Fobitro Tourat Shorif dusra sifara
Hizrot
Forisiti
Ermaze ase:
(1) Allae Boni Israilre azad ḳorla 1:1—15:21 aeat
(2) Morubumit Boni Israilor sofor 15:22—18:27 aeat
(3) Mabudor loge tan bondar milonor usilla 19—24 ruku
(4) Allar fobitro gor bananir hukum 25—31 ruku
(5) Allar birudde Boni Israilor naformani 32—34 ruku
(6) Allar fobitro gor banani 35—40 ruku
1Allae Boni Israilre azad ḳorla (1:1–15:21)
Boni Israilor ufre zulum
1Allae Hozrot Iakubor noea nam disla Israil, erlagi tan bongshor nam oilo Boni Israil. Iakube tan bibin-baichchain ar foribaror hoḳolre loia Mishor desho gelagi. Ou shomoe tan loge oia zera gela, erar nam oilo, 2Ruben, Shimion, Lebi, Ehuda, 3Isaḳor, Shobulon, Bin-Iamin, 4Dan, Noftali, Sadu ar Ashir. 5Iakubor bongshor hokkoltae milia shottoir zon asla. Ar Iusuf ag takiu Mishoro taḳta. 6Bade Iusuf, tan baiain, ar hi amolor hoḳol mara gela. 7Oile tarar bador bongshodor baṛia kub bolala oila. Era sairobae sitria asta Mishor desh borigela.
8Ermaze Mishoro eḳzon noea bashsha oila, ein Iusufre sinoin na. 9Ein nizor proza oḳolre ḳoila, “Saia deḳo, Boni Israil amra taki beshio ar bol-alao. 10Te ao, amra eḳ fondi ḳori, ita zenu ar na baṛoin. Arnae tara baṛia heshe zuddor ḳalo amrar dushmonor loge milia amrar birudde zuddo ḳorbo, bade amrar desh taki zaibogi.”
11Teu tara shordar lagaila erare maria-doria zur-zulum ḳoria ḳam ḳoranir lagi. Era Feraunor foshol raḳar lagi Pitum ar Ramashesh namor duiṭa ṭauno banaila. 12Oile erar ufre zoto beshi zur-zulum ḳora oilo, erao oto beshi baṛila ar sitrila. Erlagi Mishori oḳole Boni Israilre kub ḍoraigela. 13Ḍoraia eraredi aro ḳoṭin ḳam ḳoraila. 14Maṭi ḳam, iṭor ḳam ar ḳetor maze ḳosṭor ḳam ḳoraia erar zanre titta banaililo. Ar tara zur-zulum ḳoria nisṭur-pashanor laḳan ḳam ḳoraito.
15Bade Mishoror bashshae Shifra ar Fua namor duizon Ibrani dai beṭire hukum dila, 16“Tumra Ibrani beṭintor dai girit gia, itar fuain foeda oile-u marilaio, ḳali fuṛintore zita rakio.” 17Oile hi dai beṭinte Allare ḍoraita gotike, Mishori bashshar hukum na mania fuaintoreo zita raḳta. 18Teu bashshae erare nia zikaila, “Ita ḳam ḳene ḳorlae? Fuaintore ḳene zita raḳlae?”
19Tara zuaf dila, “Ibrani beṭin Mishori beṭintor laḳan nae, tara bout bol-ala. Dai beṭi tarar ḳasat zaibar age-u tarar hurutta foeda oizae.” 20-21Ou duio beṭie Allare ḍoraita ḳori, Allae rohomot ḳoria tarareo aolad dila. Ar Boni Israilo aro beshi ḳori baṛia kub shoktiman oila. 22Ita dekia Feraune nizor proza oḳolre hukum dila, “Ibrani oḳolor kunu fuain oile-u tumra Nil nodo falai dio, ḳali fuṛintore zita rakio.”
2Hozrot Mus (a:)-or zonom
1Ermaze Lebi ḳandanor eḳzon manshe, tan nizor ḳandanor ek koinnare shadi ḳorla. 2Ou ḳoinnar goro eḳ fuar zonom oilo. Fuagu deḳte kub shundor oae, tin mash dori lukai raḳla. 3Heshe ar lukaita na faria, tain nol-ḳagṛar eḳ ṭukri loila. Ou ṭukrit maṭia tel ar alḳatra lefia ogur bitre huruttare haraia, gangor soror nol bonor maze toia aila. 4Ar er kita dosha oe deḳar lagi, tar boin duroi ubailo.
5Tuṛa bade Feraunor fuṛi gango naoat aila. Gangor faro tan bandi oḳol gura-gurit asil. Tain soror nol-ḳagṛar maze ou ṭukri dekia, tan bandire ḳoila, “Ou ṭukrigu an.” 6Ṭukrir ḍala kulia deḳla, er bitre eḳ fuae ḳander. Dekia tan maea lagigelo. Tain ḳoila, “Ish, igu to kunu Ibranir fua.”
7Ou shomoe fuar boin aia Feraunor fuṛire zikailo, “Rani ma, i huruttare dud ḳaoanir lagi kunu Ibrani beṭire faile afnar gese antam ni?” 8Feraunor fuṛie ḳoila, “Za an-gi.” Teu fuṛie gia fuar maʼre loia ailo. 9Feraunor fuṛie tanre ḳoila, “Ogo, ami tumar beton dimune, tumi amar oia ou fuagure buḳor dud ḳaoao.” Ou hi beṭie nia huruttare dud ḳaoaia falila. 10Fuagu kisu boṛo oar bade tain nia Feraunor fuṛir gese dilaila. Feraunor fuṛie enre nizor fua banai falila. Tain ḳoila, “Ami tare fani taki ṭania tulsi.” Erlagi tar nam raḳla Musa [mani, ṭania tula].
Hozrot Musa (a:) Mishor desh taki bagi gela
11Heshe Musa boṛo oigele eḳdin tan nizor zatir baiaintor gese gia deḳla, tara kub ḳosṭor ḳam ḳorra. Ermaze deḳla, tan nizor Ibrani zatir eḳ beṭare, eḳ Mishorie mair-doir ḳorer. 12Dekia sairobae saia ar kunu manush na deḳae, tain hou Mishorire kun ḳoria balur tole gaṛilla. 13Bador dino tain hirbar bare gela. Gia deḳla, duizon Ibranie nize nize maramari ḳorer. Ou tain dushi zonre ḳoila, “Oba, tumar baire ḳene marrae?” 14He ḳoilo, “Tumare ḳegie amrar hakim banaia bisar ḳorat faṭailo? Ḳail zela hou Mishorire kun ḳorso, oula amareo kun ḳoriltae sairae ni?” Ou Musae ḍoraigela. Tain buzla ita to zana-zani oigese.
15Ar Ferauneo ita hunia Musare marilta saila. Ou shomoe Musa Feraunor ges taki bagi gela. Bagia Madian desho boshot ḳorar lagi aila. Aia honor ek kuar ḳasat boila. 16Madian desho Shuaib namor eḳ imam sab asla. Tan shatzon fuṛin asoin. Ou fuṛinte kuar faro aia, tarar bafor sagol-meṛare fani ḳaoanir lagi gamla borat lagla. 17Ou shomoe oinno raḳal oḳole tarare ḳedaia dilailo. Oile Musa ubaia tarare shaijjo ḳorla, ar tarar falre fani ḳaoaila. 18Tara tarar bafor daro gia harle tain zikaila, “Tumra aiz oto zoldi ḳemne ailae?” 19Tara ḳoila, “Eḳ Mishori beṭae amrare raḳal oḳolor at taki basaisoin. Ein amrar sagol-meṛare fani tulia ḳaoaisoin.” 20Teu tain zikaila, “I manushgu kuai? Tumra tare toia aillae ḳene? Ere ḍakia ania ḳana ḳaoao.” 21Erbade Musae ou imamor baṛit roite razi oila. Imam sabe tan fuṛi Sofurare Musar loge shadi dila. 22Bade Sofurar goro eḳ fua oile Musae ḳoila, “Ami to boitol bonia bidesho roiram.” Erlagi ou fuar nam raḳla Zarsum [mani, boitol].
23Bout din bade Mishoror bashsha morigela. Boni Israile gulamir lagi ḳator oia ḳanda-ḳaṭi ḳorlo. Tarar ḳandon Allar gese ḳobul oigelo. 24Allae tarar foriad hunla. Tain Ibrahim, Isʼhak ar Iakubor loge tan oadar ḳota iad ḳorla. 25Ar Boni Israilor bae muḳ firaila, doyar nozore tarar bae saila.
3Tur faṛo Hozrot Musa (a:)-e Allar didar faila
1Musae tan hour Madiani imam sab Shuaibor sagol-meṛa raḳta. Eḳdin tan sagolor fal loia morubumir hesh galat Allar hou Tur faṛor ḳasat gela. 2Hono eḳ zonglar maze Mabudor firistae agunir laḳan nuror maz taki tanre deḳa dila. Musae deḳla, zonglar maze aguin zoler oile zongla zoler na. 3Ou tain taijjub oia ḳoila, “Zongla ze zoler na, er ḳaron kita? Te aro ḳasat gia deki sain.”
4Mabude zebla deḳla ein deḳar lagi ḳasat zairagi, ou shomoe tain zonglar maz taki ḍakia ḳoila, “Musa, O Musa!” Musae ḳoila, “Ounu ami.” 5Allae ḳoila, “Ar samne aguaio na. Tumar fao taki zuta kulilao. Zano ni, tumi oḳon ze zagat ubaiso ikan faḳ zaga. 6Huno, ami tumar bafor Alla, Ibrahimor Alla, Isʼhakor Alla ar Iakubor Alla.” Ikan hunia-u Musae tan muḳ lukailla. Allar bae saite tan dilo ḍor hamaigelo.
7Mabude ḳoila, “Ami Mishor desho amar bonda oḳlor duḳ-mosibot dekiar. Mishori shordar oḳlor lagi tarar ḳandon huniar. Tarar duk-koshṭo hoḳolta ami deḳsi. 8Dekia Mishori oḳlor zulum taki tarare basaitam ḳori ami nize lamia aisi. Te ami tarare Mishor taki horaia nimugi. Nia roshail zomir bout boṛo shundor eḳ desh dimu. Ikan dud ar mour banḍar-ala desh. Ou desh oilo oḳonkur Kenani, Hiṭṭi, Amuri, Farizi, Hibbi ar Zibuzi oḳolor desh. 9Boni Israilor foriad amar dorbaro aise, Mishori oḳole tarare zela sataira, ita ami dekiar. 10Erlagi ami tumare Feraunor gese faṭaiar. Tumi zao, gia amar bonda Boni Israilre Mishor taki bar ḳoria ano.”
11Musae zuaf dila, “Ami aroḳzon ḳe, zein Feraunor samne gia Mishor desh taki tarare horaitam farmu?”
12Allae ḳoila, “Ami to tumar loge loge roimu. Tumi Mishor taki manshore horaia ania, tarare loia ou faṛo amar ebadot ḳorbae. Teu buzbae amiu tumare faṭaisi.”
13Musae aroz ḳorla, “Deḳoukka, ami zebla Boni Israilre gia ḳoimu, tumrar baf-dadar Allae amare paṭaisoin, ou shomoe tara zudi zikain tan nam kita, te tarare kita zuaf ditam?”
14Allae ḳoila, “Ami zein asi, asiu. Boni Israilre oula ḳoio, zen nam ‘ami asi’ tain amare tumrar gese paṭaisoin. 15Tumi gia tarare ḳoio, Mabud zein hor-hamesha asoin, ein tumrar baf-dadar Alla, Ibrahimor Alla, Isʼhak ar Iakubor Alla, einu amare tumrar gese paṭaisoin. Amar hor-hameshakur nam ‘Mabud, zein asoin’. Zuge zuge, purushe purushe ou nam ḳaim roibo. 16Tumi zao, gia Boni Israilor murobbi oḳolre ekḳano dola ḳoria ḳo, Mabud, zein tarar baf-dadar Alla, Ibrahimor Alla, Isʼhak ar Iakubor Alla, tain tumare didar dia ḳoisoin, ami tumrar bae kial ḳorsi, tumrar uforor zulum-mosibot deḳsi, Mishoro tumrar bae zeta ḳora or eota kial ḳorsi. 17Ita dekia ami ḳoiar, ami Mishoror gulami taki tumrare basaia Kenani, Hiṭṭi, Amuri, Farizi, Hibbi ar Zibuzi oḳolor dud ar mour banḍar-ala desho nimugi.
18“Israilor murobbi oḳole tumar ḳota hunba, tumi tarare loge loia Mishoror bashshar gese zaio. Gia ḳoio, ‘Mabud, zein Ibrani oḳolor Alla, tain amare doroshon disoin. Erlagi amra tan name ekkan kurbani ḳortam saiar, amra morubumir bae tin dinor fot gia kurbani dimu, te amrare zaoar onumoti deukka.’ 19Oile ami zani Mishoror bashshae tumrare zaite dito nae, zur-zobordosti ḳorleo dito nae. 20Teu ami amar kudroti at lagaimu ar oula asanoḳ gozob nazil ḳormu, zate he tumrare zaite dey. 21Ar ami Mishori oḳolor dilor maze Boni Israilor bae emon eḳ doyar bab foeda ḳoraimu, era zanu Mishor taki ḳali ate na zain. 22Hoḳol Israili beṭinte tarar ari-fori ba zerar baṛit tara roin, oula Mishori beṭintor ges taki tarar shuna-rufar goena-gaṭi ar bala ḳafoṛ-sufoṛ ḳuzia nio. Ota dia tumrar fua-fuṛinreo hazaio, ou nomunae tumra Mishorintor don-samana doḳol ḳorbae.”
4Hozrot Musa (a:)-e keramoti-muzeza faila
1Musae zuaf dila, “Mabud, tara zudi amare ekin na ḳoroin, amar mat na hunoin ba tara zudi ḳoin, Mabude tumare doroshon disoin na, te ami kita ḳortam?” 2Ou Mabude tane zikaila, “Tumar ato igu kita?” Tain ḳoila, “Egu laṭi.” 3Mabude ḳoila, “Oḳṭa maṭit falao.” Musae laṭire maṭit falaiteu iṭa haf oigelo. Haf dekiau tain faldi hori gela. 4Mabude tane hukum ḳorla, “At baṛaia ogur lenjo doro.” Ar tain dorar loge loge ogu hirbar laṭi oigelo. 5Bade Mabude ḳoila, “Tumio oula ḳorio, teu tara hasau ekin ḳorba tarar baf-dadaintor Alla, Ibrahimor Alla, Isʼhak ar Iakubor Allae tumare doroshon disoin.”
6Mabude hirbar ḳoila, “Tumar at tumar saddoror tole harao.” Tain at haraila, ar bar ḳorar badeu tan at kusṭo-dolbeda bemare dudor laḳan dola oigelo. 7Mabude ḳoila, “Tumar at hirbar hono harao.” Tain haraila ar saddoror tol taki bar ḳoria deḳoin, agor laḳan bala oigese.
8Mabude ḳoila, “Tara zudi tumare ekin na ḳoroin, te tumar laṭire haf oa deḳle ekin ḳorba, ar eoṭae ekin na ḳorle tumar ator bemaror keramoti deḳle tara ekin ḳorba. 9Ar zudi i duio keramotieo ekin na ḳoroin, tumar ḳota na manoin, te tumi Nil nod taki tuṛa fani ania hukna maṭit falaio, deḳbae maṭit foṛiau i fani lou oizibo.”
10Ou Musae Mabudre ḳoila, “O malik, ami to bala ḳori mat-ḳotau mattam fari na, ageo fartam na ar afne i gulamor loge batchit ḳorar badeo fari na, amar to zifra baṛua.” 11Mabude ḳoila, “Manshor muk ke banaise, ami nae ni? Ḳe manshore buba, ḳalua ba anda banain? Souḳe deḳar lagi sokur faoar ḳe dein? Ita to ami Mabudeu dei na ni? 12Te tumi zao, gia kita matitae ami hikaia dimu. Tumar muḳor zobanre ami shaijjo ḳormu.”
13Tain ḳoila, “O malik, ami minot ḳoriar, oinno ḳeurore faṭai deukka.” 14Ou Musar ufre Mabudor gusa uṭlo. Tain ḳoila, “Tumar bai Harun bin Lebi ase na ni? Ami zani, he bala boktita dito fare. He oḳon tumar loge deḳa ḳorat ar, tumare dekia he kub kushi oibo. 15Tumi hikaia dio ar ḳoio he kita matito. Ami tumra duiozonor muḳor zobanre shaijjo ḳormu. Ar hono gia kita ḳortae ami hikaia dimu. 16Tumar bai Harunor muḳ oibo tumar muḳ, he tumar oia manshor loge matibo. Fegambor oḳole zela Allar ḳalam ḳoin, Harune oula tumar buli ḳoibo. 17Ou laṭi tumar ato rakio, iṭa dia hou keramoti-muzeza oḳol zair ḳorbae.”
18-19Madian desho taḳteu Mabude Musare hukum ḳorsla, “Tumi Mishoro zaogi, ḳaron Mishoror zeta manshe tumare kun ḳorta saisla, ita oḳon mori gesoin.” Teu Musae tan hour Shuaibor ḳasat gia ḳoila, “Ami amar zonom maṭi Mishor desho zaitam sairam, amar ḳesh-kuṭum oḳol zita asoin ki na, tarar hal-hokikot deḳat zaitam, te amare zaoar onumoti deukka.” Houre ḳoila, “Aichcha, sohi-salamote zao.” 20Ou Musae tan bibi ar fuaintore gadar ufre soṛaia Mishoror fote roana oila. Tan ato Allai keramotir hou laṭi raḳla.
21Mabude Musare hukum dila, “Tumi Mishoro gia harle amar deoa keramoti oḳol Feraunor samne deḳaio, oile ami tar dilre fashan banailimu, he manshore saṛto nae. 22Tumi Feraunre ḳoio, Mabude nize ḳoisoin, ‘Boni Israil to amar foela futor laḳan4:22 Allar foela fut, mani tan ḳas mayar bonda oḳol. Iṭa eḳṭa rufok baikko. . 23Ami nize tumare hukum ḳorslam, amar ebadoto zaita ḳori tumi amar futre saṛi ditae, oile tumi mancho na. Erdae amio tumar foela futre marilimu.’ ”
24Bade Mishoro zaoar foto rait ḳaṭaibar zagat aile Mabude Musare marilita ḳori mukamuki oila. 25Oile tan bibi Sofurae ekkan darail fattor loia tan fuar mosolmani ḳorailla ar oḳṭa tan zamai Musar faor maze suaia ḳoila, “Lour bodola ami tumare zamai hishabe faisi.” 26Teu Musare Mabude saṛi dila. Mosolmani ḳamor befare Sofurae to ou ḳotau ḳoisla.
27Ermaze Mabude Harunre ḳoila, “Tumi morubumit gia Musar loge deḳa ḳoro.” Ou tain gela ar Allar faṛ Turor gese aia Musare faia suma dila. 28Ar Mabude zeta zeta ḳoibar lagi Musare hukum disla, Musae ita hokkolta Harunre zanaila. Mabude zoto laḳan keramoti deḳanir hukum disoin, ita hoḳolta-u tain Harunre buzaila.
29Bade Musa ar Harun Mishor desho gia Boni Israilor hoḳol murobbire dola ḳorla. 30Mabude Musare zotota ḳoisla, Harune ita hoḳolta tarare zanaila, ar hou keramoti oḳolo manshor samne deḳaila. 31Erlagi manshe ita ekin ḳorla. Tara zebla hunla, Mabude tarar bae kial ḳorsoin, tarar uforor zulum-mosibot deḳsoin, ou tara tanre soizda ḳorla.
5Feraunor loge foela shakkat
1Musa ar Harune gia Feraunre ḳoila, “Mabud, zein Boni Israilor Alla, tain nize ḳoisoin, amar bonda oḳolre tumi saṛi deo, amar name hoj ḳorar lagi, tara morubumit hizrot ḳorte oibo, tumi tarare saṛo.” 2Feraune zuaf dilo, “I Mabud aroḳzon ḳe, zen hukum mania ami Boni Israilre saṛi ditam? Ila kunu Mabudre ami sini na, ar Boni Israilreo ami saṛtam nae.” 3Tara ḳoila, “Ibrani oḳolor Allae amrare doroshon disoin. Erlagi amra minot ḳoriar amrare morubumir bae tin dinor fot gia, amrar Mabud Allar name kurbani ḳorte deukka, arnae tain amrare gozobi bemar dia ba zuddor maze falaia marilaiba.” 4Mishoror bashshae zuaf dila, “O Musa ar Harun, tumra manshore ḳene ḳamo taki firairae? Zao, tumrao gia ḳamo lago. 5Deḳrae ni, desho tumrar manush bout baṛigesoin, ar tumrar lai faia itae kunu ḳam ḳorra na.”
6Ou Feraune hou dinu Mishori zalim shordar ar Israili subedar oḳolre hukum ḳorla, 7“Iṭ banaibar lagi tumra manshore agor laḳan ḳer-nera ania dio na, tara gia ita zugaṛ ḳoruk. 8Oile age tara zotoḳan iṭ banaito oḳono otoḳan banaite oibo, ekḳano ḳom oito nae. Ita alshia oigesoin ḳori, ono aia tarar Allar namor kurbani ḳorta ḳoia sillaira. 9Tumra tarare aro ḳosṭor ḳamo lagao, teu itae kunu laḳan baze mat na hunia ḳamor maze mon diba.”
10Ou hi shordar ar subedar oḳol baroi gia manshore ḳoila, “Feraune ḳoisoin, oḳon taki tain ar iṭ bananir ḳer zugai dita nae. 11Tumra zen taki faro ḳer-nera zugaio, oile tumrar ḳam kuntau ḳomail oito nae.” 12Ou manshe ḳer-nera tukaibar lagi hara Mishor desho sitri gela. 13Ar shordar oḳole bare bare tagda dia ḳoilo, “Age ḳer zugaia deoar bala tumra forteḳ din zotoḳan iṭ banaitae, oḳono otoḳan banao.” 14Feraunor zalim shordar oḳole Boni Israilor ufre ze subedar lagaisil, hou shordar oḳol aia subedar oḳolre mair-doir ḳoria zikailo, “Tumra age zotoḳan iṭ ditae, oḳon otoḳan deona ḳene?”
15Ou Boni Israilor subedar oḳole aia Feraunor gese nalish dila, “Afnar i gulam oḳolor loge ila bebohar ḳene ḳorra? 16Shordar oḳole amrare ḳer-nera zugai dein na, ta-o iṭ banaibar hukum dein ar afnar i gulam oḳolre mair-doir ḳoroin, oile dush to afnar nizor shordaror.” 17Feraune zuaf dilo, “Tumra alshia, kuṛia, erlagi ḳoirae Mabudor name kurbani ḳorat zaitam. 18Zao, ḳam ḳoro gia. Tumrare ḳer deoa zaito nae, ta-o forteḳ din zotoḳan iṭ banaibar ḳota asil, otoḳanu banaite oibo.”
19Ou Boni Israilor subedar oḳole buzla, tara bifodor maze foṛsoin, ḳaron tarare hukum ḳora oise, age zotoḳan iṭ banani lagto, oḳono otoḳan iṭ banaite oibo, ḳom oito nae. 20Tara Feraunor ges taki zaoar foto Musa ar Harunor loge deḳa oilo, era ubaia bar saoat asla. 21Subedar oḳole ḳoila, “Mabude afnarar faona shaza diba, afnara Feraun ar tar uzir-naziror gese amrare fosa-ganda banaia, amrare kun ḳorar lagi toluar nia tarar ato disoin.”
22Ou Musae hirbar gia Mabudor gese foriad ḳorla, “O din duniar malik, tumi ḳene tumar bondare mosiboto falailae? Ar amare kitallagi paṭailae? 23Feraunor gese tumar ḳota hunanir bad takiu tumar bonda oḳolor ufre zulum to aro baṛise. Oile tumi to kuntau ḳorlae na.”
61Mabude Musare ḳoila, “Feraunor kita dosha oe tumi dekio, amar ator zur deḳleu he manshore saṛi dibo. Zurala ator kudrot deḳleu he tar desh taki erare ḳedai dibo.”
Boni Israilor logor oada Allar iad ase
2Allae Musar loge batchit ḳori Musare ḳoila, “Ami ‘Mabud zein asoin’. 3Ami Ibrahim, Isʼhak ar Iakubor gese shorbo-shoktiman Alla name didar ditam, ‘Mabud zein asoin’ name tarare didar ditam na. 4Ami tarar loge ou oada ḳorslam, ami tumrare Kenan desh dimu, ze desho tumra musafir oia ro, ou deshu ami tumrare dimu. 5Ḳas ḳori Mishori oḳole Boni Israilre gulami ḳoranir lagi erar ḳandon hunia, amar hou oada oḳon iad ḳorlam. 6Erlagi tumi gia Boni Israilre ḳo, Mabude ḳoisoin, ami Mabud, ami tumrare Mishori oḳolor tol taki bar ḳori anmu, tarar gulami taki azad ḳormu. Tarare deḳar moto shaza dia, amar kudroti atdi tumrare ḳalas ḳormu. 7Heshe tumrare amar nizor bonda banaimu, ami nize tumrar Alla oimu. Teu tumra buzbae, ami Allau tumrar Mabud, ar Mishori oḳolor baror tol taki amiu tumrare basaisi. 8Ami Ibrahim, Isʼhak, Iakubor loge ze deshor ḳota oada ḳorsi, hou desho tumrare loia zaimu, tumra hou deshor malik oibae. Amiu Mabud.”
9Musae gia ita hoḳolta tarare zanaila, oile hi betaea zulum-toklif ar gulami ḳorte ḳorte mon-mora oizaoae, tara ar Musar mate ḳan dila na.
10Ou Mabude Musare ḳoila, 11“Tumi gia Mishoror bashsha Feraunre ḳo, he zanu tar desh taki erare zaite dey.” 12Musae zuaf dila, “Boni Israileu zebla amar mat huner na, te Feraune kila hunbo? Ar amar to matte muḳo lagizae.” 13Teu Mabude Musa ar Harunre ḳoila, “Tumra Boni Israil ar Mishoror raza Feraunre ḳo, Mabude amrare hukum disoin, Boni Israilre Mishor taki bar ḳori neoar lagi.”
Hozrot Musa ar Harun (a:)-or baf-dadaintor forisoe
14Musa nobir nizor zati Boni Israilor fordan murobbi oila Hozrot Iakub, Allae ou Iakubor noea nam disla Israil. Israilor fuain oila Ruben, Shimion, Lebi shoho muṭ barozon, ou Lebi oila Musa ar Harun ḳandanor mul-murobbi.
Israilor boṛo fua Rubenor fuain oila Honuk, Pollu, Hasir ar Kormi, era Ruben ḳandanor mul-murobbi.
15Shimionor fuain oila Jimuel, Jamin, Ohod, Jakin, Shuhor ar tar Kenani bour torofa fua Shoul, era Shimion ḳandanor mul-murobbi.
16Ḳandan taliḳa hishabe Lebir fuain oila Zarsun, Kahat ar Marari. Lebi eḳ-sho shaṛtish boros basisla. 17Zarzir gusṭir fordan hishabe Zarsunor fuain oila Libni ar Shimio. 18Kahator fuain oila Imran, Izhar, Hebron ar Ujjol. Kahat eḳ-sho tetrish boros basisla. 19Mararir fuain oila, Moholi ar Mushi.
Erau oila Lebir ḳandanor mul-murobbi.
20Imranor fuain oila Musa ar Harun. Imrane tan fufu Iuḳabezre bia ḳorsla, tan feṭo erar zonom oisil. Imran eḳ-sho shaṛtish boros basisla.
21Izharor fuain oila Kurah, Nefog, Ziḳri.
