Петрин-1

ВАРИ ХЪУГЪРУДАРИЗ ПЕТРИН САБПИ КАГЪАЗ

Гирами Рюгьну Петрин хилариинди бикІуз гъиту гьаму сабпи кагъаз, БицІи Азияйиъ Исайихъ сабпидарди хъугъдар, чпин хъугъувалиан кялхъюваларилан, рихшанд апІуваларилан ва сабра дарди ктукьури балайикк ккитуваларилан гъагъи гьялнаъ ахьдариз кІури дибикІнайиб ву. Дурар саб суалну архаинди гъитрадайи: чпи айи йишваъ арайиз дуфнайи гьяларихъди аьлакьайиъ шулуш, даршсан гьюкумдрариз къаршу гъедергуруш. Петри дурариз, чпин хъугъувалилантина аьзабариъ ахъдичва, кІура, гьаз гъапиш Исайихъ хъугънайидар имбударигъян жа-жаради аьгъю шулу, дурарин уьмур цІийивализ дигиш дубхьна. Кагъзиъ, гьамцдар дюшюшариъ ахъу Исайихъ хъугърудари гьапІну ккундуш улупури, гьаму кІулин суаларилан гъайри, мянфяаьтлу насигьятарра а. Вари хъугърудари фикир тувру варитІан аьхю умуд, Гирами Рюгьнан насигьятарин мюгькам бина ву. Исайин вакили кагъаз урхрудариз гьамци кІура: «Хъа гьамци, Месигьдин аьзабариъ иштирак учвура шулайивалиин шад йихьай, Дугъан ад ачмиш гъабхьи вахтнара шадвали ацІдичва ва гьарай ипдичва» (4:13).

ЧІиви умуд

¹ Иса Месигьдин вакил Петрихьан гъурабйирди жара жилариин Понтдиъ, Галатдиъ, Каппадокияйиъ, Азияйиъ ва Вифанияйиъ дарагънайи, Аллагьди Чан рябкъювалиинди кадагънайи хъугънайидариз, учву, Рюгьну гирами дапІнайидар, Иса Месигьдихъ хъпехъбан ва Дугъан ифдиинди марцц хьпан бадали, учвуз гьуркІну вуйи уж’вал ва мясляаьт ибшричвуз!

³ Ихь Агъа Иса Месигьдин Адаш ужувлиинди ишричав. Дугъу, Иса Месигь чІиви апІбиинди Чан зурба вуйи уж’вал улупну, ухьу заълан бабкан гъахну ва цІийи уьмрихъ хъаъну. ⁴ Гьамдиинди ухьук, я аьжалихьан, я камиваларихьан, я вахтнахьан чІур апІуз даршлу, чІиви миж кивунхьук. Ихь миж кайи «девлет» ухьуз аьршариъ уьбхюра. ⁵ Учвуз, ичв хъугъувализ дилигну, Аллагьдин кьудратнакк ккайидар, гъиямат йигъахъна аьхиримжи вахтари ачмиш шлу уьрхювал рубкьидичвуз. ⁶ Гьаци вуйиган, гьеле сацІиб вахтари гьаржюре читинвалариъ учІврушнар кчІикьуб алабхъурушра, гьамдиин шад йихьай. ⁷ Аьгъю йибхьайки, гъизилра цІиинди таза алапІурайиб. ЦІихьан гьеле думу зат имдарди деебцІну гъядапІузра шулу, хъа ичв хъугъувал гъизилтІан лап артухъ багьа ву, ва думу, гьякьди вуйиб вуш, ясана – дарш, Иса Месигь кьяляхъ гъафи вахтна гъиямат йигъан жвуван тяриф, ад ва заанвал жвувахьна рубкьбан бадали, ахтармиш дапІну ккундарин?! ⁸ Думу (Иса) ккундучвуз, гьеле учвуз гъяркъюндаршра, учву Дугъахъ хъугърачва, гьеле гьаму ражари Думу ичв уларикк ккадаршра. Учву улупуз даршлу аьжайиб шадвали ацІну урхьурачва, ⁹ гьаз гъапиш ичв хъугъувалин метлеб кІулиз удубчІвурайичв – ичв уьрхювал.

