al-Moti

Fobitro Injil Shorif foela sifara

al-Moti

Siloṭi bashae torjoma

Forisiti

al-Moti sifarar mul talim oilo, Hozrot Isa al-Mosi eḳzon bashsha. Alla Pakor boail ḳora bashsha. Tain i duniat toshrif ania manshore daot dila, tan ufre iman anar lagi. Zera tan ufre iman anba, era oiba Allar noea zati. Erar nam oibo, Allar proza ba behesti bashshair zon, ar Hozrot Isa al-Mosiu oila ou bashshair malik. Alla Pake tanre boail ḳorla, zate ruz hashoror din tain duniar hokkol manshor bisar ḳoroin.

Ou al-Moti sifara tilaot ḳorle, amra Hozrot Isar talimor mulloban hoḳol boeanir bistarito deḳmu. Amra deḳmu, Hozrot Isar zonom kila oisil, tan duniabi baba mani Bibi Moriom (a:)-or zamai Hozrot Iusufor zobanbondi faimu. Ou sifarat amra faimu, Hozrot Isae kila ḳam-ḳaz ḳorsoin, ḳemne zindegi ḳaṭaisoin, tain kuai taki bol-shokti faita. Amra aro deḳmu, bout zomana age Alla Pake Hozrot Musa (a:) ar Hozrot Daud (a:)-or Fobitro Tourat ar Zobur Shorifor maze, erloge bad-baki aro nobi-rosul oḳolor gese zeta zeta bataisoin, Hozrot Isar zomanat aia tan ato ota hoḳolta folise.

al-Moti sifarar 5 ruku 17, 20 aeato ase, Hozrot Isae ḳoira, “Tumra ikan mono ḳorio na, ami Tourat kitab ar nobi oḳolor sohifa batil ḳorat aisi. Ami to ita batil ḳorat nae, borong fura ḳorat aisi. Huno, ami tumrare ḳoiram, alim-ulamar amol takio tumrar amol zudi aro bala na oe, te kunumonte-u behesti bashshait hamaitae fartae nae.”

Ar 11 ruku 28-30 aeato ase, Hozrot Isae ḳoira, “Bar-buza boite boite tumra zera heran oigeso, tumra hoḳol amar gese ao, ami tumrare aram dimu. Amar zual tumrar ḳando tulo ar amar ges taki talim lo, teu tumrar aram oibo. Amar zual boia neoa shuza, amar deoa bar kub fatla. Amar mizaz kub norom ar ṭanḍa.”

Leḳok forisiti ar shomoe

Alla Pakor hukum mafik ou sifara leḳsoin, Hozrot Isa al-Mosir sahabi Hozrot Moti (ra:). Hozrot Isar ufre iman anar age tan fesha asil ḳazna adae ḳora. Tain manshor ges taki ḳazna tulia Ruman shorḳaror ato shomzai dita. Hozrot Isae tanre imanor daot dile tain iman ania Isa al-Mosir ummot oila. Ar Hozrot Isae behesto toshrif neoar onuman 25-35 bosor bade ou sifara kitab aḳare tain leḳsoin.

Ermaze ase,

(1) Hozrot Isar forisoe ar foela zindegi 1—2 ruku

(2) Hozrot Isae ḳam shuru ḳorla 3—4 ruku

(3) Faṛor feṭo Hozrot Isar talim 5—7 ruku

(4) Hozrot Isar dosh keramoti 8—9 ruku

(5) Barozon sahabire fosond ar talim 10 ruku

(6) Hozrot Isare shondoe ar birudita ḳora 11—12 ruku

(7) Hozrot Isar batail shat kichcha 13:1-52 aeat

(8) Hozrot Isae ḳene toshrif anchoin 13:53—17:27

(9) Ummotor lagi Hozrot Isar zoruri talim 18 ruku

(10) Shomazor manshor lagi Hozrot Isar talim 19—22 ruku

(11) Neta oḳolre Hozrot Isar hushiari 23—25 ruku

(12) Hozrot Isar ufat ar zinda oa 26—28 ruku

Hozrot Isar forisoe ar foela zindegi (1:1–2:23)

Hozrot Isa al-Mosir ḳandan

¹Hozrot Isa al-Mosi oila Daud nobir bongshodor, ar Daud oila Hozrot Ibrahimor bongshodor. Isa al-Mosir ḳandanor forisoe oilo,

²Hozrot Ibrahimor fua Hozrot Isʼhak, Isʼhakor fua Hozrot Iakub, Iakubor fua Ehuda ar tan baiain, ³Ehudar fuain Firuz ar Zarah, erar maʼr nam Tamar. Firuzor fua Hasir, Hasiror fua Rayam, ⁴Rayamor fua Aminadab, Aminadabor fua Nahish, Nahishor fua Selim, ⁵Selimor fua Buaz, tan maʼr nam Rahba. Buazor fua Ubayed, tan ma oila Rut. Ubayedor fua Ias, ⁶Iasor fua Bashsha Daud.

Daudor fua nobi Sulaiman, en ma asla Uriar ṛaṛi bou Batseba. ⁷Sulaimanor fua Rohbiam, Rohbiamor fua Abia, Abiar fua Asa, ⁸Asar fua Zihusafoṭ, Zihusafoṭor fua Uram, Uramor fua Uzia, ⁹Uziar fua Zutom, Zutomor fua Ahaz, Ahazor fua Hizkia, ¹⁰Hizkiar fua Manosha, Manoshar fua Amon, Amonor fua Iushia, ¹¹Iushiar fua Iakunia ar tar baiain. Israil zatire Babil desho bondi ḳori neoar bala erar zonom oisil.

¹²Israil zatire Babil desho bondi ḳori neoar bade Iakuniar fua Saltielor zonom oisil. Saltielor fua Zerbabil, ¹³Zerbabilor fua Abihud, Abihudor fua Iliakim, Iliakimor fua Azor, ¹⁴Azoror fua Sadik, Sadikor fua Akim, Akimor fua Elihud, ¹⁵Elihudor fua Ali-Azor, Ali-Azoror fua Motin, Motinor fua Iakub, ¹⁶Iakubor fua Iusuf, ou Iusuf oila Bibi Moriomor zamai. Bibi Moriomor feṭo Hozrot Isar zonom oisil, enre ḍaḳa oe al-Mosi.

¹⁷ou laḳan Hozrot Ibrahim taki Daud nobi forzonto souddo siṛi. Daud nobi taki Babilo bondi ḳori neoa forzonto souddo siṛi. Babilo bondi oa taki al-Mosi forzonto souddo siṛi.

Hozrot Isa al-Mosir zonom

¹⁸Isa al-Mosir zonom oisil ou laḳan. Iusuf namor eḳzonor loge Bibi Moriomor shadi ṭik oisil, oile tara eḳloge mila-misha ḳorar ageu Allar Pak Ruhur kudroti bole Moriomor feṭo hurutta ailo. ¹⁹Iusuf asla hok manush, Moriomor feṭo hurutta ase, i ḳobor hunia tain Moriomre manshor samne shorom dita saila na, erdae mone mone ṭik korla, lukaia i bia bangilita.

²⁰Tain zebla olaḳan sinta ḳorra, ou shomoe Mabudor eḳ firistae kuabor maze tanre doroshon dia ḳoila, “O Iusuf bin Daud, tumi Moriomre shadi ḳorte ḍoraio na. Tan feṭo ze hurutta aise, ita to Pak Ruhur kudroti boleu oise. Tan goro eḳ fuae zonom loiba. ²¹Tumi i fuar nam rakio Isa. Ḳaron i namor mani toraneala, ein nizor ummot oḳolre guna taki toraiba.”

²²Agor zomanar nobir mazdi Mabude zela bataisla, oḳan folibar lagiu ita oibo. ²³Mabude bataisla, “Huno, eḳzon abiati shoti narir feṭo hurutta aibo, tain eḳ fuar zonom diba, i fuare ḍaḳa oibo Immanuel.” I namor mani oilo, Alla amrar loge asoin.

²⁴Bade gum taki uṭia Iusufe firistar hukum mafik Bibi Moriomre shadi ḳorla. ²⁵Oile ou fuar zonmor ag forzonto tain Moriomor loge kunu mila-misha ḳorla na. Shomoe moto ou fuar zonom oilo, tain ou fuar nam raḳla Isa.

Hozrot Isar tallashe gonoḳ oḳol

¹Raza Herudor amolo Ehudia zilar Betelham gaut Hozrot Isar zonom oisil. Zonmor bade fubor deshor ḳoezon gonoḳ Zeruzalem ṭauno aia zikaila, ²“Ihudi zatir ze bashshar zonom oise, ein kuai? Amra asmanor fubedi tan zonmor tera deḳsi, dekia tanre boḳti deoat aisi.”

³Noea bashshar ḳota hunia Raza Herud ar Zeruzalemor bad-baki hoḳol manush kub sintat foṛigela. ⁴Erlagi Herude deshor boṛo imam ar moulana oḳolre ekkano dola ḳori zikaila, “Afnara zanoin ni, al-Mosi kuai zonom loiba?” ⁵Era ḳoila, “Tan zonom oibo Ehudia zilar Betelham gaut. Agor zomanar eḳ nobir kitabo leḳa ase,

⁶O Ehudia zilar Betelham,

Ehudiar nami-dami zagar maze

tumi kunumonte-u huru nae,

tumar maz takiu to

ola eḳzon bashsha foeda oiba,

zein amar Israil zatire salaiba.”

⁷Teu Herude hou gonoḳ oḳolre niralae nia zikaia zanla, ṭik kun shomoe hou zonmor tera deḳa gesil. ⁸tain ou gonoḳ oḳolre ḳoila, “afnara Betelham zaukka, gia bala ḳori ou huruttar tallash ḳoroukka. tan kunu ḳobor faile amare zanaiba, teu amio gia tanre boḳti dimu.”

⁹Razar hukum faia gonoḳ oḳol roana dila. Tara fubor asmano ze zonom tera deḳsila, ou tera tarar age age gelo. Ar ou hurutta ze zagat asla, ṭik ou zagat aia tera tami gelo. ¹⁰Tera tami gese dekia gonoḳ oḳolor bitre kushir ḍeu uṭlo, kushir maire tara goror bitre hamaila. ¹¹Goro hamaia ou huruttare tan ma Moriomor ḳandat deḳla. Dekia tara maṭit foṛi tanre boḳti dila, ar tarar beg kulia dami dami ufohar dila. Ou ufohar oilo shuna, loban ar mura-ator. ¹²Oile Allae kuabor maze tarare hushiar ḳori dila, tara zanu Raza Herudor gese ar firia na zain. Teu tara dusra fote nizor desho gelagi.

Hozrot Isa al-Mosir kuze Raza Herud

¹³Gonoḳ oḳol gia harle Allar eḳ firistae kuabor maze Iusufre doroshon dia ḳoila, “O Iusuf uṭo, fua ar tan maʼre loia Mishor desho bagia zaogi, bade ami zotodin na ḳoi, otodin honou roio. I fuare marilito ḳori Herude tukaibo.”

¹⁴Teu Iusuf uṭia ou raitu tarare loia Mishoro roana dila, ¹⁵ar Raza Herud morar ag forzonto hono roila. Ita goṭisil, zate agor eḳ nobir mazdi Mabude zeta zanaisla, ota fura oe. Mabude bataisla, “Ami amar futre Mishor taki ḍakia anlam.”

¹⁶Gonoḳ oḳole Raza Herudre ṭogisoin ḳoria tain kub gusa ḳorla. Erlagi gonoḳ oḳolor ges taki tain ze shomoyor ḳota hunsla, ou shomoe mafik Betelham gau ar er ash-fash elaḳat dui bosor ba tar ḳom boeoshi zoto fuain asla, ita hoḳolre marilibar hukum dila. ¹⁷Ete nobi Iaromiar mazdi Mabude zeta zanaisla, ota foligelo. Mabude bataisla,

¹⁸Ramat kub ḳanda-ḳaṭir aoaz huna zar,

Rahelae tair huruttaintor lagi ḳander,

kunumonte-u shanti or na,

tair huruttain shesh oigesoin.

¹⁹Bade Raza Herud moria harle Mabudor eḳ firista aia, Mishor desho Iusufre kuabor maze ḳoila, ²⁰“O Iusuf, uṭo, ou fua ar tan maʼre loia Israil desho zaogi. Fuare zetae marilita saisla, ita to morigesoin.”

²¹Teu Iusuf uṭia fua ar fuar maʼre loia Israil deshor shimanat aila. ²²Aia hunla, hou Herudor fua Arkilaus oḳon Ehudia zilar raza oigese. Erlagi tain hino zaite ḍoraila. Bade kuabe hukum faia Galil zilat gelagi. ²³Galilo gia Nasarot namor eḳ gaut boshot ḳorla. Ita goṭilo, zate agor nobi oḳolor mazdi zeta zanail oisil, ota oḳon fura oe. Zanail oisil, “Tanre Nasaroti ḳoia ḍaḳa oibo.”

Hozrot Isae ḳam shuru ḳorla (3:1-4:25)

Hozrot Ehia (a:)-or toblig

¹Ou shomoe Ehudia zilar morubumit aia Ehia nobie toblig korla, ²“Touba ḳoro, duniar maze behesti bashshai salu oite ar beshi deri nae.” ³Ou Ehia nobir befareu Ishaea nobie age bataisla,

Morubumir maze eḳzon manshe

zure zure elan ḳorra,

Tumra malikor fot sohi ḳoro,

tan solar rasta oḳol shida ḳoro.

⁴Ehia nobie to uṭor rumor ḳafoṛ findita ar ḳomro samṛar belṭ bandita. Tain faṛia mou ar foṛing ḳaita. ⁵tan toblig hunar lagi asta Ehudia zila, Zeruzalem ṭaun ar Zordan gangor sairobae taki bout manush tan gese aila. ⁶Aia zarzir guna shikar ḳorla, bade tain erare Zordan gango toubar gusol ḳoraila.

⁷tain deḳla, toubar gusol ḳorar lagi bout Forishi ar Siddekia mozobor manusho tan gese aira. ou tain ḳoila, “O hafor baichchain, asmani gozob aior dekia zan basanir fot tumrare ḳegie batai dilo? ⁸Tumra zudi hasaror touba ḳoria taḳo, te er folo deḳao. ⁹Mone mone ḳoio na, tumra Ibrahimor aolad. Huno, ami ḳoiram, Allae saile to ou fattor oḳol takiu Ibrahimor aolad banaita farba. ¹⁰Gasor guṛit to kuṛal lagailu ase. Ze gaso bala fol dore na, i gas ḳaṭia agunit falail oibo.

¹¹“Touba ḳorso gotike ami tumrare fanidi gusol ḳorailam, oile amar bade aro eḳzon aira, ein ama toneo himmotala, tan faor zuta boar laḳo ami nae. Tain aia tumrare Pak Ruh ar aguindi gusol ḳoraiba. ¹²Tan kula to tan atou ase, ikan dia tain dan uaia ugaro tulba, ar susare ou agunit falaia zalaiba, ze aguin kunu shomoe nibto nae.”

Hozrot Isar pak gusol

¹³Ou shomoe Galil zila taki Hozrot Isao pak gusol ḳorar lagi, Zordan gango Ehia nobir gese aila. ¹⁴Oile Ehiae tanre oḳan ḳoia na ḳorla, “Afne aisoin ni amar gese, amaru zorur asil afnar gese gia gusol ḳora!” ¹⁵Isae zuaf dila, “Aichcha, oḳon olau ouk, karon amrar usit oilo Allar morzi furon ḳora.” Ikan hunia Ehia razi oigela.

¹⁶Pak gusol ḳoria fani taki uṭteu Isae deḳla, asman dui bag oigese, ar Allar ruh faror surot doria tan ufre lamia aira. ¹⁷Ou shomoe asman tone gaibi aoaz oilo, “Einu amar ḳas maear zon Ibnulla, en ufre ami kub kushi.”

Hozrot Isare Iblise forikka ḳorlo

¹Pak gusol ḳorar bade, Allar Pak Ruhur isharae Isare morubumit neoa oilo, zate ou shomoe Iblise tane forikka ḳorar shuzug fae. ²Morubumir maze tain eḳlagare sallish din sallish rait ruza asla, kunuzat ḳani ḳaisoin na. Erbade tan kub feṭo buk laglo. ³Ou shomoe Iblise aia tanre ḳoilo, “Tumi zudi Ibnulla, Allar ḳas maear zon o, te ota fattorre ḳo na ruṭi oizito.”

⁴Isae zuaf dila, “Allar kalamo leḳa ase, ḳali ruṭi ḳaileu manush base na, borong Allar fortek kalameu manush base.”

⁵Teu he Isare loia fobitro ṭaun Zeruzalemo gelo, gia Baetul-Mukaddos kaba goror minarar ufre tane uba ḳoraia ḳoilo, ⁶“Tumi zudi Allar ḳas maear zon o, te deki sain, on taki fal dia lamat foṛo, kitabo to leḳa ase,

Allae tan firista oḳolre hukum diba;

ar tara nizor atdi tumare doriliba,

zate tumar fao-o kunu fattoror suṭ na lage.”

⁷Isae tare ḳoila, “Kitabo ou ḳotao leḳa ase,

Tumi tumar Mabud Allare forikka ḳorat lagio na.”

⁸bade Iblise tanre kub usa eḳ faṛor ufre loia gelo, nia eḳ foloḳe duniar tamam mulluḳ ar otar hoḳol zak-zomoḳ deḳailo ar ḳoilo, ⁹“Tumi zudi amare soizda ḳorilao, te i hokkolta ami tumare dilaimu.”

¹⁰Isae zuaf dila, “Dur shoetan, bag! Allar kalamo ase, tumi ḳali tumar Mabud Allareu ḍoraio, ḳali tan ebadot ḳorio.”

¹¹oḳan hunia Iblis tan ges taki horia gelogi, ar Allar firista oḳol aia tan ḳezmot ḳorla.

Hozrot Isa al-Mosir toblig

¹²Bade Isae ḳobor faila, Ehia nobire aṭok koria zelo harail oise, oḳan hunia tain Galil zilat gelagi. ¹³Hono gia Nasarot gau saṛia Sobulon-Noftali elaḳar aoror faror Kofornaum ṭauno gia roila. ¹⁴ita hoḳolta oilo, zate Ishaea nobir mazdi Allae zeta bataisla, ota oḳon folizae. Ishaea nobie ḳoisla,

¹⁵Bidormi manshor boshot ḳana Galil zilar

aoror faror Sobulon-Noftali elaḳar manush,

ar Zordan gangor dusra faror manshor gese

Allar nur zair oibo.

¹⁶Zeta manush be-foti bonia andarir maze zindegi ḳaṭaira,

tara Allar nuror moha rushoni deḳba.

Ar zera goin andarir maze boshot ḳore,

tarar geseo Allar nur zair oibo.

¹⁷Ou shomoe taki Isae toblig korla, ḳoila, “Touba ḳoro, ḳaron duniar maze behesti bashshai salu oite ar beshi deri oito nae.”

Hozrot Isar foela shagrid oḳol

¹⁸Hozrot Isa Galil aoror faredi aṭia zaira, ou shomoe deḳla, Saimon urfe Fitor ar en bai Andriase aoro zal baira, era to zalua asla. ¹⁹Isae erare ḳoila, “Amar loge ao, ami tumrare manush dorar zalua banaimu.” ²⁰Loge loge era zal falaia Isar loge roana oigela.

²¹On tone tuṛa age gia deḳla, Iakub ar Hannan tara duio baie bafor loge nao-o boia zal zuit-zait ḳorra. Erar bafor nam Zibudia. Isae erare dekia ḍaḳ dila, ²²ḍaḳ hunia erao tarar bafore nao-o toia Isar loge aila.

Hozrot Isae bout bemarire shifa ḳorla

²³Bade Isa Galil zilar hoḳol zagat guri guri, honor nanan mosido gia nosiot ḳorla, ar behesti bashshair kush-ḳobri toblig korla. Erloge bout nomunar bemarire bala ḳorla. ²⁴Asta Shiria deshor maze tan ḳobor roṭi gelo. Ete nanan nomunar bemar-azar ar zala-zontronae zeta manshe ḳoshṭo faisil, zerare zin-bute dorsil, mirgi ar ordong bemari zoto manush asil, manshe otare Isar gese loia aila. Tain era hoḳolre bala ḳorla. ²⁵Galil, Dikafoli, Zeruzalem, Ehudia ar Zordanor oinno far taki bout manush Isar ḳore ḳore roana oila.

Faṛor feṭo Hozrot Isar talim (5:1–7:29)

Kun kun manush nek-kofali

¹Bout manush aisoin dekia Isa gia eḳ faṛor ufre uṭila. Uṭia boar bade tan shagrid oḳol ḳandat aila. ²Shagrid oḳolre dekia tain ou talim dila, ḳoila,

³“Nek-kofali ou manushu, zara dil taki nizore gorib mono ḳore,

behesti bashshai to tarau faiba.

⁴Tarau ḳofali, zarar mono oḳon duk ase,

tarau to shuk faiba.

⁵Tarau ḳofali, zarar sal-cholon norom,

i dunia to tararu oibo.

⁶Tarau ḳofali, zera dile-zane pak-forezgarir lagi ḳande,

tarar ou asha fura oibo.

⁷Tarau ḳofali, zara manshore doya ḳore,

tarau to doya faiba.

⁸Tarau ḳofali, zarar dil ḳaṭi,

ḳaron tarau Allar didar faiba.

⁹Tarau ḳofali, zara manshore shantie raḳar lagi menot ḳore,

Allae tarare tan afon aolad ḳoia ḍakiba.

¹⁰Tarau ḳofali, zara Allar hukum mafik solat gia

zulum-mosibot shoijjo ḳore,

behesti bashshai to tarau faiba.

¹¹“ar tumrau ḳofali zarare amar lagi manshe ginnae, manshe tumrare zulum ḳore ar nanan nomunar misa bodnam gae. ¹²Ila oile mono rakio, tumrar age ze nobi oḳol aisla, ita manshe ou nobir ufreo ola zulum ḳorta. Te tumra kushi-bashi ar furti ḳorio, ḳaron tumrao ou nobi oḳolor laḳan behesto bout boṛo furushkar faibae.

Mumin oḳol duniar batti ar nun

¹³“tumra oilae duniar nun, oile nunor gun zudi nosṭo oizae, te ar nunta ḳora zae ni? i nun to ar kunu ḳamo lage na. manshe ita bare falai dein ar itar ufredi aṭoin.

¹⁴“huno, tumra oilae duniar batti. faṛor uforor kunu ṭaun to lukail raḳa zae na. ¹⁵Ar kunu manshe lem zalaia ṭukrir tole toe na, ikṭa lem-danir ufreu toe, zate goror hoḳole for deḳoin. ¹⁶ou laḳan tumrar foro manshor samne zolouk, zate tumrar bala ḳam dekia manshe tumrar behesti baf, Alla Pakor tarif ḳoroin.

shoriotor befare talim

¹⁷“Tumra ikan mono ḳorio na, ami Tourat kitab ar nobi oḳolor sohifa batil ḳorat aisi. Ami to ita batil ḳorat nae, borong fura ḳorat aisi. ¹⁸ami hasa ḳota ḳoiram, Tourat kitabor hoḳol ḳota zotodin na folise, oto din i kitabor eḳṭa horof ba zer-zoboro batil oito nae. asman-zomin ḳoe na oa forzonto, ikan batil oito nae. ¹⁹Tourat kitabor kunu huru-muru hukumo zudi ḳeu na mane, ba i hukum na manar lagi manshore foramish dey, te behesti bashshait tareo hoḳol taki huru ḳoa oibo. Oile ze zone i hukum-ahkam amol ḳore ar manshoreo hikae, behesti bashshait tare bout dam deoa oibo. ²⁰Ami tumrare ḳoiram, alim-ulama ar Forishi oḳolor amol takio, tumrar amol zudi aro bala na oe, te kunumonte-u behesti bashshait hamaitae fartae nae.

Rag-gusar befare hushiari

²¹“Tumra huncho, agor amolor manshor gese ḳoa oise, ‘Kun ḳorio na, zegie kun ḳorbo, he i kunor daṛo foṛbo.’ ²²Oile ami tumrare ḳoiram, ze manshe tar bai-biradoror loge rag-gusa ḳore, he bisaror daṛo foṛbo. He zudi tar baire ḳoe, ‘Tumi to be-aḳol’ te aro boṛo bisaror daṛo foṛbo. Ar ze zone tar baire ḳoe, ‘Tumi beokuf,’ he duzoḳor aguino zolbo.