22Ujjolor fuain Mishael, Elzafon ar Zitri.
23Ar Harune Aminadabor fuṛi Nahishor boin Ilishebare bia ḳorae, tan hurutta oila Nadab, Abihu, Ali-Azor ar Isamar.
24Kurahor fuain oila Oshir, Ilḳana, Obiashof. Era Kurahi oḳolor mul-murobbi.
25Ali-Azoror fua oila Finhosh. Harunor fua Ali-Azore Fuṭielor fuṛire bia ḳorae tair feṭo Finhoshor zonom oisil.
Gusṭi hishabe era oila Lebi ḳandanor mul-murobbi.
26Ou Harun ar Musare Mabude hukum ḳorsla, tumra Boni Israilre sifai dolor laḳan Mishor taki bar ḳoro. 27Musa ar Haruneu Boni Israilre Mishor taki bar ḳori anar ḳota Mishoror bashsha Feraunor loge matisla.
Mabude Hozrot Musa ar Harun (a:)-re hukum dila
28Mabude Musar loge zedin Mishor desho batchit ḳorla, 29hou din tain ḳoila, “Ami Mabud. Te tumare oḳon zeta zeta ḳoimu, ita hoḳolta tumi Mishoror bashsha Feraunre ḳoio.” 30Musae Mabudor dorbaro aroz ḳorla, “Deḳoukka, amar to matte muḳo lagizae, Feraune kunu amar mat hunbo ni?”
71Ou Mabude Musare ḳoila “Huno, ami Feraunor gese tumare Allar laḳan banaimu. Ar tumar bai Harunre banaimu tumar nobi. 2Ami tumare zela hukum ḳormu, tumi oula Harunre ḳoibae, ar Harune ota Feraunre ḳoibo; zate he Boni Israilre tar desh taki saṛi dey. 3Oile ami Feraunor dilre fashan ḳorilimu. Mishor desho ami bout keramoti ar kudroti lila-ḳela deḳaimu. 4Tar badeo Feraune tumrar mator dam dito nae. Teu ami Mishoror ufre amar at lagaia, deḳar moto shaza dia Mishor desh taki amar nizor bonda Boni Israilre sifair laḳan dole dole bar ḳormu. 5Mishoror maze amar nizor at lagaimu, Mishori oḳolor maz taki Boni Israilre bar ḳoria anmu, oudin tara buzba amiu Mabud.” 6Bade Musa ar Harune oula ḳorla, Mabudor hukum mafik kam ḳorla. 7Feraunor loge mat-ḳotar shomoe Musar boeosh asil ashi, ar Harunor tirashi boros.
Hozrot Harun (a:)-or keramotir laṭi
8Ou shomoe Mabude Musa ar Harunre ḳoila, 9“Feraune zebla ḳoibo, tumrar nizor kunu keramoti ḳam deḳao, teu tumi Harunre ḳoio, tar laṭi nia Feraunor samne falaito, falanir loge logeu iṭa haf oizibo.” 10Bade Musa ar Harun Feraunor gese gela, gia Mabudor hukum mafik kam ḳorla. Harune Feraun ar tar uzir-naziror samne hou laṭi falanir loge logeu iṭa haf oigelo. 11Ou Ferauneo tar gunin ar zadugir oḳolre anailo, tarao tarar zadu-montro dia oula deḳaila. 12Tara hoḳoleu zarzir laṭi saṛlo, ar eota haf oigelo, oile Harunor laṭie tarar hokkol laṭire gilililo. 13Ita dekiao Feraunor dil fashan roilo, he erar mate ḳan dilo na, zela Mabude age ḳoisla.
Allar foela gozob, fani lou oigelo
14Bade Mabude Musare ḳoila, “Feraunor dil to fashan, he manshore saṛte razi nae. 15Te tumi biani bala Feraunor gese zaio, gele deḳbae he fanir gese zaibo, tumi tar loge deḳa ḳorar lagi Nil nodor faro ubaio. Tumar ze laṭi haf oisil, ou laṭi ato ḳori nio. 16Nia tare ḳoio, ‘Mabud, zein Ibrani oḳolor Alla, tain nize amare faṭaisoin afnare oḳan ḳoitam, tumi amar bonda oḳolre saṛi deo, tara amar bondegi ḳorar lagi morubumit hizrot ḳoruk, ta-o oḳono tumi hunrae na. 17Erlagi oḳon tumi buzbae, amiu Mabud.’ Oḳan ḳoia hari tumi ḳoio, ‘Deḳoukka, ami nizor ator laṭi dia ou Nil nodor fanit baṛi marmu, ar hokkol fani lou oizibo. 18Hokkol mas morizibo ar fosa gondo baroibo, teu Mishori oḳole ou Nil nodor fani ḳaita farta nae.’ ”
19Mabude Musare ḳoila, “Harunre ou ḳota ḳo, tumi nizor laṭi loia Mishori oḳolor hokkol fanir ufre, deshor gang-nala, ḳal-bil, aor-baor sairobae tumar at baṛao, teu itar hokkol fani lou oizibo. Fattor kudia banail ba laḳṛir fatil-ḳoloshir maze toa fanio lou oizibo.”
20Ou Musa ar Harune Mabudor hukum mafik oula ḳorla, tain laṭi usa ḳori Feraun ar tar uzir-naziror samne Nil nodor fanit baṛi marla, teu hoḳol fani lou oigelo. 21Nil nodor hoḳol mas morigelo, hoḳol fanit fosa gondo baroilo, Mishori oḳole fani ar ḳaita farla na, Mishor deshor hoḳol fani lou oigelo. 22Mishori zadugir oḳoleo tarar zadu-montro saṛia oula ḳorlo, ete Feraunor dil fashan roilo. He erar mato ḳan dilo na, zela Mabude age ḳoisla. 23Bade Feraune Musa ar Harunre fis dia tar razbaṛit gelogi, ita kuntatu ḳan dilo na. 24Oile kunu Mishorie gangor fani ḳaite na farae, fani ḳaoar lagi gangor faror sairobae tara gat kudila.
25Nil nodor fanit Mabudor gozob nazil oar bade shat din guzori gelo.
8Allar dusra gozob, beng
1Ou shat din bade Mabude Musare ḳoila, “Tumi Feraunor gese zao, gia tare ḳo, Mabude nize ḳoira, amar kezmot ḳorar lagi amar bonda oḳolre saṛi deo. 2Tarare na saṛia kunu bada dile, ami beng dia tumar asta desho gozob ḍalmu. 3Asta Nil nod benge boriziba, ar ita aia tumar razbaṛit, hutibar goro, tumar bisnat uṭiba. Ar tumar uzir-naziror goro, tumar proza oḳolor goro, tumar undal ar fiṭa banaibar gamlato aia hamaiba. 4Tumar, ar tumar uzir-naziror, ar proza oḳolor gotoro beng uṭiba.”
5Bade Mabude Musare ḳoila, “Harunre ḳo, tumi Nil nod ar ḳal-bilor ufre hou laṭiala at baṛaia asta Mishoro beng anao.” 6Ou Harune Mishoror hoḳol fanir ufre tan at baṛaila, teu bengainte aia Mishor desh boria jam oigela, kunu zaga ḳali roilo na. 7Oile zadugir oḳoleo tarar zadu-montro dia Mishoro oula beng anlo.
8Bade Feraune Musa ar Harunre anaia ḳoila, “Mabudor gese aroz ḳoro, tain amar ges taki ar amar proza oḳolor ges taki i beng oḳol horaia neukka, taile ami manshore saṛi dimu, zate tara gia Mabudor name kurbani ḳorto fare.” 9Ougi Musae Feraunre ḳoila, “Afne amare ṭik kori ḳoukka, ami kun shomoekur lagi minoti ḳortam, kun shomoe afnar gor, afnar uzir-nazir ar proza oḳolor gor taki beng oḳol horia zaitagi, gia ḳali gango roita?”
10Tain ḳoila “Ḳailkur lagi.” Ou Musae ḳoila, “Afnar zoban motou ouk, zate afne buzta faroin, amrar Mabud Allar homani ar keu nai. 11Bengainte afnar ges taki, afnar gor-baṛi taki, afnar uzir-nazir ar proza oḳolor gor taki horia gia ḳali Nil nodo roiba.”
12Musa ar Harun Feraunor ges taki bare gela, gia Musae Mabudor gese foriad ḳorla, Feraunor ufor taki bengor gozob horanir lagi. 13Mabude Musar arzi ḳobul ḳorae, tarar baṛi-gor, uṭan ar bondor hoḳol beng morigelo. 14Ar manshe itare zagae zagae dola ḳorle, fosia desho gondo baroilo. 15Oile Feraune zebla deḳlo, gozob to horigese, ou he tar dil fashan ḳorillo. Erar mato ar ḳan dilo na, zela Mabude age ḳoisla.
Allar tin nombor gozob, mosha
16Bade Mabude Musare ḳoila, “Tumi Harunre ḳo, tumi tumar laṭi baṛaia maṭir dulit baṛi maro, teu i duil mosha oia asta Mishor desh borizibo.”
17Tara oula ḳorla, Harune tan laṭiala at baṛaia maṭir dulit baṛi marla, teu maṭir hokkol duil mosha oigelo. Ou moshae manush, zanuar ar Mishoror hokkolbae borigelo. 18Ar zadugir oḳoleo tarar zadu-montro dia oula mosha banaito sailo, oile farlo na. Manush ar zanuaror maze mosha roilo. 19Teu zadugir oḳole Feraunre ḳoila, “Ita to Allar kudrot.” Ta-o Feraunor dil fashan roilo, he erar mate ḳan dilo na, zela Mabude age ḳoisla.
Allar sair nombor gozob, fuḳor fal
20Bade Mabude Musare ḳoila, “Tumi fozore uṭia Feraunor gese azir o, gele deḳbae he fanir gese aibo. Tumi tare oula ḳoio, Mabude nize ḳoira, amar kezmot ḳorar lagi tumi amar bonda oḳolre saṛi deo. 21Zudi na saṛo taile ami tumar, tumar uzir-nazir, tumar proza oḳolor ufre, ar tumar goraintor maze ḳamṛaora fuḳor fal faṭaimu, ita falefale aia Mishori oḳolor goro ar tarar boshot-biṭa shoho hoḳol zagat jam oiziba. 22Oile ami amar bonda oḳolor boshot ḳana Gushon elaḳare ita taki basaimu, ino fuḳor fal aita nae. Teu tumi buztae farbae, ami Mabud i desho asi. 23Ami to amar bonda ar tumar prozar maze tofat-fartokko ḳormu, ḳail i nomuna deḳbae.” 24Ar Mabude oula ḳorla, Feraun ar tar uzir-naziror goro ḳamṛaora fuḳor fal ailo, asta Mishor deshor hokkolbae fuḳor lagi shorbonash oigelo.
25Teu Feraune Musa ar Harunre ḍakaia ḳoila, “Tumra zao, deshor bitre tumrar Allar name kurbani ḳorogi.” 26Musae ḳoila, “Ila ḳora ṭik nae, ḳaron amrar Mabud Allar name Mishori oḳolor ginna ḳora kurbani ḳorte oibo. Ar deḳoukka, Mishori oḳolor samne tarar ginna ḳora kurbani ḳorle tara to amrare fattordi iṭaia mariliba. 27Te amrar Mabud Allae zela hukum ḳorba, amra morubumir bae tin dinor fot horia gia, tan name oula kurbani ḳormu.”
28Feraune ḳoila, “Ami tumrare saṛi diar, tumra morubumit gia tumrar Allar kurbani ḳoro. Oile beshi duroi zaio na, tumra amar lagio minot ḳorio.” 29Ou Musae ḳoila, “Deḳoukka, ami afnar ges taki horia gia Mabudor gese minoti ḳormu, teu ḳail afnar ges taki, afnar uzir-nazir ar afnar proza oḳolor ges taki fuḳor fal horiziba. Oile manshe Mabudor kurbani ḳorat zaite afne ar kunu baotabazi ḳoroin na zanu.”
30Bade Musae Feraunor ges taki gia Mabudor gese minoti ḳorla. 31Ar Mabude Musar arzi mafik kam ḳorla. Feraun, tar uzir-nazir ar tar proza oḳolor ges taki hokkol fuk horigela, eguo roila na. 32Oile hirbar Feraune tar dil fashan ḳorillo, manshore saṛlo na.
9Allar fas nombor gozob, foshur moṛki
1Bade Mabude Musare ḳoila, “Tumi Feraunor ḳasat gia tare ḳo, Mabud, zein Ibrani oḳolor Alla, tain nize ḳoira, amar ebadot ḳorar lagi amar bonda oḳolre saṛi deo. 2Tarare saṛte razi na oia oḳono bada dile, 3hunia raḳo, bondor maze tumar foshuintor ufre, guṛaintor, gadaintor, uṭ, ar goru-sagol, meṛaintor ufreo ami Mabude at dimu, betaea bemaror moṛki saṛimu. 4Oile ami Mabude Mishoror ar Boni Israilor foshur maze tofat ḳormu; Boni Israilor kunu foshu morta nae.”
5Ar Mabude shomoyo ṭik koria dilaila, samnor ḳail tain desho i ḳam ḳorba. 6Hasau bador din Mabude oulau ḳorla, teu Mishoror hokkol foshu morigela, oile Boni Israilor egu foshuo morla na. 7Feraune manushdi ḳobor loia deḳlo, Boni Israilor egu foshuo morsoin na; ta-o tar dil fashan roilo, he manshore saṛlo na.
Allar soe nombor gozob, fuṭ-ga
8Ou Mabude Musa ar Harunre ḳoila, “Tumra duiozone muiṭ boria undalor sali ano, ania Musae ou salire Feraunor samne ufredi siṭai deo. 9Deḳbaene, ita hara Mishor deshor maze fatla duil oia hoḳol zagar manush ar foshuintor gotro gozobi bish-furi oibo.” 10Teu tara undalor sali ania Feraunor samne ubaia, Musae ufredi siṭai dila, ete manshor ar foshuintor gotro bish-furi oilo. 11Ar ou furr lagi zadugir oḳole Musar samne ubaita farla na, hoḳol Mishori ar zadugir oḳolor gotoro-o bish-furi oilo. 12Oile Mabude Feraunor dil fashan ḳorilla. He erar mate ḳan dilo na, zela Mabude age ḳoisla.
Allar shat nombor gozob, hil-tufan
13Bade Mabude Musare ḳoila, “Tumi biane uṭia Feraunor samne ubaia oula ḳoio, Mabud, zein Ibrani oḳolor Alla, tain nize ḳoira, amar ebadot ḳorar lagi amar bonda oḳolre saṛi deo. 14Naile i fira ami tumar, tumar uzir-nazir ar tumar proza oḳolor maze amar hokkol zator gozob saṛimu. Teu tumi buzbae, hara duniait amar homani ḳeu nai. 15Er ageu ami amar at baṛaia betaea moṛki dia tumare ar tumar proza oḳolre martam farlam one, tumi duniai taki binash oigelae one. 16Asole erlagiu ami tumare duniait otodin basaisi, zate tumare amar lila-ḳela deḳai, ar hara duniait amar nam zair oe. 17Tumi oḳono amar bonda oḳolre saṛrae na, tumar beṭagiri deḳairae, 18te dekio, ḳail i shomoye ami ou laḳan hil-tufan ar meg dimu, zeta Mishoror zonom taki aiz forzonto kunudin oise na. 19Erlagi bondor maze tumar foshuin ar zotota ase, itare ania goro harao; manush ba foshuin zeta goro hamaita nae, itar ufre hil foṛia hokkolṭi morba.” 20Teu Feraunor uzir-naziror maze zera Mabudor zobane ḍoraila, tara zoldi ḳori nizor gulam ar foshuintore goror bitre anaila. 21Oile Mabudor zobanre zetae dam dilo na, tarar gulam ar foshuintore bondor maze toilo.
22Bade Mabude Musare ḳoila, “Tumi asmanor bae nizor at baṛao, teu Mishoror hokkol zagat hil-tufan oibo, Mishoror manush, foshu ar ḳetor hoḳol gas-gasalir ufre ita foṛbo.” 23Ou Musae tan ator laṭi ufredi tulla, Mabude Mishor deshor ufre megor ḍak-zilḳanir loge hil-tufan deoaila; ar asmani ṭaṭa zomino foṛlo. 24Ou hilor loge megor zilkani ar ṭaṭao asil. I laḳan gozobi hil-tufan Mishor deshor zonom taki kunudino oise na. 25Hara Mishor deshor bondor mazor hokkol manush ar foshuintor ufreo kub zure zure hil foṛlo, ar ḳetor hoḳol foshol nosṭo oigelo ar hoḳol gas-gasalio bangi gelo. 26Ḳali Boni Israilor boshot ḳana Gushon elaḳat hil-tufan oilo na.
27Bade Feraune manush faṭaia Musa ar Harunre anaia ḳoilo, “I fira ami oforad ḳorsi. Mabud to pak-fobitro, oile ami ar amar proza oḳol oforadi. 28Te gozobi megor ḍaḳ ar hil-tufan to bout oise, ar zartam fariar na. Erlagi ami oḳon tumrare saṛi dimu, ar aṭḳaitam nae. Tumra amar lagi Mabudor gese minot ḳoro.”
29Musae tare ḳoila, “Ami ṭaunor baire giau Mabudor gese at tulmu, teu megor ḍaḳ, hil-tufan bondo oizibo, zate afne buzta faroin i duniai to Mabudor. 30Oile ami to zani, afne ba afnar uzir-nazir oḳole oḳono Alla Mabudre ḍoraira na.”
31I shomoe ḳetor hoḳol nalia gas ar barli nosṭo oigelo, ḳaron nalia gasor ful ar barlir soṛa baroi gesil. 32Oile kunu zator gomor gas boṛo na oae itar ḳeti oilo na.
33Teu Musae Feraunor samne taki ṭaunor bare gia Mabudor gese at tulla, loge loge megor ḍaḳ, hil-tufan bond oilo, megor zoṛio bond oigelo. 34Oile Feraun ar tar uzir-nazir oḳole meg, megor ḍaḳ ar hil foṛa bond oigese dekia tarar dil fashan ḳorilla. Feraune hirbar guna ḳorlo. 35Tar dil fashan oizaoae, he Boni Israilre saṛlo na, Mabude age zela Musare ḳoisla.
10Allar aṭ nombor gozob, fongofal
1Mabude Musare ḳoila, “Tumi Feraunor gese zao; ami to tar ar tar uzir-naziror dilre fashan ḳorilisi, zate tarar samne ami amar kudroti lila-ḳela deḳaitam fari. 2Ami Mishori oḳolor ufre zeta zeta ḳoṭin gozob disi, tarar maze kudroti zeta lila-ḳela zair ḳorsi, tumi ita tumar aolad ar nati-futir gese gof ḳortae faro, ar amiu zen Mabud iṭa buztae faro.”
3Teu Musa ar Harune Feraunor gese gia ḳoila, “Alla, zein Ibrani oḳolor Mabud, tain nize ḳoira, tumi amar samne mata nuaite ar ḳotodin horail roitae? Huno, tumi amar bonda oḳolre amar ebadot ḳorar lagi saṛi deo. 4Tarare saṛte razi na oile dekio, ami ḳail tumar shimanat fongofal oḳol saṛimu. 5Itae aia tumar asta zominre oula beriliba, kunu manshe maṭi deḳto farto nae. Hil-tufan taki zotota basigese, ḳetor maze zoto gas-gasali roise, ita hokkolta tara ḳailiba. 6Tumar nizor gor-baṛi, tumar uzir-naziror gorain, ar hokkol Mishori oḳolor gorain boria jam oiziba. Tumar moe-murobbi ar tarar baf-dada oḳoleo duniait tarar zonom taki aiz forzonto kunudin oula deḳsoin na.” Oḳan ḳoiau tain muḳ firaia Feraunor ges taki bare gelagi.
7Feraunor uzir-nazire tare ḳoila, “I beṭae ar ḳotodin amrare sataito? Otar Mabud Allar ebadotor lagi otare saṛi deukka. Afne oḳono kunta buzra na ni, asta Mishor desh nu sarḳar oizar?” 8Ou Feraune Musa ar Harunre hirbar anailo, anaia ḳoilo, “Tumra zaogi, gia tumrar Mabud Allar ebadot ḳoro. Oile ḳe ḳe zaitae sairae?” 9Musae ḳoila, “Amra to Mabudor name hojo zairam. Te amrar huruttain, murobbi, fua-fuṛin ar goru-sagol loia zaimu.” 10Feraune ḳoilo, “Aichcha, ami zudi hasau tumrare hurutta-murutta dia saṛi dei, te tumrar ou Mabudo zanu tumrar loge oia zaegi. Ḳobordar! Tumrar motlob to bala nae. 11Na, ila to oito nae, tumrar hokkolta nite ditam nae. Tumra zebla zaitaeu sairae, te ḳali beṭain zaogi.” Oḳan ḳoia hari Feraune tar samne taki Musa ar Harunre ḳedai dilo.
12Teu Mabude Musare ḳoila, “Tumi Mishor deshor ufre fongofalor lagi at tulo, fongofale aia Mishoror zominor hoḳol gas-gasali ḳailibo. Hil-tufan taki zotota basise, ita hokkolta ḳailibo.”
13Musae Mishoror ufre tan laṭi melia dorla, ar Mabude hara din hara rait deshor maze fubali haoa saṛla, ou fubali haoae biane fongofal loia azilo. 14Hara Mishor deshor ufre fongofale jam oigela. Mishoror hoḳol zagat fongofale gis-gis ḳorla, kub bezati fongofal aila, oula fongofal er ageo kunudin oisoin na ar badeo kunudin oita nae. 15Tara asta zominor ufor gurilila, desh andair oigelo, ar zominor zoto ḳet, gas-gasali hil-tufan taki basi gesil, ita hokkolta ḳailila. Asta Mishoror kunu gas-gasali ba ḳetor foshol kuntau roilo na. 16Feraune zoldi ḳori Musa ar Harunre anaia ḳoilo, “Ami to tumra ar tumrar Mabud Allar gese gunagar oigesi. 17Te minot ḳoriar, ḳali ekkan bar amar guna maf ḳori deo. Amar ges taki i ḳa’l oḳolre horai neoar lagi, tumrar Mabud Allare minot ḳoro.”
18Ou Musae Feraunor ges taki horia gia Mabudor gese minot ḳorla; 19ar Mabude kub zure fochchima haoa saṛla, itae fongofal oḳolre ḳedaia saf ḳoria Nil doriat falailo, Mishoror kunu zagat egu fuḳo roilo na. 20Oile Mabude Feraunor dil fashan ḳorilla, he Boni Israilre saṛlo na.
Allar noe nombor gozob, andair
21Bade Mabude Musare ḳoila, “Tumi asman muka tumar at baṛao; teu hara desho oto gono andair oibo, i andair at dia soa zaibo.” 22Musae asman muka at baṛaile tin din forzonto hara Mishor desh kub gono andair oilo. 23Tin din ḳeu ḳeuror muḳo deḳto farlo na, ḳeu zaga taki loṛto farlo na. Oile Boni Israil oḳolor goro kunu rushonir obab asil na. 24Feraune Musare anaia ḳoilo, “Zao, tumra gia tumrar Mabudor ebadot ḳoro, tumrar huruttainreo neogi, ḳali tumrar goru-sagolor fal taḳuk.”
25Musae ḳoila, “Amrar Mabud Allar name dibar lagi, foshu kurbani ar zalail kurbanir foshuin amrar loge nite oibo. 26Amrar loge oia amrar foshuino zaiba, foshur ekkan kuṛao toia zaitam nae. Amrar Mabud Allar ebadotor lagi on taki kurbani ḳora lagbo, ar kita kita kurbani ḳortam, ita amra hono na gele ḳoitam fartam nae.”
27Oile Mabude Feraunor dil fashan ḳorilla, he erare saṛte razi oilo na. 28Feraune ḳoilo, “Amar samne taki bago. Ḳobordar! Amar muḳor samne ar kunudin aio na. Amar samne zedin aibae, hidin zan ḳuaibae.” 29Musae ḳoila, “Balare bala! Ami shok koria kunudinu afnar muḳ deḳat aitam nae.”
11Aḳeri gozobor hushiari
1Mabude Musare ḳoila, “Ami Feraun ar Mishor deshor ufre ar matro eḳṭa gozob saṛmu, erbade he tumrare on tone saṛi dibo, saṛar bala he tumrare ekkebare ḳedai dibo. 2Tumi Boni Israilre hikai deo, hokkol beṭain-beṭinte tarar Mishori ari-forir ges taki shuna-rufar goena-gaṭi ḳuzia neuk.” 3Ou haloto Mishori oḳolor nozoro maea faite Mabude shaijjo ḳorla. Ermaze Mishor desho Feraunor uzir-nazir ar proza oḳolor gese Hozrot Musa kub ijjoti bonigela.
4Musae Feraunre ḳoila, “Mabude nize ḳoira, ami ada raitkur bala Mishor deshor mazdi zaimu. 5Ete godit boa Feraunor boṛo fua taki bara-banra bandir fua forzonto, Mishor deshor maze roura hokkol foribaror boṛo fuain moriziba. Erloge hoḳol foshuintor foela meda baichchao moriziba. 6I laḳan dosha Mishor desho kunudin oiseo na ar oito-o nae, asta Mishor desho ou laḳan ḳandon ḳandiba. 7Oile Boni Israilor kunu manush ba foshur bae egu kuttaeo uh ḳorto nae, zate afnara buzta faroin ami Mabude Mishori ar Boni Israilor maze tofat ḳori.” 8Heshe Musae Feraunre ḳoila, “Ou shomoe afnar hokkol uzir-nazire aia amar ṭengo foṛia ḳoiba, afne afnar hoḳol manshore loia bidae neingi, erbade ami baroimu.” Oḳan ḳoia tain gusae aguin oia Feraunor ges taki baroi gela.
9Mabude Musare ḳoisla, “Feraune tumar ḳota manto nae, zate Mishor desho amar keramotir foriman aro baṛe.” 10Erlagi Musa ar Harune Feraunor samne ou keramoti oḳol deḳaila. Oile Mabude Feraunor dilre fashan ḳorilla, he nizor desh taki Boni Israilre saṛlo na.
12Azadi Id adae ḳorar hukum
1Bade ou Mishor deshor bitre Mabude Musa ar Harunre ḳoila, 2“I sandḳan bosoror foela sand oibo, tumra i sandre bosoror foela sand gonio. 3Tumitain tamam Boni Israilre dola ḳori zanai deo, ou sandor dosh tariḳo tumrar hoḳol foribaror murobbie, zarzir foribaror lagi egu ḳori meṛa ba sagolor baichcha nibae. 4Oile kunu foribaro er gust ḳaoar manush ḳom oile, laga goror manshor loge milia, duio foribare zotoḳan ḳaita faroin, hou onumane meṛa ba sagolor baichcha nibae. 5I baichcha oibo nikut, eḳ boros boeoshor faṭa baichcha oite oibo; tumra meṛa ba sagolor baichcha nitae farbae. 6Ar ou sandor souddo tariḳ forzonto iṭar zoton ḳorbae, bade tamam Boni Israil eḳloge milia, tara hainja bala zarzir foribare ou baichchain zobo ḳorba. 7Zobo ḳorar bade tara er kisu lou nia zoto goro er gust ḳaiba, oto goror duaror soukaṭor duio galat ar uforor soukaṭo ou lou lagaiba. 8Hou raitu tara i gust aguindi sekia ḳamir saṛa ruṭi ar titta hagor loge milaia ḳaiba. 9I gust tumra ḳasa, ba fanidi randia ḳaio na. Ḳali aguindi sekia ḳaio, er ṭeng, ḳolla shudda bitoror hokkolta ekkano sekio, bade ḳaio. 10Rait fuanir age ḳani shesh ḳorio, bian forzonto kuntau baki toio na. Zudi kunta baki roizae, te aguindi zalailio. 11I ḳani ḳaoar bala tumrar ḳomoror ḳafoṛ mozbut ḳori findio, faot zuta lagaio, ator laṭi loio. Zoldi ḳori ḳani ḳaio. Iṭa oilo Mabudor namor Azadi Id. 12Hou raitu ami Mishor deshor mazdi zaimu, deshor hokkol manshor boṛo fuare ar foshur foela meda baichchareo marilimu. Mishoror hoḳol deb-debir bisar ḳoria shaza dimu; amiu Mabud. 13Oile tumrar duaror soukaṭo lefa lou deḳle ami buzmu i goro tumra ro. Erlagi ami Mishor desho gozob ḍalibar shomoe, lou lefa ou gor bad dia samnedi zaimu. Moutor gozob tone tumra rehai faibae. 14Ou dinre tumra iad rakio ar ami Mabudor name idor din manio. I idre tumra amar hukum mono ḳoria hor-hamesha oarishor for oarish dori mania zaio.”
