al-Ruman

Fobitro Injil Shorif 6 nombor sifara

al-Ruman

Forisiti

Asmani kitab Fobitro Injil Shorifor foela hisha mani, foela fas sifarar maze Hozrot Isa al-Mosir zonom, tan ḳam-ḳaz, talim, tan mout, moutor bador zindegir boeani. Tan sahabi oḳolor ḳam-ḳaz, ar hou zomanar zomat oḳolor kisu itihash.

Ar Injil shorifor dusra hisha oilo, siṭir aḳare leḳa bador 21 sifara. Oḳnain foṛle amra buztam farmu, hou amolor Isaei zomat oḳolor hal-hokikot, sal-cholon, tarar iman ar duniabi asar-bebohar kilaḳan asil. Ou al-Ruman sifara oilo, i hishar hoḳol foela sifara, ikan bout mulloban.

Ou sifarar leḳok Hozrot Isa al-Mosir sahabi Hozrot Paulus (ra:). Hozrot Isae dunia taki behesto toshrif neoar onuman 25 bosor bade ou sifara leḳsoin. Ikan leḳar age tain kunudin Rum ṭauno gesoin na. Oḳon tan kial oilo, nanan desho toblig kori ḳori, Rum ṭauno zaita, bade on taki Spen desho zaiba. Erlagi Rum ṭaunor Isaei ummot oḳolre tan soforor ḳota zanaira. Erloge bout zoruri talim ar nosiot zanaira.

I sifarar 1-8 rukur maze tan talimor kub guruttofurno nosiot ase, ḳas ḳori Hozrot Isar ufre iman anle manush ḳemne Allar dorbaro be-ḳosur ḳalas hishabe goinno oe, ar Allar deoa Pak Ruh faia hari kila fak-fobitro zindegi ḳaṭae, zela 1:17 aeato leḳa ase, “Imanor boleu be-ḳosur ḳalas oa zonor zan basibo.”

9–11 rukut leḳa ase, Hozrot Musa (a:)-or shoriotor hukum-ahkam furafur mante ofarog oae Boni Israil zati Allar naforman bonigese, ar ou shoriotor ufre borosha ḳorae tara Hozrot Isar kush-ḳobrireo elami ḳorse. Ashole ou kush-ḳobrir ufre iman anleu hesh-mesh tarar zan basibo.

Bade 12–16 rukut ase, Allar dorbaro ḳobul kurbani hishabe kila nizore shofi deoa zae, ar zomator manshor lagi bastob zindegir sal-cholonor talim, deshor raza ba shorḳaror loge mumin oḳolor shomporko kilaḳan oibo, ota nanan befare zukti-torkor nomunae ou sifara leḳa oise.

Ermaze ase,

(1) Allar dorbaro manush kila be-ḳosur ḳalas oin 1—8 ruku

(2) Shoriote ofarog oileo, Boni Israilor hesh rokka imane 9—11 ruku

(3) Isaei mumin oḳolor sal-cholon 12—16 ruku

Allar dorbaro manush kila be-ḳosur ḳalas oin (1:1–8:39)

Manshor zan basanir kush-ḳobri

¹Ami Paulus to Hozrot Isa al-Mosir gulam. Ruman bashshair razdani Rum ṭaunor mumin oḳolor gese ou sohifaḳan leḳram. Alla Pake amare fosond ḳoria anchoin al-Mosir sahabi oar lagi ar tan batail kush-ḳobri toblig korar lagi. ²Allae tan nobi oḳolor mazdi pak kitabor maze ou kush-ḳobrir ḳota ageu oada ḳorsoin. ^3-4Ou kush-ḳobri oilo tan ḳas maear zon Isa al-Mosir befare. Tainu amrar malik. Roḳto-mangshor silsilae tain oila Hozrot Daud nobir aolad, ar Allai Pak Ruhur kudrotie murda taki zinda oia Ibnulla hishabe zair oisoin. ⁵Tan nam uzila ḳorar lagi, tan mazdiu amra Allar niamot ar sahabi fod faisi, zate hoḳol zatir manshe iman ania Allar baiddo oia sole. ⁶Ou manshor maze tumrao aso. Allae to tumrare daot ḳoria anchoin, Isa al-Mosir afon zon oar lagi.

⁷Te ou Rum ṭauno Allar zoto maear bonda oḳol asoin, Allae tan pak bonda oar lagi zerare daot ḳoria anchoin, tumra hoḳolor gese ami ou siṭikan leḳram. Amrar gaibi baf Alla Pak ar Hozrot Isa al-Mosie tumrare rohomot ar shanti dan ḳoroukka.

⁸Ami foelau ḳoiram, tumrar mozbut imanor ḳota asta duniair maze roṭigese ḳori, ami Isa al-Mosir name amar Allar shukria adae ḳorram. ⁹Allar ḳas maear zon Ibnullar befare kush-ḳobri toblig koria, ami dile-zane Allar ebadot ḳorram. Eḳ Allau shakki asoin, ami forteḳ bar munazator shomoe tumrar ḳota iad ḳori. ¹⁰Ami hamesha ou ḳota magiram, otodin bade oileo Allar morzie zekunu monte ami zanu tumrar gese aitam fari. ¹¹Ami tumrar loge deḳa ḳortam sairam, zate ruhani kunu niamot dia tumrare boloban ḳortam fari. ¹²Mani, amar iman dekia tumra hoḳole ar tumrar iman dekia ami nizeo utshaho fai.

¹³O baiain huno, ami bout bar tumrar gese aitam saisi, oile bar bar bada aise. Nanan zagat gia bin zatir gese toblig koria zela fol faisi, tumrar geseo ola fol deḳar ashae aitam sairam. ¹⁴Bodro Iunani zati ba o-bodro borbor zati, shikkito ba oshikkito, hoḳolor lagiu to amar eḳ homan dae bar ase. ¹⁵Erlagi tumra zera Rum ṭauno boshot ḳorrae, ami amar shaiddo mafik tumrar geseo kush-ḳobri toblig korar lagi kiali.

¹⁶Ḳaron Hozrot Isa al-Mosir befare kush-ḳobri toblig korte ami kunu shorom mono ḳori na, ou kush-ḳobri hunia zera iman ane, tarar zan basanir lagi ita oilo Allai bol. Foela Boni Israilor lagi zera eḳ Alla manoin, bade be-din bin zati oḳolor lagi. ¹⁷Ou kush-ḳobrir mazeu to batail oise, Allae kila manshore be-ḳosur ḳalas hishabe ḳobul ḳoroin. Ḳali imanor mazdiu manshore aual taki aḳer forzonto be-ḳosur ḳalas ḳoia goino ḳora oe. Zela kitabo leḳa ase, “Imanor boleu be-ḳosur ḳalas oa zonor zan basibo.”

Hoḳol manushu naforman

¹⁸Manshe nizor naformani dia Allai hokre lukaia raḳe. Tarar naformani ar Allar bae ḍor-ḳof na taḳae asman taki tarar ufre gozob nazil oe. ¹⁹Allar befare zotoḳan buzar takkot ase ita manshor gese forishkar, Allae nizeu to ita zair ḳorsoin. ²⁰Tan zeta gunagun manshor a-deḳa, mani tan siroḳalin ḳemota ar Allai shobab, ita dunia foeda oar ag takiu forishkar fuṭia uṭse. Tan foeda ḳora zinish deḳleu manshe ita buzto fare. Erlagiu tanre sini na ḳoia kunu manshe bana deḳanir ufae nai. ²¹Allar befare otota zanar badeo manshe tanre Alla babia tan ebadot-bondegi ar shukur-guzari na ḳorae, tarar bisar-bibeḳ oshar oigese ar be-aḳol mon andair oigese. ²²Zudio tara nizore aḳoldar mono ḳoroin, ashole tara be-aḳol. ²³Tara siroḳalin zinda Allar ebadot bad dia ostaei manush, foshu-faki, ar buke solra zandaror murti banaia otar fuza ḳorse, Allar faona gourob-mohima otare dise.

²⁴Erlagi Alla Pakeo tarar dilor bod ḳaish mafik, tarare noforoti ḳamor ato saṛi disoin, otar dae tara eḳe-oinnor loge bodmaishi-beijjoti ḳorer. ²⁵Tara Allar hokre bad dia misare fosond ḳorse. Foeda ḳorra Allare bad dia, tan foeda ḳora zinishor fuza ḳorse. Oile zuge zuge siroḳal hoḳol tarif eḳmatro foeda ḳorra Allaru. Amin.

²⁶Manshe olaḳan noforoti ḳam ḳorer dekia, Allae-o tarare ou bod ḳaishor ato shofi disoin. Otar beṭinteo zamair loge mila-misha bad dia oinno beṭintor loge ḳobisi ḳam ḳorse. ²⁷Oula beṭainteo beṭintor loge mila-misha bad dia oinno beṭar loge mila-mishar lagi fagol oigese, beṭainte beṭaintor loge ḳobisi ḳam ḳorse. Erlagi tara forteḳor zindegit zarzir bod ḳamor shaza faira. ²⁸Manshe tar dil taki Alla Pakre maner na dekia, Allae-o tarare ola bod ḳaishor ḳobisi dilor ato saṛi disoin, erlagi tara ota ḳorat roe. ²⁹Tara hoḳol nomunar naformani, bod ḳam, lub-lalos, ingsha-ninda, kun-ḳarafi, mara-mari, sol-soturi ar ḳana-ḳani ḳorar lagi ustad. ³⁰Tara manshor gibot gae, ar Allare ginnae. Tara bod-mizazi, ohonkari, boṛai-beṭagiri ar noea noea naformanir dandae taḳe. Tara ma-baforo obaiddo. ³¹Neki-bodi buzar aḳol nai, oada ḳelafḳari, fashan, itar dilo kunu doya-maea nai. ³²Tara to Allar i bisaror ḳota bala ḳoriu zane, zera ilaḳan ḳam ḳore, tarar shaza oibo mout. Ikan zaniao, tara ḳali nize ita ḳore na, baki zera ila ḳam ḳore, tarar fokkeo shae dey.

Manshor gunar bisar

¹Erlagiu ḳoiram, O manush zati, tumi to oinno zonre dushi shaibosto ḳorrae, ita bisar tumi hiklae kila? Tumar zuaf dibar kunu fot ase ni? Ḳaron tumi nize ze oforad ḳorrae, ou eḳoi oforade tumi aroḳzonre dushi ḳoirae. Te i dush tumar ufreo foṛer na ni? ²Amra to zani, zera ilaḳan oforad ḳore, Allae hok insaf mafik tarar faona shaza diba. ³O manush zati, ze ḳam tumi nizeo ḳoro, ou eḳoi ḳamor lagi tumi aroḳzonre dushi shaibosto ḳoro, te ḳemne buzlae, tumi Allar shaza taki rehai failibae? ⁴Tumi to Alla Pakor oshesh meherbani, tan doijjo-shokti ar soborgarire elami ḳorrae. Tan meherbanie tumare ḳali touba ḳorar fote ṭania ney, ikan fauriliso ni?

⁵Oile tumar fashan dil ar touba na ḳorar monobabor lagi, tumar ufre Allar gozob dola ḳori toirae, Allae zedin gozob zair ḳorba, hok bisar ḳorba, hou dinor lagi shaza dola ḳorrae. ⁶Tain forteḳ manshore zarzir ḳamor fol diba. ⁷Zera doijjo doria nek kamor mazdi Allai tarif, ijjot, ar koehin zindegi tallash ḳore, Allae tarareu aḳeri zindegi dan ḳorba. ⁸Oile zera nizor ḳaishor boshe sole, Allai hokor birudde roe, naformanir fokke taḳe, tarar ufre Allai duk-mosibot, gozob ar lannot aibo. ⁹Forteḳ naformanor ufre ita aibo, foela Boni Israilor ufre, bade bin zatir ufre. ¹⁰Oile zera nek kam ḳore, tara forteḳe tarif, ijjot ar shanti faibo. Foela Boni Israile, bade bin zatie faiba. ¹¹Allar dorbaro to fokkofatir kunu ḳarbar nai, hoḳolu homan.