¹⁰ Гьаму уьрхюваликан чпин вахтари гьеле пайгъамбрари чпихьан удукьрубкьан ужуйи ахтармиш’валар гъахури гъахьнийи, ва улихьмиди Аллагьдин гъянивалиан учвуз тувнайи багъишдикан гъапнийи. ¹¹ Дурари, Месигьдин Рюгьну фуну вахтнакан кІураш, фицдар гьялариъ Месигьдин аьзабар шулуш, ва гьадму аьзабарин кьяляхъ шлу Дугъан аднакан аьгъю апІуз ккунди, ахтармиш’валар гъухнийи. ¹² Пайгъамбрариз чпи чпин – ваъ, хъа – ичв гъайгъушин бадали гъилихуваликан ачмиш гъабхьнийи. Дурари аьршариан гьаънайи Гирами Рюгьну дебкку Ужувлан хабарнакан хабар дебккнийи – гьаму ражари рабгъурайи Ужувлан хабар. Гьаму сир аьгъю апІуз ккунди, гьеле аьршарин малайикарра кмиди тямягьну йихура. ¹³ Гъит, гьаддиз ичв фагьум фагьмихъ хъади ибшри, ва ляхнар апІуз гьаммишан гьязурди гъузай. Вари ичв умуд Аллагьдин гъянивалиин илипай, хъа гъиямат йигъан Иса Месигь гъафиган, учвуз ичв умуд кайиб вари багъиш апІиди.

Гирами уьмрихъна дих

¹⁴ Хъпехъру бицІидарси, учву Аллагьдихъна гъяйиз айи ичв тямягьяр фицдар вуйиш, гьадрарихьди ичв уьмур хъапІуз мигъитанай. ¹⁵ Хъа гьатци, учвуз дих ДапІнайир фици Гирамир вуш, учвура гьаци гирамидар йихьай ва ичв хасиятра гирами вуйиб ибшри. ¹⁶ Гьаддиз БикІбариъ дупна:

«Гирамидар йихьай, гьаз гъапиш Узу Гирамир вуза».

¹⁷ Эгер учву сабдизра дилигди, вари адмийирин суд АпІруриз Адаш кІураш, му дюн’яйиъ имиди Дугъхьан гучІ’вал кади яшамиш йихьай. ¹⁸ Аьгъю йибхьайки, ичв абйирихьан дурубкьнайи гьаму файдасуз уьмриккан учву, гъизилна арсси чІур дубхьну гъябгърубдихъ кьимат тувну гъадагъну азадвалиъ тІаънадар, ¹⁹ хъа гьич саб жюрейин зиян, я скаш ктру ччилан ифдихъси, варитІан багьа вуйи Месигьдин ифдихъ гъадагъну, азадвалиъ тІаънайидар вучва. ²⁰ Иса, дюн’я арайиз хайиз, учву бадали Кадагънайир вуйи, ва гьаму аьхиримжи йигъари Думу жилиина гъафну. ²¹ Учву Думу гъачІидаригъян чІиви гъапІу ва Дугъаз ад туву Аллагьдихъ, Гьадгъулантина хъугъначва. Гьаци вуйиган, ичв хъугъвал ва миж Аллагьдиъ авучв.

²² Учвуз ичв хъугънайи гъардшар, жвув гьякьвалихъ хъебехъну марцц гъахьиган, кью-кьюб маш гъидривру масанвалиинди, марцци юкІвариинди ва жандин вари кьувватниинди ккун гъахьунчвуз! ²³ Учвуз цІийи уьмур тувру тум алаур йибкІру тум даричв, аьхир, хъа – дирибкІру тум. Думу тум чІиви ва гьаммишандиз вуйи Аллагьдин Гаф ву. ²⁴ Гьаддиз Гирами китабариъ дупна:

«Инсаният укІси ву,

дурарин усппагьивал – хутІлин кюкюси.

УкІ ебццуру – кюкюра алдабхьуру.

²⁵ Агъайин гаф

аьсрариан-аьсрариз гъубзра».

Агъайин гьадму Гаф, учвуз гъурубкьу Ужувлан хабар ву!

