al-Luk

Fobitro Injil Shorif tisra sifara

al-Luk

Forisiti

al-Luk sifarat nanan talim ase, ermazor mul talim oilo, Hozrot Isa al-Mosiu oila shara zogotor hoḳol manshor nazator ḳanḍari. Tain duniat toshrif ania deḳaila, tain manshore ḳoto maea ḳoroin. Gorib-duki, onat-etim, ṛaṛi, nirashroe manshore tain maea ḳoria ashroe dein. Duniar manshe zarare elami ba tuchcho ḳore, tain erareo ador ḳoroin. Huru huru nabalik hurutta, nirashroe beṭintore tain kub ador ḳoroin. Allar zoto bonda Allar dorbar taki horia gesegi, tarare tukaia ania hirbar Allar bashshait zaga disoin. Hozrot Isa Ruhullar namu Bin-Adom, mani Adomor aolad, manush surote aoa Allar ḳolifa.

I sifarar foela rukut ase al-Mosie duniat toshrif anra, iṭa Alla Pakor ḳas morzi. Hirbar aḳeri rukut boean ḳora oise, tain zinda halote behesto toshrif nisoin. Itao Mabudor ḳas morzi, ar hara duniar manshor lagi kushir ḳobor.

Ou sifarar bout talim batail oise misal ba kichcha dia. I talim, keramoti-muzeza, ar tobligor boeandi buzail oise, Hozrot Isau oila asta duniar manshor lagi Allai rohomot. Ḳali tan usillae hoḳol nomunar gunar mafi faoa zae. Tainu asta duniar nazator ḳanḍari.

Amra ou sifarar 19 ruku 10 aeato deki, Hozrot Isae ḳoira, “Ou laḳan be-foti oḳolre tukaia bar ḳoria, tarare basanir lagiu to ami Bin-Adom i duniat aisi.”

Leḳok forisiti ar shomoe

Alla Pakor hukume ou sifara leḳsoin Hozrot Luk (ro:). Fobitro Injil shorif taki zana zae, Hozrot Lukor fesha asil hekimi ḍaktor. Tain Hozrot Isar sahabi Hozrot Paulusor ḳezmoto roia nanan deshor nanan zatir gese Allar kalam toblig korta. Hozrot Isa dunia taki behesto toshrif neoar onuman 30 bosor bade ou sifara kitab aḳare leḳa oise. Ou al-Luk sifara oilo Hozrot Lukor leḳa foela sifara, bade tain Sahabi Nama namor aroḳ sifara leḳsoin.

Ermaze ase,

(1) Bumiḳa, Hozrot Ehia ar Hozrot Isar zonom ar foela zindegi 1:1—2:52 aeat

(2) Allar ḳam ḳorar lagi Hozrot Isa zuit oila 3:1—4:13

(3) Galil zilat Hozrot Isar keramoti ar toblig 4:14—9:50

(4) Zeruzalem zaoar fote Hozrot Isa 9:51—19:27

(5) Zeruzalem ṭauno Hozrot Isa 19:28—21:38

(6) Hozrot Isar duk-koshṭo ar mout 22—23 ruku

(7) Moutor bade zinda oila Hozrot Isa 24 ruku

^1-2Mohamainno Tiofilas,

Afnar to zana ase, amrar maze zeta zeta goṭise, ita zera foela takiu nizor souke deḳsoin ar tobligo ḳorsoin, erar mukor ḳota hunia balamonte shomzia hari, bout mumine leḳat lagsoin. ³Erlagi oḳon amio adi-onto hokkolta tallash ḳoria, eḳ ek kori lekia afnare zanani ḳan bala mono ḳorlam. ⁴Oḳan taki afne shomzita farba, afne age zeta talim hunchoin, ita ekkebare ṭik.

Hozrot Ehia ar Hozrot Isar zonom ar foela zindegi (1:5–2:52)

Hozrot Ehia (a:)-or zonmor gaibi ḳobor

⁵Raza Herude zebla Ehudia zila salaira, ou shomoe Zeruzalem ṭauno Baetul-Mukaddosor imam oḳolor mazor eḳzonor nam asil Zakaria. Tain Boni Israilor mul imam Harunor ḳandanor Abia dolor manush. Tan bibir nam Elisabet, eino Harunor bongshor manush. ⁶Era duiozonu Allar nozoro kamil dindar asla. Mabudor hoḳol hukum-ahkam shullo-ana adae ḳorta. ⁷Oile era asla niaoladi, Bibi Elisabet oila aṭkura bemari. Ou halote duiozon murobbi oigesoin.

⁸Ermaze oinno dolor imamotir din shesh oia tan nizor dolor imamotir bari ailo, teu Zakaria Allar goro imamotit asla. ⁹Imamoti ḳamor niom mafik loṭari maria tane fosond ḳora oilo, zate tain Baetul-Mukaddosor fobitro herem shorifo hamaia agor-kushboe zalain. ¹⁰Tain bitre ota zalaira, ar bare bout manshe dua-durud ḳorra.

¹¹Aḳtau agor-kushboe zalani ṭebulor ḍainedi Allar eḳzon firistae tanre doroshon dila. ¹²Firistare dekiau tan dil ḳafigelo, zano ḍor ailo. ¹³Firistae ḳoila, “O Zakaria, ḍoraio na. Huno, Allar dorbaro tumar dua ḳobul oise. Tumar bibi Elisabetor goro eḳ fua oiba, tumi en nam rakio Ehia. ¹⁴Ou fute tumar zindegit bout kushi baṛaiba, tain zonom loae aro bout zon kushi oiba. ¹⁵Ein to Mabudor nozoro bout boṛo ijjoti oiba. Zindegie kunudinu anguror shorab ba kunuzat nisha ḳaita nae. Tan maʼr feṭo taḳteu Pak Ruhe kamil oiba. ¹⁶Ar Boni Israilor bout manshore tarar Mabud Allar bae firaia anba. ¹⁷Tain Ilias nobir laḳan himmot ar takkote malikor age oia aiba. Aia baf oḳolor dilre aolador bae, ar naforman oḳolor dilre forezgarir bae firaiba. Ou laḳan Mabudor lagi eḳ dol bondare tain furafur tiar ḳorba.”

¹⁸Ita hunia Zakariae firistare ḳoila, “Er forman kita, ami ḳemne ekin ḳortam? Ami to buṛa oigesi, amar bouo ekkere murobbi oigesoin.”

¹⁹Firistae ḳoila, “Ami Zibrail, ami Allar samne azir taki. Tumar loge batchit koria, ou kush-ḳobri tumare zananir lagiu Allae amare bezisoin. ²⁰Dekio, amar ḳota shomoe moto folibo. Oile amar mat ekin na ḳorae, ikan folibar ag forzonto tumi buba bonizibae, kunta mattae fartae nae.”

²¹Ibae manshe Zakariar lagi bar saira. Baetul-Mukaddosor bitoror ou pak zagat tan deri or dekia, tara hoḳol sintat foṛigela. ²²Bade Zakaria baroia aila, oile tain kuntau matta farla na. Tain buba oigela ar ishara-asharae buzaila. I halot dekia manshe buzilila, pak zagar bitre tain kunu doroshon faisoin. ²³Imamoti ḳamor bari shesh oia harle, tain nizor baṛit gelagi.

²⁴Erbade tan bibi Elisabetor feṭo hurutta ailo, erdae Elisabet fas mash baṛir bare baroila na. ²⁵Tain ḳoila, “Ita to Allai lila-ḳela. Manshor gese ami ze kuṭar bagi oisi, ou kuṭar shorom horanir lagi tain amar bae kial ḳorsoin.”

Isa Ruhullar zonmor gaibi ḳobor

^26-27Elisabetor feṭo zebla soe mashor hurutta, ou shomoe Galil zilar Nasarot gaut eḳzon abiati shoti nari asla, en nam Bibi Moriom. Allae Zibrail firistare tan gese bezila. Tan bia ṭik oisil, Bashsha Daudor ḳandanor Iusuf namor eḳzonor loge. ²⁸Firistae aia Bibi Moriomre ḳoila, “Assalamu alaikum; Alla Pake afnare rohomot ḳorsoin, tain afnar loge asoin.”

²⁹Ikan hunia Moriomor mon fereshan oigelo. Tain mone mone ḳoila, i salamor mani kita? ³⁰Firistae ḳoila, “O Moriom, afne ḍoraiba na, Allae afnare rohomot ḳorsoin. ³¹Hunoukka, afnar goro eḳ fua foeda oiba, afne en nam raḳba, Isa. ³²Tain bout boṛo ijjoti oiba. Tanre ḳoa oibo Ibnulla, Allatalar ḳas maear zon. Alla Mabude tan ḳandanor murobbi Bashsha Daudor godi tanre diba. ³³Tain dunia aḳerato Boni Israilor ufre bashshai ḳorba, tan bashshai kunudinu furaito nae.”

³⁴Teu Bibi Moriome firistare ḳoila, “Ita kilan oibo? Amar to bia-shadiu oise na.” ³⁵Firistae ḳoila, “Pak ruh afnar ufre nazil oiba, ar Allar kudroti saea afnar ufre aibo. Erdaeu afnar goro ze pak aolade zonom loiba, tanre Ibnulla, mani Allar ḳas maear zon ḳoia ḍaḳa oibo. ³⁶Hunoukka, afnar kuṭum Bibi Elisabetor befare manshe ḳoita na ni, tan kunu huruttau oita nae? Oile oḳon to ou murobbi boeosho tan feṭo-o soe mashor fua ase. ³⁷Te Allae faroin na, ila kuntau nai.”

³⁸Moriome ḳoila, “Ami to Allar bandi; afnar ḳota moto-u hoḳolta folouk.” Bade firista tan ges taki bidae oigela.

Bibi Moriom Bibi Elisabetor baṛit gela

³⁹Erbade Bibi Moriom uṛa-taṛa ḳori, Ehudia zilar eḳ faṛia gaut gela. ⁴⁰Gia hono imam Zakariar baṛit hamaia, tan bibi Elisabetre salam ḳorla. ⁴¹Elisabete Moriomor aoaz hunar loge logeu, tan feṭor hurutta aḳta loṛia uṭila. Tain Pak Ruhe kamil oia, ⁴²zure zure ḳoila, “Duniar tamam beṭintor maze tumiu ḳofali, tumar feṭor sabalo ḳofali. ⁴³Amar munibor ma amar goro toshrif anchoin, amar oto boṛo ḳofal kila oilo? ⁴⁴Ami tumar aoaz hunar loge logeu, amar feṭor gedaeo kushie loṛia uṭisoin. ⁴⁵Tumi to ḳofali beṭi, ḳaron Mabude tumare zeta zanaisoin, tumi dile-zane ita ekin ḳorso.”

⁴⁶Ou Bibi Moriome ḳoila,

“Amar ḳolbe tarif ḳorer amar Mabudor,

⁴⁷behesti kushie borigese amar ontor,

toraura sand aisoin, obaginir gor.

⁴⁸Souk tulia saisoin doyal, ḳangal bandir bae,

erdae-u tamam zatie shabash shabash gae,

boṛo ḳofali ḳoiba more, zug zugantor.

⁴⁹Shoktimane ḳorla more oto boṛo ḳam,

amar lagi oisoin tain kudroti asan,

tainu to subohan Alla, pak-fobitro tain.

⁵⁰Zera tane tazim ḳori roin ḍoraia,

rohom ḳoroin tain itare nizor zania,

oarishe oarishe rohom, tainu bilain.

⁵¹Tanu kudroti ate ḳorsoin moha ḳam,

monor gorimae zetae ḳore boṛai shan,

itare ḳedaia dia, boitol banaisoin.

⁵²Raza-bashshain hokir oila godi kuaia,

hokir oḳol bashsha oila rohomot faia,

usa-nisa hokir-bashsha, tainu banaisoin.

⁵³Ufashi ḳangalre dila bala bala ḳani,

bukashir feṭo gelo dami dana-fani,

doni zonre ḳali ate, ḳedaia disoin.

⁵⁴Tain zela oada ḳorsla moe-murobbir loge,

ola-u to asan ḳorsoin Boni Israilre,

Boni Israil oila Allar afon gulam.

⁵⁵Ibrahimre iad raḳsoin rohom borkot diba,

loge tan ḳandane-o ou doya faiba,

siroḳalin ou oada mono rakisoin.”

⁵⁶Bibi Moriom tan kuṭum Elisabetor gese tin mash roila, heshe tan nizor baṛit gelagi.

Hozrot Ehia (a:)-or zonom

⁵⁷Bade miad fura oia harle Elisabetor goro eḳ fua oila. ⁵⁸Mabude tanre oto boṛo rohom ḳorsoin hunia, ari-fori ar ḳesh-kuṭum oḳol aia tan loge kushi-bashi ḳorla.

⁵⁹Ihudi oḳolor reoaz mafik zonmor aṭ dinor din, fuar mosolmani ar akika ḳoranir lagi tara hoḳol dola oila. Tara saila, bafor namor laḳan fuar namo ouk. ⁶⁰Oile maʼe ikan manla na, tain ḳoila, “Na, er nam oibo Ehia.” ⁶¹Tara ḳoila, “Tumar ḳesh-kuṭumor maze to ila nam ḳeuror nai.”

⁶²Teu tara isharae fuar bafore zikaila, tain kun nam fosond ḳoroin. ⁶³Zakariae tarar ges taki ḳata-ḳolom nia leḳla, “Tar nam Ehia.”

Ou tara hoḳol taijjub oigela. ⁶⁴Ar loge logeu Zakariar zoban kuligelo, tain mat-ḳota matila ar Allar shukria adae ḳorla. ⁶⁵Ita dekia ari-fori hoḳole ḍoraigela. Ehudia zilar faṛia oncholor hoḳol manshor muke muke ou ḳobor roṭigelo. ⁶⁶Zoto manshe i goṭona hunchil, tara hoḳole-u mone mone sinta ḳori ḳoilo, boṛo oia harle i fua kita oibo. Ḳaron Mabudor kudroti at tan ufre asil.

Hozrot Zakaria (a:) nobir muko gaibi ḳobor

⁶⁷Bade fuar baf Zakaria, Pak Ruhe kamil oia ou gaibi ḳobor ḳoila,

⁶⁸“Shukria zanai ami bondae Alla Mabudor,

asan ḳorsoin tain nize afon Israilor,

kial ḳori ḳorla azad nizor gulam dol.

⁶⁹Amrar lagi fosond ḳorla Daud ḳandanre,

bol-takkoti ḳanḍarire anla oḳan tone,

deḳailae doyal more nazat ḳorra zon.

⁷⁰Nobi oḳole zobandi ḳoisla bout age,

tainu ḳoaisla ita nobi oḳolor muke,

takkoti ḳanḍari-u oiba Daud kulor bol.

⁷¹Dushmon oḳolor ḳobza taki tain basaila,

gin-ingsha ḳorra taki oḳon fana dila,

amrare basaila aia doyal Moular zon.

⁷²Basaila amrare ḳali moe-murobbir ḳatire,

ḳosom ḳora pak oada furanir niote,

moe-murobbire zoban deoae amra basilam.

⁷³Ḳosom ḳori oada ḳorsla doyal Allae,

Ibrahimre zanaila tain nazator ufae,

Ibrahim nobi-u oila amrar ashol baf.

^74-75Amrare basaita ḳori Moular ou ḳosom,

dushmon taki basar lagi batai dila niom,

zinda zudin asi amra nisinta roitam.

Ḍor-ḳof saṛa amra zanu ḳori ebadot,

forezgar ar sohi fote taki nirafod,

tan samne roia zate ḳori tan ḳezmot.

⁷⁶Ore amar maear fut Ehia babaji,

tumare to ḍaḳa oibo Allatalar nobi,

munibor age roia sohi ḳorbae fot.

⁷⁷Batai dibae tumi tan bonda oḳolre,

guna mafir fot sinba tumar talime,

bataia dibae baba nazat faoar fot.

⁷⁸Amrar Allar rohom ar hou mohobbote,

behesti nuror eḳ shuruz aiba ufrete,

amrar ufre aia hari rakiba nozor.

⁷⁹Mout ar andarir gato zera ḳaṭae din,

nuror fot deḳba tara ḳoria ekin,

amrareo shantir fote salaiba ou zon.

Ou huzur nazil oia deḳaiba kudrot,

tainu hou oada ḳora Allai rohomot.”

⁸⁰Bade Ehia aste aste boṛo oila, loge oia tan ruhani bolo baṛilo. Boni Israilor samne kula-mela zair oibar ag forzonto, tain morubumir maze din ḳaṭaila.

Hozrot Isa al-Mosir zonom

¹Ou shomoe Ruman bashsha Agosto Ḳoisore hukum dila, tan asta bashshair hoḳol prozae zarzir nam leḳanir lagi. ²Shiriar hakim Kuriniasor amolo, ou foela bar manush gonar lagi nam leḳail oilo. ³Teu nam leḳanir lagi hoḳol manush zarzir buniadi gaut gela.

⁴Ou laḳan Iusufo nam leḳanir lagi Galil zilar Nasarot gau taki Bashsha Daudor gaut aila. Tain to Daudor ḳandanor manush. Gaur nam Betelham, iṭa Ehudia zilat. ⁵Bibi Moriomo ou Iusufor loge oia nam leḳanit gela. Ou Iusufor logeu tan shadi ṭik oisil, ar tan feṭo ou shomoe hurutta asil. ⁶Betelhamo taḳteu Moriomor hurutta oibar bishe dorlo. ⁷Ar tan foela fuar zonom oilo. Oile hino kunu meman ḳanat taḳar zaga millo na, erdae Moriome ou huruttare tenadi beraia gual goror ḳeror gamlat hutai toila.

Firista ar raḳal oḳol

⁸Ou Betelham gaur ḳandat bondor maze, meṛar raḳal oḳole raitkur bala tarar meṛa fara deoat asil. ⁹Aḳtau Allar eḳ firista tarar samne aia doroshon dila, ar Mabudor nuror teze tarar sairobae for oigelo. Ita dekia raḳal oḳol ḍoror suṭe bedisha bonigela.

¹⁰Oile firistae tarare ḳoila, “Tumra ḍoraio na. Ami tumrar lagi kub kushir ḳobor loia aisi. I kush-ḳobri duniar tamam manshor lagi. ¹¹Huno, tumrar toraneala aiz Daudor gaut zonom loisoin. Tainu al-Mosi, tainu malik. ¹²Tumra gia er forman deḳbae, deḳbae ek kasa huruttare tenadi beraia, gual goror ḳeror gamlat hutaia toa oise.”

¹³Ou shomoe aḳtau hou firistar loge aro bout firistare deḳa gelo. Era Allar zikir-azkar ḳori ḳori ḳoila,

¹⁴“Asmano Allar lila-ḳela deḳa zauk,

duniar bukut tan fiara bondar shanti ouk.”

¹⁵Bade firista oḳol tarar ges taki asmano gia harle, raḳal oḳole eḳe-oinnore ḳoilo, “Ao, amra Betelhamo zai. Mabude amrare ze ḳobor zanaila, ota dekia ai.”

¹⁶Mati mati tara zoldi ḳori gela, gia Moriom, Iusuf ar ḳeror gamlat hutail ou huruttare faila. ¹⁷Faia ou huruttar befare tarare ze ḳobor zanail oisil, ita tara hoḳolre ḳoila. ¹⁸Tarar mat hunia hoḳoleu taijjub oigela. ¹⁹Oile Moriome hoḳolta dilor maze gatia raḳla, ar mone mone sintat roila. ²⁰Firista oḳole raḳal oḳolre zela ḳoisla, era ita dekia hunia Allar zikir tarif ḳori ḳori firot gelagi.

²¹Bade zonmor aṭ dinor din akika ar mosolmani ḳoranir bala, tan nam raḳa oilo Isa. Mar feṭo aibar ageu firistae ou nam toisla.

Geda Isare Baetul-Mukaddoso anla

²²Ermaze Musa nobir shoriot mafik tarar pak-saf oar shomoe oilo. Teu Isare Mabudor ato shofia dibar niote, Iusuf ar Moriome tane loia Zeruzalem ṭauno aila. ²³Mabudor shoriotor hukum asil, forteḳ zandaror foela fuare Allar name shofia dite oibo. ²⁴Erloge, eḳ zuṛa ḍufi faki ba faror duiṭa baichcha kurbani dite oibo, shoriotor ou hukum mafik tara kurbani deoat aila.

²⁵Ou shomoe Zeruzalem ṭauno Samaun namor eḳzon allaraia buzurg asla, tain Pak Ruhe kamil. Tain mone mone bar saoat asla, Allae kun shomoe Boni Israilre shanti diba. ²⁶Pak ruh tan loge asla, ou ruhe tanre bataisla, tan moutor ageu Allar oada ḳora al-Mosire tain deḳba. ²⁷Pak ruhur isharae Samaun ou din Baetul-Mukaddoso azir oila. Isar ma-bafeo shoriotor hukum adae ḳorar niote, geda Isare loia ono aila. ²⁸Ou kamil buzurg Samaune Isare kulo loia Allar shukria adae ḳorla. Tain ḳoila,

²⁹“O malik, tumar zoban mafik

tumar i gulamre oḳon shantie bidae deo.

^30-31Adom zatire toranir lagi,

tamam manshor soukor samne

tumi ze usilla ḳaim ḳorso hou al-Mosire

amar niz souke dekia gelam.

³²Tumar ḳas proza Boni Israilor gourob to einu,

bad-baki tamam zatireo fot deḳanir nur.”

³³Samaune Isar befare ou zeta ḳoila, ita hunia Isar ma-baf taijjub oigela. ³⁴Samaune tarare dua dila, tain Isar ma Moriomre ḳoila, “Huno, Alla Pakor kial oilo, ou huruttar dorun Boni Israilor bout zone nazat hasil ḳorba, ar bout zon lannoti oiba. Tain ou laḳan eḳ nishana, tan bifokke bouteu matibo. ³⁵Ota taki tarar dilor hal-hokikot buza zaibo. Ar huno, toluare ḳaṭile zela oe, tumar dilo-o ola dukor sel hamaibo.”

³⁶Ou shomoe Hanna namor eḳzon beṭi manusho asla, tain Allar nobi. Tan bafor nam Fanuel, ar ḳandanor nam Ashir. Tan bout boeosh oigese, shat bosor zamair gor ḳoria hari, ³⁷sourashi bosor forzonto ṛaṛi halote asla. Tain Baetul-Mukaddosor bitre ruza raḳta ar dua ḳorta. Ebadot-bondegir maze rait-din ḳaṭaita, bare baroita na. ³⁸Ṭik ou shomoe taino ono aia Allar shukria adae ḳorla. Ar zerar dilo ou asha asil, Alla Pake Zeruzalemre azad ḳorba, tarar logeo tain Isar befare batchit ḳorla.

³⁹Moriom ar Iusufe Mabudor shoriot mafik hoḳol ḳam shesh ḳoria harle, tarar boshot baṛi Galil zilar Nasarot gaut gelagi.

⁴⁰Nabalik Isar boeosh baṛilo, erloge tain shorilor bol ar ilim-aḳoleo mozbut oila. Allar rohomot to tan loge asil.

Baro bosoror Hozrot Isa Zeruzalem kaba shorifo

⁴¹Ihudi oḳolor Azadi Idor shomoe aile Isar ma-baf forti bosoru Zeruzalemo zaita. ⁴²Isar boeosh zebla baro bosor, ou shomoyo hou reoaz mafik tara Zeruzalemo aila. ⁴³Id shesh oia harle tara baṛit roana dila, oile Isa ou shomoe i dolor loge na gia Zeruzalemo roigela. Tan ma-bafe ikan ṭer faila na. ⁴⁴Isao dolor bitre asoin mono ḳoria tara eḳdinor fot aguai gela. Gia tarar ḳesh-kuṭum ar logor manshor gese tallash ḳoria tanre faila na. ⁴⁵Na faia tanre tukai tukai hirbar Zeruzalemo aila. ⁴⁶Tin din tallash ḳoria tanre Baetul-Mukaddoso faila. Tara deḳla, tain moulana oḳolor loge boia tarar boean hunra, ar nanan musla zikaira. ⁴⁷Ar zoto manshe tan mat hunla, tara hoḳoleu tan aḳoldari batchit hunia taijjub bonigela. ⁴⁸Tan ma-bafeo tanre dekia ekkere somkigela. Mae tanre zikaila, “Futre, tumi amrar loge ita ḳorlae ḳene? Ami ar tumar bafe ḳoto fereshan oia tumare tukairam.” ⁴⁹Isae zuaf dila, “Tumitain ḳene amare tukairae? Zano na ni, ami to amar gaibi bafor gorou roite oibo?” ⁵⁰Tan ma-bafe i mator kunu bed buzla na. ⁵¹Bade tain baroia ma-bafor loge oia Nasaroto gela, ar tarar ḳota moto solla. Oile tan maʼe ita hokkolta dilo gatia raḳla.

⁵²Ermaze Allar mohobbot, manshor maea, boeosh ar ilim-aḳole tain aste aste boṛo oila.

Allar ḳam ḳorar lagi Hozrot Isa zuit oila (3:1–4:13)

Hozrot Ehia nobir toblig

¹Ruman bashsha Tibirio Ḳoisoror bashshair fonro bosor soler. Ou shomoe Fontio Filat asla tan odinor Ehudia zilar hakim, ar Herud asla Galil zilar raza, Herudor bai Filif asla Zituria ar Takuniti zilar raza, ar Lusanias asla Abilini zilar raza. Era hoḳolu asla Ruman bashshar odine. ²Ou amolor Ihudi zatir fordan imam asla, imam Hanon ar Kaeafa. Ṭik ou shomoe Zakariar fut Ehiar gese morubumi elaḳat Allae tan kalam nazil ḳorla. ³Teu Ehia nobie Zordan gangor ḳanda-ḳasar hoḳol ḳano gia toblig korla. Ḳoila, guna taki mafi faoar lagi touba ḳoria torikar gusol ḳora zorur. ⁴Ehia nobir befare Isaea nobir kitabo zela leḳa asil, tain oula ḳorla. Leḳa ase,

Moru bumir maze eḳzone elan ḳorra,

tumra malikor fot sohi ḳoro,

tan solar rasta oḳol shida ḳoro.

