Foeda Nama

Fobitro Tourat Shorif foela sifara

Foeda Nama

Siloṭi bashae torjoma

Forisiti

Ermaze ase,

Hozrot Adom (a:) —Duniar foeda 1—5 ruku

Hozrot Nuh (a:) —Fanir gozob 6—10 ruku

Hozrot Ibrahim (a:) —Allar oada 11—23 ruku

Hozrot Isʼhak (a:) —Hirbar Allar oada 24—26 ruku

Hozrot Iakub (a:) —Boni Israilor shuru 27—36 ruku

Hozrot Iusuf (a:)—Boni Israil Mishor desho aila 37—50 ruku

Hozrot Adom (a:) (1:1–5:32)

Asman-zomin foeda

¹Foela-u Allae asman ar dunia foeda ḳorla. ²Duniai niraḳar ar ḳali asil, goin fanir ufre fura andair asil. Allar ruh er ufre solasol ḳorta. ³Bade Allae formaila for ouk, ar for oilo. ⁴Allae deḳla for bala. Tain andair taki forre alga ḳoria ⁵er nam raḳla din, ar andairor nam raḳla rait. Hainja gelo, biano gelo, ikṭa oilo foela din.

⁶Bade Allae formaila, fanir maze gumbuzor laḳan faḳ zaga ouk, ar fani dui bag oizauk. ⁷Ar Allae faḳ zaga foeda ḳoria, tolor ar ufror fani alga ḳorla. Ar oula oilo. ⁸Allae gumbuzor laḳan ze zaga banaila, tar nam raḳla asman. Hainja gelo, biano gelo, ikṭa oilo dui nombor din.

⁹Erbade Allae formaila, asmanor tolor fani eḳ zagat dola ouk, ar hukna zaga deḳa zauk. Ar oula oilo. ¹⁰Allae hukna zagar nam raḳla zomin ar zomail fanir nam doria. Tain deḳla ita bala. ¹¹Bade Allae formaila, zomino gash folouk; ar hoḳol zator bisala lota-fata gas-biriḳor zonom ouk. Ar zominor ufre hoḳol zator folor gas-o ouk, era nizor zatmoto fol dorbo ar folor maze zarzir bis-o taḳbo. Ar oula oilo. ¹²Zomino gash folilo, hoḳol zator bisala lota-fata gas-biriḳ zonmilo. Zominor ufre hoḳol zator folor gas oilo zetae zarzir zatmoto fol dore, hi folor maze zarzir bis-o ase. Allae deḳla ita bala. ¹³Hainja gelo, biano gelo, ikṭa oilo tin nombor din.

¹⁴Bade Allae formaila, asmanor maze oula serag oḳol ouk, zara rait taki dinre alga ḳore. Ita alga alga din, ar bosor ar id-utshobor nishana oibo. ¹⁵Asman taki tara duniair ufre for dibo. Oula-u oilo. ¹⁶Allae duiṭa boṛo serag banaila, ermaze boṛoṭare dinor ufre bashshai ḳorar lagi ar huruṭare raitor ufore. Ita saṛa tain tera oḳolo foeda ḳorla. ¹⁷Tain erare asmanor maze boaila zate tara duniait for dey. ¹⁸Era din ar raitor ufre bashshai ḳore, andair taki forre alga ḳore. Allae deḳla ita bala. ¹⁹Hainja gelo, biano gelo, ikṭa oilo sair nombor din.

²⁰Bade Allae formaila, fanir maze zandar oḳol fale fale bori zauk, ar duniair ufre asmanor maze fakin uṛouk. ²¹Ar Allae doriar biraṭ zandar oḳol, ar fanir maze fal bandia gurra hoḳol zator zandar foeda ḳorla, ar hoḳol zator fakio foeda ḳorla. Tain deḳla ita bala. ²²Tain tara hoḳolre ou laḳan boroḳot nazil ḳorla, tumra folala oia baṛo ar doriar fani bori zao, duniair maze faki oḳolo baṛouk. ²³Hainja gelo, biano gelo, ikṭa oilo fas nombor din.

²⁴Erbade Allae formaila, maṭi taki oula zandar ouk zarar nizor zat oḳolre baṛaibo, erar maze fala heman, fuḳ-zuḳ ar zongli zanuar oḳolo. Oula-u oilo. ²⁵Allae duniair maze hoḳol zator zongli zanuar, fala heman ar maṭir maze buke solra zandar banaila. Tain deḳla ita bala.

²⁶Erbade Allae formaila, ao amrar surote amrar loge mil rakia manush banai. Tara doriar mas, asmanor faki, zanuar, maṭir maze buke solra zandar, ar asta duniair ufre bashshai ḳorouk.

²⁷Tain tan nizor surote manush foeda ḳorla, ekkere nizor moto ḳori foeda ḳorla, foeda ḳorla beṭa ar beṭi. ²⁸Ar tarare boroḳot nazil ḳoria ḳoila, tumitain folala oia baṛia duniai bori zao. Duniaire shashon ḳoro, ar doriar mas, asmanor faki, maṭir ufre solra hoḳol zandaror ufre bashshai ḳoro. ²⁹Erbade Allae formaila, Huno, duniar ufror hoḳol zator bisala gas-biriḳ, ar hoḳol zator folor gas zarar nizor zatmoto fol dore zar folor maze tarar nizor bis ase, ita hoḳolta ami tumrar ḳanir lagi dilam. ³⁰Duniar forteḳ zanuar, asmanor fakin, maṭir maze buke solra zandar, ita hokkol zandaror ḳanir lagi ami hoḳol lota-fata ar gash dilam. Oula-u oilo. ³¹Allae tan foeda ḳora hoḳolta deḳla, ita hoḳolta-u kub bala oise. Hainja gelo, biano gelo. Iḳṭa oilo soe nombor din.

¹Ou laḳan asman-zomin ar er mazor hoḳolta foeda ḳora shesh oilo. ²Allae i hoḳol ḳam shesh ḳoria harle shat nombor din aram ḳorla, tain idin ar kunta foeda ḳorla na. ³Ou shat nombor dinre boroḳot nazil ḳoria faḳ din ḳorla, tan hoḳolta foeda ḳora shesh ḳori tain ou din ziraila.

Adom-Haoa foeda

⁴Ou oilo asman ar zomin foedar boean. Mabud Allae zebla asman ar zomin foeda ḳorsila, ⁵i shomoe zominor ufre kunu zator gas-fala asil na ar kunu lota-fatao folise na, ḳaron tain zominor ufre meg disoin na, ar zomin abad ḳorar manusho asil na. ⁶Ou shomoe maṭir mur taki fani uṭto ar zomin bizto. ⁷Bade Mabud Allae feḳ maṭi dia manush banaia tar naḳor maze fu dia zan haraila. Ar ou manush zandar oilo. ⁸Mabud Allae fubedi Adono eḳṭa bagan ḳorsila, hono tanor banail ou manushre raḳla. ⁹Hikanor maṭit tain oulaḳan gas oḳol folaisla, zeta deḳte kub shundor ar folo ḳaite kub moza. Ar baganor mazḳano tain ‘zindegi-gas’ ar ‘neki-bodir aḳol deora gas’ namor duiṭa gaso raḳsila.

¹⁰Hou bagano fani zugaia dito eḳ gang asil, zeḳṭa Adonor mazedi baroia sair bag oigesil. ¹¹Foela gangor nam asil Fishun, ikṭa asta Hobila deshor bitre dia gese. Ino shuna faoa zae, ¹²ar ou deshor shuna kub ḳaṭi, ita saṛao hino meshḳe-ambor ar akik moni faoa zae. ¹³Dui nombor gangor nam Zihun, ikṭa asta Kush deshor bitre dia gese. ¹⁴Tin nombor gangor nam Dozla, ikṭa Ashiria deshor fube dia gese. Ar sair nombor gangor nam oilo Furat.

¹⁵Bade Mabud Allae ou manushre Adon bagano raḳla, hino ḳet-ḳamar ar hefazot korar lagi. ¹⁶Tain Adomre hukum dila, “Tumi tumar kushimoto i bagisar zekunu gasor fol ḳaitae farbae, ¹⁷ḳali neki-bodir aḳolor gasor fol ḳaio na, zedin tumi ou gasor fol ḳaibae idin tumi morbae-u morbae.”

¹⁸Erbade Mabud Allae ḳoila, “Manshor lagi eḳla taḳa bala nae. Ami tar laḳ eḳzon zuṛi banaimu.” ¹⁹Ar Mabud Allae duniair hoḳol zandar ar asmanor hoḳol faki maṭidi banaia ou manshor samne anla, deḳla ein itare kita ḳoia ḍaḳoin, ar tain zare ze name ḍaḳla, tar ou nam oilo. ²⁰Adome hoḳol fala heman, asmanor faki, ar zongli zanuaror nam raḳla, itar maze tan lak kunu zuṛi millo na. ²¹Erbade tain Adomor maze behushi gum anla. Ou gumor maze tan fainjoror eḳṭa aḍḍi kulia nia zagaṭa bond ḳori dila, ²²ar ou aḍḍi dia Mabud Allae eḳ beṭimanush banaia Adomor gese anla. ²³Tane dekia Adome ḳoila, “Oḳon oise, tai amar aḍḍir aḍḍi, gustor gust. Tair nam oibo nari, taire nor taki neoa.” ²⁴Erlagi beṭainte ma-bafore saṛia bour loge taḳba, tara duiozon eḳ shoril oiba. ²⁵Adom ar tan bibir shoril udam taḳto, ita kunu shorom asil na.

Adom-Haoar guna ar bisar

¹Mabud Allar foeda ḳora zominor hoḳol zandaror maze haf oilo hoḳol taki fondibaz. Ou hafe eḳ din hi beṭi manshore ḳoilo, “Allae hasa-u tumatanre ḳoisoin ni, baganor hoḳol gasor fol tumra ḳaitae fartae nae?” ²Beṭie ḳoila, “Baganor zekunu gasor fol amra ḳaitam fari, ³ḳali baganor mazḳano ze gasṭa ase, Allae ḳoisoin, tumra er fol ḳaio na, soio-o na, soile-u morbae.” ⁴Ou hafe tanre ḳoilo, “Na, kunumonte-u mortae nae. ⁵Allae to zanoin, zedin tumra i gasor fol ḳailibae idin tumrar souk kulizibo, ar neki-bodir aḳol faia tumra Allar laḳan oizibae.” ⁶Beṭie zebla buzla, ou gasor fol ḳaite moza oibo, deḳteo shundor, ar aḳoldaro oizimu, ou tain fol faṛia ḳaila, ar tan zamaireo dila ar zamaieo ḳailila. ⁷Loge loge tara duio zonor souk kuligelo, ar buzla tain-tain lemṭa. Ou tara ḍumur gasor ḳoeṭa fata siṛia shilai ḳori lemṭi banaila.

⁸Hainjabala tara Mabud Allar aoaz hunla, tain baganor maze faḳanit aira. Teu Adom ar tan bou Mabud Allar samne na foṛar lagi baganor gasor aoṛe lukaila. ⁹Mabud Allae Adomre ḍaḳ dia zikaila, “Tumi kuai?” ¹⁰Tain ḳoila, “Baganor maze ami tumar aoaz hunchi. Ami to lemṭa, erlagi ḍoraia lukai roisi.” ¹¹Teu Mabud Allae zikaila, “Tumi ze lemṭa ḳe ḳoilo? Ze gasor fol ḳaite tumare na ḳorsilam, ḳailiso na kita?” ¹²Adome ḳoila, “Ze beṭimanush tumi amar loge diso, tai ou gasor fol amare ḳaoaise.” ¹³Ou Mabud Allae beṭire zikaila, “Tumi ita kita ḳorlae?” Tain ḳoila, “Hafe amare salla dia ḳaoaise.” ¹⁴Teu Mabud Allae hafre ḳoila, “Tumar i ḳamor lagi hoḳol fala heman ar hoḳol zongli zanuaror maze tumi-u lannoti oilae. Tumi zindegibor feṭo bordi solbae ar dula-balu ḳaibae. ¹⁵Ami tumar ar beṭir maze, tumar bongsho ar beṭi manshor bongshor maze dushmoni foeda ḳormu. Hi bongshe tumar ḳolla guṛa ḳorbo, ar tumi tar faor murat kamṛaibae.” ¹⁶Ar tain beṭire ḳoila, “Tumar hurutta oibar shomoe tumar mosibot kub baṛai dimu, tumi kub ḳosṭo ḳoria hurutta foeda ḳorbae. Zamair bae tumar kub ḳaish taḳbo, ar he tumar ufre beṭagiri ḳorbo.” ¹⁷Tain Adomre ḳoila, “Ze gasor fol ami haram ḳoria dislam, tumi tumar bour ḳota hunia ita ḳaiso, ou ḳarone zominre lannoti ḳora oilo. Zindegibor zobor toklif ḳoria tumi zominor foshol ḳaibae. ¹⁸Tumar lagi maṭir maze ḳaṭa-gosa ar bishala zongol zonmaibo, ar tumar ḳani oibo ou maṭir foe-foshol. ¹⁹Ze maṭi taki tumare foeda ḳorslam, hou maṭit firia na zaoa forzonto tumar matar gam faot falaia ḳani ḳaibae. Tumar maṭir shoril, maṭit-u mishizibo.”

²⁰Adome tan bibir nam raḳla Haoa [mani, zindegi-deora], ḳaron tain hoḳol zinda manshor ma oiba. ²¹Adom ar tan bibir lagi Mabud Allae zanuaror samṛadi lebas banaia findaila.

²²Erbade Mabud Allae ḳoila, “Deḳo, neki-bodir aḳol faia manush amrar laḳan oigese, oḳon he zate at baṛaia zindegi-gasor fol ḳaia hamesha zinda na roe.” ²³Ou ḳota ḳoia Mabud Allae ze maṭi dia manshore foeda ḳorsla, hou maṭit ḳet-ḳamar ḳorar lagi tare Adon bagan taki ḳedai dila. ²⁴Ḳedai dia tain zindegi-gasor gese zaoar fot fara deoar lagi Adon baganor fubedi Ḳarubi firista oḳol raḳla ar aguinor toluaro guranit raḳla.

Habil-Kabil

¹Adome tan bibi Haoar loge milar bade tan feṭo hurutta ailo, ar Kabil4:1 mani, kobul name tan eḳ fuar zonom oilo. Teu Bibi Haoae ḳoila, “Mabudor ges tone ami eḳ manush kobul ḳorsi.” ²Hirbar tan goro Kabilor bai Habilor4:2 Habil mani beḳamaea zonom oilo. Habile sagol-meṛa raḳto, ar Kabile ḳet korto. ³Bade eḳ din Kabile Mabudor gese tar ḳetor foe-foshol ania lilla dilo ⁴ar Habileo tar falor maze foela zonmise oula ḳoeṭa sagol-meṛa zobo ḳoria sorbiala ongsho lilla dilo. Mabude Habil ar tar lilla kobul ḳorla, ⁵Kabil ar tar lilla kobul ḳorla na, gotiḳe he kub gusa ḳoria muk kala ḳorlo. ⁶Mabude Kabilre ḳoila, “Tumi gusa ḳorrae ḳene, ar kitar lagi tumi muk kala ḳorso? ⁷Tumi bala ḳam ḳorle tumar muk for oilo one? Ar na ḳorle to gunae tumare dorar lagi tumar duaro ubai roise. Igur ufre tumi zitte oibo.”

⁸Bade Kabile tar bai Habilre ḍakia ḳoilo, “Ao, amra bondo zai.” Ar bondo gia tar bai Habilor ufre aḳta hamla ḳoria kun ḳorlo. ⁹Heshe Mabude Kabilre zikaila, “Tumar bai kuai?” Kabile ḳoilo, “Ami zani na, amar baire ami deḳa-huna ḳori ni?” ¹⁰Teu Mabude ḳoila, “Tumi ita kita ḳorlae? Deḳo, zomin taki tumar bair loue amar gese foriad ḳorer. ¹¹Zomine zebla tumar ḳarone tumar bair lou ḳailo, ou shomoe tumi lannoti oia zomin taki ḳedailo oilae. ¹²Tumi zebla zomino ḳet korbae, zomine ar tumare foshol dito nae. Tumi boitol oia duniai zuṛi gurbae.” ¹³Teu Kabile Mabudre ḳoilo, “I shasti amar angaz oito nae. ¹⁴Aiz tumi amare zomin taki ḳedai dirae, ami tumar samne tone hori zaimugi. Ar boitol oia zebla ami duniait gurmu, ou shomoe zar samne-u ami foṛmu, he-u amare kun ḳorbo.” ¹⁵Mabude tare ḳoila, “Te tumare ze kun ḳorbo, tar ufre ami shatgun bodla loimu.” Ou ḳota ḳoia Mabude Kabilre eḳṭa sinnot dila, zate ḳeu tare ato faiao na mare. ¹⁶Erbade Kabil Mabudor samon taki horia Adonor fubedi Nud [mani, gura-fira] desho gelogi.

Ḳarigori ḳam ar dormo-ḳormo shuru

¹⁷Ar Kabil tar bour loge milae tair feṭo hurutta ailo, ar Honukor zonom oilo. Kabile eḳṭa ṭaun banaia tar fuar name ṭaunor nam raḳlo Honuk. ¹⁸Honukor fua Irod, Irodor fua Mohuaiel, Mohuaielor fua Motushaiel, Motushaielor fua Lemoḳ. ¹⁹Lemoḳe dui bia ḳorsla, eḳ bour nam Ada, aroḳ bour nam Shilla. ²⁰Adar goro Zabolor zonom oilo, zara tambut taḳe ar foshu fale, ou Zabol tarar mul baf. ²¹Zabolor bair nam Zubol. Zara bashi ar bin bazae, ou Zubol tarar mul baf. ²²Shillar feṭo Tubol-Kabilor zonom oilo. Fitol ar luar atiar banani asil tar ḳam. Tar boinor nam Naiema.

²³Eḳdin Lemoḳe tar dui boure ḳoilo,

“O Ada ar Shilla, amar ḳota hun,

Lemoḳor bibin, amar ḳotae deo ḳan.

Ze beṭae amare ḳorilo zoḳom,

ze beṭae amar gat tullo at,

here ami ḳorilam nifat.

²⁴Kabilor kunor bodla zudi shatgun oe,

Lemoḳor bodla shatottoir gun nichoe.”

²⁵Ermaze Adome hirbar tan bour loge milae, tan feṭo aroḳ fua oilo, Haoae tar nam raḳla Shish4:25 mani, zugai deoa. Tain ḳoila, “Kabile Habilre kun ḳorse ḳori Allae Habilor bodla amare eḳ serag zugai disoin.” ²⁶Bade Shishoro eḳ fua oilo, he tar nam raḳlo Anush, ou shomoe tone manshe Mabudor nam loa shuru ḳorla.

Hozrot Adom (a:)-or ḳandan-nama

¹Ita oilo Adomor ḳandanor ḳolombondi boean. Manush foeda ḳorar shomoe Allae tan nizor surote foeda ḳorla. ²Foeda ḳorla beṭa ar beṭi, ar tarare Mabude boroḳot dila, foeda ḳoria nam raḳla Adom.

³Adomor eḳ-sho tish boros boeosho tan loge mil rakia tan surote eḳ fua oilo. Tain er nam raḳla Shish. ⁴Shishor zonmor bade Adom aro aṭ sho boros basla, ermaze tan aro fua-fuṛin oisil. ⁵Muṭ noe-sho tish boros zinda taḳar bade Adom mara gela.

⁶Shishor eḳ-sho fas boros boeosho tan fua Anushor zonom oilo. ⁷Anushor zonmor bade Shish aro aṭ-sho shat boros basla. Er maze tan aro fua-fuṛi oisil. ⁸Muṭ noe-sho baro boros basar bade Shish mara gela.

⁹Anushor nobboi boros boeosho tan fua Kinanor zonom oilo. ¹⁰Kinanor zonmor bade Anush aro aṭ-sho fonro boros basla. Er maze tan aro fua-fuṛi oisil. ¹¹Muṭ noe-sho fas boros basar bade Anush mara gela.

¹²Kinanor shottoir boros boeosho tan fua Maholailor zonom oilo. ¹³Maholailor zonmor bade Kinan aro aṭ-sho sallish boros basla. Er maze tan aro fua-fuṛi oisil. ¹⁴Muṭ noe-sho dosh boros basar bade Kinan mara gela.

¹⁵Maholailor foeshoṭṭi boros boeosho tan fua Iaredor zonom oilo. ¹⁶Iaredor zonmor bade Maholail aro aṭ-sho tish boros basla. Er maze tan aro fua-fuṛi oisil. ¹⁷Muṭ aṭ-sho fosanobboi boros basar bade Maholail mara gela.

¹⁸Iaredor eḳ-sho bashoṭṭi boros boeosho tan fua Idrisor zonom oilo. ¹⁹Idrisor zonmor bade Iared aro aṭ-sho boros basla, ermaze tan aro fua-fuṛi oisil. ²⁰Muṭ noe-sho bashoṭṭi boros basar bade Iared mara gela.

²¹Idrisor foeshoṭṭi boros boeosho tan fua Matushalaḳor zonom oilo. ²²Matushalaḳor zonmor bade tin-sho boros forzonto, Allar loge Idrisor ḳas didar asil. Er maze tan aro fua-fuṛi oisil. ²³Idris muṭ tin-sho foeshoṭṭi boros duniait asla. ²⁴Erbade tane ar deḳa gelo na. Allar loge tan ḳas didar asil gotiḳe Allae tanre zinda halote nizor gese nilagi.

²⁵Matushalaḳor eḳ-sho shatashi boros boeosho tan fua Lamaḳor zonom oilo. ²⁶Lamaḳor zonmor bade Matushalaḳ aro shat-sho birashi boros basla. Er maze tan aro fua-fuṛi oisil. ²⁷Muṭ noe-sho unushottoir boros basar bade Matushalaḳ mara gela.

²⁸Lamaḳor eḳ-sho birashi boros boeosho tan eḳ fua oilo. ²⁹Tain er nam raḳla Nuh5:29 mani, aram ar ḳoila, “He amrar ator i lezaroti ḳam taki, Mabudor lannoti zomin taki oḳon aram dibo.” ³⁰Nuhor zonmor bade Lamaḳ aro fas-sho fosanobboi boros basla, ermaze tan aro fua-fuṛi oisil. ³¹Muṭ shat-sho shatottoir boros basar bade Lamaḳ mara gela.

³²Nuhor fas-sho boros boeoshor bade tan fuain Sham, Ham ar Iafetor zonom oilo.

Hozrot Nuh (a:) (6:1–10:32)

Duniait naformani baṛse

¹Duniar ufre zebla manush baṛa arombo oilo, ar bout fuṛintoro zonom oilo. ²Teu Allar ḳadim oḳole ou fuṛintore kubsurot dekia, ze zare kushi tare bia ḳorat lagla. ³Ita dekia Mabude ḳoila, “Amar ruh hamesha manshor loge taḳto nae. Manush to ḳali lou ar gust, oḳon taki ami tarare eḳ-sho bish boros haeat diar.” ⁴Ou fuṛintor loge Allar ḳadim oḳolor mila-mishar ḳarone ze aolador zonom oilo, tara asla furana zomanar foeluan oḳol, hi shomoe ba tar bade-o duniait Samud zator manush asil.

⁵Mabude deḳla, duniait manshor naformani kub baṛi gese, ar tarar dilor ḳaish, kial-kushi ḳali ḳarafir bae. ⁶Ita dekia Mabude kub toklif faila, tain duniait manush foeda ḳorsila ḳori kub bezar oila. ⁷Ar ḳoila, “Amar foeda ḳora manshore, ar tarar loge hoḳol zator zanuar, fuḳ-zuḳ ar asmanor fakio ḳotom ḳori dimu. Itare foeda ḳoria amar dilo duk lager.” ⁸Oile Nuhor ufre Mabud kushi asla.

Hozrot Nuh (a:)-or zaz

⁹Ita oilo Nuhor zindegir boean. Nuh eḳzon kamil manush, tan amolor manshor maze tain-u asla pak-forezgar. Allar loge tanor ḳas didar asil. ¹⁰Sham, Ham ar Iafet namor tan tin fua asil.

¹¹I shomoe Allar sokut hara duniai gunae fosigese ar zur-zulume borigese. ¹²Allae duniar bae saia deḳla, ita gunae fosigese. Ḳaron duniar manshor ḳaisolot be-fote gesegi. ¹³Ita dekia Allae Nuhre ḳoila, “Tamam manush zatre ami ḳotom ḳorilaitam ṭik korsi. Manshor lagi duniai zur-zulume borigese. Manshor loge loge duniar hoḳolta ami shesh ḳorilitam. ¹⁴Tumi goforor tokta dia tumar lagi ekkan zaz banao. Er bitre alga alga kuṭa taḳbo. Ar zazor bare-bitre alkatra lagaio. ¹⁵Zazḳan lambae tin-sho at, fashe fonchash at ar ḳaṛa-ubi tish at banaio. ¹⁶Ar salo taki eḳ at tole sairobae kiṛki raḳbae, ar duar dibae zazor ek kandat. Zazḳan titala banaio. ¹⁷Dekio, ami duniait ola boinna dimu, asmanor tole zoto zandare dom falae hoḳolta-u binash oizibo. Duniair hoḳol zandar-u morizibo. ¹⁸Ḳali tumar loge amar oada zari raḳmu. Tumi gia zazo uṭbae, ar tumar loge tumar fuain, tumar bibi ar tumar fuaintor bou-o. ¹⁹Ar zan basanir lagi tumi hoḳol zator zandaror beṭa-beṭir zuṛa milaia tumar loge zazo tulbae. ²⁰Forteḳ zator faki, heman-zanuar ar maṭir maze buke solra zandarre basanir lagi zuṛa zuṛa ḳori tumar gese anbae. ²¹Ar tumi hoḳol zator lagi ḳanir zinish zugaṛ ḳori raḳbae. Ita tumar ar tarar ḳani oibo.” ²²Nuhe Allar hukum mafik hoḳolta-u ḳorla.

Duniait gozobi ban

¹Ar Mabude Nuhre ḳoila, “Tumi ar tumar foribaror hoḳol aia zazo uṭbae. Ami dekiar i zomanar manshor maze tumi-u ḳali dindar. ²Tumi halal zanuar oḳol taki nor-medi milaia shat zuṛa ḳori ar haram zanuar taki eḳ zuṛa ḳori tumar loge loio. ³Asmano uṛra fakir maz taki nor-medi milaia shat zuṛa ḳori loio. Duniar maze erar bongsho basanir lagi ikan ḳorio. ⁴Ami shat din bade duniair ufre sallish din sallish rait eḳlagare meg dimu, ar hoḳol zandarre dunia taki ḳotom ḳormu.” ⁵Mabudor hukum mafik Nuhe hoḳol ḳam ḳorla.

⁶Boinna shurur shomoe Nuhor boeosh asil soe-sho boros. ⁷Boinna taki basar lagi Nuh, tan bibi, tan fuain ar fuaintor boure loia zazo gia uṭla. ^8-9Allar hukum mafik halal-haram zanuar, faki, buke solra zandaror nor-medi milia zuṛa zuṛa oia Nuhor gese aia zazo hamaila. ¹⁰Ou shat din bade duniait boinna oilo.

¹¹Nuhor soe-sho bosoror shomoe dusra mashor shotoro tariḳ fatalor hoḳol fani baroito laglo, ar asman zenu faṭigelo. ¹²Sallish din sallish rait duniair ufre meg oilo. ¹³Zedin meg shuru oilo, idin Nuh, tan bibi, tan fuain Sham, Ham, Iafet ar tarar bou oḳolo zazo aia uṭla. ¹⁴Tarar loge zuṛa zuṛa ḳori hoḳol zator zongli zanuar, fala heman, maṭir maze buke solra zandar, faki ar ḍaḳna-ala hoḳoltao uṭla. ¹⁵Dom falaia base ila hoḳol zator zandar Nuhor gese aia zazo uṭsil. ¹⁶Allar hukum mafik-u nor-medir zuṛa milia tara uṭsil. Erbade Mabude zazor duar bond ḳori dila.

¹⁷Sallish din dori duniait fani baṛte-u taḳlo. Fani baṛi zaoae zazḳan maṭi taki ufre baia uṭlo. ¹⁸Bade fani kub baṛlo ar zazḳan fanir ufre solasol ḳorlo. ¹⁹Ar fani baṛte-u taḳlo. Ete zeno zoto boṛo boṛo faṛ asil, hokkolta buṛi gelo. ²⁰Hoḳol faṛ-forbot buṛia fani aro fonro at ufre uṭlo. ²¹Ar duniait solra hoḳol zandar, mani faki, fala heman, zongli zanuar ar fal bandia gurra hoḳolta, manshor loge binash oigelo. ²²Maṭir ufre zoto roḳomor zoto zandar dom falaia base ita hoḳolta-u morigelo. ²³Allae ou nomunae zominor hoḳol zandar duniair ufor taki fusilaila. Ete manush, zanuar, buke solra zandar ar asmanor faki duniai taki saf oigelo. Ḳali Nuh ar tan loge zara asil, tara-u basia roila. ²⁴Dunia deṛ-sho din fanit buṛail roilo.

Banor fani taki rehai

¹Zazo Nuh ar tan loge zoto zandar ar fala heman asil, Allae tarar ḳota-o faurila na. Tain duniait batash salaile fani ḳoma shuru oilo. ²Maṭir tol taki fani baroni ar asman tone meg foṛar faṭa bond oigelo, ar mego dom loilo. ³Maṭir uforor fani hori gelo, ar deṛ-sho din bade deḳa gelo fani bout komse. ⁴Shat nombor mashor shotoro tariḳ zazḳan Ararator faṛi elaḳat gia aṭkilo. ⁵Erbadeo fani ḳomat taḳlo, ar dosh nombor mashor foela din faṛ oḳolor mata deḳa gelo.

⁶Er sallish din bade Nuhe zazor kiṛki kulla. ⁷Ar kiṛkibae ek kaua saṛla. Maṭi taki fani na hukani forzonto ḳauaṭa aoa-zaoat roilo. ⁸Maṭir ufor tone fani ḳomse ki na deḳar lagi Nuhe bade eḳṭa faro saṛla. ⁹I shomoyo asta duniait fani asil ḳori fao toibar zaga na faia faroṭa hirbar firia ailo. Tain at baṛaia tare bitre anla. ¹⁰Heshe tain aro shat din bar saia hirbar tare saṛla. ¹¹Hainjabala he tan gese firia ailo, ar tar ṭuṭo asil zoetun gasor hazma fata, tain buzla maṭir ufor taki fani ḳomi gese. ¹²Aro shat din bade tain hirbar faroṭa saṛla, ikṭa ar firia ailo na.

¹³Nuhor boeosh soe-sho eḳ bosoror shomoe foela mashor foela din maṭir ufor taki fani horigelo, ar Nuhe zazor sal kulia saia deḳla, maṭi hukani dorse. ¹⁴Dusra mashor shataish dinor din maṭi ekoibare hukai gelo. ¹⁵Allae tanre ḳoila, ¹⁶“Tumi tumar bibi, tumar fuain ar tumar fuaintor boure loia zaz taki baroia ao. ¹⁷Ar tumar loge zoto zator zandar ase—faki, zanuar ar maṭir maze buke solra zandar—tarare-o bar ḳori loia ao, zenu hara duniai zuṛi tara sitria gia folala oia baṛe.” ¹⁸Teu Nuhe tan bibi, tan fuain ar tarar boure loia zaz taki baroila. ¹⁹Tarar loge duniair hoḳol zanuar, fuḳ-zuḳ ar faki, ek kotae duniait solra hoḳol zandar, zarzir zatmoto baroilo.

²⁰Bade Nuhe Mabudor name ekkan kurbani ḳana banaila, ar forteḳ zator halal foshu-faki taki eḳ eḳṭa loia zobo ḳoria, zalaia kurbani dila. ²¹Mabud i kurbanir dumar kushbue kushi oila, ar tain ḳoila, “Manshor lagi ami ar kunu shomoyo maṭire lannot ditam nae, zudio hurubala takiu manshor monor kial ḳarafir bae taḳe. Ifira zela hoḳol zandarre marsi, ilaḳan ar kunu din-u martam nae. ²²Zotodin i duniai taḳbo, otodin niommoto bis falani ar foshol ḳaṭa, ṭanda ar gorom, barisha ar eot, din ar rait solte-u taḳbo.”

Hozrot Nuh (a:)-or loge oada

¹Allae Nuh ar tan fuaintore boroḳot dia ḳoila, “Tumitain folala oia baṛia duniai bori zao. ²Duniair zanuar, asmanor faki, maṭir maze buke solra zandar ar doriar mas, hoḳole-u tumrare ḍor-boe ḳori solbo. Itare tumrar ato deoa oilo. ³Zela tumrare ḳetor fol-foshol ar tori-torḳari dislam, oula oḳon zita zandar hoḳolreo tumrar ḳanir lagi dilam. ⁴Ḳali lou-shoho gust tumra ḳaio na, lou oilogi zan. ⁵Ḳeu zudi manshore kun ḳore te ami oboshsho-u tar kunor bodla loimu. He zanuar ouk ba manush ouk, manshor zan ze ney, tar zano deon lagbo. ⁶Manshor lou ze bar ḳore, mansheo tar lou bar ḳorbo, ḳaron Allae manshore nizor surote banaisoin. ⁷Tumitain beshḳori folala oia baṛo ar duniait sitria zao.”