ЧІиви гъван ва гирами халкь

¹ Гьаци вуйиган, гьарсаб чІуруб, гьарсаб кучІал, кью-кьюб маш гъивнайивал, маш ккадарди хьувал, гьар жюрейин футнийир гатІахьай. ² Тазади бабкан духьну имбу бицІидарси, рюгьнан тІяаьмлу никкдихъ, гьаддин кюмекниинди аьхю хьуз ва уьрхювал гъазанмиш апІуз, тямягь хъивай. ³ ИкибаштІан, Агъа фици ужур вуш, учвуз аьгъю гъабхьунчвуз. ⁴ Гьадгъахьна гъачай – чІиви Гъвандихьна, адмийири тина гьадапІубдихьна, хъа Аллагьди ктабгъубдихьна, Дугъан уларихь багьа вуйибдихьна. ⁵ Учвура, чІиви гъванарикан хал диврайиси, ичв учвкан рюгьвалин хал тикмиш апІинай. Гьадмуган, гирами вуйи гъуллугъчйир хьпан кьяляхъ, Месигьдиланмина Аллагьдиз кьабул вуйи, Рюгьниинди вуйи гъурбнар апІидичва. ⁶ Гьаз гъапиш, Гирами китабариъ гьаци кІура:

«Магьа, Узу Сион дагъдиин

мурччван гъван дивдиза – кадабгънайиб, багьа вуйиб.

Дугъахъ хъугъру гьич саркьан биябур хьидар».

⁷ Гьаци вуйиган, учвуз, хъугърудариз, Думу зурба хазна ву, хъа хътругърудариз –

«Устайи тина гъапІу гъван

мурччвануб гъабхьну»,

⁸ ва

«Му Гъван хъарсру гъван ву.

Му Гъвандихъ хъарсу адмийир

алдакуру».

Магьа, дурар хъарсну, гьаз гъапиш Ужувлан хабарнахъ хъугърадар. Дурарихъди гьаци шулайиб ву.

⁹ Хъа учву, кадабгънайи жинс, Паччагьдин гъуллугъчйир, гирами халкь, Аллагьдин хусусият, мучІушнаан Чан аьжайиб аквнаъ хьуз учвуз Шли дих дапІнаш, Гьадгъан зурба ляхнарикан хабар дебккбан бадали, гъядягънайидар вучва.

¹⁰ «Саб вахтна,

халкь ву дупну – халкь дарудар,

хъа гьамус – Аллагьдин халкь.

Улихьди – уж’вал дархьидар,

хъа гьамус

думу учвуз гъабхьунчвуз».

¹¹ Йиз багьа вуйидар, гьаму дюн’яйиин улукьуз дуфну, кьяляхъ гъягъюри рякъ’ин алидарси, кІвахьди дяви гъабхурайи жандин тямягьярихьан ярхлади гъузуб учвкан ккун апІураза. ¹² Гъит, ичв хасият Аллагьдихъ хътругърударин арайиъ марцциб ибшри. Ва гьадмуган, гьаму ражари учвуз, пис касар ву, кІури люкьнар апІурайидари, учву апІурайи ужувлан ляхнар рякъюри, Аллагь гъафи гъиямат йигъан, Дугъан ад апІиди.

