Dusra-Boyani

Fobitro Tourat Shorif fas nombor sifara

Dusra-Boyani

Forisiti

Ou sifara Hozrot Musa (a:)-or ufre nazil oa fobitro Tourat Shorifor shesh sifara mani, fas nombor sifara. Ou sifara nazil oar mul ḳaron oilo, morubumir maze soforor haloto zonom oa Boni Israilor aolad oḳolre, fobitro Tourat Shorif ar Allar deoa hukum-ahkam oḳol aroḳbar mono ḳorai deoa. Erlagi ikanor nam oilo, Dusra-Boyani.

Agor sairo sifarar loge ou sifarat noea bout hukum ase, ar ou sifarar bout aeat fobitro Injil Shorifor mazeo ulleḳ ḳora oise. Ermaze kub mulloban ou aeato ase, “Tumra forteḳe tumrar asta dil, asta zan ar hoḳol bol-shokti dia tumrar Mabud Allare mohobbot ḳorio. Aiz ami tumrare ze hukum diar, ita tumrar dilo gatia rakio.” (6:4-6)

Ou sifarat Hozrot Musa (a:)-or tinṭa ḳas nosiot ase, tain tan ufator age Boni Israilre iad ḳorai dila. Ou shomoe tara Kenan deshor shimanat aia hari Allar oada ḳora hou aramor Kenan desho hamanir lagi zuit asla. Er age to tara sallish bosor morubumir nanan zagat gurte gurte bout heran oisoin.

ermaze ase,

(a) Hozrot Musa (a:)-or foela nosiot 1:1—4:43 aeat

(b) Hozrot Musar dusra nosiot 4:44—28:68 aeat

(c) Hozrot Musar tin nombor nosiot 29—30 ruku

(d) Hozrot Musar shesh halot 31—34 ruku

Hozrot Musa (a:)-or foela nosiot (1:1—4:43)

Tur faṛ saṛar ḳota

¹Musa nobie Zordan gangor fub faror Araba namor morubumit Boni Israil zatire ou boean ḳorsla, tain Suf gaur samne ubaia tarar loge matila. Er eḳbae asil Faran, ar oinnobae asil Tufol, Labon, Hazirut ar Dizahab, ou sair gau.

²Seiror faṛia fotedi Tur faṛ taki Kadesh-Bornea forzonto aṭia zaite ḳali egaro din lage. ³Oile Boni Israil Mishor taki bar oia unchallish bosor egaro mash forzonto, ortat soforor sallish boros solar ḳalo, ono gurila. Bade ou mashor foela tariḳo Musa nobie tarare zanaila Mabude tanre zeta ḳoisla. ⁴Tain laṛai ḳori Amuri oḳolor bashsha Sihunre ar Bashon deshor bashsha Uzre araia harle ita ḳoila. Ou Sihune bashshai ḳorta Hishbon ṭauno, ar Uze bashshai ḳorta Osṭarut ar Idri ṭauno.

⁵Zordan gangor fub faror Muab desho, Musa nobie Allar deoa Tourator talim boean ḳoria buzaila. Tain ḳoila, ⁶“O Boni Israil, huno, amra Tur faṛor galat taḳar ḳalo Mabud Allae amrare ḳoisla, ou faṛor galat tumrar bout din guzor gese. ⁷Te oḳon tumra hoḳole tambu tulia Amuri oḳolor faṛia elaḳa ar ou elaḳar ḳanda-ḳasar hoḳol zagat zaoar lagi roana o. I zaga hoḳolta oilo gia: Araba morubumi ar ou morubumir ḳanda-ḳasar usa faṛia zaga ar nisa faṛia zaga, Negeb morubumi ar doriar kinara, mani Kenan desh taki arombo ḳoria Lebanon desh oia Furat gang forzonto ita hoḳol zaga. ⁸Mono rakio, ita hoḳol zaga ami tumrare dilaisi. Ami Mabude tumrar baf-dadain Ibrahim, Isʼhak, Iakub ar tarar ḳandanre ze desh deoar oada ḳorslam, tumra oḳon gia ita hoḳol zaga doḳol ḳorilao.

Hozrot Musae aro ḳoezonre neta banaila

⁹“Te baiainre, hou shomoe ami tumrare ḳoislam, tumra hoḳolor bar to ami eḳla boibar shaiddo nai. ¹⁰Tumrar Mabud Allae tumrare oto aolad baṛai disoin, erlagi tumra aiz asmanor terar laḳan oiso, gonia fuṛail zae na. ¹¹Tumrar baf-dadar Mabud Allae tumrare aro azar azar gun baṛaukka, ar tan oada mafik tumrare rohom ḳoroukka. ¹²Oile ami eḳla ḳemne tumrar ḳaijja-fosad miṭaitam, ar tumrar zimmadarir bar boitam? ¹³Erlagi tumrar forteḳ ḳandan taki ḳoezon aḳoldar, zanra-hunra ar hoḳol manshor gese ijjoti zonre fosond ḳoro, ami tumrar zimmadari erar ato shomzaimu.

¹⁴“Tumra zuaf dislae, aichcha, afne zela ḳoira, olau bala oibo. ¹⁵Teu ami tumrar forteḳ ḳandan taki aḳoldar, buddiman ar zanra-hunra zonre nia tumrar azar zonor ufre, sho zonor ufre, foinchash zonor ufre, dosh zonor ufre shordar banai dislam, ar ofisaro boail ḳorslam.

¹⁶“Hou shomoe ami tumrar hakim oḳolre hukum dislam, ḳoislam, ḳaijja-fosador bisaro badi-bibad duio fokkor mat hunia hok insaf ḳorio, ita nizor zatir ouk ba bin zatir ouk. ¹⁷Bisaror shomoe tumra ḳeuror fokko loio na, doni-gorib hoḳolor ḳota hunio. Ashole bisaror malik to Alla, erlagi tumra kunu manshore ḍoraio na. Ze bisaror mimangsha ḳora tumrar lagi ḳoṭin oe, ikan amar gese anio, ami deḳmu. ¹⁸Ar tumra kila kita ḳortae, ita to ami hou shomoe ḳoia dislam.

Guia faṭaia deshor ḳobor zana

¹⁹“Bade amra Mabud Allaor hukum faia, Tur faṛ saṛia Amuri oḳolor faṛia elaḳa muka roana oilam. Tumra to deḳso, ḳoto boṛo ar ḳoto marattoḳ morubumi far oia amra Kadesh-Bornea aia azilam. ²⁰Azia hari ami ḳoislam, oḳon to tumra Amuri oḳolor hou faṛia elaḳat aia fousi geso, i deshḳan amrar Mabud Allae amrare dilaira. ²¹Huno, tumrar Mabud Allar dan ḳora ou asta deshu tumrar samne foṛi roise. Oḳon zao, gia tumrar baf-dadar Mabud Allar oada ḳora ou deshre doḳol ḳoro. Ḳeu ḍoraio na, nirash oio na.

²²“Ou shomoe tumra hoḳol aia amare ḳoilae, te foela ḳoezon guiare ou desho faṭail ouk, tara gia deshḳan dekia aia amrare ḳoiba, kun fote zaoa amrar lagi bala ar zaoar foto kun kun ṭaun foṛbo.

²³“Tumrar foramish amar fosond oilo, erlagi forteḳ ḳandan taki eḳzon ḳori muṭ baro zonre alog ḳorlam. ²⁴Tara tumrare ono toia ou faṛor ufre uṭlo, ar Ashkul namor faṛia ḳalo gia bala ḳori hoḳolta dekia ailo. ²⁵Tara hou desh taki kisu fol-mul ania amrare deḳaia ḳoilo, amrar Mabud Allae amrare ze deshḳan dan ḳorra, ikan to boṛo bala zaga.

²⁶“Oile tumra ou desho zaite razi oilae na. Tumra nizor Mabud Allar hukumor birudita ḳorlae. ²⁷Tumra zarzir tambut hamaia boḳa-zoḳa shuru ḳorlae, ar ḳoilae, Mabude amrar loge dushmoni ḳoroin, erlagiu amrare binash ḳorar niote, Amuri oḳolor ato falaia marar kiale, Mishor desh taki tain amrare bar ḳori anchoin. ²⁸Amra kila hino zaimu? Amrar guia baiainte aia zano ḍor harai disoin. Tara ḳoisoin, hinor manush bule amra taki bout usa-muṭa foeluan. Tarar ṭaun oḳolo boṛo boṛo, itar sairobae usa usa oal dia baunḍori ḳora, asmano soilar lager. Ar foeluan Anaki oḳolreo bule hono deḳsoin.

²⁹“Ita hunia ami tumrare ḳoislam, tumra mon gabṛaio na, itare ḍoraio na. ³⁰Tumrar Mabud Alla to tumrar age age zaira. Tain tumrar fokko loia tumrar sokur samne Mishor desho zela zuddo ḳorsla, oḳono oula ḳorba. ³¹Ar ou morubumir mazeo to tumra deḳso, ono aia fousar ag forzonto, bafe zelaḳan afon futre kulo ḳori boia nein, oulaḳan Alla Mabude tumrareo asta fot boia anchoin. ³²Otota hunar badeo tumra tan ufre borosha ḳorlae na. ³³Taineu to tambu gaṛibar zaga sinanir lagi ar fot sinaia nibar lagi, raitkur shomoe agunir kuṭi ar dinkur shomoe megor kuṭir nomuna oia tumrar age age gesoin.

³⁴“Oile tumrar ita zuaf hunia Mabude kub gusa ḳorla, tain ḳosom ḳaia ḳoila, ³⁵Ami Mabude tumrar baf-dadar gese ḳosom ḳaislam ou deshḳan ditam ḳori, ta-o oḳonkur ita naforman oḳole i bala zaga ḳan deḳar nosib oito nae, ³⁶ḳali Zifunnir fua Kalut saṛa. Ikan deḳar shoubaiggo ou Kalute faibo, he amar ḳotare furafur manche, he zeta zaga faodi faṛaia aise, ita zaga ami tare ar tar aolad oḳolre dimu.

³⁷“Baiainre, tumrar ḳarone Mabude amar ufreo gusa ḳorla, gusa ḳori amare ḳoila, tumi Musao hou desho hamaitae fartae nae. ³⁸Ḳali tumar ḳadim Nunor fua Iusa gia hono hamaibo. Tumi tare shaosh dio, he Boni Israilre i deshor doḳoldari dia malik banaibo. ³⁹Tumra ḳoislae, amrar bebuz nabalik huruttaintore hou deshor manshe doria nibogi. Oile ami Mabude erareu ou Kenan deshor malik banaimu, era ikan doḳol ḳorba. ⁴⁰Te oḳon tumra hirbar fisaia gia Nil doriar faredi morubumir bae roana deo.

⁴¹“Ikan hunia tumra ḳoislae, amra to Mabudor dorbaro gunagar oigesi. Ta-o amrar Mabud Allar hukum mafik oḳon gia zuddo ḳormu. Oḳan ḳoia tumra ostro-shostro loilae, ar mono ḳorslae, faṛi elaḳat uṭia zuddo ḳorao kub shuza.

⁴²“Oile Mabude amare ḳoila, tumi tarare ḳo, tara zanu zuddor lagi faṛo na uṭe, ḳaron ami tarar loge roitam nae, ar amare saṛia zudi tumrar nizor ichchae zao, te dushmonor gese aribae. ⁴³Ami tumrare hushiari deoar badeo tumra ita manlae na. Tumra Mabudor hukumor ulṭa gia buk fulaia ou faṛo uṭat laglae. ⁴⁴Teu faṛor bashinda Amuri zatie tumrare dekia fal bandi bar oilo, mousaḳor mou-fukor laḳan fal bandia tumrar ḳore ḳore ailo, ar marte marte Seiror Horma ṭaun forzonto ḳedaia nilo. ⁴⁵Bade tumra aia Mabudor gese ḳandon lagailae, oile Mabude ḳan bond ḳorilla, i ḳandon hunla na. ⁴⁶Ou nomunae tumra bout din Kadesh elaḳat roilae, lamba shomoe ono guzorilo.”

Boni Israile desh desh gura

¹Hozrot Musae aro ḳoila, “Mabude amare zela hukum disla, oula amra fisaia gia morubumir mazedi Nil doriar muka roana dilam. Seiror faṛia elaḳa sokkor dia zaite amrar bout din gelogi. ²Bade Mabude amare ḳoila, ³Tumra bakka din taki ou faṛia elaḳat sokkor dirae, oḳon uttor muka roana deo. ⁴Erbade tain amare ḳoila, ami tumrare zanaitam tumra oḳon Shek Ishor aolador doḳol taḳa Seir deshor bitredi zaite oibo. Gele tumrare dekia tara ḍoraiba, oile tumra kub hushiar roio, era to tumrar baiain. ⁵Tarar loge ḳaijja-fosad ḳorio na. Mono rakio, tarar deshor eḳ inchi zomio ami tumrare ditam nae. Ḳaron asta Seir faṛor malikana ami Shek Ishre dilaisi. ⁶Tarar ou desh far oia zaibar ḳalo tumrar ḳani-kuraki lagle ṭeḳadi loia ḳaibae, oula fanio loia ḳaibae.

⁷“Tumrar Mabud Allae hoḳol ḳamor mazeu tumrare rohom-borkot disoin. Ou oto boṛo morubumi faronir bala tain tumrare hefazot ḳorsoin. Ou sallish bosor dori tumrar Mabud Alla tumrar loge loge asoin, erlagi kunu laḳan obab oise na.

⁸“Teu amra fatari fote aṭilam, aṭia amrar bai Seiror bashinda Ishor aolador desh falaia gelam. Amra Araba tolbumir ze rasta Elat ar Izion-Gebor taki bar oia aise, ou fotedi na gia Muabor morubumir muka aṭa dorlam. ⁹Ar Mabude amare ḳoila, tumra Muabi oḳolre sataio na, kunu zuddor bab-shab deḳaio na. Mono rakio, tarar deshor kunu zomiu ami tumrare ditam nae. Tarar razdani Aur ṭaunor malikana ami Lut nobir aolad Muabi oḳolre dilaisi.”

¹⁰(Age Eimi zatir manush ou elaḳat roita, ita asla foeluan zati, tara forimane asla bout zon, ar deḳte Anaki zatir laḳan usa-muṭa lamba. ¹¹Anaki oḳolor laḳan Eimi oḳolreo Rofayi name ḍaḳa oito, oile Muabi oḳole itare Eimi ḳoia ḍakita. ¹²Seir faṛo Hurio oḳole boshot ḳorta, bade Ishor aolad oḳole tarare ḳedaia dia ikan doḳol ḳorla. Mabudor ate Boni Israile zela Kenan deshor malikana faia Kenani oḳolre ḳedaiba, ṭik ola Ishor aolad oḳoleo ḳorsla. Tara Hurio oḳolre binash ḳoria hoḳol zomi-maṭi doḳol ḳoria nize hono boshot ḳorla.)

¹³Musa nobie aro ḳoila, “Bade Mabude hukum dila, tumra zoldi ḳori roana o, ar Zered faṛia ḳal far oia hofaro zao. Teu amra far oilam. ¹⁴Ar Kadesh-Bornea taki bar oia hari Zered gulla far oia aite amrar aṭtish bosor lagsil. Ermaze oula oilo, Mabude age ḳosom ḳaia zela ḳoisla, oula Kadesh-Bornea taki baronir ḳalo amrar zoto sifai asla, era hoḳolu ou aṭtish bosore morigela. ¹⁵Boni Israil shomaz taki tarare binash ḳorar ag forzonto Mabud tarar bifokke asla.

¹⁶“Ou hoḳol sifai moria shesh oia harle, ¹⁷Mabude amare ḳoila, ¹⁸Aiz tumra Muabi oḳolor deshor shimana far oibae, tarar razdani Aur ṭaunor ḳandabae zaibae. ¹⁹Oile tumra zebla Boni-Amman deshor ḳasat zaibaegi, gia tarare sataio na, tarare zuddor bab-shab deḳaio na. Mono rakio, tarar deshor kunu zagau ami tumrare ditam nae, ikanor malikana to ami Lut nobir aolad Boni-Ammanre dilaisi.”

²⁰(Age Rofayi oḳol ono roita, erlagi ikan Rofayi oḳolor desh ḳoia ḍaḳa oito. Ar Boni-Ammane itare Zam-Zamimi ḳoia ḍakita. ²¹Rofayi zati foeluan asla, deḳte Anaki zatir laḳan usa-muṭa lamba ar forimaneo bout beshi asla. Mabude Boni-Amman zatir ato itare binash ḳoraila, Boni-Ammane Rofayi zatire ḳedai dia ou desh doḳol ḳorla. ²²Mabude Ishor aolad oḳolredi ou eḳoi ḳam ḳoraila, tain erar ato Hurio zatire binash ḳorla. Era Hurio oḳolre ḳedaia dia, tarar Seir desh doḳol ḳoria boshot ḳorra. ²³Ermaze Koftur dif taki Kofturi zatie aia Obbi zatire binash ḳorla, tarar maṭire doḳol ḳoria boshot ḳorla. Ou Obbi oḳol Gaza ṭaunor daro boshot ḳorta, honor hoḳol gau-geramo tara roita.)

²⁴“Erbade Mabude ḳoisla, O Boni Israil, tumra baro, bar oia Ornon ḳalor hofaro zao. Huno, Amuri zatir bashsha Sihun ar tar Hishbon deshre ami tumrar ato shofi disi. Ikan doḳol ḳorat gia bashshare zuddor fildo lamao, ²⁵Teu deḳbae, ami Mabude aiz taki zogotor hoḳol zatir dilo ḍor harai dimu, tumrar ḍore tara ḳafiba. Tumrar aoaz hunleu tarar zano doṛ-foṛ shuru oibo.”

