al-Iakub

Fobitro Injil Shorif 20 nombor sifara

al-Iakub

Forisiti

Alla Pakor hukume ou sifara leḳsoin Hozrot Isa al-Mosir haton bai Hozrot Iakub (ra:). Hozrot Isa behesto toshrif neoar onuman 13–18 bosor bade ikan leḳa oise. Ou leḳok to Boni Israil ḳandanor mul baf hou Hozrot Iakub (a:) nobi nae. Ar Hozrot Isar barozon sahabir mazor eḳzonor nam asil Zibudiar fua Iakub, eino ou sifarar leḳok nae. Oile ou leḳok to Zeruzalem zomator boṛo murobbi neta (Sahabi Nama 15 ruku). Tain al-Mosir befare toblig korar shomoe naforman Ihudi oḳolor ato fobitro Baetul-Mukaddoso shohid oisla.

Ou sifara tilaot ḳorle, Hozrot Isa al-Mosir ummot oḳole duniabi zindegi ḳaṭanir lagi kun laḳan iman-akida, amol-ḳaslot ḳora zoruri, ou befare zana zaibo. Er talimor loge Hozrot Isar “Faṛor uforor talim”-or loge Fobitro Injil Shorifor Moti sifarar 5–7 ruku bout mil ase. Ou sifarar 1 ruku 26 aeato ase, “Ze manshe nizore forezgar mono ḳore, oile nizor zifrare shamlae na, he to tar nizore ṭoge, tar hokkol ebadoti-u misa.”

Ermaze ase,

(1) Ashol iman ar amol 1—2 ruku

(2) Zifra shamlani ar ashol aḳol-hekmot 3 ruku

(3) Mair-dorbar, gibot, boṛai, zulum na ḳora 4:1—5:6 aeat

(4) Sobor, munazat ar hedaeot ḳora 5:7-20

¹Ami Iakub, Alla ar Hozrot Isa al-Mosir gulam, duniar nanan desho sitrail Boni Israilor baro gusṭir manshore salam zanairam.

Iman ar hekmot

²O amar bai oḳol, tumra zebla nanan zator forikkar maze foṛo, i shomoe ita kub kushir befar mono ḳorio. ³Zano to, imanor forikkae tumrare tir taḳar ḳemota baṛai dey. ⁴Ar i tir taḳar ḳemotare ḳamo lagao, zate tumra kamil ar ḳaṭi oia tumrar kunu ḳomti na roe.

⁵Tumrar maze zudi ḳeuror aḳolor ḳomti taḳe, te he zanu Allar gese sae, teu faibo. Tain kunu bezari bab na ania hokkolreu behishab dan ḳoroin, ḳali ate firain na. ⁶Oile he mono kunu shondoe na rakia ekin ḳoria saite oibo. Ze shondoe ḳore he to doriar ḍeur laḳan, tare aula-zaula batashe uṛaia loia zae. ⁷Ilaḳan manshe zanu Mabudor ges tone kunta faoar asha na ḳore, ⁸he to du-dila manush, tar hoḳol ḳamou oshanti.

Gorib ar doni

⁹Ze imandar bai gorib, tare boṛo banaisoin ḳoria he nizore mubarok mono ḳorouk. ¹⁰Ar ze doni, tare huru banaisoin ḳoria he-o nizore mubarok mono ḳorouk, ḳaron he gash fulor laḳan zoria foṛizibo. ¹¹Shuruz zebla uṭe, i shomoe tar teze gash hukai zae, ful zoria foṛizae, ar tar shundor nosṭo oizae. Doni manusho olaḳan tar bestotar maze zoria foṛizibo.

¹²Mubarok hou zon, ze zon forikkar shomoe mozbut roe. Forikkat kamiab oile zoeor mala hishabe he aḳer faibo. Ou mala tan ashik oḳolre diba ḳori shoeong Alla Pake oada ḳorsoin. ¹³Kunu manshe gunar bae eshki oia zanu na ḳoe, Allae amare gunar fote ṭanira. Kunu naformanir foteu Allare ṭana zae na, taino ḳeurore i fote nein na. ¹⁴Oile manshor nizor dileu ṭania nia tare fando falae. ¹⁵Bade dilor bod niot fura oile gunar bis feṭo loe, ar guna boṛo oia moutor zonom dey.

