al-Galatia

Fobitro Injil Shorif 9 nombor sifara

al-Galatia

Forisiti

Alla Pakor hukume Hozrot Isa al-Mosir sahabi Hozrot Pauluse (ra:) siṭir aḳare ou sifara leḳsoin. Hozrot Isae behesto toshrif neoar onuman 16 bosor bade ikan leḳa oise. Hozrot Paulus bortoman Turoshko deshor Galatia elaḳat gia toblig korla, ḳali Hozrot Isar ufre iman anleu nazat mile. Oile tain hon taki zaoar bade ḳoezon Ihudi moulana aia ḳoila, ḳali iman anleu nazat mile na, erloge Ihudi dormo mafik Musa nobir shorioto mante oibo. Tarar ou bonḍami talim taki basanir lagi tain ou foegam leḳla.

Tain buzaira, Allar oada ḳora al-Mosir ufre iman anleu nazat faoa zae, nazator lagi Musar shoriot amol ḳorar zorur nae. Oile nazator fol oilo shoriotor hukum-ahkam mafik sola.

Ou zomanar Ihudi ar oinno zatir maze kunu boni-bona asil na. Ihudi oḳole mone ḳorta ḳali tarau Allar maear zati, tara saṛa bad-baki hoḳol manushu be-din ar naforman. Oile Hozrot Pauluse ḳoira, na, Ihudi ba oinno zati era hoḳolu naforman, kunu manshoru takkot nai shullo-ana shoriot amol ḳora, erlagi hoḳolu lannoti bonigese. Te Isa al-Mosi saṛa basar kunu fot nai.

Ermaze ase,

(1) Allai kush-ḳobri ḳali eḳṭau 1:1-10 aeat

(2) Hozrot Paulus kila sahabi oila 1:11—2:21

(3) Shoriot na rohomot? 3—4 ruku

(4) Mumin oḳolor shadinota 5 ruku

(5) Eḳe-oinnor asan ḳoro 6 ruku

Allai kush-ḳobri ḳali eḳṭau

¹Ami Paulus, Isa al-Mosir eḳzon sahabi. Ami kunu manshor hukum-foramishe ba kunu manshor usillae sahabi oisi na. Ḳali Isa al-Mosi ar amrar gaibi baf Alla, zein al-Mosire murda taki zinda ḳori tulchoin, erar ges takiu ḳelafoti faisi. ²Ami ar amar logor hoḳol mumin baiainte milia, Galatia deshor Isaei zomat oḳolor gese ou sohifaḳan leḳram.

³Amrar gaibi baf Alla Pake ar Isa al-Mosie tumrare rohomot ar shanti dan ḳoroukka. ⁴Amrar gaibi baf Alla Pakor munshae, hou Isae amrar gunar mafir lagi nizor fobitro zan kurbani disoin, zate ou ḳaraf zomanar at taki amrare basaita faroin. ⁵Alla Pakor tarif hor-hamesha zari rouk. Amin.

⁶Ami boṛo taijjub oigesi, al-Mosir rohome zein ḍakia ania tumrare nizor bonda banaisoin, tane saṛia tumra kila oto zoldi aroḳ nomunar kush-ḳobrir bae firigelae. ⁷Ashole to ita kunu kush-ḳobriu nae. Oile ḳoezon manush ase, zetae tumrar iman loia ḳeiṛ ḳelaira, tara al-Mosir kush-ḳobrire ulṭa-falṭa ḳorilta saira. ⁸Huno, amra ze kush-ḳobri tumrar gese toblig korsi, ou kush-ḳobri saṛa dusra kunu kush-ḳobri zudi tumrar gese toblig kora oe, ita zudi amra nizeu ḳori, ba asmani kunu firistae aia ḳoroin, te ogur ufre lannot foṛouk. ⁹Ami age zemone ḳoisi, oḳon hirbar oula ḳoiram, agor ze kush-ḳobri tumra mancho, ita saṛa dusra kunu kush-ḳobri ḳeu tumrar gese toblig korle, ogur ufre lannot foṛouk.

