al-Ifisia

Fobitro Injil Shorif 10 nombor sifara

al-Ifisia

Forisiti

Fobitro asmani kitabor ou sifara Allar hukume leḳsoin, Hozrot Isa al-Mosir sahabi Hozrot Paulus (ra:). Hozrot Isae behesto toshrif neoar onuman 27 bosor bade ikan leḳa oise. Allar kalam toblig korae tain ou shomoe zel ḳanat bondi asla.

Ifis ṭauno boshot ḳorra Hozrot Isar ummotre utshaho dibar lagi tain siṭir aḳare ou sohifa leḳsoin. Tain age ou ṭauno tin bosor roia zomat tiar ḳorsoin. On taki bidae bala tain ḳoisla, “Mono raḳba, ami tin boros doria rait-din soukor fani falaia afnarare hushiar ḳorte dom loisi na.” (Sahabi Nama 20:31)

Ou sohifar mul boean oilo, Alla Pakor batuni munsha zair oa. Leḳoke ḳoira, Allar oada ḳora al-Mosir mazdi hou batuni munsha oḳon zair oise. Al-Mosie toshrif anar age ḳali Boni Israil zati asil Allar ḳas proza, oile tain aia hari duniar tamam zatir loge Alla Pakor milon goṭaisoin. Tan nizor zan kurbani dia hoḳolre eḳ shoman odikar faoar fot ḳori disoin. Ou sohifar maze fak-fobitro zindegi ḳaṭani ar Iblisor birudde zuddo ḳorar ḳotao zanail oise.

Ermaze ase,

(1) Salam, dua ar shukria 1 ruku

(2) Hozrot Isar usillae Allar noea proza 2—3 ruku

(3) Allar nure noea zindegi ḳaṭao 4:1—6:9 aeat

(4) Allai atiardi Iblisor loge zuddo ḳoro 6:9-24

¹Ami Paulus, Alla Pakor morzi mafik Hozrot Isa al-Mosir eḳzon sahabi. Ifis ṭaunor maze al-Mosir torikar pak bonda ar mumin oḳolor gese ami Pauluse ou sohifaḳan leḳram. ²Amrar gaibi baf Alla Pake ar Hozrot Isa al-Mosie afnara hoḳolor ufre rohomot ar shanti nazil ḳoroukka.

Hozrot Isa al-Mosir mazeu rohomot

³Alla Pakor tarif ouk, tainu Isa al-Mosir Alla ar tan gaibi baf, ar ou Hozrot Isau amrar malik. Alla Pake to al-Mosir usillae asmanor forteḳ nomunar ruhani rohomot amrare dan ḳorsoin. ⁴Alla Pakor dorbaro amra zate fak-fobitro ar nikut oitam fari, ou kiale tain i dunia foedar ageu, nizor maea-mohobbote al-Mosir usillae amrare fosond ḳorsoin. ⁵Allae tan nizor morzi ar nizor kushie ageu ṭik koria raḳsoin, zate Isa al-Mosir usillae amrare tan afon aolad hishabe ḳobul ḳorba. ⁶Allae ita ḳorsoin, zate tan ḳas maear zon Isar usillae amrare zoto forimane rohomot ar mohima dan ḳorsoin, otae tan tarif oe.

⁷Al-Mosir fobitro kurbanir usillae tan lour bodla amra gunar shaza taki ḳalas faisi, amra ou mafi faisi, ita to Alla Pakor ḳas rohomot. ⁸Ou rohomot to Allae tan ḳas aḳol-hekmote amrar ufre ḍalia disoin. ⁹Tain age taki zelaḳan kial ḳorsla, al-Mosir mazdi zeta ḳorar niot ḳorsila, ou kial-kushir hokkol batuni befar tain amrare zanaisoin. ¹⁰Tain to ageu oḳan ṭik koria raḳsila, zate shomoe fura oia harle, tan afon morzi mafik asman-zominor hokkoltare ekkano ḳoria, al-Mosir aotae anba. ¹¹Allae tan nizor aḳol-insaf dia nizor morzi mafik hoḳol ḳam ḳoroin. Tan munsha mafik tain ageu zeta ṭik koria raḳsila, hou munsha mafik tain amrareo fosond ḳorsoin al-Mosir usillae tan ḳas bonda oar lagi. ¹²Erlagi amra zera ag takiu al-Mosir ufre borosha ḳortam, ou amrar mazdiu zate Allar gourob-mohimar tarif oe, ou kialeu tain amrare fosond ḳorsoin.