Гьюкумдариз мютІюгъ йихьай

¹³ Агъа бадали мютІюгъ йихьай адмийири дерккнайи вари гьюкмариз, ¹⁴ гьюкум гъабхурайидариз, гьаз гъапиш дурари тІафларизна тІарашчйириз жазйир гьадатІуру ва ужувлар апІрудариз пешкешар тувру. ¹⁵ Даршуз Аллагьдин ният гьациб ву: ужувлар апІрудари, абдларин чІуруди улхру ушварихь, ужудар ляхнар апІбариинди гьитІибшвну ккунду. ¹⁶ Хъа учву, азад адмийир вуйивализ дилигну, ахмакь ляхнар ккеркуз ичв азадвал ишлетмиш мапІанай – учву Аллагьдин лукІар вучва, аьхир. ¹⁷ Варидариз гьюрмат апІинай, гъардшар ккун апІинай, Аллагьдихьан гучІ апІинай, паччагь гьисабназ гъадагъай. ¹⁸ ЛукІар, ичв агъйириз хай гъюру жюрейиинди гучІ’вал кади, неинки гъянириз ва гъюдлириз, хъа учІвру хасият хъайириз вушра, мютІюгъ йихьай. ¹⁹ Тяриф хьибди, чан аьзабар аьгь апІрурин, гьаз гъапиш дицир Аллагьдин ниятнан гъавриъ айир ву; думу лайикь дарди бедбахтваларикк ккахъна. ²⁰ Хъа эгер, тахсир дапІну, учву урччвураш, ичв фициб ад шул? Хъа учву уж’вал апІури, аьзабар сабурлуди аьгь апІуруш, Аллагьдин улихь ичв аваза за хьибди. ²¹ Учвуз, учву гьамци хьуз, дих дапІначвуз, аьхир, гьаз гъапиш Месигь учвхъанди аьзабарикк ккахъну ва Дугъу дурар аьгь гъапІну. Дугъу учвуз, Чан шилнаъди гъюз, мисал гъибтну.

²² Дугъу «гунагь гъапІундар ва Дугъан ушвниин кучІал илибшундар».

²³ Учв биябур апІруган, Дугъу Чавра адмийир биябур апІуз хъюгъюндар. Учв аьзабарикк ккахънайиган, Дугъу гучІар ккаундар, хъа Дугъу Учв гьякь вуйи Суд’яйин хилиз тувнийи. ²⁴ Дугъу Чав, ухьу гунгьариз дийихнайидарси хьуз ва гьякьвал бадали яшамиш хьуз, Чан хусуси бедендиъди ихь гунгьар хачриина гъухну. Учву Дугъан зийнариинди сагъ гъахьунчва. ²⁵ Учву саб фила-вуш, марччарси, улдугнайчва, хъа гьамус учву ичв Марччлихънихьна – гъайгъу Зигрурихьна кьяляхъ хътакунчва.

Жиларин ва хпарин гьякьнаан

¹ Учвура, хпар, ичв жилариз гьаци мютІюгъ йихьай. Дурарикан шли Аллагьдин Гаф кьабул апІурадарш, чпин хпарилантина, ² ичв марцци ва Аллагьдихьан гучІру уьмур уларикк ккади рябкъюрайибдиинди, саб гаф адарди, дурарра хъугъвалихъна гъиди. ³ Гъит ичв усппагьивал, гьар жюре аьжайиб кІюлгънар апІбиинди, гъизиларихьди балгбиинди, ясана уччвудар палтариинди чІатлануб дарибшри, ⁴ хъа – айтІануб: чІур даршлу усппагьивал улупру хъпехъувалиинди ва гьюжатариз ададапІру рюгьниинди кІваан вуйиб ибшри – гьамциб ву Аллагьдин улихь багьавал. ⁵ Фила-вуш садар вахтари, Аллагьдиин хъугъвал али дишагьлийири, чпи гьамцдариинди балгуйи, аьхир! Дурар чпин жиларихъ хъпехъуйи. ⁶ Мисалназ, Сара, варибдиъ Ибрагьимдихъ хъпехъуйи ва дугъаз чан агъа кІуйи. Учвура Сарайин шубар вучва – эгер учву ужувлар апІуруш ва гучІури хьуваликк кІул ккивруш.

⁷ Ари гьамци, сатІлан вуйи уьмриъ жиларра чпин хпарихьна лайикь вуйибси духьну ккунду. Дурарин гьюрмат дюбхну ккунду, гьаз гъапиш, гьеле дурар цІибди зяифдар вушра, жиларихьди сабси ужувлан багъишдин ирсчйир ву. Гьаддиз, учву ккарагруган, гьич сарихьанра машат апІуз хьибдарчвуз.

Гьякь ляхин апІузди алабхъру аьзабнакан

⁸ Аьхирки, гъит ичв сабсдар фикрар ва гьиссар ишри, ичв гъардшарихьна вуйи саб масанвал ибшри, язухъ зигуб ва фурс ктрувал ибшри. ⁹ Писвализ – писвалиинди, биябурвализ – биябурвалиинди жаваб мутуванай, хъа жараси, уж’вал апІбиинди жаваб тувай, гьаз гъапиш, учвуз гьаддиз дих дапІна ва учвузра, ирс вуди, уж’вал дебккуз гаф тувна.

