al-Filifia

Fobitro Injil Shorif 11 nombor sifara

al-Filifia

Forisiti

Alla Pakor hukume fobitro asmani kitabor ou sifara siṭir aḳare leḳsoin, Hozrot Isa al-Mosir sahabi Hozrot Pauluse (ra:). Onuman ḳora oe, Hozrot Isa behesto toshrif neoar bade 31–33 bosoror maze ikan leḳa oise. Ou shomoe Hozrot Paulus Rum ṭauno bashsha Ḳoisoror razbaṛir zel ḳanat bondi asla.

Ou sifara leḳar ḳoe bosor age tain Filifi ṭauno aisla Hozrot Isar kush-ḳobri toblig korar lagi, aia tain zomat ḳaim ḳorla, ita oilo Iurup mohadeshor hoḳol foela zomat (Sahabi Nama 16 ruku deḳoukka).

Iman anar bade ou Filifi zomator manush kub gorib ar zulum-mosibotor maze roileo, tara oinno mumin oḳolre ar Hozrot Paulusre ṭeḳa-foesha dia shaijjo ḳorae, tain kushi oia erare doinnobad zanaisoin. Tarar imanor fol dekia tain foramish dira, tara zanu hamesha Allai kushi-bashit roia al-Mosir laḳan tiagi ar nisharto zindegi ḳaṭain.

Ermaze ase,

(1) Salam, shukria ar kushi-bashir ḳota 1:1-11 aeat

(2) Hozrot Paulusor nizor halot 1:12-26

(3) Hozrot Isar tiagor nomuna 1:27—2:18

(4) Duizon ustadre faṭani 2:19-30

(5) Dadir musla bad dia Allar ruhe ebadot ḳoro 3 ruku

(6) Dan-ḳoerator lagi doinnobad 4 ruku

¹Ami Paulus ar Timoti oilam Hozrot Isa al-Mosir gulam. Ou Filifi ṭauno boshot ḳorra, ze pak bonda oḳole Hozrot Isa al-Mosir ufre iman anchoin erare, erar ustad oḳolre ar ḳadimdar oḳolor gese leḳram.

²Amrar gaibi baf Alla Pak ar Hozrot Isa al-Mosir rohomot ar shanti tumrar ufre nazil ouk.

Filifi zomator lagi munazat

³Tumrar ḳota zotobaru amar iad oe, otobaru ami amar Allar shukria adae ḳori. ⁴Ami zebla tumrar lagi dua ḳori, amar mono kub kushi loia dua ḳori. ⁵Hozrot Isa al-Mosir toblig kamor lagi to tumra foela taki oḳon forzonto amare shaijjo ḳorrae. ⁶Ami ekin ḳori, ze Allae tumrar dilor maze ou nek kam shuru ḳorsoin, al-Mosie dusrabar toshrif ana forzonto, ou Allae i ḳam fura ḳorba.

⁷Tumra to amar maear manush, erlagi tumrar befare amar monor bab ola oa usit. Ami zelo bondi halote ba kush-ḳobrir hok kota zenou toblig kori na ḳene, tumrao amar logor rohomotor bagi. ⁸Eḳ Allae zanoin, al-Mosir mohobbote ami tumrar lagi ḳoto ashik.

⁹Ami dua ḳori, tumrar mohobbot zanu kamil bibeḳ ar aḳole din din baṛe. ¹⁰Zate tumra aḳol ḳaṭaia bala bala befar oḳol sinbae, ar al-Mosie dusrabar toshrif anar ag forzonto, ¹¹tan bole tumra nek kam-ḳaz ḳoria ḳaṭi fote nikut oia roibae. Teu Alla Pakor gourob ar tarif zair oibo.

Hozrot Paulusor nizor halot

¹²O amar bai oḳol, ami sairam tumrao zano, amar ufre zeta zeta goṭise, itar lagi ashole kush-ḳobri tobligor ḳam aro baṛigese. ¹³Erlagi onor razbaṛir sifai oḳole ar bad-baki mansheo zanilisoin, ami to ḳali al-Mosir lagiu zel ḳaṭiar. ¹⁴Ar ami zelo hamanie amrar bout baiainte malikor ufre aro besh ḳori borosha ḳora hiksoin, tara ḍor-boe fauria Allar kalam tobligor lagi aro shaoshi oisoin.