¹³Ar afnarao Allar hok kalam, mani nazator kush-ḳobri faia al-Mosir ufre iman anchoin. Al-Mosir ummot oae Alla Pake tan oada ḳora Pak Ruh dia afnaintore sil-sappoṛ marsoin. ¹⁴Te zeta manshore Alla Pake tan nizor shompod ḳoia ḍakisoin, erare tain eḳṭa odikar dibar oada ḳorsoin. Erlagi zotodin forzonto era furafur ḳalas na oisoin, otodin forzonto ou odikaror foela kishti hishabe erare Pak Ruh dan ḳorsoin. Ar ou hokkoltar mazdi Allar gourob-mohimar tarif oibo.

Hozrot Paulusor shukria ar munazat

¹⁵Te Hozrot Isar ufre afnara iman anchoin ar Allar hoḳol bondareu afnara maea-mohobbot ḳorra, ou ḳobor ami zebla hunlam, ¹⁶hunar bad takiu, ami afnarar lagi Allar dorbaro shukria adae ḳora kunu shomoyo bond ḳorsi na. Ami zebla munazat ḳori, i shomoe afnaintor ḳota fauri na. ¹⁷Ami Allar dorbaro aroz ḳori, amrar malik Isa al-Mosir Allae, zalal ar shanala gaibi bafe afnaintore ruhani aḳol ar buzar ḳemota deukka. Teu afnara aro balamonte tanre sinba. ¹⁸Ami aro munazat ḳoriar, afnarar dilor souk kuli zauk, teu Allai daot faia afnarar dilor maze ze eshki foeda oise ota aro balamonte buzba. Erloge eoḳano buzta farba, Allar dorbaro tan pak bonda oḳol ḳoto boṛo shompotti. ¹⁹Ar amra zera tan ufre iman anchi, amrar dilor maze ḳoto boṛo shoktie ḳam ḳorer. I shokti oilo, tan kudrotor mohashokti. ²⁰Ou shoktir boleu tain al-Mosire mora taki zinda ḳorsoin, ar behestor arshe-azimo tan ḍainor toḳto nia boaisoin. ²¹Asmanor hokkol nomunar ḳemota, shashon, shokti, ar bahaduri zarar ato ase, era hoḳolreu tain al-Mosir tole raḳsoin. Ar zare ze nameu ḍaḳa oe na ḳene, ita i zogotor ouk ba aḳeri zogotor ouk, hokkol namor ufre Isa al-Mosir nam. ²²Allae hokkoltareu al-Mosir aotae raḳsoin. Manshor mata zela tar shorilor bashsha, al-Mosire ola zomator mata, mani bashsha hishabe boail ḳorsoin. ²³Ar i zomat oilogi al-Mosir shoril. Zein asman-zominor hokkoltare shullo-ana furafur ḳorsoin, ou al-Mosie zomatre furafur ḳoroin.

Mora zindegi taki zita oa

¹Tumra to guna ar naformanir maze mora aslae. ²Zogotor babor maze foṛia tumrao eḳ shomoe hou naformani ar gunar fote sola-fira ḳortae. Ze bod ruh asmanor hoḳol taki shoktiala raza, hou bod ruhe naforman oḳolor bitre ḳam ḳore, ar tumrao hou bod ruhur murid aslae. ³Amra hoḳoleu eḳ shomoe gunar shobabor gulam bonia, ota naforman manshor laḳan zindegi ḳaṭaitam. Ou bod shobab taki ze bod ḳaish amrar dilo aito, amra ola ḳam ḳortam. Ar ou ḳam-ḳazor lagi hota manshor laḳan amra-o Allar gozobor laḳ aslam.