²³“Erdae kurbani ḳanat gia Allar name lilla-sodga dibar shomoe zudi tumar mono oizae, tumar loge tumar kunu bair bibad ase, ²⁴te tumar lilla-sodga ou zagat toia, age gia tumar bair loge miṭ-maṭ ḳoro, bade gia tumar kurbani deo.

²⁵“Ḳeu tumar birudde kunu mamla ḳorle adaloto zaoar ageu tar loge zoldi miṭ-maṭ ḳorilio. Ila na ḳorle, he tumare hakimor ato dibo, hakime tumare fulishor haola ḳorba, ar fulishe tumare zelo haraiba. ²⁶heshe tar shullo-ana faona adae na ḳora forzonto, tumi kunumonte-u saṛa faitae nae. ami tumrare ashol ḳota ḳoilam.

zina ar ḳosom befare hushiari

²⁷“Tumra huncho, age batail oise, ‘Zina ḳorio na.’ ²⁸Oile ami tumrare ḳoiram, kunu beṭae zudi kunu beṭi manshor bae ku-nozore sae, te he ou shomoe mone mone tair loge zina ḳorlo.

²⁹“Tumar ḍain souke zudi tumare gunar fote ṭane, te i souk tulia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala. ³⁰Tumar ḍain ate zudi tumare gunar fote ṭane, i at ḳaṭia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala.

³¹“Aro ḳoa oise, ‘Ze manshe tar boure talaḳ dey, he boure talaḳ nama deuk.’ ³²Oile ami tumrare ḳoiram, ze manshe zina saṛa oinno kunu ḳarone nizor boure talaḳ dey, he to tar boure zinakur banae. Ar talaḳ faoa beṭire zegie bia ḳore, he-o zinakur bone.

³³“Tumra to zano, agor zomanar manshor gese batail oise, ‘Misa kunu ḳosom ḳorio na, ar zekunu ḳosom ḳorle iṭa Allar name adae ḳorio.’ ³⁴Oile ami tumrare ḳoiram, kunuzat ḳosom ḳorio na. Behestor name ḳosom ḳorio na, ikan to Allar arosh. ³⁵Duniar name ḳorio na, ikan to Allar ḳodom mubarok toar zaga. Zeruzalemor nameo ḳosom ḳorio na, ikan oilo mohan bashsha Allar ṭaun. ³⁶Tumar nizor matar name ḳosom ḳorio na, i matar eḳsa sulre dola ba ḳala ḳorar ḳemota to tumar nai. ³⁷Tumrar mator oeḳan oe, ar naḳan na ouk. Huno, itar bare ar zototau oe, ita Iblis taki oe.

Bodla loar befare talim

³⁸“Tumra to huncho, age batail oise, ze forimane ḳeti oise, ou forimane shaza dio, ‘Soukor bodla souk ar dator bodla dat.’ ³⁹Oile ami ḳoiram, ḳeu zudi tumrar loge ḳaraf bebohar ḳore, te tumra er bodla loio na, borong kunu manshe tumar ḍain galo soṛ marle, tare bau galo fatia dilaio. ⁴⁰Ḳeu zudi mamla-mokoddoma ḳoria tumar kurta nitogi sae, te tumar saddoro dilaio. ⁴¹Ḳeu zudi tumare ḳoe, tar gaiṭ boia loia eḳ mail zaitae, te tumi tar loge dui mail zaiogi. ⁴²Ḳeu tumar gese kunta kuzile tare dio. Ḳeu aolat saile, tare firai dio na.

Dushmonre mohobbot ḳoro

⁴³“Tumra zano, age to batail oisil, ‘Tumar ari-forire maea ḳorio ar dushmonre ginnaio.’ ⁴⁴Oile ami tumrare ḳoiram, tumrar dushmonreo maea ḳorio. Zera tumrare zulum ḳore, tarar lagi dua ḳorio. ⁴⁵ita dekia manshe buzba, tumra hasau tumrar behesti baf Alla Pakor maear aolad bonigeso. tain to bala-bura hoḳolor ufre tan shuruz uṭain, dindar ar naforman hoḳolor ufreu meg-fani dein. ⁴⁶Zara tumrare mohobbot ḳore, tumra zudi ḳali tarareu mohobbot ḳoro, te tumra kita furushkar faibae? Gushkur toshildar oḳoleo ila ḳore na ni? ⁴⁷Tumra zudi ḳali nizor baire salam deo, te oinno manush taki beshi ar kita ḳorrae? Bidormi oḳoleo ila ḳoroin na ni? ⁴⁸Erlagi ami ḳoiram, tumrar behesti baf Alla Pak zela ḳaṭi, tumrao ola ḳaṭi o.

Dan-ḳoerator befare talim

¹“tumra hushiar roio, manshore deḳanir lagi ebadot-bondegi ḳorio na, ila ḳorle tumrar behesti baf Alla Pakor ges taki kunu furushkar faitae nae.

²“Kunu manshore dan-ḳoerat dile bonḍo oḳolor laḳan dio na. Tara to manshor ges taki tarif faita ḳori mosido-mondiro ar fote-gaṭe, ḍul-ḍofki bazaia lilla-zoḳat dein. Ami tumrare hasau ḳoiram, tarar furushkar to tara failise. ³Oile tumi kunu dan-ḳoerat dile, tumar ḍain ate bilaile bau ate zanu na zane. ⁴Oula lukaia dan ḳorio. Teu tumar behesti baf Alla, zein lukaia hoḳolta deḳoin, tainu tumare furushkar diba.

Dua ḳorar befare talim

⁵“Tumra zebla dua ḳoro, ou shomoe bonḍo oḳolor bab dorio na. Tara manshore deḳanir lagi mosido-mondiro ar fotor muko ubaia dua ḳore. Ami tumrare hasau ḳoiram, itae to tarar furushkar failise. ⁶Oile tumi dua ḳorar bala goror doroza-zanala lagaia dua ḳorio, ar tumar niraḳar baf, zenre deḳa na geleo azir asoin, hou Allar gese saio. Tain to gufon hoḳolta deḳoin, tainu tumare fol diba.

⁷“Tumra zebla dua ḳoro, ou shomoe duniar manshor laḳan ḳamoḳa ber-beri ḳorio na. Tara mono ḳoroin, beshi beshi ḳoile Allae tarar dua ḳobul ḳorba. ⁸Tumra tarar laḳan oio na, tumrar behesti baf Allar gese saoar ageu, tain zanoin tumrar kita dorḳar. ⁹Erlagi tumra olaḳan dua ḳorio,

O baba, amrar behesti baf,

tumar nam fak-fobitro mana ouk.

¹⁰Duniait tumar bashshai zoldi auk,

shob tumar morzi mafik kora zauk,

behesto zela oula duniait,

behesto zela oula duniait.

¹¹O baba, aizkur ḳani aizku deo,

maf ḳoro amrar hoḳol oforad,

¹²zara amrar birudde ḳorse faf,

amra to tarare dilaisi maf.

¹³Falaio na amrare forikkat,

shoetanor ḳobza taki ḳoro ḳalas.

¹⁴Huno, tumra zudi aroḳzonor oforad maf ḳoro, te tumrar behesti baf Allae-o tumrar oforad maf ḳori diba. ¹⁵Oile tumra zudi oinnore maf na ḳoro, te tumrar behesti bafe tumrareo maf ḳorta nae.

Ruzar befare talim

¹⁶“Tumra zebla ruza raḳo, ou shomoe bonḍo oḳolor laḳan muk kala ḳorio na. Tara ruza raḳsoin, oḳan deḳanir lagi souk-muk kala ḳori raḳoin. Ami tumrare hasau ḳoiram, itae to tarar furushkar failise. ¹⁷Oile tumi ruza raḳle muk-at doio, matat tel-fani dio, ¹⁸zela manshe buzto na fare, tumi ruza raḳso. Teu tumar niraḳar baf, zenre deḳa na geleo azir asoin, hou Allaeu ita deḳba. Tain to gufon hoḳolta deḳoin, tainu tumare fol diba.

Aḳerator don ḳamao

¹⁹“I zindegit tumra nizor lagi oto don-shompod zomaio na. Duniar shompodor maze zongare dore, fuke ḳae ar hing kudia sure ney. ²⁰Oile behestor maze nizor lagi samana zomao, hino zongare dore na, fukeo ḳae na ar surio oe na. ²¹mono rakio, tumar don zeno, mon-o hono roe.

²²“Zano to, souk oilo shorilor batti. Tumar souk zudi bala oe, te tumar asta shorilo soḳsoḳa for oibo. ²³Oile tumar souk zudi ḳaraf oe, te asta shorilu ḳala andair oizibo. Tumar dilor batti andair oile, i andair boṛo bezuita.

²⁴“Zano ni, kunu gulameu dui munibor ḳezmot ḳorto fare na, he eḳzonre ginnaibo aroḳzonre bala faibo. Arnae eḳzonor bae kial ḳorbo, aroḳzonre elami ḳorbo. Te tumrao Alla Pak ar don-samana, duiotar ḳezmot eḳloge ḳortae faro na.

²⁵“Erdae ami tumrare ḳoiram, kila ḳaitam ar kila finditam, ita loia sinta ḳorio na. Ḳani taki zan boṛo, ḳafoṛ-sufoṛ taki shoril boṛo.

²⁶“Asmanor ou fakintor bae sao, tara zalao bain ḳore na, fosholo ḳaṭe na, ugaro kunta zomae na, ḳali tumrar behesti baf Allae tarar kuraḳ dein. Te tumra kunu ita taki aro dami nae ni? ²⁷ḳo sain, tumrar maze ḳeu sinta-babna ḳoria tar haeati ekkan gonṭa baṛaito farbo ni?

²⁸“Finnor ḳafoṛor lagi sinta ḳoro ḳene? Tumra ou zongli fulor bae saia deḳo, ita ḳoto beshi shundor! Itae to nizor shundoror lagi kuntau ḳore na, kunu rongo silai ḳore na, baino ḳore na, emneu oe. ²⁹Te ami ḳoiram, Bashsha Sulaiman oto zak-zomoḳor maze roileo tan lebas to ota egu zongli fulor laḳano shundor asil na. ³⁰Deḳrae ni, zongolor maze ou zeta shundor ful oḳon ase, ḳail oileu manshe ita daru banaia aguindi zalaibo. Allae zudi ou zongolre ola shundor ḳori hazaisoin, te o ḳomzur imandar oḳol, tumrareo tain shundor ḳori hazaita nae ni? ³¹Erdae kita ḳaitae ar kita finditae, ita loia sinta ḳorio na. ³²I duniar manshe ḳali ota loiau danda ḳore. Tumrar behesti baf Allae to zanoinu, ita hoḳolta tumrar zorur ase. ³³Erlagi tumra foelau Allar morzi zugaia solo, tan bashshair dandat ro. Teu ita hokkoltao tumra faibae. ³⁴Ḳailkur sinta ḳorio na, ḳailkur befar ḳailkur ufre saṛi deo. Dinor azab dinor lagi zotesṭo.

Manshor dush tukaio na

¹“Tumra manshor dush tukanit roio na, teu tumrar dusho tukail oito nae. ²Tumra zela manshor dush tukao, Allae-o oula tumrar dush tukaiba. Tumra zela falladi mafibae, tumrar lagio ola mafa oibo.

³Tumar bair soukor bitre guṛa ase ikan deḳrae, oile nizor souko gasor seli ase ikan deḳrae na ḳene? ⁴Tumar sokut seli hamaise ikan zebla deḳrae na, te tumar baire kila ḳoibae, bai, tumar sokut guṛa hamaise, ao, bar ḳoria dei? ⁵Haere bonḍo, foela nizor souk taki seli bar ḳoro, bade tumar bair souk taki guṛa bar ḳorat lagle bala ḳori deḳtae farbae.

⁶“huno, kuttar samne fak-fobitro kunu siz dio na. shuoror samne moni-mukta siṭaio na. arnae ou sizre tarar faodi uṛia, ulṭa aia tumrareo hamla ḳorta faroin.

dua-munazator befare oada

⁷“Ami tumrare ḳoiram, sao, tumrare deoa oibo. Talash ḳoro, teu faibae. Duaro ṭuka deo, teu duar kula oibo. ⁸Zara sae, tarau to fae. Ze tallash ḳore he fae. Ze duaro ṭukae, tar lagi duar kula oe. ⁹Tumrar maze ila kunu ma-baf ase ni, zar fute ruṭi saile maṭi dibo? ¹⁰Mas saile haf dibo? ¹¹tumra ḳaraf oia-o zudi tumrar huruttainre bala bala siz ditae zano, te zara behesti baf Alla Pakor gese saibo, tain to nichoe tarare bala bala siz dan ḳorba, ita to shababik. ¹²Huno, tumra manshor ges taki zelaḳan bebohar faitae sao, tumrao hoḳolor loge ou laḳan bebohar ḳoro. Otau oilo Tourat kitab ar nobi oḳolor sohifar mul talim.

Kun fote soltae

¹³“Huno, tumra sifa duaredi hamaio, ḳaron ze fote binashor bae ṭane, i fot muṭa, fotor duaro boṛo, bout manush ou duaredi hamain. ¹⁴Oile ze fote gele zindegi mile, i fotor duar sifa, foto huru-muru. Kub ḳom mansheu i duaror kuz fain.

¹⁵“Bonḍo nobi oḳol taki hushiar roio. Tara tumrar gese meṛar surote ae, oile bitre bitre tara raikkosh bagor laḳan. ¹⁶Tarar zindegi dekiau sintae farbae. Zano to, gosa-ḳaṭar maze kunu angur dore ni ba bon-zonglar maze ḍumur fol dore ni? ¹⁷Ṭik ou laḳan, bala gase to bala folu dore ar mondo gase mondo folu dore. ¹⁸Bala gase to mondo fol dore na, ar mondo gase bala fol dore na. ¹⁹Ze gase bala fol dore na, igure ḳaṭia daru zalail oe. ²⁰olau bonḍo nobi oḳolor zindegir fol deḳleu itare sin.

behesti bashshait ḳe hamaibo?

²¹“mono rakio, amare ‘huzur, huzur!’ ḳoileu zen behesti bashshait hamaizibae, ikan ṭik nae. borong ze zone amar behesti baf Alla Pakor morzi zugaia sole, ḳali he-u hamaito farbo. ²²Hou din aile boute ḳoiba, ‘Munib, munib, amra tumar name gaibi ḳobor ḳoisi na ni? Tumar name zin-but saṛaisi na ni? Tumar name bout keramoti deḳaisi na ni?’ ²³Oile ami tarare zuaf dimu, ‘Dur, Iblisor dol! ami to tumrare siniu na, amar ges taki bago.’

imanor dui nomuna

²⁴“Ze manshe amar ou talim hunia amol ḳore, he aḳoldar manshor laḳan mozbut kuṭir ufre tar gor banae. ²⁵Bade meg-tufan ar zuar aia ou gorre ṭela dileo falaito fare na, ḳaron ikan to mozbut kuṭir ufre banail oise. ²⁶Oile ze amar talim huniao amol ḳore na, he be-aḳolor laḳan norom maṭir ufre gor banae. ²⁷Bade zebla meg-tufan ar zuar aia ou gorre ṭela dey, ou shomoe ikan foṛia sefṭa oizae.”

²⁸Isar ita talim hunia manush taijjub bonigela. ²⁹Ḳaron tain to tarar moulana oḳolor laḳan talim na dia, ḳemotaban manshor laḳan talim dita.

Hozrot Isar dosh keramoti (8:1–9:38)

Fosa-kushṭo bemarire bala ḳora

¹Hozrot Isa faṛ taki lamia aile bout manush tan ḳore ḳore aila. ²Ou shomoe eḳ fosa-kushṭo bemarie tan ḳandat aia faot foṛia ḳoilo, “Huzur, afnar morzi oile amare ou nafaḳ bemar taki bala ḳorta faroin.” ³Teu tain at baṛaia tare soia ḳoila, “Oe ami sairam, tumi pak-saf o.” Ḳoar loge logeu tar bemar shifa oigelo. ⁴Isae tare ḳoila, “Huno, ita ḳeurore hunaio na, ḳali imam sabor gese gia deḳao. Musa nobir shoriot mafik pak-saf oar lagi zela kurbani ḳora zorur, ou kurbani dileu shomaze zaniliba tumi bala oigeso.”

Ruman subedaror gulamre bala ḳora

⁵Erbade Isa gia Kofornaum ṭauno hamaila. Hino Ruman sifair eḳ subedare tan gese aia minot-ḳajji lagaila, ⁶“Huzur, amar gulamor obosh bemar oia bisnat foṛi roise, he kub ḳoshṭo ḳorer.”

⁷Isae enre ḳoila, “Aichcha, ami zaimune, gia tare bala ḳormu.”

⁸Teu subedare ḳoila, “Huzur, afnar moto zone amar baṛit toshrif nita, ami to er laḳ nae. Afne ḳali mukkandi ḳoileu he bala oizibo. ⁹afne to buzra, amio amar kamanḍaror hukume soli, oula amar sifai oḳolo amar hukume soloin. ami era eḳzonre ao ḳoile ae, zao ḳoile zae. amar gulamre zudi ḳoi, oḳan ḳoro, he ikan ḳore, te afneo ola mukdi hukum dileu he bala oizibo.”

¹⁰Ikan hunia Isa ekkere taijjub oigela, tan ḳore oia zoto manush aoat asil, erare ḳoila, “Ami tumrare hasau ḳoiram, i subedar to bidormi Ruman manush, oile amar Boni Israilor mazeo oto boṛo mozbut imandar ami ar deḳsi na. ¹¹Huno, fub ar foismor desh taki bout zon aiba, tara Hozrot Ibrahim, Isʼhak ar Iakub nobir loge behesti bashshait ḳanit boiba. ¹²oile behesti bashshait zara taḳar ḳota, tarare bare andair gato falai deoa oibo. hino tara ḳanda-ḳaṭi ḳorba ar zala-zontronae dat kiṛimiṛi ḳaiba.”

¹³Bade Isae ou subedarre ḳoila, “Tumi zaogi. Tumi zela ekin ḳorso, olau ouk.” Hasau, loge logeu hou gulam bala oigelo.

Hozrot Fitoror hoṛir shifa

¹⁴Erbade Hozrot Isa Hozrot Fitoror baṛit gela, gia deḳla, Fitoror hoṛir kub taf uṭse, tain bisnat foṛono. ¹⁵tane dekia Isae tan ato soila, ar loge loge taf saṛi dilo. beṭie uṭia Isar memandari lagla.

¹⁶Ou din hainjabala manshe zinor asorala bout zonre Isar gese loia aila. Isae tan mukor ḳotae-u erar zin saṛaila, ar hokkol bemarire bala ḳorla. ¹⁷Ita goṭlo, zate Ishaea nobir mazdi bout age zeta batail oisil, ota oḳon fura oe. Hono batail oisil,

Amrar hoḳol ḳomzuri tan ḳando nila,

amrar bemar-azar horaila.

Ḳaṭi ummot oar tagid

¹⁸Isar sairo galabae biṛ lagi gese dekia, tan shagrid oḳolre hukum dila aoror hofaro zaitagi. ¹⁹Ou shomoe eḳzon moulana aia Isare ḳoila, “Huzur, afne zeno zaiba, amio hono zaimu.”

²⁰Isae enre ḳoila, “Hunoukka, hialor gat ase, fakiro bada ase, oile ami Bin-Adomor mata toar ṭai nai.”

²¹Aroḳzon shagride aia ḳoila, “Huzur, amare baṛit zaite deukka, ami foela gia amar babar dafon-ḳafon ḳoria ai.” ²²Tain ḳoila, “Mora oḳoleu tarar morare maṭi deuk, tumi amar loge solo.”

Aoror tufan bondo ḳora

²³Isa aoror hofaro zaita ḳori, tan shagrid oḳolre loia eḳ nao-o uṭla. ²⁴Isa naor maze gumaira, ou shomoe aḳtau aoror maze boṛo eḳ tufan ailo, tufane nao ḳan buṛizibar dosha oigelo. ²⁵I dosha dekia shagrid oḳole Isare hozag kori ḳoila, “Huzur, amrare basaukka, amranu mori zairam.”

²⁶Isae zuaf dila, “O ḳomzur imandar oḳol, tumra ḍorairae ḳene?” oḳan ḳoia tain uṭia tufan ar aorore domoḳ dila, teu hokkolta tir oigelo. ²⁷I keramoti dekia tara taijjub oia ḳoila, “Ein ashole ḳe? Tufan ar aoreo deki tan hukum mane!”

Bute dora duizon manush

²⁸Erbade Isa aor faṛi dia Zerasini oḳolor desho aila. Ou shomoe bute dora duizon manush ḳobrostan taki baroia tan gese ailo. Tara ola zonun fagol asla zen, tarare ḍoraia ḳeu ou fotedi zaito farto na. ²⁹Tara sillaia Isare ḳoilo, “O Allar ḳas maear zon Ibnulla, amrar loge afnar kita dorḳar? Shomoe oar ageu afne amrare satanit aichchoin ni?”

³⁰ou shomoe tarar ges taki tuṛa duroi boṛo eḳ shuoror fale ḳaoat asla. ³¹But oḳole Isare minot ḳori ḳoilo, “Afne amrare ḳedaite saile, ou shuoror falor maze faṭai deukka.”

³²Isae tarare izazot dia harle tara gia ou shuoror falor maze hamaigelo. Ar shuoror fale aoror ḳaṛa soredi kub zure douṛaia gia fanir maze buṛia morla.

³³Ita dekia shuoror raḳal oḳole douṛaia gia gaur hoḳol manshore ḳobor zanaila, erloge ou bute dora manshor ḳotao ḳoila. ³⁴I goṭona hunia gaur hoḳol manush Isar loge deḳa ḳorat aila. Tan loge deḳa ḳoria tara minot ḳori ḳoila, “Meherbani ḳori amrar desh taki zaukkagi.”

Obosh bemarire shifa ḳora

¹Bade Hozrot Isa nao-o ḳori aor faṛi dia nizor ṭauno aila. ²Aia harle ḳoezon manshe eḳzon obosh bemarire folodi boia loia tan gese ailo. Tarar imanor bol dekia Isae ou bemarire ḳoila, “Mono bol raḳo re fut, tumar guna maf ḳora oise.”

³Ikan hunia ḳoezon moulanae mone mone ḳoila, “I beṭae to shiriki ḳorer.” ⁴Isae tarar dilor bab buzia ḳoila, “Afnara ḳene ila ku-sinta ḳorra? ⁵Amar lagi kunḳan ḳoa shuza, tumar guna maf ḳori dilailam, na uṭo, tumar bisna loia baṛit zaogi? ⁶Te oḳon afnara forman deḳoukka, i duniat guna mafir ḳemota ami Bin-Adomor ase.” Oḳan ḳoiau tain bemari beṭare ḳoila, “Oba uṭo, tumar ḳeta-balish loia baṛit zaogi.”

⁷Ḳoiteu hi bemari beṭa uṭia tar baṛit gelogi. ⁸Ita dekia manush taijjub oigela, Allae manshore oto ḳemota disoin ḳori tara Allar tarif ḳorla.

Hozrot Motire torikar daot

⁹Isae fotedi aṭia zaira, ou shomoe deḳla, Moti namor eḳzon manush ḳazna tular ofiso boiroisoin. Dekia tanre ḳoila, “Ao, amar ummot o.” Teu Moti uṭia Isar ḳore ḳore gela.

¹⁰erbade Isae tan shagrid oḳolre loia Motir baṛit gia ḳaoat boila. tan loge bout ḳazna tulra ar naforman oḳolo ḳanit asla. ¹¹Ita dekia Forishi mozobor manshe Isar shagrid oḳolre ḳoila, “Tumrar murshide gushkur ḳazna tulra ar ḳobis oḳolor loge ḳaoa-daoa ḳoroin ḳene?”

¹²Ikan hunia Isae ḳoila, “Bala manshor lagi ḳobiraz lage na, oile bemarir lagi to lage. ¹³Allar kalamo batail oise, ‘Ami kunu foshu kurbani nae, ḳali doya deḳtam sai.’ Te ou aeator mani kita, oḳan tallash ḳoroukka. Mono raḳba, ami kunu forezgarre daot deoat aisi na, ḳali gunagar oḳolreu daot ditam aisi.”