¹⁶O amar maear bai oḳol, tumra ou laḳan bul ḳorio na. ¹⁷Hokkol bala ar nikut dan to behest tone lamia ae, zein asmani nur oḳol foeda ḳorsoin, hou Allar ges tone ae. Ou nur oḳol sebar laḳan ḍulaḍuli ḳorleo, tain ila ḳoroin na. ¹⁸Tain nizor kushie amrare hok kalam dia tan bonda banaisoin, amra zanu ashraful-moḳluḳat, shristir shera manush oi.

Kalam hunia amol ḳora

¹⁹O amar maear bai oḳol, mono rakio, tumra age huno bade mato, zoldi gusa ḳorio na. ²⁰Manshe gusa ḳorle Allar dorbaro kunu bala ḳam ḳorto fare na. ²¹Gotike tumra hoḳol zator haram ar naformani ḳam bad dilao. Tumrar dilor maze ze kalam rua oise, norom dile ou kalam ḳobul ḳoro. Tumrare toranir ḳemota i kalamor ase.

²²Allar kalam ḳali hunleu oito nae, olaḳan amolo ḳoro. Kalam hunia zudi amol na ḳoro, te tumra nizore ṭogirae. ²³Ḳeu zudi i kalam hunia amol na ḳore, te he ou manshor laḳan, ze aenat nizor sera dekia zaegi, ²⁴bade horia gia faurilae tar sera kilaḳan. ²⁵Oile ze ḳaṭi ain manshore azad ḳore, ar ou ainor bae nozor rakia zera hamesha ziail roe, ita hunia hari faure na, amol ḳore, tara hoḳol ḳamo mubarok oibo.

²⁶Ze manshe nizore forezgar mono ḳore, oile nizor zifrare shamlae na, he to tar nizore ṭoge, tar hokkol ebadotiu misa. ²⁷Etim oḳolre ar ṛaṛi beṭintore bifodor shomoe shae-shaijjo ḳora, erloge duniar hoḳol naformani taki nizore pak-saf raḳau oilo, Allar nozoro ḳaṭi ar sohi ebadoti.

Hoḳolre eḳ nozore deḳa

¹O amar bai oḳol, tumra zebla amrar kudroti malik Hozrot Isa al-Mosir ufre iman ancho, te hoḳolre eḳ nozore dekio. ²Doro, eḳzon manush tumrar mozlis ḳanat shundor ḳafoṛ-sufoṛ findia ato shunar angṭi lagaia ailo, ar moela ḳafoṛ findia eḳzon gorib manusho ailo. ³Tumra zudi shundor ḳafoṛala manshor mukedi saia ḳo, “Afne ou bala zagaḳano boukka,” ar gorib beṭare ḳo, “Oba, tui hono uba, arnae amar faor ḳandat bo,” ⁴te tumra nizor maze har-for ḳorrae na ni, ar shoetani niote bisar ḳorrae na ni? ⁵O amar maear bai oḳol, huno. I duniar gorib manshore Allae fosond ḳorsoin na ni imane doni bananir lagi? Allar ashik manshore Allae ze bashshai deoar oada ḳorsla, i bashshair malik oar lagi tain gorib oḳolre fosond ḳorsoin na ni? ⁶Oile tumra to i gorib oḳolre elami ḳorso. Doni oḳole kita tumrare zulum ḳore na ni? Tarau to tumrare ṭania-sesṛaia bisaro loia zae. ⁷Ze mohan namor ḳatire tumrare ḍaḳa oe, tara kita i namre loia kufuri ḳorer na ni?

⁸Pak kitabo leḳa ase, “Tumar ari-forire nizor laḳan maea ḳorio,” tumra zudi hasau Allar bashshair ou hukum amol ḳoro, te to balau ḳorrae. ⁹Oile tumra zudi hoḳolre eḳ nozore na deḳo, te to guna ḳorrae, ar shoriotor borkelaf ḳoria dushi oirae. ¹⁰Ḳeu zudi shoriotor hokkol hukum amol ḳoriao ḳali eḳ hukum bange, te dora oibo he asta shoriotu omainno ḳorse. ¹¹Ḳaron zein ḳoisoin, “Zina ḳorio na,” tainu hirbar ḳoisoin, “Kun ḳorio na.” Te tumi zudi zina na ḳoria kun ḳoro, tebou to shoriotor borkelaf ḳorso. ¹²Ze aine manshore azad ḳore, ou ain diau tumrar bisar oibo. Gotike buzi-huni mat mato ar ḳam ḳoro. ¹³Mono rakio, ze manshe doya ḳorse na, bisaror shomoe tareo doya ḳora oito nae. Hashoror moedano doyagir oḳoleu doya faibo.