⁸Bade Allae Nuh ar tan fuaintore ḳoila, ⁹“Huno, ami zoban diar, tumra ar tumrar bador hoḳol manshore, ¹⁰ar faki, fala heman ar duniair zoto zanuar tumrar loge zaz taki baroise, tarare-o. ¹¹Zobanṭa oilo, banor fani dia ar kunu shomoe-u hokkol zandarre mara oito nae, ar tamam duniai saf ḳorar lagi ila kunu bano oito nae.” ¹²Allae aro ḳoila, “Ze zoban ami tumrare ar tumrar logor zandar oḳolre dilam, ikṭa kiamot forzonto boail roibo. ¹³Ar megor ḳalnir maze amar rongdenu dilam, ikṭa oilo duniait amar zobanor nishana. ¹⁴Zebla ami duniair ufre ḳalni dimu, i shomoe ou rongdenu deḳbae. ¹⁵Ar ou shomoe-u ami tumrar ar hoḳol zandaror loge amar zobanor ḳota iad ḳormu. Ar kunu shomoe-u boinna oia hoḳol zandarre fani dia doia nito nae. ¹⁶Ḳalnir maze zebla hi rongdenu deḳa zaibo ou shomoe ami duniair hoḳol zandaror loge amar i hameshakur zobanor ḳota iad ḳormu.” ¹⁷Heshe Allae Nuhre ḳoila, “Duniair hoḳol zandaror loge ami ze zoban disi, ikṭa oilo tar nishana.”

Hozrot Nuh (a:) ar tan fuain

¹⁸Zaz tone Nuhor ze fuain baroisla, tarar nam oilo Sham, Ham ar Iafet. Ou Ham oilo Kenanor baf. ¹⁹Nuhor ou tino fuar ḳandan hara duniait sitri gela.

²⁰Nuhe ḳet-ḳamar shuru ḳoria eḳ angur-ḳet korla. ²¹Ar anguror shorab ḳaia ṭal oia tambur bitre udam oia foṛi roila. ²²Kenanor baf Hame aia tar bafor ou hal dekia bare gia tar duio bair gese ḳoilo. ²³Oile Sham ar Iafete ḳando ḳori ekkan ḳafoṛ loia fise aṭia bafore ou ḳafoṛdi guria dila, tarar souk ulṭa bae taḳae bafore be-abru halote deḳla na. ²⁴Nisha ḳomi zaoar bade Nuhe tan fuar ḳanḍo hunia ²⁵ḳoila, “Kenanor ufre lannot foṛouk, he tar baiaintor gese gulamor gulam oibo.” ²⁶Tain aro ḳoila, “Hoḳol tarif Shamor Mabud Allar, Kenan Shamor gulam ouk. ²⁷Allae Iafetre boutta deukka, he Shamor tambut taḳouk, ar Kenan tar gulam ouk.”

²⁸Banor bade Nuh aro shaṛe tin-sho boros basla. ²⁹Muṭ shaṛe noe-sho boros boeosho tain mara gela.

Hozrot Nuh (a:)-or ḳandan-nama

¹Nuhor fuain Sham, Ham, ar Iafetor ḳandanor boean. Banor bade tarar fua-fuṛi oisla.

²Iafetor fuaintor nam: Gumor, Mazuz, Madoe, Iaban, Tubol, Meshok ar Tirosh. ³Gumoror fuain: Oskinosh, Rifot ar Tugormo. ⁴Iabanor fuain oila: Ilishah, Torshish, Kittim ar Dudanim. ⁵Erar bongshor manshe nanan zator mat-ḳota, foribar ar zat hishabe doriar faror nanan desho sitri gela.

⁶Hamor fuaintor nam: Kush, Mishor, Fuṭ ar Kenan. ⁷Kushor fuain: Shoba, Hobila, Shofta, Roema ar Shoftoḳa. Roemar fuain oila: Shaba ar Dodan. ⁸Kushor eḳ fuar nam asil Nomrud. Ou Nomrud duniait foeluan oia uṭsil. ⁹Mabudor gese he asil foeluan shiḳari. Erlagi ḳotae ḳoe, manushṭa zen Mabudor samne Nomrudor laḳan foeluan shiḳari. ¹⁰Shinar deshor Babil, Eroḳ, Okkod ar Ḳolni namor ṭaun oḳol loia he bashshai shuru ḳorlo. ¹¹On taki tar rajjo baṛia Ashiria desh forzonto gelo. Hoḳanor Ninob, Rohobotfur, Ḳeloh ¹²ar Reshon namor ṭaun oḳolo tar banailo. Reshon asil Ninob ar Ḳelohor mazḳano, i tinṭae milia eḳ biraṭ shohor oilo. ¹³Mishoror bongsho oila ou zat oḳol: Ludi, Onami, Lohabi, Noftuhi, ¹⁴Fotrushi, Ḳoshluhi, ar Ḳofturi, ou Ḳoftur dip taki Filistini oḳol baroia aila.

¹⁵Kenanor boṛo fua Sidon, bador fua Hiṭ, Hiṭṭi zatir mul baf. ¹⁶Kenan asla Zibuzi, Amuri, Girgashi, ¹⁷Hibbi, Arki, Shini, ¹⁸Arbadi, Zomari ar Hamati, ou zati oḳolor mul baf. Heshe ou Kenani oḳol sairobae sitri gesla. ¹⁹Sidon ṭaun taki Geraror muka Gaza forzonto, ar Gaza taki Sadum, Amura, Odma ar Sobuim zaoar fote Lasha forzonto Kenani oḳolor razotto asil. ²⁰Foribar, mat-ḳota, desh ar zat hishabe era asil Hamor ḳandan.

²¹Iafetor boṛo bai Shamoro fua-fuṛi oisla. Sham oila Aber ar tar ḳandanor baf. ²²Shamor fuaintor nam: Ilam, Ashur, Arfaksad, Lud ar Iram. ²³Iramor fuain: Uz, Hul, Getor ar Mosh. ²⁴Arfaksador fua Shaleḳ, ar Shaleḳor fuar nam Aber. ²⁵Aberor dui fua oisla, eḳzonor nam Falez [mani, alga], tan shomoe dunia alog oisil ḳori tan ou nam oilo. Falezor bair nam Iaḳtan. ²⁶Iaḳtanor fuain oila: Olmudod, Shelof, Hazramaot, Zeroh, ²⁷Hoduram, Uzal, Dikla, ²⁸Obol, Obimaiel, Shaba, ²⁹Ofir, Hobila ar Zubob. Era hoḳol oila Iaḳtanor fuain. ³⁰Mesha taki fubedi Sefaro zaoar foto ze faṛi zaga ase, ono tara taḳta. ³¹Foribar, mat-ḳota, desh, ar zat hishabe era oila Shamor ḳandan.

³²Zat ar bongsho hishabe era oilo Nuhor fuaintor foribar. Banor bade erar bongsho oḳole nanan zat oia asta duniait sitri gesla.

Hozrot Ibrahim (a:) (11:1–23:20)

Babil minar

¹Hi zomanat asta duniait kali eḳ bashae matta, ar tarar buli oḳolo eḳlaḳan-u asil. ²Tara fubedi aguaia zaite zaite Shinar deshor eḳ tʼol zaga faia hoḳano-u boshot korla. ³Tara eḳe-oinnore ḳoilo, “Ao, amra iṭ banaia aguindi zalai.” Ḳoia-u tara fattoror bodla iṭ ar sun-shurkir bodla tartel lagailo. ⁴Tara aro ḳoilo, “Ao, amrar nizor lagi eḳṭa shohor banai, ar oula eḳṭa goro banai, zeḳṭar minar gia asman lagal faibo. Teu amrar namo oibo ar amra duniait sitritamo nae.” ⁵Manshe ze usa gor ar shohor banaira ikṭa deḳat Mabud lami aila. ⁶Ar ḳoila, “Era eḳ zator manush, erar mat-ḳotao eḳ; erlagi tara ou ḳamor maze at dise. Nizor motlob hasilor lagi era ar kunu bada-u manto nae. ⁷Te ao, amra lamia gia tarar bulir maze gulmal lagai dei, zate tara eḳzone aroḳzonor mat buzto na fare.” ⁸Erbade Mabude hou zaga taki tarare asta duniait sitrai dila. Ar tarar hou shohor bananir ḳamo bond oigelo. ⁹Ou ḳarone hou zagar nam oilo Babil [mani, gulmal], hoḳano-u Mabude hara duniair bulir maze gulmal lagai disla. Hoḳan takiu tain tarare asta duniait sitrailila.

Hozrot Ibrahim (a:)-or baf-dadain

¹⁰Ou oilo Shamor ḳandanor boean. Banor dui boros bade Shamor boeosh zebla eḳ-sho boros, ou shomoe tan fua Arfaksador zonom oilo. ¹¹Arfaksador zonmor bade Sham aro fas-sho boros basia asla. Er maze tan aro fua-fuṛi oisla.

¹²Arfaksador faetish bosoror shomoe tan fua Shaleḳor zonom oilo. ¹³Shaleḳor zonmor bade tain aro sair-sho tin boros basia asla. Er maze tan aro fua-fuṛi oisla.

¹⁴Shaleḳor tish boros boeoshor shomoe tan fua Aberor zonom oilo. ¹⁵Aberor zonmor bade Shaleḳ aro sair-sho tin boros basia asla. Er maze tan aro fua-fuṛi oisla.

¹⁶Aberor soutish bosoror shomoe tan fua Falezor zonom oilo. ¹⁷Falezor zonmor bade Aber aro sair-sho tish boros basia asla. Er maze tan aro fua-fuṛi oisla.

¹⁸Falezor tish boros boeoshor shomoe tan fua Raur zonom oilo. ¹⁹Raur zonmor bade Falez aro dui-sho noe boros basia asla. Er maze tan aro fua-fuṛi oisla.

²⁰Raur bottish bosoror shomoe tan fua Sharuzor zonom oilo. ²¹Sharuzor zonmor bade Rau aro dui-sho shat boros basia asla. Er maze tan aro fua-fuṛi oisla.

²²Sharuzor tish bosoror shomoe tan fua Nahuror zonom oilo. ²³Nahuror zonmor bade Sharuz aro dui-sho boros basia asla. Er maze tan aro fua-fuṛi oisla.

²⁴Nahuror untish bosoror shomoe tan fua Tareḳor zonom oilo. ²⁵Tareḳor zonmor bade Nahur aro eḳ-sho unnish boros basia asla. Er maze tan aro fua-fuṛi oisla.

²⁶Tareḳor shottoir bosoror shomoe tan fuain Abram (tan bador nam Ibrahim), Nahur ar Haronor zonom oisil.

²⁷Ou oilo Tareḳor ḳandanor boean. Tareḳor fuar nam asil Abram, Nahur ar Haron. Ar Haronor fuar nam Lut. ²⁸Haron tan baba zinda taḳte-u, tan zonom-maṭi Babil deshor Ur ṭauno mara gesla. ²⁹Abram ar Nahur duizone bia ḳorsla. Abramor bour nam asil Sara. Ar Nahuror bour nam Milka. Milka ar Iska asla Haronor fuṛin. ³⁰Oile Sarar kunu fua-fuṛi asil na, tain niaoladi asla.

³¹Tareḳe Abram, Lut ar Sarare loia Kenan desho zaoar lagi Babil deshor Ur ṭaunor taki roana oila. Abram oila Tareḳor fua, Haronor fua Lut oila Tareḳor nati, ar Sara oila Tareḳor fua Abramor bou. Foela tara Haran name eḳ ṭauno gela ar hoḳano boshot korla. ³²Tareḳ dui-sho fas boros boeosho Haran ṭauno mara gela.

Hozrot Abram [Ibrahim] (a:)-or soforor hukum

¹Bade Mabude Abramre formaila, “Tumi tumar nizor desh, ḳesh-kuṭum, ar babaiti biṭa-maṭi saṛia ami ze desh deḳaimu hou desho zao. ²Tumar maz taki ami bout boṛo eḳ zati foeda ḳormu. Tumare rohom-boroḳot dimu. Ami tumare boṛo izzoti banaimu, ar tumar usillae asta duniar manshe rohom-boroḳot faiba. ³Ar huno, tumare zara dua diba, ami tarare rohom-boroḳot dimu, oile zara tumare boddua diba, tarare ami lannot dimu. Duniair hoḳol zatie tumar usillae rohom-boroḳot faiba.”

⁴Mabudor hukum moto-u Abram baroigela, tan batiza Luto tan loge gela. Haran ṭaun falaia zaoar shomoe Abramor boeosh asil fosottir boros. ⁵Tan bibi Sara ar batiza Lutre loia tain baroila. Hoḳol mal-samana loia ar ze gulam oḳolre tain-tain Haran elaḳat faisla tarare loia Kenan desho zaoar lagi roana dila. Heshe hono gia fousla. ⁶Kenanor mazedi zaite zaite Abram Shikimo aia Murir elon gasor gese ziraila. I shomoe Kenani oḳol hou desho boshot korta. ⁷Mabude Abramre dorshon dia ḳoila, i deshḳan ami tumar oarishre dilaimu. Abramre zein deḳa dila, hou Mabudor name tain hono ek kurbani ḳana banaila. ⁸Hon taki tain Betel ṭaunor fubedi faṛi elaḳat aguai gela, gia foisme Betel fube oe ṭaunor mazḳano tain tambu gaṛila. Mabudor name tain ino ek kurbani ḳana banaila ar Mabudor nam loila. ⁹Bade tain hin taki horte horte Negeb namor douḳnor morubumir baedi gela.

Hozrot Ibrahim (a:) Mishor desho gela

¹⁰I shomoe Kenan desho nidan deḳa dilo. I nidan kub betaea oae, Abrame musafir hazia Mishor desho gelagi. ¹¹Mishoror ḳandat aia Abrame tan bibi Sarare ḳoila, “Huno, ami zani tumi kub shundori. ¹²Tumi zebla Mishori oḳolor souko foṛbae, teu tara buzbo tumi amar bou, ar tumare rakia amare kun ḳorilibo. ¹³Erlagi ḳoio, tumi amar boin. Ete tumar lagi amar bala oibo, ar amare basaia raḳbo.” ¹⁴Abram Mishoro aia harle Mishoror manshe deḳla Sara kub shundori. ¹⁵Mishoror badsha Feraunor guia oḳole tane dekia Feraunor gesegia tan tarif ḳoria boutta ḳoila. Ar Sarare razbaṛir bitre neoa oilo. ¹⁶Sarar lagi Feraune Abramre maea ḳorta lagla. Tain Abramre bout goru-sagol, gada-gadi, uṭ, ar bandi-gulam upohar dila.

¹⁷Oile Bibi Sarar lagi Mabude Feraun ar tar baṛir hoḳol manshor maze besheba bemar foeda ḳorla. ¹⁸Teu Feraune Abramre nia zikaila, “Afne amar loge ita kita ḳorla? Tanre ḳene afnar bou na ḳoia ¹⁹boin ḳoila? Ar ami to tanre bia ḳorar lagi neoaislam. Ein to afnar bibi, ene loia afne in taki hori zaukkagi.” ²⁰Ou ḳota ḳoia Feraune tan manshore hukum ḳorla, ar tara Abramor hoḳol mal-samana shoho tane ar tan bibire bidae ḳori dila.

Hozrot Ibrahim ar Hozrot Lut (a:)

¹Teu Abram ar tan bibie hoḳolta loia Mishor desh falaia Negeb morubumit gelagi, Luto tan loge asla.

²Abram kub doni asla, tan bout heman-zanuar ar shuna-rufa asil. ³Bade tain Negeb taki horte horte Betel forzonto gela. Gia tain Betel ar Oe ṭaunor mazḳano fousla, ze zagat tain age tambu gaṛisla ⁴ar foela kurbani ḳana banaisla. Ono gia tain hirbar Mabudor nam loila. ⁵Abramor loge musafir asla tan batiza Lut, eno bout goru-sagol ar tambu asil. ⁶Oile zagaṭa ila asil na zen, duiozonor poshur fale eḳloge ḳaita farba. Goru-sagol ar tambu oto beshi asil zen, ita loia tarar taḳar ufae asil na. ⁷Erlagi Abram ar Lutor raḳal oḳole hamesha dorbar-ḳaijja ḳorta. Ar hi shomoe Kenani ar Farizi oḳolo hi desho boshot korto.

⁸Teu Abrame Lutre ḳoila, “Huno, amra to duiozon-u afon. Te tumar-amar maze ar tumar-amar raḳalor mazeo dorbar-ḳaijja ḳora ṭik nae. ⁹Hara deshṭa-u tumar samne foṛi roise. Te ao, amra alga oizai. Tumi baue fosond ḳorle, ami ḍaine, ar tumi ḍaine gele, ami baue zaimu.” ¹⁰Lute saia deḳla, Zordan gangor tʼol zagar hoḳol bae Shuar gau forzonto bout fani ase, Mabudor bagisa ba Mishor deshor laḳan i zaga-o gash-fani ala. Ou shomoyo Mabude Sadum ar Amura ṭaun binash ḳorsoin na. ¹¹Erlagi Lute Zordan gangor hoḳol tʼol zaga nizor lagi basia fubedi horia gelagi. Oula tara alga oigela. ¹²Abram Kenan desho roila, ar Lut hou tʼol zominor ṭaun oḳlor ḳasat gia boshot korla. Tain Sadum ṭaunor kinaro tambu gaṛilla. ¹³Sadumor manush oḳol kub ḳobis asil, Mabudor nozoro tara betaea gunagar.

¹⁴Lut alga oar bade Mabude Abramre ḳoila, “Tumi ze zagat ubaiso, ikan taki utore-douḳne, fube-foisme eḳbar saia deḳo. ¹⁵Ze zaga oḳol tumi deḳrae, ita ami tumare ar tumar oarish oḳolre hameshakur lagi dilaimu. ¹⁶Ami tumar oarishre duniair duil-balur laḳan behishab ḳormu. Duniar duil-balu zudi ḳeu gonia fuṛaito fare, taile tumar oarishreo gonto farbo. ¹⁷Uṭo, asta deshṭa tumi eḳbar guria ao, ou deshu ami tumare dimu.” ¹⁸Teu Abrame tan tambu tulia, Hebron elaḳat Momrir elon bonor ḳandat nia gaṛila. Hoḳano tain Mabudor lagi kurbani ḳana banaila.

Hozrot Lut (a:) bondi oila

¹Babil deshor bashsha Omrafel, Illashoror bashsha Ariaḳ, Ilamor bashsha Ḳodor-laumor ar Goimor bashsha Tidiol, era sairozone eḳ oia ²Sadumor bashsha Bira, Amurar bashsha Birsha, Odmar bashsha Shinab, Soboimor bashsha Shimebor ar Bilar ba Shuaror bashshar birudde zuddo ḳorat gela. ³Ou faszon bashshae tarar sifai oḳolre ekḳano ḳoria Siddimor tol zagat loia gela. I zagare Luna Shagor ḳoin. ⁴Hi bashsha oḳole baro boros bashsha Ḳodor-laumoror gulami ḳoria tero bosoror shomoe bidruho ḳorla. ⁵Er bador boros bashsha Ḳodor-laumor ar tan logor bashsha oḳle gia Ostorut-Ḳornoimo Rofayi oḳolre, Homo gia Zuzi oḳolre, ar Shabi-Kiriataimo gia Eimi oḳolre araila. ⁶Bade morubumir ḳasar El-Faron forzonto Seir faṛor Hurio oḳolreo araila. ⁷Heshe ou bashsha oḳole guria gia Oin-Mishfoṭo ba Ḳadesh gela. Tara Amaleki oḳolor asta desh doḳol ḳorla ar Hazazon-Tamar ṭauno ze Amuri oḳol asil tarareo doḳol ḳorla. ⁸Bade Sadum, Amura, Odma, Soboim ar Bilar ba Shuaror bashsha oḳole ⁹Ilamor bashsha Ḳodor-laumor, Goimor bashsha Tidiol, Babilor bashsha Omrafel ar Illashoror bashsha Ariaḳor loge zuddo ḳorar lagi Siddim namor tol zagat tarar sifai oḳol hazaila. Sair bashshar birudde fas bashshae lagla. ¹⁰Siddimor tol zagat tartelor bout gat-gaṛa asil. Sadum ar Amurar bashshain zebla bagia zaira, i shomoe tarar logor ḳeu ḳeu ou tartelor gato foṛi gela, ar baki oḳole bagia faṛo gela. ¹¹Teu tarar dushmon oḳole Sadum-Amurar hoḳol don-samana ar ḳani-danir hoḳolta luṭia loia gelogi. ¹²Ar tara Abramor batiza Lutor hoḳol mal-samana shudda hou Lutreu doria loia gelagi, ḳaron eineu Sadum ṭauno roita.

¹³Teu eḳzone bagia aia Ibrani Abramre ou ḳobor dilo. Abram i shomoe Amuri Momrir elon bonor ḳasat taḳta. I Momri asla Ashkul ar Aneror bai, Abramor loge erar zuddor shaijjor chukti asil. ¹⁴Tan batizare doria loia gesoingi hunia Abrame laṛai zanra nizor tin-sho aṭaro zon gulamre loia Dan ṭaun forzonto dushmonor ḳore ḳore gela. Ou gulam hoḳol tan baṛit-u zonmisil. ¹⁵Raitor bala dushmonor dolor lagal faia era hamla ḳoria herare arai dila, ar ḳedaite ḳedaite Damesk ṭaunor utore Hoba forzonto gela. ¹⁶Luṭ ḳora hokkol zinish tain firaia anla, mal-samana shudda tan batiza Lutreo uddar ḳorla. Erloge hoḳol beṭintore ar hoḳol manshoreo uddar ḳori anla.

Bashsha Malki-Siddike dua dila

¹⁷Ḳodor-laumor ar tar logor bashsha oḳolre araia Abram firia aoar shomoe Sadumor bashshae tan loge deḳa ḳorar lagi Shabi ba Bashsha namor tol zagat baroia aila. ¹⁸Ar Shalemor bashsha Malki-Siddike Abramor lagi ruṭi ar anguror shorbot loia aila, tain oila Allatalar imam. ¹⁹Tain Abramre dua ḳoria ḳoila, “Zein asman ar zomin foeda ḳorsoin, hou Allatala Abramre boroḳot dan ḳoroukka. ²⁰Afnar dushmon oḳolre zein afnar ato shofisoin, tan nam doinno ouk.” Ou Abrame tan hokkoltar doshbaṭor eḳbaṭ Malki-Siddikre dilaila. ²¹Ar Sadumor bashshae Abramre ḳoila, “Afne mal-samana hoḳolta raki deukka, ḳali manush guin amare firot dilain.” ²²Abrame Sadumor bashshare ḳoila, “Zein asman-zomin foeda ḳorsoin hou Mabud Allatalar name ami at tulia ḳosom ḳorsi, ²³afnar kunu zinish-u, eḳsa shuta-u ba faor zutar eḳsa fitao ami nitam nae. Arnae bade afne ḳoiba, amar done-u Abram doni oise. ²⁴Amar manshe zeta ḳailisoin ita saṛa ami ar kichchu nitam nae. Ḳali Aner, Ashkul ar Momri zera amar loge gesla, tarar faona baṭ tara neukkagi.”

Hozrot Ibrahim (a:)-or loge Allar oada

¹I goṭona oḳlor bade ohir maze Mabudor ḳalam Abramor gese nazil oilo. Tain ḳoila, “O Abram, ḍoraio na, ami-u tumar hefazotḳari, tumar bout boṛo furushkar.” ²Abrame ḳoila, “O Mabud Moula, amare kita ditae? Ami to niaoladi. Ami morar bade Dameskor Eliezer amar shompottir malik oibo. ³Tumi to amare kunu aolad dilae na, erlagi amar baṛir gulam amar oarish oibo.” ⁴Ou Mabude Abramre ḳoila, “Na, he nae, tumar nizor bour aolad-u tumar oarish oibo.” ⁵Mabude Abramre bare ania ḳoila, “Asmanor bae sao, ar farle ou tera oḳol gonia fuṛao, tumar bongshor oarish oula behishab oibo.” ⁶Abrame Mabudor ou oadare ekin ḳorla, ar Mabude hou ekinre dindari ḳam hishabe ḳobul ḳorla.

⁷Ar tain Abramre ḳoila, “Ami-u Mabud. I Kenan deshor odiḳari oibar lagi ami tumare Babil deshor Ur ṭaun taki bar ḳoria anchi.” ⁸Ou Abrame ḳoila, “O Mabud Moula, ami itar malik oimu ḳori kila buzmu?” ⁹Tain ḳoila, “Tumi tin bosoror eḳṭa ḳori ḍeki, boḳri, ar meṛar faṭa amar samne loia ao, erloge eḳṭa ḍufi faki ar eḳṭa faror baichchao anio.” ¹⁰Abrame oula ḳorla. Tain ita hoḳolṭi ania dui ṭuḳra ḳoria ulṭa-ulṭi ḳori hazaia raḳla, ḳali faki oḳolre ṭuḳraila na. ¹¹Teu hokun aia ou ṭuḳra oḳolor ufre foṛle, Abrame ḳedaila.

¹²Shuruz ḍubar shomoe Abramor eḳ beushi gum ailo. Gumor maze betaea ḍor ar andaire tane asor ḳorlo. ¹³Ou Mabude tanre ḳoila, “Tumi nichoe oia zanio, tumar oarish oḳole oula desho gia roiba zeḳṭa tarar nizor nae. Hono tara kub zulum-mosibotor maze roia sair-sho boros forzonto gulami ḳorba. ¹⁴Ar ze zatie tarare gulam banaiba, ami hi zatir bisar ḳormu. Bade tara bout don-doulot loia hon tone baroia aiba. ¹⁵Ar tumi shantie tumar baf-dadar gese zaibae. Tumi fura murobbi boeosho ḳoeboro hamaibae. ¹⁶Tumar sair siṛi bade era ono firia aiba, ḳaron Amuri oḳolor guna oḳono fura oise na.”

¹⁷Shuruz ḍubia zebla andair oigelo ou shomoe dumae bora eḳ undal ar agunir mushal hou hazaia raḳa kurbanir ṭuḳraintor mazedi gelo. ¹⁸Mabude hou din-u Abramor loge oula oada ḳorla, “Mishoror gang tone boṛo gang Furat forzonto asta desh ami tumar oarishre dilam. ¹⁹Iḳṭa oilo Keni, Konizi, Kodmuni, ²⁰Hiṭṭi, Farizi, Rofayi, ²¹Amuri, Kenani, Girgashi ar Zibuzi oḳolor desh.”

Hozrot Ismail (a:)-or zonom

¹Bibi Sarar feṭo Abramor kunu hurutta oisoin na, oile Hazera name Sarar eḳ Mishori bandi beṭi asla. ²Eḳdin Sarae Abramre ḳoila, “Huno, Mabude amare niaoladi ḳorsoin. Te tumi amar bandir ḳasat zao, kiba taire dia ami aolad failitam fari.” Ou Abramo Sarar mate razi oila. ³Kenan desho Abram dosh boros roar bade Sarae tan Mishori bandi Hazerare nizor zamai Abramor loge bia dila. ⁴Bade Abram ar Hazerar ekḳano roile tair feṭo hurutta ailo. Hazerae zebla buzlo tair hurutta oita teu tair malik bibir bae boṛai deḳanit laglo. ⁵Ou Sarae Abramre ḳoila, “Amar bae tair be-adobir lagi tumi-u dayi. Amar i bandire ami-u tumar bisnat tulia dislam, ar oḳon tair hurutta oita ḳori amare boṛai deḳar. Mabude tumar-amar bisar ḳoroukka.” ⁶Abrame Sarare ḳoila, “Deḳo, tumar bandi to tumar ato-u ase. Tumar zela bala mone ḳoe ola-u ḳoro.” Ou Sarae Hazerare oula duk dila, duke tai tan ges taki bagia gelogi.

⁷Foto morubumir maze eḳṭa fanir kuar ḳasat Mabudor firistae Hazerare faila. I kua asil Shur namor zagat zaoar foto. ⁸Firistae ḳoila, “O Sarar bandi Hazera, tumi ḳoi taki airae ar ḳoi zaitae?” Hazerae ḳoilo, “Ami amar malik Bibi Sarar ges taki bagia zairamgi.” ⁹Teu Mabudor firistae ḳoila, “Tumar malik bibir gese firia gia ḳolla nuaia hirbar tan ḳezmoto lago.” ¹⁰Tain aro ḳoila, “Ami tumar oarish oula baṛai dimu, tarare gonia fuṛaito nae. ¹¹Huno, tumar feṭo hurutta ase. Tumar eḳ fua oibo, tar nam rakio Ismail [mani, Allae hunoin], ḳaron Mabude tumar duk hunchoin. ¹²Ar boṛo oile he lagam saṛa guṛar laḳan oibo. He hokkolor bae at tulbo, ar hokkole tar bae at tulba. Baiaintor loge hamesha tar lag taḳbo.” ¹³Ar Hazerar loge Mabude matila ḳori, tai tan nam dilo “tumi deḳa deneala Alla”; tai ḳoilo, “Zein amare deḳoin, ami ono-u tanre deḳlam nae ni?” ¹⁴Erlagi Ḳadesh ar Beredor mazor hi kuar nam oilo, Ber-Lohoe-Rui [mani, zein zinda ar amare deḳra, tan kua].

¹⁵Bade shomoe aile Hazerar goro eḳ fua oilo, Abrame ou fuar nam raḳla Ismail. ¹⁶Abramor boeosh zebla siashi bosor oigese, ou shomoe Hazerar goro Ismailor zonom oilo.

Abram taki noea nam Ibrahim

¹Abramor nirannobboi borosor shomoe Mabude hirbar tanre didar ḳoila, “Ami shorbo-shoktiman Alla. Tumi amar deoa foto takia kamil o. ²Ami tumar-amar maze chukti ḳaim ḳormu ar tumar oarish kub beshi baṛai dimu.” ³Teu Abram soizdat foṛla, ar Allae tan loge batchit kori ḳoila, ⁴“Tumar loge ami oada ḳaim ḳoriar, tumi bout zatir mul baf oibae. ⁵Tumare ar Abram [mani, boṛo baf] ḳoia ḍaḳa oito nae, oḳon taki tumar nam oilo Ibrahim [mani, bout zatir baf], ami tumare bout zatir mul baf banailam. ⁶Ami tumare bout folala ḳormu, ar tumar maz tone bout zati ar bashsha oḳol foeda ḳormu. ⁷Ami tumar ar tumar oarishor for oarish oḳolor loge ze chukti ḳaim ḳormu, ikṭa hor-hamesha boail taḳbo, er zoriae ami tumar ar tumar oarishor for oarish oḳolor Alla oimu. ⁸Ar ze Kenan desho tumi oḳon musafir oia taḳrae, i furaṭa-u ami tumare ar tumar oarish oḳolre hor-hameshakur doḳolor lagi dimu. Ami tarar Alla oimu.”

Mosolmani ḳamor chukti

⁹Allae Ibrahimre ḳoila, “Tumi amar ḳaim ḳora chukti manio, tumi ar tumar oarishor for oarish oḳoleo mania solio. ¹⁰Tumrar loge ar tumrar oarishor loge amar oula chukti ḳaim oilo, tumrar hoḳol beṭaintor mosolmani ḳam ḳoraite oibo. ¹¹Tumra hoḳole nizor furush-ongor mukar samṛa ḳaṭbae. Oḳṭa-u tumrar ar amar maze boail ḳora chuktir nishana. ¹²Oarishor for oarish doria tumrar hoḳol fuaintore zonmor aṭ dinor din mosolmani ḳoraibae. Zara tumar oarish nae, ḳali tumrar baṛit zonmise ba tumrar ḳorida gulam, tararo mosolmani ḳorani lagbo. ¹³Tumrar goro zonmise ba ḳorida gulam oḳolre nichoe mosolmani ḳoraibae. Tumrar shorilo zari ḳora amar i chukti hor-hameshakur chukti oibo. ¹⁴Ze beṭae furush ongor mukar samṛa ḳaṭto nae, tare tar zatir maz taki fusia falail oibo. He to amar chuktir borḳelaf ḳorse.”