⁵Faṛia hokkol nisa zaga boraṭ oibo,

usa-nisa ṭillain homan ḳora oibo.

Teṛa-beḳa hoḳol fot shuza oibo,

gat-gaṛa hoḳolta homan ḳora oibo.

⁶Ar duniar manshore toranir lagi

Allae nazator ze usilla ḳorsoin

tamam mansheu ita deḳba.

⁷Ehia nobir toblig hunia toubar gusol ḳorar niote zera ailo, tain erare ḳoila, “O hafor baichchain, asmani gozob aior dekia zan basanir fot tumrare ḳegie batai dilo? ⁸Hasau zudi tumra touba ḳoria taḳo, te er folo deḳao. Mone mone ḳoio na, tumra Ibrahimor aolad. Huno, ami ḳoiram, Allae saile to ou fattor oḳol takiu Ibrahimor aolad banaita farba. ⁹Gasor guṛit to kuṛal lagailu ase. Ze gaso bala fol dore na, i gas ḳaṭia agunit falail oibo.”

¹⁰Ita hunia manshe Ehiare zikaila, “Te amra kita ḳortam?” ¹¹Tain ḳoila, “Ḳeuror zudi duiṭa kurta taḳe, te zar nai tare eḳṭa deuk. Zar goro dan-saul ase, he-o oula bilauk.”

¹²Ḳazna tulra ḳoezon toshildare toubar gusol ḳorat aia zikaila, “Murshid, amra kita ḳortam?” ¹³Tain ḳoila, “Niom taki beshi ṭeḳa adae ḳorio na.”

¹⁴Ḳoezon sifaieo zikaila, “Huzur, te amra kita ḳortam?” Tain ḳoila, “Ḳeurore zur-zulum ḳoria ba fando falaia kunta adae ḳorio na. Zarzir betone kushi roio.”

¹⁵Manshe mone mone al-Mosir lagi bar saoat asil, Ehiare dekia tara kub asha ḳorlo, einu mono loe al-Mosi. ¹⁶Oile Ehiae tarare ḳoila, “Ami ḳali fanidi toubar gusol ḳoraiar, te amar bade zein toshrif anra, tain ama takio takkot-ala. Tan faor zutar fita gesa kular zukao ami nae. Tain aile Pak Ruh ar aguin dia tumrare gusol ḳoraiba. ¹⁷Tan kula to tan atou ase, maṛa deoa dan ou kuladi uaia hari dan nia ugaro tulba, ar susare omon agunit falai zalaiba, ze aguin kunudin nibe na.”

¹⁸Ou laḳan aro bout nosiot ḳoria Ehiae manshor gese kush-ḳobri toblig korla. ¹⁹Oile Raza Herude bout nomunar ḳaraf ḳam ḳorae, ar tar bair bou Herudiare hanga ḳorae, Ehiae tare dushi shaibosto ḳorla. ²⁰Erdae he tar hoḳol ku-ḳamor loge eoḳano baṛailo, he nobi Ehiare zelo haraililo.

Hozrot Isae pak gusol ḳorla

²¹Ehia nobi zelo hamanir age, tan gese aia zebla bout manshe toubar gusol ḳorra, ou shomoe Isao ono aia tarar loge gusol ḳorla. Gusolor bade Isae zebla dua ḳorra, aḳtau Allar aroshor duar kuligelo, ²²ar Pak Ruh faror surot doria tan ufre nazil oila. Loge loge behesti ou aoazo huna gelo, “Tumiu amar ḳas maear zon, tumar ufre ami kub kushi.”

Hozrot Isa al-Mosir ḳandanor forisoe

²³Onuman tish bosor boeoshor ḳalo Isae toblig kam shuru ḳorla. Manshe zanta tain Iusufor fua. Iusufor moe-murobbi oila,

²⁴Ali, Mattat, Lebi, Malki, Iannai, Iusuf,

²⁵Mattatia, Amuz, Naum, Isli, Naggai,

²⁶Mahat, Mattatia, Shimio, Iuseḳ, Ioda,

²⁷Iuhannan, Risha, Zerbabil, Shaltiel, Niri,

²⁸Malki, Addi, Ḳasam, Ilmadam, Ier,

²⁹Iusa, Eliezer, Iurim, Mattat, Lebi,

³⁰Samaun, Ehuda, Iusuf, Iunan, Iliakim,

³¹Malia, Manna, Mattata, Natan, Daud nobi,

³²Ias, Ubayed, Buaz, Selim, Nahish,

³³Aminadab, Admin, Arni, Hasir, Firuz, Ehuda,

³⁴Iakub nobi, Isʼhak nobi, Ibrahim nobi, Tareḳ, Nahur,

³⁵Saruz, Rau, Falez, Aber, Shaleḳ,

³⁶Kinan, Arfaksad, Sham, Nuh nobi, Lamaḳ,

³⁷Matushalaḳ, Idris nobi, Iared, Mahalail, Kenan,

³⁸Inush, Shish nobi, Adom,

Alla Pak.

Hozrot Isare Iblis-shoetane forikka ḳorlo

¹Isa Pak Ruhe kamil oia, Jordan gango taki uṭia morubumit gelagi. Gia Pak Ruhur isharae eḳlaga sallish din morubumit gurila. ²Ar Iblis aia tanre forikka salailo. Ou sallish din eḳlagare ruza asla, kunuzat ḳana ḳaisoin na. Erbade tan feṭo buk laglo.

³Teu Iblise tanre ḳoilo, “Tumi zudi Ibnulla, Allar ḳas maear zon o, te ou fattorre ḳo na ruṭi oizito.” ⁴Isae zuaf dila, “Allar kalamo batail oise, ḳali ruṭi ḳaileu manush base na.” ⁵Bade Iblise tanre kub usa eḳ zagat loia gelo, nia hari eḳ foloḳe duniar tamam mulluḳ tanre deḳailo ar ḳoilo, ⁶“I tamam mulluḳor bashshai ar zak-zomoḳ ami tumare dilaimu. Ita hokkoltar malikana amare deoa oise. Ami zare kushi tare ditam fari; ⁷ḳali tumi amare soizda ḳorilao, teu i hokkolta tumar oizibo.” ⁸Isae tare ḳoila, “Allar kalamo ase, Tumi ḳali afon Alla Mabudre soizda ḳorbae, ḳali tan ebadot ḳorbae.” ⁹Teu he Isare loia Zeruzalem ṭauno gelo, gia fobitro kaba gor Baetul-Mukaddosor minarar ufre tane uba ḳoria ḳoilo, “Tumi zudi Ibnulla, Allar ḳas maear zon o, te deki sain, on taki fal dia lamat foṛo. ¹⁰Kitabo to leḳa ase,

Allae tan firista oḳolre hukum diba,

ar tara tumare basaiba.

¹¹Tara nizor atdi tumare doriliba,

zate tumar faot kunu fattoror suṭ na lage.”

¹²Isae tare ḳoila, “Kitabo leḳa ase, Tumi tumar Mabud Allare forikka ḳorat lagio na.”

¹³Iblise tar hoḳol nomunar forikka shesh ḳoria, afatoto tan ges taki horia gelogi.

Galil zilat Hozrot Isar keramoti ar toblig (4:14–9:50)

Nizor gaut Hozrot Isa

¹⁴Bade Pak Ruhur kudrote Isa Galil elaḳat gela, gia harle tan nam sairobae roṭigelo. ¹⁵Tain honor mosido mosido gia boean talim dila, teu hoḳol manshe tan tarif ḳorlo.

¹⁶Ar Isa hou Nasarot gaut aila, ze gaut tain huru taki boṛo oisoin. Ono aia tain nizor niom mafik Zummabare mosido gia kutba foṛat ubaila. ¹⁷Isaea nobir sohifaḳan tan ato deoa oilo. Tain kitab kulia ou aeat bar ḳorla, ze aeato leḳa ase,

¹⁸Amar dilo Mabudor ruh boshot ḳoroin,

tainu amare ḳelafoti dia bezisoin,

gorib oḳolor gese kush-ḳobri zananir lagi.

Ar bondi oḳolor gese azadir ḳota,

anda oḳolor gese souke deḳar ḳota,

zerar ufre zulum or tarare basanir ḳota

elan ḳorar lagi bezisoin.

¹⁹Ar ou ḳota elan ḳorar lagio bezisoin,

oḳon Mabudor rohomot deḳanir shomoe oigese.

²⁰Kutba tilaot ḳoria harle, tain kitabḳan aṭaia mosidor mutollir ato dia boila, mosidor hoḳol manshe tan bae dian dori sai roise. ²¹Tain ḳoila, “Asmani kitabor i aeat ḳanain, aiz afnara hunar loge logeu foligelo.” ²²Hoḳol manshe tan tarif ḳorlo, tan muk taki oto shundor boean hunia taijjub oigelo. Tara ḳoilo, “Ein Iusufor fua nae ni ba?”

²³Ermaze Isae tarare ḳoila, “Afnara nichoe amare ou silleḳ hunaiba, Ḍaktor sab, nizor bemar shifa ḳoro. Kofornaumo bule bout keramoti-muzeza deḳaiso, te oḳon nizor gauto ota deḳao na. ²⁴Hunoukka, ami afnaintore hok kota ḳoiram, kunu nobireu tan nizor gaur manshe manoin na. ²⁵Ar ikano hasa ḳota, Ilias nobir zomanat eḳlaga shaṛe tin bosor kunu meg oisil na, asta desho bezuita nidan asil. Hou shomoe to Israil desho bout ṛaṛi beṭin asla, ²⁶oile Ilias nobire era ḳeuror gese na bezia, ḳali Sidon deshor Sarifot gaur eḳ ṛaṛi beṭir gese beza oisil. ²⁷Ar Aliasa nobir amolo Israil desho bout fosa-kushṭo bemari asla, oile era ḳeurore bala na ḳoria, ḳali Shiria deshor Namanre bala ḳora oisil.”

²⁸Ikan hunia-u mosidor shob manush gusae aguin oigela. ²⁹Tara uṭia tanre ṭelia ḳedaia gaur bare loia gelo, gia gaur kunar ḳaṛa ṭillar ufre nia, dakkadi tole falaito sailo. ³⁰Oile biṛor maz tone tain aṭia horia gelagi.

al-Mosie bout bemarir shifa ḳorla

³¹Bade Isa Galil elaḳar Kofornaum ṭauno gela, gia Zummabare manshore oaz-nosiot ḳorla. ³²Tan oaz hunia manush taijjub oigela, tain to fura himmot-ala zonor laḳan talim dita.

³³Hou mosido zinor asor-ala eḳ beṭa asil. He zure zure sillaia ḳoilo, ³⁴“O Nasarotor Isa, amrar gese ḳene aisoin? Amrare binash ḳorat aisoin ni? Ami zani afne ḳe, afneu Allar hou pak-fobitro zon.” ³⁵Isae tare damki dia ḳoila, “Chup, er bitor taki baroi za.” Zine loge logeu tare asaṛ mari hoḳolor mazḳano falaia, kunuzat ḳeti na ḳoria saṛia gelogi. ³⁶Ita dekia manush taijjub bonia mata-mati lagaila, “Ita kita deḳlam? Tain himmot ar ḳemota ḳaṭaia zin oḳolre hukum dein, tarao deki baroia zaegi.” ³⁷Bade hinor hoḳol zagat Isar keramotir ḳobor roṭigelo.

³⁸Mosid taki baroia tain Saimonor baṛit gela. Saimonor hoṛir kub beshi taf uṭsil, erdae hoḳole Isare kub minot ḳorla. ³⁹Tain Saimonor hoṛir ḳandat ubaia tafre domoḳ dila. Domoḳor loge logeu tafe saṛidilo. Beṭie uṭia tarar memandarit lagla.

⁴⁰Hainjabala manshe bout zator bemarire loia Isar gese aila. Isae tara hoḳolor gotro atai dia bemar bala ḳorla. ⁴¹Zinor asor-alao bout bemari asla, tarao bala oila. Zin oḳole zure zure sillaia ḳoila, “Afneu Ibnulla, Allar ḳas maear zon.” Oile tain itare damki dia muk bond ḳorla. Tarar to zana asil, tainu Allar oada ḳora hou al-Mosi.

⁴²Biane uṭia hari, Isa hi gau saṛia eḳ nirai zagat aila. Manshe tanre tukai tukai tan daro ailo, aia minot-ḳajji ḳorlo zate tain tarar gese roin. ⁴³Oile tain zuaf dila, “Ami aro bout zagat gia Allar bashshair kush-ḳobri toblig kora zorur, ou ḳamor lagiu Allae amare bezisoin.” ⁴⁴Bade tain asta Ihudi deshor mosidainto gia toblig korla.

Gaibi mas faia iman ana

¹Eḳ din Isa Galil aoror faro uba asla, ou shomoe bout manush Allar kalam hunar lagi tan ḳandat aia ṭelaṭeli lagaila. ²Isae deḳla, aoror kinaro duḳan zalua nao lagail. Nao taki lamia zalua oḳole tarar zal doira. ³Isa gia Saimon namor eḳ zaluar nao-o uṭia tare ḳoila, naoḳan bashaia kisu fanit nibar lagi. Ḳoia tain nao-o boia manshore oaz-nosiot ḳorat lagla.

⁴Nosiot bade tain zalua Saimonre ḳoila, “Naoḳan goin fanit neo ar zal falao.” ⁵Saimone ḳoila, “Huzur, asta rait ḳoshṭo ḳoriao kunu mas faisi na, ta-o afnar ḳotae zal falairam.”

⁶Zal falanir bade oto beshi mas zalo hamaila, masor ṭelae zal faṛizibar dosha. ⁷Ou tara shaijjor lagi logor naor zaluare ḍaḳ dila. Tara aia mas doria nao borilila, zalo oto mas hamaisil zen, masor bare duio nao ḍubuḍubu oigelo. ⁸Ita dekia, Saimon-Fitore Isar fao-o foṛia ḳoila, “Huzur, ami to gunagar manush, amar ges taki toshrif ḳan neukkagi.” ⁹Ḳaron, oto mas dekia Saimon-Fitor ar tan logor hokkole taijjub bonigela. ¹⁰Saimonor logor zalua Zibudiar duio fua Iakub ar Hannaneo ita dekia taijjub oila. Teu Isae Saimonre ḳoila, “Ḍoraio na, oḳon taki ar mas nae, tumi Allar name manush dorbae.” ¹¹Bade tara nao loia kinarat aila, ar hokkolta toia Isar loge roana oigela.

Nafaḳ fosa-kushṭo bemarire bala ḳora

¹²Eḳbar Isa eḳ gaut gela. Hou gaur eḳ beṭar asta gotor zuṛi nafaḳ fosa-kushṭo bemar asil. Isare dekiau he tan fao-o foṛia minot-ḳajji lagailo, “Huzur, afnar mone saile to amare ou nafaḳ bemar taki bala ḳorta farba.” ¹³Isae at baṛaia tare soia ḳoila, “Oe, amio sairam, tumi pak-saf o.” Ḳoar loge logeu tar bemar ḳomigelo.

¹⁴Bala oia harle Isae tare hukum dila, “Ita ar ḳeurore hunaio na, tumi gia ḳali imam sabre deḳao. Musa nobir shoriot mafik pak-saf oar lagi zela kurbani ḳora zorur, ou kurbani dileu manshe zaniliba, tumi bala oiso.” ¹⁵Oile Isar ḳobor sairobae roṭigelo. Erdae tan mukor buli hunar lagi ar bemari oḳol bala oar niote, bout manush tan gese aila. ¹⁶Oile tain kunu na kunu nirai zagat gia hamesha dua ḳorta.

Guna maf ḳorar ḳemota Hozrot Isar ase

¹⁷Eḳdin Isa talim deoat asla, ou mozliso alim oḳol ar Forishi mozobor bout mullain boat asla. Tara Zeruzalem ṭaun, Galil ar Ehudia zilar nanan gauain taki aisoin. Isar maze Mabudor kudroti bol asil, ou boleu bemari oḳolre shifa ḳorta.

¹⁸Ermaze ḳoezon manshe eḳzon obosh bemarire folodi boia loia aila. Tara saila tare nia goror bitre Isar samne toita. ¹⁹Oile biṛor lagi goro hamanir fot faila na. Ou tara salor ufre uṭia, salor sani kulia folo shudda bemarire Isar samne manshor mazḳano lamai dila. ²⁰Tarar imanor bol dekia Isae ḳoila, “Baire, tumar guna maf ḳori dilam.”

²¹Ikan hunia alim oḳole ar Forishi dolor mullainte mone mone ḳoila, “I manushgu ḳegu, he ola shiriki ḳorer? Ḳali Alla saṛa ar ḳeu guna maf ḳorto fare ni?” ²²Tarar dilor sinta Isae buzilila, buzia ḳoila, “Afnara ḳene ila sinta ḳorra? ²³Ami kunḳan ḳoa shuza, tumar guna maf ḳori dilam? Ba tumi uṭia aṭia tumar bisna loia baṛit zaogi? Kunḳan shuza? ²⁴Te oḳon afnara forman deḳoukka, i duniat guna mafir ḳemota ami Bin-Adomor ase.” Oḳan ḳoiau tain bemari beṭare ḳoila, “Oba, ami tumare ḳoiram, uṭo, tumar ḳeta-balish loia baṛit zaogi.” ²⁵Ḳoiteu hi bemari beṭa hoḳolor samne ubaia, tar ḳeta-balish loia Allar tarif ḳori ḳori nizor baṛit gelogi. ²⁶Ita dekia hoḳol taijjub bonia, Allar tarif ḳori ḍorai ḍorai ḳoila, “Aiz ita kizat keramoti ḳam deḳlam.”

al-Mosie Lebire daot dila

²⁷Bade Isa bare gela, gia toshil ofiso Lebi namor ek kazna tulrare boat deḳla. Dekia tare ḳoila, “Ao, amar ummot o.” ²⁸Daot hunia-u Lebie tan hoḳolta falaia Isar loge oia roana dilaila.

²⁹Bade Lebie tan nizor baṛit Isar lagi boṛo ek kaoa-daoar bebosta ḳorla. Tarar loge bout gushkur ḳazna tulra ar aro manush ḳaoat boila. ³⁰Teu Forishi ar tarar dolor alim oḳole na-kush oia Isar shagrid oḳolre ḳoila, “Tumra ḳazna tulra ṭogbaz ar naforman oḳolor baṛit ḳana-fina ḳao ḳene?” ³¹Isae tarare zuaf dila, “Bala manshor lagi to ḍaktoror zorur nai, oile bemari oḳolor lagi zorur ase. ³²Te amio forezgar oḳolre daot deoat aisi na, ḳali gunagar oḳolre daot deoat aisi, zate tara touba ḳoroin.”

Furan talim taki Hozrot Isar talim bala

³³Bade hou alim ar Forishi oḳole ḳoila, “Ehiar shishio oḳole hamesha ruza raḳoin, dua ḳoroin, ar Forishir shishio oḳoleo ola ḳoroin, te afnar shishio oḳole kunu shomoe-u ḳani bad dein na ḳene?”

³⁴Isae zuaf dila, “Nosha loge taḳle logor boiratire kunu ufash raḳa zae ni? ³⁵Oile omon eḳ din aibo, zebla noshare tarar ges taki neoa oizibo. Hou shomoe tara ruza raḳba.” ³⁶Isae tarare talim dibar lagi ou misal hunaila, ḳoila, “Noea kurtar ṭukra siṛia, ḳeu furan kurtat tali dey na. Ila ḳorle to noeaṭao nosṭo oibo, ar noea ḳafoṛor tali to furan ḳafoṛor loge milto-o nae. ³⁷Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oe. ³⁸Taza rosh noea tolit toite oe. ³⁹Ar anguror furan rosh ḳaia harle, kunu manshe noea rosh ḳaito sae na. Tara ḳoin, furantau moza.”

Zummabaror befare talim

¹Eḳ Zummabare Isa gom ḳetor ailedi aṭia zaira. Ou shomoe tan shagrid oḳole gomor soṛa siṛia ato goshi goshi ḳaira. ²Ita dekia Forishi mozobor ḳoezone ḳoila, “Musa nobir shoriot mafik to Zummabare zekunu ḳam ḳora haram, te tumra i soṛa siṛirae ḳene?” ³Isae zuaf dila, “Te Daud nobi ar tan logor hoḳolor zebla feṭo buk lagsil, hi shomoe tara kita ḳorsla, ita afnara foṛsoin na ni? ⁴Tain nize Allar goro hamaia fobitro ruṭi ḳaisla, ar tan logor oḳolreo ḳaoaisla. Ashole ḳali imam oḳol saṛa ar ḳeu i ruṭi ḳaoa zaiz asil na.” ⁵Bade Isae tarare ḳoila, “Huno, ami Bin-Adomu Zummabaror malik.”

⁶Aroḳ Zummabare Isa mosido gia oaz-nosiot ḳorat asla. Hono eḳ bemari beṭa asil, tar ḍainor at bemare hukai gese. ⁷Moulana ar Forishi dolor manshe Isare fando falaita ḳori bana tukanit asla. Tara deḳta saila, zummar din tain ḳeurore bala ḳoroin ni, ḳorle tanre dushi banaita farba. ⁸Isaeo tarar dilor ku-motlob buzilila. Buzia tain hukna at-ala beṭare ḳoila, “Oba, tumi aia hoḳolor samne ubao sain.” Teu beṭa aia ubailo. ⁹Isae tarare zikaila, “Ami afnaintore ekkan ḳota zikairam, Zummabare kun ḳam ḳora zaiz, bala ḳam na bad ḳam? Zan basani, na zanor binash ḳora?”

¹⁰Bade tain sairo galar hoḳolor bae saia hou beṭare ḳoila, “Tumar atḳan baṛao.” Beṭae tar at baṛailo, ar furafur bala oigelo. ¹¹Ita dekia hou mulla oḳolor kub gusa uṭlo. Tara foramish salaila, Isare ḳemne tamail zae.

Barozon ḳas sahabi

¹²Bade Isa dua ḳorar lagi eḳ faṛo uṭila, ar asta rait Allar gese dua ḳorla. ¹³Biani bala tan shagrid oḳolre ḍakia ḳandat anla, erar mazor baro zonre fosond ḳoria, tan ḳas sahabi banaila. ¹⁴Ou baro zon oila,

Saimon—Isae en noea nam dila Fitor,

Saimonor bai Andrias,

Iakub, Hannan,

Filif, Bortolmoe,

¹⁵Moti, Tumas,

Alfir fua Iakub,

muktizudda Saimon,

¹⁶Iakubor fua Ihuda,

ar Ihuda Iskariat—ou Ihudae bade beimani ḳorsil.

Faṛor feṭo Hozrot Isar talim

¹⁷Ermaze Isae tan sahabi oḳolre loia ufre taki lamia faṛor feṭo homan eḳ zagat aia ubaila. Hino tan bout ummot dola oisla, Zeruzalem ṭaun ar Ehudia zila taki, doriar faror Shur ar Sidon elaḳa takio dol bandi bandi manush aisla. ¹⁸Tara tan boean hunar kiale ar bemar taki shifa oar niote aila. Ar zarar ufre zinor asor asil, tarao bala oila. ¹⁹Hoḳol mansheu tanre at dia soito sailo, ḳaron tan bitor taki kudroti shokti baronie, era hoḳolor bemar ḳomsil.

²⁰Teu Isae afon shagrid oḳolor bae saia ḳoila,

“Tumra zera gorib tumrau ḳofali,

Allar bashshai to tumrar lagiu.

²¹Tumra zoto zonor feṭo buk ase,

tumrau ḳofali,

tumra feṭ boria ḳaibae.

Tumra zera ḳandirae tumrau ḳofali,

bade to ashibae.

²²“Tumrau ḳofali, zebla Bin-Adomor dae manshe tumrare ginnae, gau taki basia ekgori ḳore, bodnam gae, ar tumrar nam hunle mukor tu falae. ²³Ila ḳorle tumra kushi oio, furtie nasio, ḳaron behesto tumra bout boṛo puruskar faibae. Zano ni, ou naforman oḳolor baf-dadainteo Allar nobi oḳolor ufre ola zulum ḳorta.

²⁴“Haere doni oḳol,

tumrar shuk to duniatu ḳamailirae.

²⁵Haere feṭ boria ḳaura oḳol,

tumrao buke soṭfoṭ ḳorbae.

Haere hae zera oḳon ashirae,

tumra ḳanda-ḳaṭi ar ahazari ḳorbae.

²⁶Haere hae, manshe zebla tumrar shunam gae,

zano ni, ota manshor baf-dadainteo

agor amolor bonḍo nobi oḳolor

ola shunam gaito.

²⁷“Tumra zotozon amar torikae soltae sao, ami tumrare ḳoiram, tumra zarzir dushmonreo mohobbot ḳorio. Zera tumrare ginnae, tumra tarar balai ḳorio. ²⁸Zera tumrar lagi lannot mange, tumra tarar lagi rohomot saio. Ar zera tumrar bodnam ḳore, tumra tarar lagi dua ḳorio. ²⁹Ze tumar eḳ galo soṛ mare, tare aroḳ gal fatia dio. Ze tumar saddor ḳaṛia nito sae, tare kurtao kulia dio. ³⁰Zara tumar gese sae, tarare dio. Ḳeu tumar kunu siz nilegi, tar gese ar firot saio na. ³¹Huno, tumra manshor ges taki zelaḳan bebohar faitae sao, tumrao hoḳolor loge ou laḳan bebohar ḳoro.

