al-Titas

Fobitro Injil Shorif 17 nombor sifara

al-Titas

Forisiti

Alla Pakor hukume ou sifara leḳsoin Hozrot Isa al-Mosir ḳas sahabi Hozrot Paulus (ra:). Hozrot Isae behesto toshrif neoar bade 26–28 bosoror maze ou sifara leḳa oise. Ou shomoe leḳokor murobbi boeosh. Titas name eḳzon zuan manush bin-dormo taki al-Mosir torika ḳobul ḳorsila. Shomazor gese tan temon beshi nam-ḍaḳ asil na. Ein Hozrot Paulusre Kriti difo toblig kamo shaijjo ḳorsoin, erlagi tan ato hou zomator zimma deoa oise. Bade leḳoke al-Titas namor ou sohifa tan gese leḳsoin.

Leḳoke ḳoira, Kriti difo boshot ḳorra naforman shomazor maze, Hozrot Isa al-Mosir ummotor shobab-choritro, sal-cholon kila oa zorur. Ar zomator nanan nomunar ba nanan boeoshor manshore kila talim deoa zae. Esaṛa, zomator maz taki doladoli, ingsha-ninda, baze torko-bitorko bad dia, Allar ḍor-ḳofe Allai rohomote zindegi ḳaṭanir foramish ase.

Ermaze ase,

(1) Salam ar dua 1:1-4 aeat

(2) Kriti difor zomator saloḳdar neoa 1:5-16

(3) Zomator nanan manshor daeitto 2 ruku

(4) Nek kamor foramish ar hushiari 3:1-11 aeat

(5) Bidaei salam 3:12-15

¹Ami Paulus to Alla Pakor gulam ar Hozrot Isa al-Mosir eḳzon sahabi. Amar daeitto oilo, Allar fosond ḳora bonda oḳolre imanor fote ana, ar Allare mania solar maze ze hokikot ase, ou hokikotre sinai deoa. ²Ami al-Mosir ḳezmot ḳoriar, aḳeri zindegi faoar ashae. Ze Allae kunu misa matoin na, hou Allae i zindegi deoar oada ḳorsoin, dunia foeda oar ageu. ³Tain tan kalam shoṭik shomoye zair ḳorsoin, ar amrar toraneala Allar hukum mafik ita toblig korar bar amar ato deoa oise.

⁴Amar hou ḳas aolad Titasor gese leḳram, amra duiozonu ekoi imane al-Mosir ummot oisi.

Amrar gaibi baf Allae ar toraneala Isa al-Mosie rohomot ar shanti dan ḳoroukka.

Kriti difor zomator saloḳdar neoa

⁵Titas huno, ami tumare ou Kriti difo toia aisi, zate zeta ḳam oḳono baki roise, tumi ota furafur adae ḳoro. Ar ami zela hukum dislam, ṭik oula tumi forteḳ ṭaunor zomator murobbi oḳolre ḳamo boail ḳoro. ⁶Mono rakio, ze murobbi oḳol bodnam saṛa nikut, zerar ḳali eḳzon bou asoin, zerar fua-fuṛin Isaei imandar, zera beforua babe zindegi ḳaṭae na, borong ma-bafor baiddo ase, ou murobbire tumi boail ḳoro. ⁷Allai ḳamor zimmadari faoae zekunu saloḳdar zanu bodnam saṛa nikut oin. Tain zanu shoirasar, bodragi, nishakur, mara-mari ḳorra ba haram ruzi-ruzgaror lalchi na oin. ⁸Er bodla tain zanu memandari ḳorra, nek babor ashik, hok-halali, ar Allar baiddo zon oin. Tan bala bisar-buddi taḳe, ar nizore furafur shamlaia raḳta faroin. ⁹Alla Pakor ze hok kalam talim faisoin, tain itare mozbut ḳori doria raḳoin, ar ṭik ou laḳan ḳaṭi talim toblig korta faroin. Erloge zera tan bifokke ase, tarar bul-beaḳoli-o dorai dein.