¹⁵Allae Ibrahimre ḳoila, “Tumar bibire ar Sara ḳoia ḍakio na. En nam oibo Saera [mani, rani]. ¹⁶Ami taire boroḳot nazil ḳormu, tair goro tumar eḳ fua dimu. Ar boroḳot nazil ḳoria bout zatir mul ma banaimu, ar bout mulluḳor bashsha oḳolo foeda oiba.” ¹⁷Ou Ibrahime maṭit soizdat foṛi ashia mone mone ḳoila, “Hasa-u eḳ-sho bosoror buṛar hurutta oito ni! Ta-o nobboi bosoror buṛi Saerar feṭo?” ¹⁸Tain Allare ḳoila, “Ah! Ismailgu zanu tumar rohomote basia taḳe.” ¹⁹Ou Allae formaila, “Ṭik ase. Oile tumar bibi Saerar feṭo hasa-u tumar fua oibo, tumi tar nam raḳbae Isʼhak [mani, he ashe]. Tar loge amar chukti ḳaim ḳormu, tar oarishor loge ikṭa amar hor-hameshakur chukti oibo. ²⁰Ar Ismailor lagio tumar dua hunchi. Huno, ami tareo boroḳot nazil ḳormu ar tare folala ḳoria bout baṛai dimu. He barozon razar baf oibo ar tar mazedi ami biraṭ zati foeda ḳormu. ²¹Samnor boros i sando Saerar goro tumar ze hurutta oibo, hou Isʼhakor loge ami amar chukti ḳaim ḳormu.” ²²Ibrahimor loge batchit shesh ḳoria Allae tan ges taki uṭia toshrif nilagi.

²³Allar hukum moto Ibrahime hou dinu Ismailre mosolmani ḳoraila. Erloge ḳorida gulam oḳol ar tan baṛit zonmise ila hoḳol gulamre, baṛir hokkol beṭaintore mosolmani ḳoraila. ²⁴Ibrahimor nizor mosolmani ḳam ḳoranir shomoe tan boeosh asil nirannobboi boros, ²⁵ar tan fua Ismailor boeosh tero. ²⁶Eḳ dine-u Ibrahim ar tan fua Ismailor mosolmani ḳorail oilo. ²⁷Hidin baṛir hoḳol beṭaintor, zara tan baṛit zonmisil ar zerare bidesh taki loia anchoin, ita hoḳolor-u mosolmani ḳam ekloge ḳorail oilo.

Bibi Saerar goro fuar oada

¹Bade Momrir elon bonor ḳasat Mabude Ibrahimre deḳa dila. Tain dinor gormor shomoe tambur dorzat boat asla. ²Oula shomoe souk tulia deḳla, tan samne tinzon manush ubai roisoin. Dekia-u tain dorzar ges taki douṛaia gia, maṭit soizda ḳoria tarare ḳoila, ³“O munib, ami zudi afnarar maear kunu manush oi, taile afnarar i gulamre falaia zain na zen. ⁴Ami tuṛa fani ania diar afnara at-fao doia, ou gas tolat ziraukka. ⁵Ar i gulamor ḳasat zebla aisoin, te tuṛa ḳani ania dei, ota ḳaia zano aram oile afnara hirbar roana dibane.” Tara ḳoila, “Bala, afne zebla ḳoira, te ḳoroukka.” ⁶Ibrahime loge loge bitre gia Saerare ḳoila, “Zoldi ḳoria tin feṭu bala moeda makia fiṭa banao.” ⁷Tain douṛaia gia gorur fal tone kub bala eḳṭa ḳosma basur ania tan gulamre dila. He-o zoldi ḳori oḳṭa randilo. ⁸Ou Ibrahime dud, doi ar gust ania tarare ḳaibar dila, tara ḳaoa-daoa ḳorla. Tain tarar ḳandat gas tolat ubaila.

⁹Tara Ibrahimre zikaila, “Afnar bibi Saera ḳoi?” Tain ḳoila, “Ounu, tambur bitre asoin.” ¹⁰Ou erar maze eḳzone ḳoila, “Samnor boros i sando ami oboshsho-u afnar gese aimu. Deḳba, oushmoe afnar bibi Saerar kulo eḳ fua taḳbo.” Saerae Ibrahimor ḳore tambur dorzat ubaia ita hunla. ¹¹I shomoe Ibrahim ar Saera buṛa-zoif oigesoin, hurutta oar laḳan boeosho Saerar roisil na. ¹²Erlagi Saerae mone mone ashia ḳoila, “Amar oula heshḳali boeosho ita kushi ar aibo ni? Amar maliko murobbi oigesoin.” ¹³Teu Mabude Ibrahimre ḳoila, “Saerae kitar lagi ita ḳoia ashlo zen, hasa-u amar hurutta oibo ni, ami to buṛi? ¹⁴Mabude faroin na ila kunta ase ni? Dekio, ṭiḳ shomoye ami hirbar tumar gese aimu, ar i shomoe Saerar kulo fua taḳbo.” ¹⁵Saerae ḍoraia ḳoila, “Ji na, ami to ashchi na.” Ou tain ḳoila, “Na-reba, tumi nu ashilae.”

Sadum ṭaunor lagi Ibrahim (a:)-or minoti

¹⁶Erbade hou tinzone in tone uṭia Sadumor bae saila. Ibrahime tarar loge oia bidae deoat gela. ¹⁷Teu Mabude ḳoila, “Ami zeta ḳortam saiar, ita kunu Ibrahimre lukaitam ni? ¹⁸Ibrahim takia-u to ami eḳ mohan himmotala zati foeda ḳormu, duniair hoḳol zatie on tone boroḳot kamaiba. ¹⁹Erlagi-u ami tare ḳatir ḳorsi, he tar oarish ar tar nizor hoḳolre amar morzi mania hok ar insafor ḳam ḳorar hukum dey. Tarao zudi ou laḳan sole, taile ami Mabude Ibrahimor befare zotota ḳoisi, hoḳolta-u fura ḳormu.” ²⁰Bade Mabude ḳoila, “Sadum ar Amurar birudde kub nalish ar foriad huniar, tarar gunao kub bezuita. ²¹Erlagi ami tole lamia gia deki, ami zela nalish huniar, ita hasa-u oula ḳaraf ki na. Ar na oileo to deḳmu.”

²²Ou hi duiozone firia Sadumor bae roana dila ar Ibrahim Mabudor gese ubai roila. ²³Bade Ibrahime Mabudor bae aguaia gia ḳoila, “Afne gunagaror loge hok manush oḳolreo marilaita ni? ²⁴Ṭaunor maze zudi foinchash zon hok manush taḳe taile hou foinchash zonor ḳatire ṭaunre meherbani na ḳoria binash ḳorilaiba ni? ²⁵Te afnar ḳam to oula nae, hok ar gunagarre eḳloge marilaoa, eḳ homan shaza deoa, afnar lagi to ṭik nae. Zein hara duniar bisar ḳoroin, tain kunu hok insaf ḳorta nae ni?” ²⁶Mabude ḳoila, “Zudi Sadum ṭauno foinchash zono hok manush taḳoin, taile tarar ḳatire ami asta ṭaunre rehai dilaimu.” ²⁷Ibrahime ḳoila, “Deḳoukka, ami to duil ar sali saṛa kunta nae, ta-o ami shaosh ḳoria amar malikor loge matiar. ²⁸Doroukka, zudi foinchash zon hok manush na oia fas zon ḳom oe, taile kita ou fas zon ḳomor lagi afne asta ṭaun binash ḳorilaiba ni?” Tain ḳoila, “Ami zudi hino foetallish zonre fai, taile ikṭa binash ḳortam nae.” ²⁹Ibrahime tanre hirbar ḳoila, “Doroukka, zudi hino sallish zon faoa zae?” Mabude ḳoila, “Hou sallish zonor ḳatire ami binash ḳortam nae.” ³⁰Ibrahime ḳoila, “Amar malik zanu amar mate naraz na oin. Aichcha, zudi hino tish zonre faoa zae?” Tain ḳoila, “Zudi ami tish zonre-o fai, taile-o ami binash ḳortam nae.” ³¹Ibrahime ḳoila, “Ami zebla himmot koria malikor loge batchit koriar te hirbar ḳoiar, zudi hino bish zonre faoa zae?” Mabude zuaf dila, “Hou bish zonor ḳatire-u ami ikṭa binash ḳortam nae.” ³²Heshe Ibrahime ḳoila, “Amar malik zanu naraz na oin, ami ḳali aro eḳbarta ḳoiar, zudi hino dosh zon taḳoin?” Mabude ḳoila, “Hou dosh zonor ḳatire-u ami ikṭa binash ḳortam nae.” ³³Ibrahimor loge Mabudor bat-soal shesh oia harle roana dilaila, ar Ibrahimo tan baṛit firia aila.

Sadum ṭaunor ufre Allar gozob

¹Bade hainjabala hou duizon firista Sadum ṭauno gela. I shomoe Lut ṭaunor mul geiṭor gese boat asla, erare dekia tain ubaila ar maṭit soizda ḳoria ḳoila, ²“O amar malik oḳol, ami minoti ḳori ḳoiar, doya ḳori afnarar ou gulamor goro toshrif anilaukka ar at-fao doia raitḳan ḳaṭaukka. Biane hirbar roana oibane.” Era ḳoila, “Na, amra ou ṭaunor moedano rait kaṭaimu.” ³Tain zebla kub minot-ḳajji ḳorra ou shomoe era tan baṛit hamaila. Bade Lute ruṭi banaia erar lagi ḳana-dana zuit korla, ar tara ḳaila. ⁴Erar hutibar age-u Sadum ṭaunor hokkol zuan-buṛa beṭainte aia hi baṛire berilaila, ⁵ar Lutre ḍakia ḳoila, “Aiz rait ze duizon manush tor ino aise, tara ḳoi? Otare bar ḳoria amrar gese an. Amra otar loge mouz ḳortam.” ⁶Ou shomoe Lute dorzar bare gia tan ḳoror dorza bond ḳoria tarare ḳoila, ⁷“Baiainre, ami minot koriar, tumra ila bod-ḳam ḳorio na. ⁸Deḳo, amar duiṭa shoti fuṛi ase. Ami bar ḳoria tumrar gese loia aiar, tara kunu beṭaintor gese roisoin na, tumrar zeta mone sae ḳoro; ta-o, i manshor loge tumra kunta ḳorio na, era amar goro ashroe loisoin.” ⁹Oile tara ḳoilo, “Za, za, fot taki hor!” Tara aro ḳoilo, “Oi beṭa, tui eḳla boitol oia aisos ar ḳali amrar ufre netagiri ḳorre. Oḳon erar saite tor loge aro beshi ḳobisi ḳormu.” Ḳoia-u tara Lutre ṭelia horaia dorza bangto sailo. ¹⁰Ou shomoe hou duizone at baṛaia, Lutre goror bitre ṭania nia dorza bond ḳori dila. ¹¹Ar dorzar bare ubail huru-boṛo hoḳol aḳta-u anda oigelo, ar dorza tuḳaite tuḳaite heran oigelo.

¹²Bade hou duiozone Lutre zikaila, “Ino tumar ar ḳe ḳe ase? Tumar fua-fuṛi ar damandre loia in tone horia zaogi. ¹³Ḳaron amra i zagare sarḳar ḳorilaiar. Inor manshor birudde Mabudor gese oula bezuita nalish oise zen, ikṭa binash ḳorar lagi tain amrare faṭaisoin.” ¹⁴Ou Lute bare gia tan damand oḳolre ḳoila, “Ao, tumra i zaga saṛia baro ḳaron Mabude i ṭaunre binash ḳorar lagi tiar oiroisoin.” Oile tara mone ḳorlo, tain ita tamsha ḳorra.

¹⁵Fotabala hou firistae Lutre tagda dia ḳoila, “Uṭo, zoldi ḳori tumar bou ar i duio fuṛire loia on tone zaogi. Naile ou gozobor maze foṛia binash oizibae.” ¹⁶Lute zai-zairam oula ḳorra. Oile Mabudor maea tan ufre asil ḳori hou duiozone, tain ar tan bou ar tan duio fuṛintor ato dori ṭania ṭaunor bare loia aila. ¹⁷Hoḳolre bar ḳoria anar bade tara ḳoila, “Baste saile bago, ḳoredi saio na, bagia faṛo zao, i tʼol zagar kunuḳano ubaio na arnae tumrao morbae.” ¹⁸Ou Lute ḳoila, “O amar malik oḳol, ila ḳoroin na zen; ¹⁹Deḳoukka, afnar i gulamre afne meherbani ḳorsoin, ar amar zan basaibar lagi afne amare moha doya deḳaisoin. Oile ami bagia faṛo zaitam fartam nae. Hoeto i bifod aia amare zata mari dorle, amio mormu. ²⁰Deḳoukka, bagia zaite to ou huru gauṭa ḳasat ase. Zan basaibar lagi amare ono faṭai deukka. Gauṭa huru-muru ase.” ²¹Tain ḳoila, “Ṭiḳ ase, ami tumar i arzi manlam. Tumi ze gaur ḳota ḳoilae, iṭa ami dongsho ḳortam nae. ²²Zoldi ḳori hino zao. Tumi hono na fousani forzonto ami kunta ḳortam fariar na.” Lutor ḳotar lagi hou gaur nam oilo Shuar [mani, huru]. ²³Lute zebla Shuaro gia fousla i shomoe shuruz uṭigese.

²⁴Erbade-u Mabude asman taki Sadum ar Amurar ufre aguin ar gondoḳor gozob saṛila. ²⁵Tain hi ṭaun oḳol, hoḳol tʼol zaga, hokkol manush ar hi maṭir ufror hokkolta dongsho ḳorilaila. ²⁶Ermaze Lutor boue ḳoredi firia saoae, tain eḳṭa nunor sakka oigela.

²⁷Bador din Ibrahime biane uṭia hou zagat gela zeno agor din tain Mabudor gese ubaisla. ²⁸Tain tole Sadum, Amura ar hoḳol tʼol zagar bae saia deḳla, iṭ-baṭa taki zela duma baroe, ou laḳan hou elaḳa taki duma uṛer.

²⁹Ar Lute zeḳano boshot korta, hou tʼol zagar ṭaun oḳol dongsho ḳorar shomoe, Allae Ibrahimor ḳota mono ḳoria Lutre hinor gozobor maz taki horaia anla.

Muab ar Bin-Ommi zatir ḳobisi foeda

³⁰Shuar gaut roite ḍoraila ḳori, Lute tan duio fuṛire loia hin taki baroia faṛo aia, eḳ gator bitre roila. ³¹Eḳdin tan boṛo fuṛie huru boinre ḳoilo, “Baba to murobbi oigesoin. Ar zogotor shomazor niom moto amrare bia ḳorar lagi ino kunu beṭaino nae. ³²Te ae, amra babare shorab ḳaoaia tan ḳasat roi. Teu babaredi amrar bongsho basaitam farmu.” ³³Ou tara duiozone raitor bala tanre shorab ḳaoaia ṭal banailo. Bade boṛo boin bafor gese hutito gelo, oile kun shomoe hutilo ar kun shomoe uṭilo, bafe kunta-u ṭer faila na. ³⁴Bador din boṛoguie hurugure ḳoilo, “Deḳ, ḳail rait ami babar gese hutislam. Ae, aiz raito tane oula shorab ḳaoaia ṭal banai, bade tuio gia tan gese hutis. Te babaredi amrar bongsho basaitam farmu.” ³⁵Ou laḳan tara hou raito tarar bafore shorab ḳaoaia ṭal banailo, ar huru fuṛi tair bafor gese hutilo. Tai kun shomoe hutilo ar kun shomoe uṭilo, ita tain kunta-u ṭer faila na. ³⁶Ou nomunae Lutor duio fuṛir feṭo bafredi hurutta ailo. ³⁷Bade boṛo fuṛir goro fua oile, er nam raḳlo Muab [mani, babar ges tone]. Ou Muabu oḳonkur Muabi oḳolor mul baf. ³⁸Ar huru fuṛiro eḳ fua oilo, er nam raḳlo Bin-Ommi [mani, amar mulluḳor fua]. He oḳonkur boni-Ammanor mul baf.

Geraror bashshae Bibi Saerare nila

¹Ar Ibrahime hintone Negebor morubumir bae gia Ḳadesh ar Shuror mazḳano Gerar desho roila. ²Hono hirbar tan bou Saerare nizor boin ḳoia forisoe dila. Erlagi hinor bashsha Abimalike manushdi Saerare tan gese nilagi. ³Ar rait Allae Abimalikre kuabe ḳoila, “Huno, ou ze beṭire tumi loia aiso, tair to zamai ase, erlagi tumi oḳon moutor muko.” ⁴Abimalik oḳono Saerar gese gesoin na. Erlagi tain ḳoila, “O Malik, ni-oforadi zati oileo kita afne marilaita ni? ⁵Ou manushṭae to nize-u ḳoise, ein tar boin. Ar ou beṭieo ḳoisoin na ni, ein tan bai? Ami to shorol mone ni-oforadi ate i ḳam ḳorsi.” ⁶Allae kuabe tanre ḳoila, “Amio zani, tumi shorol mone i ḳam ḳorso. Erlagi tumare gunar ḳam taki ami dom loailam. Taire soite dilam na. ⁷Oḳon tumi tan bibire tan gese firot dilao. Tain eḳzon nobi. Tain tumar lagi dua ḳorba, teu tumar zan basbo. Ar zudi taire firot na deo, te zanilio, tumi ar tumar hoḳol-u nichoe morbae.”

⁸Ou Abimalike fozore uṭia tan nizor uzir-nazir oḳolre ita hoḳolta ḳoila, ita hunia tara kub beshi ḍoraila. ⁹Bade Abimalike Ibrahimre anaia ḳoila, “Afne amrar loge ita kun zator bebohar ḳorla? Ami afnar gese kita dush ḳorsi zen, afne amare ar amar bashshaire oto boṛo gunar daye falaila? Afne to amar loge ita oinnae ḳam ḳorla.” ¹⁰Abimalike aro ḳoila, “Afne kita dekia ila ḳam ḳorla?” ¹¹Ibrahime zuaf dila, “Ami mone ḳorslam, i zagar manshor Allar bae kunu ḍor-boe nae, erlagi amar bour lalose hoeto tara amare kun ḳorba. ¹²Ar tai hasa-u amar boin lage, ḳaron tai amar haton goror boin, ar oḳon amar bou. ¹³Allae zebla amare amar bafor baṛi tone bar ḳori anla, ou shomoe ami taire ḳoislam, ‘Tumi amare ou maeaḳan ḳorio, amra zeno-u zai na ḳene, tumi amare tumar bai ḳoia forisoe dio.’ ” ¹⁴Bade Abimalike ḳotoṭa meṛa-goru, bandi-gulam Ibrahimre dila ar tan bibi Saerareo firot dilaila. ¹⁵Abimalike ḳoila, “Deḳoukka, amar asta deshṭa-u afnar samne foṛi roise, te afnar zeno fosond ono-u roukka.” ¹⁶Tain Saerare ḳoila, “Deḳoukka, ami afnar baire eḳ azar rufar ṭeḳa dilam. Ar afnar izzotor hoḳol bisaror foesala oilo.” ¹⁷Bade Ibrahime Allar gese dua ḳorla, ar Allae Abimalik, tan bou ar tan bandi oḳolre shifa ḳorla ar tarar huruttao oila. ¹⁸Ḳaron Ibrahimor bibi Saerar lagi Mabude Abimalikor baṛir hoḳol beṭintor hurutta oa bond ḳori disla.

Hozrot Isʼhak (a:)-or zonom

¹Mabude tan ḳalam mutabek Bibi Saerare hefazot korla, tain zela oada ḳorsla, ola-u ḳorla. ²Ar Bibi Saerar feṭo hurutta ailo. Allae ze shomoekur ḳota ḳoisla, hou shomoye-u Ibrahimor murobbi boeosho tan fuar zonom oilo. ³Ibrahime Saerar goror tan ou fuar nam raḳla Isʼhak [mani, asha]. ⁴Allar hukum moto tain aṭ dinor din tan fua Isʼhakor mosolmani ḳam ḳoraila. ⁵Ibrahimor eḳ-sho bosoror shomoe tan fua Isʼhakor zonom oilo. ⁶Bibi Saerae ḳoila, “Allae amar muko ashi bar ḳorla, ar ita ze hunbo, he-o amar loge ashibo.” ⁷Tain aro ḳoila, “Saerae fuaintore bukur dud ḳaoaibo, ita Ibrahimre ḳe ḳoilo one? Ar oḳon to ou buṛa boeosho, amar feṭo tan fua foeda oilo.”

Bibi Hazera ar tan fuare ḳedai deoa

⁸Isʼhak boṛo oar bade zedin tane maʼr dud saṛail oilo, houdin Ibrahime eḳ boṛo mezbani ḳorla. ⁹Ar Mishori Hazerar feṭo Ibrahimor ze fua oisil, Saerae deḳla he tamsha ḳorer. ¹⁰Ou tain Ibrahimre ḳoila, “Fua shoho i bandire bar ḳori deo, bandir fua amar Isʼhakor loge ongshidar oito farto nae.” ¹¹Fuar ita hunia Ibrahime mono kub toklif faila. ¹²Ou Allae tanre ḳoila, “Tumar bandi ar tair fuar lagi tumi bezar oio na. Saerae zela tumare ḳoise oula ḳoro, ḳaron tumar fua Isʼhakor ḳandanre-u tumar ḳandan ḳoia gona oibo. ¹³Ar i bandir torofa fua taki-o ami eḳṭa zati toiar ḳormu, ḳaron he-o to tumar aolad.” ¹⁴Ou Ibrahime aguan uṭia kisu ruṭi ar fani bora eḳṭa samṛar toli hazaia Hazerar ḳando tulia dia, fuagure tair ato shofia bidae ḳorla. Hin tone baroia Hazerae Ber-Shebar morubumir maze sokkor dita lagla.

¹⁵Tolir fani shesh oigele tain fuare eḳṭa zonglar tole hutaia toila. ¹⁶Ar eḳ ḍakor foriman duroi gia tain boiroila. “Fuar mout zate amar souḳe na deki” mone mone ḳoia, tain hono boia-u sillaia ḳandila. ¹⁷Fuagur ḳandon Allae hunla, ar Allar firistae asman tone ḍakia Hazerare ḳoila, “Hazera, O Hazera, tumar kita oise? Ḍoraio na, fuagu zeno ase, hon takiu tar ḳandon Allae hunchoin. ¹⁸Tumi uṭia fuagur ato doro, ami taredi eḳ biraṭ zati foeda ḳormu.” ¹⁹Ou Allae Hazerar souk kulia dila, ar tain ek kua deḳla. Hi kua tone samṛar tolit fani bori ania fuare ḳaoaila.

²⁰Allae hou fuare hefazot korla. He boṛo oilo, ar morubumit takia tir-donuḳ salanir ustad oilo. ²¹He Faran morubumit taḳto. Tar maʼe Mishoror eḳ fuṛire ania tare bia ḳoraila.

Ber-Shebat Geraror bashshar loge chukti

²²Hou shomoe Abimalik ar tan shenapoti Fikole Ibrahimre ḳoila, “Afne zeta-u ḳoroin, otat-u Allae afnar loge taḳoin. ²³Erlagi Allar name afne oḳon ono amar gese ḳosom ḳoroukka, amar ba amar aolad oḳolor loge, afne kunu beimani ḳorta nae. Ar ami zela afnare doea deḳaisi, afne-o amar loge ar afnar musafirir zaga, i deshor loge oula doear nozor raḳba.” ²⁴Ibrahime ḳoila, “Ji oe, ḳosom ḳorlam.”

²⁵Ar Abimalikor gulam oḳole eḳṭa fanir kua zure nisilgi ḳori, tain nalish dila. ²⁶Abimalike zuaf dila, “Ita ḳam ḳe ḳorse ami to zani na. Afne-o amare ita ḳoisoin na, aiz-u ami ikṭa hunlam.” ²⁷Bade Ibrahime kisu meṛa ar goru ania Abimalikre dila ar duiozone chukti ḳorla. ²⁸Ar Ibrahime fal tone shatgu meṛi-baichcha algaila. ²⁹Abimalike tane zikaila, “I meṛi-baichcha shatgu alga ḳorar mani kita?” ³⁰Ibrahime ḳoila, “Afne oguintore neukka. I kuaṭa ze ami kudsi ikṭa oilo tar forman.” ³¹Erlagi ou zagar nam oilo Ber-Sheba [mani, ḳosomor kua], ono-u tara duio zone ḳosom ḳorsla. ³²Tara Ber-Shebat ou chukti ḳorar bade, Abimalik ar tan shenapoti Fikol uṭia Filistini oḳolor desho firia gelagi. ³³Bade Ibrahime Ber-Shebat eḳṭa zau gas ruila, ar ze Mabudor shuru-o nae shesh-o nae, tan ebadot korla. ³⁴Ar Ibrahime Filistini oḳolor desho bout din ḳaṭaila.

Hozrot Ibrahim (a:)-or moha kurbani

¹I goṭonar bade Allae Ibrahimor eḳ forikka loila. Allae tanre ḍak dila, “Ibrahim!” Tain zuaf dila, “Ounu ami.” ²Mabude formaila, “Tumar fuare, zare tumi oto mohobbot koro, hou ḳas maear fut Isʼhakre loia tumi Muria elaḳat zao. Hoḳano ze faṛor ḳota ami tumare ḳoimu, er ufre tare nia zalail kurbani deo.” ³Teu Ibrahime fozore uṭia gadar fiṭit goddi lagaia tan fua Isʼhak, duizon gulam ar zalail kurbanir lagi laḳṛi ḳaṭia loia, ze zagar ḳota Allae tanre ḳoisla, hobaedi roana oila. ⁴Tin dinor din Ibrahime souḳ tulia saiteu duroi taki hou zagaḳan deḳla. ⁵Ou tan gulam oḳolre ḳoila, “Tumra gadaṭa loia ono ubao, ami ar amar fua hono gia ebadoti shesh ḳoria harle tumrar gese aimu.” ⁶Ibrahime zalail kurbanir laḳṛir aṭa tan fua Isʼhakor ḳando tulia dia nize aguinor fatil ar suri loia, duio zone samnor bae aguaila. ⁷Ou Isʼhake tan bafore ḳoila, “Baba.” Tain ḳoila, “Kitare baf ḳo?” Isʼhake ḳoila, “Ino to laḳṛi ar aguin ase, te kurbanir meṛar baichcha kuai?” ⁸Tain zuaf dila, “Babare, kurbanir lagi Allae nize-u meṛar baichcha zugaiba.” Ota matte matte tara aguai gela.

⁹Allar fosondor zagat fousia Ibrahime kurbani ḳana banaia, laḳṛi hazaila. Bade nizor fua Isʼhakre bandia ou darur ufre hutaila. ¹⁰Ar tain nizor fuare kurbanir lagi suri ato loila. ¹¹Ou Mabudor firistae asman tone tane ḍak dila, “Ibrahim! O Ibrahim!” Tain ḳoila, “Ounu ami.” ¹²Firistae ḳoila, “Fuagur bae tumar at tulio na, ba tare ar kunta ḳorio na. Tumi zen Allare ḍorao ita buza gese, ḳaron amare tumar fua, tumar ḳas maear fua dan ḳorte-o na-kush oiso na.” ¹³Ibrahime souḳ tuli saia deḳoin, tan ḳore eḳṭa dumba ar tar hing zongolor maze aṭki roise. Ou tain gia dumbaṭa ania, nizor fuar bodla zalail kurbani dila. ¹⁴Tain hi zagar nam raḳla Iaoeh-Jirih [mani, Mabude zugain]. Erlagi oḳono manshe ḳoin, “Mabudor faṛo zugail oibo.”

¹⁵Mabudor firistae asman tone hirbar Ibrahimre ḍakia ḳoila, ¹⁶“Huno, Mabude ḳoira, tumi oula ḳorlae, tumar fuare, tumar ḳas maear fuare dan ḳorteo naraz oilae na. Erlagi ami Mabude ḳosom ḳoria ḳoiar, ¹⁷ami nichoe tumare boroḳot nazil ḳormu, tumar bongshore asmanor tera ar doriar soror balur laḳan behishab ḳormu. Tumar bongshe tarar dushmonor ṭaun oḳol doḳol ḳorba. ¹⁸Ar tumar bongshor usillae duniar hoḳol zatie boroḳot hasil ḳorba. Ḳaron tumi amar hukum mancho.” ¹⁹Bade Ibrahime tan gulam oḳlor gese firia aila, ar tara eḳloge Ber-Sheba namor zagat gela. Ou zagatu tain boshoti ḳorla.

Hozrot Ibrahim (a:)-or bai Nahuror ḳandan

²⁰I goṭonar bade Ibrahime ḳobor faila, tan bai Nahuror bibi Milkar ḳoegu fuain oisoin. ²¹Er boṛo fuar nam Auz, tar baiaintor nam Buz, ar Iramor baf Ḳomuel, ²²erbade Kesod, Hosho, Fildosh, Zidlof ar Botuel. Botuelor fuṛir nam Rebeka. ²³Ibrahimor bai Nahuror bibi Milkar feṭo taki i aṭzon fuar zonom oisil. ²⁴Nahuror eḳ hangar bou asil, tair nam Ruma. Tair feṭo Ṭeboh, Gohom, Tohosh ar Maḳar zonom oisil.

Bibi Saerar inteḳal ar ḳoebor

¹Bibi Saera eḳ-sho shataish boros basila; Allae tane otodinor haeati disla. ²Bade Kenan deshor Kiriot-Orbo mani Hebrono inteḳal ḳorla. Ar Ibrahime tan lagi bout kanda-ḳaṭi ar ahazari ḳorla. ³Heshe tan murda bibir ges tone horia gia hou deshor Hiṭṭi oḳolre ḳoila, ⁴“Ami to bideshi musafir oia afnarar ono roiar. Meherbani ḳori ḳobrostan banaibar lagi amare tuṛa zomi deukka, ami amar samne tone amar murdare dafon ḳori.” ⁵Hiṭṭi oḳole tane ḳoila, ⁶“Huzur, amrar ḳota hunoukka. Afne to amrar maze Allar mohobbotor buzurg. Amrar gurustanor maze zeno fosond oe, ono-u afnar murdare dafon ḳoroukka. Tanre dafon ḳorar lagi amrar ḳeu-u nizor banail ḳoebor saṛte omot korto nae.” ⁷Ou Ibrahime ubaia hinor Hiṭṭi oḳolor samne mata nuaia ijjot kori ḳoila, ⁸“Amar bibire ino dafon ḳorat zudi afnarar kunu omot na taḳe, te doea ḳori amar arziḳan hunoukka. Afnara amar oia Shuhoror fua Ifrunre ḳoukka, ⁹tan zominor hesh matat Moḳfela ze guha ase, oḳanta zenu ḳobrostan bananir lagi tain fura dam loia amar gese besilain.” ¹⁰Aro Hiṭṭi oḳolor loge i shomoe Ifruno hono boat asla. Ibrahimor mator zuafe hou Hiṭṭi oḳolor samne Ifrune ḳoila, ¹¹“Na, na, afne doea ḳori amar matḳan hunoukka. Ami hoḳolor samne-u i zomi ar guha afnare dilailam, afnar murdare dafon ḳorilain.” ¹²Teu Ibrahime hirbar hinor hoḳolor samne mata nuaia, ¹³hi deshor hokkolre hunaia Ifrunre ḳoila, “Hunoukka, zomiḳanor dam ami dilai. Afne-o zomiḳanor dam neukkagi, bade amar murdare ono dafon ḳormu.” ¹⁴Ifrune tanre zuaf dila, ¹⁵“Huzur, amar ḳota hunoukka, ou zomiḳanor dam oilogi sair-sho tola rufa, te afnar-amar lagi ita kunta-u nae. Afnar murdare ḳoebor dilaukka.” ¹⁶Ou Ibrahime Ifrunor ḳota mania Hiṭṭi oḳolor samne tain, Ifrunor saoa dam mafik, faiḳari mafe sair-sho tola rufa tanre mafia dila.

¹⁷Ou laḳan Momri ṭaunor gese Moḳfelat Ifrunor ze zomin asil hou zomin ar honor guha ar zominor sairobae zoto gas-gasali asil, ¹⁸ita hoḳolta-u hinor Hiṭṭi oḳol ar ṭaunor mukor hoḳolor samne, Ibrahimor malikanae ailo. ¹⁹Bade Ibrahime Kenan deshor Momri ṭaun ba Hebronor Moḳfelar guhat tan bibi Saerare dafon ḳorla. ²⁰Ou laḳan Moḳfelar ou guha shoho asta zominḳan gurustanor lagi, Hiṭṭi oḳolor at tone Ibrahimor ato ailo.

