al-Ibrani

Fobitro Injil Shorif 19 nombor sifara

al-Ibrani

Forisiti

Fobitro asmani kitabor ou al-Ibrani sifara leḳsoin, Alla Pakor hukume Hozrot Isa al-Mosir eḳzon sahabie. Hozrot Isae behesto toshrif neoar onuman 30–35 bosor bade ou sifara leḳa oise. Hozrot Musa (a:)-or ummot Ihudi dormor zeta manshe Hozrot Isar torika ḳobul ḳorsila, tara nanan nomunar bifodo foṛla, ou bifodor lagi tarar mazor ḳeu ḳeu hirbar furana dormot firia zaitagi saisoin, erare utshaho dibar lagi ou sifara leḳa oise.

Amra zani, duniar hoḳol dormor ebadot-ḳanar maze eḳṭa ḳas fobitro zaga ba herem shorif taḳe, er bitre shadaron ebadotḳari hamani nished. Ota taki amra buzi, dormo mania Allar daro zaibar ufae nai, kunumonte-u Allar ḳas didar mile na. Tan didar mile ḳali Hozrot Isa al-Mosir usillae; zela i sifarar 9 ruku 24 aeato ase, “Al-Mosi to manshor ator banail kunu pak zagat hamaisoin na, tain ḳali ashol behesto hamaisoin, zate amrar nazator lagi Allar samne oḳon azir oita faroin.” Ar 10 ruku 19 aeato ase, “Erlagiu O bai oḳol, Hozrot Isa al-Mosir lour zoriae, amra behesti ḳas pak zagat hamanir shaosh faisi.”

Ermaze ase,

(1) Nobi ar firista oḳol taki Isa al-Mosi mohan 1—2 ruku

(2) al-Mosir zoriaeu Allar deoa aram 3:1—4:12 aeat

(3) Hoḳol kurbani taki al-Mosir kurbani mohan 4:13—7:28

(4) Allar loge milonor noea ar siroḳalin usilla 8—10 ruku

(5) Imani buzurgan ar al-Mosir bae saia samnedi douṛai 11—13 ruku

Nobi ar firista oḳol taki Isa al-Mosi mohan (1:1–2:18)

Hozrot Isa al-Mosiu Kolimatulla

¹Alla Pake agor zomanat nanan nomunae nobi oḳolor mazdia amrar moe-murobbi oḳolor gese ṭukra ṭukra ḳori ohi bezisoin, ²oile oḳon aḳeri zomanat aia tain ohire manush surote shorashori bezisoin. Ou manush oila Allar ḳas maear futor laḳan, en namu Kolimatulla, mani Allar ohi. Ou maear fut Kolimatullar atou tain hokkoltar malikana dilaisoin, en usillae asman-zomin ar hokkolta foeda oise. ³Einu oila Allar shan-tozollir nur, tan mazdiau Alla Pake nizore zair ḳorsoin. Ou maear fut Kolimatullar hukumor bole, tamam zogotor hokkolta sole. Tain duniar manshor gunare doia saf ḳoria, arshe-azimo Allar ḍainor toḳto toshrif raḳsoin.

Firista oḳol taki Hozrot Isa mohan

⁴Ita dekia amra buzi, Allae tanre firista oḳol taki aro beshi mortuba-ala nam disoin, ar zela nam oula ijjoto dan ḳorsoin. ⁵Allae kunudin kunu firistare ila ḳota ḳoisoin na,

Tumi to amar fut,

aiz amiu tumar bafor laḳan oilam.

Ba,

Amiu tar bafor laḳan oimu

ar he oibo amar fut.

⁶Tain zebla tan ḳas fordan futre duniat bezila, ou shomoe firista oḳolre hukum dila,

O firista oḳol, tumra enre soizda ḳoro.

⁷Allae firista oḳolor befare ḳoira,

Firista oḳolre tain haoar nomunae foeda ḳorsoin,

nizor ḳadim oḳolre agunir fulkir laḳan banaisoin.

⁸Oile ou futor befare tain ḳoira,

Ia-Elahi, tumar toḳt hor-hamesha boail roibo,

tumar insafu oilo hok insaf,

⁹tumi naformanire ginnao ar dindarire bala fao,

erlagi Allae-o, tumar Allae tumare ḳelafoti disoin,

tumare ijjoti godi dan ḳorsoin,

tumar bai-birador takio

tumare bout beshi kushi disoin.

¹⁰Allae aro ḳoira,

O malik, tumiu foela duniar ian kuṭi gaṛiso,

asman oḳolo tumar ate foeda ḳorse.

¹¹Ita hokkolta binash oizibo,

oile tumi to hamesha boail roibae.

Ita ḳafoṛor laḳan furan oizibo,

¹²tumi itare saddoror laḳan bainj ḳoria toibae,

findibar ḳafoṛor laḳan ita hokkolta bodlaibae.

Oile tumi zela aso, oulau roibae,

tumar haeati kunudinu furaito nae.

¹³Ar Allae kunudin kunu firistare ila ḳota ḳoisoin na,

Tumar dushmon oḳolre zotodin tumar faor tolat na falai,

otodin tumi amar nizor toḳtor ḍain galat bo.

¹⁴Firista oḳol to ḳali ḳezmot ḳorra ruh nae ni? Zera nazat hasil ḳorba, tarar ufoḳar ḳorar lagiu erare beza oise.

Kiali oar lagi hushiari

¹Te ou futor befare amra zotota hunchi, ita kub kial ḳoria shomza dorḳar, arnae aste aste amra i talim taki be-fote zaitamgi fari. ²Firistar marfote batail kalam zebla ḳaim roise, ar zera i kalamor ulṭa solchil, erao tarar faona shaza faise, ³taile Allae tan ḳas meherbanie amrar lagi oḳon ze nazator fot tiar ḳorsoin, i fotor ulṭa solle amra kunu basmu ni? Ou nazator ḳota to hokkol foela malik Isa nizeu ḳoisoin, ar zera ita hunchil tarao furafur saf ḳoria amrare ḳoisoin, ita ekkebare hasa. ⁴Erar loge Allae nizeo nanan kisimor kudroti alamot, keramotir bol-takkotdi ou nazator fokke shakki disoin. Ar nizor morzie Pak Ruhur deoa nanan niamot bilai diao shakki disoin.

Duk-koshṭor mazdi Hozrot Isa nazator ḳanḍari

⁵Te amra ze batuni bashshair ḳota ḳoiar, i bashshai to Allae kunu firistar zimmae raḳsoin na. ⁶Borong Allar kalamor maze eḳzone bataisoin,

Manush aroḳta kita zen tumi tarare iad ḳoro?

Manshor aoladu ba kita zen tumi tarare deḳa-huna ḳoro?

⁷Tumi to manshore firista taki ḳali tuṛa lamat lamaiso,

gourob ar ijjotor mala to tumi manshoreu dan ḳorso.

Tumar foeda hokkoltar ufre erare ijjot diso,

⁸hokkoltau erar faor tolat, erar aotae raḳso.

Te Allae hokkoltare erar aotae anae, erar ḳemotar bare ar kuntau roise na. Oile oḳono to hokkoltare amrar nizor aotae deḳram na. ⁹Ḳali hou Isare deḳram, tanre firista oḳol taki tuṛa lamat lamail oisil, zate Allar rohomote duniar tamam manshor zan basanir lagi, tan nizor zan bilai dein. Hasau tain kub ḳoshṭo faia nizor zan bilai dia mara gesoin, erlagiu deḳram, Allae tanre ou ijjot ar gourobor mala findaisoin.

¹⁰Ashole hokkoltau to Allar lagi, tainu hokkolta foeda ḳorsoin, ar tan kial oilo tan bout aolado tan shan-mohimar bagi oin. Erlagiu tarar nazator ḳanḍari ou Isare duk-koshṭo dia kamil banaisoin, zate en log doria era tan gese ain. ¹¹Te ze Isae manshore pak-saf ḳoroin ar zera pak-saf bonoin, era hokkolu to eḳ Allar foribaror. Otar dae Isae erare bai ḳoia ḍaḳte kunu shorom fain na. ¹²Tain ḳoisoin,

Ami amar baiaintor gese tumar nam toblig kormu,

shomazor maze tumar tarif-gozol gaimu.

¹³Tain hirbar ḳoisoin, ami Allar ufre borosha ḳormu.

Ar aroḳbar ḳoisoin,

Deḳoukka, amio asi ar hou aolad oḳolo ono asoin,

zerare Allae amar ato shofia disoin.