¹²Shoriotor baire roia zeta manshe guna ḳorse, tara binasho oiba shoriot saṛa, ar shoriotor bitre roia zera guna ḳore, ou shoriot mafiku tarar bisar oibo. ¹³Zeta manshe shoriotor boean ḳali hune, Allar nozoro to tara be-ḳosur nae, oile zera shoriot amol ḳore, tarau ḳali be-ḳosur ḳalas ḳoia goinno oiba. ¹⁴Bin zati oḳole Allai kunu shoriot na faileo, tara zebla emneu shoriot mafik soloin, ou shomoe tarar bibeḳu shoriot bonizae. ¹⁵Ete deḳa zae, shoriot mafik zeta ḳora zorur, ita tarar dilor bibeḳor maze leḳa ase. Tarar bibeḳe tarar ḳamor shakki dey, kunu kunu shomoe tarar bibeḳe tarare dushi shaibosto ḳore, ar kunu kunu shomoe tarar fokkeo shae dey. ¹⁶Te Allae zedin Isa al-Mosir mazdi hoḳol manshor lukail amolor bisar ḳorba, hou dinu ita zair oibo. Ar ami oḳon ze kush-ḳobri toblig koriar, ou mafiku bisar oibo.

Boni Israil ar shoriot

¹⁷Tumi zebla nizor forisoe dirae Boni Israil ḳoia, tumi Hozrot Musar shoriotor ufre borosha ḳorrae ar Allar maear bonda ḳoia boṛai deḳairae. ¹⁸Te Allae tumar ges taki kita asha ḳoroin, tumi kita ḳortae, ikan to tumi zano-u, shoriot taki tumi itar talim faiso. ¹⁹Tumi mone mone ḳoirae, ami to andare fot deḳaiar, andarit zeta asoin, itar gese ami nuror rushoni. ²⁰Be-aḳolre hedaeot ḳoriar, huruttainre talim diar. Tumi buzrae, shoriotor bitre hok ar aḳol-buddi ase. ²¹Ita kub bala ḳota, oile tumi zebla oinno manshore hikairae, te nizeo ita hiko na ḳene? Tumi manshore ḳoirae, suri ḳorio na, oile tumi nizeu suri ḳorrae na ni? ²²Manshore ḳoirae, zina ḳorio na, oile tumi nize kunu zina ḳorrae na ni? Tumi to deb-debir murtire ginnairae, hirbar nizeu murtir mondirre luṭ-toraz ḳorrae na ni? ²³Ze shoriot loia tumi boṛai ḳorrae, i shoriotor ulṭa solia tumi nizeu Allare oshomman ḳorrae na ni? ²⁴Allar kalamo ase, “Tumrar sal-cholon dekia bin zati oḳole Allar namre beijjot ḳorer.”

²⁵Huno, tumi zudi shoriot mania solo, te mosolmani ḳam ḳoranir dam ase, ar shoriot mafik na solle, mosolmani ḳam ḳoraileo zeta, na ḳoraileo ota. Allar nozoro tumi mosolmani na ḳorail be-dinor laḳan. ²⁶Oḳon mosolmani na ḳoraiao zudi ḳeu shoriot mania sole, te Allae tare mosolmani ḳorail ḳoia shomzita nae ni? ²⁷Ar mosolmani na ḳorail manshe zebla shoriot mania sole, te likito shoriot faia ar mosolmani ḳoraiao zudi tumi er ulṭa solo, taile hou mosolmani na ḳorail beṭae tumare dushito nae ni?

²⁸Bishoeṭa buzrae ni? Ḳali name Boni Israil oileu ḳeu ashol Boni Israil nae. Shorilor ongo ḳaṭia mosolmani ḳoraileo to, ashol mosolmani oe na. ²⁹Oile mon taki zera Boni Israil, tarau ashol Boni Israil. Ita kunu likito ain-ḳanunor befar nae, dilor bitoror ruhani befar. Dilor mosolmaniu oilo ashol mosolmani. Zogotor manshe erar tarif na ḳorleo, Allae tarif ḳoroin.

¹Te ilaḳan befar oile, Boni Israil oae baṛti kunu lab ase ni? Mosolmani ḳam ḳoranit kunu faeda ase ni? ²Nichchoe ase. Bout nomunar faeda ase. Foela faeda: Alla Pake tan hokkol kalam nazil ḳorsoin Boni Israilor gese. ³Oboshsho tarar kunu kunu zone beimani ḳorse, ete kita oise? Tara beimani ḳorleo Alla Pake kunu tarar laḳan beimani ḳorba ni? ⁴Nauzubilla! Hoḳol manshe misa matleo Alla to hamesha hok taḳoin. Fobitro Zobur Shorifo ase:

Erbadeo forman milbo tumar zoban shoṭik,

tumar fokke rae zaibo.

⁵Duniabi manshe ḳoito fare, amrar na-hok kame zebla aro forishkar buza zae Alla Pak koto hok, te amrar na-hoke tan gourob oar badeo tain amrare shaza dile ita tan oinnae? Nauzubilla. ⁶Allae zudi hok insaf na ḳoroin, te tain kila asta zogotor bisar ḳorba? ⁷Tara ḳoin, “Amar misa mator mazdiu buza zae, Alla Pak hok-insafḳari. Ar amar misa mate zebla Allar gourob-tarif oe, te tain amare gunagar shaibosto ḳoroin ḳene?” ⁸Ikan kub shundor zukti. Erlagi amra ḳoitam ni, “Ao, amra naformani ḳorat roi, zate ou naformanir mazdi bala fol mile?” Kunu kunu manshe amrar bodnam gaia ḳoin, amra-o bule ola talim dei. Itae tarar faona shaza faiba.

Allar dorbaro hoḳol manushu dushi

⁹Oḳon amra kita ḳoitam? Boni Israil hishabe amrar halot kita bin zati taki bala ni? Nichchoe na. Ageu amra ḳoisi, Boni Israil ar bin zati hoḳolu gunar gulam. ¹⁰Allar kalamo ase,

Be-ḳosur bolte ḳeu nai, eḳzono nai;

¹¹aḳoldar eḳzono nai,

ḳeu Allar tallash ḳore na.

¹²Hoḳol manush be-foti oigese,

hoḳol eḳloge naforman oigese,

nek kam ḳore ila ḳeu nai, eḳzono nai.

¹³Tarar muk to fosa lashor kula ḳoeboror laḳan,

tarar zibe sol-soturi mate,

ar ṭuṭor tole ase, hafor bish.

¹⁴Tarar golar maze boddua ar titta mat-ḳotae bora,

¹⁵kun-ḳarafir lagi tarar fao aguail,

¹⁶tarar foto ḳali binash ar ahazari.

¹⁷Shantir fot tara sine na,

¹⁸tarar dil taki Allar ḍor-ḳof horigese.

¹⁹Amra zani, Hozrot Musar shoriot tarar lagiu, zerar gese ou shoriot deoa oise. Zate ḳali bin zati nae, shoriot faora Boni Israilo, mani asta zogotor ḳeu kunta matibar shuzug nai, shobu Allar bisaror daṛo foṛe. ²⁰Ḳaron shoriot amol ḳorleu, Allae manshore be-ḳosur ḳalas ḳoia goino ḳoriliba, ila kunta nae. Oile shoriotor mazdiu manush gunar befare hushiar oe.

Manush kila be-ḳosur hishabe goinno oin

²¹Oḳon to Alla Pake fot batai disoin, shoriot saṛao tain kila manshore be-ḳosur ḳalas hishabe goino ḳoroin. Age tain Tourat Shorif ar nobi oḳolor kitabo ou befare ishara disoin. ²²Ou fot oilo, Hozrot Isa al-Mosir ufre zera iman ane, ou imanor mazdiu Allae tarare be-ḳosur ḳoia goino ḳoroin. I befare Boni Israil ouk ba bin zati ouk hoḳolu eḳ homan. ²³Ḳaron, hoḳoleu guna ḳorse, Allar shan-tozollit hamanir shamorto ḳeuror nai. ²⁴Oile Isa al-Mosie manshore gunar at taki basanir bebosta ḳorsoin, tain Allar rohomotor dan hishabe manshore be-ḳosur ḳoia goino ḳorar fot ḳorsoin. ²⁵Zera tan ufre iman ane, al-Mosie tarar lagi nizor loure koforar kurbani dia Alla Pakre kushi ḳorsoin. Ou nomunae Allae deḳaisoin, zudio tan nizor soborgarir lagi manshor furana gunar shaza dite deri ḳorra, tebou tain hok-insafḳari. ²⁶Ar oḳon tain ita deḳaisoin, zate forman oe, tain nize hok-insafḳari ar zera al-Mosir ufre iman anoin, tarare be-ḳosur ḳalas ḳoia goino ḳoroin.

²⁷Erbadeo manshe boṛai deḳanir kunta ase ni? Na, kuntau nai. Ḳene nai? Manshe shoriot mane ḳori tar boṛai ḳorar kunta nai ni? Na, ashol ḳota oilo, imanor maze boṛai ḳorar zaga nai. ²⁸Amra zani, Allae manshore tar imanor lagiu be-ḳosur ḳalas ḳoia goino ḳoroin, shoriot manar lagi nae.

²⁹Te Alla ḳali Boni Israilor ni, bin zatir lagio nae ni? Nichchoe, tain bin zatiro Alla. ³⁰Ḳaron Alla to eḳzonu. Tain Boni Israilre zela imanor mazdi be-ḳosur ḳoia goino ḳoroin, ola bin zati oḳolreo ḳorba. ³¹Oḳon ḳo sain, imanor lagi amra shoriot batil ḳorram ni? Na, muṭeu na! Borong amra shoriotre mozbut ḳoriar.

Hozrot Ibrahim (a:) taki talim

¹Te amrar ḳandanor mul baf Hozrot Ibrahimor zindegir befare kita ḳoitam? Tain kita faila? ²Shoriot manar lagiu zudi tanre be-ḳosur ḳoia gona oe, te tain nizor boṛai deḳaita faroin, oile Allar dorbaro to nae. ³Ḳaron Allar kalamo ase, “Ibrahime Allar ufre iman anae, Allae tanre be-ḳosur ḳalas ḳoia goino ḳorla.” ⁴Ḳamlae ḳam ḳoria ze beton fae, ikṭa kunu dan nae, ikṭa tar faona mozuri. ⁵Oile kunu manshe zudi nizor amolor ufre borosha na ḳoria, ḳali tan ufre iman ane, zein gunagarre be-ḳosur ḳoia goino ḳoroin, te tar imanor lagi he ḳalas fae. ⁶Ar niz amol saṛa Alla Pake zare be-ḳosur ḳoia goino ḳorsoin, Hozrot Daudeo tare nek-kofali ḳoisoin. Fobitro Zobur Shorifo tain ḳoira,

⁷Nek-kofali tarau, zerar naformanire maf ḳora oise,

Mabud Moulae zerar gunare ar hishabo dorta nae.

⁸Nek-kofali hou zon, zar gunare Allae tar amol-noma taki ḳaṭi disoin.