Ḳamir saṛa ruṭi ḳaoar hukum
15Mabude ḳoila, “Tumra shat din forzonto ḳamir saṛa ruṭi ḳaibae. Foela dinu zarzir gor taki hoḳol ḳamir falai dibae. I shato dinor maze zegue ḳamirala nan ruṭi ḳaibo, tare Boni Israil tone fusia falail oibo. 16Foela din ar shat nombor din tumra fobitro milon-mahfil adae ḳorbae, i dui din ḳali zoruri ḳaoa-daoa saṛa dusra kunu ḳam-ḳaz ḳorbae na. 17Ou laḳan tumra ḳamir saṛa ruṭir i id adae ḳorio, amar hukum mono ḳoria oarishor for oarish dori hor-hamesha i id adae ḳorio. Ou dinu ami tumrare sifai dolor laḳan ḳori Mishor desh taki bar ḳori anmu. 18Tumra foela sandor souddo tariḳor hainja taki shuru ḳoria, eḳoish tariḳor hainja forzonto ḳamir saṛa ruṭi ḳaio. 19Ou shat din zate tumrar goro ḳamiror kunu nam-nishana na taḳe, ou shomoe ḳeu zudi ḳamirala ḳani ḳae, te he tumrar nizor zatir ouk ba bin zatir ouk, tare Boni Israilor shomaz taki fusia falail oibo. 20I shat din tumra zenou ro na ḳene ḳamirala kuntau ḳaio na; ḳali ḳamir saṛa ruṭi ḳaio.”
21Musae Boni Israilor hoḳol moe-murobbire dola ḳoria ḳoila, “Afnara zaukka, gia zarzir foribaror lagi Azadi Idor meṛar baichcha ania zobo ḳoroukka. 22Ar ‘esub’ gasor eḳ aṭi ḍeṭa loia, fatilo toa lout buṛaia duaror soukaṭor duio galat ar ufre lagaio. Shabdan! Shuruz uṭar age ḳeu goror bare baroio na. 23Mishori oḳolre marar lagi Mabude zebla Mishor deshor mazdi toshrif niba, ou shomoe tumrar soukaṭor ufre ar duio galat lou deḳle, tain i gor bad dia samnedi aguaiba. Azrail firistare tumrar goro hamaia marte dita nae.
24“Amar batail hukum mono ḳoria tumra ar tumrar aolad oḳole i idre adae ḳorio. 25Ami amar nizor oada mafik tumrare ze desh dimu, hou desho gia harleo tumra i id adae ḳorio. 26Tumrar huruttainte zebla tumrare zikaiba, i idor ḳaron kita? Iṭa kila aise? 27Te tumra zuaf dio, iṭa Mabudor name Azadi Idor kurbani. Mishori oḳolre marbar bala tain Mishor desho Boni Israilor gor bad dia samnedi aguai gia, amrare azad ḳorsla.” Ikan hunia hoḳol manshe Mabudre soizda ḳorla. 28Musa ar Harunre Mabude zela batai disla, hoḳol Boni Israil tarar goro gia ou laḳan ḳam ḳorla.
Dosh nombor ba aḳeri gozob, boṛo fuar mout
29Heshe maz raite ou laḳan goṭlo, Mabude godit boa Feraunor fua tone zel ḳanar bondir fua forzonto hokkolre marilila. Mishor deshor hokkol foribaror boṛo fuain ar foshuintor foela meda baichchareo tain marilila. 30Teu Feraun ar tar uzir-nazir oḳol, Mishoror hoḳol manush hozag oia uṭla, asta Mishor desho betaea ḳandonor ruil foṛlo; ḳaron ola kunu gor roisil na, ze goro ḳeu na ḳeu morse na.
Mishor desh taki Boni Israilor hizrot
31Hou raitu Feraune Musa ar Harunre anaia ḳoilo, “Tumra zoldi zao, Boni Israilre loia amar prozar ges tone horo. Tumra zela ḳoiso, oula gia Mabudor ebadot ḳoro. 32Tumrar zoban motou tumrar goru-meṛar fal oḳolreo neogi. Tumra amareo nek dua deo.”
33Mishori oḳole kub ḍoraila, tara mono ḳorla tarao moriziba. Erlagi tara tagda dita lagla, Boni Israil zoldi ḳori bidae oita. 34Boni Israile tarar moedar ḳair maze ḳamir furaibar ageu, ḳai shoho gamlain ḳafoṛdi gaiṭ bandia ḳando loila. 35Hoḳol Boni Israile Musar foramish moto, Mishori oḳolor shuna-rufar goena-gaṭi ar ḳafoṛ-sufoṛ ḳuzia nila. 36Mabude ag toneu Mishori oḳolor dilor maze eḳ doya-maea foeda ḳorsla, zate Boni Israile zeta ḳuziba, otau zanu tarare dein. Ou laḳan ḳori tara Mishori oḳolor bout don-douloto ḳobza ḳorla.
37Ota nia Boni Israil Ramashesh elaḳa taki Shukkotor muka roana oila. Tarar maze onuman soe lak shobol beṭain aṭia gela. Erar loge beṭin ar huruttaino asla. 38Boni Israil badeo tarar loge roura aro bout manush, goru-meṛar fal hoḳolta milia bout boṛo dol bandia roana dila. 39Bade tara Mishor taki ana hou moedar ḳai dia ḳamir saṛa ruṭi banaila. Mishor taki tarare zoldi ḳori bidae deoae i ḳait ḳamir maḳaibar shomoe-u faisla na, ar fotor lagi kunu mosao nita farsla na.
40Boni Israil Mishoro hokkoltae sair-sho tish boros boshot ḳorsla. 41Ṭik ou sair-sho tish boros fura oibar dino Mabudor hokkol bonda, sifai dolor laḳan hazia Mishor desh taki baroila. 42Ou rait Mabude afon kudroti saeae fahara dia tarare Mishor desh taki bar ḳoria anae, i raitḳan ebadotir rait. Hokkol Boni Israilor lagi oarishor for oarish dori, Mabudor name uzagori ḳorar ek kas rait.
Azadi Id adae ḳorar niom-ḳanun
43Mabude Musa ar Harunre ḳoila, “Azadi Idor kurbanir niom-ḳanun ami tumrare hikai diar. Huno, oinno kunu zatir manshore er gust ḳaite dibae na. 44Oile ḳorida gulame mosolmani ḳoranir bade ita ḳaito farbo. 45Oinno zekunu zatir musafir ba betondari ḳamlareo ita ḳaoaio na. 46Tumra zar baṛit foshu zobo ḳorbae hou baṛitu er gust ḳaite oibo; baṛir bare kuntau nibae na, foshur kunu aḍḍi bangibae na. 47Tamam Boni Israile ou id adae ḳorbae. 48Tumrar loge roura kunu abadire zudi Mabudor namor i id manto sae, te foela tar foribaror hoḳol beṭaintor mosolmani ḳorani lagbo. Bade he Boni Israilor laḳan id adae ḳorto farbo. Oile mosolmani ḳorani saṛa ḳeu i gust ḳaito farto nae. 49Boni Israilor lagi ar abadir lagio eḳ homan ain zari oilo.”
50Mabude Musa ar Harunre zela hukum disla, Boni Israile hasaror oulau amol ḳorla. 51Mabude hou dinu sifai dolor laḳan ḳori, Boni Israil oḳolre Mishor desh taki bar ḳori anla.
13Boṛo fuare Allar name shofia dibar hukum
1Mabude Musare hukum dila, 2“Tumi Boni Israilor hokkol foribaror boṛo fuainre amar name alog ḳoria shofia deo. Ita kunu manshor fua ouk ba foshur baichcha ouk. Hoḳoltar boṛo fuain ḳali amaru.”
3Teu Musae manshore ḳoila, “I din ḳanre tumra iad rakio, ou dinu tumra Mishoror gulami taki azad oiso. Mabude tan kudroti at dia tumrare hon taki bar ḳorsoin. I din kunu zator ḳamirala ḳana ḳaio na. 4Abib sandor ou tariḳo tumra baroilae. 5Mabude tumrar baf-dadar gese oada ḳorsoin, Kenani, Hiṭṭi, Amuri, Hibbi ar Zibuzi oḳolor desho tumrare nibagi. I desh dud ar mour banḍarala desh. Te hono gia harleo tumra forteḳ bosor Abib sandor ou id adae ḳorio.
6“Tumra shat din forzonto ḳamir saṛa ruṭi ḳaio, bade shat nombor dino Mabudor name id adae ḳorio. 7I shato din ḳamir saṛa ruṭi ḳaoa lagbo, tumrar gese ḳamirala kunu zator ḳana zate na deki, tumrar asta deshor bitreo zanu kunu ḳamir na mile. 8I din tumra hoḳole zarzir fuaintore ḳoio, ‘Amra zebla Mishor taki baroia aislam, ou shomoe Mabude amrare zela rohom ḳorsla, otar iadgarir lagi amio oḳon ola ḳorram.’ 9Ou laḳan tumra zarzir aolad oḳolre Mabudor hukum talim dio, zate tumrar mono roe, Mabude tan kudroti at dia tumrare Mishor desh taki bar ḳori anchoin. Tumrar ator ba ḳofalor tabiz-ḳobozor laḳan, ou talimreo hamesha sokur samne rakio. 10Erlagi forteḳ boros ou oḳt aileu tumra i niom adae ḳorio.
11“Mabude tumrar gese ar tumrar baf-dadaintor gese zela oada ḳorsoin, ou oada mafik tain tumrare Kenani oḳolor desh dan ḳorsoin. Te Mabude hono nia harle, 12tumra zarzir boṛo fuare Mabudor name shofia dilaio; erloge tumrar hoḳol foshuintor foela meda baichchareo Mabudor name dilaio, ita to Mabudoru. 13Oile hoḳol gadintor foela meda baichchar bodola, tumra egu meṛar baichcha dia ḳalas ḳoraio. Ḳalas na ḳoraile gada baichchar gordona bangi dio. Mono rakio, tumrar hokkol foribaror boṛo fuainre ḳalas ḳorani lagbo.
14“Tumrar fuainte zebla zikaiba, ita kitar lagi ḳora lage? Tumra zuaf dio, ‘Mabude tan kudroti at dia amrare Mishoror gulami taki azad ḳori anchoin. 15Feraune na-humari ḳoria zebla amrare aite dilo na, ou shomoe Mabude Mishor deshor hoḳol foribaror boṛo fuaintore, manshor fuain ar foshuintor foela meda baichchainre marilla. Ou ḳarone amrar boṛo fuainre Mabudor ges taki ḳalas ḳorai, ar foshur foela meda baichchare kurbani dei. 16Iṭa omon eḳ iadgarir id, at ba ḳofalo banda tabiz-ḳobozor laḳan zanu hamesha sokur samne roe, ar Mabude tan kudroti at dia amrare Mishor taki bar ḳori anchoin, oḳan mono roe.’ ”
Allar kudroti hazira megor ar agunir kuṭi
17Feraune Boni Israilre saṛar bade, Filistini oḳolor deshor mazdi shida fot taḳleo Allae tarare hi fotedi nila na. Allae ḳoila, heshe zudi kunu zuddor mukabila ḳora lage, te manshe zuddor ḍore hirbar Mishoro firizito fare. 18Erlagi tain manshore Nil doriar faredi morubumi bae neoaila; tamam Boni Israile sifai dolor laḳan hazi-faṛi Mishor desh taki roana oila. 19Zaoar bala Musa nobie Hozrot Iusufor ḳoebor taki tan aḍḍi-guḍḍi loge ḳori nila. Iusufe Boni Israilre mozbut ḳori ḳosom ḳorai ḳoisla, “Allae nichoe tumrare hefazot ḳorba, te tumra zaoar bala amar aḍḍiguin tulia loge ḳori niogi.”
20Bade tara Shukkot ṭaun taki roana oia morubumir kinaro Etom namor zagat aia tambu gaṛila. 21Ar Mabude tarare fot sinanir lagi dinor bala megor kuṭir surote roita, ar raitor balae for deḳanir lagi agunir kuṭir surote tarar age-age zaita, erlagi tara rait-din homane solta farta. 22Manshor samne hamesha dinor bala megor kuṭi ar raitor bala agunir kuṭi roito.
14Feraune Boni Israilre dorat ailo
1Mabude Musare ḳoila, 2“Tumi Boni Israilre ḳo, tara guria aia Fama-Hirut namor zagar ḳandat Migdul ar doriar mazamazi, Baal-Safon elaḳar samne doriar soro tambu gaṛita. 3Ita deḳle Feraune mono ḳorbo, Boni Israile kunubae fot na faia guraguri ḳorte ḳorte morubumit aṭki gesoin. 4Ami Feraunor dilre fashan banaimu, he tumrar ḳore ḳore ḳedanit aibo. Teu Feraun ar tar sifai oḳloredi amar nam uzila oibo; ita dekia Mishori oḳleo buziliba, amiu Mabud.” Mabudor hukum mafik Boni Israile oula ḳorla.
5Hasau Mishoror bashsha Feraune zebla ḳobor failo, Boni Israil oḳol bagi gesoin, hunia-u Feraun ar tar uzir-naziror dil firigelo. Tara ḳoila, “Hae, hae! Amra ita kita ḳorsi? Itare amrar gulami taki ḳene saṛlam?” 6Oḳan ḳoiau Feraune tar zuddor guṛar gaṛi hazanir hukum dia, tar sifai oḳolre zuit ḳorailo. 7He tar ḳas shoktiman soe-sho guṛar gaṛi, Mishoror hokkol guṛar gaṛin ar erar saloḳdar sifaireo loge loilo. 8Mabude Mishoror bashsha Feraunor dilre fashan ḳorilla, he Boni Israilor ḳore ḳore ḳedanit ailo. Era zebla himmot ḳori aṭia zaira, ou shomoe he erare dorat ailo. 9He Mishor deshor hoḳol guṛ soar sifai, guṛar gaṛiala sifai shoho asta armi dol loia erare dorar lagi erar ḳandat aillo. Ou shomoe Boni Israil oḳol doriar faro Baal-Safonor samne Fama-Hirutor ḳandat asla.
10Tara ḳandat ateu Boni Israile saia deḳla, tarar ḳore oia Mishori sifai aira; dekiau zanor ḍore Mabudor dorbaro ḳandon lagaila. 11Tara Musare ḳoila, “Mishoro ḳoebor dibar zaga nai dekia, amrare martae ḳori ou morubumit loia aiso ni? Tumi ita kita ḳorlae? Ḳene amrare Mishor taki bar ḳorlae? 12Mishoror bitre amra tumare ḳoisi na ni, amrare ono roite deo, amra Mishorintor gulami ḳori? I morubumit morar saite Mishorintor gulami ḳorau to amrar lagi bala asil.”
13Musae tarare ḳoila, “Tumra ḍoraio na. Hoḳole nirai oia deḳo, Mabude aiz kila basain. Ou zeta Mishorintore oḳon deḳrae, itare ar kunudinu deḳtae nae. 14Tumra oḳon shanti o, deḳo, Mabudeu tumrar fokko oia zuddo ḳorba.”
Allar kudrote Nil doria hukai gelo
15Bade Mabude Musare ḳoila, “Tumi ḳene amar gese ḳandirae? Boni Israilre ḳo na, samnedi aguaita. 16Ar tumar ator laṭire baṛaia doriar ufre usa ḳori doro, doriare dui bag ḳorilao. Teu tamam Boni Israil hukna bae aṭia doria far oiba. 17Kial rakio, ami Mishori oḳolor dil ola fashan banaimu, tara erare dorar niote doriat hamaiba. Erbade Feraun, tar sifai, tar guṛar gaṛin, tar guṛ-soar oḳolor mazdi amar zalal-shan zair oibo. 18Feraunor hal-hokikot dekia baki Mishori oḳoleo buziliba, amiu Mabud.”
19Ermaze Allar ze firista Boni Israilor age oia zaoat asla, ein zaga bodlaia Boni Israilor ḳore gelagi. En loge oia kudroti hou megor kuṭio samne taki horia ḳore aillo. 20Ḳore aia Mishori ar Israili duio dolor mazḳano ubailo. Erlagi ou megor kuṭir andaire Mishori oḳol andarit foṛigela, tara raitor bala Boni Israilor ḳanda loita farla na. Oile Boni Israilor samne raitor balao megor kuṭir forsha roilo.
21Bade Musae doriar ufre tan at baṛaila, ar Mabude hara rait kub zure fubali haoa dia doriar fani horaia dui baṭ ḳorilla, doria hukaia mazedi hukna fot baroilo. 22Boni Israil oḳole hukna faoe doriar mazdi roana dila, doriar fani tarar ḍaine-baue oalor laḳan ubai roilo.
23Ita dekia Mishori oḳole tarare ḳedaia doriar hou hukna fotedi gela. Feraunor hokkol guṛar gaṛi, guṛa, ar guṛ-soar oḳol ḳedai ḳedai doriar hou foto gia hamaila. 24Ar fotabala Mabude hou kudroti aguin ar megor kuṭi taki Mishori sifair bae lannoti nozore saila, teu tara bedisha lagigela. 25Tain erar guṛar gaṛir sakka nosṭo ḳori dila, erlagi tarar kub ḳosṭo oile guṛar gaṛi salanit roilo; ermaze tara eḳe-oinnore ḳoilo, “Oise, ar bad deo, amra Boni Israilor ḳor tone hori zai. Mabude nize tarar fokko oia amrar loge zuddo ḳorra.”
26Ou shomoe Mabude Musare ḳoila, “Tumi doriar ufre hirbar at baṛao. Tumar at baṛaile fani hirbar Mishorintor ufre, tarar guṛar gaṛi ar guṛ-soaror ufre aibbo.” 27Musae doriar ufre at baṛaila, ar bian oar ageu doriar fani hirbar homan oigelo; Mishorinte ḍaine-baue douṛa-douṛi lagaila, oile Mabude tarare doriar fanidi baoai dila. 28Fani hirbar zagat aillo, tarar guṛar gaṛin, sifain, ar guṛ-soar oḳol, mani Boni Israilor ḳore oia ḳedanit aora hokkolta fanie buṛi gelo, eguo zita roila na. 29Oile Boni Israil oḳole hukna fote doriar mazdi gela, tarar ḍaine-baue fani oalor laḳan ubai roilo.
30Ou nomunae Mabude hi din Mishori oḳolor at taki Boni Israilre basaila, tara nizor souḳe deḳla, Mishorintor mora lash doriar soro foṛia roise. 31Mishorintor ufre Mabudor kudroti lila-ḳela dekia, Boni Israileo Mabudre ḍoraigela. Tara Mabudor ufre ar tan gulam Hozrot Musar ufre furafur iman anla.
15Hozrot Musar (a:)-or shukurana gozol
1Allar kudrote Nil doria far oia aia harle, Hozrot Musa ar tamam Boni Israile Mabudor name ou shukurana gozol gaila:
“Ami Mabudor name gozol gaimu,
hoḳolor samne tan kudroti mohima baṛise,
guṛ-soar shudda guṛainre tainu doriar fanit falaisoin.
2Alla-u to amar bol, tainu amar gozol,
amare basanir ḳol-ḳobza tan ato ase.
Ou Alla-u amar Mabud, amar baf-dadar Mabud,
ami tan hamd gaimu, tan lila-ḳela boean ḳormu.
3Mabud oila foeluan sifai, tan namu Mabud.
4Feraunor guṛar gaṛire ar sifaire tain fanit falaila,
tar namḳora subedar oḳol Nil doriat buṛia morla.
5Goin fanie tarare gilillo,
ar bari fattoror laḳan tara doriar tole gelagi.
6O Mabud, tumar ḍain atḳan kudroti lilae bora,
tumar ate nichchoe dushmonre surmar ḳorse.
7Tumar birudde zetae lagsila, kudroti bole tarare goin gato falailae.
Tumar faṭail gozobi aguine, hukna ḳer-nerar laḳan tarare zalaililo.
8Tumar naḳor dome hoḳol fani dola oigelo,
fanir fut oḳol zagat ubai roilo,
doriar goin fani sakka bonigelo.
9Dushmone ḳoisil, ‘Ami itare ḳedaia nimu,
douṛaia nia dormu, tarar hoḳolta ḳaṛia ania baṭimu.
Tarar maldi ami maldar oimu, itadi amar monor ḳaish furaimu.
Amar toluardi maria tarar nam miṭailimu.’
10Oile tumi fu dia batash dilae,
ar doriae tarare gurililo,
tara shishar laḳan goin fanit tolaigelo.
11O Mabud, kun deb-debi tumar homan?
Ḳe tumar laḳan oto fobitro mohan,
ar tumar moto boeonkor kudroti mohima ḳar ase?
12Tumar bol-ala ḍain atḳan baṛailae,
ar duniae tarare gilililo.
13Tumar ḳas maeae zerare basaiso,
tarare to tumiu salairae,
tumar afon kudroti bole tumar fobitro boshot ḳanat nirae.
14Ita hunia hokkol zatie ḳafira,
Filistini bedin oḳolor mon soṭfoṭ ḳorer.
15Idumor shordar oḳol ḍoraia bedisha lagigela,
Muabor neta oḳole tor-toraia ḳafila,
Kenani oḳol ḍoraia horigela.
16Tarar bitre ḍor-ḳof aia hamaise,
tumar ator ṭelae fattoror laḳan nirai oigese.
O Mabud, tumar proza oḳol, tumar ḳorida gulam oḳol,
furafur far na oa forzonto tumi oula raḳso.
17Tumi erare nia gasor serar laḳan,
tumar nizor faṛo ruibae.
O Mabud, hoḳanu tumar boshot ḳana,
tumar afon ator goṛa fobitro ebadot shorif.
18O Mabud, zug zug dori tumiu ḳali bashshai ḳorbae.”
19Feraunor guṛain, tar guṛar gaṛi ar guṛ-soar oḳol zebla doriar maze hamaigelo, Mabude tarar ufre doriar fani firai anla, oile Boni Israil hoḳol to hukna fote doriar mazedi age aṭia geslagi.
20Harunor boin Hozrot Moriomo nobi asla, tain ḍugi ato loia bazaila, ar baki hoḳol beṭinteo tan ḳoredi ḍugi loia nasi-nasi baroi aila. 21Ar Moriomeo manshor samne oula gaila:
“Tumra Mabudor name gozol gao,
hoḳolor samne tan kudroti mohima baṛise,
guṛ-soar shudda guṛainre tainu doriar fanit falaisoin.”
Morubumit Boni Israilor sofor (15:22–18:27)
Hozrot Musae titta fanire miṭa banaila
22Musae Boni Israilre Nil doria taki samnedi loia roana oila, ar Shur namor morubumit gela. Tarar zaoar foto tin din dori kunu fani faila na. 23Bade tara Marua namor eḳ zagat aila, oile hinor fanio ḳaita farla na, hinor fani kub titta. Erlagi ou zagar nam laglo Marua [mani, titta]. 24Ar manshe Musar birudde ḳana-ḳani ḳori ḳoila, “Amra oḳon fani ḳaitam kila?” 25Musae Mabudor gese foriad ḳorla, Mabude tanre egu gas deḳai dila, tain hou gasre nia fanit falaila, ar fani miṭa oigelo.
Mabude hou zagat Boni Israilor forikka loila, ar tarar lagi niom-ḳanun batai dila. 26Tain ḳoila, “Tumra zudi kial ḳoria tumrar Mabud Allar ḳalam huno ar ou laḳan amol ḳoro, ami zeta fosond ḳori ota ḳoro, amar hukum mano, te ami Mabude Mishori oḳolre zeta bemar-azar disi, ita kunu bemar tumrar ufre ditam nae; zano to, ami Mabud tumrar shifa ḳorneala.”
27Heshe tara Elimo gia fousla, hino barogu fanir indara ar shottoirgu kezur gas asil. Tara ou fanir ḳandat tambu gaṛila.
16Boni Israilor lagi behesti ḳani
1Bade tamam Boni Israile Elim taki roana dilaila. Mishor desh taki baronir bador sandor fonro tariḳo tara Sin namor morubumit aia azila. Sin oilo Tur Faṛ ar Elimor mazḳano. 2Ou shomoe tamam Boni Israile Musa ar Harunor birudde ḳana-ḳani lagaila. 3Era duiozonor birudde Boni Israile ḳoila, “Haere hae, itar ḳotae amra ḳene ailam, Mabude ḳene nizor ate amrare Mishor desho marla na? Hi shomoe amra gustor ḍegor ḳandat boitam, feṭ boria gust-ruṭi ḳaitam, oile itae amrare ufashe ar feṭor buḳe marta ḳori ono anchoin.”
4Ikan hunia Mabude Musare ḳoila, “Ami tarare forikka ḳoria deḳmu, tara amar niom-ḳanun manoin ki na. Ami tumrar lagi megor nomunae behesti ḳani zomino saṛimu. Manshe baire aia haftar forteḳ dinor ḳani forti din tulia niba. 5Ḳali haftar soe nombor dino tara zeta tulia anba, ita toiar ḳorar bade oinno dinor ḳani taki ḍabul oizibo.”
6Bade Musa ar Harune hokkol Boni Israilre ḳoila, “Mabudor birudde tumra zebla ḳana-ḳani lagaiso, te aiz hainja balau buzbae, ou Mabudeu tumrare Mishor taki bar ḳori anchoin. 7Bian oileu tumra Mabudor kudroti nur deḳbae, tain to hunchoin, tumra kita ḳana-ḳani ḳorso. Te amra ar kita zen, tumra amrar birudde otota matirae?” 8Musae tarare ḳoila, “Mabude hainja bala tumrare gust diba, ar biane feṭ bora ruṭio diba. Mabudor birudde tumra zeta ḳana-ḳani ḳorso, ita tain hunchoin. Ashole amra duizon kita zen, tumra amrar birudde otota matirae? I mat to amrar birudde nae, tumra Mabudor biruddeu matirae.”
9Erbade Musae Harunre ḳoila, “Tumi hokkol Boni Israilre zanai deo, tumra Mabudor birudde zeta matiso, ita tain hunchoin. Oḳon tumra aia Mabudor samne azir o.” 10Teu Harune tarare ou shongbad zanaira, ou shomoe morubumir bae tarar souḳ foṛteu deḳoin, megor ḳalnir maze Mabudor kudroti nur zair oise.
11Ermaze Mabude Musare ḳoila, 12“Ami Boni Israilor hokkol mat-ḳota hunchi. Oḳon tumi zanai deo, tara forteḳ din hainja bala ḳaiba gust ar biane ḳaiba feṭ bora ruṭi. Teu tara buzba, ami Allau tarar Mabud.”
13Hasau hainja bala kuel fakir fal aia tarar asta kempo zam oigelo, bador din biane kua foṛia kempor sairobae bizigelo. 14Beil oar bade ou kua hukaile deḳa gelo, shagur danar laḳan eḳ zator fatla zinish maṭir ufre foṛi roise. 15Ita dekia Boni Israile eḳe-oinne zikaila, “Oba, ita kita? Ita kita foṛse, amra ḳeu to sinram na.”