¹⁴Aichcha, te i aolad oḳol to roḳto-mangshor manush, gotike Isa nizeo oula roḳto-mangshor ḳaeae zonom loila. Ḳali ou ḳaear moutor usillae, moutor ḳemotar malik hou Iblisre gayel korta faroin, ¹⁵ar moronor ḍore zera hara zindegi moutor gulamor laḳan ḳaṭaira, tarareo azad ḳorta faroin. ¹⁶Tain to firista oḳolre shaijjo ḳoroin na, ḳali Ibrahimor aolad oḳolreu shaijjo ḳorra. ¹⁷I hokkolta furafur adae ḳorar lagi Isaro zorur asil, tain nizeo ou baiaintor loge hoḳol befare homani oa. Homani oia Allar dorbaro nirbor ḳorar zuka, dil-dorodi fordan imam oita faroin. Imam bonia manshor gunar koforar lagi nizor zan kurbani dein. ¹⁸Tain nize forikkat foṛia duk-koshṭo shoijjo ḳorsoin, erlagiu zera forikkat foṛoin tarareo tain shaijjo ḳorta faroin.

al-Mosir zoriaeu Allar deoa aram (3:1–4:12)

Musa nobi taki Hozrot Isa ijjoti

¹Erlagi O amar pak-forezgar bai oḳol, tumra zera behesti daoto shorik oiso, tumra forteḳeu Isar bae souk raḳo. Alla Pake tan i ḳas ḳolifare bezisoin, tainu to hou fordan imam, ikan amra manchi. ²Hozrot Musa zela Allar gor-shongsharo nirbor ḳorar zuka asla, ou laḳan Isareo zein bezisoin, ou Allar dorbaro tain asla nirbor ḳorar zuka. ³Te gor banaora malike zela gor takio beshi ijjot fain, ou laḳan Allar gor-shongsharo Hozrot Isaeo Musa nobi taki beshi ijjot hasil ḳorsoin. ⁴Hokkol gorainu to kunu na kunu manshe banaisoin, oile zein hokkolta banaisoin tainu Alla. ⁵Ashole samnor zomanar lagi zeta batail oibo, ota befar zananir lagi, Musa asla Allar gor-shongsharor ḳam-ḳazo nirbor ḳorar zuka ḳamlar laḳan. ⁶Oile al-Mosi to Allar gor-shongsharor zimmadar hishabe nirbor ḳorar zuka futor laḳan asla. Oḳon amra-o zudi zarzir dilor asha ar himmot rakia mout forzonto ḳaim roi, te deḳa zaibo zen, amra-o Allar gor-shongsharor bagi oisi.

Beimanir lagi hushiari

⁷Erlagiu Allar Pak Ruhe bataisoin,

Aiz zudi tumra tan aoaz huno,

⁸te tumrar moe-murobbir laḳan,

tumrar nizor dilre fashan banaio na.

Allae ḳoira, tara zela morubumir maze,

amar birudde gia amare forikka ḳorsla,

tumra ila ḳorio na.

⁹Tumrar baf-dadainte sallish bosor dori

amar kudroti ḳam deḳar badeo,

hono amare forikka ḳorsoin.

¹⁰Erlagi ami tarar ufre kub bezar oia ḳoilam,

erar dil to hamesha be-fote sokkor der,

tara to amar fot sinlo na.

¹¹Teu ami gusa ḳoria ḳosom ḳaia ḳoislam,

amar deoa hou aramor zagat,

era hamaito farto nae.

¹²Baiain oḳol, hushiar o! Tumrar dilor maze zanu naformani ar beimani na hamae, ita hamai gele zinda Allar ges taki nizore duroi horailae. ¹³Itar bodla zoto dinre aiz ḳoia ḍaḳa oe, otodin tumra eḳe-oinnore shaosh deo, zate ḳeu gunar fando foṛia nizor dilre fashan na banae. ¹⁴Ḳaron amra zudi foelakur laḳan hesh forzonto imane mozbut roia soli, te buza zaibo amra al-Mosir loge shorik oisi. ¹⁵Tuṛa age batail oise,

Aiz zudi tumra tan aoaz huno,

te tumrar moe-murobbir laḳan,

tumrar nizor dilre fashan banaio na.

¹⁶Aichcha ḳo sain, Allar nizor zobanor buli hunar badeo ḳegie tan birudita ḳorsil? Erau nae ni, zerare Musa nobie Mishor taki bar ḳori anchila? ¹⁷Ḳo sain, Allae sallish bosor dori ḳar ufre bezar asla? Erar ufreu nae ni, zera guna ḳorsla ar morubumir maze lash oia foṛsla? ¹⁸Allae ḳar ufre bezar oia ḳosom ḳaia ḳoisla, ‘Amar deoa hou aramor zagat era hamaito farto nae’? Ou erar ufreu nae ni, zera tan zobanor buli huniao naformani ḳorsil? ¹⁹Ota takiu to amra buzram, iman na anae tara Allar deoa hou aramor zagat hamaito farse na.

Allar bonda oḳolor lagi aram

¹Allar deoa aramor zagat hamanir oada oḳono amrar lagi salu ase. Erlagi ao, amra aro hushiar oia soli, naile deḳa zaibo heshe tumra ḳeu aramor zaga taki bad foṛigeso. ²Amrar gese zela kush-ḳobri toblig kora oise, Boni Israilor geseo oula toblig kora oisil, i kush-ḳobri hunia tarar kunu faeda oise na, ḳaron tara ita hunleo iman anche na. ³Oile amra to iman anchi ar Allar oada ḳora hou aramor zagat hamaitam fariar. Ou aramor befare Allae ḳoisoin,

Teu ami gusa ḳoria ḳosom ḳaia ḳoislam,

amar deoa hou aramor zagat,

era hamaito farto nae.

Zudio dunia foeda ḳorar bad takiu, Allar i aram tiar ḳora oise, ta-o tain ola ḳoisoin. ⁴Ou aramor befare aroḳ aeato leḳa ase, “Allae i hoḳol ḳam shesh ḳoria shat nombor din aram ḳorla, tain idin ar kunta foeda ḳorla na.” ⁵Oile tainu hirbar ḳoisoin,

Amar deoa hou aramor zagat,

era hamaito farto nae.

⁶Erlagi ou ḳotau foesala oilo zen, kisu manush Allar hi aramor maze hamaita farba, oile foela zerar gese kush-ḳobri toblig kora oisil, tarar naformanir ḳaroneu tara Allar hi aramor maze hamaito farse na. ⁷Allae bout din age ita Boni Israilor gese bataisla, bade tan aramor maze hamanir lagi hirbar noea din ṭik koria ou dinor nam dila, aiz. Hirbar bout din bade tain Daud nobir gese ḳoisoin, zela ufre leḳa ase,

Aiz zudi tumra tan aoaz huno,

te tumrar nizor dilre fashan banaio na.

⁸Oḳan ḳoar mani oilo, Hozrot Musar moutor bade Iusa nobie zudi tarare hi aramo harailita farta, te Allae bade aroḳ dinor ḳota ḳoila na one. ⁹Te buza zae, aramo hamanir fot Allar bonda oḳolor lagi oḳono kula ase. ¹⁰Mul ḳota oilo, Allae zela tan hokkol ḳam shesh ḳoria bade aram ḳorsla, ou laḳan kunu bondao tan aramor maze hamaia harle, he-o tar ḳam taki aram fae. ¹¹Te ao, amra-o hi aramor maze hamanir lagi ḳas dile aguai, zate hou naforman Boni Israilor laḳan Allar hukumor birudde gia, i aram taki bad na foṛi.

¹²Allar kalam to zinda ar bolala ḳamla, duio gala darail toluaror saiteo beshi darala. I kalame fuṛ ḳoria manshor bitre hamaia dil-ruh, aḍḍi-gustre algae, ar dilor bitoror niot-sinta hokkoltare forikka ḳoria deḳe. ¹³Allar foeda ḳora kunu moḳluḳatu tan gese lukail nae. Tan soukor samne hokkoltau kula-mela zair ase, tan gese-u amrar hishab dite oibo.

Hoḳol kurbani taki al-Mosir kurbani mohan (4:13–7:28)

Hozrot Isa al-Mosiu fordan imam

¹⁴Amra to ola eḳ fordan imam faisi, zein tamam asman faroia hari Allar arosho toshrif nisoin, tainu Allar ḳas maear zon, Isa Ibnulla. Te aukka, amra tan kolimare mozbut ḳori mani. ¹⁵Ḳaron amrar fordan imam i laḳan nae zen, amrar kunu ḳomzurir duke tain duki oita nae, taino amrar laḳan hokkol zator gunar forikkat foṛsoin, oile kunuzat guna ḳorsoin na. ¹⁶Erlagi aukka, amra himmot ḳoria Allar rohomotor toḳtor kinaro zai, zate meherbani hasil ḳortam fari, ar zelaḳan rohomotor goroz ase, ou laḳan rohomoto fai.

