Фессалоник-1

ФЕССАЛОНИК ШАГЬРИЪ АЙИ ХЪУГЪРУДАРИЗ 1-ПИ КАГЪАЗ

Му кагъаз Коринф шагьриъ дибикІнайиб ву. Павел Фессалоникдизра Исайикан хабар хьади гъушну. Душваъ Дугъан тереф гъибисдарра шулу. Аммаки Иса хачриин дукІну чІиви гъахьи Месигьдикан хабар вуйиб дици дар кІурудари шагьрин саб кьадар агьлар Павелиз къаршуди гъитІиккури гъахьну ва, гьаддиз, думу Фессалоникдиан ухди гъягъюз мажбур шулу. Фессалоникдин хъугърударин уьмрикан аьгъю апІуз ккунди, Павели дина чахъди Коринфдиъ Аллагьдин гъуллугънаъ ади гъахьи Тимофей гьаъру. Тимофей дилин ужудар хабрар хьади кьяляхъ гъюру. Аллагьдихъ хъугърудар, хъергувалариз дилигди, Исайихъ дурар сабан ва гьаргандиз хъугънайи, дурарин хъугъувал лигимтІан-лигим шулайи. Гьаци дурар, вари Греция вуйибси, варидариз Месигьдиъ мисал вуйи. Дурариз чпин месэлйирира архаинвал туврадайи: дурарин арайиъ Павел имдардимиди сакьюдар гъийихнура вуйи. Гъийихдарин багахьлуйириз, гъийихдар чІиви шлуб вуйкІан-дайкІан кІури, гьич сикинвал туврадайи. Дурар ккарцури, Гирами Рюгьну Павелилантина гьамци бикІура: Иса гъафиган, Думу гъяйиз гъийихдарин улихь чІивиди имбудар гьич сабдинна артухъди хьидар. Месигь гъафибси, дийихнайидар чІиви хьиди, гьаддихъан хъугънайидар вари гьаргандиз Гьадгъахъди гъузди. Ужувлан хабарнахъ хъугънайивали гьамустІанра ужуб бегьер хура: гьациб гележегдихъ хъугъру кас гьамустІанра, гьадму вахт улубкьнайиси, яшамиш шула.

¹ Павелихьан, Силвандихьан ва Тимофейихьан – Фессалоникдиъ айи Адаш Аллагьдин ва Агъа Иса Месигьдин хъугърудариз.

Уж’вал учвуз ва мясляаьт!

Фессалоникдиъ гъабхьи хъугъувализ чухсагъул

² Учу ич ккарагбариъ, учву кІваин апІури, учвуз гъапІубдиз Аллагьдиз гьаммишан чухсагъул кІурача. ³ Учу ихь Адаш Аллагьдин улихь ичв ляхнариинди вуйи хъугъвал, юкІв абцІну зигру масанвалин жафа, ихь Агъа Иса Месигьдихъ хъугъувалиин ичв мюгькамди дийигънайивал гьаммишан кІваинди гъибтрача. ⁴ Учуз аьгъячуз, гъардшар, учву Аллагьдиз ккунду, Гьадгъу учву ктагъну, ⁵ гьаз гъапиш, учу учвуз гъабхи Ужувлан хабар неинки гафариинди, хъа гьацира аьхю кьувват, Гирами Рюгь хъади вуйи ва думу гьякь вуйивал улупру лап дерин хъугъувал вуйи. Учвуз аьгъячвуз, учу учвухъди хьайиган фициб саягъниинди учу яшамиш гъахьнуш. Гьаци хьувал учвуз ужувлаз вуйи, ⁶ ва учву учуна Агъайи апІруб апІури гъахьнийчва. Учву Ужувлан хабар, зурба аьзаб-аьзиятназ дилигди, Гирами Рюгьну туву шадвалиинди кьабул гъапІнийчва. ⁷ Гьаддиз учву Македонияйиъна Ахаяйиъ айи вари хъугърудариз мисал вуди гъахьунчва. ⁸ Гьамус учвлантина Агъайин гаф неинки Македонияйиъна Ахаяйиъ рабгъура, хъа гьацира – Аллагьдихъ учву хъугъра, кІуру хабар варишвариз дубшна. Ва сарун дидкан фукІара пуб учуз алабхъурадар. ⁹ Учу наанди гъушишра, варишвариъ, учву учу фици кьабул гъапІнуш, гьаддикан ктибтури шулчуз. Дурари хъана, чІиви ва гьякь вуйи Аллагьдин гъуллугънаъ хьпан бадали, учву фици идоларихьан Гьадму Аллагьдихъна гъафнуш, ктибтури шулчуз. ¹⁰ Дурари гьацира Аллагьди чІиви гъапІу Чан Бализ – гьамус гъюз ккайи Суддин хъялнаккан ккадаъру Исайиз, аьршариан Думу гъяйиз, учву ккилигури гъузну ккуниваликан ктибтури шулчуз.