⁴Oile Alla Pak to rohomotor banḍar; tain amrare kub beshi maea-mohobbot ḳoroin. ⁵Erlagiu naformani ḳoria amra zebla mora zindegir maze habu-ḍubu ḳaislam, hou shomoe al-Mosir loge tain amrare zinda ḳorla. Allar rohomote tumra rehai faiso. ⁶Amra al-Mosir loge asi, erlagi Allae amrare al-Mosir loge zinda ḳoria, tan loge ḳori behestor bitre boaisoin. ⁷Tain ita ḳorsoin, zate tan moha-mulloban rohomot oḳol zuge zuge siroḳal deḳaita faroin. Al-Mosir usillae tain amrare ze doya ḳorsoin, ou doyar mazdi tan i rohomotor ḳota zair oise. ⁸Allar rohomote iman anae tumra nazat faiso. Ita tumrar nizor kunu amolor fol nae, ḳali Allar deoa dan. ⁹Ita to kunu nek kamor bodla nae, zate ḳeu kunu laḳan boṛai ḳorto na fare. ¹⁰Amra to Alla Pakor ator foeda. Tain al-Mosir ummot hishabe amrare hirbar noea ḳori foeda ḳorsoin, zate amra nek kam ḳori. Ou nek kam tain age takiu ṭik koria raḳsila zate amra ola zindegi ḳaṭai.

Hozrot Isar hoḳol ummot eḳ

¹¹Zonmogoto babe tumra oilae bidormi zatir manush. Manshor at dia zarare shorilo mosolmani ḳorail oise, era ḳoira, tumra bule mosolmani ḳoraiso na. ¹²Te mono rakio, age to tumra al-Mosir ges taki horail aslae; tumra aslae Allar fosond ḳora Boni Israilor bairor manush. Allae Boni Israilor loge milonor zoto laḳan usillar oada ḳorsoin, itar loge tumrar to kunu shomporko asil na. Tumrar kunu ashao asil na; tumra aslae i duniat Alla saṛa zati. ¹³Ek kotae, tumra Alla taki duroi aslae. Oile oḳon Isa al-Mosir ummot oae, tan kurbanir lour usillae tumrare Allar daro ana oise.

¹⁴Tainu amrar shanti. Israil zati ar bin zati, hokkolre tain ek korsoin. I duio zatir maze dushmonir ze oal asil, i oalre tain bangia surmar ḳorsoin. ¹⁵Ar solibor ufre nizor ḳaeare kurbani dia, tain Musa nobir shoriotor hoḳol hukum-ahkam ar ain-ḳanunor ḳemotare batil ḳorsoin. Tan ila ḳorar ḳaron oilo, tain saila, ou duiota dia tan nizor noea eḳ zati foeda ḳorta, zate ou zatir mazdi i duio dolor maze shanti oe. ¹⁶Ar tain saila, solibor ufre tan nizor zan kurbanir usillae, ou duio dolre tain ekkano ḳoria Allar loge milon goṭaita. Erlagi ou duio dolor maze dushmonir ze bab asil, i dushmonire tain ekkebare miṭai disoin. ¹⁷Tumra eḳ shomoe Alla taki duroi aslae, ar Boni Israil oḳol ḳasat asla, oḳon tain aia ou duio dolor gese-u shantir kush-ḳobri toblig korsoin. ¹⁸Er fole tan usillae amra duio dol Pak Ruhur mazdi, amrar behesti baf Alla Pakor dorbaro azir oitam fari.

¹⁹Erlagiu tumra oḳon bairor manush nae, bin zatio nae. Borong Allar ḳas bonda oḳolor loge tumrao Allar bashshai ar tan foribaror shodoishsho bonigeso. ²⁰Sahabi ar nobi oḳol oila tan goror kuṭi, ar Hozrot Isa al-Mosi oila mul ian kuṭi. Ou kuṭir ufreu tumrare goṛa oise. ²¹Al-Mosir loge zuṛa lagae, asta goror hoḳol ongsho eḳloge milia ekkan fobitro gor tiar oise. ²²Tumrao aia tan loge zuṛa lagso, mani tan ummot oiso, Erlagi tumrareo eḳloge goṛia tula or, zate Pak Ruhur mazdi i goror maze Allar boshot ḳana oe.