Bashsha Sihun ar tar zatir binash

²⁶Musa nobie Boni Israilre aro ḳoila, “Bade ami apush-chukti ḳorar kiale Ḳadimut morubumi taki Hishbonor bashsha Sihunor gese ḳobria faṭailam, ḳoilam, ²⁷Amra afnar deshor bitredi far oia zaitam sai, onumoti diba ni? Amra atare-fatare kunubae zaitam nae, ḳali mul shoṛok aṭia zaimu. ^28-29Amra nogod ṭeḳadi afnar ges taki ḳani-kuraki ba fanio ḳorid ḳoria ḳaimu. Amrar Mabud Allae amrare ze deshḳan dita saira, Zordan gang far oia hou desho zaibar ag forzonto, afnar deshor ufredi amrare aṭia zaite deukka. Seiror faṛia elaḳar bashinda Ishor aolad oḳole, ar Aur ṭaunor bashinda Muabi oḳoleo amrare ola far oite disoin.

³⁰“Oile Hishbonor bashsha Sihun razi oilo na, amrare zaite dilo na. Tumrar Mabud Allaeu tar dilre fashan banailla, tar monor bab luar laḳan oigelo, zate tumrar ato tar binash oe, ar ṭiku ola oilo. ³¹Teu Mabude amare ḳoila, O Musa, Sihun ar tar bashshaire ami tumar ato shofi dilam. Oḳon tumi hono zao, gia ou desh doḳole anat lago, ar hono boshot ḳoro.

³²“Teu Iahaz elaḳat Sihune tar hoḳol sifai dol loia amrar loge laṛai ḳorat ailo, ³³ou shomoe amrar Mabud Allae tare amrar ato falaila. Amra bashshare, tar fuaintore, tar sifai dolre nifat ḳorlam. ³⁴Ar amra tar hoḳol ṭaun, gau-geram hoḳolta doḳol ḳorlam, tarar hoḳol beṭain-beṭin ar huruttare binash ḳorlam. Eḳzono zinda roise na. ³⁵Ḳali tarar foshur fal ar gonimotor mal-samana amrar lagi anlam. ³⁶Ornon ḳalor shimanar Aroar ṭaun, ar ou elaḳar eḳ gau taki aroḳ gau doḳol ḳori ḳori, Giliod forzonto kunu zaga amrar doḳolor baire roilo na. Amrar Mabud Allae ita hoḳolta amrar ato dila. ³⁷Ḳali Boni-Amman zatir desh, Jabbuk faṛia ḳalor ḳanda-ḳasar hoḳol zila, faṛor uforor gau-geram, ar amrar Mabud Allae zeta zaga doḳol ḳorte nished ḳorsoin, ou zaga ḳanain tumrar doḳolor baire roilo.”

Bashon deshor bashsha Uzre araila

¹Hozrot Musae Boni Israilre aro ḳoila, “Hishbon desh taki amra Bashon desho zaoar fote roana oilam. Bashonor bashsha Uze ḳobor faia zuddo ḳorar lagi tar hoḳol sifai dol loia Idri ṭauno ailo. ²ar Mabude amare ḳoila, O Musa, i bashshare tumi ḍoraio na. Huno, ami tare, tar asta deshre, tar sifai dolre tumar ato tulia dilaisi. Tumi Hishbon desho Amuri zatir bashsha Sihunor ze dosha goṭaiso, ogureo oula ḳorio.

³“Ou nomunae amrar Mabud Allae Bashon deshor bashsha Uzre, tar hoḳol manshore amrar ato shomzai dila. Amra-o ita hokkolṭire binash ḳorlam, kunugure zinda raḳsi na. ⁴Amra tar deshor hoḳol gau-geram, ṭaun-bondor doḳol ḳorlam. Tarar shaiṭ ḳan ṭaunu doḳol ḳorillam, kunta bad roilo na. Asta Orgub elaḳa, mani Bashonor bashsha Uzor fura bashshai amrar doḳolo nilamgi. ⁵Ou ṭaun oḳolo usa usa oal dia baunḍori ḳora asil, itar geiṭo asil boṛo boṛo kil. Ar baunḍori saṛao bout gau-geram asil. ⁶Amra hoḳol ṭaun ar gau-geramre ekkebare binash ḳorsi. Age Hishbonor bashsha Sihunor ze dosha goṭaisi, oḳon Bashon deshor beṭain-beṭin, huruttain, hoḳol gau-geram ar ṭaunreo eḳoi laḳan binash ḳorsi. ⁷Oile tarar hoḳol foshur fal ar gonimotor mal-samana amra loia aisi.

⁸“Amra ou shomoe Zordan gangor fub faror Amuri zatir duio bashshar doḳolor, Ornon ḳal taki Hormun faṛ forzonto ḳobza ḳorslam. ⁹(Sidonor manshe ou Hormun elaḳare Sirion ḳoia ḍaḳoin, ar Amuri zatie ḳoin Sonir.) ¹⁰Faṛia elaḳar ou tʼol zagar hoḳol ṭaun ar gau-geram, asta Giliod elaḳa, bashsha Uzor Suloḳa ar Idri ṭaun shoho asta Bashon deshre amra doḳol ḳorlam.” ¹¹(Fura Rofayi zatir maze ḳali Bashon deshor bashsha Uz zita ro. Ou bashsha luar falongo hutita, ikan lambae noe at ar faṛe sair at. Boni-Amman zatir Rabba ṭauno ikan oḳono toa ase.)

Boni Israilor zomir bag-baṭura

¹²Hozrot Musae aro ḳoira, “Amrar doḳol ḳora Ornon ḳalor faro Aroar ṭaunor bairor utoror elaḳa, ar faṛia Giliod elaḳar ordeḳ zaga, honor hoḳol ṭaun ar gau-geram oḳol, Boni Israilor Ruben ar Sadu ḳandanre dilailam. ¹³Giliod deshor baki ongsho ar bashsha Uzor ges taki ana asta Bashon deshre ami Manosha ḳandanor ordeḳ manshore dilam.” (Bashon deshor asta Orgub elaḳare Rofayi zatir desh ḳoia ḍaḳa oito. ¹⁴Manosha ḳandanor eḳ zonor nam asil Zaeir, he asta Orgub elaḳa mani, Goshuri ar Maḳati zatir shimana forzonto doḳol ḳoria tar nizor namor mile ou Bashon deshor nam dilo Habbut-Zair. Erlagi oḳono ikan ou name ḍaḳa oe.)

¹⁵“Ar Giliodor faṛia elaḳa ami Makirre dilam. ¹⁶Oile Giliod taki Ornonor faṛia ḳalor mazamazi forzonto hoḳol zaga, ar hon taki Boni-Amman zatir shimana Jabbuk ḳal forzonto ami Ruben ar Sadu ḳandanre dilam. ¹⁷Tarar deshor foismor shimana asil, Araba morubumit Zordan gangor ze ongsho Galil aoror daredi, Fisga namor faṛia elaḳar Araba shagor ba luna shagor forzonto gese, ou zaga.

¹⁸“Ou zaga oḳnain shomzai dia tarare ḳoilam, iknain bug-doḳol ḳorar lagi tumrar Mabud Allae tumrare disoin. Oile tumrar zeta beṭaintor shorilo bol ase, zera zuddo ḳorar laḳ, era zuit-zait oia Boni Israilor age gia gang far o. ¹⁹Oile tumrare deoa ṭaun ar gau-geramo tumrar bou, fua-fuṛin ar goru-sagol hoḳolta roiba. Ami zani tumrar bout foshu asoin. ²⁰Bade Mabude zebla tumrar zatir baiainre tumrar laḳan aramor zaga dilaiba, tumrar Mabud Allae Zordan gangor hofaro tarare ze desh dan ḳorra, oḳanor doḳol faia harle, tumra hirbar amar deoa ou zagat firia aio.”

Hozrot Musa (a:)-or gang far oa nished

²¹Hozrot Musae tarare ḳoira, “Ou shomoe ami Iusare ḳoilam, tumrar Mabud Allae ou duio bashshar kun dosha goṭaisoin, ita to nizor souke deḳso. Te oḳon Zordan far oia tumra zoto deshainto zairae, Mabude ita hokkol deshaintor doshao ou laḳan goṭaiba. ²²Erlagi tumra itare ḍoraio na, shoeong Alla Mabud tumrar fokko oia tarar loge zuddo ḳorba.

²³“Ar ou shomoe ami Mabudor dorbaro aroz ḳorlam, ²⁴O Mabud Moula, tumar gulamre to oḳonu deḳani dorso, tumi ḳoto mohan ar ḳoto boloban. Tumi ou zotota ḳorso, ita ḳorar shaiddo ḳar ase, asmano ba zominor kunu devtar takkot ase ni, tumar laḳan dafoṭ deḳaito? ²⁵Moula go, amar boṛo shok oilo, Zordan gangor hofaro gia tumar oada ḳora ou shundor faṛia elaḳa ar Lebanon desh deḳtam, meherbani ḳori zaite diba ni? ²⁶Oile Mabude na ḳorla, tain amar arzi hunla na, tumrar ḳaroneu tain amar ufre naraz asla. Mabude zuaf dila, tumi bout ḳoiso, i befare ar mangio na. ²⁷Aichcha, tumi ou Fisga ṭillar ufre uṭo, uṭia utore-doukone ar fube-foisme souk falao. Zordan gang faroni nished oileo, on taki ubaia hou deshre deḳilao. ²⁸Ar tumar ḳadim Iusare hikai deo, kita kita ḳora lagbo. Tar himmot baṛao, bitre shaosh deo, ḳaron hoḳol manshor age roia he gang far ḳoraibo, ar tumi on taki ze desh deḳrae, he eraredi ou desh doḳol ḳoraibo. ²⁹Oḳan hunia amra Baet-Piuror samnor nisa zagat roigelam.”

Allar kalam mania sola

¹Hozrot Musae tarare ḳoila, “O Boni Israil, ami oḳon ze shoriot ar hukum-ahkam ḳoimu, ita tumra kial ḳori huno. Teu tumra zane basbae ar tumrar baf-dadar Mabud Allae tumrare ze desh dan ḳorra, hou desho gia doḳol ḳortae farbae. ²Ami tumrare ze hukum diar, i hukumor loge dusra kunta baṛaio na ba ḳomaio na. Ami zelaḳan ḳoiram, tumra ṭik olau tumrar Mabud Allar hoḳol hukum-ahkam mania solio.

³“Tumra to nizor souke deḳso, age Mabude Baal-Piyuror befare kita ḳorsoin. Tumrar mazor zoto zone Piyur elaḳar baal devtar fuza ḳorsil, Alla Mabude tumrar samne ita hokkolṭire binash ḳorsoin. ⁴Oile tumra zera dile-zane Alla Mabudor ashik aslae, tumra hoḳolu oḳono zinda roiso.

⁵“Oḳon huno, amar Mabud Allae amare zelaḳan hukum-ahkam disla, ami tumrare ṭik ou hukum-ahkam ar niom-ḳanun hikaisi. Zate tumra oḳon ze desh doḳol ḳorat zairae, hou desho ita ḳamo lagao. ⁶Erlagi tumra kub hushiar oia ita manio, ar ḳamo lagaio. Teu bad-baki tamam zatir gese-u ita tumrar aḳol-buddi hishabe zair oibo. Ou hukum-ahkamor ḳota hunle tara ḳoiba, hasau era kub boṛo zati ar aḳol-buddi ala zati. ⁷Ar amrar Mabud Alla zela amrar loge loge roin, tanre ḍaḳ zela daro fai, ou duniar bukut dusra kunu boṛo zati asoin ni, zetar devta ola loge loge roin? ⁸Ba ami oḳon ze shoriotor ḳota ḳoiram, ita dusra kunu boṛo zatir ase ni? Ila niom-ḳanun ar nikut hukum-ahkam tarar ase ni?

⁹“Oile tumra zotodin basia roibae, otodin nizor befare kub hushiar roio, nizor dilre shabdane rakio, arnae nizor sokur deḳa goṭona oḳol faurilibae, ita tumrar dil taki kuailibae. Ar ou hukum-ahkam tumrar fua-fuṛinre hikao, tarao ola tarar aoladre hikaiba. ¹⁰Ar tumra hou dinor goṭona mono ḳoro, ze din tumra Tur faṛo afon Mabud Allar samne azir oislae. Zebla tain amare ḳoisla, amar kalam hunar lagi tumi hokkol manshore dola ḳoria amar samne ano, teu tara hikba, i zogoto tara zotodin zinda roiba, otodin amare ḍoraia roita, ar tarar huruttainreo ola solar talim dita. ¹¹Ou shomoe tumra ḳandat gia ou faṛor lamat ubaislae, ubaia deḳlae, asta faṛo dau dau ḳori nuror aguin zoler, aguine gia asman soilise, ar goin gono megor ḳalnie andair asil. ¹²Hou nuror agunir bitre taki, Mabude tumrare tan kalam hunaila. Tumra tan mukor aoaz hunlae, oile tan kunu surot-aḳar deḳaisoin na, ḳali tan golar aoaz huncho. ¹³Tain nize tumrare tan loge milonor usillar Allai apush-chuktir ḳas doshṭa hukum-ahkam dila, ar ḳoila oguin mania solar lagi. Tan kudroti ate dui ṭukra fattoror ufre ita leḳiao dila. ¹⁴Hou shomoe Mabude amare hukum dila, ami tumrare tan shoriotor hukum-ahkam hikaitam, zate Zordan gangor hofaro tumra ze desh doḳolo zairae, hono gia harle ota mania solo.

Murtifuza taki hushiar

¹⁵“Mabude zebla nuror agunir maz taki Tur faṛo tumrar loge batchit ḳorsla, hou din to tumra tan kunu surot-aḳar deḳso na. Erlagi tumra nizor befare kub hushiar roio ¹⁶zate kunu murti na banao, be-foti bonia fuza ḳorar kiale kunu beṭa ba beṭir surote murti banaio na. ¹⁷Maṭir ufre solra kunu zib-zanuaror surote, asmano uṛra kunu fakir surote, ¹⁸buk sesṛaia solra kunu zandaror surote, ba fanit roura kunu zandaror surote murti banaio na. ¹⁹Asmanedi saia hari sand, shuruz, tera oḳol dekia ou namor deb-debi ba firistar fuza ḳorio na, erar ḳezmoto lagio na. Itare to tumrar Mabud Allae asmanor tolor hoḳol zatir lagi dan ḳorsoin. ²⁰Mono rakio, Mabude tumrare fosond ḳorsoin lua golanir gorom agunir gato taki, tain Mishor desh taki tumrare bar ḳori anchoin, zate tumra tan afon proza o, ar oḳon to hasau tan proza oiso.

²¹“O Boni Israil, tumrar ḳarone Mabude amar ufreo gusa ḳorsoin. Tain ḳosom ḳaia ḳoisoin, amare Zordan gangor hofaro zaite dita nae, tumrar Mabud Allae tumrare ze deshor malikana dira, ou aramor desho amar zaoa nished. ²²Amar mout ono-u oibo. Zordan gang faronir hukum nai. Oile tumra gang far oia hou aramor desh doḳol ḳorat zairae. ²³Te tumra nizor befare hushiar roio, tumrar Mabud Allae tumrar loge ze apush-chukti ḳaim ḳorsoin, ita faurio na. Tumrar Mabud Allar nished omainno ḳoria kunu zinishor murti banaio na. ²⁴Mono rakio, tumrar Mabud Alla to moha dongshor agunir laḳan, tain tan nizor faona ebadot sainu sain.”

²⁵Hozrot Musae tarare eoḳan ḳoila, “Hou aramor desho gia hari, tumra fua-fuṛin, nati-futir zonom dia bout din boshot ḳorar badeo zudi ku-fote zaogi, ar kunu zinishor surote murti banao, tumrar Mabud Allae zetare ginna ḳoroin, tumra ota ḳoro, ²⁶te ami oḳon asman-zomin shakki rakia tumrar birudde ḳoiar, Zordan gang far oia ze desh doḳol ḳorat zairae, hino kub zoldi tumrar nam miṭizibo. Beshi din ṭiktae fartae nae, nichchit binash oibae. ²⁷Mabude tumrare nanan zatir maze sitrai diba, tain ḳedai dia zeḳano faṭaiba, hono tumrar kub ḳom manush zinda roiba. ²⁸Ou halote tumra manush-ate banail murtir fuza ḳorbae, zetae souke deḳe na, ḳane hune na, ḳaito fare na, kunuzat gerano hungito fare na, laḳṛir ar fattoror ota murtir fuza ḳorbae. ²⁹Ta-o hono roia zudi tumra nizor Mabud Allar tallash ḳoro, te tain tumrare didar diba. Ḳota oilo, dile-zane ḳator oia tane ḍaḳite oibo. ³⁰Hesh-mesh tumra mosiboto foṛia hirbar touba ḳoria, tumrar Mabud Allar nam loibae, ar tan kushi mafik solbae. ³¹Mono rakio, tumrar Mabud Alla Rohmanur Rohim, tain tumrare falaita nae ba binash ḳorta nae. Ar tain ḳosom ḳaia tumrar moe-murobbir loge ze oada ar chukti ḳorsoin, itao faurita nae.”