¹Manshor fokke roia Allar ebadotir lagi manshor maz toneu forteḳ fordan imamre fosond ḳori neoa oe. Tan ḳam oilo manshor guna mafir lagi foshu kurbani deoa ar hoḳol zator lilla-sodga boḳshia deoa. ²Zera na buzia guna ḳore ar be-foti oe erar loge tain norom bebohar ḳorta faroin, ḳaron tan mazeo ḳomzuri ase. ³Tain zela oinno manshor gunar lagia kurbani dein, oula tan nizor ḳomzuri ar gunar lagio kurbani ḳora forz.

⁴Fordan imam oar ijjot ḳeu nize nize ḳamaito fare na, ḳali Allae zenre fosond ḳoroin tainu i ijjot hasil ḳoroin, zela Allae Harun nobire i ijjot disla. ⁵Isaeo oula fordan imam oar lagi nize nizore boṛo banaila na, borong Allaeu tanre ou gourob dan ḳorsoin, Allae bataisoin,

Tumi to amar fut,

aiz amiu tumar bafor laḳan oilam.

⁶Tain oula aroḳ aeato ḳoisoin,

Bashsha Malki-Siddikor nomunae

tumiu hor-hameshakur imam.

⁷Allae to Isare moutor at taki basaita farla one, Isa duniat taḳar shomoe tan gese ahazari ḳori ḳandia dua-minoti ḳori bik magisoin, tan maze Allar ḍor-ḳof ar baiddota taḳae itar zuafo faisoin. ⁸Tain fut oileo ḳoshṭo shoijjo ḳoria, Allar baiddo oia roa hikisoin, ^9-10ar ou laḳan roia tain zebla furafur kamil bonigela, Allae tanre Malki-Siddikor nomunae fordan imamor ḳetab dila, ou nomunae tan baiddo ummot oḳolor lagi Allai nazator fot kulia disoin.

Iman taki na horar lagi hushiari

¹¹Malki-Siddikor befare amrar aro bout boean ase, oile tumrar ḳano tala lagai diso ḳori tumrare ita buzani kub ḳoshṭo. ¹²Otodinor maze tumrao ustad oizitae asil, oile oḳono deḳa zar tumrare Allar kalamor foela soboḳ hikani lagbo. Tumrare oḳono huruttar laḳan dud ḳaoani lager, shokto ḳana hozom ḳortae farrae na. ¹³Ar zera dud ḳae tara to geda hurutta, shoriotor hukum-ahkamor befare tara kuntau buze na. ¹⁴Shokto ḳana tarar lagiu zerar boeosh oise, tara bala-burar tofat buzia aḳol ḳaṭaia sole.

¹Isar befare amra foela zeta talim faisi, aukka itare faroia amra aro agedi aguaia kamil oi. Hou foelakur talim hirbar hikar ar goroz nai, zemon naformani ḳam taki dilre bodlani, Allar ufre iman ana, ²nanan nomunar gusol, dua nibar shomoe atai deoa, moutor bade zinda oia uṭa, ar aḳerator bisar. ³Inshalla, amra olau ḳormu.

⁴Oile zera eḳbar Allar fot dekilaise, behesti danor moza faise, Pak Ruhe shorik oise, ⁵Allar rohomotor kalamor moza buzche, ar samnor zomanar nanan kudroti ḳam deḳse, ⁶deḳar badeo ḳafiri ḳam ḳorse, erar dilre ar bodlail zaito nae, ḳaron tara nize Allar ḳas maear zon Ibnullare hirbar duk-koshṭor solibo ḳatol ḳorer, ar hoḳolor samne kula-mela tan gibot gar. ⁷Ze maṭie bare bare megor fani ozom ḳoria girost oḳolre hag-torḳari zugaia dey, i maṭit Allar rohomot nazil oe. ⁸Oile ze maṭit ḳali bon-zongol ar ḳaṭa-gosa fole, ita beḳama maṭi, i maṭit lannot foṛe. Manshe itare aguindi zalain.

⁹O maear dust oḳol, zudio amra ilaḳan ḳoiram, oile ashole amra ḳas dile mono ḳori, tumrar halot e taki bout bala ase, ar tumrar zindegit nazator folo deḳa zar. ¹⁰Alla to hok-insafḳari, tumra tan lagi ze mohobbot deḳairae, tan lagi zeta ḳam-ḳaz ḳorrae, tan pak bonda oḳolor ḳezmot ḳoria airae, ita to tain faurita nae. ¹¹Amrar kub ichcha oilo, tumra forteḳ zoneu hesh forzonto eḳoi laḳan ḳam ḳorat aguai aibae, zate tumrar asha fura oe. ¹²Ou laḳan ḳamo aguaite tumrar alshi na ae; borong imane ar sobore zera Allar oada ḳora borkot hasil ḳorsoin, tumrao tarar laḳan oizao.

Allar oadar nichchoeota

¹³Hozrot Ibrahimor loge Allae zebla oada ḳorsla, i shomoe dusra kuntar name tain ḳosom ḳaisoin na, ḳaron tan taki boṛo dusra kuntau nai, erlagi tain nizor name ḳosom ḳoria ḳoisla,

¹⁴Ami nichoe tumare borkot nazil ḳormu

tumar aolad bout forimane baṛai dimu.

¹⁵Ibrahime oula bout lamba shomoe sobor ḳoria Allar oadar fol faila. ¹⁶Manshe zebla kunu ḳosom ḳae, he tar saite dami ḳeuror name ḳosom ḳae, teu buza zae tar ḳosom hasa, ar ou ḳosomor lagi hoḳolta miṭ-maṭ oizae. ¹⁷Oula Allae-o zerar loge oada ḳorsoin, tan oadar nichchoeotar lagia taino ḳosom ḳaisoin, zate tan oada rod-bodol oar shondoe na taḳe. ¹⁸Ar Allae kunu misa mata to bout duror ḳota. Te tain zebla oadar loge ḳosomo ḳorsoin, oḳon amra aro ḳoto beshi borosha raḳtam fari. Erlagi ao, amra zera tan dorbaro gia ashroe faisi, faia ze asha foeda ase, amrar samnor hou ashare mozbut ḳori doria roi. ¹⁹Ou asha amrar zanor longoror laḳan, ḳaim ar mozbut. Iṭae Allar behesti ebadot-ḳanar forda faroia ḳas pak zagar bitre amrare nia fousae. ²⁰Ar amrar fokko oia Isa gia amrar age hi zagat fousi gesoin. Tain to Malki-Siddikor silsilar reoaz mafik hor-hameshakur lagi fordan imam oisoin, te ou befare oḳon ḳoiram.

Allai imam Malki-Siddikor forisoe

¹I Malki-Siddik oila Allatalar imam, Shalemor bashsha. Ibrahime bashsha oḳolre zuddot araia hari firia aoar bala ou Malki-Siddikor loge tan mulaḳat oile, Malki-Siddike Ibrahimre dua ḳorsla. ²Ibrahime tan hokkoltar dosh baṭor eḳ baṭ enre dilaila. Malki-Siddik namor mani oilo, forezgaror bashsha. Tain Shalem ṭaunoro bashsha, mani shantir bashsha. ³Malki-Siddikor ma nai, bafo nai, tan kunu ḳandan namao nai, tan haeatir shuru ba shesh nai. Te buza zae, tain Allar ḳas maear futor laḳan, hor-hameshakur imam.