⁹Te nek-kofali ḳali tarareu ḳoa oise ni, zerar mosolmani ḳam ḳorail oise? Mosolmani na ḳorail manshoreo ḳoa oise na ni? Oe, tarareo nek-kofali ḳoa oise. Ḳaron Allar kalamo faisi, Hozrot Ibrahimor imanor lagiu, Allae tanre be-ḳosur ḳalas ḳoia goino ḳorla. ¹⁰Kun shomoe ḳorla? Mosolmani ḳoranir age, na bade? Nichchoe, mosolmani ḳoranir ageu oisla. ¹¹Mosolmani ḳam ḳoranir ageu Allae tanre imanor lagi be-ḳosur ḳoia goino ḳorsla, ar mosolmani ḳam ḳorani asil er forman ba nishana. E taki buza zae, mosolmani na dileo, ḳali imanor lagi zerare be-ḳosur ḳalas ḳoia dora oe, tarar mul baf oila Hozrot Ibrahim. ¹²Mosolmani ḳoranir age Hozrot Ibrahimor iman zelaḳan asil, mosolmani ḳoraia zoto manshe ou imane sole, tararo mul baf oila ou Ibrahim.

Imanor boleu Allai oada furon

¹³Alla Pake oada ḳorsla, Hozrot Ibrahim ar tan ḳandanre i duniar doḳoldari diba. Shoriot manar lagi i oada ḳora oise na, borong Ibrahimor imanor lagiu tanre be-ḳosur ḳalas ḳoia goino ḳoria ou oada ḳorsla. ¹⁴Shoriot mania ḳeu zudi doḳoldari failae, te to iman beḳama bonizae ar Allar oadaro kunu dam roe na. ¹⁵Shoriote to Allar gozob lamae. Ashol ḳota oilo, zeḳano shoriot nai, ino shoriot bongor ḳotao nai.

¹⁶Erlagi i oada ḳali manshor imanor mazdi fura ḳora oe, zate iṭa Allar rohomotor dan hishabe roe. Te Ibrahimor ḳandanor gese ze oada ḳora oise, ikan nichchoe fura ḳora oibo. Ḳali shoriot manra oḳolor lagiu furon ḳora oito nae, zera Ibrahimor imanor loge shorik, tarar lagio i oada fura ḳora oe. ¹⁷Allar kalamo zela leḳa ase, “Ami tumare bout zatir mul baf banailam.” Ou hishabe Allar nozoro Ibrahim oila amra hoḳolor mul baf. Zein morare zindegi dein ar zeta oar nae, ota oaita faroin, hou Allar ufre tain iman ansla.

¹⁸Ou Ibrahime zebla aolad faoar kunu asha ḳorar ḳota nae, hou shomoyo tain Allar ufre borosha ḳoria imane mozbut roisoin. Allae tanre ḳoisla, “Tumar ḳandanre ami asmanor terar laḳan behishab ḳormu.” Ar ou ḳotar ufre tain iman anla. ¹⁹Eḳ-sho bosor boeoshor Ibrahime zudio buzchila, hurutta zonom deoar ḳemota ar tan nai, tan bibi Saeraro hurutta oar boeosh shesh oigese, tebou tan iman mozbut asil. ²⁰Allar oadar befare tan mono kunu shondoe aise na, borong tain imane aro mozbut oia Allar tarif ḳorla. ²¹Ibrahime furafur ekin ḳorla, Allae ze oada ḳorsoin, ita fura ḳorar ḳemotao tan ase. ²²Ou ḳaroneu tan imanor lagi tanre be-ḳosur ḳoia goino ḳora oisil. ²³“Be-ḳosur ḳoia goino ḳora oisil,” ikan ḳali Ibrahimor lagi leḳa oise na, ²⁴amrar lagio leḳa oise. Imanor lagiu Allae amrare be-ḳosur ḳoia goino ḳorba, ḳaron ze Allae amrar malik Isare murda taki zinda ḳorsla, amra tan ufreu iman anchi. ²⁵Amrar gunar kofora hishabe ou Isare moutor ato tuli deoa oisil, ar amrare be-ḳosur ḳalas ḳoia goino ḳorar lagi tanre murda taki zinda ḳora oisil.

Be-ḳosur ḳalas bonia kushi ḳora

¹Imanor mazdi amrare be-ḳosur ḳalas ḳoia goino ḳora oise, gotike malik Isa al-Mosir usillae Alla Pak ar amrar maze shu-shomporko boail oise. ²Ou ze rohomotor tole amra asi, al-Mosie amrare i zagat ania fousaisoin. Erlagi Allar mohima faoar ashae amrar mon oḳon nichchit kushie bori gese. ³Ḳali ikan nae, amra duk-koshṭor mazeo kushi-bashi ḳorram. Ḳaron duk-koshṭoe sobor ane, ⁴sobore meoa fole, ou meoae asha-borosha ane, ⁵ar ou asha-borosha beḳama zae na. Ḳaron Allae amrare ze Pak Ruh disoin, i Pak Ruhe amrar dilor maze Allai mohobbot zonmae.

⁶Amra to ḳomzur-lasar aslam, shoṭik shomoye amrar laḳan gunagarre basanir lagi, al-Mosie nizor zan kurbani dila. ⁷Kunu forezgar manshor lagi shadaronoto ḳeu zan dilaito sae na, ta-o kub bala zonor lagi aḳta ḳeu dileo dilaito fare. ⁸Oile amra gunagar haloteu al-Mosie amrar lagi nizor zan kurbani disoin. Oḳan taki forman mile, Allae amrare ḳoto maea ḳoroin.

⁹Ar al-Mosir kurbanir usillae zebla be-ḳosur ḳalas ḳoia goinno oisi, te oḳon al-Mosir mazdi amra Allar shaza takio rehai faimu, iṭa to shullo-ana nichchit. ¹⁰Amra age Allar dushmon aslam, hou shomoe tan ḳas maear zon Ibnullar moutor usillae, tan loge amrar milon oise. Te to al-Mosir zinda oia uṭar mazdi oḳon aro beshi nichchit, amra nazat faimu. ¹¹Ḳali ikan nae, zar usillae ou milon oise, amrar malik ou Isa al-Mosir mazdi oḳon Allar name kushi-bashio ḳorram.

Hozrot Adom (a:) ar al-Mosir tulona

¹²Eḳzon manshor mazdi duniait guna aia hamaisil, ar ou gunar mazdi mouto aisil. Bade hoḳol mansheu guna ḳorse, erlagi hoḳolor lagiu mout aia azise. ¹³Hozrot Musar shoriot nazilor ageo duniait guna asil. Oile shoriot asil na gotike gunare hishabo dora oito na. ¹⁴Ta-o Baba Adom taki Musa nobir amol forzonto zera Adomor laḳan shorashori Allar hukumre bangise na, tarar ufreo moute beṭagiri ḳorse.

Te kunu kunu ḳarone Baba Adomor loge, bade toshrif ana ou al-Mosiro mil asil. ¹⁵Oile Baba Adomor naformani ar Allar rohomotor danor maze bout tofat ase. Hou eḳzonor naformanir dae boutor lagi mout ailo ar aroḳzon, mani Isa al-Mosir meherbanir mazdi ze rohomoti dan ailo, Allar i rohomot aro bout beshi baṛi gelo. ¹⁶Ar eḳzon manshor gunae zela fol deḳa gelo, Allar rohomotor dan to ilaḳan nae. Ḳali eḳzon manshor gunar lagi bout manshore dushi shaibosto ḳora oise. Oile bout beshi forimane guna ḳorar badeo Allar ou rohomote bout zonre be-ḳosur ḳalas ḳoia goino ḳora oise. ¹⁷Eḳzon manshor gunar lagi zebla moute amrar ufre beṭagiri ḳorse, te dusra aroḳzon, mani Isa al-Mosir mazdi amra zera Allar rohomote be-ḳosur ḳalas hishabe goinno oisi, amra-o ola ḳoto beshi nichchit oia Allai zindegi faia hoḳoltar ufre razotto ḳormu.

¹⁸Ashol ḳota oilo, eḳzon manshor gunar lagi zela hoḳol manshore dushi shaibosto ḳora oise, oula eḳṭa nek kamor mazdi hoḳol manshore be-ḳosur ḳalas ḳoia goinno oar shuzug deoa oise. Ou shuzugor fol oilo aḳeri zindegi. ¹⁹Zemon doro, eḳzon manshor obaiddotar lagi bout manush gunagar oisoin. Oula eḳzon manshor baiddotar lagi bout manshore be-ḳosur ḳalas ḳoia goino ḳora oise. ²⁰Ermaze shoriotor hukum-ahkamo nazil oigelo, zate i naformanir hishabor foriman aro baṛi zae. Oile naformani zeno baṛilo, ino Allar rohomot aro bout baṛigelo. ²¹I rohomot baṛilo, zate moutor mazdi age gunae zela beṭagiri ḳorsil, oḳon be-ḳosur ḳalas oar mazdi Allar rohomote oula razotto ḳore. Ar otar fol hishabe amrar malik Isa al-Mosir usillae aḳeri zindegi fai.

Gunar zindegi shesh, noea zindegir shuru

¹Te oḳon amra ola ḳoitam ni, amrar ufre zate Allar rohomot aro baṛe, erlagi amra aro guna ḳorat roi? ²Nauzubilla, muṭeu na! Gunar babote amra to morigesi, te i murda halote oḳon ar ḳemne gunar ḳamo roitam? ³Aichcha, amra zoto zone al-Mosir name toubar gusol ḳorsi, amra to tan moutor logeo shorik oisi. ⁴Ou gusolor ḳalo amrare to al-Mosir loge ḳoebor deoa oise. Ar gaibi baf Allae tan moha kudrote al-Mosire zela ḳoebor taki zinda ḳori tulchoin, ṭik oula amra-o zanu noea zindegie din ḳaṭai. ⁵Ar amra zebla al-Mosir mouto shorik oisi, te tain zela murda taki zinda oia uṭsoin, ola amra-o tan zinda oar loge shorik roimu. ⁶Amra ikan zani, amrar shorilor bod ḳaishre beḳama ḳorar niote amrar furan ‘ami’re al-Mosir loge solibor ufre maria falail oise, zate amra ar gunar gulam na roi. ⁷Ḳaron zar mout oizae, he to gunar ḳobza taki ḳalas failise. ⁸Te al-Mosir loge zebla amrar moron oise, oḳon amrar iman oilo, tan loge zindegio faimu.

⁹Amra zani, al-Mosi murda taki zinda oia uṭisoin ḳori tan ar mout oito nae. Moutor kunu ḳemota tan ufre nai. ¹⁰Ashole tan ze mout oise, ita to gunar ḳemota binash ḳorar lagi ḳali eḳbaru oise. Ar oḳon tan ze zindegi ase, ita to Allar mohimar lagi zinda asoin. ¹¹Ṭik oula, tumrao mono ḳorio, gunar ḳemotar befare tumrar moron oigese, oḳon ḳali Isa al-Mosir name Allar mohimar lagi zinda aso.

¹²Erlagi moutor zuka tumrar i shorilor ufre gunare kunu laḳan beṭagiri ḳorte dio na, shorilre bod ḳaishor ato shofi dio na. ¹³Shorilor kunu ongore bod ḳamor atiar banaio na. Borong nizore murda taki zinda oa zon mono ḳoria furafuri Allar ato shofi deo, shorilor hoḳol ongore nek kamor atiar hishabe Allar name bilai deo. ¹⁴Tumra to gunar gulam nae, shoriotor aotaeo nae, ḳali Allar rohomotor tole aso.

¹⁵Te oḳon kita ḳortam? Shoriotor aota taki saṛa faia, Allar rohomotor aotae asi ḳori, amra ḳali guna ḳortam ni? Nauzubilla, muṭeu na! ¹⁶Tumra buzo na ni, tumra zebla nizore ḳeuror ato shofi dia tar hukum mafik solo, te emneu to tar gulam bonizao. Olaḳan tumra hoeto gunar gulam bonia morbae, arnae Allar gulam bonia nek kam ḳorbae. ¹⁷Alla Pakor shukur, age zudio tumra gunar gulam aslae, ta-o Isaei torikar talim faia hari, dile-zane itar ashik oiso. ¹⁸Gunar gulami taki saṛa faia, nek kamor gulam oiso.