³²“Zara tumrare maea ḳore, tumra zudi ḳali tarareu maea ḳoro, te tumra bahba faitae kila? Ila to naforman oḳoleo eḳe-oinnore maea ḳore. ³³Ar zara tumrar balai ḳore, tumra zudi ḳali tarar balai ḳoro, te bahba faibae kila? Naforman oḳoleo to ila ḳore. ³⁴Ze manshor ges taki tumra ḳorzo faibar asha ase, tumra zudi ḳali tareu ḳorzo deo, te kila bahba faibae? Naforman oḳoleo eḳe-oinnore ila ḳorzo dey, he asha ḳore bifodo foṛle he-o hon taki ḳorzo faibo. ³⁵Te ami tumrare ḳoiram, tumra zarzir dushmonreo maea ḳorio, tarar balai ḳorio. Bodla faoar asha na ḳoria ḳorzo dio, teu tumrar lagi boṛo boḳshish ase. Tumra Alla Pakor aolad bonbae. Tain to nimoḳ-haram ar ḳaraf manshoreo doya ḳoroin. ³⁶Tumrar niraḳar baf zela doyal, tumrao olan doyal o.

³⁷“Manshor bisar ḳorio na, teu tumrao bisaror daṛo foṛtae nae. Ḳeurore dushi shaibosto ḳorio na, teu tumrao dushi oitae nae. Maf ḳoria dio, teu tumrao mafi faibae. ³⁸Dan-ḳoerat deo, teu tumrareo deoa oibo. Manshe zatai zatai boria ania tumrar gaṭit bandia diba. Tumra zela mafia dibae, tumrar lagio ola mafa oibo.”

³⁹Bade Isae tarare ou kichcha hunaila, “Eḳ andae kunu aroḳ andare fot deḳaito fare ni? Te duiozonu gato foṛto nae ni? ⁴⁰Shagrid ustad taki boṛo nae, oile ze shagride furafur talim loe, he-o ustador laḳan bonizae. ⁴¹Tumar bair sokut guṛa hamaise oḳanu deḳrae, oile nizor souko gasor seli ase ita deḳrae na? ⁴²Tumar sokut seli hamaise ikan na saia tumar baire kila ḳoibae, baisab, tumar souko ze guṛa foṛse, ao, ogu bar ḳoria dei. Tumar nizor sokur seliu to deḳrae na. O bonḍo, foela tumar nizor souk taki seli horao, teu bair souk taki guṛa bar ḳorat lagle bala ḳori deḳtae farbae. ⁴³Bala gase to mondo fol dore na, ar mondo gase bala fol dore na. ⁴⁴Fol dekia gas sina zae. Manshe to rifuzi lot taki boṛoi faṛe na, ba sutra gas taki angur faṛe na. ⁴⁵Bala manshor dilor nek banḍar taki balai baroe, ar bod manshor bod dil taki bodu baroe. Manshor dilor banḍaro zeta zoma ase, ota takiu to zobanor buli baroe.

⁴⁶“Tumra ḳene amare ḳali huzur huzur ḳoirae, otoso ami zeta ḳoi, ita mano na? ⁴⁷Amar ḳandat aia amar boean hunia ze zone amol ḳore, he ḳar laḳan, ami tumrare ḳoiram. ⁴⁸He ou manshor laḳan, ze gor bananir niote goin ḳori maṭi kudia mozbut ḳori goror kuṭi banailo, bade boinna ailo ar fanir fute ou gorre ṭelilo, oile ikan loṛaito farlo na, ikan to mozbut ḳori banail. ⁴⁹Ar amar boean hunia ze zone amol na ḳore, he ou laḳan manush, zegie gat na kudia ḳali norom maṭir ufre gor banailo, bade banor futor dakkae tar gor foṛia bangia surmar oigelo.”

Bideshi subedaror gulamor shifa

¹Isae tan boean shesh ḳoria manshor ges taki bidae loia Kofornaum ṭauno gelagi. ²Hino Ruman sifair eḳ subedaror gulam bemar foṛia morar foti oigesil, subedar sabe i gulamre kub maea ḳorta. ³Tain Isar ḳobor hunia ḳoezon Ihudi murobbire Isar gese faṭaila, tan gulamgure bala ḳorta sufarishor lagi. ⁴Murobbi oḳol aia Isare minot-ḳajji ḳori ḳoila, “Sab, ze zone amrare afnar gese faṭaisoin tan gulamor lagi minot ḳortam, ein asholeo doya faoar laḳ. ⁵Tain bideshi oileo amrar Ihudi zatire kub maea ḳoroin. Amrar mosid ḳano tain banai disoin.”

⁶Isa tarar loge oia roana dila, tain subedaror baṛir ḳandat aiteu subedare nizor dust oḳolre faṭaia zanaila, “Huzure ar ḳoshṭo ḳoroin na zanu, afnar moto zone amar baṛit toshrif anra, ami to itar laḳ nae. ⁷Afnar samne ubanir zoiggo-o ami nae, erdae ami airam na. Te afne ḳali zobandi ḳoileu, amar gulamor bemar shifa oizibo. ⁸Afne to buzra, ami amar kamanḍaror hukume soli, oula amar sifai oḳolo amar hukume soloin. Ami era eḳzonre ao ḳoile ae, zao ḳoile zae, amar gulamre ou ḳam ḳoro ḳoile, he ḳore. Te afneo ola ḳali mukdi ḳoileu, hokkoltae manbo.”

⁹Ikan hunia Isa ekkere taijjub bonigela, dole dole zoto manush tan ḳore oia aoat asil, erar bae firia ḳoila, “Ami tumrare ḳoiram, i subedar to bidormi Ruman manush, oile amar Boni Israilor mazeo to oto mozbut imandar ami kunuḳano deḳsi na.” ¹⁰Hasau subedare zarare faṭaisla, tara goro aia deḳla, hi gulamor bemar ḳomigese.

Hozrot Isae murdare zinda ḳorla

¹¹Tuṛa ḳoe din bade Isae tan shagrid oḳol ar aro bout manush loia Naein namor eḳ gaut aila. ¹²Tain zebla hou gaut aia hamaira, ou shomoe manshe ḳoraro ḳori eḳ moiot loia zaira. I moiot asil eḳ ṛaṛi beṭir eḳmatro fua. Gaur bout manush ou ḳoraror loge asla. ¹³Ou ṛaṛi beṭire dekia Isar dilo doya hamailo, tain ḳoila, “Ogo, ḳandio na.” ¹⁴Ḳoia tain ḳoraror ḳandat gia ḳoraro soila, teu moiot boia neura beṭain ubai gela. Isae ḳoila, “O beṭa, ami ḳoiram, tumi uṭo.”

¹⁵Teu hi murda beṭa uṭia boigelo, boia mat-ḳota matilo. Isae tare tar maʼr ato shomzai dila. ¹⁶Ita dekia hoḳolor bitre ḍor hamaigelo. Tara ḳoila, “Subhan Alla, eḳzon mohan nobie amrar maze toshrif anchoin, Allae meherbani ḳoria tan bonda oḳolor bae souk firaisoin.”

¹⁷Isar ou keramotir ḳota asta Ehudia zilat ar ash-fash hokkol zagat mashur oigelo.

Hozrot Isar dorbaro Ehia nobir shagrid

¹⁸Ehia nobir shagrid oḳol gia ou hokkolta Ehiare zanaila. ¹⁹Ou Ehiae tan duizon shagridre Isar gese faṭaila. Tara aia Isare ḳoita, “Huzure ḳoisoin amra zania zaitam, zein toshrif anar ḳota, afneu hein ni? Na amra ar ḳeuror lagi bar saitam?” ²⁰Teu duio shagrid aia Isare ḳoila, “Ehia nobie amrare faṭaisoin, afnare zikaitam, zein toshrif anar ḳota, afneu hein ni? Na amra ar ḳeuror lagi bar saitam?”

²¹Ṭik ou shomoe Isae bout manshore bemar-azar ar zin-butor asor taki bala ḳorla. Bout andareo deḳar ḳemota dila. ²²Ota ḳoria harle Ehiar duio shagridre Isae ḳoila, “Tumra zaogi, tumra ono aia nizor souke zeta deḳlae ar hunlae, ota gia Ehiare zanao. Tanre ḳoio, andaeo souke deḳra, lengṛa oḳole aṭira, fosa-kushṭo bemari bala oira, ḳaluaeo hunra, murda manush zinda oira, ar gorib oḳolor geseo Allai kush-ḳobri toblig kora or. ²³Ar erau ḳofali manush, amar befare zerar dilo kunu bada na fae.”

²⁴Ehiar shagrid oḳol gia harle, Ehiar befare Isae manshore ḳoila, “Tumra morubumit kita deḳat geslae? Batashe loṛe-soṛe ota ḳagṛa-bon deḳat geslae ni? ²⁵Na, kita deḳat geslae? Shundor ḳafoṛ finno-o kunu manshore ni? Zera dami dami ḳafoṛ findia zak-zomok kore, ar shukirta din ḳaṭae, tara to razbaṛit taḳoin. ²⁶Te tumra kita deḳat geslae? Kunu nobire deḳat geslae ni? Oe, hasau ami tumrare ḳoiram, i Ehia to ḳali nobi nae, nobi takio boṛo zon. ²⁷Ein to hou zon, zen ḳota asmani kitabo leḳa ase,

Huno, tumar age beziar ami

amar fegambor,

ein gia ṭik-ṭak korba

tumar solar fot.

²⁸Te ami tumrare ḳoiram, asta duniar kunu Adomu Ehia taki boṛo nae. Oile Allar bashshair hoḳol taki huru zono, Ehia taki mohan.”

²⁹Shomazor hoḳol doronor am manshe ar gushkur ḳazna tulra oḳoleo Ehiar toblig hunla, tara toubar gusol ḳoria Alla Pakre hok-insafḳari hishabe manla. ³⁰Oile Forishi dolor manshe ar moulana oḳole Ehiar gese toubar gusol na ḳoria, tarar befare Alla Pakor ze kial asil, itare kunu dam dilo na.

³¹Teu Isae hirbar ḳoila, “Ḳo sain, oḳon i zomanar manshore ami kitar loge tulona ḳortam? Tara ḳar laḳan? ³²Tara to omon huruttar laḳan, zetae bazaro boia eḳe-oinnore ḍakia ḳoe,

Bashi to bazailam dust tumrar lagia,

tumra ḳeu nasilae na bashi hunia.

Mattomor zari-gan gailam amra shobe,

ḳandilae na tumra ḳeu mattomor shure.

³³Te Ehia nobi aia hari bat-ruṭi ar anguror shorbot na ḳaoae, tumra ḳoilae tanre bute dorilise. ³⁴Ar Bin-Adom aia ḳana-fina ḳorra dekia tumra ḳoirae, deḳrae ni, i beṭa to feṭua ar modkur. He gushkur ḳazna tulra ar naforman manshor loge dusti ḳore. ³⁵Ta-o aḳol ḳaṭaia zera sole, tarar sal-cholon takiu forman mile, aḳolu oilo ḳaṭi-nikut siz.”

Ḳobis beṭir guna maf

³⁶Forishi dolor eḳzon manshe Isare tan baṛit ḳanir daot dila, Isa ou baṛit gia ḳanit boila. ³⁷Oile ou gaut ek kobis beṭi asil. Isa ono daoto aisoin hunia hou ḳobis beṭie dami eḳ fattoror boeamo ḳori ator loia ono ailo. ³⁸Aia Isar fison galabae tan faor ḳandat ubaia, ḳandia soukor fanidi tan faor fata bizaililo. Bade tair matar suldi fao fusia dilo, faor maze hunga dite dite ator maḳailo.

³⁹Ita dekia Isare zein daot disla, ein mone mone ḳoila, “I beṭa kunu nobi oile to emneu buzlo one i beṭi ḳegu, igu ḳoto boṛo ḳobis gunagar beṭi.” ⁴⁰Isae tare ḳoila, “Saimon, tumar loge amar kisu ḳota ase.” Saimone ḳoila, “Ḳoukka huzur.”

⁴¹Isae tanre ḳoila, “Mone ḳoro, eḳ mazonor ges taki duizon manshe kisu ṭeḳa ḳoroz nisil, eḳzone fas-sho, aroḳzone foinchash dinar. ⁴²Tarar ḳeuroru takkot asil na i ṭeḳa firot deoa, teu mazone era duio zonre maf ḳori dilaila. Oḳon ḳo sain, era kun zone mazonre beshi bala faibo?” ⁴³Saimone ḳoila, “Amar mone ḳoe, zar beshi ṭeḳa maf deoa oise.” Isae ḳoila, “Tumi ṭiku ḳoiso.”

⁴⁴Teu Isae ou beṭir bae saia ḳoila, “Saimon, ou beṭigur bae kial ḳoro ar huno, ami tumar goro aia harle tumi to amare fao doaro fani diso na, oile tair soukor fanidi amar fao bizaia, matar suldi fusia dise. ⁴⁵Tumi to amar loge ainja ḳori doria hunga diso na, oile deḳrae ni ami tumar baṛit hamanir bad oneu tai amar faot hunga deoatu ase. ⁴⁶Tumi kunuzat tazim ḳori amare aguai ancho ni? Oile tai amar faot ator ḍalia tazim ḳorse. ⁴⁷Te ami tumare ḳoiram, tai beshi maea ḳorse ḳori buza zar, tai boṛo gunagar oileo gunar mafi faise. Zar tuṛa guna maf ḳora oe, he tuṛa maea ḳore.”

⁴⁸Bade Isae beṭire ḳoila, “Ogo, tumar tamam guna maf ḳora oise.” ⁴⁹Zara Isar loge ḳanit boisla tara mone mone ḳoila, “Ein ḳe, zein gunao maf ḳorilain?”

⁵⁰Isae hi beṭire ḳoila, “O beṭi, tumar imanor boleu tumi nazat failae, oḳon shanti oia baṛit zao.”

Hozrot Isar ḳezmoto beṭi manush

¹Bade Isae ou barozon sahabire loia gaue gaue, ṭaune ṭaune, guria Allar bashshair toblig korat roila. ²Tarar loge ḳoezon beṭino asla. Ou beṭin zinor asor ar bout zator bemar taki bala oia tan log dorsla, erar nam oilo, Mogdilini Moriom, en ges taki shatgu zin saṛail oisil, ³Raza Herudor uzir Kuzair bou Shuhana, Shushana ar aro bout beṭin asla. Ou beṭinte tarar nizor samana dia Isa ar tan shagrid oḳolor ḳoros-fati salaita.

Girosti ḳamor loge imanor tulona

⁴Bade zebla nanan zaga taki bout manush aia Isar gese dola oila, ou shomoe tain ek kichcha hunaila. ⁵Tain ḳoila, “Eḳ giroste danor zala bain deoat gelo. Gia bain deoar bala kisu zala ailor maze foṛigelo, manshe faodi uṛia i zala nosṭo ḳorillo, ar fakinteo aia ḳaililo. ⁶Girostor kisu zala hukna-shokto maṭir ufre foṛlo, itae ali oileo heshe rosh na faia hukaia morigelo. ⁷Kisu zala bon-zonglar maze foṛlo, i zalae ali fuṭleo itare bon-zonglae zatia dorlo. ⁸Oile kisu zala bala zomino foṛlo, i zalae bala dan oilo, ar eḳ-sho gun beshi dan dorlo.”

Ou kichcha ḳoiau tain zure zure ḳoila, “Zar ḳan ase, he hunouk.”

⁹Shagrid oḳole aroz ḳorla, “Huzur, i kichchar mani kita?” ¹⁰Tain ḳoila, “Allar bashshair gufon rohoisho zanar eḳtiar ḳali tumrare deoa oise, oile baki manshor gese to ita kichchar laḳan ḳoiram, zate tara dekiao na deḳe, huniao na buze.

¹¹“Te i kichchar mani oilo, i danor zala oilo Allar kalam. ¹²Ailor maze foṛa zaladi buzail oise, zera Allar kalam hune, bade Iblise aia tarar dil taki ita ḳaṛia neygi. Iblise sae na manshe iman ania nazat hasil ḳorouk. ¹³Ar hukna-shokto maṭir ufre foṛa zaladi buzail oise, zara i kalam besh kushi oia hune, oile kalame tarar dilo balamonte zoṛ ḳore na. Erdae i iman tuṛa ḳoedin ṭike, kunu forikkat foṛleu tarar iman kuailae. ¹⁴Bon-zonglat foṛa zaladi buzail oise, zera imanor daot hune, oile duniabi dandat foṛia don-samanar lalos, ar aram-aishor bae saia ita faurilae. Erdae tarar zindegit kunu bala fol dore na. ¹⁵Bala zomino foṛa zaladi buzail oise, zera hok ar sohi dile Allar kalam hune, hunia nizor dilo balamonte gatia raḳe, ar imane mozbut roia zindegit bala fol dore.

¹⁶“Kunu manshe lem zalaia hari sokir tole toe ni ba ṭukridi gurilae ni? Nichoe na, tara gasar ufre toe, zate goror bitre for deḳa zae. ¹⁷Te ila gaibi kuntau nai zeta zair oito nae. Ila lukailo kunta nai zeta ḳeu hunto nae ba zanto nae. ¹⁸Erdae tumra kila hunrae kial ḳorio, zar ase tare aro deoa oibo, ar zar nai, tar zeta ase bolia he mone ḳorer, otao neoa oizibo.”

Hozrot Isar ma-bai ḳe

¹⁹Ermaze Isar ma ar baiain tan gese aia azila, oile biṛor lagi tara ḳasat aita farla na. ²⁰Teu eḳzon manshe aia Isare ḳoila, “Afnar ma ar baiain afnar loge deḳa ḳorat aia bare ubai roisoin.” ²¹Isae zuaf dila, “Amar ma-bai to erau, zera Allar kalam hunoin ar amol ḳoroin.”

Hozrot Isae aoror tufan bond ḳorla

²²Eḳdin Isa ar tan sahabi oḳol gia nao-o uṭla, uṭia tain sahabi oḳolre ḳoila, “Ao, amra aoror hofaro zai.” Teu sahabi oḳole nao bashaila. ²³Nao soltir maze Isa gumai gela. Aḳtau aoror maze omon tufan ailo, tufane naot fani hamaia borizar, tara deḳla boṛo mosibot aise. ²⁴Sahabi oḳol Isar daro gia tane hozag koria ḳoila, “Huzur, huzur, amranu moriziram.” Isa uṭia fanir ḍeu ar batashre damki dila. Loge logeu ḍeu ar tufan tamia hoḳolta tir oigelo. ²⁵Isae tarare ḳoila, “Ou ota ni tumrar iman?” Tara ḍoraia taijjub oia eḳe-oinnore ḳoila, “Ein ashole ḳe, deḳrae ni batashe ar fanieo tan hukum mane?”

Zine dora bemarire bala ḳora

²⁶Isae tan sahabi oḳol loia Galil aor faroia Zerashini elaḳat gela. ²⁷Gia hari tain nao taki lamla, ou shomoe hou gaur zinor asor-ala eḳ beṭa tan gese ailo. Zinor fale asor ḳorae he bout din dori lemṭa, ar kunu baṛi-goro roito na, ḳali ḳobrostano roito. ²⁸Isare dekiau he sillaia uṭlo, tan samne foṛia zure zure ḳoilo, “O Allar ḳas maear zon, afne ḳene amar ino toshrif anla? Meherbani ḳori amare satain na zanu.”

²⁹Ikan ḳoar ḳaron oilo, Isae hi zinre hukum disla ou beṭare saṛia zaoar lagi. I zine tare bout din taki asor ḳorsil, beṭare ḍanḍa-beṛi ar shikoldi bandia raḳleo, he ita siṛilito, hou zine tare nirai zagat nitogi. ³⁰Isae tare zikaila, “Tor nam kita?” He ḳoilo, “Fouz fal” ḳaron tara bout zin eḳloge asil. ³¹Teu hi fouz fale Isare minot-ḳajji ḳoria ḳoila, tain zanu tarare roshatole na gaṛoin.

³²Hino faṛor eḳ galat boṛo eḳ shuoror fal asil. Fouz fale tanre minot ḳoria ḳoila, tarare hou shuoror bitre hamanir izazot dita. Tain izazot dila. ³³Ou tara hi beṭare saṛia shuoror bitre gia hamailo, ete shuoror fal faṛor ḍaledi douṛia gia aoror fanit buṛia morla.

³⁴Ita dekia shuoror raḳal oḳol douṛia gia ṭauno ar gaue gaue ḳobor dilo. ³⁵Ḳobor faia sairobae tone manush aila, aia deḳla, ze beṭar log taki fouz fal baroia gesoin, he furafur bala oia ḳafoṛ-sufoṛ findia Isar faor ḳandat boiroise. Dekia tara somki gela. ³⁶Ar ou goṭona goṭite zera deḳsil, tara hoḳol manshore hunaila, i beṭa kila bala oise. ³⁷Hunia Zerashini elaḳar hoḳol manush ḍoraigela. Ḍoror suṭe tara Isare minot-ḳajji ḳoria ḳoila, tain tarar ges taki toshrif nitagi. Teu Isa nao-o uṭia hirbar Galilo aila. ³⁸Oile ze beṭare zine dorsil, he aroz ḳorlo tan loge roibar lagi. Isae tare oḳan ḳoia baṛit faṭai dila, ³⁹ḳoila, “Tumi tumar baṛit zao, ar Allae tumar lagi ze kudroti ḳam ḳorsoin, ota gia ḳo.” Teu he gelogi, gia ṭaunor hoḳol manshore zanailo, Isae tar lagi oto boṛo ḳam ḳorsoin.

Eḳ mora fuṛi ar bemari beṭi

⁴⁰Isa Galilo aia harle hinor manshe kushi oia tanre ḳobul ḳorla, tara tan lagi bar saoat asil. ⁴¹Ou shomoe Zaeir name mosid komiṭir eḳ motolli aia Isar fao-o foṛia minot lagaila, huzurre tan baṛit nibar lagi. ⁴²Ḳaron tan eḳmatro fuṛi sorḳato asil, fuṛir boeosh baro bosor. Isa zebla ou baṛit zaibar lagi roana dila, manshe aia tan sairobae biṛ ḳoria ṭelaṭeli lagaila.

⁴³Biṛor maze eḳ beṭi manusho asla, ein baro bosor doria mashik bemari. Tan hoḳol don-samana ḍaktoror tole kuaiao bala oita farsoin na. ⁴⁴Tain Isar ḳoredi aia Isar saddoror kunat soar loge logeu tan bemar ḳomigelo. ⁴⁵Teu Isae zikaila, “Amare ḳe soilo?” Ḳeu shikar na ḳorae Fitor ar tan logor manshe Isare ḳoila, “Huzur, afnar sairobae ḳoto manshe ṭelaṭeli ḳoria afnar gat lager.” ⁴⁶Oile Isae ḳoila, “Ḳeu amare soise, ḳaron ami buzram, amar bitor taki gaibi bol baroise.” ⁴⁷Ou beṭie zebla deḳlo dora foṛigese, tai ḳafi ḳafi Isar samne aia tan fao-o foṛia hoḳolor samneu ḳoilo, ḳene tai Isare soisil ar kilan loge logeu bala oigese. ⁴⁸Isae beṭire ḳoila, “Mai go, tumi ekin ḳorso ḳori bala oiso. Oḳon shantie baṛit zao.”

⁴⁹Isae ota matira, omon shomoe mosidor motollir baṛi taki ḳobria aia tanre ḳoilo, “Sab, afnar fuṛi dunia taki gesoingi, te huzurre ar ḳoshṭo dibar ḳam nai.” ⁵⁰Ikan hunia Isae ḳoila, “Ḍoraio na, ḳali ekin ḳoro. Deḳbaene, tai bala oizibo.” ⁵¹Isa hou baṛit gela, gia Fitor, Hannan, Iakub ar fuṛir ma-baf saṛa oinno ḳeurore goror bitre hamaite dila na. ⁵²Hoḳole zebla fuṛir lagi ḳanda-ḳaṭi ar ahazari ḳorra, ou shomoe Isae ḳoila, “Ḳandio na-re, tai to morse na, gumar.” ⁵³Ikan hunia tara tanre siṛaila. Tara hoḳoleu zanto fuṛi morigese. ⁵⁴Teu Isae fuṛir ato dori ḍaḳ dila, “Mai go, uṭo.” ⁵⁵Loge logeu fuṛir zan firot ailo. Tai uṭia boigelo. Isae ḳoila, fuṛire kunta ḳaibar dita. ⁵⁶Fuṛir ma-baf ekkere taijjub bonigela. Bade Isae ḳoila, “Huno, ita ḳeurore hunaio na.”

Barozon sahabire tobligo faṭaila

¹Bade Isae hou barozon sahabire ekkano dola ḳorla, tarare hoḳol zator zin-but saṛani, bemarire bala ḳorar izazot ar ḳemota dila. ²Bade tain Allar bashshair toblig ar bemarintore shifa ḳorat erare faṭaila. ³Tain ḳoila, “Tumra fotor lagi laṭi, gaiṭ-buski, ḳani-kuraki, ṭeḳa-foesha, ba duiṭa kurtao loge nio na. ⁴Kunu gaut gele tumra ze baṛit hamaibae, ou baṛitu roio, ar on taki hirbar bidae oio. ⁵Manshe zudi tumrare zaga na dein, te hon taki baroibar age tumrar faor duil fusia falaio, ou duileu tarar bifokke shakki dibo.” ⁶Sahabi oḳol roana oia gaue gaue gia, Allar kush-ḳobri toblig ar bemarintore shifa ḳorat lagla.

⁷Raza Herude Isar ou ḳam-ḳazor ḳobor hunia kub gabṛi gela. Kunu kunu manshe tanre ḳoila, Ehia nobi hirbar zinda oia uṭi gesoin. ⁸Ar kunu kunu zone ḳoila, Ilias nobie doroshon disoin. Hirbar ḳeu ḳeu ḳoilo, furana zomanar kunu nobi zinda oia aisoin. ⁹Teu Herude ḳoila, “Ami nizeu to Ehiar mata ḳaṭaisi, te ou zeta hunram, ein ashole ḳe?” Erdae Herude Isare deḳar kial oilo.

Fas azar manshor gaibi ḳani

¹⁰Isae ze barozon sahabire tobligo faṭaisla, tara firia aila. Aia tanre zanaila, tobligi soforo kita kita ḳorsoin, ou tain erare loia kub niribili halote Baet-Soeda namor eḳ gaut gela. ¹¹Oile manshe i ḳobor hunia dole dole Isar ḳore oia roana dilaila. Tain erare kushi mone ḳobul ḳorla. Tarar gese Allar bashshair boeani toblig korla, ar zeta bemarir bemar shifa oa zorur asil, tain erare shifa ḳorla.