¹⁰ «Шлиз бахтаварвалиинди яшамиш духьну

ва ужудар йигъар дяркъну ккундуш,

гъит, мелз чІурубдихьан уьбхри,

хъа ушв – кІучІлихьан.

¹¹ Гъит, писвалихьан ярхла ишри,

гъит, уж’вал апІри;

гъит, мясляаьт абгри,

гъит, ислягьвал арайиз хури,

¹² фицики Агъайин улар гьякьлудариин ал

ва ибар

дурарин ккарагбарихъ хъивна.

Хъа писвалар апІурайидарихьинди лигруган,

Агъайин машнак хъял кубчІвру».

¹³ Хъа шлихьан учвуз зарал тувуз шидихъа, эгер уж’вал апІузтІан ичв тямягь хътарш? ¹⁴ Гьеле учву, ичв гьякьвализ дилигну, балйирикк ккахънашра, бахтаврар вучва! Дурариз гучІурайибдихьан гучІ мапІанай ва гучІ’валиъ мугъузанай! ¹⁵ Хъа Агъа Месигьдин гьюрмат ичв юкІвариъ гирамиди уьбхяй. Учвуъ яшамиш шулайи умуд фтиин биналамиш дубхьна, кІури, гьерхруриз, ккунириз жаваб тувуз шлубси гьязурди гъузай; ¹⁶ анжагъ аькьюллудина гьюрматлудитІан жаваб мутуванай. Учву яшамиш шулайи ичв гъяни уьмур кьабул дарди, люкьнар апІру адмийириз, Месигьдихъ хъугъиган, чпин гъапІу гафарихьан нач шлуси, ичв намус марцциди уьбхяй. ¹⁷ ЧІуруб дапІну, аьзабнакк ккуркьайиз, эгер Аллагьдин ният вуш, ужуб дапІну аьзабнакк ккахъуб хъа ужуйи даринхъа! ¹⁸ Гьаци Месигьра, ухьу гъапІу гунгьарихъанди, сабан ва гьаргандиз, Гьякьлур гьякьсузарихъанди, учву Аллагьдихьна хпан бадали, ккахъундаринхъа! Дугъан беден аьжализ тувну гъабкІну, хъа Рюгь уьмрихъна кьяляхъ хътакну. ¹⁹ Иса гьадму Рюгьнаъди, мучІушнаъ айи рюгьяриз Ужувлан хабарнакан ктибтури, гъушну. Думу рюгьяр, дюн’я, шид илипну, ккапІуз ккунди, Нюгьди гими апІайиз Аллагь сабурлуди ккилигурайи вахтна, Аллагьдихъ хъпебехъу адмийирин рюгьяр ву. Нюгьдихъди штуин али гимдиъди сакьюдартІан гъюрхюндайи – анжагъ миржир кас. ²¹ Думу шид, цІийи хьуз, штуан хьувалин лишан ву. Думу лишан гъира кмиди учву уьбхюрайиб ву. Штуан хьувал – му ичв жандилан чиркшин алдапІувал дар, хъа ичв марцци кІвахьан Аллагьдиз тувнайи гаф ву, Иса Месигь чІиви хьуб’инди учву уьрхюрайи. ²² Завариина за духьну, Думу гьамус Аллагьдин арччул хилихъинди хъа. Дугъаз вари малайикар, гьюкмар ва кьудратар мютІюгъ гъахьну.