¹⁰Ita ḳoria ami ḳar ges taki tarif faitam saiar, kunu manshor ges taki na Allar ges taki? Ami kunu manshore kush ḳorar sesṭa ḳoriar ni? Ami zudi oḳono manshore kush ḳorar sesṭa ḳortam, te ami al-Mosir ḳadim oilam na one.

Hozrot Paulus kila sahabi oila

¹¹O baisab oḳol, afnara zania raḳoukka, ami ze kush-ḳobri toblig korsi, ita to kunu manshor banail motobad nae. ¹²Ami ita kunu manshor ges taki faisi na, ḳeu amare ita hikaiseo na. Ḳali Isa al-Mosie nize amar gese ita zair ḳorsoin.

¹³Ami age zebla Ihudi dormo mantam, hou shomoe amar sal-cholon kila asil ita to tumra huncho. Ami Allar zomat oḳolre ḳoto beshi zulum ḳortam, ar itare binash ḳorar sesṭat aslam, eota tumra zano. ¹⁴Amar baf-dadar ges taki faoa shora-rosumot manato ami kub kiali aslam. Erdae amar boeoshi Ihudi oḳolor maze alla-billa ḳorat ami bout aguail aslam. ¹⁵Oile Allae to amar maʼr feṭo taḳteu amare fosond ḳorsoin, tainu nizor rohomote amare daot disoin. Tan munsha asil, ¹⁶ami tan ḳas maear zonor didar faia, oinnainno zatir gese kush-ḳobri toblig kori. Te ou didar faiao ami kunu Adom zator loge foramish ḳorsi na. ¹⁷Ar amar agor kunu sahabir loge mulaḳat ḳorar lagi ami Zeruzalem ṭaun ḳano-o gesi na. Borong ami Arob desho geslamgi, gia guri-firi hirbar Damesk ṭauno aisi.

¹⁸Er tin boros bade sahabi Fitoror loge mulaḳat ḳorar niote Zeruzalem geslam, gia tan ono fonro din aslam. ¹⁹Ou shomoe Hozrot Isar bai sahabi Iakub saṛa, dusra kunu sahabir loge amar deḳa oise na. ²⁰Eḳ Alla shakki asoin, ami ou zeta leḳlam, er eḳṭa horofo misa nae. Mono raḳba, ou kush-ḳobri to kunu manshor ges taki faisi na, ḳali Isa al-Mosie nize amar gese zair ḳorsoin.

²¹Bade ami Shiria ar Kilikia deshor bout zagat geslam. ²²Ou shomoe Ehudia zilar Isaei zomat oḳoleo amare sinta na. ²³Tara ḳali ou ḳobor hunchila, “Age ze beṭae amrar ufre zulum ḳorto, ar Isar namre dunia taki tuṛilito saisil, oḳon hou beṭae al-Mosir imanor kush-ḳobri toblig korer.” ²⁴Ami iman ania bodoli zaoae, tara Allar shukur-tarif ḳorta.

Zomate Hozrot Paulusre ḳobul ḳorla

¹Souddo boros bade Barnabasor loge oia ami hirbar Zeruzalem gelam, ou shomoe Titasreo loge nilam. ²Allai hukume ami hono gelam. Gia honor baiainre ḳoilam, oinnainno zatir gese ami kun kush-ḳobri toblig kori. Oile zomator murobbi oḳolre ita niralae ḳoilam, amar sinta asil, amar oto douṛor ḳam zate beḳama na zae. ³Amar logor bai Titas o-Ihudi oileo, tan mosolmani ḳam ḳoranir lagi era kunu saf dise na. ⁴Ashole imandar dolor bitre ḳoezon munafik hamanie ola oilo. Isa al-Mosir ummot bonae amra ze shadinota faisi, otar kut dorar lagiu era hamaisil, zate amrare Musar shoriotor gulamit raḳto fare. ⁵Oile amra eḳ foloḳor lagio tarar gulami manlam na, zate kush-ḳobrir hokikoti tumrar gese ḳaim roe.

