Zaira Kalam

Fobitro Injil Shorif 27 nombor sifara

Zaira Kalam

Forisiti

Zaira Kalam sifaraḳan oilo, asmani kitab Fobitro Injil Shorifor shesh sifara. Alla Pakor hukume ou sifara leḳsoin, Hozrot Isa al-Mosir maear sahabi Hozrot Hannan (ra:). Hozrot Isae behesto toshrif neoar bade 60–65 bosoror ḳalo ikan leḳa oise. Ou sifara leḳar shomoe al-Mosir ummot oḳolor ufre kub beshi zulum-otachar asil. Ou halotor maze mumin oḳolre asha-utshaho zugani, sobor ḳora, ar ou zulumor mazeo imane mozbut roia Allar dorbaror furushkaror lagi zuit roite foramish deoa oise. Ou sifarar loge agor zomanar nobi Hozrot Danial, Hozrot Hezkil ar Hozrot Zakaria (a:)-or kitabor loge bout mil ase. Er maze leḳa ase, kiamotor age mumin oḳolor hal-hokikot kila oibo, ḳoto beshi zulum-mosibot oibo, bade Alla Pake Hozrot Isa al-Mosir usillae lannoti shoetanre ekkebare binash ḳoriliba, ar ou shomoe zera imane mozbut roiba, tara Allar dorbar taki furushkar faiba.

I sifarat faiba, shatṭa Isaei zomator gese siṭir bashae boeani leḳa ase. Ou shato zomator ṭikana oilogi, hou amolor Ruman bashshair Asiya desh, bortoman Turoshko deshor fochchim elaḳa. Zomator hal-hokikot buza, ar amra zania hari nizor zindegit amol ḳora zorur.

Ou sifarat bout batuni nombor leḳa ase. Ou nomboror kisu mani oula oito fare:

2 = Hoḳor befare shakki deoa; hamesha duizonor shakki zorur.

4 = Allar arosh ar ou befare; erlagi kaba shorif oilo sairkuni, zate ou aroshor loge mil deḳa zae.

6 = Manush ar gunagar manshor befare; soe nombor din manush foeda, ar soe oilo fobitro nombor 7 taki ḳom. Erlagi 666 buzae, kiamotor age asta duniare be-fote nibar lagi ze Dorjal aibo tar namor marka ba nombor.

7 = Allar fobitro nombor, ḳas ḳori tan nizor furafur ḳamor befare; shat dine asman-zominor hoḳolta foeda, ou sifarar maze Allar furafur fobitro prozar shat zomat, ar tan furafur gozob ḍalibar shat nomuna bar bar ullek kora oise.

12 = Allar ḳas proza; Hozrot Isar age asil Boni Israilor baro ḳandan, bade Hozrot Isar barozon ḳas sahabi, erlagi 12+12=24, ar 12x12=144 buzae, hoḳol zomanar Allar ḳas proza oḳol.

1000 = Asta dunia ba fura eḳ zug; erlagi 144000 buzae hoḳol zomanar ar asta duniar Allar ḳas proza oḳol.

1260 = Shat bosoror ordeḳ din. Uforor shat deḳba.

Zaira Kalam sifarar maze nanan nomunar doroshonor mazdi, otit, bortoman, bobishot hoḳol zomanar ḳota leḳa oise. 1 ruku 19 aeato ase, “Erlagiu tumi oḳon zeta deḳrae, er age zeta goṭise ar bade zeta goṭibo, ita hokkolta tumi lekia to.”

Ermaze ase,

(1) Sahabi Hannanor behesti doroshon 1 ruku

(2) Shato zomator lagi ufodesh 2—3 ruku

(3) Allar fobitro toḳtor doroshon 4—5 ruku

(4) Gozobi shatṭa sil-sappoṛ ar shatṭa shinga 6—11 ruku

(5) Shoetan danobor loge Allar ḳas bondar zuddo 12:1—14:5 aeat

(6) Aḳeri shatṭa gozob 14:6—16:21

(7) Naforman Babil ṭaunor bisar 17:1—19:10

(8) Aḳerator bisar 19:11—20:15 aeat

(9) Noea foeda 21—22 ruku

Sahabi Hannanor behesti doroshon (1:1–20)

Salam ar dua

¹Ou kitabo zotota leḳa oise, ita Alla Pake Isa al-Mosire zanaisoin, ar al-Mosie ita zair ḳorsoin. Tuṛa dinor bitre zeta zeta befar nichchit goṭibo, ita zate tan gulam oḳole zanoin. Al-Mosie tan firista faṭaia nizor gulam sahabi Hannanre ita hoḳolta zanaila. ²Sahabi Hannane Allar kalam ar Isa al-Mosir shakkir befare zoto doroshon deḳla, ou doroshonor befareu tain zobanbondi dila. ³Ar hou zonu nek-kofali, zein i kalamor agam ḳobor oḳol tilaot ḳoroin, ar tarao nek-kofali, zera i kalam hunoin, hunia hari amol ḳoroin; ḳaron shomoe to daro aichche.

^4-5Te ami Hannane Ruman bashshair Asiya deshor shato zomator gese ou zobanbondi leḳram. Zein asla, zein asoin ar zein hamesha roiba hou Alla Pak, ar tan toḳtor samne ze shat nomunar ruh taḳoin, era ar zein hok-halal shakki hou Isa al-Mosie tumrare rohomot ar shanti dan ḳoroukka. Tain to murda oḳolor maz taki foela zinda oia uṭisoin, tainu duniar raza oḳolor bashsha. Tain amrare mohobbot ḳoroin, erlagi nizor zan kurbani dia, amrare gunar shaza taki basaisoin. ⁶Tain amrare loia eḳ bashshai tiar ḳoria, tan gaibi baf Allar ebadotir lagi imam banaisoin. Tan mohima ar kudroti bol hor-hamesha boail rouk. Amin.

⁷Huno, tain megor kuṭit oia toshrif anra, forteḳe tanre soukdi deḳbo, zara laḳṛidi banail solibo gatia tanre ḳatol ḳorsil tarao deḳbo, ar tan lagi duniar hoḳol zatie zure zure ḳandiba. Oulau ouk, amin. ⁸Alla Mabude bataira, “Amiu Alif ar Ya, zein asoin, zein asla ar zein hamesha roiba. Amiu shorbo-shoktiman.”

Hozrot Isar nuror surot

⁹Ami to tumrar bai Hannan, Hozrot Isar ummot oae amio tumrar laḳan eḳoi ḳoshṭo, eḳoi bashshai ar eḳoi soboror bagi oisi. Allar kalam toblig korae ar Isar fokke zobanbondi deoae amare Patmus namor difo nia bonobash deoa oisil. ¹⁰Er maze Hozrot Isar fobitro din, eḳ Robibare ami Allai Pak Ruhur maze furafur ḍubi gelam, omon shomoe amar ḳoredi shingar aoazor laḳan eḳ aoaz hunlam. ¹¹Hunlam, kunu eḳzone amare ḳoira, “Huno, tumi oḳon zeta deḳrae, ita ek kitabo leḳo, lekia Ifis, Izmir, Forgam, Tuatira, Sardi, Filadelfia ar Laodikea ṭaunor shato zomator gese faṭao.”

¹²Amar loge zein matira, tanre deḳar kiale ami ḳoredi gurlam, guria deki, shunar shatṭa seragdani. ¹³Ou seragdanir mazḳano ibne-Adomor laḳan eḳzonre deḳlam. Tan finno fao forzonto lamba fainjabi, ar bukur ufre shunali eḳ foṭṭi. ¹⁴Tan matar sul dudor laḳan dola soḳsoḳa. Tan souk agunir lukkar laḳan. ¹⁵Fao oilogi, aguindi zalaia manjia forishkar ḳora soḳsoḳa fitolor laḳan, ar tan golar aoaz oilo, zure zure ḳol-kolaia zaoa fanir futor laḳan. ¹⁶Tan mukor surot asil fura zolmol ḳorra shuruzor laḳan. Tan muk taki darail ekkan toluar baroilo, i toluaror duio galabae dar asil, ar tan ḍain ato asil asmanor shatṭa tera.

¹⁷Tane dekia ami morar laḳan tan faor ḳandat foṛi roilam. Teu tan nizor ḍainor at amar ufre toia ḳoila, “Ḍoraio na. Amiu aual ar amiu aḳer, ¹⁸amiu Haiul-Kaiyum, zein nize nize hor-hamesha asi. Amar mout oisil, oile oḳon ami zug zug dori siroḳal zinda asi. Mout ar ḳoeboror sabi amar ato ase. ¹⁹Erlagiu tumi oḳon zeta deḳrae, er age zeta goṭise ar bade zeta goṭibo, ita hokkolta tumi lekia to. ²⁰Tumi shunar ze shatṭa seragdani deḳso ar amar ḍain ato shatṭa tera deḳso, itar mani oilo, shato tera oilo shat zomator shatzon firista, shatṭa seragdani oilo hou shato zomat.

Shato zomator lagi ufodesh (2:1–3:22)

(1) Ifisia zomator gese

¹“Ifis ṭaunor zomator firistar gese leḳo: Zein nizor ḍain ato asmanor shatṭa tera doria, shunar shatṭa seragdanir mazḳano sola-fira ḳoroin, tain ou ḳota ḳoira,

²“Ami to tumrar ḳam-ḳaz, tumrar menot ar tumrar soboror ḳotao zani. Ami zani, tumra kunuzat bod manshore shoijjo ḳortae faro na, ar sahabi na oia-o zeguinte nizore sahabi ḳoia forisoe dein, tarare forikka ḳoria deḳso, ar formano faiso tara zen beimani mater. ³Tumrar bout sobor ase, tumra amar lagi bout ḳoshṭo ḳorrae, kunumonte heran oiso na.

⁴“Oile tumrar birudde to amar nalish ase, tumra foela amare zela mohobbot ḳortae, oḳon ita bad dilaiso. ⁵Tuṛa sinta ḳori deḳo, tumra ḳoto usa taki ḳoto lamat lami geso. I halot taki dil bodlaia, age zeta ḳortae oḳon hirbar ola ḳoro. Ar zudi dil na firao, te ami tumrar gese aia tumrar serag daniḳan zaga taki horailimu. ⁶Tumrar to eḳṭa gun ase, Nikulaeti oḳole zeta ḳam ḳoroin tumra itare ginna ḳoro, ar amio itare gin ḳori.

⁷“Zar ḳan ase he hunouk, Pak Ruhe zomat oḳolre kita bataira. Ze zon zoei oibo tare ami Alla Pakor zannatul-ferdousor zindegi-gasor fol ḳaite dimu.

(2) Izmir zomator gese

⁸“Izmir ṭaunor zomator firistar gese ou ḳota leḳo: Zein aual ar aḳer, zein mara gesla, bade zinda oisoin, tain oḳan ḳoira,

⁹“Ami to tumrar obab-onoṭon ar ḳoshṭor ḳota zani, oile erbadeo tumra doni. Zeta manshe ḳaṭi Ihudi name nizor forisoe dey, otoso Ihudir amol nai, borong Iblisor dolor manush, itae tumrar birudde kita matira ami to zani. ¹⁰Tumra ze mosibotor maze foṛbae, i mosibotre eḳdom ḍoraio na. Zano ni, Iblise forikka ḳorar niote tumrar mazor ḳoezonre zelo dibo, hono tumra dosh din ḳoshṭo faibae. Huno, imanor fote tumra moron forzonto hok-halal roio, teu zoeor mala hishabe ami tumrare aḳeror zindegi dimu.

¹¹“Zar ḳan ase he hunouk, Pak Ruhe zomat oḳolre kita bataira. Ze zon zoei oibo, dusrabaror moute, mani duzoḳe tar ḳeti ḳorar kunu shaiddo nai.

(3) Forgam zomator gese

¹²“Forgam ṭaunor zomator firistar gese ou ḳota leḳo: Darala ze toluaror duio galabae dar ase, ou toluaror malike oḳan ḳoira,

¹³“Tumra kun zagat boshot ḳorrae ita to ami zani, ikano Iblisor shinghashon ase. Oile amar befare tumra hok-halal aso, amar uforor imanre oshikar ḳorso na. Amar toblig korra hou hok-halal zon Antipas zebla ḳatol oisla, Iblisor aḳrar maze, tumrar ṭauno tare kun ḳora oisil, hou shomoyo tumrar imanre oshikar ḳorso na.