Уьмриъ дигиш’валар

¹ Гьаци вуйиган, беден аьзабарикк ккабхъбиинди Месигьди фици аьзиятар гъизигнуш, учвура гьацдар фикрар гьисабназ гъадагъай. (Гьаз гъапиш, беден аьзабарикк ккабхърури гунгьар апІуб гъибтру). ² Гьацдар фикрар гьисабназ гъадагънайиган, гъюз имбу уьмур – инсандиз ккуниси ваъ, хъа Аллагьдин ниятнаккди хъапІуз шулу. ³ Дарди хьуз, Аллагь кІул’ин алдрударси, мяна адру уьмур тямягьяриъна пиянвалариъ, кьяппавалариъна намусузвалариъ ипну, гьар жюре аллагьаризна идолариз икрам апІури, учву бегьем вахт гьавайиди гьапІунчва. ⁴ Хъа гьамус дурариз учву, чпихъди чпи айи аьгьвалиъ имдруган, аьжайибди гъугъубжвура ва ушвнихъна гъафиб вари кІурачвуз. ⁵ Аммаки дурар багарихьди чІивидаринна гъийихдарин суд апІуз Гъюрурин улихь чпи гъапибдинна гъапІубдин жаваб тувуз мажбур хьиди. ⁶ Магьа гьаддиз, гьеле чпи адмийирди имиди бедендиинди жаза дурариз гьадабтІундаршра – хъа думу жазайиккан дурарихьан ккудучІвуз хьибдар – хъа чпин рюгьнииндикьан Аллагьдин уьмрихъна гъюбан бадали, Ужувлан хабар гъийихдаризра дебккнийи.

⁷ Варибдин аьхир багахь шула. Гьаддиз ачухъ фикир айидар йихьай, фагьум апІинай, хъа гьадмуган ккарагуз хьибдичвухьан. ⁸ Сифтена-сифте вари кІваантІан чиб-чпи ккун апІинай, гьаз гъапиш масанвали гизаф гунгьар ккеркру. ⁹ Мурмрар дарапІди, хялар кьабул апІури йихьай. ¹⁰ Учвкан гьарсариз жарариз дарубсиб хъуркьвал дурубкьначвуз, гьаци вуйиган Аллагьди учвуз багъиш дапІнайи гьаму гьарсаб жюре хъуркьувалар, чиб-чпин гъайгъушнаъ шлуси, мянфяаьтлуди ишлетмиш апІинай. ¹¹ Эгер шлиз гафар апІувалин хъуркьувалар аш, гъит, дугъу Аллагьдин хабарнакан гаф рабгъри; шлиз гъуллугъ апІбаъ хъуркьувалар аш, гъит, Аллагьди туврайи кьувватнаъ учв мюгькам ишри. Гъит, варидари Иса Месигьдилантина Аллагьдин ад бадали жафа зигри! Гьадгъаз ибшри аьсрариан-аьсрариз ад ва кьудрат, амин!

Хъугърударин сабурлуваликан

¹² Йиз багьаллуйир, учвухъди фу-вуш саб аьжайиб шула, кІури, учв’ин алахьурайи гъагъи аьзабариин-аьзиятариин мюгьтал махьанай. ¹³ Хъа гьатцидарихъинди, учву Месигьдин аьзабариъ иштирак шулачва ва, гьаддиз, шад йихьай, хъа гъиямат йигъан, Иса Чан аднаъди гъафиган, шадвали ацІдичва ва гьарай ипдичва. ¹⁴ Эгер учву Месигьдин ччвурналантина биябур апІураш, учву бахтаврар вучва, му гьадму кІуру гаф вуки, Аллагьдин Рюгь Чан вари аднаъди учвуъ архаин духьна. ¹⁵ Эгер учвкан сар фуж аьзабнаъ аш, гъит, думу аьзаб йивну йикІбалан, ясана гьитІибкІбалан, ясана законсузваларилан, ясана футна апІувалилантина вуйиб дарибшри. ¹⁶ Учву Месигьдихъ хъугънайивалилантина аьзиятариъ ахьнаш, гъит, дицири нач дарапІри, хъа, гъит: «му Исайихъ хъугърур ву», – кІуруган, Аллагьди учвуз гьациб уж’вал дебккнайивализ дилигну, гьацири Дугъан ад апІри!

¹⁷ Гьаз гъапиш Суд апІру йигъ багахь хьа. Хъа думу Аллагьдин хуландарилан ккебгъди. Хъа думу ухьлан ккебгърайиган, Аллагьдин Хабар кьабул дарапІрайидарин аьхир фициб шуйкІан?!