¹²Hainjabala hou barozon sahabi aia Isare ḳoila, “Huzur, amra ze zagat asi, ikan kub niribili zaga. Te ota manshore bidae dilaukka, tara daro ḳasor gaut gia raitkur taḳa-ḳaoar bebosta ḳorouk.” ¹³Isae zuaf dila, “Tumra tarare ḳana ḳaoao.” Tara ḳoila, “Amrar gese to ḳali fasḳan ruṭi, duiṭa biran mas ase, ar kunta nai. Te amra bazaro gia erar lagi ḳana loia antam ni?” ¹⁴Isae ḳoila, “Erare foinchash-zon, foinchash-zon ḳori boai deo.” Ino ḳali beṭa manushu asla fas azaror laḳan. ¹⁵Teu sahabi oḳole tarare boaila. ¹⁶Isae ou fasḳan ruṭi ar duio mas loia asmanor bae saia Allar shukria adae ḳorla. Bade ruṭi ar mas ṭukra ṭukra ḳori bangia, sahabi oḳolor ato dia ḳoila baṭia dilaita. ¹⁷Ou ḳanae hoḳol manshe feṭ boria ḳaila. Ḳaia harle zeta guṛa-gaṛa roisil ota dola ḳorle baro ṭukri borigelo.

Hozrot Isar moutor agam ḳobor

¹⁸Eḳdin Isa eḳ nirai zagat dua ḳorat boila, ḳali sahabi oḳol tan loge asla. Tain erare zikaila, “Ḳo sain, manshe kita mono ḳoroin, ami ḳe?” ¹⁹Tara zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi, ar ḳeu ḳeu ḳoe bout agor zomanar kunu nobi hirbar zinda oia uṭisoin.” ²⁰Isae erare zikaila, “Oile tumra kita mono ḳoro, ami ḳe?” Sahabi Fitore ḳoila, “Afneu Allar oada ḳora hou al-Mosi.” ²¹Isae tarare ḳoila, “Ḳobordar! Ita ar ḳeurore hunaio na.”

²²Bade tain ḳoila, “Ami Bin-Adome bout ḳoshṭo shoijjo ḳora lagbo. Shomazor murobbi oḳole, boṛo imam, ar moulana oḳole amare ela ḳorba. Amare ḳatol ḳora oibo, oile moutor tin dinor din amar hirbar zinda oia uṭa zorur.”

²³Tain era hoḳolre ḳoila, “Amar torikae ḳeu zindegi ḳaṭaite saile, he tar nizor kushie sola bad deuk. Tar afon duk-koshṭor solib forteḳ din boia loia amar ḳore ḳore auk. ²⁴Ze manshe nizor zan basaito sae, he tar hasaror zindegi kuaibo. Oile ze zone amar lagi nizor zan kurbani dey, he hasaror zindegi faibo. ²⁵Kunu manush zudi asta duniar malik boniao tar hasaror zindegi mani aḳer kuailae, te tar kunu faeda oilo ni? ²⁶Hunoukka, ḳeu zudi amar lagi ba amar talimor lagia muk lukae, te ami Bin-Adom zebla amar nizor, fobitro firista oḳolor ar gaibi bafor shan-tozollie duniat hirbar aimu, ou shomoe amio erare deḳle muk lukaimu. ²⁷Ami tumrare hasa ḳota ḳoiram, ou mozliso oula ḳoezon manush azir asoin, Allar bashshai na dekia erar mout oito nae.”

Hozrot Isar nurani surot

²⁸Ou talimor eḳod hafta bade, Isa dua ḳorar lagi tan sahabi Fitor, Hannan, ar Iakubre loia eḳ ṭillar ufre uṭla. ²⁹Tain dua ḳorra omon shomoe aḳtau tan mukor rong bodligelo, tan finnor ḳafoṛ-sufoṛ dola soḳ-soḳa oigelo. ³⁰Ou shomoe deḳa gelo, duizon manshe aia tan loge batchit ḳorra, erar eḳzon oila Musa nobi, dusra zon Ilias nobi. ³¹Tara Allai zalal ar shane deḳa dila. Zeruzalem soforor ḳalo Isa zen Allar morzi mafik moutor mukamuki oira, ou befareu tara batchit ḳorla.

³²Sahabi Fitor ar tan logor oḳol be-malum gumo asla. Aḳtau gum bangi zaoae tara Isar zalal-shan deḳla, ar tan ḳandat uba ou duio zonreo deḳla. ³³Hou duiozon zebla Isar ges taki roana dilaira, ou shomoe Fitore ḳoila, “Huzur, amra-o to ono asi, kub bala oise, te ek kam ḳorilai, amra ono tinḳan ḍera-gor banailai, ekkan afnar, ekkan Ilias nobi, ar ekkan Musa nobir lagi.” Fitore zen kita ḳoira, ita tain nizeu buzla na.

³⁴Fitore ota matira, ou shomoe aḳtau megor ḳalni aia tarare gurililo. Tara ḳalnir aoṛe hamanir bade sahabi oḳol ḍoraigela. ³⁵Ar ḳalnir bitor taki ou aoaz ailo, “Einu amar ḳas maear zon, tumra en ḳota mano.”

³⁶I aoazor badeu deḳa gelo, Isa hono eḳla ubai roisoin. Sahabi oḳol nirai oigela, tara zeta deḳsila ou shomoe ita ar ḳeurore hunaila na.

Zinor asor-ala fua

³⁷Bador din Isa ar sahabi oḳol faṛor ṭilla taki lamia aile, bout manush tan loge deḳa ḳorat aia biṛ bandilla. ³⁸Ou biṛor mazor eḳzone sillaia ḳoilo, “Huzur, amar fuagur bae kial ḳoroukka, ogu amar eḳmatro aolad. ³⁹Tare eḳṭa zine dore, igie tare saṛto sae na, he aḳtau sik dia uṭe ar maṭit foṛia saṭiae. Tar mukedi fena baroe, heshe tare asaṛia ad-mora ḳori falai toia zae. ⁴⁰Ami afnar sahabi oḳolor gese minot-ḳajji ḳorslam ogutare ḳedaibar lagi, oile tara farsoin na.”

⁴¹Isae ḳoila, “O beiman ar naformanor zat, ami ar ḳotodin tumrar loge roimu, tumrar satani shoijjo ḳormu? Deki sain, tumar fuare ono ano.” ⁴²Beṭae fuare loia aguar, ou shomoe zinnate tare maṭit falaia zatia dorlo, he hutia saṭiani lagailo. Teu Isae zinnatre damki dila, tain ou fuare bala ḳoria tar bafor ato shomzai dila. ⁴³Allar kudroti lila-ḳela dekia hoḳol manush taijjub oigela.

Dusrabar tan moutor agam ḳobor

Isar keramoti ḳam-ḳaz dekia hokkole taijjub bonia sinta ḳorra, ou shomoe tain sahabi oḳolre ḳoila, ⁴⁴“Amar ḳota ḳanain tumra mon dia huno, ami Bin-Adomre to manshor ato dorai deoa oibo.” ⁴⁵Sahabi oḳole i mator kunu mani buzla na. Allae tarar gese ikan gaib raḳla, zate tara na buzoin. Ar ou befare Isareo kunta zikaite tarar shaosh oilo na.

Boṛo ḳe?

⁴⁶Sahabi oḳolor maze ḳe hoḳol taki boṛo, ota loia tara torka-torki ḳorra, ⁴⁷ermaze Isae tarar dilor bab buzilila. Tain eḳ nabalik huruttare ḳandat ania ḳoila, ⁴⁸“Ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore. Ar amare ze ḳobul ḳore, he ḳali amare nae, amare zein bezisoin tanreo ḳobul ḳorlo. Tumrar maze ze zon hoḳol taki huru, he-u hoḳol taki boṛo.”

⁴⁹Bade sahabi Hannane ḳoila, “Huzur, amra deḳlam afnar nam loia eḳzone but saṛar. Dekia amra tare mana ḳorsi, he to amrar torikar nae.” ⁵⁰Isae tanre ḳoila, “Ar mana ḳorio na, ze tumrar bifokke nae, he to fokkeu ase.”

Zeruzalem zaoar fote Hozrot Isa (9:51–19:27)

Hozrot Isa Zeruzalemor bae roana

⁵¹Isae behesto toshrif nibar din gonaia ailo, ou tain Zeruzalemo zaita ḳori niot ḳorla. ⁵²Tan age oia ḳobria oḳol faṭaila. Tara age gia hoḳolta zuit-zait ḳorar kiale Shomoria zatir eḳ gaut gia hamaila. ⁵³Oile hi gaur manshe zebla hunla, Isa Zeruzalem zaita, hunia tara tanre ashroe dilo na. ⁵⁴Erdae tan sahabi Iakub ar Hannane ḳoila, “Huzur, Ilias nobir laḳan amra-o oḳon aroz ḳortam ni, asmani aguin lamia otare binash ḳorilauk?” ⁵⁵Isae tarar bae firia damki dia ḳoila, “Tumra zano na ni tumra kun laḳan ruhur goṛa? Amare kunu beza oise ni manshor binash ḳortam? Amare to beza oise manshor zan basaitam.” ⁵⁶Oḳan ḳoia era aroḳ gaut gelagi.

⁵⁷Tara zebla fotedi zaira, ou shomoe eḳ beṭa aia Isare ḳoilo, “Sab, afne zeḳano zaiba, amio afnar loge hono zaimu.” ⁵⁸Isae tare ḳoila, “Babare, hialor gat ase, fakintor bada ase, oile ami Bin-Adomor mata guzar kunu ṭai nai.” ⁵⁹Bade Isae aroḳzonre deḳla, dekia tare ḳoila, “Oba, amar loge solo.” He zuaf dilo, “Huzur, amar bafor moutor bade tanre maṭi dia harle ami aimu.” ⁶⁰Isae tare ḳoila, “Mora oḳole tarar morare maṭi deuk, tumi aia Allar bashshair daot deo.” ⁶¹Aro eḳzone ḳoilo, “Huzur, ami afnar loge zaimu, te amar baṛit gia bidae loia ai.” ⁶²Isae tare ḳoila, “Langolor kuṭit doria zegue ḳoredi firia sae, he Allar bashshair laḳ nae.”

Shottoirzon shagridre tobligo faṭaila

¹Bade Hozrot Isae aro shottoirzon shagridre tobligo faṭaita ḳori fosond ḳorla. Tain nize zeta ṭaun ba gauainto zaoar irada ḳorsila, hono zaibar age erare duizon duizon ḳoria faṭaila.

²Faṭanir bala erare ḳoila, “Huno, zomino to foshol bout ase, oile ḳamla kub ḳom. Erlagi zominor malikor gese dua ḳoro, tan foshol tular lagi tain ḳamla faṭaiba. ³Tumra oḳon roana oizao. Kial rakio, bagor falor maze meṛa-baichchar laḳan ami tumrare faṭailam. ⁴Tumra zaoar ḳalo ṭeḳar toli, gaiṭ-buski, faor zuta ita kuntau loge nio na, ar fotor maze ḳeurore salamo ḳorio na. ⁵Ze baṛit gia hamaibae, hamaiau ḳoio, assalamu alaikum. ⁶Salam loar zuka ḳeu hino taḳle, tumrar salam tar ufre bortibo, ar ila ḳeu na taḳle, tumrar salam tumrar gese-u firot aibo. ⁷Foela ze baṛit hamaibae, hou baṛitu roio. I baṛi saṛia dusra baṛit zaio na. Tara zeta dein ota ḳaio, ḳaron ḳamlae tar beton faoar zoiggo.

⁸“Zebla kunu gaut zaibae, hinor manshe tumrare ḳobul ḳoria, tara zeta ḳaite dein, otau ḳaio. ⁹Tarar bemari oḳolor bemar bala ḳorio. Tarare ḳoio, Allar bashshai to tumrar daro aichche. ¹⁰Oile kunu gaut gele honor manshe zudi tumrare ḳobul na ḳoroin, te gaut aṭi aṭi oḳan ḳoio, ¹¹Hoba, tumrar gaur ze duil amrar faot lagse, ita amra fusia falai diram, ou duileu tumrar bifokke shakki dibo. Oile mono rakio, Allar bashshai ḳandat aichche. ¹²Ami tumrare ḳoiram, kiamotor din lannoti Sadum ṭaunor dosha taki, hi gaur dosha aro ḳoṭin oibo.

¹³“Haere Baet-Soeda ar Kurasin gau, tumra to lannoti. Tumrar maze zeta kudroti ḳam deḳail oise, ita Shur ar Sidon elaḳat deḳail oile, tara ḳator oia touba ḳorlo one. ¹⁴Ashole kiamotor din Shur ar Sidon elaḳar dosha takio, tumrar dosha bout ḳoṭin oibo. ¹⁵Ar O Kofornaum ṭaun, tumi bule usa oia asmano gia lagtae? Na, fartae nae! Tumare fatalo lamail oibo.

¹⁶“Tumra mono rakio, zera tumrar ḳota mane, tara ashole amar ḳotau mane. Ar zera tumrare mane na, tara amareo mane na. Zera amare mane na, tara ashole hou Allareo mane na, zein amare bezisoin.”

¹⁷Bade hi shottoirzon shagride toblig koria kub kush mizaze firot aila. Aia ḳoila, “Huzur, afnar nam hunle zin-buteo amrar ḳota mane.” ¹⁸Isae tarare ḳoila, “Huno, ami deḳsi, Iblis-shoetan megor zilkir laḳan behest taki foṛizar. ¹⁹Te ami tumrare haf-bichur ufredi aṭar ḳemota disi, ar tumrar dushmon, Iblisor hoḳol shoktir ufre tumrare ḳemota disi. Kunuzat kuntaeu tumrar ḳeti ḳorto farto nae. ²⁰Ar zin-bute tumrar ḳota huner dekia kushi na oia, borong behesti ḳatat tumrar nam leḳa oise ḳoriu kushi ḳoro.”

²¹Ou shomoe Isao Pak Ruhur bole kushi oia ḳoila, “O gaibi baba, tumiu to asman-zominor malik. Ami tumar shukria adae ḳorram, ḳaron tumi aḳoldar-buddiman oḳolor gese ita zair na ḳoria, bebuz-huruttar laḳan manshor gese zair ḳorso. Baba, ashole to ita hoḳolta-u tumar morzi. ²²Amar gaibi babae hoḳolta-u amar ato shofi disoin. Baf saṛa dusra ḳeu zane na ou fut ḳe, ar fut saṛa dusra ḳeu zane na ou baf ḳe. Fute bafore zar gese zair ḳorar kial oe, ḳali he-u bafor forisoe fae.”

²³Bade tain shagrid oḳolor bae firia ḳane ḳane ḳoila, “Tumra zeta zeta deḳso, ita deḳar shuzug zar oe, he-u nek kofali. ²⁴Ami tumrare ḳoiram, tumra zeta deḳrae, ita bout nobie ar raza-bashshae deḳar asha ḳorleo, deḳar ḳofal oise na. Tumra zeta hunrae, ita tara hunte saileo hunar ḳofal oise na.”

Hoḳol taki boṛo hukum

²⁵Eḳbar eḳ alim sab Isar gese aila. Aia tanre forikka ḳorar lagi zikaila, “Huzur, kita ḳam ḳorle ami behest faimu?” ²⁶Isae ḳoila, “Musa nobir kitabo kita leḳa ase? Afne kita faisoin?” ²⁷Alime zuaf dila, “Leḳa ase,

Tumi tumar asta dil dia, zan dia,

hoḳol bol-shokti dia,

tumar shullo-ana mon dia,

tumar Mabud Allare mohobbot ḳorbae.

ar,

Tumar ari-forire nizor laḳan maea ḳorbae.”

²⁸Isae tanre ḳoila, “Afne ṭik kota ḳoisoin. Te afneo oula ḳoroukka, teu behest faiba.”

²⁹Ou alime nizor dam baṛanir lagi Isare ḳoila, “Aichcha, te amar ari-fori ḳe?”

³⁰Isae ḳoila, “Hunoukka, eḳzon manush Zeruzalem taki Ziriho ṭauno zaoat asil. Foto ḍaḳaite faia tar ḳafoṛ-sufoṛ hoḳolta ḳaṛia nia, tare maria ad-mora ḳori falai toia gelogi. ³¹Bade eḳ imam-sab ou fotedi zaira, tain ou beṭare dekia galabae horia gelagi. ³²Ou laḳan Lebir ḳandanor ek kadim-sabo ou fotedi aila, taino ere dekia galabae gelagi. ³³Heshe Shomoria zatir eḳ beṭa ou fotedi ailo, he bidormi zatir oileo er halot dekia tar dilo dorod hamailo. ³⁴Ou he er zoḳomor ufre tel ar anguror rosh malish ḳoria foṭṭi bandia dilo. Bade tar nizor gadar ufre tulia, eḳ musafir ḳanat nia tar zoton ḳorlo. ³⁵Bador din ou Shomorio beṭae musafir ḳanar malikor ato duiṭa dinar dia ḳoilo, ou manushgur zoton ḳorba. Er beshi ḳoros oileo, ami aia dimu.

³⁶“Te alim sab, afnar kita mono oe, ou tinzonor maze kun zon, ḍaḳaitor ato fiṭa ḳaura beṭar ari-fori?” ³⁷Alime ḳoila, “Ze manshe tare dorod ḳorlo he-u to.” Teu Isae ḳoila, “Te afneo gia oula ḳoroukka.”

Bibi Marta ar tan boin

³⁸Bade Isa ar tan sahabi oḳol aṭi aṭi eḳ gaut gela. Hou gaur eḳ beṭi manshe kushi oia Isare tan baṛit nia memandari ḳorla. Ou beṭir nam Marta. ³⁹Beṭir eḳ boinor nam oilo Moriom, ein huzuror faor ḳandat boia nosiot hunra. ⁴⁰Ar Marta gia randa-baṛa ar ḳatir-zoton ḳorat fereshanit roila. Ermaze Marta aia huzur Isare ḳoila, “Huzur, deḳra ni amar boine hokkol ḳam-ḳaz eḳla amar ufre toia ono aise? Te afne ḳoukka, amare shaijjo ḳorto.” ⁴¹Huzure ḳoila, “Marta, tumi bout befare sinta ḳoria fereshan oigeso. ⁴²Huno, ashole eḳṭa befaru ḳali zorur ase. Tumar boin Moriome hou zoruri befarre fosond ḳorse. Ita to tair ges taki ḳaṛia neoa zaito nae.”

Dua ḳorar kaeda-ḳanun

¹Eḳdin huzur Isae kunu eḳ zagat dua ḳorat asla. Dua shesh oia harle tan eḳ sahabie ḳoila, “Huzur, Ehia nobie to tan sahabire dua ḳora hikaita, te afneo amrare dua ḳora hikaukka.” ²Isae erare ḳoila, “Dua ḳorar shomoe tumra oula ḳoio,

O asmani baba, tumar nam fobitro ḳoia mana ouk,

duniat tumar bashshai ḳaim ouk.

³Amrar forteḳ dinor rizek fortidin zugai dio;

⁴Baba, amrar tamam gunare maf ḳoria dilao,

zela amra-o mafi dilaisi amrar oforadi oḳolre;

ar forikka taki hefazot ḳoro amrare.”

⁵Bade Isae tarare ḳoila, “Dorilao, ada raitkur bala tumrar kunu dustor baṛit gia ḳoilae, dust, amare tinḳan ruṭi ḳoroz deo. ⁶Amar eḳ bondu fotedi zaoar bala aḳtau amar baṛit uṭsoin. Oḳon tane kita ḳaoaitam, amar goro to kunta nai. ⁷Teu duste goro tone zuaf dila, ami dorza bond ḳoria amar huruttain loia hutiroisi, amare ḳoshṭo dio na. Oḳon uṭia kunta ditam fartam nae. ⁸Oile ami ḳoiram, ou duste uṭia bondu hishabe kunta dite na saileo, tumi bar bar minot ḳorle he uṭbou. Uṭia tumi zeta sairae, ita ṭiku dibo.

⁹“Te ami tumrare ḳoiram, tumra sao, teu deoa oibo. Talash ḳoro, teu faibae. Duaro ṭuka deo, tumrar lagi duar kula oibo. ¹⁰Zara sae, tarau to fae. Ze tallash ḳore he fae. Ze duaro ṭuka dey, tar lagi duar kula oe. ¹¹Tumrar maze ila kunu baf ase ni, zar fute ruṭi saile tare maṭi dibo, mas saile haf dibo, ¹²ba enḍa saile bisa dibo? ¹³Te tumra naforman oia-o zudi tumrar huruttainre bala bala siz ditae zano, te zara behesti bafor gese saibo, tain nichoe tarare Pak Ruh dan ḳorbau.”

Hozrot Isae kun bole keramoti deḳain

¹⁴Eḳdin eḳ beṭar log takia Isae eḳ buba zinnat saṛaila. Zinnate saṛar bade hi beṭar zoban kuligelo, mat-ḳota matilo. Ita dekia manush taijjub bonigela. ¹⁵Oile kunu kunu manshe ḳoilo, “I beṭae zinor bashsha Bel-Sobulor bole zin saṛae.” ¹⁶Aro ḳoieḳ zone tanre forikka ḳorar niote, tan ator kunu keramoti deḳto sailo. ¹⁷Isae tarar dilor bab buzilila. Buzia ḳoila, “Kunu raijjo nize nize bag oigele, i raijjo binash oizae. Oula kunu foribaro zebla bibad lagizae, i foribaro ar ṭike na. ¹⁸Te zinnat zudi tar nizor bifokke lagizae, taile tar raijjo ḳemne ṭikbo? Tumra to ḳoirae, ami Bel-Sobulor bole zinnat saṛai. ¹⁹Kub bala ḳota, ami zudi Bel-Sobulor bole zinnat saṛai, te tumrar manshe kitadi saṛae? Tumrar mator bisar tumrar mansheu ḳorbo. ²⁰Oile ami zudi Allai kudrote zinnat saṛai, te to Allar bashshai tumrar nozdik aichche.

²¹“Huno, kunu bolala manshe ostro-shostro loia tar baṛi fahara dile, tar samana nirafod taḳe. ²²Oile tar taki zobordost aroḳzon aia hamla ḳoria tare arailile, he zeta ostro-shostror boṛai ḳorsil, i ostro-o ḳaṛia nibogi. Tar hoḳol mal-samanao luṭia nia baṭilibo.

²³“Te ze zon amar fokke nae, he to amar bifokko. Ze amar oia ḳam na ḳore, he to amar birudde ḳam ḳore.

²⁴“Kunu zine zebla eḳ bemarir log saṛia zaegi, gia boshot ḳorar lagi morubumit gura-guri ḳore. Bade kunuḳano roibar zaga na faia mone mone ḳoe, Dur! Ami zen taki aisi onou hirbar zaigi. ²⁵Firot aia hari deḳe, hi zaga shundor ḳori hazai-faṛai toa. ²⁶Ou he gia tar taki aro bod shatgu zin loge ḳori ane. Ania ono hamaia basha banae. Erdae ou bemarir dosha foela taki heshe aro ḳaraf oe.”

²⁷Isae ota boean ḳorra, aḳtau biṛor maz taki eḳ beṭie zure zure ḳoilo, “Huzur, ze maʼe afnare feṭo loisoin ar dud ḳaoaisoin, ein boṛo ḳofali ma.” ²⁸Isae ḳoila, “Ikan hasa ḳota, oile er saiteo boṛo ḳofali tara, zara Allar kalam hune, hunia ola amol ḳore.”

Hozrot Iunus nobir alamot

²⁹Bade aro bout manush Hozrot Isar gese aila. Tain erare ḳoila, “I zomanar manush to naforman. Tara ḳali keramoti tukae, oile Iunus nobir alamot saṛa dusra kunu keramoti tarare deḳail oito nae. ³⁰Iunus nobi nize nizeu zela Ninob ṭaunor manshor gese eḳ alamot oisla, Bin-Adomo oula i zomanar manshor gese nizeu alamot oiba. ³¹Ruz kiamotor din douknor deshor rani uṭia ou zomanar manshor dush zair ḳorba. Ḳaron Bashsha Sulaimanor aḳolor ḳota hunar niote tain duniar hesh mata taki aisla. Oile oḳon to Sulaiman takio aro mohan eḳzon ono asoin. ³²Kiamotor din Ninob ṭaunor murda oḳol uṭia i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus takio aro mohan eḳzon ino asoin, ta-o manshe touba ḳorer na.

Souk bala zar, dil bala tar

³³“Kunu manshe to lem zalaia hari sokir tole ba ṭukrir tole toe na, borong gasar ufreu toe, zate goror manshe for deḳe. ³⁴Tumar souku oilo tumar ḳaear batti. Souk zudi bala oe, te tumar asta shorilo for oibo. Ar souk karaf oile, tumar shorilo andarit roibo. ³⁵Te kial rakio, tumar dilo ze nur ase, ita andair oizar ki na? ³⁶Tumar asta shorilo zudi for taḳe, kunu ongo andair na taḳe, te leme zela tar nizor teze tumare for dey, oula i nureo tumar asta shorilre for ḳorilibo.”

Dilre fak-fakiza raḳa zorur

³⁷Isae boean ḳorra ou shomoe Forishi dolor eḳzone tanre ḳaibar daot dila. Tain gia en goror bitre ḳanit boila. ³⁸Forishie deḳla, ḳaoat boibar ḳalo Isae Ihudi niom mafik at doisoin na, ou tain taijjub bonigela.

³⁹Teu Isae tanre ḳoila, “Hunoukka, afnara Forishi oḳole to bashon-bortonor bair gala kub shundor ḳoroin, oile afnarar bitre to naformani ar lalose bora. ⁴⁰O be-aḳolor dol, zein bargala banaisoin, tainu kita bitor galao banaisoin na ni? ⁴¹Erlagi afnarar bitre zeta ase, ota age allar oaste lilla-sodga deukka. Teu deḳbane, afnarar hoḳolta-u pak-saf oizibo.

