al-Markus

Fobitro Injil Shorif dusra sifara

al-Markus

Forisiti

al-Markus sifarar mul talim oilo, Hozrot Isa al-Mosir ḳamor ḳemota. Alla Pake tanre ḳemota disoin, Iblis-shoetanor hoḳol laḳan ḳemota ar bol-shoktir ufre. Tan ḳemota asil bemari oḳolor bemar bala ḳora, zin-but ḳedani, prokriti mani haoa-batash ar foeda ḳora hoḳoltar ufre, ar haeat-moutor ufreo. Allae tanre ou ḳemotao disoin, zera touba ḳoria tan ufre iman ane, tain erar guna maf ḳorta faroin.

al-Markus sifarar 10 ruku 45 aeato Hozrot Isae ḳoira, “Mono rakio, ami Bin-Adom ḳezmot faoat aisi na, aisi to ḳezmot ḳorat. Ar bout manshor zan basanir lagi nizor zan bilai deoat aisi.”

Leḳok forisiti ar shomoe

Alla Pakor hukume ou sifara leḳsoin, Hozrot Isa al-Mosir sahabi Hozrot Fitoror (ra:) ḳadim Hozrot Markus (ro:). Itihash taki zana mote, Hozrot Markuse Allar hukum faia tan ustad Hozrot Fitoror muk taki boeani hunia ou sifara leḳsoin. Hozrot Isae behesto toshrif neoar onuman 20-30 bosor bade ikan kitab aḳare leḳa oise.

Ermaze ase,

(1) Hozrot Isae ḳelafoti faila 1:1-13 aeat

(2) Galil zilat Hozrot Isar muzeza ar toblig 1:14—7:23

(3) Galil zilar bare Hozrot Isar muzeza 7:24—10:52

(4) Zeruzalem ṭauno Hozrot Isa 11—13 ruku

(5) Hozrot Isar duk-koshṭo ar mout 14—15 ruku

(6) Mout bade zinda oila Hozrot Isa 16 ruku

Hozrot Isae ḳelafoti faila (1:1–13)

Hozrot Ehia (a:)-or toblig

¹Alla Pakor ḳas maear zon Ibnulla Hozrot Isa al-Mosir Injil, mani kush-ḳobri boeanir shuru.

²Bout din age, Hozrot Ishaea nobir kitabo Alla Pake bataisoin,

Huno, ami tumar age

amar fegamborre beziar,

ein tumar fot sohi ḳorba.

³Morubumir maze zure zure eḳzone elan ḳorra,

tumra malikor fot sohi ḳoro,

tan solar rasta oḳol shida ḳoro.

⁴Ou aeat mafik Hozrot Ehia nobie morubumit gia toblig korta ar toubar gusol ḳoraita. Tain elan ḳorta, gunar mafir lagi touba ḳoro, torikabondi lo. ⁵Teu asta Ehudia zila ar Zeruzalem ṭaunor hoḳol manush baroia Ehiar gese aia, zarzir gunar lagi touba ḳorla, ar Ehiae tarare Zordan gangor fanit toubar gusol ḳoraita.

⁶Ehia nobie uṭor rumor ḳafoṛ findita ar ḳomoro samṛar belṭ bandita. Tain faṛia mou ar foṛing ḳaita. ⁷Tain manshore ḳoita, “Amar bade aro eḳzone toshrif anra, ein ama toneo himmotala. Unda oia tan faor zutar fita kular laḳo ami nae. ⁸Ami tumrare fanidi toubar gusol ḳorailam, oile tain tumrare Pak Ruhu dia gusol ḳoraiba.”

Hozrot Isar pak gusol ar forikka

⁹Ou shomoe Hozrot Isa Galil zilar Nasarot gau tone Ehiar gese aia, Zordan gango torikabondi loila. ¹⁰Ar fanit buṛ dia uṭteu Isae loge loge deḳla asman dui bag oigese, Allar ruh faror surot doria tan ufre lamia aira. ¹¹Ou shomoe asman tone aoaz oilo, “O fut, tumiu amar ḳas maear zon, tumar ufre ami kub kushi.”

¹²Erbadeu Allai Pak Ruhur tagide tanre morubumit beza oilo. ¹³Ou morubumit shoetane sallish din dori Isare lalos deḳaia guna ḳoraito sailo. Hino zongli zanuaror loge tain roila ar Allar firista oḳole tan ḳezmot ḳorta.

Galil zilat Hozrot Isar muzeza ar toblig (1:14–7:23)

Hozrot Isar foela toblig kam

¹⁴Hozrot Ehia zelḳanat bondi oar bade Isa Galil zilat aia Allar batail ou kush-ḳobri toblig korla, ¹⁵“Shomoe fura oigese, Allar bashshai nozdik aichche. Afnara touba ḳoroukka ar ou kush-ḳobrir ufre iman anoukka.”

¹⁶Bade tain Galil aoror faredi aṭia zaira, ou shomoe deḳla, Saimon ar tan bai Andriase aoro zal baira. Era to maimol asla. ¹⁷Isae erare ḳoila, “Amar loge ao, ami tumrare manush dorar zalua banaimu.” ¹⁸Loge loge era zalor log saṛia Isar loge log dorla. ¹⁹On tone tuṛa age gia tain deḳla, Iakub ar Hannan duio baie nao-o boia zal zuit-zait ḳorra, erar bafor nam Zibudia. ²⁰Isae erare dekiau ḍaḳ dila, ḍaḳ hunia erao nizor baf Zibudiare ḳamlaintor loge nao-o toia Isar log dorla.

Zinor asorala beṭare shifa ḳora

²¹Bade era hoḳole milia Kofornaum ṭauno gela, ar Ihudir Zummabare tarar mosido hamaia Isae talim dila. Hozrot Musar reoaz mafik Ihudir Zummabar oilo Shukrobar shuruz ḍuba taki Shonibaror shuruz ḍuba forzonto. I din kunuzat ḳam ḳora haram. ²²Tan talim hunia manush taijjub bonigela, tain to tarar alim-ulamar laḳan boean ḳorra na, tain ḳemota-ala manshor laḳan talim dira.

²³Ou shomoe zinor asorala eḳ beṭao ou mosidor bitre asil. ²⁴He sillaia ḳoilo, “O Nasarotor Isa, amrar loge afnar kunu zae-zorur ase ni? Afne kita amrare binash ḳorat aisoin ni? Ami to afnare sini, afneu Allar hou pak zon.” ²⁵Ikan hunia Isae tare damki dila, “Chup, oḳonu ere saṛia za.” ²⁶Ou hi zine beṭare murani maria zure sik dia saṛia gelogi. ²⁷Ita dekia hoḳole taijjub oia eḳe-oinne ḳoilo, “Deḳrae ni! Asanok karbar! Ita kun zator noea talim? Tan ḳemota ḳaṭaia zinnatre hukum dein, ar tarao mane.” ²⁸Erdae Isar nam asta Galil zilar sairobae kub zoldi uṛi gelo.

Saimonor hoṛir baṛit Hozrot Isa

²⁹Mosid taki baroia tain tain Iakub ar Hannanor loge oia Saimon ar Andriasor baṛit gela. ³⁰Saimonor hoṛir kub taf oisil, tain bisnat foṛono asla. Isae toshrif anteu tanre bemarir ḳota zanail oilo. ³¹Bemar hunia tain ou beṭir ato dori tulla, ar loge loge tafe saṛi dilo, beṭi uṭia gia erar memandari ḳorat lagla.

³²Ou zummar din sheshe hainjabala, shuruz ḍubar bade manshe hoḳol bemarire ar zinor asorala manshore Isar gese loia ailo. ³³Asta ṭaunor manush aia ou baṛir uṭano dola oigelo. ³⁴Teu Isae nanan nomunar bout bemarir shifa ḳorla ar boutor log tone zinnat saṛaila. Oile zinnate tan forisoe zanai diba ḳori, tain itare kunu mat-matar shuzug dila na.

Galil zilat toblig

³⁵Bade fotabala uṭia tain nirai zagat gia dua ḳorat boila. ³⁶Teu Saimon ar tan logor hoḳole Isare tallash ḳorat baroila. ³⁷Baroia tanre faia ḳoila, “Huzur, hokkol manshe afnar tallash ḳorer.” ³⁸Isae ḳoila, “Ao, amra ou ḳanda-ḳasar gauainto gia toblig kori. Erlagiu to ami aisi.” ³⁹Bade tain hara Galil zilar mosidainto gia toblig korla ar zinnat saṛaila.

Fosa-kushṭo bemarire shifa ḳora

⁴⁰Eḳdin eḳ fosa-kushṭo bemarie Hozrot Isar ḳandat aia tan faot foṛia minot ḳoria ḳoilo, “Huzur, afnar morzi oile amare shifa ḳoria pak-saf ḳoroukka.” ⁴¹Beṭar bae tan kub doya hamailo. Tain nizor at baṛaia tare soia ḳoila, “Oe ami sairam, tumi pak-saf o.” ⁴²Ḳoar loge loge tar bemar bala oia he pak-saf oigelo. ⁴³Isae ou shomoe-u tare bidae dila ar doṛaia ḳoila, ⁴⁴“Huno, ita ḳobor ḳeurore hunaio na. Ḳali imam sabor gese gia deḳao ar pak-saf oar lagi Hozrot Musar kitabor hukum mafik, kurbani adae ḳoro. Teu shomazeo zanilibo, tumi bala oigeso.”

⁴⁵Oile he bare giau ita hokkol bae roṭai dilo. Erdae Isa ar kula-mela kunu gaut zaita farla na. Tain bara nirai zagat gia roa laglo, ono-o sairobae tone manush tan gese aila.

Ordong bemarire shifa ḳora

¹Ḳoedin bade Hozrot Isa hirbar Kofornaum ṭauno firia aile manshe hunilila tain goro asoin. ²Teu oto manush ino zoma oila, goro to duror ḳota, goror bareo ar zaga roilo na. Tain era hoḳolor gese Allar kalam toblig korat asla.

³Ou shomoe sairzon manshe eḳzon ordong bemarire boia loia Isar gese ailo, erar loge aro manush asla. ⁴Oile biṛor lagi tare Isar gese loia zaita farla na. Erdae tain ze zagat boat asla, ṭik tar uforor sal fuṛ ḳoria folo shudda ou bemarire lamat lamai dilo. ⁵Tarar imanor bol dekia tain ou ordong bemarire ḳoila, “Baba, tumar tamam guna maf ḳori dilailam.”

⁶Oile hikano ḳoezon moulana boat asla. Tain tain mone mone ḳoila, ⁷“I manshe ilaḳan mater ḳene? He to shiriki ḳorer. Eḳmatro Alla saṛa ar ḳe guna maf ḳorto fare?”

⁸Tanre loia moulana oḳole ze olaḳan sinta ḳorra, Isae tan gaibi bole ikan buzilila, buzia erare ḳoila, “Afnara ḳene mone mone ila sinta ḳorra? ⁹I ordong bemarire kunḳan ḳoa amar lagi shuza, tumar guna maf ḳora oilo, na, uṭo tumar folo loia aṭia zaogi? ¹⁰Te oḳon afnara forman deḳoukka, i duniat guna maf ḳorar ḳemota ami Bin-Adomor ase,” oḳan ḳoiau tain bemari beṭare ḳoila, ¹¹“Ami tumare ḳoiar, uṭo, tumar folo loia tumar baṛit zao.”

¹²Teu loge loge ou bemari beṭa uṭia tar folo loia hoḳolor samneu baroia gelo. Ikan dekia hoḳole taijjub oia ḳoila, “Subohan Alla, zindegie kunudin ilaḳan ḳam deḳsi na.”

Hozrot Isa gunagaror ḳanḍari

¹³Bade Hozrot Isa hirbar baroia Galil aoror daro gela, teu hokkol manush tan ḳandat ailo, tain tarare talim deoat lagla. ¹⁴Talim dia fotedi zaite zaite deḳla, Alfir fua Lebi ḳazna tular ofiso boi roisoin. Dekia tanre ḳoila, “Ao amar ummot o.” Teu Lebi uṭia Isar loge loge gela.

¹⁵Bade tain Lebir baṛit gia ḳaoat boila. Bout ḳazna tulra ar gunagar manusho Isa ar tan ummot oḳolor loge ḳanit asla. Ou shomoe bout manush tan ḳore ḳore gurat asil. ¹⁶Oile tain gunagar oḳolor loge boia ḳani ḳaira dekia Forishi mozobor moulana oḳole tan ummot oḳolre ḳoila, “Ein gushkur ḳazna tulra ar ḳobis oḳolor loge ḳaoa-daoa ḳoroin ḳene?”

¹⁷Ikan hunia Isae ou moulana oḳolre ḳoila, “Bala manshor ḳobiraz lage na, oile bemarir to lage. Ami forezgaror gese aisi na, gunagar oḳolreu daot ditam aisi.”

Furan talim taki Hozrot Isar noea talim bala

¹⁸Eḳbar Hozrot Ehiar ummot ar Forishi oḳol ruza asla, ita dekia kisu manshe Isar gese aia ḳoila, “Ehia nobir ummot ar Forishi oḳole ruza raḳoin, oile afnar ummot oḳole ruza raḳoin na ḳene?”

¹⁹Isae tarare ḳoila, “Nosha loge taḳte kita boirati oḳole ruza raḳto fare ni? Na, ḳeu ruza roe na, zotodin nosha loge taḳoin, oto din tara ruza raḳto fare na. ²⁰Oile ola oḳt aibo, zebla noshare tarar ges tone horail oizibo, ou shomoe tara ruza raḳba. ²¹Furan ḳafoṛor maze ḳeu noea ḳafoṛ zuṛa dey na. Zuṛa dile ou ḳafoṛ doia harle kus oia siṛia i fuṛ aro boṛo oizae. ²²Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oe. Taza rosh noea tolit toite oe.”

Zummabaror befare noea talim

²³Eḳ Zummabare Hozrot Isa ḳetor ailedi aṭia zaoat asla. Aṭi aṭi tan ummot oḳole danor soṛa siṛat lagla. ²⁴Ita dekia Forishi dole Isare ḳoila, “Amrar Musa nobir shoriot mafik to Zummabare kunuzat ḳam ḳora zaiz nae, te tara i danor soṛa siṛira kitar lagi?”

²⁵Isae zuaf dila, “Daud nobi ar tan logor hoḳole eḳbar feṭor buke zeta ḳorsla, ita kita tumitain kunu shomoe foṛso na ni? ²⁶Tain to fordan imam Abiatoror amolo Allar goro hamaia, ze fobitro ruṭi imam sab bade ar ḳeu ḳaoa zaiz nae, ou ruṭi ḳaisla ar tan logor manshoreo disla.” ²⁷Isae tarare aro ḳoila, “Zummabaror balair lagi to manshore banail oise na, oile manshor balair lagiu Zummabar banail oise. ²⁸Huno, Zummabaror tamam eḳtiar ami Bin-Adomor ato ase.”