Alla saṛa dusra kunu Mabud nai

³²Hozrot Musae tarare eoḳan ḳoira, “Alla Pake zomino manush foeda ḳorar bad taki oḳon forzonto, tumrar agor hokkol zomanar itihash tukao, asta asman-zominor eḳ mata taki aroḳ mata tukaia deḳo, Boni Israilor ufre zoto azob goṭona goṭise, ita laḳan dusra kunu goṭona goṭse ni? Ba ila kunta kunudin huna gese ni? ³³Ar nuror aguin taki Alla Pakor buli hunar bade, ḳali tumra saṛa dusra kunu zati zinda roise ni? ³⁴Tumra tallash ḳori deḳo, tumrar Mabud Allae tumrar sokur samne Mishor desho tumrar lagi zotota ḳorsoin, asta zogotor kunu deb-debie ila ḳorto farse ni? Ila forikka loa, kudroti nishana deḳani, laṛai-zuddo ḳora, mozbut ator bol deḳani, boṛo boṛo taijjubi lila-ḳela ar ḍor-ḳof deḳaia, zekunu zatire oinno zatir bitre taki bar ḳori ania nizor proza banaito farse ni?

³⁵“Te tumra zate furafur buzo, ou Allau oila Mabud, tain saṛa ar kunu Mabud nai, oḳan buzanir lagiu tumrare otota deḳani oisil. ³⁶Tumrare hedaeot ḳorar kiale tain behestor arosh taki tan nizor buli hunaila, ar zominor ufre deḳaila nuror agunir kunḍoli. Ou agunir maz taki bar oilo Allai buli tumra huncho. ³⁷Tain tumrar moe-murobbi oḳolre mohobbot ḳorta, erlagi erar moutor bade tarar aolad oḳolreo fosond ḳorsoin. Ar tain shoeong azir oia tan moha kudroti ḳemota ḳaṭaia tumrare Mishor desh taki bar ḳori anchoin. ³⁸Tan kial asil, tumatan taki boṛo ar boloban zati oḳolre tumrar samnor taki ḳedaia hari, tarar desho nia hou hoḳol deshor malikana tumrare dita. Oḳon deḳrae ni, tain to ita ḳorsoin.

³⁹“Te oḳonkur ou talim mono rakio, dilor maze gatia toio, huno, ḳali ou Allau ufre asman ar tole zominor malik, tain saṛa dusra kunu Mabud nai. ⁴⁰Erlagi ami oḳon ze shoriot ar hukum-ahkam zanairam, tumra ita mania solio, teu tumra ar tumrar aolad oḳolor balai oibo. Tumrar Mabud Allae siroḳalor lagi tumrare ze desh dan ḳorra, ou desho tumrar haeati lamba oibo.”

Ashroe ṭaun ṭik ḳora

⁴¹Bade Musa nobie Zordan gangor fub-faror tinḳan ṭaun algaila, ⁴²zate kunu kuni manush bagia gia ou ṭauno zan basaito fare. Ze manshe kun ḳorar kunu sinta ba dushmoni bab asil na, ḳali aḳta onichchae ḳeurore marilae, he bagia bonobashi bonia ono roito farbo. ⁴³Tino ṭaun oilo, Ruben ḳandanor lagi morubumir kinarar faṛia tʼol zagar Basir namor ṭaun. Sadu ḳandanor lagi Giliod elaḳar Ramut ṭaun. Manosha ḳandanor lagi Bashon deshor Gulan ṭaun.

Hozrot Musa (a:)-or dusra nosiot (4:44—26:19)

Shoriotor hukum-ahkam zanani

⁴⁴Musa nobie Boni Israilor samne shoriotor ou hukum boean ḳorla, ⁴⁵Mishor desh taki bar oia aoar bade, hoḳol hushiarir ḳota, shoriotor niom-ḳanun ar hukum-ahkam Boni Israilre zanaila. ⁴⁶Tain Zordan gangor fubor faro, Hishbon elaḳar Amuri zatir raza Sihunor deshor Baet-Piuror samnor tol zagat ita ḳoila. Mishor taki bar oia aia harle Musa nobie ar Boni Israile zuddo ḳori ou bashsha Sihunre araisla. ⁴⁷Tara bashsha Sihunor desh ar Bashonor bashsha Uzor desh doḳol ḳorsla. Amuri zatir ou duio bashshar bashshai asil Zordan gangor fubor faro. ⁴⁸Ornon ḳalor faror Aroar ṭaun taki Sirion faṛ, mani Hormun faṛ forzonto ou duio razar shimana asil. ⁴⁹Er bitre ase Zordan gangor fubor faror asta elaḳa. Ikṭa Fisga faṛor ṭillar toledi Araba shagoror kinara forzonto gese.

Allar deoa ḳas dosh hukum

¹Musa nobie tamam Boni Israilre dola ḳoraila, tarare ḳoila, “O Boni Israil, ami oḳon zeta hukum-ahkam ar ain-kanun tumrare zanaimu, ita tumra kial ḳori hunio, hunia dilo gatia rakio ar amol ḳorio. ²Amrar Mabud Allae Tur faṛo amrar loge eḳ apush-chukti boail ḳorsoin. ³Ou chukti tain amrar moe-murobbir loge na ḳoria, amrar loge ḳorsoin, amra zoto zon ono zinda asi, amrar loge ḳorsoin. ⁴Mabude ou faṛor ufre nuror agunir maz taki tumrar loge samna-samni batchit ḳorsoin. ⁵Tumra agunir ḍore hou shomoe faṛor ufre uṭlae na, erlagi ami tumra ar Mabudor mazḳano ubaia, tan mukor buli tumrare hunaisi. Tain ḳoisla,

⁶“Ami Allau tumrar Mabud. Mishor deshor gulami taki amiu tumrare ḳalas ḳori anchi.

⁷“Amar bodla tumra dusra kunu devta manio na.

⁸“Fuza ḳorar kiale tumra kunu murti banaio na, asman, zomin ba fanir tole zotota ase, ita kunutar surote murti banaio na. ⁹Tumra itar fuza ḳorio na. Itar sheba-zoton ḳorio na. Mono rakio, ami Allau tumrar Mabud. Amar faona ebadot ami saiu sai. Amare zera mane na, ami tarar gunar shaza dei, tarar foela siṛi taki sair siṛi aolad forzonto5:9 mul Ibrani: tisra siṛi forzonto ar sair nombor siṛi forzonto shaza dei. ¹⁰Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maea-mohobbot deḳaimu.

¹¹“Beḳama kunu ḳarone tumrar Mabud Allar nam muko loio na. Ḳeu zudi ḳamoḳa Mabudor nam loe, te kunumonte-u amar shaza taki rehai faito nae.

¹²“Ar tumrar Mabud Allar hukum mafik, Zummabarre fobitro din manio. ¹³Haftar soedin tumra ḳam-ḳaz ḳorio, tumrar dorḳari hoḳol ḳam shario. ¹⁴Oile shat nombor din oilo Zummabar, tumrar Mabud Allar name ziraibar din. I din tumra, tumrar fua-fuṛin, gulam-bandin, goru-gadain, tumrar gaut ba ṭauno roura musafir ba bin-deshi, ḳeu kunuzator ḳam-ḳaz ḳorio na. Tumar gulam-bandieo tumar laḳan ziraiba. ¹⁵Mono rakio, Mishor desho taḳte tumrao ola gulam aslae, ar tumrar Mabud Allae tan bolala-mozbut kudroti atdi tumrare azad ḳori anchoin. Erlagi tain hukum disoin, tumra Zummabarre fobitro din mantae.

¹⁶“Tumrar Mabud Allar hukum mafik tumrar ma-bafore ijjot ḳorio. Teu tumrar Mabud Allae ze desh dira, hou desho tumrar haeati baṛibo ar tumrar balai oibo.

¹⁷“Kun ḳorio na.

¹⁸“Zina ḳorio na.

¹⁹“Suri ḳorio na.

²⁰“Ḳeuror birudde misa shakki dio na.

²¹“Foror bour bae lalos ḳorio na. Foror gor-baṛi, zomi-mirash, gulam-bandi, goru-gada, ba kunu zinishor bae lalos ḳorio na.

²²“Mono rakio, shoeong Mabude tumrare Tur faṛor uforor hou nuror aguin taki, meg ar goin andarir bitre taki, kub zure zure ou hukum disoin. Ḳali ou hukum-ahkam saṛa tumrare ar kunuta ḳoisoin na. Bade ou kalam oḳolre dui ṭukra fattoror ufre tan kudroti ate lekia amar ato disla. ²³Oile tan nuror tozollie zebla faṛ zoler, ermaze tumra nizor ḳane hunlae, hou andarir bitre taki Mabudor golar aoaz, hunia tumrar hoḳol ḳandanor amir oḳol, tumrar moe-murobbi oḳol amar gese uṭia aila, ²⁴aia ḳoila, amrar Mabud Allae didar dia tan zalal ar mohima amrare deḳaisoin, nuror aguin taki bar oilo tan golar aoaz amra hunchi. Ar oḳon amra buzlam, kunu adom zate Alla Pakor loge batchit ḳorar badeo, i adom basia roe. ²⁵Oile oḳon ḳene amra ino mortam? Kudroti i aguine to amrare zalailibo, amra zudi aro besh ḳori amrar Mabud Allar golar aoaz hunat roi, te to nirgat moron oibo. ²⁶Amrar laḳan ila ar kunu adom zat asoin ni, zera nuror aguin taki zinda Alla Pakor golar aoaz hunar badeo zita ase? ²⁷Te amrar Mabud Allae zotota bataisoin, tan ḳandat gia afneu ota hunia aiukka. Tain afnar gese zeta zanaiba, afne aia ota amrare hunaiba. Teu amra ota amol ḳormu.

²⁸“Ar hou shomoe tumra zebla amar loge matirae, shoeong Mabude ita hunla, hunia amare ḳoila, ou manush oḳolor mat-ḳota to ami hunchi, tara tumare zeta ḳoisoin ita hoḳolta-u bala. ²⁹Hasau zudi tara amare ola ḍorain, hamesha amar hukum-ahkam mania solar kiali oin, te tara ar tarar aolad oḳolor siroḳalin balai oibo.

³⁰“Oḳon tumi lamat zao ar tarare ḳo, tarar tambut firia zaitagi. ³¹Oile tumi ono amar ḳandat roio. Ami tumare amar hoḳol hukum-ahkam, ain-kanun ar shoriot bataimu, tumi gia tarare ota hikaibae. Teu ami tarare ze deshor doḳoldari diar, hou desho gia hari tara ota amol ḳorba.

³²“Erlagiu tumrar Mabud Allae tumrare zeta hukum-ahkam disoin, ita zoton ḳoria adae ḳorio, itar til foriman her-fer ḳorio na. ³³Tain ze fote solar lagi hukum disoin, ṭik ou fote solio, teu tumra zane basbae, tumrar balai oibo, ar tumra ze deshor doḳoldari faibae, hou desho tumrar haeati bout lamba oibo.

Allar hukum-ahkam manar lagi minoti

¹“Tumrare hikanir niote tumrar Mabud Allae amare ou hukum-ahkam, shoriot ar ain-kanun disoin, zate hou ze desh doḳol ḳorar niote tumra Zordan gang far oia zairae, hono gia hari tumra ita amol ḳoro. ²Teu tumra, tumrar huruttain ar tarar aolad oḳole hara zindegi Alla Mabudre ḍoraia tan deoa niom ar hukum oḳol amol ḳorio. Ola ḳorle tumra bout din basia roibae. ³O Boni Israil, tumra amar ḳota huno ar hushiar oia ita amol ḳoro, teu tumrar baf-dada oḳolor Mabud Allar oada mafik, hou dud ar mour banḍar ala desho tumrar balai oibo ar tumra bout baṛibae.

⁴“O Boni Israil, huno, Alla amrar Mabud, tainu eḳ. ⁵Tumra forteḳe tumrar asta dil, asta zan ar hoḳol bol-shokti dia tumrar Mabud Allare mohobbot ḳorio. ⁶Aiz ami tumrare ze hukum diar, ita tumrar dilo gatia rakio. ⁷Tumra hoḳole tumrar huruttainre ita kial ḳori hikaio. Ar goro boia, fote-gaṭe solar shomoe, gumanir shomoe, gum taki uṭar badeo ota befare mata-mati ḳorio. ⁸Mono raḳar nishana hishabe ita ato bandia rakio ar ḳofalor maze lagaio. ⁹Tumrar duaror soukaṭo ar mul geiṭo lekia rakio.

¹⁰“Tumrar baf-dada Ibrahim, Isʼhak ar Iakubor gese tumrar Mabud Allae ḳosom ḳaia ze desh deoar oada ḳorsoin, hou desh tain tumrare niba. Hino shundor shundor ar boṛo boṛo ṭaun oḳol ase, zeta tumra banaiso na, ḳali emneu faibae. ¹¹Ar mal-samanae bora hazail-faṛail gor-duar faibae, zeta tumra zugaiso na, fanir kua faibae zeta tumra kudiso na, anguror bagan ar zoetunor bagan faibae zeta tumra lagaiso na. ¹²Oile tumra hushiar roio, ita hoḳolta faia hari maldar bonia tumrar hou Alla Mabudre faurio na, zein tumrare Mishor deshor gulami taki ḳalas ḳoria anchoin.

¹³“Tumrar Mabud Allare ḍoraia solio, ḳali tan ebadot ḳorio, ar tan name ḳosom ḳaio. ¹⁴Tumra ari-fori zatir deb-debir fuza ḳorio na. ¹⁵Zano to, tumrar Mabud Alla zein tumrar loge asoin, tain nizor faona ebadot faita sainu sain. Erlagi hushiar roio, itar fuza ḳorle tain gusae aguin oia tumrare dunia taki fusiliba. ¹⁶Tumrar Mabud Allare forikka ḳorat lagio na, zela age hou Masa namor zagat ḳorslae. ¹⁷Tumrar Mabud Allae tumrare zoto hukum-ahkam, hushiari ar niom-ḳanun disoin, ita tumra kial ḳori manio. ^18-19Ar Mabudor nozoro zeta shoṭik, tain zeta bala fain, tumra otau ḳorio, teu tumrar balai oibo. Mabude tumrar baf-dadar gese ze desh dibar ḳosom ḳorsoin, hou desh taki tumrar dushmonre tain ḳedaia diba. Ar Mabudor oada mafik hou aramor deshor doḳoldario tumra faibae.

²⁰“Bobishote zebla tumrar aolad oḳole tumrare zikaiba, amrar Mabud Allae ou zeta hukum-ahkam, niom-ḳanun, ar hushiari disoin itar mani kita? ²¹Ou shomoe zuaf dio, Mishor desho amra Feraunor gulam aslam, oile Allae tan bolala kudroti at dia amrare bar ḳoria anchoin. ²²Mabude amrar sokur samne Feraun ar tar baṛir hoḳolor ufre, asta Mishor deshor ufre boṛo boṛo gozobi nishana, bezuita bala-mosibot ar kudroti ḳam deḳaila. ²³Oile amrare tain hou desh taki bar ḳoria anla, zate ze desh dibar lagi amrar baf-dada oḳolor gese ḳosom ḳaisla, hou desho amrare far ḳoria doḳoldari dein. ²⁴Ar tain hukum dila, amra zanu tan hoḳol hukum-ahkam mani, tanre ḍoraia soli, teu amrar balai oibo ar amra oḳonkur laḳan hamesha basia roimu. ²⁵Oḳon amra zudi amrar Mabud Allar hukum mafik tan deoa niom-ḳanun kial ḳoria mani, te itau oilo amrar forezgari.”

Deshor bidormir loge dusti ḳorio na

¹Hozrot Musae aro ḳoila, “Huno, tumra ze desh doḳol ḳorat zairae, tumrar Mabud Allaeu tumrare hono niba ar bout zatire tumrar samne taki ḳedaia hari ita doḳol ḳoraiba. Tain Hiṭṭi, Girgashi, Amuri, Kenani, Farizi, Hibbi ar Zibuzi zatire ḳedai diba, i shato zatiu forimane tumra taki boṛo ar bolala. ²Tumrar Mabud Allae zebla itare tumrar ato shofia diba, ou shomoe tumra tarare ekkebare binash ḳorilio, tarar loge kunu chukti ḳorio na, ar kunu doea-maea deḳaio na. ³Itar loge bia-shadir befare kunu chukti ḳorio na. Tumrar fuṛintore tarar fuaintor gese bia dio na, ar tarar fuṛinreo tumrar fuaintor lagi anio na. ⁴Ḳaron itae tumrar fua-fuṛinre amar ges taki horaia deb-debir fuza ḳoraibo. Teu Alla Mabude tumrar ufre gusa oia, loge logeu tumrare binash ḳorba. ⁵Erlagi tumra tarar hoḳol fuz-monḍop bangilio, fuzar zaga oḳol binash ḳorio, Ashera-debir nishana kuṭi ḳaṭia falaio, ar hoḳol zator murtire aguindi zalaio. ⁶Mono rakio, tumrau oilae Alla Mabudor fobitro proza. Duniar hoḳol zatir maz taki tainu tumrare nizor proza ar ḳas shompod hishabe alog ḳorsoin.

⁷“Ḳene alog ḳorsoin? Oinno zati taki tumrar manush beshi otar lagi ni? Na, muṭeu na. Tumra to hoḳol zati taki ḳom aslae. ⁸Ta-o tain tumrare kub maea-mohobbot ḳoroin, ar tumrar baf-dada oḳolor gese ze ḳosom ḳorsla, otar lagiu tumrare alog ḳorsoin. Mabude tan kudroti at lagaia tumrare bar ḳoria anchoin, Mishoror bashsha Feraunor at taki ar gulamir desh taki tumrare azad ḳorsoin. ⁹Oḳon tumra mono rakio, tumrar Mabud Allau oila ashol Mabud. Tainu siroḳalin hok-halal. Zera ashik oia tane mohobbot ḳore ar tan hukum-ahkam mane, tain tarar azar azar siṛi forzonto nizor oada ḳora zoban ar doya boail raḳoin. ¹⁰Oile zetae bod shaosh ḳoria tan bae fis dilae, tain itare binash ḳoria zoldi ḳori bodla dein. ¹¹Erlagi aiz tumrare ze hukum-ahkam, niom-ḳanun ar shoriot diram, ita kub kial ḳoria amol ḳorio.