⁶Ar zomator nam-ḍaki zon oḳolor loge ami matilam, era zeinu oin na ḳene, itae amar kuntau zae ae na, Allae to muk saia mosolmani ḳoroin na. Era to amare noea kunta disoin na, ⁷borong tara buzilila, Ihudi shomazor gese kush-ḳobri tobligo Fitorre zela daeitto deoa oisil, ou laḳan oinnainno zatir gese tobligor daeitto amare deoa oise. ⁸Tara oḳan deḳla, Ihudi oḳolor gese sahabi-ḳamo Fitorre zein salaisoin, hou Allaeu oinnainno zatir maze sahabi-ḳamo amare salaisoin. ⁹Oḳan dekia zomator goinio-mainio murobbi, mani Iakub, Fitor ar Hannane buzilila, Allar torof tone ami ḳas rohomot faisi. Teu tarao amrar loge eḳmot asoin oḳan deḳaita ḳori, amar ar Barnabasor loge tarar at milaila. Ar ou mate razi oila, amra toblig kormu oinnainno zatir gese, oile tara toblig korba Ihudi shomazor gese. ¹⁰Tara ḳali ekkan abdar ḳorla, amra zanu zomator gorib oḳolor bae kial raki. Ashole amaro ola ḳorar kub ichcha asil.

Hozrot Paulus ar Fitore omil

¹¹Bade Fitor Antiokia ṭauno aila. Ermaze tain eḳ boṛo oinnae ḳorae ami tan mukor samneu afotti zanailam. ¹²Ou shomoe Ihudi taki mumin oa eḳdol manshe fotua dita, oinnainno zati taki zera Isar ummot oe, tarar mosolmani ḳam ḳorani zorur. Ou fotua dolor kisu manush sahabi Iakubor ges taki aibar age Fitore oinno zatir loge mila-misha ḳori ḳana-dana ḳaita. Iṭa to kub bala. Oile era aoae erar ḍore tain ou bala ḳam bond ḳorilla. Oḳṭau boṛo oinnae. ¹³Antiokiar aro bout Ihudi mumineo Fitoror loge ou bonḍamit shamil oila. Hesh-mesh Barnabaso tarar loge bul fote fao dilaila.

¹⁴Oile ami zebla deḳlam, kush-ḳobrir hokikotor loge tarar ḳam-ḳaz miler na, ou hoḳolor samne Fitorre ḳoilam, “Afne Ihudi oia-o zudi Ihudi niom bad dia oinno zatir laḳan soloin, te oinno zatire ḳene oḳon Ihudi niom manar tagid dira? ¹⁵Afne-ami duiozonu to Ihudi, naforman o-Ihudi kulo zonmisi na. ¹⁶Erbadeo to amra zani, Musar shoriot amol ḳorleo Allae manshore dindar ḳoia ḳobul ḳoroin na, ḳali Isa al-Mosir ufre iman anleu dindar ḳoia ḳobul ḳoroin. Erdaeu amra tan ufre iman anchi, zate shoriotor amole nae, oile al-Mosir ufre iman anae amrare dindar ḳoia ḳobul ḳoroin. Ḳaron shoriot amol ḳorleo kunu manshore dindar ḳoia gona oito nae.

¹⁷Oile oḳon amra al-Mosir torikae dindar bontam sairam ḳori, Ihudi shorar niom-ḳanun bad dilaisi. Ete zudi kunu kunu zone amrare naforman ḳoin, te kita buza zae, al-Mosie kunu gunar ḳezmot ḳoroin ni? Nauzubilla, nichoe na. ¹⁸Ami nize zeta bad dilaisi, ota zudi hirbar ḳori, te to nizeu nizore dushi forman ḳoriar. ¹⁹Shoriotor niome shoriotor atou amar mout oigese, zate Allar tarifor lagi ami zinda roi. ²⁰Te dorilao, amare al-Mosir loge gaso loṭḳaia ḳatol ḳora oise. Ami ar zinda nae, amar ḳaear maze al-Mosiu zinda asoin. Ou ḳaeae oḳon ze zindegi ḳaṭairam, iṭa Allar ḳas maear zonor ufre imanor bole ḳaṭairam. Tain amare mohobbot ḳoria, amare toranir lagi nizor zan kurbani disoin. ²¹Alla Pakor i rohomot ami bifol oite ditam nae. Shoriot amol ḳoria zudi manush dindar bonizito, te al-Mosi ḳamoḳa kurbani oila ni?

Shoriot na rohomot?