¹⁰Ḳaron bout beshamal manush asoin, zetae ḳeurore manoin na, beḳama mat matoin, sol-soturi ḳoroin. Zetae mosolmani ḳam ḳoranir lagi zura-zuri ḳoroin, ami ḳas ḳori otar ḳota-u ḳoiram. ¹¹Itar muk bond ḳora zorur. Itae ku-fote ṭeḳa ḳamanir ashae ola talim dein, ze talim deoa tarar lagi ṭik nae. I talim dia kunu kunu foribarre bigṛailira. ¹²Erlagi tarar nizor deshor eḳzon fonḍite ḳoisoin, “Kriti difor manshe hamesha misa matoin, iguin to zongli zanuaror laḳan, kuṛia ar feṭua.” ¹³Ita to eḳdom hasa, erlagi tumi kub gorom oia tarar aib deḳaia deo, zate tarar Isaei iman shullo-ana nikut oe. ¹⁴Ihudi oḳolor banail kichcha-ḳahini, ar zeta manush Allai hokikot taki be-fote gesegi, tara zanu itar hukum-ufodesh ḳano na loin.

¹⁵Zerar dil fak-fobitro, tarar gese hoḳolta-u fobitro. Oile zerar dil nafakie bora, ar zeta beiman, itar gese kuntau fobitro nae. Itar mon ar bibeḳ hoḳolta-u borbad. ¹⁶Tara mukdi dabi ḳoroin Allare manoin, oile tarar ḳamor mazdi tanre oshikar ḳoroin. Iguin to noforoti ar obaiddo. Itare kunu bala ḳamo lagail zae na.

Zomator nanan manshor daeitto

¹Titas huno, tumi manshore olaḳan talim deo, zate tumar mator maze nikut hok talim taḳe. ²Zomator murobbi beṭainre ḳo, tara zanu hamesha nizore shamlaia raḳoin, ijjoti bonoin, bala bisar-bibek kaṭain. Tarar zanu ḳaṭi iman, maea-mohobbot ar sobor taḳe.

³Olaḳan murobbi beṭintoreo ḳo, tara zanu forezgarir adob-ḳaeda mania soloin ar nekir bab hikain. Oinnor bodnam gaoa, ba nishakur bona tarar lagi ṭik nae. ⁴Teu tara zuan fuṛintore hikaita farba, zate tarar zamai ar fua-fuṛinre mohobbot ḳoroin, ⁵nizore shamlaia raḳoin, shoti roin, bala shongshari oin, doyalu oin, ar zamair baiddo taḳoin. Teu Allar kalamor bodnam ḳorar shuzug keu faito nae.

⁶Olaḳan zuan fuaintoreo ufodesh deo, zate tara nizore shamlaia raḳoin. ⁷Tumi tarar gese hoḳol nomunar nek kamor nishana o. Hoḳ niote ar dae-daeitto loia talim deo. ⁸Ḳeu zanu tumar zobanor kunu dush na fae. Tumar oula sal-cholon dekia dushmon oḳol shorminda oiba ar amrar bodnam ḳorar kunu kut faita nae.

⁹Tumi saḳor oḳolre ḳo, tara zanu hokkol befare munibor baiddo roin, munibor mon zugaia soloin, tarar mukor ufre be-adobi mat na matoin. ¹⁰Munibor mal-samana suri na ḳoroin, borong nizor hok-halalir forman deḳaia hari, amrar toraneala Allar befare ze talim ase, ou talimre hokkol nomunae shundor ḳori hazain.

¹¹Zano to, Allar ze rohomotor usillae hoḳolor nazat mile, ita oḳon duniat zair oigese. ¹²Ou rohomoteu amrare talim dira, zate amra be-dini ḳam-ḳaz taki ar duniar hoḳol bod ḳaish taki duroi roia, i zogoto nizore shamlaia raki, ar nek fote roia forezgar zindegi ḳaṭai. ¹³Erloge amrar dilor forom asha furonor lagi bar sai, Allatala ar toraneala Isa al-Mosir shan-mohima zair oar kushi-bashi furonor lagi bar sai. ¹⁴Isa al-Mosie to amrare basanir lagi tan nizor zan kurbani dilaisoin, zate hoḳol guna taki amrare ḳalas ḳori anta faroin, ar ou laḳan eḳdol manshore fak-fobitro ḳoroin, zera ḳali tan nizor oiba, zera nek kamor ashik oiba.