Allar hukum manar furushkar

¹²“O Boni Israil, tumra ou hukum-ahkamor ḳota ḳan fatia huno, ar ita kial ḳori amol ḳoro. Teu tumrar Mabud Allae tumrar baf-dadaintor loge, tan doea-maear befare ḳosom ḳaia ze apush-chukti ḳorsla, ita tumrar loge boail raḳba. ¹³Tain tumrare maea-mohobbot ḳorba, rohom-borkot diba ar tumrar manshor foriman baṛaiba. Tumrare ze desh dibar lagi tumrar moe-murobbir gese ḳosom ḳaisla, ou desho tumrare rohom-borkot diba. Tumrare aolad baṛai diba, tumrar baganor fol-mul, ḳetor foshol, anguror rosh, zoetunor tel, goru-basur, meṛa-sagol hoḳoltare baṛai diba. ¹⁴Hoḳol zati taki tumra beshi rohom-borkot faibae, tumrar beṭain-beṭin ba tumrar foshur falor ḳeu aṭkura roito nae. ¹⁵Alla Mabude tumrare hoḳol laḳan bemar taki basaiba. Mishor desho tumra zeta ḳoṭin bemar-azar deḳso, ita tumrare dita nae, ḳali tumrar dushmon oḳolre diba. ¹⁶tumrar Mabud Allae zoto zatir manshore tumrar ato shofiba, itare tumra ekkebare shesh ḳorilaio, kunu doya ḳorio na, ar tumra itar devtare fuza ḳorio na, arnae ita tumrar fotor ḳaṭa oiba.

¹⁷“Tumra hoeto mone mone ḳoibae, amra kilaḳan tarare ḳedaia dimu? Ita zatir manush to forimane amra taki bakka beshi. ¹⁸Oile tumra itare ḍoraio na. Feraun ar asta Mishor deshor ufre tumrar Mabud Allae kita ḳorsoin, ita tumra faurio na. ¹⁹Mabude ḳoto boṛo boṛo gozob-mosibot ḍalia tarare binash ḳorsoin, ita to nizor soukeo deḳso. Tain bout kudroti ḳam, bout laḳan nishana ar tan bolala mozbut at dia tumrare bar ḳoria anchoin, ita mono rakio. Ar tumra oḳon zeta zati oḳolre dekia ḍorairae, itar ufreo tumrar Mabud Allae ṭik oula goṭaiba. ²⁰Erbadeo tumrar ges taki lukaia zeguin zita roiziba, tumrar Mabud Allae bingulor fal faṭaia ita hoḳolṭire binash ḳorba. ²¹Te tumra itare ḍoraio na, zano to, tumrar Mabud Alla zein tumrar loge boshot ḳoroin, ein boṛo boeonkor ar mohan. ²²Tumrar Mabud Allae tumrar samne taki aste aste ota zatire ḳedai diba. Oile hoḳolṭire to tumra eḳloge ḳedaitae fartae nae, ḳedaile zongli zanuare tumrar sairobae boriziba. ²³Ta-o tara ekkere binash oar ag forzonto tumrar Mabud Allae tarare bezuita oshantit falaia tumrar ato shofia binash ḳoraiba. ²⁴Tarar raza-bashsha oḳolreo tumrar ato shofiba, tumra dunia taki itar nam miṭailibae, itare binash ḳorar ag forzonto ḳeu aia tumrar samne ubanir takkot oito nae.

²⁵“Tumra itar murti oḳolre agunit falaia zalailio. Tarar gotror shuna-rufar bae lalos ḳorio na, arnae fando foṛbae. Mono rakio, tumrar Mabud Allae itare ginnain. ²⁶Ginnar kunu zinish tumrar goro haraile tumrao otar laḳan bonizibae. Borong tumrao itare kub ginnaio ar tuchcho ḳorio, ita to lannoti.

Shudinor ḳalo Allare faurio na

¹“Oḳon ami tumrare ze hukum diram, tumra kub kiali oia ita amol ḳorio, teu tumra basia roibae, tumrar aolad baṛibo, ar tumrar moe-murobbir gese Mabude ḳosom ḳaia ze desh dibar oada ḳorsoin, hou desho hamaia doḳol ḳortae farbae. ²Ar tumra mono rakio, tumrar Mabud Allae ou sallish bosore morubumir mazdi tumrare kila loia aisla, tumrar boṛai-beṭagiri bangibar lagi, ar tumra tan hukum-ahkam manbae ki na oḳan forikka ḳorar niote, tumrar dilor ḳobor zanar lagi tain tumrare noto ḳorsoin. ³Tumrar moe-murobbire ḳani-kuraki na dia ufash raḳla, bade ze ḳani tara sinta na, manna namor ou ḳani ḳaoaia tain tumrar boṛai-beṭagiri bangisoin. Tain tumrare hikaita saila, ḳali ruṭi ḳaileu manush base na, borong Allar forteḳ kalameu manshor zan base. ⁴Ou sallish bosoror maze tumrar gotror ḳafoṛ-sufoṛ nosṭo oise na, din-rait aṭileo tumrar fao fulche na. ⁵Oḳon tumrar dilo gatia rakio, bafe zela nizor fuare shashon ḳore, tumrar Mabud Allae tumrareo ola shashon ḳoroin.

⁶“Tumra nizor Mabud Allar hukum-ahkam amol ḳorio, tan fote solio, ar tanre ḍoraio. ⁷Tumrar Mabud Allae tumrare ze aramor desho nira, i zagat faṛ-forbot, faṛia gang, fanir zorna ase, ar maṭir toleo fani ase. ⁸Hino gom, barli, angur, ḍumur gas, anuar fol, zoetunor tel ar mou ase. ⁹Hi desho bout ḳani-fani faibae, kuntar obab tumrar oito nae. Hinor fattoror maze lua ase, honor faṛ kudile tumra tama-fitol faibae. ¹⁰Hou desho feṭ boria ḳana-fina ḳaia harle tumrar Mabud Allar deoa ou aramor deshor lagi tan shukria adae ḳorio.

¹¹“Ta-o tumra hushiar roio, tumrar Mabud Allare kunu shomoe faurio na, ar ami oḳon tumrare zeta hukum-ahkam, niom-ḳanun, ar shoriot zanairam, ita amol ḳorte kunu gafloti ḳorio na. ¹²Hono gia feṭ bori ḳana-fina ḳaia, shundor ḳori gor-baṛi banaia, ¹³tumrar goru-sagolor fal boṛo ḳoria, shuna-rufa zomaia, hoḳol monte don-samana baṛia harle hushiar roio. ¹⁴Tumrar dilre boṛai-beṭagiri ḳorte dio na. Ar hou Alla Mabudre faurio na, zein tumrare Mishor desh taki, hou gulami taki bar ḳoria anchoin. ¹⁵Tain to tumrare bezuita bifod-afode bora biraṭ morubumi taki, ḳoṭin bishakto haf, bishakto ḳakṛa-bisae bora fotedi tumrare far ḳori anchoin. shokto fattoror bitor taki tumrar lagi fani bar ḳorsoin. ¹⁶Tain hou morubumir maze tumrare manna ḳabaisoin, zetar nam tumrar moe-murobbi oḳole hunchoino na. Tumrar bitoror boṛai-beṭagiri bangibar lagi, ar tumrare forikka ḳorar nioteu ita ḳorsoin, zate heshe tumrar balai oe. ¹⁷Tumra mone mone ḳoio na, amar nizor bol-shoktie nizor ḳamai dia doni oisi. ¹⁸Oile tumrar nizor Mabud Allae tumrar moe-murobbir gese ḳosom ḳaia zeta oada ḳorsla, ota oḳon furafur ḳorar lagi tumrare i don-samana disoin, erlagi tanre mono rakio.

¹⁹“Tumra zudi kunu din tumrar Mabud Allare faurilao, ar deb-debir fuza ḳorat lago, otar ḳezmot ba bozona ḳoro, te ami oḳon tumrare hushiari diar, tumra nichchit binash oizibae. ²⁰Tumrar Mabud Allar hukum-ahkam na manle, tumrar samne hou zeta zati oḳolre tain binash ḳorsoin, tumrareo ola binash ḳorba.”

Boni Israilor ḳaijja ar naformani

¹Hozrot Musae aro ḳoila, “O Boni Israil huno, tumra taki bout bolala ar forimane bout beshi, boṛo boṛo zatir deshre doḳol ḳorar lagi oḳon Zordan gang far oia zaibae, tarar ṭaun oḳolo boṛo boṛo, ou ṭaunor baunḍorir oal asmano soilise. ²Tara oila usa-muṭa foeluan, era hoḳolu Anaki bongshor manush. Tumra to ageu tarar befare huncho, Anaki oḳolor loge lagar takkot ḳar ase? ³Oile tumra oḳan mono rakio, tumrar Mabud Alla to tumrar age age zaira, tain zalaia sarḳar ḳorra agunir laḳan. Tainu itare domaia tumrar tolua banaiba. Teu Mabude age zelaḳan ḳoisla, tumra olau tarare ḳedai dia zoldi ḳori binash ḳorbae.

⁴“Tumrar Mabud Allae zebla tumrar samne taki tarare ḳedaia diba, hou shomoe tumra mone mone ḳoio na, amrar forezgarir fol hishabe Mabude amrare ou desh doḳol ḳorar lagi anchoin. Ashole hou zati oḳolor naformanir lagiu Mabude tarare tumrar samne taki ḳedai diba. ⁵Tumrar forezgari ba shototar lagi to hi deshor doḳoldari fairae na, borong hou zatir naformanir lagi, ar tumrar Mabud Allae tumrar moe-murobbi Ibrahim, Isʼhak ar Iakubor gese ze oada ḳorsla, oḳan furon ḳorar lagi, tainu tumrar samne taki itare ḳedaia diba. ⁶Erlagi tumra zania rakio, tumrar forezgari dekia to tumrar Mabud Allae ou aramor deshor doḳoldari tumrare dira na, tumra oilae gaṛteṛa-ekguia zati.

Shunar basuror fuza

⁷“Ar hou morubumir maze tumra kila nizor Mabud Allar gusa tulaislae, ikan mono rakio, kunudin faurio na. Mishor desh saṛia aoar din taki oḳano aoa forzonto, hamesha tumrar monor bitre Mabudor birudita ase. ⁸Tur faṛor mazeo tumra Mabudor gusa tulaislae, erlagi tain tumrare binash ḳorilta saila. ⁹Mabude tumrar loge ze apush-chukti boail ḳorsoin, ou chukti nama leḳa duio ḳan fattor anar lagi ami faṛo uṭislam, sallish din sallish rait kunu dana-fani na ḳaia ami ruza aslam. ¹⁰Ar Mabude tan fobitro ator anguildi leḳa hou duio ḳan fattor amare dila. Tumra hoḳol zedin Tur faṛo aia dola oilae, ou din Mabude zalail agunir maz taki tumrare zeta bataisla, ou duio fattoror maze to ota leḳa asil.

¹¹“Hou sallish din ar sallish raitor bade Mabude ou chukti nama leḳa fattor duio ḳan amar ato dila. ¹²Dia ḳoila, zao, tumi zoldi ḳori lamat zao, ḳaron tumi zeta manshore Mishor taki bar ḳoria ancho, ita ku-fote gesoingi. Amar batail fot taki tara oto zoldi be-foti oigese, tara fuza ḳorar lagi shuna golaia eḳ murti banaise. ¹³Mabude amare aro ḳoila, ami to ita manshore deḳlam, ita boṛo gaṛteṛa-ekguia zati. ¹⁴Oḳon tumi amar ges taki hori zao, kunu bada dio na, ami itare binash ḳorilimu, dunia taki itar nam miṭailimu. Ar tumar maz taki eḳ noea zati foeda ḳormu, ita aro boṛo aro bolala zati oibo.

¹⁵“Teu ami faṛ taki lamia ailam, faṛor ufre aguin zoler, ar amar ato asil chukti nama leḳa hou duio ḳan fattor. ¹⁶Bade ami sailam, saia deki tumra nizor Mabud Allar dorbaro guna ḳorrae. Tumra fuza ḳorar lagi shuna golaia format ḍalia eḳ gorur basur banailae. Mabudor batail fot saṛia tumra oto zoldi be-fote gelaegi! ¹⁷Erlagi ami ou duio ḳan fattor amar at taki falai dilam, teu ita bangia tumrar sokur samne ṭukra ṭukra oigelo.

¹⁸“Mabude zetare nafosond ḳoroin, olaḳan guna ḳoria tumra tan gusa tulailae, erlagi ami agor laḳan hirbar sallish din sallish rait kunu dana-fani na ḳaia, tan samne soizdat foṛi roilam. ¹⁹Mabudor bezuita gusare ami kub ḍorailam, tain gusae aguin oia tumrare binash ḳorilta saila, oile oubaro tain amar foriad hunla. ²⁰Mabude Harunor ufreo kub gusa oia tanre shesh ḳorilta saila, teu ami Harunor lagio tan dorbaro minoti ḳorlam. ²¹Ar tumrar gunar atiar mani tumrar banail hou basuror murtire agunit falaia zalaia sarḳar ḳorlam. Ogur zalail ṭukrare fishia sali banaia faṛia gangor fanir futor maze falailam.

²²“Tumra to Taberat, Masat ar Kibrut-Hutaba namor zagat Mabudor gusa tulaislae. ²³Erbade Kadesh-Bornea taki roana oar ḳalo Mabude zebla ḳoila, ami tumrare aramor ze desh dan ḳorsi, tumra gia oḳan doḳol ḳoro, hou shomoyo tumra nizor Mabud Allar hukumor birudita ḳorlae, tanre manlae na, tan ḳotareo ekin ḳorlae na. ²⁴Ashole ami zedin taki tumrare sini, hou din takiu dekiar, tumra hamesha Mabudor hukumor ulṭa solrae.

²⁵“Zai ouk, Mabude tumrare binash ḳorar ḳota ḳoae ami sallish din sallish rait, tan samne soizdat foṛi roilam. ²⁶Ami tan dorbaro minot ḳori ḳoilam, O Mabud Moula, tumi erare binash ḳorio na, era to tumaru bonda, tumaru ḳas shompod. Tumar kudroti ḳam dia, tumar nizor bolala atdi zetare Mishor desh taki bar ḳori ancho, itare mario na. ²⁷Itar boitolgiri, naformani ar gunar bae na saia, tumi ḳali tumar gulam Ibrahim, Isʼhak ar Iakubor ḳota mono ḳoro. ²⁸Oḳon tumi zudi itare marilao, te tumi ze desh taki amrare bar ḳoria ancho, hou deshor manshe ḳoibo, Mabude tan oada ḳora desho itare nita farsoin na, ba tarare ingsha ḳoria zane marar lagi ou morubumit nisoin. ²⁹Ashole era to tumaru bonda, tumar nizor shompod. Tumar afon kudroti at lagaia, tumar bol-takkot ḳaṭaia erare Mishor taki bar ḳoria ancho.”

Allai chukti namar fattor hirbar dila

¹Hozrot Musae tarare ḳoira, “Hou shomoe Mabude ḳoila, tumi fattor ḳaṭia agor laḳan duḳan ṭukra banao, ar oḳnain loia faṛor ufre uṭia amar daro ao. Erloge laḳṛidi eḳṭa shonduḳo banaio. ²Tumi age ze dui ṭukra fattor bangiliso, hou fattoror ufre zeta leḳa asil, ota ami ou duio fattor ṭukrar ufre hirbar lekia dimu, bade tumi oḳnain nia hou shonduḳor bitre toibae.

³“Hukum faia ami babla laḳṛidi eḳ shonduḳ banailam, ar dugu fattor ḳaṭia agor laḳan dui ṭukra ḳorlam, bade ou duio ṭukra ato loia ami faṛor ufre uṭlam. ⁴Uṭia harle Mabude hou foela duio fattor ṭukrar ufre zeta lekisla, ota hirbar ou duio ṭukrar ufre lekia amare dila, ou leḳa aeat oilo, shoriotor ḳas dosh hukum. Age zedin tumra hoḳol Tur faṛo aislae, hou din Mabude zalail agunir maz taki tumrare ou hukum-ahkam bataisla. ⁵Bade ami faṛ taki lamat lamia aia amar banail hou shonduḳor bitre duio ḳan fattor toilam, zela Mabude hukum disla. Ita oḳono hono ase.”

⁶(Boni Israile Birut-boni-Iakan taki roana oia Muserat gelagi. Ou zagat Harun nobir ufat oae, tanre ono dafon ḳora oilo. Bade tan bodla tan fua Ali-Azor fordan imam oila. ⁷Bade Boni Israilor kafela Gudgudat gelagi, hon taki Zotbatat gela, i zagat fanir fut ala bout ḳal-nala asil. ⁸Ou shomoe taki Mabude Lebi ḳandanre fosond ḳorla shahadot shonduḳ boia nibar lagi, Mabudor ebadot-bondegi ḳorar niote tan samne azira dibar lagi, ar tan name manshore dua dibar lagi. Ou imamoti ḳam tara oḳono ḳorra. ⁹Otar lagi Lebi ḳandanor manshe Boni Israilor dusra ḳandan oḳolor laḳan zomi-zomar kunu baṭ ba kunu mirashdari faila na. Tumrar Mabud Allar zoban mafik shoeong Mabudu oila tarar mirash.)