Teu Musae ḳoila, “Ita to behesti ḳani, tumra ḳaitae ḳori Mabude dan ḳorsoin. 16Ou ḳanir ḳotau Mabude hukum disoin, forteḳ zone zarzir foribaror lagi ḳani tukaia neo. Goror hoḳolor lagi zon-mate eḳ feṭu ḳori tukaio.” 17Teu tara oula ḳorla, manush onumane ḳeu besh ḳori nila, ḳeu ḳom nila. 18Bade feṭudi mafia deḳla, zein beshi tukaisla, tano beshi oise na, ar zein tuṛa tukaisla, tano ḳom oise na; hoḳoleu zarzir foribaror ḳanir onumane tukaisoin.
19Musae tarare ḳoila, “Tumra ḳail biankur ḳanir lagi ita muṭeu zomai toio na.” 20Ta-o ḳeu ḳeu Musar ḳota na mania bador dinor lagio tuṛa toilo. Erlagi ita fosia kiṛa-fuk zonmia gondo baroilo; ita dekia Musa tarar ufre kub gusa oila. 21Ola forteḳ din fozore tara zarzir ḳanir onumane tukaito, oile roid gorom oileu ita golizito.
22Bade soe nombor dino tarar ḳanir lagi ḍabul ḳani, mani dui feṭu ḳori tukailo, ar gusṭir murobbi oḳole aia Musare zanaila. 23Musae tarare ḳoila, “Ita ṭik ase, Mabudeu oula hukum disoin; ḳail to haftar shesh din, Zummabar; Mabudor faḳ-fobitro din. Te tumrar zeta randar dorḳar ase ita aiz randilao, ar biran ḳorar zorur oile biran ḳoro, baki hoḳolta bador din biankur lagi toi deo.” 24Ou Musar hukum mafik tara bador din forzonto ita goro toilo, itar maze kunu gondo-o baroilo na, kiṛaeo dorlo na.
25Bade Musae tarare ḳoila, “Aiz tumra ita ḳao, ḳaron aiz Mabudor faḳ-fobitro din, Zummabar. Aiz tumra bondor maze i ḳani faitae nae. 26Tumra haftat soe din i ḳani tukaio, oile shat nombor din to Zummabar, i din ita faitae nae.”
27Ta-o kunu kunu zone shat nombor din-o ou ḳani tukaibar lagi bare gelo, gia kunta failo na. 28Teu Mabude Musare ḳoila, “Tumra ar ḳotodin amar hukum ar niom-ḳanun bangitae? 29Huno, tumrar ziranir lagi i Zummabar to Mabudeu tumrare disoin, erlagi tain haftar soe nombor dino tumrare dui dinor ḳani dein; oḳon taki ou shat nombor din, mani Zummabare tumra hoḳole zarzir goro roia ziraio, ḳeu goror bare zaio na.” 30Er bad taki haftar shat nombor dino manshe ziraito.
31Boni Israile i ḳanir nam toilo, manna; ita deḳte dola ḍula bisir laḳan, ar ḳaite mou maḳail fiṭar laḳan moza.
32Bade Musae tarare ḳoila, “Mabude ou hukum disoin, tumra eḳ feṭu foriman manna tulia tumrar bador bongshodor oḳolor lagi zoma ḳori to, teu tarao deḳba, Mishor desh taki tumrare bar ḳori neoar ḳalo morubumir maze tain kita ḳaoaisoin.”
33Musae Harunre ḳoila, “Tumi egu boeamor maze eḳ feṭu foriman manna tulia Mabudor samne to, ita tumrar oarishor for oarish dori zoma roibo.” 34Mabude Musare zela hukum ḳorsla, ou laḳan Harune ou manna boeamo borla. Bade tain fobitro shonduḳor bitore shahadot pattoror samne toila. 35Boni Israile sallish boros dori i manna ḳailo, tara zotodin forzonto manush boshot ḳorar zaga, mani Kenan deshor shimanat aia na fousilo, otodin ou ḳaniu ḳaila. 36Eḳ feṭu oilogi, eḳ furaror dosh baṭor eḳ baṭ.
17Boni Israilor ḳaijja, fattor taki kudroti fani
1Bade Mabudor hukume tamam Boni Israil Sin morubumi taki roana dia, eḳ zaga taki aroḳ zagat gia gia heshe Rofidimo aia tambu gaṛila, oile hino manshor ḳaoar fani asil na. 2Erlagi manshe Musar loge ḳaijja ḳori ḳoila, “Amrare ḳaoar fani deukka.”
Musae tarare ḳoila, “Tumra ḳene amar loge ḳaijja ḳorrae? Ḳene Mabudre forikka ḳorrae?”
3Manshe fanir fiase ḳahil oia Musar birudde gali-galaz ḳori ḳoila, “Tumi amrare martae ḳori Mishor desh taki ancho ni? Amrare, amrar huruttaintore, amrar foshur falre anafanie martae ḳori ono ancho ni?”
4Teu Musae Mabudor gese foriad ḳori ḳoila, “Ami i manshore kita ḳortam? Ar tuṛa deri oileu to tara fattordi iṭaia amare mariliba.”
5Mabude zuaf dila, “Tumi ze laṭidi Nil nodo baṛi marslae, hou laṭi ato lo, ar Boni Israilor ḳoezon murobbire loge loia manshor age age zao. 6Gia harle ami Tur faṛor ḳandat eḳ fattoror ufre azir oimu, tumi ou fattoro baṛi marle ogu taki fani baroibo, teu manshe ḳaita farba.” Hasau Musae Israilor murobbi oḳolor samne oula ḳorla.
7Ou Rofidimo aia manshe ḳaijja ḳori ḳoisla, “Mabud kita amrar loge asoin ni, na hori gesoin?” Oula ḳoia tara Mabudre forikka ḳorsla ḳori, i zagar nam oilo Masa [mani, forikka] ar Mariba [mani, ḳaijja].
Amaleki oḳolor loge Boni Israilor zuddo
8Ou shomoe Boni Israilor loge zuddo ḳorar lagi Amaleki sifai oḳol Rofidimo aila. 9Teu Musae tan ḳadim Hozrot Iusare ḳoila, “Tumi amrar manush taki laṛai ḳorra zon basia nia, Amaleki oḳolor loge zuddo ḳorat zao. Amio ḳail Allai kudroti laṭi ato loia faṛor ufre ubaimu.”
10Iusaeo Musar hukum mafik kam ḳorla. Amaleki oḳolor loge zuddo ḳorla, Musa, Harun, ar Hur, ou tino zon gia faṛor ṭillar ufre uṭla. 11Bade deḳa gelo, Musae zoto shomoe at usa ḳori raḳoin, oto shomoe Boni Israilor dol zitoin, oile Musae at lamaileu Amaleki dol zitoin. 12Aste aste Musar at bar oa dorlo. Ou tara ekkan fattor ania Musare boibar bebosta dila. Ou fattoror ufre Musa boila, Harun ar Hur duiozone Musar dui galat ubaia tan at usa ḳori dorla. Teu shuruz ḍubar ag forzonto tan at usa roilo. 13Erlagi Amaleki sifair loge zuddo ḳoria Iusa zitigela.
14Bade Mabude Musare ḳoila, “Ita iad raḳar lagi tumi ekkan kitabor maze lekia to ar Iusareo zanao. Mono rakio, ami duniar buḳ taki Amaleki oḳolor nam miṭailimu.” 15Musae ekkan kurbani ḳana banaia er nam toila, Mabud namu amar zuddor zanḍa. 16Tain ḳoila, “Mabudor namor zuddor zanḍa amra ato loi, teu Mabudeo oarishor for oarish dori Amaleki oḳolor loge zuddo ḳorba.”
18Hozrot Shuaib nobir loge Musa (a:)-or mulaḳat
1Allae Hozrot Musare ar tan bonda Boni Israilre zoto laḳan rohom ḳorsoin, ita hoḳolta Musar hour Madian deshor imam Shuaibor ḳano gelo. Mabude Boni Israilre Mishor desh taki kila bar ḳori anchoin, eota tain hunla. 2Musae age tan bibi Sofurare hour baṛit faṭai disla, erlagi tan houre Musar bibire ar duio fuare nizor gese raḳla. 3I duio fuar mazor eḳzonor nam asil Zarsum [mani, boitol]. Musae ḳoila, “Ami bin desho boitolor laḳan roiram.” 4Ar dusra zonor nam asil Eliezer [mani, Alla shohae]. Tain ḳoila, “Amar bafor Alla amar shohae oia amare Feraunor toluar taki hefazot ḳorsoin.”
5Musar hour Shuaibe Musar bibi ar tan duio fuare loia Musar gese aila. Ou shomoe Boni Israil ar Musar tambu asil Allar faṛ Turor ḳandat. 6Tan hour ono aia Musare ḳobor dila, “Ami tumar hour Shuaib. Te ami tumar bibi ar duio fuare loia ono aisi.” 7Ḳobor faia Musae tan houror loge deḳa ḳorat baroila. Tain maṭit soizda ḳoria tan hourre salam ḳorla ar maear hunga dila. Bade duiozone bala-bura zikaia hari tambur bitre hamaila. 8Mabude Boni Israilor fokko loia Feraun ar Mishori oḳolor loge zeta zeta ḳorsoin, ita hokkolta tan hourre hunaila. Mishor taki zaoar bala tarar ḳoto ḳosṭo oisil ar Allae kila tarare basaisoin eotao tanre zanaila. 9Ar Mabude Mishori oḳolor at taki Boni Israilre azad ḳoria tarare zoto laḳan asan ḳorsoin, ita hunia tan hour kub kushi oila.
10Tain ḳoila, “Hoḳol tarif Mabudor, zein Feraun ar Mishori oḳolor at taki tumrare azad ḳorsoin. 11Oḳon ami nizeo buziar, hoḳol devtar saite Allau mohan. Ḳaron Mishorinte zeta befar loia tumrar birudde bahaduri ḳorta, itar ḳobza taki tainu tumrare basaisoin.” 12Bade Musar hour Shuaibe Allar name zalail kurbani ar hoḳol zator kurbani zuit ḳori loia aila. Heshe Harun ar Boni Israilor murobbi oḳol aia, Musar houror loge boia Allar samne ḳana-fina ḳaila.
Hozrot Shuaib (a:)-e daman Musare foramish dila
13Bador din Musae manshor bisar-shalish ḳorat boila. Bisaror lagi manush aia bian taki hainja forzonto hara din tan samne ubai roila. 14Musae ola ḳorra dekia tan houre ḳoila, “Tumi manshore loia ita kita ḳorrae? Kitar lagi tumi eḳla ono bisaro boiso, ar bian taki hainja forzonto hoḳol manush tumar gese ubai roise?”
15Musae zuaf dila, “Bisaror befare Allar foesala hunar lagi manush amar gese ain. 16Tara kunu ḳaijja-fosad ḳorle amar ḳasat ain, aile ami duio dolor bisar ḳori, ar Allar hukum-ahkam tarare batai.”
17Teu Musar houre ḳoila, “Tumi zelaḳan ita ḳorrae, ita to bala nae. 18Ila ḳorle tumi ar tumar hoḳol manusho ḳahil oizibae. I ḳam tumar takkot taki beshi, tumi eḳla ita kulaitae fartae nae. 19Te ami tumare ḳoiar, tumi amar foramish huno, ete Allao tumar loge roiba. Tumi manshor bisar-asar foesala ḳorar niote, tarar imam hishabe hoḳol befar Allar samne azir ḳorio. 20Ar manshoreo Allar hukum-ahkam talim dio. Tara kila solta, kita ḳorta na ḳorta, ota tarare buzaio. 21Ar tumi erar maz taki basia oula joiggo manush bar ḳoro, zera Allare ḍorain, hok fote soloin, ar gush ḳaoare gin ḳoroin. Erare tumi manshor bisar-asaror daeitto deo. Era kunu zonre azar zonor ufre, ḳeurore sho zon, ḳeurore fonchash zon, ar ḳeurore dosh zonor ufre bisar-asaror bar deo. 22Erau hamesha manshor bisar-insaf ḳorba. Huru-muru hoḳol bisar tara ḳorba, ḳali boṛo boṛo bisar tumar gese anba. Teu tumar bar kisu ḳombo, tarao tumar loge kisu bar boukka. 23Allar hukum faia tumi zudi oula ḳoro, te tumi kulaitae farbae, ar mansheo arame zarzir zagat zaita farba.”
24Musae tan houror foramish manla, tain zela ḳoila Musae oula ḳorla. 25Musae tamam Boni Israil taki basia ufozukto manush tukaia, tara ḳeurore azar zon, ḳeurore sho zon, ḳeurore fonchash ar ḳeurore dosh zonor ufre neta banaila. 26Era hamesha manshor bisar-asar ḳorta. Ḳali boṛo boṛo goṭona oḳol Musar ḳasat anta, ar huru huru hoḳolta tara miṭaita.
27Heshe Musae tan hourre bidae dile, tain nizor desho toshrif nilagi.
19Mabudor loge tan bondar milonor usilla (19:1–24:18)
Boni Israile Tur faṛo Alla Pakor aoaz hunla
1-2Mishor desh taki Boni Israil oḳol baronir bade, tin nombor sandor foela dinu tara Rofidim oia Sinai morubumit fousila. Ono aia tara morubumir Tur faṛor samne tambu gaṛila.
3Ermaze Hozrot Musa Tur faṛor ufre Allar dorbaro gela. Mabude faṛor ufre taki tanre ḍakia ḳoila, “O Musa, tumi Iakubor aolad oḳolre ḳo, Boni Israilre zanai deo, 4ami Mabude Mishori oḳolor dosha kita goṭaisi, ita to tumrar nizor souḳe deḳso. Sile zela tar baichchare ḍaḳnadi boia ney, amio ou nomunae tumrare amar gese boia anchi. 5Oḳon tumra zudi amar tamam hukum-ahkam mano, ar amar logor oada adae ḳoro, te duniar hokkol zatir maz taki tumrau oibae amar ḳas shompod. Mono rakio, hara duniar hoḳolta-u amar eḳtiaro. 6Tumrare diau ḳaim oibo amar imam oḳolor bashshai, tumrau oibae amar fobitro zati. Te amar ou buliḳanain tumi Boni Israilre zanao.”
7Ou Musae aia Boni Israilor murobbi oḳolre dola ḳoraila. Dola ḳoraia ḳoila, Mabude tanre kita kita hukum disoin. 8Teu hoḳol manshe eḳloge ḳoila, “Mabude zela bataisoin, amra ola hokkolta ḳormu.” Manshe zemone zuaf dila, Musae gia Mabudor dorbaro ola zanaila. 9Ar Mabude Musare ḳoila, “Ami zebla tumar loge batchit ḳormu, ou batchit zate manshe nizor ḳane hunto fare, erlagi ami gono eḳ megor ḳalnir maze roia batchit ḳormu. Teu manshe ita hunba, ar tumar ufre hor-hamesha furafur ekin raḳba.”
Bade Musa gia tararo hoḳol ḳota Mabudre zanaila. 10Ikan hunia Mabude Musare ḳoila, “Tumi aiz ar ḳail duio din manshor ḳasat gia tarare faḳ-saf ḳoro. Tara zarzir ḳafoṛ-sufoṛ doia deuk. 11Tara forshu dinor lagi toiar ouk, ou din ami Mabud Tur faṛor ufre lamia aia tara hoḳolre didar dimu. 12Te tumi faṛor sairobae eḳṭa shimana ṭik koria dilao. Dia tarare hushiar ḳori ḳo, tara zanu i faṛo na uṭe ar faṛor shimanat na soe. Ḳeu zudi i faṛo soe, te tar shaza oilo mout. 13Marar bala tar gotoro at na dia, tare fattor ba tir maria marbae. He manush ouk ba zanuar ouk tare marilibae. Ḳali eḳloge bout shomoe shinga bazanir aoaz hunle, tara ou faṛor ḳandat aita farba.”
14Teu Musae faṛo taki lamia aia manshore faḳ-saf ḳorla, manshe tarar ḳafoṛ-sufoṛ doia dilo. 15Musae tarare ḳoila, “Tumra forshu dinor lagi zuit o, ermaze ḳeu bibir loge milamisha ḳorio na.” 16Hasau hou forshu din aile bianku bala faṛor ufre gono megor ḳalni deḳa gelo, kub beshi megor ḍak-zilkani shuru oilo. Zure zure shingar aoaz huna gelo, teu Boni Israilor kempor bitoror hoḳol manush ḍoraia ḳafa dorla. 17Ou shomoe Musae manshore Allar samne neoar lagi kemp taki bar ḳorla. Tara hoḳol gia faṛor lamat ubaila. 18Ar asta Tur Faṛ dumae bori gelo, Mabud-Moulae agunir laḳan nuror surote faṛor ufre toshrif anla. Iṭ-baṭṭar dumar laḳan duma uṛa shuru oilo ar asta faṛ zuṛi bezuita ḳaf shuru oilo. 19Shingar aoaz aro zure zure bazilo. Ou shomoe Musae Allar loge matila, ar Allae-o nizor aoazdi Musar mator zuaf dila.
20Mabud nize Tur faṛor matat lamia aia Musare ḍakila, teu Musa uṭia faṛor ufre gela. 21Gia harle Mabude tanre ḳoila, “Tumi lamat zao, gia manshore ḳoṛa ḳori ḳoia ao, arnae amare deḳar lagi tara shimana far oia ufre aibba. Aile bout manush mara zaiba. 22Ar ze imam oḳol hamesha amar samne azir oin, ashole tarar ḳamu amar samne azir oa, tarao nize nizore faḳ-saf ḳorba. Arnae ami tarar ufreo gozob ḍalimu.”
23Musae Mabudre zuaf dila, “Tara to emneu Tur faṛo aita nae, afne ageu amrare ḳoṛa hushiari disoin. Amra-o faṛor sairobae dag dia afnar lagi faḳ shimana algaisi.”
24Oile Mabude tanre ḳoila, “Na, tumi lamat zao. Bade tumi ar Harun duiozone milia ufre aio. Kial rakio, kunu imam ba dusra kunu manush zate shimana saṛia amar ḳasat na ain, aile ami tarar ufre lannoti gozob ḍalmu.”
25Ikan hunia Musa lamat gela, gia manshore hoḳolta zanaila.
20Allar siroḳalin ḳas dosh hukum
1Bade Mabude formaila, 2“O Boni Israil oḳol, ami Allau tumrar Mabud. Mishor deshor gulami taki amiu tumrare ḳalas ḳori anchi.
3“Amar bodola tumra dusra kunu devta manio na.
4“Fuza ḳorar niote tumra kunu murti banaio na, asman, zomin ba fanir tole kunutar surote murti banaio na. 5Tumra itar fuza ḳorio na, itar sheba-zoton ḳorio na. Mono rakio, ami Allau tumrar Mabud, amar faona ebadot ami saiu sai. Huno, amare zera mane na, ami tarar gunar shaza dei, tarar tin-sair siṛi forzonto shaza dei. 6Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maea-mohobbot deḳaimu.
7“Beḳama kunu ḳarone tumrar Mabud Allar nam muḳo loio na. Ḳeu zudi ḳamoḳa Mabudor nam loe, te kunumonte-u amar shaza taki rehai faito nae.
8“Iad ḳoria Zummabarre fobitro din manio. 9Haftat soe din tumra ḳam-ḳaz ḳorio, tumrar dorkari ḳam shario. 10Oile shat nombor din oilo Zummabar, tumar Mabud Allar name ziraibar din. I din tumi, tumar fua-fuṛin, tumar gulam-bandin, tumar foshur fal, tumar gaut ba ṭauno roura musafir ba bin-deshi, ḳeu kunu zator ḳam-ḳaz ḳorio na. 11Zano to, Mabude soe dine asman-zomin, doria ar erar mazor hoḳolta foeda ḳorsoin, bade shat nombor din ziraisoin, kunu ḳam ḳorsoin na. Ou dinre Mabude rohomot dia pak din ḳorsoin.
12“Tumrar ma-bafore ijjot ḳorio. Teu tumrar Mabud Allae ze desh diba, hou desho tumrar haeati baṛibo.
13“Kun ḳorio na.
14“Zina ḳorio na.
15“Suri ḳorio na.
16“Ḳeuror birudde misa shakki dio na.
17“Oinno manshor gor-duaror bae lalos ḳorio na, tar bou, gulam-bandi, goru-gada, ba kunu kichchur bae lalos ḳorio na.”
18Boni Israile zebla faṛ taki megor ḍaḳ, zilkani, shingar aoaz, ar duma baronit deḳla, dekia tara duroi takiu ḍoraia ḳafa dorla. 19Tara Musare ḳoila, “Afneu amrar loge matoukka, amra hunmu; oile Allae amrar loge batchit ḳorle to amra morizimu.”
20Musae tarare ḳoila, “Tumra ḍoraio na. Allae tumrare forikkat falaisoin, zate tumrar zano Allar ḍor hamae, ḍoraia tumra guna taki basia ro. Erlagiu tain nize didar disoin.”
21Hoḳol manush duroi ubai roila, ar Musa Allar hou megor ḳalnir andarir maze hamaila.
Allar loge milonor usillar shorto
(1) Kurbani ḳana banani
22Mabude Musare ḳoila, “Tumi Boni Israilre ḳo, tumra nizeu to deḳlae, ami Mabude asman taki tumrar loge batchit ḳorlam. 23Erlagi ebadot ḳorar niote, amar bodola dusra kunuzat devta banaio na. Tumra shuna ba rufadio nizor kunu deb-debi banaio na.
24“Amar lagi ḳali maṭi dia kurbani ḳana banaio. Er ufre tumrar zalail kurbani ar Salamoti Kurbanir goru-sagol ania kurbani dio. Zeta zagainto ami amar nam iad ḳorai dimu, hou zagainto ami nize azir oia tumrare dua dimu. 25Tumra amar lagi fattordi kunu kurbani ḳana bananit lagle, hi fattorguin ḳaṭio na. Er ufre atiar salaile tumra itare nafaḳ banailibae. 26Amar kurbani ḳana oula ḳori banaio, zate er ufre uṭte kunu moi ba siṛi na lage. Ḳaron siṛi bae uṭat gele kiba tumrar lemṭa deḳa zaibo.”
21Allar loge milonor usillar shorto
(2) Ḳorida bandi-gulamor befare
1Mabude Musare aro ḳoila, “Tumi Boni Israilre amar ou niom-ḳanun oḳol zanao.
2“Tumra zudi kunu Ibrani beṭare ḳorid ḳoria gulam banao, te ou gulame soe bosor tumrar gulami ḳorbo, bade shat bosoror bala tar ges taki kunta na nia, tare emneu azad ḳori dibae. 3He zudi eḳla tumrar gese ae te eḳlau zaibo; ar zudi boure loge loia ae, te bou loia zaibo. 4Oile tar munibe zudi tare bia ḳorai taḳe, ar tar kunu hurutta-muruta oin, taile i beṭi ar huruttain munibor gese-u roiba; he ḳali eḳla azad oibo. 5Ar hi gulame zudi saf ḳori ḳoe zen, he tar munib ar tar bou-baichchar maeae, erare saṛia zaito nae, 6te i malike tare loia Allar dorbaro azir oibo. Tare duaror ḳopaṭ ba soukaṭor loge uba ḳoria munibe shik dia tar ḳano fur ḳorbo. Teu he hara zindegi bor munibor gulamit roibo.
7“Kunu manshe zudi bandigirit dibar lagi tar nizor fuṛire besilae, te gulam oḳol zela soe bosor bade munibor baṛi taki emneu azad oizain, ou fuṛi to ila azad oito nae. 8Tair munib zudi tair ufre kushi na oin, te ṭeḳa-foeshar bodola taire azad ḳori dite oibo. Taire dusra kunu zatir manshor gese besibar eḳtiar nai, ḳaron munibe to tan nizor daeitto adae ḳorsoin na. 9Oile munibe zudi tan nizor fuar lagi taire fosond ḳoria nein, te taire afon fuṛir laḳan hoḳol ḳemota dite oibo. 10Munibe zudi ou bandire bia ḳorar bade, dusra kunu ḳoinnare bia ḳore, ta-o i bandir kuraki, ḳafoṛ-sufoṛ ar shorilor faona hok taire deoa lagbo. 11He zudi ou tino hok furafur adae na ḳore, te i fuṛire eḳdom bina foeshae azad ḳori dite oibo.
Allar loge milonor usillar shorto
(3) Mara-marir shaza
12“Mair ḳaia zudi kunu manush morizae, te zegie tare marse, tareo ḳatol ḳorte oibo. 13Oile he nize zudi kun na ḳorar niote mare, aḳta kunu ḳarone goṭizae ba ami Allar morzie ita oe, te ou kuni zon gia ola kunu zagat bagito farbo, ze zagar ḳota ami tumrare ḳoimu. 14Ar ḳeu zudi zania-hunia ichcha ḳori ḳeurore kun ḳoria, bade aia amar kurbani ḳanar geseo ashroe loe, ta-o hon taki doria nia tare ḳatol ḳorte oibo.
15“Ze manshe tar afon ma ba bafor ufre at tule, tare nichoe ḳatol ḳorte oibo.
16“Ḳeu zudi kunu manshore suri ḳoria ania besilae, ba ou manshore tar gese faoa zae, te tare nichoe ḳatol ḳorte oibo.
17“Ze manshe afon ma ba bafore gali-galaz ḳore, tareo nichoe ḳatol ḳorte oibo.
18“Kunu manshe ḳaijjat lagia zudi logor zonre ṭushi ba fattordi mare, i mair ḳaia ou zon na morleo bisnat hutia foṛono taḳe, 19heshe uṭia laṭi bor dia sola-fira ḳorar zorur oe, te zegie tare marse tare ḳatol ḳorio na. Ḳali hou zonor ḳam-ḳazor ḳeti ar tar shullo-ana daoai ḳoros dite oibo.
20“Ḳeu zudi tar ḳorida gulam-bandire laṭi dia mare ar mair ḳaia ogu morizae, te ere shaza dite oibo. 21Oile mair ḳaoar dui-eḳdin bade zudi basia roe, te kunu shaza deoa lagto nae, ḳaron ou gulam to tar nizor samana asil.
22“Maramari ḳorat lagia zudi aḳta ḳeu kunu beṭire mare ar tair feṭor baichcha nosṭo oizae, oile ar kunu ḳeti na oe, te ou beṭir zamair dabi ar bisari-shalishor bibesona mafik ere ḳeti-furon dite oibo. 23Oile zudi tair aro kunu ḳeti oe, taile ere ou laḳan shaza dibae: 24zanor bodola zan, souḳor bodola souḳ, dator bodola dat, ator bodola at, faor bodola fao, 25zalanir bodola zalani, zoḳomor bodola zoḳom, dagor bodola dag dite oibo.
26“Ḳeu zudi tar ḳorida gulam ba bandir kunu sokut marae souḳ nosṭo oizae, te ou souḳor bodola he i gulamre azad ḳori dite oibo. 27Zudi maria er dat falai dey, ta-o ere azad ḳori deoa lagbo.
28“Kunu gorue gutaia zudi kunu beṭa ba beṭire marilae, te gorur malikre kunu shaza deoa lagto nae. Ḳali hi gorure fattordi iṭaia marilite oibo, i gorur gust ḳeu ḳaito farto nae. 29Oile i gorur zudi hamesha oula gutanir ḳaichchot taḳe, ar hi malikre hushiar ḳorar badeo he iṭare aṭḳae na, ermaze i gorue kunu beṭa ba beṭire marilae, te i gorure fattor maria marilite oibo, ar tar malikreo marilite oibo. 30Zudi i malikor gese kunu ḳeti-furon saoa oe, taile he ou zorimana dia nizor zan basaito farbo. 31I gorue zudi kunu huruttare gutaia marilae, taile erlagio ou homan niom oibo. 32Kunu gorue zudi ḳeuror gulam ba bandire gutaia marilae, taile gorur malike hi gulamor malikre tish tola foriman rufa dite oibo ar hi gorureo fattor mari marilite oibo.