¹O be-aḳol Galati oḳol, tumrare ḳegie zadu ḳorse? Tumrar gese to kula-mela ar saf-sofa toblig kora oise, Isa al-Mosire gaso loṭḳaia ḳatol ḳora oisil. ²Te oḳon ami ḳali ou ḳotaḳan zantam sairam, tumra ze Pak Ruh faiso, iṭa kita Musar shoriot amol ḳoria faiso ni? Na kush-ḳobri hunia iman anae faiso? ³Tumra kunu ola be-aḳol ni? Pak ruhur bole noea zindegi shuru ḳoria, oḳon nizor bole kamiab oitae sairae? ⁴Te ḳamoḳa oto duk-koshṭo ḳorlae ni? Ami asha ḳori tumrar i ḳoshṭo muṭeu behuda gese na. ⁵Aichcha, Allae to tumrare Pak Ruh dan ḳorsoin, ar tumrar maze bout keramoti ḳamo ḳorsoin. Te ḳo sain, tan shoriot manae tain ita ḳorla ni? Na kush-ḳobri hunia tumra iman anae ita ḳorsoin?

⁶Ibrahim nobir befarḳan deḳo, Allar kalamo ase, “Ibrahime Allar oadae iman anae, Allae tanre dindar ḳoia ḳobul ḳorla.” ⁷Erdae tumrao shomzilao, zera iman ane, tarau Ibrahimor ashol aolad. ⁸Asmani kitabo ageu batail oise, Allar ufre iman anleu to tain oinnainno zatire dindar ḳoia ḳobul ḳoroin. Ibrahimor gese ou aeator kush-ḳobri ageu zanail oisil, “Tumar usillae duniar tamam zatie borkot faiba.” ⁹Te buza zae, Allar oadae iman anae Ibrahime zela borkot faisoin, tan bade zera iman anba tarao ola borkot faiba.

¹⁰Asmani kitabe ḳoe, “Ze manshe shoriotor kitabo leḳa tamam hukum-ahkam amol na ḳore, he lannoti.” On taki buza zae, zera shoriot manar ufre borosha ḳore, tara hoḳolor ufreu i lannot ase. ¹¹Allar kalame batae, “Dindar ḳoia zare ḳobul ḳora oe, he tar imanor zoriae zindegi faibo.” Erdae buza zae, shoriotor hukum-ahkam manleo Allae ḳeurore dindar ḳoia ḳobul ḳoroin na. ¹²Oile shoriote ḳoe, “Shoriotor hukum-ahkam mafik ze manush sole, he shoriotor mazdiu zindegi ḳaṭaibo.” Te to buza zae, shoriote imanor ufre borosha ḳore na. ¹³Shoriotor borkelaf ḳorae amrar ufre ze lannot asil, ou lannot al-Mosie tan nizor ḳando nia amrare azad ḳorsoin. Allar kalamo to ase, “Gaso loṭḳaia zare ḳatol ḳora oe, he lannoti.” ¹⁴Allae Ibrahim nobire ze borkot dan ḳorsoin, Isa al-Mosir zoriae ou borkot zate oinno zati oḳoleo fain, ar amra-o zate imanor mazdi oada ḳora hou Pak Ruhu fai, otar daeu al-Mosie i lannot nizor ḳando nisoin.

Shoriot ar oada

¹⁵O bai oḳol, ami duniabi ḳotadi buzai diram. Dui fokko manshor maze zebla kunu chukti faḳa-fukto oizae, ou chukti eḳ fokkoe ar batil ḳorto fare na, ba ermaze noea kunta lagaito-o fare na. ¹⁶Te Ibrahim nobi ar tan aolador loge Allae ze oada ḳorsla, Allar kalamo to ḳoa oise na, “Aolad oḳolor loge” mani bout aolador loge. Borong ḳoa oise ḳali “Tumar aolador loge” mani eḳ aolador loge, ar ou aoladu oila al-Mosi. ¹⁷Ami ḳoitam sairam, Allae Ibrahimor amolo oadar mazdi ze niom boail ḳorsla, er sair-sho tish boros bade shoriot deoa oisil. Ou shoriot aoae agor hou oadar niom to batil ḳorto fare na. Te to tan oada zari roilo. ¹⁸Ar Allar borkot faoa zudi shoriot amolor ufre nirbor ḳorto, te oadar ufre nirbor roilo na one. Oile Allae oadar mazdiu Ibrahimre borkot dan ḳorsla.