¹⁰Hozrot Musae tarare ḳoila, “Agor baror laḳan ibaro ami sallish din sallish rait Tur faṛor ufre aslam, ibaro Mabude amar foriad ḳobul ḳorla, tain tumrare binash ḳora bad dilaila. ¹¹Bade Mabude amare ḳoila, tumi uṭo, uṭia agedi aguanir lagi ota manshore zuit ḳoria tarar ag oia roana deo, ami tarar moe-murobbi oḳolor gese ze desh dibar lagi ḳosom ḳaia oada ḳorsi, tara hou desho gia ita doḳol ḳorouk.

Allar ashik oia tan hukum-ahkam mano

¹²“O Boni Israil, huno, tumrar Mabud Allae tumrar gese kita sain. Tain saira, tumra ḳali tan ḍor-ḳof bitre raḳo, tan fote solo, tanre mohobbot ḳoro, tumrar asta dil-mon dia tan ebadot-bondegi ḳoro. ¹³Ar tumrar balair lagi aiz ami tumrare Mabudor ze hukum-ahkam ar shoriot diram, ita furafur amol ḳoro.

¹⁴“Zano to, asman ar asmani hokkolta, zomin ar zominor tamam samana to tumrar Mabud Allar. ¹⁵Ta-o tumrar moe-murobbir bae tan ṭan taḳae, tain erare mohobbot ḳorta. Tarar bade tarar aolad oḳolre mani, oḳonkur zomanar duniar hoḳol zatir maz taki ḳali tumrare fosond ḳorsoin. ¹⁶Erlagi tumrar zarzir dilor mosolmani ḳorao, gaṛteṛa naforman bonia roio na. ¹⁷Mono rakio, tumrar Mabud Alla to hoḳol deb-debir ufre, munib oḳolor munib, tainu mohan, boloban ar ḍor-ḳof foeda ḳorra Alla. Tain kunu fokkofati ḳoroin na, gush ḳain na. ¹⁸Etim oḳol ar ṛaṛi beṭintor bae hok insaf ḳoroin, ar tumrar loge boshot ḳorra bin-deshi oḳolre ḳaoa-findar hoḳolta dia tan mohobbotor forman deḳain. ¹⁹Age to Mishor desho tumrao ola bin-deshi aslae, erlagi bin-deshi manshore tumra maea-mohobbot ḳorio. ²⁰Tumra nizor Mabud Allare ḍoraia solio, tan ebadot-bondegi ḳorio, tan ashik bonia roio, ar ḳali tan name ḳosom ḳaio. ²¹Tainu tumrar tarifor kuṭi, tainu tumrar Alla. Tumra nizor souke zoto asanok taijjubi ar bezuita kudroti ḳam deḳso, ita hokkolta to tumrar lagi tainu ḳorsoin. ²²Tumrar zeta moe-murobbi Mishor desho gesla, era asla muṭ shottoir zon, ar oḳon tumrar Mabud Allae tumrare asmanor terar laḳan ḳorsoin, zeta gonia fuṛail zae na.

¹“Erlagi, O Boni Israil, tumra nizor Mabud Allare mohobbot ḳorio, ar tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio. ²Tumra oḳon mono rakio, ita ami tumrar huruttaintore na ḳoia ḳali tumrar gese ḳoiar, tara to tumrar Mabud Allar hedaeot deḳse na, ita sineo na. Tumrar gese tan afon mohima, tan kudroti ator bahaduri, ³ar Mishoror bashsha Feraunor ufre, tar asta deshor ufre tain zoto nomunar kudroti lila-ḳela deḳaisoin ita to tara deḳse na. ⁴Tara Mishoror sifai dol, itar guṛa, guṛar gaṛin ar itare tain kila Nil doriat buṛ maria ekkere binash ḳorsoin, itao to deḳse na, ⁵ou zagat aia tumra fousibar age morubumir maze tain tumrar ufre zotota goṭaisoin, tumrar huruttainte itao deḳse na. ⁶Tain Ruben ḳandanor Iliabor fua Daton ar Abiramre ze shaza disoin mani, duniar maṭi faṭia a ḳoria asta Boni Israilor mazḳan taki tarare gilililo, tarar bou-baichchain shudda asta foribar, tarar gor-duar, ar heman-zanuar shoho hoḳol mal-samana maṭir tole hamaigelo, itao era deḳse na. ⁷Oile tumra nizor souke Mabudor hoḳol kudroti lila-ḳela deḳso.

Allar hukum-ahkam manle deshor lab

⁸“Te oḳon ami tumrare zela hukum diram, tumra ita hokkolta manio, teu Zordan gang far oia ze desh doḳolor lagi zairae, tumra bolala bonia honor doḳoldari faibae. ⁹Mabude tumrar moe-murobbi oḳolre ar tarar aolad oḳolre ze desh dibar lagi ḳosom ḳaisla, dud ar mour banḍar ala hou aramor desho tumrar haeati lamba oibo. ¹⁰I deshḳan to hou Mishor deshor laḳan nae zeḳan taki tumra bar oia aiso, mono or ni, hag-torḳarir ḳet zela fani dein, hou desho bisi bain dia harle tumra faor naoṛa dia ola fani hisitae? ¹¹Oile gang far oia ze desh tumra doḳol ḳorat zairae, i desho faṛia tol zaga ar faṛ-forbote bora, i zomine Allar deoa megor fani ḳae. ¹²Tumrar Mabud Allae i deshor kial raḳoin. Bosoror foela taki hesh forzonto tan doya nozor taḳe i zominor ufre.

¹³“Te ami aiz tumrare zela hukum diar, ita tumra kub kiali oia manio, tumrar Mabud Allare mohobbot ḳorio, ar furafur dile-zane tan ebadot-bondegi ḳorio. ¹⁴Teu Mabude zorur mafik bosoror foela ar shesheo rohomoti meg dia, tumrar ḳetor foshol, anguror rosh, zoetunor tel hokkolta zugan diba. ¹⁵Tumrar foshur falor lagi zomino gash diba, tumra tusṭo oia ḳani-fani ḳaibae.

¹⁶“Ta-o tumra hushiar roio, arnae tumrar mon ku-fote zaibogi, ar tumra be-foti bonia deb-debir fuza ḳorbae, itare boḳti ḳorbae. ¹⁷Ila ḳorle tumrar ufre Mabudor gusar aguin gorom oibo, tain asmanor rohomoti duar bond ḳoriliba, teu meg-fani bond oia zomino ar foshol folito nae, ar Mabude tumrare ze desh dan ḳorra, hou aramor desh taki tumrare zoldi ḳori fusia falail oibo. ¹⁸Erlagi tumrar monor maze, tumrar dilor bitre amar ou hukum ḳan gatia rakio, tumrar duio ato ita nishana hishabe bandia toio, ar ḳofalor mazeo lagaio. ¹⁹Tumrar huruttaintoreo ita hokkolta talim dio. Tumra goro roar shomoe, fote-gaṭe aṭibar shomoe, hutibar shomoe ar hutono taki uṭia harle hamesha ota befare batchit ḳorio. ²⁰Ita lekia tumrar baṛir geiṭo ar duaror soukaṭo lagaio. ²¹Ita manle Mabude tumrar moe-murobbir gese ze desh dibar ḳosom ḳaisla, hou desho tumra ar tumrar aolador haeati otodin roibo, zotodin i duniar ufre asman roibo.

²²“Aiz ami tumrare zeta hukum-ahkam diar, tumra zudi kub kiali oia ita mano, tumrar Mabud Allare mohobbot ḳoro, tan batail fote solo ar tan ashik bonia ro, ²³te Mabude tumrar samne taki hou deshor hoḳol zatire bar ḳori diba, teu tumra nizor taki aro boṛo boṛo ar bolala zatire ḳedaia honor doḳoldari faibae. ²⁴Tumrar faodi zeta zagar ufre aṭibae, ita hoḳol zaga tumrar doḳolo aibo. Douknor morubumi taki Lebanon forzonto, Furat gang taki foismor doria forzonto doḳoldari faibae. ²⁵Kunu beṭa tumrar samne ubanir takkot oito nae, tumra hou deshor zeḳano zaibae, oḳanor mansheu tumrare ḍoraiba, tarar bitre ḳafibo, ita tumrar Mabud Allae tan nizor oada mafiku ḳoraiba.

²⁶“Huno, aiz ami tumrar samne rohomot ar lannot duiota deḳailam. ²⁷Ami oḳon tumrare zela hukum dilam, tumrar Mabud Allar ou hukum-ahkam zudi tumra mano, te tumra ou rohomot faibae. ²⁸Ar ita na mania tumra zudi tumrar Mabud Allar hukumor ulṭa solo, i fot taki horia kunu deb-debir ḳore ḳore zao, te tumra lannoti oibae.

²⁹“Tumra ze desh doḳol ḳorar lagi zairae, tumrar Mabud Allae zebla tumrare hou desho nia haraiba, haraia harle tumra ou rohomotor ḳota Gorisim faṛor ufre uṭia elan ḳorbae, ar ou lannotor ḳota elan ḳorbae Ibal faṛor ufre uṭia. ³⁰Tumra to sino, Zordan gang far oia fotor foismedi Gilgolor daro ou duio faṛ ase, Araba namor tol zagar bashinda Kenani oḳolor deshor Murir elon bonor ḳandar ou duio faṛ sino na ni? ³¹Mono rakio, tumrar Mabud Allae tumrare ze deshor doḳoldari dira, Zordan gang far oia hou desho hamaia hari tumra zebla hono boshot ḳorbae, ³²hou shomoe tumra ou hukum-ahkam ar niom-ḳanun kub kial ḳoria amol ḳorio, zeta oḳon tumrare ḳoilam.

Ḳas ebadot ḳana banani

¹“O Boni Israil, tumrar moe-murobbir Mabud Allae tumrare ze deshor doḳoldari disoin, hou desho gia amar batail ou hukum-ahkam ar niom-ḳanun hor-hamesha mania solio. ²Honor zoto zatire ḳedaia hari tumra doḳoldari fairae, tarar huru-boṛo hoḳol faṛ-forbotor ufre, dal-fala melail tortaza hoḳol gasor tole tara zeta deb-debir fuza ḳoroin, tumra ita deb-debir astana bangia ekkebare surmar ḳorilaio. ³Tarar hoḳol boli ḳana bangilio, fuzar fattor oḳol surmar ḳorio, Ashera-debir nishana kuṭi oḳol aguindi zalailio, tarar banail murti oḳol bangilio, itar nam hi zomin taki furafur fusia falaio.

⁴“Ar tarar deb-debir fuzar nomunae tumrar Mabud Allar ebadot-bondegi ḳorio na. ⁵Oile tumrar Mabud Allae tumrare didar-doroshon dibar kiale, tan nizor boshot ḳana hishabe, tumrar hoḳol ḳandanre deoa zaga taki, tain ze zagare fosond ḳorba, tumra tan ebadotir lagi hou zagat azir oio. ⁶Tumra zarzir zalail kurbani, hoḳol zator foshu kurbani, hoḳol ruzi-ruzgaror dosh baṭor eḳ baṭ, lilla-sodga, mannotor kurbani, dan-ḳoerat ar tumrar foshur foela baichchare ou zagat anio. ⁷Oḳano tumrar foribaror hoḳolre loia, tumrar Mabud Allar samne ḳana-fina ḳorio, ar tan rohom-borkot faoa hoḳol laḳan ḳamai-ruzgaror lagi kushi-bashi ḳorio.

⁸“Ar oḳon amra zela zemne kushi omoneu solram, hono gia harle tumra ila ḳorio na. ⁹Tumra shuḳ-shantie boshot ḳorar lagi tumrar Mabud Allae ze zagar doḳoldari dira, tumra to oḳono hino geso na. ¹⁰Ta-o tumra zebla Zordan gang far oia, tumrar Mabud Allar deoa desho gia boshoti ḳorbae, hou shomoe Mabude tumrar sairo galar dushmonor at taki shanti dia harle, ¹¹tain nizor Baetulla Shorif hishabe ze zagare fosond ḳorba, hou zagat tumra amar batail hoḳolta loia azir oio. Tumrar zalail kurbani, hoḳol zator kurbanir foshu, hoḳol ruzi-ruzgaror dosh baṭor eḳ baṭ, lilla-sodga, dan-ḳoerat ar hoḳol nomunar mannotor kurbani loia ono aio. ¹²Aia tumrar Mabud Allar samne tumra nize, tumrar fua-fuṛin, tumrar bandi-gulam, tumrar gau ar ṭaunor Lebi ḳandanor manush oḳol, zera tumrar laḳan kunu zaga-zomi faise na, tumra hoḳole milia kushi-bashi ḳorio. ¹³Ar kub hushiar roio, tumra nizor fosond moto zesa zagat zalail kurbani dio na. ¹⁴Borong tumrar ḳandan oḳolre deoa zomin taki tain ze ḳandanor zaga fosond ḳorba, ḳali hou zagat zalail kurbani adae ḳorio, ar hou zagar lagi amar batail hoḳol ḳam-ḳaz ḳorio.

¹⁵“Ta-o tumrar monor shok oile fak-nafak haloteo hoḳoleu zekunu zator zongli orinor gust ḳaoa zela zaiz ase, ola tumrar Mabud Allar rohom-borkote faoa foshure zobo ḳoria, tumrar elaḳar gau ba ṭauno ḳaitae farbae. ¹⁶Ḳali tumra kunu lou ḳaio na, loure fanir nomunae maṭit ḍali dibae.

¹⁷“Tumrar hoḳol zator foe-fosholor, anguror shorbotor ar telor dosh baṭor eḳ baṭ, tumrar goru-sagolor foela baichcha, tumrar mannotor hoḳolta, tumrar lilla-sodga, dan-ḳoerat, ita kuntau tumrar boshoti elaḳar kunu gaut ba ṭauno ḳaio na. ¹⁸Ita ḳali tumrar Mabud Allar fosond ḳora zagat nia tan samne ḳaio. Tumra nize, tumrar fua-fuṛin, tumrar gulam-bandi, ar tumrar gau ba ṭaunor Lebi ḳandanor manshe ḳaiba. Tumrar hoḳol nomunar ḳam-ḳazor maze nizor Mabud Allar samne kushi-bashi ḳorio. ¹⁹Ta-o tumrar desho zotodin boshot ḳorbae, otodin Lebi ḳandanor manshor ufre kial-nozor rakio.

²⁰“Tumrar Mabud Allae tan oada mafik tumrar deshor shimana baṛaia harle, tumra zebla gust ḳaibar niote ḳoibae, gust ḳaitam mone sar, hou shomoe tumrar monor shok miṭaia gust ḳaio. ²¹Tumrar Mabud Allae Baetulla Shorif hishabe ze zaga fosond ḳorba, hi zaga zudi tumrar boshot ḳana taki bakka duroi oe, te tumra amar batail hukum mafik tumrar Mabudor deoa goru-sagolor fal taki foshu nia zobo ḳorio, ar zarzir gau ba ṭauno nizor kushie gust ḳaio. ²²Shikaror zongli orinor gustor laḳan tumra ita ḳaio, fak-nafak halote hoḳoleu ḳaio. ²³Oile hushiar roio, lou ḳaio na, lou oilogi zan, tumra gustor loge zan ḳaio na. ²⁴Tumra kunumonte-u lou ḳaio na, itare fanir nomunae maṭit ḍali dio. ²⁵Tumra lou ḳaio na, Mabudor nozoro zeḳṭa shoṭik, oḳṭa amol ḳorle tumra ar tumrar bobishot aolad oḳolor balai oibo.

²⁶“Mabudor fosond ḳora zagat tumrar fak-fobitro zinish ar mannotor zinish loia zaio. ²⁷Tumrar Mabud Allar kurbani ḳanar ufre tumrar zalail kurbanir gust ar lou zalaio. Oile tumrar oinno hoḳol kurbanir lou kurbani ḳanar maze ḍalio ar i kurbanir gust tumra ḳaio. ²⁸Tumra ar tumrar bobishot aolad oḳolor zate hor-hamesha ae-unnoti oe, otar lagi tumra amar batail ou hukum ḳanain zoton ḳori manio, ila solle tumra Alla Mabudor nozoro zeta shoṭik ar bala, oṭau tumra ḳorbae.

²⁹“Tumra zoto zatire be-doḳol ḳorbae, tarare tumrar Mabud Allae tumrar samnor taki ḳedaia harle, tumra zebla hou deshor doḳoldari faia hono boshot ḳorbae, ³⁰hou shomoe tumra hushiar roio, arnae tumrao tarar fando foṛia tarar devtar bozona ḳoria zudi ḳo, ota manshe zela tarar deb-debir fuza ḳoroin, amra-o ola tarar laḳan fuza ḳortam. ³¹Ḳobordar! Tumrar Mabud Allar ebadot-bondegi tarar fuzar nomunae ḳorio na. Tara to zarzir deb-debir name Mabudor nafosondor hoḳol nomunar aḳam-kuḳam ḳore, emonki tarar deb-debir name nizor fua-fuṛinre agunit zalaia boli dilae.

³²“Te ami tumrare zeta hukum-ahkam zanailam, tumra ḳali otau manio. Itar loge dusra kunta baṛaio na, ar kunta bado dio na.