⁴Te sinta ḳori deḳoukka, ein ḳoto mohan, zenre amrar ḳandanor mul baba Ibrahimeo tan gonimotor malor dosh baṭor eḳ baṭ dan ḳori disoin. ⁵Ar Lebi gusṭir maze zera imamoti ḳam ḳoroin, tara shoriotor hukum mafik tarar baiain, mani Boni Israilor ges taki dosh baṭor eḳ baṭ adae ḳorar eḳtiar faisoin. Ou Boni Israilo to Ibrahimor ḳandanor maze zonmisoin. ⁶Oile hou ze Malki-Siddik Ibrahimor ḳandanor na oileo, Ibrahimor ges taki dosh baṭor eḳ baṭ nisla, ar Ibrahimre duao disla, zen loge Allae nize oada ḳorsoin. ⁷Huru oḳole boṛo oḳolor ges taki dua faia taḳoin, ermaze to shondoe nai. ⁸Eḳbaedi ze imamor mout oe, ou Lebi gusṭir imam oḳole dosh baṭor eḳ baṭ adae ḳoroin, ar aroḳbae Malki-Siddik, kitabe ḳoe tain hor-hamesha zinda asoin, taino dosh baṭor eḳ baṭ adae ḳorsoin. ⁹Hirbar ikano ḳoa zae, Lebi gusṭir ze imame dosh baṭor eḳ baṭ adae ḳorsoin, taino Ibrahimor mazdi Malki-Siddikre dosh baṭor eḳ baṭ disoin, ¹⁰ḳaron Malki-Siddike zebla Ibrahimor loge mulaḳat ḳorla, Lebi to ou shomoe Ibrahimor naṛor bitre asla.

Hozrot Isa Malki-Siddikor silsilar imam

¹¹Lebi gusṭir imam sab oḳolor ḳam-ḳazor ufre nirbor ḳoria Allae Boni Israilre shoriot disla, i imamor mazdi zudi kamil oa zaito, te Lebi gusṭir foela imam Harunor bodla Malki-Siddikor nomunar aroḳ imam aoar kunu goroz asil ni? ¹²Imamor silsila bodlail oile to shoriotreo bodlani lage. ¹³I hoḳol boean zan niote ḳorram, ein to Lebi gusṭir nae, aroḳ gusṭir, hi gusṭir ḳeu kurbani ḳanar ḳadim asla na. ¹⁴Amrar munib to Ehuda gusṭir maze foeda oisoin, i gusṭir ḳeu imam oiba ḳoria Musae kunta ḳoisoin na. ¹⁵Malki-Siddikor nomunae zebla aroḳzon imame toshrif anoin, i shomoe to amrar boean aro saf oigese. ¹⁶Isa to roḳto-mangshor kunu niome imam oisoin na, ḳali tan hor-hameshakur kudroti zindegir boleu oisoin. ¹⁷Tan befare pak kalame ḳoe,

Malki-Siddikor nomunae

tumiu hor-hameshakur imam.

¹⁸Te deḳoukka, eḳbae agor imamotir hukum-ahkam oḳol ḳomzur ar beḳama oizaoae itare horai deoa oise, ¹⁹Musar shoriote to kuntareu kamil banaito farse na. Ar aroḳbae oula eḳ mohan noea oada zari ḳora oise, i oadar zoriae amra Allar aro ḳasat aitam farmu.

²⁰Ar agor imam oḳolor befare to kunu ḳosom ḳora oise na, oile Isar imamotir befare Allae ḳosom ḳorsoin. ²¹Tain ḳosom ḳoria enre boail ḳorsoin, ar ḳoisoin,

Mabude ḳosom ḳaia ḳoira, tumiu hor-hameshakur imam,

tumar befare tan munsha bodlaita nae.

²²Te amra buzram zen, Isa Allar loge manshor milonor aro mohan eḳ usillar zamindar oisoin. ²³Ar Lebir gusṭi taki bout manshe imamoti ḳorsoin, mout oizae ḳori era kunu zonu hamesha imamoti ḳorta farsoin na. ²⁴Oile Isa to hor-hamesha zinda asoin, erlagi tan imamoti kunudino furaito nae. ²⁵Erlagiu zera tan usilla loia Allar ḳasat ae, Allae tarare furafur nazat dan ḳoroin, ḳaron tarar fokke sufarish ḳorar lagi tain hamesha zinda asoin.

²⁶Ashole amrar lagi oula eḳzon fordan imamor zoruro asil, zein pak-forezgar, be-guna, gunagar oḳol tone alog, ar Allae zenre asman oḳolor ufre tulchoin. ²⁷Baki hokkol fordan imame foela tan nizor lagi, bade tan ḳoumor gunar lagi forteḳ din kurbani adae ḳora lagto. Oile ou imamor lagi itar zorur asil na, ḳaron tain tan nizore kurbani dia eḳoi bare i ḳam adae ḳorilisoin. ²⁸Shoriote zoto fordan imam oḳolre boail ḳorse era hoḳolu ḳomzur, oile shoriotor bade Allar ḳosom mafik zenre boail ḳora oise, einu ḳas maear fut, hor-hameshakur imamotir lagi enre kamil banail oise.

Allar loge milonor noea ar siroḳalin usilla (8:1–10:39)

Allar loge milonor noea usilla

¹Amrar boeanor mul befar oilo, amrar oula eḳzon fordan imam asoin, zein behesto arshe-azimo Allar ḍainor toḳto toshrif raḳsoin. ²Tain hou ashol pak zaga, mani behesti ebadot-ḳanat ebadoti ḳorra, i ebadot-ḳana to kunu manshor ator banail nae, ḳali Mabude nize banaisoin.

³Foshu kurbani ar lilla-sodga adae ḳora oilo forteḳ fordan imamor daeitto, erlagi ou fordan imamor geseo kurbanir zinish taḳte oibo. ⁴Tain zudi oḳon duniat taḳta te imamoti ḳorta farla na one, ḳaron shoriotor hukum mafik kurbani dibar imam to asoinu. ⁵Hi imam oḳolor ḳam oilo behesti ḳamor nomuna ba saea, zela Musae hi ebadot-ḳana bananir shomoe Allae Musare hushiar ḳori ḳoila, “Dekio, ou faṛor ufre tumare zela noḳsha deḳailam, ekkere ou laḳan ḳori hoḳolta banaio.” ⁶Oile oḳon amra deḳram, Isae imamotir ze daeitto faisoin, ita hi imam oḳol taki bout bala, zela Allar loge manshor milonor aro bala eḳ usillar lagi tain zimmadar oisoin. I usilla agor usilla taki bout bala; i usilla to bout bala bala oadar ufre ḳaim oise. ⁷Allar loge amrar milonor foela usilla zudi nikut oito, te dusra usilla ḳaimor kunu zorur asil na. ⁸Oile Allae tarar dush deḳaisoin, zela asmani kitabe ḳoe,

Mabude ḳoira, Huno, ola eḳ oḳt aibo,

zebla ami Boni Israil ar Ehuda gusṭir lagi,

amar loge milonor eḳ noea usilla ḳaim ḳormu.

⁹Ou noea usilla agor hi usillar laḳan nae,

Mishor desh taki tarar moe-murobbi oḳolre,

azad ḳori anar bala ze usilla ḳorslam.

Ḳaron tara amar usillar ufre ṭik roise na,

Erlagi amio tarar log saṛi disi,

ikan Mabude ḳoiram.

¹⁰Oile ami Mabude eoḳano ḳoiram,

i zomanar bade ami Boni Israilor loge,

amar noea ou usilla ḳaim ḳormu,

amar shoriot tarar dilor maze dimu,

tarar ontoror maze ami lekia dimu,

ami tarar Alla oimu,

tara oiba amar proza.

¹¹Tara hoḳoleu tarar ari-forire,

zarzir bai-biradorre

ila talim deoa lagto nae bule, tumra Allare sino.

Tara huru-boṛo hokkole emneu to amare sinba,

¹²ḳaron ami tarar hokkol naformani maf ḳormu,

tarar gunare ar kunudinu mono raḳtam nae.

¹³Te buza zae, ‘noea’ ḳota ḳoia tain foela usillare furan banaisoin, ar zeta osol-furan oizae, ita to zoldi ḳori araizae.

Dui laḳan ebadot-ḳana

¹Allar loge manshor milonor foela usillar maze, Allar ebadotir lagi nanan nomunar niom-ḳanun asil, ar duniat ebadot ḳorar lagi ekkan ebadot-ḳanar ḳotao leḳa asil. ²Hou niom mafik ekkan ebadot-tambu banail oisil, hi ebadot-tambur foela kuṭat asil serag dani, fobitro ruṭi ar ita raḳar ṭebul. I kuṭar nam asil pak zaga. ³Dusra fordar bitre ḳas pak zaga name arok kuṭa asil, ikan oilo herem shorif. ⁴I kuṭar maze asil, shunadi banail agor-kushboe zalani ṭebul, shunadi lefa shahadot shonduk, shondukor bitre asil shunar boeamo bora kudroti ḳani manna, imam Harunor laṭi, ou laṭit kudroti ful fuṭisil. Aro asil Allar loge milonor usilla leḳa hou duio shahadot fattor. ⁵Hi shondukor ufre asil Allar zalali duio karubi, erar ḍaḳnar saear tolor sanit gunar kofora adae ḳora oito. Ita hokkoltar kuṭinaṭi boean ḳora oḳon zorur nae.