Furan talim taki Hozrot Isar talim bala

¹⁴Erbade Ehia nobir ummot oḳole aia Isare zikaila, “Huzur, amra ar Forishi mozobor manshe hamesha ruza raki, oile afnar ummot oḳole ruza raḳoin na ḳene?” ¹⁵tain zuaf dila, “nosha loge taḳle logor boirati kunu duk deoa zae ni? deḳbane, ila shomoe aibo, zebla noshare tarar ges taki horail oizibo, hou shomoe tara ruza raḳba.

¹⁶“Ana-doa noea ḳafoṛor ṭukradi ḳeu furan kurtat tali dey na. Ila ḳorle doia harle furan ḳafoṛ taki noea tali kus oia siṛizae, ar siṛaḳan aro boṛo oe. ¹⁷Furan samṛar tolit ḳeu noea anguror rosh bore na. Borle ou taza roshor fafe toli faṭia rosh ar toli duiota borbad oe. Erlagi manshe taza rosh noea tolit toin. Teu duiota base.”

Eḳ mora fuṛi ar bemari beṭi

¹⁸Hozrot Isae zebla ota befare talim dira, ou shomoe eḳ neta aia tan fao-o foṛia ḳoila, “Huzur, amar fuṛigu ou matro mara gese. Te afne aia meherbani ḳori taire atai dileu fuṛigu zinda oizibo.” ¹⁹Teu Isae tan shagrid oḳolre loia en loge roana dila.

²⁰Zaoar fote eḳ beṭie ḳoredi aia Isar saddoror kunat soilo. Baro bosor dori i beṭir beṭiara bemaror lou zaito. ²¹Beṭir ekin asil, tai zudi ḳali tan saddoror kunat soilito fare, te bemar bala oizibo. ²²Isae ṭer faia ḳoredi saia ou beṭire ḳoila, “Ḍoraio na go mai, tumar imanor boleu tumi bala oilae.” Oḳan ḳoar loge loge beṭi bala oigelo.

²³Erbade Isa hou netar baṛit gela. Gia deḳla, asta baṛir manshe hoi-hulla ḳorra, ar tarar shomazor reoaz mafik mora baṛit bashi-bazna bazaira. ²⁴Tain ḳoila, “Tumra hoḳol gor taki bare zao. Fuṛigu morse na, tai to gumar.” Ikan hunia manshe tanre loia asha-ashi lagaila. ²⁵Manshore bar ḳoria harle, tain gia goror bitre hamaia fuṛir ato dorla, dorteu tai uṭia boigelo. ²⁶Ar i goṭonar ḳota ou elaḳar hoḳolbae roṭi gelo.

Anda ar bubare bala ḳora

²⁷Isa ou netar baṛi taki bidae oia harle duizon anda beṭa tan ḳore ḳore gelo. Tara zure zure ḳoilo, “O Daudor aolad, amrare rohom ḳoroukka.” ²⁸Bade tain aia goro hamaile, hou duio andao tan gese ailo. Tain zikaila, “Tumra ekin ḳorrae ni, ami tumrare bala ḳortam farmu?” Tara ḳoilo, “Ji-oe huzur, afneu farba.”

²⁹Teu tain erar souk atai dia ḳoila, “Tumra zela ekin ḳorso, olau ouk.” ³⁰Oḳan ḳoiteu tarar souk bala oigelo. Bade Isae tarare kub doṛaia ḳoila, “Huno, ita ḳeurore hunaio na.” ³¹oile tara bar oia gia ash-fash hoḳol zagat tan i ḳobor roṭai dilo.

³²Hou duio anda zebla bala oia zairagi, ou shomoe manshe bute dora eḳ buba beṭare Isar gese loia ailo. ³³tain i beṭar but saṛanir bade tar zoban kuligelo, he mat-ḳota matilo. ita dekia hoḳole taijjub oia ḳoila, “asta Israil deshor maze ila ḳam to kunudin deḳsi na.” ³⁴Oile Forishi oḳole ḳoila, “Igie to butor bashshar shaijjoe but saṛae.”

Zomino foshol bout, ḳamla ḳom

³⁵Hozrot Isae gaue gaue ar ṭaune ṭaune gia tarar mosido hamaia talim dila. Tain behesti bashshair kush-ḳobri toblig korla, ar hoḳol nomunar bemarire bala ḳorla. ³⁶Ou shomoe manshor biṛ dekia tan kub duk laglo, ita manush to a-raḳali meṛar laḳan befana lagi gurira. ³⁷Teu Isae shagrid oḳolre ḳoila, “Zomino to foshol bout ase, oile ḳamla kub ḳom. ³⁸Erlagi zominor malikor gese dua ḳoro, tan foshol tular lagi tain ḳamla faṭaiba.”

Barozon sahabire fosond ar talim (10:1-42)

Barozon sahabire tobligo faṭani

¹Bade Isae tan barozon sahabire ḍaḳaia anla, ania zin-but saṛani, ar hoḳol zator bemarire bala ḳorar ḳemota dila. ²Ou barozon sahabi oila,

Saimon urfe Fitor ar tan bai Andrias,

Zibudiar fuain Iakub ar Hannan,

Filif ar Bortolmoe,

³Tumas ar ḳazna tulra Moti,

Alfir fua Iakub ar Toddey,

⁴muktizudda Saimon ar Ihuda Iskariat.

Ou Ihudae bade beimani ḳoria Isare dushmonor ato dorai disil.

⁵Ou barozon sahabire Isae hukum dila, ḳoila, “Tumitain tobligo zao, oile kunu bidormir gese ba Shomoria zatir kunu gaut zaio na, ⁶ḳali Boni Israilor arail meṛa oḳolor gese zao. ⁷Zaoar fote toblig kori ḳori zaio, ḳoio, Behesti bashshai daro aichche. ⁸Ar tumra bemari oḳolre bala ḳorio, morare zinda ḳorio, fosa-kushṭo bemarire bala ḳorio, ar zin-but saṛaio. Tumra zela bina ṭeḳae faiso, oula bina ṭeḳaeu dio. ⁹Zaoar shomoe loge ḳori ṭeḳa-foeshar toli, shuna-rufa ba eḳṭa shikio nio na. ¹⁰Tumra fotor lagi laṭi, gaiṭ-buski, zuta, ba duiṭa kurtao loge nio na. Ze zone ḳam ḳore, he ḳaoa-finda faoar zuka. ¹¹Tumra ze gaut hamaibae, ou gaur eḳzon zoiggio manshore tukaia bar ḳorio, i gau saṛia zaoar ag forzonto en baṛitu roio. ¹²Baṛir bitre hamanir bala tarare salam dio. ¹³I baṛi zudi salam faoar zuka oe, te tumrar deoa ou shanti tara faiba, ar zuka na oile tumrar shanti tumrar gese-u firia aibo. ¹⁴I zagar ḳeu zudi tumrare ḳobul na ḳore, tumrar ḳota na hune, te i baṛi ba gau taki baronir bala tumrar faor duil zaṛia falaia aio. ¹⁵Ami tumrare hasa ḳota ḳoiram, hashoror din ou gaur dosha taki, hou lannoti Sadum ar Amura ṭaunor dosha bout bala oibo.

Sahabi oḳolre agam hushiari

¹⁶“Huno, raikkosh bagor samne meṛar laḳan ami tumrare faṭairam. Erlagi tumra hafor laḳan salaḳ-sotur ar faro fakir laḳan shorol o. ¹⁷Hushiar roio, manshe tumrare doria adaloto shomzaiba, ar tarar mosido nia tumrare singladi marba. ¹⁸Amar nam loar lagi tumrare raza-bashshar samne neoa oibo. Tumra erar samne ar bidormi oḳolor gese amar befare shakki dibae. ¹⁹Manshe zebla tumrare dorai dibo, ou shomoe kita mattae ba kita ḳoitae, ita loia kunu sinta ḳorio na. Hou shomoe tumrare ita hikai deoa oibo. ²⁰Ashole tumrar mukdi zen tumra nize matbae, ikan nae, tumrar batuni bafor ze ruh tumrar bitre ase, hou ruheu itar zuaf diba.

²¹“Baie baire ar bafe fuare kun ḳoranir lagi dorai dibo. Fua-fuṛieo tarar ma-bafor bifokke gia tarare kun ḳoraibo. ²²Amar ḳarone hoḳol manshe tumrare ginnaibo, oile hesh forzonto ze ṭikia roibo, he-u rehai faibo. ²³Kunu gaur manshe tumrare zulum ḳorle, i gau saṛia oinno gaut zaiogi. Huno, ami hasa ḳota ḳoiram, Israil deshor hokkol ṭaun ar gaut tumrar toblig shesh oar ageu Bin-Adom hirbar aiba.

²⁴“Mono rakio, ustad taki shagrid boṛo nae, ar munib taki tar gulam boṛo nae. ²⁵Te shagrid tar ustador shoman, ar gulam tar munibor shoman oau zotesṭo. Hunrae ni, goror munibre zebla butor bashsha Bel-Sobul ḳoira, te goror baki hoḳolre tara aro ḳotota ḳoiba!

²⁶“Oile tumra tarare ḍoraio na, ḳaron ila gufon kuntau nai zeta zair oito nae. Ila lukailo kunta nai zeta ḳeu hunto nae ba zanto nae. ²⁷Ami andarir maze zeta tumrare ḳoisi, tumra ita foror maze ḳoio. Zeta ḳane ḳane huncho, ita saṭor ufore taki zure zure elan ḳorio. ²⁸Zara manshor ḳaeare binash ḳorto fare, oile ruhre kunta ḳorto fare na, tarare ḍoraio na. Zein ḳaea ar ruh duiotare duzoḳo zalaita faroin, ḳali tanre-u ḍoraio. ²⁹Huno, duiṭa soṛa faki ḳali dui ṭeḳae bike na ni? Oile tumrar batuni baf Allar hukum na oile ota egu soṛa fakio maṭit foṛe na. ³⁰Zano to, tumrar matar sulgesaino gona ase. ³¹Erdae tumra ḍoraio na. Tumrar dam to bout soṛa takio beshi.

³²“shomazor samne ze zone amare ḳobul ḳore, amio amar behesti baf Alla Pakor samne tare ḳobul ḳormu. ³³Oile ze manshe shomazor samne amare oshikar ḳorbo, amio tare amar behesti baf Allar samne oshikar ḳormu.

³⁴“Tumra mono ḳorrae ni, ami duniat shanti ditam aisi? Na, muṭeu nae, ami to duniat eḳ motobed laganit aisi. ³⁵Ami bafe-fuae, maʼe-fuṛie, ar hoṛie-boue bibad laganit aisi. ³⁶Manshor nizor foribaror zoneu tar loge dushmoni ḳorbo.

³⁷“Ze manshe ama taki tar ma-bafore beshi maea ḳore, he amar ummot oito farto nae. Ar ze zone ama taki tar fuare ba tar fuṛire beshi maea ḳore, he-o amar ummotor zuka nae. ³⁸Ze zone nizor duk-koshṭor solib boia loia amar ḳore na ae, he-o amar zuka nae. ³⁹Ze zone tar nizor zan basaito sae, he tar ashol zindegi kuaibo. Oile ze zone amar lagi tar zan kurbani dilae, he ashol zindegi faibo.

⁴⁰“Ze zone tumrare ḳobul ḳore, he amare-u ḳobul ḳore, ar ze amare ḳobul ḳore, he ashole hou Allareu ḳobul ḳore, zein amare faṭaisoin. ⁴¹Ḳeu zudi kunu nobire nobi ḳoia ḳobul ḳore, te ou nobie ze furushkar faiba, he-o ou furushkar faibo. Kunu allaraia manshore ḳeu zudi allaraia ḳoia ḳobul ḳore, te ou allaraia manshe ze furushkar faiba, he-o ou furushkar faibo. ⁴²Ar amar ummot zania ḳeu zudi tumrar mazor eḳ nogoinno zonreo eḳ gelas fani ḳaoae, te he kunumonte-u er furushkar taki bad foṛto nae.”

Hozrot Isare shondoe ar birudita ḳora (11:1–12:50)

Hozrot Isar dorbaro Ehia nobir shagrid oḳol

¹Hozrot Isae tan barozon sahabire ou talim dia harle, tain gaue gaue gia toblig ar talim deoar lagi roana oigela.

²Ehia nobie zelo taki zebla al-Mosir ḳamor ḳota hunla, ou shomoe tan ḳoezon shagridre faṭaila ḳobor zanar lagi. Era gia Isare zikaila, ³“Huzure ḳoisoin, zein aibar ḳota asil, afneu hein ni? Na amra ar ḳeuror lagi bar saitam?”

⁴Isae ḳoila, “Huno, ono aia tumrar nizor souke zeta deḳso ar huncho, ota gia Ehiare ḳo. ⁵Tanre ḳoio, anda manshe souke deḳra, lengṛaeo aṭira, fosa-kushṭo bemari bala oira, ḳalua oḳole hunra, mora manush zita oira, ar gorib oḳolor gese Allai kush-ḳobri toblig kora or. ⁶Huno, he-u nek-kofali, zar dilo amar befare kunu bada ae na.”

Ehia nobi ashole ḳe

⁷Ehia nobir shagrid oḳol zairagi, ou shomoe Ehiar befare Isae manshore ḳoila, “Kita ba, morubumit kita deḳat geslae? Batash aile zeta nol-ḳagṛae loṛe, ota deḳat geslae ni? ⁸Na, kita deḳat geslae? Shundor ḳafoṛ finno kunu manshore ni? Ashole, zera dami dami ḳafoṛ findoin, tara to razbaṛit taḳoin. ⁹Te tumra kita deḳat geslae? Kunu nobire deḳat ni? Huno, ami ḳoiram, Ehia to ḳali nobi nae, nobi takio boṛo. ¹⁰Ein to hou zon, zen befare asmani kitabo leḳa ase,

Huno, tumar age faṭaiar ami, amar fegambor,

ein gia ṭik-ṭak korba tumar solar fot.

¹¹Te ami tumrare hasa ḳota ḳoiram, Ehia taki boṛo asta duniatu kunu adom asla na. Oile behesti bashshair maze hoḳol taki huru zono, Ehia taki mohan. ¹²Ehia nobir amol taki oḳon forzonto behesti bashshai kub mozbut oia aguar, ar zera imane mozbut, tara dile-zane aia er bitre hamaira. ¹³Huno, Ehia nobir amol forzonto Hozrot Musar Tourat kitab ar shob nobir sohifar maze, Allar bashshai aoar ḳota zanail oise. ¹⁴Oḳon zudi afnara amar mat ekin ḳoroin, te hunoukka, ze Ilias nobie hirbar aibar ḳota asil, ou Ehiau oila hou Ilias. ¹⁵Zar ḳan ase, he hunouk.

¹⁶“I zomanar manshore ami kitar loge tulona ḳortam? Tara to omon huruttar laḳan, zetae bazaro boia eḳe-oinnore ḍakia ḳoin, ¹⁷‘Hoi, amra tumrar lagi bashi bazailam, tumra to naslae na, ahazarir gan gailam, tumra to ḳanlae na.’ ¹⁸Ṭik olaḳan, Ehia nobie aia shomazor loge ḳaoa-daoa na ḳorae, manshe ḳoira tane bute dorse. ¹⁹Oile ami Bin-Adom aia ḳaoa-daoa ḳorae tumra ḳoirae, ‘Deḳoukka, i beṭa to feṭua, modkur, he gushkur ḳazna tulra ar naforman oḳolor loge dusti ḳore.’ Te aḳol ḳaṭaia zera sole, tarar sal-cholon takiu forman mile, aḳolu oilo ḳaṭi-nikut siz.”

Lannoti gau ar ṭaun

²⁰Hozrot Isae zeta gauainto ar ṭauno beshir bag keramoti deḳaisla, itar manshe touba ḳorsoin na. Erlagi tain i gau ar ṭaunor ufre bezar oia ḳoila, ²¹“Haere Baet-Soeda ar Kurasin gau, tumra to lannoti. Tumrar maze zeta kudroti ḳam deḳail oise, ita zudi Shur ar Sidon elaḳat deḳail oito, te bout ageu tara ḳator oia touba ḳorlo one. ²²Oile ami tumrare ḳoiram, kiamotor din Shur ar Sidon elaḳar dosha takio, tumrar dosha bout ḳoṭin oibo. ²³O Kofornaum ṭaun, huno, tumi bule usa oia asmano gia lagtae? Na, fartae nae! Tumare fatalo lamani oibo. Tumar maze zeta kudroti muzeza deḳail oise, ita zudi Sadum ṭauno deḳail oito, te i ṭaun oḳono ṭikia roilo one. ²⁴Oile ami tumrare ḳoiram, hashoror din Sadum ṭaunor haloto tumrar taki bout bala oibo.”

Hozrot Isar dua ar aramor daot

²⁵erbade Isae ḳoila, “O amar gaibi baf Alla, tumi to asman-zominor malik. ami tumar shukria zanairam, ḳaron tumi aḳoldar ar buddiman oḳolor gese ita zair na ḳoria, bebuz-huruttar laḳan manshor gese zair ḳorso. ²⁶Baba, ashole ita hoḳolta-u tumar morzi.

²⁷“amar gaibi babae hoḳolta-u amar ato shofi disoin. baf saṛa dusra ḳeu ou futre sine na, ar fut saṛa dusra ḳeu ou bafore sine na. fute bafore zar gese zair ḳorar kial oe, ḳali he-u bafor forisoe fae.

²⁸“Bar-buza boite boite tumra zera heran oigeso, tumra hoḳol amar gese ao, ami tumrare aram dimu. ^29-30Amar zual tumrar ḳando tulo ar amar ges taki talim lo, teu tumrar aram oibo. Amar zual boia neoa shuza, amar deoa bar kub fatla. Amar mizaz kub norom ar ṭanḍa.”

Zummabaror befare talim

¹Eḳ Zummabare Hozrot Isa ḳetor ailedi aṭia zaoat asla. Tan shagrid oḳolor feṭo buk lagae, tara danor soṛa siṛi siṛi ḳaoat lagla. ²Ita dekia Forishi mozobor manshe Isare ḳoila, “Amrar shoriote ḳoe, Zummabare kunu ḳam ḳora zaiz nae, te afnar shagrid oḳole danor soṛa siṛira ḳene?”

³Isae zuaf dila, “Daud nobi ar tan logor manshe eḳbar feṭor buke zeta ḳorsla, ita afnara foṛsoin na ni? ⁴Tain Allar kaba goro hamaia hou fobitro ruṭi ḳaisla, i ruṭi ḳaoa to tain ar tan logor manshor lagi nazaiz, ita ḳali imam sabor lagi zaiz asil. ⁵Ar afnara Tourat Shorifo foṛsoin na ni, Baetul-Mukaddosor imam oḳole Zummabare zummar dinor niom bangleo tarar kunu guna oe na. ⁶Oile ami afnarare ḳoiram, Baetul-Mukaddos takio dami eḳ manush ono asoin. ⁷Allar kalamor ou aeator bed zudi afnara buzta, ze aeato ase, ‘Ami doya deḳtam sai, foshu kurbani nae.’ Te afnara ni-oforadire oforadi banaila na one. ⁸Hunoukka, Zummabaror tamam eḳtiar ami Bin-Adomor ato.”

Hukna at-ala bemarir shifa

⁹Bade Hozrot Isa in tone gia ou Forishi oḳolor mosido hamaila. ¹⁰Hono ola eḳ beṭa asil, tar eḳ at bemare hukai gese. Isar kunu kut bar ḳoria tanre dushi bananir niote, ou mosidor manshe tanre zikailo, “Sab, Musar shoriot mafik Zummabare ḳeuror bemar shifa ḳora zaiz ni?”

¹¹Isae zuaf dila, “Doroukka, afnara eḳzonor egu meṛa zudi Zummabare gator maze foṛizae, te ou din i meṛare gato taki tulta nae ni? ¹²Ar manshor dam to meṛa taki bout beshi. Erlagi buza zae, Zummabareo nek kam ḳora zaiz ase.” ¹³Bade tain ou hukna at-ala beṭare ḳoila, “Tumar atḳan baṛao.” He tar at baṛaiteu hukna at oinno ator laḳan furafur bala oigelo. ¹⁴Bade hou Forishi oḳole bare gia foramish ḳorla, Isare kila zane mara zae.

Hozrot Isau Allar ḳas maear zon

¹⁵Tarar ou foramishor ḳobor Isae zanilila, erlagi tain hin tone hori gela. Ou shomoe bout manush tan ḳore ḳore aila. Erar maze zoto bemari asla, tain era hoḳolre bala ḳorla. ¹⁶Tain erare doṛaia ḳoila, “Ḳobordar, tumra amar forisoe zair ḳorio na.” ¹⁷Ita oisil zate agor amolor nobi Ishaear mazdi zeta batail oisil, ota folizae. Tain ḳoisla,

¹⁸Huno, ami amar ou gulamre fosond ḳorsi.

Einu amar maear zon, tan ufre ami kub kushi.

En ufre ami amar ruh dimu,

hoḳol zatir gese tain amar hok-bisaror ḳota zanaiba.

¹⁹Tain kunu torka-torki ba silla-silli ḳorta nae,

fote-gaṭe kunu manshe tan aoaz hunto nae.

²⁰hok bisar ḳaim oar ag forzonto,

tain sesa nol-ḳagṛa bangita nae,

ar miṭ miṭ ḳori zolra lemor fitao limaita nae.

²¹Duniar hoḳol zatie tan ufreu borosha ḳorba.

Hozrot Isa ar zinor bashsha

²²bade manshe zinor asor ala eḳ beṭare Isar gese loia ailo. i beṭa asil anda ar buba. tain ou beṭare bala ḳorla. he bala oia mat-ḳota matilo ar soukeo deḳlo. ²³Ita dekia hoḳol manush taijjub oia ḳoila, “Daud nobir ḳandano zein zonom oar ḳota, einu hein ni?” ²⁴Ikan hunia Forishi oḳole ḳoila, “Igie to zinor bashsha Bel-Sobulor bole zinnat saṛae.”

²⁵Tarar monor sinta buzia Isae ḳoila, “Kunu deshor bitre doladoli lagigele, i desh to binash oizae. Ou laḳan kunu foribaror maze ba kunu ṭauno zebla doladoli lagizae, itao ar ṭike na. ²⁶Oula shoetane zudi shoetanre ḳedai dey, te to tar nizor mazeu doladoli lagigelo. Tar razotto ar kila ṭikbo? ²⁷Ami zudi Bel-Sobulor bole zinnat saṛai, te tumrar manshe ḳar bole saṛae? Tumrar mator bisar tumrar mansheu ḳorba. ²⁸Oile ami zudi Allar ruhur bole zinnat saṛai, te to Allar bashshai tumrar daro aichche.

²⁹“Kunu bolala manshor baṛit luṭ-toraz ḳorat aia, foela bolala zonre na bandile, ḳemne luṭ-toraz ḳorbo? Oile tare bandia harle luṭ-faṭ ḳorto farbo.

³⁰“Ḳeu zudi amar fokke na taḳe, he to amar bifokke. Ze zone amar loge tukae na, he to sitrae. ³¹Ami tumrare ḳoiram, manshor tamam nomunar guna ar kufurir mafi ase, oile Pak Ruhur befare kufuri ḳorle, i kufurir kunu mafi milto nae. ³²Ami Bin-Adomor birudde ḳeu kunta matileo he mafi faibo, oile Pak Ruhur birudde matile tar kunu mafi nai, i zindegito nai, aḳero-o nai.

Fol dekia gas sina zae

³³“Mono raḳba, gas bala oile tar folo bala oe, ar gas bura oile tar folo bura oe. Fol diau gas sina zae. ³⁴O hafor bachchain, tumra nizeu to ḳaraf, te tumrar muk tone bala buli ḳemne baroibo? Manshor dil zetadi bora, muk taki to otau baroe. ³⁵Bala manshor dilor bitoror balai tone bala buli baroe, ar bad manshor dilor burai tone bad buli baroe. ³⁶Oile ami tumrare ḳoiram, ze manshe aze-baze ber-beri ḳore, hashoror moedano tar forteḳ mator hishab dite oibo. ³⁷Tumar zobaneu tumare dushi banaibo, ar ou zobaneu tumare nirdushio banaibo.”