¹⁹Te ḳoiba, shoriot ḳene deoa oisil? Manshe gunar ḳam na saṛae, Allar torof taki oadar loge shorioto shamil ḳorsla. Ar Ibrahimor ze aolador befare Allae oada ḳorsla, ou zone toshrif na ana forzonto i shoriot boail asil. Allar firistar zoriae Musa nobir gese i shoriot nazil oisil. Ou Musau asla Alla ar manshor maze shafaeatḳari, mani mazor manush. ²⁰Oile ḳali eḳfokko taḳle to mazor manshor zorur asil na; ar Alla to eḳzonu. Tain Ibrahimor loge oadar ḳalo kunu mazor zon lagse na.

²¹Te shoriot kunu Allar oada oḳolor ulṭa ni? Nichoe na. Allae zudi ou laḳan shoriot dan ḳorta, zetae aḳeri zindegi mile, te shoriot maniau manush Allar dorbaro ḳobul oigelo one. ²²Oile asmani kitabe batae, tamam manushu gunar ḳobzae bondi, tara zanu Isa al-Mosir ufre iman ania, imanor zoriae oada ḳora hou borkot fain.

²³Iman aoar age shoriote amrare fara disil. Iman zair na oa forzonto ou shorioteu amrare bandia raḳsil. ²⁴Erdae buza zae, al-Mosir gese fousanir age ou shorioteu otodin amrare salaise, zate imanor zoriae amrare dindar ḳoia ḳobul ḳora oe. ²⁵Oile oḳon iman ḳaim oae, amra ar saloḳdar shoriotor tolua nae.

Allar nuror aolad

²⁶Isa al-Mosir ufre iman anae tumra hokkol oḳon Allar aolad bonigeso. ²⁷Tumra zara al-Mosir torika ḳobul ḳorso, tumra to finnor noea ḳafoṛor laḳan al-Mosir bitre hamaigeso. ²⁸Ihudi ar o-Ihudi, gulam ar azad, beṭin ar beṭaintor maze oḳon kunu tofat nai. Isa al-Mosir loge mishi zaoae tumra hoḳolu to eḳ oigeso. ²⁹Tumra zebla al-Mosir zon oigeso, te to Ibrahimor aolado oiso, ar Allae Ibrahimre zeta diba ḳori oada ḳorsla, tumrao otar bagi bonigeso.

¹Ashole ami buzaitam sairam, bafor hoḳol don-samanat aolador eḳtiar taḳleo, he zotodin nabalik roe otodin aolad ar gulamor maze kunu tofat mile na. ²Tar bafe ze shomoyor ḳota osiot ḳori zain, otodin he tar murobbi ba zimmadaror aotae roite oe. ³Ou laḳan amra-o zebla nabalik aslam, hou shomoe duniar nanan sal-cholonor gulam aslam. ⁴Oile shomoe fura oia harle, Allae tan ḳas maear zonre bezila. Tain eḳzon nek aorotor feṭo zonom loia, shoriotor hukum-ahkam mafik zindegi ḳaṭaila. ⁵Zate shoriotor aotae taḳa manshore azad korta faroin, ar amrareo Allar aolad bonar eḳtiar dein. ⁶Erdae tumra Allar aolad bonizaoae tumrar dilo boshot ḳorar lagi, Allae tan ḳas maear zonor ruhre bezisoin. Tumrar dilor ou ruhe to Alla Pakre abba ḳoia ḍaḳoin. ⁷Gotikeu tumra gulam roiso na, aolad bonigeso; ar aoladre Allae zeta deoar oada ḳorsila, oḳon tumra eotar malikanao faiso.

Imane mozbut ar ḳaṭi o

⁸Age tumra zebla Alla Pakre sintae na, hou shomoe tumra zetar gulami ḳortae, iguin to ashole kunu devtau nae. ⁹Oile oḳon to Allare sincho; ashole Allaeu tan nizor forisoe disoin. Te tumra kila hirbar duniabi hou ḳomzur ar batil sal-cholonor bae firizirae? Aroḳbar otar gulam bontae sairae ni? ¹⁰Tumra hirbar omuk ar tomuk din, mash, ritu ar bosorre manrae. ¹¹Erdae amar ḍor ḳorer, tumrar tole amar oto menot ni maṭi oizae.