¹⁴“Ta-o tumrar birudde amar kisu mat ase. Tumrar ono ola kisu manush asoin, zetae Musa nobir amolor bonḍo nobi Balamor talime soloin. Ou Balame bashsha Balakre hikaisil, zate he devtar murtir samonor foshad ḳaoaia ar zina ḳoraia, Boni Israilre gunar fote ney. ¹⁵Ita saṛao Nikulaeti oḳolor talime zeta soloin, ota ḳoeguo tumrar ono asoin. ¹⁶Erlagi i halot taki tumra dil bodlao, ar na bodlile ami kub zoldi tumrar daro aimu, aia amar mukor toluardi tarar loge jihad ḳormu.

¹⁷“Zar ḳan ase he hunouk, Pak Ruhe zomat oḳolre kita bataira. Ze zon zoei oibo, ami tare lukail behesti manna taki tuṛa manna ar eḳṭa dola fattor dimu. Ou fattoror ufre omon eḳ nam leḳa taḳbo, i nam ḳeu sine na; ze zone ou fattor faibo, ḳali he-u i nam sinbo.

(4) Tuatira zomator gese

¹⁸“Tuatira ṭaunor zomator firistar gese ou ḳota leḳo: Allar ḳas maear zon Ibnulla, tan souk oilo agunir lukkar laḳan, fao duioḳan manjia forishkar ḳora soḳsoḳa fitolor laḳan, tain oḳan ḳoira,

¹⁹“Ami to tumrar ḳam-ḳaz, tumrar maea-mohobbot, iman, ḳezmot ar tumrar soboror ḳota zani. Ar eoḳano zani, tumra age zeta ḳam ḳorso, oḳon er taki aro beshi ḳam ḳorrae.

²⁰“Oile tumra to Izabel namor ou beṭire ashroe dirae, erlagi tumrar birudde amar ekkan ḳota ase, tai nizore nobi ḳoia forisoe dey. Amar bonda oḳolre tai zina ḳora ar devtar samonor foshad ḳaoa hikaia be-fote nergi. ²¹Ou zina taki touba ḳorar lagi ami taire shomoe dislam, oile tai touba ḳorte razi nae. ²²Huno, erlagi ami taire eḳ bisnat falaia toimu, tair loge zetae zina ḳoroin, itae zudi touba na ḳoroin, te tarareo boṛo mosiboto falaimu. ²³Tair fua-fuṛinreo ami marilimu. Teu hoḳol zomate zaniliba, ami to manshor dilor ar monor ḳobor raki. Ami amol-noma dekia tumra forteḳ zonor fol dimu. ²⁴Tuatira zomator baki mumin oḳolre ḳoiram, tumra zera ou beṭir ḳotae solo na, manshe zetare Iblisor goin talim ḳoin, tumra zera hou fot sino na, ami tumrare dusra kunu bar ditam nae. ²⁵Ḳali tumrar zeta ase, ami na aoa forzonto oḳnainre tumra mozbut ḳori doria roio.

²⁶“Amar gaibi bafe zela hokkol zatir ufre amare ḳemota disoin, zera zoei oibo, tarareo ami ou ḳemota dimu. Ami ze ḳame kushi oi ou ḳam zera aḳer forzonto ḳorbo, tara i ḳemota faiba. ²⁷Tara luar laṭi dia itar shashon ḳorba, ar maṭir fatilor laḳan itare surmar ḳorba. ²⁸Zera zoei oibo, ami tare fozoror shuk-terao dimu.

²⁹“Zar ḳan ase he hunouk, Pak Ruhe zomat oḳolre kita bataira.

(5) Sardi zomator gese

¹“Sardi ṭaunor zomator firistar gese leḳo: Allar shat nomunar ruh ar shatṭa tera zein doria raḳsoin, tain oḳan ḳoira,

“Tumrar ḳam-ḳaz to ami zani. Tumra zinda aso ḳoria tumrar bout shunam ase, oile ashole to tumra murda. ²Tumra hozag oia uṭo, ar bad-baki zotota morar foti oigese, itare bol zugao. Huno, amar Allar samne tumrar ekkan ḳamo ami shoṭik deḳsi na. ³Erlagi tumra zeta faiso ar zeta huncho, ota iad raḳo ar amol ḳoro. Tumrar oḳonkur halot taki dil bodlao. Tumra zudi hozag na o, te ami suror laḳan lukaia aimu, kun bala tumrar gese aimu, tumra ṭeru faitae nae. ⁴Te ou Sardi zomato tumrar ola ḳoezon manush asoin zerar lebaso kunu kut nai, mani tarar sal-cholon ḳarafir bae gese na. Tara forezgar bonda, erlagi tara forishkar dola lebas findia amar loge sola-fira ḳorba. ⁵Ze zon zoei oibo, he ola dola lebas finbo. Aḳerator zindegi ḳata taki tar nam ami kunudino fustam nae. Borong amar gaibi baf ar tan firista oḳolor samne ami tare amar ḳoia shikar ḳormu.

⁶“Zar ḳan ase he hunouk, Pak Ruhe zomat oḳolre kita bataira.

(6) Filadelfia zomator gese

⁷“Filadelfia ṭaunor zomator firistar gese leḳo: Zein hok ar fak-fobitro, zen ato Bashsha Daud nobir sabi ase, zein kulle ar ḳeu bond ḳorto fare na, ar bond ḳorle ḳeu kulto fare na, tain oḳan ḳoira,

⁸“Ami to tumrar ḳam-ḳaz zani. Huno, ami tumrar samne ekkan duar kula raḳlam, ikan bond ḳorar ḳemota ḳeuror nai. Ami to zani, tumra kub ḳomzur, erbadeo tumra amar hukum amol ḳorso ar amare oshikar ḳorso na. ⁹Zera Ihudi ḳoia nizor forisoe dey otoso ashol Ihudi nae, Iblis-shoetanor dolor hou beiman oḳolre ami tumrar gese anaimu, tumrar fao-o dorai ḳodombusi ḳoraimu, ar tarare zanai dimu ami tumrare mohobbot ḳori. ¹⁰Tumrare sobor ḳorar lagi ami ze hukum dislam ita tumra mancho; erlagi i duniar ufre mosibotor ze shomoe aia azer, hou shomoe taki ami tumrare hefazot ḳormu. Duniar manshore forikka ḳorar lagi ou mosibotor shomoe aibo.

¹¹“Huno, ami kub zoldi airam. Tumrar zeta ase otare mozbut ḳori doria raḳo, zate tumrar zoeor mala ḳeu ḳaṛia nito na fare. ¹²Ze zon zoei oibo, tare ami amar Allar goror eḳṭa kuṭi banaimu, he ar kunudin baroia zaito nae. Ami tar ufre amar Allar nam ar Allar ṭaunor namo leḳmu. Hou ṭaun oilogi noea Zeruzalem. Behestor maz taki, amar Allar daro taki hou ṭaun lamia aibo. Ar ze zon zoei oibo, tar ufre ami amar noea namḳano leḳmu.

¹³“Zar ḳan ase he hunouk, Pak Ruhe zomat oḳolre kita bataira.

(7) Laodikea zomator gese

¹⁴“Laodikea ṭaunor zomator firistar gese leḳo: Zen nam amin, zein hok-halal shakki, zein Allar foeda ḳora hokkoltar mul kuṭi, tain oḳan ḳoira,

¹⁵“Tumrar ḳam-ḳazor ḳota to ami zani. Tumra oilae na ṭanḍa, na gorom. Tumra hoe ṭanḍa na oe gorom oile bala oilo one. ¹⁶Oile tumra to umli gorom, na ṭanḍa, na gorom, erlagi ami amar mukor sefor laḳan tu ḳori tumrare falai dimu. ¹⁷Tumra to ḳoirae, tumra bout doni, tumra boṛoluk oigeso, erlagi tumrar kuntar obab nai. Ita kub bala ḳota, oile ashole to tumra buzrae na, tumra kub duki, ḳangal, gorib, anda ar lemṭa aso. ¹⁸Erlagi ami tumrare ou ufodesh diram, aguindi zalail ḳaṭi shuna tumra amar ges taki loia neo, zate tumra hasaror doni oitae faro. Amar ges taki dola lebas loia nia findo, teu tumrare ar lemṭa deḳa zaito nae. Amar ges taki sokut laganir shurma loia neo, teu tumra hasaror souke deḳbae.

¹⁹“Huno, ami zerare maea ḳori, tarar dush-tiruti deḳai dei ar shashono ḳori. Erlagi tumra umli gorom taki fura gorom oia touba ḳoro. ²⁰Zano ni, ami duaror gese ubaia duaro ṭukairam. Amar golar aoaz hunia zudi ḳeu tar duar kulia dey, te ami tar bitre hamaimu, tar loge ḳana-dana ḳaimu ar he-o amar loge ḳana-dana ḳaibo. ²¹Ami zela zoei oia amar gaibi bafor loge tan fobitro aroshor kursit boisi, ṭik ou laḳan ze zon zoei oibo, tareo ami amar loge amar kursit boar odikar dimu.

²²“Zar ḳan ase he hunouk, Pak Ruhe zomat oḳolre kita bataira.”

Allar fobitro toḳtor doroshon (4:1–5:14)

Allar toḳtor samne ebadot

¹Erbade ami doroshon deḳlam, behestor ekkan duar kula ase. Ar ami tan golar aoaz hunlam, shingar aoazor laḳan zein age matisla, tain amare ḍaḳ dila, ḳoila, “Tumi ono uṭia ao. Ami oḳon tumare deḳaimu, erbade kita kita nichchit goṭibo.” ²Ḍaḳ hunar loge logeu ami Pak Ruhe kamil oilam, ar deḳlam, behestor maze ekkan toḳt ase, ou toḳtor ufre eḳzon boat asoin. ³En surot oilo, dami hira ar lal monir laḳan. I toḳtor sairo galabae asil rongdenu, ita deḳte ekkere ḳosua fanna monir laḳan. ⁴Ou toḳtor sairo ḳandabae aro sobbishḳan toḳt asil, hou toḳto boat asla sobbishzon murobbi neta. Erar lebas asil dola soḳsoḳa ar matat asil shunar taz. ⁵Mazḳanor toḳt taki megor zilkani, guṛ-guṛi ḍaḳ ar bezuita ṭaṭari shobdo baronit asil. Er samne shatṭa mushal zalail asil, i mushal oilo Allar shat nomunar ruh. ⁶Toḳtor samne foṭikor golashor laḳan forishkar ḳasor eḳ doria asil. Ar ou mazor toḳtor sairo galat sairzon zandar asil, erar samne-fise duiobae souk oḳole bora. ⁷Foela zandarṭa deḳte shinghor laḳan, dusraṭa bisalor laḳan, tin nomborṭa manshor laḳan ar sair nomborṭa uṛal deora silor laḳan. ⁸Ou sairo zandaror forteḳor soeṭa ḳori ḍaḳna asil, ar bare-bitre sairobae souk asil. Tara din-rait hamesha ou zikir ḳorra,

“Kuddusun, kuddusun, kuddusun, Rabbu-ilahul-kadir,

kana wa-hu kainus-saiyatin,

Fobitro, fobitro, fobitro Alla Mabud shorbo-shoktiman.

Zein asla, zein asoin, ar zein hamesha roiba.”

⁹Zein siroḳalin zinda, zein toḳto boat asoin, ou zandar oḳole zeblau tan tarif, shomman ar shukria zanain, ¹⁰ou shomoe zein toḳto boat asoin, zein siroḳalin zinda, en samne hou sobbishzon murobbi neta noto oia soizda ḳoroin. I neta oḳole zarzir matar taz shinghashonor samne kulia toia ḳoin,

¹¹“O amrar Mabud Alla,

tumi to ijjot, tarif ar kudroti ḳemotar zoiggo.

Tumiu to hoḳolta foeda ḳorso,

tumar morzie hoḳolta foeda oise ar ṭikia ase.”

Gaibi kitab ar meṛar baichcha

¹Ou toḳtor maze zein boat asla, tan ḍainor ato ami ekkan kitab deḳlam. Kitabor bare-bitre kunta leḳa ase, ikan shatṭa sil dia sil-sappoṛ mara. ²Bade ami deḳlam, kub shoktiala eḳzon firistae zure zure ḳoira, “Ila zoiggo ḳeu asoin ni, zein ou sil-sappoṛ bangia kitabḳan kulta farba?” ³Oile asman-zomin ba fatalor maze ila ḳeu millo na, zein ikan kula ba er bitor deḳar zoiggo. ⁴Teu ami Hannanor kub ḳandon ailo, ḳaron i kitabḳan kular ba er bitor deḳar zoiggo eḳzono faoa gelo na. ⁵Bade hou murobbi neta oḳolor mazor eḳzone amare ḳoila, “Oba, ḳandio na. Huno, zein Ehuda ḳandanor shingho, Daud nobir bongshodor, tain zitisoin. Tain ou shato sil-sappoṛ bangia kitabḳan kulta farba.”