At hukna bemarir shifa

¹Hozrot Isa hirbar mosido gia hamaila, hono ola eḳ beṭa asil, tar eḳ at bemare hukai gese. ²Tain Zummabare ou beṭare bala ḳoroin ki na deḳar lagi Forishi mozobor ḳoezon manshe tan bae kub kial raḳla, tara saila tan kunu kut bar ḳoria fando falaita. ³Isae ou hukna at-ala beṭare ḳoila, “Oba, hoḳolor samne aia ubao sain.” ⁴Beṭa aia harle tain hoḳol manshore zikaila, “Sab oḳol, Zummabare kita ḳora zorur, nek kam, na bod ḳam? Zanor hefazot ḳora, na zane mara?” Ikan hunia tara muk bond ḳori boiroila. ⁵Tarar monor i fashan halot dekia, Isar dilo kub duk hamailo. Tain tarar bae saia gusa ḳori hou bemari beṭare ḳoila, “Tumar atḳan baṛao.” He tar at baṛaiteu agor laḳan fura bala oigelo. ⁶Ikan dekiau Forishi oḳol loge loge baroigela, gia Raza Herudor manshor loge milia Isare ḳatol ḳorar foramish ḳorla.

^7-8Bade Isae tan shagrid oḳolre loia aoror faro gelagi, hono-o bout manush tan ḳore ḳore gela. Tan nanan muzeza ar keramotir ḳobor faia, Ehudia zila, Galil, Zeruzalem, Idum, Zordan gangor hofar, Shur ar Sidon elaḳa taki ou manush oḳol aisla. ⁹Manshor biṛ dekia tain shagrid oḳolre ḳoila, “Tumra amar lagi ekkan nao zuit ḳoro, arnae manshe ṭela-dakka ḳaia amar ufre aia foṛiziba.” ¹⁰Tain bout bemarire shifa ḳorae bemari manshe tane soita ḳori ṭelia dakkaia aia tan ufre foṛizita. ¹¹Ar zin-but oḳole tane deḳleu tan samne maṭit foṛia soizda ḳoria sillaia ḳoito, “Afneu Allar ḳas maear zon Ibnulla.” ¹²Oile Isae tarare kub ḳoṛaḳoṛi hukum dita, “Ḳobordar! Tumra amar forisoe zair ḳorio na.”

Barozon sahabi fosond ḳora

¹³Bade Hozrot Isa faṛor ufre gelagi, gia tan fosond ḳora kisu shagridre tan ḳandat ḍaḳaia nila. ^14-15Era aia harle erar maz tone barozonre tain alog korla, era zanu tan loge loge roin, ar zin-but saṛanir ḳemota dia erare toblig kamo bezita faroin. Ou barozon oila tan sahabi. ¹⁶Tain Saimonor noea nam raḳla Fitor. ¹⁷Zibudiar dui fua Iakub ar Hannan, tain erar noea nam dila Bunergosh, mani megor ḍaḳor fua. ¹⁸Andrias, Filif, Bortolmoe, Moti, Tumas, Alfir fua Iakub, Toddey, muktizudda Saimon, ¹⁹ar Ihuda Iskariat, ou Ihudae bade beimani ḳoria Isare dushmonor ato doraia disil.

Hozrot Isa ar zinor bashsha

²⁰Hozrot Isa eḳ baṛit gela. Ono aiao oto beshi manshe biṛ bandila, biṛor lagi Isae ar sahabi oḳoleo ḳana ḳaita farla na. ²¹Tan bai-biradore i ḳobor hunia tanre on taki bar ḳori neoat aila, era ḳoila, “Tar to mata ḳaraf oigese.” ²²Zeruzalem taki ḳoezon moulana aisla, tara ḳoila, “Zinor bashsha Bel-Sobule tare asor ḳorse. Ou Bel-Sobulor bole he zin-but saṛae.” ²³Ikan hunia Isae ou moulana oḳolre daro anaia kichcha dia ḳoila, “Shoetane kila shoetanre ḳedae? ²⁴Kunu deshor bitre doladoli lagi gele i desh to ar ṭike na. ²⁵Oula kunu foribaror mazeo zebla doladoli lagi zae, ou foribaro ar ṭike na. ²⁶Te shoetaneo zudi nizor maze doladoli lagai dey, he-o to ṭikto nae, binash oizibo. ²⁷Ashol hasa ḳota oilo, kunu ḍaḳait ḍaḳatit aia foela ou baṛir bolala mul girostre na bandile, he luṭ-toraz ḳorto farto nae. Oile tare bandia harle luṭ-toraz ḳorto farbo. ²⁸Hunoukka, ami hasa ḳota ḳoiram, manshor tamam nomunar guna ar kufurir mafi ase, ²⁹oile Pak Ruhur befare kufuri ḳorle, kunumonte-u i gunar mafi milto nae. I guna ruz hashor forzonto zari roibo.” ³⁰Isar ufre zine asor ḳorse, moulana oḳole ou ḳota ḳoae tain tarare oula zuaf dila.

Hozrot Isar afon manush ḳe?

³¹Ou shomoe Hozrot Isar ma ar baiain aia bare tone tan gese ḳobor faṭaila. ³²Oile sairo galabae manshor biṛ lagail asil, manshe tanre ḳoila, “Huzur, afnar amma ar baiain aia bare afnar tallash ḳorra.” ³³Tain ḳoila, “Amar ma ar baiain ḳe?” ³⁴Ḳoia tain sairo galar manshor bae saia ḳoila, “Huno, erau to amar ma ar baiain. ³⁵Zera Allar morzi zugaia soloin, tarau to amar ma, ar bai-boin.”

Allar bashshait fol dorar nanan nomuna

¹Hozrot Isa hirbar Galil aoror faro aia manshore talim dita lagla. Tan sairo galabae bout manshe biṛ bandilla, erdae tain eḳ naot uṭia boila, ar manshe faro tone tan boean hunla. ²Tain kichcha hunai hunai manshore talim deoat asla, ermaze tain ḳoila, ³“Doroukka, eḳ giroste zala bain ḳorat gelo. ⁴Gia bain ḳorar shomoe kisu zala fotor ḳandat foṛlo, ar fakinte aia ita ḳaililo. ⁵Kisu zala fattorala maṭit foṛlo, itar tole beshi maṭi asil na, erdae toledi bol na ḳoria-u zoldi ḳori fuṭigelo. ⁶Bade shuruz uṭia harle zoir ḳaililo, ar tolor zoṛe rosh na faoae hukaia morigelo. ⁷Kisu zala zonglar maze foṛlo, teu zongla boṛo oia itare zatia dorlo, erdae kunu soṛa saṛlo na. ⁸Oile kisu zala bala zomino foṛlo, itae ali baroia boṛo oia soṛa saṛlo, kunu soṛae tish, kunu soṛae shaiṭ, kunu soṛae eksho gun beshi dan dorlo.” ⁹Heshe Isae ḳoila, “Hunar lak kan zar ase, he hunouk.”

¹⁰Bade biṛ ḳomia harle tan logor manshe ar barozon sahabie tanre zikaila, “Huzur, i kichchar mul mani kita?” ¹¹Isae zuaf dila, “Allar bashshair gufon rohoisho zanar shuzug tumrare deoa oise, oile baira manshor gese kichchar mazdi ḳoa oise. ¹²Er ḳaron oilo, Allar kalamor ou aeat folite oibo,

Tara saia taḳleo kuntau deḳto nae,

hunleo kunta buzto nae.

Kizanu tara zudi Allar bae firizain,

ar mafi failain.”

¹³Bade Isae tarare ḳoila, “Tumra ou kichchar maniḳano buzlae na ni? Te baki kichchar mani kila buzbae? ¹⁴Huno, giroste ze zala bain ḳorer, i zala oilogi Allar kalam. ¹⁵Fotor ḳandat foṛa zala dia tarar befare buzail oise, zera i kalam hune, oile loge loge Iblis aia tarar dil taki i kalamre ḳaṛia neygi. ¹⁶Fattoror ufre foṛa zaladi buzail oise, zera i kalam hune ar kub kushi oia loge loge ḳobul ḳorilae, ¹⁷oile tarar dilo balamonte hamae na ḳoria, ita ḳali tuṛa ḳoedin ḳaim roe, bade i kalamor lagi kunu zulum-mosibot azir oile tara fislai zae. ¹⁸Zonglar maze foṛa zalar mani oilo, zera i kalam hune, ¹⁹oile zogotor sinta-babna, don-samanar maea ar duniabi lalose i kalamre zatia dorilae, erdae kalame kunu amol ḳore na. ²⁰Ar bala zomino foṛa zalar mani oilo, zera i kalam hune, ḳobul ḳore ar bala fol dore, ḳeu tish, ḳeu shaiṭ, ḳeu eksho gun fol dore.”

²¹Isae aro ḳoila, “Kunu manshe lem zalaia ṭukrir tole ba sokir tole toe ni? Lem zalaia gasar ufre toin na ni? ²²Te ila lukail kuntau nai, zeta baroito nae. Ar ila kunu batuni befaro nai, zeta zair oito nae. ²³Hunar lak kan zar ase, he hunouk.” ²⁴Bade tain ḳoila, “Tumra kial ḳoria huno, tumra zela mafia deo, tumrar lagi oula mafa oibo. Dorilao, tumrar lagi aro besh ḳori mafa oibo. ²⁵Zar ase tare aro deoa oibo, oile zar nai, tar zeta ase eota neoa oizibo.”

²⁶Tain aroḳbar ḳoila, “Huno, Allar bashshai oilo ou laḳan. Dorilao, eḳ giroste tar zomino zala bain ḳorlo. ²⁷Bade he rait oile gumailo ar dinor bala gura-guri ḳorlo. Oile zala fuṭia ḳemne gas oilo, he to kunta zane na. ²⁸Zomine nize nizeu ita folailo, foela sera, bade soṛa ar soṛar maze fusṭo dan dorlo. ²⁹Dan fakia harle he buzilae daoar shomoe oigese, teu ḳasi lagaia dae.”

Ḍenga bisir kichcha

³⁰Hozrot Isae ḳoila, “Allar bashshaire amra kitar loge tulona ḳortam? Kitadi buzaitam? ³¹Aichcha, mone ḳoro Allar bashshai oilo egu ḍenga bisir laḳan. I bisi bain ḳorar bala deḳa zae, hoḳol zator bisi tone iṭa huru-muru. ³²Oile bain ḳorar bade iṭa hokkol zator hag toneo boṛo boṛo fata ar gas oe. Ar muṭa muṭa ḍal baroe, i ḍalor saeat fakinte aia ashroe loin.”

³³Ou laḳan bout nomunar kichcha ḳoita, ar ze zela buzto fare, tar buz mafik tare Allar kalam hunaita. ³⁴Kichcha saṛa tarare kunu talim dita na. Oile ḳali sahabi oḳol zebla tan loge roita, ou shomoe tain hoḳol bed bangia buzaita.

Aoror tufan bond ḳora

³⁵Ou din hainjabala Hozrot Isae tan sahabi oḳolre ḳoila, “Ao, amra aoror hofaro zaitam.” ³⁶Teu sahabi oḳole manshor ges taki bidae loia, Isa ze nao-o boat asla ou nao-o uṭia roana dilaila, erloge aro naoaino asil. ³⁷Nao soler, ou shomoe aḳtau kub boṛo eḳ tufan ailo, tufanor dae afalor fani hamaia nao buṛizibar dosha. ³⁸Isa naor ḳor galat eḳ balisho hitan dia gumo asla. Sahabi oḳole tanre hozag koria ḳoila, “Huzur, afne kial ḳorra na ni, amra to morizaiar.” ³⁹Tain uṭia tufanre domoḳ dila ar aorore ḳoila, “Dom lo, tir o.” Ḳoar loge loge tufan bond oigelo, ar hokkolta tir oilo. ⁴⁰Bade tain sahabi oḳolre ḳoila, “Tumra oto ḍoraluk kene? Tumra oḳono iman ancho na ni?” ⁴¹Ita dekia sahabi oḳole kub ḍoraila, ar eḳe-oinne ḳoila, “Ein ashole ḳe? Fanie ar batasheo deki tan hukum mane.”

Butor falre ḳedai deoa

¹Hozrot Isae tan sahabi oḳolre loia Galil aor faṛi dia Zerasini oḳolor desho aila. ²Tain nao taki lamteu bute dora eḳ beṭa, ḳobrostan taki baroia tan samne ailo. ³He ḳoeboror maze roito, kunu manshe luar zinjurdi bandiao tare aṭḳaita farta na. ⁴Tar at-fao bout bar zinjurdi bandileo he ita siṛia, faor beṛio bangilito. Tare ḳeu shamlaita farta na. ⁵He faṛor ṭillae ṭillae, ḳoebore ḳoebore hara din-rait gurto ar sillaito, fattor dia tar nizor shorilo marto.

⁶Isare he duroi taki dekiau douṛaia aia tan faot foṛia soizda ḳorlo, ⁷ar sillaia ḳoilo, “O Isa, Allatalar ḳas maear zon Ibnulla, afne ḳene amar gese aisoin? Ami Allar ḳosom ḳaia ḳoiar, afne amare satain na zanu.” ⁸Isae age ou butre ḳoisla, “Tui ou beṭare saṛia baroia za,” erdae he Isare ou minoti ḳorlo. ⁹Tain ou butre zikaila, “Tor nam kita?” He ḳoilo, “Amar nam fouz, ḳaron amra bout zon asi.” ¹⁰Oḳan ḳoia he Isar gese bare bare minot ḳori ḳoilo, “Afne amrare i elaḳa taki ḳedain na zanu.”

¹¹Ou shomoe hono faṛor galat boṛo eḳ shuoror fale ḳaoat asil. ¹²Butor fale Isare minot ḳori ḳoilo, “Huzur, amrare ou shuoror falor maze faṭai deukka, amra gia otar bitre hamai.” ¹³Isae izazot dia harle tara gia ou shuoror falor maze hamaigelo. Teu shuoror fale faṛor ṭillar feṭedi kub zure douṛaia gia aoror maze buṛia morla. I falo onuman dui azar shuor asil. ¹⁴Ita dekia shuoror raḳal oḳole douṛaia gia gaut ar ḳanda-ḳasar hoḳolre ḳobor zanaila. Ḳobor hunia manshe ita deḳat aila. ¹⁵Tara Isar ḳandat aia deḳla, butor fouze ze beṭare dorsil, i beṭa bala oia ḳafoṛ-sufoṛ findia boiroise. Ita dekia tarar mono ḍor hamaigelo. ¹⁶Teu zera ou goṭona deḳsil, tara hou bute dora beṭar ḳota ar shuoror goṭona erare zanailo. ¹⁷Erdae manshe Hozrot Isare minot ḳori ḳoila, “Meherbani ḳori amrar elaḳa taki toshrif neukkagi.”

¹⁸Tain zebla naot uṭizira, ou shomoe bute dora beṭao tan loge oia zaito ḳori minot lagailo. ¹⁹Oile Isae tare oḳan ḳoia bidae ḳori dila, “Tumi tumar baṛit zao, gia baṛir manshore deḳao, Mabude tumare ḳoto meherbani ar boṛo taijjubi ḳam ḳorsoin.” ²⁰Tan ḳota hunia beṭa gelogi ar asta Dikafoli elaḳar manshore ḳoilo, Isae tar lagi ḳoto boṛo ḳam ḳorsoin. Ikan hunia tarao taijjub oigela.

