al-Hannan

Fobitro Injil Shorif souta sifara

al-Hannan

Forisiti

al-Hannan sifarar talim oilo, Hozrot Isa al-Mosiu oila Allar kalam, ba Kalimatulla. Ou kalam oila, shoeong Allar buli ba aoaz, ze aoaze tamam zogotor zonom. Allar morzie ou kalame manshor surot faila, ar manush rufe duniat toshrif anla. Hozrot Isau oila Allar kalam, i ḳota ḳoite gele amra buztam fari, ḳali tan usillaeu amra mohan Alla Pakor ashol didar ba forisoe fai.

Amra aro deki, duniat aia Hozrot Isae bout keramoti-kudroti ḳam ḳorsoin. Ermaz taki ou sifarat nishana ba sin hishabe bishesh shatḳan keramotir bistarito boean ḳora oise, ze ḳam taki buza zae, Hozrot Isa al-Mosir zobanor buliu Allar kalam, tan ḳam oilo Allaru ḳam. I sifarar 20 nombor rukur 31 aeato ase, “Ḳali ou goṭona oḳol leḳa oise, zate ota tilaot ḳoria tumra iman ano, Hozrot Isau Alla Pakor oada ḳora hou al-Mosi, tainu Ibnulla, Allar ḳas maear zon, ar iman ania zate tan usillae tumra aḳeri zindegi hasil ḳoro.” (‘al-Mosi’, ‘Ibnulla’, ‘Allar ḳas maear zon’, i shob nam-ufadir mani bangia deḳba kitabor heshe ‘Kitab Shutro’ namor ongshot.)

I sifarat Hozrot Isae ‘amiu’ ḳoia nizor shatḳan bishesh gaibi nam raḳsoin. Ou shato nam oilogi: amiu zindegi-ruṭi; amiu duniar nur; amiu duar; amiu ashol raḳal; amiu kiamot ar zindegi; amiu fot, hok ar zindegi; ar, amiu ashol angur gas. I gaibi nam oḳol dia buza zae, ḳali tan usillae Allar didar faoa zae, ḳali tainu toraneala, duniar nazat deora zon, zein Adom zatire Iblisor ḳobza taki mukto ḳoroin.

Leḳok forisiti ar shomoe

Alla Pakor hukume ou sifara leḳsoin Hozrot Hannan (ra:). Tain Hozrot Isa al-Mosir 12 zon sahabir mazor eḳzon. Hozrot Isa dunia taki behesto toshrif neoar onuman 40-50 bosor bade ou sifara kitabor akare leḳa oise.

Ermaze ase,

(1) Allar kalam manush surote nazil. 1:1-18 aeat

(2) Hozrot Ehia ar Hozrot Isa al-Mosir foela ummot. 1:19-51

(3) al-Mosir toblig ar keramoti ḳamor boean. 2—12 ruku

(4) Ummot oḳolre Hozrot Isar aḳeri talim. 13—17 ruku

(5) Hozrot Isar ufre zulum-mosibot ar tan ufat. 18—19 ruku

(6) Hozrot Isa moutor bade zinda oila ar boute deḳla. 20—21 ruku

Allar kalam manush surote nazil (1:1–18)

¹Foelau kalam asla, kalam Allar loge asla ar ou kalam nizeu Alla asla. ²Hoḳol foela ou kalam Allar loge asla. ³Ou kalamor mazdi hokkolta foeda ḳora oisil, zotota foeda ḳora oise, er kunutau tanre saṛa foeda oise na. ⁴Tan maze zindegi asil, hou zindegiu oilo manshor nur. ⁵Ou nur andarir maze zoler, oile andaire i nurre ḳobza ḳorto farse na.

⁶Allae Ehia namor eḳzon manshore duniat faṭaila. ⁷Ou nuror befare shakki dibar lagi tanre faṭail oilo, zate tan zobanbondi hunia manshe iman ane. ⁸Tain nize hi nur asla na, oile nuror befare shakki dibar lagi duniat aisla. ⁹Ashol nur oila hou zon, zein hokkol manshore nur dan ḳoroin, tain duniat toshrif anra.

¹⁰Ou duniat tain asla, dunia tan usillae foeda oise, ta-o duniar manshe tanre sinlo na. ¹¹Tain nizor zomino aila, tan nizor mansheu tanre ḳobul ḳorlo na. ¹²Oile zoto zone tan ufre iman ania tanre ḳobul ḳorla, era forteḳ zonre tain Allar ḳas aolad, mani maear zon bonar eḳtiar dila. ¹³Ashole ou zon oḳolor zonom to manshor lou taki oise na, shorilor ḳaish ba manshor ichchaeo oise na, iṭa ḳali Alla takiu oise.

¹⁴Ou kalamu manush surote zonom loila ar amrar maze boshoti ḳorla. Bafor ḳas aolad hishabe tain ze zalal ar mohima faisoin, hou zalal ar mohima amra deḳsi. Tain to hok ar rohomote shullo-ana kamil.

¹⁵Ehia nobie tan befare boṛo golae shakki dila, ḳoila, “Einu to hou zon, zen befare ami age ḳoislam, amar bade eḳzone toshrif anra, tain ama takio mohan, amar bout ag takiu to tain asoin.”

¹⁶Tain shullo-ana kamil oae amra hoḳole rohomotor ufredi aro rohomot faisi. ¹⁷Musa nobir marfote Allae shoriot dan ḳorsila, oile Isa al-Mosir marfote hok ar rohomot aise. ¹⁸Allare to ḳeu kunudin deḳse na. Tan loge roura hou eḳmatro fut, mani tan ḳas maear zon, zein shoeong Moula, tainu Allare zair ḳorsoin.

Hozrot Ehia (a:) ar Hozrot Isa al-Mosir foela ummot (1:19–51)

Hozrot Ehia nobir forisoe

¹⁹Ihudi neta oḳole Zeruzalem ṭaun taki zebla ḳoezon imam ar Lebi shomazor kisu manshore Ehia nobir gese faṭaila, ou shomoe Ehiae erar gese shakki dila. Tara zebla zikaila, “Sab, afne ashole ḳe?” ²⁰Ehia nobie kunta na lukaia shikar oia ḳoila, “Ami to al-Mosi nae.” ²¹Teu tara tanre zikaila, “Te afne ḳe? Afne Ilias nobi ni?” Tain ḳoila, “Na, ami Ilias nae.” Ou tara zikaila, “Te afne kita agor zomanar hou nobi ni?” Tain zuaf dila, “Ji na.” ²²Tara hirbar tanre zikaila, “Taile afne ḳe? Amrare zera faṭaisoin, amra firia gia kita ḳoitam, afnar nizor forisoe kita?” ²³Ehiae zuaf dila, “Ami oilam hou aoaz, zen befare Hozrot Ishaea nobie batai gesoin,

Morubumir maze zure zure eḳzone elan ḳorra,

tumra Malikor fot sohi ḳoro.”

²⁴Ehia nobir gese zerare faṭail oisil, era asla Forishi shomazor manush. ²⁵Tara tanre zikaila, “Afne zebla al-Mosio nae, Ilias nobio nae ba agor zomanar hou nobio nae, te afne ḳene manshore toubar gusol dira?” ²⁶Ehia nobie tarare zuaf dila, “Ami to manshore fani dia toubar gusol ḳorairam, oile afnarar maze oula eḳ buzurgzon asoin, zenre afnara sinoin na. ²⁷I buzurg hou zon, zein amar bade toshrif anar ḳota asil. Tan faor zutar fitagesa kular laḳo ami nae.”

²⁸Zordan gangor aroḳ faro Baet-Ania gaut, Ehia nobi ze zagat toubar gusol ḳoranit asla, hou zagat ou soal-zuaf oilo.

Allai meṛar baichcha

²⁹Bador din Ehia nobie deḳla huzur Isa tan gese aira, dekia ḳoila, “Ou deḳrae ni Allai meṛar baichcha, zen usillae hokkol manshor gunar mafi oe. ³⁰Ein oila hou zon, zen befare ami age ḳoislam, amar bade eḳzone toshrif anra, ashole tain amar ag takiu asoin, ar tain ama takio ijjoti zon. ³¹Age to ami tanre sintam na, oile Boni Israilor maze tain zate forisiti fain, otar lagi ami age aia manshore fanidi toubar gusol ḳorairam.”

³²Bade Ehia nobie ou shakki dila, ḳoila, “Ami deḳlam ḳoitoror surote Pak Ruh asman taki lamia aila, aia en ufre azila. ³³Ami to tanre sintam na, oile toubar gusol ḳoranir lagi zein amare bezisoin, tain amare batai disoin zen, Allai Pak Ruhre zar ufre lamia aite deḳbae, einu hou zon, zein manshore Pak Ruhudi torikabondi diba. ³⁴Te ami ita deḳlam, dekia hari shakki diram, einu Ibnulla, Allar ḳas maear zon.”

Hozrot Isar foela sahabi

³⁵Bador din Ehia nobi ar tan duizon ummot hirbar hou zagat aila. ³⁶Ou shomoe Hozrot Isa aṭia zaira, tanre dekia Ehiae ḳoila, “Ou deḳrae ni Allai meṛar baichcha.” ³⁷Ehia nobir ou ḳota hunia hou duiozon Isar ḳore ḳore roana oigela. ³⁸Isae ḳoredi firia erare deḳla, dekia ḳoila, “Kita ba, tumra kita sao?” Tara zuaf dila, “Robbi, (mani ustad), afne kuai taḳoin?” ³⁹Isae tarare ḳoila, “Ao na, aia dekia zao.” Teu tara tan loge gela, gia deḳla tain kun zagat taḳoin, ar tarao asta din tan loge roila. Ou shomoe asoror oḳt aichche.

⁴⁰Ehia nobir ḳota hunia ze duizon Isar ḳore ḳore gesla, erar eḳzonor nam oilo Andrias, en bair nam Saimon-Fitor. ⁴¹Ou Andriase foela tan bai Saimonre tukaia bar ḳoria ḳoila, “Baisab huncho ni, amra to al-Mosire deḳsi.” al-Mosir mani oilo Allar ḳelafoti faoa zon. ⁴²Andriase Saimonre loia Isar gese aila. Isae Saimonor bae saia ḳoila, “Tumi to Saimon bin Iuhanna, oile oḳon taki tumare Koifa name ḍaḳa oibo.” Koifa mani Fitor, ba fattor.

⁴³Bador din Isae niot ḳorla, Galil zilat zaitagi. Ou shomoe tain Filifre deḳla, dekia ḳoila, “O Filif ao, aia amar ummot o.” ⁴⁴Filif asla Baet-Soeda gaur manush. Andrias ar Fitoror baṛio asil ou gaut. ⁴⁵Filife Notonelre tukaia bar ḳoria ḳoila, “Musa nobir Tourat kitabo ar asmani nobi oḳolor sohifat zen ḳota leḳa ase, amra to tanre deḳsi. Tain to Nasarot gaur Isa, tan bafor nam Iusuf.” ⁴⁶Ikan hunia Notonele Filifre ḳoila, “Dut! Nasarot taki bala kunta baroe ni?” Filife ḳoila, “Te aia deḳo.”

⁴⁷Isae deḳla, Notonel tan gese aira, dekia ḳoila, “Ou deḳrae ni eḳzon ḳaṭi Boni Israili. Tar maze kunu dundur-mundur nai.” ⁴⁸Teu Notonele Isare zikaila, “Afne amare ḳemne sinla?” Isae zuaf dila, “Huno, tumare ḍakibar age tumi zebla hou ḍumur gasor tole aslae, hou shomoe ami tumare deḳsi.” ⁴⁹Ikan hunia Notonele Isare ḳoila, “Huzur, afneu to Ibnulla, Allar ḳas maear zon. Afneu Boni Israilor bashsha.” ⁵⁰Isae tanre ḳoila, “Tumare hou ḍumur gasor tole deḳsi oḳan ḳoae tumi iman anlae ni? Huno, er takio aro bout boṛo boṛo keramoti tumi deḳbaene.” ⁵¹Bade Isae ḳoila, “Ami tumrare hok kota ḳoiram, tumra deḳbae behest kuligese, ar Allar firista oḳol ami Bin-Adomor ufre uṭa-lama ḳorra.”

al-Mosir toblig ar keramoti ḳamor boean (2:1–12:50)

Hozrot Isae fanire anguror shorbot banaila

¹Er duidin bade Galil zilar Kanna gaut eḳ bia asil. Hozrot Isar ma ou biat asla. ²Ou biat Isa ar tan sahabi oḳoleo daot faisla. ³Biar onusṭano zebla anguror shorbot furai gelo, ou shomoe Isar maʼe Isare ḳoila, “Erar anguror shorbot shesh oigese.” ⁴Isae tan maʼre ḳoila, “Mai go, ita to amar bishoe nae. Oḳono amar shomoe oise na.” ⁵Oile tan maʼe ḳadimdar oḳolre ḳoila, “Oba, tain zeta ḳoin, otau ḳoro.”

⁶Ihudir shoriot mafik uzu ḳorar lagi hino fattoror soeṭa gamla asil. Ita ekoṭat onuman dui-tin mon fani dorto. ⁷Isae ḳadimdar oḳolre ḳoila, “Ou gamlainto fani boro.” Teu tara iguin ṭefe ṭefe bori dilo. ⁸Bade tain ḳoila, “On taki tuṛa fani nia fordan babursire deo.” Teu tara olau ḳorlo. ⁹Babursie ou fani ḳaia deḳla, ita to anguror shorbot. Oile i shorbot kuai taki ailo, ikan tain zanta na. Ḳali ḳadimdar oḳole zanto. Erlagi babursie biar noshare ḍakia ḳoila, ¹⁰“Foela hoḳoleu manshore ḳaṭi shorbot ḳaite dey. Manshe ichchamoto ḳaoar bade zebla shesh oizae, ou shomoe ze shorbot dey, ita foela taki kisu bezal taḳe. Oile tumi ḳaṭi shorbot oḳono raḳso.”

¹¹Hozrot Isae Galil zilar Kanna gaut nishana hishabe ou foela keramoti deḳaia nizor mohima zair ḳorla. Ita dekia sahabi oḳole tan ufre iman anla.

¹²Erbade Isae tan ma, baiain ar sahabi oḳolre loia Kofornaum ṭauno gela, gia ḳoedin hono roila.

Zeruzalem Baetul-Mukaddoso Isa al-Mosi

¹³Ihudir Azadi Id gonai gele Isa Zeruzalem ṭauno aila. ¹⁴Zeruzalemo aia tain deḳla, fobitro Baetul-Mukaddos kaba goror shimanat kurbanir goru, meṛa ar faro besa-kina soler, ar ṭeḳar baṭṭar ḳarbari oḳolo boi roisoin. ¹⁵Ita dekia tain doṛi dia eḳ sabuk banaila, ar sabuk dia hoḳol goru-meṛa ar manshore in tone ḳedai dila. Ar ṭeḳar baṭṭar ḳarbari oḳolor ṭeḳa-foesha sitraia, tarar kesh baksho ulṭaia falaila. ¹⁶Faro besra oḳolre Isae ḳoila, “In tone hokkolta horao. Amar bafor gorre bazar banaio na.” ¹⁷Ou shomoe pak kitabor ou ḳota sahabi oḳolor mono oigelo, “Tumar goror lagi amar ze mohobbot, ou mohobboteu amar dilor maze agunir laḳan zoler.”

¹⁸Isar i ḳamor lagi Ihudi neta oḳole tanre zikaila, “Ita ḳorar odikar ze tumar ase, tar forman hishabe tumi kun keramoti deḳaibae?” ¹⁹Tain zuaf dila, “Afnara ou kaba gor bangilaukka, ami tin dinor bitre hirbar tulmu.” ²⁰Ikan hunia tara ḳoila, “I ebadot-ḳana banaite soesallish bosor lagsil, ar tumi kita tin dinor bitre banailibae ni?” ²¹Oile Isae ino Allar gor bolte nizor shorilor ḳotau ḳoisoin. ²²Erlagi Isa mora taki zinda oar bade sahabi oḳolor mono oisil, tain ou ḳotau ḳoisla. Teu sahabi oḳole pak kitabor ḳota ar Isae zeta ḳoisla, ota ekin ḳorla.

²³Azadi Idor shomoe Isae Zeruzalem roia zeta keramoti ḳam ḳorsila, ita dekia bout manshe tan ufre iman anlo. ²⁴Oile Isae nizore tarar gese dora dila na, ḳaron tain hoḳol manshore sinta. ²⁵Manshor befare tan kunu shakkir zorur asil na, tain erar dilor ḳobor zanta.

Noea zonom ar ekinor befare talim

¹Forishi oḳolor maze Nikodim name Ihudi oḳolor eḳzon neta asla. ²Eḳdin rait tain aia Isare ḳoila, “Huzur, amra zani, afne eḳzon ustad hishabe Allar ges taki aisoin. Afne zeta keramoti ḳam ḳorra, Alla loge na taḳle ḳeu ita ḳorto fare na.” ³Tain Nikodimre ḳoila, “Ami afnare hasau ḳoiram, noea ḳori zonom na loile ḳeu Allar bashshai deḳe na.” ⁴Teu Nikodime tanre ḳoila, “Manush buṛa oigele hirbar zonom loe kila? Dusrabar maʼr feṭo hamaia zonom loe ni?” ⁵Isae zuaf dila, “Ami afnare hasau ḳoiram, fani ar Pak Ruhu taki zonom na oile ḳeu Allar bashshait hamaito fare na. ⁶Roḳto-mangsho taki zetar zonom oe, ita to ḳali roḳto-mangsho. Ar Pak Ruhu taki zetar zonom, ita ruhu. ⁷Ami ze afnare ḳoilam, noea ḳori zonom loa zorur, ete taijjub oiba na. ⁸Batash tar zebae ichcha obae zae, ar afne tar aoaz hunoin, oile ḳoi taki ae ar ḳoi zae, ikan zanoin na. Te Pak Ruhu taki zerar zonom oise, tarar belaeo olaḳan oe.”

⁹Nikodime Isare zikaila, “Ikṭa kila oito fare?” ¹⁰Isae zuaf dila, “Afne Boni Israilor ustad oia-o ita buzoin na ni? ¹¹Afnare hasau ḳoiram, amra zeta zani oḳanu ḳoi, ar zeta deḳsi ou befare shakki dei. Oile afnara amrar shakki manoin na. ¹²Ami afnarare duniabi befare ḳoile zebla ekin ḳoroin na, te behesti befar ḳoile kila ekin ḳorba? ¹³Zein behesto taḳoin ar behest taki aisoin, hou Bin-Adom saṛa ar ḳeu behesto uṭsoin na.

¹⁴“Morubumir maze Musa nobie zela hafre usat tulchila, ola ami Bin-Adomreo usat tula oibo. ¹⁵Zate ze zone amar ufre iman ane, he aḳeri zindegi hasil ḳore. ¹⁶Alla Pake duniar manshore oto beshi maea ḳorla, i maear ḳatire tan ḳas maear zonre dan ḳorla. Ze manshe ou maear zonor ufre iman ane, he binash oe na, borong aḳeri zindegi hasil ḳore.

¹⁷“Allae manshore dushi forman ḳorar lagi tan maear zonre duniat faṭaisoin na. Ou maear zonor ḳatire manshe zate nazat fae, erlagiu faṭaisoin. ¹⁸Ze zone ou maear zonor ufre iman ane, tar kunu bisar oe na, oile ze iman ane na, tare ageu dushi shaibosto ḳora oigese. Ḳaron Allar eḳmatro maear zon, Ibnullar ufre he iman anche na. ¹⁹Tare dushi shaibosto ḳora oise, ḳaron duniat nur zair oise. Oile manshor bod ḳamor lagi nur taki andairre beshi bala faise. ²⁰Ze manshe bod ḳam ḳore, he nurre ginnae, tar bod ḳam oḳol zair oizibo ḳori he nuror gese ae na. ²¹Oile ze zon hok-halalir fote sole, he nuror gese ae, zate tar hoḳol ḳam Allar munsha mafik oise ḳori forman oe.”