¹⁵Erar maze ḳeu ḳeu ingsha ar doladolir niote al-Mosir toblig korer, oile ḳeu ḳeu bala niote ḳorer. ¹⁶Erar dilor mohobboteu al-Mosir toblig korer. Tara zanoin, kush-ḳobrir fokke matar lagiu amare aṭok kora oise. ¹⁷Oile zera nizor faeda ḳamanir lagi al-Mosir toblig kore, era to bala niote ḳam ḳore na. Tara sae, ami zelo bondi roi ar amar ḳoshṭo baṛouk. ¹⁸Oile itae kita ae zae? Ashol ḳota oilo, zemneu oe na ḳene, al-Mosir nam to toblig or. Ita dukabazir niote ouk ba sohi nioteu ouk. Ar ota dekiau ami kushi.

Amar i kushi kunudin fuṛaito nae. ¹⁹Ami to zani, amar ufre zeta goṭise, itar hesh fol oilo, ami nistar faimu. Tumrar dua ar Isa al-Mosir ruhur bole ita oibo. ²⁰Amar kub mozbut ekin ase, ami kunumonte-u shorom faitam nae. Ami furafur shaosh ḳoria age zela al-Mosir gourob zair ḳorsi, ami mori ba basi oḳono ola zair oibo. ²¹Ḳaron amar lagi zindegi oila al-Mosi ar moron oilo lab. ²²Oile ami zudi basia roi, te amar zindegit kub bala ḳam ḳorar shuzug oibo. Erlagi ami buzram na, ami kun fot loitam. ²³Duio foteu amare ṭaner. Amar ichcha oilo, ami moria hari al-Mosir loge roitam, oḳanu amar lagi bala. ²⁴Oile tumrar lagi amar basia roaḳan aro zoruri. ²⁵Ar ou monobole ami bala ḳori zani, ami basmu ar tumrar loge roimu, zate tumrar iman aro mozbut oia tumrar kushi baṛe. ²⁶Ami tumrar maze hirbar aia harle, amare loia tumra Isa al-Mosir name kub kushi ḳorbae.

Isa al-Mosir torikar zindegi

²⁷Ashol befar oilo, tumra zarzir zindegire ou nomunae ḳaṭao, ze zindegi al-Mosir kush-ḳobrir laḳ. Teu ami nize aia deki ba duroi taki huni, ami buzmu, tumra dile-zane milia mozbut aso. Ar kush-ḳobrir mazdi ze iman foeda oe, ou imanor lagi hoḳole milia eḳ dile menot ḳorrae. ²⁸Zetae tumrar birudita ḳoroin, kunu befareu tumra itare ḍoraio na. Teu forman oizibo, tara binashor fote zairagi ar tumra rehai fairae. I rehai ḳali Allar ges takiu mile. ²⁹Al-Mosir ufre iman ancho iṭa zela rohomot, tan lagi zulum-mosibot shoijjo ḳorar shuzug faiso iṭao tumrar lagi rohomot. ³⁰Tumra age amare zela ḳoshṭo ḳorat deḳso ar oḳono zeta ḳoshṭor ḳota hunrae, tumrao to ou laḳan ḳoshṭor maze foṛigeso.

Hozrot Isar tiagor nomuna

¹Al-Mosir ufre iman anle zebla borosha mile, tan mohobbote zebla shanti mile, tumrar loge zebla Pak Ruhur bala shomporko ase, ar tumrar dilo zebla maea-momota ase, ²te tumra amar bitoror kushikan furailao. Tumra hoḳol eḳ mone solo, dile-zane eḳ o, ar eḳe-oinnore mohobbot ḳoro. ³Nizor labor asha ba beṭagiri deḳanir lagi kunta ḳorio na, borong noto oia nizor saite oinnore beshi dam deo. ⁴Ḳali nizor shartor sinta ḳorio na, foror ḳotao sinta ḳorio. ⁵Hozrot Isa al-Mosir mon zelaḳan asil, tumrar mono olaḳan banailao. ⁶Tain ashole Allai surote roileo, Allai shinghashon doria raḳar lagi lalchi asla na. ⁷Borong gulam bonia manush hishabe zonom loia nizore huru banaila. ⁸Tain manush surote roia mout forzonto, duk-koshṭor solibor uforor mout forzonto baiddo roia nizore noto ḳorla. ⁹Erlagiu Allae tanre arshe-azimo uṭaila ar ola ijjoti eḳ nam dila, ze nam hoḳol taki shera. ¹⁰Zate ou namor gune asman-zomin ar fatalor tamam zandar Isar samne noto oin, ¹¹ar gaibi baf Alla Pakor gourobor lagi shikar ḳoroin, Isa al-Mosiu malik.