Mora fuṛire zinda ḳora

²¹Hozrot Isa naot ḳoria hirbar aoror hofaro gia harle, sairobae tone manshe aia ou aoror farou biṛ lagai dila. ²²Ou shomoe mosid komiṭir Zaeir namor eḳ neta aia Isare dekia tan faot foṛia, ²³kub minot ḳori ḳoila, “Huzur, amar fuṛigu morar foti oigese. Afne toshrif ania amar fuṛigure atai dileu tai bala oizibo.”

²⁴Teu tain ou netar baṛit roana dilaila. Tan sairo galabae biṛ bandia ṭela-ṭeli ḳoria aro bout manush tan loge oia zaira. ²⁵Ou biṛor maze eḳzon beṭi manush asla, baro boros dori tan beṭiara bemaror lou zaito. ²⁶Bout ḍaktor ḳobiraz deḳaia ḳoshṭo ḳori niom-ḳanun mania, hoḳol ṭeḳa-foesha kuaiao kunu faeda oise na. Dine dine bemar aro baṛise. ²⁷Isar befare hunia beṭie ou biṛor maze ṭik tan ḳoredi aia, tan finnor saddor ḳanor ek kunat soilo. ²⁸Tai ekin ḳorsil zen, Isar finnor kunu ḳafoṛor maze soite farleu bemar shifa oizibo. ²⁹Hasau, Isar saddoror kunat soiteu, beṭir lou zaoa ekkere ḳomigelo. Beṭie nizor shorilor halot buzililo, bemar ḳomigese. ³⁰Isaeo ṭer faila, tan shoril mubarok taki bol baroise. Ou tain biṛor maze sairobae saia zikaila, “Amar ḳafoṛo ḳe soilo?”

³¹Tan shagrid oḳole ḳoila, “Huzur, afne to deḳra, manshe kila sairobae ṭela-ṭeli ḳorra, te ar ḳene zikaira, ḳe afnare soilo?” ³²Oile Isae sairobae soukdi tallashit roila, ḳe tane soilo. ³³Teu bemar shifa oa beṭie nizor halot buzia ḍoraia ḳafi ḳafi tan samne aia faot foṛlo, ar hoḳolta kulia ḳoilo. ³⁴Isae beṭire ḳoila, “Mai go, tumar imane tumi baslae. Oḳon shantie baṛit zao, ar i bemar taki hefazot ro.”

³⁵Tain ota mato roisoin, ou shomoe mosidor hou netar baṛi taki ḳobria aia netare ḳoilo, “Sab, afnar fuṛi to ar nai, dunia saṛia gesoingi. Te huzurre ar toklif dibar ḳam nai.” ³⁶Oile ikan hunia Isae hou netare ḳoila, “Ḍoraiba na, ḳali ekin ḳoroukka.” ³⁷Ḳoia tan sahabi Fitor, Iakub, ar Iakubor bai Hannan, ḳali ou tinzon bade ar ḳeurore tan loge nila na. ³⁸Erare loia tain hou netar baṛit aia deḳla, manshe ḳanda-ḳaṭi, bilaf ar mattom ḳorra. ³⁹Tain bitre gia manshore ḳoila, “Tumra i ḳanda-ḳaṭi ar mattom ḳorrae ḳene? I fuṛi to morse na, ḳali gumaise.” ⁴⁰Ikan hunia manshe tanre siṛaila. Teu tain murdar kuṭa taki hoḳolre bar ḳori dia, ḳali fuṛir ma-baf ar sahabi oḳolre loia kuṭat hamaila. ⁴¹Tain fuṛir ato doria ḳoila, “Ṭalita kum,” mani, “O fuṛi, tumare ḳoiar, uṭo.” ⁴²Hasau, murda fuṛi loge loge uṭia aṭa dorlo, fuṛir boeosh asil baro bosor. Ita dekia era asanok taijjub oigela. ⁴³Isae erare hukum dila, ita ḳeurore hunaio na. Ar ou fuṛire oḳon ḳaibar kunta deo.

Nizor gau Nasaroto Hozrot Isar oshomman

¹Hozrot Isa hon tone nizor gau Nasaroto toshrif anla. Tan sahabi oḳolo loge asla. ²Zummabare tain mosido gia talim dila. Bout manshe tan talim hunla, hunia taijjub oia ḳoila, “I beṭae ita talim kuai taki failo? He ḳemne ita ilim hasil ḳorse, ar zeta muzeza oḳol deḳar, itar bed kita? ³E to hou Moriomor fua ḳaṭ-mestoir nae ni? He Iakub, Iusi, Ehuda ar Saimonor bai nae ni? Tar bonin to amrar gautu roira.” Isar befar loia manshor dilor maze bitishna deḳa dilo.

⁴Teu Isae tarare ḳoila, “Zekunu nobiu nizor gau, nizor desh, nizor baṛi, ḳesh-kuṭumor bairaḳano ijjot fain.” ⁵Bade tain ḳoezon bemarire atai dia bemar shifa ḳorla. Oile hino ar kunu muzeza zair ḳorar ufae oilo na. ⁶Manshe tan ufre iman na anae tain kub taijjub oigela. Bade tain gaue gaue sairobae sofor ḳoria manshore talim dila.

Sahabi oḳolre tobligo faṭani

⁷Isae tan barozon sahabire nizor daro ania, zin-butor ufre ḳemota dia, duizon duizon ḳori toblig kamo faṭaila. ⁸Soforor shomoe ḳali ator laṭi saṛa ar kuntau erare loge nite dila na. Ḳani-kuraki, beg ba ḳomoror tolit bandia kunu foesha-ḳoṛi niteo na ḳorla. ⁹Tain ḳoila, “Faot zuta finditae farbae, oile finnor ek kafoṛ bade ar kunu ḳafoṛ-sufoṛ nio na.” ¹⁰Ar hukum dila, “Tumra gia foela ze baṛit hamaibae, i gau saṛia zaoar ag forzonto ou baṛitu roio. ¹¹Kunu zagar manshe zudi tumrare ḳobul na ḳore, ar tumrar boean na hune, te hon taki baronir bala tumrar faor duil zaṛia falaio, ou duil tarar naformanir shakki roibo.” ¹²Teu sahabi oḳole gia toblig korla, manshore tagid dila touba ḳorar lagi. ¹³Era bout but saṛaila, ar bout bemari manshor matat tel maḳaia bemarre shifa ḳorla.

Hozrot Ehia (a:)-re ḳatol ḳora

¹⁴Hozrot Isar shunam sairobae roṭi zaoae Raza Herudor ḳano-o gia azilo. Kunu kunu manshe ḳoila, tain oila Ehia nobi, ein hirbar zinda oia uṭia aisoin ḳoriu ou keramoti deḳaira. ¹⁵Ḳeu ḳoilo, ein oila Hozrot Ilias nobi. Ar ḳeu ḳeu ḳoilo, ein furana zomanar kunu nobir laḳan noea eḳ nobi. ¹⁶Ita hunia Herude ḳoilo, “Ein to hou Ehia, zen ḳolla ami ḳaṭaislam. Tain hirbar zinda oia uṭsoin.”

^17-18Er age Herude tar babi Herudiar mon zuganir lagi, Ehia nobire aṭok koraia zelo harai toisil. He tar bai Filifor boure hanga ḳorae nobie tare hamesha ḳoita, “Afon bair boure nia hanga ḳora tumar zaiz oise na.” ¹⁹Erdae Ehia nobir bae Herudiar kub gusa asil. Tai enre ḳatol ḳorar niot ḳorlo, oile farlo na. ²⁰Herude enre ḍoraito ar zanto, ein eḳzon pak-forezgar kamil manush, erdae hamesha enre tair at taki basaito. En nosiot hunte tar bitre doṛ-foṛ ḳorleo he ita kub fosond ḳorto.

²¹Heshe tai eḳ shuzug failo, Herudor zonom dinor onusṭano tar uzir-nazir, sifair ofisar oḳol, ar Galil zilar goinno-mainno hoḳol manshor lagi ḳani zuit ḳora oilo. ²²Ou onusṭano Herudiar fuṛie aia nas deḳaia hoḳol meman ar Herudre kushi ḳorlo. Kushi oia Herud razae fuṛire ḳoilo, “O ma, tumi amar gese kita sao? Zeta saibae, otau faibae.” ²³He ḳosom ḳaia ḳoilo, “Tumi amar gese zeta saibae, otau dimu. Amar raijjor ordeḳ saileo dilaimu.”

²⁴Ou fuṛie tair maʼr gese gia zikailo, “Mai go, ami kita saitam?” Ma Herudiae hikai dilo, “Tumi hou Ehiar ḳolla saio.” ²⁵Fuṛie zoldi ḳori aia razare ḳoilo, “Ami sairam, afne hou Ehiar ḳolla ḳaṭia eḳ talo ḳori amare deukka.” ²⁶Ikan hunia raza kub bezar oigelo, oile onusṭanor meman oḳolor samne ḳosom ḳorae ou fuṛire na ḳorar kunu ufae asil na. ^27-28Teu loge loge razae zolladre hukum dilo Ehiar mata ḳaṭia anar lagi. Zollade gia zel ḳanat bondi Hozrot Ehiar mata ḳaṭia eḳ talo ḳori loia ailo. Razae i tal ou fuṛir ato dile, tai nia tair maʼr gese dilo. ²⁹Ehia nobir shagrid oḳole i ḳobor hunia zel tone tan lash nia dafon ḳorla.

Fas azar manshor gaibi ḳani

³⁰Hozrot Isar barozon sahabie toblig tone firia aia tanre zanaila, tobligo gia kita kita ḳorsoin, kilaḳan talim disoin. ³¹Ou shomoe bout manush Isar gese aoa-zaoat taḳae sahabi oḳole kunu ḳana-finaro shuzug faila na. Erdae tain sahabi oḳolre ḳoila, “Tumra amar loge kunu nirai zagat aia tuṛa zirao.” ³²Ḳoia naot uṭia eḳ nirai zagat roana oila. ³³Erare zaoat dekia bout manshe sinilila, teu era fousar ageu ash-fashor gauain taki manush douṛaia gia hono fousigela. ³⁴Isa nao taki lamiau deḳla, bout manshe tan bar saira. Dekia erar bae tan boṛo dorod hamailo. Era asil a-raḳali meṛar laḳan. Ou Isae erare bout laḳan talim dila. ³⁵Hainja oia harle tan sahabi oḳole ḳoila, “Huzur, ikan kub nirai zaga, ar hainjao oigese, ³⁶te ota manshore bidae dilaukka, era ḳanda-ḳasar ota gauainto gia tarar ḳani-kuraki louk.” ³⁷Isae ḳoila, “Tumrau erar ḳanir intezam ḳoro.” Sahabi oḳole zuaf dila, “Amra kita dui-sho dinaror ḳani loia ania erare ḳaoaitam ni?” Dui-sho dinar to foinchash azar ṭeḳar homan. ³⁸Tain ḳoila, “Tumra saia deḳo, tumrar gese ki foriman ruṭi ase.” Tara dekia ḳoila, “Sab, fasḳan ruṭi ar duiṭa biran mas ase.” ³⁹Tain sahabi oḳolre hukum dila, “Tumra ou gashor ufre lain doraia manshore boai deo.” ⁴⁰Teu manshe eḳ-shozon ḳori ḳatar bandia foinchash ḳatar boila. ⁴¹Isae hou fasḳan ruṭi ar duiṭa biran mas ato loia Allar aroshor bae saia shukria adae ḳoria, manshore baṭia dibar lagi ou ruṭi ṭukra ṭukra ḳori sahabi oḳolor ato dila. Ou laḳan mas duiṭao baṭia dila. ⁴²Hoḳol manshe feṭ bori ḳaila. ⁴³Ḳaia harle baṛti ruṭi ar masor ṭukrain nia baroṭa ṭukri borla. ⁴⁴I dolor maze ḳali beṭa manushu fas azar zone boia ḳaila.

Fanir ufredi aṭa

⁴⁵Ḳanir badeu Hozrot Isae sahabi oḳolre tagda dila, tara naot ḳori aoror hofaro Baet-Soeda gaut zaoar lagi, tain onor manshoreo bidae dila. ⁴⁶Manush bidae oia harle tain dua ḳorar lagi faṛor ufre uṭila. ⁴⁷Raitor bala sahabi oḳolor nao aoror mazḳano asil, oile Isa eḳla huknat asla. ⁴⁸Tain deḳla, ufta batashor maze era kub ḳoshṭo ḳori daṛ baira. Fotabala Isae ou aoror fanir ufredi aṭia, sahabi oḳolor galabae tarare faroia agedi zaira. ^49-50Tanre aoror fanir ufredi aṭia zaoat dekia, but mono ḳoria ḍoraia era hoḳole sik-sillani lagaila. Ou tain ḳoila, “Ḍoraio na, himmot ḳoro, i to ami.”

⁵¹Tain aia sahabi oḳolor naot uṭteu ufta batash dom loililo. Ita dekia era asanok taijjub bonigela. ⁵²Oile agor hou ruṭi-masor gaibi ḳanir bed era buzla na. Erar dilor duar to bond asil.

⁵³Aor faṛi deoar bade era Gineshorot elaḳat aia nao biṛaila. ^54-55Nao taki lamteu tane dekia manshe sinilila, ar sairobae douṛa-douṛi lagaila. Douṛaia tara zarzir bemari oḳolre folodi boia ania, tain ze zagat asla ou zagat loia ailo. ⁵⁶Ṭauno ba gaut, ollie-gollie tain zenou toshrif nita, onou manshe bemari oḳolre ania bazaro dola ḳorta. Ar tanre minot-ḳajji ḳoria ḳoita, bemari oḳole zanu tan saddoror kunaḳano soita faroin. Ar zera soita, hasau erar bemar shifa oizito.

Moe-murobbir ges taki faoa rosumot

¹Bade Zeruzalem taki ḳoezon moulana ar Forishi mozobor kisu manush Hozrot Isar gese aila. ²Aia deḳla, Isar ḳoezon ummote at na doia emneu ḳanit boigesoin. ³Ashole agor zomanar moulana oḳolor batail rosumot mafik, hokkol Ihudi ar Forishi oḳoleo uzu na ḳoria kunu ḳani ḳain na. ⁴Bazar-aṭ taki kunu zinish anle pak-saf na ḳoria muko dein na, tal-bashon doia saf-sutra ḳora, ou laḳan bout riti-reoaz tara mane. ⁵Erdae ou moulana ar Forishi oḳole Isare zikaila, “Afnar ummot oḳole agor zomanar moulana oḳolor batail rosumot ḳene manoin na? Tara to nafaḳ ate ḳani ḳain.”

⁶Tain zuaf dila, “Afnara to bonḍo! Hozrot Ishaea nobie afnaintor befare ṭiku ḳoisoin,

Ita manshe muk dia ḳali amare ijjot ḳore,

oile tarar dil ama tone bout duroi.

⁷Tara hudar ḳamoḳa amar ebadot ḳore,

tarar talim oḳol to

manshor banail mongoṛa shoriot.

⁸Te afnara to Allar deoa hukum-ahkam bad dia, manshor banail rosumot amol ḳorra.”