⁶I hokkolta zuit ḳorar bade imam oḳole imamoti ḳamor lagi hamesha foela kuṭar bitre hamaita. ⁷Oile dusra kuṭat, mani ḳas pak zagat ḳali fordan imam bosoro eḳbaru hamaita farta, taino kurbanir lou bina hino hamaita farta na. Tan nizor guna ar tan ḳoumor na-zana hoḳol gunar mafir lagi, kurbanir lou loia hono hamaita. ⁸Te Pak Ruhe deḳaia dira, i duniar foela ebadot-ḳana zotodin ḳaim ase, otodin hi ḳas pak zagat hamanir fot kula oito nae. ⁹Hi ebadot-ḳana oilo i zomanar lagi eḳ nishana, i nishanae amrare batai dey, ou laḳan kurbani ar lilla-sodgae ebadotḳarir bibeḳor kutkuti bab dur ḳorto fare na. ¹⁰Ita to ḳali ḳaoa-daoa, uzu-gusolor befar, hokkoltau ḳali zaira shoriot, dilor kunta nae. I shoriot ḳaim asil, aro bala kunu usilla aibar ag forzonto.

¹¹Oile oḳon zoto bala bala befar aise, al-Mosi to ou noea torikar fordan imam oisoin. Tain aro ijjoti aro beshi kamil ebadot-ḳana oia aisoin. I ebadot-ḳana kunu manshor ator banail nae, ikan i duniar duniabi kunta nae. ¹²Kunu bisal ba sagolor lou ato loia tain hino hamaisoin na. Ḳali tan nizor zan kurbanir lou dia eḳbareu ḳas pak zagat hamaisoin, hamaia amrare hor-hameshakur lagi ḳalas ḳorsoin. ¹³Age zera nafaḳ bonizito, tarar lagi bolod ba sagolor lou ar ḍeki-gorur zalail sali siṭaia pak-saf ḳora oito, oile itae to erar shorilor bair gala ḳali pak-saf oito. ¹⁴Te zein hor-hameshakur zinda ruhur mazdia, be-guna kurbani oia tan nizore Allar name shofia dilaisoin, hi al-Mosir loue amrar dilre nafaki ḳam-ḳaz taki aro ḳoto beshi forimane pak-saf ḳorbo, zate amra zinda Allar ebadot-bondegi ḳortam fari.

¹⁵Ar foela usilla salu taḳte manshe zeta guna ḳorsla, ou gunar at taki ḳalas ḳorar niote, kofora hishabe al-Mosir mout oise. Allae zerare daotdi ania siroḳalin mouroshi shompod dibar oada ḳorsoin, al-Mosi to erar lagiu noea usillar zimmadar oisoin. Ou mouroshi shompod oḳon manshe faibar shuzug oise, ¹⁶ḳaron duniabi niome mouroshi shompodor kunu osiot-nama ḳamo lagaite oile, foela ou osiot ḳorrar mout oise ḳori forman dorḳar oe. ¹⁷Manshor moutor bade tar osiot-nama ḳamo lage, osiot ḳorra zinda taḳte ita kunu ḳamo lage na.

¹⁸Ṭik ou laḳanu, Allar loge milonor foela usillao, moutor lou saṛa ḳamo lagail oise na. ¹⁹Hozrot Musae shoriotor tamam hukum-ahkam Boni Israilre zananir bade, tain bisal ar sagolor lour loge fani mishaila, bade lal rong ḳora meṛar ruma ar esub gasor ḍeṭadi Allai shoriot kitabor ufre, ar hokkol manshor gotro siṭaia dila. ²⁰Musae ḳoila, “I lou oilo Allai milonor hou usillar lou, ze usilla mafik solar lagi Allae tumrare hukum disoin.” ²¹Ou nomunae tain ebadot-ḳana ar ebadoti ḳamor hokkol mal-samanar ufreo lou siṭaia dila. ²²Ashol ḳota oilo, Musar shoriot mafik beshir bag zinishu lou dia pak-saf oite oe, kurbanir lou saṛa kunumonte-u gunar mafi faoa zae na.

Hozrot Isau tamam gunar kofora

²³Zeta zinish oḳol ḳali behesti zinishor nishana, otare kurbanir foshur loudi pak-saf ḳora zorur asil, oile zeta zinish ashol behesti, itare pak-saf ḳorar lagi to aro mohan kurbanir zorur. ²⁴Ar al-Mosi to hou nishanar zinishor laḳan, manshor ator banail kunu pak zagat hamaisoin na, tain ḳali ashol behesto hamaisoin, zate amrar nazator lagi Allar samne oḳon azir oita faroin. ²⁵Hoḳol fordan imame kurbanir foshur lou loia zela forteḳ bosor ḳas pak zagat hamani lage, al-Mosi to i laḳan bare bare kurbani oar lagi behesto toshrif nisoin na. ²⁶I laḳan oile to dunia foeda taki oḳon forzonto tain bare bare ḳoshṭo faia kurbani oite oilo one. Oile tain to aḳeri zomanat aia ḳali eḳbaru zair oisoin, zate nizore kurbani dia tamam gunar kofora oin. ²⁷Allae to ṭik koria dilaisoin, hokkol manshor ḳali eḳbar moron oibo, ar moron bade bisar. ²⁸Ṭik ou laḳan, bout manshor gunar buza boibar lagi al-Mosireo ḳali eḳbaru kurbani deoa oise. Tain dusrabar toshrif anba, oile gunar kofora bonar lagi aita nae. Ḳali zera tan ashik oia bar sar, tarare furafur nazat ḳorar lagi dusrabar aiba.

Hozrot Isar siroḳalin kurbani

¹Shoriot oilogi ḳali eḳ nishana, itae bobishotor niamotor ḳota batai dey, ita to ashol kunu befar nae. Erlagiu zera Allar ebadot ḳorar kiali oe, shoriotor niome tara bosor bosor eḳoi laḳan kurbani dia to kunumonte-u kamil oito fare na. ²Shoriote zudi tarare furafur kamil banailito, te to foshu kurbani deoa eḳbareu bondo oigelo one. Ebadot ḳorra oḳol zudi eḳbareu pak-saf bonizito, te era nizore ar gunagar mono ḳorlo na one. ³Oile ou foshu kurbanie tarare forteḳ bosor iad ḳoraia dey zen, tara ashole gunagar. ⁴Muloto, sagol ba bisalor loue manshor gunare kunu laḳanu saf ḳorto fare na.

⁵Erlagiu al-Mosie duniat toshrif anar ḳalo Allar dorbaro ḳoisoin,

Foshu kurbani ba dan-sodga to ashole tumi sao na,

oile amare ekkan ḳaea diso bilai dibar lagi.

⁶Zalail kurbani ba gunar koforar kurbanie

tumi to kushi oiso na.

⁷Teu ami ḳoilam, O Alla,

deḳoukka, ami to ono aisi;

tumar kalam shorifo zela ase,

amar zonom oibo ou zogoto,

tumar munshare ḳaim ḳorar lagi,

ar hasau ami aisi.

⁸Uforor aeat oḳolor maze al-Mosie foela ḳoira, “Foshu kurbani ba dan-sodga to ashole tumi sao na, zalail kurbani ba gunar koforar kurbanie tumi to kushi oiso na.” Shoriotor hukum mafik ou kurbani oḳol adae ḳora oileo, al-Mosie ola ḳoila. ⁹Bador aeato tain hirbar ḳoila, “Deḳoukka, ami to ono aisi, tumar munshare ḳaim ḳorar lagi.” Te buza zae, dusra usillare ḳaim ḳorar niote, tain foela usillare batil ḳorilila. ¹⁰Erlagi Alla Pakor hou munsha mafik Isa al-Mosir ḳaeare ḳali eḳbaru kurbani deoa oisil, ou kurbanir bole Allar dorbaro amrare pak-saf ḳora oise.

¹¹Forteḳ imam sabe fortidin azir oia Allar ebadoti ḳoroin ar bare bare kurbani adae ḳoroin, ta-o ou laḳan kurbanie kunudinu gunare doia saf ḳorto fare na. ¹²Oile al-Mosie to siroḳalor gunar mafir lagi ḳali eḳbaru kurbani oia, arshe-azimo Allar ḍainor toḳto toshrif raḳsoin. ¹³Ar hou shomoe taki tain bar saira, zotodin forzonto tan dushmon oḳolre tan faor tolat falaia surmar ḳora na oe, otodin bar saiba. ¹⁴Ḳaron tan ou eḳbaror kurbanir usillae zerare pak-saf ḳora oise, erare siroḳalor lagiu tain furafur kamil ḳorsoin. ¹⁵Ou befare Allar Pak Ruheo amrar gese shakki dira, tain foela ḳoisoin,

¹⁶Ami Mabude ḳoiram,

i zomanar bade ami Boni Israilor loge,

amar noea ou usilla ḳaim ḳormu,

amar shoriot tarar dilor maze dimu,

tarar ontoror maze ami lekia dimu.