Hozrot Isʼhak (a:) (24:1-26:35)

Hozrot Isʼhak (a:)-or bia

¹Ibrahim i shomoe kub murobbi ar zaoagir foti oigesoin. Mabude tanre hoḳolbae tone boroḳot nazil ḳorsla. ²Ar tan ḳas gulam, baṛir furan ze gulamor ufre tan hoḳoltar bar deoa asil tare ḳoila, “Tumar atḳan amar urator tole harao. ³Ami tumare asman-zominor malik Alla Mabudor name ḳosom ḳoraiar, ami ze Kenani oḳolor maze takiar, tarar kunu fuṛire amar fuar bou banaia tumi anio na. ⁴Tumi amar desho gia, amar fua Isʼhakor lagi amar ḳesh-kuṭumor maz taki egu ḳoina saia anbae.” ⁵Ou hi gulame tanre ḳoila, “Zudi kunu fuṛie amar loge i desho aite razi na oino, taile ze desh saṛia afne aisoin, afnar fuare ami hono loia zaitam ni?” ⁶Tain ḳoila, “Ḳobordar! Tumi amar fuare kunumonte-u hino loia zaio na. ⁷Ze asmani Alla Mabude amare, amar bafor baṛi ar zonom maṭi tone bar ḳoria anchoin, tain amar loge bat-soal ḳori ḳosom ḳoria ḳoisoin, i deshḳan tain amar oarish oḳolre diba. Tain tumar age-u tan firistare hono faṭaiba, zate amar fuar lagi tumi hon tone egu ḳoina antae faro. ⁸Zudi kunu fuṛie tumar loge aite razi na oe, te amar i ḳosom taki tumi ḳalas; ta-o amar fuare tumi kunu laḳan-u hino loia zaio na.” ⁹Ou hi gulame tan munib Ibrahimor urator tole at haraia oula ḳosom ḳorla.

¹⁰Bade hou gulame tan munibor uṭor fal taki doshṭa uṭ loila. Ar munibor bala bala zinish oḳol loia, Iram Nohoroim deshor zeno Nahur taḳta hobaedi roana oila. ¹¹Ar hainja bala zebla beṭinte fani anat baroin, ou shomoe hi gulame ṭaunor bare ek kuar ḳasat tan uṭ oḳolre toila. ¹²Toia ou dua ḳorla, “O Mabud, amar munib Ibrahimor Alla, aroz ḳori, aiz amar samne kamiabi zair ḳoro, ar amar munib Ibrahimre meherbani ḳoro. ¹³Deḳo, i ṭaunor fuṛinte fani neoat aira ar ami ino kuar ḳasat ubai roisi. ¹⁴Te ou fuṛintor maze ami zare ḳoimu, ‘Afnar ḳoila lamaia amare tuṛa fani ḳaoaukka’, er zuafe zudi hou fuṛie ḳoin, ‘Afne fani ḳaukka ar afnar uṭ oḳolre-o ami fani ḳaoaimu’ taile ou fuṛi-u zanu tumar gulam Isʼhakor lagi tumar fosondor fuṛi oino. Teu ami buzmu, tumi amar munibre meherbani ḳorlae.”

¹⁵Tan dua shesh na oiteu Botuelor fuṛi Rebekae ḳoila ḳaḳo loia ṭaun taki baroia aila. Ou Botuel oila Ibrahimor bai Nahuror Bibi Milkar fua. ¹⁶Rebeka asla kub shundori, abiati, shoti nari. Tain kua taki ḳoila boria zebla uṭia aira, ¹⁷ou shomoe-u Ibrahimor gulame douṛaia tan gese gia ḳoila, “Doea ḳori afnar ḳoila taki amare tuṛa fani ḳaoaukka.” ¹⁸Rebekae ḳoila, “Huzur, fani ḳaukka.” Ou ḳota ḳoia-u tain zoldi ḳori ḳoilaṭa ḳaḳo tone ato ania fani ḳaite dila. ¹⁹Fani ḳaoaibar bade Rebekae tanre ḳoila, “Ami afnar uṭ oḳolre-o tarar fias miṭaia fani ḳaoaimu, tara feṭ boria fani ḳaiba.” ²⁰Ḳoia-u tain zoldi ḳori fanir gamlat koilar fani ḍalia hirbar douṛaia kuar gese gela. Ar hoḳol uṭre fani tuli dila. ²¹Mabude tan i sofor kamiab ḳorsoin ki na iṭa zanar lagi hi gulame nirobe Rebekar bae sai roila.

²²Uṭ oḳole fani ḳaia harle, tain ada tolar eḳṭa shunar naḳor not ar dui ato dosh tolar duiṭa shunar bala Rebekare dia zikaila, ²³“Afnar babar nam kita? Afne ḳoukka sain, afnar bafor baṛit amrar rait taḳar zaga oibo ni?” ²⁴Rebekae ḳoila, “Amar babar nam Botuel. Dadar nam Nahur ar dadir nam Milka. ²⁵Te afnar uṭor ḳanir lagi amrar baṛit bout ker-busi ase ar roibar zaga-o ase.” ²⁶Ou hi gulame Mabudor soizda ḳoria ḳoila, ²⁷“Hokkol proshongsha Mabudor, zein amar munib Ibrahimor Alla. Tain amar malikre tan deoa oada raḳte ar imandari deḳaite faurisoin na. Tain amare-o fot sinaia amar munibor kuṭmor baṛit loia aisoin.”

²⁸Rebekae douṛaia gia tan maʼr baṛir hoḳolre ita zanaila. ²⁹Rebekar eḳ bair nam asil Labon. Ou Labone douṛaia kuar ḳasat aila enre deḳta ḳori. ³⁰Bonir ator bala ar naḳor not dekia, ar hi manshe zeta ḳoise ita hunia, tain aia deḳla, manushṭa kuar ḳandat tar uṭor gese ubai roise. ³¹Labone tanre ḳoila, “O Mabudor rohomotor manush, aukka. Bare ubai roisoin ḳene? Ami afnarar lagi gor, ar uṭor lagi zaga zuit koria aisi.” ³²Ou hi gulame tarar baṛit gia uṭ oḳolor gaiṭ lamaiteu, Labone ḳer ar busi ania dila. Tane ar tan logor hoḳolre at-fao doar fani-o dila. ³³Bade tan samne ḳani deoa oilo, teu tain ḳoila, “Ami kitar lagi ino aisi, ita na hunaia ḳani ḳaitam nae.” Labone ḳoila, “Te ḳoilaukka.”

³⁴Ou tain ḳoila, “Ami Ibrahimor gulam. ³⁵Amar malikre Mabude bout boroḳot nazil ḳorsoin, aiz tain bout doni-mani. Mabude tanre bout goru-meṛa, uṭ-gada, shuna-rufa, ar bandi-gulam disoin. ³⁶Tan bibi Saerar murobbi boeosho munibor eḳzon fua oisoin, ar ou fuare-u tain, tan hoḳolta dilaisoin. ³⁷Tain amare ḳosom ḳoraia ḳoisoin zen, tain ze desho boshot korra, hi Kenan deshor kunu fuṛire zate tan fuar bou na banai. ³⁸Er bodla tan bafor ar tan ḳandanor baṛit gia tan fuar lagi eḳzon ḳoina saia nei. ³⁹Ou ami amar munibre ḳoilam, ‘Zudi kunu fuṛi amar loge aite razi na oin?’ ⁴⁰Tain ḳoila, ‘Mabud, zanre ami kezmot kori, tain-u tan firistare faṭai diba, zate tumar sofor kamiab oe. Ar tumi amar nizor bongsho ar amar bafor ḳandan tone, egu fuṛire amar fuar lagi saia anbae. ⁴¹Tarar hino gele zudi tara kunu fuṛire na dein, taile tumi amar i ḳosom taki ḳalas faibae.’

⁴²“Ou aiz ami kuar gese aia dua ḳorlam, ‘O Mabud, amar munib Ibrahimor Alla, tumi zudi amar i sofor kamiab ḳoro taile, ⁴³deḳo, ami ou bora kuar gese ubai roisi, ar kunu fuṛie ono fani neoat aile ami ḳoimu, ḳoila taki amare tuṛa fani ḳaoao. ⁴⁴Ar zudi tai ḳoe, tumio fani ḳao ar tumar uṭ oḳolreo ami fani tulia dimu, taile ou fuṛi-u zanu amar munibor fuar lagi tumar fosond ḳora fuṛi oe.’

⁴⁵“Amar dua shesh na oiteu deki, Rebekae ḳoila ḳaḳo loia kuat aira fani tulta. Fani tular bade ami ḳoilam, ‘Doea ḳori amare tuṛa fani ḳaoaukka.’ ⁴⁶Tain zoldi ḳori ḳaḳo tone ḳoila lamaia amare ḳoila, ‘Ou nein, fani ḳain. Ami afnar uṭ oḳolreo fani ḳaoaimu.’ Teu ami fani ḳailam, ar tain amar uṭ oḳolreo fani ḳaoaila. ⁴⁷Bade ami tane zikailam, ‘Afne ḳar fuṛi?’ Tain ḳoila, ‘Ami Botuelor fuṛi, amar dadar nam Nahur ar dadir nam Milka.’ Ou ami tan naḳo not ar ato bala findaia dilam. ⁴⁸Bade ami Mabudor soizda ḳorlam. Ar zein amar munib Ibrahimor Alla, hou Mabudor shukur adae ḳorlam, tain-u amare ṭik fote salaia anchoin zate ami amar munibor batizire, tan fuar lagi tukaia fai. ⁴⁹Teu oḳon afnara amar munibor bae dorod ar insaf ḳorba ni, ḳoukka. Zudi na ḳoroin ta-o ḳoukka, zate ami ḍaine-baue zaitam fari.”

⁵⁰Ou Labon ar Botuele ḳoila, “Goṭona to Mabud takiu oise. Oḳon amrar bala-bura matar kunta-u nae. ⁵¹Ou deḳoukka, Rebeka to ono ase, te Mabudor hukum moto afnar munibor fuar bou banaibar lagi ere loia zaita farba.”

⁵²I mat hunia Ibrahimor gulame Mabudor soizda ḳorla. ⁵³Erbade tain shuna-rufar goena-gaṭi ar ḳafoṛ-sufoṛ bar ḳoria Rebekare dila, erloge Rebekar ma-baireo bout dami dami ufohar dila. ⁵⁴Bade tain ar tan logor hoḳole ḳaoa-daoa shesh ḳoria hoḳano-u rait kaṭaila. Biane gum taki uṭia tain ḳoila, “Amar munibor gese zaoar lagi amare bidae dilaukka.” ⁵⁵Teu Rebekar ma ar baie ḳoila, “Fuṛigu aro doshḳan din amrar gese taḳouk, bade zaibone.” ⁵⁶Ou hi gulame tarare ḳoila, “Mabude zebla amar i sofor kamiab ḳorsoin, taile amare deri na ḳoraia bidae dilaukka, amar munibor gese zaigi.” ⁵⁷Era ḳoila, “Amra taile fuṛire samne ania zikailai.” ⁵⁸Ar Rebekare ḍakia ania zikaila, “Tumi kita tan loge zaibae ni go?” Tain ḳoila, “Aichcha, zaimune.” ⁵⁹Ou tara Ibrahimor gulam ar tan logor manshor loge tarar boin ar tan bandi beṭire bidae dila. ⁶⁰Ar Rebekare dua ḳoria ḳoila, “Boin go, tumi laḳ laḳ aolador ma o. Tumar aolade dushmon oḳolre gail ḳorouk.” ⁶¹Rebeka ar tan bandi oḳole toiar oia uṭor ufre soṛia, Ibrahimor gulamor ḳore oia roana dila. Ou laḳan hou gulame Rebekare loia baroila.

⁶²Isʼhak i shomoe Negebo taḳta. Tain Ber-Lohoe-Rui namor zaga tone firot aila. ⁶³Eḳdin biali bala tain bondedi aṭat baroila. Aḳta-u souḳ tulia saia deḳla, ḳoeṭa uṭ aira. ⁶⁴Rebekae-o duroi tone Isʼhakre dekia-u uṭor ufor taki lami gela. ⁶⁵Ar hou gulamre zikaila, “Ou zein bondor mazedi amrar bae aira, ein ḳe?” Gulame ḳoila, “Ein to amar munib.” Ou Rebekae burkar forda lamai dila. ⁶⁶Ar hi gulame zeta zeta ḳoria aisoin, hoḳolta Isʼhakre zanaila. ⁶⁷Isʼhake tan ma Bibi Saerar tambut Rebekare loia gia tane bia ḳorla. Ar tanre maea ḳorla. Tan maʼr moutor bade, Rebekar maeae-u tan zano shanti faisla.

Bibi Katurar goro Hozrot Ibrahim (a:)-or ḳandan

¹Ibrahime Katura namor aro eḳzon beṭire bia ḳorsla. ²Tan feṭo Zimron, Zokshon, Modan, Madian, Zishboḳ ar Shuhar zonom oisil. ³Shaba ar Dodan oila Zokshonor aolad. Ashuri, Loṭushi, Liummi oḳol oila Dodanor aolad. ⁴Madianor aolad oila Oifa, Efor, Honuk, Obid ar Ildaea. Era hoḳol-u Katurar aolad. ⁵Ibrahime tan hoḳolta Isʼhakre dilaila. ⁶Oile tain zinda taḳte-u, tan heshor biar aolad oḳolre-o alga alga dan ḳoria, erare Isʼhakor loge na rakia fubedi, fubor desho faṭai dila.

Hozrot Ibrahim (a:)-or inteḳal ar ḳoebor

⁷Ibrahim eḳ-sho fosottoir boros basila, Allae tane otodinor haeati disla. ⁸Tain murobbi oia furafur buṛa boeosho inteḳal ḳorla, ar tan baf-dadar gese gia azila. ⁹Heshe tan fua Ismail ar Isʼhake Momri ṭaunor fubedi, Hiṭṭi Shuhoror fua Ifrunor zomir Moḳfela-guhat, tanre dafon ḳorla. ¹⁰I zomiḳan tain Hiṭṭi oḳolor ges tone loisla. Ono-u tan bibi Saerare ar tane dafon ḳora oise. ¹¹Ibrahimor moutor bade Allae tan fua Isʼhakre boroḳot nazil ḳorla. Tain Ber-Lohoe-Ruir gese roita.

Hozrot Ismail (a:)-or inteḳal ar ḳandan

¹²Ou oilo Ismailor ḳandanor boean. Bibi Saerar bandi Mishori Hazerar feṭo Ibrahimor fua Ismailor zonom oisil. ¹³Ou oilo Ismailor aolador nam ar gusṭir boean. Tan boṛo fuar nam Nabaut, bade Ḳaedar, Odbel, Mibsom, ¹⁴Mishma, Duma, Masa, ¹⁵Hodod, Tema, Ziṭur, Nafish ar Kedma. ¹⁶Ismailor ou barozon fua asla baro gusṭir shordar. Tarar namor laḳan hi gau ar tambu bisail zagaro ou nam oisil. ¹⁷Ismailor haeat eḳ-sho shaṛtish boros asil, heshe tain mara gela ar tan baf-dadar gese gelagi. ¹⁸Hobila tone Ashiriar bae Mishoror samnor Shur forzonto tan aolad oḳol roita. Ismaile tan hoḳol baiaintor galabae roar zaga faila.

Hozrot Isʼhak (a:) ar tan bai Shek Ish

¹⁹Ou oilo Ibrahimor fua Isʼhakor ḳandan-nama. Ibrahimor goro Isʼhakor zonom oilo. ²⁰Isʼhake sallish boros boeosho tan mamur goror boin Rebekare anaia bia ḳorla. Rebeka oila Foddon-Iram deshor Irami Botuelor fuṛi, Irami Labonor boin. ²¹Tan bou ni-aoladi asla gotike, Isʼhake Mabudor gese dua ḳorla. Mabude tan dua ḳobul ḳorla, ar Rebekar feṭo hurutta ailo. ²²Bade feṭor bitre huruttae loṛa-soṛa ḳorat lagla. Ou tain ḳoila, “Amar feṭo ila lager ḳene?” Ḳaron zanar lagi tain Mabudor gese dua ḳorla. ²³Mabude tanre ḳoila, “Tumar feṭo duiṭa zati ase, feṭo tone-u tara dui bongsho oia foeda oiba. Eḳ bongsho tone aroḳ bongsho shoktiala oibo, ar boṛogue hurugur kezmot korbo.” ²⁴Hurutta foedar bala deḳoin, hasa-u tan feṭo zuṛor fua. ²⁵Foela zar zonom oilo he lal rongor ar tar shorilo foshomi ḳafṛor laḳan rumae bora. Tar nam raḳla Ish [mani, ruma-ala]. ²⁶Bade Ishor faor murat dori tar bair zonom oilo, er nam raḳla Iakub [mani, faot dorra]. Isʼhakor shaiṭ boros boeosho era zuṛe foeda oila.

²⁷Ou fuain boṛo oar bade Ish kub bala shikari ar morubumit faḳaora oila, oile Iakub asla nirai-zirai, tain tambut taḳta. ²⁸Shikaror gust moza lagto ḳori Isʼhake Ishre maea ḳorta, ar Rebekae Iakubre maea ḳorta.

²⁹Eḳdin Iakube ḍail randisoin, ou shomoe tan boṛo bai Ish morubumi taki feṭor buke kub ḳator oia aila, aia huru bai Iakubre ḳoila, ³⁰“Baire, amar kub buk lagse. Te ou rongil, rongil ota amare feṭ bori ḳaite de.” Ou ḳotar lagi tan siṛ laglo Idum [mani, rongil]. ³¹Iakube ḳoila, “Taile boṛo bai oar malikana, tumi aiz amar gese besilao.” ³²Ishe ḳoila, “Deḳo, amar zan baroizar, ar boṛo bair malikanadi ar kita ḳortam?” ³³Iakube ḳoila, “Age tumi amar gese ḳosom ḳoro.” Ou Ishe ḳosom ḳoria boṛo bai oar malikana Iakubor gese besilaila. ³⁴Bade Iakube Ishre ḍail ar ruṭi ḳaite dila. Ḳaoa-daoa ḳoria tain uṭia gelagi. Ou laḳan Ishe boṛo fua oar kunu dam-u raḳla na.

Hozrot Isʼhak (a:)-or gese Allar oada

¹Ibrahimor zomanar laḳan ifira-o desho hirbar eḳ nidan deḳa dilo. Teu Isʼhak Gerar ṭauno Filistini oḳolor bashsha Abimalikor gese gelagi. ²Ar Mabude Isʼhakre didar dia ḳoila, “Tumi Mishoro lamia zaio na. Ami tumare ze deshor ḳota ḳoimu, ono-u takio. ³Ou desho tumi musafir oia ro. Ami tumar loge roia, tumare boroḳot nazil ḳormu. I desh oḳol ami tumare ar tumar oarish oḳolre dimu. Ar tumar baf Ibrahimor gese ami ze ḳosom ḳorslam, oḳṭa fura ḳormu. ⁴Ami tumar oarish oḳolre asmanor terar laḳan behishab ḳormu, ou desh oḳol-o tarare dimu. Tumar oarishredi, duniair hoḳol zatie boroḳot hasil ḳorba. ⁵Ibrahime amar mat hunia, amar hukum, amar ain ar amar shoriot oḳol amol ḳorse.”

⁶Ougi Isʼhak Gerar ṭauno roila. ⁷Ar hinor manshe tan bour ḳota zikaile, tain ḳoila ein amar boin. Enre bou ḳoite tain ḍoraila, mone ḳorla, Rebeka shundori ḳoria hinor manshe Rebekare neoar lagi tanre kun ḳoriliba. ⁸Isʼhak bout din hono roar bade eḳdin Filistini oḳolor bashsha Abimalike tan kiṛki baedi saia malum ḳorla, Isʼhake tan bibi Rebekare maea ḳorra. ⁹Dekia tain Isʼhakre neoaia ḳoila, “Deḳoukka, Rebeka to asole afnar bibi, te afne ḳene tanre afnar boin ḳoila?” Isʼhake zuaf dila, “Ami mone ḳorslam tair lagi amar zan araimu.” ¹⁰Teu Abimalike ḳoila, “Amrar loge afne ita kita bebohar ḳorla? Zekunu manshe to afnar bibir loge mila-misha ḳorto sailo one ar afne amrare dushi banaila one.” ¹¹Bade Abimalike hoḳol manshore ou hukum zari ḳorla, ḳeu zudi Isʼhak ba tan bibir shorilo at dey, tare nichoe ḳatol ḳora oibo.

¹²Ar Isʼhake hi boros ḳet koria tan zomino rua bis taki eḳ-sho gun beshi foshol faila, Mabude tanre oula boroḳot nazil ḳorla. ¹³Tan ḳali baṛteu laglo, aste aste tain kub maldar oigela. ¹⁴Tan goru-sagol ar gulam-bandi oula baṛlo zen, ita dekia Filistini oḳole ingshaita lagla. ¹⁵Ar tan baf Ibrahimor amolo, tan gulam oḳole ze kua oḳol kudisla, Filistini oḳole iguin maṭidi boria bond ḳorilaisla. ¹⁶Bade Abimalike Isʼhakre ḳoila, “Afne amrar ges tone zaukkagi, afne to amra tone beshi shoktiala oigesoin.”

¹⁷Ou Isʼhake hon tone horia gia Gerar mora gangor soro tambu gaṛia roila. ¹⁸Ar tan baf Ibrahimor amolor kuda kuain, tain hirbar kudila, ḳaron Ibrahimor moutor bade Filistini oḳole ita borilaisla. Ar tan bafe ou kuaintor ze nam raḳsla, tain-o ou nam raḳla. ¹⁹Isʼhakor gulam oḳole ou gangor soro kudia fanir futala ek kua faila. ²⁰Ar Geraror raḳal oḳole tan raḳal oḳolor loge dorbar ḳoria ḳoilo, i fani amrar. Ou tain i kuar nam raḳla Eshoḳ [mani, dorbar]. ²¹Bade Isʼhakor raḳal oḳole aro ek kua kudila, ar iṭa loiao tara dorbar ḳorla. Ou tain iṭar nam raḳla Shiṭna [mani, dushmoni]. ²²Heshe tain hon tone horia gia aro ek kua kudaila, ifira tara ar kunu dorbar ḳorla na. Teu Isʼhake ou kuar nam raḳla Rohobot [mani, bout zaga]. Tain ḳoila, “Oḳon Mabude-u amrare bout zaga dila, amra i desho aro baṛtam farmu.”

²³Bade Isʼhake hon tone horia Ber-Shebat gelagi. ²⁴Hou rait-u Mabude tanre didar dia ḳoila, “Ami tumar baf Ibrahimor Alla. Tumi ḍoraio na, amar gulam Ibrahimor ḳatire ami tumar loge asi. Ami tumare boroḳot nazil ḳormu ar tumar bongsho baṛaimu.” ²⁵Ou Isʼhake hono ekkan kurbani ḳana banaia Mabudor nam loila. Hono tain tan tambu gaṛila ar tan gulam oḳle ek kua kudila.

²⁶Bade Abimalike tan uzir Ohuzot ar shenapoti Fikulre loia Gerar taki Isʼhakor gese aila. ²⁷Isʼhake erare ḳoila, “Afnara amar gese kitar lagi aila? Afnara to ingsha ḳoria amare afnarar ges tone ḳedai dilaisoin.” ²⁸Tara ḳoila, “Amra oḳon saf buziar zen, Mabud afnar loge asoin. Erlagi afnar loge amrar egu oada oizauk. Aukka, amra eḳ chukti ḳorilai. ²⁹Amra zela afnare soisi na ar afnar balai saṛa kunu ḳeti ḳorsi na, zela afnare shantie bidae disi, oula afne-o amrare ḳeti ḳorta na. Afne-u to Mabudor boroḳotor manush.” ³⁰Bade Isʼhake tarar lagi ḳana-dana zuit korle, tara ḳana-dana ḳorla. ³¹Bador din biane uṭia tara duiozone ḳosom ḳorla. Ar Isʼhake tarare bidae dile, tara dilor maze shanti faia roana oila. ³²Hou dinu tan gulam oḳole aia tarar kuda ek kuar ḳobor zanaila, tara fanir lagal faisoin. ³³Ou tain er nam dila Sheba [mani, ḳosom]. Erlagi aiz-o hinor nam Ber-Sheba roise.

³⁴Ishe sallish boros boeosho Hiṭṭi Berir fuṛi Zihudit ar Hiṭṭi Elonor fuṛi Bashomotre shadi ḳorla. ³⁵I duio beṭie Isʼhak ar Rebekar zanor maze kub duḳ dila.

Hozrot Iakub (a:) (27:1–36:43)

Hozrot Isʼhak (a:)-e huru fuare dua dila

¹Murobbi boeosho Isʼhakor souḳor zuti ḳomi zaoae tain ar souḳe deḳta na. Tain tan boṛo fua Ishre anaia ḳoila, “Babare.” Ishe zuaf dila, “Ounu ami.” ²Tain ḳoila, “Deḳo, ami to buṛa oigesi, kun din morizimu ḳoitam fariar na. ³Tumi egu ḳam ḳoro; tumar atiar, tir donuḳ loia zongolo shikaro zao, ar amar lagi kunta shikar ḳoria, ⁴amar fosondor bala ḳani toiar ḳori ano, teu morar age ita ḳaia amar zane tumare dua dibo.”

⁵Isʼhake zebla tan fua Ishor loge ita matira, i shomoe Rebekae ita hunsila. Teu Ish zebla shikaro gelagi, ⁶tain aia tan fua Iakubre ḳoila, “Huno, ami hunlam tumar bafe tumar bai Ishre ḳoira, ⁷‘Tumi amar lagi kunta shikar ḳori bala ḳani toiar ḳoro, teu ami morar age ota ḳaia, Mabudor samne tumare dua dimu.’ ⁸Te re fut, ami tumare oḳon zeta ḳortae ḳoimu, tumi oula hunio. ⁹Tumi gia fal taki duiṭa taza ḳoshi ano. Ami itadi tumar bafor shoḳor ḳani, asanoḳ moza ḳori randia dei. ¹⁰Teu tumi ota loia tumar bafor gese zaio, tain ita ḳaia morar age tumare dua ḳorba.” ¹¹Iakube tan maʼre ḳoila, “Huno, amar bai Ishor shoril to ruma-ala, amar shorilo to ruma nae. ¹²Zudi babae amar shorilo atain, te mono ḳorba ami tane duka diar, taile ami duar bodla aro lannot ḍakia anmu.” ¹³Teu tan maʼe ḳoila, “Futre, tumar i lannot amar ufre-u foṛouk. Tumi ḳali amar matḳan huno ar ḳoshiguin ania deo.” ¹⁴Ou Iakube gia ḳoshi ania tan maʼre dila. Ar tan bafe zela shok koroin, tain oula moza ḳori randila. ¹⁵Bade tain goror maze toa boṛo fua Ishor bala bala ḳafoṛ-sufoṛ ania tan huru fua Iakubre findaila. ¹⁶Iakubor ato ar golat ze zagat ruma nae, hou zagat ou ḳoshir samṛa lagai dila. ¹⁷Ar nizor randa hou mozar ḳani ar ruṭi tan fua Iakubor ato dila.

¹⁸Iakube tan bafor gese gia ḍak dila, “Baba.” Isʼhake zuaf dila, “Ounu ami, tumi ḳe re fut?” ¹⁹Iakube tan bafore ḳoila, “Ami afnar boṛo fua Ish. Afne amare zela ḳoisla, ami oula ḳorsi. Doea ḳori uṭia boukka, amar shikaror gust kaukka, ḳaia harle afne amare dua diba.” ²⁰Isʼhake tan fuare ḳoila, “Babare, tumi oto zoldi shikar failae kila?” Tain ḳoila, “Afnar Mabud Allae milai disoin.” ²¹Ou Isʼhake Iakubre ḳoila, “Baba, amar ḳasat ao teu tumar gotro at dia buzmu, tumi hasa-u amar fua Ish ni.” ²²Iakub tan baf Isʼhakor aro ḳasat gela. Tain shorilo ataia ḳoila, “Golar aoazṭa Iakubor, oile at duioḳan to Ishor.” ²³Iakubor at tan bai Ishor moto rume bora asil ḳori Isʼhake tanre sinla na. Ou tain Iakubre dua dila. ²⁴Tain zikaila, “Tumi kita hasa-u amar fua Ish ni?” Iakube ḳoila, “Ji oe baba.” ²⁵Ou Isʼhake ḳoila, “Fuar shikaror gust amar gese ano, ita ḳaia harle amar zane tumare dua dibo.” Iakube gust loia aile tain ḳaila. Bade tanre anguror rosh dile tain eota ḳaila. ²⁶Heshe tan bafe ḳoila, “O fut ao, ḳasat aia amare hunga deo.” ²⁷Ou Iakube ḳasat gia hunga dila, ar Isʼhake tan shorilor ḳafoṛor geran hungia tanre dua dila, “Deḳo, amar fuar geran to Mabudor boroḳoti ḳetor geranor laḳan. ²⁸Allae asmanor kua tone ar roshail zomin tone tumare deukka; bout foshol ar anguror rosh tumare deukka. ²⁹Hoḳol manush tumar gulam ouk, hoḳol zatie tumar gese mata nuauk. Nizor zator maze tumi boṛo murobbi o, tumar maʼr feṭor baiainte tumar gese mata nuauk. Ze tumare lannot dibo, tar ufre lannot foṛouk. Ze tumare dua ḳorbo, he rohomoti ouk.”

Shek Ishe babaiti faona dua araila

³⁰Isʼhake Iakubre dua ḳora shesh oile, Iakub tan baf Isʼhakor samne tone horte-u, tan bai Ishe shikar loia goro aila. ³¹Taino bala ḳani toiar ḳoria bafor gese loia aia ḳoila, “Baba, uṭia boia afnar fuar shikaror gust kaukka, ḳaia harle afnar zane amare dua diba.” ³²Ou tan bafe ḳoila, “Tumi ḳe?” Tain ḳoila, “Baba, ami to afnar boṛo fua Ish.” ³³Ar Isʼhakor shorilo bezuita ḳafa shuru oilo. Ḳafi ḳafi tain ḳoila, “Taile amar gese shikaror gust loia ze aisil, he ḳe? Tumi aibar age-u ami ota ḳaia tare dua ḳorsi, ar duar fol he-u faibo.” ³⁴Bafor mat hunia-u Ishe ekebare buk bangia sillaia tan bafore ḳoila, “Bazan, amare, amare-o dua ḳoro!” ³⁵Isʼhake ḳoila, “Tumar baie aia soturi ḳoria tumar faona dua nisegi.” ³⁶Ishe ḳoila, “Tar nam Iakub [mani, dukabaz] nae ni? Hasa-u he duibar amare duka dise. Boṛo fua hishabe amar malikana he age suri ḳori nisil, ar deḳoukka, i fira amar dua-o loia gelogi.” Tain firia ḳoila, “Afne amar lagi kunu dua-u raḳsoin na ni?” ³⁷Isʼhake zuaf dila, “Huno, ami tare tumar neta banaisi, ar tar gusṭire tar gulam banaisi, tare foshol ar anguror rosh dia samani ḳorsi; oḳon tumar lagi ar kita ḳortamre fut?” ³⁸Ishe firia tan bafore ḳoila, “O bazan, afnar gese kita ou eḳ dua-u asil ni? Bazan reba, afne amare, amare-o dua ḳoroukka!” Ota ḳoia tain zure zure sillaia ḳandat lagla.

³⁹Ou tan baf Isʼhake ḳoila, “Tumar boshotḳanar maṭi nirosh oibo, hino asmanor kuao foṛto nae. ⁴⁰Toluar-u tumar zindegi oibo, ar nizor bair gulam oibae; oile zebla tumi na-manra oizibae, ou shomoe nizor gordona taki tar zual horaibae.”

Hozrot Iakub (a:) Shek Ishor ges tone bagila

⁴¹Iakube tan bafor ges tone dua faisla ḳori Ishe tanre ingshaita lagla. Ishe mone mone ḳoila, “Amar bafor lagi moutor ḳandonor din aichche. Erbade-u tare kun ḳormu.” ⁴²Rebekae tan boṛo fua Ishor ita mata-mati hunla, teu huru fua Iakubre anaia ḳoila, “Huno, tumar bai Ishe tumare kun ḳorar niote dilre bandilaise. ⁴³Amar fut, tumi amar matḳan huno, tumi Haran ṭauno amar bai Labonor gese horia zaogi, ⁴⁴ar tumar bair gusa na ḳoma forzonto tan gese taḳo. ⁴⁵Tar gusa ḳomigele, tumi tar loge zeta ḳorso ita he faurilile, ami ḳobriadi tumare anaimu. Kitallagi ami eḳdine tumra duiozonre araitam?”

⁴⁶Bade Rebekae Isʼhakre ḳoila, “Ou Hiṭṭi fuṛintor lagi amar ar basar shad nai. Iakube-o zudi ou laḳan, i deshor kunu Hiṭṭi fuṛire shadi ḳorilae, taile amar ar basia-u lab kita?”

¹Rebekar mat hunia Isʼhake, Iakubre anaia dua ḳorla ar ou hukum dila, “Tumi Kenan deshor kunu fuṛire bia ḳorio na. ²Tumi Foddon-Iram desho tumar nana Botuelor baṛit zaogi, hono tumar mamu Labonor kunu fuṛire bia ḳorio. ³Shorbo-shoktiman Allae tumare boroḳot nazil ḳoroukka ar foldar ḳoria bout baṛaukka, zate ḳori tumi bout gusṭiala zati o. ⁴Ze boroḳot tain Ibrahimre nazil ḳorsla, hou boroḳot tain tumare ar tumar bongshore dan ḳoroukka. Ar ze desh Allae Ibrahimre disoin, zeḳano tumi oḳon musafir aso, i deshḳan zanu tumar oe.” ⁵Bade Isʼhake Iakubre bidae dila, ar tain Foddon-Iramo Irami Botuelor fua Labonor gese roana oila. Labon oila Rebekar bai, Iakub ar Ishor mamu.