¹²O bai oḳol, ami tumrare minot ḳoriar, ami zela tumrar laḳan oigesi, tumrao ola amar laḳan o. Tumra to otodin amar kunu ḳeti ḳorso na. ¹³Tumrar zana ase, amar shorilo bemar oae, ami tumrar gese foela bar kush-ḳobri tobligor shuzug faislam. ¹⁴Amar bemaror dae tumrar ḳoshṭo oileo, tumra to gin ba ela ḳoria amare falaiso na. Borong Allar kunu firista ba Isa al-Mosire zelaḳan ḳobul ḳortae, ou laḳan amareo ḳobul ḳorso. ¹⁵Oile oḳon tumrar dilor hi eshki gelo kuai? Ami to tumrar befare oḳanu ḳoitam fari, hou shomoe farle tumra nizor ḳoilja kulia amare dilailae one. ¹⁶Te tumrar gese hok kota matae, ami oḳon dushmon oigelam ni?

¹⁷Huno, ou zeguinte tumrar kuz-ḳobor loira, oguin to bod niote aira. Tara sain, tumrare amar bae tone firaia, tarar ashik banaita. ¹⁸Bala niote ola ḳorle faeda oilo one. Oile ami zebla tumrar samne ai, ḳali ou shomoe nae, nek niote hor-hamesha kuz-ḳobor loa bala. ¹⁹O amar fiara aolad oḳol, tumra zotodin al-Mosir laḳan na boncho, otodin ami hirbar tumrar lagi hurutta foedar bishor laḳan soṭfoṭ ḳorram. ²⁰Amar mone sar, ou foegam leḳa bad dia oḳonu ami nize tumrar gese aia, ṭanḍa matae batchit ḳortam. Te tumrare loia kita ḳortam kunta buzram na.

Bibi Saera ar bandi Hazera taki talim

²¹Tumra zera Musar shoriotor gulami ḳortae sao, tumra ḳo sain, shoriote zeta ḳoe ita tumrar ḳano hamae na ni? ²²Allar kalame batae, Ibrahim nobir dui fua asla, foela fua bandi beṭi Hazerar torofa ar dusra fua ashol shadin Bibi Saerar torofa. ²³Bandi beṭir torofa fuar zonom oisil duniar niome, oile ashol shadin bibir fuar zonom oisil Alla Pakor oadae kudroti bole.

²⁴I mator mani oilo, ou dui beṭi oila duiṭa niom. Eḳ niom Tur Faṛ tone aise, itae tar ḳezmot ḳorra manshore gulamir fote ṭane; ein oila bandi Hazera. ²⁵Ou Hazera mani Arob deshor Tur Faṛ. Ar Hazera oila ou zogotor Zeruzalem ṭaunor eḳ nomuna, Zeruzalem ṭaune to tar fua-fuṛinre loia bandi bonche. ²⁶Oile asmani ze Zeruzalem, ein to shadin; einu amrar ma. ²⁷Asmani kitabe ḳoe, “O niaoladi beṭi, zar kunu hurutta oise na, tumi kushir gozol gao. Hurutta foedar bishe zare dorse na, tumi gola faṭaia zure zure gozol gao. Zamair goror bour saiteo, zar ḳeu nai tair bout beshi aolad oiba.”

²⁸Bai oḳol, erdae-u tumrar zonom oise Allar oadar Isʼhakor laḳan. ²⁹Oile hou shomoe duniar niome zar zonom oisil, he zulum ḳorto ou zonre, zein zonom loisoin Allar Pak Ruhur bole; ar oḳono oula zulum or. ³⁰Erdae deḳo, Allar kalame ḳoe, “Bandire ar tair fuare baṛi tone ḳedai deo; bandir torofa fuae kunumonte-u ashol bibir fuar loge, don-samanar baṭ faito nae.” ³¹Te O bai oḳol, ou aeate buza zae, amra bandir aolad nae, amra to ashol shadin bibir goror aolad.