¹⁷Bade hirbar ḳoira,

Ami tarar naformani ar gunare

ar kunudinu mono raḳtam nae.

¹⁸Te buzrae ni, Allae zebla guna ar naformanire mafi dilain, erbade to gunar lagi kunuzat kurbaniru zorur nai.

Imane mozbut roar foramish

¹⁹Erlagiu O bai oḳol, Hozrot Isa al-Mosir lour zoriae, amra behesti ḳas pak zagat hamanir shaosh faisi. ²⁰Al-Mosie amrar lagi noea ar zinda eḳ torika kulchoin, tan shoril kurbanir usillae amra zanu ḳas pak zagar duaror forda faroia, Allar samne azir oitam fari. ²¹Te amrar eḳzon fordan imamo asoin, Allar foribaror tamam manshor zimma to tan ato deoa oise. ²²Erlagi ao, imanor mazdi amra furafur nichchit bonia ḳaṭi dile Allar dorbaro azir oi; ḳaron dushi bibeḳor at taki amrar dilre al-Mosir loue pak-saf banaise, ar forishkar fani dia amrare naoail oise.

²³Mumin hishabe amrar dilo ze borosha ase ḳoia shikar ḳori, ao, ou boroshae furafur mozbut roia tan torikae soli, ḳaron zein oada ḳorsoin ein to shullo-ana hok-halali. ²⁴Amra eḳe-oinnor lagi kial ḳori, mohobbot ar nek kam ḳorar lagi eḳe-oinnore shaosh-foramish dei. ²⁵Kunu kunu zonor shobab oilo, tara zomato aia shorik oe na, oile amra zanu ou laḳan na oi. Al-Mosie dusrabar toshrif anar oḳt zoto gonaia aior, amra oto beshi ḳori eḳe-oinnore shaosh-foramish deoat roi.

²⁶Alla Pakor hok torika zanar badeo zudi amra zania-hunia guna ḳorat roi, te i gunar koforar lagi kunuzator kurbani nai. ²⁷Ase ḳali hashoror moedano ḳoṭin bisaror lagi ḍorai ḍorai bar saoa, ar Allar dushmon oḳolre zalaia sali ḳorar gozobor ḍor. ²⁸Kunu zone Musar shoriotor hukum-ahkamor borkelaf ḳorle, ere kunu maea-momota na ḳoria dui ba tinzonor shakki loia ḳatol ḳorilte oe. ²⁹Te sinta ḳoroukka, ze zone Allar ḳas maear zon Ibnullare gin ḳore, he aro ḳoto boṛo azabor bagi oise! Ze lour usillae he pak-saf oise, Allai hou usillar loure he elami ḳorse, ar ze Pak Ruhe rohomot boḳshia dein, hou ruhreo beijjot ḳorse. ³⁰Ashole amra to tanre siniu, zein formaisoin,

Bodla loa amar ḳam,

ami forteḳ zonor amolor bodla dimu.

Aroḳ aeato tain ḳoisoin,

Mabude tan bonda oḳolor bisar ḳorba.

³¹Buzrae ni, zinda Allar samne azira deoa ḳoto boṛo mosibotor befar!

³²Tumra hou dinor ḳota iad ḳoro, zebla Isar torikar nuror fot faia hari, bout nomunar zulum-mosibotor mazeo mozbut roislae. ³³Kunu kunu shomoe shomazor samne beijjoti, zulum-ṭiṭkari, ṭaṭṭa-moshkora huniao tumra nize ḳoshṭo shoijjo ḳorslae. Ar kunu kunu shomoe oinnor ufre ou laḳan ḳoshṭo aise hunia, tarar loge tumrao dukito oislae. ³⁴Tumrar mazor zera zel ḳaṭisla, tarar duke tumrao duki oislae. Tumrar don-samana luṭ-faṭ ḳora oileo kushi aslae, ashole buztae farslae, tumrar lagi aro bout bala bala samana zoma ase, ze samana siroḳal roibo.

³⁵Te oḳon tumrar hi monobol kuaio na, ermaze to bout dami furushkar ase. ³⁶Tumra mozbut roa dorḳar, zate Allae ze furushkar diba ḳori oada ḳorsoin, tan morzi mafik solia tumrao hou furushkar fao. ³⁷Allae to ḳoisoin,

Ar tuṛa ḳoeḳan din baki ase, zein toshrif anar ḳota,

tain toshrif aniliba, beshi deri ḳorta nae.

³⁸Amar dindar bondae, imanor boleu aḳer faibo,

Oile ḳeu ḳoredi fisli gele tar ufre ami kushi roitam nae.

³⁹Oile amra to ḳoredi fislia binash oar manush nae, zera iman ania nazat hasil ḳore, amra oilam hou dolor manush.

Imani buzurgan ar al-Mosir bae saia samnedi douṛai (11:1–13:25)

Imani buzurgan

¹Iman kita? Amra zeta faimu ḳori asha ḳorsi, ita oḳon na faileo bade faimu-u faimu, ou ekinor namu iman. Ou imanor boleu amra nichchit oia buzi, oḳon zeta amrar souke deḳram na, ita asholeo ase. ²Ou imanor boleu amrar moe-murobbi oḳole Allar ges taki tarif ḳamaisoin. ³Imaneu amra buzram zen, Allae tan kalamor boleu asman-zominor hokkolta foeda ḳorsoin, ita amrar sokur deḳa kunu siz taki emne foeda oise na.

⁴Imanor bole Habile Allar name Kabilor saite bala kurbani adae ḳorla. Erlagi Allae Habilor befare bataila, ein eḳzon kamil manush. Te bout zomana age Habilor mout oileo, imanor befare tain oḳono amrar loge matira.

⁵Imanor bolor lagiu Idris nobir mout oilo na, Allae tanre zinda halote behesto tulia nilagi, duniat tanre tukaia millo na. Idrisre behesto tulia neoar age Allae zanaisla, Idris amar kushi mafik solchoin. ⁶Oile iman saṛa to ḳeu Allare kushi ḳorto fare na. Zekunu manush Allar daro zaite saile, he ekin ḳora lagbo zen, Alla asoin, ar zera tan tallash ḳore, tain erare furushkar dein.

⁷Imanor bole Nuh nobir zomanat zeta goṭona deḳa gesil na, Allar hushiari faia tain ota ekin ḳorla, ekin ḳoria nizor foribarre basanir lagi ekkan zaz banaila. Tan ou imani ḳamor mazdi zogotor naformanir forman deḳaila, ar Allar dorbaro forezgar hishabe goinno oigela, ḳali imanor boleu ila oa zae.

⁸Imanor bole Ibrahim nobie Allar hukum faiau nizor biṭa-maṭi saṛia roana dila. Allae tanre ze desh dita ḳori oada ḳorsoin, hi deshḳan kun zagat, ikan na zaniao tain roana oigela. ⁹Imanor bole tain Allar oada ḳora hou Kenan deshor bitreo musafiror laḳan din ḳaṭaila. Tan loge aro zera hi oadar bagi asla, hou Isʼhak ar Iakubor laḳan taino tambue tambue roia zindegi ḳaṭaila. ¹⁰Ashole ze ṭaun hor-hamesha ḳaim roibo, hou behesti ṭaunor lagi tain bar saoat asla, i ṭaunor noḳsha-nomuna shoho hokkol ḳarigori shoeong Allar ḳam.

¹¹Imanor bole Ibrahimor niaoladi Bibi Saerae aolad zonom deoar ḳemota faila, tarar hurutta foedar boeosh faroigeleo Ibrahime ekin ḳorsla, zein i oada ḳorsoin, ein to hok, ein nizor oada furaibau furaiba. ¹²Erlagi boeoshor bare morar foti ou eḳ Ibrahim taki oto manush zonom loila, zera asmanor tera ar doriar soror balur laḳan, gonia furail zae na.