⁴²“Haere Forishi oḳol, lannot tumrare, tumra ḳali tejfata, fodina fata ar hokkol hag-torḳarir dosh baṭor eḳ baṭ Allar name zoḳat deo, oile Allar mohobbot ar hok insafor bae tumrar kunu kialu nai. Ashole ou foelata manar loge loge badortao amol ḳora forz. ⁴³O lannoti Forishi oḳol! Mosido hamaia samonor ḳataro boa, ar bazar-aṭo gia salam faite tumra kub fosond ḳoro. ⁴⁴Lannot tumrar ufre, tumra oilae o-sina ḳoeboror laḳan. Manshe na sinia er ufredi aṭa-fira ḳore.”

⁴⁵Ikan hunia eḳzon alime Isare ḳoila, “Huzur, oḳan ḳoia to afne amrareo beijjot ḳorra.” ⁴⁶Isae ḳoila, “Nichoe, afnarao lannoti, afnara manshor ḳando bar buzai ḳoria dein, oile tarar asanor lagi angulṭao laṛoin na.

⁴⁷“Haere lannoti oḳol, tumra nobi oḳolor rouzare shundor ḳoria pakka ḳoro, oile tumrar moe-murobbieu to erare ḳatol ḳorsla. ⁴⁸Ota dekiau buza zae, tumra tumrar moe-murobbir ḳamor shakki oirae, tumrao ola oirae. Tara nobi oḳolre ḳatol ḳorsil, ar tumra hou nobir rouzare pakka ḳorrae. ⁴⁹Erdae Alla Pakeo tan nizor morzie ḳoila, ami tarar gese amar nobi-rosul bezimu, erar ḳeurore tara zulum ḳorbo, ar ḳeurore ḳatol ḳorbo. ⁵⁰Ete duniar foela taki oḳon forzonto zoto nobire ḳatol ḳora oise, era hokkolor dayi oiba ou zomanar manush. ⁵¹Hunoukka, ami afnaintore ḳoiram, foela Adomor fut Habilor kun taki shuru ḳoria, nobi Zakariar kun forzonto hoḳol lour shaza ou zomanar manshor ges taki adae ḳora oibo. Nobi Zakariare to Zeruzalemor fobitro kaba shorifor kurbani ḳana, ar ḳas pak zagar mazḳano ḳatol ḳora oise. ⁵²Haere lannoti alim oḳol, tumra manshoreo Allar fot sinairae na, nizeo Allar bashshait hamairae na, ar zera hamaito sae, tarareo bada dirae.”

^53-54Boean bade Isa ikan taki roana dilaila. Teu alim ar Forishi oḳole mizaz gorom ḳoria Isare fando falaita ḳori kusai-faṛai matila. Nanan nomunar soal ḳoria tanre aṭḳanir shuzug tukaila.

Aḳerator saman ḳamai ḳoro

¹Ou shomoe azar azar manush dola oigela, tara ṭelaṭeli ḳori eḳe-oinnor ufre foṛla. Isae foela tan sahabi oḳolre ḳoila, “Tumra Forishi mozobor ḳamir taki hushiar roio, ou ḳamir oilo tarar bonḍami. ²Ṭik ou ḳamiror laḳan, ila lukail kuntau nai, zeta zair oito nae. Ila gufon kuntau nai, zeta zana zaito nae. ³Tumra andair goro zeta matiso, manshe ita foror maze hunbo. Goror bitre ḳane ḳane zeta ḳoiso, ita salor ufre roṭail oibo.

⁴“O amar dust oḳol, ami tumrare ḳoiar, zara ḳali shorilre binash ḳora saṛa ar kuntau ḳorto fare na, tarare ḍoraio na. ⁵Te ḳare ḍoraitae eoḳano ḳoiram, marar bade duzoḳo haranir ḳemotao zan ase, ḳali tanre-u ḍoraio. Ami hirbar ḳoiram, tumra ḳali taneu ḍoraio. ⁶Matro dui anae fasgu soṛa faki mile na ni? Allae to ou soṛar ḳotao fauroin na. ⁷Ar kita ḳoitam, tumrar matar sulor hishabo tan gese ase. Tumra ḍoraio na, bout soṛa faki toneo tumrar dam tan gese beshi.

⁸“Huno, ami tumrare ḳoiram, ze manshe shomazor samne amare ḳobul ḳore, ami Bin-Adomeo Allar firista oḳolor samne tare ḳobul ḳormu. ⁹Oile ze manshe shomazor samne amare oshikar ḳorbo, amio tare Allar firista oḳolor samne oshikar ḳormu. ¹⁰Ami Bin-Adomor birudde ḳeu kunta matileo mafi faibo. Oile ḳeu zudi Pak Ruhur birudde kufuri ḳore, te tar kunu mafi nai.

¹¹“Manshe zebla tumrare mosidor fainchaito, bisari oḳolor samne, ba tanat nibo, ou shomoe kita zuaf ditae ba kita ḳoitae, ita loia kunu sinta ḳorio na. ¹²Kita matitae ita Pak Ruhe tumrare hou shomoe batai diba.”

¹³Biṛor maz taki eḳzone Isare ḳoilo, “Huzur, afne amar baire ḳoukka, amar babae zeta don-samana toia gesoin, ota baṭ-baṭura ḳoria dita.” ¹⁴Isae tare ḳoila, “Oba, tumrar bisar ḳortam ar don-samana baṭitam, ita eḳtiar amare ḳegue dise?” ¹⁵Tain manshore ḳoila, “Ḳobordar! Hokkol nomunar lub-lalos tone nizore basao. Ḳaron don-samana baia geleo itae manshor zan basae na.” ¹⁶Bade Isae tarare ou kichcha hunaila, ḳoila, “Eḳ doni beṭar zomino bout dan folisil. ¹⁷Dan dekia he mone mone ḳoilo, oto dan oḳon kita ḳortam? Amar to toibaru zaga nai. ¹⁸Te ami ek kam ḳori, amar ugar bangia boṛo ḳori ḳoeṭa ugar banailai. Teu amar hoḳol dan ar mal-samana zaga oibo. ¹⁹Heshe amar zanre ḳoimu, O zan, bout bosoror mal-samana ar ḳani-kurakir lagi nisinta oigeso. Oḳon aram-ayeshe tumi ḳaia findia furti ḳoro. ²⁰Oile Allae tare ḳoila, ore be-aḳol, tor zan to aiz raitu ḳoboz ḳora oibo. Te tui zeta zomaisos, ita ḳegue ḳaibo?” ²¹Heshe Isae ḳoila, “Ze manshe ḳali duniabi don-samana dola ḳore, oile aḳeror don na zomae, tar halot oulau oe.”

²²Bade Isae tan shagrid oḳolre ḳoila, “Erdaeu ami tumrare ḳoiram, kita ḳaia bastam, ar kita finditam, ita loia tumra sinta ḳorio na. ²³Zan taki to ḳani boṛo nae, ar shoril taki ḳafoṛ boṛo nae. ²⁴Ou ḳauaguintor bae kial ḳoro, tara to ḳeto ḳore na, fosholo ḳaṭe na. Tarar ugaro nai, banḍaro nai. Allae tarar rizek zugaia dein. Te tumra to ou ḳaua taki bout dami. ²⁵Ḳo sain, tumrar maze ḳeu sinta-babna ḳoria tar haeati ekkan gonṭao baṛaito farbo ni? ²⁶Ar ou huru ḳamḳanu zebla faro na, te ḳene baṛti sinta ḳoro?

²⁷“Tumra ou zongli fulor bae sao, ita ḳoto shundor? Itae to nizor shundoror lagi kuntau ḳore na, kunu rong silaio ḳore na, baino ḳore na, emneu oe. Te ami ḳoiar, Bashsha Sulaiman oto zak-zomoḳor maze roileo tan lebas to ota egu zongli fulor laḳano shundor asil na. ²⁸Deḳrae ni, zongolor maze ou zoto shundor ful oḳon ase, ḳail oileu manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrareo tain shundor ḳori hazaita nae ni? ²⁹Te kila ḳaitam, kila soltam, ita befare sinta ḳorio na, ba ostir oio na. ³⁰I duniar manshe ḳali ota loiau danda ḳore. Oile tumrar batuni bafe to emneu zanoin, tumrar kita kita lagbo. ³¹Erdaeu tumra ita bad dia, ḳali Allar bashshair dandat ro, teu ita hokkoltau tain zugaiba.

³²“Tumrau amar meṛar fal, tumrar dol huru-muru oileo ḍoraio na, tumrar batuni bafor morzi oilo, tumra tan bashshair bitoro hamao. ³³Tumrar zotota ase, hokkolta besia gorib oḳolre bilai deo, ar nizor lagi ḳali oula ek kuti-beg tiar ḳoro, ze kuti kunudin furan oe na. Ou behesto samana zoma ḳoro, zeḳano samana ḳoe oe na, sureo ney na, fukeo ḳae na. ³⁴Ḳaron tumrar don zeno roe, mono hono roibo.

Hamesha tiar roio

³⁵“Tumra ḳafoṛ-sufoṛ findia ar batti zalaia tiar roio. ³⁶Tumra ou zat ḳamlar laḳan o, zara tarar munibor lagi bar sae, tain biar daot taki firot aia duaro ṭuka dileu, loge loge duar kulto fare. ³⁷Hou gulam oḳolu ḳofali, zerare tarar munibe aia hozag faiba. Ami hasa ḳota ḳoiram, munibe aia hari tan nizor ḳomoro gamsa bandia tarare ḳanit boaiba, ar nizor ate baṛia ḳaoaiba. ³⁸Tarau boṛo ḳofali, zerare tarar munibe ada rait ba hesh raite aia ḍaḳ dileu hozag faiba. ³⁹Mono rakio, sur kun shomoe aibo, giroste ikan zanle to he hozag roilo one, tar goro hing ḳatte dilo na one. ⁴⁰Tumrao ola tiar roio, ḳaron ze oḳtor ḳota tumra sintau ḳortae nae, hou shomoe-u Bin-Adome toshrif anba.”

⁴¹Teu sahabi Fitore ḳoila, “Huzur, i nosiot ḳali amrar lagi, na hoḳol manshor lagi?” ⁴²Huzure zuaf dila, “Aḳoldar ar hok-halali ou zon ḳe, zar ato malike tan gulam-bandire deḳa-hunar bar diba, he oḳtor ḳalo tarar ḳani baṭia dibo? ⁴³Hou gulamu ḳofali, zare tar munibe aia ou laḳan ḳam ḳorat deḳba. ⁴⁴Ami tumrare hasa ḳota ḳoiram, hou munibe tare tan nizor hoḳol don-samana todarokir eḳtiar diba. ⁴⁵Oile dorilao, hou gulame mone mone ḳoilo, amar munib aite to bout deri ase, ar ou fake he hokkol bandi gulamre mair-doir ḳorlo, ḳaia daia furti ḳoria, mod ḳaia ṭal oia foṛi roilo. ⁴⁶Bade zedin ar ze oḳtor ḳota he sintau ḳorto nae, hou din ar hou oḳto tar munib aia azir oiba. Tain tare eḳ sede dui ṭukra ḳoria naforman oḳolor ḳataro mishaiba.

⁴⁷“Ar ze gulame tar munibor morzire buziao tiar oise na, tan hukum mafik kam ḳorse na, tare bezuita mair mara oibo. ⁴⁸Oile na zania zudi he shaza faibar ḳam ḳorilae, te tar shaza ḳom oibo. Zare beshi deoa oise, tar ges tone beshi saoa oibo, ar zar gese beshi forimane toa oise, tar gese-u beshi dabi ḳora oibo.

⁴⁹“Ami to duniat aguin laganit aisi. Oḳon zudi i aguinḳan zolizito, te boṛo bala oilo one. ⁵⁰Ami to ek kas gusol ḳorau lagbo. Te amar duk-koshṭor i gusol zotodin na oise, otodin amar fereshanir kunu shima nai. ⁵¹Tumra mono ḳorrae ni, ami duniat shanti ditam aisi? Na, muṭeu nae, ami ḳoiram, ami to duniat eḳ motobed laganit aisi. ⁵²Oḳon taki eḳ goror faszon zarzir alog oizibo. Tinzon duizonor bifokke, ar duizon tinzonor bifokke lagbo. ⁵³Bafe fuar bifokke ar fua bafor bifokke. Ma fuṛir bifokke ar fuṛie maʼr bifokke. Hoṛi bour bifokke ar boue hoṛir bifokke lagbo.”

⁵⁴Bade Isae manshore ḳoila, “Tumra to foismedi ḳalni deḳleu ḳo, meg aior. Ar hasau meg ae. ⁵⁵Hirbar dokina batash salu oile tumra ḳo, ḳora oibo, ar olau oe. ⁵⁶O bonḍo oḳol! Tumra asman ar zominor surot buztae faro, te aḳeri zomanar hal-hokikot ḳene buzo na?

⁵⁷“Kunḳan ṭik, ita tumra nize nizeu bisar ḳoro na ḳene? ⁵⁸Kunu nalish loia hakimor samne zaibar age, bifokkor loge foto boiau miṭ-maṭ ḳorar sesṭa ḳorio. Arnae he tumare doria hakimor samne nibo, hakime fulishor ato dibo, ar fulishe nia zelo haraibo. ⁵⁹Heshe shesh foeshaṭa adae na ḳora forzonto, kunumonte-u zel taki saṛa faitae nae, ita ami tumrare ḳoiram.”

Touba na ḳorle binash oibae

¹Hozrot Isae boean ḳorra, ou shomoe honor ḳoezon manshe tanre ḳoila, “Huzur, Galil zilar kisu manshe Allar pak zagat gia foshu kurbani deoat asla, ou shomoe hakim Filate tarare hou pak zagat ḳatol ḳoria, tarar lou ar kurbanir lou eḳloge mishaisoin.” ²Ikan hunia Isae ḳoila, “Ou kurbani deurar mout ola oae, tumra mono ḳorrae ni, Galilor oinno manush taki era beshi gunagar asil? ³Ami tumrare ḳoiram, na, ila nae, oile tumra zudi guna taki touba na ḳoro, te tumrao ola binash oibae. ⁴Huno, Zeruzalemor Siloa elaḳar hou usa minara bangae ze aṭaro zon mara gesil, tarar befare kita mono ḳoro? Zeruzalemor baki manush taki era beshi gunagar ni? ⁵Ami tumrare ḳoiram, na, ikan ṭik nae, oile tumra zudi guna taki touba na ḳoro, te tumrao ola binash oibae.”

⁶Bade tain ou kichcha hunaila, ḳoila, “Eḳ giroste tan bagano ḍumuror eḳṭa gas lagaila. Shomoe aile ein aia gaso fol tukaila, oile kunu fol faila na. ⁷Na faia baganor malire ḳoila, Huno, aiz tin bosor dori ou ḍumur gaso fol tukairam, oile kuntau fairam na. Te tumi gasgu ḳaṭilao, igue ḳamoḳa zominor rosh ṭaner. ⁸Malie ḳoilo, sab, i bosorḳano taḳouk. Ami ogur sairo galar maṭi kuṛia shar dimu. ⁹Samnor bosor zudi fol dorilae, te to bala, naile ḳaṭilimu.”

Zummabare keramoti

¹⁰Eḳ Zummabare Isa mosidor bitre nosiot ḳorat asla. ¹¹Hono eḳ beṭi manush asil, i beṭir ufre aṭaro bosor dori atoshi-deoe asor ḳorsil. Deoe beṭire guza banailisil, beṭi shida oia ubaito farto na. ¹²Isae beṭire ḍaḳdi ḳandat ania ḳoila, “Mai go, tumi oḳon i bemar taki rehai faiso.” ¹³Oḳan ḳoiau tain beṭire atai dila. Loge logeu beṭi shida oia ubailo, ar Allar shukur-guzar ḳorlo.

¹⁴Oile zummar din tain i beṭire bala ḳorae, mosidor motollie gusa ḳoria ḳoila, “Ḳam ḳorar lagi to baki soedinu ato ase. Tumra zummar din na aia oinno zekunu din aia bala oio.”

¹⁵Teu Isae hi motollire ḳoila, “O bonḍo oḳol! Zummar din afnarar goru-gadare gualar bare nia fani ḳabain na ni? ¹⁶Aiz aṭaro bosor dori Ibrahimor ou aoladre shoetane bandia raḳsil. Oḳon Zummabare i beṭire azad ḳora zaiz oise na ni?”

¹⁷Ikan hunia zera tan bifokke asil tara hoḳoleu shorminda oilo. Oile baki musolli oḳole tan hoḳol keramoti dekia kushi oila.

Ḍenga bisi ar ḳamiror kichcha

¹⁸Bade Isae ḳoila, “Allar bashshaire ami kitar loge tulona ḳortam? ¹⁹Mono ḳoroukka, Allar bashshai oilogi egu ḍenga bisir laḳan, kunu giroste tar zomino nia ou bisi bain dilo, bade iṭa boṛo oia gas oigelo, ar fakinte aia gasor ḍalo bada banailo.”

²⁰Tain hirbar ḳoila, “Allar bashshair tulona ami kitar loge ḳortam? ²¹Doroukka, Allar bashshai oilogi ḳamiror laḳan, kunu eḳ beṭie tuṛa ḳamir nia eḳ mon moedar loge makilo, ar ḳamiror fafe hoḳol moeda fulia uṭilo.”

Nazator befare talim

²²Hozrot Isae aṭi aṭi gaue gaue ar ṭaune ṭaune gia toblig koria Zeruzalemor bae aguaila. ²³Ermaze eḳzon manshe tane zikailo, “Huzur, zera nazat faiba, era forimane kub ḳom ni?”

Ou Isae manshore ḳoila, ²⁴“Sifa duaredi hamanir lagi dile-zane fikir ḳoro. Huno, ami tumrare ḳoiram, bout zon ino hamaite saileo, hamaito farto nae. ²⁵Goror malike zebla duar bond ḳoriliba, tumra bare ubaia duaro ṭukaite ṭukaite ḳoibae, huzur, amrare duarḳan kulia deukka. Oile tain zuaf diba, tumra kuai taki aiso, ami to siniu na. ²⁶Teu tumra ḳoibae, amra afnar loge ḳaisi-boisi, afne to amrar foto-gaṭo aia amrare nosiot ḳorta. ²⁷Oile tain ḳoiba, haere naforman oḳol, amar ges taki bago. Tumra kuai taki aiso, ami to siniu na.

²⁸“Tumra deḳbae Ibrahim, Isʼhak, Iakub ar tamam nobi oḳol Allar bashshait dakil oisoin, oile tumrare horaia falani oise. Tumrar maze ḳeu ḳanda-ḳaṭi ḳorbae ar ḳeu dat kiṛimiṛi ḳaibae. ²⁹Aro deḳbae, duniar sairobae taki manush aia Allar bashshait dakil oia ḳana-dana ḳaira. ³⁰Te zera oḳon ḳoror ḳataro ase, tara ḳeu ḳeu age aibo, oile oḳon zera agor ḳataro ase tara ḳeu ḳeu ḳore zaibogi.”

Zeruzalemor lagi afsus

³¹Tain ota matira, ermaze aḳtau Forishi dolor ḳoezon aia Isare ḳoila, “Afne in taki horia zaingi, ḳaron Raza Herude afnare marilita saira.” ³²Isae tarare ḳoila, “Afnara gia hou hialor saore ḳoukka, aiz ar ḳail ami zinnat saṛaimu, bemari oḳolor shifa ḳormu, foru din amar ḳam shesh oibo. ³³Te zelau ouk, aiz, ḳail ar foru, ou tin din amar solau lagbo. Ami to zaniu, Zeruzalemor bare kunu nobire ḳatol ḳora oe na.

³⁴“Zeruzalem! Haere Zeruzalem! Tumi nobi oḳolre ḳatol ḳoro. Tumar gese zarare beza oise, tumi tarare fattor marso. Murgie zela tair saore ḍaḳnar tole ashroe dey, ami oula tumar manshore ashroe ditam saisi, oile tumi razi oilae na. ³⁵Te huno, tumar baṛi ḳali-baṛi oibo. Ami tumrare ḳoiram, zotodin tumra na ḳoibae, Allar nam loia zein aira tainu mubarok, otodin tumra ar amare deḳtae nae.”

Ḳanir daoto boia talim

¹Hozrot Isa Forishi dolor eḳ murobbir baṛit kunu eḳ Zummabare daoto gela, gia harle tara tan bae kub bala ḳori souk raḳlo. ²Aḳtau tan samne eḳ bemari beṭa ailo, tar asta shoril bemare fuligesil. ³Teu Isae honor alim ar Forishi oḳolre zikaila, “Musa nobir shoriot mafik Zummabare kunu manshor bemar shifa ḳora zaiz ni?” ⁴Ikan hunia tara hoḳol nirai roila, ar Isae hi bemarire shifa ḳoria bidae dilaila. ⁵Bade tarare ḳoila, “Tumrar maze ila kunu zon ase ni, zar kunu hurutta ba goru-sagol zummar din fanit foṛigele, he igure fani taki tule na?” ⁶Ikan hunia tara kunu zuaf dita farla na.

⁷Ar ze meman oḳol daoto aisoin, tara hoḳole bala bala zaga tukai boira dekia, Isae tarare ou talim dila, ⁸“Kunu manshe tumare biar daot dile, tumi mozliso hamaia dami zagat boa ṭik nae. Ḳaron malike kiban tumar taki aro ijjoti ḳeurore daot disoin. ⁹Te oile zein tumare daot disoin tain aia ḳoiba, ou siṭ taki uṭia amar dami memanre boibar dein. Teu tumi shorminda oia emneu hoḳol taki nisa zagat gia boibae. ¹⁰Erdae tumi kunu daoto gele foela nisa zagat gia boio. Teu zar baṛit daoto geso tain aia ḳoiba, baisab, ino ḳene boisoin, bala zagat toshrif anoukka. Ete aro meman oḳolor samne tumar ijjot baṛbo. ¹¹Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.”

¹²Ze moulanae Hozrot Isare daot disla, Isae enre ḳoila, “Dinor ba raitkur ḳanir lagi tumi kunu onusṭan ḳorle, tumar bondu-bandob, bai-birador, ḳesh-kuṭum, ar daro ḳasor doni manshore daot dio na. Tarare ḳaoaile bade tarao tumare ḳaoaia bodla dilaiba. ¹³Erlagi tumi kunu memandari ḳorte saile, ḳali gorib manush, atur, anda, lula-lengṛare daot dio. ¹⁴Era to firia tumare ḳaoaito farto nae. Ete kiamotor din tumi forezgar oḳolor loge itar bodla faibae.”

¹⁵Ita hunia hou ḳanir mozlisor eḳzone ḳoila, “Mubarok hou bonda, zein Allar bashshait boia ḳana-fina ḳaiba.” ¹⁶Teu Isae ḳoila, “Kunu eḳzon manshe kub boṛo eḳ mezbani ḳoria, bout manshore daot dila. ¹⁷Ḳaoar shomoe oile tan gulamoredi ḳoaila, afnara aioukka, ḳana tiar oigese. ¹⁸Oile hoḳol daotie eḳ eḳṭa uzor deḳailo. Foela zone ḳoilo, ami tuṛa zomin ḳorid ḳorsi, oḳon deḳat zaitam, te hono na gele oito nae, erlagi amare maf ḳoroukka. ¹⁹Dusra zone ḳoilo, ami alor lagi fas zuṛa bisal loisi. Oḳon gia deḳtam, itae al bain ki na, amare maf ḳoroukka. ²⁰Aroḳzone ḳoilo, ami to noea bia ḳorsi. Oḳon zaitam fartam nae. ²¹Hi gulame aia tar malikre hoḳolta zanailo. Ita hunia malike gusa ḳoria ḳoila, tui zoldi ḳori ṭaunor ollie-gollie za, gia gorib, atur, anda, lula-lengṛare angi. ²²Teu he ola ḳoria hari bade aia ḳoilo, huzur, afnar hukume hoḳolta ḳora oise, oile oḳono zaga ḳali roise. ²³Ou tain ḳoila, te ṭaunor bare foto-gaṭo, ar sifae-safae za, gia minot-ḳajji ḳori manshore an. Manush aia mozlis bori zaukka. ²⁴Ar tumra kial ḳori huno, age zetare daot dislam, ita kunugie zanu amar ḳani na fain.”

al-Mosir ummot oar shorto

²⁵Bade Hozrot Isar loge oia bout manush aṭat asla. Ou shomoe tain erar bae saia ḳoila, ²⁶“Ḳeu zudi amar torikat aito sae, te tar nizor ma-baf, bou-baichcha, bai-birador, ar nizor zanreo amar taki huru mone ḳorte oibo. Arnae he amar ummot oito farto nae. ²⁷Ze manshe nizor duk-koshṭor solib ḳando loia amar ḳore ḳore roe na, he amar ummot oito fare na.

²⁸“Tumrar ḳeu zudi usa kunu dolan banaito sae, te he foela tar ḳorosor hishab milaia deḳe, dolanor ḳam shesh ḳorar lagi tar ṭeḳa ase ki na. ²⁹Na oile, ian dia hari ḳam shesh ḳorte na farle, manshe ṭaṭṭa ḳorba, ³⁰tara ḳoiba, Beṭae dolan tulia oḳon shesh ḳorto farer na.

³¹“Ar zudi eḳ raza aroḳ razar bifokke zuddo ḳorat lagoin, te foela boia foramish ḳorba, tain ḳoiba, bish azar fouz loia zera amar bifokke aira, ami dosh azar fouz loia er mukabila ḳortam farmu ni? ³²Zudi na faroin, te hamla ḳorra raza duroi taḳteu afushor lagi ḳoezon tiait faṭaiba. ³³Ṭik oula, tumrar maze ḳeu zudi tar hokkoltar maea saṛto na fare, te he amar ummot oito farto nae.

³⁴“Nun to bala zinish, oile nunor zudi shad nosṭo oizae, te ar nunta ḳora zae ni? ³⁵Itadi sharo banail zae na, zomino deoa zae na, erlagi manshe ita bare falai dein. Hunar moto ḳan zar ase, he hunouk.”