Mumin oḳolor shadinota

¹O mumin oḳol, al-Mosie amrare shadin ḳorsoin, shadin halote roar lagi. Erdae tumrar shadinotare doria raḳo, gulamir lagam ar findio na.

²Huno, ami Pauluse tumrare ḳoiram, tumra zudi oḳono mosolmani ḳam ḳorao, te al-Mosir kunu damu to tumrar gese nai. ³Ami hoḳolor gese hirbar oḳan ḳoiram, ze zonre mosolmani ḳorail oe, tar ufre forz oizae shoriotor tamam hukum-ahkam mana. ⁴Tumra zara shoriot amol ḳoria dindar bontae sairae, tumra to al-Mosir ges tone alog oigeso, Allar rohomot tone horigeso. ⁵Oile amrare dindar ḳoia ḳobul ḳora oibo, imane ou nichoeota faia Pak Ruhur bole amra bar sairam. ⁶Isa al-Mosir ummot bonia harle mosolmani ḳam ḳoraileo zeta, na ḳoraileo ota. Borong mohobbotor mazdi ze iman zair oe, ou imanu oilo ashol.

⁷Tumra to bala fote solat aslae; te ou hok fote solte tumrare ḳegie bada dilo? ⁸Huno, tumra oḳon ze motobad manrae, ze Allae tumrare fosond ḳori anchoin, i motobad to tan batail fot nae. ⁹Zano ni, eḳ fuṭa senae eḳ balti dudre borbad ḳorilae. ¹⁰Te tumrar befare ami malikor dorbaro ou borosha ḳori, tumra dusra kunu motobado zaitae nae. Oile zegie tumrare satar, he ze-u oe na ḳene, tar faona shaza he faibo.

¹¹O bai oḳol, ami zudi oḳono oḳan ḳoi, manshe mosolmani ḳam ḳorani zorur, te amar ufre ḳene oḳono zulum or? Te duk-koshṭor solibor ufre al-Mosir moutor ḳota hunle zetae muk lukain, tarar muk lukani to bond oigelo one. ¹²Erdae ami sairam, tumrar dilo zetae gonḍogul lagaisoin, oguinte tarar asta nofs ḳaṭia falai deuk.

Gunar gulami saṛo, Pak Ruhe ḳaṭi o

¹³O bai oḳol, Allae tumrare fosond ḳoria anchoin azad oar lagi. Oile azad bonia tumrar dilor gunar ḳaish furanit lagio na, borong dilor mohobbote eḳe-oinnor ḳezmot ḳoro. ¹⁴Ḳaron asta shoriotreu ekkano ḳoria ḳoa oise, “Tumar ari-forire nizor laḳan maea ḳorio.” ¹⁵Oile tumra zudi eḳe-oinne ḳaijja-fosad ar resha-reshi ḳoro, te hushiar oizao! Ita ḳorle to tumra eḳe-oinnore binash ḳorilibae.

¹⁶Huno, ami tumrare ḳoiram, Pak Ruhur bole zindegi ḳaṭao, teu dilor ou ḳaish miṭanir kial oito nae. ¹⁷Ou ḳaishe zeta ḳoe, ita to Pak Ruhur bifokke, ar Pak Ruhe zeta ḳoin ita bod ḳaishor bifokke. Bod ḳaish ar Pak Ruh era eḳe-oinnor birudi, erdae nek kamor niot ḳoriao tumra ita fura ḳoro na. ¹⁸Ar tumra zudi Pak Ruhur bole zindegi ḳaṭao, te tumra shoriotor gulam nae.

¹⁹Dilor bod ḳaishor ḳam-ḳaz to kula-melau sina zae, ita oilogi zina, nafaki, bodmaishi, ²⁰devta fuza, zadu-ṭuna, dushmoni, ḳaijja-fosad, lub-lalos, gusa, niz-motlobi, omil, doladoli, ²¹ingsha, matlami, hoi-hulla ḳori bojjati ḳora, ar ou nomunar aro bout ḳam. Te ami age zela hushiar ḳorslam, oḳon hirbar oula ḳoiram, dilor ou bod ḳaishor gulami zera ḳore, Allar bashshait tarar kunu ṭai nai.