¹³Mozbut imane zindegi ḳaṭaia era hoḳolor mout oise, era ḳeu hi oadar fol bug korta farsoin na, ḳali duroi taki ita dekia hari kushi oisoin. I duniat tara musafirit aisoin, ikan tarar nizor boshot ḳana nae, ita to tara manchoin. ¹⁴Ar zera ikan manchoin, tara hoḳoleu shundor ḳori buzaisoin zen, tara nizor afon deshor tallash ḳorra. ¹⁵Ze zomin taki tara baroia aisla, hi zominor ḳota kial ḳorle to tara hirbar hono hamanir shuzug faila one. ¹⁶Oile tara to aro bala eḳ desh, mani behestor tallash ḳorsla. Erlagiu Alla Pake nizore tarar Alla ḳoia forisoe dite kunu shorom fain na, tainu tarar lagia aramor eḳ ṭaun tiar ḳorsoin.

¹⁷Ibrahim nobi forikkat foṛia hari imanor boleu tan fua Isʼhakre kurbani disla. Ze Ibrahimor loge Allae nize oada ḳorsoin, hou zone tan ḳas maear futre kurbani dilaita saisoin. ¹⁸Ze futor befare Allae bataisla, “Tumar fua Isʼhakor ḳandanreu tumar ḳandan ḳoia gona oibo.” ¹⁹Ibrahimor dilor ou ekine tain kurbani dite razi oisla zen, Allae to murdareo zinda ḳorta faroin. Ar hasau moutor tol taki Isʼhakre firot faila.

²⁰Imanor bole Isʼhake tan fuain Iakub ar Ishor bobishot zindegir lagi dua disla.

²¹Imanor bole Iakube moutor oḳto Iusufor duio fuare dua dila, tain nizor laṭir ufre bordi Allar ebadoti ḳorla.

²²Imanor bole Iusufe moutor oḳto ḳoisla, tan nizor zati Boni Israil Mishor desh taki baroia zaiba, tara zaoar ḳalo tan aḍḍi-guḍḍire boia neoar hukum dila.

²³Imanor boleu Musar ma-bafe Musar zonmor bade tin mash forzonto lukaia toila, tara deḳsla, fuagu kub shundor, bashshar hukumeo tara ḍoraila na. ²⁴Imanor boleu Musae, tan buzdar oar bade Feraunor fuṛir goror nati ḳoia forisoe dite razi oila na. ²⁵Tain gunar maze roia tuṛa ḳoedin shuk kamanir saite, Allar bonda oḳolor loge milia zulum-mosibotor maze roau fosond ḳorla. ²⁶Tain Mishoror hokkol zak-zomoḳor saite, al-Mosir name durnam hasilreu beshi mulloban mono ḳorla, ḳaron tan nozor asil behesti furushkaror bae. ²⁷Imanor bole tain Mishor taki baroi gela, bashshar gusareo ḍoraila na. Niraḳar Allare dekilaisoin, oula mono ḳoria-u tain sobor ḳori roila. ²⁸Imanor boleu tain Azadi Id ar lou siṭaia deoar niom manla, zate Azrail firistae Boni Israilor foela fuaintore na soin.

²⁹Imanor boleu manshe Nil doriar mazedi hukna maṭir fotor laḳan aṭia gela, oile Mishori oḳole ila zaoat lagia buṛia morla.

³⁰Imanor boleu Boni Israile Ziriho ṭaunor baunḍorir oal shatdin sokkor deoar bade emneu foṛigelo.

³¹Imanor boleu ou ṭaunor Rahba namor bodmaish beṭie Boni Israilor guia oḳolre memandari ḳorae, hinor naforman oḳolor loge i beṭi binash oila na.

³²Ar ḳoto zonor boean ḳoitam? Zidaun, Barak, Shimshun, Ifta, Daud, Samuel ar nobi oḳolor imani bolor boean ḳorat lagle shomoye kulaito nae. ³³Imanor bole era bout desh doḳol ḳorsoin, hok insaf ḳaim ḳorsoin, Allai oadar faeda hasil ḳorsoin, shinghor muk bond ḳorsoin, ³⁴agunir kunḍolir tez ḳomailisoin, toluaror samon taki rehai faisoin, ḳomzur takio bol hasil ḳorsoin, jihador maze bol-ḳemota deḳaisoin, bin-deshi oḳolor fouzre ḳedaia disoin. ³⁵Beṭinte tara zarzir murda oḳolre hirbar zinda halote faila.

Aro boute zanor maea saṛia zulum-nirjaton shoijjo ḳoria morla, zate kiamotor bade behesti shuk fain. ³⁶Boute ṭaṭṭa-moshkora ar mair-doir shoijjo ḳorsoin, boute ḍanḍa-beṛi shoho zel ḳaṭisoin. ³⁷Manshe tarare ḳankoṛdi iṭaisoin, ḳoratdi siria dui ṭukra ḳorsoin, toluardi ḳatol ḳorsoin. Tara zulum-mosibot, zala-zontrona faisoin, obabor ṭelae foshur samṛa findia shorom lukaisoin. ³⁸I dunia tarar zuka asil na, tara faṛ-zongol, morubumi, ar gat-gaṛar maze roia duniar zindegi ḳaṭaisoin.

³⁹Imanor bolor lagi era hokkole tarif ḳamaisoin, ta-o Allar oadar fol i duniat faisoin na. ⁴⁰Ḳaron Allae amrar lagi hou zomana taki aro bala furushkar toisoin, zate amrare bad dia tara kamil na bonoin.

Allae mumin oḳolre shashon ḳoroin

¹Te amra deḳram, imani tezor bout shakki amrar sairobae ase. Erlagi ao, amra-o hoḳol zae-zamela horai, ze gunae amrare fesaia raḳe, otare horaia falai, ar douṛaora dolor loge oia doijjo dori hesh forzonto douṛai. ²Aukka, amrar nozor raki malik Isar bae, aual taki aḳer forzonto tain oila amrar imanor mul kuṭi. Tan lagi ze kushi raḳa oise, ou kushir baedi saia, duk-koshṭor solibor uforor moutreo ḳobul ḳorla, i beijjotire kunu dam dila na. Ar oḳon arshe-azimo Allar ḍainor toḳto tain toshrif raḳsoin. ³Te zein gunagar manshor oto boṛo dushmonire shoijjo ḳorla, tan befare sinta ḳoro, zate tumrar dilo kunu ḳomzuri ba nirasha na ae.

⁴Gunar loge laṛait lagia to lou baronir dosha tumrar oḳono oise na. ⁵Tumrar gaibi baf Allae, tan aolad hishabe tumrare ze nosiot ḳorsoin, tumra to ita fauriliso ni? Kitabo ase,

O amar fut, Mabudor shashonre elami ḳorio na,

tain kunu damki dile, bezar oio na.

⁶Ḳaron Mabude zerare mohobbot ḳoroin,

tarareu shashon ḳoroin,

zerare tain aolad hishabe ḳobul ḳorilain,

era forteḳ zonre tain shaza dein.

⁷Shashon mono ḳoria tumra ḳoshṭo shikar ḳoro. Bafe-fute zelaḳan shomporko, Allae-o tumrar loge oula shomporko raḳsoin. Ila kunu fut ase ni, zare tar bafe shashon ḳoroin na? ⁸Hokkol futreu shashon ḳora oe. Tumrare zudi shashon ḳora na oe, te to tumra funga, ashol fut nae. ⁹Zano to, amrar duniabi baf oḳole amrare shashon ḳoroin, ar amra tarare ijjot ḳori. Te zein amrar asmani baf, tan gese gordona nuaia sola amrar lagi zorur nae ni, zate amra zindegi fai? ¹⁰Amrar duniabi baf oḳole zela bala mono ḳorta, ola amrare shashon ḳorta, ar ita to tuṛa ḳoedinor lagi, oile Allae to amrare shashon ḳorra zate amra-o tan fak-fobitrota hasil ḳori. ¹¹Kunu shashonreu kushir befar mono ḳora oe na, dukor befaru mono oe, oile zera shashon mania sole, tara bade dindarir shantiala zindegi fae. ¹²Erlagi tumrar ḳomzur atre mozbut ḳoro, durbol aṭure shobol ḳoro. ¹³Tumra shida fote aṭo, zate lengṛa fao ar na ḳoske, borong bala oizae.