³⁸Bade ḳoezon moulana ar Forishie Isare ḳoila, “Huzur, amra afnar ekkan keramoti deḳtam sai.” ³⁹Isae zuaf dila, “i zomanar naforman ar beiman oḳole ḳali keramoti deḳta sain, oile Iunus nobir keramoti saṛa dusra kunu keramoti tarare deḳail oito nae. ⁴⁰Iunus nobi zela masor feṭo tin din, tin rait asla, ami Bin-Adomo oula tin din, tin rait maṭir tole roimu. ⁴¹kiamotor din hou Ninob ṭaunor murda oḳol uṭia hari, i zomanar manshor dush zair ḳorba. ḳaron Iunus nobir toblig hunia tara touba ḳorsila. oile oḳon to Iunus takio aro mohan eḳzon ino asoin, ta-o manshe touba ḳorer na. ⁴²Ruz kiamotor din douknor deshor rani uṭia aia ou zomanar manshor dush zair ḳorba. Ḳaron bashsha Sulaimanor aḳolor ḳota hunar kiale tain duniar hesh mata taki aisla. Oile oḳon to Sulaiman takio aro mohan eḳzon ono asoin.

⁴³“Huno, kunu bute zebla manshor log saṛia zaegi, ou shomoe he arame taḳar kiale hoḳol hukna zagat ashroe tukae. Oile aramor zaga na faia bade ḳoe, ⁴⁴Dur, amar agor goru bala, zegur ges taki aisi, ogur gese-u firia zaigi. Firia aia deḳe i gorḳan ḳali, saf-sofa ar hazail-faṛail. ⁴⁵dekia he gia tar tone aro ḳaraf shatgu but loge loia ae, aia ou goro roe. erdae ou manshor dosha foela taki heshe aro beshi ḳaraf oe. te i zomanar naforman oḳolor doshao olaḳan oibo.”

Hozrot Isar maear manush ḳe?

⁴⁶Isae zebla manshor loge matira, ou shomoe tan ma ar baiain bare aia, tan loge deḳa ḳorar lagi bar saoat asla. ⁴⁷Teu eḳzon manshe aia tanre ḳoilo, “Huzur, afnar ma ar baiain afnar loge matar lagi bare ubai roisoin.”

⁴⁸Ikan hunia Isae tare ḳoila, “Amar ma ḳe, ar amar baiainu ba ḳe?” ⁴⁹Bade tan shagrid oḳolre deḳaia ḳoila, “Erau amar ma ar baiain. ⁵⁰zara amar behesti baf Alla Pakor morzi zugaia soloin, tarau amar ma ar bai-boin.”

Hozrot Isar batail shat kichcha (13:1–52)

Eḳ girostor zala bain ḳorar kichcha

¹Hozrot Isa ou din gor taki baroia aoror faro gia boila. ²Boia harle bout manush tan gese aia biṛ lagai dila, biṛ dekia tain gia eḳ nao-o uṭia boila ar hoḳol manush faro ubai roila. ³Ou shomoe tain kichcha hunai hunai nanan nomunar talim dila.

Tain ḳoila, “Mono ḳoro, eḳ giroste zala bain ḳorat gelo. ⁴Gia bain ḳorar bala kisu zala ailor maze foṛlo, ar fakinte aia ita ḳaililo. ⁵Tar kisu zala hukna-shokto maṭir ufre foṛlo, i zala fuṭia ali baroileo tole beshi maṭi na taḳae, zoldi baṛilo. ⁶Bade shuruz uṭia harle zoir ḳaililo, ar tolor zoṛe rosh na faoae hukaia morigelo. ⁷kisu zala bon-zonglar maze foṛlo, ar ou bon-zongla baṛia itare zatia dorlo. ⁸Oile kisu zala bala zomino foṛlo, i zalae bala dan oilo, itar kunu soṛae tish, kunu soṛae shaiṭ, kunu soṛae eksho gun beshi dan dorlo.”

⁹Ou kichcha hunanir bade Isae ḳoila, “Zar ḳan ase, he hunouk.”

¹⁰Bade tan shagrid oḳole ḳoila, “Afne ḳali kichcha ḳoia manshore talim dira ḳene?”

¹¹Tain ḳoila, “Behesti bashshair gufon rohoisho zanar shuzug tumrare deoa oise, oile baki manshor gese ita batuni roise. ¹²Huno, zar ase, tare aro deoa oibo, tar aro baṛibo. Oile zar nai, tar zeta ase, otao ḳaṛia neoa oibo. ¹³Erlagi ami kichchar mazdi erare talim diram, era to dekiao deḳe na, huniao hune na ar kunta buzeo na. ¹⁴Erar mazdiau Ishaea nobir batail ou aeat fura oise, tain ḳoisla,

Tumra ḳane hunleo kunta buztae nae,

souke deḳleo kunta sintae nae.

¹⁵Ita manshor dil oshaṛ oigese,

tarar ḳano tala lagigese.

Tara zarzir souk muzi boiroise,

zate souke na deḳe,

ḳane na hune,

dil dia na buze.

Kizanu tara touba ḳoria

amar bae firizain,

ar ami tarare bala ḳorilai.

¹⁶Oile nek-kofali to tumra, tumrar souke deḳe, ar ḳane hune. ¹⁷Ami tumrare hok kota ḳoiram, tumrar souke zeta deḳrae ar ḳane zeta hunrae, ita bout nobi ar oli-auliae deḳar asha ḳorleo deḳar ḳofal oise na, ar hunar asha ḳorleo hunar ḳofal oise na.

¹⁸“Oḳon tumrare ou girostor kichchar mani buzai diram, ¹⁹huno, ailor maze foṛa zala dia olaḳan manshor befare buzail oise, ze manshe behesti bashshair ḳota huniao buze na, erlagi Iblise aia ou zonor dilo Allar ze kalam bain ḳora oisil, ota ḳaṛia neygi. ²⁰Hukna-shokto maṭir ufre foṛa zaladi buzail oise, zera i kalam hune ar kub kushi oia ḳobul ḳore, ²¹oile tarar dilo balamonte hamae na, erlagi ita tuṛa ḳoedin roe, bade i kalamor lagi kunu zulum-mosibot aileu tara ḳorlami zae. ²²Bon-zonglar maze foṛa zaladi buzail oise, zera i kalam hune, oile duniabi sinta-babna ar don-samanar maeae i kalamre zatia dorilae, erdae kalame kunu faeda oe na. ²³Ar bala zomino foṛa zaladi buzail oise, zera i kalam hune, hunia buze ar amol ḳore. Ḳeu zindegit tish gun, ḳeu shaiṭ gun, ḳeu eksho gun beshi fol dey.”

Dan ar fufra gasor kichcha

²⁴Bade Isae talim dibar lagi arok kichcha hunaila. Ḳoila, “Behesti bashshai ola eḳ girostor laḳan, zein nizor zomino bala danor zala bain dila. ²⁵bade rait oia harle zebla hoḳol manush gumai gesoin, ou shomoe tan eḳ dushmone aia bain deoa ou zominor maze fufra gasor bisi siṭaia gelogi. ²⁶heshe danor gas zebla boṛo oia soṛa saṛlo, ou shomoe ermaze fufra gaso deḳa gelo. ²⁷Ita dekia baṛir saḳor oḳole tarar munibre ḳoila, ‘Afne zomino ḳali bala dan bain disla na ni? Oḳon fufra gas oilo kuai taki?’

²⁸“Tain ḳoila, ‘Kunu dushmone i ḳam ḳorse.’ Saḳor oḳole tanre zikailo, ‘Te amra gia ou fufra gas saf ḳoriltam ni?’ ²⁹Munibe ḳoila, ‘Na, na, tumra fufra gas saf ḳorat gia, danor gaso tulilibae. ³⁰Erlagi dan daoar ag forzonto ita taḳouk. Bade daoar bala ami manshore ḳoimu, foela hoḳol fufra gas tulta, ar daru zalanir lagi aṭi bandita, bade dan daia amar ugaro tulba.’ ”

Ḍenga bisi ar ḳamiror kichcha

³¹Hozrot Isae arok kichcha hunaila. Ḳoila, “Behesti bashshai oilo egu ḍenga bisir laḳan. Eḳzon manshe egu ḍengar bisi tar zomino bain dilo. ³²I bisi to hoḳol zator bisi taki huru. Oile bain deoar bade i gas hokkol zator hag-torḳari taki boṛo oe, ar fakinte aia tar dal-falat bada banae.”

³³Erbade arok kichchar maze ḳoila, “Behesti bashshai oilo ḳamiror laḳan. Eḳzon beṭi manshe tin bosta moedar maze tuṛa ḳamir mishailo. Ḳamiror fafe hoḳol moeda fulia uṭlo.”

³⁴Hozrot Isae kichcha hunai hunai hoḳol nomunar talim dila. Kichcha saṛa tain kunu talim dila na. ³⁵Ita hokkolta oilo, zate nobir mazdi zeta batail oisil, ota oḳon fura oe,

Talime bora kichcha hunai hunai

ami matimu,

duniar foela taki zotota batuni asil,

ota oḳon kulmu.

Dan ar fufra gasor kichchar orto

³⁶Bade Isae manshore bidae dia goro hamaila. Ou shomoe tan shagrid oḳole aia ḳoila, “Huzur, fufra gasor kichchar maniḳan amrare buzai deukka.”

³⁷Tain ḳoila, “Bala danor zala zein bain ḳoroin, ein oilam ami Bin-Adom. ³⁸Zomin oilo ou zogot, ar behesti bashshair manush oila bala bis. Iblisor ḳandan oilo ou fufra gas. ³⁹Ze dushmone fufra gas bain disil, he oilo Iblis. Dan daoar shomoe oilo kiamot, ar daura oḳol oila Allar firista. ⁴⁰Fufra gas aṭi bandia zela daru zalani oe, kiamotor shomoe ṭik olau oibo. ⁴¹Bin-Adome tan firista oḳol faṭaiba. Ze manshe nize guna ḳore ar aroḳzonre gunar fote ṭane, tara hoḳolre firista oḳole Bin-Adomor bashshair maz taki ekkano dola ḳoria, ⁴²duzoḳor agunit falaiba. Hino manshe ḳanda-ḳaṭi ḳorba ar zala-zontronae dat kiṛimiṛi diba. ⁴³hi shomoe allaraia manshe tarar behesti baf Alla Pakor bashshait nurani surote shuruzor laḳan jilmil ḳorba. hunar laḳ ḳan zar ase, he hunouk.

behesti bashshair aro tin kichcha

⁴⁴“Huno, behesti bashshai oilo, maṭir tole lukail kunu donor laḳan. Kunu manshe ou don tukaia failo, faia hirbar gaṛia toi dilo. I don faia kushi oia he tar hoḳol samana besia, ou zominḳan ḳorid ḳorlo.

⁴⁵“Hirbar, behesti bashshai oilo ola eḳ shodagoror laḳan, i shodagore ḳaṭi moni-mukta tukanit asil. ⁴⁶He eḳṭa dami muktar ḳobor faia, tar hokkolta besia ou mukta ḳorid ḳorlo.

⁴⁷“Ba behesti bashshai ola eḳ zalor laḳan, i zaldi aoro ṭan dile er bitre hokkol zator mas hamailo. ⁴⁸Mase zal borigele zalua oḳole ikanre ṭania faro tullo. Bade tara bala bala mas basia sangat toilo ar badguin falai dilo. ⁴⁹Te hashoror moedano ou halot oibo. Firista oḳole aia allaraia manshor dol taki, naforman oḳolre algaia duzoḳor agunit falaiba. ⁵⁰Hino tara ḳanda-ḳaṭi ḳorba ar zala-zontronae dat kiṛimiṛi diba.”

⁵¹Erbade Isae tan shagrid oḳolre zikaila, “Tumra ita hoḳolta buzcho ni?”

Tara ḳoila, “Ji-oe, buzchi.”

⁵²Teu Isae tarare ḳoila, “Ze moulana oḳole behesti bashshair talim faisoin, tara ola eḳ girostor laḳan, ze giroste tan shonduk taki noea ar furana mal bar ḳoroin.”

Hozrot Isae ḳene toshrif anchoin (13:53–17:27)

Nizor gaut Hozrot Isar oshomman

⁵³Hozrot Isae kichcha ḳoia ḳoia talim dia harle in tone gelagi. ⁵⁴Gia tan nizor gaur mosido hamaia oaz-nosiot ḳorla. Tan boean hunia manshe taijjub oia ḳoila, “I beṭae ḳemne oto ilim ar keramoti failo? ⁵⁵E kita hou ḳaṭ mestorir fua nae ni? Tar maʼr nam Moriom nae ni? He Iakub, Iusuf, Saimon ar Ehudar bai nae ni? ⁵⁶Tar boinain to amrar gautu roira? Te he ita ilim ḳoi taki failo?” ⁵⁷Ou laḳan Isare loia manshor dilo bitishona ailo. Ou shomoe Isae tarare ḳoila, “Nizor baṛi-gor ba gau-desh saṛa ar hoḳol zagatu nobi oḳole shomman fain.”

⁵⁸Gaur manshor iman nai dekia, tain hikano beshi keramoti deḳaila na.

Hozrot Ehia nobir mout

¹Ou shomoe Galil zilar Raza Herude Isar befare hunla, ²hunia tan uzir-nazirre ḳoila, “Ein to toubar gusol ḳoraora Ehia. Ein mora taki zinda oia uṭae ou keramoti deḳaira.”

³Ou Herude tar bai Filifor bou Herudiare hanga ḳorsil. Tair mon zuganir lagi he Ehia nobire zelo bondi ḳoria toisil, ⁴ḳaron Ehiae Herudre ḳoita, “Taire hanga ḳora to tumar ṭik oise na.” ⁵Erlagi he Ehia nobire marilito sailo, oile manshor ḍore marto farlo na, manshe zanta ein eḳzon nobi.

⁶Bade Raza Herudor zonom dinor onusṭano Herudiar fuṛie nasia razare kushi ḳorlo. ⁷Erdae razae ḳosom ḳaia ḳoilo, “Ou fuṛie zeta saibo, ota dimu.” ⁸Fuṛie tair maʼr loge foramish ḳori ḳoilo, “Toubar gusol ḳoraora Ehiar ḳolla ḳaṭia ekkan talo ḳori, oḳon ania amare deukka.”

⁹Ikan hunia razar mon kub bezar oigelo. Oile tar loge boa meman-musafiror samne nize ḳosom ḳorse, erlagi he ou ḳolla ḳaṭibar hukum dilo. ¹⁰Tar zollad faṭaia zelor bitre Ehia nobir ḳolla ḳaṭailo. ¹¹Bade ou ḳolla eḳ talo ḳori ania ou fuṛire deoa oilo, fuṛie nia tair maʼr gese dilo. ¹²Erbade Ehia nobir ummot oḳole tan lash nia dafon ḳorla, ar Hozrot Isar gese gia ou ḳobor zanaila.

Fas azar manshor gaibi ḳani

¹³Ehiar moutor ḳobor hunia Isae ekkan naot uṭia nirai eḳ zagat gelagi. Tain gesoingi hunia, nanan zagar manush hukna bae aṭi aṭi tan ḳore roana oila. ¹⁴Tain nao tone lamar bade manshor biṛ dekia tan bitre doya hamaigelo. Erdae tarar maze zoto bemari asla, tain erare bala ḳorla.

¹⁵Biali bala sahabi oḳol ḳandat aia ḳoila, “Huzur, ikan to kub nirai zaga, ar beilo zargi. Te ota manshore bidae dilaukka, era ḳanda-ḳasar gauainto gia tarar ḳani-kuraki louk.” ¹⁶Isae ḳoila, “Na, tara zaoar dorḳar nai, tumrau erare ḳani deo.” ¹⁷Sahabi oḳole ḳoila, “Amrar gese to ḳali fasḳan ruṭi ar duiṭa biran mas saṛa ar kuntau nai.”

¹⁸Tain ḳoila, “Oḳnain amar gese ano.” ¹⁹Bade tain manshore ḳoila, gashor ufre boizita. Tain hou fasḳan ruṭi ar duiṭa biran mas ato loila, ar asmanedi saia shukria adae ḳorla. Bade ou ruṭi ṭukraia sahabi oḳolor ato dile, era baṭia dilaila. ²⁰otadi hoḳol manshe feṭ bori ḳaila. ḳaia harle baṛti zeta roilo, oḳnain dola ḳorle baro ṭukri borigelo. ²¹Onuman fas azar beṭa manshe ou ḳana ḳaila, erar loge beṭin ar huruttaino asla.

Fanir uforedi aṭa

²²Ḳanir badeu tan sahabi oḳolre hukum dila, tain zaibar age tara nao-o uṭia aoror hofaro zaitagi. Ḳoia tain onor manshore bidae dilaila. ²³Era gia harle tain dua ḳorar lagi faṛor ufre uṭila. Hainja bad forzonto hono eḳla roila. ²⁴Ou shomoe sahabi oḳolor nao aoror mazḳano gesegi, ar ufta batashor ḍeue nao kub ilkani dorlo. ²⁵Fotabala Hozrot Isa aoror fanir uforedi aṭia sahabi oḳolor ḳandat aira. ²⁶Ou shomoe sahabi oḳole tanre dekia kub ḍoraila, tara but mono ḳoria but, but ḳoia sillaia uṭla.

²⁷Ou tain ḳoila, “Ḍoraio na, shaosh ḳoro, i to ami.”

²⁸Teu sahabi Fitore ḳoila, “Huzur, afneu zudi oin, te amare izazot deukka, amio fanir uforedi aṭia afnar gese aitam.” ²⁹Isae ḳoila, “Ao.” Teu Fitor nao taki lamia fanir ufredi aṭa dorla. ³⁰Oile batashor zur dekia tain ḍoraigela, ar buṛizira dekia zure zure Isare ḍaḳ dila, “Huzur, huzur, amare basaukka.”

³¹Loge loge Isae at baṛaia tanre doria ḳoila, “Ouni tumar iman? Mono shondoe anlae ḳene?” ³²Bade Isa ar Fitor nao-o uṭteu batash tamigelo. ³³teu naor hoḳole tanre soizda ḳoria ḳoila, “huzur, asholeu afne Alla Pakor ḳas maear zon, Ibnulla.”

³⁴Aor faṛi dia tara Gineshorot elaḳat aia nao taki lamla. ³⁵Lamteu honor manshe tanre dekia sairobae ḳobor faṭaila. Ḳobor faia manshe hoḳol zator bemarire loia tan gese ailo, ³⁶tara minot ḳori ḳoilo, ou bemari oḳole zanu tan gotror saddoror kunaḳano soita faroin. Ar zoto manshe soila, tara hokkolu bala oigela.

Manshor banail rosumot

¹Zeruzalem ṭaun taki ḳoezon moulana ar Forishi mozobor kisu manush Isar gese aila, aia tanre zikaila, ²“Afnar ummot oḳole agor zomanar moulana oḳolor batail rosumot manoin na ḳene? Tara to uzu na ḳoria-u ḳani ḳailain.” ³Isae zuaf dila, “Ou moulana oḳolor rosumot manar lagi afnara ḳene Allar hukumor borḳelaf ḳorra? ⁴Allae hukum disoin, ‘Ma-bafore ijjot ḳorio, ar ze manshe tar ma-bafor bodnam gae, tare nichoe marilite oibo.’ ⁵Oile afnara ḳoin, kunu manshe zudi tar ma-bafore ḳoilae, ‘Amar zeta samana dia afnaintor ḳezmot ḳortam asil, ita ami Allar name lilla dilaisi,’ ⁶te tar ma-bafore ar kunta ḳora lage na. Ou laḳan afnarar baf-dadar mongoṛa niom dia Allar kalam batil ḳorilisoin. ⁷O bonḍo oḳol! Hozrot Ishaea nobie tumrar befare ṭiku ḳoisoin,

⁸Ita manshe muk dia ḳali amare ijjot ḳore,

oile tarar dil ama taki bout duroi.

⁹Tara hudar ḳamoḳa amar ebadot ḳore,

tarar talim oḳol to manshor banail mongoṛa rosumot.”

Manush kila nafaḳ oe

¹⁰Bade Isae manshore ḍakia ḳoila, “Amar talim ḳanain kial ḳori hunoukka. ¹¹Baire taki zeta zinish manshor mukor bitre hamae, itae to tare nafaḳ banae na. Borong manshor muk taki zeta baroe, otaeu tare nafaḳ banae.”

¹²Teu tan shagrid oḳole ḳoila, “Huzur, afne buzchoin ni, Forishi oḳole mono ḳorra, ou talim dia afne tarare beijjot ḳorsoin?” ^13-14Tain ḳoila, “Itar mat falao. Amar behesti baf Allae ze gas lagaisoin na, i gas tan bagan taki huria falail oibo. Tarar daeitto asil anda manshore fot deḳaito, oile tara nizeu anda bonigese. Kunu andae aroḳ andare fot deḳanit gele, duio andau gato foṛi morbo.”

¹⁵Teu sahabi Fitore ḳoila, “Afne zeta bataira, ota amrare buzai deukka.” ¹⁶Isae ḳoila, “Tumra oḳono bebuz roiso ni? ¹⁷Tumra buzo na ni, baire taki zeta zinish manshor muko hamae, ita to ḳali feṭo hamae, ar feṭ taki hirbar baroizae. ¹⁸Oile manshor muk taki zeta baroe, ita dilo taki ae, ar otaeu manshore nafaḳ banae. ¹⁹Manshor dil takiu to hoḳol nomunar ku-sinta baroe, zemon kun, zina, suri, misa shakki, ar ingsha-ninda baroe. ²⁰Otaeu manshore nafaḳ banae, oile uzu saṛa ḳani ḳaile ḳeu nafaḳ oe na.”

Bidormi beṭir imanor bol

²¹Bade Hozrot Isa nizor desh saṛia Shur ar Sidon desho gelagi. ²²Hono gia harle Kenani zatir eḳ bidormi beṭi tan gese aia zure zure ḳoilo, “O huzur, Daudor aolad, amare rohom ḳoroin. Amar fuṛigure zine dorae tai boṛo ḳoshṭo ḳorer.”

²³Oile Isae kunta matila na. Teu tan sahabi oḳole tanre minot ḳori ḳoila, “Huzur, ou beṭigure bidae dilaukka, tai amrar ḳore oia sillar.” ²⁴Isae ḳoila, “Amare to faṭail oise, ḳali Boni Israilor arail meṛa oḳolor lagi.”

²⁵Oile ou beṭi tan ḳandat aia ḳodombusi ḳoria ḳoilo, “Huzur, amare ou asanḳan ḳoroukka.” ²⁶Tain ḳoila, “Nizor huruttar rizek kuttar samne deoa ṭik nae.” ²⁷Beṭie ḳoilo, “Ji-oe huzur, afnar ḳotau ṭik, oile munibor ḳani taki zeta guṛa-gaṛa galabae foṛe, ita to kukre ḳae.” ²⁸teu tain beṭire ḳoila, “ashole go mai, tumar iman boṛo mozbut. aichcha, tumi zela sairae, olau ouk.” oḳan ḳoar loge logeu fuṛi bala oigelo.

sair azar manshor gaibi ḳani

²⁹Bade Isa hon tone Galil aoror faredi aṭia gela, gia eḳ faṛor ufre uṭia boila. ³⁰Boia harle manshe lula-lengṛa, atur, anda, buba, olaḳan aro bout zator bemarire dole dole tan gese loia ailo. Ania tan faor ḳandat toilo, tain era hoḳolre bala ḳorla. ³¹Manshe zebla deḳla, lula-lengṛa bala oizira, buba oḳole matira, atur manshe aṭira, andae souke deḳra, dekia tara hoḳol taijjub oigela, ar Boni Israilor Mabud Allar shukria adae ḳorla.

³²Erbade Isae tan sahabi oḳolre ḳandat ania ḳoila, “Ita manshor lagi amar boṛo dorod lager, aiz tin din dori tara amar ḳore ḳore gurira, oile tarar loge ḳanir kunta nai. Te ou halote erare bidae ditam sai na, arnae ita fotou beush oiziba.”