Hozrot Ismail (a:)-or fuṛir loge Shek Ishor bia

⁶Ishe zebla hunla, Isʼhake Iakubre dua ḳoria bia ḳoranir niote Foddon-Iramo faṭaisoin ar Kenani fuṛintore bia ḳorte nished ḳorsoin, ⁷ar Iakube tan ma-bafor hukume Foddon-Iramo gesoingi, ⁸ou Ishe buzla zen, tan baf Isʼhak Kenani beṭintor ufre kushi nae. ⁹Erlagi dui bou taḳle-o tain Ibrahimor fua Ismailor gese gia tan fuṛi Moholotre bia ḳorla. Moholot oila Nabautor boin.

Betelo Hozrot Iakub (a:)-or kuab

¹⁰Ar Iakube Ber-Sheba saṛia tan mamur baṛi Haran ṭaunor bae roana dila. ¹¹Foto eḳ zagat shuruz ḍubi gele tain honou rait kaṭaila. Honor fattordi hitan dia Iakube gumaita ḳori hutila. ¹²Hutia harle kuabe deḳla, duniair ufre ekkan moi ubai roise, i moir mata asmano lagail. Tain deḳla Allar firista oḳole ogubae uṭa-nama ḳorra, ¹³ar Mabude er ufre ubaia ḳoira, “Ami Mabud, tumar baf-dadain Ibrahimor Alla ar Isʼhakor Alla. Tumi ou ze zomino hutiso, iṭa ami tumare ar tumar oarish oḳolre dimu. ¹⁴Tumar oarish oḳol duniair duil-balur laḳan behishab oiba. Ar fube-foisme, utore-douḳne sairobae meliziba. Tumi ar tumar bongshor mazedi duniair hokkol zatie boroḳot hasil ḳorba. ¹⁵Ami tumar loge loge asi, tumi zeno-u zao na ḳene ami tumare hefazot kormu ar ou desho hirbar tumare firaia anmu. Ami tumare zeta zeta ḳoisi ita hasil oar age, tumare saṛtam nae.” ¹⁶Bade Iakube gum taki uṭia ḳoila, “Taile hasa-u Mabud ino asoin, ami to zantam na.” ¹⁷Ou tain ḍoraia ḳoila, “Kizat gorom i zaga! Ikan nichchoe Allar gor, oḳano-u behestor duar.”

¹⁸Tain fozoror shomoe uṭia, ze fattorṭa tan matar tole hitan disla, ikṭa kuṭir moto ḳori gaṛia er ufre tel ḍalila. ¹⁹Ar hi zagar nam raḳla Betel [mani, Baetulla], inor agor nam asil Luz. ²⁰Bade Iakube ḳosom ḳaia ḳoila, “Allae zudi amar i soforo hefazot koroin, tain amar ḳani-kuraḳ, findar lebas zugai dein, ²¹ami hirbar sohi-salamote bafor baṛit firia ai, te ou Mabudre-u amar Alla manmu. ²²Ar ou ze fattor ami kuṭi gaṛia toilam, ono Baetulla shorif oibo. Ar tumi amare zotota dibae, er dosh baṭor eḳ baṭ ami nichoe tumare dilaimu.”

Hozrot Iakub (a:) mamar baṛit gela

¹Bade Iakube aṭi aṭi fubor deshor manshor elaḳat gelagi. ²Gia honor bondor maze ek kua deḳla. Hou kuar gese tin fal meṛa hutiroise; raḳal oḳole on tone tarare fani ḳaoain. Ar kuar muko boṛo eḳ fattor toa oise. ³Hoḳol meṛar fal zebla ekḳano oito, teu raḳal oḳole kuar muk tone fattorgu horai dia meṛaintore fani ḳaoaito. Bade fattorre hirbar kuar muko toito.

⁴Iakube tarare zikaila, “Bai oḳol, afnara kun zagar manush?” Tara ḳoila, “Haran ṭaunor.” ⁵Ou tain ḳoila, “Afnara Nahuror nati Labonre sinoin ni?” Tara ḳoila, “Ji oe, sini.” ⁶Iakube zikaila, “Tain bala asoin ni?” Tara ḳoila, “Ji oe, bala asoin. Ounu tan fuṛi Rahelae meṛar fal loia aira.” ⁷Tain ḳoila, “Deḳoukka, oḳono bout beil ase. Te foshu oḳol ekḳano oibar shomoe to oise na. Afnara meṛaintore fani ḳaoaia hirbar raḳat loia zaingi.” ⁸Tara ḳoila, “Na, amra ila ḳortam fari na, hokkol fal ekḳano dola oile bade kuar muk tone fattor horaia amra meṛaintore fani ḳaoai.”

⁹Tain oḳono tarar loge mato roisoin, ou shomoe Rahelae tan bafor meṛar fal loia ono aila, tain i falor raḳalit asla. ¹⁰Iakube tan mamu Labonor fuṛi Rahelare ar tan meṛar fal dekia-u kuar gese gia kuar muk tone fattorṭa horaia meṛaintore fani ḳaoaila. ¹¹Bade tain Rahelare maea dia zure zure ḳandita lagla. ¹²Ar tain Rahelare ḳoila zen, tain Labonor baigna, Rebekar fua. Ou Rahelae douṛaia gia tan bafore i ḳobor dila.

¹³Labone tan baigna Iakubor ḳobor hunia douṛaia tan loge deḳa ḳorat aila. Tanre ainja ḳori doria hunga dia baṛit loia gela. Gia harle Iakube Labonre tan aibar hokkolta zanaila. ¹⁴Labone ḳoila, “Tumi to amar-u zan ar amar-u gus.” Ar Iakub Labonor baṛit eḳ mash roila.

Hozrot Iakub (a:)-or dui bia

¹⁵Eḳ mash bade Labone Iakubre ḳoila, “Tumi amar kuṭum oilae ḳori bina betone amar saḳri ḳortae ni ba? Tumare kita ditam, ḳoilao.” ¹⁶Labonor duiṭa fuṛi asil. Boṛogur nam Lea ar hurugur nam Rahela. ¹⁷Lear ḳali souḳ-u shundor asil, oile Rahelar goṭon ar sehara-surot, hokkolta shundor asil. ¹⁸Iakube Rahelare fosond ḳorta ḳori tain ḳoila, “Afnar huru fuṛi Rahelar lagi ami shat boros afnar gulami ḳormu.” ¹⁹Labone ḳoila, “Rahelare manshor ato deoar saite tumar gese deoa-u bala. Tumi amar gese ro.” ²⁰Teu Iakube Rahelar lagi shat boros gulami ḳorla. Rahelare mohobbot korta ḳori, ita eḳo boros tan gese eḳ dinor homan mono oilo.

²¹Heshe tain Labonre ḳoila, “Amar gulamir miad furigese. Oḳon amar boure amar ato shomzaia deukka, ami tair gese roitam sai.” ²²Teu Labone hou elaḳar hoḳol manshore biar daot koria ḳana-dana ḳaoaila. ²³Heshe rait oile tain tan fuṛi Leare Iakubor gese dila, ar Iakube en loge roila. ²⁴Labone nizor bandi Zilpare, tan fuṛi Lear bandigirit dila. ²⁵Oile biane uṭia deḳoin, ein to Lea. Teu Iakube Labonre ḳoila, “Afne amar loge ita kun zator ḳam ḳorla? Otodin ami Rahelar lagi afnar gulami ḳorsi nae ni? Te amare duka dila ḳene?” ²⁶Labone ḳoila, “Boṛo fuṛir age huru fuṛir bia deoa amrar deshor sol nae. ²⁷Tumi biar kushi-bashir haftaṭa faroite deo. Teu hi fuṛireo tumar gese bia dimu, oile tumi aro shat boros amar gulami ḳorte oibo.” ²⁸Iakube tan ḳota mania ou kushi-bashir hafta far ḳorla. Bade Labone tan fuṛi Rahelare-o Iakubor gese shadi dila. ²⁹Ar tan bandi Bilhare Rahelar bandigirit dila. ³⁰Iakube Rahelar loge-o roila, tain Lear saite Rahelare beshi maea ḳorta. Bade tain aro shat boros tan mamu Labonor gulami ḳorla.

³¹Oile Leare maea na ḳorae, Mabude Leare hurutta foedar ḳemota dila, ar Rahela ni-aoladi roila. ³²Ar Lear goro eḳ fua oilo. Tain fuar nam raḳla Ruben [mani, fuare deḳo]. Tain ḳoila, “Mabude amar duḳ deḳsoin, oḳon nichchoe amar zamaie amare maea ḳorba.” ³³Bade hirbar tan goro eḳ fua oilo. Tain fuar nam raḳla Shimion [mani, hunoin] tain ḳoila, “Amare elami ḳorar ḳota Mabude hunchoin, erlagi tain amare ou fua disoin.” ³⁴Bade hirbar tan goro eḳ fua oilo. Tain ḳoila, “Oḳon amar zamaie amar loge ashik oiba, tan tinṭa fua amar feṭ tone foeda oilo.” Ou er nam raḳla Lebi [mani, ashik]. ³⁵Bade hirbar tan aro eḳ fua oile tain ḳoila, “Ifira ami Mabudor tarif ḳormu.” Ar tain ou fuar nam raḳla Ehuda [mani, tarif]. Erbade tan hurutta oa bond oigelo.

¹Rahelae zebla deḳla, tan goro Iakubor kunu aolad oira na, ou shomoe tan bonir bae ingsha foeda oilo. Tain Iakubre ḳoila, “Amare aolad deo, naile ami morizimu!” ²Teu Rahelar loge Iakube kub gusa ḳoria ḳoila, “Ami kunu Alla ni? Tain-u to tumar feṭ bond ḳori disoin.” ³Rahelae ḳoila, “Hunoukka, amar bandi Bilha ono ase, afne tair gese zaukka, tairedi hurutta faia ami-o hurutta-ala oizitam fari.” ⁴Oḳan ḳoia hari Rahelae tan bandi Bilhare Iakubor gese hanga dila, ar Iakub tair gese roila. ⁵Teu Bilhar goro Iakubor eḳ fua oilo. ⁶Ar Rahelae ḳoila, “Allae amare insaf ḳorsoin, ar amar ahazari hunia egu fua disoin.” Tain i fuar nam raḳla Dan [mani, insaf]. ⁷Bade Rahelar bandi Bilhar goro hirbar Iakubor dusra fua foeda oilo. ⁸Ar Rahelae ḳoila, “Boinor loge moha laṛait ami zitsi.” Ou tain i fuar nam raḳla Noftali [mani, laṛai].

⁹Leae zebla deḳla tan goro ar hurutta oira na, teu tain-o tan bandi Zilpare Iakubor gese hanga dila. ¹⁰Teu Lear bandi Zilpar feṭo Iakubor eḳ fua oilo. ¹¹Ar Leae ḳoila, “Amar ḳofal kulche!” Tain er nam raḳla Sadu [mani, ḳofal]. ¹²Bade Lear bandi Zilpar goro Iakubor aroḳ fua oilo. ¹³Ar Leae ḳoila, “Amar ḳoto shuk! Hoḳol beṭinte amare shuki ḳoiba.” Teu tain i fuar nam raḳla Ashir [mani, shuki].

¹⁴Gom daoar shomoe Rubene bondo gia kisu dutora-guṭa faia, tan ma Lear gese ania dila. Ar Rahelae Leare ḳoila, “Tumar fuar ḳoegu dutora-guṭa amare deo sain.” ¹⁵Leae ḳoila, “Tumi amar zamaire doḳol ḳorso, itae oise na ni? Oḳon amar fuar dutora-guṭa-o sairae ni?” Rahelae ḳoila, “Taile tumar fuar dutora-guṭar bodla aiz rait tain tumar loge roibane.” ¹⁶Hainja bala Iakube bondo tone aiteu Leae baroia tane ḳoila, “Aiz amar loge roibae, ḳaron amar fuar dutora-guṭar bodla ami tumare aolat nisi.” Ou hi rait tain Lear goro hutila. ¹⁷Allae Lear dua ḳobul ḳorae, tan goro Iakubor fas nombor fuar zonom oilo. ¹⁸Ou Leae ḳoila, “Amar zamair gese amar bandire dislam ḳori, Allae amare er bodla dila.” Erlagi tain i fuar nam raḳla Isaḳor [mani, bodla]. ¹⁹Bade hirbar Lear goro Iakubor soe nombor fuar zonom oilo. ²⁰Leae ḳoila, “Allae amare bout boṛo eḳ niamot dila. Oḳon amar zamaie amare dam diba, ḳaron ami tan soegu fuar zonom disi.” Tain i fuar nam raḳla Sobulon [mani, dam]. ²¹Heshe Lear eḳ fuṛi oilo, tair nam raḳla Dina.

²²Allae Rahelar bae-o kial ḳorla. Tain Rahelar dua ḳobul ḳoria, tanre hurutta foedar takkot dila. ²³Ar Rahelar goro eḳ fua oile tain ḳoila, “Allae amar shorom horaisoin.” ²⁴Tain i fuar nam raḳla Iusuf [mani, baṛani]. Tain ḳoila, “Mabude amare arogu fua baṛai deukka.”

Hozrot Iakub (a:)-or don-shompod baṛise

²⁵Rahelar goro Iusuf oar bade, Iakube Labonre ḳoila, “Oḳon amare bidae dilaukka, ami nizor deshor baṛit zaigi. ²⁶Afne to zanoin, ami kila afnar gulami ḳorsi, ami amar bouain ar fua-fuṛir lagi afnar gulami ḳorsi. Oḳon tarare loia amare zaite deukka.” ²⁷Labone tanre ḳoila, “Amar lagi zudi tumar maea taḳe, te zaio na. Ami alamote buziar zen, tumar ḳatire Mabude amare-o boroḳot nazil ḳorsoin. ²⁸Tumar beton tumi nize-u ḳoilao. Ami tumare ola-u dimu.” ²⁹Ou Iakube tanre ḳoila, “Ami kila afnar gulami ḳorsi, ar amar ato afnar foshur fal kilaḳan oise, ita afne-u zanoin. ³⁰Ami aoar age afne gorib asla. Ar oḳon to baṛia boutta oise. Amar ḳarone Mabude afnare bout boroḳot disoin. Oile amar nizor foribaror lagi kundin ḳamai ḳortam?” ³¹Teu Labone ḳoila, “Ami tumare kita ditam?” Iakube ḳoila, “Afne amare kunta-u na dia zudi amar egu mat raḳoin, taile ami hirbar afnar foshur falor kezmot kormu. ³²Ami aiz afnar foshur falor maze gia, fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongor hokkolṭi amar beton babot nimugi. ³³Teu afne zebla-u betonor ḳarone aiba, i shomoe deḳba, amar imandarie amar lagi zuaf dibo. Ar fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongorta saṛa ar kunta faile mono ḳorba, ami suri ḳorsi.” ³⁴Ou Labone ḳoila, “Aichcha, tumar ḳota-u ṭik taḳouk.” ³⁵Labone hou dinu fal taki lamba dagala ar sitra sagol, fuṭa fuṭa dag ar sitra tuṛa tuṛa dola sagin ar ḳala meṛa oḳol algaia nizor fuaintor gese dilaila. ³⁶Dia tain Iakubor ges taki tin dinor fot duroi horia gelagi ar Iakube Labonor baki fal oḳolre raḳat roila.

³⁷Iakube libni, lauz ar armun gasor ḳasa ḍal ḳaṭia ufre taki baḳol falaia ḍalor maze lamba lamba dola dag dila. ³⁸Sagolor fale aia zeḳano fani ḳain, tain ou baḳol falail dagala ḍal oḳol, hono fanir gamlar samne toila. Ar fani ḳaoar shomoe era fal ḳaito. ³⁹Teu ou ḍalor gese aia fal ḳaoae tarar baichchain-o sitra, lamba dagala ar fuṭa fuṭa rongor oita.

⁴⁰Bade tain ou baichchain algaita, ar Labonor ḍura-ala ar ḳala meṛaintor bae meṛintor souḳ raḳaita. Ou laḳan tain, tan nizor falre Labonor falor loge milaita na. ⁴¹Ar zurala meṛi-saginte fal ḳaoar shomoe, tain gamlat tarar souḳor samne ou ḍal oḳol toita, ⁴²oile ḳomzur foshur samne i ḍalain toita na. Teu Labonor foshuin oita ḳomzur, ar Iakubor foshuin oita zurala. ⁴³Ou laḳan ḳam ḳoria tain bout doni oila. Tan gulam-bandi, uṭ-gada ar foshur fal bout boligelo.

Hozrot Iakub (a:) hour baṛi taki bagila

¹Bade Iakubor ḳano ailo Labonor fuainte matira zen, “Iakube amrar bafor hokkolta nisegi, ar amrar bafor mal dia-u he maldar oigese.” ²Ar Iakube-o kial ḳorla, tanbaedi Labonor agor hi monor bab ar nae. ³Mabude Iakubre ḳoila, tumi tumar baf-dadar desho nizor manshor gese firia zaogi. Ami tumar loge taḳmu. ⁴Ou Iakube ḳobria faṭaia Lea ar Rahelare bondo tan foshur falor gese anaia ḳoila, ⁵“Ami tumartan bafor muk dekia buziar, tan agor hi monor bab amar bae nae, oile amar babar Alla amar loge loge roisoin. ⁶Tumitain to zano zen, ami amar hoḳol shokti dia-u tan ḳoto gulami ḳorsi, ⁷ta-o tain amare ṭogisoin ar dosh-doshbar ḳoria amar beton bodlaisoin, oile Allae amar kunu ḳeti oite disoin na. ⁸Tain zebla ḳoila, tumar beton oibo, fuṭa fuṭa rongor foshu, teu falor hoḳol foshue ou laḳan baichcha dilo. Hirbar tain zebla ḳoila, tumar beton oibo ḍura-ala foshu, teu falor hoḳol foshue ḍura-ala baichcha dilo. ⁹Allae ou laḳan ḳori tan falor foshu ania amare disoin.

¹⁰“Eḳbar foshuinte fal ḳaoar shomoe ami kuabe deḳlam, meṛi-sagintor ufre ze faṭa oḳol uṭira, iguin ḍura-ala, sitra ar fuṭa fuṭa rongor. ¹¹Kuabor maze Allar firistae amare ḍakila, ‘Iakub!’ Ami ḳoilam, ‘Ounu ami.’ ¹²Tain ḳoila, ‘Tumi souḳ tulia deḳo, meṛi-sagintor ufre zeta faṭain uṭira, hokkolṭi ḍura-ala, sitra ar fuṭa fuṭa rongor. Labone tumar loge zeta zeta ḳorse, ita hoḳolta-u ami deḳsi. ¹³Ami hou Betelor Alla, zeno tumi kuṭir ufre tel ḍalia amar name ḳosom ḳorslae. Oḳon solo, i desh saṛia tumar zonom maṭit firot zao.’”

¹⁴Ou Lea ar Rahelae ḳoila, “Babar shompottir kunu dabi ar amrar roilo ni? ¹⁵Tain to amrare begana manush mono ḳoria, amrare besilaisoin ar amrar hokkolta-u ḳailisoin. ¹⁶Erlagi Allae amrar babar samana tone zotota nisoin, i hokkolṭi-u oḳon amrar ar amrar aolador oise. Te Allae tumare zela hukum ḳorsoin, tumi-o oula ḳoro.”

¹⁷Bade Iakube tan huruttain ar bibintore uṭor ufre tulia, ¹⁸Foddon-Iramo tan ḳamail foshu oḳol ar mal-samana hokkolta loia, Kenan desho tan baf Isʼhakor gese roana dilaila. ¹⁹Hou shomoe Labone tan meṛaintor ruma ḳaṭar lagi gesla, ar ou faḳe Rahelae tan bafor murti oḳol suri ḳorilila. ²⁰Iakube tan zaoar ḳota Irami Labonre na zanaia tanre ṭogila. ²¹Ar tain hokkolta loia bagia, Furat gang faroia Giliodor faṛor samnedi zaoat roila.

Houre Hozrot Iakub (a:)-re dorat aila

²²Zaoar tin din bade Labone hunla zen, Iakub bagia gesoingi. ²³Ou tain ḳesh-kuṭumre loia, Iakubor ḳore oia shat dinor fot gia, Giliodor faṛo tarar lagal faila. ²⁴Oile raitor bala Allae kuabe Irami Labonor gese aia ḳoila, “Ḳobordar! Iakubre bala-bura kunta-u ḳoio na.”

²⁵Iakube faṛor maze tambu gaṛisla, ar Labone gia tanre ono-u lagal failila, teu Labon ar tan ḳesh-kuṭum oḳole-o Giliodor hou faṛor maze tambu gaṛila. ²⁶Bade Labone Iakubre ḳoila, “Tumi ḳene ita ḳorlae? Amare ṭogia amar fuṛintore ḳene zuddor bondir laḳan loia ailae? ²⁷Ḳene tumi duka dia amare na zanaia, lukaia bagia ailae? Amare zanaile to ami kushi-bashi ḳoria, dutara ar mondira bazaia gan gaia, tumare bidae dilam one. ²⁸Tumi amar fuṛintore ar nati-noshare-o hunga dite-o dilae na, be-aḳolor moto ḳam ḳorlae. ²⁹Oḳon ami to tumrar ḳeti ḳortam farmu, oile tumrar baf-dadar Allae goto rait amare ḳoisoin, ‘Ḳobordar! Iakubre bala-bura kunta-u ḳoio na.’ ³⁰Tumar bafor baṛit zaoar lagi mone ḳandisil ḳori, tumi bagia aiso manlam, te amar devta oḳol ḳene suri ḳorlae?” ³¹Iakube zuaf dila, “Ami ḍoraislam, mono ḳorslam, afne zur ḳoria afnar fuṛintore, amar ges tone ḳaṛia raki diba. ³²Te oḳon zar gese afnar devtain faiba, tare zita raḳtam nae. Amrar ḳesh-kuṭmor samne hokkolta tallash ḳoria zudi afnar kunta fain, taile neukkagi.” Hou murti oḳol zen Rahelae suri ḳorsoin, ita to Iakube zanoin na.

³³Ou Labone Iakub, Lea ar duio bandir tambut hamaia hoḳolta tukaia kunta na faia, heshe Lear tambu tone Rahelar tambut gia hamaila. ³⁴Rahelae i murti oḳol nia uṭor goddir bitre toia, tain ou goddir ufre boila. Labone tan tambur hoḳolta tukaia hono ita faila na. ³⁵Ar Rahelae tan bafore ḳoila, “Bazan ami uṭia ubaitam fariar na ḳori afne bezar oin na zen, beṭiara bemaror lagi amar shoril ḳaraf.” Ou Labone hi murti oḳol ar tukaia faila na.

³⁶Heshe Iakube gusa oia Labonre siṛaia ḳoila, “Amar oforad kiano? Ami kita dush ḳorsi, afne amar ḳore oia oula ḳedanit aila? ³⁷Amar hoḳol mal-samana aulaia afnar goror kun zinishḳan faila? Faile ita afnar-amar ḳesh-kuṭmor samne raḳoukka, tara amrar bisar ḳorba. ³⁸Ami i bish boros afnar loge aslam. Er maze afnar kunu meṛi ba sagir feṭor baichcha nosṭo oise na ba afnar falor kunu meṛa-o ami ḳaisi na. ³⁹Ar zongli zanuare mara kunu foshu-o afnar gese anchi na, ita ami nize-u furia disi. Dino ba rait kunu foshu suri oile, afne amar ges taki boria loisoin. ⁴⁰Ami oula din ḳaṭaisi, dino zolsi gorome ar raite ḳafsi shite. Amar sokut gum aito na. ⁴¹Ze bish boros afnar baṛit roisi, er souddo boros ami afnar dui fuṛir lagi gulami ḳorsi, ar soe boros gese afnar foshur lagi. Er maze afne dosh-doshbar amar betono bodlaisoin. ⁴²Amar babar Alla, Ibrahimor Alla ar Isʼhake zanre ḍoraita tain zudi amar loge na taḳta, te hasa-u oḳon afne amare ḳali ate bidae dila one. Allae amar menot ar duḳ deḳsoin. Erlagi-u tain ḳail rait afnare domḳaisoin.”

Hozrot Iakub (a:)-or loge houror chukti

⁴³Labone Iakubre zuaf dila, “I fuṛin amar-u fuṛin, ar ou huruttain amar-u nati-nosha, ar i foshur fal oḳolo amar. Tumi ono zotota deḳrae, hoḳolta-u amar, ta-o amar fuṛintore ba tarar huruttaintore ami ar kita ḳormu? ⁴⁴Ao, amra duiozone eḳ chukti ḳorilai. Ou chuktir nishanaṭa tumar-amar maze shakki roibo.” ⁴⁵Ou Iakube eḳ fattor loia kuṭi gaṛila. ⁴⁶Ar tan ḳesh-kuṭum oḳolre ḳoila, “Afnara-o fattor anoukka.” Teu tara-o fattor ania eḳ biṭa banaila, heshe ou biṭar gese ḳani ḳaila. ⁴⁷Labone hou biṭar nam raḳla Zigor-Shahoduta [mani, shakki-biṭa] oile Iakube er nam raḳla Gol-Ed. ⁴⁸Labone ḳoila, “Ou biṭa oḳon tone tumar-amar shakki oilo.” Erlagi ou biṭar nam oilo Gol-Ed, ⁴⁹ar ou kuṭir nam oilo Mishpa [mani, faharar zaga]. Labone ḳoila, “Amra zebla horia zaimugi ou shomoe Mabude-u tumar-amar fahara diba. ⁵⁰Tumi zudi amar fuṛintore duḳ deo ba amar fuṛin saṛa ar ḳeurore bia ḳoro, taile kunu manush amrar loge na roile-o Alla amrar shakki roila.”

⁵¹Labone Iakubre aro ḳoila, “Ou biṭa bae ar ou kuṭir bae sao, iṭa tumar-amar mazḳano ami gaṛlam. ⁵²I duioṭa tumar-amar shakki roilo. Tumi-o ingsha ḳori ou biṭa ar kuṭi ḍingaia aibae na ar ami-o burair niote ita ḍingaia zaitam nae. ⁵³Ibrahimor Alla, Nahuror uforala ar tarar bafor uforalae tumar-amar bisar ḳorba.” Ar Iakube, tan baf Isʼhake zanre ḍoraita tan name ḳosom ḳorla. ⁵⁴Iakube hou faṛor ufre kurbani ḳoria tan ḳesh-kuṭum oḳolre ḳaoar daoat dila. Ḳaoa-daoa shesh ḳoria hari tara hou faṛor maze rait roila.

⁵⁵Bador din fozore Labone tan fuṛintore ar nati-noshare hunga dia dua ḳorla, heshe tan baṛi muka fot dila.

Mohonoimo firista oḳolor loge deḳa

¹Iakub-o tan fote roana oile, Allar firista oḳole tanre deḳa dila. ²Erare dekia tain ḳoila, “Ita Allar fouz.” Ar i zagar nam raḳla Mohonoim [mani, dui fouz].

Shek Ishor gese ufohar faṭani

³Iakube tan age ḳori Seir ba Idum desho, tan boṛo bai Ishor gese ḳoezon ḳobria faṭaila. ⁴Tain erare hikai dila, “Tumra amar munib Ishre ḳoio, tan gulam Iakube ḳoise, ami otodin tone amrar mamu Labonor gese musafirit aslam. ⁵Amar goru-gada, sagol-meṛa ar gulam-bandi hoḳolta-u ase. Amar munibor gese doea faoar ashae tumrare faṭailam.”

⁶Ḳobria oḳole firia aia Iakubre ḳoila, “Amra afnar bai Ishor gese geslam. Tain sair-sho manshore loia afnar loge mulaḳat korat aira.” ⁷Ou Iakube ḍoraia kub ostir oigela. Tain logor hoḳol manshore, goru-sagol, meṛa-meṛi ar uṭ-gada oḳolre dui dole algaila. ⁸Tain ḳoila, baie aia eḳ dolre hamla ḳorle-o aroḳ dol nirafode roibo.

⁹Ar Iakube dua ḳorla, “O Mabud, amar dada Ibrahimor Alla ar amar baba Isʼhakor Alla, tumi-u amare hukum ḳorso zen, ‘Tumar desho tumar nizor manshor gese firia zao, teu ami tumare rohom ḳormu.’ ¹⁰Tumar i gulamor bae ze rohom ar imandari deḳaiso, ami ita kuntar-u laḳ nae. Ami to egu laṭi loia i Zordan gang far oislam, ar oḳon dui dol oigesi. ¹¹Mabud, ami aroz ḳoriar, amar bai Ishor at tone amare basao. Amar ḍor ḳorer, he aia bou fua-fuṛir loge amare-o kun ḳorbo. ¹²Tumi-u to oada ḳorso, ‘Ami oboshsho-u tumar balai ḳormu, tumar oarish oḳolre doriar faror balur laḳan behishab ḳormu, zela gonia fuṛae na.’”

¹³Iakube i rait hono roila ar tan zotota asil er maz taki ḳotoḳan loia tan bai Ishor lagi eḳ ufohar toiar ḳorla. ¹⁴Ita oilo dui-sho sagi, kuṛiṭa sagol, dui-sho meṛi, kuṛiṭa meṛa, ¹⁵tishgu baichcha-ala dudor uṭ, dui kuṛi gai, doshgu bisal, ek kuṛi gadi ar doshgu gada, ¹⁶bade tain eḳ eḳ gulamor ato eḳ eḳ fal shomzai dia ḳoila, “Tumra amar age oia zao ar eḳ fal taki aroḳ falor maze faḳ rakio.” ¹⁷Foela dolor gulamre tain hikai dila, “Amar bai Ishor loge deḳa oar bade zebla zikaiba, ‘Ḳoi zaitae ba? Tumi ḳar manush? Tumar homḳor foshuin ḳar?’ ¹⁸Tumi zuaf dio, ‘Ita afnar gulam Iakubor. Tain amar munib Ishor lagi, ita ufohar faṭaisoin. Ar tain amrar ḳore oia aira.’ ” ¹⁹Ou laḳan tain dui nombor, tin nombor dolor gulam oḳolre-o hikai dila zen, “Ishor loge deḳa oile tumra-o oula ḳoio. ²⁰Ar heshe ḳoio, afnar gulam Iakub-o amrar ḳore oia aira.” Iakube mono ḳorla, “Age ufohar oḳol faṭaia tane ṭanḍa ḳormu, bade tan loge deḳa-shakkat kormu, te tain amare maea ḳorilita faroin.” ²¹Tan age oia ufohar oḳol gelogi, oile tain rait tan ḍerat roila.

Firistar loge kustir bade noea nam Israil

²²Heshe rait uṭia tan duio bibin, duio bandi ar egarogu fuare loia faoe aṭia, Zabbuk ḳalor hofaro toia aila. ²³Tain erare ḳal far ḳoraia tan hoḳol mal-samana-o hono faṭai dila. ²⁴Ar tain eḳla ono roila, teu gaibi eḳzon manush aia tan loge raitbor kusta-kusti ḳorla. ²⁵Oile tain Iakubre ḳabu ḳorta na farae en urator zuṛat marla ar Iakubor urator aṛ zaga tone ḍuli gelo. ²⁶Heshe hi manshe ḳoila, “Fozor oizar, oḳon tumi amare saṛi deo.” Iakube ḳoila, “Afne amare dua na ḳorle saṛtam nae.” ²⁷Hi manshe zikaila, “Tumar nam kita?” Tain ḳoila, “Iakub.” ²⁸Ou hein ḳoila, “Tumi Alla ar manshor loge laṛai ḳoria zitso ḳori, tumar nam ar Iakub roito nae, tumar nam oilo Israil [mani, Allar loge kusti ḳorra].” ²⁹Iakube tanre ḳoila, “Afnar namḳan kita ḳoukka.” Tain ḳoila, “Tumi kitar lagi amar nam zikairae?” Heshe tain Iakubre dua ḳorla. ³⁰Ou Iakube i zagar nam raḳla Ponuel [mani, Allar surot]. Tain ḳoila, “Ami Alla Pakre mukamuki dekia-o zinda roisi.” ³¹Ar Iakube Ponuel faronir bade shuruz uṭigelo. Tan urator mairor lagi lengṛaita lagla. ³²Erlagi Boni Israile oḳono ranor zuṛar gust kain na, ḳaron tain urator zuṛar rogor maze Iakubre marsla.