¹⁵Tumi furafur bol ḳaṭaia ota befare talim deo, manshore nosiot ḳoro ar tarar dush-ḳosuri deḳaia deo. Tumare hey ḳorar shuzug keurore dio na.

Nek kamor foramish ar hushiari

¹Allar bonda oḳolre mono ḳorai deo, tara zanu deshor raza ar shorḳari niomor odine roin, tara obaiddo na oin, manshor hoḳol nomunar ufoḳar ḳorar lagi zuit taḳoin. ²Tara zanu ḳeuror bodnam na gain, ḳaijja-fosad na ḳoroin, borong shanto-shisṭo roia hoḳolor loge norom bebohar ḳoroin.

³Amra-o age be-aḳol ar naforman aslam, be-fote soltam, duniabi aram-ayesh ar nanan nomunar bod ḳaishor gulam aslam. Oinno manshore ingsha ḳortam, tarar ḳeti ḳorar dandae din ḳaṭaitam. Ar nize ginnar zoiggo oileo eḳe-oinnore ginnaitam. ⁴Oile amrar toraneala Allar rohomot ar mohobbot zebla zair oilo, ⁵ou shomoe tain amrare rehai dila. Amrar nizor kunu nek kamor lagi rehai disoin na, ḳali tan doya-maeae disoin. Pak ruhe noea zonom dia, noea babe foeda ḳoria amrar dilre forishkar ḳorsoin. Ar olaḳan-u tain amrare rehai disoin. ⁶Amrar toraneala Isa al-Mosir mazdi tain kula ate amrar maze ou Pak Ruhu ḍalia disoin. ⁷Zate aḳeri zindegir asha-borosha faia, Allai hokkoltar odikari oi. Allar rohomote amrare be-ḳosur ḳalas hishabe ḳobul ḳorae-u to amra ita faisi. ⁸Ikan to furafur hasa.

Ami saiar, tumi ou befare furafur zur deo, zate Allar ufre zera iman anche, tara nek kam ḳorar kiali oe. Ila nek kam ḳora to hoḳolor lagi bala ar ufoḳari. ⁹Ta-o beokufor laḳan torka-torki, zat-bongsho loia mata, ḳaijja-fosad, ar shoriot loia ḳota ḳaṭa-ḳaṭi ḳorio na. Itae to kunu faeda oe na, ita ekkere beḳama. ¹⁰Ze manshe doladoli lagae, tare foela eḳbar, bade dusrabaro hushiar ḳorio, itae zudi he na bodle, te tar loge sola-fira ekkere bad dilaio. ¹¹Tumi to zano-u, ita manshor dilor sinta kub ḳaraf, he gunagar. He emneu nizor naformanir forman dey.

Bidaei salam

¹²Titas huno, ami Artimas ba Tukik baire tumar gese faṭaimu, era ḳeu gele tumi ḳas ḳori sesṭa ḳorio Niḳafoli ṭauno aia amar loge deḳa ḳorar lagi. Ami niot ḳorsi, shitor ḳoemash ou Niḳafolit roimu. ¹³Ukil Zoin sab ar Apollos bair soforor lagi zotoḳan faro shaijjo ḳorio, zate tarar kunu obab na oe. ¹⁴Amrar manshore to hikani zorur, shomazor balair lagi kila nizore ḳaṭail zae. Teu tara manshor zoruri obab miṭaito farbo, ola tarar nizor zindegio folala oibo.

¹⁵Amar logor hoḳole tumare salam zanaira. Al-Mosir ufre iman anae zera amrare maea ḳoroin, tarare amar salam dio.

Allar rohomot tumra hoḳolor ufre ḳaim rouk. Amin.