⁹Isae tarare aro ḳoila, “Allar deoa hukum bad dia, nizor mongoṛa rosumot ḳaim ḳorar danda to afnara kub bala ḳoriu zanoin. ¹⁰Zela Hozrot Musae ḳoisoin, ma-babare ijjot ḳorio, ze manshe afon ma-bafor bodnam gae, tare ḳatol ḳora oibo. ¹¹Oile afnara manshore talim dira, kunu manshe zudi tar ma-bafore ḳoilae, amar zeta samana dia afnaintor ḳezmot ḳortam asil, ita Allar name lilla dilaisi, ¹²te tar ma-bafor lagi ar kuntau ḳora lage na. ¹³Ou laḳan afnarar baf-dadar mongoṛa niom dia Allar kalam batil ḳorilisoin. Ikan badeo afnara oula aro bout ḳam ḳorra.”

¹⁴Bade Isae manshore tan ḳandat nia ḳoila, “Afnara hoḳole amar ḳota kial ḳori hunoukka ar buzoukka. ^15-16Baire taki zeta zinish manshor bitre hamae, itae to tare nafaḳ banae na. Borong manshor bitre taki zeta baroe, otaeu tare nafaḳ banae.”

¹⁷Boean bade tain manshor ges taki horia gia goro hamaila, teu sahabi oḳole tanre er mani zikaila. ¹⁸Isae ḳoila, “Tumra kita oulau be-akkol ni? Tumra buzo na ni, bare taki zeta zinish manshor bitre hamae, itae manshore nafak korto fare na. ¹⁹Ita to tar dilor bitre hamae na, ḳali feṭor maze hamae, ar feṭ taki hirbar baroi zae.” Isae ou talim dia buzaila, kunuzat ḳaniu nafaḳ nae. ²⁰Tain ḳoila, “Manshor bitre taki zeta baroe, otaeu manshore nafak kore. ²¹Manshor dil takiu to hoḳol nomunar ku-sinta ae; zina, suri, kun, ²²lub-lalos, foror ḳeti ḳorar danda, sol-soturi, bodmaishi, bod-nozor, ingsha-ninda, boṛai-beṭagiri ar shoetani baroe. ²³Ou tamam naformani manshor dil taki baroia tarare nafaḳ banae.”

Galil zilar bare Hozrot Isar muzeza (7:24–10:52)

Bidormi beṭir imanor bol

²⁴Bade Isa ou elaḳa tone Shiria deshor Shur ṭaunor ḳandat toshrif nilagi. Ono aia tain eḳ goror bitre lukai roila, saila manshe zanu na zanoin tain aisoin ḳori. Oile tan ḳobor roṭi gelo. ²⁵Hono eḳ beṭi manshor fuṛire bute dorae, Isae toshrif anchoin hunia ou beṭie, zoldi ḳori aia tan faot foṛlo. ²⁶I beṭir baṛi Shiria deshor Foinikia elaḳat, oile matito Iunani bashae. Tai Isar gese minot-ḳajji ḳoria ḳoilo, “Huzur, butor ḳobza taki amar fuṛigure basaukka.” ²⁷Isae ḳoila, “Age nizor huruttainte feṭ bori ḳaukka, nizor sabalor ḳani kukror samne falani ṭik nae.” ²⁸Beṭie ḳoilo, “Ji-oe huzur, afnar ḳotau ṭik, oile nizor sabalor ḳanir zeta guṛa-gaṛa galabae foṛe, ita to kukre ḳae.” ²⁹Tain ḳoila, “Tumi to ḳaṭi matu matso. Te zao, gia deḳo, bute tumar fuṛire saṛia gesegi.” ³⁰Hasau beṭie baṛit gia deḳlo, tair fuṛi bala oia bisnat hutiroise.

Ḳalua tutla beṭare shifa ḳora

³¹Bade Isae Shur elaḳa tone Sidon ṭaun oia, Galil aoror hofaro Dikafoli elaḳat aila. ³²Ono aia harle manshe ek kalua tutla beṭare tan gese ania minot lagaila, tare atai dibar lagi. ³³Tain ere manshor biṛ tone bare nirai zagat nia, tar duio ḳano tan ator anguil haraila, tan mukor sef lagaia tar zifra atai dila. ³⁴Ar ufre asmanedi saia lamba ḳori shash falaia ḳoila, “Iffata,” mani, “Kulizauk.” ³⁵Loge logeu beṭar ḳan kuligelo. Tutlami saṛi gelo, he forishkar mata dorlo. ³⁶Heshe tain erare hukum dila, “Ḳobordar, tumra ita ḳeurore hunaio na.” Oile tain zoto beshi na ḳorla, tara oto besh ḳori ita roṭailo. ³⁷Tara asanok taijjub oia ḳoila, “Ein to hoḳol ḳamu kub nikut ḳori ḳoroin. Deḳrae ni, tain ḳaluare hunar shokti, ar bubare matibar takkot disoin.”

Sair azar manshor gaibi ḳani

¹Bade aroḳbar bout manush aia tan gese dola oila. Erar gese kunu ḳani-kuraki na taḳae, Isae tan sahabi oḳolre daro nia ḳoila, ²“Ita manshor lagi amar boṛo dorod lager, aiz tin din dori tara amar loge loge asoin, oile oḳon tarar ḳanir kunta nai. ³Ou halote erare bidae ḳori baṛit faṭai dile, ita fotou beush oiziba, era ḳeu ḳeu to bout duroi taki aise.” ⁴Sahabi oḳole ḳoila, “Huzur, i nirai-morubumir maze ḳe kuai taki oto ruṭi zugaia erare ḳaoaibo?” ⁵Tain ḳoila, “Tumrar gese ruṭi ḳoeḳan ase?” Era ḳoila, “Sab, shatḳan ase.” ⁶Tain manshore ḳoila, “Afnara ḳanir lagi maṭit boizain.” Ḳoia ruṭi shatoḳan nia Alla Pakor shukria adae ḳori oḳnain siṛila, ar sahabi oḳolre dia baṭia deoaila. ⁷Sahabi oḳolor gese huru huru ḳoeṭa biran maso asil, tain ou masor lagi shukria adae ḳorla, ar erare ḳoila manshore baṭia dita. ⁸Hoḳol manshe feṭ bori ḳaila. Ḳanir bade zeta roisil, sahabi oḳole ota dola ḳoria harle shat ṭukri borigelo. ⁹I dolor maze ḳali beṭa manushu onuman sair azar zone ḳaila. Bade tain erare bidae dia, ¹⁰sahabi oḳolre loia naot ḳori Dalmanuta zilat gelagi.

¹¹Ono aia harle Forishi oḳole tan loge torka-torki lagaila, ar tanre zasai ḳorar lagi tara asmani kunu muzeza deḳta saila. ¹²Ikan hunia Isae lamba ḳori shash falaia ḳoila, “I zomanar manshe ḳali muzeza tukain ḳene? Ami hok kota ḳoiar, erare kunuzat muzeza deḳail oito nae.” ¹³Ḳoia tain erar ges taki horigela, ar naot uṭia hirbar aoror hofaro gelagi. ¹⁴Sahabi oḳole loge ḳori ruṭi nite faurilila. Naor maze erar loge ḳali ekkan ruṭi asil. ¹⁵Ou shomoe Isae ḳoila, “Tumitain hushiar o, Raza Herud ar Forishi mozobor ḳamir taki hushiar roio.” ¹⁶Ikan hunia sahabi oḳole ḳana-ḳani ḳori ḳoila, “Amra loge ḳori ruṭi na anae tain mono loe oḳan ḳoira.”

¹⁷Oile sahabi oḳole kita matira, Isae ikan buzia tain erare ḳoila, “Tumitain ḳene ḳoirae, ruṭi ancho na ḳori ami ikan ḳoisi? Tumra kita oḳono kunta zano na ni, kuntau buzo na ni? Tumrar dil fashan oigese ni? ¹⁸Tumrar souk taḳteo deḳrae na ni? Ḳan taḳteo hunrae na ni? Tumrar mono foṛer na ni, ¹⁹zebla ami fas azar manshor lagi ḳali fasḳan ruṭi siṛislam, ou manshe ḳaia harle tumra ḳoto ṭukri guṛa-gaṛa dola ḳorslae?” Era ḳoila, “Huzur, baro ṭukri.” ²⁰Tain hirbar ḳoila, “Aichcha, ami zebla sair azar manshor lagi shatḳan ruṭi siṛislam, manshe ḳaia harle tumra ḳoe ṭukri dola ḳorslae?” Era ḳoila, “Shat ṭukri.” ²¹Ou tain ḳoila, “Erbadeo tumra buzlae na ni?”

Andar souk bala ḳora

²²Bade Isae tan sahabi oḳolre loia Baet-Soeda gaut aila, aia harle manshe eḳ anda beṭare tan gese ania ḳoilo beṭagure atai dibar lagi. ²³Isae ou beṭar ato dori gaur bare loia gela. Gia tan mukor sef beṭar sokut lagaia tar gotro at dia ḳoila, “Oba, tumi kunta deḳrae ni?” ²⁴Beṭae souk kulia saia ḳoilo, “Ji-oe huzur, ami to manush deḳram, oile itare gasor laḳan lager, era aṭa-uṭi ḳorer.” ²⁵Teu Isae aroḳbar tar sokur ufre atai dile, he bala ḳori sailo ar hokkolta forishkar deḳlo. ²⁶Isae tare tar baṛit faṭai dia ḳoila, “Huno, Baet-Soeda gaut ar zaio na.”

Hozrot Isau Allar oada ḳora al-Mosi

²⁷Bade tain ar sahabi oḳol Ḳoisoria-Filifi ṭaunor ḳanda-ḳasar gauainto gela. Foto tan sahabi oḳolre zikaila, “Ḳo sain, manshe amar befare kita mono ḳoroin, ami ḳe?” ²⁸Era zuaf dila, “Ḳeu ḳoe, afne Hozrot Ehia. Ḳeu ḳoe Ilias nobi. Ḳeu ḳeu ḳoin, afne oinno kunu nobi.” ²⁹Ou tain ḳoila, “Oile tumra kita mono ḳoro, ami ḳe?” Sahabi Fitore zuaf dila, “Afneu Allar oada ḳora hou al-Mosi.” ³⁰Tain erare hushiar ḳori ḳoila, “Tumra amar befare ḳeurore hunaio na.”

Foela bar nizor moutor agam ḳobor

³¹Bade tan sahabi oḳolre ou boean hunaila, “Ami Bin-Adome bout duk-mosibot fuani lagbo. Murobbi oḳole, boṛo imam oḳole, ar moulana oḳoleo amare manta nae. Amare ḳatol ḳora oibo, oile moutor tin din bade hirbar zinda oia uṭa lagbo.” ³²Tain kub kula-mela ḳori ita ḳoila. Erdae Fitore tanre alga horaia nia ḳoila, “Huzur, shabdan, ila mat matoin na zanu.” ³³Isae sahabi oḳolor bae muk firaia Fitorre damki dia ḳoila, “Dur Iblis, amar ges taki bag! Tui Allai munshare bad dia, manshor laḳan sinta ḳorre.”

³⁴Bade tan sahabi ar am manshoreo tan daro nia ḳoila, “Huno, amar torikae ḳeu zindegi ḳaṭaite saile, he tar nizor kushie sola bad deuk. Tar afon duk-koshṭor solib boia loia amar ḳore auk. ³⁵Ze zone tar nizor shadine solto sae, he tar hasaror zindegi kuailibo. Oile ze zone amar lagi ar Allar deoa kush-ḳobrir lagi tar zan bilae, he tar hasaror zindegi basaibo. ³⁶Ḳeu zudi asta duniar malik boniao tar hasaror zindegi, mani aḳer kuailae, te tar kunu faeda oilo ni? ³⁷Heshe hasaror zindegi faoar lagi he kun don bilaibo? ³⁸Hunoukka, i zomanar beiman ar gunagar oḳolor maze, ḳeu zudi amar lagi ba amar talimor lagia muk lukae, te ami Bin-Adom zebla fobitro firista oḳolre loge loia, amar gaibi bafor shan-tozollie zogoto hirbar aimu, ou shomoe amio erare deḳle muk lukaimu.”

Hozrot Isa Ruhullar nurani surot

¹Hozrot Isae tan sahabi oḳolre ḳoila, “Ami tumrare hasau ḳoiram, ino ilaḳan ḳoezon azir asoin, zera Allar bashshair shan-tozollire nizor souke na deḳar age mout oito nae.” ²Ikan ḳoar soedin bade tain ḳali Hozrot Fitor, Iakub ar Hannanre loia usa eḳ faṛor ufre uṭila. Ou tino zonor soukor samne tan nizor surot bodli gelo. ³Tan finnor lebas oto beshi dola soḳsoḳa oilo zen, duniar kunu dufaeu ila soḳsoḳa ḳori doar takkot nai. ⁴Sahabi oḳole Hozrot Musa ar Ilias nobire deḳla, era aia Hozrot Isar loge batchit ḳorra. ⁵Teu Fitore ḳoila, “Huzur, amra to ono asi, kub bala oise. Amra tinḳan ḍera-gor tiar ḳorilai, ekkan afnar lagi, ekkan Hozrot Musa ar ekkan Ilias nobir lagi.” ⁶Era kub beshi ḍorai gesla, erdae kita matita kunu tal faila na. ⁷Ou shomoe gaibi eḳ megor ṭukrae aia erare gurililo, ar ou ṭukra taki gaibi aoaz oilo, “Einu amar ḳas maear zon, tumra en nosiot huno.” ⁸Ṭik ou shomoe tara sairobae saia ḳali Isa saṛa ar ḳeurore ino deḳla na. ⁹Bade faṛ taki lamia aibar bala Isae erare hukum dila, “Aiz zeta deḳlae, ami Bin-Adom mora taki zinda oia uṭar ag forzonto ita ar ḳeurore hunaio na.”

¹⁰Era tan hukum manla, oile mora taki zinda oar bed kita oḳan na buzae, tara eḳe-oinne zikaila. ¹¹Bade Isar gese aroz ḳorla, “Huzur, moulana oḳole ḳene ḳoin, Hozrot Ilias nobie foela toshrif ana zorur?” ¹²Tain ḳoila, “Ikan hasa ḳota, foela Hozrot Iliase aia hokkolta agor haloto firai anba. Oile Bin-Adomor befare Allar kalamo ḳene leḳa oise, tain kub duk-mosibot fuani lagbo, manshe tanre ḳobul ḳorta nae? ¹³Ami tumrare ḳoiar, Ilias nobir befare pak kitabo zela leḳa ase, olaḳan-u tain aisla. Mansheo tan loge zeta mono loe ota ḳorse.”

Zinor asor-ala fuare bala ḳora

¹⁴Isae ou tino zonre loia faṛ tone lamia baki sahabi oḳolor gese aia deḳla, bout manush aia sairobae dola oisoin, ar ḳoezon moulanae erar loge torka-torki ḳorra. ¹⁵Isare dekiau manush taijjub oia, douṛaia aia tanre salam ḳorla. ¹⁶Tain ou moulana oḳolre zikaila, “Afnara kita loia erar loge torko ḳorra?”