Ehia nobie Isar befare ḳoira

²²Erbade Hozrot Isa ar sahabi oḳol Ehudia elaḳat aila. Hino tain sahabi oḳolor loge kisu din ḳaṭaila ar manshore toubar gusol ḳoraila. ²³Ou shomoe Salim namor eḳ gaur ḳandat Oinun namor eḳ zagat Ehiaeo toubar gusol ḳoranit asla. Hou zagat bout fani taḳae dole dole manush aia toubar gusol loila. ²⁴Ehia nobire ou shomoyo zelo bondi ḳora oise na.

²⁵Ou shomoe shoriot mafik pak-saf oar befar loia, Ehia nobir ummot oḳole Ihudir eḳ alimor loge torko lagai dila. ²⁶Bade tain tain Hozrot Ehiar gese aia ḳoila, “Huzur, zein Zordan gangor hofaro afnar loge asla, ar zar befare afne shakki disla, deḳra ni, hoḳol manush tan gese zairagi ar tain erare toubar gusol dira.” ²⁷Ikan hunia Ehiae ḳoila, “Behest taki deoa na oile ḳeu kunta fae na. ²⁸Tumrau to huncho, ami ḳoisi, ami al-Mosi nae, oile tan age amare faṭani oise. ²⁹Zar gese koinnare bia deoa oe, einu nosha. Noshar duste ḳali ubaia noshar mat hunoin ar tan golar aoaz hunia kushi oin. Ou laḳan amar kushio aiz fura oilo. ³⁰Tanre boṛo oite oibo ar ami hori zaitam oibo.”

Behest taki zein aisoin

³¹Zein ufor taki ain, ein hoḳolor ufre. Oile ze dunia taki ae, he to duniar, he duniabi matu mate. Zein behest taki ain, tan ashon hoḳolor ufre. ³²Tain hono zeta deḳsoin ar hunchoin, otar shakkiu dein. Ḳeu tan shakki mane na. ³³Oile ze zone tan shakki ḳobul ḳorse, he oḳan diau forman ḳore, Allar kalamu hasa. ³⁴Allae zenre faṭaisoin, tain Allar kalamu batain, ḳaron Allae tanre furafur ḳoria Pak Ruh dan ḳoroin. ³⁵Bafe tan futre, mani tan ḳas maear zonre maea ḳoroin ar tan atou hoḳolta disoin. ³⁶Ze manshe Allar ḳas maear zonor ufre iman anche, he aḳeri zindegi failise. Oile ze tanre mane na, he kunumonte-u aḳer faito nae borong tar ufre Allar gozob foṛbo.

Shomoriar beṭir iman

¹Forishi oḳole hunla, Hozrot Isae Ehia nobi taki beshi manshore tan ummot banaisoin, ar toubar gusol ḳoraira. ²Oile Isae nize toubar gusol ḳoraira na, tan ummot oḳoleu ḳoraira. ³Hozrot Isae i ḳobor faia, Ehudia zila saṛia hirbar Galil zilat zaoar lagi roana oila. ⁴Zaoar ḳalo tanre Shomoriar mazdi zaoa lagsil. ⁵Foto tain Shomoriar Shuḳar namor eḳ gaur daro aila. Hozrot Iakube tan fua Iusufre ze zomin dan ḳorsla, ou zominḳan asil hou gaur daro. ⁶I zomino Hozrot Iakubor kua asil. Isa aṭte aṭte heran oia ou kuar ḳasat ziraila. Ou shomoe onuman duifor oigese.

^7-8Ermaze Shomoria zatir eḳ beṭie fani tulat ailo, ar kuar ḳasat Isa eḳla asla, ḳaron tan sahabi oḳol ḳani-fani loar lagi bazaro geslagi. Isae taire ḳoila, “O mai, amare tuṛa fani ḳaoaukka.” ⁹Beṭie ḳoilo, “Ami to Shomoria zatir manush. Afne eḳzon Ihudi oia amar gese fani saira kila?” Beṭie ikan ḳoilo, ḳaron Shomoria zatir loge Ihudi manshor kunuzat mil-mish ba sola-fira asil na. ¹⁰Isae taire ḳoila, “Tumi zudi zantae Allar dan kita, ar ḳe tumar gese fani saira, te tumi nizeu tan gese fani sailae one, ar tain tumare zinda fani dila one.” ¹¹Beṭie ḳoilo, “Sab, afnar gese to fani tular kunta nai, ar i kuao goin. Te zinda fani kuai taki faila? ¹²Afne kunu amrar mul-murobbi Iakub nobi taki boṛo ni? Tainu amrar lagi i kua kudisla. Tain ar tan fuainteo ou kuar fani ḳaita, ar tan foshur falreo ḳaoaita.”

¹³Teu Isae ḳoila, “Ze zone i kuar fani ḳaibo, tar hirbar fias lagbo. ¹⁴Oile amar deoa fani ze ḳaibo, tar kunu shomoe-u fias lagto nae. Borong i fani tar dilor maze zornar laḳan utlia uṭbo ar aḳeri zindegi dan ḳorbo.” ¹⁵Teu beṭie Isare ḳoilo, “Huzur, te amareo hou fani deukka, zate amar fias na lage, ar fanir lagi ino aoa na lage.”

¹⁶Isae beṭire ḳoila, “Te zao, tumar zamaire ono loia ao.” ¹⁷Beṭie ḳoilo, “Sab, amar to kunu zamai nai.” Isae ḳoila, “Tumi ṭiku ḳoiso, tumar zamai nai. ¹⁸Ḳaron er age to tumar faszon zamai oigesoin, ar oḳon ze tumar loge ase, he tumar zamai nae. Tumi hasa ḳotau ḳoilae.” ¹⁹Ikan hunia beṭie Isare ḳoilo, “Huzur, oḳon ami buzlam, afne eḳzon nobi. ²⁰Amrar baf-dadainte ou faṛor ufreu ebadot ḳorta, oile afnara ḳoin, Zeruzalemou manshor ebadot ḳora usit.”

²¹Isae tanre ḳoila, “Huno, amar matḳan ekin ḳoro. Dekio, oula shomoe aibo zebla tumra i faṛor ufore, ba Zeruzalemor kunuḳano, gaibi baf Allar ebadot ḳortae nae. ²²Tumra zare sino na, tar ebadot ḳoro, oile amra zan ebadot ḳori, tanre amra sini. Zano ni, nazator fot to Ihudi oḳolor mazdiu aise. ²³Huno, ola shomoe aibo, borong oḳonu aichche, zebla ashol ebadotḳari oḳole hokkani ruhe gaibi baf Allar ebadot ḳorba. Gaibi bafeo olaḳan ebadotḳarir tallash ḳoroin. ²⁴Allatala oilagi ruh, erlagi zara tan ebadot ḳorba, tara hokkani ruhe tan ebadot ḳora lagbo.”

²⁵Bade ou beṭie ḳoilo, “Ami zani, al-Mosi aira. Tain aia hoḳolta amrare zanaiba.” ²⁶Isae ou beṭire ḳoila, “Amiu hein, zein oḳon tumar loge matira.”

²⁷Ou shomoe sahabi oḳole aia deḳla, Isae eḳ beṭir loge matira, dekia tara taijjub oigela. Ta-o tara ḳeu zikaila na, afne kita saira ba en loge matira ḳene. ²⁸Bade beṭie tair fanir ḳoila toia gaur manshore gia ḳoilo, ²⁹“Tumra aia eḳzonre deki zao. Amar zindegit zeta ḳorsi, ita hoḳolta-u tain ḳoilisoin. Te tainu kita hou al-Mosi ni?” ³⁰Ita hunia gaur manush baroia Isar gese aoa dorla.

³¹Bade tan sahabi oḳole tanre onurud ḳori ḳoila, “Huzur, kunta ḳaukka.” ³²Tain ḳoila, “Amar gese ila ḳani ase, ze ḳanir befare tumra zano na.” ³³Ikan hunia sahabi oḳole eḳe-oinne zikaila, “Te tanre ḳeu kunu ḳani ania dise na kita?” ³⁴Teu Isae tarare ḳoila, “Zein amare bezisoin, tan morzi mafik tan ḳam fura ḳorau amar ḳani.

³⁵“Tumra ḳo na ni, ‘Ar sair mash badeu foshol ḳaṭar shomoe aibo’? Oile ami tumrare ḳoiram, bala ḳori eḳbar ḳetedi saia deḳo, foshol fakia ḳaṭar zuka oigese. ³⁶Foshol ḳaṭrae oḳonu beton faira ar aḳeror lagi foshol dola ḳorra. Erlagi zein zala bain dein ar zein foshol ḳaṭoin, duiozonu homan kushi oin. ³⁷Ete ou silleḳor forman oe, ‘Eḳzone bain dein, aroḳzone ḳaṭoin.’ ³⁸Amio tumrare ola foshol ḳaṭat faṭaisi, ze fosholor lagi tumra menot ḳorso na. Oinno manshe menot ḳorse ar tumra ou menotor foshol ḳaṭiso.”

³⁹Ze beṭir zindegir hoḳolta Isae ḳoilisoin, ou beṭir shakki hunia hou gaur bout Shomoria manshe Isar ufre iman anla. ⁴⁰Tara Isare gia minot ḳori ḳoila, tarar oḳano roibar lagi. Erdae tain duidin hono roila. ⁴¹Ou shomoe tan talim hunia aro bout manshe iman anla. ⁴²Ar gaur manshe ou beṭire ḳoila, “Tumar ḳotae amra iman anchi na, amra nizeu tan mat hunia buztam farsi, einu zogotor ashol toraneala.”

Hozrot Isar dusra keramoti

⁴³Shomoriat duidin roia hari Hozrot Isa nizor baṛi Galil zilat gelagi. ⁴⁴Zudio tain age ḳoisla, kunu nobireu nizor desho dam deoa oe na, ⁴⁵tebou ou shomoe tara tanre ḳobul ḳorla. Ḳaron idor shomoe Isae Zeruzalemo zeta keramoti deḳaisla, Galilor manush hono taḳae tara ita deḳsla ḳori tain Galilo aile tara ḳobul ḳorla.

⁴⁶Bade Isa hirbar Galilor Kanna gaut gela. Onou tain fanire anguror shorbot banaisla. Kofornaum ṭauno eḳ shorḳari ofisaror fua kub bemar asil. ⁴⁷Hozrot Isa Ehudia taki Galil aisoin hunia, ou ofisar tan gese gia minot ḳorla, tain zanu Kofornaum gia en fuagure bala ḳoroin. Ou shomoe tan fua morar foti oigesil.

⁴⁸Isae ou ofisarre ḳoila, “Kunu nishana ba keramoti ḳam na deḳle afnara kunumonte-u iman anta nae.” ⁴⁹Teu ofisare ḳoila, “Huzur, doya ḳori zoldi aukka, fuagur zan taḳte aukka.” ⁵⁰Isae tanre ḳoila, “Afne zaukkagi, afnar fua bala oigese.” Isar ḳota ekin ḳoria ein gelagi.

⁵¹Hasau, hou ofisar baṛit zaoar fote tan gulam oḳole aia ḳobor ḳoilo, “Sab, afnar fuar bemar ḳomigese.” ⁵²Tain erare zikaila, “He kun shomoe bala oise?” Tara ḳoila, “Ḳail duifor taki tan taf saṛi dise.” ⁵³Teu ofisaror mono oilo, ṭik duifori bala Isae tanre ḳoisla, “Afne zaukkagi, afnar fua bala oigese.” Erlagi ou ofisar ar tan foribaror hoḳole Isar ufre iman anla. ⁵⁴Hozrot Isa Ehudia tone Galilo aoar bade ou dusra keramoti nishana deḳaila.

Isae aṭtish bosoror bemarire bala ḳorla

¹Itar bade Ihudi oḳolor idor shomoe aile Isa Zeruzalemo gelagi. ²Zeruzalemo meṛa-dorzar ḳandat eḳṭa furki asil, ou furkit siṛi banda fasḳan gaṭ asil, faso gaṭor ufre fasḳan sauni. Ibrani bashae i furkir nam Baet-Soda. ³Ou gaṭo bout zator bemari foṛi roito. Lula-lengṛa, anda, ar bemare zerar shoril ekkebare hukai gese, tarao ono roito.

⁴Maze maze eḳzon firista aia ou furkir fani laṛaita, laṛanir badeu foela ze zon fanit lamto, tar zoto boṛo bemar ouk bala oizito. Erdae ou bemari oḳole fani laṛanir ashae ono foṛi roito.

⁵Erar maze ola eḳzon bemari asil, ze beṭa aṭtish bosor taki bemar. ⁶Bout din taki he ono foṛi roise hunia Isae tare zikaila, “Kita ba, tumar ichcha ni tumi bala oizitae?” ⁷Beṭae ḳoilo, “Huzur, amar to ila ḳeu nai, zein fani laṛanir loge logeu amare furkit lamaito. Ami lamte lamte aroḳzon gia lami zae.” ⁸Isae ere ḳoila, “Te uṭo, tumar bisna loia aṭa-sola ḳoro.” ⁹Loge logeu ou bemari bala oigelo, ar tar bisna tulia sola-fira ḳorlo.

Hi din asil Zummabar, Zummabare kunuzat ḳam ḳora zaiz nae. ¹⁰Erdae Ihudi neta oḳole ou beṭare ḳoila, “Aiz to Zummabar, te aiz tumar bisna tulia neoa zaiz nae.” ¹¹Oile he ḳoilo, “Zein amare bala ḳorsoin, tainu amare ḳoila, uṭo, tumar bisna loia aṭa-sola ḳoro.” ¹²Teu neta oḳole beṭare zikaila, “Ou manushgu ḳegu, zegie tumare ḳoise, bisna loia sola-fira ḳortae?” ¹³Oile ou beṭae to zanto na tain ḳe, hi zagat bout manshe biṛ ḳorilisoin dekia, Isa hin tone geslagi.

¹⁴Bade Isae ou beṭare Baetul-Mukaddoso faia ḳoila, “Huno, tumi to bemar taki bala oigeso. Te ar kunu guna ḳorio na, zate tumar shorbonash na oe.” ¹⁵Teu ou beṭae gia Ihudi neta oḳolre ḳoilo, tare zein bala ḳorsoin, en nam Isa.

Hozrot Isar Allai eḳtiar

¹⁶Isae Zummabare bemarire bala ḳorae Ihudi neta oḳole tanre marilita saila. ¹⁷Oile Isae tarare ḳoila, “Huno, amar gaibi bafe hamesha ḳam ḳorra ar amio ḳorram.” ¹⁸Ikan hunia tara tanre zane marar lagi aro gorom oia fot tukanit roila. Tara mono ḳorsil, tain ḳali Zummabaror niom bangisoin na, tain Alla Pakre baf ḍakia shirikio ḳorsoin.

¹⁹Erlagi tain ou neta oḳolre ḳoila, “Ami nichchit hok kota ḳoiram, fute to nize nize kunta ḳorta faroin na, oile tan bafore zeta ḳam ḳorat deḳoin, tain ḳali otau ḳoroin, bafe zeta ḳoroin, futeo to ota ḳoroin. ²⁰Bafe tan futre maea ḳoroin ar tain nize ze ḳam ḳoroin, ita hoḳolta-u futre deḳain. Ar ita taki aro boṛo boṛo kudroti ḳam futre deḳaiba, zeta dekia afnara taijjub oiziba. ²¹Bafe zela murdare zinda ḳori tuloin, futeo oula zerare ichcha zindegi dan ḳoroin. ²²Bafe ḳeuror bisaro ḳoroin na, tan hoḳol bisaror bar futor ato disoin, ²³zate bafore zela hoḳole ijjot ḳore, oula futreo ijjot ḳore. Futre ze ijjot ḳore na, he ashole hou bafreo ijjot ḳore na, zein i futre bezisoin.

²⁴“Ami afnarare hasa ḳota ḳoiram, ze zone amar kalam hune ar zein amare faṭaisoin tan ufre iman ane, he to aḳeri zindegi failise. Tare ar dushi shaibosto ḳora oito nae. He to mout taki zindegit faṛi dilaise. ²⁵Ar ami hasau ḳoiram, ila eḳ zomana aibo, borong oḳonu aichche, zebla murda oḳole ami Ibnullar golar aoaz hunba, ar zara hunba tara zinda oiba. ²⁶Itar ḳaron oilo, baf nize zela zindegir malik, tan futreo oula zindegir malikana disoin. ²⁷Bafe futre manshor bisar ḳorar eḳtiar disoin, ḳaron einu to Bin-Adom. ²⁸Te ita hunia afnara taijjub oiba na, zanoin ni, oula shomoe aior, zebla Allar futor golar aoaz hunia murda oḳol ḳoebor taki baroia aiba. ²⁹Ar zera nek kam ḳorsoin, tara behesti zindegi faoar lagi uṭba, oile zera naformanir maze zindegi ḳaṭaise, tara uṭba shaza faoar lagi.

³⁰“Ami to nize nize kunta ḳortam fari na, ami zela huni ola bisar ḳori. Ami hok bisar ḳori, ḳaron ami amar nizor ichchae ḳam ḳortam sai na, ḳali zein amare faṭaisoin tan morzi fura ḳortam sai.

Nizor befare Hozrot Isa

³¹“Ami zudi nizor befare nize shakki dei, te i shakki shoṭik nae. ³²Oile dusra zoneo amar befare shakki dira, ar ami zani, tain ze shakki dira, ita hasa. ³³Afnara to Ehia nobir gese ḳobria faṭaia zikaisoin, taino hokor fokke shakki disoin. ³⁴Ar ami kunu manshor shakkir ufre borosha ḳori na, oile afnara zate nazat faia zan basaita faroin, erdae ita ḳoiram. ³⁵Hozrot Ehiau asla hou zalail mushal, ze mushale for disil. Afnarao tuṛa ḳoedin ou mushalor foror maze kushi ḳorte razi oisla.

³⁶“Oile Ehia nobir shakki toneo aro boṛo shakki amar ase, ḳaron amar gaibi bafe ze ḳamor lagi amare faṭaisoin, ami otau ḳorram. Ar ou ḳamor shakkieu buza zae, amare amar gaibi bafe bezisoin. ³⁷Tainu to hou baba, zein amare faṭaisoin, tain nizeo amar befare shakki disoin. Afnara kunu shomoe tan golar aoaz hunchoin na, ar tanre deḳsoino na. ³⁸Esaṛa tan kalam to afnarar dilo roe na, ḳaron tain zare faṭaisoin, en ufre afnara iman anoin na.

³⁹“Afnara to kub mon dia asmani kitab tilaot ḳoroin, mono ḳoroin ita tilaot ḳorle aḳeri zindegi faiba. Oile ou kitabeu to amar befare shakki dey. ⁴⁰Erbadeo afnara zindegi faoar lagi amar gese aita sain na.

⁴¹“Ami to manshor ges taki tarif faoar ashae aisi na, ⁴²oile ami zani, Allar bae afnarar kunu mohobbot nai, ami to afnarare sini. ⁴³Ami amar gaibi bafor nam loia aisi, ta-o afnara amare ekin ḳorra na. Oile dusra ḳeu zudi tar nizor name ae, te tare afnara ekin ḳorba. ⁴⁴Afnara eḳe-oinnor ges taki tarif faita sain, oile ze tarif Allar ges tone faoa zae, itar lagi kunu sesṭa ḳoroin na. Te afnara ḳemne ekin ḳorba? ⁴⁵Afnara mono ḳorba na, ami amar babar gese afnaintore dushi banaimu. Oile ze Musa nobir ufre afnara borosha ḳori asoin, hou Musaeu afnaintore dushi ḳoira. ⁴⁶Afnara zudi Musa nobire ekin ḳorta, te amareo ekin ḳorla one, i Musa nobie to amar befareu leḳsoin. ⁴⁷Oile afnara zebla tan leḳareu ekin ḳoroin na, te amar mukor ḳotare kila ekin ḳorba?”