⁶Ami aro deḳlam, murobbi neta oḳolor, sairo zandaror, ar ou toḳtor mazḳano eḳ meṛar baichcha ubai roise. Deḳte mono oilo, i baichchare zobo ḳora oise. I meṛa-baichchar shatṭa hing ar shatṭa souk. Allar ze shat nomunar ruhre duniar maze faṭail oe, ou shato souk oilo hou shato ruh. ⁷Bade ou meṛar baichcha aia, toḳto zein boat asla, en ḍain at taki ou kitabḳan nila. ⁸Kitab neoar bade hou sairo zandare ar sobbishzon murobbi netae ou meṛar baichchare soizda ḳorla. Era forteḳor ato egu ḳori sharinda, ar agor-kushboye bora egu shunar baṭi asil. I agor-kushboe oilo Allar pak bonda oḳolor dua-munazat. ⁹Ar tara noea ou gozol gaila,

“Ḳali tumiu shoṭik zon ou kitabḳan nibar,

nia er sil-sappoṛ kulbar.

Tumare to ḳatol ḳora oisil.

Tumi tumar lou dia hokkol ḳandan taki,

Allar lagi manush ḳorid ḳorso.

Hokkol zator bulie matra manush,

hoḳol desh ar zati takio ḳalas ḳorso.

¹⁰Erare loia tumi eḳ bashshai ḳaim ḳorso,

amrar Allar ebadotir lagi imam banaiso,

erau asta zogoto bashshai ḳorba.”

¹¹Bade ami sailam, ar hou toḳt, sairo zandar ar murobbi neta oḳolor sairobae bout firista oḳolor aoaz hunlam. Ino hazare hazar, kuṭi kuṭi firista asla. ¹²Era zure zure ou gozol ḳoila,

“Ze meṛa-baichchare zobo ḳora oisil,

einu ḳemota, don-doulot, aḳol, bol-shokti,

ijjot, gourob ar tarif faoar zoiggo.”

¹³Erbade ami hunlam, asmano, zomino, fatalo ar doriar maze zoto zandar ase, ba itar bitre aro zotota ase, era hokkole oḳan ḳoira,

“Toḳtor maze zein boat asoin,

tain ar ou meṛa-baichchar,

tarif, ijjot, gourob ar ḳemota hor-hamesha zari rouk.”

¹⁴Teu hou sairo zandare ḳoila, “Amin.” Ar hou murobbi neta oḳol noto oia soizda ḳorla.

Gozobi shatṭa sil-sappoṛ ar shatṭa shinga (6:1–11:19)

Kitabor foela soeṭa sil-sappoṛ kula

¹Bade ami deḳlam, hou meṛar baichchae zebla shato sil-sappoṛor maz taki foela sil bangira, ou shomoe hou sairo zandaror mazor eḳzone ṭaṭa foṛar aoazor laḳan zure ḳoila, “Ao.” ²Teu ami saia deḳlam, dola eḳṭa guṛa, er ufre zein soar oisoin tan ato tir-donuḳ ase. Tan matat taz lagail oilo, tain zoe ḳorar lagi zoe ḳori ḳori roana oila.

³Ar tain zebla dusra sil bangila, ou shomoe ami dusra zandaror aoaz hunlam, ein ḳoila, “Ao.” ⁴Teu lal churuk aroḳṭa guṛa baroilo, ar er ufre zein soar oisoin, enre ou ḳemota deoa oilo, zate tain dunia taki hoḳol shanti ḳaṛia neingi, manshe eḳe-oinnore kun ḳoroin, enre boṛo ekkan toluaro deoa oilo.

⁵Bade meṛar baichchae zebla tin nombor sil bangila, ou shomoe ami tin nombor zandaror aoaz hunlam, tain ḳoila, “Ao.” Teu ami deḳlam, eḳṭa ḳala guṛa. Er ufre zein soar oisoin, tan ato ekkan falla ase. ⁶Ar ami hunlam, hou sairzon zandaror mazḳan taki ḳeu zanu ḳoira, “Eḳ dinare ḳali eḳ sher gom ba eḳ dinare tin sher barli mile. Oile tumi zoetun ar angur gasor ḳeti ḳorio na.”

⁷Ou meṛar baichchae zebla sair nombor sil bangila, ou shomoe ami hunlam, sair nombor zandare ḳoila, “Ao.” ⁸Teu ami saia deḳlam, sali rongor eḳ guṛa, ou guṛar zein soar, en nam oilo mout ar tan ḳore ḳore ḳoebore aṭer. Erare duniar sair baṭor mazor eḳ baṭor ufre ḳemota deoa oilo, zate tara toluar dia, nidan dia, gozobi mout ar zongli zanuar dia manshor zan nein.

⁹Bade tain zebla fas nombor sil bangila, ou shomoe ami deḳlam, kurbani ḳanar tole ou laḳan manshor ruh oḳol ase, zerare Allar kalamor lagi ar Hozrot Isar fokke zobanbondi deoar lagi ḳatol ḳora oise. ¹⁰Era zure zure ḳoila, “O fak-fobitro hokkani Moula, amrar ḳatolor bisar ḳorte ar bodla loite, tumi duniar manshore ar ḳotodin shomoe ditae?” ¹¹Teu era hoḳolre dola lebas dan ḳora oilo, ar ḳoa oilo, tarar logor ḳezmotgar ar tarar zoto baiainre tarar nomunae ḳatol ḳora oibo, erar shongḳa fura na oa forzonto, aro kisu din bar saite oibo.

¹²Bade ami deḳlam, meṛar baichchae soe nombor sil bangila, ou shomoe kub boṛo boisal oilo. Shuruzor rong oigelo ḳala siai ar bora sandor rong oilo lour laḳan lal. ¹³Tufan aile zela ḍumur gas taki ḳasa folo tufane falai dey, ṭik oula asmanor tera oḳol kulia zominor ufre foṛigelo. ¹⁴Asta asman dola oia ḳagozor fuṭla laḳan bonia gaib oigelo. Faṛ-forbot ar dif oḳolo zarzir zaga taki horigelo. ¹⁵Ar duniar hoḳol raza-bashshain, namḳora zon, sifair fordan, zomidar, foeluan, gulam ba azad forteḳ zonu faṛor gate gate, fattoror aoṛe lukailo. ¹⁶Tara ou faṛ ar fattor oḳolre ḳoilo, “Amrar ufre aia foṛo, zein toḳto boat asoin tan soukor samon taki ar meṛar baichchar gozob taki amrare lukao. ¹⁷Tarar gozobi hou kiamotor din to aichche, oḳon ar ṭikia taḳar shaiddo ḳar ase?”

Allar sil-sappoṛ mara gulam

¹Erbade ami deḳlam, duniar sair kunat sairzon firista ubai roisoin. Tara duniat, doriat ar hoḳol gas-falat batash hamanir duar bond ḳorar lagi ubaisoin. ²Bade ami deḳlam, fube taki aroḳzon firista uṭia aira, zinda Allar sil-sappoṛ tan gese ase. Tain aia ze sairzon firistare dunia ar doriar ḳeti ḳorar lagi ḳemota deoa oisil, hou sairo firistare zure zure ḍakia ḳoila, ³“Amra zotoboil amrar Allar gulam oḳolor ḳofalo sil na marsi, otoboil tumra duniar, doriar ba gas-falar ḳeti ḳorio na.” ⁴Bade ami hou sil-sappoṛ mara manshor foriman hunlam. Boni Israilor hoḳol ḳandan taki eḳ laḳ sousallish azar zonre sil mara oise.

⁵Ehuda ḳandanor baro azar zon sil mara;

Ruben ḳandan taki baro azar;

Sadu ḳandan taki baro azar;

⁶Ashir ḳandan taki baro azar;

Noftali ḳandan taki baro azar;

Manosha ḳandan taki baro azar;

⁷Samaun ḳandan taki baro azar;

Lebi ḳandan taki baro azar;

Isaḳor ḳandan taki baro azar;

⁸Sobulon ḳandan taki baro azar;

Iusuf ḳandan taki baro azar;

Bin-Iamin ḳandan taki baro azar zon sil mara.

Dola lebas finda manshor misil

⁹Bade ami deḳlam, forteḳ desh, hoḳol ḳandan, hoḳol zati ar hoḳol zator bulie matra bout manush dola oisoin, erare gonia fuṛanir shaiddo ḳeuror nai. Era dola lebas findia ḳezur fata ato loia, hou toḳt ar meṛar baichchar samne ubai roisoin. ¹⁰Tara zure zure ḳoira,

“Amrar Alla zein toḳto boat asoin,

ar meṛar baichchar atou,

gunar mafi ar nazat ase.”

¹¹Erbade tamam firista oḳol, hou toḳtor, hou murobbi neta oḳolor ar sairo zandaror sairo ḳandabae ubaila. Tara toḳtor samne soizdat foṛia ḳoila,

¹²“Amin.

Tarif, gourob, aḳol ar shukria,

ijjot, ḳemota ar bol-shokti,

zuge zuge amrar Allaru ouk.

Amin.”

¹³Bade murobbi neta oḳolor mazor eḳzone amare ḳoila, “Buzrae ni, dola lebas finda ou manush oḳol ḳe, era kuai taki aisoin?” ¹⁴Ami tanre ḳoilam, “O malik, ita to afneu zanoin.” Teu tain ḳoila, “Era oila hou zon oḳol, zera hou moha mosibotor maz taki aise. Tarar lebasre meṛar baichchar loudi doia dola banaise.

¹⁵Erlagi era Allar toḳtor samne ase;

tara din-rait behesti ebadot-ḳanar maze ebadot-bondegi ḳorra.

Ar toḳto zein boat asoin,

tain nize erar ufre tambu ṭanai diba.

¹⁶Erar ar kunudin buk lagto nae,

fanir fiase dorto nae;

shuruzor tez erar gotro lagto nae,

kunu goromo lagto nae.

¹⁷Toḳtor mazor meṛar baichchaeu erar raḳali ḳorba.

Tain erare abe-haeator

zindegi-fanir zornar gese loia zaiba,

ar Allae erar soukor fani fusia diba.”

Shat nombor sil-sappoṛ kular goṭona

¹Bade ou meṛar baichchae zebla shat nombor sil-sappoṛ bangila, ou shomoe onuman ada gonṭa shomoe behesto kunu aoaz huna gelo na. ²Ar ze shatzon firista Allar samne ubat taḳoin, ami erare deḳlam, erar ato shatṭa shinga deoa oilo.

³Erbade aroḳzon firista aia kurbani ḳanar samne ubaila. Tan ato shunar agor-kushboe dani. Toḳtor samnor agor zalanir shunar ṭebulor ufre zalanir lagi bout agor-kushboe tanre deoa oilo, Allar tamam pak bonda oḳolor dua-munazator loge mishanir lagi ita deoa oilo. ⁴Erlagi hou firistar ator agor-kushboer dumar loge, pak bonda oḳolor dua-munazato Allar samne uṭlo. ⁵Bade ou firistae kurbani ḳana taki aguin nia agor danit borla, boria ita duniat falaila. Teu ṭaṭari aoaz, megor ḍaḳ, zilkani, ar boisal oilo.

Shatṭa shinga

⁶Ar hou ze shatzon firistar ato shatṭa shinga asil, era ou shinga bazanir lagi zuit oila. ⁷Foela firistae shinga bazanir loge loge lou maḳail hil ar aguin zomino falail oilo. Teu zominor tin baṭor eḳ baṭ, gas-gasalir tin baṭor eḳ baṭ, ar hoḳol gash-fata zoli gelo.

⁸Erbade dusra firistae tan shinga fukila. Ou shomoe zalail faṛor laḳan muṭa eḳ siz doriat falail oilo. Itae doriar tin baṭor eḳ baṭ fani lou oigelo. ⁹Doriar tin baṭor eḳ baṭ zandar morigelo, tin baṭor eḳ baṭ zaz binash oigelo.