¹⁷Biṛor maz taki eḳzone ḳoilo, “Sab, amar fuagure loia afnar gese aislam, ogure buba zine asor ḳorse. ¹⁸Ou zine tare zeblau dore, tare asaṛ maria maṭit falae. Tar muk taki fena baroe, dato ḳoboṭ lagia ḍaṭṭa oizae. Ami tare loia afnar sahabi oḳolor gese aislam, oile era farsoin na.” ¹⁹Teu Isae ḳoila, “Haere beiman oḳol! Ami ar ḳoedin tumrar loge roimu, tumrar zala ḳoedin shoijjo ḳormu? Aichcha, fuare ono ano.” ²⁰Manshe fuare tan gese anla. Tane dekiau zine tare kub zatia dorlo. Fuae maṭit foṛia mukor fena bar ḳori goṛa-goṛi lagailo. ²¹Isae tar bafore zikaila, “Tar i dosha ḳotodin taki?” Beṭae ḳoilo, “Huruman takiu. ²²Ar i zine tare marilito ḳori bout bar tare agunit ar fanit falaise. Oḳon afne zudi faroin, te amrare doya ḳoroukka.” ²³Isae ḳoila, “Zudi faroin, i ḳotar mani kita? Ze ekin ḳore tar lagi hokkoltau oe.” ²⁴Ou beṭae zure zure ḳoilo, “Huzur, ami ekin ḳorsi. Amar imanor ḳomzuri horai deukka.” ²⁵Aro bout manush douṛaia tan gese aira dekia, tain zinre damki mari ḳoila, “Oi ḳalua ar buba zin, ami hukum diar, er ges taki baroi za. Tare ar kunudin doris na.” ²⁶Ikan hunia zine tare kub zure sik dia zata mari saṛia gelogi. Teu i fua murdar laḳan maṭit foṛi roise dekia manshe ḳoila, “E to mara gese.” ²⁷Oile Isae tare ato dori tulteu he ubai gelo.

²⁸Bade tain goro hamaia harle sahabi oḳole tanre niralae zikaila, “Huzur, amra farlam na ḳene?” ²⁹Tain zuaf dila, “Dua na ḳorle ar kunumonte-u i laḳan zin saṛail zae na.”

Dusrabar nizor moutor agam ḳobor

³⁰Bade hoḳole mili i zaga saṛia Galil zilar mazedi roana oila. Saila, manshe zanu ita na zanoin. ³¹Ou shomoe to tan sahabi oḳolre talim deoat asla, tain ḳoila, “Ami Bin-Adomre manshor ato dorai deoa oibo, ḳatol ḳora oibo, ar moutor tin din bade hirbar zinda oia uṭmu.” ³²Sahabi oḳole tan i talimor kunu bed buzla na, ar tan gese zikaniro shaosh faila na.

Dami manush ḳe?

³³Bade Isae tan sahabi oḳolre loia Kofornaum ṭauno aila. Aia goro hamaia erare zikaila, “Foto tumra kita loia torko ḳorlae?” ³⁴Era muk bond ḳori boiroila. Ashole foto tara torko ḳorsla, tarar maze ḳe hoḳol taki dami manush. ³⁵Isa boigela, boia era barozonre tan daro nia ḳoila, “Ḳeu zudi dami manush oito sae, te he hoḳolor ḳore roite oibo. Ar hoḳolor ḳezmot ḳora lagbo.” ³⁶Bade eḳ huruttare ania erar samne uba ḳoraila. Tare kulo loia ḳoila, ³⁷“Ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore. Ar amare ze ḳobul ḳore, he ḳali amare nae, amare zein bezisoin tanreo ḳobul ḳorlo.”

³⁸Tan sahabi Hannane ḳoila, “Huzur, amra eḳ beṭare deḳsi, he afnar nam loia zinnat saṛae. Dekia amra tare nished ḳorsi, he to amrar torikar manush nae.” ³⁹Tain ḳoila, “Ere nished ḳorio na. Amar nam loia ḳeu keramoti deḳanir bade, he oto zoldi amar gibot gaito farto nae. ⁴⁰Zera amrar bifokke nae, tara to amrar fokke. ⁴¹Huno, ami hasa ḳota ḳoiar, al-Mosir torikar manush oar ḳatire, ḳeu zudi tumrare eḳ gelas fani ḳaoae, te he er furushkar faibou faibo.

Rifu taki hushiar roa

⁴²“Ar amar torikar ou huru-muru eḳzonre zudi ḳeu tar imanor fote bada dey, te er saite tar lagi aro bala oibo, tar golat fattor bandia doriat falai deoa. ⁴³Tumar at zudi tumar rifu oizae, te at ḳaṭia falai deo. ⁴⁴Duio at loia zahannami oa taki, eḳ at loia zannato zaoa tumar lagi bala. Zahannomor aguin to kunudin nibe na. ⁴⁵Tumar fao zudi tumar rifu oizae, te fao ḳaṭia falai deo. Duio fao loia Zahannomo zola taki, lengṛa oia zannato zaoa tumar lagi bala. ^46-47Tumar souk zudi tumar rifu oizae, te souk tulia falai deo. Duio souk loia zahannomo zola taki, ḳana oia Allar bashshait dakil oa tumar lagi bala. ⁴⁸I zahannomor bichchu oḳol more na, ar hinor aguino kunudin nibe na.

⁴⁹“Huno, forteḳ manushu agunit nunta oibo. ⁵⁰Nun to bala zinish, oile nune zudi tar nunta gun kuailae, te tare ar nunta banail zaibo ni? Tumra zarzir dilor maze i nun ḳaim raḳo, ar eḳe-oinne shantie boshot ḳoro.”

Talaḳor musla

¹Kofornaum taki Hozrot Isa Ehudia zilat aila, ar Zordan gangor hofaro gela. Ono aile hirbar bout manush aia tan gese dola oila. Taino tan reoaz mafik erare talim dila. ²Ou shomoe tanre forikka ḳorar niote Forishi mozobor ḳoezone aia zikailo, “Sab, ḳoukka sain, boure talaḳ deoa zaiz ase ni?” ³Tain zuaf dila, “Hozrot Musae afnaintore kita bataisoin?” ⁴Tara ḳoila, “Tain ḳoisoin, talaḳ-nama lekia hari bou talaḳ deoa zaiz ase.” ⁵Isae ḳoila, “Tumrar dil fashan gotikeu Musa nobie i musla leḳsoin. ⁶Oile eoḳan to leḳa ase, Allae foela Adom ar Haoare mord ar aorot banai foeda ḳorsoin. ⁷Erdae mansheo tarar ma-bafore toia bour loge ashik oiba. ⁸Zamai ar bou ek kaea oiba. Tara dui roita nae, eḳ oiba. ⁹Te Allae zeta zuṛa lagaisoin, manshe itare alog na ḳorouk.”

¹⁰Bade sahabi oḳole goro hamaia, hirbar tanre ou musla zikaila. ¹¹Teu Isae ḳoila, “Ze manshe tar boure talaḳ dia aroḳ beṭire nika ḳore, he to ou bour loge zina ḳore. ¹²Oula boueo zudi nizor zamaire talaḳ dia aroḳ beṭar gese nika boe, te taio zina ḳore.”

Huru huruttaintor befare talim

¹³Bade manshe huru huru huruttaintore loia Isar gese aila tarare atai dibar lagi. Oile sahabi oḳole erare boḳa-zoḳa ḳorla. ¹⁴Ita dekia Isa naraz oia tarare ḳoila, “Huruttaintore amar gese aite mana ḳorio na, Allar bashshai to erar laḳan manshor lagiu. ¹⁵Ami hok kota ḳoiram, huru huruttainte zela boṛor shashon manoin, Allar shashonre ou laḳan na manle, manush kunumonte-u Allar bashshait hamaito farto nae.” ¹⁶Bade tain tarare kulo loia tarar matat at rakia dua ḳorla.

Gorib ar donir behest

¹⁷Hozrot Isa zebla baroia roana oila, ou shomoe eḳ beṭa douṛaia aia aṭu gaṛia tan samne boia ḳoilo, “Ustad, afne to meherban. Te amare batai deukka, aḳer faoar lagi ami kita ḳortam?” ¹⁸Tain ḳoila, “Amare ḳene meherban ḳoirae? Eḳ Alla saṛa ar ḳeu meherban nae. ¹⁹Tumi to Tourat kitabor hukum zano. Kun ḳorio na, zina ḳorio na, suri ḳorio na, misa shakki dio na, ṭoga-ṭogi ḳorio na, ma-bafore ijjot ḳorio.” ²⁰Beṭae ḳoilo, “Sab, ami to huruman toneu ita amol ḳoriar.” ²¹Teu Isae maear nozore tar bae saia ḳoila, “Ḳali ekkan zinish tumar baki roise. Tumi zao, gia tumar hoḳol don-samana besia gorib oḳolre bilai deo. Teu tumi behesto tumar samana ḳamaibae. Bade aia amar ummot oio.” ²²Ikan hunia beṭar muk kala oigelo. Tar bout don-samana asil ḳori mono duk loia gelogi.

²³Teu Isae sairobae saia tan sahabi oḳolre ḳoila, “Doni manush Allar bashshait hamani boṛo moshkil.” ²⁴Ikan hunia era taijjub oigela. Isae hirbar ḳoila, “Baba oḳol, deḳrae ni, duniabi don-samanar ufre zera borosha ḳore, Allar bashshait hamani tarar lagi bout moshkil. ²⁵Doni manush Allar bashshait hamanir saite, suir furedi uṭ hamani aro shuza.” ²⁶Ikan hunia sahabi oḳol aro taijjub oia eḳe-oinne ḳoila, “Te kun manshe nazat hasil ḳorbo, ḳe rehai faibo?” ²⁷Isae erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.” ²⁸Sahabi Fitore ḳoila, “Huzur, amra to hoḳolta falai toia afnar ḳore aisi.” ²⁹Tain ḳoila, “Ami tumrare hok kota ḳoiram, ze manshe amar lagi ar Allar batail kush-ḳobrir lagi nizor baṛi-gor, ma-baf, bai-boin, fua-fuṛi, zomi-mirash saṛi dise, ³⁰he ou duniat itar eksho gun beshi baṛi-gor, ma-baf, bai-boin, fua-fuṛi, zomi-mirash faibo. Itar loge he zulum-toklifo faibo. Bador zindegit he aḳero faibo. ³¹Oile zera foela ḳataro asoin, erar maze bout zon ḳore foṛiziba, ar zera ḳoror ḳataro asoin, tarar bout zon foela ḳataro aiba.”

Tisrabar nizor moutor agam ḳobor

³²Hozrot Isae tan sahabi oḳolre loia Zeruzalemo zaira. Tain age oia aṭira, ar sahabi oḳol ḍorai ḍorai ḳore ḳore zaira. Aro zera tan ḳore oia zaira tarar zano-o ḍor asil. Isae tan barozon sahabire alga horaia nia hirbar ḳoila, tan kun dosha goṭibo. ³³Tain ḳoila, “Huno, amra oḳon Zeruzalem zairam. Hono ami Bin-Adomre doria boṛo imam ar moulana oḳolor ato shofi deoa oibo. Tara bisar ḳoria ḳatol ḳorar rae diba. Amare bidormi zatir ato shomzai diba. ³⁴Ou bidormi oḳole ṭaṭṭa-moshkora ḳoria, shorilo sef siṭaia, bezuita sabuk marba, ar ḳatol ḳorba. Moutor tin din bade hirbar zinda oia uṭmu.”

Montri oar lagi onurud

³⁵Bade Zibudiar dui fut Iakub ar Hannan namor duio sahabi Hozrot Isar gese aia ḳoila, “Huzur, amra ekkan arzi loia aisi, mono ḳorram, afne amrar arzikan raḳba.” ³⁶Tain ḳoila, “Ami tumrar lagi kita ḳortam, tumra kita sairae?” ³⁷Era ḳoila, “Afne zebla furafur dafoṭor loge raz-godit boiba, ou shomoe amra eḳzonre afnar ḍainor godi, oinnozonre bauor godiḳan diba.” ³⁸Isae ḳoila, “Tumra to buzrae na tumra kita sairae. Ami ze toklifor fialadi ḳaimu, ita kunu tumra ḳaitae farbae ni? Ami ze toklifor gusol ḳormu, tumra ita farbae ni?” ³⁹Tara ḳoila, “Ji-oe farmu.” Tain ḳoila, “Aichcha, ami ze fialadi ḳaimu, tumrao ogudi ḳaibae. Ami ze gusol ḳormu, tumrao oula ḳorbae. ⁴⁰Oile amar ḍain ba bau galat boanir eḳtiar amar ato nae. I godi oḳol zerar lagi zuit ḳora oise, ḳali tarau faiba.” ⁴¹Baki doshzon sahabie Iakub ar Hannanor i arzi hunia kub biroḳto oila. ⁴²Teu Isae era hoḳolre ekkano dola ḳoria ḳoila, “Tumra to zano, bidormi zatir raza oḳol tarar prozar munib oe. Tarar zomidar oḳole nizor gulamor ufre beṭagiri ḳore. ⁴³Oile tumrar maze ila oa ṭik nae. Tumrar ḳeu dami bonte saile, he tumrar ḳezmot ḳorouk. ⁴⁴Ar ḳeu boṛo oite saile, he hoḳolor gulami ḳorouk. ⁴⁵Mono rakio, ami Bin-Adomeo ḳezmot faoat aisi na, aisi to ḳezmot ḳorat. Ar bout manshor zan basanir lagi nizor zan bilai deoat aisi.”

Anda beṭare shifa ḳora.

⁴⁶Hozrot Isae tan sahabi oḳol loia Ziriho ṭauno aila. Bade erare ar aro bout manshore loia ṭaun taki baronir bala, Timoeor fua Bortimoe namor eḳ anda beṭae fotor daro boia bik korat asil. ⁴⁷Einu Nasarot gaur Isa, ikan hunia beṭae zure sillai sillai ḳoilo, “O Isa, Hozrot Daudor aolad, amare rohom ḳoroin.” ⁴⁸Sillani hunia boute ḳoila, “Chup, sillais na.” Oile he aro zure sillaia ḳoilo, “Daudor aolad, amare rohom ḳoroin.” ⁴⁹Tar sillani hunia Isae dom loia ḳoila, “Ere ono ano.” Manshe ou anda beṭare ḳoila, “Ḍoraio na, ao. Huzure tumare ḍakira.” ⁵⁰Teu beṭae tar shorilor saddor kulia, faldi uṭia tan ḳandat gelo. ⁵¹Isae tare zikaila, “Tumi kita sao ba? Ami tumare kita ḳortam?” Beṭae ḳoilo, “Huzur, ami souke deḳtam sai.” ⁵²Tain ḳoila, “Aichcha zao, tumar imanor boleu tumi bala oilae.” Ḳoiteu tar deḳar shokti ailo ar Isar ḳore ḳore roana oilo.