Mumin oḳol nuror laḳan

¹²O amar maear bai oḳol, tumra to hamesha-u amar hukum mania airae. Te ami samne taḳle zela mano, oḳon amar aforḳeo ola tumrar dilor ḍor-ḳofe nek amol ḳoro. Ou amolor mazdi deḳao, tumra guna taki nazat failiso. ¹³Buzrae ni, Allae tumrar dilor maze ola eḳ bab dan ḳorsoin, ita amol ḳorle tain kushi oin, ou amol ḳorar niot ar takkoto tain tumrare disoin.

¹⁴Tumra kunuzat torka-torki ba ḳaijja-fosad na ḳoria hoḳol ḳam ḳoro. ^15-16Zate shullo-ana forezgar ar nikut bono, ar i zomanar ḳobis naforman shomazor mazeo tumra Allar aolad hishabe ro. Ota manshor samne Allar pak kalam toblig koria, ou duniatu tumra asmanor san-shuruzor laḳan soḳsoḳa bonizao. Teu al-Mosi zebla dusrabar toshrif anba, hou din ami buk fulaia ḳoitam farmu, amar ou menot ar aṭni-ḳaṭni beḳama gese na. ¹⁷Huno, ze imanor kurbanir mazdi tumra Allar ebadot ḳorrae, er ufre zudi amar nizor loure kurbani hishabe ḍali deoa oe, ta-o ami kush asi, tumrare loia kushi ḳorram. ¹⁸Ṭik tumrao ola kushi o, amar loge kushi ḳoro.

Duizon ustadre faṭani

¹⁹Ami asha ḳori, Hozrot Isar morzi oile ami Timotire kub zoldi ḳori tumrar gese faṭaimu, teu tumrar halot zania ami shanti oimu. ²⁰Timotir laḳan ila ar keu amar gese nai, zein tumrar lagi sinta ḳoroin. ²¹Baki hoḳoleu Isa al-Mosir befare sinta na ḳoria, tara zarzir dandae asoin. ²²Oile Timotir befar to tumra zano, fute zela nizor bafor loge ḳam ḳore, taino ola al-Mosir kush-ḳobri tobligor lagi amar loge menot ḳorsoin. ²³Erlagiu ami asha ḳoriar, amar dosha kita oibo, oḳan zanar badeu ami tanre faṭaitam. ²⁴Oile ami malikor ufre borosha ḳori ḳoiar, ami nizeo kub zoldi ḳori aitam farmu.

²⁵Ar ami mono ḳoriar, Usaidre tumrar gese faṭanikan kub zorur. Amar ḳezmot ḳorar lagi tumra tanre amar gese faṭaislae. Amra eḳloge toblig kori, Isa al-Mosir lagi jihad ḳori. Ein amar imandar bai. ²⁶Taino tumrar loge deḳa ḳorta saira, tumra tan bemaror ḳobor hunae, tain fereshanit foṛigesoin, erlagi ami tanre faṭaiar. ²⁷Ashole tain kub bemar asla, bemare tan na-basar halot oigesil. Oile Allae tanre rohom ḳorsoin. Ḳali tanre nae, tain basi zaoae Allae amareo bout boṛo rohom ḳorsoin, zate ami ek koshṭor ufre ar kunu ḳoshṭo na fai.

²⁸Erlagi ami kub kiali oia tanre faṭaiar, zate tanre faia tumrao kushi o, ar amar monor sintao hori zae. ²⁹Te Allar bonda hishabe furafur kushi oia tanre ḳobul ḳorio, ar erar laḳan manshore ijjot ḳorio. ³⁰Al-Mosir toblig korat gia tain morar foti oigesla. Amar samne na taḳae tumra ze ḳam ḳortae farso na, ou ḳamor lagi tain nizor zan diteo razi asla.

Dadir musla bad dia Allar ruhe ebadot ḳoro

¹O amar bai oḳol, hesh-mesh ḳoiram, malikor name kushi ḳoro. Eḳ befar loia bare bare leḳte amar kunu ḳoshṭo or na, tumrare basanir lagiu ami ita ḳorram. ²Huno, hou kukror fal taki, mani naforman dolor dadir musla taki hushiar roio. Itae to tarar shorilor ḳaṭa-sirar ufreu borosha ḳore. ³Ashole amrau oilam ḳaṭi mosolmani ḳorail manush, amra to Isa al-Mosir name gourob ḳori, Allar ruhur bole tan ebadot ḳori, shorili kunu ebadotor ufre borosha ḳori na.