¹⁰Bade tin nombor firistae tan shinga fukila. Teu asmanor soḳsoḳa biraṭ eḳ tera boṛo mushalor laḳan zoli zoli tole foṛlo, iṭa aia hoḳol gang, ḳal-bilor tin baṭor eḳ baṭor ufre foṛlo. ¹¹Ou terar nam asil Nagdana. Iṭa foṛia tin baṭor eḳ baṭ fani titta-zohor oigelo, i fanir lagi bout zon morla.

¹²Ar sair nombor firistae zebla shinga fukila, ou shomoe sand, shuruz ar tera, ita hokkoltar tin baṭor eḳ ongsho zoḳom oigelo, teu hoḳoltar tin baṭor eḳ baṭ andair oigelo, erlagi dinor tin baṭor eḳ baṭo ar raitor tin baṭor eḳ baṭo kunuzat rushoni roilo na.

¹³Bade ami sailam, saia deki, eḳṭa sil faki bout usat asmanor mazedi uṛer, ar he zure zure mater, “Baki ze tinzon firistae shinga fukiba, tarar shinga fukile duniar bashinda oḳolor ufre gozob, gozob, gozob lambo.”

¹Bade fas nombor firistae shinga fukila, teu ami deḳlam, asmanor eḳṭa tera behest taki duniat foṛlo. Ou terare habia duzoḳor sabi deoa oilo. ²Teu he habia duzoḳor duar kullo, bout boṛo ḍomḳa taki zela duma baroe, i duzoḳ taki ola duma baroilo. Ou duzoki dumae asman ar shuruz andair oigelo. ³Hou duma taki bout fongofal baroia duniat aila. Itare duniar ḳakṛa-bisar laḳan ḳemota deoa oilo. ⁴Tarare hukum deoa oilo, tara zanu duniar kunu gash-fata, gas-fala ba hag-torḳarir ḳeti na ḳore. Ḳali zeta manshor ḳofalo Allar sil-sappoṛ mara nai, otar ḳeti ḳoroin. ⁵Ita manshore zane marar kunu ḳemota tarare deoa oilo na, oile fas mash forzonto zala-zontrona dibar ḳemota deoa oilo. Ḳaḳṛa-bisae kunu manshore ḳamoṛ dile zela bish-bedona oe, ou fongofale ḳamṛaileo ola oibo. ⁶Hou shomoe manshe mout mangiba, ta-o mout oito nae. Tara morta saiba oile moron tarar ges taki bagibo.

⁷I fongofal oḳol deḳte zuddor lagi zuit ḳora guṛar laḳan. Tarar matat shunar tazor laḳan siz asil, ar mukor goṭon oilo manshor laḳan. ⁸Tarar sul oilo beṭintor sulor laḳan ar dat oilo shinghor dator laḳan. ⁹Tarar bukur maze asil luar fattor laḳan ḳoshḳosha sal. Zuddor guṛar gaṛi ṭania guṛar fal eḳloge gele zela aoaz oe, tarar ḍaḳnar aoazo asil ou laḳan. ¹⁰Tarar leinj ar leinjor mukor bish-dat asil ḳakṛa-bisar laḳan. Fas mash dori manshore ḳoshṭo dibar ḳemota i leinjo ase. ¹¹Habia duzokor firista asla ou fongofalor raza. Ibrani bashae i firistar nam oilo Abaddon, ar Iunani ba Grik bashae er nam oilo Afollion, mani gozobi firista.

¹²Foela gozob horlo, oile huno, aro duiṭa gozob aia azer.

¹³Bade soe nombor firistae tan shinga fukila. Teu Allar samnor agor zalanir shunar ṭebulor sairṭa hingor ges taki ami eḳzonre oḳan ḳoite hunlam, ¹⁴ein hou shinga-ala soe nombor firistare ḳoila, “Moha gang Furator maze ze sairzon firista aṭok asoin, tarare kulia deo.” ¹⁵Erlagi hou sairo firistare saṛi deoa oilo. Duniar tin baṭor eḳ baṭ manshore marar lagi ou firista oḳolre shoṭik shomoe, shoṭik din, mash ar bosoror lagi zuit ḳori raḳa oisil. ¹⁶Bade ami hunlam, guṛat soṛia zaoa ou sifair foriman asil bish kuṭi.

¹⁷Ou doroshono ami zoto guṛain ar guṛ soar oḳol deḳlam, i soarre deḳte ola laglo, erar bukur uforor fouzi lebas agunir laḳan lal, aḳashor laḳan lil ar gondoḳor laḳan oldia. Guṛaintor ḳolla asil shinghor ḳollar laḳan, itar muko taki aguin, duma ar gondoḳ baror. ¹⁸Erar mukor ou aguin, duma ar gondoḳor gozobdi tin baṭor eḳ baṭ manush mara oilo. ¹⁹I guṛaintor leinj ar mukor mazeu asil tarar bol, i leinj asil du-muki hafor laḳan. Ou leinjdi tara manshor ḳeti ḳore.

²⁰Oile ou gozobor badeo zeta manush zita roila, tara nizor ator banail murtifuza taki touba ḳorlo na. Tara nanan nomunar butor fuza, ar zetae deḳoin na, hunoin na ba aṭa-sola ḳorta faroin na ota murtir fuza ḳorat roila. Shuna, rufa, fitol, fattor ar laḳṛidi banail murtifuzat roila. ²¹Erloge kun-ḳarafi, zadu-ṭuna, zina ar suri takio touba ḳorlo na.

Firista ar huru-muru kitab

¹Bade ami deḳlam, behest taki kub shoktiala aroḳzon firista lamia aira. Megor saḳa asil tan lebas, tan muk shuruzor laḳan soḳsoḳa, tan fao asil agunir kuṭir laḳan. Tan matar ufre asil rongdenu. ²Tan ato huru-muru ekkan kitab kula asil. Tan ḍainor fao doriat ar bauor fao zominor ufre toia, ³shinghor laḳan kub zure gorzia uṭila. Ou gorzonor loge logeu ṭaṭa foṛar moto shatṭa aoaz oilo. ⁴Ou shato aoaz hunia ami leḳat laglam; ermaze behest taki ou shobdo ailo, “Huno, ou shato ṭaṭari aoaze zeta ḳoisoin, ita batuni raḳo, lekio na.”

⁵Bade hou firista, zenre ami doria ar zominor ufre ubat deḳslam, tain behestor bae nizor ḍain at tulla. ⁶Tulia zein hor-hamesha siroḳal zinda asoin, zein asman, zomin, doria ar itar mazor hokkolta foeda ḳorsoin, tan name ḳosom ḳaia ḳoila, “Ar to deri oito nae. ⁷Oile shat nombor firistae shinga fukibar din Allar batuni lila-ḳela fura oibo. Allae tan nizor gulam, nobi oḳolor gese zela bataisla, oulau folibo.”

⁸Behest taki age ze shobdo hunchilam, ein hirbar amare ḳoila, “Huno, doria ar zominor ufre ze firista ubat asoin, tan gese zao, gia tan at taki kula kitabḳan neo.” ⁹Teu ami en gese gia ḳoilam, ou huru-muru kitabḳan amar ato deoar lagi. Tain ḳoila, “Aichcha neogi, nia ḳailao. Ikane tumar feṭre titta ḳorilibo, oile tumar muko mou laḳan miṭa lagbo.” ¹⁰Ou ami hi firistar ator huru-muru kitabḳan nia ḳaililam. Ḳaite shomoe hasau amar muko mou laḳan miṭa laglo, ar gilia harle asta feṭ titta oigelo. ¹¹Bade amare ḳoa oilo, “Tumi bout desh, bout zati, nanan bulie matra manush, ar bashshar befare hirbar ohi zanaite oibo.”

Duizon shakki

¹Bade mafibar lagi laṭir laḳan eḳṭa nol amar ato deoa oilo, ar eḳzone ḳoila, “Huno, fobitro Baetul-Mukaddos kaba shorif ar kurbani ḳanare mafo. Mafia hono zera ebadot ḳore tarar foriman gono. ²Oile ou kaba goror uṭanre mafio na, ikan bad deo, ikan to bidormi oḳolre deoa oise. Tara beallish mash dori i fobitro zagaḳanre faodi ḳoslaibo. ³Ar ami amar duizon shakkire ola ḳemota dimu, i ḳemota faia era ḳator oia solar soṭ findia, eḳ azar dui-sho shaiṭ din nobir laḳan ohi bataiba.”

⁴Era oila hou zoetun gas zuṛa, ar hou seragdani zuṛa, tara to din-duniar malikor samne ubat asoin. ⁵Ḳeu tarar ḳeti ḳorte saile, tarar muk taki aguin baroia hi dushmon oḳolre zalailibo. Zekunu zone tarar ḳeti ḳorat lagle ou doshae mout oibo. ⁶Era zotodin nobi halote ohi bataiba, otodin zate kunu meg na oe erlagi asmanor duar bond ḳori dibar ḳemota tarar ase. Fanire lou banani, ar zotobar kushi otobar zekunu gozob ḍalia zogotor ḳeti ḳorar ḳemotao tarar ase.

⁷Tarar zobanbondi deoa shesh oigele habia duzoḳ taki hou zanuar uṭia aia tarar loge laṛai ḳoria, tarare araia kun ḳorbo. ⁸Ar tarar lash hou mohan ṭaunor rastar maze foṛi roibo, ze ṭauno tarar malikre solibor ufre loṭḳaia kun ḳora oisil. I ṭaunor nam ṭik Sadum ba Mishor na oileo eḳoi laḳanu ḳaraf. ^9-10Hou shomoe hoḳol desh, ḳandan, hoḳol zator bulie matra manshe ar hoḳol zatir manshe shaṛe tin din dori ou lashguin deḳba. Ar era mara gesoin ḳori zogotor duniabi manshe kushie furti-amud ḳorba, eḳe-oinnore ufohar diba. Ar i lash dafon ḳorar farmishon dita nae, ḳaron ou duio nobir lagi duniadari manshor ḳoshṭo oisil.

¹¹Bade hou shaṛe tin din faria harle Allar deoa zan erar bitre hamailo, teu era fao-o bordi ubaila. Ar zoto zone erare deḳla, hoḳoleu ḍoraia ḳafila. ¹²Bade era hunla, behest taki ḍakia zure zure ḳoa or, “Tumra ono uṭia aio.” Teu era nizor dushmonor samne eḳ megor kuṭit oia behesto gelagi. ¹³Ou shomoe kub boṛo boisal oilo, ar hi ṭaunor dosh baṭor eḳ baṭ bangi gelo. Boisale shat azar manush morla. Ita dekia bad-baki hoḳole ḍoraia behestor Allar tarif ḳorat lagla.

¹⁴Ou nomunae dusra gozob faroilo, oile huno, tin nombor gozob kub zoldi aia azibo.

Shat nombor shinga fukila

¹⁵Bade shat nombor firistae tan shinga fukila. Teu behestor maze zure zure elan ḳora oilo, “Oḳon to duniar bashshai amrar Mabud ar tan Mosir hukumo aise. Tain zug zug dori siroḳal bashshai ḳorba.”

¹⁶Bade hou sobbishzon murobbi neta, zera Allar samne zarzir toḳto boat asla, era Allare soizda ḳoria ḳoila,

¹⁷“O shorbo-shoktiman Mabud Alla,

tumi ageo aslae ar oḳono aso.

Amra tumar shukur-guzar ḳorram,

tumi to tumar moha ḳemota ato loia oḳon bashshai ḳorrae.

¹⁸Hokkol zatie gusa ḳoria sillaise,

te oḳon tumar gozob ḍalibar shomoe oigese.

Murda oḳolor bisaror shomoe aise,

ar tumar afon gulam nobi oḳolor,

tumar pak bonda oḳolor,

huru-boṛo zotozone tumare ḍorain,

tarare furushkar dibar shomoe aise.

Ar zera duniar ḳeti ḳorse,

tarare binash ḳorar shomoyo aise.”

¹⁹Bade Allar behestor ebadot-ḳanar duar kula oilo, ar er bitre Allai shahadot shonduk deḳa gelo. Ou shomoe megor zilkani, guṛ-guṛi ḍaḳ, ṭaṭa foṛa, boisal ar kub beshi hil-meg oilo.