Фессалоникдиъ Павелин ляхнар

¹ Учвуз аьгъячвуз, аьхир, гъардшар, учу учвухьна гъювал дав ляхин гъабхьундайи, ² аммаки Филипдиъ, учвуз аьгъюганси, аьзабар ва ужуз апІувалар алахьунчуин. Хъа учу ихь Аллагьдин кюмекниинди, учуз писди къаршу удучІвувалариз дилигди, учвуз дирбашди ва ачухъди Ужувлан хабарнакан ктибтнийча. ³ Учу учвуз улупу аьгъювалар ич улдугнайиваларин бинайиин алидар я чІуру ниятназ апІурайидар, я кучІлар айидар дар. ⁴ Аллагьди, учу лайикь вуди гьисаб дапІну, Чан Ужувлан хабар ич хилиъ ивнийи. Учу гьаци, адмийириз ккун ишри, кІури гъапІундарча, ваъ, хъа – ихь юкІвар ахтармиш апІру сар Аллагь бадали. ⁵ Учвуз аьгъюганси, учу гьич саб ражнукьан уччвудар гафар гъапІундарча, ва ич хайирназ гьич саб аьмал гъапІундарча – мидин шагьид Аллагь ву! – ⁶ ясана адмийирин ад гъазанмиш апІуз шерик гъахьундарча – я учвухь, я жарадарихь.

⁷ Учу Месигьдин вакилар вуди хьпаз лигну, учхьан учву ишлемиш апІуз шуйчухьан. Хъа учу учв’ин гъагъ илипундарча ва ичв арайиъ бицІидар хъайи дадаси гъахьунча. ⁸ ЮкІвар ачухъди, шадвалиинди ичв хилариъ неинки Ужувлан хабар, хъа гьацира ич уьмрарра ивнийча. Магьа гьамкьан учву учуз ккун гъахьунчуз! ⁹ Ичв кІваин илмийичвки, гъардшар, уч’ин алахьу гъагъишнар ва ич аман-иман адатІру жафйир. Учу Аллагьдихьан Ужувлан хабарнакан учвуз ктибтруган, учв’кан гьич сариинра гъагъ илилипбан бадали, йишв-йигъ лихури гъахьунча.

¹⁰ Учву хъугърудар гъахьиган, учу фици марцциди, гьякьлуди ва тахсир ктарди учвухъди гъахьнуш, учвура Аллагьдихъди шагьидар гъахьунчва. ¹¹ Учвуз аьгъюганси, адаш чан балихъди фици шулуш, учура учвухъди гьаруридихъди гьаци гъахьунча: ¹² ичв уьмур Чан Паччагьлугъдиз ва аднахьна дих апІурайи Аллагьдиз лайикьлуб хьпан бадали, учу учвуз дих апІури гъахьунча, ял апІури гъахьунча ва насигьятар туври гъахьунча.