Bonḍo pir-dorbesh ar murti fuzaḳarir bisar

¹“Oḳon tumrar mazor kunu pir-dorbeshe ba isteḳana ḳorrae kunta goṭibo ḳoia zudi agam ḳobor zanae, ar kunu keramotir ḳota ḳoe, ²ḳoar bade hasau zudi ola foli zae, ar ou zoneu kunu deb-debir ḳota hunaia tumrare ḳoe, solo, amra gia hou devtar fuza ḳori, ³te tumra ou pir-dorbesh ba isteḳana ḳorrar ḳota manio na. Mono rakio, tumra zane-forane tumrar Mabud Allare mohobbot ḳorrae ki na, ouḳan zasai ḳorar lagi tumrar Mabud Allae tumrare forikka ḳoroin. ⁴Tumra nizor Mabud Allar hukum mafik solio, ḳali tanre-u ḍoraio, tan hukum-ahkam manio, tan kalam hunia amol ḳorio, tan ebadot-bondegi ḳorio, ar tan ashik bonia roio. ⁵Erlagi hou bonḍo pir-dorbesh ba isteḳana ḳorrare zane mari laio. Mono rakio, tumrar ze Alla Mabude tumrare Mishor desh taki bar ḳoria anchoin, gulami taki tumrare azad ḳorsoin, ou bonḍoe to tumrare hou Mabudor birudde naformanir lagi ṭaner, tumrar Mabud Allar batail fot taki be-foti banaito sar. Erlagi tumrar maz taki ou ḳarafire binash ḳorilaibae.

⁶“Oḳon tumrar afon bai, tumrar nizor fua ba fuṛi, tumrar zanor ṭukra bou, ba tumrar maear bondu aia zudi niralae ḳoe, solo, amra gia deb-debir bozona ḳori. Ita devtain tumar ba tumar baf-dadar osina, ⁷tumar ash-fash elaḳar ba duroir deshor kunu devta ouk, duniar eḳ shimana taki arek shimanar zekunu zatir zekunu devta ouk, ⁸he zudi tumare hono nito sae, te tumi zaio na, tar ḳota hunio na, tare doya deḳaio na, tar zan basaio na, ar lukanir zaga dio na. ⁹Tare nichchit zane marilaio. Zane mari laoar lagi foela tumar nizor atdi shuru ḳoro, bade hoḳole aia shorik oiba. ¹⁰Ogure fattordi iṭaia zane marilio, he to tumare hou Alla Mabudor ebadoti taki horaia ku-fote nito sar, zein tumare Mishor deshor gulami taki azad ḳoria anchoin. ¹¹Ogure mari laoar ḳobor hunia hoḳol Boni Israile ḍoraiba, erbade ila naformani ḳorar shaosh ar ḳeuror oito nae.

¹²“Tumrar Mabud Allae tumrar boshot ḳanar lagi ze gau ar ṭaun oḳol dan ḳorra, ita kunu zagar befare tumra zudi huno, ¹³honor Boni Israilor mazor kunu naformanor dol bar oia, hou zagar manshore be-fote nibar lagi ḳor, solo, amra gia noea noea deb-debir fuza ḳori. ¹⁴Te tumra kub balamonte kuz-ḳobor loio ar todonto ḳorio. Todonto ḳoria zudi ita ḳamor forman mile, ¹⁵te honor hoḳol bashindare zane marilio. Hou gau ba ṭaunor hoḳol manush ar poshu-pongkire toluardi ḳaṭilio. ¹⁶Hin taki ana hoḳol mal-samana bondor maze nia zalailio. Hou asta gaure ba ṭaunreo zalail kurbanir laḳan zalaia sali ḳorio. Hou zagare siroḳalor lagi binash ḳorio, ḳeu zanu kunudin hino kunta banaito na fare. ¹⁷Mabudor bezuita gusa taki rehai faoar lagi, honor kunu mal-samana zanu tumrar gese na roe, ita to lannoti mal. Teu Mabude tumrare rohom-borkot, ar doea-maea ḳorba, tumrar baf-dadar logor oada mafik tain tumrar aolad-oarish baṛaiba. ¹⁸Ḳali aiz ami tumrare zeta hukum-ahkam zanaiar, ota hoḳolta manio, Alla Mabudor kushi mafik solia tumrar zindegi ḳaṭaio.

Halal haram ḳani

¹“Tumra to tumrar Mabud Allar ḳas proza. Erlagi tumra kunu murdar lagi ḳanda-ḳaṭi ba ahazari ḳorat gia, nizor shorilre ḳaṭa-sira ḳorio na, ar matar samnor galar sul ḳamaio na. ²Mono rakio, tumra oilae nizor Mabud Allar ḳas fobitro zati. Duniar hoḳol zatir maz taki, Mabude tan ḳas proza ar tan nizor shompod hishabe tumrare alog ḳorsoin.

³“Te kunuzat noforoti ḳani tumra ḳaio na. ⁴Ou laḳan foshur gust ḳaitae farbae: goru, meṛa, sagol, ita to halal. ⁵Ar orin, maea-orin, sitra-orin, zongli sagol, lamba hingi ram-sagol, fisone dola orin ar faṛia meṛa ḳaio. ⁶Zeta foshur kura furafur dui ongsho laḳan sira, ar zeta foshuinte ḳanire fazain, itar gust zaiz. ⁷Oile zeta foshur ḳali kura sira, ba zeta foshuinte ḳali ḳanire fazain, ota foshur gust tumra ḳaio na. Te tumra uṭ, ḳorgush ba shafon-unduror gust ḳaio na, itae ḳanire fazain oile itar kura sira nae, erlagi haram. ⁸Ar shuoror gusto haram, itar kura sira oileo itae ḳanire fazain na. Ita foshu oḳolor mora lash dora-soao nazaiz.

⁹“Fanir maze boshot ḳorra zeta zandaror foir ar ḍaḳna ase, ita tumrar lagi halal. ¹⁰Oile zetar foir ar ḍaḳna nai, ita nazaiz. Ita tumrar lagi haram.

¹¹“Hoḳol zator fak-fobitro faki tumrar lagi halal. ¹²Oile boṛo sil, hukun, haf-ḳauri, ¹³hoḳol zator sil, ¹⁴hoḳol zat ḳaua, ¹⁵uṭfaki, nim faki, gangsil, hoḳol nomunar baz faki, ¹⁶hoḳol zat fesa, hoḳol zator kuṛa, ¹⁷sola-kak, bolua faki, fani-ḳauri, ¹⁸hoḳol zator zaṭia, hoḳol zator bogola, mon-sura faki ar badur tumrar lagi haram.

¹⁹“Ar ḍaḳna ala hoḳol zator fuk-zuk, zetae ṭeng dia aṭoin, ita tumrar lagi haram, ita to nafaḳ. ²⁰Oile ḍaḳna ala hoḳol zator fak-fobitro foṛing tumrar lagi halal.

²¹“Tumra oilae to tumrar Mabudor name eḳṭa fak-fobitro zati, erlagi omne omne mori zaoa kunu zib-zanuaror gust tumra ḳaio na, ita tumrar lagi haram. Oile tumrar gaut ba ṭauno boshot ḳorra dusra zekunu zatir manshore ita ḳabaitae farbae, bin zatir gese bestaeo farbae.

“Ar huno, tumra bokrir baichchare tar maʼr dud dia randio na.

Zokaṭ dibar niom-ḳanun

²²“Forteḳ bosor tumrar zomino zeta foe-foshol fao, itar dosh baṭor eḳ baṭ atra ḳori toio. ²³Ar tumrar Mabude tan Baetulla Shorif hishabe ze zagare fosond ḳorba, hou zagat ota loia aio. Tumrar ḳetor foshol, anguror shorbot, zoetunor telor dosh baṭor eḳ baṭ anio. Ita fosholor loge tumrar fala goru-sagolor foela baichchare zobo ḳoria hokkolta Mabudor samne ḳaio, ou laḳan tumra hamesha nizor Mabud Allare ḍoraia sola hikio. ²⁴Oile tumrar Mabud Allar fosond ḳora zaga zudi bakka duroi oe, ar Mabudor rohom-borkote faoa ou samana loia hino zaitae na faro, ²⁵te ou samana besia itar ṭeḳa loia tumrar Mabud Allar fosond ḳora hou zagat zaio. ²⁶Gia ou ṭeḳadi tumrar kushi mafik goru-sagol, anguror shorbot, taṛi, ba tumrar fosondor zekunuta kinilaio. Bade foribaror hoḳolre loia ita ḳani-dani ḳaia hari, Alla Mabudor samne kushi-bashi ḳorio. ²⁷Ou shomoe tumrar gau ba ṭauno boshot ḳorra Lebi ḳandanor manshore faurio na. Ḳaron tumrar to zaga-zomin ase, oile tarar ita kunta nai.

²⁸“Forteḳ tin bosor bade bade tumrar ḳetor fosholor dosh baṭor eḳ baṭ ania ṭauno dola ḳorio. ²⁹Teu Lebi ḳandanor manshe, zera zaga-zomin ba don-samanar baṭ faise na era, ar bideshi musafir oḳole, etim oḳole, ṛaṛi beṭinte ita feṭ boria ḳaiba. Ar tumrar Mabud Allae tumrar hoḳol ḳamor maze rohom-borkot diba.

Aolat maf ḳorar hukum

¹“Tumrar hoḳol zator faona forteḳ shat boros bade bade maf ḳori dio. ²Ita ou laḳan mafi dio, Boni Israilor maze forteḳe eḳe-oinnor faonare mafi dio. Mabude hukum disoin faona mafi dibar lagi, erlagi ar kunu faona dabi ḳorio na. ³Bin zatir manshor gesor faona dabi boail taḳto fare, oile nizor zatir bair gese hoḳol zator faona maf ḳori dio. ⁴Ashole tumrar Mabud Allae tumrare ze deshor doḳoldari dira, hou zomino tain nichchit tumrare rohom-borkot diba, erlagi tumrar maze ḳeu gorib roar ḳota nae. ⁵Tain to ila rohom-borkot diba tumra Mabud Allare kushi ḳorar kiale aiz amar batail ita hukum oḳol ḳali tumra zudi furafur mania solo. ⁶Tumrar Mabud Allae tan oada mafik ze shomoe rohom-borkot diba, ou shomoe tumra bout zatire aolat dibae, oile tumrar aolat ḳorar kunu dorḳar oito nae. Ar tumra hoḳol zatir ufre razotto ḳorbae, oile tumrar ufre ḳeu razotto ḳorto nae.

⁷“Tumrar Mabud Allae tumrare ze desh dira, hou deshor kunuḳano tumrar baiaintor maze ḳeu zudi gorib oe, te tar bae tumrar dil fashan ḳorio na, tar lagi tumrar at muiṭ ḳoria rakio na. ⁸At kula rakia tar zorur buzia aolat dio. ⁹Hushiar roio, shat nombor bosor mani, aolat mafir bosor ḳandat aichche dekia monor ku-motlobe tumrar obabi baire ḳali ate firai dio na, arnae he Mabudor dorbaro foriad ḳorle tumra gunar bagi oibae. ¹⁰Monor maze kunuzat bezari na ania tare dio, teu tumrar Mabud Allae tumrar hoḳol ḳamo rohom-borkot diba, tumra ze ḳamo at dibae, ou ḳamou rohom-borkot faibae. ¹¹Deshor maze to hor-hamesha gorib manush roiba, erlagi ami tumrare ou hukum diram, tumrar baiaintor bae, deshor gorib-duki, obabi manshor bae nizor at kula rakio.

Gulam-bandire azad ḳorar hukum

¹²“Tumrar shomazor kunu Ibrani beṭa ba beṭie zudi nizore tumrar gese besi lae, te soe boros ḳam ḳoranir bade shat nombor boros arombo oar ḳalo tare azad ḳori dio. ¹³Azad ḳorbar ḳalo tare ḳali ate bidae dio na. ¹⁴Tumra tare kula ate tumrar falo taki meṛa-sagol, ḳet-ḳamar taki foshol ar angur maṛar zaga taki anguror shorbot dio. Tumrar Mabud Allae tumrare zela rohom-borkot disoin, tumrao tare ola ḳorio. ¹⁵Mono rakio, tumrao age Mishor desho gulam aslae, ar tumrar Mabud Allae tumrare azad ḳorsoin. Erlagiu aiz ami tumrare ola hukum diram.

¹⁶“Oile hou gulame tumrar gese shuk faia, tumrar foribaror manshore bala faoae zudi ḳoe, tumrar ges taki zaito nae, ¹⁷te tumra tar ḳanor lotire duaror ḳofaṭo lagaia shik dia fuṛ ḳori dibae, teu he zindegibor tumrar gulamit roibo. I hukum gulam ba bandir lagi eḳ homan. ¹⁸Gulam ba bandire azad ḳori dite tumrar mono ḳoshṭo ana ṭik nae, he to soe boros dori betondari ḳamlar saiteo ḍabol ḳam ḳorse. Oḳon tare azad ḳorle tumrar Mabud Allae tumrar hoḳol ḳamo rohom-borkot diba.

Foshur foela meda baichcha kurbanir niom

¹⁹“Tumrar goru-sagolor forteḳ foela meda baichchare tumrar Mabud Allar name algaia toio. Gorur foela baichchadi ḳam-ḳaz ḳoraio na, meṛa-sagolor foela baichchar ruma ḳaṭio na. ²⁰Itare tumrar Mabud Allar fosond ḳora zagat nia, foribaror hoḳolre loia tan samne forteḳ bosor otar gust ḳaio. ²¹Oile itar maze zudi kunu laḳan kut taḳe, ita lengṛa, anda ba aro kunu zator kut taḳe, te igureu tumrar Mabud Allar name kurbani dio na, ²²oile ita kutala foshu tumrar nizor elaḳat zobo ḳori ḳaitae farbae. shikaror orinor laḳan zobo ḳoria fak-nafak halote zekunu zone ḳaitae farbae. ²³Ḳali lou ḳaio na, loure fanir laḳan maṭit ḍali dio.

Azadi Idor niom-ḳanun

¹“O Boni Israil, Abib mashor sando tumra Mabud Allar name Azadi Id adae ḳorio. Ḳaron ou sandor eḳdin tumrar Mabud Allae raitkur bala Mishor desh taki tumrare bar ḳoria anchoin. ²Tumrar Mabud Allae nizor Baetulla Shorif hishabe ze zagare fosond ḳorba, ou zagat tumra tan name goru-sagolor fal taki foshu nia Azadi Idor kurbani dio. ³Kurbanir foshur gust tumra ḳamir ala nan ruṭidi ḳaio na. Mishor desh taki taṛa-uṛa ḳori zemne ḳamir saṛa halote bar oia aislae, oḳon tumra Mishor deshor duk-mosibotor ḳota iad ḳorar lagi fura shat din tumra ola ḳamir saṛa ruṭi ḳaio. Hou dinre hara zindegibor mono raḳar lagi tumra ola ḳorio. ⁴Ou shato din tumrar kunu zagat zanu ḳamir ala kunuzat ḳani na mile. Foela din hainja bala ze foshu kurbani dibae, itar gust zanu fozoror shomoe forzonto na roe.

⁵“Tumrar Mabud Allae tumrare ze ṭaun oḳol dan ḳorba, ita kunu ṭaunor maze tumra Azadi Idor kurbani dio na. ⁶Ḳali Baetulla Shorif hishabe tain ze zagare fosond ḳorba, hou zagat kurbani dio. sandor ze tariḳo tumra Mishor desh taki bar oia aislae, forteḳ bosor ou tariḳor hainja bala tumra Azadi Idor foshu kurbani dio. ⁷Tumrar Mabud Allar fosond ḳora zagat kurbanir gust randia ḳaio. Bade bian oile zarzir goro firia zaio. ⁸Fura soe din tumra ḳamir saṛa ruṭi ḳaio, ar shat nombor din tumra Alla Mabudor name milon-mahfil ḳorio, ou din kunuzat ḳam-ḳaz ḳorio na.

Foshol daoar Idor niom-ḳanun

⁹“Ḳetor foshol ḳaṭat foela ḳasi laganir din taki tumra shat hafta gona shuru ḳorio. ¹⁰Bade tumrar Mabud Allar rohom-borkote zoto foshol faiso, ota taki nize kush oia lilla dia tan name Foshol daoar Id adae ḳorio. ¹¹Tumrar Mabud Allae Baetulla Shorif hishabe ze zagare fosond ḳorba, tumra hou zagat tan samne tumrar fua-fuṛin, gulam-bandi, tumrar loge boshot ḳorra Lebi ḳandanor manush, bin-deshi oḳol, etim huruttain ar ṛaṛi beṭin, hokkole milia idor kushi-bashi ḳorio. ¹²Tumra mono rakio, age tumra Mishor desho gulam aslae, te kub kiali oia ou niom-ḳanun adae ḳorio.

Ḍera-goror Idor niom-ḳanun

¹³“Tumrar ḳetor foshol ar angur maṛar zaga taki hoḳolta ugaro tulia harle, fura shat din tumra Ḍera-goror Id adae ḳorio. ¹⁴Idor ḳalo tumrar fua-fuṛin, gulam-bandi, tumrar loge boshot ḳorra Lebi ḳandanor manush, bin-deshi musafir, etim huruttain ar ṛaṛi beṭin hoḳole milia kushi-bashi ḳorio. ¹⁵Mabudor fosond ḳora zagat gia Alla Mabudor name fura shat din tumra ou id adae ḳorio. Mabude to tumrar hoḳol zator fosholor maze, tumrar hoḳol ḳam-ḳazo rohom-borkot disoin, erlagi tumra hoḳole kushi-bashi ḳorbae.

¹⁶“Tumrar mazor hoḳol beṭainte tumrar Mabud Allar fosond ḳora zagat gia bosoro tinbar, tan didaro azir oio, Ḳamir saṛa ruṭir Idor ḳalo, Foshol daoar Idor ḳalo ar Ḍera-goror Idor ḳalo azir oio. Kial rakio, ḳeu zanu ḳali ate Mabudor samne na ae. ¹⁷Tumrar Mabud Allae zare ze laḳan rohom-borkot disoin, ou hishabe nizor tofik man forteḳ zone Mabud Allar name lilla dilaukka.