Arail meṛar kichcha

¹Hozrot Isar boean hunar lagi bout gushkur ḳazna tulra ar be-shorioti am manush tan gese dola oila. ²Ita dekia Forishi dolor manshe ar moulana oḳole ḳana-ḳani ḳori ḳoila, “I manushgu ḳali naforman oḳolor loge uṭa-boa ar ḳana-fina ḳae.”

³Teu Isae tarare ou kichchain hunaila. Tain ḳoila, ⁴“Mono ḳoroukka, afnara kunu eḳzonor eḳ-shoṭa meṛa ase. Ermazor egu meṛa arai gele, he baki nirannobboiṭa bondo toia hou arail ogu tukanit zae na ni? ⁵Gia ogu tukaia faile, kushie itare ḳando ḳori ane. ⁶Bade baṛit gia bondu-bandob ar ari-forire ḳoe, ao, amar loge furti ḳoro. Amar arail meṛagu tukaia failisi. ⁷Ami afnarare ḳoiram, ekkere ou laḳanu, zara guna taki touba ḳorar zorur mono ḳore na, ila nirannobboi zon forezgar taki eḳzon gunagare mon bodlaia touba ḳorle, behesto aro beshi kushi-bashi oe.

Arail ṭeḳar kichcha

⁸“Ba doroukka, kunu eḳ beṭir gese rufar doshṭa ṭeḳa asil. Er taki egu ṭeḳa zudi arai zae, te beṭie hi ṭeḳar lagi lem zalaia huruindi huria asta gor tukae na ni? ⁹Bade tukaia failile bondu-bandob ar ari-forire ḍakia ḳoe, Ao na, amar loge kushit shamil o. Amar arail ṭeḳagu tukaia failisi. ¹⁰Ami afnarare ḳoiram, ekkere ou laḳanu, eḳzon gunagar manshe mon bodlaia touba ḳorle, Allar firista oḳole oula kushi ḳoroin.”

Arail fuar kichcha

¹¹Bade Isae ḳoila, “Eḳ girostor dui fua asil. ¹²Eḳdin huru fuae tar bafore ḳoilo, baba, ami babaiti zomi-zoma ar don-samana zeta faitam, amar ou baṭḳan oḳonu algaia dilaukka. Ou bafe tan samana duio fuar name baṭia dilaila. ¹³Er ḳoedin bade huru fuae tar hokkol samana besia bidesh gelogi. Bidesh gia bad fote solia tar ṭeḳa-foesha hokkolta kuaililo. ¹⁴Hoḳolta kuaia harle hou deshor hoḳol zagat kub nidan deḳa dilo erdae he kub ḳoshṭot foṛlo. ¹⁵He hou deshor eḳ girostor baṛit gia saḳri sailo. Malike tare saḳri dia shuoror fal raḳar lagi bondo faṭailo. ¹⁶Bondo gia shuore zeta ḳae, he-o ota ḳaia feṭor buk miṭaito sailo, oile otao ḳeu tare dito na.

¹⁷“Bade aḳta eḳdin tar hush oilo. He mone mone ḳoilo, amar babar baṛit to bout saḳor-baḳore feṭ bori bat ḳaira. Te ami ono ufashe morram ḳene? ¹⁸Ami gia amar babare ḳoimu, baba, ami to Allar gese ar tumar geseo naforman bonigesi. ¹⁹Tumar fua ḳoia ami ar forisoe dibar laḳ nae. Ḳali tumar saḳoror laḳan amare eḳzora ashroe deo. ²⁰Oḳan ḳoia he tar baṛit roana dilailo. Baṛir ḳandat aiteu tar bafe tare dekilila. Dekia tan dil goli gelo. Tain douṛia gia tare ainja ḳori doria hunga dila. ²¹Teu fuae ḳoilo, baba, ami to tumar fua ḳoia forisoe dibar laḳ roisi na. Ami Allar gese ar tumar geseo naforman bonigesi. ²²Oile bafe loge loge ḳamlaintore ḳoila, hoi, zoldi ḳori gor taki bala zubbaṭa ania amar fuagure findao. Tar ato angṭi ar faot zuta findai deo. ²³Ar huno, falo taki taza ḍeḳa-basurgu ania zobo ḳoro. Ao, amra hoḳole milia kushi-bashi ḳori ḳana ḳai. ²⁴Amar i fuagu to morigesil, oḳon hirbar zinda oise. Ogu nai oigesil, oḳon firot faisi. Teu hoḳole milia kushi-bashit lagla.

²⁵“Ou shomoe beṭar boṛo fua bondo asil. He baṛir ḳandat aia nas-gan ar ḍul-ḍofkir aoaz hunia, ²⁶tarar eḳ saḳorre zikailo, Kitare, ita kita or? ²⁷Saḳore ḳoilo, Sab, afnar huru bai baṛit aisoin. Afnar abbae tanre sohi-salamote faia, taza ou ḍeḳa-basur zobo ḳorsoin. ²⁸Ikan hunia boṛo fuae gusa ḳoria baṛir bitre aito sailo na. Teu tar baf baroia aia tare minot-ḳajji ḳorla. ²⁹He tar bafore ḳoilo, Deḳoukka, ami otodin doria afnar ḳezmot ḳorram, kunudinu afnar hukum ulṭaisi na. Oile amar bondu-bandob loia kushi ḳorar lagi egu bokrir baichchao kunudin disoin na. ³⁰Ar afnar ze fuae noṭi beṭintor tole hoḳol samana kuaise, he aiteu taza ḍeḳa-basurgu ania zobo ḳorilaila! ³¹Bafe ḳoila, Futre, tumi to hamesha-u amar loge aso. Amar zeta samana roise, ita hokkoltau to tumar. ³²Oḳon amra hoḳole dil saf ḳoria kushi-bashi ḳora zorur. Tumar i bai to moriu gesil, oḳon hirbar zinda oise. Ogu ekkere nai oigesil, oḳon firot faisi.”

Beiman menezaror kichcha

¹Bade Hozrot Isae tan shagrid oḳolre ḳoila, “Huno, kunu eḳ zomidaror eḳ menezar asil. Ou menezaror bodnam baroilo, he bule tar munibor don-samana binash ḳorilar. ²Bodnam hunia munibe tare anaia ḳoila, Tumar name ita kita hunram? Tumar hishab-nikash hoḳolta shomzai deo. Tumare ar saḳrit raḳtam nae. ³Ikan hunia menezare mone mone ḳoilo, Oḳon ami kita ḳortam? Munibe to amare bidae dilaira. Ami to maṭi ḳamo ḳortam fartam nae, bik korteo shorom lage. Oḳon ḳaimu kila? ⁴Aichcha, ek kam ḳori, zate amar menezari gelegio manshor goro ashroe fai. ⁵Ou he kita ḳorlo, zarar gese tar munibor faona asil, eḳ ek kori erare anailo. Anaia foela zonre ḳoilo, Tumar gese amar munibor ḳoto faona ase? ⁶Hein ḳoila, Eḳ-sho mon tel. Menezare ḳoilo, Zoldi ḳori tumar ḳata bar ḳoro, ar eḳ-shor bodla foinchash mon lekilao. ⁷Bade menezare dusra zonre zikailo, Tumar gese ḳoto fain? Hein ḳoila, eḳ-sho furar gom. Menezare ḳoilo, Tumar hishabo ashi furar lekilao. ⁸Ita hunia hi zomidare ou beiman menezaror tarif ḳorla. Tain ḳoila, He dandabaz oileo bout boṛo buddimanor ḳam ḳorse. Te kita mono ḳoro, itae buza zae na ni, allaraia manshor aḳol takio, i zomanar duniabi manshor fes-faichcha beshi. ⁹Huno, ami kita ḳoiram, tumrao naforman ou zogotor samana dia manshor loge dusti fatao, zate i samana fuṛaigeleo tumrare behestor bagano fulor mala deoa oe.

¹⁰“Ze manush shamainno befare hok-halal roe, he boṛo befareo hok-halal roe. Oile ze zone shamainno befare beimani ḳore, he boṛo befareo beimani ḳore. ¹¹Te tumra zudi duniabi don-samanar befare hok na ro, taile ḳe tumrare bishash ḳoria ashol don dibo? ¹²Foror samana zudi tumra ṭik-ṭak moto bebohar ḳortae na faro, te ḳe tumrar nizor samana tumrar ato dibo? ¹³Kunu gulame eḳloge dui munibor gulami ḳorto fare na. Te oile he eḳzonre ingshaibo, aroḳzonre maea ḳorbo. Eḳzonre ijjot dibo ar aroḳzonre elami ḳorbo. Tumrao oula, Allatala ar don-samana duiotar gulami eḳloge ḳortae fartae nae.”

¹⁴Ikan hunia Forishi mozobor manushe Isare loia ḍong-tamasha lagaila, tara to ṭeḳa-foeshare kub maea ḳorta. ¹⁵Isae tarare ḳoila, “Tumrau to manshor samne nizor forezgari deḳao, oile Allae tumrar dilor ḳobor zanoin. Manshor gese zeta kub dami, Allae itare ginnain. ¹⁶Huno, Ehia nobir shomoe forzonto Musar shoriot, ar nobi oḳolor sohifa zari asil. Oile oḳon Allar bashshair kush-ḳobri toblig kora or, ar mansheo dile-zane ono dakil oita saira. ¹⁷Oile i shoriotor eḳṭa horof batil oar saite, asman-zomin binash oaḳan bout shuza. ¹⁸Te huno, ze beṭae nizor boure talaḳ dia aroḳ beṭire hanga ḳore, he zinakur. Oula talaḳ faoa kunu beṭire zegie bia ḳore, he-o zinakur.”

Lasar hokir ar eḳ doni manush

¹⁹“Eḳ doni beṭa asil, he raza-bashsha oḳolor laḳan dami dami ḳafoṛ-sufoṛ finto, ar hamesha zak-zomok koria furti-amud ḳorto. ²⁰Manshe Lasar namor eḳ hokir beṭare hamesha ou donir duaror samne boaia toita, tar asta gotro fosa-ga asil, ²¹ar fotor kuttainte aia tar ga zifradi leita. Ou donie bat ḳaia hari aḍḍi-guḍḍi guṛa-gaṛa zeta tole falaita, ota ḳaoar lagi tar kub ichcha asil. ²²Eḳdin ou hokir beṭa morigelo, morar bade Allar firista oḳole tare Ibrahim nobir kulo nia boaila. Ermaze hou doni beṭao morigelo, tare dafon ḳora oilo. ²³Bade he duzoḳor azab taki aḳta ufredi saia deḳlo, duroi behestor maze Ibrahim nobi boi roisoin, tan kulo hou Lasar. ²⁴Dekiau he sillaia ḳoilo, Baba Ibrahim! Amare rohom ḳoroukka. Lasarre amar gese faṭaukka, he tar angulor agaḳan fanit buṛaia amar zifrare ṭanḍa ḳorouk. Duzoḳor i agunit amar boṛo azab or. ²⁵Ibrahime ḳoila, Babare, mono ḳoria deḳo, tumar shuk tumi duniatu ḳamailiso, ar Lasare bout ḳoshṭo ḳorse. Oḳon ino aia he arame ase, ar tumi azabo aso. ²⁶Huno, ita saṛao tumrar ar amrar maze oḳon bout boṛo pak raḳa oise. Inor ḳeu ichcha ḳorleo tumrar gese zaito farto nae, ar tumrao ḳeu ichcha ḳorle ino aitae fartae nae. ²⁷Ou hi doni beṭae ḳoilo, Baba, te doya ḳori Lasarre amar babar baṛikano faṭaukka. ²⁸Hono amar aro fasgu bai roisoin. He gia amar baiainre hushiar ḳorouk, tara zanu i duzoḳor azab taki basoin. ²⁹Ibrahime zuaf dila, Tarar gese to Hozrot Musa ar nobi oḳolor usillae bout kitab beza oise, tara ou talim hunouk. ³⁰Hou donie ḳoilo, Na, na, baba Ibrahim! Murda taki ḳeu zinda oia tarar gese geleu, tara touba ḳorba. ³¹Ibrahime ḳoila, Tara zudi Hozrot Musa ar nobi oḳolor ḳota na hune, te murda taki zinda oia geleo tara manto nae.”

Nanan befare nosiot

¹Hozrot Isae tan shagrid oḳolre ḳoila, “Gunar fote neoar lagi uskani aibou aibo. Oile lannot hou zonor ufre, zegue guna ḳorar lagi uskani dey. ²Ou bebuz oḳolor eḳzonreo zegue gunar fote ṭania ney, ogur lagi aro bala oilo one, ogur golat fattor bandia doriat falai deoa. ³Tumrao zarzir befare hushiar roio. Tumar kunu baie tumar gese dush ḳorle tare buzaio. He dil bodlaia maf saile tare mafi dio. ⁴He dinor maze shatbar dush ḳoria, shatbar aia tumar gese maf saile, tare maf ḳori dio.”

⁵Sahabi oḳole Hozrot Isar gese abdar ḳorla, “Huzur, amrar imani bol baṛai deukka.” ⁶Tain ḳoila, “Tumrar dilo zudi egu ḍengar bisir foriman iman taḳe, ar tumra ou heora gasre ḳo, zoṛ shudda huria gia doriat gaṛizao, te he tumrar ḳota hunbo.

⁷“Tumrar maze ila kunu girost ase ni, zar ḳamlae al baia ba goru rakia bondo taki baṛit aiteu, he tar ḳamlare ḳoe, tumi zoldi aia ḳana ḳao? ⁸Na, ḳeu ila ḳoe na. Borong oula ḳoe, oba, tui amar ḳana zuit ḳor. Ami zoto shomoe ḳana ḳai, tui ono ubaia balamonte amare batash de. Bade tui ḳais. ⁹Ar hou gulame tan hukum manche ḳori tain tare kunu doinnobad dein ni? Nichoe na. ¹⁰Ou laḳan tumrao hoḳol hukum-ahkam adae ḳorleo ḳoio, Malik, amra to tumar na-layeḳ gulam. Amra zeta ḳam ḳora zorur asil, ḳali otau kunu rokome adae ḳorsi.”

Doshzon fosa-kushṭo bemarire shifa ḳora

¹¹Hozrot Isa Zeruzalem ṭauno zaoar bala Shomoria ar Galil zilar mazedi aṭia zaira. ¹²Ou shomoe eḳ gaut hamanir fotor muko doshzon fosa-kushṭo bemarie tanre deḳat aila. Tara duroi ubaia zure zure ḳoila, ¹³“O huzur Isa, amrare rohom ḳoroukka.” ¹⁴Tarare dekia tain ḳoila, “Zao, imam sab oḳolre gia tumrar halot deḳao.”

Fotedi zaite zaite tara hoḳolor bemar ḳomigelo. ¹⁵Tarar maze eḳzone zebla deḳlo, he bala oigese, dekiau zure zure Allar tarif ḳori ḳori he firia ailo. ¹⁶Aia Isar faot foṛia tanre shukria zanailo. He oilo Shomoria zatir manush.

¹⁷Teu Isae ḳoila, “Dosho zonreu kunu bala ḳora oise na ni? Te baki noezon kuai? ¹⁸Allar tarif ḳorar lagi ou bideshi beṭa saṛa ar ḳeu firia ailo na ni?” ¹⁹Bade Isae tare ḳoila, “Bai, tumar imanor boleu tumi bala oiso. Oḳon sohi-salamote zao.”

Kiamotor alamot

²⁰Forishi mozobor ḳoezon aia Hozrot Isare zikaila, Allae kun shomoe tan bashshai salu ḳorba. Tain ḳoila, “Allar bashshai to ḳeurore zanai-hunai ae na. ²¹Ḳeu ḳoar shaiddo nai, Allar bashshai ono ba hono deḳsi. Hunoukka, Allar bashshai to oḳonu afnarar maze salu ase.”

²²Bade tan shagrid oḳolre ḳoila, “Omon eḳ shomoe aibo, zebla tumra ami Bin-Adomor ekkan din deḳtae saibae, oile fartae nae. ²³Manshe tumrare ḳoiba, Ono deḳo, Hono deḳo. Oile tumra tarar ḳotae douṛio na, kunuḳano zaio na. ²⁴Huno, megor zilkir loge asmanor eḳ mata taki aroḳ mata zebla for oe, ou shomoe to hoḳole deḳe. Te ami Bin-Adom zebla aimu hou shomoyo ola hoḳole deḳbo. ²⁵Oileo foela i zomanar manshor ato ami bout ḳoshṭo faitam oibo, tara amare dur-dur ḳorba.

²⁶“Zela Nuh nobir amolo oisil, ami Bin-Adomor zomanato ola oibo. ²⁷Nuh nobi zazo uṭar ag forzonto manshe ḳana-fina, bia-shadi ar gor-shongshar ḳorta, Nuh nobir boinna aia itare nifat ḳorlo. ²⁸Oula Lut nobir amolo-o manshe ḳana-fina, ḳorid-biki, ḳet-girosti ar baṛi-gor bananit besto asla. ²⁹Oile Lut nobi zedin Sadum ṭaun saṛia bidae oigela, hou dinu asman taki aguin ar gondoḳor gozob lamia ita hokkolṭire nifat ḳorlo. ³⁰Ṭik oula, ami Bin-Adom zedin zaira oimu, houdino ola aḳta aibo.

³¹“Hidin ḳeu zudi goror salor ufre taḳe, te tar goror mal-samana nibar lagi, lamat lamia goror bitre na hamauk. Ou laḳan ḳeu zudi bondo taḳe, he-o ar baṛit na auk. ³²Lut nobir bibir goṭona iad ḳoro. ³³Mono rakio, ze zone zan basaito sae, he nizor zindegi kuaibo, oile ze zone zan shofia dey, he zindegi faibo. ³⁴Hi rait eḳoi bisnat duizon hutileo, eḳzonre neoa oibo, dusra zon bad foṛizibo. ^35-36Dui beṭie eḳloge bara-banat taḳleo, erar eḳzonre neoa oibo, aroḳzon bad foṛizibo.”

³⁷Sahabi oḳole ḳoila, “Huzur, ita kuai oibo?” Tain zuaf dila, “Mora lash zeḳano, hokuno hono dola oe.”

Nirash oio na, hamesha munazat ḳoro

¹Munazator befare shagrid oḳol nirash na oia hamesha zate munazat ḳoroin, oḳan buzanir lagi Isae ek kichcha hunaila. ²Ḳoila, “Kunu eḳ ṭauno eḳzon hakim asla. Ein Allareo ḍoraita na, kunu manshoreo toakka ḳorta na. ³Hou ṭauno eḳ ṛaṛi beṭi asil. Ou beṭie aia hamesha tanre ḳoito, Hakim sab, amare dushmonor at taki basaukka, doya ḳori ou niajjo bisarḳan ḳoroukka. ⁴I hakime ḳoedin kunta ḳoila na. Bade mone mone ḳoila, Ami to Allare ḍorai na, manshoreo toakka ḳori na, ⁵oile i ṛaṛie aia to hamesha satae, oḳon ogur niajjo bisarḳan ḳorilai. Naile tai aia bar bar sataibo.”

⁶Bade huzure ḳoila, “Deḳlae ni, ou naforman hakime kita ḳorse? ⁷Te zera hamesha dine-raite Allar gese ḳande, Allae kita tan i maear bonda oḳolor hok foriad hunta nae ni? Tain hunte kunu ar deri ḳorba ni? ⁸Ami ḳoiram, tain zoldi ḳoriu erar hok foriad hunba. Oile ami Bin-Adom dusrabar zebla i duniat aimu, hou shomoe duniat kunu iman faimu ni?”

Forishi ar ḳazna tulrar dua

⁹Zeta manshe nizore kub forezgar, ar bad-baki hoḳol manshore huru mono ḳorto, Hozrot Isae tarare ou kichcha hunaila. ¹⁰Ḳoila, “Duizon manush dua ḳorar lagi Baetul-Mukaddoso gelo. Erar eḳzon Forishi dolor ar dusra zon gushkur ḳazna tulra. ¹¹Forishi beṭae alga ubaia oula dua ḳorlo, O Alla, ami tumar shukria adae ḳorram, ami to shomazor manshor laḳan naforman, zalim, ar zinakur nae, ba ou gushkur ḳazna tulrar laḳano nae. ¹²Ami haftat duidin ruza raki, ar amar hokkol ruzir dosh baṭor eḳ baṭ tumar name zoḳat dei. ¹³Oile ou ḳazna tulra beṭae duroi ubai roilo, Allar aroshor bae souk tular shaosho tar oilo na. He bukut mari mari ḳandi ḳandi ḳoilo, O Alla, ami boṛo gunagar, amare rohom ḳoro.

¹⁴“Ami tumrare ḳoiram, ou ḳazna tulra beṭau forezgar bonia tar goro gelo, hi Forishi nae. Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.”

Hurutaintor laḳan bonizao

¹⁵Manshe tarar huru huruttainre loia Isar gese ailo, tain zanu huruttainre atai dia dua ḳoroin. Ita dekia sahabi oḳole manshor ufre biroḳto oia na ḳorla. ¹⁶Oile Isae huruttainre tan ḳandat nila, nia ḳoila, “Hurutainre amar ḳandat aibar deo, tarare bada dio na. Allar bashshai to ou nomunar manshor lagiu. ¹⁷Ami hok kota ḳoiar, huru hurutta bonia Allar shashon na manle, kunu zonu Allar bashshait hamaito farto nae.”

Hozrot Isar gese eḳ doni

¹⁸Hozrot Isar gese fainchaitor eḳ murobbi aila, aia ḳoila, “O hok ustad, amare batai deukka, kita ḳorle ami aḳer faimu?” ¹⁹Isae ḳoila, “Amare ḳene hok koira? Ḳali eḳ Alla bade ar ḳeu hok nae. ²⁰Afne to shoriotor hukum-ahkam zanoin,

Zina ḳorio na.

Kun ḳorio na.

Suri ḳorio na.

Misa kunu shakki dio na.

Tumar ma-bafore ijjot ḳorio.”

²¹Hi murobbie ḳoila, “Huzur, i hokkolta to huruman toneu adae ḳorram.”

²²Ikan hunia Isae ḳoila, “Oḳon ḳali ekkan ḳam baki ase, afnar hoḳol don-samana besia gorib oḳolre lilla dilaukka. Teu afne behesto don faiba. Bade aia amar ummot oukka.” ²³Ikan hunia hi murobbi kub bezar oigela, tain ashole bout boṛo doni asla. ²⁴Tain bezar oigesoin dekia Isae ḳoila, “Doni manush Allar bashshait hamani boṛo moshkil. ²⁵Doni manush Allar bashshait hamanir saite, suir na baedi uṭ hamani aro shuza.”

²⁶Ikan zara hunla, tara aroz ḳorla, “Te ar ḳegie rehai faibo?” ²⁷Tain ḳoila, “Manshor gese zeta oshombob, Allar gese to ita shombob.”

²⁸Ou shomoe Fitore ḳoila, “Huzur, amra to hoḳolta falai toia afnar ummot oisi.” ²⁹Teu Isae sahabi oḳolre ḳoila, “Ami tumrare hasa ḳota ḳoiram, Allar bashshair lagi zera nizor baṛi-gor, ma-baf, bou, fua-fuṛi, bai-birador falaia aise, ³⁰tara ou duniatu er bout beshi faiba, ar bador zindegit aḳero faiba.”

Hozrot Isar moutor tin nombor agam ḳobor

³¹Bade Isae tan barozon sahabire daro boaila. Boaia ḳoila, “Huno, amra oḳon Zeruzalemo zairam, te ami Bin-Adomor befare nobi oḳole zotota lekia gesoin, ita oḳon fura oibo. ³²Amare bidormi zatir ato shofi deoa oibo. Manshe loia ḍong-tamasha ḳorba, beijjot ḳorba, ar tutu ḳori muko sef diba. ³³Amare sabuk marba bade ḳatol ḳorba. Moutor tin dinor din ami hirbar zinda oia uṭmu.” ³⁴Oile tan sahabi oḳole ou mator kunu bed buzla na. Tain kita ḳoira tara shomzita farla na, ḳaron tarar gese gufon raḳa oisil.

Anda hokirre bala ḳora

³⁵Isa zebla Ziriho ṭaunor ḳandat aila, ou shomoe eḳ anda beṭae fotor ḳandat boia bik korat asil. ³⁶Aḳtau bout manshor faor tali hunia beṭae zikailo, “Kita ba, kita or?” ³⁷Manshe ḳoila, “Nasarotor Isae ou fotedi toshrif nira.” ³⁸Ou he sillaia uṭlo, “O Daudor aolad Isa, amare doya ḳoroukka.” ³⁹Sillani hunia biṛor samonor ḳataror manshe tare domoḳ dila, “Chup ḳoro, nirai ro.” Oile he aro zure sillaia ḳoilo, “O Daudor aolad, amare rohom ḳoroukka.”

⁴⁰Teu Isa ubai gela. Ubaia anda beṭare tan ḳandat anaila. Beṭa daro aia harle tain zikaila, ⁴¹“Kita ba, tumare kita ḳortam?” Beṭae ḳoilo, “Huzur, ami ḳali souke deḳtam sai.”

⁴²Isae tare ḳoila, “Aichcha te deḳo. Tumar imanor boleu tumi bala oilae.”

⁴³Loge logeu beṭar souk kuligelo, deḳar shokti failo. Beṭae Allar shukria adae ḳori ḳori tan ḳore oia roana dilailo. Ita dekia hoḳol manshe Allar tarif ḳorla.

Doni Zakiror touba

¹Hozrot Isa Ziriho ṭaunor mazedi aṭia zaira, ²hono Zakir namor boṛo eḳ doni manush asla. Ein oila ḳazna tulra oḳolor fordan. ³Isare deḳar lagi tan kub ḳaish asil, oile tain baṭṭi manush, erdae oto biṛor maze deḳar ufae oilo na. ⁴Ou douṛia agedi gela, gia Isa ze fotedi aira ou fotor ḳandar eḳ ḍumur gaso uṭla. ⁵Isa zebla hou ḍumur gasor tole aila, tain ufredi saia Zakirre ḍaḳ dila, “Zakir, zoldi lamia ao. Ami aiz tumar baṛit roite oibo.” ⁶Zakir loge logeu lamia aila. Tain kushi oia Isare tazim ḳoria tan baṛit nila. ⁷Ita dekia hoḳole ḳana-ḳani ḳori ḳoila, “Tain ḳene eḳ naforman beṭar baṛit rait ḳaṭanit gela?”