Fas azar manshor gaibi ḳani

¹Erbade Hozrot Isa Galil aoror hofaro gelagi, ou aoror aroḳ nam Tibiria aor. ²Bout manush tan ḳore oia zaoat asla, tara to deḳsila, bemari oḳolor ufre tain kila keramoti ḳam ḳorsoin. ³Hono gia hari tan sahabi oḳolre loia eḳ faṛor ufre boila. ⁴Ou shomoe Ihudi oḳolor Azadi Id gonai aise. ⁵Isae saia deḳla, bout manush tan gese uṭia aira, ou tan sahabi Filifre ḳoila, “Ita manshore ḳaoanir lagi amra ruṭi faimu kun zagat?” ⁶Ashole Filifre forikka ḳorar lagi tain ikan zikaila, oile kila kita ḳorba, ikan tain ageu zanta. ⁷Filife zuaf dila, “Erare tuṛa tuṛa ḳani dileo dui-sho dinaror ruṭie kulaito nae.”

⁸Hono Andrias name Hozrot Isar eḳ sahabi asla. Tain oila Saimon-Fitoror bai. ⁹Tain Isare ḳoila, “Huzur, ono huru eḳ fuar gese fasḳan aṭar ruṭi ar duiṭa biran mas ase, oile oto manshor maze itae kita oibo?” ¹⁰Isae hukum dila, “Tumra ota manshore gashor ufre boai deo.” Teu tara gashor ufre boigela. Ino ḳali beṭa manushu asla onuman fas azar zon. ¹¹Bade tain ou fasḳan ruṭi ato loia Allar shukria adae ḳoria erare baṭia dila. Oula biran maso baṭia dila. Ze zoto sailo, he otoḳan failo. ¹²Hoḳol manshe feṭ bori ḳailo. Ḳaia harle Isae tan sahabi oḳolre ḳoila, “Ḳanir bade zeta roise, tumra ota ekkano dola ḳoro, kunta falaio na.” ¹³Era ou fasḳan ruṭir baṛti ṭukrain dola ḳoria baro ṭukri borla.

¹⁴Hozrot Isar i keramoti dekia manshe mata-mati lagaila, “Nichchoe einu hou nobi, zein duniat toshrif anar ḳota.” ¹⁵Teu Isae buzilila, manshe zur ḳoria tanre tarar bashsha bananir lagi dorto sar. Oḳan buzia tain hirbar eḳlau faṛor ufre gelagi.

Aoror fanir ufredi aṭa

¹⁶Hainjabala Isar sahabi oḳol aoror faro gela. ¹⁷Ar Kofornaum ṭauno zaita ḳori nao loia aor faṛi deoat lagla. I shomoe andair oigesil ar Isao tarar loge asla na. ¹⁸Aoror mazḳano zaiteu kub tufani batash ar boṛo boṛo ḍeu shuru oilo. ¹⁹Onuman tin-sair mail nao baia zaoar bade tara deḳla, Hozrot Isa fanir ufredi aṭia tarar gese aira. Ita dekia sahabi oḳole kub ḍoraigela. ²⁰Ou shomoe Isae tarare ḳoila, “Ḍoraio na, i to ami.” ²¹Sahabi oḳole tanre nao-o tulta saila, ar tara ze zagat zaoar ḳota, loge loge nao gia hono fousi gelo.

Zindegi-ruṭir befare boean

²²Aoror hofaro zeta manush uba asla, bador din tara buzla, agor din ino ekkan nao saṛa dusra kunu nao asil na. Tara eoḳano buzla, Isa tan sahabi oḳolor loge nao-o uṭsoin na, borong tara eḳlau aor faroisoin. ²³Oile ze zagat Isae Allar shukria adae ḳoria hari manshore ruṭi ḳaoaisla, ou zagar gese Tibiria ṭaun taki ḳoeḳan nao ailo. ²⁴Manshe zebla deḳla, Isa ba tan sahabi oḳol ḳeu i zagat nai, ou tara ota naoainto uṭia Isar tallashe Kofornaum ṭauno gelagi.

²⁵Hono gia tara Isare faia ḳoila, “Huzur, afne ino kun shomoe aila?” ²⁶Tain zuaf dila, “Ami tumrare hasa ḳota ḳoiram, tumra amar keramoti nishanar mani buzia amare tukairae na, borong feṭ bori ruṭi ḳaiso ḳoriu tukairae. ²⁷Oḳon huno, duniabi ze ḳani nosṭo oizae, tar ḳore guria lab kita? Ze ḳani kunudin nosṭo oe na, borong aḳeri zindegi dan ḳore, tar ḳore oia guro. I ḳani to ami Bin-Adome tumrare dimu. Ou eḳtiar ḳali amar ase, amar gaibi baf Allaeu itar forman deḳaisoin.”

²⁸Ikan hunia tara Isare zikaila, “Te Allar ḳam ḳorar lagi amra kita ḳortam?” ²⁹Tain ḳoila, “Allae zare faṭaisoin, tan ufre iman anau oilo Allar ḳam.” ³⁰Erbade tara tanre zikailo, “Te afne omon kita nishana deḳaiba, zeta dekia amra afnar ufre iman anmu? Afne kun ḳam ḳorba? ³¹Amrar baf-dadae to morubumit manna ḳaisla. Pak kitabo leḳa ase, Allae tarare behesti ḳani ḳaoaila.”

³²Isae zuaf dila, “Ami tumrare hok kota ḳoiram, behesti ze ruṭi tumra faislae, ita to Musa nobie disoin na, borong amar gaibi bafeu tumrare ashol behesti ruṭi dan ḳoroin. ³³Ar Allar deoa hou ruṭi oila ou zon, zein behest taki lamia aia hara zogotre zindegi dein.” ³⁴Teu tara ḳoilo, “Huzur, te ou ruṭiu amrare hor-hamesha deukka.”

³⁵Isae ḳoila, “Amiu hou zindegi-ruṭi. Ze zon amar gese ae, tar kunu shomoe buk lage na, ar ze amar ufre iman ane, tar kunu shomoe fiaseo dore na. ³⁶Ami to tumrare mukdi ḳoisio, ar tumra amare dekiao iman anlae na. ³⁷Amar gaibi bafe zerare amar ato dein, tara hoḳolu amar gese aibo. Ze zon amar gese ae, ami kunumonte-u tare bare falaitam nae. ³⁸Ami kunu amar morzi mafik kam ḳorat aisi ni? Na, borong zein amare faṭaisoin, tan morzi zugaia ḳam ḳorar lagiu ami behest taki lamia aisi. ³⁹Huno, ze bafe amare faṭaisoin, tan munsha oilo, tain zerare amar ato disoin, ami zanu era eḳzonreo na arai borong ruz hashoro erare zinda halote tuli. ⁴⁰Amar bafor munsha oilo, zara tan futre dekia tan ufre iman ane, tara zanu aḳer fae. Ar amiu tarare ruz hashoro zinda ḳori tulmu.”

⁴¹Ikan hunia Ihudi neta oḳole Isare loia ḳana-gusha lagaila. Ḳaron tain age ḳoisla, “Behest taki ze ruṭi lamia aise, amiu hou ruṭi.” ⁴²Erlagi tara nize nize ḳoila, “Ogu to Iusufor fua Isa nae ni ba? Amra to tar ma-bafreo sini. Te he ḳemne ḳoe, he bule behest taki lamia aise?”

⁴³Isae tarare ḳoila, “Tumra nizor maze ḳana-gusha ḳorio na. ⁴⁴Amar ze gaibi bafe amare faṭaisoin, tain ashik na banaile kunu manushu amar gese aito fare na. Ar amiu tare ruz hashoro zinda halote tulmu. ⁴⁵Zano ni, nobi oḳolor kitabo leḳa ase, ‘Tara hoḳole Allar ges taki talim loiba.’ Ar ze zone gaibi bafor ges taki talim faise, hou zonu amar gese ae.

⁴⁶“Ou bafore to kunu manshe deḳse na, ḳali Allar ges taki zein aisoin, tainu i bafore deḳsoin. ⁴⁷Ami tumrare nichchit hasa ḳota ḳoiram, ze zone amar ufre iman anche, he loge logeu aḳer failise. ⁴⁸Amiu zindegi-ruṭi. ⁴⁹Tumrar baf-dadainte to morubumit manna ḳaisla, ta-o tarar mout oise. ⁵⁰Oile ikan oilo hou ruṭi, ze ruṭi behest taki lamia aise, zate ou ruṭi ḳaia manush moron taki rehai fae. ⁵¹Huno, amiu oilam hou zinda ruṭi, ze ruṭi behest taki lamia aise. Ze zone i ruṭi ḳaibo, he siroḳalin zindegi faibo. Amar ḳaeau oilo ou ruṭi. Manshore siroḳalin zindegi dibar niote ami amar deho-ḳaea bilai dimu.”

⁵²Ikan hunia Ihudi neta oḳolor maze torka-torki lagigelo. Tara eḳe-oinne ḳoilo, “I beṭae ḳemne tar shorilor gust amrare ḳaoaibo?” ⁵³Isae ḳoila, “Te huno, ami nichchit hok kota ḳoiram, tumra ami Bin-Adomor lou ar gust na ḳaile to tumrar maze zindegiu nai. ⁵⁴Ḳeu zudi amar lou ar gust ḳae, te he aḳeri zindegi failise, ar ruz hashoror dino ami tare zinda ḳori tulmu. ⁵⁵Amar gustu oilo ashol ḳani ar amar lou-u oilo ashol fani. ⁵⁶Ze zone amar lou ar gust ḳae, he amar bitre taḳe ar amio tar bitre taki. ⁵⁷Zela amar gaibi zinda bafe amare faṭaisoin, erlagiu amio zinda asi. Oula ze zone amare ḳae, he-o amar lagi zinda roibo. ⁵⁸Deḳrae ni, ou ruṭi to behest taki lamia aise. Ze ruṭi ḳaia tumrar baf-dadain mara gesoin, i ruṭi to amar laḳan nae. Amar ou ruṭi ze zone ḳaibo, he siroḳal zinda roibo.” ⁵⁹Hozrot Isae Kofornaum ṭaunor mosido talim deoar shomoe ita hoḳolta ḳoila.

Bout ummotor mono moto-birud

⁶⁰Talim hunia hari tan ummotor mazor boute ḳoila, “Ita to boṛo gorom talim. Ita ḳegie manbo?” ⁶¹Oile Isae tan gaibi bole buzilila, kita loia era ḳana-gusha ḳorra. Buzia erare ḳoila, “Ou talim hunia tumra gabṛi gelae ni? ⁶²Te ami Bin-Adom age ze zagat aslam, amare zebla hono uṭi zaoat deḳbae, ou shomoe tumra kita ḳoibae? ⁶³Tumra buzrae ni, manshor shoril to beḳama, ashole ruh oilogi zindegi. Ami tumrare ze boeani ḳoilam, ita oilogi manshor ruh ar zindegir befar. ⁶⁴Oile tumrar maze ḳeu ḳeu oḳono amar ufre iman anche na.” Ḳe tan ufre iman anche na, ar ḳe tanre dushmonor ato dorai dibo, Isae foela takiu ita zanta. ⁶⁵Ou tain ḳoila, “Ou ḳarone ami tumrare ḳoisi, gaibi bafe bol na dile, kunuzonu amar gese aito fare na.”

Hozrot Fitoror shakki

⁶⁶Isar ita talim hunia tan bout ummot firia gelagi, tara tan loge sola-fira bad dilaila. ⁶⁷Erlagi Isae tan barozon sahabire zikaila, “Kita ba, tumitaino zaitaegi ni?” ⁶⁸Saimon-Fitore zuaf dila, “Huzur, amra ar ḳar gese zaitam? Aḳeri zindeganir talim to ḳali afnar gese-u ase. ⁶⁹Amra to zanchi ar afnar ufre imano anchi, afneu Allar oada ḳora hou fobitro zon.”

⁷⁰Teu Isae erare ḳoila, “Ami to tumra barozonre fosond ḳorsi, oile tumrar mazeu eḳzon shoetan ase.” ⁷¹Ino tain Saimon Iskariator fua Ihudar befare ḳoila, ou Ihudae bade tane dorai dibo. He asil ou barozon sahabir mazor eḳzon.

Hozrot Isar afon baiain

¹Erbad taki Hozrot Isa Galil zilar bitreu sola-fira ḳorla. Ihudi neta oḳole tanre zane marilito saisil, erlagi tain ar Ehudia zilat zaita saila na. ²Ou shomoe Ihudi oḳolor Ḍera-goror Idor din gonai aisil. ³Erlagi Isar baiainte tanre ḳoila, “Tumi in tone Ehudia zilat zaogi, teu tumi zeta ḳam ḳorso, ota tumar ummot oḳoleo deḳba. ⁴Ḳeu zudi nizore manshor gese zair ḳorto sae, te he lukaia kunta ḳore na. Tumio zebla omon ḳam ḳorrae, te nizore manshor gese zair ḳoro.” ⁵Ashole Isar baiainteo tan ufre iman anchoin na.

⁶Isae tarare ḳoila, “Amar shomoe oḳono oise na, oile tumrar to shomoe oshomoe kunta nai. ⁷Duniar manshe tumrare ginnaito nae, oile amare gin ḳore. Ami to tarar befare ḳoiar, tarar hoḳol ḳamu ḳaraf. ⁸Te tumra zaogi, gia id ḳoro. Amar shomoe oḳono fura oise na, erlagi ami oḳon zaitam nae.” ⁹Oḳan ḳoia tain Galil zilat roigela.

¹⁰Tan baiain idor mahfilo gia harle taino gela, oile kula-mela na gia lukaia gela. ¹¹Idor ḳalo Ihudi neta oḳole tan tallash ḳorat roila, ar ḳoila, “Hou manushṭa kuai.” ¹²Biṛor maze Isar befare manshe mata-mati ḳorla. Ḳeu ḳeu ḳoilo, “Ein to boṛo bala manush.” Ar ḳeu ḳeu ḳoilo, “Na, na, he to manshore be-foti banailar.” ¹³Oile Ihudi neta oḳolre ḍoraia, muk kulia tan befare ḳeu kunta matilo na.

Idor shomoe Hozrot Isar talim

¹⁴Ou idor mazamazi shomoe Hozrot Isa Baetul-Mukaddos kaba shorifo gia talim dila. ¹⁵Tan talim hunia taijjub oia Ihudi neta oḳole ḳoila, “I manshe madrashat na foṛia oto ilim failo kila?” ¹⁶Isae zuaf dila, “Ami ze talim dei, ita amar nizor nae, zein amare bezisoin, ita to tanu talim. ¹⁷Ḳeu zudi tan morzi zugaia solto sae, te he buzbo, i talim Allar ges taki aise, na amar muk taki diram. ¹⁸Ze zone nizor mon taki mate, he ḳali nizor tarif faito sae. Oile ze zone tar faṭaneala malikor tarif ḳorar sesṭa ḳore, he hamesha hok-halal taḳe, tar mono kunu dukabazi nai.

¹⁹“Tumra kunu Musa nobir shoriot faiso na ni? Oile tumra eḳzoneo to shoriotor hukum-ahkam manrae na. Te tumra ḳene amare marilitae sairae?” ²⁰Teu tara ḳoila, “Tumare bute faise, tumare ḳe marto sar?”

²¹Isae tarare ḳoila, “Ami ḳali ekkan ḳam ḳorlam, ar tumra taijjub oigelae. ²²Hozrot Musae to tumrare mosolmani ḳam ḳoranir niom disla, ar Zummabareo tumra ou ḳam ḳorao. Ashole, i niom Musa nobir ges taki aise na, borong agor moe-murobbir ges takiu aise. ²³Ṭik ase, Musa nobir niom salu raḳar lagi Zummabareo zudi mosolmani ḳam ḳorail zae, te ami Zummabare eḳzon bemarire bala ḳorsi dekia amar ufre gusa ḳorrae ḳene? ²⁴Hoḳ-insaf ḳoro, ḳali bargala dekia bisar ḳorio na.”

al-Mosi ḳe?

²⁵Ou shomoe Zeruzalem ṭaunor kisu manshe ḳoilo, “Neta oḳole zare marilta saira, ogu kita hou manush nae ni? ²⁶Te he to deki kula-mela mater, ta-o tara deki kunta ḳoira na. Taile tara kita hasa ḳota buzilisoin ni, ou manushu al-Mosi? ²⁷Ar amra to zani, ogu kuai taki aise. Oile al-Mosi zebla aiba, ou shomoe ḳeu zanto nae, tain kuai taki aisoin.”

²⁸Erbade Isae Baetul-Mukaddoso talim deoar shomoe zure zure boean ḳorla, “Afnara amareo sinoin, ar ami kuai taki aisi ikano zanoin. Hunoukka, ami niz taki aisi na, hok Alla Pakeu amare faṭaisoin. ²⁹Afnara tanre sinoin na, oile ami sini. Ḳaron ami tan ges takiu aisi ar tainu amare faṭaisoin.”

³⁰Ikan hunia manshe Isare dorilito sailo, oile tan shomoe fura oise na gotike ḳeu tan gotro at tullo na. ³¹Ar erar mazor boute tan ufre iman ania ḳoilo, “Ein to bout keramoti deḳaisoin, al-Mosi aia kunu er saite beshi keramoti deḳaiba ni?”

³²Ita loia manshe ḳana-ḳani ḳorra, ikan Forishi oḳole hunla. Hunia boṛo imam ar Forishi oḳole Isare dorar lagi ḳoezon faradar-sifai faṭaila. ³³Isae ḳoila, “Huno, ami ar beshi din tumrar maze nae. Ami to tan gese zaimugi, zein amare faṭaisoin. ³⁴Tumra amare tukaia faitae nae, ar ami ze zagat roimu, tumra ḳeu hino aitaeo fartae nae.”

³⁵Hozrot Isar ita mat hunia Ihudi neta oḳole eḳe-oinne zikaila, “He kuai zaibogi, zeḳano amra tare tukaia faitam nae? He kita Iunani oḳolor desho zeta Ihudi asoin, hono roia Iunani otareo talim dibo ni? ³⁶He to ḳoilo, tumra amare tukaia faitae nae, ar ami zeḳano zaimu, tumra hino aitae fartae nae. Tar i mator mani kita?”

³⁷Idor aḳeri din Hozrot Isa ubaia zure zure boean ḳorla, “Kunu manshor fiase dorle, he amar gese aia fani ḳauk. ³⁸Ze zone amar ufre iman ane, pak kitabor aeat mafik tar dil taki zinda fanir gang baroibo.” ³⁹Isar ufre iman ania zera Pak Ruhure faiba, hou Pak Ruhur befare tain ou ḳota ḳoila. Tarar gese Pak Ruhure oḳono deoa oise na, ḳaron Isae tan mohima oḳono hasil ḳorsoin na.

Hozrot Isare loia doladoli

⁴⁰Ita hunia kisu manshe ḳoilo, “Ashole einu hou oada ḳora nobi” ⁴¹Ar ḳoezone ḳoilo, “Einu al-Mosi.” Oile ḳeu ḳeu ḳoilo, “al-Mosi kunu Galil zila taki aiba ni? ⁴²Pak kitabe to batae, al-Mosie zonom loiba Daud nobir bongshot, Daud nobir Betelham gaut.” ⁴³Ou laḳan Isare loia manshor maze doladoli lagigelo. ⁴⁴Ermaze ḳoezone tanre dorilito sailo, oile ḳeu tan gotro at tullo na.