³³Sahabi oḳole ḳoila, “Huzur, i nirai morubumir maze oto manshore ḳaoanir lagi ruṭi amra kuai faimu?” ³⁴Tain ḳoila, “Tumrar gese ḳoeḳan ase?” Era ḳoila, “Shatḳan ruṭi ar biran ḳora ḳoeṭa huru mas ase.” ³⁵Teu Isae manshore maṭit boar lagi ḳoila. ³⁶Ḳoia tain ou shatoḳan ruṭi ar biran mas ato loia, Allar shukria adae ḳoria oḳnain ṭukraila, bade sahabi oḳolredi baṭaila. ³⁷Hokkol manshe feṭ bori ḳaila. Ḳaia zeta roisil, sahabi oḳole ota dola ḳorar bade shat ṭukri borigelo. ³⁸Onuman sair azar beṭa manshe ou ḳana ḳaila, erar loge beṭin ar huruttaino asla. ³⁹Bade tain erare bidae dia nao-o uṭia Mogodon elaḳat gelagi.

manshe ḳali keramoti deḳta sain

¹Bade Isare forikka ḳorar lagi Forishi ar Siddekia mozobor kisu manush aila, aia asmani kunu nishana deḳta saila. ²Isae ḳoila, “Biali bala asmanor lal rong dekia afnara ḳoin, ḳailkur din to bala oibo. ³Ar biani bala asmano ḳalni dekia ḳoin, aiz meg-tufan oibo. Te asmanor halot afnara ṭiku buzoin, oile zomanar halot afnara buzoin na. ⁴ou zomanar beiman ar naforman oḳole ḳali keramoti deḳta sain, oile Iunus nobir nishana saṛa dusra kunu nishana tarare deḳail oito nae.” oḳan ḳoia tain erare toia hori gela.

⁵bade aor faṛi dia zaoar ḳalo sahabi oḳole loge ḳori ruṭi nita faurilila. ⁶Isae tarare ḳoila, “Tumra shabdan o, Forishi ar Siddekia dolor ḳamir taki hushiar roio.”

⁷Ikan hunia sahabi oḳole ḳana-ḳani ḳori ḳoila, “Amra ruṭi anchi na ḳori mono loe tain oḳan ḳoira.” ⁸Isae tarar bab buzilila, buzia ḳoila, “haere ḳomzur imandar oḳol, tumrar gese ruṭi nai, ikan ḳoirae ḳene? ⁹Tumra oḳono kunta buzo na ni, kunta mono or na ni? Ami zebla fasḳan ruṭidi fas azar manshore ḳaoaislam, ḳanir bade tumra ḳoto ṭukri guṛa-gaṛa dola ḳorslae? ¹⁰Ar hou ze shatḳan ruṭidi sair azar manshe ḳaisla, ḳaia harle ḳoto ṭukri dola ḳorslae? ¹¹Te oḳon tumra buzo na ḳene, ami ou ruṭir befare ḳoiar na? Huno, Forishi ar Siddekia oḳolor ḳamir taki hushiar o.” ¹²Teu sahabi oḳole buzla, tain ashole ḳaibar ḳamir taki hushiaror ḳota ḳoira na, borong Forishi ar Siddekia oḳolor talim taki hushiar oite ḳoisoin.

Hozrot Isa ashole ḳe?

¹³Bade tan sahabi oḳolre loia Ḳoisoria-Filifi ṭaunor ḳanda-ḳasat gela. Foto sahabi oḳolre zikaila, “Ḳo sain, manshe kita mono ḳoroin, ami Bin-Adom ḳe?” ¹⁴Era zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi. Ḳeu ḳeu ḳoe Iaromia nobi, ba oinno kunu nobi.” ¹⁵Ou tain ḳoila, “Oile tumra kita mono ḳoro, ami ḳe?” ¹⁶Sahabi Saimon-Fitore zuaf dila, “Afne to Allar oada ḳora hou al-Mosi Ibnulla, zinda Allar ḳas maear zon.” ¹⁷Isae ḳoila, “O Saimon bin Iunus, tumi boṛo nek-kofali, ḳaron, duniar kunu manshe tumare ita zanaise na, oile amar behesti baf Allaeu zanai disoin. ¹⁸Te ami tumare ḳoiram, tumi to fattor, erlagi tumar nam dislam Fitor, ar ou fattoror ufreu amar torikar tamam zomat goṛia tulmu. Duzoki kunu shoktieu er loge farto nae. ¹⁹Tumar ato ami behesti bashshair sabi dimu, ou duniat tumi zetare nazaiz ḳoibae, ita Allar dorbaro nazaiz oizibo, ar tumi zetare zaiz ḳoibae, Allar dorbaro-o ita zaiz oizibo.”

²⁰Bade Isae tarare doṛaia ḳoila, “Amiu zen hou al-Mosi, ita ḳeurore hunaio na.”

Foela bar nizor moutor agam ḳobor

²¹Ou shomoe taki Isae tan sahabi oḳolre zanani dorla, tain Zeruzalemo zaite oibo. Honor murobbi oḳole, boṛo imam oḳole ar moulana oḳole tanre bout duk-mosiboto falaiba. Bade tanre ḳatol ḳora oibo, oile moutor tin dinor din hirbar zinda oia uṭba.

²²Ikan hunia sahabi Fitore tanre tuṛa horaia nia ḳoila, “Huzur, oshombob, afnar ufre kunumonte-u ita oite fare na.” ²³Isae Fitoror bae firia ḳoila, “Dur Iblis, amar ges taki bag! Tui amar fotor zoinjal. Tui Allai munshare bad dia, manshor laḳan sinta ḳorre.”

²⁴Bade tain erare ḳoila, “Ḳeu zudi amar torikat aito sae, te he tar nizor kushie sola bad deuk, tar afon duk-koshṭor solib boia loia amar ḳore auk. ²⁵Ze manshe tar nizor zan basaito sae, he tar ashol zindegi kuaibo. Oile ze zone amar lagi tar zan kurbani dey, he ashol zindegi faibo. ²⁶kunu manshe asta dunia faiao zudi tar ashol zindegi kuailae, te tar kunu faeda oilo ni? heshe ashol zindegi faoar lagi he kun don bilaibo? ²⁷Ami Bin-Adome zebla amar firista oḳolre loge loia amar gaibi bafor kudroti mohimae zogoto hirbar aimu, ou shomoe forteḳ manshore tar amol mafik fol dimu. ²⁸Huno, ami tumrare hasa ḳota ḳoiram, ono ilaḳan ḳoezon azir asoin, ami Bin-Adom bashsha halote na aoa forzonto, kunumonte-u erar mout oito nae.”

Hozrot Isa Ruhullar nurani surot

¹Er soedin bade Hozrot Isae ḳali Fitor, Iakub ar Iakubor bai Hannanre loia usa eḳ faṛor ufre uṭla. ²Uṭia harle erar soukor samne tan nizor surot bodli gelo. Tan muk oigelo shuruzor laḳan zolmol, ar finnor lebas oilo dola soḳsoḳa. ³Sahabi oḳole deḳla, Hozrot Musa ar Ilias nobie aia tan loge batchit ḳorra.

⁴Ou shomoe Fitore ḳoila, “Huzur, amra to ono asi, kub bala oise. Afne saile ami tinḳan ḍera-gor banailai, ekkan afnar, ekkan Musa nobir ar ekkan Ilias nobir lagi.” ⁵tain Isar loge matira, aḳtau dola dobdoba megor eḳ ṭukrae aia erare gurililo, ar ou ṭukra taki gaibi aoaz ailo, “einu amar ḳas maear zon Ibnulla, en ufre ami kub kushi, tumra en nosiot huno.”

⁶Ikan hunia sahabi oḳol kub ḍoraila, ḍoraia maṭit foṛigela. ⁷Ou shomoe Isa aia tarare soia ḳoila, “Uṭo, ḍoraio na.” ⁸Teu tara souk tuli saila, saia ḳali Isa saṛa ar ḳeurore ino deḳla na.

⁹Faṛ taki lamia aoar bala Isae erare hukum dila, “Aiz zeta deḳlae, ami Bin-Adom mora taki zinda oia uṭar ag forzonto ita ar ḳeurore hunaio na.” ¹⁰Sahabi oḳole Isare zikaila, “Huzur, moulana oḳole ḳene ḳoin, al-Mosi aibar age, foela Ilias nobir aoa zorur?” ¹¹Tain ḳoila, “Ikan hasa ḳota, foela Hozrot Iliase aia hokkolta agor haloto firaia anba. ¹²Oile ami tumrare ḳoiram, Ilias nobi ṭiku aisla. I duniar manshe tanre na sinae, tan loge zeta mono loe ota ḳorse. Ar ami Bin-Adomeo ou laḳan duk-mosibot fuani lagbo.” ¹³Teu sahabi oḳole buzilila, tain oḳon Ehia nobir ḳota ḳoira.

Zinor asor-ala mirki bemarir shifa

¹⁴Bade tara faṛ taki lamia aila. Ono manshor biṛ asil, ou biṛor maze eḳ beṭa aia Isar samne aṭu galadi boia ḳoilo, ¹⁵“Huzur, amar fuagure basaukka, he mirki bemare kub ḳoshṭo ḳorer. Ou bemar uṭle he hamesha agunit ar fanit foṛizae. ¹⁶Ami tare loia afnar sahabi oḳolor gese aislam, oile tara bala ḳorta farsoin na.”

¹⁷Isae ḳoila, “Haere beiman ar naformanor zat, ami ar ḳotodin tumrar loge roimu, tumrar zala ḳotodin shoijjo ḳormu? Deki, tumar fuare ono ano.” ¹⁸Isae fuar logor hou zinnatre damki dila, damki ḳaia zine fuare saṛia gelogi, loge loge he bala oigelo.

¹⁹Bade sahabi oḳole niralae Isare zikaila, “Huzur, amra ḳene ou zinnat saṛaitam farlam na?”

²⁰tain ḳoila, “tumrar imanor ḳomzurir lagiu farso na. ami hasau ḳoiram, tumrar dilo zudi egu ḍenga bisi foriman iman taḳe, ar tumra ou faṛore ḳo, ‘on taki ḍulia hono zaogi,’ te ou faṛo ḍulizibo. tumrar oshaiddo kuntau roito nae. ²¹Huno, dua ar ruza raḳa saṛa i-zat zin saṛail zae na.”

Dusrabar nizor moutor agam ḳobor

²²Bade Galil zilat aia Isae tan sahabi oḳolre ḳoila, “Ami Bin-Adomre manshor ato dorai deoa oibo. ²³Tara amare zane mariliba, morar tin dinor din ami hirbar zinda oia uṭmu.” Ikan hunia sahabi oḳol kub bezar oigela.

Masor muko rufar ṭeḳa

²⁴Erbade Isae sahabi oḳolre loia Kofornaum ṭauno gela, ou shomoe Baetul-Mukaddosor ḳazna tulra oḳole sahabi Fitorre ḳoila, “Afnarar ustade Baetul-Mukaddos kaba shorifor sanda dein na ni?” ²⁵Fitore zuaf dila, “Ji-oe, dein to.” Oḳan ḳoia Fitor goro hamaia kunta matar ageu Isae ḳoila, “Fitor, tumi kita mono ḳoro? Duniar bashsha oḳole ḳar ges taki ḳazna-sanda adae ḳoroin? Nizor manshor ges taki, na bara manshor ges taki?”

²⁶Fitore ḳoila, “Bara manshor ges taki.” Teu Isae ḳoila, “Te to nizor manush ita taki basi gelo, ar amra-o Allar afon manush oae Allar goror ḳazna taki basi gesi. ²⁷Oile amra erare bezar ḳortam nae, erlagi tumi aoro zao, gia mas marar lagi boṛi falao, boṛit foela ze mas lagbo, ogur mukor bitre eḳṭa rufar ṭeḳa faibae. Ou ṭeḳa nia tumar ar amar sanda dilao.”

Ummotor lagi Hozrot Isar zoruri talim (18:1–35)

Behesti bashshait boṛo ḳe?

¹Ou shomoe sahabi oḳole Isar ḳandat aia zikaila, “Huzur, behesti bashshair maze hokkol taki boṛo ḳe?”

²Teu Isae eḳ huruttare ḍakia ania tarar maze uba ḳorai ḳoila, ³“Ami tumrare hasau ḳoiram, tumra zudi mon firaia ou huruttar laḳan na o, te kunumonte-u behesti bashshait hamaitae fartae nae. ⁴Ze zone nizore ou huruttar laḳan huru mono ḳore, behesti bashshait he-u hoḳol taki dami. ⁵Ar ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore.

Gunar ḳam taki hushiar roa

⁶“Huno, amar torikar ou huru-muru eḳzonre zegie gunar fote ṭania ney, ogur lagi aro bala oilo one, ogur golat fattor bandia doriat falai deoa. ⁷Haere dunia, gunar fote neoar lagi tumar maze ḳoto uskani ase! Uskani to aibou aibo. Oile lannot hou zonor ufre, zegie guna ḳoranir lagi uskani dey. ⁸tumar at ba fao zudi tumare gunar fote ṭane, te i at-fao ḳaṭia falai deo. duio at-fao loia duzoḳo zola taki, atur oia-o behesto zaoa tumar lagi bala. ⁹Tumar souke zudi tumare gunar fote ṭane, te i souk tulia falai deo. Duio souk loia duzoḳo zola taki, ḳana oia-o aḳer faoa tumar lagi bala.

¹⁰“Huno, ami ḳoiram, tumra ou huruttar laḳan kunu sabalreo elami ḳorio na. Tarar firista oḳole behestor maze hor-hamesha amar behesti baf Alla Pakor muk deḳra. ¹¹Zano ni, zera be-fote gesegi, erare basanir lagiu ami Bin-Adom i duniat aisi.

¹²“Mono ḳoro, kunu manshor eḳ-shogu meṛa ase, er mazor egu meṛa arai gele he baki nirannobboiṭa bondo toia, hou arail ogu tukanit zae na ni? ¹³Ami tumrare hasau ḳoiram, he zudi ikṭa tukaia fae, te ze nirannobboigu arsil na, oguin toia zegu ari gesil, ogur lagiu he kub kushi-bashi ḳore. ¹⁴Ṭik ou laḳan, tumrar behesti baf Allae-o sain na, ou huruttaintor mazor egu huruttao binash ouk.

Oforadire buzao

¹⁵“Tumar kunu baie zudi tumar gese dush ḳorilae, te he zebla niralae taḳe, ou shomoe tumi eḳla gia tare buzaio. Tumar buz zudi manilae, te ou bair loge tumar baiali basaililae. ¹⁶Oile he zudi tumar buz na mane, te aro dui-eḳzon mazor manush loia zaio. Gia tarar samne tare buzaio. Teu Musar shoriotor ou hukum fura oibo, ‘Dui-tinzon shakkir ḳotae zekunu befar forman oe.’ ¹⁷Erar buzo zudi he na mane, te tar befare zomato nalish deo. Zomator ḳota zudi manilae te bala, ar na manle tare bidormi ba gushkur toshildar mono ḳoria, tare tar fote saṛi deo. ¹⁸Te ami tumrare hasa ḳota ḳoiram, ou duniait tumra zetare nazaiz ḳoibae, ita Allar dorbaro nazaiz oizibo, ar tumra zetare zaiz ḳoibae, Allar dorbaro-o ita zaiz oibo.

¹⁹“Huno, ami tumrare aro ḳoiram, tumrar mazor duizon zudi eḳmot oia kunu befare dua ḳore, te amar behesti baf Allae ou dua ḳobul ḳorba. ²⁰Amar name ze zagat dui ba tin zon zoma oe, hou zagat amio azir taki.”

Maf ḳorar befare talim

²¹Ou shomoe Fitore aia Isare ḳoila, “Huzur, amar baie zudi amar gese bar bar dush ḳore, te ami ḳotobar tare maf ḳortam? Shatbar ni?” ²²Isae ḳoila, “Ḳali shatbar nae, ami ḳoiram, tare shottoir gun shatbar maf ḳorio.

²³“Huno, behesti bashshai ola eḳ bashshar laḳan, zein tan uzir-naziror gese hishab-nikash saila. ²⁴Bashshae hishab loat boile erar mazor ola eḳzonre tan samne ana oilo, bashshae er gese laḳ laḳ ṭeḳa faona asla. ²⁵Ou faona firot dibar ḳemota er nai. Erdae bashshae hukum dila, he shudda tar bou, fua-fuṛin gulam hishabe biki ḳaia, hoḳol shoe-shompotti besia tan faona adae ḳorar lagi. ²⁶Ou hukum hunia he bashshar faot doria ḳandia ḳoilo, ‘Huzur, amare tuṛa shuzug deukka, ami afnar hoḳol faona dilaimu.’ ²⁷Ou tain doya ḳoria tare saṛi dila, ar hoḳol dena maf ḳori dilaila.

²⁸“Bade he bare gia tar logor aroḳ saḳrianre failo. Ou zonor gese he eḳ-sho ṭeḳa faona asil. Faia tare golat ṭifa mari doria ḳoilo, ‘Oi, tui amar faona ṭeḳa de.’ ²⁹Hou zone tar fao-o foṛi minot ḳori ḳoilo, ‘Amare tuṛa shuzug deo, ami tumar hoḳol faona dilaimu.’ ³⁰Oile he er ḳota manlo na. Tar ṭeḳa na deoa forzonto tare zelo harai toilo.

³¹“Ita dekia tar logor uzir-nazir oḳol kub bezar oila. Tara gia ita bashshare zanaila. ³²Bashshae hou saḳrianre anaia ḳoila, ‘Haere naforman, tumi amare minot ḳorae ami tumar hoḳol dena maf ḳori dilaislam. ³³Te ami zela tumare doya ḳorslam, tumio oula tumar logor saḳrianre doya ḳora usit asil na ni?’ ³⁴Bade bashshae gusa ḳoria tare zelo haraila, tan faona adae oar ag forzonto zelor zollad sifaie tare ḳoṛaḳoṛi shaza dila.

³⁵“Ṭik ou laḳan, tumrao zudi tumrar baire dil taki maf ḳori na deo, te amar behesti baf Allae-o tumrare oula shaza diba.”

Shomazor manshor lagi Hozrot Isar talim (19:1–22:46)

Talaḳor musla

¹Ou talimor bade Hozrot Isa Galil zila taki Zordan gangor hofaro Ehudia zilar fub elaḳat aila. ²Ou shomoe bout manush tan ḳore ḳore aila, tain era hoḳolor bemar bala ḳorla.

³Ar Forishi mozobor ḳoezon manush aia Isare forikka ḳorar lagi zikaila, “Ḳoukka sain, Musa nobir shoriot mafik kunu manshe zekunu ḳarone tar boure talaḳ deoa zaiz ni?” ⁴Isae ḳoila, “Afnara Allar kalamo faisoin na ni, Allae foela Adom ar Haoare beṭa ar beṭi banai foeda ḳorsoin, tain ḳoisoin, ⁵‘Erlagiu beṭainte tarar ma-bafore saṛia bour loge taḳba, tara duiozon eḳ shoril oiba.’ ⁶Erdae tara dui roita nae, ek kaea oiba. Te Allae zerare zuṛa bandia disoin, manshe itare alog na ḳorouk.”

⁷Teu Forishi oḳole tanre ḳoila, “Te Musa nobie ḳene bataisoin, talaḳ-nama lekia boure talaḳ deoa zaiz?” ⁸Tain ḳoila, “Tumrar dil fashan gotikeu Musae i onumoti disoin. Oile foela taki ila niom asil na. ⁹Ami tumrare ḳoiram, ze manshe zinar dush saṛa oinno zekunu ḳarone tar boure talaḳ dia aroḳ beṭire hanga ḳore, he nizeu zina ḳore.”

¹⁰Teu sahabi oḳole tanre ḳoila, “Zamai-bour mazeo zudi ola goṭona goṭe, te to bia na ḳorau bala.”

¹¹Isae tarare ḳoila, “Hoḳol manush to ila roito fare na, ḳali Allae zerare i ḳemota disoin, tarau fare. ¹²Kunu kunu manush na-mord haloteu duniat zonom loe, erlagi tara bia ḳore na. Ar kunu kunu zonre mansheu na-mord banailae, erdae tarao bia ḳore na. Hirbar ḳeu ḳeu ase bia-shadi na ḳoria, ḳali behesti bashshair ḳezmoto zindegi ḳaṭanir niot ḳorilae. Te ikan zera amol ḳorto fare, tara amol ḳorouk.”

Huru huruttaintor befare talim

¹³Bade manshe huru huru huruttainre loia Isar gese aila, tara saila tain zanu huruttaintor matagu atai dia dua ḳoroin. Oile sahabi oḳole erare boḳa-zoḳa ḳorla. ¹⁴Ita dekia tain ḳoila, “Huruttainre aṭḳaio na, tarare amar gese aite deo. Allar bashshai to erar laḳan manshor lagiu.” ¹⁵Huruttaintor mata ataia dua ḳoria harle, tain hin taki gelagi.

Gorib ar donir behest

¹⁶Bade eḳ zuan beṭae aia tanre zikailo, “Huzur, aḳerat faoar lagi ami kun hok kam ḳortam?” ¹⁷Isae ḳoila, “Hok kamor befare amare ḳene zikairae? Hoḳ to ḳali eḳzonu asoin, tumi aḳerat faite saile, tan hoḳol hukum-ahkam amol ḳoro.” ¹⁸Hou zuane ḳoilo, “Huzur, kun kun hukum mantam?”

Tain ḳoila, “Kun ḳorio na, zina ḳorio na, suri ḳorio na, misa shakki dio na, ¹⁹ma-bafore ijjot ḳorio ar ari-forire nizor laḳan maea ḳorio.”

²⁰Beṭae ḳoilo, “Sab, ita to ami emneu amol ḳoriar, oile ar kita ḳortam ḳoukka?” ²¹Teu Isae tare ḳoila, “Tumi zudi shullo-ana ḳaṭi oitae sao, te tumar baṛit zao, gia tumar hoḳol don-samana besia gorib-dukire bilai deo. Teu tumi behesto don-samana faibae. Erbade aia amar ummot oio.” ²²Ikan hunia beṭa bezar oia gelogi, tar to bout don-samana asil.

²³Teu Isae tan sahabi oḳolre ḳoila, “Ami hasa ḳota ḳoiram, doni manush Allar bashshait hamani boṛo moshkil. ²⁴Huno, doni manush Allar bashshait hamanir saite, suir furedi uṭ hamani aro shuza.” ²⁵Ikan hunia sahabi oḳol taijjub oia ḳoila, “Te kun manush nazat hasil ḳorbo, ḳe rehai faibo?” ²⁶Tain erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.” ²⁷Ou shomoe Fitore zikaila, “Huzur, amra to hokkolta falai toia afnar ḳore aisi. Te amra kita faimu?”

²⁸Isae ḳoila, “Ami tumrare hasa ḳota ḳoiram, tumra zara amar ummot oiso, ami Bin-Adom zinda oia zebla Allar bashshair godit boimu, ou shomoe tumrao amar loge oia baroṭa toḳto boibae, boia Boni Israilor baro gusṭir bisar ḳorbae. ²⁹Huno, ze manshe amar lagi nizor baṛi-gor, ma-baf, bai-boin, fua-fuṛi, ar zomi-mirash falaia aise, he ou duniat itar eḳ-sho gun beshi faibo, erloge aḳero faibo. ³⁰Oile oḳon zera agor ḳataro ase, erar bout zon ḳore foṛizibo, ar ḳoror ḳataror bout zon age aibo.”

Angur baganor girostor kichcha

¹Hozrot Isae aro ḳoila, “Behesti bashshai to ola eḳ girostor laḳan. I giroste tan ḳetor ḳamor lagi kub biane uṭia ḳamla tukanit gela. ²Gia ḳamla saia tarare eḳ-sho ṭeḳa ruz fuṛaia tan angur bagano ḳamo lagaila. ³Kisu beil oia harle tain hirbar baroila, baroia deḳla aro ḳoezon ḳamla beḳar ubai roisoin. ⁴Dekia ḳoila, ‘Tumrao gia amar bagano ḳamo lago, ami tumrare usit ṭeḳa dimu.’ ⁵Teu tara gia ḳamo lagla. Olaḳan beil duifori bala ar zuhoror bade girost hirbar baroia gia aro ḳamlain ania ḳamo lagaila. ⁶Heshe biali bala tain bare gia, aro ḳamlain ubai roisoin dekia ḳoila, ‘Tumra haradin dori ino ubai roiso ḳene?’ ⁷Era ḳoila, ‘Sab, amra kunu ḳam faisi na.’ Giroste ḳoila, ‘Tumrao gia amar bagano ḳamo lago.’