33“Ḳeu zudi kunu gator muk kulia toe ba gat kudia igur muḳ guria na toe, ar i gator bitre kunu goru ba gada foṛizae, 34taile gator malike foshur malikre ḳeti-furon dite oibo. Oile i mora foshu faibo gator malike.
35“Ḳeuror gorue zudi aroḳzonor gorure gutaia marilae, te hou zita gorure besia, er dam ar mora gorur damo era duiozone homan-homan ḳori baṭia niba. 36Oile ag taki zudi zanahuna taḳe zen, i gorue ola gutae, ar tar malike tare na aṭḳae, te gorur bodola goru dite oibo, bodola deora zone ou mora goruṭa faibo.
22Allar loge milonor usillar shorto
(4) Ḳeti-furonor niom
1“Ḳeu kunu manshor goru ba meṛa-sagol suri ḳoria ania zudi besilae ba zobo ḳorilae, te eḳ gorur bodola fasgu, eḳ meṛa ba sagolor bodola sairgu firot dite oibo. 2-4Sure tar surir malor ḳeti-furon dite oibo, oile tar zudi ḳeti-furon dibar kunu takkot na taḳe, te tare besia er ḳeti-furon adae ḳorte oibo. Suri ḳora goru-gada ba meṛa-sagol zudi suror gese zita faoa zae, taile he ita egur bodola dugu firot dite oibo.
“Kunu sure zudi surit gia goro hamaibar bala dora ḳailae ar zoḳom oia morizae, taile tare marar lagi marra zon dayi oito nae. Oile shuruz uṭar bade zudi dinor bala ila oe, te i kunor lagi he dayi oibo.
5“Ḳeu zudi tar goru-sagol nizor bagano ba ḳetor maze raḳat gia saṛi dey, ar itae gia manshor ḳetor foshol ḳailae, te tar nizor ḳetor hoḳol taki bala ongsho bodola dia ḳeti-furon dite oibo.
6“Kunu zaga taki aguin lagia zudi zuf-zongol zole, ar bade ou aguin gia ḳeuror ḳetor maze banda muiṭ, ṭeki ba asta ḳet zolizae, te aguin zegie zalaisil, he itar ḳeti-furon dibo.
7“Ḳeu zudi aroḳzonor gese mal-samana ba ṭeḳa-foesha amanot toe, ar amanotdaror gor taki ita suri oizae, te ou sur dora foṛle, sure er ḍabul firot dibo. 8Oile sur dora na foṛle, hi goror malike nizeu ita lukaise ni, oḳan zanar lagi tare Allar dorbaro azir ḳorbae.
9“Aroḳzonor doḳolo ase, oula kunu goru-gada, meṛa-sagol, finnor ḳafoṛ ba zekunu arail samana dekia ḳeu zudi mono ḳore iṭa tar mal, taile iṭar salishir lagi tara duiozon gia Allar dorbaro azir oibo. Allae zare dushi shaibosto ḳorba, he tar birudi zonre er ḍabul firot dibo.
10“Ḳeu zudi tar goru-gada, sagol-meṛa ba oinno kunu foshure kunu girostor gese raḳat dey, ar ogu morizae, zoḳom oizae ba araizae, oile er kunu shakki na mile, 11te ou giroste nizeu zen ita ḳorse na, iṭa he Mabudor samne gia ḳosom ḳoria miṭmaṭ ḳorbo. I foshur malikeo ikan mante oibo, tain kunu ḳeti-furon faita nae. 12Oile i girostor ges taki zudi iṭa suri oizae, te malike ḳeti-furon faibo. 13Zudi kunu zongli zanuare dori igure marilae, taile er formanor lagi ogur faṛa-siṛa ṭukrain ania deḳani lagbo. Teu er kunu ḳeti-furon lagto nae.
14“Ḳeuror ges taki ḳuzia ana kunu foshu zudi malikor aforḳe zoḳom oe ba morizae, te zein ḳuzia anchoin, ein er ḳeti-furon diba. 15Oile malikor samneu zudi oula oe, te ḳeti-furon lagto nae. I foshu zudi ṭeḳa dia baṛa ḳori ana oe, te ou baṛar ṭeḳau oibo er ḳeti-furon.
Allar loge milonor usillar shorto
(5) Shomazor befare
16“Biar aḳt oise na oula kunu shoti fuṛire ḳeu zudi misa matia ania tair loge zina ḳorilae, taile hou beṭae fuṛir bafore zorimana dia ou fuṛire bia ḳorte oibo. 17Oile fuṛir bafe zudi tar fuṛire i fuar gese bia dite kunu monteu razi na oe, ta-o i zorimana dite oibo.
18“Kunu zadugir beṭire tumi zita rakio na.
19“Kunu foshur loge ḳeu zina ḳorle, tare nichoe ḳatol ḳorte oibo.
20“Ḳali Mabud saṛa dusra kuntar name zudi ḳeu kunu boli-foshad dey, te tareo shesh ḳorilte oibo.
21“Kunu bin-deshi manshor loge bad bebohar ḳorio na, tare zulum ḳorio na. Mono rakio, tumrao eḳ shomoe Mishor desho musafir aslae.
22“Kunu ṛaṛi beṭire ba kunu etim huruttare duḳ dio na. 23Tarare duḳ dile tara zudi ḳande, te i ḳandon nichoe ami ḳobul ḳormu. 24Ete amar gusa oibo aguin borabor. Tumra zuddot foṛia morbae, tumrar bouo ṛaṛi oibo, tumrar huruttaino oula etim oiba.
25“Tumra zudi amar kunu obabi bondare ḳoroz deo, taile shudkuror laḳan tar ges taki shud nio na. 26Ḳeuror gotoror saddor bondok raḳle, shuruz ḍubar ageu tar saddor firot dilaio. 27Ḳaron uṛibar lagi oṭau tar eḳmatro shombol. Ikan nilegi he kita uṛia hutibo? Huno, he zudi amar gese ḳande, te ami to rohmanur rohim, ami tar ḳandon hunmuu.
28“Tumi Allar birudde matio na, tumar kunu bisarok-shalishreo boddua dio na.
29“Tumrar ḳetor foshol ba anguror shorbotor ze baṭ amare dibar ḳota, amar i baṭ dite deri ḳorio na. Tumra hoḳolor boṛo fuain amare dilaibae. 30Tumrar goru-basur ar sagol-meṛar lagio ou eḳ shoman hukum. Itar hoḳol boṛo meda baichchain shatdin forzonto tarar maʼr gese roiba, aṭ dinor din amare dilaibae.
31“Tumrau oibae amar faḳ-fobitro bonda. Zongli zanuare maria falaise, ila kunu zandaror gust tumra ḳaio na; ita kukurre ḳaoaio.
23Allar loge milonor usillar shorto
(6) Hok bisar ḳora
1“Tumra misa kunu bodnam bar ḳorio na. Fokkofati ḳori misa shakki dia kunu ḳobis manshore shaijjo ḳorio na. 2Shomazor doshzone oinnae ḳorer dekia tumio oula ḳorio na. Kunu mamla-mokoddomar shakki deoat gia, shoktiala dolor fokko loia oinnae ḳam ḳorio na. 3Ar kunu goribor bisaro gia, he gorib gotikeu tar fokko loio na.
4“Tumar dushmonor kunu goru-gadare be-fote zaoat deḳle, iṭa firaia ania tar gese dio. 5Tumare ingshae ila kunu manshor gadare baror tole foṛigese deḳle, tare ila falaia zaio na. Tare tulat tumi oboshshoi shaijjo ḳorbae.
6“Kunu goribor mamla-mokoddomat oinnae salishi ḳorio na. 7Hazail misa mamla taki horia roio. Kunu be-ḳosur ba ni-oforadi manshore moutor shaza dio na. Zegie ila oinnae ḳorbo, tare ami saṛtam nae. 8Gush ḳaio na, ḳaron gushe souḳala manshoreo anda ḳorilae. Gushe bala manshor mator mazeo fes lagai dey.
9“Kunu bin-deshi manshor ufre zulum ḳorio na. Musafiror hal-hokikot to tumra zano, ḳaron tumrao Mishor desho musafir aslae.
Allar loge milonor usillar shorto
(7) Zummabar ar aram ḳorar niom
10“Tumra eḳ lagare soe boros zomino ḳet ḳorio ar foshol ḳaṭio, 11bade shat nombor boroso zomino kunu ḳet na ḳoria fotit rakio, zominre aram dio. Ete zomino emneu zeta folibo, ota tumrar gorib oḳole ḳaia basiba. Tara neoar bade zeta foṛi roibo, ita zongli foshu-fakinte ḳaiba. Tumrar anguror bagan ba zoetun baganor lagio ou hukum manio.
12“Tumra haftat soe din ḳam ḳorio, oile shat nombor din to Zummabar, idin kunta ḳorio na. Teu tumrar goru-gadae ziraiba, ar tumrar baṛit zonmise i gulam ar musafir oḳolor zaneo aram faibo.
13“Ami tumrare zeta hukum dilam, ita kub hushiar oia amol ḳorio. Kunu devtar nam muḳo loio na, itar nam zanu tumrar muḳo na huna zae.
Allar loge milonor usillar shorto
(8) Idor befare
14“Tumra forteḳ boros tinbar amar name id adae ḳorio. 15Foela, Ḳamir saṛa Ruṭir Id adae ḳorio. Ami zela hukum ḳorsi, ekkere ou laḳan Abib sandor shatdin ḳamir saṛa ruṭi ḳaio, ḳaron ou sando tumra Mishor taki baroia aislae. Idor shomoe lilla-sodga saṛa tumrar ḳeu zanu ḳali ate amar gese na ae. 16Dusra, tumra Foshol Daoar Id manio. Ketor maze tumra zeta ruiso, ita daoar bade foela foshol diau id ḳorio. Tisra id, bosoror hesh sando baganor faḳna fol baṛit anar bade Ḍera-goror Id ḳorio. 17Ou tino idor shomoe, bosoro tinbar tumrar hoḳol beṭain aia hoj ḳorar niote ami Alla malikor samne azir oio.
18“Tumra zebla amar name foshu kurbani deo, ou shomoe ḳamirala kunuzat ruṭi itar loge furaia lilla dio na. Idor shomoe amar name zeta foshu kurbani dibae, itar sorbiala ṭukrain bian forzonto rakio na. 19Tumrar ḳetor hoḳol taki bala foshol, tumrar Mabud Allar goro anio.
“Ar huno, kunu sagolor baichchar gust tar maʼr dud dia randio na.
Allar hukum ar oada
20“Ami tumrar lagi ze zaga zuit ḳori raḳsi, hono tumrare hefazote fousanir lagi, ami tumrar age age eḳzon firista faṭaimu. 21Tumra en ḳota mon dia hunio ar manio, en loge to amio asi. Hushiar roio, en birudde zaio na. Arnae ein tumrar oforad maf ḳorta nae. 22Oile tumra zudi en hukum mano, ar ami zela ḳoisi oula solo, taile tumrar dushmonor loge ami dushmoni ḳormu, zera tumrar birudde lagbo, ami tarar birudde lagmu. 23Amuri, Hiṭṭi, Farizi, Kenani, Hibbi ar Zibuzi oḳolor desho amar firistae tumrare nia haraiba. Ami tara hoḳolṭire binash ḳorilimu. 24Tumra tarar devtare fuza ḳorio na, kezmoto ḳorio na, ar hinor manshe zeta ḳoroin tumra ita ḳorio na. Tumra tarar deb-debir murtin ar tarar fuzar monḍop oḳol bangia surmar ḳorilio. 25Tumra ḳali tumrar Mabud Alla, mani amar ebadot ḳorio. Teu tumrar rizeḳor maze rohomot dimu, ar tumrar hokkol bemar-azar dur ḳormu. 26Tumrar deshor kunu beṭir feṭor hurutta nosṭo oito nae, ḳeu aṭkura roito nae. Ami tumrare furafur haeati forzonto basaia raḳmu. 27Tumra zoto zatir ḳasat zaibae, tarar dilor maze ag taki amar ḍor-ḳof foeda ḳormu, tarare bedisha banailimu. Tumrar hokkol dushmon ḳoredi bagiba. 28Hibbi, Kenani ar Hiṭṭi oḳolre tumrar shamna taki ḳedaibar lagi, ami tumrar age ḳori bingulor fal faṭaimu. 29Oile ami tara hokkolre eḳoi bosoror bitre ḳedaitam nae, arnae asta desh fotit roia zongli zanuare boriziba, bade itae tumrare sataiba. 30Ami aste aste tarare ḳedaimu, ar tumrar manush baṛia asta desh abad ḳorbae. 31Ami Nil doria taki Filistini deshor shagor forzonto, ar douknor morubumi taki Furat gang forzonto tumrar deshor shimana gaṛmu. I desho zera boshot ḳorer tarare tumrar ato shofimu, ar tumra tarare i desh taki ḳedai dibae. 32Tarar loge ba tarar devta oḳolor loge tumra kunu chukti ḳorio na. 33Tumrar deshor bitre tarare roibar dio na. Arnae tara tumrare amar ges taki horaia gunar fote ṭania nibogi. Tumra zudi tarar deb-debir fuza ḳoro, taile nichchit tumrao tarar fando hamaibae.”
24Allar loge milonor usilla faḳa-fukto
1Mabude Musare ḳoila, “Tumi ar Harun, Harunor fuain Nadab ar Abihu, ar Boni Israilor shottoir zon murobbi neta amar gese uṭia ao. Aibar bala tumra duroi taki amare soizda ḳorio. 2Oile ḳali tumi eḳla amar ḳasat ufre aibae, ar keu nae. Erar loge ar kunu Boni Israil zanu na uṭe.”
3Musae manshor gese aia Mabudor hokkol ḳalam ar ain-ḳanun hunaila, ita hunia hoḳol manshe eḳloge ḳoila, “Mabude zotota bataisoin ita hokkolta amra manmu.” 4Mabudor batail hoḳol ḳalam Musae lekia toila. Bador din fozore uṭia faṛor lamat ekkan kurbani ḳana banaila, ar Boni Israilor baro gusṭire iad raḳar lagi barogu kuṭa banaila. 5Bade tain Boni Israilor zuan oḳolre faṭaila ar tara Mabudor name bout zalail kurbani dila, ar bout bisal zobo ḳoria Salamoti Kurbanio dila. 6Musae kurbanir lour ordeḳ nia ḳoeṭa baṭit toila, ar baki ordeḳ nia kurbani ḳanar ufre siṭai dila. 7Bade tain Allar loge milonor usillar niom-ḳanun leḳa kitabḳan tilaot ḳori manshore hunaila. Ita hunia manshe zuaf dila, “Amra Mabudor hoḳol hukum hunmu, tain zotota ḳoisoin hoḳolta manmu.” 8Oḳan hunia Musae lou loia manshor ufre siṭaia ḳoila, “I lou oilo Allai milonor hou usillar lou, ze usilla Mabude tan hoḳol shorto mafik tumrar loge boail ḳorsoin.”
9Teu Musa, Harun, Nadab, Abihu ar Boni Israilor shottoir zon murobbi neta faṛor ufre uṭla. 10Tara nizor souḳe Boni Israilor Alla Pakor didar deḳla. Tara deḳla, Allar fao mubaroḳor tole ase, soḳsoḳa lil moni fattoror toiari saṭor laḳan, asmanor nomunae saf. 11Boni Israilor murobbi oḳole Allare deḳleo tain erare marar lagi at tulla na. Tara tan didar faila ar ḳaoa-daoa ḳorla.
Hozrot Musa eḳla Allar dorbaro roila
12Bade Mabude Musare ḳoila, “Tumi ou faṛor ufre amar ḳandat ao, aia ḳoe din ro. Manshore talim dibar lagi amar ze hukum-ahkam fattoror ufre leksi, ota ami tumare dimu.” 13Teu Musae tan ḳadim Iusare loge loia faṛo uṭla, ar Musa Allar faṛo gela. 14Tain murobbi oḳolre ḳoia gela, “Amra firot aibar ag forzonto afnara amrar lagi ono bar saiba. Harun ar Hur afnarar ḳasat asoin, kunu ḳaijja-fosad lagle erar gese zaiba.” 15Musa faṛo uṭteu asta faṛ megor kuṭie guri gelo, 16ar Tur faṛor ufre Mabudor nuror tozolli zair oilo. Soe din asta faṛ megor kuṭie gura roilo. Shat nombor din ou megor kuṭi taki Mabude Musare ḍakila. 17Boni Israile Mabudor nuror tozolli deḳla, tara deḳla faṛor ufre agunir laḳan zoler. 18Faṛ baia uṭi-uṭi Musa hou megor bitre hamai gela. Tain sallish din, sallish rait hou faṛo roila.
25Allar fobitro gor bananir hukum (25:1–31:18)
Goror mal-samana zuganir hukum
1Mabude Musare ḳoila, 2“Tumi Boni Israilre ḳo, tara amar gese dan-ḳoerat loia azir ouk. Tarar nizor kushie zeta dan ḳorba, ota tumi shomzia rakio. 3Tarar ges taki ou laḳan mal shomzio;
shuna, rufa, fitol;
4Lil, baingoni, lal rongor suta;
dami lilen ḳafoṛ ar sagolor ruma;
5Lal rong lagail meṛar samṛa, fur samṛa;
babla laḳṛi;
6Lem zalanir lagi zoetunor tel;
ḳelafoti boḳshibar telor moshla ar agor-kushboe bananir moshla;
7Imamor lebasor efron ar buḳor uforor tolit laganir akik moni ar baki hoḳol zator dami fattor.
8“Amar roar lagi tumi Boni Israil oḳolredi faḳ-fobitro ekkan zaga toiar ḳoraibae. Teu ami tarar loge boshot ḳormu. 9Amar roar gor ar mal-samanar befare ami tumare zela nomuna deḳaimu, ekkere ou laḳan ḳori hoḳolta tiar ḳoraio.
Shahadot shonduk bananir niom
10“Tara babla laḳṛi dia egu shonduk banaiba. Iṭa lambae aṛai at, deṛ at fash ar deṛ at usa. 11Er bare-bitre ḳaṭi shunadi lefia dio, ar sairo kinarao shunar noksha lagaio. 12Hunaror aguindi fuṛia sairṭa shunar ḳoṛa er sairo kunat lagaio, o galat duiṭa ar ho galat duiṭa lagaio. 13Babla laḳṛidi dugu benda banaia shunadi lefia dite oibo. 14Shondukre boia near lagi duio galar ḳoṛar mazedi, ou duio benda harani lagbo. 15Benda duioṭa shonduḳor ḳoṛar bitre harail roibo, iguin kulio na. 16Ami amar hukum-ahkam leḳa ze fobitro shahadot fattor tumare dimu, tumi iṭa ou shonduḳor bitre toio.
17“Ḳaṭi shunadi shonduḳor ekkan sani banaio, oḳanor ufre gunar kofora adae ḳora oibo. I sani lambae aṛai at ar fashe deṛ at oibo. 18-19Tumi hou sanir kinarao shuna fiṭaia dugu karubi banaio. Ou karubi deḳte Duldul guṛar laḳan ḍaḳna-ala. Banaia shonduḳor dui galat lagaio, o galat eḳṭa, ar ho galat eḳṭa. Duio karubi sanir loge ou laḳan ḳori shunadi banani lagbo, zeta astaṭa ḳali eḳ siz oe. 20Er ḍaḳna duioḳan ufredi melail roibo, ar er saear tole taḳbo shonduḳor sani. Duio karubi mukamuki uba taḳbo, ar tarar souḳ roibo sanir bae. 21I sanire shonduḳor ufre lagaio, ar amar hukum-ahkam leḳa ze shahadot fattor tumare dimu, ou fattor tumi shonduḳor bitre toio. 22I shahadot shonduḳor sanir ufre duio karubir mazḳano, ami tumare didar dimu. Ou didaror shomoe Boni Israilor lagi amar hoḳol ain-ḳanun zanaimu.
Fobitro ruṭi toibar ṭebul banaio
23“Babla laḳṛi dia dui at lamba, eḳ at fash ar deṛ at usa ḳori ekkan ṭebul banaio. 24Oḳanre ḳaṭi shunadi lefia sairo kinarao noksha lagaio. 25Ṭebulor sairo kinarao sair angul usa ḳori eḳ haz dibae, hazor maze shunadi noksha ḳorbae. 26Ṭebulor sairo kunat sairo faear ufre shunar sairṭa ḳoṛa lagaibae. 27I sairo ḳoṛain ṭebulor kunar hou usa hazor tole lagaio, zate ṭebul boia neoar bala ḳoṛar bitre benda harail zae. 28Benda duioṭa babla laḳṛidi banaia shunadi lefibae, ou bendadi ṭebul boia nibae. 29Ṭebulor uforor tal-bashon, Allar name Shorbot-Fanir Kurbanir zog ar mog, hoḳolta ḳaṭi shunadi banani lagbo. 30Ou ṭebulor ufre amar samne hamesha fobitro ruṭi toibae, i ruṭi zanu shob shomoe toa oe.”
Fobitro seragdani bananir niom
31Mabude Musare ḳoila, “Tumi ḳaṭi shunadi ekkan seragdani banaibae, seragdanir tola ar uforor ḍanḍi ḳaṭi shuna fiṭaia goṛaibae. Er ḍanḍi, fulor laḳan fiala, kuṛi ar fafṛi oḳol seragdanir loge ekkano lagail roibo. 32Seragdanir ḍanḍir dui galat tinṭa ḳori muṭ soeṭa ḍal taḳbo. 33Forteḳ ḍalor maze zobafulor laḳan tingu ḳori fiala taḳbo. Seragdanir soeo ḍalo eḳlaḳan ḳam ḳora oibo. 34Seragdanir mul ḍanḍir mazeo zobafulor laḳan sairṭa fiala taḳbo. 35Ou mul ḍanḍi taki baroil soeṭa ḍalor maze, foela duio ḍalor zuṛat egu kuṛi, dusra duio ḍalor zuṛat arok kuṛi, ar heshor duio ḍalor zuṛato kuṛi dio. 36Kuṛi ar ḍal hoḳolta seragdani taki baroibo, hoḳolta milia ek chiz oibo. Astaṭau ḳaṭi shuna fiṭaia banani lagbo. 37Erbade shatṭa lem banaia ou seragdanir ufre ou laḳan ḳori lagani lagbo, zate lem zalanir bade seragdanir samna for oe. 38Lemor fita saf ḳorar simṭa ar zalail fitar sali toar lagi ḳoegu baṭi, ḳaṭi shunadi banani lagbo. 39Seragdanir hoḳolta bananir lagi eḳ mon ḳaṭi shuna lagbo.
40“Huno, ou faṛor ufre tumare zela noksha deḳail oilo, ekkere ou laḳan ḳori hoḳolta banaio.”
26Allar gor bananir terfal
1Mabude Musare ḳoila, “Tumi dosh ṭukra fesail sutardami lilen ḳafoṛdi amar goror bitoror forda banaio. Ar lil, baingoni, lal sutadi bala ustadredi ermaze karubi oḳolor sobi bain ḳoraio. 2Hoḳol ṭukrain eḳ mafor oibo, lambae aṭaish at ar fashe sair at. 3I ṭukraintor fasḳan fasḳan ḳori ekkano zuṛa dia, duḳan boṛo terfal banaite oibo. 4Boṛo terfalor foela ṭukrar fashor ek kinarao lil sutadi hukor fur banaite oibo. Dusra ṭukrato oula ḳorte oibo. 5Foela terfalor kinarao fonchashgu hukor fur ar dusra terfalo oula fonchashgu fur dite oibo. Duio boṛo terfalor hukor fur egu aregur ulṭamuḳa taḳbo. 6Bade shunadi fonchashgu huk banaia hou furor mazedi haraia, boṛo duio terfalre aṭḳai dio. Teu i duio ṭukradi ekkan gor tiar oibo.
7“Amar goror ufor gurar lagi sagolor ruma dia terfalor laḳan egaroḳan ṭukra banani lagbo. 8Hoḳol ṭukrain eḳ mafor oibo, tish at lamba ar sair at fash. 9On taki fas ṭukra eḳloge zuṛa dia boṛo eḳ terfal banaite oibo. Ar baki soe ṭukra zuṛa dia, boṛo aroḳ terfal banaia harle, ou dusra terfalor ze ṭukra baṛoti roibo, oḳanre tambur samnor bae dui bainj ḳori dite oibo. 10Foela boṛo terfalor fashor ek kinarao fonchashgu hukor fur banaite oibo, ar dusra terfalo-o oula oibo. 11Bade fitol dia fonchashgu huk banaia hou hukor furor maze haraia, ou boṛo duio terfal ekkano zuṛa dite oibo. Teu i duio terfal milia ekkan sani oibo. 12Sagolor rumar boṛo terfalor ze ada ṭukra baṛoti oibo, ikan ḳoredi loṭḳail roibo. 13I terfalḳan tolor ḳafoṛ taki eḳ at boṛo oae ikan duio galabae loṭḳail roia hara gorre gurilibo. 14Er ufor gurar lagi lal rong ḳora meṛar samṛadi aroḳan terfal banaia guri dite oibo. Bade er ufre fu’r samṛadi sani toiar ḳori guri dite oibo.”
Allar goror freim bananir laḳṛi-toḳta
15Mabude Musare ḳoila, “Amar goror lagi babla laḳṛidi ḳoeḳan freim banani lagbo. 16Forteḳ freim banaibae dosh at lamba ar deṛ at faṛ. 17Ou freimo dugu ḳori faea taḳbo. Hoḳol freim eḳlaḳan banaite oibo. 18Dokkin galar lagi bishḳan freim banani lagbo. 19I freimor faear tole deoar lagi sallishgu rufar bura banani lagbo, forteḳ freimor dui faear lagi dugu bura lagbo. 20Amar goror uttor galar lagiao bishḳan freim lagbo, 21ar forteḳ freimor faear lagi dugu ḳori sallishgu rufar bura banani lagbo. 22Foismor galar lagi, mani ḳor galar lagi soeḳan freim, 23ar ḳoror duio kunar lagi aro duḳan freim lagbo. 24I dui freimre dui kunar duio freimor loge tole-ufre ekkano zuṛa dite oibo. Fortek kunar dui freim daror freimor loge batti maria eḳloge zuṛa dite oibo. Duio kuna eḳlaḳan oibo. 25Teu ḳoredi aṭḳan freim oibo, ar forteḳ freimor tole deoar lagi dugu ḳori shulogu rufar bura lagbo.
26“Tumi freimre zuṛa dibar lagi babla laḳṛidi ḳoegu lamba batti banaio. 27Er maze fasgu batti goror eḳ galar lagi, ar baki fasgu aroḳ galar lagi, ar fasgu lagbo ḳor gala, mani fosim galar freimor lagi. 28Freimor mazḳano lagail ou battidi hoḳol freimor eḳ mata taki aroḳ mata forzonto aṭḳaibae. 29Freimḳanain shunadi lefte oibo, ar batti haranir lagi shunar ḳoṛa banaia freimo lagaite oibo. I batti oḳolo shunadi lefte oibo. 30Amar goror ze noksha tumare ou Tur faṛor ufre deḳailam, tumi ekkere ou laḳan ḳori iṭa toiar ḳoraio.”