Bin zatir lagi Hozrot Paulus

¹Ou ḳarone ami Pauluse Allar dorbaro dua ḳoriar. Ar tumra zara bin zati, tumrare Isa al-Mosir torikar daot deoar lagiu ami oḳon zelo bondi oisi. ²Tumra nichoe huncho, Allae amare ou ḳas daeitto disoin, tan rohomotre ami tumrar ato fousai ditam. ³Allae tan nizor batuni munsha ohir mazdi amare zanaisoin, ar ou befarḳan ami tumrar gese shongkefe leḳlam. ⁴Ikan foṛle tumra buzbae, al-Mosir befare ou batuni bishoe buzar ḳemota amar ase. ⁵I batuni befarḳan sahabi ar nobi oḳolor gese zela Pak Ruhur mazdi oḳon zair or, agor zomanar kunu manshor gese-u ila zair oise na. ⁶Ar i batuni befar oilo, Injil shorifor kush-ḳobrir mazdi bin zati oḳolo Isa al-Mosir loge eḳ oia, Boni Israilor loge Allai odikaro shorik oe, hoḳol eḳ shorilor ongsho oe, eḳoi oadar duar bagi oe. ⁷Allae tan moha kudrotor bole amare rohomot dan ḳorsoin, ar zela rohomot faisi, ola kush-ḳobri tobligor daeitto adae ḳorram.

⁸Allar hokkol bondar maze ama taki huru ar ḳeu nai, ta-o al-Mosir ze donor ḳota shullo-ana buza zae na, ou mulloban donor kush-ḳobri bin zatir gese tobligor daeitto amar ufre disoin, itau Allar rohomot. ⁹Ar tan batuni munsha kila ḳamo lagail zae, ikan zair ḳorar baro tain amar ufre disoin. Zein asman-zomin hokkolta foeda ḳorsoin, hou Allae otodin doria ita batuni raḳsila. ¹⁰Tain ita batuni raḳar ḳaron oilo, asmanor hoḳol raza ar ḳemota-ala hoḳolor gese, Allar nanan nomunar aḳol-hekmot al-Mosir zomator mazdi oḳon kula-mela oe. ¹¹Tan nizor siroḳalor munsha mafik ita oise, ar ou munsha-morzi amrar malik Isa al-Mosir mazdi fura ḳorsoin. ¹²Tan loge shorik oia imanor bole, bukut shaosh rakia Allar samne amra azir oar eḳtiar faisi. ¹³Erlagi ami tumrare minot ḳoriar, ami duk-mosibot shoijjo ḳoriar dekia tumra nirash oio na. Ita to tumrar lagiu shoijjo ḳoriar, erlagi gourob ḳoro.

Mumin oḳolor lagi munazat

^14-15Te asman-zominor hoḳol zandarre zein foeda ḳorsoin, ami aṭu gaṛia hou batuni bafor samne munazato boisi. ¹⁶Ami dua ḳori, Allae zanu tan oshesh kudrotor bole tumrare omon bol-shokti dein, zate Pak Ruhur mazdi tumrar dil mozbut oe, ¹⁷ar imanor usillae al-Mosie tumrar dil furafur doḳol ḳoroin. Ami dua ḳori, tumra zanu Isa al-Mosir mohobbotor maze furafur ḍub dia tir ro. ¹⁸Teu hoḳol pak bonda oḳolor loge tumrao buzbae, al-Mosir mohobbotor kunu kul-kinar nai, kunu shesh-shima nai. ¹⁹Ou ze mohobbot furafur buzar oshaiddo, ami dua ḳoriar, i mohobbotre zanu tumra sino, sinia hari tumrao Allai hoḳol nomunar gunagun hasil ḳoria furafur kamil o.

²⁰Ashole Allar ze kudroti bole amrar dilor maze ḳam ḳore, hou bolor usillae amrar sinta-babna ba saoa-faoa taki aro bout beshi ḳam tain ḳorta faroin. ²¹Hozrot Isa al-Mosir mazdia ar zomator mazdiao zug zug dori hor-hamesha Alla Pakor tarif ouk. Amin.