⁸“Hainjabala giroste tan nizor saḳorre ḳoila, ‘Oba, baganor ou ḳamlaintore ania, sheshor zon taki foela zon forzonto hoḳolor ruz dilao.’ ⁹Biali bala zera ḳamo lagsil, tara eḳ-sho ḳori failo. ¹⁰Ita dekia foela zara ḳamo lagsil, tara mono ḳorlo tara aro beshi ṭeḳa faibo, oile giroste era hoḳolre eḳ homan ruz dila. ¹¹Erdae foela dol ou girostor ufre bezar oia ḳoila, ¹²‘Amra hara din dori roide zoli-fuṛi ḳam ḳoria eḳ-sho ṭeḳa failam. Oile tara heshe aia tuṛa shomoe ḳam ḳoraeo, afne tarare amrar homan ṭeḳa dila.’

¹³“Teu giroste tarar eḳzonre ḳoila, ‘Oba, ami oinnae kunta ḳorsi ni, tumi nizeu to eḳ-sho ṭeḳae ḳam ḳorte razi oiso na ni? ¹⁴Oḳon tumar faona loia tumi zao. Ami amar nizor ichchae hoḳolre eḳ homan disi. ¹⁵Amar nizor samana, nizor ichchamoto ḳoros ḳorar odikar nai ni? Ami tarare doya ḳorae tumar sokut zoler ni?’ ”

¹⁶Ou kichcha hunanir bade Isae ḳoila, “Buzcho ni, zera ḳoror ḳataro ase tara age aibo, ar agor ḳataror tara ḳore zaibo.”

Tisrabar nizor moutor agam ḳobor

¹⁷Bade tain zebla Zeruzalem muka roana oizita, ou shomoe tan barozon sahabire alga horaia nia ḳoila, ¹⁸“Huno, amra oḳon Zeruzalem zairam. Hono ami Bin-Adomre doria boṛo imam ar moulana oḳolor ato shofi deoa oibo. Tara bisar ḳoria ḳatol ḳorar rae diba. ¹⁹Amare bin-deshi oḳolor ato shomzaiba. Tara amare ṭaṭṭa-moshkora ḳoria, bezuita sabuk maria, laḳṛir solibo loṭḳaia ḳatol ḳorba. Moutor tin dinor din ami hirbar zinda oia uṭmu.”

Montri oar lagi onurud

²⁰Bade Zibudiar duio fuare loia tarar maʼe Isar gese aila. Aia kunta saoar ashae tan fao-o foṛla. ²¹Isae beṭire zikaila, “Afne kita sain?” Beṭie ḳoila, “Huzur, amar egu fuare afnar razottor ḍainor godi, ar arogure bauor godikano boibar shuzug diba ni?”

²²Isae tarare zuaf dila, “Tumra to buzrae na, tumra kita sairae. Ami ze duk-mosibotor fialadi ḳaimu, ita kunu tumra ḳaitae farbae ni?” Tara ḳoila, “Ji-oe, farmu.” ²³Tain ḳoila, “Aichcha, ami ze fialadi ḳaimu tumrao ou fialadi ḳaibae, oile amar ḍaine ba baue boanir eḳtiar to amar ato nae. Amar behesti baf Allae zarar lagi i godi ṭik korsoin, ḳali tarau faiba.”

²⁴Zibudiar duio fuar arzi hunia, baki doshozon sahabi erar ufre kub biroḳto oila. ²⁵Teu Isae era hoḳolre ḳandat ania ḳoila, “Tumra to zano, bidormi zatir raza oḳol tarar prozar ufre hukum zari ḳore, ar tarar zomidar oḳole gulamor ufre beṭagiri ḳore. ²⁶Oile tumrar maze to ila oa ṭik nae. Tumrar ḳeu dami bonte saile, he tumrar ḳezmot ḳorouk. ²⁷Ar ḳeu boṛo oite saile, he hoḳolor gulami ḳorouk. ²⁸Mono rakio, ami Bin-Adomeo ḳezmot faoat aisi na, aisi to ḳezmot ḳorat. Ar bout manshor zan basanir lagi, nizor zan bilai deoat aisi.”

Hozrot Isae duizon andare bala ḳorla

²⁹Hozrot Isae tan sahabi oḳolre loia Ziriho ṭaun taki roana oigela, ou shomoe bout manush tan ḳore ḳore gela. ³⁰Zaoar shomoe fotor ḳandat dui anda beṭa boat asil. Tain ou fotedi zaira hunia tara zure zure sillaia ḳoilo, “O huzur, O Daud nobir aolad, amrare rohom ḳoroin.” ³¹Sillani hunia onor manshe tarare domoḳ dila. Oile tara aro zure zure sillaia ḳoilo, “O huzur, O Daud nobir aolad, amrare rohom ḳoroin.”

³²Erar sillani hunia tain ubai gela, ubaia ou duio andare ḳandat anaia zikaila, “Kita ba, kita sao? Ami tumrare kita ḳortam?” ³³Tara ḳoilo, “Huzur, amrar soukguin bala ḳori deukka.” ³⁴Ikan hunia tan dorod hamaigelo. Tain tarar souk atai dila, loge logeu tarar souk bala oigelo. Bade tarao tan ḳore ḳore roana oilo.

Fobitro Zeruzalemo Hozrot Isa

¹Hozrot Isae tan sahabi oḳolre loia Zeruzalemor ḳasat, Zoetun faṛor loge Baet-Faijja gaut aia azila. Ono aia tan duizon sahabire ḳoila, ²“Tumra ou samnor gaut zao. Gaut hamaiteu deḳbae egu gada banda ase, loge tar baichchao banda. Oguintor golar doṛi kulia ono loia aio. ³Ḳeu kunta zikaile ḳoio, huzuror dorḳar ase, erdae niram. Teu he loge loge razi oizibo.”

⁴Ita oilo zate agor zomanar hou nobir mazdi zeta batail oise, ota oḳon folizae. ⁵Tain ḳoisla, “Sion-ḳoina Zeruzalemre tumra ḳoio, tumar bashsha tumar gese aira. Tain kub norom mizazi. Tain gada soṛia, gadir baichcha soṛia aira.”

⁶Teu Isae zela hikai disla, duio sahabie gia ola ḳorla. ⁷Ou gada ar tar baichcha anar bade sahabi oḳole nizor gotror saddor kulia gadar fiṭit bisai dila, teu Isa er ufre soar oila. ⁸Aro bout manshe tarar gotror saddor kulia fotor maze bisai dila, ar boute shundor shundor gasor fatain siṛia ania foto bisaila. ⁹Isar age ḳore aro bout manush zaoat asil, era zure zure misil dila,

“Bashsha Daudor aolad, marhaba!

Mabudor name zein aira,

tan tarif ouk.

Behesto-o marhaba!”

¹⁰Hozrot Isa Zeruzalem aia harle asta ṭauno uloistol lagigelo. Hoḳole zikaila, “Oba, ein ḳe?” ¹¹Manshe ḳoila, “Ein to hou Isa nobi, en baṛi Galilor Nasarot gaut.”

Zeruzalem kaba shorifre pak-saf ḳora

¹²Bade Zeruzalem aia tain fobitro Baetul-Mukaddoso hamaila. Hono kaba goror shimanat zera ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳolor kesh baksho, ar faro besra oḳolor ashon ulṭaia falai dila. ¹³Tain ḳoila, “Allar kalamo batail oise, amar gor oibo ebadotor gor, oile tumra ikanre ḍaḳaitor aḍḍaḳana banailiso.”

¹⁴Erbade anda, lula-lengṛa manush oḳol Isar gese Baetul-Mukaddoso aila, tain era hoḳolre bala ḳorla. ¹⁵Hozrot Isae ze kudroti muzeza ḳam ḳorsla, boṛo imam ar moulana oḳole ita deḳla. Tara hunla, Baetul-Mukaddosor bitre huruttainte ḳoira, “Marhaba, Daudor aolad, marhaba.” Ikan hunia tara zoli-fuṛi uṭla. ¹⁶Tara Isare ḳoila, “Ou huruttainte kita sillaira, ita tumi hunrae na ni?” Tain ḳoila, “Oe, huniar to. Allar kalamo foṛsoin na ni,

Nabalik huruttaintor muk taki

tumi tumar tarif adae ḳorso?”

¹⁷Bade Hozrot Isa tarar ges taki gelagi, gia ṭaunor bare Baet-Ania gaut rait roila.

Mozbut imanor munazat

¹⁸Bador din biane Baet-Ania taki Zeruzalem ṭauno aoar shomoe tan feṭo buk laglo. ¹⁹Ou tain fotor ḳandat egu ḍumur gas dekia, ogur fol ḳaoar kiale gasor daro gela. Gia deḳla, gasor maze ḳali fata, kunu fol nai. Tain ou gasre ḳoila, “Tumar maze zanu ar kunudin fol na dore.” Oḳan ḳoar loge logeu gasṭa hukaia morigelo. ²⁰Sahabi oḳole ita dekia taijjub oia ḳoila, “Gasṭa oto zoldi hukai gelo kila?” ²¹Isae zuaf dila, “Ami tumrare hasau ḳoiram, tumra zudi dilor maze shondoe na ḳoria, furafur imane mozbut taḳo, te ami ou ḍumur gasre zeta ḳorsi, tumrao ola farbae. Ḳali ikan nae, tumra zudi ou faṛore ḳo, ‘Uṛia gia doriat foṛo,’ te olau oibo. ²²Tumra zudi ḳalis niote ekin ḳoria dua ḳoro, te tumra zeta saibae, otau faibae.”

Baetul-Mukaddoso Hozrot Isa al-Mosi

²³Bade Hozrot Isa hirbar Baetul-Mukaddoso aia oaz-nosiot ḳorat asla. Ou shomoe boṛo imam ar murobbi oḳol aia tanre zikaila, “Aichcha, ḳo sain, tumi kun eḳtiare ita ḳorrae? Ḳe tumare i ḳemota dise?” ²⁴Isae zuaf dila, “Amio afnarare ekkan soal ḳoriar, afnara er zuaf dilaile amio ḳoimu, kun eḳtiare ami ita ḳorram. ²⁵Afnara ḳoukka sain, Hozrot Ehiae torikar gusol deoar eḳtiar ḳar ges taki faisla? Manshor ges taki, na Allar ges taki?” Ikan hunia tara ḳane-ḳane matila, “Amra zudi ḳoi, Allar ges taki, te he ḳoibo, taile tumra tan ufre iman anlae na ḳene? ²⁶Ar zudi ḳoi, manshor ges taki, te manshe amrare marba, ḳaron manshe to Ehiare nobi ḳoia manoin.” ²⁷Erlagiu tara zuaf dila, “Amra ikan zani na.” Isae ḳoila, “Te amio ḳoitam nae, kun ḳemotae ami ita ḳorram.”

²⁸Erbade Isae ḳoila, “Aichcha, afnara kita mono ḳoroin? Doroukka, eḳ beṭar dui fua asil. Beṭae tar boṛo fuare ḳoilo, ‘Tumi aiz anguror bagano ḳamo zao.’ ²⁹Fuae foela ḳoilo, ‘Ami fartam nae.’ Oile bade tar mon bodlaia ḳamo gelo. ³⁰Bade beṭae tar huru fuar gese gelo, gia ou ḳamor ḳota ḳoilo. He zuaf dilo, ‘Aichcha ami zaimune,’ oile bade gelo na. ³¹Te ḳoukka sain, ou duio fuar maze ḳe bafor hukum manlo?” Tara ḳoila, “Boṛo fuae.” Teu Isae ḳoila, “Ami afnaintore hasa ḳota ḳoiram, gushkur toshildar ar sinal beṭin afnaintor age oia Allar bashshait hamaizira. ³²Ḳaron Ehia nobie hok fot bataia deoat aisla, ta-o afnara tan ḳotae iman anchoin na. Oile gushkur toshildar ar sinal beṭinte iman anla. Ota deḳar badeo afnara iman anchoin na, toubao ḳorsoin na.”

Angur baganor girostor kichcha

³³Bade Hozrot Isae ḳoila, “Afnara oḳon arok kichcha hunoukka. Eḳzon giroste anguror bagan ḳoria sairobae beṛa dilo. Bade sokidaror lagi usa ḳori ekkan ṭong-gor banailo ar anguror rosh bar ḳorar lagi gat kudilo. Heshe ḳet bagi dia girost bidesh gelogi. ³⁴Angur fakia harle giroste tar baṭ nibar lagi, bagidar oḳolor gese tar saḳor oḳol faṭailo. ³⁵Oile bagidare girostor eḳ saḳorre doria kub mair-doir ḳorlo, dusra saḳorre fattordi maria zoḳom ḳorlo ar aroḳ saḳorre zane marililo. ³⁶Bade tain aro besh ḳori eḳ dol saḳor faṭaila, oile bagidar oḳole tarar logeo oula bebohar ḳorlo. ³⁷Hesh-mesh giroste tan nizor fuare tarar gese faṭaila, mono ḳorla, tara tan fuare dam dibo. ³⁸Oile bagidar oḳole fuare dekia, eḳe-oinne foramish ḳori ḳoilo, Ou fuau to bade i shompottir malik oibo. Te ao, ogure marilai, teu amrau itar malik bonizimu. ³⁹Ḳoiau tara fuare doria angur baganor bare nia zane marililo. ⁴⁰Oḳon ḳoukka sain, baganor malik zebla aiba, aia ou bagidar oḳolre kita ḳorba?” ⁴¹Tara ḳoila, “Tain aia to ou naforman oḳolre kun ḳorba ar shomoe moto zera fosholor baṭ dibo, tarar gese ḳet bagi diba.” ⁴²Hozrot Isae ḳoila, “Afnara Allar kalamo foṛsoin na ni,

Raz-mestoir oḳole ze fattorre beḳama ḳoia falai disil,

oḳṭa diau goror ian kuṭi oilo.

Mabude nizeu ita oaila,

ita dekia to amrar taijjubi lager.

⁴³Erlagi ḳoiram, Allar bashshai afnarar ges taki ḳaṛia neoa oibo. Ar zerar zindegit ou bashshair fol deḳa zaibo, tarareu ou bashshai deoa oibo. ⁴⁴Huno, ou fattoror ufre ze zon foṛbo, he ṭukra ṭukra oizibo. Ar ou fattoro zar ufre foṛbo, he-o surmar oizibo.”

⁴⁵Isar ou talim hunia boṛo imam ar Forishi oḳole buzilila, tain ita tarar bifokkeu ḳoira. ⁴⁶Erdae tara Isare dorilito sailo. Oile manshore ḍoraia tanre kunta ḳorlo na. Manshe to Hozrot Isare nobi hishabe manta.

Bia baṛir daotor kichcha

¹Hozrot Isae hirbar tarare aro kichcha hunaila. Tain ḳoila, ²“Behesti bashshai ola eḳ bashshar laḳan, ze bashshae tan fuar biar ḳanir bebosta ḳorla. ³Ar daoti meman oḳolre anar lagi tan ḳoezon saḳorre faṭaila, oile tara ḳeu ailo na. ⁴Bade tan aro saḳorre oḳan hikai dia faṭaila, ḳoila, ‘Tumra gia meman oḳolre ḳoio, ami amar taza bisal ar ḍeḳain zobo ḳoria ḳani zuit ḳorsi. Oḳon ḳani tiar oigese, afnara aia ḳailaukka.’

⁵“Daoti oḳole erar ḳotao na hunia, ḳeu tar nizor ḳamaro ar ḳeu tar dukano gelogi. ⁶Ar baki manshe ou saḳor oḳolre doria beijjot ḳoria kun ḳorillo. ⁷Bashshae ita hunia gusae aguin oigela. Tain nizor sifai dol faṭaia hou kuni oḳolre binash ḳorla, tarar asta ṭaun aguindi zalailila. ⁸Bade tan saḳor oḳolre ḳoila, ‘Ḳani to tiar oigese, oile zetare daot dislam, ita to i daotor zuka nae. ⁹Te huno, tumra oḳon rastar muṛae muṛae zao, gia zoto manshore faibae, tara hokkolre biar ashoro loia ao.’ ¹⁰Bashshar hukum faia tara baroia gia bad-bala zoto zonre failo, hoḳolre anlo. Erlagi memane asta bia baṛi bori gelo.

¹¹“Erbade bashshae memanor loge deḳa ḳorat aila, aia mozlisor bitre hamaia deḳoin, eḳ beṭae shadaron ḳafoṛ findia ḳanit aichche. ¹²Tain ere zikaila, ‘Oba, bia baṛir zuka ḳafoṛ na findia ino hamaile kila?’ Oile he kunu zuaf dito farlo na. ¹³Teu bashshae tan gulam oḳolre hukum dila, ‘Ogur at-fao bandia bare nia andair gato falai deo.’ Hono manshe ḳanda-ḳaṭi ḳorba ar zala-zontronae dat kiṛimiṛi ḳaiba.”

¹⁴Kichchar Bade Isae ḳoila, “Erlagiu ami ḳoiram, daot faisoin boute, oile fosond oisoin ḳom.”

Ḳaznar befare dushmon oḳolor prosno

¹⁵Oḳan hunia Forishi dolor manush Isar ges taki horia gelagi, gia foramish ḳorla tanre kila ḳotar fando falail zae. ¹⁶Teu tara nizor ḳoezon shagrid ar Raza Herudor dolor kisu manshore Isar gese faṭaila. Otae aia ḳoila, “Huzur, amra to zani, afne eḳzon hok manush. Hoḳ-halal fote manshore Allar rasta batai dira. Ḳe kita mono ḳore ba na ḳore, itae afnar kuntau zae ae na, afne to muk saia kunta ḳoroin na. ¹⁷Te amrare batai deukka, Hozrot Musar shoriot mafik Ruman bashshare ḳazna deoa zaiz ni? Amra tanre ḳazna ditam ni, na ditam na?”

¹⁸Itar ku-foramish tain buzilila, buzia ḳoila, “O bonḍo oḳol, tumra ḳene amare forikka ḳorrae? ¹⁹Ze ṭeḳadi ḳazna dein, ota egu ṭeḳa amare deḳao.” Ou tara eḳṭa dinar ania Isar ato dila. ²⁰Tain zikaila, “I foeshar ufre ḳar nam ar sobi?” ²¹Tara ḳoila, “Ruman bashshar.” Tain ḳoila, “Te huno, bashshar zeta ita bashshare deo, ar Allar zeta ita Allare deo.” ²²Ikan hunia tara taijjub bonia tan ges taki gelagi.

Moron bade zinda oar prosno

²³Ou din Siddekia mozobor ḳoezon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare fando falaibar lagi zikaila, ²⁴“Huzur, Hozrot Musae ḳoisoin, ḳeu zudi tar boure niaoladi halote toia mara zae, te tar baie ou ṛaṛi beṭire bia ḳoria tar bair bongsho basaite oibo. ²⁵Te amrar ono eḳ foribaro shat bai asil. Boṛo zone bia ḳoria niaoladi halote mara gelo. ²⁶Bade dusra baie tar ou ṛaṛi babire bia ḳori mara gelo. Ou nomunae tisra bai taki shuru ḳoria shato baie ou beṭire bia ḳorlo. ²⁷Heshe ou beṭio mara gelo. ²⁸Te ḳoukka sain, moron bade zebla tara zinda oia uṭba, ou shomoe i beṭi, era kun bair bou oibo? Tara hoḳoleu to i beṭire bia ḳorsil.”

²⁹Tain zuaf dila, “Afnara to Allar kalam zanoin na, Allar kudroti befaro buzoin na. Erdae afnara i bul ḳorra. ³⁰Hunoukka, murda oḳol zebla zinda oia uṭba, ou shomoe tara bia-shadi ḳorta nae, ḳeu tarare bia dito-o nae. Era to firistar laḳan boniziba. ³¹Murda oḳol zinda oar befare Allae kita bataisoin, ita afnara kitabo foṛsoin na ni? ³²Kitabo leḳa ase, ‘Ami Ibrahimor Alla, Isʼhakor Alla ar Iakubor Alla.’ Oḳan taki buza zae, ou nobi oḳolor ufat oileo era to Allar sokut oḳono zinda asoin. Alla to murda oḳolor Mabud nae, tain zinda oḳolor Mabud.” ³³I talim hunia tara taijjub oigela.

Hoḳol taki boṛo hukum kita?

³⁴Forishi oḳole zebla hunla, Siddekia mozobor manshe Isar mator kunu zuaf dita farsoin na, teu tara hoḳol ekkano oila. ³⁵Tarar dolor eḳzon moulana aia Isare forikka ḳorar lagi zikaila, ³⁶“Huzur, Musar shoriotor maze hoḳol taki boṛo hukum kunṭa?”

^37-38Isae zuaf dila, “Hoḳol taki boṛo hukum oilo, ‘Tumrar asta dil, asta zan, asta mon ar hoḳol shokti dia tumrar Mabud Allare mohobbot ḳorio.’ ³⁹Dusra hukumo ou laḳan, ‘Tumrar ari-forire nizor laḳan maea ḳorio.’ ⁴⁰Ou duio hukumor ufre asta Tourat Shorif ar asmani kitab oḳol nirbor ḳore.”

al-Mosi ḳe?

⁴¹Forishi oḳol ekkano dola roisoin, ou shomoe Isae tarare zikaila, ⁴²“Al-Mosir befare afnara kita zanoin? Tain ḳar aolad?” Tara ḳoilo, “Daud nobir aolad.” ⁴³Teu Isae tarare ḳoila, “Te Pak Ruhur bole Daud nobie kila al-Mosire tan nizor munib ḳoisoin? Daude to ḳoisoin,

⁴⁴Mabude amar munibre ḳoila,

ami zoto shomoe tumar dushmon oḳolre

tumar faor tolat na falai,

oto shomoe tumi amar ḍainor toḳto bo.

⁴⁵Daude zebla nizeu al-Mosire tan munib ḳoisoin, te al-Mosi ḳemne Daudor aolad oiba?”

⁴⁶Tara er kunu zuaf dita farla na, ar ou din taki ḳeu tanre kunta zikaniro shaosh failo na.

Neta oḳolre Hozrot Isar hushiari (23:1–25:46)

Moulana oḳolor lagi afsus

¹Hozrot Isae tan logor manshore ar sahabi oḳolre ḳoila, ²“Musa nobir shoriot talim dibar eḳtiar to moulana ar Forishi oḳolor ato. ³Erlagi tara zeta ḳoin, ota manio, ar zeta amol ḳorar hukum dein, ota amol ḳorio. Oile tara nize zeta ḳoroin, tumra ita ḳorio na. Ḳaron, tara muk dia zela ḳoin, ila ḳam ḳoroin na. ⁴Tara am manshor ḳando boṛo boṛo gaiṭ tulia dein, oile shaijjor lagi tara eḳṭa angulo laṛain na. ⁵Tara ḳali manshore deḳanir lagi hoḳolta ḳoroin. Allar kalamor aeat dia boṛo boṛo tabiz bandoin ar nizor forezgari deḳanir lagi lamba lamba faugṛi bandoin. ⁶Tara ḳanir mozliso bala bala zaga tukain ar mosido hamaia samnor ḳataro boita sain. ⁷Bazar-aṭo gia salam faite kub fosond ḳoroin, ar sain manshe tarare huzur huzur ḳorouk.

⁸“Oile tumrare ḳeu huzur huzur ḳorouk, ita asha ḳorio na. Tumrar ashol huzur to ḳali eḳzonu asoin, tumra ḳali bai bai roio. ⁹I duniat ḳeurore baba ḳoia ḍakio na, ḳaron tumrar batuni baf to eḳzonu, tain behesto asoin. ¹⁰Ḳeu tumrare neta ḳoia ḍaḳouk, ita asha ḳorio na. Tumrar neta to eḳzonu, tain oila al-Mosi.

¹¹“Tumrar maze zein hoḳol taki boṛo, ein tumrar ḳezmot ḳorouk. ¹²Ze zone nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.

¹³“Haere moulana ar Forishir dol, afsus tumrar lagi, tumra bonḍo! Tumra manshor samne behesti bashshair duar bond ḳori toiso. Tumra nizeo ono hamairae na, manshoreo hamaite dirae na. ¹⁴Haere bonḍo moulana ar Forishir dol, manshore deḳanir lagi tumra lamba lamba dua ḳoro, hirbar ṛaṛi beṭintor zaga-mirasho doḳol ḳoro. Erlagi tumrar ḳoṭin shaza oibo. ¹⁵Haere bonḍo moulana ar Forishir dol! Eḳzon manshore tumrar dolo nibar lagi shat shomudro tero nodi faroia tumra douṛao. Oile he tumrar dolo hamaia harle, tare tumra taki aro boṛo duzoki banao.