¹³ Хъана учу Аллагьдиз зат сикин дарди баркаллагь кІурача, гьаз гъапиш учву учкан гъеебхьу Аллагьдин Гаф гьаци, адмийин гафарси ваъ, хъа дугъридан гьякь Аллагьдин гафси ва учвуъ, хъугърудариъ, ляхин гъабхурайи кьувватси кьабул гъапІунчва. ¹⁴ Учву, гъардшар, Месигь Исайихъди саб духьнайи Ягьудияйиъ айи Аллагьдин хъугърудариз ухшар духьначва: учвуз ичв адмийирихьан бегьем учІврушин кубкьунчвуз, дурариз чпин адмийирихьан – жугьдарихьан кубкьубси. ¹⁵ Дурар, пайгъамбрар йивну йихруси, Агъа Иса дукІну, ухьухъ хъергна. Дурарин ляхнар Аллагьдиз кьабулди дар, ва дурар вари адмийирин душмнариз илтІикІура. ¹⁶ Дурари ухьуз хабарнакан жугьуд дарудариз ктибтуз гъадагъа апІура. Вари гьамцдар ляхнариинди дурари чпин гунгьарин гъагъ артухъ апІура. Хъа Аллагьдин хъял дурариин сабан ва гьаммишандиз алабхъиди!

Павелиз Фессалоникдиз хъана гъягъюз ккун шулу

¹⁷ Гъардшар, учу учвхьан сабан цІиб вахтназтІан жара гъахьундайча, думура – бедендиинди, хъа юкІвариинди – ваъ, гьамус учву рякъюз гизаф тямягь хъайич. ¹⁸ Ав, фу дапІнура учвухьна гъюз гизаф ккун гъабхьунчуз. Дугъриданна узу, Павели, гьаци апІуз гизаф ражари хъюгъюнза, хъа ШейтІни гъитри гъабхьундар. ¹⁹ Учву дарди, сарун фужар шул ич миж кайидар, ич шадвал алидар, ич адлувалин заанвал хьайидар. Учв’инди учу ихь Агъа Исайин улихь, Думу кьяляхъ гъафиган, фурслу хьидича?! ²⁰ Фицики ич адлувал ва шадвал, иллагьки, учву вучва!

¹ Ва гьаддиз, сарун учхьан учву дарди гъузуз даршлуган, Афинайиъ учу ялгъузди гъузуз кьаст гъапІунча. ² Хъа ихь гъардаш Месигьдикан Ужувлан хабар рабгъру Аллагьдин гъуллугъчи Тимофей учвухьна гьаъдича. Дугъу учвуз читин хьибган, кюмек апІиди, ккарцциди ва ичв хъугъувал мюгькам апІиди. Учвузра аьгъячвуз гьацдар аьзабар ухь’ин алахьруб. ⁴ Гьеле учу учвухъди хъайигантІан ухь’ин аьзабар улукьрубдикан кІури гъахьунча. Учвуз аьгъюганси, гьаци хьузра гъабхьну. ⁵ Ва гьаддиз узхьан сарун, ккилигури, аьгь апІуз шули амдруган, ичв хъугъуваликан аьгъю апІуз Тимофей гьаунза. Алдатмиш духьну, учву рякълан улдугнийкІан кІури, ва ич жафйир дав гъахьнукІан кІури, гучІури гъабхьунзуз.

⁶ Амма учвхьан кьяляхъ гъафи Тимофейи ичв хъугъуваликан ва масанваликан, учву учу ич ужудар ляхнариинди кІваин уьрхюрайиваликан ва ич учву рякъюз юкІв хъайиси, ичв учу рякъюзра юкІв хъимбуваликан ужудар хабрар гъахну. ⁷ Гьаддиз, гъардшар, вари гьаму бедбахтвалариъ ва гьергувалариъ айи учу ичв хъугъували ккарцури гъахьну. ⁸ Учву ижмиди Агъайихъди хъайивали учура уьмриъ шад апІуру. ⁹ Ихь Аллагьдин улихь учву учуз туву му шадвалин гьякьнаан Аллагьдиз фициб чухсагъул кІуру?! ¹⁰ Аллагьди учву рякъюз мумкинвал туври кІури ва ичв хъугъувалиъ учвуз гьудрубкІрубдин кюмек ибшри кІури, эргвал аьгъдарди, учу йишв ва йигъ ккарагурача.

¹¹ Гъит Чав Аллагьди, ихь Адашди, ва ихь Агъа Исайи ич рякъ учвухьна гьапІри, ¹² хъа ичв чиб-чпихьна ва жарадарихьна вуйи масанвал, ич учвухьна айи масанвалси, Агъайи гьубкІну ва артухъра кади туври. ¹³ Ва гъит Гьадгъу учву, ихь Агъа Иса Чан вари гирами халкьра хъади гъюру Йигъ гъяйизкьан, ихь Аллагьдин ва Адашдин улихь марцциди гъузбан бадали, гирамивали ацІнайи ичв юкІвар мюгькам апІри. Амин.