⁴⁵Isare dorar lagi ze faradar-sifai oḳolre faṭani oisil, tara firot aile boṛo imam ar Forishi oḳole zikaila, “Tare doria anlae na ḳene?” ⁴⁶Era ḳoila, “I manshe zela mat mate, ila mat ḳeu kunudin matise na.” ⁴⁷Teu Forishi oḳole sifai oḳolre ḳoila, “He tumrareo ṭogililo ni? ⁴⁸Deḳso ni, neta ba Forishi shomazor ḳeu tar ufre iman anche ni? ⁴⁹Ḳali ou zetae shoriotor kuntau zanoin na, otau to. Itar ufre lannot ase.”

⁵⁰Forishi oḳolor maze eḳzonor nam asil moulana Nikodim, ein age Isar gese gesla. ⁵¹Nikodime ḳoila, “Ḳeuror mukor ḳota na hunia ba tar oforad na zania, tare shaza deoar niom kunu amrar shorioto ase ni?” ^52-53Ikan hunia Forishi oḳole Nikodimre ḳoila, “Tumio kita Galil zilar manush ni? Pak kitabo saia deḳo na, Galilo kunu nobir zonom oe na.”

Zinakur beṭir bisar

¹Bade hoḳol manush zarzir baṛit gelagi, ar Hozrot Isa eḳla Zoetun faṛo gia uṭla. ²Bador din fozor oḳto Isa hirbar Baetul-Mukaddoso gela, gia harle hoḳol manush tan gese ailo. Tain ono boia tarare talim dila. ³Ou shomoe moulana ar Forishi shomazor manshe eḳ zinakur beṭire loia tan gese ailo. Aia beṭire mozlisor mazḳano uba ḳoraia ḳoilo, ⁴“Huzur, ou beṭi ogu zinar ḳamo dora ḳaise. ⁵Te Tourat Shorifor maze to Musa nobie zinakur beṭintore fattor maria marilibar hukum disoin. Oḳon afne kita ḳoin?” ⁶Tara Isare forikka ḳorar nioteu ila ḳoila, zate tanre dushi bananir lagi kunu kut fain.

Teu Isaeo mata nisa ḳori angul dia maṭit leḳat lagla. ⁷Oile tara zebla bar bar tanre zikaira, ou shomoe tain mata tulia ḳoila, “Afnaintor maze ze zone kunudin guna ḳorsoin na, ein foela ou beṭire fattor maroukka.” ⁸Oḳan ḳoia tain hirbar mata nisa ḳori maṭit leḳat lagla. ⁹Ikan hunia neta oḳolor maze buṛa taki shuru ḳoria eḳe eḳe hoḳolu gelagi. Ḳali Isa ar hou beṭi saṛa dusra ḳeu roilo na. ¹⁰Teu Isae mata tulia ou beṭire zikaila, “Kita go mai, ita manush kuai? Ḳeu tumare shazar zuka mono ḳorlo na ni?” ¹¹Beṭie ḳoilo, “Ji na huzur, tara ḳeu to shaza disoin na.” Ou shomoe Isae ḳoila, “Te amio tumare kunu shaza ditam nae. Oḳon zaogi, gunar fote ar zindegi ḳaṭaio na.”

Hozrot Isa al-Mosiu duniar nur

¹²Bade Hozrot Isae manshore ḳoila, “Amiu duniar nur. Ze zon amar fote ae, he kunu shomoe andarit fao falaito nae, borong nuror zindegi faibo.” ¹³Ikan hunia Forishi oḳole ḳoila, “Tumar shakki loa zaito nae, tumi tumar nizor fokke shakki dirae.” ¹⁴Teu Isae zuaf dila, “Ami amar nizor fokke shakki dileo amar shakki to hasa. Ḳaron ami kuai taki aisi ar kuai zairam, ita to tumra zano na, ḳali amiu zani. ¹⁵Tumra to duniabi manshor laḳan bisar ḳoro, oile ami ḳeuror bisar ḳori na. ¹⁶Ami ḳeuror bisar ḳorleo hok bisar ḳormu, ḳaron ami eḳla nae, amar loge amar gaibi bafo asoin, ou bafe amare bezisoin. ¹⁷Tumrar shoriotor maze leḳa ase, duizone zudi eḳ homan shakki dey, te i shakki hasa. ¹⁸Olaḳan amio amar fokke shakki dei, ar ze bafe amare faṭaisoin, taino amar fokke shakki dein.”

¹⁹Forishi oḳole tanre ḳoila, “Tumar baf kuai?” Isae zuaf dila, “Tumra amareo sino na, ar amar bafreo sino na. Amare sinle amar bafreo sinlae one.” ²⁰Fobitro Baetul-Mukaddosor dan-baksor gese ubaia Hozrot Isae ou talim dila. Oile tan shomoe fura na oae ḳeu tanre dorlo na.

Nizor moutor befare agam ḳobor

²¹Hozrot Isae Forishi oḳolre hirbar ḳoila, “Ami to zaiargi. Gia harle tumra amare tukaibae, oile ar faitae nae, ami zeno zairam, tumra hino aitaeo fartae nae, tumra nizor gunar mazeu morbae.” ²²Ihudi neta oḳole ḳoila, “He ḳene ḳoilo, ami zeno zairam, tumra hino aitae fartae nae? He kita nize nize morizito ni?” ²³Isae ḳoila, “Ami aisi ufre taki, ar tumra tole taki. Tumra i zogotor, oile ami to i zogotor nae. ²⁴Erlagi ami ḳoiram, tumra nizor gunar mazeu morbae. Tumra zudi ekin na ḳoro, amiu hein, te gunagar haloteu morbae.”

²⁵Ikan hunia neta oḳole tanre ḳoila, “Tumi ḳe?” Tain zuaf dila, “Foela taki ami zela ḳoiram, amiu hein. ²⁶Tumrar befare matar ar bisar ḳorar boutta ase. Huno, zein amare faṭaisoin tan maze to misa kunta nai. Ami tan ges taki zeta huni, otau i duniare zanai.” ²⁷Isae zen tan gaibi bafor ḳota ḳoira, tara ita buzla na. ²⁸Erdae Isae ḳoila, “Tumra zebla ami Bin-Adomre ufre tulbae, ou shomoe buzbae amiu hein. Ar eoḳan buzbae, ami nize nize kunta ḳori na, amar gaibi bafe amare ze talim disoin, ou talimu ami batai. ²⁹Zein amare faṭaisoin, tain nize amar loge asoin. Tain amar log saṛsoin na, ami to hamesha ou ḳamu ḳori, ze ḳam ḳorle tain kushi oin.” ³⁰Isar i boean hunia bout manshe tan ufre iman anla.

Hozrot Ibrahimor ḳaṭi aolad ḳe

³¹Erar maze zeta Ihudi oḳole tan ufre iman anchila, tain erare ḳoila, “Tumra zudi amar ḳota moto solo, te tumra amar hasaror ummot. ³²Tumra hok sinbae ar ou hokeu tumrare azad ḳorba.” ³³Ikan hunia tara ḳoila, “Amra to Hozrot Ibrahimor bongshor manush, amra kunu shomoyo ḳeuror gulam aslam na. Te tumi kila ḳoirae, amrare azad ḳora oibo?”

³⁴Hozrot Isae ḳoila, “Ami tumrare hok kota ḳoiram, zera gunar maze zindegi ḳaṭae, tara gunar gulam. ³⁵Kunu gulam siroḳal tar munibor baṛit taḳe na, oile fut to siroḳal taḳe. ³⁶Erlagi fute zudi tumrare azad ḳoroin, te tumra hasaror azad oibae. ³⁷Ami zani, tumra Ibrahim nobir bongshor manush, tebou amare marilitae sairae, ḳaron amar nosiot tumrar bitre hamae na. ³⁸Ami amar gaibi bafor gese zeta deḳsi ota ḳoiram, ar tumra nizor bafor ges taki zeta hikso otau ḳorrae.”

³⁹Ou shomoe tara Isare ḳoila, “Huno, Hozrot Ibrahimu amrar baf.” Tain ḳoila, “Tumra zudi Ibrahim nobir aolad oitae, te Ibrahimor laḳan ḳam ḳorlae one. ⁴⁰Ami Allar ges taki ze hok kalam faisi, otau tumrare ḳoiram. Tebou tumra amare marilitae sairae, oile Ibrahime to ila ḳorsoin na. ⁴¹Tumrar nizor bafe zeta ḳore, tumrao ota ḳorrae.” Ou tara Isare ḳoila, “Amra to funga fua nae. Amrar eḳzonu baf asoin, ein oila Alla.”

⁴²Isae tarare ḳoila, “Asholeu Alla zudi tumrar gaibi baf oita, te amar bae tumrar maea taḳlo one. Ḳaron ami Allar ges taki aisi ar oḳon tumrar maze asi. Ami nize aisi na, tainu amare faṭaisoin. ⁴³Tumra amar ḳota buzrae na, ḳaron tumra amar ḳota shoijjo ḳortae faro na. ⁴⁴Iblisu tumrar baf ar tumra tar aolad, erdae tumra tar ḳaish fura ḳortae sairae. Iblis to foela takiu kuni. He kunudin hokor maze boshot ḳorse na, ḳaron tar maze kunu hok nai. He zebla misa mate, ou shomoe he niz takiu mate. Ḳaron he beiman, ar hoḳol beimani tar maz takiu foeda oise. ⁴⁵Ami hok mat matiar erlagi tumra amare ekin ḳorrae na. ⁴⁶Tumrar maze ḳeu amare gunagar forman ḳorto farbo ni? Ami zudi hok mat mati, te amare ekin ḳorrae na ḳene? ⁴⁷Ze manush Allar bonda, he Allar kalam hune. Tumra Allar nae gotike Allar kalam huno na.”

⁴⁸Ou shomoe tara Isare ḳoila, “Amra to ṭik kota ḳoisi, tui Shomoria zator manush, tore bute dorse.” ⁴⁹Tain ḳoila, “Na, amare bute dorse na. Ami amar bafore ijjot ḳori, oile tumra amare beijjot ḳorrae. ⁵⁰Ami nize kunu ijjot faitam ḳori ḳam ḳori na. Oile eḳzon asoin, zein amar ijjotor lagi ḳam ḳoroin, tainu amar bisarok. ⁵¹Ami tumrare hok kota ḳoiram, ḳeu zudi amar ḳota mane, he kunu shomoe-u morto nae.”

⁵²Tara tanre ḳoila, “Oḳon amra buzlam, tore ṭiku bute dorse. Ibrahim nobi ba aro nobi oḳol to mara gesoin, ar tui ḳoire, ḳeu zudi amar mat hune, he kunu shomoyo morto nae. ⁵³Tui kunu baba Ibrahim takio boṛo ni? Tain nize ar baki tamam nobi oḳolu mara gesoin. Te tui nizore kita mono ḳoros?” ⁵⁴Isae zuaf dila, “Ami zudi nizor tarif nizeu ḳori, te er kunu dam nai. Amar gaibi baf, zanre tumrar Alla ḳoia dabi ḳoro, tainu amare ijjot dan ḳoroin. ⁵⁵Tumra tanre sincho na, oile ami tanre sini. Ami zudi ḳoi ami tanre sini na, te to tumrar laḳan amio beiman oimu. Ami tanre sini ar tan hukum-ahkam mania soli. ⁵⁶Tumrar baf Ibrahim nobie amar din deḳar ashae kushi ḳorsoin. Tain ita deḳsoin ar kushio oisoin.”

⁵⁷Ihudi neta oḳole tanre ḳoila, “Tumar boeosh to oḳono foinchash bosor oise na, te tumi Ibrahim nobire deḳlae kila?” ⁵⁸Isae ḳoila, “Ami tumrare hok kota ḳoiram, Ibrahim nobir zonmor ag takiu ami asi.” ⁵⁹Ikan hunia neta oḳole tanre marar lagi fattor tukaia loila. Oile Hozrot Isae auṛi dia Baetul-Mukaddos taki baroia gelagi.

Hozrot Isae zonmor andare bala ḳorla

¹Hozrot Isa fotedi aṭia zaoar shomoe eḳ anda beṭare faila. He zonmo takiu anda asil. ²Ere dekia tan sahabi oḳole tanre zikaila, “Huzur, ou manushgu ḳar gunae anda oia zonmise? Tar nizor gunar lagi, na tar ma-bafor?” ³Tain zuaf dila, “Tar nizor lagio nae, ar tar ma-bafor gunar lagio nae. Tar mazdi Allar lila-ḳela zair oar lagiu ila oise. ⁴Huno, zein amare bezisoin, shomoe taḳte taḳte tan ḳam ḳora amrar zorur. Rait gonaia ar, hi shomoe ḳeu ḳam ḳorar ufae nai. ⁵Buzrae ni, ami zotodin duniat asi, otodin amiu duniar nur.”

⁶Oḳan ḳoiau tain maṭit sef falaia feḳ banaila, bade ou feḳ anda beṭar sokut lagaia ḳoila, ⁷“Zao ba, Siloar furkit gia doilao.” Siloa mani faṭani. He gia souk doilo ar bala oia ailo. ⁸Ikan dekia ari-fori ar zoto manshe tare age bik korat deḳsila era ḳoila, “Ogu kita hou beṭa nae ni, zegie ono boia bik korto?” ⁹Ḳeu ḳeu ḳoilo, “Oe, he to ou beṭau.” Ar ḳeu ḳeu ḳoilo, “Deḳte zudio tar laḳan, oile he nae.” Teu he nize ḳoilo, “Ji-oe, amiu hou zon.”

¹⁰Ou tara ere zikaila, “Ḳo sain, tumar souk bala oilo kila?” ¹¹He ḳoilo, “Isa namor ou manshe feḳ banaia amar sokut lagaia ḳoila, zao ba, Siloar fuḳorir maze doia aogi. Ami gia doilam ar bala oigelam.” ¹²Tara ḳoila, “Ou manushgu kuai?” He ḳoilo, “Ami zani na.”

¹³Ou ze beṭa anda asil, manshe tare doria Forishi oḳolor gese loia gela. ¹⁴Ḳaron Isae zedin feḳ lagaia tar souk bala ḳorsla, i din asil tarar Zummabar. ¹⁵Erlagi Forishi oḳole hirbar tare zikaila, “Tumar souk bala oilo kila?” He ḳoilo, “Hou zone amar sokut feḳ lagaia dila, ar ami gia doiau souke deḳlam.”

¹⁶Ou shomoe ḳoezon Forishie ḳoila, “I manushgu to Allar ges taki aise na. Deḳrae ni, he Zummabaro mane na.” Oile ḳeu ḳeu ḳoila, “Gunagar manshe ilaḳan keramoti ḳam ḳorbo kila?” Ota loia tarar maze doladoli lagigelo. ¹⁷Tara hirbar ou manshore zikaila, “Ṭik ase, he to tumar souk bala ḳorse, erlagi tumi tar befare kita ḳo.” He ḳoilo, “Tain eḳzon nobi.”

¹⁸Oile ou beṭa zen age anda asil ar oḳon souke deḳer, Ihudi neta oḳole tar ma-bafore na zikani forzonto ita ekin ḳorla na. ¹⁹Tara tar ma-bafore zikaila, “Deḳo sain, ogu tumrar hou anda fua ni, zegure tumra zonmor anda ḳo? Te he oḳon souke deḳer kila?” ²⁰Tar ma-bafe ḳoila, “Ji-oe, he amraru fua ar he anda oia zonmisil. ²¹Oile oḳon kila souke deḳer, ikan amra zani na. Ar ḳe tar souk bala ḳorsoin, ta-o ḳoitam fari na. He to boṛo oigese, tareu zikaukka, tar befar he ḳouk.”

²²Tar ma-bafe Ihudi neta oḳolor ḍore ola matila, ḳaron Ihudi neta oḳole ag takiu ain ḳorsila, ḳeu zudi Isare al-Mosi ḳoia ḳobul ḳore, te tare shomaz taki bar ḳori deoa oibo. ²³Erlagiu tar ma-bafe ḳoila, “He boṛo oigese, tareu zikaukka.”

²⁴Neta oḳole dusrabar tare ania zikaila, “Tumi Allar name hasa mat mato. Amra to zani i manushṭa gunagar.” ²⁵He zuaf dilo, “Tain gunagar na kita, ikan ami zani na. Ḳali oḳan zani, ami age anda aslam, oḳon souke dekiar.” ²⁶Neta oḳole ḳoila, “Ḳo sain, he tumare kita ḳorse? Tumar souk kila bala ḳorlo?” ²⁷Ou beṭae zuaf dilo, “Ami to ageu ḳoilam, oile afnara hunla na. Te oḳon ḳene ar hunta saira? Afnarao tan ummot oita saira ni?”

²⁸Ikan hunia tara beṭare kub gala-gali ḳoria ḳoila, “Hoi, tui gia ogur ummot oisot, oile amra oilam Musa nobir ummot. ²⁹Amra zani, Allae nize Musa nobir loge batchit ḳorsoin, oile i beṭa kuai taki aise, ita to amra zaniu na. ³⁰Teu beṭae ḳoilo, “Ki taijjubi! Afnara zanoin na tain kuai taki aisoin, otoso tainu amar souk bala ḳorla. ³¹Amra zani, naforman oḳolor ḳota Allae hunoin na. Oile ḳeu zudi Allar ashik bonia tan morzi zugaia sole, te Allae tar foriad hunoin. ³²Ar aiz forzonto ila huna gese na zen, zonmo taki anda kunu manshor souk keu bala ḳorse. ³³Tain zudi Allar ges taki na aita, te ila ḳorta farla na one.” ³⁴Neta oḳole tare ḳoila, “Tor zonom oise naformanir maze, ar tui amrare talim dire ni?” Oḳan ḳoia tara tare shomaz taki ekgori ḳorla.

³⁵Isae hunla, neta oḳole ou beṭare ekgori ḳorsoin. Tain ou beṭare tukaia bar ḳoria ḳoila, “Oba, tumi kita Bin-Adomor ufre iman ancho ni?” ³⁶He ḳoilo, “Huzur, tain ḳe? Amare ḳoukka, ami zate tan ufre iman antam fari.” ³⁷Isae tare ḳoila, “Tumi tanre deḳso, ar tainu tumar loge matira.” ³⁸Ou beṭae ḳoilo, “Huzur, ami iman anlam.” Oḳan ḳoiau he Hozrot Isare soizda ḳorlo.

³⁹Isae ḳoila, “Huno, ami aisi i duniat bisar ḳorar lagi, zera anda asoin tara zanu bala oin, ar bala oḳol anda oin.” ⁴⁰Ou shomoe ḳoezon Forishio Isar ḳandat asla. Ikan hunia tara ḳoila, “Te afne kita ḳoita saira, amra anda ni?” ⁴¹Isae ḳoila, “Tumra zudi anda oitae, te tumra kunu dushi oilae na one. Oile tumrau ḳoirae anda nae, erlagiu tumrar maze dush ase.”

Hozrot Isa al-Mosiu duar

¹Hozrot Isae aro ḳoila, “Ami tumrare nichchit hasa ḳota ḳoiram, ze manush meṛar gual-goror duaredi na hamaia, oinno fote hamae, he to sur-ḍaḳait. ²Oile ze zon duaredi hamae, he-u meṛar raḳal. ³Gual-goror sokidare raḳalre duar kulia dey. Meṛainteo raḳalor ḍaḳ hunoin ar raḳale tarar nam dori ḍaki ḍaki bar ḳori ney. ⁴Gor taki nizor meṛaintore bar ḳoria harle, raḳal tarar age age zae, ar tar meṛain zae ḳore ḳore, ḳaron tar golar aoaz tara sine. ⁵Tara kunubala osina kunu raḳalor loge zaito nae borong tar ges taki bagibo, ḳaron osina kunu raḳalor golar aoaz tara sine na.” ⁶Isae Forishi oḳolre hikanir lagi ou udahoron dila, oile tain kita buzaira, tara shomzita farla na.