¹⁸ «Эгер гьякь вуйирихьан

саб нуфтдитІан жвув уьрхюз шулдарш,

хъа фу шул

кацІнайидарикан ва гунагькрарикан?»

¹⁹ Гьаддиз Аллагьдин ниятниинди аьзабнакк ккайидар, гъит, гьуркІну чпи вариб халкь ГъапІурин ихтиярнаъ учІври – Думу гьарган аьгьтлур ву – ва чпин фикрар ужудар ляхнариина жалб апІри.

Аллагьдин лиж

¹ Гьаци вуйиган, гьамус узу ичв аьхюдарихьна илтІикІураза. Даршуз узура йиз марччарин – хъугърударин аьхюр вуза. Мидлан гъайри, Месигьдикан кчІикьу аьзабарин шагьид вуза ва, магьа, гьамус – хъа дюн’яйиз гъиямат йигъ хьади гъюрайи Дугъан ад рубкьрударикан сар духьназа. ² Ичв ихтиярназ тувнайи Аллагьдин лиж уьбхяй, дидин гъайгъушнаъ учву буржлу вуйивалиан мишанай, хъа Аллагь ихь гъайгъушнаъ айиганси, учвура ичв аьшкьниинди гъайгъушнаъ йихьай; учвуз му дюн’яйикан хайир ктабгъуз ккунди ваъ, хъа ичв гьякь тямягь хъайивалиинди гъайгъушнаъ йихьай; ³ гьякимари Аллагьди чпин хилиъ ивнайи адмийирин зиин агъавал апІурайиганси ваъ, хъа вари лижаз мисал вуди гъуллугънаъ шлуганси гъайгъушнаъ йихьай; ⁴ ва, Аьхюну Марччлихъан гъафиган, гьич зат дучрубхру адлувалин кунцІ рубкьидичвуз.

⁵ Учвура, жигьилар, аьхюдарихъ хъпехъури апІинай; чиб-чпин гъайгъушнаъ духьну, разивалиъ кІул ипай, гьаз гъапиш,

«Аллагь фурсачйириз къаршу удучІвуру,

хъа разивал улупрудариз

Думу рягьим апІрур ву».

⁶ Гьаддиз, Аллагьдин кьудратлу хилин улихь разивалиинди икрам апІинай, Дугъу учвура Чан вахтна заъди. ⁷ Ичв вари гъайгъушнар Гьадгъуин иличай – Думу ичв гъайгъушнаъ а!

⁸ Ичв фагьмихъ гъузай, мааханай! Учвуз къаршу вуйир, иблис, гашу удубтІнайи асланси, учвкан хътІюкьюз ужур агури либцура.

⁹ Учву ичв мюгькам хъугъвалиинди, дюн’яйиъ вари ичв гъардшари учвуси гьамцдар аьзабар аьгь апІурайиб аьгъяди, дидиз къаршу удучІвну ккунду. ¹⁰ Аммаки учвуз аьгь апІуз сацІибтІан имдар! Иса Месигьдиъ сатІиди духьну дих дапІну, гьарсаб ужувлан булагъ айи Аллагьди Чан гьаммишандин Ад учвухъди пай апІиди, учву дюз алаиди, ижми апІиди, кьувватлу апІиди, йишв’ин мюгькам апІиди. ¹¹ Дугъан кьувват аьсрариан-аьсрариз ибшри, амин!

Аьхиримжи насигьят

¹² Узу гьаму бицІи кагъаз Силван гъардшин кюмекниинди гъибикІунза. Узуз дугъан хъугъувал ужуйи аьгъязуз. Узу му кагъаз учвуз, мушваъ улупнайиб Аллагьдин ужувлан гьякь багъиш ву, кІури, учву рази ктаъбан бадали, гъибикІунзачвуз. Ижмишнаан гьамдихъан хъичІихай.

¹³ Учвуси Аллагьди кадагънайи Вавилондиан вуйи чуччура учвуз саламар хътаура, ва гьацира – йиз бай Маркдира. Чиб-чпиз чвевалин масанвалин мак апІбиинди салам туври апІинай. Вари Месигьдиндариз, учвуз, мясляаьт ибшри!