Аллагьдиз ккуни уьмур

¹ Аьхиринишв’ин гъардшар, учу учвуз Аллагьдиз ккунидарси яшамиш хьуз улупганси, гьамусдихъантинара гьаци яшамиш хьуб учвкан Агъа Исайин ччвурнахъан ккун апІурача. Учву гьамустІанра гьаци яшамиш шули ачва, хъа вушра, хъана артухъ ужуйи яшамиш хьуз чалишмиш йихьай.

² Учу учвуз Агъа Исайин гьюкмиинди фицдар насигьятар тувнийиш, гьархнадарчвуз. ³ Аллагьдин ният учву Чаз бахш хьувал ва кьяппавалихьан гьудучІвуб ву. ⁴ Гъит гьарсари, гирами ва марцц шлуси, чан жандин эйвал апІри, ⁵ хъа, Аллагь аьгъдру аллагьсузарси, тямягьярин цІа кабхъну даришри. ⁶ Гьацдар тямягьяриъ ахъуз ва гъардшин ихтиярариин лик иливуз гьич фикиркьан мапІанай, гьаз гъапиш, учу улихьна гъаписи ва учвкан ижмиди ккун гъапІганси, вари гьацдар ляхнариз Агъайи жаза гьадабтІиди. ⁷ Аллагьди ухьуз чиркинвалиъ яшамиш хьуз ваъ, хъа гирамивалиъ гъузуз дих апІура. ⁸ Гьаци вуйиган, шли му тина апІураш, дугъу адми тина апІурадар, хъа Чан Гирами Рюгь учвуз туврайи Аллагь тина апІура.

⁹ Гъардшарихьна вуйи масанваликан бикІуб думукьан лазим вуди гьисаб апІурадарча, фицики Чав, Аллагьди, учву чиб-чпи ккун апІуз улупунчвуз. ¹⁰ Хъа учву Македонияйиъ айи вари гъардшарихьна гьаци хьузра шулачва. Гъардшар, учвуз миннат апІураза, имбубтІан артухъ чиб-чпи ккун апІинай ¹¹ ва, гизафна-гизафси, архаинди яшамиш хьуз чара абгай. Жарадари ичв гьюрмат уьбхбан ва ичвра сабдиъра ул ади дархьбан бадали, гъит гьарсари чан ляхин апІри ва уьмриз уьлин кьацІ гьарди, учу учвуз мугагьназ гъапиганси, чан хилариинди гъазанмиш апІри.

Агъа гъюбкан

¹³ Гъардшар, учуз учву гъийихдарикан фукІа-мукІа аьгъдарди гъитуз ккундарчуз. Сабдикра миж кимдру имбу адмийириси, дурарин дердер мизиганай. ¹⁴ Эгер ухьу, Иса, дукІну, чІиви хьувалихъ хъугъраш, ухьу гьацира Исайихъ хъугъну гъакІидар Аллагьди аьршариз Гьадгъахьна хъади гъягърувалихъ хъугърахьа.

¹⁵ Учу учвуз Агъайин гафариинди кІурача: Агъа гъяйиз, ухькан чІивиди гъуздар дийихнайидарин улихь гьучІвидар, ¹⁶ гьаз гъапиш, хабар утІубччвган, аьхю малайикдин дих утІубччвган, Аллагьдин зурна гъарабхган, Агъа Учв завариан гъиди ва сифте, Месигьдихъ хъугъну, гъийихдар чІиви хьиди, ¹⁷ хъасин ухьу, чІивиди гъузнайидар, гьадрарихъди сатІиди дифариинди Агъа рякъюз гъахиди ва гьаци гьаммишандиз Агъайихъди гъуздихьа. ¹⁸ Гьаци вуйиган, гьамцдар гафариинди чиб-чпик юкІв капІри гъузай.

Агъа гъюрайивалихьна гьязурди гъузай.