¹⁶“Haere anda fot deḳaora! Tumra nize anda oia oinnore kila fot deḳao? Tumra to ḳo, Baetul-Mukaddosor name ḳosom ḳaile kunta oe na, oile Baetul-Mukaddosor shunar name ḳosom ḳaile mante oibo. ¹⁷Haere anda be-aḳolor dol, kunḳan boṛo? Baetul-Mukaddos, na shuna? Baetul-Mukaddoseu to ou shunare fak-fobitro ḳore. ¹⁸Hirbar tumra ḳo, kurbani ḳanar name ḳeu ḳosom ḳorle kunta oe na, oile kurbanir sizor name ḳosom ḳorle mante oibo. ¹⁹O anda oḳol, kunḳan boṛo? Kurbani ḳana, na kurbanir siz? Ou kurbani ḳanaeu ou sizre fak-fobitro ḳore na ni? ²⁰erlagi ze zone kurbani ḳanar name ḳosom ḳore, he kurbani ḳana ar kurbanir siz, i duiotar nameu ḳosom ḳore. ²¹Olau Baetul-Mukaddosor name ze zone ḳosom ḳore, he-o Baetul-Mukaddos ar er bitre zein taḳoin, tan nameu ḳosom ḳore. ²²Ze zone behestor name ḳosom ḳore, he Allar arosh ar arosho zein asoin, tan nameu ḳosom ḳore.

²³“Haere bonḍo moulana ar Forishir dol! Tumra guamuri, fodina fata, ar zirar dosh baṭor eḳ baṭ Allar oaste zoḳat dirae, oile Musa nobir shoriotor hukum mafik aro zoruri befar, mani hok insaf, doya ar Allar mohobbot tumra bad dilaiso. Te foela hukum amol ḳorar loge loge badortao amol ḳora zorur. ²⁴Tumra nizeu anda, otoso aroḳzonre fot deḳairae. Tumra egu moshao sakia tulo, oile uṭre gililao.

²⁵“Haere bonḍo moulana ar Forishir dol! Tumra to bashon-bortonor bargala bala ḳori saf ḳoro, oile itar bitor gala zulum ar lub-lalose bora. ²⁶Haere anda Forishir dol, tumra foela otar bitor saf ḳoro, teu bargala emneu saf oibo.

²⁷“Haere bonḍo moulana ar Forishir dol! Tumra oilae sun-ḳam ḳora ḳoeboror laḳan, er bargala soḳsoḳa oileo bitre to ḳali mora manshor aḍḍi-guḍḍi ar ḳasrae bora. ²⁸Ṭik ou laḳan, manshe mone ḳoroin tumra kub forezgar, ashole tumrar dil to bonḍami ar naformanie bora.

²⁹“Haere bonḍo moulana ar Forishir dol! Tumra nobi oḳolor rouzare shundor ḳori fakka ḳoro, ar oli-auliar mazarre soḳsoḳa ḳori hazao. ³⁰Ar tumra ḳo, ‘Ish, amra zudi amrar baf-dadar zomanat duniat aitam, te nobi oḳolre ḳatol ḳorar bala baf-dadar loge gelam na one.’ ³¹Ou mate tumra forman dirae, nobi oḳolre zetae ḳatol ḳorsla, otar bongshodoru tumra. ³²Te tumrar baf-dadainte zeta shuru ḳoria gesoin, tumra otar baki gala fura ḳorrae.

³³“O hafor baichchain, duzoḳor azab taki tumra kila bastae? ³⁴Erlagi ami tumrar gese nobi-rosul, ar alim-ulama faṭaiar. Erar mazor ḳoezonre tumra ḳatol ḳorbae, ḳoezonre duk-koshṭor solibo loṭḳaia marbae. Ar ḳoezonre tumrar mosido haraia sabuk maria, eḳ gau taki aroḳ gaut ḳedaia nibae. ³⁵Erdaeu nirdushi hou Habilor lou taki Barakiar fut Zakariare ḳatol ḳora forzonto, duniat zoto kun-ḳarafi oise, ita hoḳol kunor dayi oibae tumra. Ou Zakariare to Baetul-Mukaddosor bitoror kurbani ḳana ar ḳas pak zagar mazḳano ḳatol ḳora oisil. ³⁶Ami tumrare hasa ḳota ḳoiram, ou tamam kunor dayi oibae i zomanar manush.

Zeruzalemor lagi afsus

³⁷“Zeruzalem! Haere Zeruzalem ṭaun! Tumi nobi oḳolre ḳatol ḳoro, tumar gese zarare faṭail oe, tumi tarare fattor maro. Murgie zela tair baichchare ḍaḳnar tole ashroe dey, amio oula tumar manshore ashroe ditam saisi, oile tara hunla na. ³⁸O Zeruzalemor bashinda oḳol, tumrar sokur samneu tumrar boshot ḳana ḳali baṛi oibo. ³⁹Ami tumrare ḳoiram, zotodin tumra ikan na ḳoibae, ‘Mubarok tainu, Allar nam loia zein aira,’ oto din tumra ar amare deḳtae nae.”

Kiamotor alamot

¹Hozrot Isa Baetul-Mukaddos taki baroia zairagi, ou shomoe tan sahabi oḳol tan gese aila, tanre Baetul-Mukaddosor shundor shundor dolan deḳanir lagi. ²Tain ḳoila, “Ami tumrare hok kota ḳoiram, tumra ou zeta boṛo boṛo dolan deḳrae, itar dui iṭ ekkano roito nae, hoḳolta maṭit mishizibo.”

³Bade tain zebla Zoetun faṛor ufre boat asla, ou shomoe sahabi oḳole aia tanre niralae zikaila, “Huzur, amrare ḳoiba ni, ita kun shomoe oibo? Kun alamot dekia amra buzmu, afnar aoar shomoe ar kiamotoro shomoe aichche?” ⁴Isae ḳoila, “Dekio, ḳeu zanu tumrare na ṭoge. ⁵Bout zone amar nam doria aibo, aia ḳoibo, amiu al-Mosi, ḳoia boutre ṭogibo. ⁶Huno, zuddor aoaz ar laṛair ḳobor tumra faibae, oile itae ḍoraio na. Ita nichoe goṭbo, goṭleo ita to shesh nae. ⁷Eḳ zatie aroḳ zatir loge, eḳ deshe aroḳ deshor loge laṛai ḳorbo. Bout zagat boisal ar nidan deḳa dibo. ⁸Oile ita to ḳali mosibotor shuru.

⁹“Ou shomoe aile manshe tumrare zulum ḳorar lagi dorai dibo ar kun ḳoraibo. Amar lagi hoḳol zatie tumrare ginnaibo. ¹⁰Teu bout zon fislizibo, eḳe-oinnore ginnaibo ar dorai dibo. ¹¹Bout bonḍo nobi aia manshore ṭogiba. ¹²Naformanir foriman baṛizibo, erlagi bout manshor maea-momota ḳomizibo. ¹³Oile hesh forzonto zera ṭikia roiba, erau rehai faiba. ¹⁴Hoḳol zatir gese shakki hishabe behesti bashshair kush-ḳobri toblig kora oibo, erbadeu kiamot aibo.

Aḳeri zomanar halot

¹⁵“Hozrot Danial nobir muk taki ze bezuita noforoti zinishor ḳota zanail oise, tumra ou pak zagat i zinish deḳbae. Ze zone tilaot ḳorer, he buzouk. ¹⁶Ou shomoe zera Ehudia zilat taḳba, tara faṛedi gia bagouk. ¹⁷Hidin ḳeu zudi goror salor ufre taḳe, te tar goror mal-samana nibar lagi, lamat lamia goror bitre na hamauk. ¹⁸Zera bondor maze ase, tarar gotror saddor nibar lagi baṛit na auk. ¹⁹Ou shomoe zeta beṭintor feṭo hurutta, ar zera huruttare bukor dud ḳaoaira, tarar boṛo mosibot oibo. ²⁰Tumra dua ḳoro, shitor dino ba Zummabare zanu tumrar bagia zaoa na lage. ²¹Ou shomoe oto bezuita ḳoshṭo oibo, zeta duniar foela taki aiz forzonto kunudin oise na, ar oito-o nae. ²²Mabude zudi i shomoere ḳomaia na dita, te ḳeu zinda roilo na one. Oile Allae tan fosond ḳora bonda oḳolor lagi i shomoe ḳomaia diba.

²³“Hi shomoe ḳeu zudi tumrare ḳoe, ‘Huncho ni, al-Mosi bule ono aisoin’ ba ‘Hono aisoin’ te tumra ekin ḳorio na. ²⁴Ḳaron al-Mosi nam loia bout bonḍo aiba, nobi haziao bout bonḍo aiba. Itae bout boṛo boṛo asanok keramoti ḳam deḳaiba. Tara saiba, shuzug faile Allar fosond ḳora bondare duka dia be-fote nitagi. ²⁵Dekio, ami ita hokkolta tumrare ageu zanai dilam.

²⁶“Huno, ḳeu zudi tumrare ḳoe, ‘al-Mosi bule morubumit asoin,’ te tumra zaio na. Zudi ḳoe, ‘Tain goror bitre asoin,’ te ekin ḳorio na. ²⁷Megor zilkir loge fube-foisme hoḳolbae zela for oizae, ami Bin-Adom aileo ola oibo. ²⁸Huno, lash zeno taḳe, hokun emneu hono dola oe.

²⁹“Ou mosibotor shomoe shesh oar badeu, ‘shuruz andair oizibo, sande ar for dito nae. Tera oḳol asman taki foṛizibo, asmanor kunu shoktiala sizu ṭik-ṭak roito nae.’ ³⁰Ou shomoe asmanor maze ami Bin-Adomor nishana deḳa zaibo. Duniar hoḳol manshe ahazari ḳorba. Tara deḳba, Allar kudroti shokti ar nuror mohimae, ‘megor kuṭit oia Bin-Adom duniat aira.’ ³¹Ou shomoe zure zure shingar aoaz oibo, er loge logeu duniar eḳ mata taki aroḳ matat tain firista oḳolre faṭaiba, era Allar fosond ḳora bonda oḳolre sairobae tone dola ḳorba.

³²“Ou ḍumur gasor bae saia talim lo. Gasor dal-fala norom oia zebla noea kuṛi baroe, ou shomoe tumra buzilao gormor din aichche. ³³Te ou laḳan tumra zebla deḳbae ita hoḳolta goṭer, dekia buzilio, Bin-Adomo daro aichchoin. Ḳali daro nae, tain aia duaro ṭukaira. ³⁴Ami tumrare hasa ḳota ḳoiram, ita na goṭa forzonto i zomanar manush fuṛaita nae. ³⁵Asman-zomin hoḳolta binash oizibo, oile amar kalam hamesha zari roibo.

³⁶“Hou din ar hi shomoyor befare ḳali amar gaibi baf Alla saṛa ar ḳeu zanoin na. Asmani firista ba Ibnullaeo zanoin na. ³⁷Nuh nobir amolo ze halot oisil, ami Bin-Adom dusrabar aoar shomoe ṭik olaḳan-u oibo. ³⁸Boinna shuru oar age Nuh nobi zazo uṭar ag forzonto manshe ḳaoa-daoa ḳorse, eḳe-oinnore bia-shadi ḳorse. ³⁹Nuh nobir boinnar fanie itare bashaia neoar ag forzonto tara kuntau ṭer faila na. Ami Bin-Adom aibar shomoyo ṭik olaḳan oibo. ⁴⁰Ou shomoe duizon manush eḳloge bondo taḳle, eḳzonre neoa oibo ar dusra zonre bad deoa oibo. ⁴¹Dui beṭie eḳloge bara-banat taḳleo, erar eḳzonre neoa oibo, aroḳzon bad foṛizibo. ⁴²Erlagi ḳoiram, tumra hushiar roio, tumrar malik kun din aiba, ita to tumra zano na. ⁴³Oile ikan mono rakio, sur kun shomoe aibo, ikan zudi giroste zanto, te to he hozag roilo one ar surre goro hamaite dilo na one. ⁴⁴Erlagi tumrao hamesha tiar roio, ze shomoyor ḳota tumra sintao ḳortae nae, hou shomoe Bin-Adom aiba.

⁴⁵“Ila hok-halali ar aḳoldar saḳor ḳe ase, zar ato tar munibe daeitto dila he oḳtor ḳalo oinno saḳor oḳolre ḳani baṭia dibo. ⁴⁶Ḳofali to hou saḳor, zare tar munibe aia hok-halal faiba. ⁴⁷Ami tumrare hasa ḳota ḳoiram, munibe ou saḳoror atou tan nizor hoḳol don-samanar bar diba. ⁴⁸Oile doro, hou saḳore mone mone ḳoilo, amar munib aite to bout deri ase, ⁴⁹ar ou fake he hokkol saḳor-baḳorre mair-doir ḳorlo, ar modkuror loge ḳana-dana ḳoria mod ḳailo. ⁵⁰Bade zedin ar ze oḳtor ḳota he sintau ḳorto nae, hou din ar hou oḳto tar munib aia azir oiba. ⁵¹Tain aia tare ḳaṭia ṭukraia bonḍo oḳolor loge mishaiba. Hino manshe ḳanda-ḳaṭi ḳorba, ar zala-zontronae dat kiṛimiṛi diba.”

Behesti bashsha ḳemne aiba

¹Erbade Isae ḳoila, “Behesti bashshai oilo ola doshgu fuṛir laḳan, zeta fuṛinte biar damandre aguaia anar lagi lem-lemṭon loia baroilo. ²Erar maze fas zon asil aḳoldar ar fas zon asil be-aḳol. ³Be-aḳol fuṛinte ḳali lem loia baroilo, lemor kunu tel nilo na. ⁴Oile aḳoldar fuṛinte lemor loge fifat ḳori telo nilo. ⁵Damand aite deri oae tara hoḳolu ungaite ungaite gumai gelo.

⁶“Bade ada-raitkur bala sillani huna gelo, ‘Damand aichchoin, damand aichchoin, zoldi baro.’ ⁷Sillani hunia ou fuṛin uṭia lem-lemṭon ṭik korat lagla. ⁸Hou be-aḳol fuṛinte aḳoldar fuṛinre ḳoila, ‘Amrare tuṛa tel deo na, amrar lem limi zargi.’ ⁹Tara ḳoila, ‘Amrar gese zeta tel ase, ita to amraru lagbo. Te tumra dukan taki tel anailao.’ ¹⁰Ou be-aḳol fuṛin tel anat gia harleu damand ailla. Ou shomoe aḳoldar ou fuṛin zuit asla, tara damandre loia bia baṛit hamailo. Tara hamanir badeu duar bond ḳora oilo. ¹¹Bade ou be-aḳol fuṛinte aia duar bond dekia ḳoila, ‘Hunra ni, duarḳan kuloukka.’ ¹²Damande zuaf dila, ‘Ami hasau ḳoiram, ami to tumrare sini na.’ ”

¹³Ou kichchar bade Isae ḳoila, “Erdae tumra hushiar roio, hidin ar hi shomoyor ḳota to ḳeuror zana nai.

Tin saḳoror kichcha

¹⁴“Behesti bashshai ola eḳzon manshor laḳan, ein bidesh zaoar bala tan saḳor oḳolor ato asta shompottir bar shomzai dila. ¹⁵Erar zoiggota mafik tain eḳzonre fas azar ṭeḳa, dusra zonre dui azar ar aroḳzonre eḳ azar ṭeḳa dila. ¹⁶Fas azar ṭeḳa ze faisil, he ou ṭeḳadi ḳarbar ḳoria aro fas azar lab ḳorlo. ¹⁷Dui azar ṭeḳa ze faisil, he-o aro dui azar lab ḳorlo. ¹⁸Oile eḳ azar ṭeḳa ze faisil, he tar malikor i ṭeḳa ḳamo na lagaia gat kudia maṭir tole toilo.

¹⁹“Bout din bade hou malik desho aia tarar hishab-nikash saila. ²⁰Teu fas azar ṭeḳa ze faisil, he aro fas azar loia aia malikre ḳoilo, ‘Sab, afne amare fas azar ṭeḳa disla, ou ṭeḳadi ami aro fas azar lab ḳorsi.’ ²¹Ikan hunia malike ḳoila, ‘Shabbash, tumi kub hok-halali manush. Tumi huru-muru befareu hok-halal roiso, erlagi ami tumare aro bout boṛo daeitto dimu. Ao, amar kushir bagi o.’ ²²Bade dui azar ṭeḳa ze faisil, he aia ḳoilo, ‘Sab, afne amare dui azar ṭeḳa disla. Ami to aro dui azar lab ḳorsi.’ ²³Teu malike ḳoila, ‘Shabbash, tumi kub hok-halali manush. Tumi tuṛa befareu hok-halal roiso, erlagi ami tumare aro bout boṛo daeitto dimu. Ao, amar kushir bagi o.’ ²⁴Oile eḳ azar ṭeḳa zare disla, he aia ḳoilo, ‘Sab, ami zani afne kub ḳoṛa manush. Afne ḳet na ḳoriao dan ḳaṭoin ar bain na dileo ali huroin. ²⁵Erdae ami ḍoraia afnar ṭeḳa maṭir tole lukaia toislam. Ou neukka afnar ṭeḳa.’ ²⁶Malike ḳoila, ‘Haere ḳobis, tuin to kuṛia. Tui zudi ikan mono ḳorle, ami ḳet na ḳorleo dan ḳaṭi ar bain na dileo ali huri, ²⁷te amar ṭeḳa tui befarir gese dile na ḳene? Te to ami aia mul ṭeḳar loge kisu lab failam one.’ ²⁸Bade tain oinno saḳor oḳolre ḳoila, ‘Tumra ogur ges taki ou ṭeḳa nia, dosh azar zar gese ase tare deo. ²⁹Huno, zar ase tare aro deoa oibo, tar aro baṛibo. Oile zar nai, tar zeta ase otao ḳaṛia neoa oibo. ³⁰Ou bojjat saḳorre nia tumra andair gato falai deo. Hou gato manshe ḳanda-ḳaṭi ḳorbo ar zala-zontronae dat kiṛimiṛi dibo.’

Aḳerator bisaror boean

³¹“Bin-Adome zebla firista oḳolre loia nizor mohimae hirbar aiba, aia nizor bashshair godit boiba. ³²Ou shomoe duniar tamam zatir manshore tan samne ana oibo. Raḳale zela meṛa ar sagolre alada ḳore, taino oula hoḳol manshore algaia dui bag korba. ³³Tan ḍain galabae meṛa ar bau galabae sagolre raḳba.

³⁴“Erbade bashshae tan ḍain galar manshore ḳoiba, ‘Tumra zara amar batuni bafor rohom faiso, tumra ao. Ar duniar foela taki tumrar lagi ze bashshai tiar ḳori raḳa oise, ou bashshair doḳol shomzia neo. ³⁵Mono ase ni, amar zebla feṭo buk lagsil, tumra amare ḳani dislae, fiasor shomoe fani dislae, ar musafir halote amare ashroe dislae. ³⁶Ami zebla udla aslam, tumra ḳafoṛ dislae, bemaror shomoe ḳezmot ḳorslae, ar zel ḳanat amare deḳat geslae.’

³⁷“Ou shomoe hou allaoala manshe ḳoiba, ‘Malik, afnar buk lagae amra kun shomoe afnare ḳaoailam? Kun shomoe afnare fani dilam? ³⁸Ar kun shomoe musafir halote afnare ashroe dilam, ḳali ga dekia kun shomoe ḳafoṛ dilam? ³⁹Ar kun shomoe-u ba bemari haloto afnar ḳezmot ḳorlam, ba zel ḳanat deḳat gelam?’ ⁴⁰Ou shomoe bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagi tumra zebla ita ḳorso, er mani amare-u ḳorso.’

⁴¹Bade bashshae tan bau galar manshore ḳoiba, ‘O lannotir dol, amar samon taki bago. Iblis-shoetan ar tar samsa zinnat oḳolor lagi duzoḳor ze aguin tiar ḳora oise, hono zao. ⁴²Amar feṭo bukor ḳalo tumra amare ḳaoaiso na, fiasor shomoe fani diso na. ⁴³Amar musafir haloto roibar ashroe diso na, ami zebla udla aslam, ḳafoṛ diso na, bemaror shomoe saiso na, amare deḳar lagi zelḳanato geso na.’

⁴⁴“Ou shomoe tara ḳoiba, ‘Huzur, amra kun shomoe ita ḳorlam? Afnare bukashi, fiasi, musafir, udla gotor, bemari ar zel ḳanat dekiao shaijjo ḳorlam na?’ ⁴⁵Bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagiu tumra zebla ita ḳorso na, er mani amare-u ḳorso na.’ ”

⁴⁶Heshe Isae ḳoila, “Ou naforman oḳole aḳerato siroḳal shaza faiba, oile allaoala manshe aḳeri zindegi faiba.”

Hozrot Isar ufat ar zinda oa (26:1–28:20)

Hozrot Isare ḳatol ḳorar foramish

¹Ou boean shesh oia harle, Isae tan sahabi oḳolre ḳoila, ²“Tumrar to zana ase, ar dui din badeu Azadi Id. Idor shomoe ami Bin-Adomre solibo loṭḳaia marar lagi dorai deoa oibo.”

³Ou shomoe boṛo imam ar murobbi oḳol aia, tarar fordan imam Kaeafar baṛit dola oila. ⁴Dola oia ou foramish ḳorla, Isare kila lukaia aṭok koria ḳatol ḳora zae. ⁵Oile tara ḳoila, “Idor shomoe tare dortam nae. Dorle manshe gonḍogul lagai dito fare.”

Hozrot Isare hazanir bed

⁶Isa zebla Baet-Ania gaur fosa-kushṭo bemari Saimonor baṛit asla, ⁷ou shomoe eḳ beṭi manush tan gese aila. Beṭie sinor eḳ boiamo ḳori kub dami ḳaṭi ator anchila. Isa ḳaoat boia harle beṭie hoḳol ator tan matat ḍali dila. ⁸Ita dekia sahabi oḳol biroḳto oia ḳoila, “Ou ator fuṭain ḳene borbad ḳora oilo? ⁹I fuṭin besile to bout ṭeḳa faia gorib oḳolre bilai deoa gelo one.”

¹⁰Ikan buzia Isae ḳoila, “Tumra i beṭigure duk dirae ḳene? Tain to amar lagi ṭik kamu ḳorsoin. ¹¹Gorib oḳol to hamesha-u tumrar loge roiba. Oile amare to hamesha faitae nae. ¹²Ein aia amar gotro ator maḳaia, dafon-ḳafonor lagi amare zuit ḳorsoin. ¹³Ami tumrare hasa ḳota ḳoiram, duniar zekunu zagat Allar kush-ḳobri toblig korar shomoe, ou besaṛire mono ḳorar lagi, tan i nek kamor ḳotaḳano ḳoa zaibo.”

Sahabi Ihudar beimani

¹⁴Bade tan barozon sahabir mazor eḳzon, en nam Ihuda Iskariat, ein boṛo imam oḳolor gese gia ḳoila, ¹⁵“Isare afnarar ato doraia dile amare kita diba?” Teu boṛo imam oḳole tare rufar tish ṭeḳa dila. ¹⁶Erbad takiu Ihudae Isare doraia deoar shuzug tukanit roilo.

Hozrot Isar aḳeri id

¹⁷Ḳamir saṛa ruṭi ḳaoar idor foela din, sahabi oḳole aia Isare zikaila, “Huzur, amra kun zagat gia afnar lagi Azadi Idor ḳana tiar ḳortam?” ¹⁸Tain zuaf dila, “Tumra ṭauno zao. Gia omuk manshore ḳoio, ‘Huzure ḳoisoin, amar shomoe gonaia aichche, te ami amar sahabi oḳolre loia tumar baṛit id ḳormu.’ ” ¹⁹Isar hukum mafik sahabi oḳole gia Azadi Idor ḳani tiar ḳorla.

²⁰Bade hainjabala Isae tan barozon sahabire loia ḳanit boila. ²¹Boia ḳoila, “Ami tumrare hasa ḳota ḳoiram, tumrar mazor eḳzoneu to amare dushmonor ato dorai dibo.” ²²Ikan hunia tara kub bezar oigela. Erlagi tara eḳ ek kori zikaila, “Huzur, i zon kita ami ni?”