Eḳ roiao nanan ḳam

¹Amar malik al-Mosir lagi ami zelo bondi asi. Ou bondi halote ami tumrare minot ḳoriar, ze ḳamor lagi Allae tumrare daot disoin, tumra er ufozukto oia solo. ²Tumrar asar-bebohar zanu furafur miṭa ar norom oe. Forteḳe sobor ḳoro ar dilo mohobbot rakia eḳe-oinnore shoijjo ḳoro. ³Al-Mosir ze shantie amrare ekkano zuṛa lagaise, hou shantir bole Pak Ruhur deoa eḳota rokkar lagi dile-zane sesṭa ḳoro. ⁴Allae tumrare tan fote daot disoin ḳoria tumrar maze ḳali ekkan asha ase, ḳali eḳ shoril ar eḳzon Pak Ruh asoin. ⁵Eḳ iman, eḳ torikabondi ar eḳzon malik asoin. ⁶Hoḳolor Alla ḳali eḳzon, mani behesti baf eḳzonu asoin. Tainu hoḳolor ufre, hoḳolor maze, hoḳolor dilo asoin.

⁷Oile al-Mosie zela ṭik koria raḳsoin, hou mafik amra forteḳe ḳas rohomot faisi. ⁸Erlagi Zobur Shorifo leḳa ase,

Tain gia zebla behesto uṭila,

ou shomoe bondi oḳolre bandia ṭania nila,

ar tan manshore bout dan dila.

⁹Te behesto gia uṭila, i aeat taki buza zae na ni, age tain duniar tole lamsila. ¹⁰Ar zein lamsila, tain hoḳolta furon ḳorar lagi, asman taki aro ufre gia uṭisoin. ¹¹Tain manshore ou dan disoin, ḳoezonre sahabi, ḳoezonre nobi, ḳoezonre kush-ḳobrir toblig, ḳoezonre zomator imam ar ustad hishabe boail ḳorsoin. ¹²Tain ila ḳorar ḳaron oilo, Allar pak bonda oḳole zanu tan ebadot-bondegi ḳorar lagi zuit oe, ar ou nomunae al-Mosir shoril, zomat hishabe goṛia uṭe. ¹³Tan kial oilo, amra hoḳole zanu Allar ḳas maear zon, Ibnullar ufre iman ania, tanre bala ḳori sinia ekkano oi. Ar al-Mosi zela hoḳol laḳan gune furafur bora, amra-o ola hoḳol gune furafur oia kamil oi. ¹⁴Teu amra ar huruttar laḳan roitam nae. Manshe shoetani aḳol ḳaṭaia be-fote nibar lagi manshore ze bul talim dey, ou bul talime zanu amrare fanir aula-zaula ḍeur laḳan du-dila na banae. ¹⁵Borong amrar dilor mohobbote hok mat matimu, hoḳol nomunae boṛo oia al-Mosir laḳan oimu. Tainu to asta shorilor mata. ¹⁶Asta shoril omola banail oise, zate shorilor hoḳol ongo zarzir zagat roia mul ḳaear loge zuṛa lagail roe. Forteḳ ongo zebla ṭik-ṭak kam ḳore, ou shomoe asta shorilu matar bole baṛia uṭe, ar mohobbotor mazdi nizore goṛia tule.

Furan zindegi bodlao, noea o

¹⁷Erlagi ami amar malikor name tumrare hushiar ḳori diar, bin dormor manshe zela baze sinta ḳoria zindegi ḳaṭain, tumra ar ila zindegi ḳaṭaio na. ¹⁸Tarar dil to andairor maze foṛi roise. Itar dil gumra, erlagiu tara Allar befare kunta sine na, kunta sinto saeo na, erlagi Allar deoa zindegi taki tara bout duroi. ¹⁹Tarar bibeḳ oshaṛ oigese, otar dae hor-hamesha nafaki ḳamor danda ḳore, tara nizor zindegire lagam saṛa bod ḳaishor ato saṛi dise.