⁸Zakire hoḳolor samne ubaia ḳoila, “Huzur deḳoukka, ami oḳonu amar don-samanar ordeḳ goribre lilla dilairam. Ar zerar hok ṭogia anchi, tarare sair otoḳan firot dilaimu.” ⁹Teu Isae ḳoila, “Aiz taki i baṛit nazat aise. Eino to Ibrahimor ḳandanor eḳzon. ¹⁰Ou laḳan be-foti oḳolre tukaia bar ḳoria, tarare basanir lagiu to ami Bin-Adom i duniat aisi.”

Raza ar dosh gulamor kichcha

¹¹Hozrot Isae tarar loge ota matira, ou shomoe tain Zeruzalem taki tuṛa duroi roisoin. Tara mono ḳorla, Zeruzalem fousiau tain Allar bashshai zair ḳoriliba. Erlagi Isae tarare ou kichcha hunaila, ¹²“Nobab foribaror eḳzon beṭa manush bout duroi eḳ desho soforo gela. Tan kial asil hono gia raza oia firot aiba. ¹³Zaibar age tan doshzon gulamre ania forteḳ zonre eḳṭa ḳori shunar mohor dia ḳoila, ami aibar ag forzonto oguindi tumra ḳae-ḳarbar ḳoro.

¹⁴“Oile tan proza oḳole tanre fosond ḳorta na. Erlagi tara tan ḳore oia guia faṭaia hou bashshare zanaila, amra sai na, ein amrar raza oukka. ¹⁵Oileo tain raza bonia firot aila. Aia hou ze doshzon gulamre tain mohor disla, tarare anaia zikaila, ḳae-ḳarbar ḳoria tara ḳe ḳoto lab ḳorsoin. ¹⁶Foela zone aia ḳoilo, Huzur, afnar eḳ mohordi ami dosh mohor ruzi ḳorsi. ¹⁷Razae tare ḳoila, bala ḳorso! Tumi to bala gulam, tumi kub shamainno befareo hok aso. Te tumi ou dosh forgonar ufre zomidari ḳoro. ¹⁸Dusra zone ḳoilo, Huzur, afnar mohordi ami fas mohor ruzi ḳorsi. ¹⁹Tain ḳoila, Tumio fas forgonar ufre zomidari ḳoro. ²⁰Bade aroḳzone ḳoilo, Huzur, ou neukka, afnar hi mohor. Ami afnare ḍoraia afnar mohor rumalo bandia toi disi. ²¹Afne to ḳoṛa mizazor manush. Zoma na ḳoriao adae ḳoroin, ḳet na ḳoriao foshol ḳaṭoin.

²²“Teu razae ḳoila, O ḳobis gulam! Tor mukor ḳotae ami tor bisar ḳormu. Tui to zanos ami ḳoṛa mizazor manush, zoma na ḳoriao adae ḳori, ḳet na ḳoriao foshol ḳaṭi! ²³Te amar mohor tui befarir gese toile na ḳene? Te to ami aia mul mohoror loge kisu labo failam one. ²⁴Razae tan uzir-nazirre ḳoila, Ogur ges taki ou mohor firot ano, ar zar dosh mohor ase tare deo. ²⁵Teu hoḳole ḳoila, Huzur, tar to emneu dosh mohor ase. ²⁶Razae ḳoila, ami tumrare ḳoiram, zar ase tare aro deoa oibo. Zar nai, tar zeta ase otao ḳaṛia neoa oibo. ²⁷Ar amar zeta dushmone saisoin na ami raza oitam, otare ono doria ania amar samne marilao.”

Zeruzalem ṭauno Hozrot Isa (19:28–21:38)

Hozrot Isa Zeruzalemo hamaila

²⁸Oḳan ḳoia hari Isae tarar age oia Zeruzalemor bae toshrif nila. ²⁹Tain Zoetun faṛor ḳandat Baet-Faijja ar Baet-Ania gaur galat aia harle, tan duizon sahabire oḳan ḳoia faṭaila, “Tumra ou samnor gaut zao. ³⁰Gaut hamaiau deḳbae, egu gadar baichcha banda ase. Ogur ufre ḳeu kunudin soṛse na. Tumra ogur ban kulia ono loia aio. ³¹Ḳeu zudi zikae, igur ban kulo ḳene ba? Te ḳoio, huzuror goroz ase.”

³²Ze sahabi oḳolre faṭaisla, tara gia tan ḳota moto hoḳolta faila. ³³Tara zebla gadar baichchar ban kulra, ou shomoe malike zikaila, “Oba, doṛi kulrae ḳene?” ³⁴Tara ḳoila, “Huzuror goroz ase ḳori kulram.” ³⁵Bade gadar baichcha loia Isar ḳandat aia, erar gotror saddordi gadar fiṭit godi banaia Isare boaila. ³⁶Tain zebla gada soṛia fotedi roana dila, fotor maze manshe tarar zarzir saddor bisai dila.

³⁷Isa Zeruzalemor ḳandat Zoetun faṛ tone lamar foto aia azila, ou shomoe tan ummot oḳolo loge asla, era tan zeta keramoti ḳam deḳsila, otar lagi tara kushie zure zure sillaia Allar tarif ḳoria ḳoila,

³⁸“Mubarok hou bashsha, zein Mabudor name toshrif anra.

Behesto shanti, Allar arosho gourob!”

³⁹Biṛor maze Forishi dolor ḳoezone Isare ḳoila, “Huzur, afnar ummot oḳolre domoḳ deukka.” ⁴⁰Isae ḳoila, “Ami afnarare ḳoiram, erar muk bond ḳorilleo, fattor oḳole sillaia uṭbo.”

⁴¹Tain zebla Zeruzalemor ḳandat aila, ou shomoe Zeruzalem ṭaun dekia ḳandi dila. ⁴²Tain ḳoila, “Haere hae! Aiz zudi tumi buztae, shanti kila ḳaim oe! Oile oḳon ita tumar sokur aoṛe roise. ⁴³Tumar ufre ila shomoe azir oibo, zebla dushmon oḳole deoalor sairo galabae maṭir ṭeki bandibo. Tumare berilibo, ar hokkolbae aṭok korbo. ⁴⁴Tara tumare ar tumar feṭor aolad oḳolre maṭir loge mishaibo. Tumar eḳ fattoror ufre aroḳ fattor roito nae. Ḳaron Allae tumare basaita ḳori ze shuzug disoin, tumi i shomoe-shuzugre sinlae na.”

Zeruzalemor kaba shorifo Hozrot Isa

⁴⁵Bade tain Baetul-Mukaddoso hamaila. Hamaia hono zetae bebsha ḳorat asla, ota hokkolṭire ḳedai dila. ⁴⁶Tain ḳoila, “Pak kalamo leḳa ase, amar gor oibo munazator gor, oile tumra ikanre ḍaḳaitor aḳra banailiso.”

⁴⁷Hozrot Isa forteḳ din Baetul-Mukaddoso gia nosiot ḳorta. Ou shomoe boṛo imam, moulana ar shomazor murobbi oḳole tanre marilita saila. ⁴⁸Oile kila tanre mara zae, er kunu fondi tara failo na. Ḳaron hoḳol manshe ashik oia dile-zane tan boean hunta.

Hozrot Isa dushmonor mukabila oila

¹Ou soforor ḳalo eḳdin Hozrot Isa Baetul-Mukaddosor maze, manshor gese Allai kush-ḳobri toblig korat asla. Aḳtau boṛo imam ar alim oḳol tarar murobbi oḳolre loia aia ḳoila, ²“Aichcha ḳo sain, tumi kun ḳemotae ita ḳam ḳorrae, tumare itar eḳtiar ḳegie dise?” ³Isae zuaf dila, “Te amio afnaintore zikairam, ḳoukka sain, ⁴Ehia nobie toubar gusol ḳoranir ḳemota faisla, manshor ges taki na Allar ges taki?”

⁵Ou tara eḳe-oinne zukti-foramish ḳorlo, “Zudi ḳoi Allar ges taki, te he ḳoibo, taile tan ufre iman anlae na ḳene? ⁶Ar zudi ḳoi manshor ges taki, te manshe amrare fattordi marba. Ehiare to tara Allar nobi ḳoia manoin.”

⁷Ou tara ḳoilo, “I ḳemota kuai taki faisla, amra zani na.” ⁸Isae tarare ḳoila, “Te amio ḳoitam nae, kun ḳemotae ita ḳorram.”

Angur bagan bagidaror kichcha

⁹Bade Isae manshore ou kichcha hunaila, “Eḳ giroste anguror bagan ḳorla, bade tan baganre ḳetal oḳolor gese bagi dia bout dinor lagi bidesh gelagi. ¹⁰Angur faḳar shomoe oile malike tan baṭ nibar lagi eḳ gulamre faṭaila. Oile ḳetal oḳole tare mair-doir ḳoria ḳali ate firai dilo. ¹¹Bade tain aroḳ gulamre faṭaila. Tara i gulamreo mair-doir ḳori beijjot ḳoria ḳali ate firai dilo. ¹²Bade tin nombor gulamre faṭaile, tara eo gulamre maria zoḳom ḳoria bare falai dilo. ¹³Teu baganor malike ḳoila, Ami kita ḳortam? Oḳon ami amar maear futre faṭaimu, teu tara manto fare. ¹⁴Oile malikor fuare dekia ḳetal oḳole ḳoilo, Ou fuau to tar bafor hoḳoltar malik oibo. Ao, ere maria falai dei. Teu malikor hoḳolta amra failimu. ¹⁵Oḳan ḳoia hari tare baganor bare nia kun ḳorilailo.

“Oḳon ḳoukka sain, baganor malike i bagidar oḳolre kita ḳorba? ¹⁶Tain aia tarare nifat ḳoriliba na ni? Ar tan bagan dusra manshor gese diba na ni?” Ita hunia tara ḳoila, “Nauzubilla! Allae fana deuk!”

¹⁷Teu Isae tarar bae saia ḳoila, “Te Allar kalamo ḳene ila leḳa ase,

Raz-mestoir oḳole ze fattorre beḳama ḳoia falai disil,

oḳṭa diau goror ian kuṭi oilo.

¹⁸I fattoror ufre ḳeu foṛle, i zon bangia ṭukra ṭukra oizibo, ar i fattoro ḳeuror ufre foṛle, he-o zon surmar oizibo.”

¹⁹Oḳan hunia-u moulana ar boṛo imam oḳole Isare dorilta saila. Tara buzilila, Isae i kichcha tarar nioteu ḳoira. Oile manshore ḍoraia tara kunta ḳorla na.

Bashshar ḳazna deoa zaiz ni

²⁰Erlagi tara Isare souke souke raḳla, tan ḳore ḳoezon guia lagaila. Guia oḳole mumini besh doria solleo, tarar niot oilo Isare ḳotar fando falaita, zate tane deshor fordan hakimor adaloto salan ḳorail zae. ²¹Ou guia oḳole Isare ḳoila, “Huzur, afne to hoḳolre homan souke deḳoin. Afne hok mat matoin, hok talim dein. Ḳeurore toakka na ḳoria, manshore Allar hok fot deḳain. ²²Te ḳoukka sain, Ruman bashsha Ḳoisorre ḳazna deoa zaiz ni, na nazaiz?”

²³Isae tarar ku-motlob buzilila. Buzia ḳoila, ²⁴“Deki, amare eḳṭa dinar deḳao.” Dinar dekia ḳoila, “Igur ufre ḳar sobi ar nam ase?” Tara ḳoila, “Bashsha Ḳoisoror.” ²⁵Isae ḳoila, “Te Ḳoisororta Ḳoisorre deo, ar Allarta Allare deo.”

²⁶Tan zuaf hunia tara taijjub bonia nirai oigela. Guia oḳole manshor samne tanre ḳotar fando falaito farlo na.

Aḳerator befare prosno

²⁷Bade Siddekia mozobor kisu manush Isar gese aila. Ou mozobor manshe mono ḳoroin, morar bade kunu zandaru ar zinda oita nae. ²⁸Tara Isare zikaila, “Huzur, Musa nobie amrar lagi ou niom lekia gesoin, kunu manshe tar bou toia niaoladi halote morigele, tar baie ou boure bia ḳoria mora bair oarish foeda ḳorbo. ²⁹Oḳon mono ḳoroukka, eḳ goro shat bai asil. Foela zone bia ḳoria niaoladi halote morigelo. ^30-31Bade dui nombor ar tin nombor baie ou beṭire bia ḳorlo. Ou laḳan tara shato baieu ou beṭire bia ḳoria niaoladi halote morigelo. ³²Heshe ou beṭio morigelo. ³³Te kiamotor din i beṭi ḳar bou oibo? Shato zoneu to i beṭire bia ḳorsil.”

³⁴Isae ḳoila, “I duniar manshe bia-shadi ḳoroin, ar bia-shadi dein. ³⁵Oile moutor bade zinda oia zera aḳerato kamiabir laḳ oizae, tara ar bia-shadi ḳorta nae, ba bia-shadi boitao nae. ³⁶Tarar kunu mouto oito nae, tara firistar laḳan oiziba. Moutor bade aḳer faoae tara Alla Pakor aolad boniziba. ³⁷Tur faṛor zalail zonglar boeanir maze Musa nobie buzaisoin, murda oḳol to zinda oia uṭoin, erlagiu bout age ze nobi oḳol mara gesoin Musae Mabudre hou nobi oḳolor Alla ḳoia ḍakila. Tain Mabudre ḳoila, Ibrahimor Alla, Isʼhakor Alla ar Iakubor Alla. ³⁸Te Alla to murda oḳolor Alla nae, tain zinda oḳolor Alla. Tan nozoro hokkol manushu zinda asoin.”

³⁹Teu ḳoezon alime ḳoila, “Huzur, afne to ḳaṭi mat matsoin.” ⁴⁰Heshe tara Isare ar kunu soal ḳorar shaosh failo na.

Alim oḳolre hedaeot

⁴¹Ermaze Isae ou alim oḳolre zikaila, “Manshe ḳene al-Mosire Daud nobir aolad ḳoin? ^42-43Zobur Shorifor maze Daude nizeu to oḳan ḳoira,

Mabude amar munibre ḳoila,

zotodin tumar dushmon oḳolre

tumar faor tole na falai,

otodin tumi amar ḍain galat boiro.

⁴⁴Daude to al-Mosire tan munib ḳoia ḍakila, te al-Mosi ḳemne Daudor aolad oiba?”

⁴⁵Manshe Isar boean hunra, ou shomoe tain shagrid oḳolre ḳoila, ⁴⁶“Alim oḳolor befare hushiar o. Tara lamba lamba zubba findia gurite kub bala fain. Bazar-aṭo gia salam faite fosond ḳoroin. Mosido gia samonor ḳataro boite ar mozliso gia dami zagat boite fosond ḳoroin. ⁴⁷Tara manshore deḳanir lagi lamba lamba dua ḳoroin. Hirbar ṛaṛi beṭintor gor-baṛi doḳol ḳoroin. Kiamotor din erar boṛo ḳoṭin shaza oibo.”

Ṛaṛi beṭir dan-ḳoerat

¹Hozrot Isae saia deḳla, doni oḳole Baetul-Mukaddosor lillar ḍegor maze dan-ḳoerat dira. ²Ermaze deḳla, kub gorib eḳ ṛaṛi beṭieo aia ḍegor maze duiṭa foesha dan ḳorlo. ³Dekia tan sahabi oḳolre ḳoila, “Ami tumrare hasa ḳota ḳoiram, ou gorib ṛaṛi beṭie hoḳol taki beshi dan ḳorse. ⁴Ḳaron baki hoḳole ḳoros ḳorar bade zeta deṛia roise, on taki tuṛa ongsho ḍegor maze dan ḳorse. Oile i beṭie nizor obab-onoṭon taḳleo, tair ḳamail hokkoltau dan ḳorilise.”

Kiamotor agor alamot

⁵Ḳoezon sahabie Baetul-Mukaddos kaba shorifor befare matila, ḳoila, “Deḳra ni, oto shundor shundor fattordi ar dan-ḳoeratdi gorḳanre hazail oise.” ⁶Isae tarare ḳoila, “Tumra ou zotota deḳrae, ola eḳ din aibo, zebla ita eḳ fattoror ufre aroḳ fattor roito nae. Hoḳolta maṭir loge mishizibo.”

⁷Sahabi oḳole tanre zikaila, “Huzur, ita kun zomanat oibo? Kun alamot deḳle buza zaibo, hi shomoe oigese?” ⁸Tain ḳoila, “Hushiar roio, ḳeu zanu tumrare be-fote na ney. Bout zone amar nam dori aia ḳoibo, shomoe oigese, amiu al-Mosi. Oile tumra itar ḳore zaio na. ⁹Tumra zebla zuddo ar gonḍogulor ḳobor hunbae, ḍoraio na. Ḳaron foela ita oibou oibo, oile ita to shesh nae.”

¹⁰Bade tain ḳoila, “Zatie zatir bifokke, razae razar bifokke zuddo ḳorbo. ¹¹Boṛo boṛo boisal oibo, zagae zagae nidan ar bezuita bemar-azare manush morba. Asmano-o kub ḍor-ḳofor nishana ar azob azob kudroti lila zair oibo.

¹²“Oile ita goṭar age manshe tumrare ḳedaibo, dorbo. Bisaror lagi mozlisor samne azir ḳorbo, zelo haraibo. Amar namor lagi tumrare raza-bashsha ar hakim oḳolor samne neoa oibo. ¹³Teu amar name toblig korar lagi tumra shuzug faibae. ¹⁴Oile tumra mono rakio, kita zuaf ditae, ita age sinta ḳorar kunu zorur nae. ¹⁵Ḳaron ami tumrare oula zoban ar hekmot zugaia dimu, tumrar bifokko oḳole ita firaito farto nae, er zuaf dibaro takkot oito nae. ¹⁶Tumrar ma-baf, bai-birador, ḳesh-kuṭum ar dust oḳoleo tumrare doraia diba. Tara tumrar kunu kunu zonre zane marailiba. ¹⁷Ar amar namor lagi tumrare hokkole ginnaibo. ¹⁸Oileo kunumonte-u tumrar matar eḳsa suloro ḳeti oito nae. ¹⁹Tumra imane mozbut roile, nizor hasaror zindegi hasil ḳorbae.

²⁰“Tumra deḳbae, sifai oḳole aia sairobae tone Zeruzalemre gerao ḳorilira, teu buzilio, Zeruzalemor binash aichche. ²¹Hi shomoe zara Ehudiar zilat taḳba, tara faṛedi gia bagouk. Zara ou Zeruzalemo taḳba, tara ṭaunor bare zauk. Zara gau-geramo taḳba, tara zanu kunumonte-u ṭauno na ain. ²²Ḳaron i oḳt oilo Allai gozobor oḳt, Allar kalamor aeat oḳol fura oibar oḳt. ²³Ish! I shomoe zeta beṭintor feṭo hurutta taḳba, zera huruttare bukur dud ḳaoaiba, erar bout ḳoshṭo oibo! Deshor ufre bezuita durgoti, ar Ihudi oḳolor ufre gozob nazil oibo. ²⁴Toluaror tole tara zan kuaiba, bondi oia hokkol zatir maze zaiba. Ou bidormi zatir ḳemotar shomoe fura oar ag forzonto, i Zeruzalem tarar faor tole roibo.

²⁵“San-shuruz ar asmanor terar maze nanan alamot deḳa zaibo. Duniar hoḳol deshor manshor ḳoshṭo oibo. Doriae utal-fatal ḳorbo. Ḍeur aoaze manush bedisha lagba. ²⁶Duniat kun dosha goṭibo ota sinta ḳoria ḍoror suṭe manush beush oizibo, asmani san-shuruz, tera hokkolta aula-zaula oizibo. ²⁷Ou shomoe deḳbae, ami Bin-Adome Allar kudroti shokti ar nuror mohimae megor kuṭit oia duniat toshrif aniar. ²⁸Ita hal-hokikot deḳle tumra mozbut oio, mata usa ḳorio, buzilio tumrar nazat daro aichche.”

²⁹Isae tarare ou misal hunaila, ḳoila, “Tumra ḍumur gas ar oinno gasaintor bae deḳo, ³⁰itar noea kuṛi-fata baroni deḳleu tumra buzilao, gormor din aichche. ³¹Oula tumra zebla deḳbae, ita hal-hokikot goṭer, te buzilio Allar bashshai nozdik aichche. ³²Ami tumrare hasau ḳoiram, ita hokkolta na goṭar age, i zomanar manush ḳoe oita nae. ³³Asman-zomin ḳoe oizibo, oile amar kalam kunudino ḳoe oito nae.

³⁴“Tumra nize hushiar roio, zate mozar mozar ḳani, mod ḳaia ṭal oa ar ruzi-ruzgaror neshae aula-zaula na o, arnae hou din aia aḳtau tumrare fando haraito fare. ³⁵Duniar tamam manshor ufreu hi din azir oibo. ³⁶Oile tumra hamesha hozag roio, ar dua ḳorio, zate ou zeta zair oibo ota faroia hari amar samne ubanir bol fao.”

³⁷Isae forteḳ din Baetul-Mukaddoso aia nosiot ḳorta. Bade rait oile tain baroia Zoetun faṛo zaitagi. ³⁸Hoḳol manshe tan boean hunar niote bian-sobre Baetul-Mukaddoso aita.

Hozrot Isar duk-koshṭo ar mout (22:1–23:35)

Hozrot Isa al-Mosire ḳatol ḳorar fondi

¹Ihudi oḳolor Ḳamir Saṛa Ruṭir Id ḳasat ailo, ou idor nam Azadi Id. ²Ibae moulana ar boṛo imam oḳole foramish ḳorla, Hozrot Isare am manshor ges taki lukaia kila ḳatol ḳorta. Tara am manshore kub ḍoraita.

Ihuda Iskariator beimani

³Ou shomoe tan barozon sahabir mazor eḳzon, en nam Ihuda Iskariat, en bitre shoetan hamailo. ⁴Ein Isare doraia deoar lagi lukaia Baetul-Mukaddoso gela. Gia honor daroga ar boṛo imam oḳolor loge foramish ḳorla, kun nomunae Isare tarar ato dorai deoa zae. ⁵Teu imam oḳol kub kushi oia oada ḳorla, tanre doraia dile tare boḳshish diba. ⁶Ete Ihudao razi oia manshor aforḳe, tanre dorai deoar shuzug tukanit roilo.

Hozrot Isar aḳeri mezbani

⁷Bade Azadi Id ailo, ou idor din meṛar baichcha kurbani deoa oe. ⁸Teu Isae sahabi Fitor ar Hannanre hukum dila, “Tumra gia amrar lagi idor ḳani tiar ḳoro, amra hoḳol aia eḳloge ḳaimu.” ⁹Era zikaila, “Huzur, afnar kial kita, amra kunano gia ḳana tiar ḳortam?” ¹⁰Tain ḳoila, “Huno, ṭauno hamaia harle tumra deḳbae, eḳ beṭae fanir ḳoila boria loia zaira. Tumra en ḳore ḳore zaio, gia ein ze goro hamaiba, ¹¹hou goror malikre ḳoio, huzure zikaisoin, tan sahabi oḳolre loia Azadi Idor ḳani ze goro ḳaita, i musafir ḳana kuai? ¹²He tumrare uforor talat hazail-faṛail boṛo ek kuṭa deḳaia dibo. Hono gia tumra randa-baṛa ḳorio.” ¹³Hasau tara gia tan ḳota mafik hoḳolta faila, faia Azadi Idor ḳanio tiar ḳorla.

¹⁴Bade shomoe aile Isae tan barozon sahabi loia ḳanit boila. ¹⁵Boia ḳoila, “Amar boṛo kial asil mosibotor mukamuki oibar age, aḳeri idor ḳani ḳan tumrare loia ḳaitam. ¹⁶Ami tumrare ḳoiram, Allar bashshair ashol morzi-munsha furafur hasil na oa forzonto, ami ar kunu idor ḳani ḳaitam nae.”

¹⁷Bade tain shorbotor fiala loia Allar shukria zanaia ḳoila, “Ou fuṭain tumra baṭia ḳailao. ¹⁸Ar huno, ami tumrare ḳoiram, Allar bashshai na aoa forzonto, ami ar anguror kunu shorbot ḳaitam nae.”

¹⁹Erbade ruṭi ato loia Allar shukria zanaila. Ruṭi ṭukraia sahabi oḳolre dila, ḳoila, “Mono ḳorio iṭa amar ḳaea, ou ḳaea ami tumrar lagi shofi dimu. Amare mono ḳorar lagi tumitaino ola ḳorio.”

²⁰Ḳaoar bade shorbotor fiala ato loia ḳoila, “Amar lour zoriae Allar loge manshor milonor ze noea usilla nazil or, ou fiala oilo er nishana. Amar ou lou tumrar nazator lagi dimu. ²¹Te deḳrae ni! Amare zegie doraia dibo, he oḳon amar loge ou dostarḳanat boia ḳar. ²²Allae zela hukum ḳorsoin, ami Bin-Adomor mout to olau oibo. Haere hae! Lannoti hou adom, zegie amare doraia dibo.” ²³Sahabi oḳole eḳe-oinnore zikaila, “Te amrar mazor kun manshe ila ḳam ḳorbo?”

Kun zon hoḳol taki boṛo

²⁴Ou shomoe sahabi oḳolor maze kun zon hoḳol taki boṛo, ota loia tarar maze torka-torki lagigelo. ²⁵Teu Isae tarare ḳoila, “Bidormi deshor raza oḳole tarar prozar ufre munibgiri deḳain. Tarar zomidarre ḳoa oe zonogonor dust. ²⁶Oile tumra ilan oio na. Tumrar maze zein hoḳol taki boṛo, ein hoḳolor huru ouk. Ar zein neta, ein ḳadimdaror laḳan ouk. ²⁷Ḳo sain kun zon boṛo? Zein ḳana ḳain, na ze ḳadimdari ḳore? Zein ḳana ḳain einu nae ni? Te ami nizeu to tumrar ḳadimdari ḳoriar.