Shoetan danobor loge Allar ḳas bondar zuddo (12:1–14:5)

Hou beṭi ar doitto-danob

¹Bade asmanor maze ek kudroti ḳarbar deḳa gelo, eḳzon beṭi manush asoin, tan finno asil shuruz ar faor tole sand, en matat ase baroṭa tera dia gata eḳṭa taz. ²Beṭir goro hurutta oita, erlagi hurutta oar bedonae beṭie ḳali sillaira. ³Erbade asmano arok karbar deḳa gelo, agunir laḳan lal eḳ biraṭ danob. Tar shatṭa mata ar doshṭa hing, shato matat shatṭa taz lagail. ⁴Tar leinjuṛdi baṛiaia asmanor tin baṭoreḳ baṭ terare duniat falai dilo. Ar ze beṭir goro hurutta oita, ou danob aia beṭir samne ou nomunae ubat asil zen, beṭir goro hurutta oiteu he ḳailito. ⁵Beṭir goro eḳ fua foeda oilo, ou fuae hokkol zatire luar laṭi dia shashon ḳorba. Ou huruttare Alla ar tan toḳtor gese su mari tulia neoa oilo. ⁶Ar ou beṭi manush morubumir bae bagia gelagi. Allae hi morubumir maze beṭir lagi ekkan zaga zuit ḳorsila, ein hono eḳ azar dui-sho shaiṭ din lalon-falon faiba.

⁷Bade behesto zuddo lagigelo. Firista Mikail ar tan odinor firista oḳole hou danobor loge laṛai ḳorla, ar hou danobeo tar sela-samsare loia erar loge laṛai ḳorlo. ⁸Laṛait hi danob arigelo, ar tarare behest taki bar ḳori deoa oilo. ⁹Hou danobre ar tar sela-samsa oḳolre duniat falai deoa oilo. Ou danob oilo hou furana haf, zegur nam Iblis-shoetan, he duniar hoḳol manshore be-foti banae.

¹⁰Bade ami hunlam, behest taki eḳzone zure zure ḳoira, “Oḳon to amrar Allar nazat, tan bol-shokti, tan bashshai ar tan Mosir ḳemota azir oigese. Ḳaron zegie amrar baiaintore dushi banaito, tare to behest taki falai deoa oise. He din-rait hamesha amrar Allar gese tarar name nalish dito. ¹¹Meṛar baichchar lou ar zarzir tobligi zobanbondir bole tara Iblisre araisoin. Tara nizor ḳaeare beshi maea na ḳoria, zan diteo zuit asla.

¹²“Erlagiu O behest, tumi kushi ḳoro. Tumra zera behestbashi, tumrao furti ḳoro. Oile afsus dunia ar doriar lagi, Iblis to tarar gese lamigese. He gusae fush-fas ḳorer, he to zaneu, tar shomoe ar beshi nai.”

¹³Hou danobe zebla deḳlo tare duniat falai deoa oise, dekia hou ze beṭir goro fua foeda oisil, he ou beṭir ḳore laglo. ¹⁴Erlagi ou beṭire kub boṛo eḳ sil fakir duḳan ḍaḳna deoa oilo, beṭie ou ḍaḳnadi uṛal dia morubumit nizor zagat zaita farba. Hono hou danob-hafor soukor aoṛe shaṛe tin bosor tanre lalon-falon ḳora oibo. ¹⁵Teu hi hafe tar muk taki fani bar ḳoria eḳ gang banaililo, gangor fute beṭire bashai nitogi ḳori. ¹⁶Oile duniae beṭire shaijjo ḳorlo, i hafe ze fani bar ḳorlo, duniae maṭie a ḳoria i fanire ḳaililo. ¹⁷Erlagi i danob-hafe beṭir bae aro beshi gusa ḳorlo, he beṭir oinno aolad oḳolre, mani zera Allar hukume sole ar Hozrot Isar fokke zobanbondi dey, tarar loge zuddo ḳorat gelo.

¹⁸Gia he doriar soror balur ufre ubai roilo.

Doria taki aoa zanuar

¹Bade ami deḳlam, doria taki eḳ zanuar uṭer, tar doshgu hing, shatgu ḳolla, forteḳ hingor matat eḳṭa ḳori taz, ar fortek kollar ufre nanan kufuri nam leḳa. ²I zanuargu deḳte sitabagor laḳan, tar fao oilo balluḳor faor laḳan, ar muk oilo shinghor mukor laḳan. Hou danobe tar shokti, tar godi ar moha ḳemota ou zanuarre dilailo. ³I zanuaror eḳṭa ḳollar maze omon eḳ zoḳom asil, ou zoḳome he morar laḳ oigesil, oile zoḳomṭa bala oigelo. Ita dekia duniar hoḳol manush taijjub bonia tar ḳore ḳore gelo. ⁴Ar hou danobe tare i ḳemota disil ḳori manshe hou danobre soizda ḳorlo, erloge ou zanuarreo soizda ḳorlo. Tara ḳoilo, “I zanuaror laḳan ar ḳe ase? Tar loge laṛai ḳorar ḳemota ḳar ase?”

⁵I zanuarre kufuri buli ar beṭagiri mator muk deoa oilo. Beallish mash dori tar ḳam salanir ḳemota failo. ⁶Erlagi he Allar birudde kufuri mat matilo, he Allar nam, tan boshot ḳana ar behestbashi oḳolor bodnam ḳorat roilo. ⁷Tare ḳemota deoa oilo, he Allar pak bonda oḳolor birudde zuddo ḳoria zitito farbo. Ar fortek kandan, forteḳ desh, forteḳ zati, forteḳ nomunar bulie matra manshor ufreo tare ḳemota deoa oilo. ⁸Ita dekia duniabi hoḳol manshe tare soizda ḳorbo. Zogot foeda ḳorar age ze meṛa-baichchare zobo ḳorar ḳota shaibosto ḳora oise, hou meṛa-baichchar zindegi ḳatat zerar nam nai, era forteḳe tare soizda ḳorbo. ⁹Zar ḳan ase, he hunouk:

¹⁰Ze zon bondi oar ḳota, he to bondi oibou.

Toluaror tole zar kun oar ḳota, he ola kun oibo.

Erlagi pak bonda oḳole mozbut iman ar sobor ḳora zorur.

Zomin taki baroil zanuar

¹¹Bade ami deḳlam, zomin taki aroḳṭa zanuar baroia ailo. Meṛar hingor laḳan tar dui hing ase, oile he matito hou danobor laḳan. ¹²Ou meṛar hingala zanuare hou foela zanuaror hoḳol ḳemota bebohar ḳorto. Duniar hoḳol manshore he zur ḳoria hou zoḳom bala oa foela zanuarre soizda ḳoraito. ¹³He hoḳolor samne boṛo boṛo keramoti ḳam ḳorto, emonki asman taki zomino aguin lamaia deḳaito. ¹⁴Hou foela zanuaror lagi zoto laḳan keramoti deḳanir ḳemota tare deoa oisil, ota deḳaia he manshore be-foti banailo. Foela ze zanuar toluaror sed ḳaiao basi gesil, tar eḳṭa murti bananir lagi dusra zanuare manshore foramish dilo. ¹⁵Ar murtir bitre zan haranir ḳemota tare deoa oilo, zate i murtie matito fare, ar zera i murtire soizda ḳorto nae, tarare zane marar ḳemotao tare deoa oilo. ¹⁶He huru-boṛo, doni-gorib, munib ba gulam hoḳolre baiddo ḳorlo, zarzir ḍain ato ba ḳofalor ufre eḳṭa sil marar lagi. ¹⁷Erlagi ou sil saṛa ḳeu kunu siz ḳorid-bikir ufae roilo na. I sil asil hou zanuaror nam ba namor marka nombor. ¹⁸Ita hoḳolta buzte bout aḳolor dorḳar. Zar aḳol ase he ou zanuaror namor horofor nombor gonouk, ita to kunu manshor namor nombor. Er foriman oilo, 666; soe-sho soeshoṭṭi.

Meṛar baichcha ar nikut manush

¹Bade ami saia deki, hou meṛar baichcha Zeruzalemor fobitro Sion faṛor ufre ubai roisoin. Tan loge asoin eḳ lak sousallish azar manush. Tarar ḳofalor ufre ou meṛar baichcha ar tan gaibi bafor nam leḳa ase. ²Erbade ami behest taki zure zure ḳol-kolaia zaoa fanir futor aoaz ar zure ṭaṭa foṛar shobdor laḳan eḳ aoaz hunlam. Amar mono oilo, kunu sharinda bazaora dole sharinda bazaira. ³Era hou toḳt, hou sairo zandar ar hou murobbi neta oḳolor samne eḳ noea gozol gaira. Kunu manshe i gozol hikto farlo na, ḳali dunia taki ḳalas ḳori neoa ou eḳ lak sousallish azar zon saṛa. ⁴Era to hou manush, zera kunu beṭintor loge zina ḳoria nizor ḳaeare nafaḳ banaise na. Ou meṛar baichcha ze zagat zain, tarao en ḳore ḳore roin. Alla ar meṛar baichchar name ḳetor foela foshol hishabe erare zogotor manshor ges taki ḳalas ḳora oisil. ⁵Era kunudino misa mat matisoin na, era shullo-ana nikut.

Aḳeri shatṭa gozob (14:6–16:21)

Tinzon firista

⁶Bade ami aroḳzon firista deḳlam, ein asmanor mazedi uṛira. Duniat boshot ḳorra forteḳ desh, fortek kandan, forteḳ bashae matra ar forteḳ zatir manshor lagi siroḳalin kushir ḳobor tan gese ase. ⁷Tain zure zure elan ḳorla, “Alla Pakre ḍorao, tan ijjot-tarif ḳoro, tan bisaror shomoe aichche. Zein asman-zomin, doria ar ḳal-bil, gang oḳol foeda ḳorsoin, tan ebadot ḳoro.”

⁸Bade tan ḳore ḳore dusra firista aia ḳoila, “Binash oigelo, binash oigelo, hou namḳora Babil ṭaun binash oigelo. Ze ṭaune tair zinar ḳamor ḳoṛa nisha-fani hoḳol zatire ḳaoaise, tai binash oigelo.”

⁹Bade tin nombor firista erar ḳore ḳore aia zur golae ḳoila, “Kunu manshe zudi ou zanuar ar ogur murtir fuza ḳore, ogur sil tar ato ba ḳofalo lagae, ¹⁰te he-o Allai gozobi nisha-fani ḳaite oibo. Ou nishar loge kunuzat fani na mishaia Allai gozobi baṭit bora oise. Fobitro firista oḳol ar Allai meṛar baichchar samne, aguin ar gondoḳ dia i manshore shaza deoa oibo. ¹¹Ze agunit itare zalail oibo, i agunir duma kunudin bond oito nae. Ze manshe ou zanuar ar tar murtir fuza ḳorbo, ogur namor hou sil lagaibo, he din-rait kunu shomoe-u azab taki rehai faito nae.”

¹²Erlagi zera Allar hukum mane ar Hozrot Isar torikar imane mozbut roe, Allar ou pak bonda oḳole i halotor maze sobor taḳa zorur.

¹³Bade ami hunlam, behest taki eḳzone ḳoira, “Ou aeat leḳo, oḳon taki malikor torikat roia zoto zonor zan zaibo, erau nek-kofali.” Pak ruhe ou shakki dira, “Nichchoe erau nek-kofali. Tarar ḳam-ḳaz taki tara rehai faiba, ḳaron tarar ḳamor fol tarar loge loge roibo.”

Duniar foshol ḳaṭa

¹⁴Bade ami saia deḳlam, dola eḳ megor saḳa, ou saḳar ufre Bin-Adomor laḳan ḳeu eḳzon boat asoin. Tan matat shunar taz ar ato asil darail ḳasi. ¹⁵Bade aroḳzon firista behesti ebadot-ḳana taki baroia aila, ar zein megor ufre boat asla tanre zure sillaia ḳoila, “Duniar foshol ḳaṭibar shomoe oise, foshol furafur faki gese, afnar ḳasi lagaukka ar foshol ḳaṭoukka.” ¹⁶Teu ou megor kuṭir ufre zein boat asla, ein duniat tan ḳasi lagaila ar duniar foshol ḳaṭa oilo.

¹⁷Bade behestor ebadot-ḳana taki aroḳzon firista baroia aila, tan geseo ekkan darail ḳasi asil. ¹⁸Erbade kurbani ḳanar ges taki eḳzon firista baroia aila, tan ḳemota asil agunir ufre. Aia tain zure zure hou ḳasiala firistare ḍakia ḳoila, “Tumar darail ḳasikan lagao ar duniar angur gas taki anguror soṛin ḳaṭia dola ḳoro, ita to faki gese.” ¹⁹Teu hou firistae duniat tan ḳasi lagaila ar duniar angur gasor hoḳol angur dola ḳoria, angur maṛar gato falaila. Ou gat oilo Allar gozobor moha gat. ²⁰Ṭaunor bare angur maṛar gato i angur maṛia harle, ita taki lou baroilo, i lour boinnae guṛaintor lagam forzonto aia soilo. Loue eḳ azar soe-sho stadia (onuman dui-sho mail) zaga ḍubi gelo.