²⁰Oile tumra to al-Mosir befare ilaḳan talim faiso na. ²¹Tumra nichchoe tan befare huncho, hunia tan loge shorik oia, tan maze ze hok ase, ou hokor talim faiso. ²²Tan talim oilo, finnor furan ḳafoṛ manshe zebla ekkere falai dey, ou laḳan tumrar bitoror furan ‘ami’re ekkebare falai deo, ḳaron ou ‘ami’r bod ḳaishe manshor zindegire borbad ḳorilae. ²³Er bodla Alla Pakre shuzug deo, tain tumrar dilre noea halote goṛia tuloukka, ²⁴tan deoa noea ‘ami’re noea ḳafoṛor laḳan findo. Ou noea ‘ami’re ashol hok-forezgari ar fak-fobitro ḳoria Allar surote goṛa oise.

²⁵Erlagi tumra misa mata bad deo, eḳe-oinne hasa mato, ḳaron amra hoḳolu eḳe-oinne mishia asi. ²⁶Rag-gusa ḳorleo i ragor lagi guna ḳorio na, shuruz ḍubar ageu gusar ḳota faurilao, ²⁷Iblis-shoetanre kunu shuzug dio na. ²⁸Sure tar suri ḳora bad deuk, nizor ate halal fote menot ḳoria ḳana ḳauk, zate tar ḳaoa-findar badeo gorib-dukire dibar lagi kisu zoma roe.

²⁹Tumrar mukdi zanu bad ḳota na baroe, borong aroḳzonor ufoḳari talimor lagi bala mat matio, zate ita hunia hunra zonor balai oe. ³⁰Tumra Allar Pak Ruhre duk dio na, aḳeri nazator ag forzonto ou ruh diau Allae tumrare sil-sappoṛ maria toisoin. ³¹Hoḳol nomunar birokti bab, mizaz deḳani, rag-gusa, sillaia ḳaijja ḳora, gala-gali, ar hoḳol nomunar ingsha-ninda tumrar ges taki horailao. ³²Borong tumra eḳe-oinne doya ḳoro, oinnor duke duki o, al-Mosir mazdi Allae zela tumrare maf ḳorsoin, tumrao ola eḳe-oinnore maf ḳoro.

Allar nure noea zindegi ḳaṭao

¹Tumra to Allar maear aolad, te fut zela bafor laḳan oe, tumrao ola o. ²Al-Mosie zela amrare mohobbot ḳorsoin, tumrao ola maea-mohobbotor fote solo. Tain amrare basaita ḳori nizor zanre kushboedar kurbani hishabe Allar name bilai disoin.

³Kunu nomunar zina, nafaki ar lub-lalosor ḳota tumrar maze zanu na huna zae, ḳaron ita ḳam Allar pak bondar lagi ṭik nae. ⁴Ar behaea-beijjotir zekunu mat-ḳota, asar-bebohar ba ḳobisi ṭaṭṭa-moshkora zanu tumrar maze na oe, itae tumrare manae na. Itar bodla Allar shukur-guzar ḳoro. ⁵Tumra to zano-u, zinakur, nafaḳ ar lalchi manshe, Alla Pak ar al-Mosir bashshair maze kunu zaga faito nae. Itae to eḳ laḳan murtifuza ḳorra. ⁶Hushiar roio, misa mat matia ḳeu zanu tumrare be-fote na ney, Allar naforman bonia zera ita bod ḳam ḳore, tarar ufre Allar gozob lame. ⁷Tumra ilaḳan manshor loge mishio na, ⁸ḳaron tumra age andarir maze taḳleo oḳon to al-Mosir ummot bonia nuror foto aiso. Erlagi Allar nure kamil zone zela zindegi ḳaṭani usit, tumra oula solo. ⁹Ar nure solar fol oilo, forezgari, shotota, hoḳol nomunar nek kam. ¹⁰Erlagi ze ḳame malik kushi oin, tumra zasai ḳoria ou ḳam ḳoro. ¹¹Andair zogotor befaeda ḳamor loge kunu nomunar shomporko rakio na, borong tumra otar dush deḳai deo. ¹²Manshe lukaia zeta ḳam ḳoroin, ita befare kunta matao shorom. ¹³Nuror mazdi dush deḳaia dilaile ita zaira oizae, ¹⁴ḳaron ou nureu hoḳolta zair ḳore. Erlagi silleḳ ase,

O gumor manush, hozag o,

mora taki zita o,

teu al-Mosir nure,

nurani ḳoriba tumare.