Zeruzalem ṭauno Hozrot Isa (11:1–13:37)

Bashshar beshe Zeruzalemo hamani

¹Hozrot Isae tan sahabire loia Zeruzalemor ḳasat, Zoetun faṛor loge Baet-Ania ar Baet-Faijja gaut aia azila. Ono aia tan duizon sahabire ḳoila, ²“Tumra duio zon samnor ou gaut zao. Gia gaut hamaiteu deḳbae egu gadar baichcha banda ase. Er ufre ḳeu kunudin soar oise na. Ogur golar doṛi kulia ono loia aio. ³Ḳeu zikaile ḳoio, huzuror dorḳar ase, erdae niram. Tain zoldi ḳori firot dilaiba.” ⁴Tan hukum mafik era gela. Gia deḳla, hasau fotor ḳandat eḳ baṛir uṭano gadar baichcha banda ase. Dekia era tar band kulita saila, ⁵ou shomoe hono uba ḳoezon manshe zikaila, “Oba, tumra i baichchar doṛi kulrae ḳene?” ⁶Teu Isae zela hikai disla, era oulau zuaf dila. Ikan hunia manshe ar kunta ḳoila na. ⁷Gadar baichcha loia Isar gese aia harle, manshe nizor gotror saddor kulia gadar fiṭit bisaila. Bade tain er ufre soṛila. ⁸Aro bout manshe tarar gotror saddor kulia fotor maze bisai dila, ar boute gasor fatain siṛia ania foto bisaila. ⁹Isar loge oia age-ḳore zera zaoat asil, era zure zure elan dila,

“Marhaba! Mabudor name zein toshrif anra,

Tan tarif ouk.

¹⁰Amrar mul-murobbi Daudor bashshai ḳaim or,

al-hamdulilla! Behesto-o marhaba!”

¹¹Zeruzalem aia tain fobitro Baetul-Mukaddoso hamaila ar sairobae saia hoḳolta deḳla. Bade hainja oizaoae tan barozon sahabire loia Baet-Aniat gelagi.

¹²Bador din Baet-Ania taki bidae oar shomoe tan feṭo buk laglo. ¹³Ou tain duroi taki fatae bora egu ḍumur gas dekia, ogur fol ḳaibar niote gasor daro gela. Ou shomoe ḍumur gaso fol dorar din nae. Tain gia deḳla, gasor maze ḳali fata, kunu fol nai. ¹⁴Tain ou gasre ḳoila, “Ar kunudin ḳeu zanu tumar fol na ḳae.” Tan i buli sahabi oḳole hunilila.

Zeruzalemor kaba shorifre pak-saf ḳora

¹⁵Bade Zeruzalem aia tain fobitro Baetul-Mukaddoso hamaila. Ar kaba goror shimanat zoto ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳolor kesh baksho, ar faro besra oḳolor ashon ulṭaia falai dila. ¹⁶Baetul-Mukaddosor uṭanedi kunuzat mal-samana loia solasol ḳorte nished dila. ¹⁷Tain talim dila, “Allar kalamo batail oise na ni, amar gorre duniar tamam zatir ebadot-ḳana ḳoia ḍaḳa oibo? Oile tumra i gorre ḍaḳaitor balaḳana banailiso.” ¹⁸Ikan hunia boṛo imam ar moulana oḳole tanre ḳatol ḳorar dandat lagla. Oile tara Isare kub ḍoraita, ḳaron tan talim hunia manshor maze asanoḳ eshki foeda oisil. ¹⁹Hainjabala tain sahabi oḳolre loia ṭaunor bare gelagi.

Mozbut imanor dua

²⁰Biane sahabi oḳole fotedi aṭia aoar bala deḳla, ou ḍumur gas ekkere zoṛe-foṛe hukaia morigese. ²¹Dekia sahabi Fitoror mono oigelo. Ou tain ḳoila, “Huzur, afne ze gasre boddua disla, deḳoukka, igu morigese.” ²²Tain erare ḳoila, “Allar ufre ekin raḳo. ²³Ami tumrare hasau ḳoiram, kunu manshe tar dilor maze shondoe na ḳoria, furafur imane zudi ou faṛore ḳoe, zao, uṛia gia doriat foṛo, te he zela ḳoibo tar lagi ola ḳora oibo. ²⁴Erdae ami tumrare ḳoiram, dua ḳorar shomoe tumra zeta mango, ekin ḳorio tumra ita failiso. Teu hasau ita faibae. ^25-26Tumra zeblau dua ḳorat ubao, ou shomoe ḳeuror birudde tumrar kunu nalish taḳle, tare maf ḳori dio. Teu tumrar behesti baf Allae-o tumrar tamam guna maf ḳori diba.”

Hozrot Isae ḳar eḳtiare ḳam ḳoroin?

²⁷Bade Hozrot Isae tan sahabi oḳolre loia hirbar Zeruzalem aila. Tain kaba goror uṭano aṭira, ou shomoe boṛo imam oḳole, murobbi ar moulana oḳole tan daro aia zikaila, ²⁸“Tumi kun eḳtiare ita ḳorrae? Ḳe tumare i ḳemota dise?” ²⁹Tain ḳoila, “Ami afnarare ekkan soal ḳormu. Afnara er zuaf dilaile, amio ḳoimu, ḳar eḳtiare ami ita ḳoriar. ³⁰Aichcha ḳoukka sain, Hozrot Ehiae torikar gusol deoar eḳtiar ḳar ges taki faisla, Allar ges taki, na manshor ges taki?” ³¹Ikan hunia tara ḳane ḳane matila, “Amra zudi ḳoi Allar ges taki, te tain ḳoiba, tumra tan ufre iman anlae na ḳene? ³²Ar zudi ḳoi manshor ges taki, te to?” Tara manshore kub ḍoraita, ḳaron hoḳol mansheu manta, Hozrot Ehia eḳzon nobi. ³³Erdae tara zuaf dila, “Amra ikan zani na.” Teu Isaeo ḳoila, “Te amio afnarare ḳoitam nae, ḳar eḳtiare ami ita ḳoriar.”

Angur ḳetor girostor kichcha

¹Teu Hozrot Isae hou moulana oḳolre kichcha hunaia buzaila, “Eḳzon manshe angur ḳet ḳoria tar sairobae beṛa dila. Bade anguror rosh bar ḳorar lagi eḳ gat kudila ar sokidaror lagi usa ḳori ekkan ṭong-gor banaila. Heshe manshor gese ḳet bagi dia malik bidesh gelagi. ²Angur fakia harle malike tan eḳ gulamre bagidaror gese faṭaila, tan baṭ anar lagi. ³Oile bagidar oḳole i gulamre dori mair-doir ḳori, ḳali ate bidae ḳori dilo. ⁴Teu malike tan aro eḳ gulamre faṭaila. Bagidar oḳole tareo gala-gali ḳoria maria tar mata faṭaililo. ⁵Erbade tain aro eḳzonre faṭaila. Enre tara zane marililo. Olaḳan ḳori tain aro bout zonre faṭaila. Erar mazor ḳoezonre tara mair-doir ḳorlo, ar ḳoezonre zane marililo. ⁶Heshe malikor ḳali eḳzon manush baki roisil, he oilo tan maear fut. Hesh-mesh tain ou fuareu tarar gese faṭaila, mono ḳorla, amar fuare tara ijjot dibo. ⁷Oile bagidar oḳole eḳe-oinne foramish ḳori ḳoilo, “Ou fuau to bade i shompottir malik oibo. Te ao, ereo amra marilai, teu amrau itar malik bonizimu.” ⁸Ḳoiau tara fuare doria zane maria, angur ḳetor bare nia falai dilo.

⁹“Te oḳon ḳoukka sain, ḳetor malike kita ḳorba? Tain aia to ou bagidar oḳolre mariliba ar ḳet oinno manshor gese bagi diba. ¹⁰Afnara Allar kalamo foṛsoin na ni,

Raz-mestoir oḳole ze fattorre beḳama ḳoia falai disil,

oḳṭa diau goror ian kuṭi oilo.

¹¹Mabude nizeu ita oaila,

ita dekia to amrar taijjubi lager.”

¹²Ita hunia tara Isare dorilito sailo. Tara buzililo, tain i kichcha tarar bifokkeu ḳoira. Oile manshore ḍoraia tanre saṛia gelogi.

Ḳazna dibar befare talim

¹³Bade ou murobbi ar moulana oḳole Isare fando falanir lagi, Forishi ar Raza Herudor dolor ḳoezon manshore tan gese faṭailo. ¹⁴Tara aia ḳoilo, “Huzur, amra to zani, afne eḳzon hok manush. Manshe kita mono ḳore ba na ḳore, itae afnar kuntau zae ae na, afne to ḳeuror mukor bae saia kunta ḳoroin na. Hoḳ-halal niome manshore Allar rasta batai dira. Te amrare batai deukka, Hozrot Musar shoriot mafik Ruman bashshare ḳazna deoa zaiz ni? ¹⁵Amra tanre ḳazna ditam ni, na ditam na?” Tain tarar bonḍami buzilila, buzia ḳoila, “Tumra ḳene amare forikka ḳorrae? Deki, eḳṭa dinar ania amare deḳao.” ¹⁶Tara dinar loia tan gese aile, tain zikaila, “I foeshar ufre ḳar nam ar sobi?” Tara ḳoila, “Ruman bashshar.” ¹⁷Tain ḳoila, “Te huno, bashshar zeta ita bashshare deo, ar Allar zeta ita Allare deo.” Ikan hunia tara ammok bonigela.

Moron bade zinda oa

¹⁸Bade Siddekia mozobor ḳoezon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare zikaila, ¹⁹“Huzur, Hozrot Musae amrar lagi ou musla lekia gesoin, kunu manshe bia ḳoria, tar boure niaoladi halote toia he zudi mara zae, te tar baie ou beṭire bia ḳoria tar bair bongsho basaite oibo. ²⁰Te doroukka, eḳ foribaro shat bai asil. Boṛo zone bia ḳoria niaoladi halote mara gelo. ²¹Bade dusra baie tar ou ṛaṛi babire bia ḳorlo. Oile he-o niaoladi roia mara gelo. Bade tin nombor baie bia ḳoria he-o oula mara gelo. ²²Ou nomunae tara shato bair ḳeuroru hurutta oilo na. Heshe ou beṭio mara gelo. ²³Te moron bade zebla manush zinda oia uṭba, ou shomoe i beṭi, era kun bair bou oibo? Tara hoḳoleu to i beṭire bia ḳorsil.”

²⁴Tain zuaf dila, “Afnara to Allar kalamo zanoin na, Allar kudroti takkoto buzoin na. Erdae afnara i bul ḳorra. ²⁵Hunoukka, murda oḳol zebla zinda oia uṭba, ou shomoe tara bia-shadi ḳorta nae, ḳeu tarare bia dito-o nae. Era to firistar laḳan boniziba. ²⁶Tourat kitabo Tur faṛor zongla zolar boeanir maze, murda oḳol zinda oar befare kita leḳa ase, ita afnara foṛsoin na ni? Allae Musa nobire ḳoila, amiu Ibrahim, Isʼhak ar Iakubor Alla. ²⁷Te Alla to murda oḳolor Alla nae, tain zinda oḳolor Alla. Afnara to bout boṛo bul ḳorsoin.”

Hoḳol taki boṛo hukum

²⁸Ou shomoe eḳzon moulana aia erar torka-torki hunla. Ar Isae zen ṭik zuaf disoin ikan buzia ein zikaila, “Ḳoukka sain, Tourat Shorifor maze hoḳol taki boṛo hukum kunṭa?” ²⁹Isae zuaf dila, “Hoḳol taki boṛo hukum oilo, O Boni Israil, amrar Mabud Alla eḳ. ³⁰Tumrar asta dil, zan, mon ar hoḳol shokti dia tumrar Mabud Allare mohobbot ḳorio. ³¹Dusra hukum oilo, tumrar ari-forire nizor laḳan maea ḳorio. Ou duio hukum taki boṛo ar kunu hukum nai.” ³²Ikan hunia hi moulanae ḳoila, “Huzur, marhaba! Afne to ṭiku ḳoisoin, Alla eḳ, tain saṛa ar kunu Mabud nai. ³³Ar asta dil, bibeḳ-buddi, hoḳol shokti dia tanre mohobbot ḳora, ari-forire nizor laḳan maea ḳora oilo, hoḳol nomunar foshu kurbani ar lilla-sodga takio zoruri.” ³⁴Isae zebla deḳla, ou moulanae kub shundor ḳori zuaf disoin, ou tain ḳoila, “Allar bashshai taki afne to beshi duroi nae.” Erbade tone Isare kunu soal ḳorar shaosh ar ḳeuror oilo na.

al-Mosi ḳe?

³⁵Isae Baetul-Mukaddoso talim deoar shomoe zikaila, “Moulana oḳole ḳemne ḳoin, al-Mosi oila Hozrot Daudor aolad? ³⁶Daude to Pak Ruhur bole ḳoisoin,

Mabude amar munibre ḳoila,

Ami zoto shomoe tumar dushmon oḳolre

tumar faor tolat na falai,

oto shomoe tumi amar ḍainor toḳto bo.

³⁷Daude zebla nizeu al-Mosire tan munib ḳoisoin, te al-Mosi ḳemne Daudor aolad oiba?” Bout manshe kushi oia Isar boean hunat asil.

³⁸Boeanor maze tain ḳoila, “Moulana oḳolor befare hushiar roio. Tara ḳali lamba lamba zubba findia bazar-aṭo gura fira ḳoroin ar ijjot faita sain. ³⁹Tarar shoḳ oilo kunu mozliso gele dami zagat boa, ḳanir shomoe samnor ḳataro boia ḳaoa. ⁴⁰Eḳbae tara lamba lamba dua ḳoria manshor mon golain, aroḳbae ṛaṛi beṭintor zomi-mirash doḳol ḳori nein. Hashoror moedano erar hoḳol taki boṛo mosibot oibo.”

Gorib ṛaṛi beṭir sodga deoa

⁴¹Bade tain Baetul-Mukaddosor lillar ḍegor ḳandat boia deḳla, manshe aia ḳemne lilla-sodga dira. Tain deḳla, bout doni manshe besh ḳori ṭeḳa-foesha dan ḳorra. ⁴²Bade eḳ gorib ṛaṛi beṭie aia ḳali duiṭa foesha dan ḳorlo. ⁴³Dekia tan sahabi oḳolre ḳoila, “Ami tumrare hok kota ḳoiram, hoḳol manush tone ou beṭie beshi dan ḳorlo. ⁴⁴Hoḳol manshe tarar bout don-saman taki kisu ongsho dan ḳorse, oile i beṭi obabi oileo, beṭie nizor lagi kunta na rakia, hoḳolta-u dan ḳori dilo.”

Kiamotor alamot

¹Hozrot Isa Baetul-Mukaddos taki baroia zaoar bala tan eḳzon sahabie ḳoila, “Huzur, ou deḳoukka, ḳoto boṛo boṛo fattoror oal ar shundor shundor dolan.” ²Tain ḳoila, “Tumi ou zeta boṛo boṛo dolan deḳrae, itar dui fattor ekkano lagail roito nae, hoḳolta banga oizibo.” ³Bade tain zebla Zoetun faṛor ufre Baetul-Mukaddos kaba shorif muka boat asla, ou shomoe sahabi Fitor, Iakub, Hannan ar Andriase tanre niralae zikaila, ⁴“Huzur, amrare zanaukka, ita kun shomoe oibo? Kun alamot dekia amra buzmu, ita binash oar shomoe aichche?” ⁵Tain ḳoila, “Dekio, ḳeu zanu tumrare na ṭoge. ⁶Bout zone amar nam doria aia ḳoibo, amiu hein, ḳoia boutre ṭogibo. ⁷Oile zuddor aoaz ar laṛair ḳobor hunia tumra ḍoraio na. Ita nichoe goṭbo, goṭleo ita to shesh nae. ⁸Eḳ zatie aroḳ zatir loge, eḳ deshe aroḳ deshor loge laṛai ḳorbo. Bout zagat boisal ar nidan deḳa dibo. Oile ita to ḳali mosibotor shuru.