Allar gozob taki zan basao

¹⁴Hoḳol manshor loge shantie boshot ḳora ar fak-fakiza oia solar lagi kiali o, ila na solle ḳeu malikor doroshon faitae nae. ¹⁵Hushiar roio, zate ḳeu Allar rohomot taki bad na foṛo. Kial rakio, tumrar mazor ḳeu zanu bishakto titta gasor zoṛor laḳan baroia na satae, ar bout manshore nafaḳ na banae. ¹⁶Hozrot Iakubor bai Ishor laḳan kunu be-foti naforman foeda na oe. Ishe to ḳali eḳ oḳtor ḳanir lagi, tar nizor mouroshi malikana besilaise. ¹⁷Tumrar to zanau ase, zudio bade he sokur fani falaia ḳandi ḳandi dua mangisil, oile touba ḳorar shuzug ar he faise na.

¹⁸Tumra nichchoe ila kunu faṛor ḳandat aiso na, ze faṛo atdi soa zae. Hou Tur faṛor zalail aguin, goin andair, hil-tufan, ¹⁹shingar aoaz, ba zure zure mat-ḳotar kunu aoazor geseo aiso na. Zure zure mator ou aoaz zera hunchil, tara minot ḳori ḳoisil, zate tarar loge ar batchit ḳora na oe. ²⁰Tara Allar ou hukum shoito farsil na, Allae ḳoisla, “Zudi kunu foshueo i faṛo soe, te tareo ḳankoṛ maria marilite oibo.” ²¹Ou shomoe zera Mabudor didar deḳsil, tara oto ḍor ḍoraisil zen, shoeong Musa nobie ḳoila, “Ḍoror suṭe ami ḳafiram.”

²²Oile tumra to fobitro Sion faṛ ar zinda Allar ṭaunor ḳasat aiso, azar azar firistae zeḳano kushi-bashir mahfil ḳorra, hono aiso. I ṭaun oilogi, behesti Zeruzalem. ²³Behesti ḳatat zerar nam leḳa oigese, boṛo fuar laḳan zerare ijjot deoa oise, erar banail zomator daro aiso. Zein tamam manshor bisar ḳoroin, hou Allar ḳasat aiso. Ze forezgar oḳol furafur kamil oigesoin, erar ruhur mozliso aiso. ²⁴Ze Isa Allar loge milonor noea usillar zimmadar, hou Isar gese aiso. Habilor lou taki aro mortuba-ala ze lou, tumra siṭail hou lour ḳasat aiso.

²⁵Musa nobie Allai hushiarir ḳota duniar manshore zananir bade zera tan hushiarire elami ḳorsil, era zebla rehai faisoin na, te zein behesto takia amrare hushiar ḳorra, tan hushiarire elami ḳorle to ekkebare nichchitu amra kunu rehai faitam nae. Erlagi kial rakio, zein hou batchit ḳorsoin, tan hukumre elami ḳorio na. ²⁶Hi amolo Alla Pakor mukor aoaze hara duniare ḳafaisil, oile oḳon tain ou oada ḳorsoin, “Ami dusrabar ḳali i duniare nae, asmanreo ḳafaimu.” ²⁷Te “dusrabar” ou shobdo taki buza zae zen, zeta zinish oḳol laṛa-saṛa ḳorail zae, mani zeta foeda ḳora oise, itare bad deoa oizibo, ar zetare laṛa-saṛa ḳora zae na, ota ḳaim roe. ²⁸Buzra ni, ze bashshaire laṛa-saṛa ḳora zae na, amra to hou bashshai fairam, Erlagi aukka, amra Allar dorbaro shukria zanai. Alla Pak ze nomunae kushi oin, ou nomunae amra tan ebadot ḳortam farmu, tanre ḍoraia, tazim ḳoria ebadot ḳormu. ²⁹Ḳaron amrar Alla to binash ḳorra agunir laḳan.

Aḳeri nosiot

¹Tumra eḳe-oinnore afon bair laḳan hamesha maea ḳorio. ²Memandari ḳora faurio na. Zano ni, kunu kunu zone na sinia Allar firistaro memandari ḳorsoin. ³Zel ḳanat zeta manush bondi asoin, nizoreo ola bondi mono ḳoria tarare shaijjo ḳorio, ar zerar ufre zulum-mosibot ḳora or, nize ou mosiboto foṛso mono ḳoria, tarare kial ḳorio.

⁴Hoḳoleu bia-shadire ijjot ḳorio. Zamai-bour shomporkore fak-fobitro rakio. Mono rakio, Allae ku-nozori, zinakur ar luchcha oḳolor bisar ḳorba.

⁵Duniabi don-samanar lalos taki horia roio. Tumrar zeta ase, ota loiau kushi roio. Allae bataisoin,

Ami kunumonte-u tumare saṛtam nae,

kunu haloteu tumare falaitam nae.

⁶Erlagiu amra himmot ḳoria ḳoitam fariar,

Mabud amar shohae asoin, ami ḍoraitam nae.

Manshe amar kita ḳorto?

⁷Huno, ze buzurg oḳole tumrare Allar kalam talim disoin, tarar ḳota iad ḳorio. Tarar zindegir halotor ḳota balamonte sinta ḳoria, tumrao tarar laḳan imane mozbut o. ⁸Isa al-Mosi gotoḳail zela asla, aizo ola asoin, ar hor-hamesha-u ola roiba.

⁹Nanan nomunar noea noea talime zanu tumrare be-fote na ney, ḳana-finar kuṭinaṭi bishoe na tukaia, borong Allar rohomotor ufre ḳaim ro. Ila kuṭinaṭi niomor ufre zera borosha ḳorto, itae to tarar kunu lab oise na. ¹⁰Amrar to ekkan kurbani ḳana ase, ikanor kunta ḳaibar eḳtiar Musa nobir ebadot-tambur imam oḳolor nai.

¹¹Gunar mafir lagi zobo ḳora foshur lou loia, Boni Israilor fordan imam oḳol ebadot-ḳanar ḳas pak zagat hamain, oile ou foshur aḍḍi-mangsho hoḳolta Boni Israilor kempor bare nia zalail oe. ¹²Ou laḳan Hozrot Isao Zeruzalem ṭaunor bare gia zulum-ḳoshṭo shoijjo ḳoria mout ḳobul ḳorla, zate tan nizor lour usillae manshore guna taki pak-saf korta faroin. ¹³Oḳon aukka, amra-o tan bodnamre nizor ḳando loia kempor bare tan ḳandat zaigi. ¹⁴Ḳaron i duniat amrar lagi staei kunu ṭaun nai, amra ḳali hou ṭaunor tallash ḳorram, ze ṭaunor didar bade faimu.

¹⁵Te oḳon amra al-Mosir zoriae loia hamesha Allar dorbaro zikir-azkar kurbani ḳori, mani duio ṭuṭe tan namor gunogan gai. ¹⁶Nek kam ḳora ar obabi manshore dan-ḳoerat bilani faurio na, ḳaron ou laḳan kurbanie Alla Pak kushi oin.

¹⁷Tumrar murobbi oḳolor hukum mania tarar gese mata nuaia roio, Allar dorbaro hishab deoa lagbo ḳori tara hamesha tumrar zanor faradar oia ḳam ḳorra. Oḳon tara zate kushi mone ita ḳoroin, erlagi tumra baiddo roio. Tara zudi mono duk faia tumrar lagi ḳam ḳoroin, te tumrar balai oito nae.

¹⁸Amrar lagi dua ḳorio. Amra to zani, amrar bibeḳ saf-sofa ase, hokkol befare hok fote soltam sai. ¹⁹Ami ḳas ḳori tumrar gese ou dua sairam, zate zoldi ḳori ami hirbar tumrar loge mulaḳat ḳortam fari.

Bidaei salam ar dua

²⁰Allar loge amrar milon, hor-hameshakur usilla,

furafur ḳaim ḳorar lagia,

amrar malik Hozrot Isa, nizor lou bilai dia,

meṛa falor mohan raḳal bonisoin.

Hozrot Isar moutor bade, shanti deura Alla Pake,

murda taki tanre zinda ḳorsoin.

²¹Hoḳol nek kamor tofik deukka, tan morzi zugaia solar,

ar tain zeta fosond ḳoroin,

dilo otar eshki deukka, Isa al-Mosir zoriae,

en mohima hor-hamesha rouk, amin.

²²Bai oḳol, tumrar gese minot ḳorram, tumra biroḳto na oia i nosiot huno, ami kub shoṭkaṭe leḳlam. ²³Huno, amrar bai Timotie ḳalas faisoin, tain zudi shomoe moto amar ono ain, te ami tumrar gese aoar shomoe tane loge loia aimu.

²⁴Tumra nizor murobbi oḳolre, ar pak bonda oḳolre amar salam zanaio. Itali deshor manshe tumrare salam zanaira.

²⁵Tumra hoḳolor ufre Allar rohomot ḳaim rouk. Amin.