Allar goror lagi forda
31Mabude Musare ḳoila, “Tumi lil, lal, baingoni suta ar fesail dami lilen ḳafoṛdi ekkan forda banaio. Bala kunu ustadredi er ufre karubi oḳolor sobi bain ḳoraio. 32I fordaḳan babla laḳṛidi sairṭa kuṭir loge lagaia shunar ḳoṛadi loṭḳai dibae, kuṭir matat shunar ḳoṛa lagaibae. Ar kuṭiguin shunadi lefaibae, kuṭir tolat rufar bura lagaibae. 33Fordar uforor lilen ḳafoṛo lagail hukor loge fordaḳan loṭḳail roibo. I fordar ḳore shahadot shonduk toibae. Fordadi amar goror herem shorif, mani ḳas faḳ zaga ar faḳ zagar mazḳano beṛa dio. 34Ou herem shorifor bitre shahadot shonduḳor ufre er sani lagaio. 35I fordar bare faḳ zagar uttor galat fobitro ruṭi toibar ṭebulḳan toio, ar er ulṭamuka dokkin galat toio seragdani.
36“Amar goror duaror lagi ekkan forda banaio, ikan dami lilen ḳafoṛdi banaia hari, lil, baingoni, lal rongor sutadi noksha ḳorio. 37I fordar lagi shunar ḳoṛa ar babla laḳṛir fasṭa kuṭi banaio. Kuṭiguin shunadi lefaio, kuṭir tolat fitolor fasgu bura lagaio.”
27Zalail kurbani ḳana banaio
1Mabude Musare ḳoila, “Tumi babla laḳṛidi fas at lamba, fas at fash ar tin at ubi dia sairkuni ḳori ekkan kurbani ḳana toiar ḳoraio. 2Er sairo kunar ufre laḳṛidi sairṭa hing dio. Ou hing kunar laḳṛi kudia banani lagbo, i astaḳan eḳ siz oibo. Bade fura kurbani ḳana fitoldi lefaio. 3Kurbani ḳanar sali tular boṛo samos ar gamla, lou toar baṭi, gust tular simṭa, angra toar fatil, hoḳolta fitoldi banaio. 4Fitoldi ekkan zali banaibae. Er sair kunat sairṭa fitolor ḳoṛa lagaio. 5Kurbani ḳanar tola taki uforor mazamazi zagar taṛiar tole ou zali boaio. 6Kurbani ḳana boia nibar lagi babla laḳṛidi dugu benda banaio, banaia duiogu fitoldi lefio. 7I bendain ḳoṛar bitredi harani lagbo. Teu kurbani ḳana boia neoar bala duio bendain kurbani ḳanar dui galabae taḳbo. 8Kurbani ḳana toḳtadi banaia er bitre pak rakio. Ami ou faṛor ufre tumare zela noksha deḳailam, ekkere olaḳan ḳori banani loaio.
Allar goror uṭanor nomuna
9“Amar goror sairobae uṭan taḳbo. Er dokkin galabae eḳ-sho at rakio, i muka dibae dami lilen ḳafoṛor forda. 10I forda ṭananir lagi bishgu kuṭi dibae. Kuṭir tolat dibae eḳṭa ḳori fitolor bura, forda ṭananir lagi rufar ḳoṛa ar bandibar tar lagaibae. 11Uttor galabae eḳ-sho at uṭan raḳbae. Hono-o forda dio, bishgu kuṭi, bishgu fitolor bura, kuṭir loge lagaio rufar ḳoṛa ar tar. 12Foisme fonchash at uṭan rakio, hono-o ḳoeḳan forda, doshgu kuṭi, fortek kuṭir tolat eḳṭa ḳori bura dio. 13Fubedio fonchash at uṭan rakio; 14Geiṭor eḳ galat fonro at lamba forda, tinṭa kuṭi ar tinṭa bura lagaibae, 15ola dusra galato fonro at forda, tinṭa kuṭi ar tinṭa bura dio. 16Uṭanor geiṭor lagi sairṭa kuṭi, sairṭa bura ar bish at lamba ekkan forda. Fordaḳan dami lilen ḳafoṛdi banaia lil, baingoni, lal sutadi noksha ḳoraio. 17Uṭanor sairo galar hokkol kuṭire bandibar tar ar ḳoṛa oibo rufar, er tole fitolor bura taḳbo. 18Uṭankan lambae eḳ-sho at ar fashe fonchash at oibo. Er sairobae fas at ubi forda dio, forda oibo dami lilen ḳafoṛor, ar kuṭintor tole dio fitolor bura. 19Amar goror ḳamor hoḳol siz fitoldi banaibae, mul tambu ar uṭanor beṛar ṭanar rosir tolor fereg oḳol fitolor oibo.
20“Tumi Boni Israil oḳolre hukum dio, tara zoetun sesia tel banaia tumar gese anto, zate lem hamesha zalail roe. 21Milon-tambur shahadot shonduḳor samne ze fordaḳan taḳbo, ou fordar bare Harun ar tar fuainte hainja taki fozor forzonto, Mabudor samne lemguin deḳa-huna ḳorba. Amar ou hukum zanu Boni Israile oarishor for oarish dori hor-hamesha amol ḳore.”
28Imam oḳolor lebas
1Mabude Musare ḳoila, “O Musa, Boni Israilor maze imamoti ḳorar lagi tumar bai Harun, tar fua Nadab, Abihu, Ali-Azor ar Isamarre tumar samne anao.
2“Tumar bai Harunor ijjot ar shundor baṛanir lagi fobitro lebas toiar ḳorao. 3Ami faḳ ruhu dia zeta ustad oḳolre ḳarigori ḳamor aḳol-hekmot disi, tumi hou ḳarigor oḳolre hukum deo, tara Harunor lagi oula fobitro lebas banaukka, ze lebas ḳali amar imamotir ḳamo lage. 4I lebasor maze buḳor uforor toli, efron, alḳella, chegor ḳafoṛor fainjabi, faugṛi ar ḳomoro bandar ḳafoṛ banaio. Tumar bai Harun ar tar fuainte zate amar imamoti ḳam ḳorta faroin, erlagi tarar faḳ-fobitro lebas banaio. 5Lebas banaite tara lil, baingoni, lal suta, ar dami lilen ḳafoṛ, erloge shunao lagaiba.
Fordan imamor efron bananir niom
6“Fordan imamor efron banaibae lil, baingoni, lal suta, dami lilen ḳafoṛ, ar shunadi. Ita bala kunu ustadredi banaio. 7Efronor ḳandor dui gala zuṛa dibar lagi duḳan foṭṭi banaia, efronor uforor kunat lagaio. 8Efronor loge zuṛa lagail feṭor uforor belṭḳano efronor laḳan lil, baingoni, lal suta, dami lilen ḳafoṛ, ar shunadi banaio.
9“Tumi duiṭa akik fattor ania er ufre Israil, mani Iakubor fuaintor nam kudaia lekaio. 10Foela fattoror ufre, tarar zonmor hishabe boṛo taki huru muka soe zonor nam, ar dusra fattoror ufreo baki soe zonor nam kudaia leḳaio. 11Hunar oḳole dami fattoror ufre kudia zela shil banain, ekkere ou laḳan ḳori dugu fattoror ufre Israilor fuaintor nam kudaio. 12Fattor duiogu shunar zazoiror maze lagaia efronor ḳandor foṭṭir loge lagaio. Israilor fuaintor bae Mabudor nozor raḳar lagi, i fattor Harune Mabudor samne tar ḳandor maze lagaibo. 13-14Duio zazoiror loge shunadi banail duksa chein lagaio. Ou duio chein ḳaṭi shunadi rosir nomunae fesaia banaio.
Buḳor uforor toli bananir niom
15“Amar rae-foesala zanar lagi bukur uforor toli banaio. Bala ustad kunu dorziredi banaio. Efronor ḳamor laḳan iṭao lil, baingoni, lal suta, dami lilen ḳafoṛ, ar shunadi banaio. 16Iṭa oibo lambae ada at, fashe ada at, sairkuna-ala dui bainj ḳora ekkan ḳafoṛ. 17Er ufre hair doraia sair hair fattor lagaibae. Foela harit iakut, fit, ar fanna moni. 18Dusra harit lal-moni, lil-moni ar hira; 19Tin nombor harit firuz, gumed ar foddorag moni. 20Sair nombor hairo fuḳraz, boidurjo ar shuruz moni. I fattor oḳol shunar zazoirdi lagaio. 21Israilor baro fuar lagi baroṭa fattor lagbo. Ita eḳo fattoro eḳ eḳ fuar nam kudia lekaio, zela kudia shil banail oe.
22“Buḳor uforor tolir lagi ḳaṭi shunadi rosir laḳan fesaia duksa chein banaio. 23Shunar duiṭa ḳoṛa banaia buḳor ou tolir uforor kunat lagaio. 24Ar chein duiogesa duio ḳoṛar loge aṭḳaio. 25Duio ḳandor efronor samnor fitat shunar zazoiror loge cheinor eḳ mata bandio. 26Aro duiṭa shunar ḳoṛa banaia buḳor uforor tolir dui kunat lagaio. I duioṭa efronor loge buḳor tolir tole roibo. 27Bade aro duiṭa shunar ḳoṛa banaia, efronor ḳandor foṭṭir shoi toledi, feṭor uforor belṭor uforor silair ḳasat lagaio. 28Bade buḳor uforor tolir tolor ḳoṛar loge feṭor uforor noksha ḳora belṭor ḳoṛa lil sutadi bandio. Teu ou toli efronor ufre taki horto nae.
29“Faḳ zagat hamaibar bala Harune amar rae-foesala hunar lagi, buḳor uforor tolir ufre leḳa Israilor baro fuar nam lagaite oibo, i toliṭae tarare hor-hamesha Mabudor samne raḳbo. 30Amar rae-foesalar ou tolir bitre Urim ar Tummim rakio. Harun zebla Mabudor samne azir oibo, ou shomoe ita tar buḳor ufre roibo. Harune Boni Israilor lagi amar rae-foesala zanar upae hishabe hor-hamesha tar buḳor ufre Mabudor deoa ou siz raḳbo.”
Imam sabor aro lebas
31Mabude Musare ḳoila, “Efronor tole lamba ze alḳella roibo, ikṭa furaṭau lil rongor sutadi banaio. 32Mata haraibar lagi er mazḳano pak rakio. I pak zaga zate na siṛe, erlagi er sairo gala doṛ ḳori bain ḳorte oibo. 33Lil, baingoni, lal rongor sutadi anuar folor laḳan banaia, ou alḳellar tolor muṛir sairobae lagaio. Ar itar maze maze dio shunar gungur. 34I muṛit dibae egu ḳori anuar ar egu gungur. 35Imamoti ḳorar bala Harune i lebas findibo. He zebla faḳ zagat Mabudor samne azir oibo, ar hon taki bare baroibo, ou shomoe ou gungur oḳolor aoaz huna zaibo, teu he morto nae.
36“Ḳaṭi shunadi ekkan fat banaia er ufre shilor laḳan kudia ou aeat lekaio, ‘Mabudor name faḳ-fobitro.’ 37I fatḳan faugṛir samnor galat lagaia lil sutadi bandio. 38Iṭa Harunor ḳofalor ufre roibo. Zoto faḳ-fobitro mal Boni Israile dan-ḳoerat loia aiba, itar hoḳol nomunar dush-tirutir bar Harune boibo. Mabude zate tarare ḳobul ḳoroin, erlagi Harune ḳofalor ufre i shunar fatḳan hamesha lagaia raḳbo. 39Imamor fainjabi ar faugṛi toiar ḳoraio chegor dami lilen ḳafoṛdi. Ḳomoro bandar ḳafoṛḳan sui-sutadi noksha ḳori banaio.
40“Harunor fuaintor ijjot ar shundoror lagi fainjabi, toki ar ḳomoro bandar ḳafoṛ toiar ḳoraio. 41Tumi tumar bai Harun ar tar fuaintore i ḳafoṛ findaio. Tarar matat fobitro tel ḍalia ḳelafoti dia imamoti ḳamo lagaio. Tumi tarare faḳ-fobitro ḳorio, zate tara amar imam oita faroin. 42Ḳomor taki urat forzonto shorom gurar lagi lilen ḳafoṛdi haf-penṭ banaio. 43Harun ar tar fuain zebla milon-tambut hamaiba, ba kurbani ḳanar gese faḳ zagat hamaia imamotir ḳamo lagba, ou shomoe tara ou haf-penṭ finba. Teu tara ni-oforadi roiba, morta nae. Harun ar tar oarishor silsilar lagi i ain hor-hamesha salu roibo.”
29Imam hishabe boail ḳorar niom
1Mabude Musare ḳoila, “Tumi imam oḳolre ou laḳan faḳ-saf ḳorio, zate imam bonia tara amar ebadot ḳam salaita faroin. Tumi nikut egu bisal ar dugu meṛa anaio. 2Erloge nireḳ moedadi ruṭi, teldi baza fiṭa, ar tel maḳail safaṭi banaio. Ita kuntatu ḳamir mishaio na. 3Ota banaia eḳ ṭukrit loio, erloge hou bisal ar duio meṛa loia amar samne aio. 4Bade Harun ar tar fuaintore amar goror duaror ḳasat ania, fanidi naoai dio. 5Ar hou fobitro lebas oḳol ania Harunre findaio. Fainjabi, alḳella, efron ar buḳor uforor toli hoḳolta findaio. Efronor loge ustadi ator banail hou feṭor uforor belṭḳano bandia dio. 6Tar matat faugṛi findaio ar shunar fatdi banail fobitro tazḳano lagaio. 7Bade ḳelafotir tel tar matat ḍalia tare ḳelafoti dio. 8Tar fuaintoreo ania fainjabi findaio. 9Harun ar tar fuaintore ḳomoror ḳafoṛ bandia dio. Fuaintor matat dio toki. Ou laḳan Harun ar tar fuaintore imamor fodo boail ḳorio, zate siroḳalin niom hishabe imamotir fod ḳali tarar bongshot taḳe.
10“Bade hou bisalre tumi milon-tambur samne anio, Harun ar tar fuainte ogur ḳolla ataia diba. 11Atanir bade ou bisalre milon-tambur duaror ḳasat nia Mabudor samne zobo ḳorio. 12Zobo ḳoria harle tuṛa lou tumar angulit lagaia kurbani ḳanar hingor maze lagaio, ar baki lou kurbani ḳanar tole ḍali dio. 13Bisalor feṭor bitoror atboror sorbi, ḳoiljar uforor sorbi, duio kiḍni ar er sorbi, kurbani ḳanar ufre nia zalailio. 14Er gust, ḳal, atbor gufor shudda Boni Israilor kempor bare nia zalailio. Ita oilo guna mafir kurbani.
15“Bade hou duio meṛa taki egu meṛa anio, anle Harune ar tar fuainte ogur ḳolla ataia diba. 16Ar ou meṛare zobo ḳoria er lou nia kurbani ḳanar sairo galat siṭai dio. 17Meṛare ḳaṭia ṭukraia tar ṭeng ar feṭor bitoror hoḳolta doia, ḳolla ar baki ṭukraintor loge toio. 18Heshe i astagu kurbani ḳanar ufre nia zalailio. Ita oilo Mabudor name zalail kurbani, Mabudor niote agunit deoa kushboeala sodga.
19“Bade dusra meṛareo ania Harune ar tar fuainte ḳolla atai diba. 20Atanir bade ogure zobo ḳoria er tuṛa lou nia Harun ar tar fuaintor ḍain ḳanor lotit, ḍain ator ar ḍain faor buṛi angulor maze lagaio. Ar baki lou nia kurbani ḳanar sairo galabae siṭai dio. 21Bade ḳelafotir tel ar kurbani ḳana taki tuṛa lou loia, Harun ar tar fuaintor gotoro ar lebasor ufre siṭai dio. Teu lebas shudda Harun ar tar fuain faḳ-saf oiba. 22Tumi ou meṛar sorbi, sorbiala lengur, feṭor bitoror hoḳoltar uforor sorbi, ḳoiljar uforor sorbi, duio kiḍni, er sorbi, ar ḍainor ran nio, iṭa oilo imamoti ḳamo boailor lagi boḳshia dibar meṛa. 23Bade Mabudor nozoro toa ḳamir saṛa ruṭir ṭukri taki ekkan ruṭi, teldi baza ekkan fiṭa ar tel maḳail safaṭi ekkan loio. 24Loia ita hoḳolta Harun ar tar fuaintor ato dia, Mabudor samne raḳar niote usa ḳori doria Dulona Kurbani hishabe dulaibae. 25Ar ota tarar at taki nia, Mabudor samne kurbani ḳanar ufre, hou zalail kurbanir ufre zalailibae. Iṭa oilo Mabudor name agunit deoa sodga. Ou kushboeala kurbanie Mabud kushi oin.”
26Mabude Musare ḳoila, “Tumi Harunre imamotir ḳamo boail ḳorar lagi, ḳelafoti boḳshibar meṛar sinar ṭukra loia, Mabudor samne Dulona Kurbani hishabe usa ḳori dulaibae. Iṭa oilo tumar baṭ. 27Harun ar tar fuaintore imamotir ḳamo boailor lagi Dulona Kurbanir meṛar sina ar ran hoḳolta tumi faḳ-fobitro ḳorio. 28Ou laḳan Boni Israilor deoa ou kurbanir ṭukrain hor-hamesha Harun ar tar fuainte faiba. Ita oibo Mabudor name Boni Israilor deoa Salamoti Kurbanir eḳṭa ongsho.
29“Harunor bebohar ḳora fobitro lebas oḳol tar oarish oḳole faiba. Ou lebas findia tara ḳelafoti faiba ar imamotir ḳamo boail oiba. 30Harunor bade tar ze fua imam oia milon-tambur faḳ zagat ḳam ḳorbo, he shatdin forzonto i lebas tar gotro raḳbo.
31“Ḳelafoti boḳshibar meṛar ou gustḳanain nia kunu fobitro zagat randibae. 32Harun ar tar fuainte milon-tambur duaror ḳasat boia, ṭukrit toa hou ruṭir loge ou gust ḳaiba. 33Imamor ḳamo boail ḳorar lagi, tarare faḳ-saf ḳorar lagi, ḳanir zeta siz oḳol gunar mafir lagi kurbani deoa oibo, ita ḳali Harun ar tar fuainte ḳaiba. Ar keu ita ḳaito farto nae, ḳaron ita oilo faḳ-fobitro ḳana. 34Ou boail ḳorar kurbanir meṛar kunu gust ba ruṭi zudi bian forzonto roizae, te ita zalailite oibo, ḳeu ḳaito farto nae, ita to faḳ-fobitro.
35“Harun ar tar fuaintor lagi, ami tumare zotota ḳorar hukum disi, tumi oula ḳorio. Boail ḳorar ou ḳam tumi shatdin bora ḳorio. 36Guna mafir kofora hishabe tumi forteḳ din egu ḳori bisal kurbani dibae. Ar kurbani ḳanare faḳ-fobitro ḳorar lagio ou laḳan kurbani dio, ar faḳ-saf oar lagi fobitro tel ḍalio. 37Kurbani ḳanare faḳ-fobitro ḳorar lagi shatdin bora kurbani dia, guna mafir kofora adae ḳoria faḳ-fobitro ḳorio. Teu i kurbani ḳana eḳ moha-fobitro zaga oibo. Zekunu zinish i kurbani ḳanat suaile, ita faḳ-fobitro oizibo.
Forteḳ dinor kurbanir niom
38“Er bad taki forteḳ din i kurbani ḳanar ufre, eḳ boros boeoshor dugu meṛar baichcha kurbani dibae, 39egu biane ar egu hainja bala. 40Foela meṛar baichchar loge eḳ sher nireḳ moeda ar eḳ sher zoetunor fisha tel mishaite oibo. Ar Shorbot-Fanir Kurbanir lagi anguror eḳ sher shorboto Allar name dibae. 41Hainja bala ze meṛa kurbani dibae, erlogeo biankur laḳan Foshol Kurbani ar Shorbot-Fani Kurbanir hoḳolta dite oibo. Ita oilo Mabudor niote agunit deoa kushboeala kurbani.
42“Oarishor for oarish dori milon-tambur duaror gese, mani amar samne forteḳ din i zalail kurbani dite oibo. Hono ami tumrare didar dimu, tumar loge batchit ḳormu. 43Boni Israilor gese ami hono didar dimu, ar amar kudrote ou zaga faḳ-fobitro oibo. 44Ami milon-tambu ar kurbani ḳana fobitro ḳormu. Amar imamotir lagi Harun ar tar fuaintoreo ami fobitro ḳormu. 45Ami Boni Israilor Mabud oia tarar maze boshot ḳormu. 46Teu tara zanba, ami Allau tarar Mabud. Ami tarar loge boshot ḳorar lagiu to tarare Mishor desh taki bar ḳoria anchi. Ami Allau tarar Mabud.”
30Agor-kushboe zalani ḳana
1Mabude Musare ḳoila, “Agor-kushboe zalaibar lagi tumi babla laḳṛidi ekkan zalani ḳana banaio. 2Igu oibo sairkuna-ala, eḳ at lamba, eḳ at fash, dui at ubi. Astaḳanu hing shudda ekkano lagail roibo. 3Er uforor sani, sanir sairo kinara ar hing, hoḳolta ḳaṭi shunadi lefibae. Sairo kinarao shunar noksha ḳoraibae. 4Er dui kinarar nokshar tole dugu ḳori shunarḳoṛa lagaio. I ḳoṛar bitre benda haraia ogu boia neoa oibo. 5I bendaguin babla laḳṛidi banaia shunadi lefaio. 6Shahadot shonduḳor sanir ḳasat ze fordaḳan ase, ou zalani ḳana er samne rakio. Ou zagat ami tumare didar dimu.
7“Forteḳ din biane lemguin zuit-zait ḳorar bala, Harune zalani ḳanar ufre kushboeala agor zalaibo. 8Hainja bala lem zalanir shomoe, he hirbar agor-kushboe zalaibo. Tumrar oarishor for oarish dori Mabudor samne hor-hamesha ou agor-kushboe zolbo. 9I agor-kushboe zalani ḳanar ufre dusra kunu zator kushboe zalaio na. Kunu zalail kurbani, Foshol Kurbani, ba ḍalibar zuka fani zatio kunta kurbani ḳorio na. 10Gunar mafir kofora hishabe, Harune bosoro eḳbar guna mafir kurbanir lou, zalani ḳanar hingor ufre lagaite oibo. Teu ikan Mabudor name moha-fobitro oibo. Oarishor for oarish dori fordan imame bosoro eḳbar ou laḳan ḳorte oibo.”
Zanor bodola rufa
11Bade Mabude Musare ḳoila, 12“Tumi zebla Boni Israilor manshor foriman gonibae, ou shomoe tara hoḳoleu zarzir zanor bodola rufa dite oibo, zate i gonar lagi tarar ufre kunu gozob na ae. 13Tarare gonar bala oula bodola loio, gona oise dolo zera hamaiba, era ebadot ḳanar mafe ada tola rufa diba. I rufa oibo Mabudor. 14Bish boros ba er beshi boeoshor zekunu zon gona shesh oa dolo hamaile, en zanor bodola Mabudre ou rufa diba. 15Zanor bodola deoar shomoe doni oḳole ou ada tular beshi dita farta nae, ar goribeo ḳom dile oito nae. 16Tumi Boni Israilor ges taki zanor bodola ou rufa nia, amar goror ḳamo lagaio. Tumrar zanor bodola i rufae, Boni Israil oḳolre Mabudor dorbaro iad ḳorai dibo.”
Ozur fanir gamla banaio
17Mabude Musare ḳoila, 18“Ozu ḳorar lagi tumi fitolor eḳṭa gamla, ar gamla toar lagi fitolor ekkan soki-ḳaṭ banaio. Milon-tambu ar kurbani ḳanar mazḳano fani boria ogu toio. 19I fanidi Harun ar tar fuainte ozu ḳorba. 20Tara zate na moroin, erlagi forteḳbar milon-tambut hamaibar bala ou fanidi ozu ḳorte oibo. Imam hishabe Mabudor name agunit deoa zekunu kurbani adae ḳorar shomoyo ozu ḳorte oibo. 21Tara zane basia roar lagi ou ozu ḳorba. I hukum tarar lagi hor-hamesha salu roibo, oarishor for oarish dori boail roibo.”
Ḳelafoti boḳshibar tel
22Mabude Musare ḳoila, 23“Tumar nizor gese kushboedar bala bala moshla oḳol dola ḳoro. Tumi fas-sho tola mura-ator, aṛai-sho tola kushboeala ḍailchini, ar aṛai-sho tola bos, 24shadaron ḍailchini fas-sho tola, ar zoetunor tel sair sher dola ḳorio. I maf oilo ebadot ḳanar mafe. 25Ou moshla oḳol dia agor-kushboe moshla bananir ḳarigoror niome tumi ḳelafoti shomjibar tel banaio, i tel to fobitro. 26Ou tel dia tumi milon-tambu, shahadot shonduk, 27ṭebul, ṭebulor uforor hoḳol samana, seragdanir hoḳolta, ar agor-kushboe zalanir ṭebul, 28kurbani ḳana ar er mazor hoḳol samana, ozur gamla ar er tolor soki-ḳaṭ hoḳoltare fusia faḳ-fobitro ḳorio. 29Teu i hoḳolta moha-fobitro samana oibo. Ita samana ḳeu soile, heo moha-fobitro oizibo.
30“Tumi Harunre ar tar fuainre amar imamotir ḳamor lagi ḳelafotir tel dia faḳ-fobitro ḳorio. 31Ar Boni Israilre zanai dio, oarishor for oarish dori iṭau oibo amar ḳelafoti shomjibar fobitro tel. 32I tel manshor gotoro deoa zaito nae. I niome tara zate ar kunu tel na banae. I tel to fobitro. Tumra iṭare faḳ-fobitro mono ḳoria ijjot ḳorte oibo. 33Ḳeu zudi i laḳan tel toiar ḳore, ba imam sab saṛa ar keu i tel gotoro maḳe, te tare nizor zati taki fusilibae.”
Agor-kushboe bananir niom
34Mabude Musare ḳoila, “Tumi nizor gese kisu kushboeala moshla: guggulu, noki, kunduru ar ḳaṭi loban dola ḳorio. Dola ḳoria ota homan homan ḳori mishaio. 35Ar zera agor-kushboe banain, tararedi ou ḳam ḳoraio. Itar loge nun mishaio, ita oibo nirbezal ḳaṭi fak-fobitro agor. 36Ou agoror tuṛa guṛa nia milon-tambur shahadot shonduḳor samne toio. Hono ami tumare didar dimu. Tumra i agorre moha-fobitro samana mono ḳorio. 37Ou moshla dia i niome ḳeu zate tar nizor lagi kunu agor-kushboe na banae. Ita to Mabudor name faḳ-fobitro chiz, ikan kial rakio. 38Kusboedar siz mono ḳoria ḳeu zudi ita toiar ḳorilae, te tare i zati taki fusilibae.”
31Allar fosond ḳora ḳarigor
1Mabude Musare ḳoila, 2“Huno, ami Ehuda gusṭir Huror nati, Urir fua Batselolre fosond ḳorsi. 3Ami tare Allai ruh dia kamil ḳorsi. Hoḳol laḳan ḳarigori ḳamor aḳol-buddi, biddae ustadi ḳamor ḳemota disi. 4Erlagi he shuna, rufa, fitolor ufre shundor shundor noksha banaito farbo. 5Dami dami fattor ḳaṭia moni-mukta lagani, laḳṛir ufre nokshar ḳam ar hoḳol zator ator ḳam ḳorto farbo. 6Tar zugali hishabe ami Dan gusṭir Ohisamaḳor fua Aholiabre fosond ḳorsi. Ze ustad oḳole i ḳam ḳorta farba, ami tarare ḳamor aḳol disi, zate tumare batail amar hukum mafik, ita hoḳolta tara banaita faroin. 7Tara banaiba, milon-tambu, shahadot shonduk, er uforor sani, tambur hoḳol mal-samana, 8ṭebul, ṭebulor logor siz oḳol, ḳaṭi shunar seragdani, seragdanir logor hoḳolta ar agor-kushboe zalani ḳana, 9kurbani ḳana ar er hoḳol mal-samana, hanḍi-bashon, ozu ḳorar gamla ar er soki-ḳaṭ, 10imamoti ḳamor lagi Harunor imamotir lebas ar tar fuaintor lebas, 11ḳelafotir tel, faḳ zagar lagi kushboeala agor. Ami tumare zela hukum disi, ekkere ou laḳan tara banaiba.”
