Asmani Kitab
Hozrot Iunus nobir sohifa
Siloṭi bashae torjoma
Forisiti
Ou sohifat amra kub boṛo boṛo nanan kudroti goṭonar ḳota faimu. Foela, Alla Pakor eḳzon nobie Allar hukum mante razi oila na. Dusra, masor feṭo eḳ manush tin din, tin rait zinda roila. Tin nombor, ou nobi zoto zagatu gela na ḳene, gia deḳla, ḳafir-mushorik oḳole, murtifuzari manshe, tan saiteo beshi Allare mane, ar Allar morzi-munsha tara aro balamonte buze. Ou nobi oila Hozrot Iunus (a:). Ashole, tain Allar hukum na manar fisone boṛo eḳ ḳarono asil, ḳaron oilo, Allae to tanre Ninob ṭauno toblig ḳorar lagi faṭaita saila, ar i Ninobor manush asla hou zomanar hoḳol taki nisṭur ar zulumbaz zati. Ḳali ikan nae, tara hamesha Iunus nobir nizor zati Boni Israilor loge laṛai-zuddo ḳorta.
Asmani kitab fobitro Injil shorifo, Hozrot Isa al-Mosie tan nizor zatir manshor dush deḳaia ḳoila, “Iunus nobi zela masor feṭo tin din, tin rait asla, amio oula tin din, tin rait maṭir tole roimu. Kiamotor din hou Ninob ṭaunor murda oḳol uṭia hari, i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus takio aro mohan eḳzon ino asoin, ta-o manshe touba ḳorer na.”
Mul ḳota oilo, Hozrot Isa al-Mosir zomanar manshe eḳ Allare ṭiku manta, tara kub alla-billa ḳorta, oile tara guna-naformanir ḳam bad na deoae, gunar lagi touba na ḳorae Allar dorbaro dushi roila. Oile Ninob ṭaunor hou naforman zulumbaz ar murtifuzari manshe zebla touba ḳorla, tara loge loge Allar dorbaro doya-meherbani faila, ar nichchit gozob taki basigela. Alla to rohmanur rohim, tain nizor bondar ḳas dushmonreo maea ḳoroin, oile Alla Pakor ou doya-maear lagi Iunus (a:) nobie foela gusa ḳorla, zudio heshe tain buz faila.
Hozrot Isa al-Mosir zonmor 750-800 bosor age ou sohifa leḳa oise.
Ermaze ase:
(1) Hozrot Iunus (a:) bagi zaoa (1 ruku)
(2) Masor feṭo Hozrot Iunusor touba (2 ruku)
(3) Ninob ṭauno toblig kora (3 ruku)
(4) Iunusor gusa ar Allar maea-momota (4 ruku)
1Hozrot Iunus (a:) bagi zaoa
1Mattar fua Iunusor gese Mabudor ou ohi nazil oilo, 2“Tumi roana deo, ar Ninob namor hou boṛo ṭauno zao, gia amar gozobor ḳota zanao. Tarar naformani amar dorbaro zair oigese.” 3Oile Iunuse Mabudor hukumor borḳelaf ḳoria bagia Spen desho zaoar lagi roana oigela. Tain Zafa namor zazor gaṭo gia Spen desho zaura ekkan zaz faia, zazor baṛa adae ḳoria bitre hamaia Mabudor samne tone bagita ḳori naiaintor loge oia roana dilaila.
4Oile Mabude doriar maze eḳ bezuita tufan saṛila. Tufanor ṭelae zazḳan bangi zaoar dosha oilo. 5Naiainte ḍoraia zarzir devtar gese ḳanda-ḳaṭi ḳorat lagla. Ar zazor bar ḳomanir lagi mal-samana doriat falai dilo. Oile Iunus zazor tolor talat lamia huti roila, hutia bedum gumo foṛla. 6Ou shomoe zazor sharong Iunusor gese gia ḳoila, “Oi mia! Tumi ḳemne gumairae? Kunta hunrae nae ni? Uṭo, tumar devtare ḍako. Oito fare tain amrar bae kial ḳorba, amrar zan binash oito nae.”