Boṛo bai Shek Ishor loge miṭ-maṭ

¹Iakube saia deḳla, tan boṛo bai Ishe sair-sho manush loia aguaia aira. Ou tain huruttaintore tan bibin Lea ar Rahela ar duio bandir gese baṭia dilaila. ²Tain tan bandin ar tarar huruttaintore samnor ḳataro raḳla. Bade Lea ar tan huruttaintore, hoḳol heshe raḳla Rahela ar Iusufre. ³Ar nize erar age gia shatbar maṭit soizda ḳoria tan bair gese azir oila.

⁴Teu Ishe tan gese douṛaia aia ainja ḳori golat doria hunga dila, ar duiozone ḳandita lagla. ⁵Bade Ishe muk tulia ou beṭin ar huruttaintore dekia zikaila, “Tumar loge era ḳegu?” Tain ḳoila, “Allae tan rohomote afnar gulamre i huruttain disoin.” ⁶Teu foela bandi oḳole Ishor ḳasat aia tarar hurutta loia mata nuaila, ⁷bade Leae-o huruttaintore loia aguaia mata nuaila, heshe Iusuf ar Rahelae gia mata nuaila. ⁸Teu Ishe ḳoila, “Foto zeta dolbol deḳlam, ita kior lagi?” Tain ḳoila, “Amar munibor gese doea faoar lagi.” ⁹Ishe ḳoila, “Baire, amar boutta ase, tumar ita tumar-u taḳouk.” ¹⁰Tain ḳoila, “Ji na, ami minot koria ḳoiar, zudi amar bae afnar doea oe, taile amar deoa i dokkina afne neukka. Afne zebla amare kushi mone ḳobul ḳorsoin, te afnar muk deḳa ar Allar surot deḳa amar lagi homan. ¹¹Allae amare rohomot dan ḳorsoin, amar boutta ase ar ou zeta ufohar afnar lagi anchi, ita afne neukka.” Tain oula minot-ḳajji ḳorae, Ishe ita ḳobul ḳorla. ¹²Ishe ḳoila, “Solo, amra roana oi, ami tumar loge roimu.” ¹³Iakube tanre ḳoila, “Amar munibe to zanra, i hurutta oḳol-o huru ar dudal gaiain-meṛin-o loge ase, bezan oia itare eḳdinu aṭaile, hokkolṭi moriziba. ¹⁴Te munib, afne amar age zaukkagi, foshur fal ar hurutta oḳolor solar ḳemota buzia ami aste aste Seir elaḳat afnar gese airam.” ¹⁵Ishe ḳoila, “Taile amar logor ota ḳoezonre tumar gese toia zaigi.” Tain ḳoila, “Itar dorḳar kita? Amar munibor gese ami ze rohom faisi, oṭa-u to boutta.” ¹⁶Ar Ish hou din-u Seiror bae roana dilaila. ¹⁷Oile Iakube Shukkuto fousia nizor lagi ḍera banaia, foshur falor lagio ḳoeḳan batan banaila, teu i zagar nam oilo Shukkut [mani, ḍera oḳol].

¹⁸Foddon-Iram tone baroia Iakube, sohi-salamote Kenan deshor Shikim ṭauno aia, ṭaunor bare tambuin gaṛila. ¹⁹Heshe ou tambuala zominḳan tain, Shikimor baf Homuror fuaintor ges tone, rufar eḳ-sho ṭeḳa dia ḳorid ḳorla. ²⁰Ar hono ekkan kurbani ḳana banaia er nam dila El-Ilohe-Israil [mani, Alla, Israilor uforala].

Bibi Dinar loge ḳobisi ḳamor bodla loa

¹Lear goro Dina name Iakubor ze fuṛi oisil, ein eḳdin honor fuṛintor loge deḳa ḳorat gela. ²Ar Shikim namor eḳzon manshor souḳo foṛla. I Shikim asil Hibbi zatir shordar Homuror fua. Shikime ere zur ḳori doria nia ḳobisi ḳam ḳorillo. ³Dinar bae tar dil ashik oigelo. He ere mohobbot kori erloge miṭa miṭa mat matto laglo. ⁴Bade Shikime tar baf Homurre ḳoilo, “Tumi ou ḳoinare amar loge biar bondobost koro.”

⁵Iakube ḳobor faila, Shikime tan fuṛire beijjoti ḳorse, oile tan fuain foshur fal loia bondo taḳae, tain na-matia nirai roila. ⁶Shikimor baf Homure Iakubor gese biar mat loia ailo, ⁷ar i ḳobor hunia Iakubor fuain-o bondo tone aila. Tara betaea gusa ar gorom oila, ḳaron Iakubor fuṛire beijjoti ḳorae Shikime asta Israilor loge beijjoti ar nazaiz ḳam ḳorse.

⁸Teu Homure erare ḳoilo, “Afnarar ḳoinar lagi amar fua ashik oigese. Doea ḳori, amar fuar loge er shadi dilaukka. ⁹Amrar loge kuṭumita ḳoroukka, amrar ḳoinaintore afnara neukka ar afnararta amrare deukka. ¹⁰Ar amrar loge taḳoukka, i asta deshu to samne roise, afnara ono-u taḳoin, ḳae-ḳarbar ḳoria, nizor malikana ḳaim ḳoroin.” ¹¹Shikime Dinar baf-baire ḳoila, “Amar bae afnara doea ḳoroin, afnara amar gese zeta saiba, ami ota-u dimu. ¹²Mohorana ar mal-samana afnara zeta dabi ḳorba ami dimu, zekunu laḳan-u Dinare amar loge bia deukka.”

¹³Shikime tarar boinre beijjoti ḳorsil ḳori Iakubor fuainte tare ar tar baf Homurre bana deḳaia ḳoila, ¹⁴“Mosolmani ḳam na ḳorail kunu damandor loge amrar boinre bia dile amrar beijjoti oibo. ¹⁵Oile ou ḳam ḳorle amra razi oimu, afnara hoḳol beṭainte mosolmani ḳoraia, amrar laḳan oiba. ¹⁶Taile amrar fuṛintore afnarar gese dimu ar afnarar fuṛintore-o amra anmu, amra-o afnarar loge eḳ zati oia boshot kormu. ¹⁷Oile afnara i mosolmanir ḳota na manle, amrar ḳoinare loia zaimugi.”

¹⁸Teu tarar i mate Homur ar tar fua Shikim kushi oila. ¹⁹Ou Shikim oilo gusṭir maze hoḳol tone dami manush. He deri na ḳoria ḳota manilailo, ḳaron Iakubor fuṛir bae he ashik asil. ²⁰Bade ṭaunor duaror gese aia, Homur ar tan fuae hokkol manshor loge matia ḳoila, ²¹“I manushguinte amrare kunu zamela ḳorer na. Amrar desho erar taḳar lagi bout zagao ase, te era ono-u taḳouk ar ḳae-ḳarbar ḳorouk, amra erar fuṛintore bia ḳoria ani ar amrar fuṛintore-o tarar gese dei. ²²Oile amra ekkan ḳam ḳorle, tara amrar loge eḳ zati oite razi asoin. Ḳamṭa oilo, tarar laḳan amrar-o hokkol beṭaintor mosolmani ḳorani lagbo. ²³Ar tarar goru-meṛa, mal-samana hokkolta-u to amrar oibo, tarar ḳotae razi oile-u tara amrar loge taḳba.” ²⁴Ou ṭaunor hoḳol beṭain Homur ar tan fua Shikimor mate razi oilo, ar tara hoḳolor mosolmani ḳam ḳorailo.

²⁵Heshe tin dinor din zebla hoḳol beṭainte mosolmanir bedonae ḳoshṭo faira, ou shomoe Dinar afon bai Iakubor dui fua Shimion ar Lebi, tarar toluar loia ṭauno hamaia, erare be-kialo faia hoḳol beṭaintore ḳatol ḳorlo. ²⁶Tara Homur ar tan fua Shikimre-o toluardi ḳatol ḳoria Shikimor gor tone Dinare loia ailo. ²⁷Era tarar boinre beijjoti ḳorsil ḳori, Iakubor hoḳol fuainte mora lashor gese aia ṭauno luṭ-toraz ḳorla. ²⁸Ar ṭaunor bitor-bairor goru-gada, sagol-meṛa, ar ḳetor hoḳolta luṭia loia aila. ²⁹Hoḳol mal-samana, fua-fuṛin, beṭin, ar goror hoḳolta-o luṭ-faṭ ḳorla. ³⁰Heshe Iakube Shimion ar Lebire ḳoila, “Tumra i deshor Kenani ar Farizi oḳolor gese amare fosa-ginnar manush banaia mosiboto falaiso. Amar manush ḳom, oḳon tara ekḳano oia amare hamla ḳorle, ami foribaror hokkolre loia mormu.” ³¹Tara zuaf dila, “He amrar boinre nia ḳanki banailito ni?”

Hozrot Iakub (a:) hirbar Betelo

¹Erbade Alla Pake Iakubre ḳoila, “Tumi hirbar Betelo zaogi. Tumar bai Ishor ges tone bagibar bala, zein tumare doroshon disla, hou Alla Pakor name tumi hono ekkan kurbani ḳana banao.” ²Teu Iakube tan afon manshore ar logor hoḳolre ḳoila, “Tumrar gese devtar zeta murtin ase, ita hokkolṭi falao; ar hoḳole pak-saf oia, saf-sutra lebas findo. ³Ar solo, amra Betelo zaitamgi. Hono ami Allar name ekkan kurbani ḳana banaimu, zein mosibotor dino amar dua ḳobul ḳorsla, ar amar soforor logi oisla.” ⁴Teu tarar zoto laḳan devtar murtin ar ḳanor zeorat asil, hoḳolta Iakubor ato dilaila. Tain ita nia Shikim ṭaunor ḳandat elon gasor tole gaṛilaila.

⁵Bade tara hon tone roana oila ar Allae sairobae, hoḳol gau-geramo eḳ ḍor foeda ḳorla, teu hinor kunu manshe Iakubor fuaintore ḳedanit gelo na. ⁶Heshe Iakub ar tan logor hoḳole Kenan deshor Luz namor zaga, mani Betelo aia fousla. ⁷Ono tain ek kurbani ḳana banaia, ou zagar nam dila El-Betel [mani, Betelor Alla], ḳaron bair ges taki bagibar bala Allae ono-u tanre didar-doroshon disla. ⁸Ar Rebekar daima Dobura mara gela. Tane Betelor lamat eḳ elon gasor tole maṭi dila, teu i zagar nam oilo Elon-Bakut [mani, ḳandonor gas].

⁹Iakube Foddon-Iram taki aoar bade, Allae hirbar tanre didar dia boroḳot nazil ḳorla. ¹⁰Allae ḳoila, “Tumar nam to Iakub; oile manshe tumare ar Iakub ḳoia ḍakta nae, tumare Israil ḳoiba.” Teu tan nam oilo Israil. ¹¹Allae tanre ḳoila, “Ami-u shorbo-shoktiman Alla. Tumi folala oia baṛo. Tuma tone eḳ zati foeda oibo, iṭa oibo bout gusṭiala zati, ar tumar ḳandano bashsha oḳol foeda oiba. ¹²Ami Ibrahim ar Isʼhakre ze desh dan ḳorsi, hou desh oḳon tumare ar tumar bador oarishre dimu.” ¹³Allae hono Iakubor loge batchit koria harle asmano toshrif nilagi. ¹⁴Iakube hou batchitor zagat fattoror ek kuṭi gaṛia, er ufre tain Allar name shorbot-fanir sodga ḍalila, heshe tel-o ḍalila. ¹⁵Allae zeḳano tanre didar disla, Iakube i zagar nam raḳsla Betel.

¹⁶Bade Iakub ar tan logor hoḳole Betel taki roana ḳoria Ifrato fousar bakka age, Rahelar hurutta oar bishe dorlo, tan kub toklif oilo. ¹⁷Hurutta oar bish aro baṛlo, teu dai beṭie ḳoilo, “Ḍoraio na go, i bar-o tumar goro fua oibo.” ¹⁸Oile Rahela mara gela. Morar bela tain fuar nam raḳla Bin-Oni [mani, amar toklifor fua] oile bafe tar nam raḳla Bin-Iamin [mani, amar bolor fua]. ¹⁹Rahelar moutor bade Ifrat, mani Betelham, zaoar fotor ḳandat tanre maṭi deoa oilo. ²⁰Maṭi dia harle Iakube tan ḳoeboror ufre eḳ fattoror kuṭi gaṛla, i kuṭi aizo ono ase. ²¹On tone Israile hirbar roana dila, ar Edor minar falaia aia tan tambu gaṛila.

²²Israil zebla hono roira, ou faḳo Rubene gia tar bafor bador biar bou Bilhar loge zina ḳorlo ar ita Israilor ḳano gelo.

²³Iakubor barozon fua asla, Lear torofa tan boṛo fua Ruben, bade Shimion, Lebi, Ehuda, Isaḳor ar Sobulon. ²⁴Rahelar torofa Iusuf ar Bin-Iamin. ²⁵Rahelar bandi Bilhar torofa, Dan ar Noftali. ²⁶Lear bandi Zilpar torofa, Sadu ar Ashir. Tan ou hurutta oḳol Foddon-Iramo oisla.

Hozrot Isʼhak (a:)-or inteḳal

²⁷Heshe Iakub Kiriot-Orbor, mani Hebronor ḳasat Momri namor zagat, tan baf Isʼhakor gese aila. Ou zagat Ibrahim ar Isʼhake-o boshot korta. ²⁸Isʼhakor boeosh eḳ-sho ashi boros oisil. ²⁹ar Isʼhak furafur buṛa oia, murobbi boeosho mara gia tan baf-dadar gese gia azila. Tan fua Ish ar Iakube tanre dafon ḳorla.

Shek Ish urfe Idum ḳandanor neta oḳol

¹Ou oilo Ish ba Idumor ḳandanor boean. ²Ishe Kenani dui fuṛire bia ḳorsla. Era oila Hiṭṭi Elonor fuṛi Ada, ar Hibbi Zibionor natin, Onar fuṛi Oholibama. ³Erar bade-o tain Ismailor fuṛi Nabautor boin Bashomotre bia ḳorsla. ⁴Adar feṭo Ilifoz ar Bashomotor feṭo Ruelor zonom oisil, ⁵ar Oholibamar feṭo Jiush, Zalom ar Kurohor zonom oisil. Ishor i fuaintor zonmo oisil Kenan desho.

⁶Bade Ishe tan bouain, fua-fuṛin, goror hoḳol manush ar foshur falain, Kenan desho ḳamai ḳora hoḳol don-doulot loia, tan bai Iakubor ges tone horia aroḳ desho gelagi. ⁷Ish ar Iakubor foshur fal, mal-samana oto beshi asil zen, era ekḳano roite hi deshor i zagae ar kulailo na. ⁸Teu Ish Seiror faṛi elaḳat gia boshot korla. Ein-u Idum.

⁹Ou oilo Seiror faṛor Idumi oḳolor mul baf Ishor ḳandanor boean. ¹⁰Ishor fuaintor nam oilo, Ilifoz ar Ruel. Ilifoz Adar fua, Ruel Bashomotor fua. ¹¹Ilifozor fuain oila, Toimon, Omar, Zofo, Gatam ar Ḳenaz. ¹²Ishor fua Ilifozor Timna namor eḳ hangar bou asil, er goro Amaleḳor zonom oisil. Era hoḳole-u Ishor bou Adar aolad. ¹³Ruelor fuain oila Nohot, Zarah, Shommo ar Mijja. Era Ishor bou Bashomotor aolad. ¹⁴Zibionor natin, Onar fuṛi Oholibamar torofa Ishor fuain oila Jiush, Zalom ar Kuroh.

¹⁵Ishor aolador maze era asla gusṭir neta. Ishor boṛo fua Ilifozor fuain oila Toimon, Omar, Zofo, Ḳenaz, ¹⁶Kuroh, Gatam, ar Amaleḳ. Era oila Idum desho, Adar fua Ilifozor aolad. ¹⁷Ishor fua Ruelor fuain zera gusṭir neta oisla, tara oila Nohot, Zarah, Shommo ar Mijja. Era oila Idum desho Ishor bou Bashomotor fua Ruelor aolad. ¹⁸Ishor bou Oholibamar ze fuain gusṭir neta oisla, tara oila Jiush, Zalom ar Kuroh. Era asla Onar fuṛi Oholibamar aolad. ¹⁹Era oila Ish ba Idumor ḳandan ar gusṭir neta.

²⁰Honor Hurio Seiror fuaintor nam oilo Luṭon, Shubol, Zibion, Ona, ²¹Dishun, Etshor ar Dishan. Era hoḳole Idum desho Seiror fuain, Hurio ḳandanor neta asla. ²²Luṭonor fuar nam oilo Huri ar Hemam, ar bonir nam Timna. ²³Shubolor fuaintor nam oilo Olobon, Manohot, Ibal, Shofo ar Onom. ²⁴Zibionor fuaintor nam oilo Oa ar Ona. Ou Ona-u tan baba Zibionor gada raḳat gia, morubumir maze gorom fanir eḳ jorna tukaia faila. ²⁵Onar fuar nam Dishun ar fuṛir nam Oholibama. ²⁶Dishunor fuaintor nam oilo Himdon, Ishbon, Zitron ar Ḳoran. ²⁷Etshoror fuaintor nam oilo Bilhon, Zaoan ar Aḳon. ²⁸Dishunor fuaintor nam oilo Auz ar Oran. ²⁹Hurio oḳolor neta oila Luṭon, Shubol, Zibion, Ona, ³⁰Dishun, Etshor ar Dishan. Era oila Seir deshor Hurio gusṭir neta.

³¹Boni Israilor maze bashshai hukumot aibar age, Idum desho era-u raza asla. ³²Bauror fua Bela Idumor raza oila. Tan razdanir nam asil Dinhaba. ³³Bela morar bade, tan zagat Boshra ṭaunor Zarahor fua Zubob raza oila. ³⁴Zubob morar bade Toimon deshor Hushom honor raza oila. ³⁵Hushom morar bade tan zagat Bododor fua Hodod raza oila. Tain zuddo ḳori Muab deshor Madiani oḳolre araila. Tan razdanir nam oilo Obit. ³⁶Hodod morar bade Moshreḳa ṭaunor Samla honor raza oila. ³⁷Samla morar bade honor Furat gangor faror Rohobot ṭaunor Shoul raza oila. ³⁸Shoul morar bade tan zagat Akbaror fua Baal-Hanon raza oila. ³⁹Akbaror fua Baal-Hanon morar bade tan zagat Hodor raza oila. Tan razdanir nam asil Pau, ar tan bour nam asil Moheṭabel. Ein Moṭredor fuṛi ar Mezahabor natin.

⁴⁰Ishor zeta aolad oḳol gusṭi ar elaḳar neta asla, tarar nam oilo, Timna, Oloba ar Zitet, ⁴¹Oholibama, Ela, Pinun, ⁴²Ḳenaz, Toimon, Mibzar, ⁴³Mogdiel ar Iram. Era asla zarzir deshor, zarzir elaḳar Idumi neta. Idumi oḳolor mul baf Ishor boean ono-u shesh.

Hozrot Iusuf (a:) (37:1–50:26)

Hozrot Iusuf (a:)-or dui kuab

¹Iakub Kenan desho-u roila, tan bafo hono musafir oia asla. ²Ou oilo Iakubor ḳandanor boean. Iusufe shotro boros boeosh tone tan baiaintor loge meṛa-sagol raḳta. Tain huruman tone-u tan haton ma Bilha ar Zilpar fuaintor loge roita. Ar erar hoḳol bad sal-cholonor ḳobor bafore zanaita. ³Iusuf, Israilor buṛa boeoshor fua gotike, tain ere hoḳol tone beshi maea ḳorta. Tain ere ek kandani zubba banai dila. ⁴Bafe Iusufre hoḳol tone beshi maea ḳoroin dekia, baiainte tanre ginnaita. Tara en loge bala mone mat-ḳota-o matta na.

⁵Iusufe ek kuab dekia tan baiaintore hunaila, teu tara aro beshi ginnaila. ⁶Tain ḳoila, “Ami kuabe kita deḳsi huno: ⁷ami deḳlam, amra ḳetor maze danor muiṭ bandiar ar amar banda muiṭḳan ubaigelo, teu tumrar muiṭ oḳole amar muiṭre sairobae beria soizda ḳorer.” ⁸Ou tan baiainte ḳoila, “Tui hasau amrar raza oite saire ni? Tui raza oia amrar ufre beṭagiri ḳorte ni?” Teu tan kuab ar tan mator lagi tara aro beshi ginnaila.

⁹Iusufe hirbar ek kuab dekia tan baiaintore hunaila. Tain ḳoila, “Huno, ami hirbar kuabe deḳsi, san-shuruz ar egaroṭa terae amare soizda ḳorer.” ¹⁰Tain i kuabor ḳota tan baf ar baiaintor gese ḳoia harle, bafe tanre domḳaia ḳoila, “Tuin ita kun zator kuab deḳle, re fut? Tor ma baiain ar ami-o kita hasau tore soizda ḳortam ni?” ¹¹Ar Iusufre tan baiainte kub ingshaita. Oile bafe i kuabor ḳota mono raḳla.

Gulam banaia baiainte besila

¹²Ar tan baiainte bafor foshur fal loia Shikimo raḳat gela. ¹³Teu Israile Iusufre ḳoila, “Tor baiainte foshur fal raḳat Shikimo gesoin, te ae, ami tore-o hono faṭai.” Tain ḳoila, “Achcha, ami zaimu.” ¹⁴Israile tane ḳoila, “Tui gia tor baiain ar foshur falor ḳobor-antor hunia aia amare ḳois.” Teu tain Iusufre Hebron tone Shikimo faṭaila. Ar Iusuf-o gia Shikimo azir oila.

¹⁵Aia harle tanre ḳetor maze gura-firat dekia eḳ beṭae zikaila, “Tumi kita tukairae ba?” ¹⁶Iusufe ḳoila, “Ami amar baiaintore tukaiar. Afne zanoin ni, era foshur fal kun zagat raḳra?” ¹⁷Hi beṭae ḳoila, “Tara in tone gesoingi. Ami hunchi tara matira, ao, amra Dutono zaigi.” Ou Iusufe tukai tukai Dutono gia tarare faila. ¹⁸Baiainte duroi tone tanre deḳlo, ar tarar gese fousar age-u tara ene kun ḳorar motlob ḳorlo. ¹⁹Tara eḳzone aroḳzonre ḳoilo, “Ou deḳo, kuab deḳra sab aira. ²⁰Ao, oḳon-u amra ene ḳotom ḳoria ou kufo harai dei; bade ḳoimu, kunu zongli zanuare ḳailaise, heshe deḳmune, tar kuabor dosha kita oe?” ²¹Oile Rubene ita hunia tarar at taki enre basaibar lagi ḳoila, “Tare zane mario na.” ²²Tain erare foramish dila, “Kun-ḳarafi ḳorat zaio na, nizor ate na maria ogure emneu kufor maze falai deo.” Oula tain Iusufre tarar at tone basaia, bafor ato faṭanir sesṭa ḳorla. ²³Iusuf tan baiaintor gese aiteu tara, tan gotor tone zubba kulilaila, hou ḳandani zubbaṭa ṭania kulilila. ²⁴Ar tane doria kufor maze falai dila. I kuf hukna asil, kunu fani asil na.

²⁵Heshe tara ḳaoat boia saia deḳla, Giliod taki Ismaili eḳ beparir dol ibae ar. Era uṭor fiṭit kori kushboe moshla, agor, ar meshke-ambor loia Mishor desho zaita. ²⁶Ou Ehudae tar baiainre ḳoilo, “Doro, baire kun ḳoria amra lukaililam, teu amrar kita lab oibo? ²⁷He to amrar-u bai, amrar afon lou ar gust. Te tar shorilo at na dia ao, Ismaili oḳolor gese tare besilai.” Ou baiain-o razi oigela. ²⁸Hou Madiani bepari oḳol ḳasat aite-u, baiainte Iusufre kufo tone ṭania tulla ar ek kuṛi rufar ṭeḳar bodla, Ismaili oḳolor gese tane besilaila. Era Iusufre loia Mishoro gelagi.

²⁹Bade Rubene hou kufor gese aia Iusufre na dekia, tan gotror kurta faṛilla. ³⁰Baiaintor gese gia ḳoila, “Fuagu to ino nae. Oḳon ami kita ḳortam?” ³¹Ou tara eḳ bokri maria, er lou Iusufor hou zubbat lagaila. ³²Bade manushdi ou zubba tarar bafor gese faṭaia ḳoila, “Iṭa amra foto faisi, te afne bala ḳoria deḳoukka, iṭa afnar fuar zubba ni?” ³³Iakube i zubba sinia ḳoila, “Iṭa to amar fuar-u. Tare kunu zongli zanuare ḳailise, tare nichoe siṛi-biṛilaise.” ³⁴Tain finnor ḳafoṛ siṛia, ḳomoro solar soṭ bandia, fuar lagi bout din mattom ḳorla. ³⁵Tan hoḳol fua-fuṛie tane buzaita saila, oile kunu buze-u tan buk ṭanḍa oilo na. Tain ḳoila, “Ami mattom ḳori ḳori amar fuar gese ḳoeboro hamaimu.” Fuar lagi tain ou laḳan ḳanda-ḳaṭit roila. ³⁶Er maze Madiani oḳole Iusufre Mishoro nia, Feraunor ḳormosari Puṭifor [Azizor] gese besilaila, i ḳormosari asla tan fordan gaḍ.

Bibi Tamaror loge Ehudar ḳobisi ḳam

¹Ehudae tar baiaintore toia Odullom gaur Hira namor eḳ manshor loge roat gelo. ²Hono roia Shua namor eḳ Kenani manshor fuṛir loge deḳa oilo, dekia he ou fuṛire bia ḳorlo. ³Biar bade hou beṭir goro eḳ fua oilo, Ehudae tar nam raḳlo Eir. ⁴Hirbar beṭir goro aroḳ fua oile, maʼe tar nam raḳlo Onon. ⁵Heshe ou beṭir aroḳ fua oile, tar nam raḳlo Shela. I shomoe tara Koshib gaut roita. ⁶Ar Ehudae tar boṛo fua Eiror loge Tamar namor eḳ fuṛire bia dilo. ⁷Oile tar i fua Mabudor nozoro kub ḳobis asil gotike, Mabude tare marilaila. ⁸Ou Ehudae Ononre ḳoilo, “Tumar babire bia ḳorilao. Tair deor oae tumar zeta ḳora zorur ase, ita adae ḳoro ar nizor bair oarish foeda ḳoro.” ⁹Onone zanto, i oarish tar nizor oito nae, ar tar bair oarish raḳte tar kial asil na gotike, tair loge mila-mishar shomoe tar biz baire maṭit falai dito. ¹⁰Mabude tar i ḳame naraz oila, tain Eirre-o marilaila. ¹¹Ou Ehudae tar fuar bou Tamarre ḳoilo, “Amar fua Shela zotodin boṛo na oe, otodin tumar bafor baṛit gia ṛaṛi oia-u ro.” Ehudae ḍorailo, Shela-o tar baiaintor laḳan morizibo. Ar Tamar bafor baṛit gelogi.

¹²Bakka ḳoedin bade Ehudar bou, Shuar fuṛi morigelo, teu ḳanda-ḳaṭi ḳorar bade Ehudae shanti oia Odullom gaur tar dust Hirar loge Timna gaut, tar meṛar falor ruma ḳaṭra manshor gese roana dilo. ¹³Ar Tamarre gia ḳeu ḳobor dilo “Tumar houre tan meṛar ruma ḳaṭar lagi Timnat zaira.” ¹⁴Tamare deḳlo, Shela boṛo oileo houre Shelar loge tair bia dira na, ou tai ṛaṛir ḳafoṛ bodlaia hazi-faṛi muko gumṭa dia, Aenaimor fotor muko gia boilo. Aenaim asil Timnat zaoar foto. ¹⁵Ar tai muk lukaia raḳae, Ehudae mono ḳorlo igu silan beṭi. ¹⁶Teu Ehudae fuar boure na sinae, fotor daro Tamaror gese gia ḳoilo, “Ao, tumar loge mila-misha ḳori.” Tamare ḳoilo, “Te amare kita dibae?” ¹⁷He ḳoilo, “Amar fal tone sagolor baichcha egu faṭai dimu.” Tamare ḳoilo, “Iṭa faṭanir age amar gese kunta zimma toia zaukka.” ¹⁸Ehudae ḳoilo, “Kita toitam?” Tai ḳoilo, “Afnar ou fita-ala sil ar afnar ator laṭi toia zaukka.” Teu Ehudae oguin zimma toia tair loge mila-misha ḳorlo ar Tamaror feṭo hurutta ailo. ¹⁹Bade Tamar uṭia gelogi ar hi ḳafoṛ bodlaia hirbar ṛaṛir ḳafoṛ findilo.

²⁰Heshe ou beṭir ges taki zimmar mal firot nibar lagi, tar Odullomor dustre dia sagolor baichcha egu faṭailo. He aia taire tukaia failo na. ²¹Ou he honor manshore zikailo, “Aenaimor fotor daro eḳ shebok beṭi asil, ogu ḳoi?” Tara ḳoila, “Ino to ila kunu beṭi nae.” ²²Teu he Ehudar gese gia ḳoilo, “Ami gia taire tukaia failam na. Honor mansheo ḳoila, ino to ila kunu beṭi aise na.” ²³Ehudae ḳoilo, “Te ita ar tair gese-u taḳouk. Naile amra shorminda oimu. Sagolor baichcha to faṭailam, ta-o tumi ere tukaia failae na.”

²⁴Onuman tin mash bade Ehudae hunlo, tar fuar bou Tamare zina ḳorse, erlagi tair hurutta oita. Ou Ehudae ḳoilo, “Ogure bare nia aguindi zalailao.” ²⁵Tamarre zebla bare nira, ou shomoe tair hourre ḳobor dilo zen, “Zar hurutta amar feṭo ase, ou mal-samana oḳol tar. Te deḳoukka, ou fita-ala sil ar laṭigu ḳar sinoin ni?” ²⁶Ehudae ita dekia ḳoilo, “Tai to ama taki bout boṛo forezgar. Amar fua Shelar loge taire bia ḳoraisi na.” Erbade Ehudae ar kunudin-o Tamaror gese hutise na.

²⁷Hurutta oibar bala deḳoin, Tamaror feṭo zuṛor hurutta. ²⁸Foela egue tar at bar ḳorlo ar dai beṭie lal shuta eḳsa tar ato bandia ḳoilo, “Igu foela foeda oilo.” ²⁹Oile he at ṭan dia bitre nilogi, teu tar bai foela baroilo ar dai beṭie ḳoilo, “Tumi kila fak koria baroilae?” Erlagi er nam oilo Firuz [mani, fak kora]. ³⁰Bade tar bai lal shuta ato banda loia baroilo, tar nam raḳla Zarah.

Hozrot Iusuf (a:) ar Azizor bou

¹Iusufre Mishor desho loia zaoar bade, Ismaili oḳolor ges tone, Aziz namor Feraunor eḳzon Mishori ḳormosarie, Iusufre ḳorid ḳorla. Aziz oila Feraunor fordan gaḍ. ²Mabude Iusufor logi oila, erlagi Iusuf hoḳol ḳamo kamiab oila. Tain hou Mishori munibor baṛit kam ḳorta. ³Mabud tan loge loge asoin ar hoḳol ḳamo tane kamiab ḳorra, tan munibe-o ita buzilaila. ⁴Teu munibe Iusufre maea ḳorta lagla, tane munibor ḳas kezmotgar banaila ar tan baṛir hoḳolta deḳa-hunar baro Iusufor gese shomzai dila. ⁵Iusufre tan baṛir ar hoḳoltar bar shofi deoar bade tone, Mabude Iusufor lagi-u, tan munibor hoḳoltar maze boroḳot nazil ḳorla. Azizor baṛit ar ḳet-ḳamar, hoḳol zagat Mabude boroḳot nazil ḳorla. ⁶Ita dekia Azize tan hoḳoltar bar Iusufor ufre shofi dila, tan nizor ḳana-dana saṛa ar kuntar-u ḳobor loita na.