Aḳeri shat gozob

¹Bade ami behestor maze aroḳṭa lila-ḳela deḳlam, iṭa boṛo mohan taijjubi. Ami deḳlam, shatzon firista asoin, erar ato aḳeri shatṭa gozob. Itare aḳeri gozob ḳoar ḳaron oilo, oguin dia Alla Pakor gusar shesh foesala oibo.

²Bade ami deḳlam, aguinala ek kasor doria, ar zoto manshe hou zanuar, tar murti ba tar namor nomboror ufre zitsoin, tarareo deḳlam. Deḳlam, tara Allar deoa sharinda ato loia ḳasor doriar faro ubai roisoin. ³Tara Allar bonda Musa nobir ar hou meṛar baichchar ou ḳaoali gaira,

“O shorbo-shoktiman Mabud Alla,

tumar lila-ḳela ḳoto mohan ar asanoḳ!

O tamam zatir bashsha,

ḳoto hok ar shoṭik tumar fot!

⁴O Mabud, tumare ḍoraito nae kun zone?

Kun zone tumar namor tarif ḳorto nae?

Ḳali tumiu to fak-fobitro,

tamam zatiu aibo tumar dorbaro,

hokkoleu tumar ebadot ḳorbo,

tumar hok bisar to zair oigese.”

⁵Erbade ami deḳlam, behestor hou shahadot tambur bitoror fobitro kaba gorḳan kula oilo. ⁶Ou shomoe hou shatzon firistae shatṭa gozob loia kaba gor taki baroia aila. Tarar finnor lebas asil soḳsoḳa forishkar ar bukut asil shunali foṭṭi. ⁷Hou sairzon zandaror eḳzone ou shato firistare shatṭa shunar baṭi dila. I shato baṭi bora asil ḳali Alla Pakor gusa, zein zuge zuge hor-hamesha zinda asoin. ⁸Allar kudroti mohima taki ze duma baronit asil, ou dumae asta gor borigelo. Ar ou shatzon firistar shatṭa gozob na furani forzonto ḳeu gia kaba goro hamaito farlo na.

Allar gozobi shatṭa baṭi

¹Bade ami hunlam, hou kaba gor taki eḳzone ou shato firistare zure zure ḍakia ḳoira, “Tumra zao, gia Allar gozobe bora ou shato baṭi duniar ufre ufuit ḳori ḍali deo.”

²Teu foela firistae gia tan baṭi duniar ufre ufuit ḳorla. Erlagi zarar gotro hou zanuaror sil asil, zera tar murtir fuza ḳorto, ita hokkolṭir gotro eḳ zator kub bad bish fuṛa deḳa dilo.

³Dusra firistae tan baṭi doriar ufre ufuit ḳorla. Teu doriar hoḳol fani mora manshor lour laḳan oigelo, doriar hoḳol zandar morigelo.

⁴Ar tin nombor firistae tan baṭi gang ar hoḳol ḳal-bilor ufre ufuit ḳorla. Erlagi ita oigelo lour gang ar ḳal-bil. ⁵Ar ami hunlam, fanir ufre ze firistar ḳemota asil, ein ḳoira,

“O fak-fobitro Alla, tumi ageo aslae, oḳono aso.

Tumi hok-insafḳari, tumiu to i gozobi shaza dirae.

⁶Iguinte pak bonda oḳolor lou zoraise,

nobi oḳoloro lou zoraise.

Erdaeu tumi itare ou lou ḳabairae,

itau tarar shoṭik faona shaza.”

⁷Ami hunlam, kurbani ḳanae shae dila,

“O shorbo-shoktiman Mabud Alla,

tumar hoḳol bisaru hok ar shoṭik.”

⁸Sair nombor firistae tan baṭi shuruzor ufre ufuit ḳorla. Teu shuruzre ḳemota deoa oilo, manshore agunit zalaia kulosh tular lagi. ⁹Ou shomoe kub gorome manshor shoril zoligelo, ar ou gozob oḳolor ufre zan ḳemota ase, hou Allar birudde tara kufuri mat matilo. Ototar badeo tara touba ḳorlo na, ba Allar tarifo ḳorlo na.

¹⁰Bade fas nombor firistae hou zanuaror godir ufre tan baṭi ufuit ḳorla. Teu i zanuaror bashshai andair oigelo. Manshe zala-zontronae zarzir zibo ḳamṛailo. ¹¹Ou zala-zontrona ar shorilor bish fuṛar ḳarone tara behesti Allar birudde kufuri mato roilo, otar badeo tarar bod ḳamor lagi touba ḳorlo na.

¹²Ar soe nombor firistae hou moha gang Furator ufre tan gozobi baṭi ufuit ḳorla. Teu gangor fani hukaia fubor deshor raza oḳolor zaibar fot oilo. ¹³Ou shomoe ami deḳlam, bengor laḳan tinṭa but. I tinoṭa hou danob, hou zanuar ar hou bonḍo nobir muk taki baroia aise. ¹⁴Ou but oḳole keramoti ḳam deḳanit asil. Tara hara zogotor raza oḳolre ekkano dola ḳorlo, shorbo-shoktiman Allar hou mohan dino zuddo ḳorar lagi.

¹⁵Mono rakio, Hozrot Isae ḳoira, “Huno, ami to suror laḳan niralae aimu. Te doinno hou zon, ze zon hozag roibo ar nizor lebas findia roibo, zate he lemṭa oia gura na lage, ar manshe tar shorom na deḳe.” ¹⁶Ibrani bashae ze zagar nam Ar-Mazaddun, but oḳole hou razaintore ania ono dola ḳorla.

¹⁷Bade shat nombor firistae tan baṭi batashor ufre ufuit ḳorla. Ou shomoe behesti ebadot-ḳanar toḳt taki zure zure ou aoaz oilo, “Oḳon oise.” ¹⁸Teu megor zilkani, guṛ-guṛi ḍaḳ ar ṭaṭa foṛto laglo, erloge ola bezuita boisal oilo, ila boisal duniat manush foeda taki oḳon forzonto kunudin oise na. ¹⁹Hou mohan ṭaun tin ṭukra oigelo, duniar nanan zatir ṭaun oḳol surmar oigelo. Ar Alla Pakor mono oilo, hou namḳora Babil ṭaunor ḳota, tain tan nizor gozobi nisha-fanir fiala boria ou Babilre ḳabaila. ²⁰Ou shomoe tamam dif oḳol bagia gelogi, faṛ oḳolre ar deḳa gelo na. ²¹Asman taki boṛo boṛo fattoror laḳan hil oḳol manshor ufre foṛat roilo. Ita eḳo fattoror uzon oilo, onuman eḳ mon. Ou hilor gozobor lagi manshe Allar birudde kufuri mat matilo, ita asil kub marattoḳ gozob.

Naforman Babil ṭaunor bisar (17:1–19:10)

Namḳora moha bodmaishni

¹Ze shatzon firistar ato shatṭa baṭi asil, erar mazor eḳzone aia amare ḳoila, “Ao, aia deḳo, bout fanir ufre ze moha bodmaishni boise, tair kita shaza oibo. ²Zogotor raza oḳole tair loge zina ḳorsla, honor manshe tair zinar nisha-fani ḳaia ṭal oisla.” ³Bade hou firistae ruhani halote amare morubumit nila. Hono ami deḳlam, lal rongor eḳ zanuaror ufre eḳ beṭi boiroise. Ou zanuaror gotro bout kufuri nam leḳa ase. Ogur shatgu ḳolla ar doshgu hing deḳlam. ⁴Ou beṭie lal ar baingoni rongor kub dami ḳafoṛ findise, tai shuna ar dami dami moni-muktar goenadi hazise. Tair ato zinar moela ar nanan nomunar noforoti zinishe bora shunar eḳ fiala. ⁵Tair ḳofalo ola eḳ nam leḳa asil, i leḳar eḳ gufon mani asil. I nam oilo, “Namḳora Babil ṭaun, bodmaish beṭin ar zogotor hoḳol noforoti zinishor ma.” ⁶Ami deḳlam, ou beṭie Allar pak bonda oḳolor lou ar zera Hozrot Isar ḳota toblig kore, erar lou ḳaia ṭal oigese.

Taire dekia ami asanok taijjub oilam. ⁷Teu hou firistae amare ḳoila, “Tumi taijjub oigelae ḳene? Ou beṭir befare, ar ze zanuare taire boia ner, zegur shatgu ḳolla ar doshgu hing, itar gufon bed ami tumare zanaiar. ⁸Tumi ze zanuar deḳsilae, igu age asil, oḳon nai, bade he habia duzoḳ taki uṭia aia siroḳalor lagi shaza faibo. Hou zera ou zogotor manush, zetar nam duniar foela takiu Allar zindegi ḳatat leḳa nai, tara ou zanuarre dekia taijjub oiziba, ḳaron igu age asil, oḳon nai, otoso hirbar deḳa dibo.

⁹“Huno, oḳon zeta batail oibo, ita buzar lagi aḳolor dorḳar. Ou shato ḳolla oilogi, shatṭa faṛ, ze faṛor ufre ou beṭi boise. Ou shato ḳollare shatzon razao buza zaibo. ¹⁰Erar mazor fas raza ageu shesh oigese. Eḳzon oḳon ase ar eḳzon oḳono aise na. Ou raza aia harle tuṛa ḳoedin roiteu oibo. ¹¹Hou ze zanuar age asil oḳon nai, he shatzonor mazor eḳzon oileo, he ashole aṭ nombor raza. Bade he hor-hamesha siroḳal shaza faibo.

¹²“Ar tumi ze doshgu hing deḳso, ita oilogi doshzon raza. Tara oḳono razotto ḳora shuru ḳorse na, oile hou zanuaror loge raza bonia tara kub ḳom shomoe razotto ḳorar ḳemota faibo. ¹³I raza oḳolor mon oibo eḳoi laḳan, tara hoḳole tarar ḳemota ar eḳtiar hou zanuarre dilaibo. ¹⁴Tara meṛar baichchar loge zuddo ḳorbo, ar meṛar baichchae tarare araiba. Ḳaron tain oila malik oḳolor malik, bashsha oḳolor bashsha. Ar tan loge zera roiba tarare daot deoa oise, ar basia algail oise, tara hok-halali.”

¹⁵Bade ou firistae amare ḳoila, “Tumi ze fani deḳso, ze fanir ufre ou moha bodmaishni boise, ita oilogi bout desh, bout manush, bout zati ar bout zator bulie matra manush. ¹⁶Ar ze doshgu hing deḳso, itae ar ou zanuare i bodmaishnire bade ginnaiba, tara taire fotor hokir banaia lemṭa ḳorba, ar tair gust ḳaiba, heshe taire agunit falai zalaiba. ¹⁷Er ḳaron oilo, Allae tarar dilor maze ola eḳ niot disoin, zate tan morzi furafur fole. Erlagi tara eḳmot oia hou zanuarre hokkol ḳemota dilaiba, zate Allar kalam furafur folibar ag forzonto he razotto ḳore. ¹⁸Tumi ze beṭire deḳso, igu oilogi hou namḳora ṭaun, i ṭaune zogotor hoḳol razaintor ufre razotto ḳorer.”

Namḳora Babil ṭaunor binash

¹Itar bade ami aroḳzon firistare deḳlam, tain behest taki lamia aira. Tan bout boṛo ḳemota ase, tan mohimar bole asta duniae zolmol ḳorlo. ²Tain zure zure ḳoila, “Binash oigese, binash oigese, hou namḳora Babil ṭaun. Ikan oḳon butor aḳra oise, hokkol nomunar but-ferotor aḳra, nafaḳ ar zogoinno fakintor boshot ḳana oise. ³Ḳaron ikane tair zinar ḳamor bezuita nisha-fani duniar hoḳol zatire ḳabaise. Zogotor raza oḳole tair loge zina ḳorse, zogotor befari shodagor oḳole oḳanor tale tale lagam-saṛa nishae doni bonche.”

