Asmani Kitab
Hozrot Malaki Nobir Sohifa
Forisiti
Nazilor shomoe: Hozrot Isa al-Mosir zonmor 470-460 bosor age.
Hozrot Malaki (a:) asla eḳzon nobi. Tan ufre nazil oa ou sohifa, fobitro Kitabul Mukaddosor Injil shorif nazil oar ag forzonto, nobi oḳolor kitab-sohifar aḳeri sohifa.
I sohifa nazil oar bout bosor age Babilor bashshae Zeruzalem ṭaunre doḳol ḳorsila. Tain Zeruzalemor bashinda Boni Israil oḳolre deshantori ar bondi ḳoria tan Babil desho nislagi. Ou shomoe fobitro Baetul-Mukaddosre bangia binash ḳorsila. Boni Israilor guna ar naformanir dae Allae tarare ou shaza disla. Bade Iran deshor bashshae Babilor bashshare zuddot araia, tarare bondi taki azad ḳoria hirbar Zeruzalemo anchoin. Tain Baetul-Mukaddosreo hirbar banaia, Allar goror lilla-sodga, kurbani, ebadot agor nomunae salu ḳoraisla.
Oile erbadeo allaoala ou Ihudi zati aste aste hirbar Allar ebadot bondegi taki duniar bae firigela, imanor ḳomzuri foeda oilo. Ou boeani Hozrot Malaki (a:) nobir sohifar laḳan, Hozrot Nohimia (a:) nobir sohifar mazeo mile. Tarar naformanir maze deḳa zae, ḳafir-mushrikor loge bia-shadi, na-hok fote ṭeḳa-foeshar len-den, zoḳator ṭeḳa-foesha fobitro Baetul-Mukaddoso na deoa ar ruhani amol-talimor befare ḳam-kiali ḳora. Asmani sohifa oḳolor mazdi Mabude tan bonda oḳolre zela hushiar ḳorsoin, er aḳeri hushiari oilo ou Malaki (a:) sohifa. Hozrot Malaki (a:)-or ufator bad taki, Hozrot Ehia (a:) ar Hozrot Isa al-Mosie toshrif anar ag forzonto, onuman sair-sho bosor i duniat ar kunu nobir aoaz huna gese na.
Ermaze ase,
(1) Boni Israilor bae Mabudor mohobbot 1:1-5 aeat
(2) Imam oḳolor naformani 1:6—2:9
(3) Am manshor naformani 2:10—3:18
(4) Mabudor bodlair din 4 ruku
11Malaki nobir usillae Boni Israilor gese Mabudor ohi.
Boni Israilre Allar mohobbot
2O Boni Israil, ami Mabude ḳoiram, ami to hamesha tumrare mohobbot ḳori.
Oile tumra ḳoirae, “Tumi kila amrare mohobbot ḳorlae?”
Te huno, Ish kita Iakubor bai asil na ni? Oile ami to tumrar ḳandanor murobbi Iakubre mohobbot ḳorsi, 3ar Ishre horaia raḳsi. Ami tar faṛ oḳol binash ḳorsi, tar biṭa-maṭi morubumir hialor aḳra banaisi.
4Ishor aolad Idumi oḳole ḳoito fare, “Amrare surmar ḳora oileo amra i surmar ḳora hoḳolta hirbar banailimu.”
Oile ami Alla Rabbul Alamine ḳoiar, tara ita banaileo ami bangilimu, ikanre ḳoa oibo, ‘Naformanir desh, ze deshor manshor loge Mabude hamesha gusa ḳoroin.’
5I halot tumrar nizor souke dekia ḳoibae, “Israil deshor shimanar bareo Mabudor takkot ḳaim ase.”
Imam oḳolor gafloti
6O imam oḳol huno, ami Alla Rabbul Alamine ḳoiar, fuainte tarar bafore ijjot ḳoroin, saḳoreo tarar malikre ḍorain. Ou laḳan ami eḳzon malik oile, amar bae ḍor-ḳof kuai? Ar ami eḳzon baf oile amar faona ijjot kuai? Tumrau to amare beijjot ḳorso.
Oile tumra hirbar ḳoirae, “Amra kila tumare beijjot ḳorlam?”
7Tumra to amar kurbani ḳanar ufre nafak kurbani dirae.
Dia ḳoirae, “Amrar kurbani nafaḳ oilo kila?”