¹⁵Tumra sinta-babna ḳori deḳo, tumrar sal-cholon kilaḳan. Be-aḳolor laḳan na solia, aḳoldaror laḳan solo. ¹⁶Nek kam ḳorar ze shuzug tumrar ato ase, ita shullo-ana ḳamo lagao, zano to oḳonkur zomana ḳaraf. ¹⁷Erlagiu ḳoiram, tumra be-aḳol bonio na, borong malikor morzire buzo. ¹⁸Modor nishae ṭal oio na, itae zindegi nosṭo ḳorilae. Borong furafur Pak Ruhur boshe ro, ¹⁹tumra hamd, ḳaoali ar Fobitro Zobur Shorifor gozol gaia eḳe-oinne batchit ḳoro; tumrar dilor bitre malikor name gozol gao. ²⁰Hamesha hoḳol befare amrar malik Isa al-Mosir name behesti baf Allar shukria adae ḳoro.

Zamai-bour befare talim

²¹Al-Mosir ijjot ar ḍore tumra eḳe-oinnore dil taki mainno ḳoro. ²²Tumra zera bou oiso, tumra zela malik Isare mainno ḳoro, ou laḳan zarzir zamaire mainno ḳoro. ²³Ḳaron al-Mosi zela zomator, mani tan shorilor mata, zamaio ola bour mata. Ashole al-Mosiu ou asta shorilor toraneala. ²⁴Ar zomat zela al-Mosir zimmae ase, oula bou oḳolo hoḳol befare zamair zimmae roa usit.

²⁵Tumra zera zamai oiso, huno, al-Mosie zela zomatre mohobbot ḳorsoin, ṭik olaḳan tumrao zarzir boure mohobbot ḳorio. Tain to zomator lagi tan nizor zan kurbani disoin. ²⁶Tan kial oilo, tain zomatre fobitro ḳorar lagi, tan kalamor mazdi manshore torikar gusol ḳoraia, ²⁷nuror mohimae nizor samne azir ḳora. Ou shomoe zomator maze kunu ḳolonkor dag, kut ba ila kuntau roito nae, ita fak-fobitro ar nikut oibo. ²⁸Erlagi zamaie tar nizor shorilre zela maea ḳore, ṭik tar boureo oula maea ḳora forz. Nizor boure maea ḳorar mani oilo, nizor shorilre maea ḳora. ²⁹Ḳeu to kunu shomoe tar nizor shorilre ginnae na, hoḳoleu zarzir shorilor boron-fushon ḳore. Ekkere ou laḳan, al-Mosieo tan zomator boron-fushon zugain. ³⁰Ḳaron amra tan shorilor ongo. ³¹Allar kalamo leḳa ase, “Erlagiu beṭainte ma-bafore saṛia bour loge taḳba, tara duiozon eḳ shoril oiba.” ³²Ikan oilo bout boṛo batuni befar, ashole ami to al-Mosi ar tan zomator befare ḳoiram. ³³Zai ouk, tumra hoḳoleu zarzir boure nizor laḳan maea ḳorio, ar bou oḳoleo zarzir zamaire ijjot ḳora zorur.

Ma-baf ar aolador befare talim

¹O aolad oḳol, malikor morzi mafik tumrar ma-bafor ḳotamoto solio, ar ola solaṭau to usit. ²Allar kalamor foela hukum, ze hukumor loge furushkaror oada ase, iṭa oilo, “Tumar ma-bafore ijjot ḳorio. ³Teu tumar balai oibo, ar i duniat tumar haeati baṛibo.” ⁴Te tumra zera huruttar baf oiso, tumrao nizor aoladre sataio na, borong malikor talim ar shringkolar mazdi tarare manush banao.