Hakim-shalishor daeitto

¹⁸“Tumrar Mabud Allae tumrare zeta gau ar ṭaun oḳol dan ḳorra, ita hoḳol ṭauno hoḳol ḳandan taki hakim-shalish ar ofisar boail ḳorio. Era hok bisar-shalish ḳorba. ¹⁹Tumra na-hok bisar ḳorio na, ḳeuror muk saia mosolmani ḳorio na. Gush ḳaio na, gushe to aḳoldaror soukreo anda banailae, ar forezgaror mukor zobano bodlailae. ²⁰Hoḳol nomunae zeṭa shoṭik, tumra ḳali ou fote solio. Teu tumrar Mabud Allae tumrare ze desh dan ḳorra, ota doḳol ḳoria lamba haeati faibae.”

Allar nished ḳora fuza-ebadot

²¹Hozrot Musae aro ḳoila, “Tumrar Mabud Allar name tumra ze kurbani ḳana banaibae, er ḳanda-ḳasat laḳṛidi banail Ashera-debir kunu nishana kuṭi toio na. ²²Fuzar niote fattoror kunu kuṭi gaṛio na, ḳaron tumrar Mabud Allae itare gin ḳoroin.”

¹Hozrot Musae aro ḳoila, “Ar tumrar Mabud Allar name ilaḳan kunu goru-sagolre kurbani dio na, zetar gotro kut ase, tain to kutala kurbanire gin ḳoroin.

²“Tumrar Mabud Allae tumrare ze gau ar ṭaun oḳol dan ḳorba, ou zagat zudi ilaḳan kunu beṭa ba beṭi mile, zegue tumrar Mabud Allar apush-chuktir ulṭa gia tain zeta ḳam gin ḳoroin ota ḳam ḳore, ³ogue zudi Alla saṛa dusra kunu deb-debir fuza ḳore, sand, shuruz, terar fuza ḳore, ⁴ar ita tumrare zanail oe, te tumra kub shabdane tallash ḳoria dekio ita hasa na misa. Hasa oile Boni Israilor bitre ila lannoti ḳam ḳorae, ⁵hou beṭa ba beṭire shaza dio. Ogure doria gau ba ṭaunor fainchaiti boiṭok ḳanat anio, ania fattor maria marilio. ⁶Oile morar zuka oforad formanor lagi dui ba tin zonor shakki lagbo, eḳla eḳ zonor shakkie mara zaito nae. ⁷Tare marar bala foela shakki oḳole fattor marba, bade hoḳol manshe marba. Ou nomunae tumrar shomazor bitor taki olaḳan naformanire ḳedaibae.

Ḳoṭin bisar-shalishor foesala

⁸“Tumrar gese zudi ilaḳan ḳoṭin kunu nalish ae, zetar bisar ḳorar ḳemota tumrar adalotor nai, te ita loia Alla Mabudor fosond ḳora zagat zaio. Dorilao, kunu kun-ḳarafi, mara-mari, zobor-doḳoldari forman-todontor bisar-asar. ⁹Gia Lebi ḳandanor imam oḳol ar hou amolor fordan hakim sabor dorbaro nalish hunaio, hunaile tara tumrare bisaror rae batai diba. ¹⁰Ar Mabudor fosond ḳora zagat tara ze rae zanaiba, ou rayor mormo buzia tumra ḳam ḳorbae, tara zeta hikai diba, kub kial ḳoria ita manio. ¹¹Allai shoriotor hukumor befare tara zela talim diba, tara zelaḳan bisaror rae diba, otar mormo buzia tumra ḳam ḳorio, tarar ḳota taki unnish-bish kichchu ḳorio na. ¹²Kunu manshe beṭagiri deḳaia zudi hou hakimor rae na mane, ba Alla Mabudor ḳadim ou imam sabor hukum na mane, te tare nichchit zane marilio. Boni Israilor bitre taki ou nomunae naformani ḳedaio. ¹³Teu ita hunia hoḳol manshe ḍoraiba, tara ar beṭagiri deḳanir shaosh faita nae.

Raza-bashshar lagi niom-ḳanun

¹⁴“Tumrar Mabud Allae tumrare ze deshor doḳoldari dira, hono gia boshot ḳoria harle tumra ḳoibae, ao, amrar ash-fashor zati oḳolor laḳan amrar nizor zatir lagio eḳzon bashsha banai. ¹⁵Hou shomoe tumrar Mabud Allae zare fosond ḳorba, tareu tumrar bashsha banaio. He zanu tumrar nizor zatir bai oe, kunu bin zatir manshore tumrar bashsha banaio na. ¹⁶I bashshae tar nizor lagi bout guṛa zanu na zomae, guṛa zuganir niote he zanu Boni Israilor manshore Mishor desho na faṭae. Mono rakio, Mabude age hukum disoin, tumra ar kunudin hi fotedi zaio na. ¹⁷I bashshae zanu bout bia-shadi na ḳore, arnae tar dil be-fote zaibogi. He zanu nizor lagi besh ḳori shuna-rufa na zomae.

¹⁸“Tare raz-godit boanir ḳalo Lebi ḳandanor imam sab oḳolor gese ze Tourat kitab taḳbo, ou kitabor aro eḳ kopi lekia tar nizor lagi nite oibo. ¹⁹Ikan tar nizor gese roibo, tar dilo Alla Mabudor ḍor-ḳof raḳar lagi ou Tourat ar er bitoror hoḳol hukum-ahkam furafur mania solar niote, he zindegibor ou kitab tilaot ḳorbo. ²⁰Teu tar zatir baiain taki nizore boṛo mono ḳorto nae, he Tourator hukum-ahkamor unish-bish ḳorto nae. Teu he ar tar aolad oḳolor godi staei oibo, tara bout din Boni Israilor ufre bashshai ḳorba.

Imam sab ar Lebi ḳandanor boron-fushon

¹“Lebi ḳandanor imam oḳole ar asta Lebi ḳandanor manshe, Boni Israilor aro ḳandanor laḳan kunu zomi-mirash ba don-samana faita nae. Mabudor name deoa hoḳol zator kurbanir gust ar hoḳol lilla-sodgar baṭo tara ḳaiba. ²Tara nizor Boni Israilor zatir baiaintor laḳan kunu zomi-mirash faita nae. Shoeong Alla Mabudu tarar mirash, tain nizeo tarare i oada disoin.

³“Manshe zoto goru-sagol kurbani diba, itar ḳandor gust, duio gal ar feṭor bitoror hokkolta imam sabre dibae, ita tan faona. ⁴Tumrar ḳetor foela foshol, baganor angur taki banail foela shorbot ar zoetun taki banail telor foela ongsho, sagol-meṛar foela bar ḳaṭa ruma imam sabre dibae. ⁵Zano to, tumrar Mabud Allae tumrar hoḳol ḳandanor maz taki Lebi ḳandanre fosond ḳoria alog ḳorsoin, zate tara hor-hamesha Mabudor ebadot-bondegir ḳamo roin.

⁶“Ar Israil deshor zekunu ṭaun taki Lebi ḳandanor kunu aolad zudi Mabudor ashik bonia Mabudor fosond ḳora zagat ae, ⁷te he-o tar ḳandanor baiaintor laḳan Alla Mabudor dorbaro ebadot-bondegir ḳam ḳorbo. ⁸Baki imam oḳolor laḳan he-o tar ḳana-finar baṭ faibo, erloge tar mouroshi samana besar ṭeḳa-foeshao faibo.

Zadu-montro taki fobitro roa

⁹“Tumrar Mabud Allae tumrare ze desh dira, hou deshor bashinda oḳole zela zogoinno naformani ḳoroin, tumra ita hikio na. ¹⁰Tumrar maze zanu ila kunu manush na mile, zegue tar nizor aoladre agunit falaia boli dey, tabzati montro foṛe, gona-basa ḳore, zadu-ṭuna ḳore, ¹¹zegue tontro-montro salae, zin-but-ferot shadon ḳore ar murdar ruhudi azirat ḳore. ¹²Ita naformani ḳam zegue ḳore, Mabude tare gin ḳoroin. Ota ḳam ḳorae Mabude hou zati oḳolre, tumrar samne taki ḳedai dira. ¹³Erlagi tumra nizor Mabud Allar samne nidushi roio.”

Hozrot Musa (a:)-or laḳan eḳ nobi

¹⁴Hozrot Musae aro ḳoila, “Mono rakio, tumra zeta zati oḳolre ḳedaia dirae, ita to zadugir ar gonoḳ oḳolor ḳotae sole, oile tumrar Mabud Allae tumrar lagi ita nished ḳorsoin. ¹⁵Tumrar Mabud Allae tumrar shomaz taki, tumrar baiaintor maz taki18:15 “Tumrar baiaintor maz taki” mani, ḳali Boni Israil zati taki, oinno ar kunu zati taki nai. 15:7 ar 24:14 aeat deḳo., amar laḳan eḳzon nobi faṭaiba, tumra hoḳol en hukume solte oibo. ¹⁶Hou Tur faṛor daro tumra hoḳol ze din Mabudor samne azir oislae, hou din to tumra Alla Mabudor gese mangia ḳoislae, amra ar Alla Mabudor mukor aoaz huntam sai na, tan nuror aguino ar deḳtam sai na, arnae amra morizimu.

¹⁷“Teu Mabude amare ḳoila, tara ṭik matu matisoin. ¹⁸Ami tarar lagi tarar nizor baiain18:18 “Tarar nizor baiain” mani, Boni Israil zati. 18:15 aeator nuṭ deḳo. taki tumar laḳan eḳzon nobi faṭaimu, en muko amar kalam shorif dimu, ar ami enre zeta zeta hikai dimu, ein tumrare ota zanaiba. ¹⁹Ar amar nam loia tain amar kalam oḳol bataiba, na-manra oḳolre ami dayi ḳormu. ²⁰Oile ami zeta ḳoisi na kunu nobie zudi bod shaosh ḳori amar name ila kunu kalam batae, ba kunu deb-debir nam loia ilaḳan mat mate, te he morteu oibo.

²¹“Oḳon kunu buli hunar bade tumrar monor maze sinta aito fare, ikan Mabude bataisoin ki na, kila buzmu? ²²Erlagi huno, Mabudor nam loia kunu nobie kunta ḳoar bade zudi ita na fole, ba ola na goṭe, te buzilio ikan Mabudor ḳota nae. Hou nobie tar bod shaoshe ita ḳoise, ilaḳan zonre tumra ḍoraio na.”

Kuni oḳolor ashroe ṭaun

¹Musa nobie tarare aro ḳoila, “Tumrar Mabud Allae zeta deshor doḳoldari dira, honor bashinda oḳolre tain binash ḳoria harle, tumra zebla tarar baṛi-gor ar ṭauno hamaia boshot ḳorbae, ^2-3hou shomoe tumrar Mabud Allar deoa ou zominre tin baṭe baṭio, ar eḳṭa eḳṭa ḳori muṭ tinṭa ṭaunre fosond ḳoria alog ḳorio, ar ota ṭauno zaibar lagi rasta zuit-zait rakio. Teu tumrar mazor ḳeu zudi onichchae ḳeurore kun ḳorilae, te ou nomunar kuni bagia gia hou ṭauno bonobashi oia ashroe loibo.

⁴“Monor maze kunuzat ingsha-dushmoni saṛa ichcha na ḳoria aḳta zudi eḳzone aroḳ zonre kun ḳorilae, te zan basanir lagi ou kuni bagia gia tar ḳanda-ḳasar bonobashi ṭauno ashroe loibo. ⁵Mono ḳoro, eḳzon manush dusra zonor log oia zongolo laḳṛi ḳaṭat gelo, gia kuṛaldi gas ḳaṭibar bala aḳtau kuṛalor asaṛi taki kuṛal suṭia, dusra zonor gotro lagia he morigelo, ou halote kuni gia tar ḳanda-ḳasar ashroe ṭauno zan basanir shuzug faibo. ⁶Arnae kun oa zonor afon manshe gusa ḳoria bodla loibar niote ou manshore dorto saibo, ar zan basanir ashroe ṭaun daro na roile tare doria marilto fare. Ashole to hi beṭae ichcha ḳoria kun ḳorse na, he shaza faibar ḳota nae. ⁷Erlagi ami tumrare hukum diram, tumrar lagi tinṭa ashroe ṭaun alog ḳori rakio.

⁸“Tumrar Mabud Allae tumrar baf-dadar loge ḳosom mafik zaga baṛaia zebla tumrare asta deshor malikana diba, ⁹ou shomoe tumra aro tinḳan ashroe ṭaun alog ḳori raḳbae. Ḳali aiz ami tumrare zeta hukum disi tumra zudi kub kiali oia ita mania solo ar zudi hor-hamesha Allare mohobbot ḳoro ar tan fote solo, te tain nichchoe tumrare asta deshor malikana dibau. ¹⁰Ou ashroe ṭaun raḳar ḳaron oilo, tumrar Mabud Allae tumrare ze deshor malikana dira, hou zomino zanu kunu ni-oforadir lou na foṛe, ar tumra kunuzat kunor dayi na o.

¹¹“Oile ḳeu zudi rag-gusa, ingsha ḳoria aroḳ zonre kun ḳorar niote ut fatia roe, bade hamla ḳoria kun ḳorilae, ar ou kuni gia kunu ashroe ṭauno hamai zae, ¹²te tar gau ba ṭaunor murobbi-shalish oḳole, manush faṭaia tare dorai ania, ogure ḳatol ḳorar lagi kun oa zonor afon manshor ato shofi diba. ¹³Ou kunire tumra kunu doea-maea ḳorio na. Tumra Boni Israilor maz taki ni-oforadire kunor dae-bar fusia falaio, teu tumrar balai oibo.

Zominor shimana kuṭi

¹⁴“Tumrar Mabud Allae tumrare ze deshor doḳoldari dira, hou deshor zominor furan amolo gaṛa ari-forir kunu shimana kuṭi unnoish-bish ḳorio na.

Bisaror shakki formanor niom-ḳanun

¹⁵“Ḳeuror befare kunuzat guna ba oforador nalish aile, te ḳali eḳzonor shakki hunia rae dio na, dui ba tin zonor shakki forman loia bisar-shalishor rae dio.

¹⁶“Kunu manshe zudi aroḳ zonor ḳeti ḳorar niote kunu nalish dey, ¹⁷te ou badi ar bibadi duio fokko hou amolor hakim ar imam sab oḳolor gese gia Mabudor samne azir oiba. ¹⁸Bade shalish oḳole kub kial ḳoria itar tallash ḳorba, tallashi ḳalo zudi dora foṛe he tar afon zatir bair befare misa nalish dise, ¹⁹te ou nalish dia he hou zonor zeta ḳeti ḳorto saisil, tumra ogur oula ḳeti ḳorio. Ou nomunae tumra nizor shomaz taki naformanire fusia falaio. ²⁰Ita hunia baki hoḳol Boni Israile ḍoraiba, teu ila ḳam ar ḳeu ḳorto nae. ²¹Ila oforadire tumra kunu laḳan doea-maea ḳorio na, zanor bodla zan, soukor bodla souk, dator bodla dat, ator bodla at, faor bodla fao adae ḳorio.

Laṛai-zuddo ḳorar niom-ḳanun

¹“Tumrar dushmonor loge laṛai ḳorat gia zudi deḳo, tarar guṛa, guṛar gaṛi, tarar sifai tumra taki beshi, te ḍoraio na. Zano to, tumrar Mabud Alla, zein tumrare Mishor desh taki bar ḳoria anchoin, tain nize tumrar loge asoin. ²Laṛair niote baronir age imam sabe aia sifai oḳolre ḳoiba, ³O Boni Israil, huno, tumra aiz tumrar dushmonor loge laṛai ḳorat zairae, oḳon tumrar monre ḳomzur banaio na, ḍoraio na, ḍoraia nirash oio na, dushmonor ḍore ḳafio na. ⁴Dushmonor loge laṛait zitanir lagi, tumrar Mabud Alla to tumrar loge oia zaira.

⁵“Bade tarar ofisar oḳol aia sifai oḳolre zikaiba, tumrar maze ila kunu sifai ase ni, zegue noea gor banaia hari, ou goro boshot ḳorar lagi duar onusṭan baki raḳse? Te tumi nizor baṛit zaogi, arnae laṛait gia morigele dusra manush aia ou onusṭan ḳorilaibo. ⁶Ar kunu sifai ase ni, zegue anguror bagan ḳoria foelakur fol na ḳaia laṛait aise? Te tumio baṛit zaogi, arnae laṛait gia morigele dusra manshe aia tumar baganor fol ḳailibo. ⁷Ar tumra ḳeuror aḳt ḳoria hari bashor rait baki roise ni? Te tumio baṛit zaogi, arnae laṛait gia morigele dusra beṭae aia ou ḳoinare bia ḳorilibo. ⁸Ou ofisar oḳole aro zikaiba, tumrar maze ila kunu sifai ase ni, zegur zano ḍor ḳorer, mone ḳafer? Te tumio tumar baṛit zaogi, arnae tumare dekia logor sifai oḳolo ḳomzur oiziba. ⁹Ou nomunae ofisar oḳolor zikani shesh oile, tara sifai dol oḳolor ufre kamanḍar boail ḳorba.

¹⁰“Tumra kunu gau ba ṭaunor loge laṛai ḳorar niote zebla hou zagar daro zaibae, gia honor manshor gese ḳobria faṭaia ḳoio, tara zanu apushe tumrar tabedari manilain. ¹¹Tara zudi razi oia ṭauno hamanir geiṭ kulia dilain, te tara hoḳol tumrar raiot bonia ḳazna diba ar tumrar gulami ḳorba. ¹²Ar razi na oia laṛai ḳorto saile, tumra ou ṭaunre beria rakio. ¹³Bade tumrar Mabud Allae hou zagare tumrar ato shofia harle, tumra hoḳol beṭaintore ḳatol ḳorio. ¹⁴Oile honor beṭi manush, huruttain, foshur fal ar hou zagar hokkolta gonimotor mal hishabe tumra nitae farbae. Dushmonor zomin taki gonimotor mal hishabe tumrar Mabud Allae tumrare zotota dan ḳorba, ita tumra bug-doḳol ḳortae farbae. ¹⁵Zeta ṭaun oḳol tumrar desh taki bakka duroi ar tumrar ḳanda-ḳasar zati oḳolor ṭaun nae, ota ṭaunor manshor loge ou laḳan bebohar ḳorio.