⁴Bade ami hunlam, behest taki aroḳzone ḳoira, “O amar bonda oḳol, tumra Babil ṭaun taki baroia ao, zate tumra tair gunar bagi na o. Ar tair ufre zeta gozob nazil oibo, ita gozobe tumrare na fae. ⁵Tair guna gia to asmano lagigese, tair naformanir bae Allae kial ḳorsoin. ⁶Oinno zonor loge tai zela ḳorse, tumrao tair loge ola ḳoro, tair ḳamor furafur faona taire deo. Ze fialar maze tai oinnor lagi naformani gulaito, ou fialat tair furafur shaza, shullo-ana shaza gulia taire ḳabao. ⁷Tai nizore loia zotoḳan boṛai ḳorse, zoto beshi bilashitar maze zindegi ḳaṭaise, ṭik otoḳan zontrona ar duk taire deo. Tai to mone mone ḳoe, ami kunu ṛaṛi beṭi ni? Ami to ranir ashono boisi, ami kunumonte-u duk-mosiboto foṛtam nae. ⁸Erlagi tair ufre eḳdineu hoḳol gozob foṛbo. I gozob oilo, mout, bilaf-ahazari, ar nidan. Taire aguindi zalail oibo, ḳaron zein tair bisar ḳorba, i Alla Mabud kub boloban.”

⁹Zogotor zoto raza oḳole ogur loge zina ḳorse, tair loge hoi-hulla ḳori bilashi din ḳaṭaise, taire zalanir bala tair duma dekia otae ḳandiba, tair lagi ahazari ḳorba. ¹⁰Tair zontrona dekia tara ḍoraia duroi ubaia ḳoiba, “Haere Babil, haere hae! Oto namḳora ṭaun, oto ḳemota-ala ṭaun! Ola zoldi tumar ufre gozob ailo ni?”

¹¹Zogotor befari shodagor oḳoleo tair lagi ḳandiba ar ahazari ḳorba, ḳaron tarar mal-samana oḳon kunu manshe loito nae. ¹²Tarar ita mal-samana oilo, shuna, rufa, dami dami moni-mukta, dami dami ḳafoṛ, baingoni rongor bashshai ḳafoṛ, reshmi ar lal ḳafoṛ, nanan nomunar kushboeala laḳṛi, attir datdi banail nanan siz, dami laḳṛidi banail siz, fitol, lua ar marbel fattordi banail nanan samana, ¹³ḍailchini, elais, agor-kushboe, mura-ator, loban, anguror rosh, zoetunor tel, moeda-gom, goru-meṛa, guṛa ar guṛar gaṛi, erloge ḳorida gulam-bandi oḳol.

¹⁴Hou shodagor oḳole ḳoiba, “O Babil, tumi ze aram-ayesh faitae saislae, ita to tumar ges taki horigese. Tumar hoḳol don-samana, zak-zomoḳ binash oigese. Ita to ar kunudinu firot faoa zaito nae.” ¹⁵Zeta shodagor oḳole ota malor bebsha ḳoria doni oisla, tair zontrona dekia hou befari oḳole ḍoraia duroi ubai roiba. Tara ḳandi ḳandi mattom ḳoria ḳoiba, ¹⁶“Ish, haere hae, dami dami moslin ḳafoṛ, baingoni ar lal rongor bashshai ḳafoṛ finda Babil ṭaun, shuna ar dami dami moni-mukta dia hazail-faṛail oto namḳora ṭaun! ¹⁷Oto zoldi tumar oto don-samanar banḍar binash oigelo ni?”

Shodagori zazor sharong ar kaftan oḳole, naia oḳole, zaz ar falor naia ḳarbari oḳole duroi ubaia ita deḳba. ¹⁸Taire zalanir shomoe tair duma dekia tara sillaia ḳoiba, “I ṭaunor laḳan namḳora, zogotor ar kunu ṭaun asil ni?” ¹⁹Tara nizor matat duil maḳaia silla-silli ḳorba ar ḳandi ḳandi mattom ḳoria ḳoiba, “Haere hae, hou namḳora Babil ṭaun, haere hae! Doriar maze zerar zaz solasol ḳore, tara to zazor ḳamai dia boṛoluk oisla, oḳon deḳrae ni, oto zoldi kila hoḳolta binash oigelo!”

²⁰Ou shomoe hou firistae ḳoila, “O behest, tumi furti ḳoro, ou ṭaunre binash ḳorae kushi ḳoro. O Allar pak bonda oḳol, nobi-rosul oḳol ar sahabi oḳol, furti ḳoro. Ogie tumrar birudde zotota ḳorsil, oḳon Allae tair bisar ḳorsoin.”

²¹Bade kub shoktiala eḳ firistae biraṭ eḳ fattor ania doriat falaia ḳoila, “Huno, ou namḳora Babil ṭaunreo ola ḍekka mari falai deoa oibo, taire ar kunudin faoa zaito nae. ²²Zera sharinda bazae, gan gae ar bashi ba shinga bazae, tarar aoaz ar kunudin tumar maze huna zaito nae. Ar kunudinu tumar maze kunuzat mestori milto nae. Kunu moshla fishar faṭar aoaz kunudin huna zaito nae. ²³Tumar maze kunudin kunu battir for zolto nae. Daman-ḳoinar golar aoaz ar kunudin tumar maze huna zaito nae. Ḳaron asta zogotor maze tumar shodagor oḳol namḳora asil, zogotor hoḳol zati tumar sol-soturir zadue fagol oizito. ²⁴Ar nobi-rosul oḳolre, Allar pak bonda oḳolre, ar zoto manshore i zogoto kun ḳora oise, tarar lou to tumar ou Babil ṭauno milche.”

Behesto Allatalar tarif

¹Erbade ami behestor maze bout manshor biṛor aoaz hunlam. Tara ḳoira, “Al-hamdulilla! Mohima ar ḳemota, aḳerator nazat, hokkoltau amrar Allar. ²Tan bisar to hok ar shoṭik. Ze ṭaune nizor zinar ḳam dia asta duniare nafaḳ banaisil, hou moha-bodmaishnire Allae shaza disoin. Tan maear gulam oḳolor lour bodla, tain ogur ges taki loisoin.” ³Era hirbar ḳoila, “Al-hamdulilla! Ogur maz taki hor-hamesha duma baroibo.” ⁴Alla Pak zein toḳto boat asoin, hou sobbishzon murobbi netae ar hou sairo zandare tanre soizda ḳoria ḳoila, “Amin! Al-hamdulilla.”

⁵Ou shomoe behesti toḳto taki eḳzone ḳoila, “O Allar maear gulam oḳol, tumra zera Allare ḍorao, tumra huru-boṛo hokkole amrar Allar tarif ḳoro.”

⁶Bade ami bout manshor biṛor aoaz ba zure zure ḳol-kolaia fani foṛar aoaz ba zure ṭaṭa foṛar aoazor laḳan ou ḳotaḳanain hunlam, “Al-hamdulilla! Amrar shorbo-shoktiman Mabud Allae bashshai ḳora shuru ḳorsoin. ⁷Ao, amra monor kushie furti ḳori, ar tan tarif ḳori, ḳaron meṛar baichchae shadi ḳorar shomoe oigese, tan ḳoina zuit oia hazigesoin. ⁸Tanre soḳsoḳa forishkar dami ḳafoṛ findail oise.” I ḳafoṛ oilo Allar pak bonda oḳolor forezgari sal-cholon.

⁹Bade hou firistae amare ḳoila, “Tumi oḳan leḳo, meṛar baichchar shadir mozliso zerare daot deoa oise, tara mubarok.” Tain eoḳan ḳoila, “Ita oilo Allar kalam, ita ḳaṭi hasa.” ¹⁰Teu ami ou firistare soizda ḳorar niote tan fao-o foṛlam, oile tain amare ḳoila, “Hae, hae! Ita kita ḳorrae, amio to tumar laḳan gulam, ar tumar ze mumin bai oḳole Hozrot Isar fokke zobanbondi deoat roe, ami tarar laḳano gulam. Te ḳali Allare soizda ḳoro. Ou Isar zobanbondiu oilo, nobi-rosul oḳolor zobanbondir mul kuṭi.”

Aḳerator bisar (19:11–20:15)

Bashsha oḳolor bashshar zoe

¹¹Bade ami deḳlam, behestor duar kula, ar hono dola eḳṭa guṛa ase. Hou guṛar ufre zein toshrif raḳsoin, tan nam oilo, hok ar hok-halali. Tain pak-forezgarie bisar-insaf ar zuddo ḳoroin. ¹²Tan souk oilo zalail soḳsoḳa agunir laḳan, tan matat bout taz ase. Tan shorilo omon eḳ nam leḳa, ze namor mani tain saṛa dusra ḳeu zane na. ¹³Tan finno ase lour maze ḍubail lebas, ar tan nam oilo, “Kalimatulla, Allar kalam.” ¹⁴Ar behestor sifai oḳole dami saf-sutra dola lebas findia, dola guṛar ufre soar oia tan ḳore ḳore zaira. ¹⁵Tain zate zogotor hoḳol zatire shaza dita faroin, otar lagi tan muk taki ekkan darail toluar baroia ailo. Tain luar laṭi dia tamam zatire shashon ḳorba, ar angur maṛar gato manshe zela faodi angur maṛoin, shorbo-shoktiman Allar lannoti gozobdi tain ola maṛiba. ¹⁶Tan urator maze ar tan lebaso ou nam leḳa ase, “Bashsha oḳolor bashsha, malik oḳolor malik.”

¹⁷Bade ami deḳlam, shuruzor maze eḳzon firista ubai roisoin. Asmanor maze zeta fakinte uṛira, tain era hoḳolre zure zure ḍakia ḳoila, “Ao, Allar dorbaro moha-daot ḳaoar lagi ekkano dola o, ¹⁸zate tumra aia gust ḳaitae faro, bashsha, fordan sifai, foeluan oḳol, guṛain ar guṛaintor soar oḳol, azad ar gulam, huru-boṛo hoḳol manshor gust ḳao.”

¹⁹Erbade ami deḳlam, ou guṛat zein soar oisoin, en loge ar en sifai dolor loge zuddo ḳorar lagi hou zanuar, asta duniar raza oḳol, tarar shoinno-sifai dol loia ekkano dola oila. ²⁰Teu hou zanuarre doria aṭok kora oilo, ar ze bonḍo nobie tar fokko loia asanok kam deḳaito, tareo dora oilo. Zeta manshe hou zanuaror sil lagaise, tar murtir fuza ḳorse, ou bonḍo nobie tar asanok kam deḳaia ota manshore be-foti banaise. I duioṭare zinda halote, zalail gondoḳor agunir maze falani oilo. ²¹Hou dola guṛar ufre zein boat asla, tan muk taki ze darail toluar baroia aisil, oḳandi tarar logor shango-pango oḳolre kun ḳora oilo. Erlagi hoḳol fakinte feṭ boria otar gust ḳaila.

Eḳ azar bosoror boean

¹Erbade ami deḳlam, behest taki eḳzon firista lamia aira. Tan ato asil habia duzoḳor sabi, ar kub boṛo eḳsa longor. ²Tain hou danobre dorla, igu oilo hou furana haf, er nam oilo Iblis ba shoetan. Tare doria eḳ azar bosoror lagi bandila, ³bandia habia duzoḳo falaila. Bade ou duzoḳor duaro tala lagaia er ufre sil-sappoṛ marla, zate he ou eḳ azar borosor maze baroia, duniar kunu zatire be-foti banaito na fare. Heshe tare tuṛa ḳoedinor lagi saṛa oibo.

⁴Bade ami deḳlam, bout toḳt ase. Zera ou toḳtor ufre boisoin, erare bisar ḳorar ḳemota deoa oise. Allar kalam ar Hozrot Isar befare zobanbondi deoae zerare gordona mara oisil, erar ruh oḳolreo ami deḳlam. Era hou zanuarre ba tar murtire fuza ḳorse na, ar ato ba ḳofalor ufre tar silo lagaise na. Era zinda oia uṭla, uṭia eḳ azar bosor dori al-Mosir loge bashshai ḳorla. ^5-6Iṭa oilo foela bar murda taki zinda oia uṭa, ar ou zera zinda oila tarau doinno ar fobitro. Foela bar zera zinda oia uṭla, erar ufre to moutor dusrabar kunu bol ḳaṭani solto nae. Tara oiba Alla Pak ar al-Mosir imam. Tara hou eḳ azar bosor dori al-Mosir loge bashshai ḳorba. Oile ou azar bosor furanir ag forzonto bad-baki kunu murda zinda oila na.