Iusufor shorilor goṭon ar seharao shundor asil. ⁷Ita dekia tan munibor boue tan bae lalos ḳorlo. Tai Iusufre ḳoilo, “Amar bisnat ao.” ⁸Oile Iusuf razi na oia munibor boure ḳoila, “Deḳoukka, i baṛit kita kita ase, amar munibe kunta-u ḳobor loin na, hoḳoltar bar amar ufre shomzai disoin. ⁹I baṛit ama taki boṛo ar ḳeu nae. Afne to tan bibi, erlagi afnare saṛa ar hoḳolre tain amar zimmae raḳsoin, te ami kila oto boṛo eḳ zogoinno ḳam ḳoria Allar birudde guna ḳortam?” ¹⁰Tai hamesha Iusufre oula minot korle-o Iusufe tair gese hutte ba ḳasat roiteo razi oila na. ¹¹Heshe eḳdin kunu ek kamor lagi Iusuf goror bitre hamaila, ou shomoe ar ḳeu hino asil na. ¹²Teu Azizor boue Iusufor ḳafoṛo dori ḳoilo, “Amar bisnat ae.” Oile Iusufe tan ḳafoṛ falaia douṛia gelagi. ¹³Iusufe tair ato ḳafoṛ toia douṛaia gelagi ḳori, ¹⁴Azizor boue goror manshore ḍakia ḳoilo, “Huno, tain amrar loge tamsha ḳorar lagi i Ibrani beṭare anchoin. He amare beijjoti ḳorar motlobe goro hamaisil, ou ami sillaia uṭsi. ¹⁵Amar sillani hunia he tar finnor ḳafoṛ amar gese toia bagise.” ¹⁶Iusufor munib baṛit na aoa forzonto, i ḳafoṛ tai nizor gese raḳlo. ¹⁷Tain aia harle tai nalish dilo “Tumi ze Ibrani gulamre amrar gese ancho, he amare beijjoti ḳorar motlobe amar goro hamaisil. ¹⁸Oile amar hauka-hauki ar sillanie he amar gese tar ḳafoṛ falai toia bagise.”

¹⁹Bour mat hunia Iusufor munibe gusae aguin oigela. Tan boue ḳoilo, “Tumar gulame amar loge ou laḳan ḳam ḳorse.” ²⁰Teu Azize Iusufre nia zel ḳanat haraila.

Zel ḳanat Hozrot Iusuf (a:)

Mishoror bashshar bondi oḳolre zeno raḳoin, tane-o hou zel ḳanat toila. ²¹Oile Iusufor ufre Mabudor saea asil, tain Iusufre boṛo zelar sabor gese maear manush banaila. ²²Boṛo zelar sabe zel ḳanar hoḳol bondi oḳolor shordari Iusufor ufre saṛi dila, teu honor hoḳol ḳam-ḳaz Iusufor hukume solto. ²³Ar boṛo zelar sabe kunta-u deḳa-huna ḳora lagto na, ḳaron Mabud Iusufor loge asla, erlagi Iusufe zetat at dita, Mabude ita kamiab ḳorta.

Zel ḳanat dui ḳoeodir kuab

¹Itar bade Mishoror bashshar dorbaror shorab bilai deora ar ruṭi banaora i duiozone bashshar gese ḳosur ḳorla. ²Teu Feraun tara duiozonor ufre gusa oila, ³tain erare bondi ḳoria tan boṛo zollador baṛir zelo haraila. Ou zelo Iusufo asla. ⁴Boṛo zollade i duio ḳoeodir bar-o Iusufor ato dila, ar Iusufe tarar kezmot korta lagla. Oula era kisudin zelo roila. ⁵Bade Mishoror bashshar hou ruṭi banaora ar shorab bilaora duiozone eḳ raite duḳan kuab deḳla, tarar kuabor mani-o asil dui laḳan. ⁶Biane Iusufe tarar gese gia deḳla, tara kub mon-mora oiroisoin. ⁷Iusufe tarare zikaila, “Kita oise, aiz oto bezar ḳene?” ⁸Tara zuaf dila, “Amra to kuab deḳsi, oile er tabir buzai deora ḳeu nae.” Iusufe tarare ḳoila, “Mani buzanir ḳemota kita Allae dein na ni? Deki sain, amare hunaukka.”

⁹Ou hi shorab bilaorae, tan shofon Iusufre hunaila. He ḳoilo, “Ami deḳlam, amar samne eḳ anguror gas. ¹⁰Gasor tingu ḍal ase; hou ḍalo kuṛi baronir loge loge ful dorlo, ar soṛa soṛa angur dori faki gelo. ¹¹Ou shomoe Feraunor shorbotor fiala amar ato asil. Ami hou angur oḳol sifia rosh bar ḳori Feraunor ato dilam.” ¹²Iusufe tare ḳoila, “Afnar shofnor mani oilo, tin ḍal mani tin din. ¹³Ou tin dinor maze Feraune afnare bar ḳoria hirbar agor ḳamo lagaiba. Afne hirbar agor laḳan Feraunor ato fiala tuli diba. ¹⁴Oile afnare minoti ḳori ḳoiar, afnar balai oar bade amare mono ḳorba ar doea ḳori Feraunor gese amar ḳota ḳoia, i zelḳana tone amare ḳalas ḳoraiba. ¹⁵Ibrani oḳolor desh tone amare zur ḳori doria ana oise. Ar ono aia-o ami zel ḳaṭar moto emon kunta ḳorsi na.”

¹⁶Bade hi ruṭi banaorae zebla deḳlo zen, shorab bilaorar kuabor mani bala ase, teu he Iusufre ḳoilo, “Ami-o kuabe deḳsi, deḳlam zen amar matat tin ṭukri moedar ruṭi loisi. ¹⁷Ar uforor ṭukrit asil, Feraunor lagi bout zator fiṭa; teu faki oḳole aia, amar matar uforor ṭukri taki ita ḳailira.” ¹⁸Iusufe zuaf dila, “I shofnor tabir oilo, tin ṭukri mani tin din. ¹⁹Ou tin dinor maze, Feraune afnar doṛ tone ḳolla algaia, gasor maze loṭḳaiba, heshe fakinte aia afnar doṛor gust ḳaiba.”

²⁰Er tin dinor din Feraunor zonmodin asil. Feraune tan dorbaror hoḳol manshor lagi, ḳani tiar ḳoraila. Ar hou ruṭi banaora ar shorab bilaora duiozonre anaia tan dorbaror samne azir ḳorla. ²¹Tain shorab bilaorare hirbar tan ḳamo lagaila, he Feraunor ato hirbar fiala tulia dilo. ²²Oile ruṭi banaorare gaso loṭḳaila. Iusufe zela ḳoisla, ekkere oula oilo. ²³Ta-o Iusufor ḳota hi shorab bilaorar iad roilo na, he faurililo.

Bashsha Feraunor dui kuab

¹Er fura dui boros bade Feraune kuabe deḳla. Tain deḳla, Nil nodor gese tain ubai roisoin, ²ar Nil nod tone shatgu shundor tortaza goru uṭia aia nol bonor maze aṭia ḳaira. ³Erbade deḳoin, aro shatgu halaḳ ar ḳobisor laḳan goru uṭia aia, Nil nodor faror hou goruintor ḳasat ubailo. ⁴Heshe ou halaḳ ar ḳobisor laḳan goruinte hou shundor ar tortaza shato gorure ḳaililo, teu Feraunor gum bangi gelo. ⁵Bade tain hirbar gumaila ar duara kuabe deḳla, eḳ gomor ḍeṭat shatgu fusṭo ar taza soṛa baroise. ⁶Heshe baroilo, fubali batashor gorome hukna shatgu ḳom fusṭo susa-ala soṛa, ⁷ar ou ḳom fusṭo soṛae hou shato fusṭo-taza soṛare gililailo. Bade Feraunor gum bangi gelo, tain buzla zen ita to kuab. ⁸Biane tan mon ostir oigelo, teu Mishor deshor hoḳol zadugir ar fonḍitre ḳobriadi anaia, tan kuab tarare hunaila, oile erar ḳeu er tabir ḳoito farlo na.

⁹Heshe Feraunor hou shorab bilaorae ḳoilo, “Huzur, aiz amar eḳ dush mono oise. ¹⁰Bout din age huzure nizor dui gulamor ufre gusa ḳorsla, tain amare ar ruṭi banaorare boṛo zelar sabor baṛir zelo toisla. ¹¹Ar eḳ raite amra duiozone alog alog kuab deḳlam, duio kuabor dui laḳan tabir asil. ¹²I shomoe zelar sabor, eḳ Ibrani zuan gulam-o ono asil. Tare amrar kuabor ḳota hunailam, ar he amrar kuabor tabir ḳoia dilo. ¹³He amrar kuabor tabir zela ḳoisil, ekkere ou laḳan-u folilo. Huzure amare hirbar tan ḳamo lagaila, oile ruṭi banaorare gaso loṭḳaila.”

¹⁴Ou Feraune Iusufre anar lagi manush faṭaila, tara gia zoldi ḳori zelḳana tone tanre bar ḳori anla. Iusufe daṛi-mus ḳamaia, ḳafoṛ bodlaia Feraunor dorbaro azir oila. ¹⁵Feraune tanre ḳoila, “Ami ekkan kuab deḳsi, oile er tabir ḳeu ḳoito farer na. Te ami hunlam zen tumar gese kuab hunaile, tumi er tabir ḳoitae faro.” ¹⁶Iusufe zuaf dila, “Hi ḳemota to amar nae, Alla Pake moharazor dilor shantir zuaf bataia dibane.” ¹⁷Feraune Iusufre ḳoila, “Kuabe deḳlam, ami Nil nodor faro ubai roisi. ¹⁸Ar deki, gango tone shatgu shundor, tortaza goru uṭia aia nol bonor maze aṭia ḳaira. ¹⁹Erbade aro shatgu goru uṭia ailo. Ita halaḳ ar ḳobisor laḳan, Mishor deshor kunuḳano ilaḳan be-surot goru kunudino deḳsi na. ²⁰Bade ou halaḳ ar be-surot goruinte, agor hi shato tortaza gorure ḳaililo. ²¹Oile tara itare gilar bade, ḳaise ḳori buzao gelo na, ḳaron tara agor laḳan-u halaḳ ar be-surot roilo. Heshe amar gum bangi gelo. ²²Bade ami hirbar deḳlam, gomor eḳ ḍeṭar maze shatgu boṛo ar fusṭo soṛa baroilo. ²³Fubali haoar gorome hukna shatgu ḳom fusṭo susa-ala soṛao baroilo. ²⁴Ar ou shato soṛae, hou taza shato soṛare gilililo. I kuab ami zadugir oḳolre hunaislam, oile ḳeu er mani ḳoito farse na.”

²⁵Iusufe Feraunre ḳoila, “Huzur, i duio kuab-u adote eḳ. Allae zeta ḳorta saira, ita afnare deḳaisoin. ²⁶Ou tortaza shato gorur mani shat boros, ar fusṭo shato gomor soṛar mani-o shat boros. Duio kuab-u eḳ. ²⁷Ar heshe uṭia aoa shato halaḳ ar be-surot goru, ar fubali haoar gorome hukna shato gomor soṛa, erar mani oilo, aḳalor shat boros. ²⁸Te Allae zeta ḳorta saira, ita moharazre deḳaisoin. Ou ḳota-u ami afnare age ḳoisi. ²⁹Hunoukka, hara Mishor desho shat boros kub beshi foshol folibo. ³⁰Erbade-u aibo aḳalor shat boros. Teu agor hi beshi fosholor ḳota manshe fauriliba, ar aḳale deshre shesh ḳori dibo. ³¹Ou aḳalor dorun, agor hi fosholor ḳota manshor mono roito nae. I aḳal oibo kub bezuita mosibotor. ³²I kuab afnare duibar deḳanir mani oilo, Allae i dosha goṭaiba, ekkere ṭik korilaisoin, ita kub zoldi ḳori-u goṭibo. ³³Oḳon huzure eḳzon sotur-buzdar fonḍit manshore tukaia, en gese Mishorre shofi deukka. ³⁴Ar afne oula ḳoroukka, desho afnar ḳormosari lagain, ou shat bosore zebla kub beshi foshol folbo, i shomoe tara er fas baṭor eḳ baṭ dola ḳorba. ³⁵Tara ou shudinor bosoror dan dola ḳoria huzuror doḳole, bazare bazare gudamo boria touk ar hefazot korouk. ³⁶Shat boros dori Mishoro ze aḳal oibo, hou aḳalor lagi dan zomaia raḳba, teu aḳale deshor manush morta nae.”

Feraune Iusuf (a:)-re montri banaila

³⁷Iusufor i mat, Feraun ar tan dorbaror hoḳolor gese kub bala mono oilo. ³⁸Feraune tan uzir-nazir oḳolre ḳoila, “I besarar laḳan Allar ruhala manush ami kuai tukaia faimu?” ³⁹Ou Feraune Iusufre ḳoila, “Allae zebla tumar gese ita hokkolta zair ḳorsoin, te tumar laḳan buzdar ar bibeḳman to ar ḳeu nae. ⁴⁰Oḳon razbaṛir hokkolta tumi-u salaibae. Amar hoḳol proza tumar hukme solba. Ḳali bashshar toḳto, ami tumar ufre taḳmu.” ⁴¹Tain Iusufre ḳoila, “Huno, ami asta Mishor desh tumar ato shofi dilam.” ⁴²Ar Feraune nizor anguil taki bashshai silor angṭi kulia Iusufor ato findaila, tan golat shunar har dila ar dami ḳafoṛor shada lebas-o findaila. ⁴³Bade tain Iusufre tan raijjor dui nombor rotor maze tulla ar Iusufor age age elan ḳora oilo, “Fornam ḳoro! Fornam ḳoro!” Ou laḳan tain Iusufor ufre asta Mishor deshor bar shomzai dila. ⁴⁴Feraune Iusufre ḳoila, “Ami-u Feraun, Mishoror bashsha! Oile tumar hukum saṛa, asta Mishor desho ḳeu rum laṛaito farto nae.” ⁴⁵Feraune Iusufor noea nam raḳla, Shafonot-Faneh. Tain On mondiror babon-ṭakur Puṭiferar fuṛi Ashonotre Iusufor loge bia dila ar Iusufe asta Mishor desho gura-guri ḳorat lagla.

⁴⁶Iusufe tish boros boeosho, Mishoror bashsha Feraunor ḳamo lagla, tain Feraunor dorbar tone baroia deshor hoḳol zaga sofor ḳorla. ⁴⁷Ar beshi fosholor ou shat bosore desho bout foshol folilo. ⁴⁸Teu Iusufe i shudinor shat bosore Mishoror hoḳol dan, bazaror gudam gorainto zoma ḳoraia toila. Tain hokkol bazaror sairo galar dan oḳol, hou bazaror gudamo zomaila. ⁴⁹Tain doriar balur laḳan oula behishab dan dola ḳorla zen, ita ar mafia fuṛaita farla na, teu mafa-mafi ḳora bad dilaila.

⁵⁰Ar aḳalor age On mondiror babon-ṭakur, Puṭiferar fuṛi Ashonotor feṭo Iusufor dui fua oila. ⁵¹Iusufe tan boṛo fuar nam raḳla Manosha [mani, faurilaoa]. Tain ḳoila, “Allae amar hoḳol toklif ar bafor baṛir hokkolta, amar dil tone fauraila.” ⁵²Bade tan dusra fuar nam raḳla Afraim [mani, foldar]. Tain ḳoila, “Ami ze desho toklif faisi, hou desho-u Allae amare foldar banaila.”

⁵³Ar Mishor deshor kub beshi fosholor hi shat boros furigelo. ⁵⁴Teu Iusufe zela ḳoisla, oula aḳalor hou shat boros aia azilo. Erloge ḳanda-ḳasar hoḳol desho-o nidan deḳa dilo oile Mishoror kunu zagat kani-kurakir obab oilo na. ⁵⁵Heshe asta Mishor desho aḳal deḳa dile, proza oḳole aia Feraunor gese ḳani magila, teu Feraune ḳoila, “Tumra Iusufor gese zao. Ein zela ḳoin, ṭik-u oula ḳoro.” ⁵⁶I aḳal asta desh zuṛi deḳa dilo. Bade aro bezuita oae Iusufe hoḳol zagar gudam gorain kulia, Mishori oḳolor gese dan besat lagla. ⁵⁷Asta duniait nidan deḳa dilo ar hoḳol deshor manshe dan ḳorid ḳorar lagi Mishor desho Iusufor gese aila.

Hozrot Iusuf (a:)-or dosh bai Mishoro gela

¹Iakube-o hunla Mishor desho dan ase, ou tan fuaintore ḳoila, “Tumra egue arogur mukor bae sairoiso ḳene? ²Huno, ami hunchi, Mishor desho dan ase, tumra hono gia amrar lagi kisu dan loia ano, teu amra i moron takia zane basmu.” ³Ou Iusufor dosho baie dan loia anar lagi Mishoro gela. ⁴Oile Iakube Iusufor afon maʼr feṭor bai Bin-Iaminre tarar loge zaite dila na, tain ḳoila, er kunu bifod oizito fare. ⁵Dan ḳoridor lagi Kenan desh taki zera Mishoro gelo, Israilor fuain-o tarar dolor logo oia gela, ḳaron Kenan desho-o aḳal asil.

⁶I shomoe Iusuf-u asla Mishor deshor hokkoltar malik. Deshor hoḳol manshor gese tain-u dan besta. Teu Iusufor baiain-o tan gese gia, tara matare maṭit lagaia tanre ijjot korla. ⁷Iusufe tan baiaintore dekia-u sinilila, oile na sinar ban ḳoria, tain kub ḳoṛa golae tarare zikaila, “Tumra kuai taki aiso?” Tara ḳoila, “Amra Kenan desh tone aisi, dan nibar lagi.” ⁸Iusufe tan baiainre hasaror sinleo, baiainte tanre sinla na. ⁹Tain erare loia kuabe zeta deḳsla, hou ḳota tan mono oilo. Ou tain erare ḳoila, “Tumra to guia! Amrar deshor fak-fuḳor ota deḳat aiso.” ¹⁰Tara ḳoila, “Ji na huzur, afnar i gulam oḳole ḳali dan loat aisi. ¹¹Amra to hoḳol eḳ bafor aolad ar saichcha manush; afnar i gulam oḳol kunu guia nae.” ¹²Iusufe hirbar tarare ḳoila, “Na, na, tumra amar deshor fak-fuḳor deḳat aiso.” ¹³Tara ḳoila, “Afnar gulam oḳol, hoḳole milia baro bai. Amra Kenan deshor eḳ bafor aolad. Amrar huru bai oḳon babar gese roise, ar aroḳ bai nae.” ¹⁴Iusufe tarare ḳoila, “Na, na, ami ṭiku ḳoisi, tumra guia-u! ¹⁵Te tumrar forikka ola-u oizauk: ami Feraunor zanor ḳosom ḳori ḳoiar, tumrar huru bai ono na aile, tumra-o in tone saṛa faitae nae. ¹⁶Tumrar eḳzonre faṭaia, tumrar hou baire anao ar baki hoḳole bondi ro. Ou forikkae tumrar mator hasa-misa buzmu. Tare na anle, ami Feraunor zanor ḳosom ḳori ḳoiar, tumra nichoe guia!.” ¹⁷Ar Iusufe tin din tarare azot kanat bondi ḳori toila.

¹⁸Heshe tin dinor din, Iusufe tarare ḳoila, “Huno, ami to Allare ḍorai, tumra baste saile, ami zela ḳoi, oula ḳoro. ¹⁹Tumra hasaror saichcha manush oile, tumrar eḳ bai azoto taḳouk ar baki hoḳole tumrar aḳali foribaror lagi dan loia zaogi. ²⁰Tumrar mat hasa ki na iṭa buzar lagi, tumrar huru baire amar gese loia aio. Teu tumra mortae nae.” Ou tara-o razi oila. ²¹Bade tara mata-mati ḳorla, “Hasa-u to, amrar hi bair loge zeta ḳorsi ita oinnae. He amrar gese ḳaz-minoti ḳorleo, amra tar mato ḳan disi na. Erlagi amrar ufre i mosibot aise.” ²²Teu Rubene tarare ḳoila, “Ami to tumrare ḳoislam, tar ufre kunu zulum ḳorio na, tumra hunlae na. Deḳo, oḳon tar lour hishab-nikash dite or.” ²³Oile Iusufe zen tarar mat buzra, ita tara zanlo na. Ḳaron tain mat buzaora eḳzonre maze rakia, tarar loge matta. ²⁴Teu Iusufe tarar ges tone horia gia ḳandita lagla. Bade hirbar aia tarar loge matila ar tain Shimionre doria tarar samne-u bandailla. ²⁵Bade Iusufe tarar bostar maze dan boraia, zarzir ṭeḳa tar bostat firai dia, erar fotor lagi mosa deoar lagi hukum dila. Ar oula ḳora oilo.

²⁶Heshe tara zarzir gadar fiṭit danor gaiṭ bandia roana oila. ²⁷Foto ziranir zagat gia zebla eḳzone gadare ḳaoanir lagi bosta kullo, ar deḳlo, bostar muko tar ṭeḳar kuti. ²⁸Ou he tar baiainre ḳoilo, “Deḳo, deḳo, amar ṭeḳa amar bostat firot deoa oise.” Dekia-u tarar zan uṛigelo ar ḍoraia ḳafte ḳafte ḳoilo, “Allae amrare ita kita ḳorla?”

²⁹Bade Kenan desho gia tarar baf Iakubor gese azir oia, ita hoḳolta hunaia ḳoila, ³⁰“Hi deshor malike, amrare kub ḳoṛa golae ḳoisoin, amra guia oia hi desho gesi. ³¹Amra ḳoisi, amra hok manush, kunu guia nae. ³²Amra barozon bai, eḳ bafor baro fua, oile amrar eḳzon nae ar hoḳol tone huru bai oḳon Kenan desho babar gese roise. ³³Ou hi manshe, zein hi deshor malik, tain amrare ḳoila, ‘Ami oula buzmu zen, tumra hok manush. Tumrar eḳ baire amar gese toia, tumrar aḳali foribaror lagi dan loia zao. ³⁴Ar tumrar huru baire amar gese loia aio. Teu ami buzmu, tumra hok manush, kunu guia nae. Bade ami tumrar baire firai dimu ar tumra i desho ḳae-ḳarbar ḳortae farbae.’”

³⁵Bade tara bosta tone dan ḍalteu deḳoin, tarar hoḳolor ṭeḳar kuti bostar maze roise. Ita dekia tarar bafe ar tara-o ḍoraigela. ³⁶Teu bafe tarare ḳoila, “Tumra amare aolad saṛa banaiso. Iusuf nae, Shimion-o nae ar oḳon tumra hirbar Bin-Iaminre-o nitae sairae. Ita hoḳolta-u amar zulum.” ³⁷Rubene tan bafore ḳoila, “Ami Bin-Iaminre tumar gese firaia ante na farle, tumi amar duio fuare kun ḳorilio. Tare tumi amar ato saṛi deo, ami tare tumar gese firaia anmu.” ³⁸Iakube ḳoila, “Na, amar i fua tumrar loge ditam nae. Tar bai morigese, ar oḳon he eḳla zita ase. Tumrar zaoar foto zudi tar kunu bifod oe, te ou faḳna sule bout duḳ dia tumra amare ḳoeboro haraibae.”

Dosh baie Bin-Iaminre loia gela

¹Kenan deshor aḳalor bab aro behal oilo. ²Ar Mishor desh tone zeta dan nisla, ita fuṛai gele Israile ḳoila, “Tumra hirbar gia amrar lagi kisu ḳani-kuraki loia anogi.” ³Teu Ehudae tanre ḳoilo, “Hou manshe amrare duara ḳori ḳoia disoin, tumrar bai tumrar loge na aile tumra ar amar samne aio na. ⁴Oḳon tumi amrar baire amrar loge ḳori deo, teu amra gia tumar lagi ḳani loia aimu. ⁵Ar tare loge na dile amra-o zaitam nae. Hi manshe amrare ḳoia disoin, tumrar baire loge na anle, tumra ar amar samne aio na.” ⁶Israile ḳoila, “Tumra ḳene amar loge oula fatrami ḳorlae? Tumrar aroḳ bai ase, ita tanre ḳene ḳoilae?” ⁷Tara ḳoila, “Hi manshe amrar ar amrar foribaror aga-guṛi hokkolta zikaisoin, tumrar baf kita oḳono zinda asoin ni? Tumrar ar kunu bai asoin ni? Amra ḳali tan soalor zuaf dislam, amra kunu zantam ni, tain ḳoiba tumrar baire-o loia aio?” ⁸Ehudae tan bafore ḳoila, “Tare amar loge ḳori dilao, amra zoldi zoldi roana oizai, teu tumi, amra ar amrar huruttain hokkol-u zane basmu, ḳeu mortam nae. ⁹Ami nize-u tar lagi zamin roilam, tare amar ges tone shomzia nio. Ami tare tumar gese firaia na anle, tumar gese azir na ḳorle, hara zindegi bora ami tumar gese dayi roimu. ¹⁰Ar oto deri na ḳorle, amra otodine duibar guria aitam farlam one.”

¹¹Ou tarar baf Israile ḳoila, “Oula oile ek kam ḳoro, tumra zarzir begor maze onor bala bala mal, agor, mou, kushboe moshla, meshke-ambor, pesta ar badam boria hou manshor lagi salami loia zao. ¹²Ar tumrar loge ḳori agor ḍabul ṭeḳa neo, bostar muko ze ṭeḳa firot aise, ta-o hirbar loia zao, kizani kunu bul oigesil. ¹³Tumrar baire loge loia, zoldi ḳori hou manshor gese zao. ¹⁴Shorbo-shoktiman Allae tumrar bae, hou manshor meherbani foeda ḳoroukka, zate tain tumrar hou bai ar Bin-Iaminre tumrar ato firot dein. Ar amar fua kuani gele, na oe gelo-u.” ¹⁵Teu tara hou salami, ḍabul ṭeḳa ar Bin-Iaminre loia roana oia, Mishor desho fousia Iusufor samne azir oila.

¹⁶Tarar loge Bin-Iaminre dekia Iusufe tan baṛir ḳadimre ḳoila, “Ou manush oḳolre baṛir bitre neo ar ḳoshi zobo ḳoria gust rando. Tara madane amar loge ḳaiba.” ¹⁷Iusufe zela ḳoila, ḳadime-o ṭik oula ḳorlo, he erare baṛir bitre loia gelo. ¹⁸Ar he erare Iusufor baṛir bitre neoae, tara ḍoraia mata-mati ḳorla, “Agor fira ze ṭeḳa amrar bostat kori firot gesil, otar lagi-u amrare ono nira, oḳon amrar dush deḳaia mair-doir ḳoria amrare gulam banaiba, ar gada oḳol-o ḳaṛia niba.” ¹⁹Teu Iusufor baṛir dorozar samne aia tara baṛir ḳadimre ḳoila, ²⁰“Huzur, amra er age-o dan loat aislam, ²¹heshe firot zaoar bala, dom loibar zagat fousia, bosta kulteu deki, amrar fura ṭeḳa-foesha zarzir bostar muko roise, oḳon ou ṭeḳa firot anchi. ²²Ar dan neoar lagi aro ṭeḳa anchi, oile hi ṭeḳa amrar bostar bitre ḳe toisil zani na.” ²³Ou ḳadime ḳoilo, “Tumrar balai ouk, ḍoraio na. Tumrar ar tumrar bafor Allae, i gaibi don tumrar bostar maze disoin. Tumrar ṭeḳa ami faisi.” Bade he Shimionre bar ḳoria tarar gese loia ailo. ²⁴He hoḳolre Iusufor baṛir bitre nia fani dilo tara fao duila ar he tarar gada oḳolre-o ḳani dilo. ²⁵Iusuf madane aiba gotike, era tarar salami oḳol zuit korla. Tara hunsla zen, tan logeu tarar ḳana-dana oibo.

²⁶Bade Iusuf baṛit aile, tarar hou salami oḳol goror bitre nia tanre dila, dia harle tanre soizda ḳorla. ²⁷Tarar bala-bura ḳobor hunia tain zikaila, “Tumrar ze murobbi bafor ḳota ḳoislae, tain bala asoin ni? Tain zinda asoin ni?” ²⁸Tara zuaf dila, “Ji oe, afnar gulam amrar baba oḳono zinda asoin ar bala asoin.” Heshe tara mata nuaia tanre ijjot korla. ²⁹Iusufe souḳ tulia tan nizor bai Bin-Iaminre dekia ḳoila, “Ouni tumrar hou huru bai, zar ḳota age ḳoislae?” Tain Bin-Iaminre ḳoila, “Allae tumare rohom ḳoroukka.” ³⁰Baire dekia Iusufor dil ḳandito laglo. Tain zoldi ḳori baroia, nizor kuṭat gia ḳandila. ³¹Bade souḳ-muk doia baroia aila ar nizore shamlaia ḳani bilaibar hukum dila. ³²Ou Iusufre, tan baiainre ar tan loge ḳaneala Mishori oḳolre alog alog zagat kani dila. Ḳaron Mishorinte Ibrani oḳolor loge boia ḳana-dana ḳorto na, ita tara gin ḳoroin. ³³Tara Iusufor samne tan baiainre boṛore boṛor zagat, hurure hurur zagat boaila, teu tara taijjub oia eḳzone aroḳzonor bae sai roila. ³⁴Ar Iusufe nizor talor ḳani tone tan baiainre deoaila, oile Bin-Iaminre hoḳol tone fas gun beshi deoa oilo. Ḳaia harle tara kushi oia uṭla.

Bin-Iaminre bondi ḳorla

¹Bade Iusufe tan baṛir ḳadimre ou laḳan hukum dila, “I manush oḳolor bostat zoto dan zaga oe, boria dilao ar zarzir ṭeḳa tar bostar muko toio. ²Oile ou huru zonor bostar muko tar ṭeḳar loge amar rufar baṭi-o toio.” Iusufe tare zela ḳoila, he oula ḳorlo. ³Bador din biane-u tara gada loia bidae oila. ⁴Tara ṭaun taki baroia tuṛa duroi zaiteu Iusufe tan baṛir ḳadimre ḳoila, “Zoldi ḳori erar ḳore douṛaia gia, erar lagal faia harle ḳoibae, tumra ufoḳaror bodla ḳene ḳeti ḳorlae? ⁵Ou baṭit koria to amar munibe fanio ḳain ar todbiror ḳamo ḳoroin. Tumra i ḳamḳan kub oinnae ḳorso.”

⁶Hi ḳadime tarar ḳoredi gia lagal faia ou laḳan ḳoilo. ⁷Oile tara ḳoila, “Huzur ila mat kene matira? Afnar gulam oḳole kunu laḳan-u ita ḳam ḳorto nae. ⁸Deḳoukka, agorbar amrar bostar muko ze ṭeḳa faislam, ita amra Kenan desh tone hirbar afnar gese firot anchi, te amra kunu afnar munibor baṛi tone shuna-rufa suri ḳormu ni? ⁹Afnar i gulam oḳolor maze zar gese ou baṭi faiba, tare marilaiba ar amra-o huzuror gulam oizimu.” ¹⁰Teu ḳadime ḳoilo, “Bala ḳota, te tumra zela ḳoilae, oula-u ouk. Zar gese ou baṭi milbo, ḳali tare amar gulam banaimu ar baki hoḳol ḳalas faibae.” ¹¹Ou tara zoldi ḳori hoḳolor bosta maṭit lamaia kullo. ¹²Ar ḳadime boṛo bai tone huru bai tori hoḳolor bosta tukaile-o heshe Bin-Iaminor bostat hi baṭi millo. ¹³Teu tara zarzir finnor ḳafoṛ faṛillo, bade hirbar gadar fiṭit gaiṭ bandia ṭauno ailo.

¹⁴Teu Ehuda ar tar baiain Iusufor baṛit gela, i shomoe tain hono asla. Tara tan samne gia maṭit foṛla. ¹⁵Iusufe tarare ḳoila, “Tumra ita kita ḳorlae? Ami zen hoḳolta gontam fari, ita tumra zano na ni?” ¹⁶Ehudae ḳoilo, “Huzuror gese amra kita ḳoimu? Kita zuaf dimu? Ar kila amrare be-ḳosur ḳoitam? Allae-u tan gulam oḳolor dush deḳai disoin, te zar gese i baṭi milse, he ar amra hoḳole-u huzuror gulam oilam.” ¹⁷Oile Iusufe ḳoila, “Na, na, ami i ḳam kunu laḳan-u ḳortam nae. Zar gese ou baṭi milse, he-u amar gulam oibo, baki shob sohi-salamote tumrar bafor gese zaogi.”