⁹“Tumra nizor befare hushiar roio. Manshe tumrare doria bisaror adaloto shomzaibo. Mosidor bitre tumrare singladi mara oibo. Amar lagi tumrare deshor raza-bashshar samne neoa oibo. Tumra erar samne amar befare shakki dibae. ¹⁰Foela duniar tamam zatir gese Allar deoa kush-ḳobri toblig kora zorur. ¹¹Tumrare doria zebla bisaro neoa oibo, ou shomoe kita zuaf ditae, ita loia age kunu sinta ḳorio na. Hou shomoe tumrare zeta hikaia deoa oibo, tumra otau ḳoio. Ashole tumra to hino mattae nae, Pak Ruheu matiba. ¹²Baie baire, bafe fuare zane marar lagi dorai dibo. Fua-fuṛie afon ma-bafor birudde gia, ma-bafore kun ḳoraibo. ¹³Ar amar lagi hoḳole tumrare ginnaibo, oile hesh forzonto ze ṭikia roibo, he rehai faibo.

¹⁴“Ze tilaot ḳorer he buzouk, bezuita mosibotor ginnar i siz ze zagat aoar ḳota nae, i sizre zebla ono deḳbae, ou shomoe zera Ehudia zilat asoin, tara bagia faṛia elaḳat zauk. ¹⁵Sator ufre zera roiba, tara lamat lamia kunta neoar lagi goror bitre ar na hamauk. ¹⁶Ḳetor maze zera roiba, tarar gotror saddor neoar lagi baṛit na auk. ¹⁷Ou shomoe zeta beṭintor hurutta oita, ar zera huruttare bukur dud ḳaoaira, tarar boṛo zobor mosibot oibo. ¹⁸Tumra dua ḳoro, ita zanu shitor dino na oe. ¹⁹Ou shomoe to oto bezuita ḳoshṭo oibo, zeta duniar foela tone aiz forzonto kunudin oise na, ar kunudin oito-o nae. ²⁰Mabude zudi i shomoere ḳomaia na dita, te ḳeu zinda roilo na one. Oile Allae tan fosond ḳora bonda oḳolor lagi i shomoe ḳomai disoin. ²¹Hi shomoe ḳeu zudi tumrare ḳoe, huncho ni, al-Mosi ono aisoin, ba deḳo, ounu tain, te tumra ita ekin ḳorio na. ²²Ḳaron bout bonḍoe aia ḳoibo, amiu al-Mosi, ar bout bonḍo nobio aiba. Shombob oile tara Allar fosond ḳora bonda oḳolreo duka dia be-fote nita ḳori bout keramoti-muzeza deḳaiba. ²³Oile tumra hushiar roio, ami to tumrare ageu ita hal-hokikot zanai dilam.

²⁴“Ou mosibotor shomoe faronir bade,

Shuruz andair oizibo,

sande ar for dito nae.

²⁵Tera oḳol asman taki kulia foṛizibo,

asmanor kunu shoktiala sizu

ṭik-ṭak roito nae.

²⁶Ou shomoe manshe deḳba, Bin-Adome Allar kudroti zalal ar shan-tozollie, megor ṭukrat oia duniat toshrif anra. ²⁷Tain firista oḳolre duniar eḳ mata taki aroḳ matat faṭaia, Allar fosond ḳora bonda oḳolre sairobae tone dola ḳorba.

²⁸“Ḍumur gasor bae saia ilim ḳamai ḳoro. Gasor dal-fala norom oia zebla noea kuṛi baroe, ou shomoe tumra buzilao gormor din aichche. ²⁹Te ou laḳan tumra zebla deḳbae ita hoḳolta goṭer, dekia buzilio, Bin-Adomo daro aichchoin. Ḳali daro nae, tain aia duaro ṭukaira. ³⁰Ami tumrare hok kota ḳoiram, ita na goṭa forzonto i zomanar manush fuṛaita nae. ³¹Asman-zomin hoḳolta binash oizibo, oile amar kalam hamesha ḳaim roibo.

³²“Hou din ar hi shomoyor befare ḳali amar gaibi baf bade ar ḳeu zanoin na. Asmani firista ba ḳas maear zoneo zanoin na. ³³Tumra hushiar o, kial ḳori solo ar dua ḳoro. Hidin kun shomoe aibo, tumra ḳeu to zano na. ³⁴Ola eḳ manshor laḳan hidin aibo, zein bidesh zaoar shomoe tan gulam oḳolor ato hoḳolta shomzai dia zarzir ḳam buzai dila. Ar sokidarre ḳoila hozag roito. ³⁵Tumrao oula hozag roio. Baṛir malik kun shomoe aiba, hainjabala, maz raite, fotabala na fozore aiba, ikan to tumra ḳeu zano na. ³⁶Tain aḳta aile zanu na deḳoin, tumra gumai roiso. ³⁷Ami tumrare zela ḳoilam, hoḳolreu oula ḳoiram, hozag ro.”

Hozrot Isar duk-koshṭo ar mout (14:1–15:47)

Hozrot Isare hazanir bed

¹Azadi Id ar Ḳamir Saṛa Ruṭir Idor ḳali dui din baki roise. Boṛo imam ar moulana oḳole, Hozrot Isare manshor aforḳe doria ḳatol ḳorar danda lagaila. ²Tara ḳoila, “Idor shomoe tare dortam nae. Dorle manshe gonḍogul lagai dito fare.”

³Isa ou shomoe Baet-Ania gaur fosa-kusṭo bemari Saimonor baṛit asla. Ono boia tain ḳana ḳaira, aḳtau eḳ beṭi manshe sinor eḳ butolo ḳori kub dami ḳaṭi ator loia aia, butol bangia hoḳol ator tan matat ḍali dilo. ⁴Ita dekia hino azir kunu kunu zone na-kush oia eḳe-oinne ḳoilo, “I ator fuṭain ḳene borbad ḳora oilo? ⁵I fuṭin besile to tin-sho dinar faia gorib oḳolre bilai deoa gelo one.” Otar lagi tara beṭire boḳa-zoḳa ḳorla. ⁶Oile Isae ḳoila, “Oise, tanre ar kunta ḳoio na. Tain to amar lagi kub shundor ḳam ḳorsoin. ⁷Gorib oḳol to hamesha-u tumrar loge roiba. Tumrar zebla mone sae tarare shaijjo ḳortae farbae. Oile amare to hamesha faitae nae. ⁸Besaṛie zeḳan farsoin oḳanu ḳorsoin. Ein aia amar gotro ator ḍalia, dafon-ḳafonor lagi amare ageu zuit ḳorsoin. ⁹Ami tumrare hok kota ḳoiar, duniar zekunu zagat Allar kush-ḳobri toblig korar shomoe, ou besarire mono ḳorar lagi, tan i ḳamor ḳota ḳano ḳoa zaibo.”

¹⁰Bade tan barozon sahabir mazor eḳzon, en nam Ihuda Iskariat, ein Isare doraia deoar lagi boṛo imam oḳolor gese gela. ¹¹Imam oḳole hunia kub kushi oia ḳoila, “Tare doraia dile tumare ṭeḳa dimu.” Teu Ihudae tanre dorai deoar shuzug tukanit roilo.

Hozrot Isar aḳeri id

¹²Ḳamir Saṛa Ruṭir Idor foela din, Azadi Idor lagi meṛar baichcha zobo ḳora oito. Erdae sahabi oḳole Isare zikaila, “Huzur, amra kun zagat gia afnar lagi idor ḳana tiar ḳortam?” ¹³Ou Isae tan duizon sahabire ḳoila, “Tumra ṭauno zao. Gia deḳbae hono eḳ beṭa manshe ḳoiladi fani boria nira. Tumra tan ḳore ḳore zaio. ¹⁴Tain ze baṛit gia hamaiba, hou baṛir malikre tumra ḳoio, sab, murshide ḳoisoin, sahabi oḳolre loia ami zeḳano Azadi Idor ḳana ḳaitam, hou musafirḳanaḳan deḳai deukka. ¹⁵Tain tumrare ufor talat hazail-faṛail eḳ boṛo kuṭa deḳai diba. Tumra ono hoḳolta tiar ḳorio.” ¹⁶Teu sahabi oḳol gia ṭauno hamaila. Hamaia Isae zelaḳan ḳoisla, ṭik ou laḳan hoḳolta faila ar idor ḳana tiar ḳorla.

¹⁷Hainjabala Isae tan barozon sahabire loia ono aila. ¹⁸Aia ḳani ḳaoar shomoe tain ḳoila, “Ami tumrare hok kota ḳoiram, tumrar mazor eḳzoneu beimani ḳoria amare dorai dibo, he oḳon amar loge boia ḳar.” ¹⁹Ikan hunia tara kub bezar oigela. Ar eḳ ek kori zikaila, “Huzur, i zon kita ami ni?” ²⁰Tain ḳoila, “He ou barozonor mazoru eḳzon. He oḳon amar loge talo at harar. ²¹Bin-Adomor moutor befare asmani kitabo zela leḳa ase, tan mout to oulau oibo, oile afsus hou manshor lagi, ze tanre doraia dibo. Duniat tar zonom na oau, tar lagi bout bala asil.”

²²Ḳanat roisoin, ou shomoe Isae ruṭi ato loia Allar shukria adae ḳoria, siṛia ṭukra ṭukra ḳori sahabi oḳolor ato dia ḳoila, “Ou neo, mono ḳoro ita amar shoril.” ²³Bade tain anguror shorbotor fiala loia Allar shukria zanaia erare dila. Era hoḳole ou fiala taki shorbot ḳaila. ²⁴Isae ḳoila, “Ḳao, mono ḳoro ita amar lou. Ou lour zoriae Adom zatir boutor basibar lagi noea usilla ḳaim ḳora oibo. ²⁵Ami hasa ḳota ḳoiram, zei forzonto Allar bashshait dakil oia ami anguror shorbot na ḳaisi, oto din i laḳan shorbot ar ḳaitam nae.” ²⁶Heshe hoḳole mili eḳ gozol gaia, gor taki baroia Zoetun faṛo gelagi.

Hozrot Fitore oshikar ḳorar agam ishara

²⁷Faṛo gia Isae tan sahabi oḳolre ḳoila, “Tumra hoḳoleu to amare falaia bagibae. Allar kalamo ase, ami falor raḳalre marilimu, teu falor meṛain sairobae sitriziba. ²⁸Oile amare murda taki zinda ḳorar bade, tumrar ageu ami Galilo zaimugi.” ²⁹Fitore tanre ḳoila, “Huzur, hoḳol bagi geleo ami bagitam nae.” ³⁰Isae ḳoila, “Te huno, ami tumare ḳoiram, aiz fotabala murgae duibar bang dibar ageu, tumi tinbar ḳoibae, tumi amare sino na.” ³¹Oile Fitore aro boṛo golae ḳoila, “Huzur ou kita ḳoin, afnar loge zudi amar morono oe, ta-o ami kunumonte-u ḳoitam nae ami afnare sini na.” Hoḳol sahabieo ou laḳan ḳoila.

Getshimani bagano Hozrot Isa

³²Bade Hozrot Isae tan sahabi oḳolre loia Getshimani namor eḳ bagano aila. Aia tain erare ḳoila, “Ami zoto shomoe dori dua ḳormu, oto shomoe tumra ono boat roio.” ³³Oḳan ḳoia tain Fitor, Iakub ar Hannanre tan loge raḳla, monor duk ar zalae tain boṛo toklif faila. ³⁴Tain erare ḳoila, “Duke amar zan baroi zargi. Tumra hoḳol ono ro ar hozag taḳo.” ³⁵Ḳoia tuṛa horia gia tain maṭit soizdat foṛia aroz ḳorla, shombob oile i mosibotor oḳtḳan horizibar lagi. ³⁶Tain ḳoila, “O abba, amar oli, tumi to hoḳolta-u ḳortae faro. Tumi amar ufor taki aneoala ou mosibotḳan horailao. Oile ita amar ichchae nae, tumar morzi mafiku ouk.”

³⁷Soizda taki uṭia tain sahabi oḳolor gese aia deḳla, era gumai gesoin. Ou tain Fitorre hozag kori ḳoila, “Saimon, tumi gumai gelae ni? Eḳan gonṭao hozag roitae farlae na ni? ³⁸Hozag ro, forikka taki bastae ḳori dua ḳoro. Dilor maze nichoe kial ase, oile ḳaea to ḳomzur.” ³⁹Bade tain hirbar gia hou eḳoi dua ḳorla. ⁴⁰Firia aia deḳla, era hirbar gumai gesoin, gume tarar souk falai der. Tara Isare kita zuaf dita, kunta buzla na. ⁴¹Tin nombor bar tain aia erare ḳoila, “Tumra deki oḳono arame gumairae. Aichcha oise, shomoe aichche to. Deḳrae ni, Bin-Adomre gunagar oḳolor ato shomzai deoa or. ⁴²Uṭo, amra roana dei. Amare zegie dushmonor ato dorai dibo, he aia azigese.”

Hozrot Isa al-Mosi dushmonor ato bondi

⁴³Tain erar loge mato roisoin, ou shomoe Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa-toluar loia ailo. Boṛo imam, moulana ar murobbi oḳole erare faṭaisoin. ⁴⁴Tanre zegie doraia dito, he tar logor erare age hikaia disil, “Ami gia zen galo hunga dimu, einu hou zon. Tumra enre bondi ḳoria kub shabdane loia zaio.” ⁴⁵Teu Ihudae shuza-shuzi Isar gese gia ḳoilo, “Huzur!” Ḳoia he tanre hunga dilo. ⁴⁶Loge loge tara aia Isare dorililo. ⁴⁷Tan ḳandat zera ubat asla, era eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo. ⁴⁸Isae ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa-toluar loia amare dorat aiso? ⁴⁹Ami to forteḳ din Baetul-Mukaddoso gia tumrar samneu talim ditam. Ou shomoe to tumra amare dorlae na. Nichoe Allar kalamor aeat to folite oibo.”

⁵⁰Tanre bondi ḳorteu tan hoḳol sahabi tane toia bagi gela. ⁵¹Ḳali eḳzon zuane ekkan longi findia tan ḳore ḳore gelo. Oile manshe zebla tareo dorta saila, ⁵²he tar longi falaia lemṭa oia douṛaia bagilo.