⁴Ashole ḳeu zudi mono ḳore, nizor shorili ebadotor ufre borosha ḳorar zukti ase, te he buzilauk, tar saite amar aro beshi zukti ase. Amio itar ufre borosha ḳortam farlam one. ⁵Zonmor aṭ dinor dinu amar mosolmani ḳam ḳorail oisil. Ami eḳzon ḳaṭi Ibrani, amar zonom oise to Boni Israilor Bin-Iamin gusṭit. Hozrot Musa nobir shoriotor befare ami to Forishi zomator. ⁶Shoriot manar befare kunu manshe amar kut bar ḳorto farse na. Dormor befare ami kub ḳoṛa, al-Mosir zomator ufreo ami zulum ḳortam.

⁷Oile ou amol ḳorae amar zoto faeda oisil, oḳon al-Mosir lagi ami itare ḳeti mono ḳori. ⁸Ashole ami zar lagi i ḳeti shikar ḳoriar, einu amar malik Isa al-Mosi. Tanre zanar mazeu hoḳol taki boṛo faeda, tan tulonae bad-baki hokkoltareu ami ḳeti mono ḳori. Ami zate al-Mosire fai, ar amare zate al-Mosir loge ekkano milail deḳa zae, ou nioteu ami ita hokkoltare moelar laḳan horaia falaisi. ⁹Te shoriot manae ami ze forezgar bonigesi, ikan nae, al-Mosir ufre iman anaeu Allae amare forezgar hishabe ḳobul ḳorsoin. I forezgari ḳali Alla takiu mile, ita to imanor ufre nirbor ḳore. Al-Mosir loge milar badeu amar ou halot oise. ¹⁰Te ami al-Mosire sintam sai, ze kudroti bole tanre mora taki zinda ḳora oisil, ou bolreo sintam sai. Ami tan duk-mosibotor bagi oitam sai, tain zela nizor zan kurbani disla, amio ou mouto shorik oitam sai. ¹¹Ar zekunu laḳan moron taki zinda oato shorik roi.

Aḳerator fote solo

¹²Te ami zeta faitam sairam, ita ze oḳonu failisi, ba furafur kamiab oigesi ila kunta nae. Hozrot Isa al-Mosie ze niote amare bondi ḳorsoin, ou niot fura ḳorar lagiu ami douṛairam. ¹³Bai oḳol, ami mono ḳorram na, ami itar lagal failisi. Oile ḳoror hoḳolta falaia ami dile-zane samnedi douṛaiar. ¹⁴Douṛai douṛai sesṭa ḳoriar, Isa al-Mosir zoriae Alla Pakor ze behesti daot ase, furushkar hishabe ou daoto hamaitam fari.

¹⁵Erlagi ḳoiram, amra zara Hozrot Isar fote bout aguai gesi, amrar nioto olaḳan oa zorur. Ar tumrar zudi oinno kunu niot taḳe, te Allaeu fot batai dibane. ¹⁶Zai ouk, amra zotoḳan aguaisi, ou laḳan zindegio ḳaṭani usit.

¹⁷Bai oḳol, tumra kilan zindegi ḳaṭaitae, ita to ami hikaisi. Tumra amar laḳan solo, ar ou laḳan zara sole, tarare dekia hiko. ¹⁸Ami to bout bar tumrare ḳoisi, ar sokur fani falaia oḳono ḳoiram, ilao bout zon ase, zera al-Mosir duk-koshṭor solibor dushmonor laḳan soler. ¹⁹Tarar ḳofalo ase binash. Tarar feṭu tarar Alla. Naformani ḳam loia tara boṛai ḳore, ḳali duniar dandae fagol. ²⁰Oile amrar ashol baṛi to behesto. Amrar toraora malik, Hozrot Isa al-Mosie hon taki toshrif anba. Amra tan lagi dile-zane bar sairam. ²¹Tain aia amrar ou ḳomzur ḳaea bodlaia, tan ḳaear laḳan ḳemota-ala nuror ḳaea diba. Ze kudroti bole tain hokkolta ḳorta faroin, hou boleu tain ita ḳorba.