⁷Erlagi tain hirbar ḳoila, “Ami tumrare nichchit hok kota ḳoiram, meṛar falor lagi amiu duar. ⁸Amar age raḳalor bab doria zeta aisla, iguin to sur-ḍaḳait asla, meṛainteo tarar ḳota hunchoin na. ⁹Amiu duar. Amar mazdi ze hamaibo, he tar zan basaibo. He bitre aoa-zaoa ḳorbo ar aṭia-soria ḳaibo. ¹⁰Sure to ḳali suri, kun-ḳarafi ar binash ḳorar nioteu ae. Oile ami aisi zate tara zindegi fae, ar ou zindegi furafur bug kore.

¹¹“Amiu ashol raḳal. Ashol raḳale tar meṛar lagi nizor zan bilai dey. ¹²Ḳali betonor lagi ze zone raḳali ḳore, he ḳaṭi raḳal nae ar i meṛaino tar nizor nae. Bag aoat deḳleu he meṛain falaia nizor zan basae. ¹³Ḳaron he ḳali betonor ashae raḳali ḳore, meṛaintor ḳota sintao ḳore na. Bage aia meṛain doria neygi, teu tara fal bangia sitri zae. ^14-15Te amiu bala raḳal. Amar gaibi bafe amare sinoin, ar amio amar bafore sini. Ṭik oula, ami amar meṛaintoreo sini, ar amar meṛainteo amare sinoin. Ami amar meṛa falor lagi nizor zan dilairam. ¹⁶Amar to aro meṛain asoin, zeta i gual-goro nai, tarareo ami ante oibo. Tara nichchoe amar ḍaḳ hunba, teu ḳali eḳzon raḳal ar eḳṭa fal oibo.

¹⁷“Bafe amare maea ḳoroin, ḳaron ami amar zan bilaimu zate hirbar firot nei. ¹⁸Amar zan ḳeu amar ges taki ḳaṛia nito nae, oile ami nizeu zan bilaimu. Mono rakio, zan deoar ḳemota zela amar ase, oula firot neoar ḳemotao ase. I daeitto ami amar gaibi bafor ges taki faisi.”

¹⁹Hozrot Isar ita mat-ḳota hunia Ihudi neta oḳolor maze hirbar doladoli lagigelo. ²⁰Tarar mazor boute ḳoilo, “Ogure bute dorse, he fagol, tumra ogur mat hunrae ḳene?” ²¹Ar boute ḳoilo, “Bute dora manshor mat to ila nae. Bute kunu andar souk bala ḳore ni?”

Hozrot Isa al-Mosir dabi

²²Bade Zeruzalem kaba goror doḳol faoar idor shomoe aia azilo. Ou shomoe asil shitor din. ²³Hozrot Isa Baetul-Mukaddosor Bashsha Sulaimanor barindat aṭa-uṭi ḳorra. ²⁴Ermaze Ihudi neta oḳol Isar sairobae dola oia ḳoila, “Ar ḳotodin tumi amrare loṭḳaia raḳtae? Tumi zudi hasaror al-Mosi o, te forishkar ḳori amrare ḳo.”

²⁵Teu Isae zuaf dila, “Ami to ḳoilam, oile afnara ekin ḳorra na, ar amar gaibi bafor name ami ze ḳam ḳori, itaeo amar befare shakki der, ²⁶ta-o afnara ekin ḳorra na, ḳaron afnara amar falor meṛa nae. ²⁷Amar meṛainte amar ḍaḳ hunoin. Ami to tarare sini ar tarao amar ḳore ḳore roin. ²⁸Ami tarare aḳeri zindegi dan ḳori, tara kunu shomoe binash oita nae. Ḳeu amar ges tone tarare ḳaṛia nito nae. ²⁹Amar ze gaibi bafe tarare amar ato disoin, tain hoḳol taki mohan. Tan at taki ḳeu kunta ḳaṛia nito fare na. ³⁰Ami ar baba, amra eḳ.”

³¹Teu Ihudi neta oḳole hirbar fattor loila tanre marar lagi. ³²Isae tarare ḳoila, “Gaibi bafor hukum mafik bout bala bala ḳam ami afnaintore deḳaisi. Itar maze kun ḳamor lagi afnara amare fattor marta saira?” ³³Tara ḳoila, “Bala kunu ḳamor lagi amra tore fattor mariar na, tui to shiriki ḳorre, erlagiu fattor marmu. Manush oia tui nizore Alla hishabe dabi ḳorre.” ³⁴Tain ḳoila, “Afnarar shorioto leḳa ase na ni, ‘Ami ḳoilam, tumrau elahi’? ³⁵Te Allar kalam zerar gese nazil oisil, erare to tain nizeu Allar laḳan ḳoia ḍakisoin. Ar pak kitabor ḳota to bad deoa zae na. ³⁶Te gaibi bafe zanre nizor lagi basia fosond ḳorla ar duniat faṭaila, ou ami zebla ḳoilam, ami Ibnulla, te afnara kila ḳoira, tui shiriki ḳorre? ³⁷Ami zudi amar gaibi bafor ḳam na ḳori, te afnara amar ufre iman anba na. ³⁸Oile ami zudi amar bafor hoḳol ḳam ḳoria taki, te amar ufre iman na anleo ita ekin ḳoroukka. Teu afnara zanba, gaibi baf amar mazeu asoin, ar amio tan maze asi.” ³⁹Ou shomoe hirbar tara Isare dorar sesṭa ḳorla, oile tain in tone gaib oigela.

⁴⁰Bade tain hirbar Zordan gangor hofaro gia roila. Age ou zagat Hozrot Ehiae manshore toubar gusol dita. ⁴¹Hono bout manush tan gese ailo ar mata-mati ḳorlo, “Ehia nobie to kunu keramoti nishana deḳaisoin na, oile tain Hozrot Isar befare zotota ḳoisla, ita furafur hasa.” ⁴²Oḳan buzia honor bout manshe Hozrot Isar ufre iman anla.

Hozrot Isae murda Lasarre zinda ḳorla

¹Lasar name eḳzon manush bemar asla. Tan baṛi Baet-Ania gaut, Moriom ar Marta namor tan dui boino ou gaut roita. ²Ḳoedin bade ou Moriomeu Isar fao-o kushboeala ator maḳaia, nizor matar suldi fao fusai diba. Ou Moriomor bai oila bemari Lasar. ³Erlagi tan boinainte oḳan ḳoia Hozrot Isar gese ḳobor faṭaila, “Huzur, afnar maear manush kub bemar.” ⁴Ḳobor faia Isae ḳoila, “I bemar to tar moutor lagi oise na, borong Allar mohima zairor lagiu oise, zate er mazdi ami Ibnullar mohima-o zair oe.”

⁵Hozrot Isae Bibi Marta, tan boin ar Lasarre kub maea ḳorta. ⁶Lasaror bemaror ḳota hunar badeo Isa ze zagat asla, hono aro duidin roila.

⁷Bade tan sahabi oḳolre ḳoila, “Ao, amra hirbar Ehudia zilat zai.” ⁸Sahabi oḳole ḳoila, “Huzur, ou ḳoedin age honor manshe afnare fattor marta saila, oḳon afne hirbar hono zaita ni?” ⁹Tain ḳoila, “Dinor bela to baro gonṭa ase, ḳeu zudi dinor bela sola-fira ḳore, he usṭa ḳae na, ḳaron he ou duniar for deḳe. ¹⁰Ar ḳeu zudi raitor bela sola-fira ḳore, he usṭa ḳae, ḳaron tar maze kunu for nai.”

¹¹Oḳan ḳoia hari tan sahabi oḳolre ḳoila, “Huno, amrar dust Lasar gumai gesegi, ami tare hozag korat zaiar.” ¹²Ikan hunia sahabi oḳole ḳoila, “Huzur, he zudi gumo taḳe, te to bala oizibo.” ¹³Isae Lasaror moutor ḳota ḳoisla, oile tara mono ḳorla, tain emne gumor ḳota ḳoisoin. ¹⁴Teu Isae forishkar ḳori ḳoila, “Lasar mara gese. ¹⁵Oile ami tumrar ḳota mono ḳoria kushi oisi, ami hino aslam na, zate tumra ekin ḳortae faro. Oḳon ao, amra Lasaror gese zai.” ¹⁶Teu tan sahabi Tumase logor sahabi oḳolre ḳoila, “Ao na, amra-o zai, zate tan loge mortam fari.” Ou Tumasre Zomoz ḳoia ḍaḳa oe.

¹⁷Hono gia harle Hozrot Isae hunla, tain zaoar sair din ageu Lasarre dafon ḳora oigese. ¹⁸Zeruzalem ṭaun taki ou Baet-Ania gau onuman dui mail duroi asil. ¹⁹Lasaror moutor bade tan boin Bibi Marta ar Moriomre buz deoar lagi Ihudi shomazor bout manush aila. ²⁰Ermaze Hozrot Isae toshrif anra hunia Bibi Marta tan loge deḳa ḳorat gela, oile Moriom goro boi roila. ²¹Bibi Martae Isare ḳoila, “Huzur, afne zudi ono roita, te amar baigu morlo na one. ²²Oile erbadeo ami zani, afne Allar gese zeta saiba, tain afnare ota diba.”

²³Isae ḳoila, “Huno, tumar bai hirbar zinda oia uṭbo.” ²⁴Teu Martae ḳoila, “Ji-oe, ami zani kiamotor din zebla murda oḳol zinda oiba, ou shomoe he-o zinda oia uṭbo.” ²⁵Isae Martare ḳoila, “Amiu to kiamot ar zindegi. Ze zone amar ufre iman ane he morleo zinda oibo. ²⁶Ar ze zone ashol zinda oia amar ufre iman ane, he kunudino morto nae. Tumi ikan ekin ḳoro ni?” ²⁷Martae ḳoila, “Ji-oe huzur, ami iman anchi, Allar oada ḳora ze zone duniat toshrif anar ḳota, afneu hou al-Mosi Ibnulla, Allar ḳas maear zon.”

²⁸Oḳan ḳoia Martae gia tan boin Moriomre sufte ḍakia nia ḳoila, “Huno, huzur ono asoin, tain tumare ḍakira.” ²⁹Teu Moriom zoldi ḳori Isar ḳandat gela. ³⁰Isa ou shomoyo gaur bitre hamaisoin na, Martae tan loge zeno deḳa ḳorsla, tain hono-u ubai roisla. ³¹Ar goror bitre zeta Ihudi oḳole Moriomre buz deoat asla, Moriome aḳta-u bare zaoat dekia tara tan ḳore ḳore gela. Tara mono ḳorlo, Moriom ḳoeboror gese ḳanda-ḳaṭi ḳorat zaira. ³²Isa ze zagat asla, Moriomo hono gela ar Isare dekia tan fao-o foṛia ḳoila, “Huzur, afne zudi ono taḳta, te amar baigu morlo na one.”

³³Moriom ar tan logor Ihudi oḳolor ḳandon-ahazari dekia Hozrot Isar dilor ruh gorom oigelo, tain ḳator oigela. ³⁴Tain erare zikaila, “Lasarre kuai dafon ḳorso?” Tara ḳoila, “Huzur aukka, deki zaukka.” ³⁵Ou shomoe Isae ḳandi dila. ³⁶Tan ḳandon dekia honor era ḳoila, “Deḳrae ni, tain Lasarre ḳoto maea ḳorta!” ³⁷Oile kunu kunu zone ḳoila, “Zein andar souk bala ḳorsoin, tain ila kunta ḳorta farla one na ni, zate Lasargu na more?”

³⁸Ita hunia Hozrot Isar dilor ruh hirbar gorom oigelo, tain Lasaror ḳoeboror daro gela. I ḳoebor asil guhar laḳan eḳ gato ar ḳoeboror muko eḳ fattor deoa asil. ³⁹Tain manshore ḳoila, “Fattorṭa horao.” Lasaror boin Martae ḳoila, “Huzur, oḳon to lash fosia gond baroigese, tain sair din age mara gesoin.” ⁴⁰Isae enre ḳoila, “Ami to tumare ḳoisi, tumi zudi ekin ḳoro, te Allar kudroti mohima deḳbae.” ⁴¹Teu manshe ḳoeboror mukor fattorṭa horaila.

Isae asmanor bae saia dua ḳorla, “O gaibi baba, tumi amar ḳota huncho, erlagi ami tumar shukria adae ḳori. ⁴²Ami zani, tumi hamesha amar ḳota huno. Oile amar sairobae zeta manush asoin, tara zate ekin ḳoroin, tumi amare faṭaiso, erdae-u oḳan ḳoilam.” ⁴³Oḳan ḳoia tain zure ḍaḳ dia ḳoila, “Lasar, baroia ao.” ⁴⁴Teu murda Lasar ḳoebor taki baroia aila. Tan at-fao ḳafondi fesail asil, ar muk asil rumal dia banda. Isae manshore ḳoila, “Tar band kulo ar tare zaite deo.”

Hozrot Isare zane marar shoṛozontro

⁴⁵Bibi Moriomor gese zeta Ihudi manush aisla, Hozrot Isar ou keramoti ḳam dekia erar mazor boute tan ufre iman anla. ⁴⁶Oile ḳeu ḳeu Forishi oḳolor gese gia Isar ou ḳamor ḳota zanailo. ⁴⁷Ita hunia boṛo imam oḳole ar Forishi dolor manshe deshor fotua komiṭire loia ekkano boila, boia ḳoila, “Amra oḳon kita ḳortam? I beṭae to bout keramoti ḳam deḳar. ⁴⁸Amra zudi tare emne solte dei, te hoḳol manshe tar ufre iman anbo, ar ita hunia Ruman shorḳaror manshe amrar ṭikana ar amrar zatireo binash ḳorba.”

⁴⁹Ou mozlisor maze ou bosoror fordan imam, Kaeafa namor eḳzon asla. Tain erare ḳoila, “Tumra to kuntau zano na. ⁵⁰Buzo na ni, asta zati binash oar saite, hoḳolor bodla eḳzonor moron aro bala.” ⁵¹Imam Kaeafae ashole nizor mon taki ou ḳota ḳoisoin na, tain ou bosoror fordan imam oae gaibi buli tan muk taki baroise ze, Ihudi zatire basanir lagi Isar moron oibo. ⁵²Ḳali Ihudi zatir lagi nae, Allar zoto bondain sairobae sitria asoin, tarare dola ḳoria ekkano ḳorar lagio tain zan bilai diba. ⁵³Hou din taki tara Isare marar faetara ḳorat lagla. ⁵⁴Erlagi Isae tarar maze kula-mela sola-fira bad dilaila, ar ou zaga saṛia morubumir ḳandat Afraim namor eḳ gaut gia tan sahabi oḳolre loia roila.

⁵⁵Ou shomoe Ihudi oḳolor Azadi Id gonai aisil. Idor age nizore pak-saf ḳorar lagi bout manush gau taki Zeruzalem ṭauno gela. ⁵⁶Hino gia tara Hozrot Isare tukaila. Tara Baetul-Mukaddoso ubaia eḳe-oinne zikaila, “Kita mono ḳoroin, tain i ido aita nae ni?” ⁵⁷Boṛo imam ar Forishi oḳole hukum disla, ḳeu zudi Isar kuz fae, te tarare zananir lagi, zate tara Isare dorta faroin.

Matar suldi fao fusa

¹Azadi Idor soedin age, Hozrot Isa hou Lasaror gau Baet-Aniat aila, ze Lasarre tain mora taki zinda ḳorsla. ²Ino tara Hozrot Isar lagi ḳanir mezbani zuit ḳorla. Isar loge ḳaoat zera boisil, erar loge Lasaro asla ar Bibi Martae ḳadimdari ḳorla. ³Ou shomoe Lasaror boin Moriome ada sher kub dami ḳaṭi ator loia aila, aia ou ator Isar fao-o ḍalia nizor matar suldi fao fusia dila. Atoror kushboye asta gor borigelo.

⁴Ihuda Iskariat name Isar eḳ sahabi, zein tanre dushmonor ato dorai diba, ein ḳoila, ⁵“Ish, i ator fuṭin besile to tin-sho dinar faia gorib oḳolre bilai deoa gelo one.” ⁶Ashole Ihudae gorib oḳolor ḳota sinta ḳoria ikan ḳoise na. He asil sur. Ṭeḳar toli tar gese taḳto, ar zoma ṭeḳa taki he suri ḳorto, erlagi ola ḳoise. ⁷Isae ḳoila, “Tumra i beṭigur mono duk dio na. Amar dafon-ḳafonor lagi tain i fuṭain toisla. ⁸Gorib oḳol to hamesha-u tumrar maze asoin, oile amare hamesha faitae nae.”

⁹Hozrot Isa Baet-Aniat aisoin hunia, Ihudi zatir bout manush ono aila. Tara ḳali Isar lagi nae, hou ze Lasarre Isae mora taki zinda ḳorsla, tareo deḳat aila. ¹⁰Ou shomoe boṛo imam oḳole niot ḳorla Lasarreo marilita. ¹¹Ḳaron Lasaror lagi bout Ihudi manshe neta oḳolor log saṛia, Isar ufre iman anchila.

Hozrot Isa Zeruzalemo aila

¹²Idor niote dole dole zoto manush aisoin, tara bador din hunla, Hozrot Isae Zeruzalemo toshrif anra. ¹³Ou tara kezuror kesma ḍal loia tanre aguaia anat gela ar misil dia ḳoila,

“Marhaba! Mabudor name zein toshrif anra,

tan tarif ouk,

tainu Israilor bashsha!”

¹⁴Allar kalamor aeat mafik Hozrot Isae eḳṭa gada dekia tar ufre soar oila. Kitabo leḳa ase, ¹⁵“O Sion-ḳoina Zeruzalem, ḍoraio na. Saia deḳo, gadar baichcha soṛia tumar bashsha aira.”

¹⁶Sahabi oḳole foela itar kunu mani buzla na. Bade Hozrot Isar kudroti mohima zair oia harle, pak kitabor ḳota tarar mono oilo, ou aeato tan befareu leḳa asil, ar manshe tan lagiu otota ḳorse. ¹⁷Ḳoebor taki Lasarre ḍakia zinda ḳori tular shomoe zeta manush Isar loge asla, tarao ou befare hamesha mat-ḳota matita. ¹⁸Erlagi manshe tan ou keramoti ḳamor ḳobor hunia tanre aguaia anat gesla. ¹⁹Ita dekia Forishi oḳole eḳe-oinne ḳoilo, “Amrar to kunu lab or na. Deḳrae ni, asta dunia-u tar ḳore gesegi.”

Nizor moutor agam ḳobor

²⁰Azadi Ido zera ebadot ḳorat aisla, tarar maze ḳoezon Iunani manusho asla. ²¹Tara Galil zilar Baet-Soeda gaur Filifre aia minot ḳorla, “Sab, amra huzur Isare deḳtam sai.” ²²Filife ikan Andriasre ḳoila. Bade Andrias ar Filife gia Isare zanaila.

²³Isae tarare ḳoila, “Ami Bin-Adomor mohima zair oar shomoe aichche. ²⁴Ami tumrare hasau ḳoiram, danor bis maṭit foṛia zudi na more, te eḳṭau taḳe, ar maṭit morle bout foshol fole. ²⁵Ola ze zone nizor zanre beshi maea ḳore, he tar ashol zindegi kuailae, oile ze zone i duniat nizor zanre tuchcho mono ḳore, he tar ashol zindegi, mani aḳerator lagi zan basae. ²⁶Ḳeu zudi amar ḳezmot ḳorto sae, te amar fote solouk. Teu ami zeḳano roimu amar ḳezmotḳario ono roibo. Ze zone amar ḳezmot ḳore, amar gaibi bafe tare ijjot diba.