¹⁹Baiainre, tumrar aḳolor ḳomzuri dekia ami tumrar loge manush bulie matiram, age zela tumrar shorilor ongore nafaki ar bod ḳaishor gulam banaislae, oḳono ṭik oula, fak-fobitro zindegi ḳaṭanir lagi, zarzir ongore nek kamor gulamit shofi deo.

²⁰Tumra zebla gunar gulam aslae, i shomoe to nek kamor dae-daeitto taki azad aslae. ²¹Agor bod ḳam-ḳazor ḳota mono oile oḳon tumrar shorom lage, te ḳo sain, ita ḳame tumrar kita lab oito? Itar hesh fol to moron. ²²Oile oḳon tumra gunar gulami taki azad oia, Allar fotor gulam bonia fak-fobitro zindegi ḳaṭairae, er hesh fol to aḳeri zindegi. ²³Ashole gunar mozuri oilo mout, oile Allar rohomotor dan oilogi amrar malik Isa al-Mosir usillae aḳeri zindegi.

Shoriotor gulami taki ḳalas

¹Te O bai oḳol, Hozrot Musar shoriotor bishoe to tumrar zanau ase. Ta-o tumra buzo na ni, shoriotor dabi-daoa manshor ufre boail taḳe, ḳali zinda taḳa forzonto. ²Zela, zamai zotodin zita ase, otodin tar bou tar aotae banda roe, ar zamair moutor bade tar bou i bandon taki ḳalas fae. ³Ar zamai zita taḳte bou zudi dusra beṭar gese hanga boe, taire to zinakur hishabe gona oe. Oile zamair moutor bade tai zamair bandon taki ain mafik kalas fae, erbade tai oinno zonor gese bia boile zinakur nae.

⁴Baiainre, ṭik ou laḳanu, al-Mosir shorilor moutor mazdi shoriotor bandon taki tumrar mout oigese ḳori, oḳon tumra oinno zonor bandono zaitae faro, ar ou oinno zon oila, murda taki zinda oa hou Isa al-Mosi, zate amrar zindegit Allar name nek fotor fol dore. ⁵Age zebla amra shorilor morzie soltam, ou shomoe shoriote amrar mazor gunar bod ḳaishre kusaia hozag korto, ou ḳarone amrar shorilor ongo oḳole moutor foti gunar fol dorto. ⁶Te age amra ze shoriotor bandono aslam, ita taki amrar mout oigese, oḳon amra i shoriotor bandon taki ḳalas faisi. Erlagi amra ar hi likito shoriotor gulam nae, ḳali Allai Pak Ruhe noea zindegir gulami ḳori.

Shoriote gunare hozag kore

⁷Oḳon amra ola ḳoitam fari ni, shorioteu guna ḳorae? Nauzubilla, muṭeu na! Ashol ḳota oilo, shoriot na taḳle to ami buztam farlam na one, guna ki zinish. Shoriote zudi na ḳoito, lub-lalos ḳorio na, te lalos ḳorle kita oe, ita amra buzlam na one. ⁸Ar ou hukumor shuzug buzia amar bitre guna hamaia, hoḳol nomunar lub-lalos zonom dise. Shoriot na taḳle to gunao morar laḳan sufsaf roe. ⁹Amar zindegit shoriotre balamonte sinar age ami to zita aslam, oile ou hukum zanar loge logeu guna hozag oilo, ar amar mout oilo. ¹⁰Buzrae ni, ze shoriote ami zindegi faoar ḳota, hou shoriote amar lagi moron loia ailo. ¹¹Shoriotor ou hukumor shuzug faia gunae amare ṭogilo, ou hukumor boleu gunae amar zan ḳaṛia nilo.

¹²Oile ikan to hasa, Musa nobir deoa shoriot fobitro, er hukum-ahkamo fobitro, ita shoṭik ar bala zinish. ¹³Te ou bala zinisheu kita amar moron anlo ni? Nauzubilla, muṭeu nae! Borong gunaeu ita ḳorse, he bala zinish dia amare maria hari forman deḳailo, guna to guna. Ar ou hukum-ahkameu buza zae, guna oilo mosto boṛo zogoinno.

Dilor loge shorilor laṛai

¹⁴Amra to zani, shoriot oilogi ruhani zogotor, oile ami oilam roḳto-mangshor zogotor, ami shorilor morzir bandono taḳae gunar gulam oisi. ¹⁵Ami nizeu to buzi na, ami kita ḳam ḳori. Ashole ami zeta ḳortam sai, ita na ḳoria, zetare ginnai otau ḳori. ¹⁶Ar zeta ḳortam sai na, ola gunar ḳam zebla ḳori, te ami emneu shikar ḳoriar, shoriot asholeo bala zinish. ¹⁷Ita taki buza zae, ami nize ila ḳoriar na, oile amar maze ze gunae boshot ḳore, he-u amare dia ita ḳorae. ¹⁸Ar ami to buziar, amar lour maze, mani shorilor ḳaishor maze bala kunu zinishu nai. Ami nek kam ḳorar kial taḳleo, amar shamortoe kulae na. ¹⁹Ḳaron ami zeta nek kam ḳortam sai, ita ḳortam fari na, oile ze bod ḳam ḳortam sai na, otau ḳori. ²⁰Te zeta ḳortam sai na, otau zebla ḳori, er mani oilo ita ami ḳori na, borong ze gunae amar maze boshot ḳore, he-u ita ḳorae.

²¹Oḳon amar nizor bitreu dekiar, eḳṭa bod rifue ḳam ḳorer, ami nek kam ḳorat lagle, bod ḳam emneu aia azi zae. ²²Ashole amar dilor ḳaislot mafik ami Allai hukum-ahkame kushi oi. ²³Oile amar shorilor ongor maze dusra arok kaislote ḳam ḳorer, amar dile nek kamre fosond ḳorleo, ou bod ḳaislote amar dilor loge zuddo ḳoria, amare tar gulamit bandia raḳe. ²⁴Amar boṛo bod nosib! Amar shorilor ou bod ḳaislot, zegie amare moutor fote ṭane, tar at taki ḳe amare basaibo? ²⁵Allar shukur, amrar malik Isa al-Mosie tar at taki amare basaisoin! Oḳon nichchit buza zae, dilor dik taki ami Allai shoriotor gulami ḳori, oile shorilor morzir dik taki ami gunar ḳaislotor gulami ḳori.

Allai Pak Ruhu faoar fol

¹Te ou talim taki amra buzi, Isa al-Mosir zera afon zon boni gesoin, oḳon tarare ar dushi shaibosto ḳora oito nae. ²Guna ar moutor at taki amare ḳalas ḳora oise, zindegi deora ruhe Isa al-Mosir usillae ḳalas ḳorsoin. ³Roḳto-mangshor shorilor bod ḳaishor lagi shoriote amrare basaito farse na, ar shoriote zeta ḳorto farse na, Allae to nizeu ita ḳorsoin. Tain tan nizor ḳas maear zon Ibnullare amrar laḳan gunagar manshor surote faṭaila, gunar ḳemotare binash ḳorar lagi. Ar ou maear zonor zan kurbanir mazdi gunar bisar ḳoria tar ḳemotare batil ḳori dila. ⁴Tain amrar fokko loia ita ḳorla, amra zera roḳto-mangshor shorilor ḳaishe na solia ruhur boshe soli, ou amrar lagi shoriotor dabi-daoa adae ḳorla.

⁵Shorilor bod ḳaishor aotae zeta manush soloin, tarar mono bod ḳaishor bae kiali taḳe, ar zera Pak Ruhur aotae, tarar mon to Pak Ruhur kushi mafik solte kiali roe. ⁶Shorilor bod ḳaish ze ḳamor kiali, itar fol oilo moron, oile Pak Ruhur kiale solar fol oilo zindegi ar shanti. ⁷Ze zonor mon shorilor bod ḳaishor bae kiali, i mon to Allar dushmon, he Allai shoriot mante razi nae, manto fareo na. ⁸Erlagiu zeta manush shorilor bod ḳaishor aotae soloin, tara Allare kushi ḳorta faroin na.

⁹Oile tumrar dilo zebla Allar ruh boshot ḳoroin, te tumra to shorilor bod ḳaishor aotae nae, borong Pak Ruhur aotae. Ashol ḳota oilo, al-Mosir ruh zar maze nai, he al-Mosir nae. ¹⁰Ar hasau zudi al-Mosi tumrar maze taḳoin, te gunar fol hishabe tumrar shoril morar foti oileo, Pak Ruhur fol hishabe tumra to zinda. Allae to tumrare be-ḳosur ḳalas ḳoia goino ḳorsoin. ¹¹Ar hou Isare zein murda taki zinda ḳorsoin, ou Allar ruh zebla tumrar dilo boshot ḳoroin, te tan ou ruhur bole moutor aotae taḳa tumrar shorilreo zindegi dan ḳorba.

¹²Erlagi O bai oḳol, shorilor bod ḳaishor gese amra ar ṭeḳat nae, ou bod ḳaishor odine solaro zorur nae. ¹³Oḳon shorilor bod ḳaishor aotae solle to tumra siroḳalor lagi morbae, oile Pak Ruhur bole shorilor hoḳol naformanire binash ḳorille siroḳal zinda roibae. ¹⁴Ḳaron Allar ruhur bole zera sole, tarau Allar aolad. ¹⁵Tumra to gulamir ruh faiso na, te ar ḍoraitae ḳene? Tumra ḳali hou Allar ruh faiso, zein tumrare aolad oar eḳtiar disoin. Erlagiu Alla Pakre amra ruhani abba, fobitro baba ḳoia ḍaki. ¹⁶Amrar dilor mazor Allai Pak Ruheo ola shakki dia ḳoira, amra Allar aolad. ¹⁷Amra zebla aolad, te amra mouroshi baṭ faimu. Al-Mosie Allar ges taki mouroshi baṭ faiba, ar tan loge amra-o faimu. Ḳali amra tan loge duk-koshṭo shoijjo ḳorle, tan loge gourob-mohimaro bag faimu.

Amra kun laḳan baṭ faimu

¹⁸Baiainre, amra bade ze mohima faimu, itar tulonae oḳonkur i duk-koshṭo kuntau nae, ita to ami zani. ¹⁹Hou shomoe aile deḳa zaibo ḳe ḳe tan ashol aolad, erare deḳar lagiu Allar foeda ḳora hoḳoltae zane-forane bar saira. ²⁰Ḳaron tan foeda ḳora hoḳolta-u oḳon oshar oigese. Ita kunu nize nize oshar oigese ni? Na, borong Allaeu tarare hou fote saṛi disoin. Oile erloge tain ou ashao disoin, ²¹eḳdin ita hoḳolta binashor at taki ḳalas oia, Allar aolad oḳolor shadinota ar gourobor bagi oito farbo. ²²Oḳon forzonto dekiar, hurutta foedar ḳalo maʼe zela buk faṭaia sillain, tan foeda ḳora hoḳoltaeu ola ahazari ḳori sillaira. ²³Ḳali ikan nae, amra-o hou ze mohima bade faimu, er foela kisti hishabe Allai Pak Ruhre oḳon faisi, faia baki kistir lagi amra-o ola sillaiar. Ar hou kisti faoar dinor lagi bar saiar, ze din amrare Allar aolad hishabe zair ḳora oibo, mani ze din amrar shorilre binashor at taki ḳalas ḳora oibo. ²⁴Amra ḳalas oar ou asha faisi, iman anar ḳalo. Te zeta zinish manshe dekilae, ita deḳar lagi he ar asha ḳore na, zeta deḳa oigese, itare deḳar asha ar ḳene ḳorto? ²⁵Oile na deḳa zinishre deḳar lagi amra doijjo doria bar sai.