¹⁸Teu Ehudae Iusufor ḳasat gia ḳoilo, “Huzur afne to Feraunor homan, te doea ḳori afnar gulamre ekkan mat matar shuzug deukka. Afnar gulamor ufre gusa oin na zen. ¹⁹Huzure age i gulam oḳolre zikaisla, tumrar baf ba kunu bai asoin ni. ²⁰Amra zuaf dislam, amrar murobbi baba zinda asoin, ar tan heshḳali boeoshor egu fua ase. Tar bai morigese, ar he eḳ maʼr eḳ fut gotike babae tare kub maea ḳoroin. ²¹Bade afnar i gulam oḳolre ḳoisla, tare amar gese loia aio, ami tare nizor souḳe deḳmu. ²²Hi shomoe amra huzurre ḳoislam, babare toia he aito farto nae ar toia aileo baba mara zaiba. ²³Oile afne i gulam oḳolre ḳoisla, tumrar huru baire loge na anle, tumra ar amar samne aio na. ²⁴Erlagi amra firia gia afnar gulam, amrar babare huzuror hoḳol ḳota hunaislam. ²⁵Bade babae ḳoila, tumra hirbar gia amrar lagi aro tuṛa dan loia anogi. ²⁶Teu amra ḳoilam, amrar huru baire loge dile amra zaimu, arnae amra gia hi manshor samne muk deḳaitam nae. ²⁷Ou afnar gulam, amrar babae ḳoila, tumra to zano, amar i bibir torofa dugu fua asil. ²⁸Erar eḳzon amar sokur samon taki baroia gelo, ar to kunudin tare deḳlam na, ami buzlam zen, nichoe kunu zanuare tare siṛi-biṛilaise. ²⁹Oḳon tumra ere-o amar ges tone nilegi ar er kunu ḳeti oile, tar duḳe tumra amare ou faḳna sule ḳoeboro haraibae. ³⁰Erlagi oḳon zudi afnar gulam, amar babar gese ami zai ar tan i fuare loge na deḳoin, te er zanor loge tan zan ekḳano banda gotike, ³¹tare na deḳle, tain nichoe mara zaiba. Afnar gulam, amrar murobbi baf bout duḳe faḳna sul loia ḳoeboro hamaiba. ³²Ar afnar gulam ami, amar babar gese tar lagi zamin oia ḳoisi zen, tare firaia ante na farle, hara zindegi bora ami tumar gese dabit roimu. ³³Te huzur ami minoti ḳoriar, tar bodla ami afnar gulami ḳormu ar tare afne erar loge zaibar dilaukka. ³⁴Ere loge na nia ami kila babar gese zaimu? Naile babar zanor shorbonash amar nizor souḳe deḳon lagbo.”

Baiainre forisoe dila

¹Iusufe tan ḳormosari oḳolor samne nizore ar ṭik raḳta farla na, tain sillaia ḳoila, “Amar ges tone hokkol hori zao!” Teu baiaintor gese nizor forisoe deoar shomoe tan samne ar ḳeu roilo na. ²Tain sillaia ḳandon shuru ḳorla, teu Mishori oḳole ita hunla ar Feraunor baṛir manshe-o i ḳobor faila. ³Iusufe tan baiaintore ḳoila, “Ami Iusuf; amar baba oḳono zinda asoin ni?” Ou tan baiainte ḍoraia zoban bond oigelo, matta farla na.

⁴Teu Iusufe tan baiainre ḳoila, “Tumra amar ḳasat ao.” Tara ḳasat aile tain ḳoila, “Ami tumrar hou bai Iusuf, Mishoro zaora bepari oḳolor gese, tumra zare besilaislae. ⁵Oile tumra amare besislae ḳori oḳon bezar oio na, ba nizor ufre naraz oio na. Manshor zanor hefazotor lagi, Allae-u tumrar age amare ono faṭaisoin. ⁶Aḳal soler ou dui boros dori, te aro fas boros kunu ḳet-ḳamar ba foshol folto nae. ⁷Duniait tumrar aolad oḳolre basaia raḳar lagi Allae-u tan kudrote tumrar age amare faṭaisoin. ⁸Teu buza zae zen, tumra amare ino faṭaiso na, Allae-u faṭaisoin. Tain amare Feraunor bafor homani ḳoria tan foribaror saloḳdar banaisoin, ar hara Mishor desh shashonor eḳtiar disoin. ⁹Oḳon tumra zoldi ḳori babar gese gia ḳo, tan fua Iusufe ḳoise, Allae amare hara Mishor deshor saloḳdar banaisoin, te tumi ar deri na ḳoria amar gese aio. ¹⁰Tumi, tumar fua-fuṛin, nati-futi, goru-meṛar fal ar tumar zotota ase, hokkolta loia amar gese Gushon elaḳat roibae. ¹¹Hono ami tumare deḳa-huna ḳormu, aḳal to aro fas boros roibo, arnae tumitain hoḳole i aḳale be-halot oizitae faro. ¹²Amar afon bai Bin-Iamine ar tumra hoḳole nizor souḳe deḳrae zen, ami nizor muke tumrar loge matram. ¹³Mishor desho amar zeta dafoṭ, man-ijjot deḳrae, tumra amar babare ita ḳoibae, ar tanre zoldi ḳori oḳano loia aibae.” ¹⁴Heshe Iusufe tan bai Bin-Iaminor golat ainja ḳori doria ḳandon shuru ḳorla ar Bin-Iamine-o golat dori ḳanda-ḳaṭi ḳorla. ¹⁵Bade Iusufe tan hoḳol baiainre hunga dila ar tarar golat dorio ḳandila. Teu baiainte-o tan loge mat-ḳota matla.

¹⁶Iusufor baiain aoar ḳobor Feraunor baṛit fousile, Feraun ar tan ḳormosari oḳol kushi oila. ¹⁷Feraune Iusufre ḳoila, “Tumar baiainre ḳo zen, tumra gadar fiṭit dan bandia Kenan desho gia, ¹⁸babare ar tumrar foribaror hokkolre loia amar gese aio. Ami tumrare Mishoror bala bala siz oḳol dimu ar tumra deshor hoḳol tone bala zaga-o faibae. ¹⁹Ar tumrare ami hukum diar, tumra zarzir bou, fua-fuṛintor lagi Mishor desh taki gaṛi loia gia, tarare ar babare loia aio. ²⁰Ar hono tumrar mal-samanar lagi maea deḳaio na, hara Mishor deshor bala bala siz oḳol to tumrar-u.”

²¹Israilor fuainte oula-u ḳorla. Feraunor hukume Iusufe tarar lagi gaṛi ar fotor ḳanir mosa dila. ²²Tain era hokkolre eḳ seṭ ḳoria ḳafoṛ dila, oile Bin-Iaminre dila fas seṭ ḳafoṛ ar tin-sho rufar ṭeḳa. ²³Tain tan bafor lagi doshgu gadar fiṭit kori Mishoror bala bala siz oḳol, ar doshgu gadir fiṭit kori ḳanir lagi ruṭi ar dan buzai ḳori faṭaila. ²⁴Ou laḳan tan baiaintore bidae dila, bidae bala tain erare ḳoila, “Tumra foto laga-lagi ḳorio na.”

²⁵Bade tara Mishor tone Kenan desho, tarar baf Iakubor gese gia ḳoila, ²⁶“Iusuf oḳono zinda ase. He to oḳon asta Mishor deshor orta-ḳorta.” Oile ita hunia Iakubor hush uṛi gelo, tan bishash-u oilo na. ²⁷Bade Iusufe tarare zeta ḳoia disla ita hunia, ar tane neoar lagi Iusufor faṭail gaṛin dekia, tarar baf Iakubor hush ṭik oilo. ²⁸Israile ḳoila, “Amar fua Iusuf zen oḳono zita ase, oṭa-u to bout, morar age ami gia tare deḳa-u lagbo.”

Hozrot Iakub (a:) Mishor desho aila

¹Israile tan hokkolta loia baroigela. Ar Ber-Shebat aia tan baf Isʼhakor Allar name kurbani ḳorla. ²Bade raitor bala Allae Israilre didar dia ḳoila, “O Iakub, Iakub!” Tain zuaf dila, “Ounu ami.” ³Allae formaila, “Ami Alla, tumar bafor Mabud. Tumi Mishoro zaite ḍoraio na, hono ami tumar eḳ biraṭ zati foeda ḳormu. ⁴Ami tumar loge loge Mishoro zaimu, ar ami-u tumare hirbar firaia anmu ar tumar fua Iusufe tumar souḳ muzaia dibo.”

⁵Bade Iakube Ber-Sheba taki roana oila. Feraune tarare neoar lagi zeta gaṛin disla, Israilor fuainte otat kori tarar bafore ar tarar bou, fua-fuṛinre loia gela. ⁶Heshe Iakub, tan fuain ar tan fura gusṭi, foshur fal oḳol ar Kenan desho ḳamai ḳora hokkol don-doulot loia Mishoro fousla. ⁷Ou laḳan Iakube tan fua-fuṛin, nati-natin, fura gusṭir hokkolre loia Mishoro faroigela.

⁸Boni Israil, mani Iakub ar tan aolad oḳol zera Mishoro gesla, tarar ḳandan-nama oilo: Iakubor boṛo fua Ruben; ⁹ar Rubenor fuain: Honuk, Falu, Hasir ar Kormi. ¹⁰Shimionor fuain: Jimuel, Zamin, Ohod, Jakin, Shuhor, ar Kenani bour torofa Shoul. ¹¹Lebir fuain: Zarsun, Kahat ar Marari. ¹²Ehudar fuain: Eir, Onon, Shela, Firuz ar Zarah. Oile Onon ar Eir Kenan desho-u morigesla. Firuzor fuain: Hasir ar Hamul. ¹³Isaḳoror fuain: Tula, Foa, Jashub ar Shimron. ¹⁴Sobulonor fuain: Sered, Elon ar Joholel. ¹⁵Tara oila Lear huruttain, Foddon-Iramo Lear torofa Iakubor i huruttain ar tan fuṛi Dinar zonmo oisil, era hokkoltae tetrish zon.

¹⁶Sadur fuain oila: Sifon, Hogi, Shuni, Ishbun, Eiri, Orudi ar Oreli. ¹⁷Ashiror fuain: Imna, Jisba, Jisbi, Boria ar tarar boin Sera. Boriar fuain: Hebor ar Molkiel. ¹⁸Tara oila Zilpar huruttain, Labone tan fuṛi Lear loge ou bandi Zilpare disla, era hoḳol-u tair torofa Iakubor huruttain, ou shullo zon.

¹⁹Iakubor bibi Rahelar fuain oila: Iusuf ar Bin-Iamin. ²⁰Iusufor fuain Manosha ar Afraim Mishor desho zonmisla. Erar ma oila On mondiror babon-ṭakur, Puṭiferar fuṛi Ashonot. ²¹Bin-Iaminor fuain: Bela, Beḳor, Oshbel, Gera, Naman, Ehi, Rush, Muppim, Huppim ar Ord. ²²Tara oila Rahelar torofa Iakubor huruttain, ou souddo zon.

²³Danor fua: Hushim. ²⁴Noftalir fuain: Johoshiel, Guni, Izer ar Shillem. ²⁵Tara oila Bilhar huruttain, Labone tan fuṛi Rahelar loge ou bandi Bilhare disla. Era hoḳol-u tair torofa Iakubor huruttain, ou shat zon.

²⁶Iakubor naṛi taki zonmia zara Mishoro aila, tan fuaintor bou bad dia, era hoḳole milia soeshoṭṭi zon asla. ²⁷Mishor desho Iusufor duizon fua zonmisla. Era shoho Iakubor foribaror zara Mishoro aila, tara muṭ shottoir zon.

²⁸Er age Iakube Ehudare Iusufor gese faṭaila, Gushono zaoar fot sinar lagi, teu tara hokkol ono gia fousla. ²⁹Ar Iusufe-o guṛar gaṛi hazaia tan baf Israilor loge Gushono deḳa ḳorat gela, ar tanre dekia-u ainja ḳori golat doria bout shomoe ḳandila. ³⁰Teu Israile Iusufre ḳoila, “Tumi zen zinda aso re fut, iṭa nizor souḳe deḳlam. Oḳon shantie-u mortam farmu.” ³¹Ou Iusufe tan baiaintore ar tan bafor logor hoḳolre ḳoila, “Ami gia Feraunre zanaimu, amar baiain ar amar bafor baṛir hoḳol, Kenan desh tone amar gese aichchoin. ³²Tarar ḳam oilo foshu fala. Tara to sagol-meṛa faloin, ar tarar foshur fal oḳol ar hokkol mal-samana loia aichchoin. ³³Feraune zebla tumrare zikaiba, afnara kita ḳam ḳoroin? ³⁴Ou shomoe tumra ḳoio, afnar i gulam oḳole ar tarar baf-dada oḳole-o huruman tone-u foshu falia basoin. Teu tumra Gushono roitae farbae. Ḳaron foshu falra manshore Mishori oḳole gin ḳoroin.”

¹Iusufe Feraunor gese gia ḳoila, “Amar baba ar baiainte, tarar goru-sagol ar tarar hokkolta loia, Kenan desh saṛia aisoin. Tara aia Gushono fousi gesoin.” ²Baiaintor maze fas zonre nia tain Feraunor samne azir ḳorla. ³Feraune tarare zikaila, “Tumra kita ḳam ḳoro?” Tara ḳoila, “Afnar i gulam oḳole baf-dadar amol takiu foshu fali.” ⁴Tara hirbar ḳoila, “Amra i desho musafir oia taḳar lagi aisi. Kenan desho oḳon bezuita nidan soler ḳori, hino amrar foshur falor kuraki nae. Erlagi doea ḳori afnar i gulam oḳolre, Gushono roibar shuzug deukka.” ⁵Feraune Iusufre ḳoila, “Tumar baf-baiain tumar gese aisoin; ⁶asta Mishor desh-u to tumar samne foṛi roise. Deshor hoḳol taki bala zagat tarare roite deo, tara Gushono-u taḳouk ar erar maze zoiggo manush faile, tarare amar foshur falor saloḳdar banailao.”

⁷Bade Iusufe tan baf Iakubre Feraunor samne anaila ar Iakube Feraunre dua dila. ⁸Feraune Iakubre zikaila, “Afnar boeosh ḳoto oise?” ⁹Iakube ḳoila, “Duniait amar musafirir aeu eḳ-sho tish boros oise, ita to beshi nae, ar kub toklife-u i din ḳaṭse; amar baf-dadar musafirir aeur homan oḳono oise na.” ¹⁰Heshe Iakube Feraunre dua ḳoria bidae loila. ¹¹Teu Iusufe Feraunor hukum moto, tan baf-baiainre Mishor deshor hoḳol taki bala zaga, Ramashesh elaḳat roita dila. ¹²Iusufe tan baf-baiain ar tarar foribarre zarzir dorḳari, ḳani-kuraki hoḳolta zugai dila.

Mishor desho nidan baṛse

¹³Bade aḳal aro betaea oilo, deshor kunu zagat kanir kunta asil na. Teu Mishor ar Kenan desh ekkebare ḳahil oigelo. ¹⁴Mishor ar Kenan deshor manshor zoto ṭeḳa-foesha shuna-rufa asil, itadi tara dan ḳorid ḳorae, Iusufe ota dola ḳoria Feraunor banḍaro zomaila. ¹⁵Mishor ar Kenan deshor hoḳol shuna-rufa zebla fuṛai gelo, teu Mishori oḳole aia Iusufre ḳoila, “Amrare ḳanir kunta deukka. Amrar shuna-rufa fuṛai gese ḳori afnar souḳor samne morizitam ni?” ¹⁶Iusufe ḳoila, “Taile tumrar foshu oḳol ania deo, shuna-rufa fuṛai gele-o foshu oḳolor bodla ami tumrare ḳani-kuraki dimu.” ¹⁷Teu tara zarzir goru-sagol, guṛa-meṛa, gada-gadi Iusufor gese anla ar Iusufe er bodla tarare dan dila. Ou laḳan tarar hokkol foshur bodla, hi bosoror kuraki salaila.

¹⁸Ar hi boros gelo, er bador boros manshe aia Iusufre ḳoila, “Huzuror gese amra kunta-u lukaiar na, amrar hoḳol shuna-rufa shesh oigese ar foshu oḳolo afnare dilaisi. Oḳon amrar ar kunta-u roise na, ḳali ou shoril ar zaga-zomin saṛa. ¹⁹Erlagi afnar souḳor samne zomi-zoma shoho amra kila morizitam? Te afne amrare-o ar amrar hoḳol zomi-zoma-o loilaukka, amra Feraunor gulami ḳormu, ta-o amrare ḳani deukka ar bis deukka, teu amra-o mora tone basmu ar zomin ḳanain-o borbad oito nae.” ²⁰Ou Iusufe Mishor deshor hokkol zomin Feraunor name loilila, ḳaron i aḳal oula bezuita oisil zen, Mishoror hoḳole-u tarar zaga-zomin besilaila. Teu deshor hoḳol zomin Feraunor ato aillo. ²¹Ar Iusufe Mishor deshor eḳ mata taki aroḳ matar hoḳol manshore ṭauno far ḳorilila. ²²Ḳali babon oḳolor zaga-zomin tain loila na, ḳaron erare Feraune beton dita, ar ota dia-u tara solta. ²³Heshe Iusufe manshore ḳoila, “Huno, Feraunor name ami tumrare ar tumrar hoḳol zaga-zomino loililam. Oḳon tumra ou bis oḳol neo ar zomino bain ḳoro. ²⁴Teu zomino zeta foshol folibo, er fas baṭor eḳ baṭ Feraunre dio ar baki sair baṭ, zominor bis, tumra ar tumrar foribar ar huruttaintor ḳanir lagi niogi.” ²⁵Teu manshe ḳoila, “Afne amrar zan basaila. Huzure amrare doea ḳorle, amra Feraunor gulami ḳormu.” ²⁶Bade Iusufe Mishor deshor zaga-zominor lagi ou ain zari ḳorla, hoḳol fosholor fas baṭor eḳ baṭ Feraune faiba, ḳali babon oḳolor zomin bade. Ou ain oḳono soler.

Hozrot Iakub (a:)-re dafonor lagi osiot

²⁷Boni Israile Mishor deshor Gushono boshot korla. Tara honor doḳoldari faia, kub folala oila ar tarar bout aolad oila. ²⁸Mishor desho aia Iakub shotro boros zinda roila. Teu tain hoḳoltae eḳ-sho shatsallish boros basila. ²⁹Israilor moutor din ḳasaia aile tan fua Iusufre ḳobor di anaia ḳoila, “Amar bae tumar meherbani oile ekkan ḳoul ḳoraitam, tumi amar urator tole tumar atḳan harao, tumi amar bae doea ar halali deḳaio, amare Mishoro dafon ḳorio na. ³⁰Ami zebla amar baf-dadar gese zaimugi, ou shomoe tumi amare Mishor desh taki nia, amar baf-dadar ḳobrostano dafon ḳorio.” Iusufe ḳoila, “Afne zela ḳoila, oula-u ḳormu.” ³¹Teu Iakube ḳoila, “Te tumi amar gese ḳosom ḳoro.” Iusufe ḳosom ḳorla. Ou Israile tan bisnar hitan muka soizdat foṛla.

Iakub (a:)-e dui natire dua dila

¹Erbade Iusufe ḳobor faila, tan baf bemar, ou tan duio fua Manosha ar Afraimre loia bafore deḳat aila. ²Iakube zebla hunla, tan fua Iusuf aisoin, ou tain shorilor hoḳol bol ḳaṭaia, uṭia bisnat boila. ³Ar tain Iusufre ḳoila, “Shorbo-shoktiman Allae Kenan deshor Luz ṭauno, amare didar dia boroḳot dan ḳoria ḳoisla, ⁴‘Huno, ami tumare foldar ḳormu ar bout aolad dimu, tuma tone bout gusṭiala eḳ zati foeda ḳormu ar tumar oarish oḳolre, hameshakur lagi i deshor malikana dimu.’ ⁵Ami tumar gese Mishoro aibar age, tumar ze duio fua Mishoro zonmisoin, tara amar-u. Ruben ar Shimion zela amar, oula Manosha ar Afraim-o amar oiba. ⁶Oile erar bade tumar zeta hurutta oisoin, tara tumar-u roiba, ar tarar bair name-u erar malikana ḳaim oibo. ⁷Ar Foddon taki amra aoar shomoe, Kenan deshor Ifrat taki tuṛa duroi taḳteu, Rahela mara gela. Teu ami honor Ifrato, Betelhamor fotor daro tanre dafon ḳorlam.”

⁸Bade Iusufor fuaintor bae saia Israile zikaila, “Era ḳe?” ⁹Iusufe tanre ḳoila, “Era amar fuain, Allae ou desho-u erare disoin.” Tain ḳoila, “Erare amar ḳasat ano. Ami tarare dua ḳortam.” ¹⁰Murobbi boeosho souḳor zuti ḳomi zaoae Israile bala ḳori deḳta na. Teu era ḳasat aile, Israile tarare ainja ḳori doria hunga dila. ¹¹Tain Iusufre ḳoila, “Babare, ami mono ḳorslam tumar muk ar kunu din deḳtam nae, oile Allae tumar aolad oḳolre-o deḳailila.” ¹²Teu Iusufe tan bafor ges tone, fuaintore horaia maṭit soizda ḳorla. ¹³Ar Iusufe tan duio fuare loia, ḍain at dia Afraimre doria Israilor bau galat, ar bau at dia Manoshare doria Israilor ḍain galat ania azir ḳorla. ¹⁴Oile Israilor nizor aḳole, tan at aṛa-aṛi ḳoria, ḍainor at huru fua Afraimor matat ar Iusufor boṛo fua Manoshar matat toila tan bau at. ¹⁵Bade tain Iusufre dua ḳoria ḳoila, “Hou Alla, zan morzie amar baf-dada, Ibrahim ar Isʼhake solta, hou Alla, zein foela taki aiz forzonto amare falia aira, ¹⁶hou firista, zein amare hoḳol mosibot taki basaisoin, tain-u ou duio fuare boroḳot nazil ḳoroukka. Erare dia-u Ibrahim ar Isʼhak ar amar nam zinda taḳouk. Duniair maze tarar bout gusṭi ouk.” ¹⁷Bafe tan ḍain at Afrahimor matat raḳla ḳori Iusuf bezar oigela. Ar Afraimor mata taki horaia, Manoshar matat deoar lagi, tan bafor at usa ḳorla. ¹⁸Tain ato doria ḳoila, “Baba, i laḳan nae. Ounu amar boṛo fua, te afnar ḍain at tar matat raḳoukka.” ¹⁹Oile tan bafe na-kush oia ḳoila, “Babare, ami ita zani, ami ita zani re fut. Taro eḳ zati oibo ar mohan oibo, oile tar huru bai tar saite-o mohan oibo, ar tar aolador bout gusṭi oibo.” ²⁰Israile erbade ou duio natire dua ḳoria ḳoila, “Boni Israile kunu manshore dua ḳorle oula ḳoiba, Allae tumare Afraim ar Manoshar laḳan ḳoroukka.” Oula tain Manoshar saite Afraimre boṛo banaila. ²¹Heshe Israile Iusufre ḳoila, “Deḳo, amar moronor oḳt aichche. Alla tumrar loge roiba, ar tumrare hirbar tumrar baf-dadar desho nichchoe firaia niba. ²²Tumar baiaintor saite tumare eḳ baṭ beshi dilam. Ou baṭ to Shikim elaḳa, ita amar toluar-donuḳ dia Amuri oḳolor ges taki anslam.”

Hozrot Iakub (a:)-or osiot

¹Bade Iakube tan fuaintore anaia ḳoila, “Tumra hokkol ekkano o. Bobishote tumrar zindegi kila zaibo, ita ami tumrare ḳoiram.

²Iakubor fuain, tumra ekḳano ao;

tumrar baf Israilor buli huno.

³Ruben tumi amar boṛo fua,

tumi amar bol, amar zuankir foela fol;

tumi hoḳol taki tezi ar himmoti.

⁴Tumi utrail gorom fanir laḳan,

tumar boṛai roito nae;

tumi afon bafor bisnat geso,

haton maʼr loge nafaki ḳam ḳorso.

⁵Shimion ar Lebi dui bai;

tarar toluar zalimor atiar.

⁶O amar zan, tarar mozliso hamaio na;

O amar shan, tarar shomazo zaio na.

Tara gusa ḳori kun ḳorlo;

aṛuami ḳori bisalor rog ḳaṭlo.

⁷Tarar gusa to lannoti, ita boṛo bezuita;

lannoti tarar zulum, ita to fashan.

Ami tarare Iakubor maze baṭimu;

Boni Israilor maze sitrai dimu.

⁸Ehuda, tumar baiainte tumar tarif ḳorba;

tumi dushmonor gordonat dorbae;

tumar bafor oarish oḳole,

tumar gese mata nuaiba.

⁹Tumi to shinghor baichcha Ehuda.

Tumi shikaror gust kaia horia ailae;

he shinghor laḳan leṭia hutia goṛiailo;

shinghire ḳegue gum bangaito?

¹⁰Ehudar at tone to

raz-laṭi horto nae;

tar duio faor maz tone

bisaror goda zaito nae;

zotodin Shilo na aiba;

ar hoḳol zati tan hukume solba.

¹¹He angur gaso banbo tar gada;

anguror shundor ḍalo banbo gadar baichcha;

lal anguror roshdi duibo tar zubba,

anguror loudi ḳorbo lebas sofa.

¹²Tar souḳ anguror roshe lal ṭoḳṭoḳa,

ar tar dat dudor laḳan dola.

¹³Sobulon doriar faro boshot koribo,

he zaz biṛanir gaṭ oibo,

Sidon forzonto tar shimana oibo.

¹⁴Isaḳor egu bolala gada,

he kuoṛor bitre hute.

¹⁵He deḳlo ziranir zagaḳan bala,

desh-ḳan shundor;

teu gaiṭ boibar lagi ḳand lamailo,

ar zuror gulam oilo.

¹⁶Dane tar nizor proza oḳolor bisar ḳorbo,

Israilor eḳ gusṭir laḳan.

¹⁷He oibo shoṛokor daror haf,

fotor bishala alod;

zegie guṛar faot kamoṛ mare,

guṛ-soar ḳoredi ulṭia foṛe.

¹⁸O Mabud, ami tumar nazator muka sai roisi.

¹⁹Sadure luṭra dole hamla ḳorbo,

bade he-o tarar ḳoredi luṭibo.

²⁰Ashiror kub bala foshol folbo,

he bashshar zuka ḳani zugaibo.

²¹Noftali oilo saṛa horini,

tar muko ase miṭa miṭa mat.

²²Iusuf folala gasor ḍal,

jornar faror folala gasor ḍal;

tar ḍalain beṛa faroi zae.

²³Tir-donuḳalainte tare bezuita toklif disla,

tir maria tare beḳaeda ḳorsla;

²⁴oile tar donuḳ doṛo roilo,

tar ator honat bol roilo;

Iakubor hou mohan shoktialar at dia,

zein Israilor hefazot korra fattor, tanre dia.

²⁵Tumar bafor hou Allare dia,

zein tumare shaijjo ḳorba;

hou shorbo-shoktimanre dia,

zein tumare boroḳot nazil ḳorba;

ufre toa asman taki lamra boroḳote,

tole bisail fani taki baroa jornar boroḳote,

bukur dud ar feṭ taki baroa boroḳote.

²⁶Amar baf-dadar dua taki,

tumar bafor deoa dua bout bala ouk;

ita hameshakur ḳaṛa hazail faṛ-forbot taki lamouk.

Hou dua Iusufor matat foṛouk;

baiain taki alogor matar talut foṛouk.

²⁷Bin-Iamin oilo boṛo-bagor laḳan,

he biane ḳae shikaror gust,

ar hainjae bilae luṭor mal.”

²⁸Era oila Israilor baro gusṭi, tarar bafe tarar lagi duar shomoe oula ḳoila. Tain era hokkolre zarzir faona dua dila.

Hozrot Iakub (a:)-or inteḳal ar dafon

²⁹Bade Iakube tan fuaintore osiot koraila zen, “Amar to baf-dadar gese zaoar shomoe oigese, te Hiṭṭi Ifrunor zominor guhat, amar baf-dadar ḳandat amare dafon ḳorio. ³⁰I guha Kenan deshor, Momrir daro Moḳfelar zomito. Ibrahime Hiṭṭi Ifrunor ges tone ou zomin loisla ḳobrostan bananir lagi. ³¹Ono-u Ibrahim ar tan bibi Saerare dafon ḳora oise, Isʼhak ar tan bibi Rebekare-o ono dafon ḳora oise, ar ami Leare-o ono dafon ḳorsi. ³²I zomin ar er mazor guha Hiṭṭi oḳolor ges tone loisla.”

³³Iakube tan fuaintore osiot ḳora shesh oile, bisnar ufre tan duio fao ekḳano ḳorla ar aḳeri dom saṛia tan baf-dadar gese gelagi.

¹Iusufe tan bafor mukor ufre muk lagaia ḳandita lagla ar tanre hunga dila. ²Bade tain nizor odinor hekim oḳolre hukum dila, tara tan bafor lashre momi banaibar lagi. Teu tara tan gotro momir moshla lagaila. ³Tara i ḳamo sallish din lagaila, ou ḳamo to sallish dinu lage. Ar Mishori oḳole tan lagi shottoir din boria ahazari ḳorla. ⁴Ou ahazarir dinor bade, Iusufe Feraunor baṛir manshore ḳoila, “Afnara zudi amare doea ḳoroin, te Feraunre amar ou ḳotaḳan zanaukka zen. ⁵Babae amare ḳosom ḳoraia ḳoisla, ‘Huno, ami to morizimu, te Kenan desho amar lagi zuit kora ḳoeboro amare dafon ḳorio.’ Teu oḳon tanre dafonor lagi, doea ḳori amare zaite deukka, babare ḳoebor dia-u ami hirbar aimu.” ⁶Feraune zuaf dila, “Tain tumare zela ḳosom ḳoraisoin, tumi gia oula-u ḳoro.” ⁷Teu Iusufe tan bafore dafonor lagi roana dila; ar Feraunor hoḳol gulame, tan dorbaror murobbi oḳole ar Mishoror moe-murobbi oḳole, ⁸Iusufor nizor foribar, tan baiain ar tan bafor foribaror hoḳole roana dila. Gushono ḳali tarar huruttain ar goru-meṛar falain toia gela. ⁹Tara bout guṛar gaṛi ar guṛ-soar oḳol loia eḳ biraṭ dol hazia roana dila. ¹⁰Ar Zordan gangor hofaro Aṭador dan maṛar zagat gia, tara hoḳole shatdin dori Iusufor bafor lagi kub ahazari ar bilaf ḳorla. ¹¹Aṭador dan maṛar zagat tarare ila ahazari ḳorat dekia, hi deshor bashinda Kenani oḳole ḳoila, Mishori oḳolor lagi iṭa kub bezuita ahazari; erlagi Zordan gangor faror ou zagar nam oigelo, Abel-Mishroeim [mani, Mishori oḳolor ahazari]. ¹²Israile tan fuaintore zela osiot korsla, tara tanre olau ḳorla. ¹³Tara tan lash Kenan desho loia gela, ar Momrir gese Moḳfelar zominor, guhar maze tanre dafon ḳorla. Iṭa ḳobrostan bananir lagi Ibrahime, Hiṭṭi Ifrunor ges taki loisla. ¹⁴Bafore dafon ḳorar bade Iusuf, tan baiain ar zoto manush tan bafore dafon ḳorat loge gesla, tara hoḳole Mishoro firia aila.

Hozrot Iusuf (a:)-e baiainre maf ḳorla

¹⁵Baf morigesoin dekia Iusufor baiainte mata-mati ḳorla, Iusufe kiba amrare ginnaibo ar amra tar zeta ḳeti ḳorsi, oḳon ita hokkoltar bodla loibo. ¹⁶Teu tara Iusufor gese ḳobria faṭaia ḳoila, “Tumar bafe morar age i ḳoul ḳorsla zen, ¹⁷tumra Iusufre ou ḳotaḳan ḳoio, tumar baiainte tumar zeta ḳeti ḳorsoin, doea ḳori tumi tarar hi oinnae ar guna maf ḳori dio. Erlagi amra minot koriar, tumar bafor Allar ou gulam oḳolre maf ḳori dilao.” Tarar mat hunia Iusufor ḳandon aillo. ¹⁸Bade tan baiainte tan samne aia maṭit foṛia ḳoila, “Huno, amra to tumar gulam.” ¹⁹Oile Iusufe tarare ḳoila, “Tumra ḍoraio na. Ami kunu Allar ḳolifa ni? ²⁰Tumra to amar ḳeti ḳortae saislae, oile Allae itare balai banailla, zela aiz deḳrae, te tan kial asil ou laḳan ḳori bout manshor zan basaita. ²¹Tumra oḳon ḍoraio na. Ami tumrare ar tumrar fua-fuṛintore deḳa-huna ḳormu.” Tain ou laḳan ḳori tarare buz dila ar kush dile mat-ḳota matila.

Hozrot Iusuf (a:)-or inteḳal

²²Bade Iusuf ar tan bafor aolad oḳole Mishoro boshot korat roila. Iusuf eḳ-sho dosh boros zinda asla. ²³Tain Afraimor nati-nosha forzonto deḳla ar Manoshar fua Makiror huruttain-o Iusufor ato foeda oila. ²⁴Bade Iusufe tan baiaintore ḳoila, “Amar to moutor oḳt aichche, nichoe Allae tumrar bae nozor raḳba. Tain Ibrahim, Isʼhak ar Iakubor gese ze desh dita ḳori ḳosom ḳorsoin, tumrare on taki hou desho loia zaiba.” ²⁵Ar Iusufe Boni Israilre ou ḳoul ḳoraila, “Nichoe Allae kunudin tumrar bae nozor ḳorba. Te on taki zaoar bala tumra amar aḍḍi oḳol tulia loia zaio.” ²⁶Heshe eḳ-sho dosh boros boeosho Iusuf mara gela. Teu manshe tan lashre kushbu-moshladi makia Mishor desho ek kafonor baksor bitre toila.