²⁷“Amar mon oḳon fereshan oigese. Te ami oḳan ḳoitam ni, baba, ze shomoe aia azise, ou shomoyor at taki amare basao? Oile otar lagiu to ami ou shomoe forzonto aisi. ²⁸Baba, tumi tumar mohima zair ḳoro.” Ou shomoe asman taki gaibi aoaz ailo, “Ami amar mohima zair ḳorsi ar hirbar zair ḳormu.” ²⁹I aoaz hunia hino zoto manush asla, tara ḳoila, “Ita to megor ḍaḳ.” Ḳeu ḳeu ḳoilo, “Kunu firistae tan loge batchit ḳorsoin.” ³⁰Ikan hunia Isae ḳoila, “I aoaz to amar lagi aise na, afnarar lagiu aise. ³¹I zogotor manshor bisaror shomoe aichche, duniar munib Iblisor at taki oḳon ḳemota ḳaṛia neoa oibo. ³²Amare zebla zomin taki ufre tula oibo, ou shomoe ami hoḳolre amar gese ṭania tulmu.” ³³Tan kilaḳan mout oibo, oḳan buzanir lagi tain ita ḳoila.

³⁴Ou shomoe manshe Isare ḳoila, “Amra pak kitab taki hunchi al-Mosi siroḳal roiba. Te afne kila ḳoira, Bin-Adomre usat tula oibo? Taile i Bin-Adom ḳe?” ³⁵Tain zuaf dila, “Ar kisu shomoe nur afnarar loge ase, nur taḳte taḳteu aṭa doroukka, zela andaire aia afnaintore na bere. Ze zon andair fote aṭe, he zane na he kuai zar. ³⁶Nur afnarar loge taḳte taḳteu nuror ufre iman anoukka, zate afnarao ou nuror manush oita faroin.” Erbade Isa in tone horia gia, erar souk taki nizore lukailila.

Manshor dil fashan

³⁷Hozrot Isae manshor samne oto beshi keramoti nishana deḳanir badeo tara tan ufre iman anlo na. ³⁸Ita hokkolta goṭisil zate agor zomanar nobi Ishaear ḳota fura oe, tain bataisla,

Mabud go, amrar tobligor ufre ḳe ekin ḳorse?

Tumar kudroti at ḳar gese-u ba zair oise?

³⁹Erlagiu to ita manshe iman anche na, ḳaron Ishaea nobie eoḳan ḳoisla,

⁴⁰Allae tarar souk anda banailisoin,

tarar dil fashan banailisoin,

zate soukdi na deḳe ar dildi na buze.

Arnae kizanu tara touba ḳorilain,

Allar bae firizain,

ar ami tarare shifa ḳorilai.

⁴¹Ishaea nobie Isar mohima deḳsla gotike, tan befare ou ḳota ḳoisla. ⁴²Tebou Ihudi neta oḳolor maz taki boute tan ufre iman anla, oile Forishi oḳole tarare shomaz taki bar ḳori dilaibo, oḳan ḍoraia tara shikar ḳorla na. ⁴³Tara Allar tarif taki manshor tarif faite beshi fosond ḳorta.

Hozrot Isau toraneala

⁴⁴Bade Isae zure zure ḳoila, “Ze zone amar ufre iman ane, he ḳali amar ufre nae, zein amare faṭaisoin tan ufreo iman ane. ⁴⁵Ze zone amare deḳe, he ashole tanre-u deḳe, zein amare faṭaisoin. ⁴⁶Ami i duniat nur hishabe aisi, zate amar ufre ze iman ane, he ar andarit na roe. ⁴⁷Ḳeu zudi amar ḳota hunia, ou mafik amol na ḳore, te ami nize tar bisar ḳori na, ḳaron ami manshore dushi shaibosto ḳorat aisi na, borong manshore toranit aisi. ⁴⁸Ze zone amare mane na ar amar ḳota hune na, tar bisaror lagi to eḳzon asoin. Ami tare ze ḳota ḳoisi, ou ḳotae-u kiamotor din tare dushi shaibosto ḳorbo. ⁴⁹Ami to nize taki kunta ḳoisi na, ḳali amar ze gaibi bafe amare bezisoin, tain nizeu hukum disoin, ami kita kita ḳoitam. ⁵⁰Ami zani, tan hukum mana-u oilo aḳeri zindegi. Erlagi ami zeta ḳoi, ita amar gaibi bafor hukume-u ḳoi.”

Ummot oḳolre Hozrot Isar aḳeri talim (13:1–17:26)

Sahabi oḳolor fao doaila

¹Azadi Idor tuṛa agor goṭona. Isae buzilila, tain i dunia saṛia tan gaibi bafor gese zaibar shomoe aichche. Duniat zera tan afon manush asla, tarare tain kub maea ḳorta ar hesh forzonto ola maea ḳoria-u gesoin. ²Raitkur ḳanit boibar agor ḳota, Hozrot Isare dushmonor ato dorai dibar lagi, Iblise aia Saimon Iskariator fua Ihudar mono ḳaish zagai dilo. ³Isae zanta, tan gaibi baf Allae tan ato hoḳolta shofi disoin, tain Allar ges taki aisoin ar tan gese-u firia zaira. ⁴Erlagi tain ḳaoa taki uṭla ar finnor fainjabi kulia ekkan gamsa ḳomoro bandila. ⁵Bade tain gamlar maze fani loia sahabi oḳolor fao doai dila, ar ḳomoror gamsadi fao fusia deoat lagla.

⁶Ou laḳan tain zebla Saimon-Fitoror gese aila, Fitore ḳoila, “Huzur, ita kita ḳoroin, afne amar fao doaia dita ni?” ⁷Tain ḳoila, “Ami zeta ḳoriar, oḳon tumi itar mani buztae nae, bade buzbae.” ⁸Ou Fitore tanre ḳoila, “Ji na, afne kunumonte-u amar fao doai diba na.” Isae ḳoila, “Ami zudi tumar fao doia na dei, te tumar loge amar kunu ḳatir nai.” ⁹Teu Saimon-Fitore ḳoila, “Huzur, te ḳali fao nae, amar mata ar ato doaia deukka”. ¹⁰Tain ḳoila, “Ze manshe gusol ḳorse, tar fao saṛa ar kunta doar zorur nae, tar to hoḳolta forishkar ase. Tumrao nichchoe forishkar aso, oile hoḳol nae.” ¹¹Ashole dushmonor ato ḳe tanre dorai dibo, ikan tain zanta. Erdae tain ḳoila, “Tumra hoḳol forishkar nae.”

¹²Sahabi oḳolor fao doaia harle Isae tan fainjabi findia hirbar boila ar tarare ḳoila, “Ami kita ḳorlam, tumra ita buzcho ni? ¹³Tumra amare ustad ar malik koia ḍaḳo, ikan ṭiku, amiu tumrar ustad ar malik. ¹⁴Ar ami tumrar ustad ar malik oia-o zebla tumrar fao doaia dilam, te tumrao ola eḳe-oinnor fao doai deoa zorur. ¹⁵Ami ila ḳoria deḳailam, zate ami zela ḳorlam tumrao ola ḳoro. ¹⁶Ami tumrare hasau ḳoiram, gulam tar munib taki boṛo nae. Ar zare faṭani oise, he tar faṭaora taki boṛo nae. ¹⁷Ita zania zudi amol ḳoro, te tumra doinno.

¹⁸“Ami tumra hoḳolor befare ḳoiram na. Ami zerare fosond ḳorsi tarare to sini. Huno, Allar kalamor aeat to folite oibo, leḳa ase, ‘Amar loge boia zegue ḳaoa-daoa ḳore, hogue amar ufre fao tulche.’ ¹⁹Ita goṭar ageu ami tumrare zanai dilam, teu goṭar bade tumra buzbae, amiu hein. ²⁰Ami tumrare hasau ḳoiram, ami zare faṭai, tare ze zone ḳobul ḳore, he ashole amare-u ḳobul ḳore. Ar ze zone amare ḳobul ḳore, he tanre-u ḳobul ḳore, zein amare faṭaisoin.”

Beiman Ihuda

²¹Oḳan ḳoia harle Hozrot Isar dil fereshan oigelo. Tain kulia ḳoila, “Ami hok kota ḳoiram, tumrar mazor eḳzoneu amare dushmonor ato dorai dibo.” ²²Tain ḳar ḳota ḳoira, sahabi oḳole ikan na buzae eḳe-oinnor bae sai roila. ²³Erar mazor ze sahabire Isae maea ḳorta, ein Isar kulo elain dia boat asla. ²⁴Saimon-Fitore enre ishara dia ḳoila, tumi zikao, tain ḳar ḳota ḳoira. ²⁵Teu ou sahabie Isar bae zukia ḳoila, “Huzur, ḳe ou zon?” ²⁶Isae zuaf dila, “Ou ruṭir ṭukra boulo bizaia zare dimu, he-u ou zon.” Ar ou ruṭi tain Saimon Iskariator fua Ihudare dila. ²⁷Ruṭir ṭukra loar loge logeu Iblis Ihudar bitre hamailo. Isae tare ḳoila, “Zeta ḳortae sao, zoldi ḳorilao.”

²⁸Isar loge zara ḳaoat boisla, tara ḳeu buzla na, tain Ihudare ḳene ikan ḳoisoin. ²⁹Ḳeu ḳeu mono ḳorlo, idor bazar ḳorar lagi Isae Ihudare oḳan ḳoisoin ba gorib oḳolre kunta deoar ḳota ḳoisoin, ḳaron ṭeḳar toli to Ihudar gese-u taḳto. ³⁰Ruṭir ṭukra loar loge loge Ihuda baroia gelogi. I shomoe rait asil.

Noea hukum

³¹Ihuda bare gia harle Isae ḳoila, “Bin-Adomor mohima zair ḳorar shomoe aichche, tan mazdi Allar mohima zair oibo. ³²Ar Allar mohima zebla tan mazdi zair oibo, ou shomoe Allae-o nizor maze Bin-Adomor mohima zair ḳorba, ita tain kub zoldiu ḳorba. ³³O aolad oḳol, ami ar beshi din tumrar gese roitam nae. Te Ihudi neta oḳolre age zela ḳoislam, tumra amare tallash ḳorbae, oile ami zeḳano zaimu tumra hino zaitae fartae nae, oḳon ou ḳota tumrareo ḳoiram. ³⁴Ami tumrare ekkan noea hukum diram, tumra eḳe-oinnore maea ḳorio. Ami zela tumrare maea ḳorsi, tumrao ola eḳe-oinnore maea ḳorio. ³⁵Tumra zudi eḳe-oinnore maea ḳoro, te hoḳole buzbo tumra amar ummot.”

Sahabi Fitoror oshikaror ḳota

³⁶Saimon-Fitore Isare ḳoila, “Huzur, afne kuai zaira?” Tain ḳoila, “Ami zeno zairam, tumra oḳon amar loge hino aitae fartae nae, oile bade aibae.” ³⁷Fitore ḳoila, “Oḳon ḳene zaitam fartam nae? Afnar lagi ami amar zano bilai dimu.”

³⁸Ou shomoe Isae ḳoila, “Amar lagi hasau tumar zan dibae ni? Te hasa ḳota ami tumare ḳoiram, murgae bang dibar ageu, tumi tinbar ḳoibae, tumi amare sino na.”

Hozrot Isa al-Mosiu fot

¹Hozrot Isae ḳoila, “Tumra ar fereshan oio na. Allar ufre to tumrar ekin ase, te amar ufreo ekin raḳo. ²Amar bafor baṛit roar bout zaga ase, na taḳle ami ḳoilam one. Ami to tumrar lagi zaga ṭik korat zairam. ³Zaga ṭik koria hirbar aimu, aia tumrare amar gese nimu. Teu ami zeno roimu, tumrao hono roibae. ⁴Ar ami kuai zairam, i fot to tumrar sina ase.”

⁵Ou shomoe sahabi Tumase Isare ḳoila, “Huzur, afne kuai zaira, oḳanu amra zani na, te fot kila sinmu?” ⁶Isae ḳoila, “Amiu fot, amiu hok ar amiu zindegi. Amar usilla saṛa kunu manushu gaibi bafor gese zaito fare na. ⁷Tumra amare sinle amar gaibi bafreo sinlae one. Te oḳon tumra tane sincho ar deḳso-o.”

⁸Filife ḳoila, “Huzur, ou gaibi baf amrare deḳaukka, teu amra shanti oimu.” ⁹Isae ḳoila, “Filif, otodin taki ami tumrar loge loge asi, erbadeo tumi amare sinlae na ni? Ze zone amare deḳse, he amar gaibi bafreo deḳse. Te tumi kilan ḳoilae, gaibi bafore deḳaukka? ¹⁰Tumi ekin ḳoro na ni, ami gaibi bafor maze asi, ar gaibi bafo amar maze asoin? Ami tumrare zeta ḳoi, ita amar nizor mukor buli nae, ze gaibi baf amar bitre asoin, tainu tan nizor ḳam salaira. ¹¹Amar ḳota ekin ḳoro, ami amar bafor maze asi, ar tain amar maze asoin. Arnae ontoto amar ota keramoti ḳam dekia amare ekin ḳoro.

¹²“Ami tumrare hasau ḳoiram, ḳeu zudi amar ufre iman ane, te ami zeta ḳam ḳori, he-o ota ḳorbo. Ar ami amar bafor gese zaiargi ḳori he aro boṛo boṛo ḳam ḳorbo. ¹³Tumra amar name zeta saibae, ami ita fura ḳormu zate bafor mohima futor mazdi zair oe. ¹⁴Amar nam loia amar gese kunta saile, ami dimu.

Pak ruhur befare oada

¹⁵“Tumra zudi amare maea ḳoro, te amar hoḳol hukum-ahkam amol ḳorio. ¹⁶Ami gaibi bafor gese saimu, ar tain tumrar lagi aroḳ shaijjogir faṭaiba, ein siroḳal roiba. ¹⁷Ou shaijjogir oila hok ruh. I duniar manshe ou hok ruhre ḳobul ḳore na, ḳaron tara ere deḳeo na, sineo na. Oile tumra ene sino, ein to tumrar loge loge roin ar samnedi tumrar dilor maze boshot ḳorba.

¹⁸“Ami tumrare etim halote falaia zaitam nae, ami hirbar tumrar gese aimu. ¹⁹Tuṛa bade duniar manshe amare ar deḳto nae, oile tumra deḳbae. Ami zinda asi gotike tumrao zinda roibae. ²⁰Ami zinda oia uṭia harle tumra buzbae, ami amar gaibi bafor maze asi ar tumra amar maze aso, ami tumrar maze asi. ²¹Ze zone amar hukum-ahkam sine ar amol ḳore, he-u amare maea ḳore. Ar ze zone amare maea ḳore, amar gaibi baf Allae-o tare maea ḳorba. Amio tare maea ḳormu, ar amar nizore tar gese zair ḳormu.”

²²Sahabi oḳolor maze Ihuda Iskariat saṛa aroḳ sahabir nam asil Ihuda, ein ḳoila, “Huzur, duniar hoḳol manshor gese zair na ḳoria, ḳali amrar gese-u afnare ḳene zair ḳorba?” ²³Isae zuaf dila, “Ḳeu zudi amare maea ḳore, te he amar ḳota manbo. Amar gaibi bafe tare maea ḳorba, amra tar gese aimu, aia tar loge boshot ḳormu. ²⁴Oile ze zone amare maea ḳore na, he kunumonte-u amar ḳotae sole na. Ami tumrare zeta ḳoilam, ita amar mukor ḳota nae, zein amare bezisoin hou bafor ḳota.

²⁵“Ami tumrar loge taḳte taḳteu ita ḳoilam. ²⁶Ou shaijjogir Pak Ruhu, zanre amar bafe amar name faṭaiba, tainu hoḳol befare tumrare talim diba, ar ami tumrare zeta ḳoisi ota iad ḳorai diba.

²⁷“Ami tumrar lagi shanti rakia zaiar, amar shantiu ami tumrare dia zaiargi. I duniae zemne shanti dey, ami ila dei na. Tumrar dilo zanu kunu fereshani ba ḍor-ḳof na ae. ²⁸Ami to ageu tumrare ḳoisi, ami zaiargi, ar hirbar tumrar gese aimu. Tumra zudi amare maea ḳortae, te ami amar bafor gese zaiar ḳori kushi oilae one, ḳaron i baf to amar takio mohan. ²⁹Ita goṭar ageu tumrare zanai dilam, zate goṭia harle tumra ekin ḳortae faro. ³⁰Ami tumrar loge ar beshi shomoe mattam nae, ḳaron duniar munib Iblis aior. Amar ufre tar kunu ḳemota nai. ³¹Oile ami amar bafor hukum mania ita hoḳolta ḳori, zate duniar manshe buzoin, ami amar bafore maea ḳori. Te ao, amra oḳon i zaga taki zaigi.”

Hozrot Isau ashol angur gas

¹Hozrot Isae ḳoila, “Amiu ashol angur gas ar amar baba girosto. ²Amar zeta ḍalainto fol dore na, tain itare ḳaṭia falai dein. Ar zeta ḍalainto fol dore, tain itare saṭia saf-sutra ḳori raḳoin, zate aro beshi fol dore. ³Te ami tumrare ze kalam talim disi, erlagi to tumra ag takiu saṭa oia saf-sutra oiso. ⁴Tumra amar maze ro, amio tumrar dilo roimu. Angur gasor loge ḍal zudi lagail na taḳe, te ḍale zela nize nize fol doraito fare na, oula tumrao amar maze na roile nize nize folala oitae faro na. ⁵Amiu angur gas, ar tumra oilae dal-fala. Ze zon amar loge lagail taḳe, amio tar loge lagail roi, teu tar zindegit bout fol dore. Ar, amare saṛa to tumra kuntau ḳortae faro na.

⁶“Amar loge ḳeu lagail na roile, tare ḳaṭa ḍalor laḳan falai deoa oe ar roide hukai zae. Bade hukna ḍalain tubaia aguino dein, teu ita zoli-fuṛi zae. ⁷Tumra zudi amar loge lagail taḳo ar amar kalam ḳanain tumrar dilo taḳe, te tumrar zeta ichcha otau saio, ita tumrare deoa oibo. ⁸Tumrar zindegit zudi bout fol dore, ar olaḳan tumra nizore amar ummot hishabe forman ḳorilao, te amar gaibi bafor tarif oibo. ⁹Bafe amare zela maea ḳorsoin, amio oula tumrare maea ḳorsi. Tumra amar maear maze ro. ¹⁰Ami amar bafor hoḳol hukum-ahkam mania zela tan maear maze roisi, tumrao oula amar hukum-ahkam manle amar maear maze roibae.

¹¹“Ami tumrare ita ḳoilam, zate amar kushi tumrar dilo taḳe ar tumrar kushi fura oe. ¹²Amar hukum oilo, ami zela tumrare maea ḳorsi, tumrao oula eḳe-oinnore maea ḳoro. ¹³Ḳeu zudi nizor dustor lagi zan bilai dey, te tar taki ar beshi maea ḳar ase? ¹⁴Amar deoa hukum zudi tumra amol ḳoro, te tumra amar dust. ¹⁵Ami tumrare ar gulam ḳoiram na, ḳaron munibe kita ḳoroin gulame to ita zane na, borong ami tumrare dust ḳoisi, ḳaron gaibi bafor ges taki ami zotota hunchi, hoḳolta-u tumrare zanaisi.

¹⁶“Amare to tumra fosond ḳorso na, borong amiu tumrare fosond ḳorsi ar ḳamo lagaisi, zate tumrar zindegi folala oe ar ou fol ṭikia roe. Teu amar name gaibi bafor gese zeta saibae, tain tumrare diba. ¹⁷Ami tumrare ou hukum diar, tumra eḳe-oinnore maea ḳoro.