²²Oile Pak Ruhe sola zindegir fol oilo mohobbot, kushi-bashi, shanti, sobor ḳora, doyalu bab, bala-manshi ḳora, hok-halali roa, ²³norom oa ar nizore shamlaia raḳa. Ou nek kamor birudi kunuzat ain nai. ²⁴Ar Isa al-Mosir afon ummote to, zarzir rifure, dilor hoḳol bod ḳaish shudda Isa al-Mosir solibo ḳoebor dilaise. ²⁵Oḳon amra zudi ekin ḳori Pak Ruhur zoriae noea zindegi faisi, te ao, amra Pak Ruhur zimmae zindegi ḳaṭai. ²⁶Amra behuda boṛai-beṭagiri bad dei, eḳe-oinnore satani ar ingsha-ingshi ekkere saṛi dei.

Eḳe-oinnor asan ḳoro

¹O bai oḳol, zomator ḳeu zudi aḳta kunu gunar fando foṛizae, te tumra zera Pak Ruhe zindegi ḳaṭairae, tumra tare tulia anio. Ar kub norom dile i ḳam ḳorio, nizor befareo hushiar roio, zate nizeo fando na foṛo. ²Tumra eḳe-oinnor bar bo, teu al-Mosir niom furafur mana oibo. ³Kunta na boniao ze manshe nizor boṛai-bahaduri deḳae, he to nizeu nizore ṭogae. ⁴Te forteḳ manshe zarzir amol-ḳaislot forikka ḳorouk. Teu oinnor loge nizor tulona na ḳoria, tar nizor ḳamor lagi boṛai ḳorto farbo. ⁵Forteḳ zoneu nizor gaiṭ nize bo.

⁶Huno, ze zonre Allar kalam hikail oe, he tar ustador balair lagi ḳezmot ḳorouk.

⁷Bai oḳol, tumra be-foti bonio na, Allar loge to ṭaṭṭa-moshkora sole na. Zein zela ḳet ḳorbae, ein ola foshol faibae. ⁸Dilor ou bod ḳaishre kush ḳorar lagi ḳet ḳorle, i ḳet taki gozob milbo. Oile Pak Ruhre kush raḳar lagi ḳet ḳorle, i Pak Ruh taki aḳeri zindegi milbo. ⁹Nek kam ḳorat lagia amra zanu nirash na oi. Hamesha lagia roile ṭik shomoye er foshol faimu. ¹⁰Shuzug faileu amra zanu hoḳol manshor, ḳas ḳori Allar foribaror manshor asan ḳori.

Aḳeri nosiot

¹¹Deḳrae ni, ḳoto muṭa muṭa horofe ami nizor ate tumrar gese leḳsi! ¹²Zeguinte tarar nizor bala-manshi zair ḳorto sae, otae tumrare mosolmani ḳam ḳoranir lagi tagid der. Al-Mosir solibor lagi zate tarar ufre kunu zulum na oe, zulum taki basar lagi tara ita ḳorer. ¹³Huno, mosolmani ḳam zetae ḳoraisoin, otaeo to shoriotor borkelaf ḳoroin. Oile erbadeo tara tumrare mosolmani ḳoraito sae, zate tara boṛai ḳoria ḳoito fare tumrao tarar dolo aso. ¹⁴Oile ami ḳoiram, ḳali Isa al-Mosir solib saṛa dusra kunu befareu ami boṛai ḳori na. Ou solibor mazdiu i dunia amar gese morigese, ar amio duniar sokut morigesi. ¹⁵Erdae mosolmani ḳam ḳoraileo zeta, na ḳoraileo ota. Al-Mosir zoriae hirbar noea foeda oau oilo ashol befar. ¹⁶Ar ou imane zera zindegi ḳaṭae, mani ḳaṭi Allar bondare, tain rohom ar shanti dan ḳoroukka.

¹⁷Hesh-mesh ḳoiram, Hozrot Isar lagi mair ḳaia ḳoto nomunar zoḳom amar nizor shorilo loia sokkor diar. Te amare ḳeu duk dio na.

¹⁸Bai oḳol, amrar munib Isa al-Mosir rohomot tumrar dilo ḳaim rouk. Amin.