Iblis-shoetanor shesh dosha

⁷Ou eḳ azar bosor gia harle shoetanre tar zel ḳana taki ḳalas deoa oibo. ⁸Teu he gia asta zogotor hoḳol zatire, mani Iazuz-Mazuzre be-foti banaibo, ar zuddo ḳorar lagi tarare ekkano dola ḳorbo. Tar manush oiba, doriar soror balur laḳan, ita gonia furani zaito nae. ⁹Ou shomoe ami deḳlam, tara asta dunia taki baroi gia Allar pak bonda oḳolor roar zaga, Allar maear ṭaunre gia berililo. Oile asman taki Allai aguin lamia itare zalaililo. ¹⁰Ar ze Iblise erare be-foti banaisil, tare doria zalail gondoḳor agunir gato falail oilo. Hou zanuar ar bonḍo nobire ageu ou gato falail oisil. Hono tara siroḳal roiba, ar dine-raite zala-zontronar azab faiba.

Ruz hashoror din

¹¹Bade ami deḳlam, boṛo ekkan dola toḳt, ou toḳto eḳzon boat asoin. Tan samna taki asman ar dunia bagigelo, kunuḳano erar zaga roilo na. ¹²Erbade deḳlam, huru-boṛo tamam murda oḳol ou toḳtor samne ubai roisoin. Bade ḳoeḳan ḳata kula oilo, erbade aro ekkan ḳata kula oilo, ikanor nam zindegi ḳata. Ou ḳata oḳolor maze hou murda oḳolor zeta amol-noma leḳa oisil, hou amol mafik tarar aḳeri bisar ḳora oilo. ¹³Doriar maze zoto murda oḳol asla, doriae erar lash bar ḳori dilo. Ar mout ar ḳoeboror maze zeta murdain asla, mout ar ḳoebore tarare bar ḳori dilo. Forteḳ zonre tar nizor amol-noma mafik bisar ḳora oilo. ¹⁴Heshe mout ar ḳoeborreo agunir gato falail oilo. Ou agunir gato foṛau oilo dusrabar mout mani, aḳeri mout. ¹⁵Zerar nam hou zindegi ḳatat millo na, tarareu agunir gato falail oilo.

Noea foeda (21:1–22:21)

Noea asman ar noea zomin

¹Bade ami ekkan noea asman ar noea zomin deḳlam. Foela asman ar foela zomin milai gese, kunu doriao ar roilo na. ²Ami deḳlam, hou fobitro ṭaun, mani noea Zeruzalem. Ikan behestor maz taki ar Allar dorbaro taki lamia ar. Kunu biar ḳoinare zela damandor lagi hazail oe, ou ṭaunreo ola shundor ḳori hazail oisil. ³Bade ami hunlam, hou behestor toḳto taki eḳzone zure zure ḳoira, “Oḳon manshor maze roar lagi Alla Pakor zaga oise. Tain manshor loge boshot ḳorba, ar tara oiba tan bonda. Tain shoeong tarar loge roiba, tarar Alla oiba. ⁴Tain erar sokur fani fusia diba. Ar kunu moron oito nae, duk, ḳandon, ḳoshṭo ar roito nae, agor ita hoḳolta-u shesh oigese.”

⁵Toḳto zein boat asla tain ḳoila, “Huno, ami hokkoltare noea ḳori foeda ḳoriar.” Bade tain hirbar ḳoila, “Amar ou ḳotaḳan leḳo, ḳaron ita ekin ḳorar laḳ hasa.”

⁶Tain amare eoḳan ḳoila, “Shesh oigese. Amiu Alif ar Ya, aual ar aḳer. Huno, zar fanir fiase dorse, tare ami abe-haeator zindegi-fanir zorna taki bina foeshae fani dimu. ⁷Ze zon zoei oibo, he ita hoḳoltar odikar faibo. Ami oimu tar Alla, ar he oibo amar fut. ⁸Oile ka-furush, beiman, haramkur, kuni, zinakur, zadugir, murtifuza ḳorra, ar hoḳol nomunar misa matra oḳol zalail aguin ar gondoḳor gato roiba. Er namu oilo dusrabaror mout.”

Noea Zeruzalem ṭaun

⁹Hou ze shatzon firistar ato aḳeri shato gozob bora shatṭa baṭi asil, erar mazor eḳzone amar ḳandat aia ḳoila, “Ao, ami tumare ḳoina-beṭi deḳaimu, mani meṛar baichchar boure deḳaimu.” ¹⁰Bade hou firistae ruhani halote amare boṛo eḳ usa faṛor ufre loia gela. Nia Allar mohimae soḳsoḳa ze fobitro Zeruzalem ṭaun, behestor maz taki ar Allar dorbaro taki lamia aoat asil, ou firistae amare ota deḳaila. ¹¹I ṭaunor rong kub dami moni-muktar laḳan soḳsoḳa, foṭikor golashor nomunae dami hirar laḳan. ¹²Hou ṭauno boṛo ekkan usa oal asil, ou oalo baroḳan geiṭ asil, baro geiṭo barozon firista asla. Ou geiṭor ufre Boni Israilor baro ḳandanor nam leḳa. ¹³I geiṭor tinḳan fubedi, tinḳan utoredi, tinḳan douknedi ar tinḳan foismedi asil. ¹⁴I ṭaunor oalor baroṭa filar asil, itar ufre meṛar baichchar barozon sahabir baroḳan nam leḳa.

¹⁵Amar loge zein batchit ḳorat asla tan ato shunar eḳṭa nol asil, zate tain ou ṭaun, ṭaunor geiṭ ar oal mafita faroin. ¹⁶I ṭaun asil sairkuni gul, lambae ar faṛe shoman. Bade tain ou noldi ṭaunḳan mafile, ikan lamba, faṛ ar usae oilo baro azar stadia (onuman deṛ azar mail). ¹⁷Bade tain oal mafila, i oal asil eḳ-sho sousallish at usa. Manshor ator mafor laḳan i firistaeo mafila. ¹⁸I oalḳan hiradi banail, ar i ṭaun asil foṭikor golashor laḳan ḳaṭi shunadi banail. ¹⁹Ṭaunor oalor filar oḳolor maze dami dami moni-mukta lagail asil. Foela filar hirar, dusraṭa akik monir, tin nomborṭa tama moni, sair nomborṭa fanna moni, ²⁰fas nomborṭa shuruz moni, soe nomborṭa iakut moni, shat nomborṭa lil moni, aṭ nomborṭa boidurjo moni, noe nomborṭa fit moni, dosh nomborṭa ufol moni, egaro nomborṭa firuz moni, ar baro nomborṭa foddorag moni. ²¹Baroḳan geiṭ baroṭa muktadi banail. Forteḳ geiṭ asil eḳoṭa dami muktar. Ṭaunor rasta asil foṭikor golashor laḳan ḳaṭi shunadi banail.

²²I ṭauno ami kunu ebadot-ḳana deḳlam na, shorbo-shoktiman Alla Mabud ar meṛar baichchau asla inor ebadot-ḳana. ²³I ṭaunre for ḳorar lagi kunu san-shuruzor zorur nai. Allar nuror mohimae for dey, ar meṛar baichchau oila inor batti. ²⁴Hoḳol zatir manush ou nuror fore sola-fira ḳorba, duniar bashsha oḳole tarar zak-zomoḳ loia ou ṭauno aiba. ²⁵Dinor bala kunu shomoe-u i ṭaunor geiṭ bond oito nae, ar hino kunu rait oito nae. ²⁶Tamam zatir ijjot ar gourob ono ana oibo. ²⁷Nafak kunu siz, haramkur ba misa matra kunu manush, kunudino ino hamaito farto nae. Ḳali meṛar baichchar zindegi ḳatar maze zerar nam leḳa ase, tarau hamaiba.

Zindegi-fanir gang

¹Erbade hou firistae amare abe-haeat, mani zindegi-fanir gang deḳaila. Ikṭa deḳte soḳsoḳa ḳasor laḳan. Iṭa Alla Pak ar hou meṛar baichchar toḳtor daro taki baroia, ²ṭaunor boṛo gollir mazḳanedi zaoat asil. Ar ou gangor duio faro zindegi-gas asil. Ou gasainto baro zator fol dore. Forteḳ mashe mashe fol dore, ou gasor fatae hoḳol zatir manshor bemar shifa oe. ³Kunuzat lannot ar roito nae. Alla Pak ar meṛar baichchar toḳt ou ṭauno roibo, ar tan gulam oḳole tan ebadot ḳorba. ⁴Tara tan fobitro muk deḳba, tarar ḳofalo tan nam leḳa taḳbo. ⁵Ar kunu rait oito nae, tarar lagi lemor ba shuruzor foror zorur oito nae, ḳaron Alla Mabudor nuru oibo tarar for. Tara hor-hamesha siroḳal dori bashshai ḳorba.

Hozrot Isa al-Mosi zoldi aira

⁶Bade hou firistae amare ḳoila, “Ita hoḳolta ekin ḳorar laḳ hasa. Alla Mabud, zein age tan nobi oḳolor mazdi batchit ḳorsoin, tain nizor firistare disoin, zate tuṛa ḳoedinor maze zeta goṭibo, ou firistae ita tan gulam oḳolre deḳain.”

⁷Hozrot Isae ḳoira, “Huno, ami kub zoldiu airam. Ze zone ou kitabor hoḳol aeator agam ḳobor amol ḳore, he-u nek-kofali.”

⁸Te Isa al-Mosir sahabi ami Hannane ita deḳsi ar hunchi. Hoḳolta huna ar deḳar bade, ze firistae amare ita deḳaisoin, ami tanre soizda ḳorar niote tan fao-o foṛlam. ⁹Oile tain amare ḳoila, “Na, na! Tumi amare nae, ḳali Alla Pakre soizda ḳoro. Ami to ḳali tumar laḳan gulam, tumar baiain mani nobi oḳolor laḳan ar i kitabor hoḳol aeat zera mane, tarar laḳanu gulam.”

¹⁰Erbade tain amare ḳoila, “Ou kitabor kunu agam ḳobor tumi lukaia rakio na, ḳaron shomoe gonaia aichche. ¹¹Zegie naformani ḳorer, he ola ḳorat rouk. Zegu ḳobis, igu tar ḳobisit rouk. Ar forezgar zone forezgari ḳorat rouk, fak-fobitro zon fak-fobitro rouk.”

¹²Hozrot Isae ḳoira, “Huno, ami kub zoldi airam, ar forteḳ manshor amol-nomar furushkar amar ato ase. ¹³Amiu Alif ar Ya, aual ar aḳer, shuru ar shesh.

¹⁴“Tarau nek-kofali, zera nizor ḳafoṛ-sufoṛ doia forishkar ḳore, zate zindegi-gasor fol ḳaoar odikar fae, ar geiṭedi gia fobitro ṭauno hamae. ¹⁵Kukror laḳan zogoinno manush, zadugir, zinakur, kuni, murtifuza ḳorra, ar zetae misa mat foson ḳore, misar maze sole, ita hokkolṭi bare foṛi roise.

¹⁶“Te ami Isae amar firistare faṭaisi, zate ein zomat oḳolor lagi tumrar gese ota hoḳol befare zobanbondi dein. Ami to Bashsha Daudor ḳandan ar mul zoṛ, fozoror soḳsoḳa shuk-tera.” ¹⁷Pak ruhe ar ḳoinae ḳoira, “Ao.” Ar ze zone ou ḳota huner, he-o ḳouk, “Ao.” Fanir fiase zare dorse, he auk. Ze zone fani ḳaito sae, he bina foeshae zindegi-fani ḳauk.

¹⁸Ze zone ou kitabor hoḳol agam ḳobor hune, tar gese ami ou zobanbondi diar, ḳeu zudi ou aeat oḳolor loge dusra kunta baṛae, te Allae-o ou kitabo leḳa hoḳol nomunar gozob tar zindegit baṛaiba. ¹⁹Ar ou kitabor aeat oḳol taki ḳeu zudi kunta bad dey, te Allae-o i kitabo leḳa zindegi-gas ar fobitro ṭaunor odikar, tar zindegi taki bad diba.

²⁰Ou befar oḳol loia zein zobanbondi dira, tain ḳoira, “Hasau, ami kub zoldi airam.”

Amin. Hozrot Isa, afne toshrif anoukka.

²¹Allar tamam pak bonda oḳolor ufre, Hozrot Isar rohomot zari rouk. Amin.

Ḳotom.