²⁶Ita saṛa amrar ḳomzurir shomoe to Pak Ruhe amrare shaijjo ḳoroin. Dua ḳorar ḳalo amra kita saitam, ita to amra zani na. Oile mukdi zeta ḳoar shaiddo nai, dilor ḳandonor loge Pak Ruhe nizeu amrar fokko oia, itar lagi minoti ḳoroin. ²⁷Ḳaron zein manshor dilor tallash ḳoroin, tain to Pak Ruhur ḳotao buzoin. Pak ruhe Allar morzi mafik tan pak bonda oḳolor lagi minoti ḳoroin.

²⁸Amra zani, Allare zera mohobbot ḳoroin, mani Allae tan nizor morzi mafik zerare daot disoin, tarar balair lagi hoḳoltae eḳloge ḳam ḳorer. ²⁹Allae zerare ag takiu tan nizor lagi fosond ḳori raḳsila, tarare tan ḳas maear zon Isar laḳan oar lagiu fosond ḳorsila, zate ou Isa Ibnullau, era hoḳolor boṛo bai oin. ³⁰Tain age zerare fosond ḳorsila, tarareu daot dila. Ar zerare daot dila, tarare be-ḳosur ḳalas ḳoia goino ḳorla, ar zerare be-ḳosur goino ḳorla, tarare tan nizor gourob-mohimao dan ḳorla.

Allar mohobbotor bol-shokti

³¹Oḳon ita befare amra kita ḳoitam? Shoeong Alla Pak zebla amrar fokke, te amrar bifokke ḳegu lagto? ³²Amra hoḳolre basanir lagi, Allae zebla tan ḳas maear zon Ibnullare bilai diteo naraz oila na, tanre moutor ato shofi dila, te ou maear zonor loge hoḳolta-u amrare dan ḳorta nae ni? ³³Ar Allae tan nizor lagi zerare fosond ḳorsoin, erar birudde nalish dibar shaiddo ḳar? Allae nizeu tarare be-ḳosur ḳalas ḳoia goino ḳorsoin. ³⁴Te tarare ḳegue dushito? Zerar lagi hou Isa al-Mosir mout oise, moutor bade zinda ḳorio tula oise, tain oḳon Alla Pakor ḍain galar toḳto boia, amrar lagi minot-ḳajji ḳorat asoin. ³⁵Erlagi ila kunu zinish ase ni, zetae amrare al-Mosir mohobbot taki alog korto? Zulum-nirjaton, zala-zontrona, monor ḳoshṭo, ḳaoa-findar obab, bifod-afod ba dushmonor toluar? ³⁶Fobitro Zobur Shorifo ase,

Tumar namor lagi

amrare hor-hamesha kun ḳora or.

Manshor sokut amra oilam bolir faṭa.

³⁷Na, ila kuntau nai. Ḳaron ze Isae amrare oto mohobbot ḳorsoin, tan bole amra ita hoḳoltatu furafur zoei oiar. ³⁸Te ami ikan balamonteu zani, zindegi ba mout, firista ba Iblisor kunu sela, oḳon ba bobishotor kunutaeu, kunu laḳan shoktieu, ³⁹asmanor ba fatalor ba foeda oa kunu zinisheu amrare Allar mohobbot taki alog korto farto nae. Tan ou mohobbot to amrar malik Isa al-Mosir usillae faisi.

Shoriote ofarog oileo, Boni Israilor hesh rokka imane (9:1–11:36)

Allar fosond ar ofosond

¹Ami al-Mosire shakki rakia, ekkere hasa ḳota ḳoiram, amar bibeḳeo Pak Ruhur loge oia ou shakki der. ²Boni Israilor lagi amar boṛo afsus ar shimahin ḳoshṭo lager. ³Haere hae, ami lannotir ḳataro gia al-Mosir ges taki horail oia-o zudi, amar zatir baiain Boni Israilre basaitam fartam. ⁴Allae to Boni Israilre tan nizor aolador eḳtiar disoin, tan shan-tozolli deḳaisoin, tan loge milonor usilla oḳol ḳaim ḳorsoin, shoriot nazil ḳorsoin, tan ebadot-bondegir shuzug kori disoin ar bout laḳan oadao ḳorsoin. ⁵Hozrot Ibrahim, Isʼhak ar Iakub nobi asla Boni Israilor mul-murobbi. Bade Isa al-Mosio to roḳto-mangshor bae taki erar ḳandanou zonom loisoin, ein hoḳoltar uforala, zuge zuge siroḳal tan tarif ouk. Amin.

⁶Huno, Allar oada oḳol oḳon zen beḳama oigese, ila kunta nae. Ḳaron Boni Israilor maze zonom oilo ḳoriu, era hoḳol to ashol Boni Israil nae. ⁷Hozrot Ibrahimor ḳandan ḳoriu tara zen tan ashol aolad, ila kunta nae. Borong kitabo leḳa ase, “Tumar fua Isʼhakor ḳandanreu tumar ḳandan ḳoia gona oibo.” ⁸Mani Israil zatir maze zonom oise gotikeu mono ḳorio na, tumra Allar aolad bonigeso. Ḳali Allar oada mafik zera aolad bonche, tarareu Ibrahimor ḳandan hishabe goino ḳora oibo.

⁹Buzrae ni, Allae to Hozrot Ibrahimor gese ou oada ḳorsla, “Samnor bosor ou sando ami firia aimu, ou shomoe tumar bibi Saerar kulo eḳ fua taḳbo.” ¹⁰Ar ou fua oila, amrar furbo-furush Hozrot Isʼhak. Ḳali ikan nae, ou Isʼhakor bibi Rebekar feṭor zuṛor fuain eḳoi bafor aolad oileo, ^11-12era maʼr feṭo taḳa halote zebla bala-bura kichchu ḳorsoin na, hou shomoe Allae Rebekare ḳoisla, “Tumar boṛo fua to huru fuar gulam oibo.” On taki buza zae, Allae tan munsha fura ḳorar kiale manshore fosond ḳoroin, ḳeuror amolor bae na saia, tan nizor fosond mafik basia nein. ¹³Erlagiu pak kitabo leḳa ase, “Ami to Iakubre mohobbot ḳorsi, oile tar bai Ishre horaia raḳsi.”

¹⁴Te oḳon amra ḳoitam ni, Allae-o obisar ḳoroin? Nauzubilla, muṭeu na! ¹⁵Allae Hozrot Musare ḳoisla, “Ami zare kushi doya ḳormu, ar zare kushi rohom ḳormu.” ¹⁶On taki buza zae, rohomot to ḳeuror sesṭae ba ichchae mile na, ḳali Allar meherbani takiu mile. ¹⁷Asmani kitabor aeato ase, Allae Feraunre ḳoisla, “Ami tumare bashsha banaisi, zate tumar mazdi hoḳole amar lila-ḳela dekia, hara duniait amar nam zair oe.” ¹⁸Te deḳa zae, Allae tan nizor kushi mafik keurore doya ḳoroin, ar ḳeuror dilre fashan banain.

Allar gozob ar rohomot

¹⁹Oḳon tumra amare zikaitae faro, “Allar morzir baira zebla ḳeu kunta ḳorto fare na, te Allae ḳene manshor dush-tiruti gonoin?” ²⁰I soalor shuza zuaf oilo, Allar ufre matar tumi ḳe? Ḳeu zudi kunu zinish banae, te tar banail zinishe zikaito farbo ni, amare ḳene ila banailae? ²¹Eḳ maṭi taki kumare nanan zator zinish banaito fare na ni? Itar kunuṭa ijjoti ḳamo ar kunuṭa shadaron ḳamo lage.

²²Ṭik olaḳan, Allae tan lannot ar kudroti ḳemota deḳaita saisla, ar zerar ufre i lannot ḍalita saisla, erar faona asil ḳali binashi gozob, ta-o tain bout boṛo sobor ḳoria tarar ita shoijjo ḳorla. ²³Tain ita shoijjo ḳorla, ḳaron aroḳbar nizor kudroti shan-tozollir ḳota zanaita saila. Ar zerare doya ḳorsoin, erare tain age takiu zuit ḳoria raḳsila, tan shan-tozolli deḳanir kiale. ²⁴Ashole amrau oilam hou doyar zon. Amrare tain ḳali Boni Israilor maz takiu daot dia anchoin na, oinno zatir maz takio to anchoin. ²⁵Hozrot Husia nobir sohifat Allae ḳoisoin,

Zeta manush amar proza nae,

tarareo amar nizor proza banaimu.

Ar zera amar maear manush asil na,

tarareo maear manush ḳoia ḍaḳmu.

²⁶Ze zomino ḳoa oisil,

tumra amar proza nae,

hou zominou tarare

zinda Allar aolad ḳoa oibo.

²⁷Oile Boni Israilor befare Hozrot Ishaea nobie ḳoisla,

Gonar bala zudio tara doriar soror balur laḳan behishab,

tebou tarar mazor kub huru eḳ ongshoe ḳalas faiba.

²⁸Mabud Moulae zogotor faona ze shaza zuit ḳorsoin,

ou shullo-ana shaza kub zoldiu diba.

²⁹Hozrot Ishaea nobie aro bataisoin, “Alla Rabbul Alamine zudi amrar lagi kisu manshore zinda na raḳta, te amrar dosha to lannoti Sadum ar Amura ṭaunor laḳan oilo one.”

Boni Israil be-foti oar ḳaron

³⁰Te amra ou ḳotau ḳoimu, bin zati oḳole zudio Allar forezgar bonda oar sesṭa ḳorse na, tebou iman anar mazdi tara Allar dorbaro forezgar bonigese. ³¹Ar Boni Israile ḳali shoriot mania forezgar bonto saisil, oile shoriot manto farse na. ³²Aichcha, tara ḳene farse na? Tara imanor ufre borosha na ḳoria, ḳali ḳam-ḳazor amolor ufre borosha ḳorse, erlagi farse na. Manshe ze fattoro usṭa ḳain, tarao ou fattoro usṭa ḳaisoin. ³³I befare asmani kitabo leḳa ase,

Huno, ami Zeruzalemo ola eḳ fattor boaisi,

ze fattoro manshe usṭa ḳaia foṛbo.

Oile ze zone tan ufre iman anbo,

he kunumonte-u shorminda oito nae.

¹Te O bai oḳol, Boni Israilor lagi amar dilor ou foriad ase, ami Allar dorbaro dua ḳoriar, tara zanu nazat fain. ²Tarar befare ami oḳanu ḳoiram, tarar monor maze Allar eshki ase, oile tara zane na, Allar dorbaro ḳemne forezgar bona zae. ³Allar dorbaro be-ḳosur ḳalas oar fot na zanae, tara i fotre mancheo na, tara ḳali shoriot amol ḳoria forezgar bonto sae. ⁴Ou shoriotor hoḳol dabi-daoa al-Mosie to adae ḳorilsoin, erlagi tan ufre zera iman ane, Allar dorbaro tarare be-ḳosur ḳalas ḳoia goino ḳora oe.