7Bade naiainte eḳe-oinne ḳoilo, “Ao amra loṭari maria deki, ḳar dushe i mosibot aise.” Teu tara loṭari marlo ar loṭarir maze Iunusor nam uṭlo. 8Ou tara tanre zikaila, “Ḳo sain, ḳar dushe amrar ufre i mosibot aise? Tumi kita ḳam ḳoro? Kuai taki aiso? Kun deshor manush? Tumi kun zator manush?” 9Iunuse zuaf dila, “Baiainre, ami eḳzon Ibrani, Israil zatir manush. Ami behestor malik Alla Mabudor ebadot ḳori, tainu doria ar zomin foeda ḳorsoin.” 10Tain aro ḳoila, Mabudor samne tone bagibar niote tain aia zazo uṭsoin. Ikan hunia tara kub ḍoraia ḳoila, “Hae, hae! Tumi ita kun zator ḳam ḳorlae?”
11Doriar tufan zebla aro bezuita bab dorlo, ou shomoe tara tanre zikailo, “Amra tumare kita ḳorle doria tir oibo?” 12Iunuse zuaf dila, “Amare doria doriat falai deo, teu doria shanti oizibo. Ami to zani, amar dusheu afnaintor ufre i gozobi tufan aise.” 13Oile naiainte tane na falaia zazḳan kinaro biṛanir lagi zan-foran shofia daṛ baila, tufanor zur ḳali baṛteu roilo, erdae tara zazḳan kinaro nita farla na. 14Teu tara Allar gese foriad ḳorlo, ḳoilo “O Mabud, rohom ḳoro, ou manshor zanor lagi tumi amrare mario na, i ni-oforadir zanor ḳarone amrare dayi ḳorio na. O Mabud, ita hoḳolta-u to tumar munsha.” 15Bade tara Iunus nobire doria doriat falai dilo, ar doriar tufanor ḍeu dom loililo. 16I halot dekia tara Mabudre kub ḍoraila. Tara Mabudor name foshu-kurbani dila ar mannot manla.
17Mabude kub boṛo eḳ masre zugai toisla Iunusre gililibar lagi, tain tin din, tin rait hou masor feṭo roila.
2Masor feṭo Hozrot Iunus (a:)-or touba
1Iunuse masor feṭo tone Mabud Allar dorbaro dua ḳorla.
2Mosiboto foiṛa Moula ḍakilam tore,
rohom ḳoria tui zuaf dile more.
Fatalor feṭo boia ami ḳandilam,
ḳobul ḳorilae aroz rohim rohman.
3Doriar muro bondu more falailae,
tumar fanir ḍeue amae bashai loia zae.
4Mile na didar tumar nai ḳanḍari,
tallashi ḳoria mukam zikir ḳori.
5Ḍeuor mazete foṛi zan doṛfoṛ ḳore,
doriar lota-fatae fesililo more.
6Fatalor tole gia miler na kinar,
ḳoredi saia deki duar nai ar.
Bondi oia ḳandi ami nirash bodone,
azad ḳorilae Moula goin gaṛa tone.
7Zan amar zae zae oilo zoḳon,
ḳator oia go bondu ḳorinu shoron.
Bikka mangilam ḳangal dorbare tumar,
arosho taki doyal deḳailae didar.
8Murti-fuza ḳore zara na faibo rohomot,
elami ḳoria tara arailo kudrot.
9Shukur-guzar ḳoro Iunus Mabud meherban,
tumar dorbare ami ḳorimu kurban.
Lilla-sodga dan-ḳoerat shofimu tore,
nazator Malik-Moulae basao amare.
10Bade Mabude hou masre hukum dila, mase Iunusre nia hukna zominor ufre bait ḳori falai dilo.