Iman ar amol

¹⁴O amar bai oḳol, ḳeu zudi ḳoe amar iman ase, oile amol na ḳore, te faeda kita oibo? I imane tare basaito farbo ni? ¹⁵Mono ḳoro, tumrar kunu bai ba boinor goro ḳani nai, findar ḳafoṛo nai. ¹⁶I halote zudi tare ḳo, “Tumar balai ouk, ḳaia-findia shuke ro,” oile tar nidan horanir lagi kunu ufae na ḳoro, te tar kunu faeda oilo ni? ¹⁷Olaḳan ze imanor loge amol nai, i iman to murda. ¹⁸Mono ḳoro ḳeu ḳoilo, “Tumar iman ase ar amar amol ase.” Ṭik ase, tumar amol saṛa iman amare deḳao, ar ami tumare amar amolor maz dia iman deḳaimu. ¹⁹Tumi ekin ḳorso Alla eḳ, kub bala ḳota. Buteo to ola ekin ḳore, ar Allar ḍore ḳafe.

²⁰O be-aḳol, tumare ami kila buzaitam, amol saṛa iman to kunu ḳamor nae? ²¹Amrar baf Ibrahime zebla tan fua Isʼhakre kurbani deoar lagi kurbanir zagat nisla, i shomoe kita tan i ḳamor lagi tanre forezgar hishabe ḳobul ḳora oise na ni? ²²Tumi to deḳso, tan iman ar amol eḳloge ḳam ḳorsil, ar amolor lagiu iman kamiab oilo. ²³Olaḳan pak kitabor aeat fura oilo, “Ibrahime Allar oadae iman anae, Allae tanre dindar ḳoia ḳobul ḳorla.” Tan ufadi dila Allar dust. ²⁴Tumra to deḳlae, amolor lagi manshore forezgar hishabe ḳobul ḳora oe, ḳali imanor lagi nae. ²⁵Ou laḳan hou sinal beṭi Rahbareo tair amolor lagi forezgar hishabe ḳobul ḳora oisil na ni? Tai to hou duio guiare lukaia rakia, dusra fotedi sohi-salamote bar ḳori disil.

²⁶Ou halote amra buztam fari, ruh saṛa ḳaea murda, amol saṛa imano murda.

Zifra shamlaia raḳa

¹O amar bai oḳol, tumra hoḳol ustad oio na. Tumra to zano, amra ustad gotike amrar bisar aro ḳoṭin oibo. ²Amra hoḳolu nanan nomunae be-foti oi. Ḳeu zudi zoban dia kunu guna na ḳore, te he kamil manush, tar asta shorilu shamlaito farbo. ³Guṛare shamlanir lagi muko lagam lagaia amra zebae ichcha obae nitam fari. ⁴Ar ḳaṛalieo huru ek kaṛal doria boṛo boṛo zazre tufani batash ṭelia, zebae kushi obae nito fare. ⁵Oula zifra kub huru oileo bout boṛo boṛo mat mate.

Ar shamainno aguine kila boṛo zongol zalaito fare! ⁶Zifrao ola eḳ aguin. Amrar shorilor maze zifra eḳṭa ḳarafir banḍar, Zahannomor aguine zifrare zalae ar zifrae asta shorilre zalaia ḳolonki banaia, amrar zindegit aguin dorae. ⁷Manshe zudio hokkol zator foshu-faki, haf-bichu ar doriar boṛo boṛo masre shamlaise ar oḳono shamlae, ⁸oileo huru muru zifrare ḳeu shamlaito fare na. Ikan kub sonchol ar ḳaraf, bezuita bishe bora. ⁹Eḳ zifra diau amrar gaibi baf Allar tarif ḳori, hirbar ou zifra diau Allar surote foeda ḳora manshore boddua dei. ¹⁰Eḳ muk takiu tarif ar boddua baroia ae. Bai oḳol, ita to ṭik nae. ¹¹Zornar muk taki eḳloge miṭa ar titta fani baroia ae ni? ¹²Bai oḳol, am gaso kita zam dore ni? Ar angur gaso am dore ni? Oula titta fanir maze miṭa fani mile na.