Zummabaror niom
12Mabude Musare ḳoila, 13“Tumi nize Boni Israilre ḳo, tumra amar deoa forteḳ Zummabar manio. I Zummabar oarishor for oarish dori tumra ar amar maze eḳ nishana oibo, zate tumra buzbae, amiu Mabud, ar ami tumrare amar fobitro bonda oar lagi alada ḳorsi.
14“Tumra Zummabar manio, ou dinre tumrar lagi faḳ din ḳora oise. Ḳeu zudi i din na mane, te tare marilite oibo. Ze manshe idin kunuzat ḳam ḳorbo, tare tar zatir maz taki fusilibae. 15Tumra haftar soe din ḳam ḳorio, oile shat nombor din Mabudor name aramor din, Zummabar. Shukrobar shuruz ḍuba taki Shonibar shuruz ḍubar ag forzonto Zummabar. I din ze manshe ḳam ḳorbo, tare marilibae. 16Boni Israil oḳole amar deoa siroḳalin niom hishabe, oarishor for oarish dori hor-hamesha i Zummabar mante oibo. 17I Zummabar to Boni Israil ar amar maze hameshakur lagi siroḳalin eḳ nishana. Ḳaron soe dine Mabude asman-zomin hoḳolta foeda ḳorla, oile shat nombor din kunu ḳam na ḳoria ziraila.”
18Mabude Tur faṛor ufre Hozrot Musar loge ou batchit shesh ḳoria harle, Musar ato dui ṭukra shahadot fattor dila. Ou fattoror maze Alla Pake tan nizor ate tan hukum-ahkam leksoin.
32Allar birudde Boni Israilor naformani (32:1–34:35)
Shunar murtifuzar shaza
1Musa nobi faṛ taki lamia aite deri or dekia, manshe aia Harunor sairobae dola oia ḳoila, “Amrare fot sinia neoar lagi, afne amrare devta banai deukka. Ḳaron, ze Musae amrare Mishor taki bar ḳori anche, tar kita goṭse amra to zani na.” 2Ikan hunia Harune tarare ḳoila, “Tumra zarzir bou ar fua-fuṛintor ḳano taki shunar goena kulia amar gese ano.” 3Teu hoḳole tarar ḳanor goena kulia Harunor gese ania dilo. 4Manshe zeta shuna ania dila, Harune ota nia aguindi golaia, hunaror atiardi eḳ basuror murti banaila. Ogu dekia Boni Israile ḳoila, “Bai oḳol, ou einu tumrar devta, zein tumrare Mishor desh taki bar ḳori anchoin.” 5I halot dekia Harune hou basuror samne eḳ boli ḳana banaia zanai dila, “Samnor ḳail Mabudor name kushi-bashi ḳora oibo.” 6Teu bador din kub sobre uṭia manshe devtar samne aia mongol boli ar foshu zalaia boli dila. Bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.
7Ou Mabude Musare ḳoila, “Tumi faṛor lamat zao. Tumar ou zeta manshore Mishor desh taki bar ḳori ancho, ita to naforman bonigese. 8Ami tarare zela solar hukum dislam, tara ita bad dia nizor lagi eḳ basuror murti banaia, maṭit foṛia ogure fornam ḳorer. Ogur name tara foshu boli der ar ḳor, bai oḳol, ou einu tumrar devta, zein tumrare Mishor desh taki bar ḳori anchoin.”
9Mabude Musare ḳoila, “Ami ita manshore sini, ita to gaṛteṛa-eḳguia zat. 10Oḳon tumi amare bada dio na, itar ufre amar gusa aguinor laḳan dau dau ḳori zoler, ami itare sarḳar ḳorilimu. Bade ami tumar maz taki eḳ moha zati foeda ḳormu.”
11Teu Musae tan Alla Mabudre minot-ḳajji ḳoria ḳoila, “O Mabud, tumi tumar kudroti at dia tumar moha kudroti bole zetare Mishor taki bar ḳori ancho, tarar ufre tumi ḳene oto gusa oilae? 12Mishori oḳole ḳene ikan matar shuzug faita, faṛia elaḳat ania tarare ḳotom ḳoria, dunia taki tarar nam miṭailibar lagi tumi tarare Mishor taki bar ḳoria ancho? Mabud go, tumar i betaea gusaḳan tumi tamailao. Meherbani ḳori, tumar bonda oḳolor ufre i gozobḳan anio na. 13Tumar afon gulam Ibrahim, Isʼhak ar Iakubor ḳota iad ḳoro. Tumi nizor name ḳosom ḳaia tarare ḳoislae, tarar oarish oḳolre tumi asmanor terar laḳan baṛaibae, ar tumar oada ḳora ou asta deshor malikanao tarare dibae, ar tara hor-hameshakur lagi er doḳol faiba.” 14Ikan hunia Mabudor meherbani oilo. Tain tan bonda oḳolor ufre ze gozob ḍalita saisla, ita bad dilaila.
15Erbade Musae Allar deoa duioḳan shahadot fattor loia lamat aila. I fattoror ulṭa-baṭiol duio galat leḳa asil. 16I duio fattor oilo Alla Pakor nizor ator ḳam, ar i fattoror ufre kudia leḳaḳano tan nizor ator leḳa. 17Musar ḳadim Iusae manshorita hoi-hulla hunia Musare ḳoila, “Sab, amrar kempor maze zuddor aoaz huna zar.” 18Musae ḳoila, “Ita to kunu zuddor ara-zitar aoaz nae. Ami zeta huniar, ita to ganor aoazor laḳan lager.”
19Bade Musae kempor ḳasat aia manshor nasa-nasi ar basuror murti deḳla. Dekiau tain gusae aguin oia, ator fattor duioḳan iṭa mari falai dila. Teu fattor duioḳan faṛor tole foṛia surmar oigelo. 20Ar Musae tarar banail basuror murti nia agunit falaia zalailila. Bade ogure fishia guṛa banaia fanit mishaia, Boni Israil oḳolre ḳaoai dila.
21Tain Harunre ḳoila, “Ita manshe tumar kun ḳeti ḳorsil, tumi ḳene tararedi shiriki ḳam ḳorailae?” 22Harune zuaf dila, “Malik, afne gusa ḳoroin na zanu, afne to zanoinu, ita manush ḳali ḳaraf ḳamor ashik. 23Tara aia amare ḳoila, amrare fot sinia loia zaoar lagi devta banai deukka, ḳaron ze Musae amrare Mishor taki bar ḳori anchoin, en kita oise, amra to zaniar na. 24Ikan hunia ami tarare ḳoilam, tumrar gese zeta shuna-dana ase, ota kulia amar gese ano. Tara ania amar ato dila, ar ami oḳnain iṭa mari agunit falailam, teu ou basur ogu baroia ailo.”
25Musae deḳla, i manushguin beforua oigesoin. Tain buzla, Harune tarare beforua oar shuzug disoin. Erlagi dushmon oḳole ashibar shuzug faisoin. 26Ou Musae kempor geiṭor gese ubaia ḳoila, “Tumra zoto zon Mabudor fokke aso, hoḳol amar ḳasat ao.” Teu Lebi gusṭir hoḳol manush tan gese ailo. 27Aia harle Musae tarare ḳoila, “Mabud, zein Boni Israilor Alla, tain nize hukum ḳorsoin, tumra hoḳole zarzir ḳomoro toluar bando, ar kempor bitre zare samne fao ḳatol ḳoro. Asta kempor bitre bai-bondu, ari-fori zare fao maro.” 28Teu Lebi gusṭir manshe Musar hukum mafik kam ḳorla. Hi din onuman tin azar manush mara gela. 29Bade Musae ḳoila, “Tumra aiz Mabudor name zarzir fua ar bai-biradoror ufre at tulte ḳoredi geso na, Mabudor ḳamor lagi tumra alada oiso, erlagi Mabude tumrare rohomot disoin.”
30Bador din Musae manshore ḳoila, “Tumra to bezuita guna ḳorso. Te ami oḳon hirbar Tur faṛo Mabudor dorbaro zairam, farle tumrar guna mafir koforar kunu fot bar ḳormu.” 31Musae Mabudor dorbaro gia aroz ḳorla, “O Mabud, i manushguinte bezuita guna ḳorilise. Tara nizor lagi shunar murti banaise. 32Te tumi meherbani ḳoria tarar gunare oḳon maf ḳori dilao, ar zudi maf na ḳoro, taile tumar leḳa ḳata taki amar namḳano ḳaṭilao.” 33Mabude zuaf dila, “Huno, amar birudde zera guna ḳorse, ami ḳali tarar namreu amar ḳata taki fusilimu. 34Te tumi oḳon zaogi, ar ami ze deshor ḳota ḳoisi, tumi tarare loia hou desho roana dilao. Amar firistae tumrare fot deḳaia niba. Bade zebla shaza deoar shomoe oibo, ou shomoe ami tarar gunar shaza dimu.”
35Harunor ate banail hou basuror murtir lagi manshe zeta ḳorsila, otar lagi Mabude tarar ufre gozob nazil ḳorla.
33Tur Faṛ taki zaoar hukum
1Mabude Musare ḳoila, “Zao, tumi ou zerare Mishor taki ancho, erare loia oḳonu i zaga saṛia zaogi. Amar oada ḳora hou desho zao. Ami Ibrahim, Isʼhak ar Iakubor gese oada ḳorslam, tarar oarish oḳolre ou desh oḳol dimu, te tumi tarare loia hono zaogi. 2Ami tumrar age ḳori eḳzon firista faṭaimu. Ein gia honor Kenani, Amuri, Hiṭṭi, Farizi, Hibbi ar Zibuzi oḳolre ḳedai diba. 3Ita to dud ar mour banḍarala desh. Oile ami tumrar loge oia zaitam nae, ḳaron tumra kub gaṛteṛa-eḳguia zat, kizanu ami fotor mazeu tumrare nifat ḳorilai.”
4I bifodor ḳota hunia manshe ḳanda-ḳaṭi lagaila. Tara ḳeu kunuzat goena-gaṭi finla na. 5Ḳaron Mabude Musare ḳoisla, “Tumi Boni Israil oḳolre ḳo, tumra oilae gaṛteṛa zat. Ami eḳ foloḳor lagi geleo tumrare nifat ḳorilimu. Tumrar gotoro taki hoḳol goena-gaṭi kulilao, teu ami buzmu, tumrar lagi kita ḳortam.” 6Teu Boni Israile Tur faṛou tarar goena-gaṭi hoḳolta kulilila, ita ar finla na.
Hozrot Musa (a:)-or ḳaneḳa-tambu
7Hozrot Musar eḳ tambu asil, tain Boni Israilor kempor bare duroi nia ou tambu fatita, i tambure tain ḳaneḳa-tambu ḳoia ḍakita. Mabudor ges taki ḳeu kunta zante saile tara ou ḳaneḳar gese zaita. 8Musa zebla hi ḳaneḳa shorifo roana dita, ou shomoe hokkol manush zarzir tambur duaro ubaita ar Musa ḳaneḳat na hamani forzonto hoḳole tan bae sai roito. 9Tain hi ḳaneḳa shorifo hamanir badeu Allai megor kuṭi ḳaneḳar duaror muḳo lamia aito, ar Mabude zotoboil Musar loge batchit ḳorta, otoboil i kuṭi ono roito. 10Manshe zeblau i megor kuṭire ḳaneḳar duaror gese deḳto, ou shomoe tara zarzir duaror ges taki Mabudre soizda ḳorto. 11Kunu manshe tar dustor loge mukamuki boia zela batchit ḳore, Mabudeo Musar loge oula mukamuki batchit ḳorta. Bade Musa kempo firia aita, oile tan ḳadim Nunor fua Iusa namor i zuan, Ḳaneḳa Shorif taki baroita na.
Hozrot Musar gese Mabudor oada
12Musae Mabudor dorbaro aroz ḳorla, “Mabud, tumi to ḳoirae ami ota manshore loia zaitamgi, oile amar loge ar ḳare dirae, ikan to amare zanailae na. Tumi ḳali ḳoilae, tumi amare tumar nizor zon mono ḳoro ar amare tumar ḳas maear nozoro raḳso. 13Te hasau zudi ami tumar maear nozoro taki, taile tumi kun kiale kita ḳoro, ota amare zanao, zate ami tumare furafur sini ar tumar rohomotor maze roi. Tumi to zano-u, i Israil zati tumaru proza.” 14Mabude zuaf dila, “Huno, ami nizeu tumar loge oia zaimu ar tumare aram dimu.” 15Ou tain ḳoila, “Tumi zudi amrar loge na zao, te amrare in taki bidae dio na. 16Tumi na gele manshe kila buzba, amar ufre ar tumar i bonda oḳolor ufre tumar rohomot ase? Amrau zen duniar hoḳol zati taki alada, ikan kila buzba?” 17Mabude Musare ḳoila, “Ṭik ase, tumi zela ḳoilae, ami ola ḳormu. Tumi to amar maear nozoro aso, tumare amar nizor afon mono ḳori.”
18Teu Musae aroz ḳorla, “Te tumar shan-tozolli amare deḳao na.” 19Mabude ḳoila, “Ami zare kushi doya ḳormu, ar zare kushi rohom ḳormu. Huno, tumar samnedi ami amar hokkol nek surot zair ḳormu. ‘Mabud, zein asoin’ tumar samne ami amar ou nam elan ḳormu. 20Oile amar muḳ deḳar takkot tumar oito nae. Ḳaron amare dekille kunu Adom zat base na. 21Te huno, tumi amar ḳasar ou zaga bae sao, deḳrae ni, fattoror eḳ taḳ ase, ou taḳor ufre tumi ubao. 22Teu tumar samone dia amar shan-tozolli zaoar bala, ami tumare ou fattoror faṭar bitre haraimu. Ami na zaoa forzonto, amar at dia tumare guria raḳmu. 23Bade amar at horaile, tumi amar ḳor gala deḳtae farbae, oile ḳeu amar muḳor didar faito nae.”
34Noea shahadot fattor
1Mabude Musare ḳoila, “Agor fattoror laḳan tumi noea duḳan fattor tiar ḳoro. Tumi ze duḳan bangislae, hi fattoror maze ze hukum leḳa asil, ou hukum oḳol ami hirbar i duio fattoro lekia dimu. 2Fozor badeu tumi tiar oia Tur faṛor ufre uṭio. Uṭia faṛor matat amar samne azir oio. 3Tumar loge kunu manshore anio na, i faṛor kunuḳano zate kunu manush na ae. Faṛor ḳandat kunu goru-sagol ba meṛa-meṛire raḳte dio na.”
4Teu Musae agor fattoror laḳan duḳan fattor banaila, ar Mabudor hukum mafik fozore uṭia fattor duioḳan ato loia Tur faṛor ufre uṭila. 5Ar Mabudo megor kuṭi taki lamia aila. Tain Hozrot Musar daro ubaia tan ‘Mabud, zein asoin’ nam elan ḳorla. 6Tain Musar samna dia toshrif nila, ar ou ḳalam elan ḳori ḳori gela,
“Mabud, zein asoin,
rohman ar rohim Alla,
tain gusa ḳoroin dir gotie,
tan obiram maea-mohobbot ar hok-halalir kunu shima nai.
7Tain azar azar oarish forzonto obiram maea-mohobbot ḳoroin,
manshor oinnae-oforad, naformani ar gunar mafi dein,
oile dushi zonre shazao dein.
Baf-dadar naformanir shaza,
tarar nati-futi forzonto bortain.”
8Ikan hunia-u Musa nobi loge loge soizdat foṛia ḳoila, 9“O malik, ami zudi tumar dorbaro rohomot fai, te meherbani ḳori tumio amrar logḳano solo. Ou zati zudio kub gaṛteṛa-ekguia zat, ta-o tumi amrar guna ar ḳosurire maf ḳoria dilao. Amrare tumar afon proza hishabe ḳobul ḳorilao.”
10Mabude ḳoila, “Huno, ami eḳ usilla boail ḳoriar, ami tumar hoḳol manshor samne ou laḳan keramoti ḳam deḳaimu, zeta asta duniar kunu zatir samne kunudino ḳora oise na. Tumi ou zeta manshor loge boshot ḳorrae, tara deḳba, ami Mabude tumrar lagi kita ḳoriar, ita dekia tarar zano ḍor malum oibo. 11Ami aiz tumrare zeta hukum dimu, ita kial ḳori amol ḳoro. Ami Amuri, Kenani, Hiṭṭi, Farizi, Hibbi ar Zibuzi oḳolre tumrar samna taki ḳedai dimu. 12Oile ḳobordar! Tumra ze desho zairae, i deshor manshor loge kunuzat chukti ḳorio na, arnae fando hamaibae. 13Tumra tarar fuza-monḍop bangia ṭukra ṭukra ḳorbae, tarar boli ḳanain bangilibae, ar tarar Ashera-debir nishana kuṭi oḳol ḳaṭia falaibae. 14Tumra kunu devtare fuza ḳorio na. Ḳaron Allar namu Mabud, tain nizor nam mafik ebadot faoar zoiggo. Tain tan nizor faona ebadot sain.
15“Hou deshor manshor loge kunuzat chukti ḳorio na, arnae tara zebla shiriki ḳamor niote, tarar deb-debir samne nizore shofia diba, devtar name boli diba, ou shomoe tara tumrareo daot diba ar tumra gia tarar ou bolir gust ḳaibae. 16Tumrar fuaintor loge tarar fuṛintor bia-shadi dibae, ar ou fuṛinte tarar devtar gese gia shiriki ḳam ḳorba, tarar loge tumrar fuaintoreo ṭanba.
17“Tumra nizor lagi kunu zator murti banaio na.
18“Tumra Ḳamir Saṛa Ruṭir Id adae ḳorio. Shat din ḳamir saṛa ruṭi ḳaio. Abib sandor ṭik kora tariḳo tumrare zela hukum deoa oise, ou laḳan id adae ḳorio. Mono rakio, ou sando tumra Mishor taki baroia aislae.
19“Tumrar feṭor foeda hoḳol foela fua amar oibo. Erloge tumrar goru-sagol ba foshur foela meda baichchao amar oibo. 20Ḳali gadintor foela meda baichchar bodola, amare egu meṛar baichcha bodola dia ogure ḳalas ḳoria nio. Ḳalas na ḳoraile ogur gordona bangilio. Tumrar hokkol boṛo fuainre ola ḳalas ḳorai nio.
“Huno, idor shomoe ḳeu ḳali ate amar ḳasat aio na.
21“Haftar soedin tumra ḳam ḳorio, oile shat nombor din ziraio. Ket ḳora ar foshol daoar balao ziraio.
22“Dan-gom daoar bala foela daoa foshol dia, tumra Foshol Daoar Id adae ḳorio. Bosoror hesh masho ḳetor faḳna fol baṛit anar bade Ḍera-goror Id adae ḳorio. 23Bosoro tinbar tumrar hoḳol beṭain aia hoj ḳorar niote amar gese azir oio. Mono rakio, amiu Mabud, Boni Israilor Alla. 24Ami hou deshor hoḳol zatire tumrar samon taki ḳedai dimu. Tumrar deshor shimana baṛaia boṛo ḳormu. Tumra bosoro tinbar nizor Mabud Allar samne azir oio, teu tumrar zaga-zominor bae ḳeu lalos ḳorto nae.
25“Amar namor kurbanir foshur loge tumra ḳamirala kunta lilla-kurbani dio na. Azadi Idor kurbanir kunuzat ḳani bian forzonto rakio na.
26“Tumrar ḳetor daoa foela fosholor hoḳol taki bala ongsho Alla Mabudor goro loia aio.
“Ar huno, sagolor baichchar gust tar maʼr duddi randio na.”
27Bade Mabude Musare ḳoila, “Tumi i ḳalam oḳol lekia to. Ami ou ḳalam mafik tumar loge ar Boni Israilor loge amar milonor usilla boail ḳorlam.” 28Ou shomoe Musa nobi sallish din sallish rait Mabudor daro faṛor ufre roila. Tain kunuzat dana-fani ḳaila na. Mabude hou duio fattoror ufre tan loge milonor usillar ou aeat oḳol, mani shoriotor doshṭa hukum-ahkam lekia dila.
Hozrot Musa (a:)-or nurani surot
29Teu Musae shahadot fattor duioḳan ato loia Tur Faṛ taki lamia aila. Mabudor loge batchit ḳorae Musar muḳor surot nurani oigelo, oile Musae ikan ṭer faila na. 30Ou shomoe Harun ar hoḳol Boni Israile Musar nurani surot deḳla, dekia tara ḳasat aite ḍoraigela. 31Oile Musae tarare ḍaḳ dila, teu Harun ar Boni Israilor murobbi oḳol tan gese aila, ar Musae tarar loge mat-ḳota matila. 32Bade hoḳol Boni Israil tan ḳasat aila. Aia harle tain Tur faṛor ufre Mabudor deoa hoḳol hukum-ahkam tarare zanaila.
33Tarar loge mat-ḳotar bade Musae tan nurani muḳ gurar lagi forda lagai dila. 34Oile Musae zebla Mabudor loge batchitor lagi ḳaneḳar bitre tan samne zaita, ou shomoe i forda kulilita. Bade bare aia forda lagaita, ar Allar deoa hukum oḳol Boni Israilre zanaita. 35Hoḳol manshe deḳta Musar muḳ nurani oigese. Musae tan muḳ gurilita ar Mabudor samne zaoar ag forzonto tan muḳ gura roito.
35Allar fobitro gor banani (35:1–40:38)
Zummabaror hukum-ahkam
1Musa nobie Boni Israilor hoḳol gusṭire dola ḳoria ḳoila, “Mabude hukum disoin, tan ou hukum-ahkam amol ḳorar lagi. 2Tumra haftar soedin ḳam ḳorio, oile shat nombor din Mabudor name faḳ-fobitro din, aramor din, Zummabar. I din ze manshe ḳam ḳorbo, tare marilibae. 3Zummabare tumrar ḳeuror goro aguin zalaio na.”
Allar goror lagi lilla deo
4Hozrot Musae Boni Israilre ḳoila, “Mabude hukum disoin, 5tumra zarzir dilor kushi mafik Mabudor name lilla loia ao. Anar shomoe oula siz oḳol lilla anio:
shuna, rufa, fitol;
6lil, baingoni, lal rongor suta;
dami lilen ḳafoṛ ar sagolor ruma;
7lal rong lagail meṛar samṛa, fu’r samṛa;
babla laḳṛi;
8lem zalanir lagi zoetunor tel;
ḳelafoti boḳshibar telor moshla ar agor-kushboe bananir moshla;
9imamor efron ar buḳor uforor tolit laganir lagi akik moni ar hoḳol nomunar dami fattor.
10“Tumrar maze zara bala ustad ḳarigor, tara aia ou hoḳolta banaiba, zela Mabude hukum disoin:
11Allar gor, goror sal, huk, freim, batti, kuṭi, kuṭir tolor bura;
12shahadot shonduk, shonduḳor sani, shonduk boia neoar benda;
shondukre agla dibar forda;
13benda shudda ṭebul, ṭebulor uforor hoḳol siz, Mabudor namor fobitro ruṭi;
14for dibar lagi seragdani, er logor hoḳol siz ar lem oḳol, lem zalanir tel;
15agor-kushboe zalani ḳana, ikan boia neoar benda;
ḳelafotir tel, kushboeala agor, Allar goror duaror forda;
16zalail Kurbani dibar kurbani ḳana;
er fitolor zali ar boia neoar benda;
kurbani ḳanar hokkol mal-samana;
ozur gamla ar gamla toar soki-ḳaṭ;
17uṭanor fordain, kuṭin ar kuṭir tolor bura;
uṭano hamanir geiṭor forda;
18goror fereg ar doṛi, uṭanor fereg ar doṛi;
19faḳ zagat imamoti ḳamor lagi, imam Harunor fobitro lebas, ar tan fuaintoro imamotir lebas.”
20Musa nobir boean bade Boni Israilor hoḳol gusṭi bidae oigela. 21Gia tarar dilor eshki mafik zarzir ichchae Allar gor bananir lagi, imam Harunor faḳ-fobitro lebasor lagi ar ebadot ḳamor lagi hoḳol nomunar mal-samana loia aila. Allar name lilla dibar lagi ota loia tara azir oila. 22Beṭain ba beṭintor maze zarar mone sailo, tara ita dila. Tara zarzir ḳafoṛor fing, ḳanor iaring, angṭi, golar har, ar hoḳol zator shunar goena ania Mabudor name Dulona Kurbani dila. 23Ar zerar gese lil suta, baingoni, lal suta, dami lilen ḳafoṛ, sagolor ruma, lal rong ḳora meṛar samṛa, fu’r samṛa asil, tara ita hoḳolta loia aila. 24Zerar gese rufa ar fitol asil, tarao ita ania Mabudor name lilla dila. Allar goror ḳamo laganir zuka babla laḳṛi zerar gese asil, tarao ita loia aila. 25Zeta beṭinte suta bananit ustad, tara nizor ate lil, baingoni, lal rongor suta, ar dami lilen ḳafoṛ banaia anla. 26Ar suta banaora zeta beṭintor dilor maze eshki foeda oilo, tara sagolor ruma dia suta banaila. 27Murobbi oḳole efron ar buḳor uforor tolit laganir lagi, akik moni ar dami dami fattor loia aila. 28Lem zalanir tel, ḳelafoti boḳshibar tel, agor-kushboe bananir moshla ar zoetunor telo anla. 29Mabude Musar mazdi zeta zeta ḳorar hukum disla, ita fura ḳorar lagi Boni Israilor hoḳol beṭain-beṭinte, zarzir kushi mafik lilla loia azir oilo.
Batselol ar Aholiab Allar fosond ḳora ḳarigor
30Bade Musae hoḳol Boni Israilre ḳoila, “Mabude Ehuda gusṭir Huror nati, Urir fua Batselolre fosond ḳorsoin. 31Tain ere nizor ruh mubarok dia kamil banaia, hoḳol laḳan ḳarigori ḳamor aḳol-buddi, biddae ustadi ḳamor ḳemota disoin. 32Erlagi ein ḳarigori ḳam ḳorar bala nizor aḳol ḳaṭaia shuna, rufa, fitolor ufre shundor shundor noksha banaita farba. 33Dami dami fattor ḳaṭa, laḳṛir ufre noksha, ar hoḳol nomunar ator ḳam ḳorta farba. 34Ar oinno manshoreo ita ḳam hikanir lagi Batselol ar Dan gusṭir Ohisamaḳor fua Aholiabor dilo Mabude aḳol disoin. 35Tain erare nanan zator nokshar ḳam, lil, baingoni, lal sutadi ḳafoṛ bain ḳora, noksha ḳora, silai ḳora, ar dami lilen ḳafoṛ silai ḳoraro aḳol disoin. Tara hoḳol nomunar ator ḳam ḳorta farba, ar nizor mon taki nanan nomunar noksha banaita farba.”
361Musa nobie eoḳan ḳoila, “Mabude Batselol, Aholiab ar oinno ḳarigor oḳolre aḳol-buddi dan ḳorla, zate tara fobitro ebadot ḳanar hoḳol ḳam-ḳaz ḳorta faroin. Mabude zela hukum ḳorsoin, ou laḳan tara zanu ebadot ḳanar hoḳolta banain ar hazain.”