²³Tain ḳoila, “Oḳon ze zone amar loge oia talo at harar, he-u amare doraia dibo. ²⁴Ami Bin-Adomor moutor befare asmani kitabo zela leḳa ase, amar mout to oulau oibo. Oile afsus hou zonor lagi, zegie amare doraia dibo. Duniat tar zonom na oau, tar lagi bout bala asil.” ²⁵Ze Ihudae Isare dorai dito sar, he tanre zikailo, “Huzur, hi zon kita ami ni?” Isae tare ḳoila, “Tumi ṭiku ḳoirae.”

al-Mosir mezbanir nomuna

²⁶Tara ḳana ḳaira, ou shomoe Isae ruṭi ato loia Allar shukria adae ḳorla. Tain ruṭi siṛia ṭukra ṭukra ḳori sahabi oḳolre dila. Dia ḳoila, “Ou neo, ḳao, mono ḳoro ita amar ḳaea.”

²⁷Bade tain shorbotor fiala loia Allar shukria zanaila, ar erare dia ḳoila, “Tumra hoḳole ou fiala taki anguror shorbot ḳao. ²⁸Mono ḳorio, ita amar lou. Ou lour zoriae adom zatir boutor guna mafi oibo. Allar loge manshor milonor usilla oilo ou lou. ²⁹Ami hasa ḳota ḳoiar, ami amar gaibi bafor bashshait dakil oia hari, tumrare loge loia zotodin noea halote anguror shorbot na ḳaisi, oto din i shorbot ar ḳaitam nae.” ³⁰Heshe tara hoḳole mili eḳ gozol gaia, gor taki baroia Zoetun faṛo gelagi.

Hozrot Fitore oshikar ḳorar agam ishara

³¹Bade Isae tan sahabi oḳolre ḳoila, “Huno, aiz rait tumra hoḳoleu to amare falaia bagibae. Allar kalamo ase, ‘Ami meṛar falor raḳalre marmu, teu falor meṛain sairobae sitriziba.’ ³²Oile amare murda taki zinda ḳorar bade, tumrar ageu ami Galil zilat zaimugi.”

³³Teu sahabi Fitore tanre ḳoila, “Huzur, hoḳol bagi geleo ami bagitam nae.” ³⁴Isae ḳoila, “Te huno, ami tumare hasa ḳota ḳoiram, aiz fotabala murgae bang dibar ageu, tumi tinbar ḳoibae, tumi amare sino na.” ³⁵Oile Fitore ḳoila, “Huzur, ou kita ḳoin, afnar loge zudi amar morono oe, ta-o ami kunumonte-u afnare oshikar ḳortam nae.” Hoḳol sahabie ou eḳ laḳan ḳoila.

Getshimani bagano Hozrot Isa

³⁶Bade Hozrot Isae tan sahabi oḳolre loia Getshimani namor eḳ bagano aila. Aia erare ḳoila, “Tumra ono bo, ami hogalat gia dua ḳormu.” ³⁷Oḳan ḳoia tain Fitor ar Zibudiar dui fuare tan loge nila. Aste aste tan dilor maze duk ar hae-hutash baṛilo. ³⁸Tain erare ḳoila, “Baiainre, duke amar ḳoilja faṭizar. Tumra ono boiro ar amar loge hozag roio.”

³⁹Oḳan ḳoia tuṛa horia gia tain maṭit soizdat foṛia ḳoila, “O amar behesti abba, amar ufre ou ze zulum-mosibot aior, dusra kunu ufae taḳle ikanta horailao. Oile ita amar ichchae nae, tumar morzi mafiku ouk.” ⁴⁰Soizda taki uṭia tain sahabi oḳolor gese aia deḳla, era gumai gesoin. Ou tain Fitorre hozag kori ḳoila, “Tumra ekkan gonṭao hozag roitae farlae na ni? ⁴¹Hozag ro dua ḳorar lagi, ar dua ḳoro forikka taki basar lagi. Tumrar dilor maze nichoe kial ase, oile ḳaea to ḳomzur.”

⁴²Bade tain dusrabar gia dua ḳorla, “O amar behesti abba, ou zulum-mosibot ami shoijjo na ḳorle, zudi dusra kunu fot na taḳe, taile tumar morzi mafiku ouk.” ⁴³Bade tain hirbar aia deḳla, era gumai gesoin, gume tarar souk falai der.

⁴⁴Dekia tarare toia tain tisra bar gia eḳoi dua ḳorla. ⁴⁵Erbade tain sahabi oḳolor gese aia ḳoila, “Tumra deki oḳono arame gumairae. Huno, shomoe aichche, ami Bin-Adomre gunagar oḳolor ato shomzai deoa oibo. ⁴⁶Uṭo, amra roana dei. Amare zegie dushmonor ato dorai dibo, he aia azigese.”

Hozrot Isa dushmonor ato bondi

⁴⁷Tain erar loge mato roisoin, ou shomoe Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa, toluar loia ailo. Boṛo imam ar murobbi oḳole erare faṭaisoin. ⁴⁸Tanre zegie doraia dito, ou Ihudae tar logor erare age hikaia disil, “Ami gia zar galo hunga dimu, he-u hou zon. Tumra ere aṭok korio.” ⁴⁹Erlagi Ihudae shuza-shuzi Isar gese gia ḳoilo, “Huzur, assalamu alaikum.” Ḳoia he tanre hunga dilo. ⁵⁰Isae tare ḳoila, “Baire, zeta ḳorat aiso, ḳorilao.” Loge logeu tara aia Isare dorililo.

⁵¹Ou shomoe Isar logor eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo. ⁵²Teu Isae enre ḳoila, “Tumar toluar bego harailao. Toluardi zara ḳelae, toluaror toleu tarar zan zae. ⁵³Tumi ikan sinta ḳoro na ni, ami amar batuni bafor dorbaro aroz ḳorle, tain ḳoyeḳ azar firista faṭaita nae ni? ⁵⁴Oile ami ila ḳorle kitabor ḳota kila folibo? Kitabo zotota batail oise, ita to goṭbou.”

⁵⁵Bade tain ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa, toluar loia amare dorat aiso. Ami to forteḳ din Baetul-Mukaddoso boia talim ditam. Ou shomoe to tumra amare dorlae na. ⁵⁶Ashole ita hokkolta goṭer, zate asmani kitabo nobi oḳole zela bataisoin, ota fura oe.” Ou shomoe sahabi oḳole Isare toia bagi gela.

Deshor fotua komiṭir samne Hozrot Isa

⁵⁷Hozrot Isare doria hari ou manshe fordan imam Kaeafar gese loia gelo. Hono moulana ar murobbi oḳol ekkano dola oila. ⁵⁸Sahabi Fitor Isar ges tone duroi hori hori roia tan ḳore ḳore fordan imamor baṛir uṭanor ḳandat gela. Gia hesh-mesh kita oe, oḳan deḳar lagi uṭanor bitre hamaia, honor faradar oḳolor loge boila.

⁵⁹Hozrot Isare ḳatol ḳorar lagi boṛo imam oḳole ar mozlisor hoḳol manshe Isar bifokke kunu nalish tukaila, ⁶⁰oile faila na. Mozliso Isar bifokke boute misa shakki dileo, tarar shakkir mil oilo na. Bade duizon manshe aia tan birudde misa shakki dia ḳoilo, ⁶¹“Amra hunchi, he ḳoise, Allar kaba shorif, mani Baetul-Mukaddosre he bangilibo, ar tin dinor bitre hirbar banaibo.” ⁶²Teu fordan imam ubaia hoḳolor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?” ⁶³Oile tain kunu zuaf na dia nirai roila. Fordan imame tanre hirbar ḳoila, “Tumi zinda Allar ḳosom ḳaia ḳo sain, tumi kita Allar oada ḳora hou al-Mosi ni, tumiu Allar ḳas maear zon Ibnulla ni?” ⁶⁴Tain zuaf dila, “Afnarau to ḳoira. Oile ami ḳoiram, afnara deḳbane, ami Bin-Adom arshe-azimo Alla Rabbul Alaminor ḍainor toḳto boat asi. Aro deḳba, ami behesti megor kuṭit oia duniat aiar.”

⁶⁵Ikan hunia-u fordan imame nizor finnor ḳafoṛ siṛia ḳoila, “He to shiriki ḳorlo, te ar kunu shakkir zorur ase ni? Afnara nizor ḳaneu to hunla, he shiriki ḳorlo. ⁶⁶Te oḳon afnara kita rae diba?” Tara ḳoila, “Ere to marilaoa dorḳar.” ⁶⁷Ou shomoe tara tan muko sef dilo, ar tanre soṛ-taboṛ marlo. Ḳeu ḳeu gushi maria ḳoilo, ⁶⁸“Hoi al-Mosi, gaibi ḳo sain, tore ḳegie marlo?”

Hozrot Fitore tinbar oshikar ḳorla

⁶⁹Fitor uṭano boat asla, ou shomoe eḳ bandi beṭi tan ḳandat aia ḳoilo, “Galilor ou Isar loge to afneo asla.” ⁷⁰Oile Fitore hoḳolor samne oshikar ḳoria ḳoila, “Na go, tumi ita kita mato? Ita kuntau ami zani na.”

⁷¹Oḳan ḳoia Fitor geiṭor daro gelagi. Tanre dekia aroḳ bandi beṭie ḳoilo, “Ou beṭao to Nasarot gaur Isar loge asil.” ⁷²Oile Fitore hirbar ḳosom ḳori ḳoila, “Na, na, ami tare siniu na.”

⁷³Ou shomoe tan ḳandat zera uba asil, tuṛa bade tara ḳoila, “Oba, tumio nichchoe erar logor, tumar mat-ḳotae-u to buza zar.” ⁷⁴Teu Fitore ḳoila, “Allar gozob foṛouk, ami ḳosom ḳaia ḳoiar, ami muṭeu tare sini na.” ⁷⁵Oḳan ḳoiteu murgae bang dilailo. Bang hunteu Fitoror mono oigelo, Isae age ḳoisla, “Murgae bang dibar ageu tumi tinbar ḳoibae, tumi amare sino na.” Erlagi tain bare gia au au ḳori ḳandon dorla.

Hakim Filator samne Hozrot Isa

¹Biane uṭia boṛo imam ar murobbi oḳole Hozrot Isare ḳatol ḳorar foramish ḳorla. ²Tara tanre bandia Ruman hakim Filator gese loia gela.

Ihudar moron

³Ze zone Hozrot Isare dushmonor ato dorai disil, hou Ihudae zebla deḳlo bisaro tanre dushi shaibosto ḳora oise, ou tar bitre kub duk hamailo. He boṛo imam ar murobbi oḳolor gese hou rufar tish ṭeḳa loia aia ḳoilo, ⁴“Ami to eḳzon ni-oforadi manshore ḳatol ḳorar lagi dorai dia guna ḳorsi.” Ikan hunia tara ḳoila, “Teu amrar kita oilo? Ita to tumar befar.” ⁵Ou shomoe Ihudae hou tish ṭeḳa Baetul-Mukaddoso iṭa mari falaia gelogi, gia nize nizeu fash lagia morigelo.

⁶Boṛo imam oḳole i ṭeḳa ato loia ḳoila, “Iguin to Baetul-Mukaddosor tohbilo raḳa ṭik nae, ḳaron ita oilo lour dam.” ⁷Bade tara foramish ḳoria ou ṭeḳadi musafir manshor ḳobrostanor lagi ek kumaror ges taki zaga loila. ⁸Erlagi ou zagare oḳono ‘lour zaga’ ḳoa oe. ⁹Ita oae, Iaromia nobir mazdi zeta batail oisil, ota foligelo. Tain ḳoisla, “Tara ze tish ṭeḳa nilo, ikṭa oilo tan dam. Boni Israile tan ou dam shaibosto ḳorsil. ¹⁰Allae amare zela hukum disoin, olau tara kumaror zaga loar lagi ṭeḳaguin dilo.”

Hakim Filator adaloto Hozrot Isa

¹¹Hozrot Isare Ruman fordan hakim Filator adaloto azir ḳora oilo. Hakime tanre zikaila, “Kita ba, tumi Ihudi oḳolor bashsha ni?” Tain ḳoila, “Ji-oe, afne ṭiku ḳoira.” ¹²Boṛo imam ar murobbi oḳole tan name bout nalish dila. Oile Isae kunu zuaf dila na. ¹³Ou shomoe Filate zikaila, “Tumi kunu zuaf ditae na ni? Deḳrae ni, tara tumar birudde ḳoto nalish dira.” ¹⁴Oile Isae itar ekkano zuaf na deoae Filat kub taijjub oigela.

¹⁵Deshor fordan hakimor niom asil, Azadi Idor shomoe manshor fosond mafik eḳzon azotire ḳalas dita. ¹⁶Ou shomoe Isa-Barabba namor eḳ namḳora azoti zelo asil. ¹⁷Hoḳol manush ekkano dola oar bade hakim Filate tarare zikaila, “Tumra kita ḳo? Ami ḳare saṛtam, Isa-Barabbare, na hou Isare, zare al-Mosi ḳoa oe?” ¹⁸Filate zanta, boṛo imam oḳole ingsha ḳoria Hozrot Isare nia tan ato disoin. ¹⁹Filat zebla hakimor ashono boat, ou shomoe tan bibie ḳobor faṭaia zanaila, “Ou ni-oforad manshore tumi kunta ḳorio na, tan befare ami aiz eḳṭa kuab dekia boṛo duk lagse.”

²⁰Oile boṛo imam ar murobbi oḳole manshore uskaia dila, tara zanu Barabbar mukti sain ar Isare ḳatol ḳorar ḳota ḳoin. ²¹Bade fordan hakim Filate onor manshore zikaila, “Ou duio zonor maze ami ḳare saṛtam?” Tara ḳoila, “Barabbare.” ²²Teu Filate tarare zikaila, “Te tumra zare al-Mosi ḳo, hou Isare kita ḳortam?” Tara hoḳole sillani lagailo, “Tare solibo gatia maro.” ²³Tain ḳoila, “Ḳene, he kita dush ḳorse?” Oile manshe aro zure zure misil lagailo, “Solibo deo, solibo deo.”

²⁴Filate zebla deḳla, tain kunumonte-u Isare basaita farra na, borong gonḍogul aro baṛer, ou tain fani dia hoḳolor samne tan at doia ḳoila, “I manshor lour dayi ami nae, tumrau er zuaf dibae.” ²⁵Teu hoḳol manshe ḳoila, “Ṭik ase, amra ar amrar aolad oḳol i lour dayi oimu.” ²⁶Teu Filate tarare kushi ḳorta ḳori Barabbare ḳalas dilaila. Ar Isare besh ḳori sabuk maria, solibo deoar hukum dila. (Solib oilo laḳṛidi banail manshore loṭḳaia marar eḳ zinish.)

Sifai oḳolor ṭaṭṭa-moshkora

²⁷Bade Filator sifai oḳole Isare doria tarar kempor bitre loia gelo. Hono asta sifai dol dia tanre ber ḳori raḳlo. ²⁸Tara tan finnor ḳafoṛ-sufoṛ kulia, lal-baingoni rongor bashshai lebas findailo. ²⁹Ar gosa-ḳaṭa dia raz-mukuṭ banaia tan matat dilo. Tan ḍain ato dilo eḳṭa raz-laṭi. Tane ijjot deḳanir ban ḳoria tan samne aṭu gaṛia boia ḳoilo, “Ihudir bashsha, marhaba.” ³⁰Ou shomoe tara tan ufre sef dilo ar ou laṭi dia bare bare tan matat marlo. ³¹Ou laḳan ṭaṭṭa-moshkora ar bettomizi ḳorar bade tan finnor baingoni lebas kulia, tan nizor ḳafoṛ findailo. Tanre solibo nia ḳatol ḳorar lagi roana dilo.

Solibor ufre Hozrot Isa

³²Sifai dole Isare loia zaira, ou shomoe tara Kurini elaḳar Saimon namor eḳzon manshore deḳlo. Sifai oḳole zur ḳoria enedi hou solib boaia neoailo. ³³Tara Isare loia Golgata, mani ‘ḳollar saṛ’ namor zagat gelo. ³⁴Hono nia hari mura namor oshud furail anguror shorbot tan muko dilo, oile tain ita ḳaila na.

³⁵Bade tara Isare nia ou solibo gatilo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo. ³⁶Ar tara ono boia tanre fara dilo. ³⁷Solibo tan matar ufre oforad-namar maze leḳlo, “En nam Isa, Ihudir bashsha.”

³⁸Duizon ḍaḳaitreo tan loge loṭḳail oilo, eḳzon ḍain galat, oinnozon bau galat. ³⁹Fotedi zera zaoat asil tara mata laṛaia Isare siṛaia ḳoilo, ⁴⁰“Oi mia, tumi bule Baetul-Mukaddos kaba gor bangia tin dinor maze hirbar banailibae! Te oḳon nizor zan basao na. Tumi bule Allar ḳas maear zon Ibnulla, te solib taki lamia ao na.”

⁴¹Boṛo imam, moulana ar murobbi oḳoleo tanre siṛaia ḳoila, ⁴²“He bule manshor zan basaito, oḳon to nizor zanu basaito farer na. Hirbar Boni Israilor bashshao bule he! Te oḳon farle solib taki lamia auk, teu amra-o ota dekia tar ufre iman anmu. ⁴³He to Allar ufre borosha ḳore. Oḳon Alla zudi tar ufre kushi taḳoin, te tare basaukka. He to dabi ḳorto, he Ibnulla, Alla Pakor ḳas maear zon.” ⁴⁴Tan ḍaine-baue ze dui ḍaḳaitre solibo loṭḳail oisil, tarao tanre ota ḳoia siṛailo.

Hozrot Isa al-Mosir ufat

⁴⁵Ou din duifor taki zuhoror bad forzonto tin gonṭa asta desh andair oigelo. ⁴⁶Ar Isae kub zure zure ḳoila, “Eloi, eloi, lama sabaktani?” Mani, “O amar Alla, amar Moula, tumi ḳene amar log saṛi dilae?” ⁴⁷Ou shomoe tan daro zara uba asil, tara ikan hunia ḳoila, “Huno, huno, he Hozrot Iliasre ḍaḳer.” ⁴⁸Tara eḳzone douṛaia gia ekkan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo. ⁴⁹Baki hoḳole ḳoilo, “Aichcha, deki na, Ilias nobi tare basanit ain ni.”

⁵⁰Heshe Isae hirbar zure aoaz ḳoria aḳeri dom falaia inteḳal ḳorla. ⁵¹Loge loge Baetul-Mukaddos mani kaba goror herem shorifor fordaḳan, ufre taki tol forzonto siṛia dui ṭukra oigelo. Ar boisalor loge boṛo boṛo fattor oḳol faṭigelo. ⁵²Bout ḳoeboror muk kuligelo, ar Allar maear ze bonda oḳol mara gesla, era bout zon zinda oia uṭla. ⁵³Tara ḳoebor taki baroia aila. Isa murda taki zinda oia harle, tara fobitro ṭauno gia hamaila, ar bout zonre deḳa dila. ⁵⁴Fordan sifair loge aro zeta sifai oḳole Isare fara deoat asla, tara ou boisal ar hoḳol halot dekia kub ḍoraia ḳoila, “Nichchoe, einu asla Allar ḳas maear zon, Ibnulla.”

⁵⁵Galil zila taki zeta beṭinte Isar ḳezmot ḳorar lagi tan loge oia aisla, tarao duroi ubaia ita deḳla. ⁵⁶Erar maze asla Mogdilini Moriom, Iusi ar Iakubor ma Moriom, ar Zibudiar bou.

Hozrot Isar rouza mubarok

⁵⁷Ou din hainjabala Arimatia gaur Iusuf namor eḳzon doni manush hono aila. Tain Isar eḳ shagrid asla. ⁵⁸Tain hakim Filator gese aia, Hozrot Isar lash nita saila. Teu Filate tanre lash neoar izazot dila. ⁵⁹Iusufe Isar lash solib taki lamaia ḳafon findaila. ⁶⁰Tain faṛ ḳaṭia nizor lagi ze ḳoebor kudisla, ou ḳoeboror maze Isare dafon ḳorla. Bade boṛo eḳ fattor ṭelia ania ḳoeboror muko dia gelagi. ⁶¹Oile Mogdilini Moriom ar aroḳ Moriom ou ḳoeboror daro boi roila.

⁶²Bador din Zummabare boṛo imam ar Forishi oḳol aia hakim Filator gese ḳoila, ⁶³“Huzur, amrar mono ase, ou ṭoge zinda taḳte ḳoisil, he bule morar tin din bade hirbar zinda oia uṭbo. ⁶⁴Erlagi afne hukum deukka, ḳoeborṭa zanu tin din forzonto ḳoṛa fara dia raḳa oe. Arnae tar ummot oḳole tar lash suri ḳori nia manshore ḳoito fare, tain to zinda oigesoin. Taile age zeta ḳoia duka dise, oḳon aro beshi duka dibo.” ⁶⁵Filate ḳoila, “Tumra faradar oḳolre neo, nia zela faro, ola fara deoar bebosta ḳoro.” ⁶⁶Ou tara gia ḳoeboror muko ze fattor asil, ou fattoror ufre sil-sappoṛ mari toila ar ḳoṛaḳoṛi fara deoar bebosta ḳorla.

Hozrot Isa moutor bade zinda oila

¹Zummabar shesh oia haftar foela din fozor oḳto, Mogdilini Moriom ar oinno Moriome Hozrot Isar ḳoebor deḳat gela. ²Ou shomoe aḳtau boṛo eḳ boisal oilo ar asman taki Allar eḳ firista lamia aila. Aia tain ḳoeboror mukor fattorṭa horaia, er ufre boila. ³Tan surot asil kub nurani ar finnor ḳafoṛ asil dola soḳsoḳa. ⁴Tanre dekia faradar oḳole ḍoraia ḳafa dorla ar tara beush oia foṛi roila.

⁵Firistae ou beṭintore ḳoila, “Ḍoraio na go. Ami zani, solibo loṭḳaia zare ḳatol ḳora oise, tumra hou Isareu tukairae. ⁶Oile tain to ino nae. Tain zela ḳoisla, olau zinda oia uṭi gesoin. Ao, tanre ze zagat hutaia raḳa oisil, oḳan aia deḳo. ⁷Ar tumra zoldi zao, gia tan sahabi oḳolre ḳo, tain murda taki zinda oia tarar age oia Galilo zairagi. Honou tan loge tarar deḳa oibo. Huno, ami ageu tumrare ikan zanai dilam.” ⁸Beṭinte zudio ḍoraisla, tebou tara kushir suṭe tan sahabi oḳolre i ḳobor zananir lagi douṛaia roana oila. ⁹Ou shomoe aḳtau Hozrot Isa aia erare salam dila. Loge loge tara tan samne aia faot doria ḳodombusi ḳorla. ¹⁰Isae tarare ḳoila, “Ḍoraio na go. Tumra gia amar baiainre ḳo, tara Galilo zaitagi. Hono tarar loge amar deḳa oibo.”

¹¹Isar logor batchit shesh ḳoria tara zebla zairagi, ou shomoe hou faradaror ḳoezone ṭauno gia boṛo imam oḳolre ita hokkolta zanaila. ¹²Teu boṛo imam ar murobbi oḳol ekkano dola oia foramish ḳorla, ou faradar sifai oḳolre bout ṭeḳa dibar lagi. ¹³Tara sifai oḳolre ḳoila, “Tumra ḳoio, ‘Amra zebla gumo aslam, ou shomoe shagrid oḳole aia tan lash suri ḳori nisoingi.’ ¹⁴Ikan zudi deshor fordan hakim sabe hunilain, te amra tanre buz dimu, tan at taki tumrare basaimu.” ¹⁵Teu faradar oḳole ou ṭeḳa nila, ar tarare zela hikail oisil, ola ḳoila. Oḳon forzonto i misa ḳota Ihudi shomazo roṭail ase.

Hozrot Isa al-Mosir aḳeri hukum

¹⁶Isae tan sahabi oḳolre Galilor ze faṛo zaoar ḳota ḳoisla, hou egaro zon sahabi ou faṛo aila. ¹⁷Aia Isare dekia tara soizda ḳorla, ermaze ḳoezonor bitre shondoe asil. ¹⁸Ou shomoe Isa tarar ḳandat aia ḳoila, “Behest ar duniar hokkol ḳemota amare deoa oise. ¹⁹Erlagi tumra gia tamam zatir manshore amar ummot banao. Behesti baba Alla Pak, tan ḳas maear zon Ibnulla, ar Pak Ruhur name manshore torikar gusol ḳorao. ²⁰Ami tumrare zeta hukum disi, ota amol ḳorar lagi tarare talim deo. Mono rakio, kiamotor ag forzonto shob shomoe ami tumrar loge loge asi.” Amin.