Allai nazator bebosta hoḳolor lagi

⁵Shoriot amol ḳoria Allar dorbaro forezgar oar befare, Hozrot Musae Tourat kitabo leḳsoin, “Zera shoriot manto sae, tara furafur manle basibo.” ⁶Ar imanor bole manush kila Allar dorbaro forezgar bone i befare Allar kalamo leḳa ase, “Mone mone ḳoio na, ḳe gia asmano uṭito?” Er mani oilo, hono uṭia al-Mosire lamaia anto. ⁷Ba ikano ḳoio na, “Ḳe gia fatalo lamto?” Er mani oilo, hono lamia al-Mosire ḳoebor taki tulia anto. ⁸Na ila kunta nae, ḳaron leḳa ase, “Ashole Allar kalam to tumar kub daro ase, ita tumar muko ar tumar dilo ase.” Ar amra zeta toblig korram, itau to hou kalam. ⁹Oḳon tumi zudi muke shikar ḳoro Hozrot Isau malik, ar dile ekin ḳoro, Allae tanre murda taki zinda ḳorsoin, te tumi aḳer faibae. ¹⁰Ḳaron dile iman anle Allae manshore be-ḳosur ḳalas ḳoia goino ḳoroin, ar muke shikar ḳorle Allae nazat dan ḳoroin. ¹¹Allar kalame batae, “Ze zone tan ufre iman anbo, he kunumonte-u shorminda oito nae.” ¹²Boni Israil ouk ba bin zati ouk, erar maze kunu tofat nai, ḳaron hoḳolor malik to eḳzon. Ze manshe Allar nam loe, Allae tare bout meherbani ḳoroin. ¹³Allar kalame to ḳoe, “Zekunu manshe Mabudor name ḍakile, he nazat hasil ḳorbo.”

¹⁴Oile zan ufre tara imanu anche na, tanre kila ḍakibo? Ar zan befare tara huncheu na, tan ufre iman anbo kila? Toblig korra na taḳle, tara hunbo kila? ¹⁵Ar tobligo ḳeu na faṭaile, tara kila tobligo zaibo? Zela Allar kalamo batail oise, “Doinno tarar fao ḳanain, zera aṭi aṭi kush-ḳobri toblig koroin.” ¹⁶Oile hoḳol manshe to i kush-ḳobrire ḳano ṭai dey na. Hozrot Ishaea nobie ḳoisoin, “O Mabud, amrar toblig hunia ḳe iman anche?” ¹⁷Te deḳa zar, Allar kalam hunle iman ae, ou kalam oilo, al-Mosir befare toblig.

¹⁸Oile ami ḳoiram, Boni Israil oḳole i kalam hunche na ni? Nichchoe hunche. Pak kalame ḳoe,

Tarar aoaz to

hara duniait sitri gese,

sitri gese tarar mat-ḳota,

duniar eḳ mata taki aroḳ mata forzonto.

¹⁹Ami hirbar ḳoiram, Boni Israile hou kalam buzchoin na ni? Nichchoe buzchoin, Allae to Hozrot Musa nobir mazdi tarare ḳoisoin,

Ami be-zatire dia

hingsha foeda ḳoraimu,

ammok eḳṭa zatire dia

tumrar gusa tulaimu.

²⁰Bade Ishaea nobie kub shaosh ḳoria i aeato ḳoisoin,

Amare zera tallash ḳorse na,

tarau amare faise.

Amar gese zera kunta saise na,

tarare ami didar disi.

²¹Oile Boni Israilor befare tain ḳoira,

Ami at baṛaia ḍakiram,

hara din dori duio ate ḍakiram,

naforman ar fashan eḳ zatire ḍakiram.

Be-foti Boni Israileo hesh-mesh nazat faiba

¹Erlagi ami oḳon zikairam, Allae kunu tan afon bonda Boni Israilor log saṛi disoin ni? Nichchoe na! Ḳaron ami nizeo to eḳzon Boni Israil ar Hozrot Ibrahimor bongshodor, Bin-Iamin ḳandanor manush. ²Allae foela taki tan ze prozare fosond ḳoria alog korsila, tain to erar log saṛsoin na. Hozrot Ilias nobir befare Allar kalamo kita ase, ita tumra zano na ni? Tain to Boni Israilor birudde Allar dorbaro ou nalish disla, ³“O Mabud, itae tumar nobi oḳolre ḳatol ḳorse, tumar kurbani ḳanaino bangilise. Ḳali amiu basia roisi, oḳon tara amar zanḳano nitagi saira.” ⁴Teu Allae tanre kita zuaf disla mono ase ni? Tain ḳoisla, “O Ilias, ami to shat azar manshore amar nizor lagi alog koria raḳsi, era to i Baal devtare fornam ḳorse na.”

⁵Ṭik olaḳan, Allae rohom ḳoria Boni Israilor eḳṭa ongshore oḳono alog kori raḳsoin. ⁶Ar Allae zebla rohom ḳoria erare alog korsoin, te ita kunu nek amolor fol nae. Amolor fol oile to ar rohomot ḳoa oilo na one. ⁷Te buza zae, Boni Israile shoriot amol ḳoria zeta faita saisla, ita tara faisoin na. Ḳali Allar fosond ḳora zone faisoin. Oile baki hoḳolor dil fashan bonigese. ⁸Zela Allar kalame ḳoise,

Allae tarar dilre beushi gumo falaisoin,

tarar souk taḳteo deḳe na,

ḳan taḳleo hune na.

Aiz forzonto ou haloto ase.

⁹Ola Hozrot Daud nobieo ḳoira,

Tarar dumdam ḳori ḳaoa-daoau

shikaror zal ar fand bonizauk.

Ita tarar bifodor ḳaron ouk,

bod ḳamor shaza bonizauk.

¹⁰Tarar souk anda oizauk zate na deḳe,

tumi tarar ḳomorre hamesha guza ḳori rakio.

¹¹Te Boni Israil oḳol siroḳalor lagi ou bifodor fando roibo ni? Nichchoe na. Borong tarar naformanie bin zati oḳolor lagi nazator duar kuligelo. Allae saila, ita dekia tarar dilo zanu zala foeda oe, ḳaron bin zatie nazat failira. ¹²Oḳan taki buza zae, tarar naformanir lagi zogotor manshor bout faeda oise, ar tarar ḳetie zebla bin zatir lab oilo, te tara zebla Allar nazator daot ḳobul ḳorba, ou shomoe bin zati oḳole aro ḳoto beshi rohom faiba.

Bin zati oḳolor nazat

¹³O bin zati oḳol, ami tumrare ḳoiram, huno, tumrar gese-u amare sahabi hishabe faṭail oise ḳori, ami amar ḳamre kub dam diram. ¹⁴Ḳaron, ou ḳam deḳaia amar nizor zati Boni Israilor dilo kunu zala foeda ḳortam fari, ar ou zalae tarar mazor kisu manshor zan basaitam fari. ¹⁵Tara duroi hori zaoae zebla zogotor manshor loge Allar milon oilo, te tarare zebla hirbar ṭai diba hou shomoe kun halot oibo? Ita mora manush zita oar laḳan nae ni? ¹⁶Doro, Allar name bilanir ruṭir mul ḳai zudi fobitro oe, te to banail ruṭio fobitro. Gasor mul zoṛ fobitro oile, er dal-falao nichchoe fobitro. Ṭik ola, Boni Israilor mul baf Hozrot Ibrahim zebla fobitro, te Boni Israilo fobitro.

¹⁷Ar mone ḳoro, gasor kisu dal-fala ḳaṭa oilo, bade ou ḳaṭa zagat tumar laḳan zongli zoetun gasor kisu ḍal ḳolom dia zuṛa deoa oilo, te tumi nichchoe mul gas takiu rosh fairae. ¹⁸Oḳon tumio nizore hou ḳaṭia falail ḍal taki boṛo mono ḳorio na, iad rakio, tumi mul gasre ṭikai raḳso na, borong mul gaseu tumare ṭikaia raḳse.

¹⁹Tumi ikan ḳoitae faro, “Amare zuṛa dibar lagiu to agor dal-falain ḳaṭa oisil.” ²⁰Ikan ṭik ase, oile iman na anar ḳaroneu to tarare ḳaṭia falail oise, ar iman anae tumare hono lagail oise. Te tumio beṭagiri na deḳaia Allare ḍorao. ²¹Mono rakio, Allae zebla mul dal-falareu rehai disoin na, te tumi ḳolomor ḍalre kunu rehai diba ni?

²²Erlagiu sinta ḳoria deḳo, Alla Pak koto doyal ar ḳoto fashan. Zera be-fote faṭi gesoin tarar lagi tain fashan, ar tumar bae tain doyalu, zudi tumi tan doyar maze ro, na roile tumareo ola ḳaṭia falai diba. ²³Ar hou Boni Israileo zudi hirbar iman anoin, te tarareo tain mul gasor loge zuṛa diba, Allae to ila zuṛa dita faroin. ²⁴Ashole to tumi aslae zongli zoetun gasor ḍal, tumare zebla hon taki ḳaṭia ania malikana baganor zoetun gasor loge asanok halote zuṛa lagail oise. Te sinta ḳoro, zera ou gasor ashol ḍal, tarare mul gasor loge lagani ḳoto shuza.

Allar doya hoḳolor ufre

²⁵O bai oḳol, tumra zate nize nize aḳoldar na bono, erlagi eḳṭa batuni befar ami tumrare hikai dei. Huno, bin zati oḳolor nazat faoar shongḳa fura na oa forzonto bout Boni Israilor dil fashan halote roibo. ²⁶Heshe olau hoḳol Boni Israile nazat hasil ḳorba, zela asmani kitabo ase,

Toranealae toshrif anba

Zeruzalemor Sion faṛ taki,

tain Iakub nobir ḳandan taki

naformani ḳedai diba.

²⁷Ami olau tarar gunare horailimu

iṭa to amar deoa oada.

²⁸Huno, tumrar balair lagi kush-ḳobrir befare tara to oḳon Allar dushmon, oile Allai fosondor befare baf-dadar silsilae tara oila Allar mohobbotor manush. ²⁹Ḳaron Allae tan rohomotor dan-dokkina ar tan daotor ḳota kunumonte-u mot bodlain na. ³⁰Zela tumrao eḳ shomoe naforman aslae, oile oḳon Boni Israile naformani ḳorae tumra tan meherbani faiso, ³¹ṭik ou laḳan, tumra meherbani faoae tara oḳon naformani ḳorer, zate tarao ola meherbani fain. ³²Ar Allar munsha oilo, tain zate hoḳolor bae meherbani deḳaita faroin, otar lagi hoḳolreu naformanir maze bondi ḳorsoin.

³³Buzrae ni, Allar banḍar ḳoto boṛo! Tan aḳol-hekmot ḳoto goin! Tan bibeḳ-bisar buzar oshaiddo, tan ḳam-ḳaz oḳol tallash ḳori buza zae na. ³⁴Zela kitabo ase,

Ḳaron Mabudor mon sinar shaiddo ḳar ase?

Tanre foramish dibar lak ke ase?

³⁵Ḳe age Allare kunta dilaito farse,

ze ḳarone tain tar gese denadar asoin?

³⁶Ashole hoḳolta-u to tan ges taki, tan mazdiu ae, tan nizor lagi foeda ḳorsoin. Zuge zuge siroḳal tan tarif ouk. Amin.

Isaei mumin oḳolor sal-cholon (12:1–16:27)

Allar name zinda kurbani

¹Erlagi O bai oḳol, Allae tumrare ola meherbani ḳorae, ami tumrare ḳas minoti ḳoriar, tumra zarzir shorilre Allar ato shofi deo, ila zinda fobitro kurbani Allar dorbaro ḳobul oe, oḳṭau oibo tumrar sohi-shuddo ebadot. ²Ar ou ḳaraf zomanar talo foṛio na, borong nizor dilor bab bodlaia noea manush o. Teu tumra Allar morzi buzbae. Tan morzi to bala ar furafur nikut, ola ḳorle tain kushi oin.