¹ Фуну вахтари ва фуну йигъан Думу гъюруш, гъардшар, учвуз дидкан бикІуб лазим дар. ² Учвуз лап ужуйи аьгъячвуз Агъайин Йигъ, йишвну тІафалси, кІваин алдруган, гъюру. ³ Адмийири: «Варишвариъ мясляаьт а ва гьич саб жюрейинра хатІа имдар!» – пуз хъюгъиган, бицІир кайи дишагьли сабпну бицІир апІуз иццрушну гъадагърубси, гьадмуган дурариина аьжал гъядябхъиди, ва дурарихьан гьергбиинди чпи уьрхюз хьибдар!

⁴ Хъа учву, гъардшар, мучІушнаъ адарчва, ва гьадму Йигъандин аквну, тІафлиси, мюгьтал апІидарчву. ⁵ Фицики учву вари аквнан ва йигъандин веледар вучва. Ухьу мучІушнакна йишвак кахьрадархьа. ⁶ Гьаддиз, имбударси, даахну гъуздархьа! Ачухъ фагьум ади ва кІубанди гъуздихьа! ⁷ Йишвну нивкІу улар удутІнайидар ахури шулу, хъа пиянискийир ярхи йишвди убхъури шулу, аьхир. ⁸ Хъа ухьу, йигъан аквнак кахьрайидар, ачухъ фагьум ади хьидихьа ва хъугъвалинна масанвалин халариъ учІвдихьа, кІул’ин ухьу уьрхру пІапІах улубкІидихьа! ⁹ Гьаз гъапиш Аллагьди ухьуз Чан хъял улупнадар, хъа, ихь Агъа Иса Месигьдиланмина вуйи ухьу уьрхювал улупна. ¹⁰ Гьаддиз ухьу дийихну ашра, адаршра, ухьу гьаммишан Гьадгъахъди хьуз кІури, Думу ухьхъанди гъакІну. ¹¹ Гьаци вуйиган, чиб-чпик юкІв капІри йихьай ва чиб-чпиз хил туври апІинай – му учву апІурачва.

¹² Учвкан ккун апІурача, гъардшар, учву Агъайихъ хъаърайидариз ва, гьарсаб улупури, кІваантІан жафа зигурайидариз артухъ гьюрмат апІури йихьай. ¹³ Дурари апІурайи ляхниз дилигну, дурариз аьхю масанвалиинди гьюрмат апІинай. Чиб-чпихъди мясляаьтниинди гъузай. ¹⁴ Гъардшар, учвкан ккун апІурача: ляхин апІуз даккнидарин кІулиъ аькьюл апІай, кагьлидариъ кІубанвал тІапІай, зяифдариз гъюн ккивай, варидарихъди сабурлу йихьай. ¹⁵ Лигайгьа, ичв арайиъ гьич сарира чІурувализ чІуру жаваб тутруври. Гьаммишан, чиб-чпихьна шлуси, варидариз ужувлиинди йихьай. ¹⁶ Гьаммишан шадвалиъ гъузай, ¹⁷ зат сикин дарди ккарагури йихьай, ¹⁸ варибдиз чухсагъул йипай – магьа учвуз, Месигь Исайихъ хъугърудариз вуйи Аллагьдин ният. ¹⁹ Рюгь мукутІуршванай, ²⁰ пайгъамбарвалин гафар тина магьадаанай, ²¹ хъа вари ахтармиш апІури, ужувлан тереф дибисну, гъузай, ²² жюрбежюр писваларихьан ярхла йихьай!

²³ Гъит мясляаьтнан Аллагьди Чав учву гьуркІну гирами апІри. Ва гъит вари учвуъ: рюгьра, юкІвра, жанра – ихь Агъа Иса Месигь гъюру гьадму Йигъаз саб зиян ктарди уьрхри. ²⁴ Учвуз дих АпІурайир аьгьтлу ву, ва Гьадгъу му тамамра апІиди!

²⁵ Гъардшар, учхъанра ккарагай!

²⁶ Вари гъардшариз гирамивалин мак апІбиинди салам тувай. ²⁷ Агъайин ччвурнахъан миннат апІураза, гьаму кагъаз вари гъардшариз урхай.

²⁸ Ихь Агъа Иса Месигьдин уж’вал учвухъди ибшри!