Tumra buzairae Mabudor kurbani ḳana kuntau nae. 8Ami Alla Rabbul Alamine zikairam, kurbanir niote tumra zebla anda foshu loia ao, ita kunu ṭik oe ni? Ar lula-lengṛa, bemari foshu kurbani deo, ita ṭik ni? Tumrar deshor razare oula foshu ufohar dia deḳo sain, tain kushi oin ni? Ar tumrar abdar raḳoin ni?
9Huno, Alla Rabbul Alamine ḳoiram, tumra amar dorbaro rohomot mangile kunu lab oibo ni? Tumra zebla nizor ateu olaḳan kurbani deo, te ami ar tumrare rohom ḳormu kila? 10Haere hae! Tumrar maze eḳzoneo zudi amar Baetul-Mukaddosor geiṭ ḳanain bond ḳorilto, tumra amar kurbani ḳanar ufre beḳamaea aguin na zalaitae, te ami kushi oilam one. Oḳon to ami Mabud tumrar ufre kushi nae, ar tumrar at tone kunu lilla-sodgao ḳobul ḳortam nae.
11Huno, Alla Rabbul Alamine ḳoiar, duniar eḳ mata taki aroḳ mata forzonto tamam zatir maze amar kudroti shan ḳaim or. Tamam zomino amar name agor batti zalani or, manshe faḳ-saf lilla-sodga dira. Hoḳol zatir mazeu to amar shan-shouḳot ḳaim ase.
12Oile tumra amar namre beijjot ḳorrae. Tumra to ḳoirae, “Mabudor kurbani ḳana kuntau nae, i kurbanir kunu damu nai.” 13Amare beijjotir niote ḳoirae, “Ita to ḳamoḳa ḳoshṭo deoa!”
Te Alla Rabbul Alamine ḳoiar, tumra ḍaḳati ḳora, ar lula-lengṛa, bemari foshu ania kurbani dirae, ami kunu ota kurbani tumrar at tone ḳobul ḳormu ni?
14Ami Alla Rabbul Alamine ḳoiar, ḳeuror falor maze nikut meda foshu ase, ogure kurbani ḳorar lagi he nioto ḳorse, oile bade ṭogami ḳori kunu kut-ala foshu Mabudor name kurbani dey, tar ufre lannot foṛouk! Ami to mohan bashsha, tamam zatie amare tazim ḳore.
2Imam oḳol hushiar
1Ami Alla Rabbul Alamine imam oḳolre hushiar ḳori ḳoiram, 2tumra zudi amar ḳota na huno ar amar ijjot-tazimor bae furafur kial na ḳoro, te ami tumrar ufre lannot falaimu. Tumrar hoḳol rohomotreo gozob banailimu. Ashole tumra amar ḳota mancho na ḳori ou laḳan gozob oḳono ḍalia aiar. 3Tumrar lagi tumrar aolad oḳolreo shaza dimu. Tumrar idor kurbanir foshur gufor-sena ami tumrar muko maḳaimu, ota maḳail halote manshe tumrare horaia falaiba.
4Ami Alla Rabbul Alamine ḳoiram, buzilao, ami tumrar gese ou hushiari faṭailam, zate tumrar ḳandanor murobbi Lebir loge amar ḳaim ḳora niom zari roe. 5Tan loge ami ze niom ḳorslam, ikṭa oilo zindegi ar shantir niom. Ermaze ḍor-ḳofor befaro asil, zate tain amare tazim ḳoroin, asholeo tain amare tazim ḳorta.
6Tan muko asil hok talim,
misa na-hok kunta ḳoita na.
Shullo-ana ḳaṭi roia amar ebadoti ḳorta,
boutre naformani taki firaita.
7Ashole imamor ḳam oilo pak kalam hefazote raḳa, zate manshe gia tan ges taki ou ḳalam talim ḳore. Imam oḳol to Alla Rabbul Alaminor foegambor.
8Oile ami Alla Rabbul Alamine ḳoiram, tumra to i fot saṛia, mongoṛa talim dia bout manshore asaṛ ḳaoaiso. Ita ḳoria tumra Lebir ḳandanor lagi ḳaim ḳora amar niom borkelaf ḳorso. 9Tumra amar fote na solia manshor muk saia bisar ḳorso. Erdae amio tumrare tamam manshor samne nisa ar beijjot ḳorsi.