Gulam ar munibor lagi talim

⁵Tumra zera gulam, tumra al-Mosir zela baiddo, oula ḍor ar tazime dile-zane tumrar zogotor munib oḳolor baiddo roio. ⁶Ḳali manshore kushi ḳorar niote munibor samne baiddo roio na, borong al-Mosir gulam hishabe dile-zane Allar morzi mafik solrae ḳoria tumrar munibor baiddo roio. ⁷Tumra ikan mono ḳorio na ze, tumra manshor ḳezmot ḳorrae, borong asmani malikor ḳezmot ḳorrae mono ḳoria, zogotor munibor ḳezmoto kiali o. ⁸Mono rakio, malikor ges taki forteḳ manshe zarzir nek kamor furushkar faibo, he gulam ouk ba azad ouk.

⁹Tumra zera munib, tumrao tumrar gulam oḳolor loge oula bala bebohar ḳoro. Tarare ḍor deḳani bad deo, ḳaron tumra to zano, tara ba tumra hoḳoloru malik eḳzon, tain behesto asoin; tan nozoro hoḳolu shoman.

Allai atiardi Iblisor loge zuddo ḳoro

¹⁰Hesh-mesh ḳoiram, tumra asmani malikor loge milia roia tan kudroti bole bolala o. ¹¹Zuddor lagi Allar deoa hoḳol nomunar atiar lagao, teu Iblisor hoḳol sol-soturir birudde mozbut oia ubaitae farbae. ¹²Amrar ou zuddo to kunu manshor loge nae, ita oilo andair zogotor hoḳol raza ar tar ḳemota-ala oḳolor birudde, andair zogotor shoktiala bod ruh oḳolor birudde, ar asmanor Iblis-shoetan dolor birudde. ¹³Te ou zuddor lagi tumra Allar deoa hoḳol nomunar atiar findilao, zate Iblise zebla hamla ḳorbo ou shomoe mozbut oia ubaitae faro, ar hesh-mesh tir roitae faro. ¹⁴Erlagi Allai hokikotir belṭ ḳomoro bando, ar buk basanir lagi forezgarir amol dia buk guria raḳo, ¹⁵sifai oḳolor laḳan duio fao-o zuta lagao, zate shantir kush-ḳobri tobligor lagi zuit taḳtae faro. ¹⁶Ar sifai oḳole nizore basanir lagi ze ḍala bebohar ḳore, oula hoḳol shomoe tumra imanor ḍala ato lo, ou ḍala dia Iblisor hoḳol zalail tir nibaitae farbae. ¹⁷Matare basanir lagi Allar deoa nazat sifair kefor laḳan findilao. Ar Pak Ruhur toluar mani, Allar kalamre mozbut ḳori doro.

¹⁸Pak ruhur bole dile-zane hor-hamesha munazat ḳoro. Erlagi hozag roia hoḳol pak bonda oḳolor lagi shob shomoe munazat ḳorat roio. ¹⁹Amar lagio dua ḳorio, ami ḳota matar bala zanu Allae amar mukor buli zugai dein, zate toblig korar shomoe ami shaosh ḳaṭaia kush-ḳobrir ashol batuni bed manshore buzaitam fari. ²⁰Ou kush-ḳobri tobligor lagi luar cheindi banda haloteo ami al-Mosir naib hishabe ḳam ḳorram. Te zelor maze roia zelaḳan shaosh ḳaṭaia toblig kora zorur, dua ḳorio, ami zate ola ḳortam fari.

Bidaei dua

²¹Amar hal-hokikot kilaḳan ar amar din-ḳal kila zar, ita amar maear dust Tukik bair ges taki hunbae. Ein amrar malikor hok-halal ḳezmotḳari. ²²Ami tanre tumrar gese faṭailam, tumra tan muk taki amrar ḳobora-ḳobor hunbae, tain gia tumrare utshaho diba.

²³Amrar gaibi baf Alla Pake ar Hozrot Isa al-Mosie, mumin bai oḳolre shanti ar imani maea-mohobbote raḳoukka. ²⁴Amrar Hozrot Isa al-Mosir lagi zarar dilo ḳaṭi mohobbot ase, era hoḳolor ufre Allar rohomot nazil ouk. Amin.