²⁸“Huno, amar hoḳol bala-mosiboto tumra amar loge loge aslae. ²⁹Ar amar batuni bafe amare zela godi ar ḳemota dan ḳorsoin, amio oula tumrare ḳemota dan ḳorram. ³⁰Ou ḳemota faia, tumrao amar bashshait dakil oia amar loge boia ḳana-fina ḳaibae, amar loge godit boia Boni Israilor baro gusṭir bisar-adalot ḳorbae.

Hozrot Fitoror befare agam ḳobor

³¹“Saimon, Saimon, huno, dan-saul zela saindi saniain, shoetaneo tumrare ola saniaito saise. ³²Oile tumar lagi ami aroz ḳorsi, tumar iman zanu ḳomzur na oe. Te tumi eḳbar gelegio touba ḳoria zebla firot aibae, ou shomoe tumar ou baiaintor imani bolo mozbut ḳorio.” ³³Fitore ḳoila, “Huzur, ami to afnar loge oia zelo zaite, ba zan diteo tiar asi.” ³⁴Tain ḳoila, “Fitor, ami tumare ḳoiram, aiz fotabala murgae bang dibar ageu, tumi tin-tinbar ḳoibae, tumi amare sino na.”

³⁵Bade tan sahabi oḳolre zikaila, “Ḳo sain, ami zebla tumrare ṭeḳar toli, gaiṭ-buski ita kunta na dia ḳali faoe faṭaislam, hi shomoe tumrar kuntar obab oisil ni?” Tara ḳoila, “Ji-na, kunu obab oise na.” ³⁶Isae ḳoila, “Te oḳon ami ḳoi, oḳon zar ṭeḳar toli ba gaiṭ-buski ase, he ota loge raḳouk. Zar toluar nai, he tar saddor besia toluar ḳorid ḳorouk. ³⁷Pak kalamor aeato to leḳa ase, tanre naforman oḳolor ḳataro milail oibo. I aeat to amar ufor diau folibo. Amar befare zotota leḳa ase, ita hokkolta oḳon folizar.” ³⁸Teu sahabi oḳole ḳoila, “Huzur deḳoukka, ino duḳan toluar ase.” Tain ḳoila, “Otau to bout.”

Zoetun faṛo Hozrot Isar toklif

³⁹Ḳana-finar bade Isa baroia boraborkur laḳan hou Zoetun faṛo gela, sahabi oḳolo tan ḳore ḳore gela. ⁴⁰Hono gia harle Isae tarare ḳoila, “Tumra dua ḳoro, zate kunu forikkat na foṛo.” ⁴¹Ḳoia hari sahabi oḳolor ges taki sair nol foriman duroi gia, zanu fatia dua ḳorat boila. ⁴²Tain ḳoila, “Behesti baba, tumar ichcha oile mosibotor i fialaṭa amar ges tone horailao. Oile amar ichchae nae, tumar ichchaeu ouk.” ⁴³Teu behest taki eḳ firista aia Isare doroshon dia tan bol baṛaila. ⁴⁴Bade tain monor duke fereshan bonia aro ḳator oia dua ḳorla. Erlagi tan gotror gam lour fuṭar laḳan maṭit foṛto laglo. ⁴⁵Dua shesh ḳoria sahabi oḳolor ḳandat aia deḳla, monor duke ḳator oia tara gumai gesoin. ⁴⁶Dekia tarare ḳoila, “Gumairae ḳene? Uṭia dua ḳoro, zate forikkat na foṛo.”

⁴⁷Isa mato roisoin, ou shomoe aḳtau hikano bout manush aila. Erar hokkolor age asil Ihuda, he Isar barozon sahabir mazor eḳzon. Ihudae tanre hunga dibar lagi ḳandat ailo. ⁴⁸Isae tare ḳoila, “Ihuda, ami Bin-Adomre hunga dia dorai dirae ni?”

⁴⁹Ou shomoe Isar ḳandat zera asla, tara buzilila kita or. Buzia ḳoila, “Huzur, otare amrar toluardi martam ni?” ⁵⁰Ḳoiau eḳ sahabie toluardi sed mari fordan imamor gulamor ḍainor ḳan ḳaṭilila. ⁵¹Oile Isae ḳoila, “Bad deo, ar mario na.” Oḳan ḳoia tain hi gulamor ḳan atai dia tare bala ḳorilla.

⁵²Hozrot Isare aṭok korat zoto boṛo imam, Baetul-Mukaddosor daroga, ar murobbi oḳol aisla, Isae tarare zikaila, “Manshe sur-ḍaḳait dorte zela laṭi-sulfi loia zain, tumra amare dorat oula aiso ni? ⁵³Ami to forteḳ dinu Baetul-Mukaddoso tumrar samne aslam, hi shomoe amare dorlae na ḳene? O, oḳon nichoe tumrar shomoe, andairor razotto salu oise.”

Hozrot Fitoror oshikar

⁵⁴Dushmonor dole Isare aṭok koria fordan imamor baṛit loia gelagi. Sahabi Fitor duroi hori hori Isar ḳore oia gela. ⁵⁵Uṭanor maze bakka manshe aguin doraia tabanit lagla, Fitoro ono aia shorik oila. ⁵⁶Ou shomoe eḳ bandi beṭie agunir foror maze Fitorre dekia bala ḳori saia ḳoilo, “Ou beṭao hogur loge asil.”

⁵⁷Fitore ḳoila, “Na beṭi, ami ere siniu na.” ⁵⁸Tuṛa bade aroḳzone Fitorre dekia ḳoilo, “Tumio otar logor eḳzon.”

Tain ḳoila, “Na ba, ami nae.” ⁵⁹Aro eḳod gonṭa bade aroḳzone boṛo golae ḳoilo, “Oe, oe, oguo er loge asil, e-o to Galilor manush.” ⁶⁰Tain ḳoila, “Dur beṭa! Tumi ita kita mato, kunta buzi na.”

Fitore ota ḳoira, ermaze aḳtau murgae bang dilailo. ⁶¹Teu Isae muk firaia Fitoror bae saila. Saiteu Fitoror mono oigelogi, huzure to ageu ḳoisla, “Aiz fotabala murgae bang dibar ageu, tumi tinbar ḳoibae, tumi amare sino na.” ⁶²Teu Fitor bare gia kub ḳandon ḳandila.

Deshor fotua komiṭir samne Hozrot Isa

⁶³Hozrot Isare doria ania faradar oḳole tanre ṭaṭṭa-moshkora ar mair-doir ḳorlo. ⁶⁴Tan souk bandia ḳoilo, “Hoi, tui bule nobi, te oḳon gaibi ḳo sain, tore ḳegie marlo?” ⁶⁵Oula aro boutta ḳoia tanre beijjot ḳorlo.

⁶⁶Rait fuanir bade deshor fotua komiṭir murobbian, boṛo imam ar alim oḳol dola oila, ar Isare tarar samne anaia ḳoila, ⁶⁷“Tumi zudi Allar oada ḳora hou al-Mosi o, te amrare ḳo.” Isae ḳoila, “Ami ḳoileo to tumitain ekin ḳortae nae. ⁶⁸Kunta zikaileo zuaf ditae nae. ⁶⁹Oile ami Bin-Adom oḳon takiu arshe-azimo Allar ḍainor kursit boimu.” ⁷⁰Teu hokkole zikailo, “Te tumiu kita Allar ḳas maear zon Ibnulla ni?” Tain ḳoila, “Oe, tumitainu to ḳoirae, amiu hein.” ⁷¹Teu tara hokkole ḳoilo, “Te ar shae-shakkidi kita ḳortae? Amra nizor ḳaneu to tar zobanbondi hunlam.”

Ruman hakimor samne Hozrot Isa

¹Tara hoḳole eḳloge dol bandia Isare loia Ruman hakim Filator gese gela. ²Gia Isar bifokke nalish dila. Tara ḳoila, “Amra deḳsi, ou beṭae amrar deshor manshore bigṛai der, he manshore nished ḳore amrar bashsha Ḳoisorre ḳazna dita na. He nizeu bule al-Mosi namor eḳ bashsha.” ³Filate Isare zikaila, “Tumi kita Ihudi oḳolor bashsha ni?” Tain zuaf dila, “Afne zela ḳoin, olau.” ⁴Teu Filate boṛo imam ar hoḳol manshore ḳoila, “Ami to i ashamir kunu dushu fairam na.” ⁵Oile tara zid ḳoria ḳoilo, “I beṭae Galil zila taki arombo ḳoria asta Ehudia zilar manshore bigṛaia, oḳon amrar ono aiao hokkolre bigṛailar.”

⁶Ikan hunia Filate zikaila, “He kita Galilor manush ni?” ⁷Hakime zebla hunla, Isar baṛi oilo Raza Herudor odinor Galil zilat, hunia tain Isare Herudor gese faṭai dila, ḳaron Herudo ou shomoe Zeruzalemo asla.

⁸Isare dekia Herud kub kushi oila. Tain bout din dori Isare deḳta saira. Age tain Isar befare boutta hunchila, erlagi tan monor asha asil, Isae tanre kunu keramoti-muzeza deḳaiba. ⁹Tain Isare bout nomunar prosno ḳorla, oile Isae itar kunu zuaf dila na. ¹⁰Adaloto ubaiao boṛo imam ar moulana oḳole kub gorom oia Isar bifokke nalish hunanit roila. ¹¹Erloge Herude ar tan sifai oḳoleo Isare ṭaṭṭa-moshkora, beijjoti ḳorla, hesh-mesh tanre bashshai soḳsoḳa lebas findaia hakim Filator gese firot faṭai dila. ¹²Er age Raza Herud ar hakim Filator maze dushmoni asil, oile ou din takiu tarar maze dusti oigelo.

¹³Bade Filate boṛo imam, murobbi oḳol, ar am manshore ekkano dola ḳoria, ¹⁴ḳoila, “Ou ashamire tumra doria ania amar gese nalish dilae, he hokkol manshore bigṛailar, oile ami to tumrar samneu tare zera ḳorlam, te tumra zela nalish diso, tar maze to ila kunu dushu failam na. ¹⁵Ar Raza Herudeo nichoe tar kunu dush faisoin na, erlagiu tain tare amar gese firot faṭaisoin. Ami deḳram, moutor shazar zuka kunu dushu he ḳorse na. ¹⁶Te ami tare singladi maria saṛi dimu.” ¹⁷Ashole hakim Filator reoazo asil, tain Azadi Idor oḳto eḳzon ḳoedire ḳalas dita.

¹⁸Oile manshe eḳloge sillaia ḳoilo, “Na, na, ogure marilao. Barabbare saṛi deo.” ¹⁹Ou Barabbare age zelo harail oisil, he Zeruzalem ṭauno kun ar shontrash ḳorsil. ²⁰Oile Filate Isare saṛi deoar niote hirbar tarar loge batchit ḳorla. ²¹Ta-o tara eḳloge sillaia uṭlo, “Ogure solibo deo, solibo deo.” (Solib oilo laḳṛidi banail manshore loṭḳaia marar eḳ zinish.) ²²Filate tin-tinbar tarare zikaila, “Ḳene? I ashamie kita dush ḳorse? Moutor shazar zuka tar kunu dushu ami fairam na. Ami ḳali singladi maria tare saṛi dimu.” ²³Oile tara mairmuki oia, sillaia, misil lagaila, “Ogure solibo loṭḳao, solibo loṭḳao.” Sillanir suṭe tarar dabi fura oilo. ²⁴Tarar dabi mafiku Filate rae dilaila. ²⁵Tain Hozrot Isare tarar bod ḳaish mafik tarar ato saṛi dila ar hou kuni-shontrashire ḳalas dilaila.

Solibor ufre Hozrot Isa al-Mosir mout

²⁶Hakimor rae faia sifai oḳole Isare ḳatol ḳorat loia zaira. Ou shomoe Saimon namor Kuriniar eḳzon manush gau taki ṭauno aoat asil. Tara ou beṭare doria laḳṛidi banail solib tar ḳando tulia dia ḳoilo, he ogu loia Isar ḳore ḳore zaito. ²⁷Isar ḳore ḳore bout manush asil, erar loge bout beṭino asla. Tara tan lagi bilaf ar ahazari ḳoria bukut tabaia ḳandon lagaila. ²⁸Oile Isae tarar bae saia ḳoila, “O Zeruzalemor mai oḳol, amar lagi ḳandio na. Tumra nizor lagi ar nizor fua-fuṛir lagi ḳando. ²⁹Huno, omon eḳ din aibo, zebla manshe ḳoiba aṭkura beṭinu boṛo ḳofali. Zerar kunu huruttau oise na, bukor dudo kunudin ḳaoaise na, tarau ḳofali. ³⁰Hi shomoe manshe boṛo boṛo faṛore ḳoibo, tumra aia amrar ufre foṛo. Faṛor ṭilla oḳolre ḳoibo, amrare lukaia raḳo. ³¹Tumra deḳrae na ni, taza gasreu itae ou halot ḳorra, te hukna gasor kun dosha oibo.”

³²Hozrot Isar loge ḳori marar lagi sifai oḳole duizon dagi ashamire loia ailo. ³³Bade Matar-Kuli namor zagat ania, tara Isare ar hou duio dagi ashamire gasor ṭukradi banail solibo loṭḳailo, eḳzonre tan ḍain galat, aroḳzonre bau galat loṭḳailo. ³⁴Ou shomoe Isae ḳoila, “Baba, erare maf ḳori dilao. Tara to buzer na tara ita kita ḳorer.”

Bade tara tan ḳafoṛ-sufoṛ nita ḳori loṭari maria baṭa-baṭi ḳorla. ³⁵Bout manshe ubaia ita deḳla, oile tarar murobbi oḳole Isare ṭiṭkari maria ḳoila, “He to bout manshor zan basaito, he zudi hasau Allar oada ḳora hou al-Mosi oe, te oḳon tar nizor zano basauk.” ³⁶Ruman sifai oḳoleo tanre loia moshkari ḳorlo, tara ṭenga anguror shorbot loia tan ḳandat gia ḳoila, ³⁷“Tumi zudi Ihudi oḳolor hasaror bashsha o, te oḳon nizor zan basao na.” ³⁸Tan matar ufre ekkan sainborḍ lagail oilo, hono leḳa asil, “He Ihudir bashsha.”

³⁹Ou shomoe tan loge aro ze duizon ashamire solibo loṭḳail oisil, ota eḳzone tanre ṭiṭkari maria ḳoilo, “Tumi bule hou al-Mosi? Te oḳon amrare ar tumareo basao na.” ⁴⁰Oḳan hunia dusra zone ere damki dia ḳoilo, “Tumi kita Allareo ḍorao na ni? Tumio to ou homan shaza fairae. ⁴¹Ar amra to fairam amrar usit shaza, amra zelan ḳam ḳorsi oulan fairam. Oile ein to kunu dushu ḳorsoin na.” ⁴²Bade he ḳoilo, “O Isa, afne firia aia zebla nize bashshai ḳorba, ou shomoe ḳano amare iad raḳoin zanu.” ⁴³Tain ḳoila, “Ami tumare hok kota ḳoiram, tumi aiz takiu amar loge arshe-azimo taḳbae.”

⁴⁴Ou shomoe beil onuman duifor, er bad taki zuhoror bad forzonto tin gonṭa dori asta desh andair oigelo. ⁴⁵Shuruzor for nibigelo. Ermaze Zeruzalemo kaba goror fobitro herem shorifor fordaḳan, ufre taki tol forzonto siṛia dui ṭukra oigelo. ⁴⁶Heshe Isae zure aoaz ḳoria ḳoila, “Baba, amar ruh tumar ato shofia dilailam.” Oḳan ḳoiau aḳeri dom falaia inteḳal ḳorla. ⁴⁷Ruman sifair ze boṛo ofisar hono fara deoat asla, ein Isar moutor i halot dekia Allar tarif ḳoria ḳoila, “Nichchoe, i besaṛa ḳaṭi dindar manush asla.” ⁴⁸Ar ita deḳar lagi zoto manush dola oisla, tarao i halot dekia bukut mari mari ahazari ḳoria firia gela. ⁴⁹Isar forisito zon oḳole, ar Galil zila taki zeta beṭin tan loge oia aisla, tara hokkole duroi ubaia ita deḳla.

Hozrot Isar ḳoebor

^50-51Deshor fotua komiṭir eḳzon ijjoti membar asla, en nam Iusuf, en baṛi Arimatia gaut. Ein to forezgar ar hok manush. Isare ḳatol ḳorar ou ku-dandat tain tarar loge razi oila na. Tain Allar bashshair lagi bar saoat asla. ⁵²Ou Iusuf hakim Filator gese gela, gia Isar lash nita saila. ⁵³Bade Hozrot Isar lash solib taki lamaia, ḳafon findaila, ar fattor kudia banail oula ek koeboror maze dafon ḳorla, i ḳoeboro kunudin ar ḳeurore dafon ḳora oise na.

⁵⁴I din asil Ihudir zummar agor din, tuṛa badeu Zummabar shuru oizibo. ⁵⁵Ar zeta beṭin Galil taki Isar loge oia aisla, tara Iusufor ḳore ḳore gia hou ḳoebor deḳla, ar kilaḳan tan lash dafon ḳora oilo eota deḳla. ⁵⁶Bade tara firia gia hari ator-gulaf ar sondon-molom banaila, heshe shoriotor hukum mafik zummar din ziraila.

Moutor bade zinda oila Hozrot Isa (24:1–53)

Hozrot Isa zinda oar shakki-forman

¹Ou beṭinte zeta ator-gulaf tiar ḳorsla, haftar foela din kub sobre tara ota loia, Isar ḳoeboror ḳandat aila. ²Aia deḳla, ḳoeboror mukor fattorḳan horail oigese. ³Dekia tara ḳoeboror bitre hamaia deḳoin, Isar lash to ḳoeboro nai. ⁴Teu tara sintat foṛigela. Ou shomoe dola soḳsoḳa ḳafoṛ finno duizon aia tarar ḳandat ubaila. ⁵Erare dekia beṭinte ḍoraia mata nuailila. Ou duiozone tarare ḳoila, “Ogo, tumitain zindare ḳene murda oḳolor maze aia tukairae? ⁶Tain to ono nai, tain zinda oigesoin. Tain Galilo taḳte tumrar gese kita ḳoisla, mono ḳoria deḳo. ⁷Tain ḳoisla na ni, Bin-Adomre naforman manshor ato dorai deoa oibo. Tanre solibo loṭḳaia ḳatol ḳora oibo, oile moutor tin dinor din hirbar zinda oia uṭba?”

⁸Oḳan hunteu Isar agor ḳota oḳol tarar mono oigelo. ⁹Tara ḳobrostan taki firia gia, hou egaro zon sahabire ar baki hoḳolor gese ḳobor zanaila. ¹⁰Mogdilini Moriom, Shuhana, Iakubor ma Moriom ar tarar loge zeta beṭin asla, era hoḳole gia i ḳobor ḳoila. ¹¹Oile zera ita hunla, era mono ḳorla ita nichoe baze mat, ita beṭintor mat tara ekin ḳorla na. ¹²Oile Fitor douṛaia ḳoeboror ḳandat gela. Gia unda oia deḳla, ḳali ḳafonḳan foṛi roise. Ita dekia tain taijjub bonia firot aila.

Duizon shagride zinda Isare deḳla

¹³Ou dinu duizon shagrid Zeruzalem taki shat mail duroi Imuas namor eḳ gaut zaoat asla. ¹⁴Foto tara ota befar oḳol loiau mati mati zaira. ¹⁵Tara mato roisoin ou shomoe aḳtau Isa nize tarar ḳandat aia eḳloge aṭa dorla. ¹⁶Oile tarar sokut saṭa lagi gesil, tara Isare dekiao sinla na. ¹⁷Isae tarare zikaila, “Aṭi aṭi afnara ita kitar batchit ḳorra?” Ikan hunia era muk bezar ḳori ubai gela. ¹⁸Ermaze Kiliofas name eḳzone Isare ḳoila, “Afneu eḳmatro zon, zein hunchoin na i ḳoedine Zeruzalemo kita goṭise?”

¹⁹Isae tarare zikaila, “Kita goṭise ba?” Tara ḳoila, “Nasarotor Isare loia zotota goṭise. Tain to Allar nobi, tan mukor zoban ar ḳame-ḳaze Allar nozoro ar hoḳol manshor sokuto kub takkoti ar mortuba-ala nobi asla. ²⁰Amrar boṛo imam ar murobbi oḳole tanre zane marar lagi Ruman oḳolor ato doraia dilaila, tara tanre nia solibor ufre ḳatol ḳorilise. ²¹Oile amrar asha asil, tain Boni Israilre azad ḳorba. Aiz tin din oilo i goṭona goṭise. ²²Ar amrar logor ḳoezon beṭi manshe aia amrare taijjub banailisoin. Tara kub sobre Isar ḳoeboro gesla, ²³gia deḳsoin, tan lash nai. Tara firot aia ḳoila, tara firistar doroshon faisoin, ar firista oḳole tarare ḳoisoin, Isa zinda asoin. ²⁴Bade amrar loge zara asla, tarar mazeo ḳeu ḳeu ḳoeboro gia deḳla, beṭintor ḳotau hasa, Isar lash ḳoeboro nai.”

²⁵Hoḳolta hunia Isae tarare ḳoila, “Afnara to kuntau buzoin na. Afnaintor dil ola oshaṛ bonigese ni? Allar nobi oḳole zeta bataia gesoin, otareo afnara ekin ḳorra na. ²⁶Nobi oḳole ḳoisoin na ni, Allar oada ḳora al-Mosie duk-mosibot shoijjo ḳoria hari tan zalal ar gourob hasil ḳorba?” ²⁷Bade tain Musa nobir Tourat kitab taki shuru ḳoria, hokkol nobir kitabor maze tan befare zotota leḳa ase, ota tarare buzaila.

²⁸Ar ze gaut zaita ḳori tara roana disla, hou gaur ḳandat aile Isae aro duroi zaoar bab deḳaila. ²⁹Oile tara kub minot-ḳajji ḳoria tanre ḳoila, “Oḳon to beil gesegi, hainja oizar, te raitḳan afne amrar gese roi zaukka.” Ou tain roar lagi baṛit hamaila. ³⁰Bade zebla ḳanit boila, ou shomoe Isae ruṭi loia ṭukraia Allar shukria adae ḳoria tarare dila. ³¹Teu tarar souk kuligelo, tara Isare sinilila. Sinar loge logeu tain erar ges taki auṛi dilaila. ³²Bade tara eḳe-oinnore ḳoila, “Foto zebla tain amrar loge batchit ḳorsla, amrare Allar kalam buzaia disla, hou shomoe amrar dilor maze eḳ eshki foeda oisil na ni?”

³³Loge loge tara duiozon baroia Zeruzalem aila. Aia hou egaro zon sahabi ar baki hokkolre ekkano boat faila. ³⁴Tara ono boia ota matira, Hozrot Isa asholeu zinda oigesoin, zinda oia Saimon-Fitorre deḳa disoin. ³⁵Ou shomoe hou duiozoneo erare ḳoila, fotor maze tara kila Isar deḳa faila, ruṭi ṭukraibar shomoe kila tanre sinla, ita hoḳolta zanaila.

Zinda Isare hoḳol shagride deḳla

³⁶Sahabi oḳole to ota loia batchit ḳorra, ou shomoe aḳtau Isa nize ono aia tarar mazḳano ubaia ḳoila, “Assalamu alaikum.” ³⁷Tane dekia tara kub ḍoraigela, mono ḳorla but aise. ³⁸Isae tarare ḳoila, “Tumra oto ostir oigelae ḳene? Ḳene tumrar dilo shondoe hamailo? ³⁹Amar at-fao balamonte deḳo, deḳo na, i to ami. Amare ataia deḳo, butor to amar laḳan aḍḍi-mangsho nai.” ⁴⁰Oḳan ḳoia tain nizor at-fao tarare deḳaila. ⁴¹Oile tara tane dekia oto beshi kushi oila, kushir suṭe bedisha bonigela, kunta bishash ḳorta farla na. Teu Isae tarare ḳoila, “Ino ḳaibar kunta ase ni?” ⁴²Tara eḳ ṭukra biran mas tanre dila. ⁴³Ou mas tain hoḳolor samne ḳaila.

⁴⁴Ḳaia erare ḳoila, “Ami zebla tumrar loge aslam, hou shomoe tumrare ḳoislam na ni, Musa nobir Tourat Shorif, nobi oḳolor sohifa, ar Zobur Shorifor maze zeta leḳa ase, ita hoḳolta nichchit folibo.” ⁴⁵Oḳan ḳoia hari, tain sahabi oḳolor dilor duar kuli dila, zate Allar kalamor mani era buzta faroin. ⁴⁶Tain ḳoila, “Allar kalamo leḳa ase, al-Mosie bout ḳoṭin duk-toklif faiba, moutor tin dinor din tain murda taki zinda oiziba. ⁴⁷Zekunu manshe tan name touba ḳorle, gunar mafi magile mafi faibo, ou boeani Zeruzalem taki shuru oia asta duniar hoḳol zatir ḳano fousani lagbo. ⁴⁸Tumrau i hokkoltar shakki. ⁴⁹Ar huno, amar batuni bafe zeta dan ḳorar oada ḳorsoin, ami ita tumrar gese bezimu. Oile behest taki bol-takkot na faoa forzonto, tumra ou Zeruzalemo roio.”

Hozrot Isare behesto tulia neoa oilo

⁵⁰Bade Isae sahabi oḳolre loia Baet-Ania gaur muko gela, gia tain at tulia tarare dua dila. ⁵¹Ar ou duar haloteu tain tarar ges tone alog oigela, tanre behesto tulia neoa oilo. ⁵²Tara hoḳole tanre soizda ḳoria, kub kushi oia Zeruzalemo firot aila. ⁵³Ar Baetul-Mukaddosor maze hamesha Allar hamd-tarif ḳorat roila. Amin.