3Ninob ṭauno toblig kora
1Bade Iunusor ufre dusrabar Mabudor ou ohi nazil oilo. 2Tain ḳoila, “Tumi roana deo, oḳon hou boṛo ṭaun Ninob zao, ar ami tumare zeta batai dimu tumi outa tarar gese elan ḳoro.” 3Mabudor hukum mafik Iunus roana oia Ninob gela. Ninob oilo kub boṛo ṭaun, i ṭaunor eḳ mata taki aroḳ matat zaite tin din lagto. 4Iunus hou ṭauno hamaia eḳdinor fot gela, gia elan ḳorla, ḳoila, “O Ninobor bashinda oḳol, ar sallish din bade Ninob ṭaun uloṭ-faloṭ oizibo.”
5Ikan hunia Ninobor manshe Allar ufre iman anla, tara ruza raḳar lagi elan ḳorla, ar huru-boṛo hoḳole duḳ zair ḳorar lagi solar soṭ findila. 6I ḳobor gia bashshar dorbaro azilo, taino bashshai godi saṛia finnor lebas kulia, solar soṭ findia salir maze boila. 7Ar tain asta Ninob ṭauno ou elan ḳoraila, “Bashsha ar tan uzir-nazir oḳolor hukum oilo: Manush ba foshu, goru-sagol ḳeu kunuzat dana-fani kuntau muko dio na. 8Manush ar foshu, hoḳole milia solar soṭ findia dile-zane Allar nam lo, hoḳole zarzir naformanir fot saṛo ar zur-zulum bad dia Allar bae firo. 9Oito fare Allae rohom ḳorba, gozobor kial bodlailiba, tan dau dau ḳora gusa one ṭanḍa oiziba, ar amra binash oitam nae.”
10Allae tarar i halot deḳla, tara zarzir naformanir fot bad dia touba ḳorsoin. Dekia taino tan irada bodlailila, tarare age binash ḳorar ḳota ḳoileo oḳon ar binash ḳorla na.
4Hozrot Iunus (a:)-or gusa ar Allar maea-momota
1Oile Iunuse itar lagi teḳto oia kub gusa ḳorla. 2Tain Mabudor dorbaro foriad ḳorla, “O Mabud, ami desho taḳteu to zantam ilaḳan oibo. Erdae ami ageu Spen desho horia zaitamgi saislam. Ami to zani, tumi doya-momotae bora Alla, gusa ḳoro dir gotie, rohom ḳoro behishab, ar gozob nazilor befare tumar morzi bodlailao. 3O Mabud, ami oḳon aroz ḳorram, tumi amar zanḳan neogi, amar to basa taki morau bala.” 4Mabude zuaf dila, “Tumar gusa ḳora ṭik or ni?” 5Bade Iunus ṭaunor bara gela, gia fubedi eḳ zagat ḍera ṭangaia, ḍerar sebat boi roila. Ar ṭaunor kita dosha oe outa deḳar lagi bar saoat roila.
6Mabud Allae hono eḳ gas zugaila. I gasor lot baṛia lamba oia, Iunusor ḳoshṭo ḳomanir lagi tan matar ufre aramor seba dilo. Ar Iunuseo i gasor seba faia kub allade godgod ḳorla. 7Oile bador din fozor oḳto Allae egu fuk zugaila. Fuke aia gasor guṛi ḳaṭidilo, ḳaṭar bade igu hukaigelo. 8Bade zebla shuruz uṭlo, ou shomoe Allae fubali gorom haoa zugaila. Roide Iunusor matat kub gorom laglo, tain beush oizibar dosha. Teu Iunuse moron mangila, ḳoila, “Amar to basa taki moronu bala.”
9Oile Allae Iunusre ḳoila, “I gasor lagi tumar gusa ḳora kunu ṭik or ni?” Tain ḳoila, “Itar ḳaron ase. Ami gusa ḳoria-u mormu.” 10Mabude ḳoila, “Tumi to i gasor lagia kunu ḳoshṭo ḳorso na, ar igu boṛo-o ḳorso na. Igu to ḳali eḳ raite oise, ar eḳ raiteu morigese, tebou igur lagi tumar maea lagse. 11Oile i Ninob ṭauno to eḳ laḳ bish azaroro beshi manush asoin, zera nizor ḍain-bau kita sine na. Ar bout heman-zanuaro asoin, te oto boṛo ṭaunor bae ami kita maea-momota ḳortam na ni?”