³Talim dibar lagi Allae amare ze ḳas niamot disoin, ou niamotor bole ami tumra forteḳ zonre ḳoiram, nizore zotoḳan boṛo mono ḳora usit, er saite beshi mono ḳorio na. Allae zare zotoḳan imani bol disoin, he zanu nizore er taki beshi kunta mono na ḳore. ⁴Kial rakio, amra hoḳolor shorilo bout ongo ase, hoḳol ongoe to eḳ laḳan ḳam ḳore na. ⁵Ṭik ou laḳan, mumin hishabe amra bout zon oileo, al-Mosir loge shorik oia ḳali eḳ shoril oisi. Eḳoi shorilor ongo gotike amrar eḳe-oinne mil ase. ⁶Allar rohomote amra nanan zone nanan laḳan niamot faisi, ou niamot zudi gaibi ohi zananir befare oe, te amrar iman mafik oli-auliar laḳan ohi ḳoite taki. ⁷Ḳeu zudi ḳezmot ḳorar niamot fae, te ḳezmot ḳorouk. Ar talim dibar niamot ze faise, he talim deuk. ⁸Utshaho dibar niamot ze faise, he manshore utshaho deuk. Dan ḳorar niamot ze faise, he ḳalis niote dan ḳorouk. Murobbiana ḳorar niamot ze faise, he dile-zane hoḳolta salauk. Manshore shaijjo ḳorar niamot ze faise, he kushi mone shaijjo ḳorouk.

Mumini sal-cholon

⁹Maea-mohobbotor maze kunu ḳad mishaio na. Ḳarafire ginnao, balair ashik o. ¹⁰Eḳe-oinnore afon bair laḳan dile-zane maea ḳoro, niz taki oinnore beshi dam deo. ¹¹Ḳezmot ḳamo durbol oio na, ruhre gorom raḳo, malikor gulami ḳorat ro. ¹²Samnor furushkaror ashae hamesha kushi-bashi ḳoro, duk-mosiboto sobor ḳoro, hor-hamesha munazat ḳorat ro. ¹³Allar pak bonda oḳolor obabo shaijjo ḳoro. Memandari ḳorte kiali o.

¹⁴Tumrar ufre zera zulum ḳore, tarar lagi nek dua ḳorio, boddua dio na. ¹⁵Zera kushi-bashi ḳorer, tarar loge kushi ḳoro, zera ḳander tarar loge oia ḳando. ¹⁶Tumra eḳe-oinne bai bai oia ro. Boṛoluki bab na deḳaia, shadaron manshor loge mili-mishi solo. Nizor fonḍiti deḳaio na. ¹⁷Ḳarafir bodla hishabe ḳeuror ḳarafi ḳorio na, hoḳol manshe zetare bala mono ḳoroin, tumra sinta-babna ḳoria otau ḳoro. ¹⁸Tumrar torof taki zotoḳan shombob hoḳol manshor loge shantie boshot ḳoro.

¹⁹O maear bai oḳol, tumra ḳeuror bodla loio na, ita Allar ato saṛi deo, bodla deoa tan ḳam. Allar kalamo ase, “Naformanir shaza dibar eḳtiar ḳali amaru ase, zar zela faona ami tare ola bodla dimu, ikan ami Mabude ḳoiram.” ²⁰Borong kitabe ḳoe, “Tumar dushmonor feṭo buk lagle, tare ḳani deo. Fiase dorle tare fani deo. Ola ḳorle to tumi tar matar ufre zalail angrar ṭukri toilae.”

²¹Ḳarafir gese kunumonte-u ario na, borong balare dia ḳarafire arao.

Razar hukum mania solo

¹Forteḳ manshe deshor razare mania solouk, ḳaron Allar morzi saṛa ḳeu razotto fae na, raza oḳolre to Allaeu godit boain. ²Erlagi ze manshe deshor razar dushmoni ḳore, he ashole Allai hukumor dushmoni ḳore. Ila ḳam zetae ḳoroin, tara to nizor ufre gozob ḍakia anoin. ³Ar bala ḳam ḳorra zone to razare ḍoranir kunta nai, oile ku-ḳam ḳorra zonor lagi ḳoṭin bifod. Te tumra kita nirboye roitae sao ni? Taile bala fote aṭo, teu razae tumrar tarif ḳorba. ⁴Razae to tumrar balair lagiu Allar ḳadim hishabe ḳam ḳoroin. Oile tumra zera ku-ḳam ḳoro, tumrar lagi bifod ase. Tain ḳamoḳa ḳeurore maroin na, oile ku-ḳam ḳorrare Allar ḳadim hishabe ṭiku shaza dein. ⁵Te ḳali shazar ḍore nae, borong zarzir bibeḳor bisareo razar hukum mana zorur.

⁶Otar lagiu to tumra ḳazna deo, ḳaron ḳazna tulia ḳoros ḳorar mazdi tara Allar ḳezmot ḳorra. ⁷Oḳon zar zela faona, tare ola deo. Zenre ḳazna dibar ḳota, enre ḳazna deo; zenre mashul dibar ḳota, enre mashul deo; zenre ijjot ḳorar ḳota, ene ijjot ḳoro; zenre tazim ḳorar ḳota, ene tazim ḳoro.

Eḳe-oinne maea ḳoro

⁸Ḳali maear rin saṛa dusra kunu befare ḳeuror gese rini oio na. Zano ni, ze manshe oinno zonre maea ḳore, he to shoriotor hukum-ahkam shullo-ana adae ḳorse. ⁹Zela shoriotor hukum ase, “Zina ḳorio na, kun ḳorio na, suri ḳorio na, lub-lalos ḳorio na,” ba i laḳan aro zoto hukum ase, i hoḳol hukumre ekkano ḳori ḳoa oise, “Tumar ari-forire nizor laḳan maea ḳoro.” ¹⁰Ar maea taḳle ḳeu ari-forir ḳeti ḳorto fare na, erlagi maea ḳorle furafur shoriotu mana oizae.

¹¹Te bai oḳol, oḳonkur zomanar halot to tumra zano-u, erlagi buzi-huni solo. Tumra gum taki hozag oar shomoe oigese, ḳaron amra ze shomoe iman anchilam, hou halot takio amrar nazat oḳon aro daro aichche. ¹²Rait fuaia hari bian oizar; oḳon zoldi ao, amra andarir bod ḳam saṛia nuror lebas lagai, Allai atiar findilai. ¹³Hoi-hulla ḳori mod ḳaia ṭal oa, zina-bodmaishi ba mongoṛa sola, ingsha ar ḳaijja-fosad bad dia, ao, amra dinor fore solra manshor laḳan soli. ¹⁴Finnor lebasor laḳan tumra malik Isa al-Mosire furafur findilao. Shorilor bod ḳaish miṭanir sinta ekkere bad deo.

Imane ḳomzur baire maea ḳoro

¹Tumrar mazor ze bai imane ḳomzur, tareo afon hishabe shomzo, tar fosond-ofosond loia torka-torki ḳorio na. ²Buzrae ni, eḳzone mono ḳore, he hoḳol zator ḳani ḳaito farbo, oile ḳomzur imandar zone ḳali niramish ḳae. ³Te mas-mangsho ḳaora zone ou niramish ḳaora zonre zanu na siṛae. Ar niramish ḳaoraeo zanu mas-mangsho ḳaorare na dushe, ḳaron Allae to duiozonreu nizor ḳoia ḳobul ḳorsoin. ⁴Ar tumare ḳegie ḳemota dilo, aroḳ beṭar gulamor bisar ḳortae? He ṭik fote ase, na bul fote ase ikan to tar munibe buzba. Ashole to he ṭik foteu roibo, malikeu tare ṭik fote raḳta farba.

⁵Kunu kunu manshe mono ḳoroin, shadaron din taki kunu ḳas dinor fozilot beshi. Ar ḳeu ḳeu hoḳol dinreu eḳ laḳan mono ḳore. Te i befare ḳe kita ḳorto na ḳorto, ita zanu tar dil taki furafur shae dey. ⁶Ze manshe kunu ḳas dinre mane, he to malik Isare kushi ḳorar nioteu ita mane. Ze zone hoḳol zator ḳani ḳae, he-o to malikre kushi ḳorar nioteu ḳae, he Allar shukria adae ḳoria ḳae, ar ze zone hoḳolta ḳae na, he-o malikre kushi ḳorar niote ḳae na, he-o Allar shukria adae ḳore. ⁷Amrar mazor kunu bondau nizor lagi nize zinda roe na, ar nizor lagi moreo na. ⁸Ḳaron amra zebla zinda roi, ḳali malikor lagiu zinda roi, ar zebla moron oe, ḳali malikor lagiu moron oe. Te amra zinda roileo zeta, morleo ota, amra to malik Isaru. ⁹Malik al-Mosio to mara gesla ar hirbar zinda oia uṭsoin, zate tain zinda ar murda duio doloru malik bonoin. ¹⁰Te tumi ḳene tumar bair kut tukairae? Tare ḳene siṛairae? Allar bisaror samne to amra hoḳolu ubaimu. ¹¹Zela Allar kalamo ase,

Mabude ḳoira, amar namor ḳosom ḳaia ḳoiar,

hoḳoleu amar samne aia soizda ḳorbo,

forteḳ mukeu shikar ḳorbo, amiu Alla.

¹²Ono deḳa zae, Allar dorbaro amra forteḳeu zarzir ḳamor hishab dite oibo. ¹³Te ao, oḳon taki amra eḳe-oinnor kut dora bond ḳori, ar niot ḳori, ila kunu ḳam ḳortam nae, ze ḳame aroḳ bair imanor ḳeti oibo, ba tare gunar fote nibo.

¹⁴Malik Isar ummot oae ami balamonteu zani ar buzi, emne to kunu zinishu nazaiz nae, oile ḳeu zudi itare nazaiz mono ḳore, te tar lagiu ita nazaiz. ¹⁵Zudi tumar kunu ḳanir lagi aroḳ baie mono duk fae, te to tumi tare mohobbot ḳorrae na. Ze baire basanir lagi al-Mosie mout ḳobul ḳorla, kunu ḳanir lagi i bair shorbonash ḳorio na. ¹⁶Tumi zetare fosond ḳoro, itar lagi dusra zone zanu tumare na nindae. ¹⁷Allar bashshai to ḳali ḳana-finar lagi nae, borong Allai Pak Ruhe deoa forezgari, shanti ar kushi-bashir befar. ¹⁸Ou nomunae zera al-Mosir ḳezmot ḳore, erar ufre Alla kushi taḳoin, ar mansheo bala fain.

¹⁹Erlagi ao, amra ola ḳam ḳori, ze ḳame shanti ḳaim oe, ze ḳame eḳe-oinnore goṛia tultam fari. ²⁰Ar kunu laḳan ḳanir lagi Allar ḳamre binash na ḳori, ḳanir zuka hoḳolta-u to halal. Oile tumi kunu eḳ bishesh ḳani ḳaoae zudi dusra manshor imano ḳoshṭo lage, te ita ḳaoa tumar lagi zaiz nae. ²¹Bishesh kunu gust ba shorab ḳaoa, ze ḳame tumar baie mono duk fae, imane bada fae, ila kunu ḳam ḳora tumar lagi ṭik nae. ²²Tumar dilor ekinre, ḳali tumi ar tumar Allar maze raḳo. Nek-kofali to hou zon, ze zone bala mono ḳoria kunu ḳam ḳoria harle, tar mono kutkuti ae na. ²³Oile mono kutkuti loia zudi he kunta ḳae, te to he dushi. Ḳaron he zeta ḳaise, ita tar bibeḳor ofosond, ar bibeḳor ulṭa ḳamu oilo guna.

Manshor balai ḳorar sesṭa ḳoro

¹Erlagi amra zerar iman mozbut ase, amra ḳali nizor kushir bae na saia, amrar ḳomzur motoshokki mona imandar baiainreo zanu shoijjo ḳori. ²Ota baiaintore goṛia tular niote, forteḳeu tarar balair lagi tarar monor fosondore zanu kush raki. ³Al-Mosieo to tan nizore kushi ḳorsoin na, borong Fobitro Zobur Shorifo ase, “O Mabud, tumare zera beijjot ḳorse, tarar ou hoḳol beijjoti amar ufreu aise.” ⁴Te agor asmani kitabo zotota leḳa oise, ita to amrareu talim dibar lagi leḳa oise, zate ota dekia amrar sobor ar shantona ae, ar asha-borosha fai.