Fotua komiṭir dorbaro bisar

⁵³Ou manshe Hozrot Isare doria hari fordan imamor gese loia gelo. Hono boṛo imam oḳol, murobbi ar moulana oḳolo ekkano dola oila. ⁵⁴Sahabi Fitor Isar ges tone duroi hori hori roia tan ḳore ḳore gia fordan imamor baṛir uṭano gela. Gia hono faradar oḳolor loge milia aguin tabanit boila. ⁵⁵Boṛo imam oḳole ar fotua komiṭir hoḳol manshe Isare ḳatol ḳorar lagi kunu nalish tukaila, oile faila na. ⁵⁶Mozliso Isar birudde boute misa shakki dileo, tarar shakkir mil oilo na. ⁵⁷Teu aro ḳoezone tan birudde ou misa shakki dilo. Tara ḳoilo, ⁵⁸“Amra hunchi, he ḳoise, manshor ator banail Zeruzalemor ou kaba shorif, ami bangilimu, ar tin dinor maze kunu manshor at na lagaia ami arokkan banaimu.” ⁵⁹Oile erar shakkio millo na. ⁶⁰Heshe fordan imam ubaia hoḳolor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?” ⁶¹Oile tain kunu zuaf na dia nirai roila. Fordan imame tanre hirbar zikaila, “Tumi kita Allatalar oada ḳora hou al-Mosi ni, tan ḳas maear zon Ibnulla ni?” ⁶²Tain zuaf dila, “Ji-oe, amiu hein. Afnara deḳba, ami Bin-Adom arshe-azimo Alla Rabbul Alaminor ḍainor toḳto boat asi. Ar deḳba, ami behesti megor kuṭit oia duniat toshrif aniar.” ⁶³Ikan hunia-u fordan imame nizor finnor ḳafoṛ siṛia ḳoila, “Ar kunu shakkir zorur ase ni? ⁶⁴Afnara nizor ḳaneu to hunla, he shiriki ḳorlo. Te oḳon afnara kita rae diba?” Ou tara hoḳole tane dushi shaibosto ḳoria, ḳatol ḳorar hukum dilo. ⁶⁵Ḳeu ḳeu tan ufre sef dilo. Tan muk bandia gushi maria ḳoilo, “Hoi, tuin bule nobi, te oḳon ohi ḳos na.” Bade sifai oḳoleo tane nia mair-doir ḳorlo.

Hozrot Fitore tinbar oshikar ḳorla

⁶⁶Fitor zebla lamat uṭano asla, ou shomoe fordan imamor eḳ bandi beṭi tan ḳandat gelo. ⁶⁷Gia tanre aguin tabanit dekia, bala ḳori tan bae saia hari ḳoilo, “Afneo to ou Nasarotor Isar loge asla.” ⁶⁸Fitore oshikar ḳoria ḳoila, “Na go, tumi ou kita ḳoirae? Ami ita kuntau zani na, buzio na.” Oḳan ḳoia Fitor geiṭor daro gela, ar ou shomoe murgae bang dilailo. ⁶⁹Bandi beṭie zebla deḳlo, Fitor ono gia ubaisoin, ou tan ḳasat uba manshore gia tai ḳoilo, “Ou beṭao erar logor eḳzon.” ⁷⁰Fitore hirbar na ḳorla. Oile tan ḳandat zera uba asil, tuṛa bade tara ḳoila, “Tumi nichchoe erar logor, tumar baṛio to Galil zilat.” ⁷¹Fitore ḳoila, “Allar gozob foṛouk, ami ḳosom ḳaia ḳoiar, tumra ou zar ḳota ḳoirae, tare ami sinio na.” ⁷²Oḳan ḳoiteu murgae duara bang dilo. Bang hunia-u Fitoror mono oigelo, Isae ḳoisla, “Murgae duibar bang dibar ageu tumi tinbar ḳoibae, tumi amare sino na.” Oḳan mono oiteu tain au au ḳori ḳandon dorla.

Fordan hakim Filator adaloto Hozrot Isa

¹Boṛo imam oḳole sobre uṭia murobbi oḳol, moulana ar fotua komiṭir hoḳolor loge foramish ḳoria, Hozrot Isare bandia Ruman hakim Filator gese loia gela. ²Gia harle hakim Filate Isare zikaila, “Tumi kita Ihudi oḳolor bashsha ni?” Tain ḳoila, “Afne ṭik kotau ḳoira.” ³Boṛo imam oḳole tan name bout nalish dila. ⁴Filate hirbar ḳoila, “Tumi kunta zuaf ditae na ni? Deḳrae ni, tara tumar birudde ḳoto nalish der.” ⁵Oile Isae kunu zuaf na deoae Filat taijjub oigela. ⁶Azadi Idor shomoe hakime deshor manshor fosond mafik, eḳzon azotire ḳalas dita. ⁷Ou shomoe Barabba namor eḳzon manush zelo asil. Shongramor shomoe he fouzor loge roia manush kun ḳorsil. ⁸Manshe Filator gese aia dabi zanaila, “Afne afnar nizor reoaz mafik kam ḳoroukka.” ⁹Tain zikaila, “Tumra sairae ni, ami Ihudi oḳolor bashshare saṛi ditam?” ¹⁰Filate zanta, boṛo imam oḳole ingsha ḳoria Isare nia tan ato disoin. ¹¹Boṛo imam oḳole manshore uskaia dila, manshe Isar mukti na saia Barabbar mukti sain. ¹²Erdae Filate hirbar manshore zikaila, “Te tumra zare Ihudir bashsha ḳo, tare ami kita ḳortam?” ¹³Tara hoḳole sillani lagailo, “Tare solibo deo.” ¹⁴Tain ḳoila, “Ḳene, he kita dush ḳorse?” Oile manshe aro zure zure sillaia ḳoilo, “Solibo deo.” ¹⁵Teu Filate tarare kushi ḳorta ḳori Barabbare ḳalas dilaila, ar Isare besh ḳori sabuk maria, solibo loṭḳaia ḳatol ḳorar hukum dila. (Solib oilo laḳṛidi banail manshore loṭḳaia marar eḳ zinish.)

Sifai oḳolor ṭaṭṭa-moshkora

¹⁶Bade sifai oḳole Isare doria fordan hakimor baṛir bitre loia gela. Hono tara aro sifai oḳol dola ḳorla. ¹⁷Tara Isare baingoni rongor bashshai lebas findaila, ar gosa-ḳaṭa dia mukuṭ banaia tan matat dila. ¹⁸Bade tara moshkora ḳori misil dilo, “Ihudir bashsha, marhaba.” ¹⁹Ar eḳ laṭi ania bare bare tan matat marlo, gotro sef dilo, tane ijjot deḳanir ban ḳoria tan samne aṭu gaṛia boilo. ²⁰Ou laḳan ṭaṭṭa-moshkora ar bettomizi ḳorar bade tan finnor baingoni lebas kulia, tan nizor ḳafoṛ findailo ar solibo nia ḳatol ḳorar lagi roana dilo.

Solibor ufre Hozrot Isa

²¹Tara loia zaira ou shomoe Kurini elaḳar Sikondor ar Roufor baf, Saimon namor eḳzon manush gau taki ou fotedi aṭia zaoat asla. Sifai oḳole zur ḳoria enedi hou solib boaia nila. ²²Tara Isare Golgata, mani ‘ḳollar saṛ’ namor zagat loia gela. ²³Hono nia tanre mura namor oshud furail anguror shorbot ḳaite dila, oile tain ita ḳaila na. ²⁴Bade tara tanre solibo, mani gaso loṭḳailo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo.

²⁵Biane noeṭar shomoe tara tanre zane marar lagi solibo gatilo. ²⁶Ar tan oforad-namar maze leḳlo, “Ihudir bashsha.” ²⁷Tara duizon ḍaḳaitreo tan loge solibo loṭḳailo, eḳzon ḍain galat, oinnozon bau galat. ²⁸Erdae Allar kalamor ou aeato foligelo, “Tanre naforman oḳolor loge gona oise.”

²⁹Hou fotedi zera zaoat asil tara mata laṛaia Isare siṛaia ḳoilo, “Oi mia, tumi bule kaba gor bangia tin dinor maze hirbar banaitae farbae! ³⁰Te oḳon solib taki lamia aia nizor zan basao na.” ³¹Boṛo imam ar moulana oḳoleo tanre siṛaia mata-mati ḳorla, “He to manshor zan basaito, oḳon nizor zan basaito farer na. ³²He bule oada ḳora hou al-Mosi, Boni Israilor bashsha! Te farle oḳon solib taki lamia auk, teu amra-o ota dekia iman anmu.” Tan ḍaine-baue zerare solibo loṭḳail oisil, tarao tanre siṛailo.

Hozrot Isa al-Mosir ufat

³³Bade beil duifor taki zuhoror bad forzonto tin gonṭa asta desh andair oigelo. ³⁴Erbadeu tain kub zure zure ḳoila, “Eloi, eloi, lama sabaktani,” mani, “O amar Alla, amar Moula, tumi ḳene amar log saṛi dilae?” ³⁵Ou shomoe zera tan daro uba asil, tara ikan hunia ḳoila, “Huno, huno, he Hozrot Ilias nobire ḍaḳer.” ³⁶Oḳan hunia eḳzon manshe douṛaia gia ekkan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo. He ḳoilo, “Ouk, deki na Iliase tare lamaia neoat ain ni.”

³⁷Heshe Isae zure aoaz ḳoria aḳeri dom falaia inteḳal ḳorla. ³⁸Loge loge Zeruzalemo kaba goror herem shorifor fordaḳan, ufre taki tol forzonto siṛia dui ṭukra oigelo. ³⁹Sifair ze ofisar hono fara deoat asla, ein Isar moutor i halot dekia ḳoila, “Nichchoe, einu asla Allar ḳas maear zon Ibnulla.”

⁴⁰Ḳoezon beṭi mansheo duroi ubaia ita deḳla, erar maze asla Mogdilini Moriom, Iusi ar huru Iakubor ma Moriom, ar Bibi Salumi. ⁴¹Isa zebla Galilo asla, ou shomoe ou beṭin hamesha tan loge loge roita ar tan ḳezmot ḳorta. Aro bout beṭi manush, zera tan loge oia Zeruzalem aisla, tarao ita deḳla.

Hozrot Isar rouza mubarok

⁴²I din asil intezamor din, mani Ihudir Zummabaror agor din, ou din shuruz ḍubar bade tone kunuzat ḳam ḳora haram asil. ⁴³Erdae ou biali bala fotua komiṭir ijjoti montri, Arimatia gaur Iusuf namor eḳzon manshe, shaosh ḳoria hakim Filator gese aia, Hozrot Isar lash nita saila. Allar bashshai ḳaim oar lagi ein bar saoat asla. ⁴⁴Filate hunia kub taijjub oigela zen, Isae oto zoldi ḳori inteḳal formaisoin. Erdae tain sifair subedarre ania zikaila, hasau Isar ruh baroi gese ni. ⁴⁵Subedare zebla ḳoila, “Ji-oe, tain mara gesoin”, ou Filate Isar lash Iusufor zimmae shomzai dila. ⁴⁶Iusufe gia ḳafonor ḳafoṛ ḳorid ḳori ania, Isar lash solib taki lamaia, ḳafon findaia, fattor ḳaṭia banail ek koeboror maze tanre dafon ḳorla, i laḳan ḳoeboro maṭi deoa lage na. Erdae tara boṛo eḳ fattor goṛiaia ania ḳoeboror muko dila. ⁴⁷Ou shomoe Mogdilini Moriom ar Iusir ma Moriome deḳla, tanre kun zagat dafon ḳorsoin.

Mout bade zinda oila Hozrot Isa (16:1–20)

Hozrot Isa zinda oar forman

¹Tarar zummar din shesh oia harle Mogdilini Moriom, Iakubor ma Moriom ar Bibi Salumie, Hozrot Isar lasho maḳanir lagi kushboeala moshla loia anaila. ²Haftar foela din biane, mani Robibare fozore shuruz uṭar loge logeu era tan ḳoeboror ḳasat gela. ³Ou shomoe tara eḳe-oinne zikaila, “Ḳoeboror mukor ou fattor ḳe horaiba?” ⁴Mati mati tara saia deḳla, i fattor horail oigese. Fattorṭa asil kub boṛo. ⁵Bade tara ḳoeboro hamaia deḳla, eḳ zuan beṭae dola ḳafoṛ findia ḍain galat boi roisoin. Ene dekia tara kub taijjub oigela. ⁶Ou hein ḳoila, “Taijjub oio na go. Tumitain to Nasarot gaur Isareu tallash ḳorrae, zenre solibo gatia ḳatol ḳora oise? Tain oḳon ino nae, tanre zinda ḳora oise. Dekizao, ou zagatu tanre dafon ḳora oisil. ⁷Te tumitain oḳon zao, gia tan sahabi oḳolre ar Fitorreo ḳo, tain age zelaḳan ḳoisla, oula tumrar age Galilo zaira. Tumra hono gele tan doroshon faibae.” ⁸Ikan hunia beṭinte ḳoebor taki baroia douṛaia bagila. Tara taijjub bonigela, ḍoror suṭe ḳeurore kunta ḳoila na.

⁹Haftar foela din fozor oḳto Isa murda taki zinda oia uṭla, ar foelau Mogdilini Moriomre doroshon dila. Ou Moriomor log taki tain shatgu zinnat saṛaisla. ¹⁰Tan doroshon faiau Moriome gia Isar logor hoḳolre ḳobor zanaila. Ou shomoe tara ḳanda-ḳaṭi ar ahazari ḳorat asil. ¹¹Oile tain zinda oisoin ar Moriomre doroshono disoin, ita tara ḳeu ekin ḳorla na.

¹²Bade tan duizon ummote aṭi aṭi gau baedi roana oila, ou shomoe Isae tan surot bodlaia tarare doroshon dila. ¹³Tara gia baki hoḳolre ou ḳobor zanaila. Oile tarar ḳotao era ekin ḳorla na.

Hozrot Isar aḳeri soboḳ

¹⁴Heshe Hozrot Isae tan egaro zon sahabire doroshon dila. Ou shomoe era ḳaoat asla. Murda taki zinda oar bade zera tanre deḳsil, tarar ḳota ekin na ḳorae, erar imanor ḳomzuri ar dilor na-humarir lagi tain erare domḳaila. ¹⁵Ar ou sahabi oḳolre ḳoila, “Tumra duniar tamam zagat zao, gia hoḳol manshor gese Allar batail kush-ḳobri toblig koro. ¹⁶Ze manshe iman ania toubar gusol ḳore, he-u rehai faibo. Ze manshe iman anto nae, he Allar dorbaro dushi bonia shaza faibo. ¹⁷Zera iman anbo, erar maze ou nishana deḳa zaibo: amar name tara zinnat saṛaibo, noea noea bashae gaibi buli matibo. ¹⁸Tara zati hafre ato loiba, bezuita bishakto kunta ḳaileo tarar kunu ḳeti oito nae. Ar kunu bemarire ataia dile bemar shifa oizibo.”

Hozrot Isar behesto zaoa

¹⁹Sahabi oḳolor loge batchit ḳorar bade Hozrot Isare arshe-azimo tulia neoa oilo. Hono tain Alla Pakor ḍainor toḳto toshrif raḳsoin. ²⁰Bade sahabi oḳole hoḳol zagat gia toblig korla. Hozrot Isae erar mazdi ḳam ḳorla, ar erare keramoti ḳamor takkot dia forman deḳaila, era zeta toblig korra, ita hasa. Amin.