Hozrot Malaki nobir hushiari
Boni Israilor Ehuda gusṭir naformani
10Amra hoḳol eḳ bafor aolad nae ni? Eḳ Allaeu amrare foeda ḳorsoin na ni? Te amra ḳene eke-oinor loge beimani ḳoria, amrar moe-murobbir ufre ḳaim ḳora niomor borkelaf ḳori? 11Ehuda gusṭie to beimani ḳorse. Zeruzalem ṭaun shoho asta Israil desho bezuita noforoti kam ḳoraise. Ehudar manshe murtifuza ḳorra furintore bia ḳoria, Mabudor maear zagareo nafaḳ banaise. 12Zoto zone ita ḳam ḳore, tara Alla Rabbul Alaminor name lilla-kurbani loia aileo, Mabude tan ḳas bonda oḳol ḳata tone tarar nam miṭailiba.
13Ar tumra to aroḳṭa ḳam ḳoro. Soukor fanie ḳali kurbani ḳanare bizao, ḳanda-ḳaṭi ar ahazari ḳoro. Oile tumra zeta lilla-sodga deo, itar bae Mabude to kial ḳoroin na, kushi mone ḳobulo ḳoroin na. 14Erbadeo tumra zikao, “Ḳene ḳobul ḳoroin na?” Ḳaron oilo, tumrar zuanki ḳalor bibir biar aḳto Mabud to shakki oisla. Ou bibiu tumrar zindegir logi, tumrar ḳabin ḳora bou. Otota badeo tumrar i bour loge beimani ḳorso. 15Mabude kita zamai-boure ek kaea banaisoin na ni? Ruhe ar ḳaeae tara to tanu saman. Tarare ḳene ekkano ḳora oise? Tan kial asil, tarar mazdi allaoala ek kandan ḳaim roito. Erdae tumrar dilor befare hushiar o, zuankir bibir loge beimani ḳorio na. 16Boni Israilor Mabud Allae ḳoira, “Boure talaḳ deoa ami gin ḳori.” Alla Rabbul Alamine aro ḳoira, “Zulumre finnor ḳafoṛor laḳan findia, zalimi surote ze manush haze, tar ḳamreo ami gin ḳori. Erdae tumra tumrar dilor befare hushiar o, bour loge beimani ḳorio na.”
17Tumra nizor zobandi Mabudre teḳto ḳoriliso. Erbadeo tumra zikairae, “Amra ḳemne tanre teḳto ḳorsi?” Tumra to ḳoiso, zetae naformani ḳoroin, ita hokkolti Mabudor nozoro bala manush, tain otar ufre kushi. Arnae ḳoiso, kuai hou Alla, zein hok insaf ḳoroin?
3Kiamotor lagi hushiari
1Huno, ami Alla Rabbul Alamine oada ḳoriar, ami amar foegamborre bezimu, tain aiba, aia amar age gia fot ṭik-ṭak korba. Ar tumra ze malikor lagi bar sairae, taino aḳtau tan goro toshrif anba. Ze zonor lagi tumra ashik oigeso ḳoirae, amar niomor hou foegambore toshrif anra.
2Oile tan toshrif anar din, shoijjo ḳorar himmot oibo ḳar? Tan shamne ubanir ḳemota ḳar? Tain to hunaror agunir laḳan, dufar sabonor laḳan. 3Hunare zela shuna-rufare zalaia ḳaṭi banae, taino ou beshe boiba. Ar shuna-rufar nomunae Lebir ḳandanre faḳ-saf ḳorba, ḳaṭi banaiba. Bade oula manush taḳba, zara Mabudor name sohi niote faḳ-saf lilla-kurbani adae ḳorba. 4Teu agor amolor laḳan Zeruzalem ar Ehuda deshor manshor lilla-kurbani Mabude kushi oia ḳobul ḳorba.
5Ami Alla Rabbul Alamine ḳoiar, hou shomoe ami bisar ḳorar lagi tumrar gese aimu. Aia zadugir, zinakur, misa shakki deora, ḳamlar beton ṭogra, ṛaṛi beṭin ar etimor ufre zulum ḳorra, musafiror bae hok insaf na ḳorra, mani zoto zone amare ḍorae na, tara hokkolor bifokke shakki dite ami kunu deri ḳortam nae.