⁵Oḳon sobor ar shantona deora Allae Isa al-Mosir fote solar lagi, tumra hoḳolor mon ek koroukka. ⁶Teu tumra eḳ mone ar eḳ muke, amrar malik Isa al-Mosir gaibi baf Allar tarif ḳortae farbae.

Hoḳolor lagi al-Mosir toshrif

⁷Erlagiu o bai oḳol, al-Mosie zela tumrare afon ḳorsila, tumrao ola eḳe-oinnore afon ḳorilao, zate Allar gourob oe. ⁸Mono rakio, Allae Boni Israilor mul-murobbi oḳolor loge zoto oada ḳorsla, otar hokikoti forman ḳorar lagi al-Mosi aia Boni Israilor ḳezmotgar oila. ⁹Ar bin zatir geseo aila, zate erao Allar rohomot dekia tan tarif ḳore. I befare Zobur Shorifo ageu ḳoa oise,

Erlagiu ami bin zati oḳolor maze tumar tarif ḳormu

tarar maze tumar gunogan gaimu.

¹⁰Ar Tourat Shorifo ḳoa oise,

O duniar hoḳol zatir manush,

Allar afon proza Boni Israilor loge milia,

tumrao tan tarif ḳoro.

¹¹Hirbar Zobur Shorifo ḳoa oise,

Duniar hoḳol zatie Mabudor tarif ḳoro,

hoḳol manshe tan gunogan gao.

¹²Ar Hozrot Ishaea nobie leḳsoin,

Zein Bashsha Daud bin-Iasor ḳandanor mul kuṭi,

hoḳol zatir ufre bashshai ḳorar lagi ein aiba,

tan ufreu taḳbo hoḳol manshor asha-borosha.

¹³Te dilor maze asha deora Allae imanor bole, tumrare hoḳol laḳan kushi-bashi ar shantir maze habu-ḍubu ḳaoaukka. Teu Allai Pak Ruhur kudrotie tumrar asha-borosha baia foṛbo.

Hozrot Paulusor toblig kamor niom-shutro

¹⁴O bai oḳol, tumrar befare ami furafur buzram, tumrar dilḳan nek niote bora ar sohi-shuddo imani aḳol ase, zate eḳe-oinnore foramish ditae faro. ¹⁵Ta-o ḳoieḳṭa befare ami tumrare mono ḳorai diram, Allae amare ou niamot disoin ḳori, ami shaosh ḳori tumrar gese lekiar, ¹⁶Isa al-Mosir ḳadim hishabe Allae amare tumrar laḳan bin zati oḳolor gese faṭaisoin. Erlagiu tan deoa kush-ḳobri tobligor mazdi ami imamotir ḳam ḳoriar, zate ou bin zati oḳol Allar Pak Ruhe fobitro oia tan dorbaro ḳobul oar zuka kurbani oin.

¹⁷Alla Pakor lagi ami ze ḳezmot ḳoriar, ou ḳamor ḳarone Isa al-Mosir mazdi amar boṛai deḳanir eḳtiar ase. ¹⁸Al-Mosie amar mazdi ze ḳam hasil ḳorra, er baire kunta matibar shaosh amar nai. Tain amar mukor ḳota, amar ḳam-ḳaz, ¹⁹keramoti-muzeza ar Allai Pak Ruhur kudroti bole bin zati oḳolredi Allar gulami ḳoraisoin. Erlagiu ami al-Mosir kush-ḳobrire Zeruzalem taki Ilurika forzonto hoḳol zagar maze furafur toblig korsi. ²⁰Te ze zagat kunudin al-Mosir kush-ḳobri toblig kora oise na, hou zagat toblig korau amar zindegir mul ḳam mono ḳori. Ami sai na aroḳzonor gaṛa kuṭir ufre bor ḳoria gor banaitam. ²¹Zela Allar kalamo ase,

Tan ḳota zerar gese zanail oise na

oḳon tara ita deḳba,

tan befare age zera hunchoin na

tara oḳon buzba.

Hozrot Paulus Rum ṭauno zaoar kial

²²Te ou ḳarone ami bout bar tumrar gese zaoar fote bada faisi. ²³Oinno zagat amar ḳam shesh na oae zaoa bond oigese, oile oḳon to ita zagat amar toblig kam shesh, kunu zagau bad roise na. Ashole bout bosor doriu amar kial asil tumrar gese zaitam, ²⁴erlagi oḳon Spen desho zaoar ḳalo ami tumrar gese zaitam sairam. Ami asha ḳorram, hono zaoar shomoe tumrar loge deḳa oibo, ar kushi-bashi ḳoria ḳoeḳan din tumrar loge ḳaṭaimu. Bade Speno zaoar lagi tumrau amar bebosta ḳoria dibae. ²⁵Oile oḳon ami Allar pak bonda oḳolor maze rilif baṭibar lagi Zeruzalem ṭauno zairam. ²⁶Hino obab-onoṭonor maze Allar ze bonda oḳol asoin, tarar gese baṭia dibar lagi Makidonia ar Gris deshor zomat oḳole kisu shaijjo tulchoin. ²⁷Tara kub kushi oia ita tulchoin. Zano ni, i zomator bai-boin oḳol Zeruzalem ṭaunor Allar pak bonda oḳolor gese rini asoin. Ḳaron Allai batuni niamotor baṭ zebla Boni Israilor mazdi bin zatie faisoin, te bin zatir lagio zorur oilo, Boni Israilre duniabi befare shae-shaijjo ḳora. ²⁸Amar ou rilif baṭat gia hari ami zebla nichchit oimu, ita furafur tarar ato fousi gese, ou shomoe ami tumrar gese aia Spen desho zaimu. ²⁹Ami buziar, ami zebla tumrar gese aimu, ou shomoe al-Mosir shullo-ana rohom-niamot loia aimu.

³⁰O bai oḳol, Allar Pak Ruhur mohobbote ar amrar malik Isa al-Mosir name ami tumrare ḳas minoti ḳoriar, amar loge oia tumrao amar lagi Allar dorbaro dua-munazator jihad salao. ³¹Dua ḳorio, Ehudia zilat Isaei torikar birudi manshor at taki ami zanu rehai fai, ar amar ana i rilifḳanain zanu Zeruzalem ṭauno Allar pak bonda oḳole shomzoin. ³²Teu ami kushi mone tumrar gese zaitam farmu, tumrar loge aram-ayesh ḳormu, inshalla. ³³Shanti deora Alla Pak tumrar loge loge roukka. Amin.

Mumin oḳolre salam zanani

¹Te oḳon amrar boin Foibi Bibire faṭairam, tain oila Kinkria ṭaunor Isaei zomator ḳadim, tan befare ḳoiar, ²Allar bonda oḳolre zela afon ḳora zorur, malik Isar name enreo ola afon mono ḳorio. Tain to amare ar aro bout manshore shaijjo ḳorsoin, erlagi zekunu befare shaijjo saile, tumra tanre shaijjo ḳorio.

³Amar loge oia al-Mosir lagi zera ḳam ḳorsoin, ou Fiskila ar Akilre amar salam zanaio. ⁴Amar zan basanir lagi, tara nizore moutor ato shofi disla. Ḳali ami nae, bin zatir mazor hoḳol zomatu tarar gese rini. ⁵Oḳon tarar baṛir zomato aia zera shorik oin, era hoḳolreu amar salam zanaio. Turoshkor Asiya elaḳat hoḳol foela zein al-Mosire ḳobul ḳorsla, hou Afinitus baire salam zanaio, ein amar maear manush. ⁶Ar hou Moriom Bibireo salam zanaio, zein tumrar lagi bout menot ḳorsoin. ⁷Amar nizor zatir manush Andronikus ar Zuniareo salam zanaio, era to amar loge oia zel ḳaṭisoin. Al-Mosir sahabi oḳolor gese era kub ijjoti zon, era amar age iman anchoin.

⁸Amar maear mumin bai Amfilusre salam zanaio. ⁹Amrar logor tobligkari Urban baire, ar amar maear dust Stakisreo salam ḳoio. ¹⁰Al-Mosir forikkat fash ḳora sifai Afilis baireo salam dio. Bai Aristabulor baṛir hokkolre salam zanaio. ¹¹Amar zatir bai Herodunre salam dio. Morhum Nakisusor baṛir zera malik Isar ummot oisoin, tarareo salam zanaio.

¹²Turfana ar Turfasa Bibireo salam dio. Ou beṭinte malik Isar lagi boṛo menot ḳorra. Maear boin Farsiareo salam ḳoio, malikor lagi taino bout menot ḳorsoin. ¹³Malik Isar fosondor manush Rouf baire salam dio, tan ammareo salam ḳoio, i beṭi to amaro ma. ¹⁴Singkirat, Filigun, Harmis, Fatrub, Hermas ar tarar loge zoto imandar bonda asoin, era hoḳolre salam zanaio. ¹⁵Bai Filagi, Zulia Bibi, Nirias ar tan boinre, ar Olimpasre salam ḳoio, Allar zoto bonda tarar loge asoin era hoḳolre salam dio. ¹⁶Huno, tumra eḳe-oinne fobitro golagoli ḳorio. Al-Mosir hoḳol zomator bai-boninte tumrare salam zanaira.

Hozrot Paulusor (ra:) bidaei nosiot

¹⁷O bai oḳol, tumrare minot ḳori ḳoiram, age zeta talim faiso, ou talimor ulṭa talim dia zeguinte doladoli ar bada-bignor zonom dein, otar bae nozor rakio, tumra itar ges taki horia roio. ¹⁸Ḳaron itae amrar malik al-Mosir gulami na ḳoria, tarar feṭor gulami ḳore. Miṭa miṭa mat matia ar tel malish ḳoria shorol-shuza manshore be-foti banae. ¹⁹Ar tumra zen Allar hukum mafik solrae, ita to hoḳoleu zane, i ḳobor hunia amio kub kushi oisi. Te ami sairam, tumra nek fote kamil o, bod fot taki basia ro. ²⁰Shanti deora Allae Iblis-shoetanre kub zoldi ḳori tumrar faor tole falai fishaiba.

Amrar malik Isa al-Mosir rohom-niamot tumrar ufre zari rouk.

²¹Amar loge kush-ḳobri toblig koroin ze Timoti bai, ein tumrare salam zanaira. Amar zati bai Lukias, Zasun ar Sufatoseo tumrare salam ḳoira.

²²Hozrot Paulusor buli hunia ami Tortius mohorire leḳram, malik Isar name amio tumrare salam zanairam.

^23-24Ami Paulus ar zomator hoḳolre zein memandari ḳoroin, hou Gous baie tumrare salam zanaira. Ou ṭaunor shorḳari keshiar Irastas baie ar mumin bai Kuatuse tumrare salam zanaira.

²⁵Al-hamdulilla, ami Pauluse Isa al-Mosir befare ze kush-ḳobri toblig kori, Alla Pakor ḳemota ase ou kush-ḳobrir usillae tumrare imane tir raḳa. Mono rakio, bout zomana dori Allae tan i batuni munshar ḳota lukai raḳsila, ²⁶oile oḳon ita duniar hoḳol zatir gese zair or. Siroḳalin zinda Allar hukume, agor zomanar nobi oḳole zeta lekia raḳsila, ota zair or, zate tara al-Mosir ufre iman ania Alla Pakor baiddo oin. Erlagi ou kush-ḳobri oḳon toblig kora or. ²⁷Tainu eḳmatro Alla, tainu aḳoldar, zuge zuge siroḳal Isa al-Mosir mazdi tan tarif ouk. Amin.