву. ⁷ Фицики му дюн’яйиз ухьу гъабхиб фукІара адарихь, я фукІа кьяляхъ гъабхидира дархьа. ⁸ Уьлна палат аш, гьаддиин рази хьидихьа. ⁹ Девлетлу хьуз ккунир гизаф абдал ва хатІавалин тямягьяриъ ахъру. Дурари адмийир бедбахтвалин ва аьжалин деринариз хъчІюхюру. ¹⁰ Вари жюре чІуруваларин ччив – пул ккун апІувал ву. Пул ккун дубхьну, хъугъувалихьан гьудучІву адмийир гизаф бахтсуз гъахьну.

Фу кІваълан гьархну ккундарш

¹¹ Хъа уву, Тимофей, Аллагьдин адми вува, гьаддиз гьацдарихьан гьерг. Дюзвал, хъугъувал, хъугъувалин тІалабар тамам апІувал, масанвал, сабур, умунвал бисуз хилар гьачІаркк. ¹² Хъугъувал бадали игит йихь, увуз дих дапІнайи гьаргандин уьмрихъан хъичІих. Фицики уву лайикьлуди гизаф шагьидарин улихь яв хъугъуваликан гъапнийва. ¹³ Гьамус узу увуз, Понтий Пилатдин унтІаъ кІубанди гьаму хъугъуваликан шагьидвал гъапІу Месигь Исайин ва варибдиз уьмур тувру Аллагьдин улихь дих апІуразавуз: ¹⁴ увуз гьич саб тягьна дяргъруси, узу увуз гъапиб вари ихь Агъа Иса Месигь гъяйизкьан, тамам апІури гъуз. ¹⁵ Вахт гъабхьиган, Думу ухьухьна Аллагьди, хушбахтавар ва сар вуйи Гьюкумдри, паччгьарин Паччагьди ва агъйирин Агъайи, лик кубкІуз даршлу аквнаъ айи ва адмийирикан гьич саризкьан дярякъю ва рякъюз даршлу, аьжал хътру Сари гьаъди. Гьадгъануб ву гьюрмат ва кьудрат гьаммишандиз! Амин.

¹⁷ Гьаму дюн’яйиин девлетлу вуйидариз йип: фурсар дарапІри ва чпин девлетарихъ йирфар хътричри – думу мюгькам вуйиб дар. Уьмрикан кьукь ктабгъури яшамиш хьуз вари лазим вуйиб артухъра кади тувру Аллагьдихъ йирфар хъирчиш, хъа ужу ву. ¹⁸ Дурарикан ужувлар апІуб ккун апІин, гъит гъяни ляхнарихьди девлетлу ишри. Кьискьисар даришри ва иштагьниинди имбудариз чпин девлетнакан капІри. ¹⁹ Гъит, гьамци чпиз хазна уч апІри – му гъюз ккимбу гьякь уьмур гъазанмиш апІру ижми шибритІ хьибди.

²⁰ Тимофей, яв хилиъ ивнайиб вари уьбх. Аллагьсузвалин улхбар-рахбарихьан ва кучІлин аьгъюваларин гьюжатарихьан гьудучІв. ²¹ Гьацдар аьгъювалар ачуз, кІурайидар хъугъувалихьан гъирагъдиз душна.

Гъит уж’вал учвухъди ибшри!