¹O amar maear bai oḳol, ami tumrare deḳtam sai. Tumrau amar kushi, amar zoeor mala. Amrar malikor loge tumra mozbut oia lagia ro.

Hozrot Paulusor foramish

²O amar boin Salima ar Saida, ami minot ḳori ḳoiram, eḳ malikor ḳezmoto lagail aso ḳori, tumra mili-mishi eḳ mone solo. ³O amar logor ashol shongi, ami tumareo minot ḳorram, tumi ou beṭintore shaijjo ḳorio. Al-Mosir kush-ḳobri toblig kamo era amar loge bout ḳoshṭo ḳorsoin. Kiliman ar oinnainno baiaintor logeo ḳoshṭo ḳorsoin. Tarar nam to Allar zindegi ḳatat leḳa ase.

⁴Malik Isar name tumra hamesha kushi-bashi ḳoro. Ami hirbar ḳoiram, kushi-bashi ḳoro. ⁵Tumrar norom bebohar zanu hoḳol manshor sokut foṛe. Zano to, amrar malik kub zoldiu aira. ⁶Kunu befareu tumra fereshan oio na, borong munazat ḳoro. Tumrar zotota saibar ase, Allar shukria adae ḳoria tan gese sao. ⁷Teu Allar deoa ze shantir ḳota manshe sintao ḳorto fare na, Isa al-Mosir mazdi ou shanti aia tumrar dil ar monre roikka ḳorbo.

⁸O bai oḳol, ami hesh-mesh ḳoiram, zeta hasa, zeta ufozukto, hok, ḳaṭi, shundor, ar ijjot faoar zuka, mani zeta bala ar zetae tarif oe, ou laḳan befare tumra kiali o. ⁹Tumra amar ges taki ze talim faiso, zeta huncho, zeta deḳso, ar zeta ḳobul ḳorso ota oḳon amol ḳoro. Teu shanti deora Allao tumrar loge loge roiba.

Dan-ḳoerator lagi doinnobad

¹⁰Malike amar kushi aro baṛai dila, bout din bade tumra amare mono ḳorrae. Amar lagi to hamesha-u tumra sinta ḳorso, oile ita deḳanir shuzug faiso na. ¹¹Kunu obabo foṛia ami ikan ḳoiram na, zekunu haloteu shontusto roaḳan ami zani. ¹²Obabi ba nobabi halote, ufashi feṭe ba bora feṭe, doni ba goribir maze kila shontusto roa zae, ita talim ami faisi. ¹³Ashole zein amare bol-shokti zugaia dein, tan boleu ami hokkolta ḳortam fari. ¹⁴Ta-o tumra amar ḳoshṭor loge shorik oia, kub bala ḳam ḳorso.

¹⁵O Filifi zomator mumin oḳol, tumra to zano, tumra foela kush-ḳobri faoar bade ami zebla Makidonia desh taki geslamgi, ou shomoe tumra saṛa ar kunu zomateu amar loge kunuzat len-den ḳorse na. ¹⁶Ami zebla Tisholoniki ṭauno aslam, ou shomoe amar obabor ḳalo tumra ḳoebar shaijjo faṭaiso. ¹⁷Ami tumrar ges taki kunu dan-dokkina sairam na, oile tumrar lagi ola eḳ fol asha ḳorram, zeta tumrar amol-nomat zoma roibo.

¹⁸Amar hoḳol faonau ami failisi. Ashole amar zotoḳan zorur, er saiteo beshi ase. Usaid bair at taki tumrar ufohar faia oḳon amar bout oise. Ou ufohar to Allai kushboeala, Allar dorbaro ḳobul oar zuka kurbani. Alla Pak itae kushi oin. ¹⁹Amar Allae tan nizor gourobor don hishabe, Hozrot Isa al-Mosir usillae tumrar hoḳol obab dur ḳorba. ²⁰Zuge zuge hor-hamesha amrar gaibi baf Alla Pakor tarif zari rouk. Amin.

Aḳeri munazat ar salam

²¹Hozrot Isa al-Mosir torikar Allar hoḳol bondare amar salam dio. Amar logor hoḳol baiainte tumrare salam zanaira. ²²Allar zoto pak bonda i zagat asoin, ḳas ḳori bashsha Ḳoisoror baṛir mumin oḳole salam zanaira.

²³Hozrot Isa al-Mosir rohomot tumrar dilo taḳouk. Amin.