Allar faona adae na ḳorar shaza
6O Iakubor aolad oḳol, ami Mabud, amar zobanor kunu rod-bodol nai, erdae-u tumra binash oirae na. 7Tumrar baf-dadar zomana takiu amar hukum-ahkam mancho na, ar amolo ḳorso na. Tumra amar gese firia aio, amio tumrar gese aimu.
Oile tumra ḳoirae, “Amra kila firia aitam?”
8Kunu manshe kita Allare ṭogito fare ni? Oile tumra to amare ṭogirae.
Ṭogia hirbar ḳoirae, “Amra ḳemne tumare ṭogailam?”
Huno, tumra to zoḳat adae ar lilla-kurbanir befare amare ṭogirae.
9Tumrar asta zatie milia amare ṭogirae, erdae-u tumra lannotor maze gaṛi roiso. 10Tumrar hoḳol ruzir dosh baṭor eḳ baṭ amar banḍaro deo, zate amar goro ḳani-kuraki roe. I befare tumra amare forikka ḳoria dekilao, ami Alla Rabbul Alamine asmanor hoḳol duar kulia, tumrar dorḳaror saiteo beshi, behishab boroḳot dei ki na. 11Ami ḳeti ḳorra fuk oḳolre bada dimu, itae tumrar zominor foshol ḳaia binash ḳorta nae. Ar tumrar ḳetor angur folo zoria foṛto nae. 12Ami Alla Rabbul Alamine ḳoiar, ola ḳorle duniar hoḳol zatie tumrare mubarok koibo, tumrar desh oibo aram ar kushi-bashir desh.
13Oile ami Mabude ḳoiar, tumra to amar bifokke ḳoṛa-ḳoṛi mat matiso.
Matia hirbar ḳoirae, “Amra tumar bifokke kita matilam?”
14Te huno, tumra ḳoirae, “Allar ebadot ḳora to ḳamoḳa ḳoshṭo ḳora. Tan hukum-ahkam amol ḳorle, Alla Rabbul Alaminor gese mata nuaia solle amrar lab kita? 15Te oḳon ao, amra beṭagiri deḳaora manshore doinno dei. Oe, oe, ḳaraf mansheu to unnoti ḳorra. Tara Allare forikka ḳoriao to rehai failira.”
16Bade tarar maze zara Mabudre ḍoraito, tara eḳe-oinnoe batchit ḳorlo, ar Mabude ita kial ḳori hunla. Mabudor ḍor-ḳof zerar bitre asil, zera ḳas dile tan dian ḳorto, tarar nam Mabudor samne ek katat leḳa oilo.
17Ami Alla Rabbul Alamine tarar befare ḳoiram, amar ṭik kori raḳa din aile tara amar ḳas samana oiba, tara amaru bonda oiba. Bafe tar ḳezmot ḳorra fuare zela maea ḳore, ou laḳan amio tarare maea ḳormu. 18Hou shomoe aroḳbar tumra deḳbae, forezgar ar naformanor maze, amar ebadot ḳorra, ar na ḳorrar maze ḳoto bebodan ḳori.
4Mabude bodla dibar din
1Huno, ami Alla Rabbul Alamine ḳoiram, hou din aior, zedin ḍomḳar agunir laḳan dau dau ḳori zolbo. I din hokkol boṛai ḳorra ar naforman oḳol nerar laḳan zolba, tarar zoṛ ba dal-pala kuntau zolar baki roito nae.
2Oile tumra zera amare ḍorao, tumrar ufre dindarir shuruz uṭibo, i shuruzor tezor maze taḳbo shifa. Tumra guala tone saṛa faoa gorur baichchar laḳan nasibae. 3Ami zedin ou ḳam ḳormu, i din tumra naforman oḳolre faodi uṛibae, tara oiba tumrar faor tolor sali. Iḳan ami Alla Rabbul Alamine ḳoilam.
4Tumra amar bonda Musar shoriotor ḳota iad raḳo, ami Tur faṛor ufre tamam Boni Israilor lagi ze hukum-ahkam tan gese dislam, ota mono rakio.
5Huno, Mabudor hou mohan ar bezuita ḍor-ḳofor din aibar age, ami Mabude Ilias nobire tumrar gese bezimu. 6Tain aia ma-bafor dil tarar fua-fuṛintor bae, ar fua-fuṛintor dil tarar ma-bafor bae firaiba, zate ami aia hari tarar deshre lannot ḍalia binash na ḳori.
Ḳotom.