Dui nomunar aḳol-hekmot

¹³Tumrar maze aḳol-hekmot ala ḳeu ase ni? Taḳle he bala amol-ḳaislote norom oia ota deḳauk. ¹⁴Oile tumrar dil zudi ingshae titta oia shartoe bora taḳe, te tumra boṛai ḳoria hasare misa banaio na. ¹⁵Ilaḳan hekmot behest tone ae na, ita dunia, ḳaraf nofs, ar Iblis takiu ae. ¹⁶Ḳaron ze zagat ingsha ar shartofori taḳe, i zagat fitna-fosad ar hoḳol zator naformani taḳe. ¹⁷Oile behest taki ze hekmot ae, ikṭa oilo ḳaṭi. Ikṭa shantie bora, soborala ar norom mizazi, doya ar hok kame bora, tar maze kunu har-for ba bonḍami nai. ¹⁸Zara shomazo shantir bis siṭae, tarar fol oilo forezgar zindegi.

Mair-dorbaror kuṭi

¹Tumrar maze kuai tone mair-dorbar ar ḳaijja foeda oe? Tumrar shukor ḳaishe shorilor ze rifue laṛai ḳore, ogu takiu ae. ²Zeta tumrar nae, ota tumra mone mone sao, erlagi tumra kun ḳoro. Ar lalos ḳoro oile fao na, erdae tumra mair-dorbar ar ḳaijja ḳoro. Tumra to sao na, erdae fao na. ³Ar saileo fao na, ḳaron tumra to bod niote sao, zela tumrar monor ḳaish fura oe.

Duniar dust Allar dushmon

⁴O beiman oḳol, tumra kita zano na ni, duniar loge dustir mani Allar loge dushmoni? Ze duniar maeae buṛi zae, he Allar dushmon oizae. ⁵“Amrar bitre ze ruh deoa oise, ikṭae amrare ingshar bae ṭane.” Pak kitabor ou talim kunu emne batail oise ni? ⁶Oile ita taki amrar ufre Allar rohomot aro beshi. Erlagi kitabor maze leḳa ase, “Boṛai ḳorrar ufre Allae at tuloin, oile norom manshore rohom ḳoroin.” ⁷Gotike tumra Allar zimmae roia shoetanor mukabila ḳoro, teu he tumrar ges tone bagibo. ⁸Allar bae sao, teu taino tumrar bae saiba. O gunagar oḳol, tumra nizore pak-saf ḳoro, O du-dila manush, tumrar dil ḳaṭi ḳoro. ⁹Duke ḳator oia ahazari ḳoro, ashir bodla ḳando, kushir bodla mattom ḳoro. ¹⁰Mabudor dorbaro noto o, teu tain tumrare usa ḳorba.

Gibot ar bisar

¹¹O bai oḳol, tumra eḳzone aroḳzonor gibot gaio na. Ḳeu zudi bair bodnam gae ba tar bisar ḳore, er mani he shoriotor bodnam ḳorlo ar shoriotor bisar ḳorlo. Tumi zudi shoriotor bisar ḳoro, te to shoriot manrae na, ulṭa tar bisar ḳorat ḳaṛa oiso. ¹²Shoriot ar bisaror ḳemota ḳali eḳzonor atou ase. Tainu basain, tainu maroin. Te ari-forir bisar ḳorra tumi aroḳzon ḳe?

Fuṭani deḳaio na

¹³Huno, tumra zara ḳo, aiz ba ḳail amra omuk ṭauno zaimugi, gia hono eḳ boros roia ḳae-ḳarbar ḳoria lab ḳormu. ¹⁴Oile ḳailkur ḳobor to tumra zano na. Tumrar zindegiu ba kita? Tumrar zindegi to ḳosu fatar fani, tuṛa shomoe taḳe, bade foṛizae. ¹⁵Erdae ila na ḳoia ola ḳo, “Inshalla, amra haeati faimu, ar ota-hota ḳormu.” ¹⁶Oile tumra to boṛai ḳoria fuṭani deḳairae. Ilaḳan fuṭani bala nae.