Dunia mumin oḳolor dushmon

¹⁸“Duniar manshe tumrare ginnain, oile mono rakio, er age tara amare-u ginnaise. ¹⁹Tumra zudi ou duniar oitae, te tara tumrare nizor hishabe bala failo one. Tumra to i duniar nae, ami tumrare duniar maz taki fosond ḳorsi gotike tara tumrare ginnae. ²⁰Amar ḳotaḳan mono rakio, gulam tar munib taki boṛo nae. Erlagi manshe zudi amare zulum ḳore, te tumrareo ola ḳorbo. Tara amar ḳota manle tumrar ḳotao manlo one. ²¹Amar ḳaroneu tara tumrar loge ola ḳorbo, ḳaron amare zein bezisoin, enre tara sine na.

²²“Ami zudi na aitam ar tarar gese nosiot na ḳortam, te tara gunagar oilo na one, oile oḳon to tarar kunu uzuat nai. ²³Ze zone amare ginnae, he amar gaibi bafreo ginnae. ²⁴Huno, zeta keramoti ḳeu kunudin deḳaise na, ota keramoti zudi ami na deḳaitam, te tara gunagar oilo na one. Oile tara to amare ar amar gaibi bafore deḳse, dekiao ginnaise. ²⁵Ita oilo, zate tarar kitabor ou ḳota fole, kitabo ase, tara bina ḳarone amare ginnaise.

²⁶“Ami amar gaibi bafor ges taki ze shaijjogir ruhre tumrar gese faṭaimu, tain aia amar befare shakki diba. Tain oila hok ruh, tain gaibi bafor ges taki aiba. ²⁷Ar tumrao amar befare shakki dibae, tumra to foela takiu amar loge loge aso.”

¹Hozrot Isae aro ḳoila, “Ami ita zanai dilam, zate tumra ḳorlami na zao. ²Manshe tumrare shomaz taki bar ḳori diba. Ola shomoe aibo, zara tumrare kun ḳorbo, tara mono ḳorbo ita Allar ebadot ḳorer. ³Tara ita ḳorbo, ḳaron tara gaibi bafreo sinche na, amareo sinche na. ⁴Ami ita ageu ḳoia raḳlam, zate shomoe aile mono oe, ami tumrare ota ḳoislam. Ami foela taki ita ḳoisi na, ḳaron ami to tumrar loge logeu aslam.

Shaijjogir ruhur ḳam-ḳazor nomuna

⁵“Huno, amare zein faṭaisoin, ami oḳon tan gese zaiargi, ta-o tumra ḳeu amare zikairae na, ami ḳoi zairam. ⁶Borong ami tumrare ita ḳoisi, erlagi tumrar mono kub duk aise. ⁷Tebou ami hok kota ḳoiram, amar zaoaḳan tumrar lagi bala, ami na gele to hou shaijjogir ruh aita nae. Ami gelegi tanre tumrar gese faṭaimu. ⁸Tain aia gunar befare, Allar morzi mafik solar befare ar Allar bisaror befare manshore hozag korba. ⁹Tain gunar befare hozag korba, ḳaron manshe amar ufre iman ane na. ¹⁰Allar morzi mafik solar befare hozag korba, ḳaron ami amar gaibi bafor gese zaiargi, tumra amare ar deḳtae nae. ¹¹Bisaror befare hozag korba, ḳaron duniar munib Iblisor bisar oigese.

¹²“Tumrare aro boutta ḳoar ase, oile oḳon ita ḳoile shoijjo ḳortae fartae nae. ¹³Hou hok ruh aia hari fot deḳaia tumrare furafur hokkan zanaiba. Tain to niz taki kunta ḳoita nae, ḳali zeta hunoin, otau ḳoiba. Ar zeta goṭbo, otau zanaiba. ¹⁴Ami zeta ḳoi, tain aia otau tumrar gese zair ḳorba. Olaḳan tain amar mohima zair ḳorba. ¹⁵Gaibi bafor zeta ase, ita hoḳolta-u amar. Erlagi ami ḳoiram, ami zeta ḳoi, tain otau tumrar gese zair ḳorba.”

Ummot oḳolre buz deoa

¹⁶Hozrot Isae ḳoila, “Tuṛa bade tumra ar amare deḳtae nae, hirbar tuṛa bade deḳbae.” ¹⁷Ikan hunia ḳoezon sahabie mata-mati ḳorla, “Tain ita kita matoin, ‘Tuṛa bade tumra ar amare deḳtae nae, hirbar tuṛa bade deḳbae’, tain hirbar ḳoira, ‘Ami bafor gese zairamgi.’ ¹⁸Te tain ze tuṛa shomoyor ḳota ḳoira, ikan kita? Tain kita matira, amra to buzram na.”

¹⁹Hozrot Isae buzilila, tan sahabi oḳole ou befare tanre kunta zikaita saira, buzia tain ḳoila, “Ami ze ḳoisi, ‘Tuṛa bade tumra ar amare deḳtae nae, hirbar tuṛa bade deḳbae’ ota loia tumra mata-mati ḳorrae ni? ²⁰Huno, ami tumrare hasau ḳoiram, tumra ḳandibae ar ahazari ḳorbae, oile i duniar manshe kushi ḳorba. Tumra oḳon duk-koshṭo ḳorbae, oile bade i duk roito nae, er bodla kushi ḳorbae. ²¹Baichcha oar shomoe beṭintor kub ḳoshṭo oe, oile oia harle noea aolador furtie mon bori zae, hi ḳoshṭor ḳota ar mono taḳe na. ²²Ou laḳan tumrao oḳon duk-koshṭo ḳorrae, oile hirbar zebla tumrar loge amar deḳa oibo, hou shomoe kushie tumrar dil borizibo, i kushi ḳeu ḳaṛia nito farto nae.

²³“Hi shomoe tumra amar gese kunta saitae nae. Ami tumrare hasa ḳoiram, tumra amar name amar gaibi bafor gese zeta saibae, tain tumrare diba. ²⁴Oḳono to tumra amar name kunta saiso na. Sao, teu faibae, zate tumrar kushi fura oe.

²⁵“Ami tumrare udahoron dia ou talim dilam. Oile olaḳan shomoe aibo, zebla ami kunu udahoron saṛa, amar gaibi bafor befare kula-mela buzaimu. ²⁶Hou dinu tumra amar name saibae. Ami to ikan ḳoiram na, ami tumrar oia gaibi bafor gese minot ḳormu. ²⁷Tain nizeu tumrare maea ḳoroin, ḳaron tumra amare maea ḳorso ar ekin ḳorso ze, ami Allar ges taki aisi. ²⁸Ashole, ami amar gaibi baf Allar ges taki ou duniat aisi ar dunia saṛia tan gese-u zairam.”

²⁹Ou shomoe sahabi oḳole tanre ḳoila, “Huzur deḳoukka, oḳon to afne kula-melau matira, kunu udahoron dira na. ³⁰Oḳon amra buzlam, afnar ozana kunta nai, ar afnare ḳeu kunta zikaniro nai. Gotikeu amra ekin ḳorlam, afne Allar ges takiu aisoin.” ³¹Isae tarare ḳoila, “Oḳon ekin oise ni? ³²Huno, ola shomoe aior, emonki aichche, zebla tumra dol saṛia amare toia zarzir zagat bagibae. Oile ami to eḳla nae, amar gaibi baf amar loge loge asoin. ³³Ami tumrare ita ḳoilam, zate tumra amar loge mishia aso gotike mono shanti fao. I duniat tumra duk-mosiboto aso, ta-o monobol rakio, amiu duniare zoe ḳorsi.”

Ummotor lagi munazat

¹Oḳan ḳoia hari Hozrot Isae asmanor bae saia dua ḳorla, “Baba, shomoe oigese. Tumi tumar futor mohima zair ḳoro, zate futeo tumar mohima zair ḳorta faroin. ²Tumi tanre hoḳol manshor ufre ḳemota diso, zate tumi zerare tan ato shofiso, erare tain aḳeri zindegi dein. ³Eḳmatro hok Allare mani tumare ar tumi zenre faṭaiso, hou Isa al-Mosire sinu oilo aḳeri zindegi. ⁴Tumi amare ze ḳam diso, i ḳam adae ḳoria duniat tumar mohima zair ḳorsi. ⁵Te baba, dunia foeda ḳorar age tumar dorbaro amar ze mohima asil, tumar gesor ou mohima oḳon amare hirbar deo.

⁶“I duniar mazor zerare amar ato shofiso, ami erar gese tumare zair ḳorsi. Tara to tumaru asla, tumiu tarare amar ato shofiso. Tara tumar hukum mania solche. ⁷Tara oḳon buzche, tumi zeta amare diso, ita to tumar ges takiu aise. ⁸Ḳaron oilo, tumi zeta toblig korar hukum diso, ami ota zanaisi. Ar tarao itare ḳobul ḳoria asholḳan buzilise zen, ami tumar ges takiu aisi. Tara ekino ḳorse, tumiu amare faṭaiso. ⁹Te ami to hoḳolor lagi minot ḳoriar na, ḳali tumi zarare amar ato diso, erar lagiu minot ḳorram, tara to tumaru. ¹⁰Amar zotota ase hokkoltau tumar, ar tumar hokkoltau amar. Erar mazdiu amar mohima zair or.

¹¹“O fobitro baba, i duniat ami ar beshi shomoe nae, oile tara i duniat asoin, ami to tumar gese airam. Tumi amare tumar ze nam diso, ou namor bole erare basao, zate amra zela eḳ, tarao ola eḳ oita faroin. ¹²Ami zotodin tarar loge aslam, otodin tumar deoa ou namor gune tarare basaisi. Tarare fara dia raḳsi, tara ḳeu binash oise na. Ḳali zar binash oar ḳota, he-u binash oise, zate Allar kalamor ḳota fole.

¹³“Te oḳon ami tumar gese airam, duniat roiteu ita tarare zanai dilam, zate amar kushie tarar dil bori zae. ¹⁴Tumi amare zeta zanaiso, amio tarare ota zanaisi. Ami zela i duniar nae, tarao ola i duniar nae, erlagi duniar manshe tarare ginnaise. ¹⁵Ami tumar gese abdar ḳorram na, tumi tarare dunia taki nitaegi, borong ou abdar ḳorram, tumi tarare Iblisor at taki hefazot ḳoro. ¹⁶Ami zela ou duniar nae, oula tarao i duniar nae. ¹⁷Tumi tarare tumar hok dia ḳas hishabe raḳo. Tumar kalamu oilo ou hok. ¹⁸Tumi zela amare duniat faṭaiso, oula amio tarare duniar maze faṭaisi. ¹⁹Ami tarar lagi nizore ḳas ḳori raḳsi, zate tarareo hok dia ḳas hishabe raḳa oe.

²⁰“Te ami ḳali erar lagi minot ḳoriar na, tarar lagio minot ḳorram, zera erar ḳota hunia amar ufre iman anbo. ²¹Ami minot ḳoriar tara hoḳol zanu eḳ oe. Baba, tumi zela amar loge aso ar amio zela tumar loge asi, oula tarao zanu amrar loge milia roin. Teu duniar manshe ekin ḳorba, tumiu amare faṭaiso. ²²Tumi amare ze mohima dan ḳorso, ami ita tarare dan ḳorsi, zate amra zela eḳ, oula tarao eḳ oita faroin. ²³Tumi zela amar maze aso, ola amio tarar maze asi. Ou laḳan tara zanu furafur eḳ oita faroin. Teu duniar manshe buzbo, tumiu amare faṭaiso, ar tumi amare zela maea ḳoro, oula tarareo ḳoro. ²⁴Baba, ami sairam, tumi zerare amar ato shofiso, ami zeḳano asi, tarao zanu amar loge hono roin ar amar mohima deḳoin. I mohima to tumiu amare dan ḳorso, ḳaron dunia foeda ḳorar ag takiu tumi amare maea ḳorso.

²⁵“O hok insafḳari baba, duniar manshe tumare sine na, oile ami to sini. Ar tumiu zen amare faṭaiso, ikan era buzilise. ²⁶Erar gese ami tumar nam zair ḳorsi, agedi aro ḳormu, zate tumi amare zela maea ḳoro, ola maea tarar bitreo taḳe ar ami tarar loge mishia taki.”

Hozrot Isar ufre zulum-mosibot ar tan ufat (18:1–19:42)

Dushmonor ato Hozrot Isa

¹Ou munazator bade Hozrot Isae tan sahabi oḳolre loia Kidrun namor eḳ faṛia ḳal faroia gela. Gia tarare loia eḳ baganor bitre hamaila. ²Beiman Ihudae i zaga sinto, ḳaron Isae age bout bar sahabi oḳolre loia ono boisoin.

³Ermaze boṛo imam ar Forishi oḳole ou Ihudar loge eḳ dol sifai ar Baetul-Mukaddosor ḳoezon fulish faṭaila. Ihudae tarare loia ono ailo, ou shomoe tarar ato lem, mushal, ar ostro-shostro asil.

⁴Isae ag takiu hoḳolta zanta, tan ufre kita goṭbo. Erlagi tain aguaia aia tarare zikaila, “Afnara ḳare tukaira?” ⁵Tara ḳoila, “Nasarot gaur Isare.” Tain ḳoila, “Amiu hein.” Ou shomoe beiman Ihudao tarar loge asil. ⁶Isae zebla ḳoila, “Amiu hein,” ikan hunia-u tara ḳoredi gia maṭit foṛigela. ⁷Tain hirbar tarare zikaila, “Afnara ḳare saira?” Tara ḳoila, “Nasarot gaur Isare.” ⁸Tain ḳoila, “Ami to ḳoilam, amiu hein. Afnara zudi amare-u tukanit ain, te amar logor erare saṛi deukka.” ⁹Ashole ila goṭlo, zate Isae age zeta ḳoisla ota fura oe. Tain ḳoisla, “Baba, tumi zerare amar ato shofiso, era eḳzonreo ami kuaisi na.”

¹⁰Ou shomoe Saimon-Fitoror loge ekkan toluar asil, oḳan bar ḳoria, tain fordan imamor gulamor ḍain ḳan ḳaṭilila. I gulamor nam asil Malkus. ¹¹Erlagi Isae Fitorre ḳoila, “Tumar toluar ḳafo harao. Gaibi bafe amare ze mosibotor fiala disoin, ikṭar shad ami loitam na ni?”

¹²Ou shomoe sifai oḳole, fordan sifaie ar Baetul-Mukaddosor fulish oḳole Isare doria bandililo. ¹³Bandia foela tara Hanonor gese loia gelo. I Hanon asla hou bosoror fordan imam Kaeafar hour. ¹⁴Ou Kaeafae age Ihudi neta oḳolre ḳoisla, “Asta zati binash oar saite, hoḳolor bodla eḳzonor moron aro bala.”

Sahabi Fitoror foelabar oshikar

¹⁵Ou shomoe Fitor ar aroḳzon sahabi Isar ḳore ḳore gela. Ou sahabire fordan imame sinta. Ein Isar loge oia fordan imamor baṛir uṭano hamaila. ¹⁶Oile Fitor baire geiṭor gese ubai roila. Teu fordan imamor forisito Isar ou sahabi bare gia faradar beṭire ḳoia Fitorre bitre anaila. ¹⁷Ou beṭie Fitorre ḳoilo, “Tumio en murid ni?” Fitore ḳoila, “Na, na, ami nae.” ¹⁸Ou shomoe kub shit foṛsil, erdae sifai ar gulam oḳole uṭano angradi aguin doraia aguin tabanit lagla. Fitoreo tarar daro ubaia aguin tabaila.

Fordan imamor zera

¹⁹Ou shomoe fordan imame Isare tan ummot ar tan talimor befare zikaila. ²⁰Isae zuaf dila, “Ami manshor samne kula-mela matisi. Ihudi oḳol zeḳano zoma oin, ota mosido ar Baetul-Mukaddoso hamesha talim disi. Ami to lukaia kunta ḳoisi na. ²¹Te amare ar ḳene zikaira? Amar talim zera hunche, tarareu zikaukka. Ami ze talim disi, ita tarar zana ase.” ²²Isar i zuaf hunia, ḳandat ze sifai oḳol uba asla, era eḳzone tanre soṛ maria ḳoilo, “Tui fordan imamre ola zuaf dire ni?” ²³Tain ḳoila, “Ami zudi bad kunta ḳoia taki te ḳoukka, ar bala mat matile amare marra ḳene?” ²⁴Ou shomoe Hanone banda halote Isare fordan imam Kaeafar gese faṭai dila.

Hozrot Fitoror hirbar oshikar

²⁵Sahabi Saimon-Fitore zebla aguin tabaira, ou shomoe manshe tanre ḳoilo, “Tumio tar logor eḳzon sahabi ni?” Fitore dusrabar oshikar ḳori ḳoila, “Na, na, ami nae.” ²⁶Fitore zar ḳan ḳaṭisla, tar ek kuṭum asil fordan imamor gulam. He ḳoilo, “Ami baganor bitre ogur loge tumareo deḳlam na ni?” ²⁷Fitore hirbar oshikar ḳorla, ar loge logeu murgae bang dilailo.

Hakim Filator samne Hozrot Isa

²⁸Ihudi neta oḳole biane Isare Kaeafar ges taki, Ruman bashshar fordan hakim Filator ṭongit loia gela. Oile tara baṛir bitre hamaila na, zate be-din hakimor baṛit hamaia nafaḳ na oin, borong pak-saf roia Azadi Idor ḳani ḳaita faroin. ²⁹Erlagi Ruman hakim Filat bare aia zikaila, “I beṭar birudde tumrar nalish kita?” ³⁰Tara ḳoila, “He oforad na ḳorle to afnar gese anlam na one.” ³¹Filate tarare ḳoila, “Tumra tare loia zaogi, gia tumrar shoriot mafik bisar ḳorilao.” Ikan hunia tara Filatre ḳoila, “Kunu manshore zane marar moto shaza deoar ḳemota amrar ato nai, ḳali Ruman oḳolor ato ase.” ³²Nizor mout kilan oibo, Isae ikan ageu ḳoisoin. Te ita oilo, zate tan ou ḳota fole.

³³Teu Filat hirbar ṭongir bitre hamaila ar Isare ḍaḳ dia ḳoila, “Oba, tumi kita Ihudi oḳolor bashsha ni?” ³⁴Tain zuaf dila, “Afne nize ou ḳota ḳoira, na manshe amar befare afnare ḳoise?” ³⁵Filate zuaf dila, “Ami kita Ihudi ni? Tumar nizor zatir manshe ar boṛo imam oḳole tumare amar ato dise. Ḳo, tumi kita ḳorso?” ³⁶Isae ḳoila, “Amar bashshai i duniar nae. Amar bashshai zudi ou duniar oito, te Ihudi neta oḳolor ato ami na foṛar lagi amar manshe laṛai ḳorlo one, oile amar bashshai to inor nae.” ³⁷Ikan hunia Filate Isare zikaila, “Taile tumi kita bashsha ni?” Isae ḳoila, “Afneu to ḳoira, ami bashsha. Hunoukka, hokor fokke shakki deoar lagi ami duniat aisi. Zara hokor loge ase, tara amar ḳota hune.”

³⁸Filate tanre ḳoila, “Te hokkan kita?” Oḳan ḳoia tain hirbar bare gia Ihudi neta oḳolre ḳoila, “Ami to er kunu dush faisi na. ³⁹Oile tumrar to eḳṭa reoaz ase, Azadi Idor shomoe ami eḳzon ḳoedire ḳalas dei. Te tumra sao ni, ami Ihudir ou bashshare saṛi ditam?” ⁴⁰Ikan hunia tara sillaia ḳoilo, “Na, na, ere na, Barabbare saṛi deukka.” Ou Barabba asil eḳ ḍaḳait.