2Ou ḳam ḳoranir lagi Musae Batselol ar Aholiabre anaila. Mabude zeta ustad ḳarigor oḳolre aḳol-hekmot disoin, ar i ḳam ḳorar lagi zerar dilo ḳaish foeda oise, Musae tarareo anaila. 3Tara aia fobitro ebadot ḳana bananir lagi, Boni Israilor deoa lillar hoḳol mal-samana Musar ges taki shomzia nila. Manshe kushi oia nizor ichchae forteḳ din biane aro siz oḳol ania ono lilla dita. 4Ze ustad ḳarigor oḳol ebadot ḳanar ḳamo asla, tara ita dekia, nizor ḳam toia aia Musare ḳoila, 5“Mabude zeta zeta bananir hukum disoin, ita bananir lagi manshe dorḳar taki aro beshi mal-samana loia aira.”
6Teu Musar hukume manshe hoḳol Boni Israilre zanai dila, ebadot ḳana bananir lagi, ḳeu zanu ar kunu mal-samana lilla na dein. Ougi manshe lilla deoa bond ḳorla. 7Ḳaron ebadot ḳanar ḳamor lagi dorḳar taki aro beshi siz zugaṛ oigesil.
Allar gor banail oilo
8Bade ḳam ḳorra ustad oḳole fesail sutar dami lilen ḳafoṛ, lil, baingoni, ar lal sutadi banail dosh ṭukra ḳafoṛ dia Allar goror forda banaila. Ar ustad oḳole er ufre karubi oḳolor sobi bain ḳorla. 9Forteḳ ṭukrain eḳ mafor asil, lambae aṭaish at ar fashe sair at. 10Bade fasḳan fasḳan ḳori ekkano zuṛa dia boṛo ḳori duḳan terfal banaila. 11Ar duio terfalor fashor ek kinarao, lil sutadi hukor fur deoa oilo. 12Oula foela terfalor kinarao fonchashgu hukor fur ar dusra terfalor kinarao fonchashgu hukor fur lagail oilo. I duio hukor fur egu ar egur ulṭamuka ḳora oilo. 13Bade shunadi fonchashgu huk banaia hou hukor furor mazedi haraia, boṛo duio terfalre zuṛa deoa oilo. Teu ekkan gor tiar oilo.
14Allar goror salor lagi sagolor ruma dia terfalor laḳan egaroḳan ṭukra banail oilo. 15Ita fortekḳan eḳoi mafor asil, tish at lamba ar sair at fash. 16On taki fas ṭukra eḳloge zuṛa dia boṛo eḳ terfal banaila. Ar baki soe ṭukra zuṛa dia, aroḳan boṛo terfal banaila. 17Foela boṛo terfalor fashor ek kinarao fonchashgu hukor fur lagaila, ar dusra terfalo-o oula lagaila. 18Bade fitol dia fonchashgu huk banaia hou hukor furor mazedi haraia, ou boṛo duio terfal ekkano zuṛa dila. Teu i duio terfal milia ekkan sani oilo. 19Lal rong ḳora meṛar samṛadi er uforor sani banail oilo, bade fu’r samṛadi aroḳan sani toiar ḳoria er ufre guri deoa oilo.
20Bade babla laḳṛidi ḳoeḳan freim banail oilo. 21Forteḳ freim asil lambae dosh at ar faṛe deṛ at. 22Forteḳ freimo dugu ḳori faea lagaia goror hoḳol freim eḳlaḳan anaila. 23Ou goror dokkin galar lagi bishḳan freim zuit ḳorla. 24I bisho freimor faear tole sallishgu rufar bura lagaila. Forteḳ freimor dui faear tole dugu bura lagailo oilo. 25Allar goror uttor galar lagio bishḳan freim zuit ḳorla. 26I forteḳ freimor faear tole sallishgu rufar bura lagaila. Eḳo freimor tole dugu ḳori bura lagail oilo. 27Ar fosim galar lagi, mani ḳor galar lagi soeḳan freim banaila. 28Ar ḳoror duio kunat duḳan freim lagaila. 29I duio kunar freimre ḳasar freimor loge tole-ufre zuṛa deoa oilo. Fortek kunar duio freimre daror freimor loge batti maria zuṛa deoa oilo. 30Teu aṭḳan freim ar shulogu rufar bura laglo, eḳo freimor tole duiṭa ḳori bura dila.
31Bade freimor zuṛa dibar lagi babla laḳṛidi ḳoegu lamba batti banaila. 32Goror eḳ galar lagi fasgu batti, aroḳ galar lagi aro fasgu, ar fasgu batti ḳor gala, mani fosim galar lagi banaila. 33Freimor mazḳano lagail ou battidi hoḳol freimor eḳ mata taki aroḳ mata aṭḳai dila. 34Bade i freimḳanain shunadi lefila. Ar batti laganir lagi shunar ḳoṛa lagaia, battireo shunadi lefila.
35Ou ustad ḳarigor oḳole dami lilen ḳafoṛdi ekkan forda banaila. Fordar ufre lil, baingoni, lal suta dia karubi oḳolor sobi bain ḳorla. 36I forda ṭananir lagi babla laḳṛidi sairṭa kuṭi banaila, banaia ou kuṭintoreo shunadi lefila, kuṭintor matat shunar ḳoṛa lagaila. Kuṭir tole bura dibar lagi rufar sairṭa bura banail oilo.
37Tambur duaror lagi lil, baingoni, lal suta ar dami lilen ḳafoṛdi noksha ḳori ekkan forda banaila. 38I fordar lagi fasṭa ḳoṛa ar fasṭa kuṭi banail oilo. Kuṭir mata ar tol shunadi lefa oilo, kuṭir tolor burar lagi fitolor fasgu bura banaila.
37Shahadot shonduk banaila
1Batselole babla laḳṛidi fobitro shahadot shonduk banaila. Iṭa aṛai at lamba, deṛ at fash ar deṛ at usa. 2Er bare-bitre ḳaṭi shunadi lefila, er sairo kinarao shunar noksha lagaila. 3Hunaror aguindi fuṛia sairṭa shunar ḳoṛa er sairo kunat lagaila, o galat duiṭa ar ho galat duiṭa lagaila. 4Babla laḳṛidi dugu benda banaia shunadi lefila. 5Shonduk boia neoar lagi i duio benda, shonduḳor dui galar ḳoṛar bitredi haraila.
6Bade ḳaṭi shunadi shonduḳor ekkan sani banaila, oḳanor ufre gunar kofora adae ḳorar lagi. I sani lambae aṛai at, ar fashe deṛ at. 7Shuna fiṭaia sanir duio galat duiṭa karubi banaila. 8Duio karubi shonduḳor sanir dui kinarao roilo. I duio karubi sanir loge ekkano ḳori banail oilo, i astaṭa ḳali eḳ siz oilo. 9Karubi deḳte Duldul guṛar laḳan ḍaḳna-ala, er duio ḍaḳna ufredi melia deoae, ou ḍaḳnar saear tole shonduḳor sani hamaigelo. Iṭa mukamuki uba roilo. Ar tarar souḳ roilo sanir bae.
Fobitro ruṭi toibar ṭebul
10Batselole bade babla laḳṛidi dui at lamba, eḳ at fash ar deṛ at usa ḳori ekkan ṭebul banaila. 11Banaia harle ḳaṭi shunadi lefia er sairo kinarao noksha lagaila. 12Ar er sanir sairo kinarao sair angul usa ḳori eḳ haz dila, hazor maze shunadi noksha lagaila. 13Ṭebulor sairo kunar faear ufre shunar sairṭa ḳoṛa lagaila. 14I sairo ḳoṛain ṭebulor kunar hou usa hazor tole lagani oilo, zate ṭebul boia neoar bala ḳoṛar bitre benda harail zae. 15Ṭebulre boia neoar lagi babla laḳṛidi dugu benda banaia shunadi lefila. 16Ṭebulor uforor tal-bashon, Allar name Shorbot-Fanir Kurbanir zog ar mog, hoḳolta ḳaṭi shunadi goṛaila.
Lem toar seragdani
17Bade ḳaṭi shunadi ekkan seragdani tiar ḳorla. Seragdanir tola ar uforor ḍanḍi ḳaṭi shuna fiṭaia goṛaila. Er ḍanḍi, fulor laḳan fiala, kuṛi ar fafṛi oḳol seragdanir loge ekkano ḳori banaila. 18Seragdanir ḍanḍir dui galat tinṭa ḳori muṭ soeṭa ḍal deoa oilo. 19Forteḳ ḍalor maze zoba fulor laḳan tingu ḳori fiala tiar ḳora oilo. Seragdanir soeo ḍalo eḳlaḳan ḳam ḳora oilo. 20Seragdanir mul ḍanḍir mazeo zoba fulor laḳan sairṭa fiala deoa oilo. 21Ou mul ḍanḍi taki baroilo soeṭa ḍalor maze, foela duio ḍalor zuṛat egu ḳori kuṛi, dusra duio ḍalor zuṛat arok kuṛi, ar heshor duio ḍalor zuṛato kuṛi lagail oilo. 22Kuṛi ar ḍal hoḳolta seragdani taki baroilo, hoḳolta milia eḳ siz oilo. Astaṭau ḳaṭi shuna fiṭaia banani oilo. 23Ḳaṭi shunadi shatṭa lem, lemor fita saf ḳorar simṭa, zalail fitar sali toar lagi ḳoegu baṭi banail oilo. 24Eḳ mon ḳaṭi shunadi i seragdani, ar logor hoḳolta tiar ḳora oilo.
Agor-kushboe zalani ḳana
25Bade babla laḳṛidi sairkuna-ala agor-kushboe zalani ḳana banail oilo. Eḳ at lamba, eḳ at fash, ar dui at ubi dia i zalani ḳana banaila. Er sanir kunar hing oḳolo ekkano ḳori banaila. 26Sani, sanir sairo kinara ar hing, hoḳolta ḳaṭi shunadi lefia sairo kinarao shunar noksha lagaila. 27Er dui kinaror nokshar tole duigu ḳori shunar ḳoṛa lagail oilo, zate er bitre benda haraia boia neoa zae. 28Babla laḳṛidi boia neoar benda banaila, iṭareo shunadi lefila.
29Bade kushboeala moshla bananir ḳarigoror niome ḳelafoti boḳshibar fobitro tel ar kushboeala ḳaṭi agor tiar ḳorla.
38Zalail kurbani ḳana ar ozur fanir gamla banaila
1Zalail kurbanir lagi babla laḳṛidi fas at lamba, fas at fash ar tin at ubi dia sairkuni ḳori ekkan kurbani ḳana banaila. 2Er sairo kunar ufre laḳṛidi sairṭa hing dila. Ou hing banaila sanir uforor kunar laḳṛi kudia, erlagi i astaḳan eḳ siz oilo. Bade fura kurbani ḳana fitoldi lefaila. 3Kurbani ḳanar sali tular lagi boṛo samos ar sali toar gamla, lou toar baṭi, gust tular simṭa, angra toar fatil, hoḳolta fitoldi banaila. 4Kurbani ḳanar lagi fitoldi ekkan zali banaila, banaia i zalire kurbani ḳanar bitoror mazḳanor sairo galar taṛiar tole lagaila. 5Ar benda haranir lagi zalir sairo kunat sairṭa ḳoṛa lagaila. 6Boia neoar benda banaila babla laḳṛidi, banaia duiogu fitoldi lefaila. 7Ar kurbani ḳanare boibar lagi er kunar ḳoṛar bitre ou benda haraila. Kurbani ḳana banaila toḳtadi, ar er bitre pak raḳla.
8Ozur fani toar lagi fitolor eḳ gamla banaila. Ebadoti ḳamor lagi zeta beṭin tambur duaror ḳasat aita, tarar fitolor aenadi i gamla ar er soki-ḳaṭ toiar ḳora oilo.
Allar goror uṭan
9Batselole Allar goror sairo galabae uṭanor zaga raḳla. Uṭanor dokkin galar eḳ-sho at zagar lagi dami lilen ḳafoṛdi forda banaila. 10I forda ṭananir lagi bishgu kuṭi banaila. Kuṭir tolat dibar lagi fitolor bishgu bura banaila, ar forda ṭananir lagi rufar ḳoṛa ar bandibar tar banaila. 11Uṭanor uttor galar eḳ-sho at zagar lagi bishgu kuṭi, kuṭir tole dibar lagi fitolor bishgu bura, ar forda ṭananir lagi rufar ḳoṛa ar bandibar tar banaila. 12Fosim galar fonchash at uṭanor lagi forda, doshgu kuṭi, doshgu bura, forda ṭananir lagi rufar ḳoṛa ar bandibar tar banaila. 13Fub galar uṭano fonchash at asil. 14Uṭanor geiṭor eḳ galar lagi fonro at lamba forda, tinṭa kuṭi, kuṭir tolor tingu bura, 15ar dusra galato ou laḳan ḳori tinṭa kuṭi, tinṭa bura ar fonro at forda banail oilo. 16Uṭanor sairo galar hokkol fordain dami lilen ḳafoṛdi banail oilo. 17Kuṭir tolor hokkol bura fitolor, forda ṭananir ḳoṛa ar bandibar tar oilo rufar, kuṭir matao rufadi fesail oilo. Uṭanor sairo galar hokkol kuṭit rufar tardi banda oilo. 18Uṭanor geiṭor lagi dami lilen ḳafoṛdi ekkan forda banail oilo. Bade lil, baingoni, lal sutadi noksha ḳora oilo. Fordaḳan bish at lamba, ar uṭanor baki fordar laḳan iṭao fas at usa deoa oilo. 19Er sairo kuṭi ar bura fitolor, kuṭir ḳoṛa ar bandar tar rufar, kuṭir matao rufadi fesai deoa oilo. 20Allar gor ar uṭanor sairo galar kuṭir fereg oḳol fitoldi banail.
Allar goror mal-samanar hishab
21Allar gor mani ou shahadot tambu banaite zeta mal-samana lagsil, imam Harunor fua Isamaror zimmae Lebi ḳandanor manshe itar hishab raḳla. Musa nobie ou hishab raḳar hukum disla. 22Mabude Musare zelaḳan hukum disla, i hukum mafik Ehuda gusṭir Urir fua Batselole ita hokkolta banaila, tain asla Huror nati. 23Dan gusṭir Ohisamaḳor fua Aholiabe Batselolre shaijjo ḳorla. Hoḳol zator ator ḳam ar noksha bananir ḳamo tain ustad asla. Dami lilen ḳafoṛor maze lil, baingoni, lal sutadi noksha ḳorar ḳamo-o tain ustad asla.
24Dulona Kurbani taki faoa untish mon shat-sho tish tola shuna ou ebadot ḳana banaite lagse. I maf oilo ebadot ḳanar tular mafe.
25Boni Israilor manush gonibar bala zerare gona oisil, tarar ges taki eḳ-sho mon eḳ azar shat-sho fosottoir tola rufa faoa gesil, i maf oilo ebadot ḳanar mafe. 26Gona oise oula manush, mani bish boros ba er saite beshi boeoshala, hou soe lak tin azar shaṛe fas-sho manshe ebadot ḳanar mafe mata fisu ada tola ḳori rufa disil. 27I rufa taki eḳ-sho mon rufa dia ebadot ḳana ar fordar kuṭir tolor bura banail oisil. Eḳ eḳ burat eḳ mon rufa dia muṭ eḳ-shogu bura banail oise. 28Ar baki eḳ azar shat-sho fosottoir tola rufa kuṭir ḳoṛa, kuṭir mata fesani, ar bandibar tar bananit lagse.
29Dulona Kurbani taki lillar fitol dola oisil shottoir mon dui azar sair-sho tola. 30Ita dia milon-tambur duaror bura, fitolor kurbani ḳana, er fitolor zali ar kurbani ḳanar hokkol siz banail oise, 31uṭanor sairo galar bura, geiṭor bura, tambu ar uṭanor sairo galar kuṭir fereg banail oise.
39Fordan imamor fobitro lebas
1Allar goror faḳ zagat imamoti ḳamor shomoe findar lagi, tara lal, baingoni ar lil sutadi shundor ḳori lebas banaila. Mabude Musare zela hukum disla, ekkere ou laḳan ḳori imam Harunor lagi fobitro lebas banaila.
2Ou ustad ḳarigor oḳole lil, baingoni, lal suta, dami lilen ḳafoṛ ar shunadi fordan imamor efron banaila. 3Shuna fiṭaia fat banaia, sutar laḳan shunar tar tiar ḳorla. Bade lil, baingoni, lal suta, dami lilen ḳafoṛ ar shunar tar eḳloge milaia ḳafoṛ banaila. 4Efronor ḳandor gala zuṛa dibar lagi duḳan foṭṭi banaia, efronor uforor kunat lagaila. 5Efronor loge zuṛa lagail feṭor uforor belṭḳano efronor sutadi banaila. Tara lil, baingoni, lal suta, dami lilen ḳafoṛ ar shunar tar dia ṭik efronor nomunae banaila. Mabude Musare zela hukum disla, ekkere ou laḳan ḳori hokkolta banail oilo.
6Bade tara duiṭa akik fattor ḳaṭia, er ufre shunar zazoir boaila. Hunar oḳole dami fattor kudia zela shil banain, oula fattor kudia Israilor fuaintor nam lekla. 7Ar ou duio fattor shunar zazoiror maze lagaia, efronor ḳandor fitar loge bandila. Israilor fuaintor bae Mabudor nozor raḳar lagi ila ḳorla. Mabude Musare zela hukum disla, oula hoḳolta ḳora oilo.
8Bade efronor laḳan bala ustad dorziredi lil, baingoni, lal suta, dami lilen ḳafoṛ ar shunadi buḳor uforor toli banail oilo. 9Iṭa oilo lambae ada at, fashe ada at, sairkuni dui bainj ḳora ḳafoṛ. 10Er ufre tara sair hair ḳori dami fattor lagaila. Foela harit iakut, fit ar fanna moni; 11dusra harit lal-moni, lil-moni ar hira; 12Tin nombor harit firuz, gumed ar foddorag moni. 13Sair nombor hairo fuḳraz, boidurjo ar shuruz moni. I fattor oḳol shunar zazoiror ufre lagail oilo. 14Israilor baro fuar lagi baroṭa fattor lagaila. Ita eḳo fattoro eḳ eḳ fuar nam kudia leḳa oilo, zela kudia shil banail oe.
15Buḳor uforor tolir lagi ḳaṭi shunadi rosir laḳan fesaia duksa chein banaila. 16Ar shunar duḳan zazoir ar duiṭa ḳoṛa banaia, buḳor ou tolir uforor dui kunat lagaila. 17Ar chein duiogesa duio ḳoṛar loge aṭḳaila. 18Duio ḳandor efronor samonor fitat shunar zazoiror loge cheinor eḳ mata bandila. 19Aro duiṭa shunar ḳoṛa banaia buḳor uforor tolir dui kunat lagaila. I duioṭa efronor loge buḳor tolir tole roilo. 20Bade aro duiṭa shunar ḳoṛa banaia, efronor ḳandor foṭṭir shoi toledi, feṭor uforor belṭor uforor silair ḳasat lagai dila. 21Ar bukur uforor tolir tolor ḳoṛar loge feṭor uforor noksha ḳora belṭor ḳoṛa bandila, ar ou tolie loṛa-soṛa na ḳorar lagi tolor ḳoṛar loge lil sutadi bandi dila, zela Mabude Musare hukum ḳorsla.
22Bade tara efronor tolor alḳella lil rongor sutadi bain ḳorla, 23ar mata haraibar bala golar pak siṛto na ḳori er sairo gala foṭṭi dia doṛ ḳori bain ḳorla, golar ou pak raḳla maz borabor. 24Lil, baingoni, lal rongor fesail sutadi anuar folor laḳan banaila. Banaia oguinre alḳellar tolor muṛir sairobae lagaila. 25Bade ḳaṭi shunar gungur banaia ou anuaror faḳe faḳe lagaila, 26asta tolor muṛit ekgu ḳori anuar ar ekgu ḳori gungur lagail oilo. Ebadoti ḳamor bala imam sabe ou alḳella findita. Mabude Musare zela hukum disla, ekkere oula ḳora oilo.
27Bade tara Harun ar tan fuaintor lagi dami lilen sutadi fainjabi banaila. 28Matar faugṛi ar tokiguino dami lilen ḳafoṛdi banaila, ar imamor haf-penṭo banaila ou ḳafoṛdi. 29Ḳomoro bandar lagi ekkan ḳafoṛ banaila, dami lilen ḳafoṛ, lil, baingoni ar lal sutadi noksha ḳori banaila. Mabude Musare zela hukum disla, ekkere oula ḳora oilo.
30Ar faugṛir samne laganir lagi, ḳaṭi shunar fatdi ekkan fobitro taz tiar ḳorla. Shilor ufre zela kudia leka oe, ou fattor ufre ola kudia lekla, ‘Mabudor name fobitro.’ 31Mabude Musare zela hukum disla, ou hukum mafiku i fatre lil sutadi faugṛir samne bandi dila.
Musa (a:)-e hoḳolta shomzia nila
32Ou laḳan milon-tambu shoho Allar goror hokkol ḳam-ḳaz shesh oilo. Mabude Musare zela hukum disla, Boni Israile ekkere ou laḳan hoḳolta ḳorla. 33Bade tara Allar goror lagi banail hokkolta Musar ḳasat loia aila. Tara anla:
milon-tambu, tambur hoḳol mal-samana, huk, freim, batti, kuṭi, kuṭir tolor bura;
34lal rong ḳora meṛar samṛar sani, fur samṛar sani, ḳas faḳ zagare beṛa deoar forda;
35shahadot shonduk, shonduk boia neoar benda, shonduḳor sani;
36ṭebul, ṭebulor hoḳol siz, Mabudor namor fobitro ruṭi;
37ḳaṭi shunar seragdani, er logor hoḳol siz, zalanir tel;
38shunar agor-kushboe zalani ḳana, ḳelafotir tel, kushboeala agor, Allar goror duaror forda;
39fitolor kurbani ḳana, fitolor zali, kurbani ḳana boia neoar benda, kurbani ḳanar hokkol mal-samana, ozur gamla ar er tolor soki-ḳaṭ;
40uṭanor fordain, kuṭin, kuṭir tolor bura, uṭano hamanir geiṭor forda, uṭanor fereg ar doṛi;
ek kotae, milon-tambu shoho Allar goror hokkol mal-samana;
41ar faḳ zagat imamoti ḳamor lagi imam Harunor fobitro lebas, ar tan fuaintoro imamotir lebas.
42Mabude Musare zela hukum disla, ou laḳan Boni Israil oḳole hoḳol ḳam ḳorla. 43Heshe Musae ita hoḳolta dekia buzla, Mabude zela hukum disla, ou laḳanu ḳora oise. Erlagi tain hoḳol Boni Israilre dua dila.
40Allar gorre ḳaṛa ḳora
1Mabude Musa nobire ḳoila, 2“Tumi bosoror foela sandor foela tariḳo milon-tambu shoho amar gorre ḳaṛa ḳorio. 3Goror bitre shahadot shondukre haraia, maze forda ṭanaia shondukre aoṛe toio. 4Ṭebulreo bitre haraia, er uforor siz oḳol hazaio. Bade seragdani bitre ania tar lem oḳol zalai dio. 5Shunadi banail agor-kushboe zalani ḳana shahadot shonduḳor samne toio, toia amar goror duaror forda lagaio. 6Amar goror milon-tambur duaror samne zalail kurbani ḳana toio. 7Kurbani ḳana ar milon-tambur mazḳano ozur gamla fanidi boria toio. 8Bade uṭanor sairo galabae forda ṭanaio, ar uṭanor geiṭo-o forda lagaio.
9“Bade tumi ḳelafotir tel dia amar gor ar amar goror hoḳol mal-samanare fobitro ḳorio. Teu ita hoḳolta moha faḳ-fobitro oibo. 10Ar zalail kurbani ḳanar ufreo ḳelafotir tel dia fobitro ḳorio. Kurbani ḳanar hoḳol mal-samanareo fobitro ḳorio. Teu i kurbani ḳana moha-fobitro siz oibo. 11Ozu ḳorar gamla ar er tolor soki-ḳaṭreo ḳelafotir tel dia fobitro ḳorio.
12“Bade Harun ar tar fuainre milon-tambur duaror samne ania fanidi naoai dio. 13Naoanir bade Harunre faḳ-fobitro lebas oḳol findaio, ar amar imam oar lagi tare fobitro tel lagaia ḳelafoti dia fobitro ḳorio. 14Tar fuaintore ania imamotir fainjabi findaio. 15Tarar bafore zela fobitro teldi imamoti ḳamor ḳelafoti diso, tarareo oula ḳelafoti dio, zate tarao amar imamoti ḳam ḳorta faroin. I ḳelafotir mazdi imamotir ze niom salu oibo, ita oarishor for oarish dori salu roibo.”
16Mabudor hukum mafik Musae ita hoḳolta ḳorla. 17Dusra bosoror foela sandor foela tariḳo Allar gor ḳaṛa ḳora oilo. 18Musae i gor ḳaṛa ḳorla, foela er kuṭir tolor bura boaila, kuṭin uba ḳorla, beṛar freim lagaila, freimor bitredi batti dila. 19Mabudor hukum mafik tain sagolor ruma dia goror foela sani dila, er ufre dila aro duiṭa sani.
20Bade hou duioḳan fobitro shahadot-fattor ania shonduḳor bitre haraila. Shonduk boia neoar benda lagaila, shonduḳor uforor sanio lagaila. 21Ar shondukre nia Allar goror bitre haraila. Haraia forda ṭanaia shondukre aoṛe raḳla, zela Mabude Musare hukum disla.
22Shonduḳor ou fordar bare uttor galabae, milon-tambur maze fobitro ruṭir ṭebul raḳla. 23Ṭebulor ufre Mabudor namor fobitro ruṭi hazaia toila, zela Mabude Musare hukum disla.
24Ṭebulor samne tambur dokkin galat seragdani toila. 25Bade Mabudor samne lemguin zalaila, zela Mabude Musare hukum disla.
26Milon-tambur mazḳanor fordar samne shunadi banail agor-kushboe zalanir ṭebul toila. 27Oḳanor ufre kushboeala agor zalaila, zela Mabude Musare hukum disla. 28Bade Musae duaror forda ṭanaila.
29Tain Allar goror milon-tambur duaror ḳandat zalail kurbani ḳana toila. Toia er ufre zalail foshu kurbani ar dan-gomor sodga dila, zela Mabude Musare hukum disla.
30Bade milon-tambu ar kurbani ḳanar mazḳano ozur gamla toila, toia ozur fani boria dila. 31Ou fani dia Musa, Harun ar Harunor fuainte ozu ḳorta. 32Mabudor hukum mafik tara milon-tambut hamanir age, ba kurbani ḳanar ḳandat zaoar age ozu ḳorta. 33Bade Musae Allar gor ar kurbani ḳanar sairobae forda ṭanaia uṭan banaila. Uṭanor geiṭor forda lagaila. Ou laḳan Musae tan hoḳol ḳam shesh ḳorla.
Allar mohima zair oilo
34Ḳam shesh ḳoria harle, gaibi megor kuṭi aia ou milon-tambure gurililo, Mabudor mohima ar kudrote asta gor bori gelo. 35Erlagi Musa ar milon-tambut hamaita farla na, ḳaron er ufre hou megor kuṭi asil, ar Mabudor kudroti mohimae asta gor bori gesil.
36Boni Israilor ou asta soforor maze, Allar goror ufre taki megor kuṭi horia harle tara aṭia roana dita. 37Oile megor kuṭi ufre taki na hora forzonto tara baroita na, ou kuṭi horar lagi bar saita. 38Ḳaron Boni Israilor ou asta soforor mazeu, dinor bala tarar sokur samne Allar goror ufre megor kuṭi roito, ar raitor bala roito aguinor kuṭi.