¹⁷Ḳeu zudi zaniao bala ḳam na ḳore, te he gunar bagi oibo.

Doni oḳolre hushiari

¹O doni oḳol, huno, tumrar ufre ze mosibot ar, itar lagi tumra ḳando ar ahazari ḳoro. ²Tumrar don-shompod binash oigese, tumrar ḳafoṛ-sufoṛ undure ḳaṭilise. ³Tumrar shuna-rufat zongare dorilise, i zongare tumrar bifokke shakki dibo, ar agunir laḳan tumrar gust ḳaibo. Ita to kiamotor lagi tumra dola ḳori toiso. ⁴Huno, tumrar dan daora ḳamlar ze beton aṭḳaiso, ou betone oḳon sillaia ahazari ḳorer. I ḳamlaintor ahazari Alla Rabbul Alaminor ḳano gia azise. ⁵Duniar bukut bilashita ar rong-tamshar maze tumra din ḳaṭaiso, duzoḳor kuraḳ bonar lagi nizore kub fulfula banaiso. ⁶Tumra ni-oforadire dushi shaibosto ḳoria kun ḳorso, oile era kunu protibad ḳorse na.

Mosiboto sobor ḳora

⁷Gotike O amar maear bai oḳol, amrar malike toshrif anar ag forzonto tumra ḳoshṭo ḳoria tuṛa sobor ḳoro. Tumra to deḳso, giroste bala foshol faoar lagi megor ashae kila sobor ḳori boi roe. ⁸Tumrao ola sobor ḳoro, ostir oio na, ḳaron malike kub zoldiu toshrif anra. ⁹O bai oḳol, tumra zate Allar nozoro dushi na bono, erlagi tumra ḳali eḳzone aroḳzonor kut tukanit roio na. Huno, bisar ḳorar lagi to Alla Pak amrar samne aia ubai roisoin.

¹⁰O maear bai oḳol, ze nobi-rosul oḳole Mabudor name toblig korsla, tarar ḳoshṭo ar soboror ḳota sinta ḳori deḳo. ¹¹Tara to ḳoshṭo faiao tir roisoin, erlagi amra tarar gunogan gai. Tumra to Aiub nobir soboror ḳota bala ḳori zano, ar eoḳan zano, Allae bade tanre kila rohom ḳorsla. Alla to doya-maear shagor.

¹²O amar bai oḳol, amar ashol ḳota oilo, tumra kunuzat ḳosom ḳorio na. Asmanor nameo na, zominor nameo na, ola kunu nameu ḳosom ḳorio na. Er bodla tumrar oe ḳan oe, ar na ḳan na ouk, zate tumra bisaror daṛo na foṛo.

Munazat ar hedaeot ḳora

¹³Tumrar maze ḳeu mosiboto taḳle he dua ḳorouk. Ḳeu shuke taḳle hamd-ḳaoali gauk. ¹⁴Ḳeuror bemar oile he zomator murobbi oḳolre daot deuk, tara aia Allar nam loia tar matat tel dia dua ḳoroukka. ¹⁵Teu imanor sate dua ḳorar ḳatire Allae i bemarire shifa ḳorba. He zudi gunao ḳoria taḳe, te tar guna maf ḳora oibo. ¹⁶Erlagi tumra eḳzone aroḳzonor gese zarzir guna shikar ḳoro, ar eḳe-oinnor lagi dua ḳoro, zate bala oitae faro. Forezgar oḳolor munazat asanoḳ bolala. ¹⁷Ilias nobi amrar laḳanu eḳzon roḳtoe-mangshoe manush asla. Tain dile-zane dua ḳorla meg na oar lagi, hasau shaṛe tin boros kunu meg oilo na. ¹⁸Bade tain megor lagi dua ḳorla, teu meg oilo, ar zomino foshol folilo.

¹⁹O amar bai oḳol, tumrar maze ḳeu zudi be-foti oizae, ar ḳeu tare firaia ane, ²⁰te zanio, ze manshe kunu gunagarre be-fot tone firaia ane, he ou gunagaror zan basae ar tar guna beshi oileo mafi fae.