¹Bade Ruman hakim Filate Isare sabuk marar hukum dila. ²Ar sifai oḳole gosa-ḳaṭa dia eḳ mukuṭ banaia tan matat dilo, ar baingoni rongor bashshai lebas findailo. ³Bade tara tan samne aia ḳoilo, “O Ihudir bashsha, marhaba!” Oḳan ḳoia ḳoia tara tan galo soṛailo. ⁴Teu Filat hirbar bare aia ḳoila, “Huno, ami ere tumrar gese bar ḳoria aniar, teu tumra buzbae, ami er kunu dushu fairam na.” ⁵Hou gosa-ḳaṭar mukuṭ ar baingoni lebas finda halote Isa baroia aila, ar Filate ḳoila, “Ou deḳo, hou manush.” ⁶Isare dekia boṛo imam ar Baetul-Mukaddosor fulish oḳole sillaia ḳoila, “Tare solibo deo, solibo deo.” Filate ḳoila, “Ami to tar kunu dush faisi na, te tumrau tare nia solibo gatilao.” (I solib oilo laḳṛidi banail, manshore loṭḳaia marar eḳ zinish.) ⁷Ihudi neta oḳole Filatre ḳoila, “Amrar shoriot mafik tar moron oa usit, ḳaron he nizore Allar ḳas maear zon, Ibnulla ḳoise.”

⁸Ikan hunia Filate aro beshi ḍoraigela. ⁹Tain hirbar ṭongi-goror bitre hamaia Isare zikaila, “Tumi kuai taki aiso?” Oile Isae kunu zuaf dila na. ¹⁰Erdae Filate Isare ḳoila, “Tumi amar mator kunu zuaf ditae na ni? Tumi zano ni, tumare ḳalas dibar ba solibor ufre loṭḳaia marar ḳemota amar ase?” ¹¹Teu Isae ḳoila, “Ufre taki afnare ḳemota na deoa oile, amar ufre afnar kunu ḳemotau taḳto na. Erlagi ze manshe amare afnar ato dorai dise, he-u boṛo gunagar.” ¹²Ikan hunia Filate Isare ḳalas dilaita saila, oile Ihudi neta oḳole sillaia ḳoila, “Afne zudi ere ḳalas dilain, te afne Ruman bashshar dust nae. Ze manshe nizore bashsha ḳoia dabi ḳore, he to Ruman bashshar dushmon.”

¹³Ikan hunia Filate Isare bar ḳori anla ar Fattordi-Banda namor eḳ uṭano bisaror ashono boila. Ibrani bashae i uṭanre Gabbata ḳoa oe. ¹⁴I din asil Azadi Idor aeozonor din. Ou shomoe beil onuman duifor oigese. Filate Ihudi neta oḳolre ḳoila, “Ou deḳo, tumrar bashsha.” ¹⁵Isare dekia tara sillaia ḳoilo, “Ogure horao, horao, tare solibo deo.” Filate ḳoila, “Tumrar bashshare ami solibo dilaitam ni?” Boṛo imam oḳole ḳoila, “Ḳali Ruman bashsha saṛa, amrar ar kunu bashsha nai.” ¹⁶Teu hakim Filate solibor ufre loṭḳaia marar lagi Isare tarar ato shomzai dila, ar sifai oḳole tanre loia gela.

Hozrot Isa al-Mosir mout

¹⁷Bade Isae tan solib nize boia ‘Ḳollar Saṛ’ namor zagat gela. Ibrani bashae i zagar nam Golgata. ¹⁸Hino nia tara tanre solibo loṭḳailo. Isare mazḳano, ar tan dui galar duio solibo oinno duizonre loṭḳailo.

¹⁹Ar Filate ekkan oforad-nama lekia Isar solibor ufre lagaila. Ikano leḳa asil, “Nasarot gaur Isa, Ihudir bashsha.” ²⁰Ze zagat tanre solibo loṭḳail oisil, ou zaga ṭaunor ḳandat asil gotike bout Ihudie ou oforad-nama foṛlo. Ikan Ibrani, Iunani ar Ruman bashae leḳa asil. ²¹Ihudir boṛo imam oḳole hakim Filatre ḳoila, “Ihudir bashsha na lekia, afne ola leḳoukka, he ḳoito, ami Ihudir bashsha.” ²²Filate ḳoila, “Ami zeta leḳsi, leḳsiu.”

²³Isare solibo loṭḳanir bade sifai oḳole tan ḳafoṛ-sufoṛ sair baṭ ḳori baṭia nila. Bade tan kurtaṭao nila. I asta kurtar gola taki bain ḳora, kunu silai asil na. ²⁴Erlagi sifai oḳole eḳe-oinne ḳoilo, “Ikṭa na siṛia borong loṭari mari deki, ḳar baiggot foṛe.” Ita goṭsil, zate asmani kitabor ḳota fole, kitabo leḳa ase,

Tara nizor maze amar ḳafoṛ-sufoṛ

baṭa-baṭi ḳorse,

amar kurtar lagi tara

loṭari marse.

²⁵Ar hasau tara ola ḳorlo.

Hozrot Isar solibor ḳandat tan ma, ḳala, Kulufar bou Moriom ar Mogdilini Moriom uba asla. ²⁶Isae deḳla, tan ma ar maear hou sahabi daro ubai roisoin. Dekia foela tan maʼre ḳoila, “Mai go, ounu tumar fua.” ²⁷Ar sahabire ḳoila, “Bai, ounu tumar ma.” Ou shomoe taki i sahabie Isar maʼre tan nizor goro loia gelagi.

²⁸Erbade hokkolta shesh oigese zania, al-Zobur kitabor aeat zate fole, otar lagi Isae ḳoila, “Amar fiase dorse.” ²⁹Ou shomoe hino eḳ zog ṭenga anguror shorbot asil. Tara ekkan tena ania ou shorbotor maze bizaia, esub gasor ḍeṭar matat lagaia usa ḳori tan mukor gese dilo. ³⁰I shorbot ḳaia harle tain ḳoila, “Shesh oigese.” Oḳan ḳoia, tain mata nuaia aḳeri dom falaila.

al-Mosir lashor forikka

³¹Azadi Idor agor din Hozrot Isae inteḳal ḳorla. Bador din asil ḳas fobitro eḳ Zummabar. Erlagi Ihudi neta oḳole saila, i din zanu kunu lash solibor ufre na taḳe. Ou tara hakim Filator gese saila, zate solibo zera ase, tara zoldi morar lagi tarar fao bangia solib taki lamani oe. ³²Teu Isar loge zerare solibo loṭḳail oisil, sifai oḳole era duiozonor fao bangi dilo. ³³Tara Isar gese aia deḳlo, tain mara gesoin, erlagi tan fao banglo na. ³⁴Oile eḳ sifaie sulfi dia tan fatti-aṛor mazedi faṛ marlo, faṛor loge lou ar fani baroia ailo. ³⁵Ze zone nizor souke i goṭona deḳsoin, tainu shakki disoin ar tan shakki hasa. Tain zanoin, tain zeta ḳoira ita hasa, zate tumrao ekin ḳoro.

³⁶Ita oisil zate pak kitabor ou ḳota fura oe, kitabo ase, ‘Tan eḳṭa aḍḍio banga oito nae.’ ³⁷Eoḳan ase, ‘Zara tanre gatise, tara tan bae sai roibo.’

Hozrot Isa al-Mosir dafon

³⁸Ita goṭonar bade Arimatia gaur Iusufe Isar lash nita ḳori hakim Filator onumoti saila. Iusuf asla Isar eḳzon lukail ummot, ḳaron tain Ihudi neta oḳolre ḍoraita. Filator onumoti faia tain Isar lash nila. ³⁹Age raitor bala zein Isar gese aisla, hou Nikodimeo mura-ator ar oguru mishaia onuman eḳ mon kushboe moshla loia aila. ⁴⁰Ar Isar lash nia Ihudi oḳolor niom mafik ou kushboeala moshla maḳaia ḳafon findaila.

⁴¹Isare zeḳano solibo gata oisil, hono eḳ baganor bitre faṛor guhar maze noea eḳṭa ḳoebor kudia raḳa asil. I ḳoeboro ḳeurore dafon ḳora oise na. ⁴²Ou din Ihudi oḳolor idor agor din oae ar ḳoeborṭao ḳandat taḳae, tara taṛa-uṛa ḳori Isare onou dafon ḳorla.

Hozrot Isa moutor bade zinda oila ar boute deḳla (20:1–21:25)

Hozrot Isa murda taki zinda oila

¹Haftar foela din fozor oḳto andair roiteu Mogdilini Moriom Hozrot Isar ḳoeboror ḳandat gela. Gia deḳla, ḳoeboror muk taki fattorṭa horail oigese. ²Dekia tain Saimon-Fitor ar ze sahabire Isae kub maea ḳorta, erar gese douṛaia gia ḳoila, “Hunchoin ni, huzuror lash manshe ḳoebor taki tulia nisoingi. Nia ḳoi raḳsoin amra zani na.”

³Ḳobor faia Fitor ar ou sahabi ḳoeboror bae roana oila. ⁴Duiozone eḳloge douṛaira. Fitorre ḳore falaia hou sahabi age ḳoeboror ḳandat gela. ⁵Gia unda oia deḳla, ḳoeboror bitre ḳafon foṛi roise, oile tain ḳoeboror bitre hamaila na. ⁶Fitoro tan ḳore ḳore aila, aia ḳoeboror bitre hamaia deḳla, ḳali ḳafonḳan foṛi roise. ⁷Ze ḳafonor ṭukra dia tan mata banda oisil, ikan oinno ṭukrar loge nae, alga foṛi roise. ⁸Ze sahabi foela ḳoeboror ḳandat gesla, bade taino bitre hamaila, hamaia hoḳolta dekia ekin ḳorla. ⁹Isar to murda taki zinda oa zorur, pak kitabor ou talimor mani age to era ḳeu buzchoin na.

¹⁰Erbade sahabi oḳol zarzir baṛit gelagi, ¹¹oile Moriome ḳoeboror ḳandat ubaia ḳandon lagaila. Tain ḳandi ḳandi unda oia ḳoeboror bitredi saia deḳla, ¹²Isar lash zeno hutaia raḳa oisil, hono dola ḳafoṛ finno duizon firista boi roisoin, eḳzon hitanedi, aroḳzon fao galabae. ¹³Firista oḳole Moriomre ḳoila, “Tumi ḳandirae ḳene go?” Tain ḳoila, “Manshe amar malikor lash tulia nisoingi, nia ḳoi toisoin zani na.”

¹⁴Oḳan ḳoia tain ḳoredi saiteu deḳla, Hozrot Isa ubai roisoin. Oile tainu ze Isa, Moriome ikan buzla na. ¹⁵Isae Moriomre ḳoila, “Ogo, tumi ḳando ḳene? Ḳare tukairae?” Isare baganor mali mono ḳoria tain ḳoila, “Deḳoukka, afne zudi tan lash nia taḳoin, te kuai nisoin, ḳoukka. Ami tan lash nimu.” ¹⁶Isae ḳoila, “Moriom.” Teu Moriom firia ubaia Ibrani bashae tanre ḳoila, “Rabbuni”, mani ustad. ¹⁷Isae tanre ḳoila, “Amare doria rakio na, ami to oḳono gaibi bafor gese ufre gesi na. Tumi borong amar baiainre gia ḳo, zein amar ar tumrar gaibi baf, amar ar tumrar Alla, ami ufre tan gese-u zairam.” ¹⁸Teu Mogdilini Moriome sahabi oḳolre gia ḳoila, Isar loge tan deḳa oise ar Isaeu tanre ita hoḳolta ḳoisoin.

Sahabi oḳole zinda Isare deḳla

¹⁹Hou din, mani haftar foela din hainjabala sahabi oḳol ekkano dola oila. Oile Ihudi neta oḳolor ḍore goror duar-kiṛki hoḳolta bond asil. Ermaze aḳtau Hozrot Isa aia erar mazḳano ubaia ḳoila, “Assalamu alaikum.” ²⁰Oḳan ḳoia hari tain nizor duio at ar fatti-aṛor zoḳomor dag erare deḳaila. Huzurre dekia sahabi oḳol kub kushi oila.

²¹Bade Isae hirbar erare ḳoila, “Assalamu alaikum. Huno, amar gaibi bafe zela amare faṭaisoin, amio oula tumrare faṭairam.” ²²Oḳan ḳoia tain sahabi oḳolor ufre fu dia ḳoila, “Allar Pak Ruhre ḳobul ḳoro. ²³Huno, tumra zudi ḳeurore maf ḳori deo, te tar guna maf ḳora oibo, ar zudi maf na ḳoro, te tar gunar mafi milto nae.”

Sahabi Tumasor shondoe

²⁴Hozrot Isa zebla sahabi oḳolor samne aila, ou shomoe barozon sahabir mazor Tumas namor eḳzon sahabi ino asla na. Ou Tumasre Zomoz ḳoia ḍaḳa oito. ²⁵Erlagi baki sahabi oḳole Tumasre ḳoila, “Amra to huzurre deḳsi.” Tumase ḳoila, “Hunoukka, ami amar nizor souke zudi tan duio ator feregor dag na deki, ou zoḳomo angul na lagai, ar tan fatti-aṛor zoḳomo at na dei, te kunumonte-u ami ita ekin ḳortam nae.”

²⁶Er eḳ hafta bade hirbar sahabi oḳol ou goro dola oila, erar loge Tumaso asla. Ou shomoe goror hoḳol duar-kiṛki bond taḳleo aḳtau Isa aia tarar mazḳano ubaia ḳoila, “Assalamu alaikum.” ²⁷Bade tain Tumasre ḳoila, “Tumar angul lagaia amar duio at deḳo, ar tumar at baṛaia amar fatti-aṛor zoḳomo harao, ekin ḳoro, shondoe ḳorio na.” ²⁸Teu Tumase ḳoila, “Malik amar, Alla amar.” ²⁹Isae tanre ḳoila, “Tumas, amare deḳso ḳori tumi iman anlae ni? Huno, doinno tara, zera na dekiao amar ufre iman ane.”

Ou kitabor mul nosiot

³⁰Hozrot Isae sahabi oḳolor samne aro bout keramoti nishana deḳaisoin, ita hoḳolta to ou kitabo leḳa oise na. ³¹Ḳali ou goṭona oḳol leḳa oise, zate ota tilaot ḳoria tumra iman ano, Hozrot Isau Alla Pakor oada ḳora hou al-Mosi, tainu Ibnulla, Allar ḳas maear zon, ar iman ania zate tan usillae tumra aḳeri zindegi hasil ḳoro.

Shatzon sahabir loge zinda Isar shakkat

¹Erbade Tibiria namor aoror faro Hozrot Isae sahabi oḳolre hirbar deḳa dila. Goṭona ou laḳan oilo. ²Saimon-Fitor, Tumas zare Zomoz ḳoa oito, ar Galil zilar Kanna gaur Notonel, Zibudiar fuain shoho aro duizon sahabi eḳloge asla. ³Sahabi Saimon-Fitore logor erare ḳoila, “Ami mas marat zaiargi.” Tara ḳoila, “Amra-o tumar loge zaimu.” Teu tara nao loia mas marat baroila, oile i rait kunu mas faila na.

⁴Fozor oḳto Isa aia aoror faro ubaila. Oile tainu ze Isa, era ikan buzla na. ⁵Tain sahabi oḳolre ḳoila, “O beṭain, tumra kunu mas faiso na ni?” Tara ḳoila, “Ji na, faisi na.”

⁶Isae tarare ḳoila, “Te naor ḍain galabae zal falao, teu faibaene.” Tan ḳota moto tara zal falaila ar zalo oto mas hamaila, ikan ṭania tulta farla na. ⁷Ze sahabire Isae maea ḳorta, tain Fitorre ḳoila, “Ein to malik.” I shomoe Saimon-Fitoror gotro ḳafoṛ asil na. “Ein to malik” oḳan hunia-u tain ḳafoṛ findia faldi fanit foṛla. ⁸Oile baki sahabi oḳole mase bora zalḳan ṭani ṭani nao loia faro azila. Ḳaron tara far taki beshi duroi nae, onuman dui-sho at duroi asla.

⁹Tara faro uṭia deḳla angrar aguin, ou aguinor ufre mas ar ruṭi. ¹⁰Isae tarare ḳoila, “Oḳon zeta mas marso, on tone ḳoeṭa ano.” ¹¹Saimon-Fitore nao taki zalḳan faro ṭania tulla. Zalor bitre eḳ-sho teppannoṭa boṛo mas asil, tebou zal faṛlo na. ¹²Isae tarare ḳoila, “Ao, ḳao aia.” Oile kunu sahabie zikanir shaosh oilo na “Afne ḳe?” Ḳaron tara zanta, tainu malik. ¹³Bade tain aia tarare ruṭi ḳaite dila, oula biran maso dila. ¹⁴Murda taki zinda oar bade, ou tin nombor bar tain sahabi oḳolre deḳa dila.

Hozrot Fitoror loge soal-zuaf

¹⁵Tarar ḳaoa-daoar bade Isae Saimon-Fitorre zikaila, “O Saimon bin Iuhanna, era zela amare maea ḳoroin, tumi amare er taki beshi maea ḳoro ni?” Tain ḳoila, “Ji-oe malik, afne to zanoin, ami afnare ḳoto maea ḳori.” Teu Isae ḳoila, “Te amar meṛa-baichchar raḳali ḳoro.”

¹⁶Isae hirbar tanre zikaila, “Saimon bin Iuhanna, tumi amare maea ḳoro ni?” Fitore ḳoila, “Ji-oe malik, afne to zanoin, ami afnare ḳoto maea ḳori.” Isae ḳoila, “Te amar meṛar fal deḳa-huna ḳoro.”

¹⁷Bade tain tisrabar zikaila, “O Saimon bin Iuhanna, hasau ami tumar maear manush ni?” Isae tisrabar zikanie Fitor mone mone kisu dukito oia ḳoila, “Malik, afne to hoḳolta-u zanoin, afne zanoinu afne amar kub maear zon.” Teu Isae ḳoila, “Te amar meṛa falor raḳali ḳoro. ¹⁸Ami tumare hasau ḳoiram, tumar zuankir shomoe tumi nizeu tumar ḳomor bandia zeno kushi ono zaitae. Oile buṛakir shomoe tumar at baṛai dibae, ar oinno zone tumare bandia, tumi zeno zaitae sao na, hono loia zaibo.” ¹⁹Allar gourob zair oar lagi Fitoror mout kilan oibo, oḳan buzanit gia Isae ou ḳota ḳoila. Bade tain Fitorre ḳoila, “Ao, amar loge taḳo.”

²⁰Ou shomoe Fitore ḳoredi saia deḳla, Isar hou maear sahabi ḳore ḳore aira. Ou sahabie ḳoedin age ḳanit boia Isar bae zukia ḳoisla, “Huzur, afnare dushmonor ato ze dorai dibo, he ḳe?” ²¹Fitore enre dekia Isare ḳoila, “Huzur, en kita oibo?” ²²Isae Fitorre ḳoila, “Ami zudi sai, ami dusrabar duniat na aoa forzonto he ono rouk, te tumar kita? Tumi amar loge taḳo.” ²³Erlagi ummot oḳolor maze ḳobor roṭi gelo, ou sahabi morta nae. Oile Isae Fitorre ikan ḳoisoin na. Borong tain ḳoisla, “Ami zudi sai, ami hirbar toshrif na ana forzonto he ono taḳouk, te tumar kita?”

Leḳok sahabir shakki

²⁴Ou sahabie ita hoḳol befare shakki disoin ar leḳsoin. Amra zani, tan shakki hasa. ²⁵Hozrot Isae aro bout ḳam ḳorsoin. Ita zudi eḳ ek kori leḳa oito, te oto kitab oito, ita asta duniae dorlo na one.