¹⁶“Oile tumrar ḳanda-ḳasar zeta zati oḳolre tumrar Mabud Allae tumrar ato dira, ita kunugureu zinda rakio na. ¹⁷Tumra nizor Mabud Allar hukum mafik, Hiṭṭi, Amuri, Kenani, Farizi, Hibbi ar Zibuzi oḳolre furafur nifat ḳorbae. ¹⁸Arnae tara nizor deb-debire fuza ḳorar bala zoto zogoinno naformani ḳoroin, tarar ota tumrao hikibae, hikia nizor Mabud Allar dorbaro gunar ḳam ḳorbae.

¹⁹“Kunu gau ba ṭaunor loge laṛait gia tumra zebla bout lamba shomoe dori beria raḳo, ou shomoe honor foldar kunuzat gas-fala kuṛaldi ḳaṭio na. Tumra itar fol ḳaio, oile gas ḳaṭio na. Gas-gasali to tumrar dushmon nae zen otare hamla ḳortae. ²⁰Ta-o zeta gas kunu fol-foladir gas nae, ita ḳaṭia honor bashinda oḳolre laṛait aranir ag forzonto, ota dia atiar banaia hamla ḳortae farbae.

Ozana kunor befare hukum

¹“Tumrar Mabud Allae tumrare ze deshor doḳoldari dira, hono bondor maze zudi kunu manshor lash foṛi roise deḳa zae, ar tar kuni kunu forisoe na mile, ²te tumrar moe-murobbi ar hakim-shalish oḳol bar oi aia, mafia deḳba ou lashor ges taki kun gau ḳotoḳan duroi. ³Dekia hoḳol taki ḳasar gaur murobbi oḳole ou laḳan eḳ gai-basur fosond ḳorba, zeṭa dia kunuzat ḳam-ḳaz, al-chash ḳora oise na. ⁴Bade honor murobbi oḳole ou basur loia omon eḳ zagat zaiba, zeḳano fanir fut ala ḳal ase, ar ḳalor faror zomino kunuzat al-chash ba ali falail oise na. Hono gia ou basuror gordona bangiliba. ⁵Bade Lebi ḳandanor imam oḳol ou zagat aiba. Ḳaron tumrar Mabud Allae tarare fosond ḳorsoin, tan ebadot-bondegi ḳora, tan name manshor lagi dua-durud ḳora, ar hoḳol nomunar fitna-foshad, mara-marir bisar ḳorar lagi. ⁶Basuror gordona bangia harle ḳanda-ḳasar gaur hou murobbi oḳole, ou ḳalor fanidi basuror ufre tarar at doiba. ⁷Doia ḳoiba, ou manush kun oite amra ḳeu deḳsi na, amrar ate tare marsio na. ⁸O Mabud, tumar azad ḳora Boni Israilre tumi oḳon mafi deo, kun oa ou ni-oforadi zonor lagi tumar i bonda oḳolre tumi dayi ḳorio na. Oḳan ḳoia harle hou kunor dae taki tara rehai faiba. ⁹Ou nomunae tumrar shomaz taki ni-oforadi manshor kunor dae-bar horaitae farbae, ḳaron Alla Mabude zela fosond ḳoroin, tumra olau ḳorso.

Zuddot bondi beṭire bia ḳora

¹⁰“Dushmonor loge laṛait gia harle, tumrar Mabud Allae zebla dushmon oḳolre tumrar ato shofia diba, ar tumra tarare bondi ḳorbae, ¹¹ou shomoe tarar mazor kunu shundori beṭire dekia tumrar maze ḳeu zudi ashik boni zae, ar ou beṭire bia ḳorar kial oe, ¹²te taire nizor baṛit anbae. Bade tai nizor matar sul ḳamaibo, nouk ḳaṭibo, ¹³ar bondi ḳalin halotor ḳafoṛ-sufoṛ falaia, tumar baṛit roia tair ma-bafor lagi fura eḳ mash ḳanda-ḳaṭi, ahazari ḳorbo. Ou eḳ mash bade taire bia ḳoria harle, tumra zamai-bou oibae. ¹⁴Bia-shadir bade zudi tumi ou beṭir ufre kushi na o, te taire tair kushi mafik saṛi dite oibo. Taire bandi hishabe raḳa ba besar eḳtiar tumar nai, ḳaron tumi tair ijjot nosṭo ḳorso.

Boṛo fuar faona hok

¹⁵“Kunu beṭar zudi dui bou oe, ar beṭae eḳ boure maea ḳore, dusra boure maea na ḳore. Ou duio bour goro zudi fuain oin, er mazor boṛo fua zudi hou maea na ḳora bour goro oe, ¹⁶te tan zomi-mirash baṭia dibar ḳalo, tan maear bour goror fuare boṛo fuar hok dita farta nae. ¹⁷Borong boṛo fuare tan oinno fuain taki ḍabol dite oibo. He to oilo tan zuankir foela fol, boṛo futor dabidar ḳali he-u.

Naforman futor bisar

¹⁸“Ḳeuror kunu fuae zudi ma-bafor ḳota na hune, ma-bafor hukumor ulṭa sole, tarar buz-shashon na mania ku-fote zaegi, ¹⁹te tar ma-bafe tare doria murobbi oḳolor gese niba, tarar gau ba ṭauno hamanir geiṭor gese fainchaiti boiṭok ḳanat niba. ²⁰Nia hou murobbi oḳolre ḳoiba, amrar ou fua kub naforman ar ku-foti bonigese, he amrar ḳota mane na, mod ḳaia matlami ḳore, ar ṭeḳa-foesha uṛae. ²¹Teu hou ṭaunor hoḳol beṭainte fattor maria tare ḳatol ḳorba. Ou nomunae tumrar maz taki olaḳan naformani fusia falaibae. Ar ita hunia hoḳol Boni Israile ḍoraiba.

Gaso loṭḳail lashor befare

²²“Kunu manshe zudi moutor shaza faoar zuka oforad ḳore, ar tare marar bade lash gaso loṭḳail oe, ²³te tar lashre rait forzonto gaso loṭḳaia rakio na, din taḳteu tare maṭi dilaio. Zano to, gaso loṭḳail manush Allar lannoti. Kial rakio, tumrar Mabud Allae tumrare ze deshor malikana dira, ita tumra nafaḳ banaio na.

¹“Tumrar zatir kunu bair goru-sagol zudi fot araia zaoat deḳo, te tumra nirai na takia, iṭare firaia ania tar malikor gese dio. ²Ou malik zudi tumrar ari-forir ḳeu nao oe, ba osina kunu zon oe, te iṭa tumra nizor baṛit nibaegi, nia he zebla tukanit aibo, ou shomoe tare dibae. ³Tumrar zatir kunu bair gada, tar finnor ḳafoṛ, ba tar arail zekunu samana faile tumra ola ḳorio, nirai horia zaio na.

⁴“Tumar zatir bair kunu goru-gada fotor maze foṛigese dekia tumi horia zaio na, iṭa ubanir lagi tumi doria shaijjo ḳorio.

⁵“Beṭinte beṭaintor ḳafoṛ ar beṭainte beṭintor ḳafoṛ findio na. Zegie ila ḳam ḳore, tumrar Mabud Allae tare gin ḳoroin.

⁶“Fotedi aṭia zaite shomoe kunu gasor ḍalo, ba maṭir ufre kunu fakir bada deḳle, badat kunu fakie ḍimo um der, ba tar baichchar loge ase, te baichchar loge tar maʼre doria nio na. ⁷Shok oile baichcha niogi, oile tar maʼre nichchit saṛia zaio. Teu tumar balai oibo, tumar haeati baṛibo.

⁸“Noea gor banaile tumra goror saṭor ufre sairo galabae beṛa dibae, arnae saṭor ufre taki ḳeu foṛia morigele tumra kunor dayi oibae.

⁹“Tumrar anguror bagano dui zator bisi lagaio na, ila ḳorle angur fol ar dusra zator bisir folo tumrar lagi haram oizibo.

¹⁰“Goru ar gadare eḳ zualo lagaia al-chash ḳorio na.

¹¹“Tumra dui zator sutadi banail ḳafoṛ findio na.

¹²“Tumrar uṛibar saddoror sairo kunat sutagesa dio.

Bour loge mila-misha ḳorar niom

¹³“Kunu beṭae bia ḳoria bashor gor ḳorar bade zudi boure fosond na oe, ¹⁴he zudi bour name bodnam roṭaia tair gibot gaia ḳoe, ami to ou beṭire bia ḳorsi ṭiku, oile tair shotittor kunu sinnot faisi na. ¹⁵Te ou ḳoinar ma-bafe tarar fuṛir shotittor sin lagail bisnar ḳafoṛ loia, honor gau ba ṭauno hamanir geiṭor muko murobbi-shalish oḳolor gese zaiba. ¹⁶Gia ḳoinar bafe murobbi oḳolre ḳoiba, ami to ou damandor loge amar fuṛire shadi dislam, oḳon he amar fuṛire fosond ḳore na. ¹⁷Ar he bodnam roṭaia ḳoise, he bule amar fuṛir shotittor sinnot faise na, oile afnara deḳoukka, amar fuṛir shotittor sinnot loia ami azir oisi. Oḳan ḳoia he ou bisnar ḳafoṛ melia murobbi oḳolre sinnot deḳaibo. ¹⁸Teu hi murobbi oḳole ou damandre shaza diba. ¹⁹Tar zorimana babot eḳ-sho tola rufa adae ḳoria ḳoinar bafore diba, ḳaron ou damande Boni Israili eḳ shoti ḳoinar bodnam roṭaise. Ar ou ḳoinare loia he shongshar ḳorte oibo, zindegie kunudin taire saṛar kunu fot nai.

²⁰“Ar damandor ḳota hasa oile, ou ḳoinar shotittor sinnot na faile, ²¹ḳoinare tair bafor baṛir geiṭor gese nia, honor beṭainte fattor maria taire mariliba. Tai to bafor baṛit taḳar ḳalo zinar ḳam ḳoria, Boni Israilor maze zogoinno naformani ḳorse. Ou nomunae tumra nizor shomaz taki ola naformanire fusia falaibae.

²²“Kunu beṭae zudi aroḳ beṭar bour loge zina ḳorat dora ḳae, te ou beṭa-beṭi duio zonre marilite oibo. Boni Israil taki tumra i laḳan naformanir nam miṭaibae.

²³“Bia ṭik oigese ila kunu fuṛire ḳeu ṭaunor maze faia zudi tair loge zina ḳore, ²⁴te tara duiogure hou zagar mein geiṭor gese nia fattor maria marilibae. Fuṛire ḳatol ḳorar ḳaron oilo, tai to hono taki shaijjor lagi kunu sik-sillani dise na, ar beṭare ḳatolor ḳaron oilo, he aroḳ beṭar bour ijjot marse. Ou nomunae tumra Boni Israil taki ola naformani fusia falaibae.

²⁵“Bia ṭik oigese omon kunu fuṛire ḳeu kunu nirai zagat faia hari, zur ḳoria tair loge mila-misha ḳorle, tumra ḳali ou beṭare ḳatol ḳorbae. ²⁶Ar ou fuṛire saṛi dibae, tai to ḳatol oar zuka guna ḳorse na. Ita to eḳzone dusra zonre kun ḳorar laḳanu. ²⁷Ḳaron ou beṭae taire nirai zagat dorse, sik-sillani dileo taire basanir ḳeu to ino asil na.

²⁸“Bia-shadi ṭik oise na, omon kunu fuṛire faia ḳeu zudi zur ḳoria tair loge mila-misha ḳore, ar tara dora ḳae, ²⁹te ou beṭae fuṛir bafore foinchash tola rufa dibo, ar fuṛir ijjot marae taire bia ḳorte oibo. Zindegie kunudin taire talaḳ dito farto nae.

³⁰“Kunu beṭae tar haton maʼre bia ḳora zaiz nae, ila ḳorle he tar bafor bour loge zina ḳoria bafore beijjot ḳorbo.”

Boni Israilor mahfilo hamanir niom

¹Hozrot Musae aro ḳoira, “Kunu beṭar zudi onḍokush sesa oe, ba tar furushali nofs ḳaṭia falail oe, te hi beṭa Mabudor bonda oḳolor mahfilo hamanir shuzug nai.

²“Kunu funga manush Mabudor bonda oḳolor mahfilo hamanir shuzug nai, tar souddo siṛir ḳeuror hamanir fot nai.

³“Boni-Amman ba Muabi zatir kunu manush Mabudor bonda oḳolor mahfilo hamanir shuzug nai, tarar souddo siṛir ḳeu hamanir fot faito nae. ⁴Mono ase ni, tumra Mishor desh taki bar oia aibar ḳalo, fotor maze tara tumrar ḳani-fani loia aguai aise na, borong tumrare boddua dibar lagi Balam bin Baur namor eḳ pirre tara gush disil, dia Iram-Nohoroyim deshor Fotur ṭaun taki tare baṛa ḳori anchil. ⁵Oile tumrar Mabud Allae ou Balamor arzit shae disoin na, tain to tumrare mohobbot ḳoroin, erlagi hou Balam piror bodduare bodlaia tain nek-dua banaila. ⁶Oḳon tumra zindegie kunudin itar kunu balai ba ufoḳar ḳorio na.

⁷“Ta-o Idumi oḳolre tumra ingsha ḳorio na, era to tumrar bai. Mishori manshore ingsha ḳorio na, tumra musafir halote age tarar desho boshot ḳorso. ⁸Tumrar loge boshot ḳorar tin siṛi taki tara Mabudor bonda oḳolor mahfilo hamaita farba.

Sifai oḳolor kemp fak-fobitro rakio

⁹“Dushmonor loge laṛait bar oia tumra hoḳol nomunar nafaki taki basia roio. ¹⁰Raitor bala kunu sifair zoubonor fani bar oia nafaḳ bonigele, he kempor bare zaite oibo. ¹¹Bade biali bala he naia hari, shuruz ḍubia harle kempo aia hamaibo.

¹²“Faeḳana ḳorar lagi tumra kempor bare eḳ zaga banaibae. ¹³Tumrar atiar-potror loge maṭi kuṛibar kudal rakio. Faeḳana ḳoria harle kudaldi gat kudia maṭir tole haraio. ¹⁴Kial rakio, tumrare basanir lagi, ar dushmonre tumrar ato shofibar kiale tumrar Mabud Alla tumrar kempor bitre gura-fira ḳoroin. Erlagi tumrar kempre fak-fobitro rakio, arnae tumrar nafaki dekia Mabude tumrar ufre taki muk firailiba.

Nanan laḳan hukum-ahkam

¹⁵“Kunu manshor kina gulam bagia aia zudi tumrar gese ashroe loe, te tare tar malikor gese firai dio na. ¹⁶He tumrar deshor zeḳano roito sae, ono-u tare zaga dio, tare duk dio na.

¹⁷“Boni Israilor kunu beṭinte zanu mondir-aḳṛar noṭigiri na ḳore. Kunu beṭaeo zanu ola noṭagiri na ḳore. ¹⁸Noṭi beṭi ba noṭa beṭar ruzi-ruzgaror ṭeḳa-foeshar kunuzat mannot-kurbani tumrar Mabud Allar goro anio na. Ilaḳan beṭa-beṭintore to Mabude gin ḳoroin.

¹⁹“Tumrar zatir kunu bair ges taki shud ḳaio na, ita ṭeḳa-foesha, ḳani-kurakir zinish ba aro kunuta oileo kunuzat shud loio na. ²⁰Oinno zatir ges taki shud nitae farbae, oile Boni Israil taki shud ḳaoa haram. Ita mania solle tumra ze deshor doḳoldari fairae, hou zagat gia harle tumrar Mabud Allae tumrar hoḳol ḳam-ḳazo rohom-borkot diba.

²¹“Tumra nizor Mabud Allar name kunuta mannot ḳorle, ita zoldi ḳori adae ḳorio, ita adae na ḳorle tumrar guna oibo. Ar i hishab to tumrar Mabud Allae bad dita nae. ²²Oile kunuzat mannot na ḳorle guna nae. ²³Tumrar zoban taki ze mannot ḳorso, iṭa nichchit adae ḳorbae, ḳaron tumar nizor zobane, nizor kushie Alla Mabudor name ita mancho, erlagi adaeo ḳorbae.

²⁴“Tumrar ari-forir anguror bagano hamaile nizor haus miṭaia angur ḳaio, oile kunu boul ba bostat ḳori kunta nitae fartae nae. ²⁵Ḳeuror zomino gia atdi kunuzat foe-fosolor soṛa siṛitae farbae, oile ḳasi dia daia nitae fartae nae.”

Bia-shadir befare

¹Hozrot Musae aro ḳoira, “Biar bade zudi kunu zamaie tar bour maze kut fae, faia tair ufre naraz oe, ar talaḳ nama lekia tair ato dia bidae ḳori dey. ²Ar ou boue gia zudi dusra zamair gese bia boe, ³bade hou dusra zamaieo taire nafosond ḳoria zudi ola talaḳ dilae, ba hou zamai morizae, ⁴te tair hou foela zamaie taire ar bia ḳorto farto nae, tai to en lagi nafaḳ oigese. Ilaḳan bia-shadire Mabude gin ḳoroin. Tumrar Mabud Allae tumrare ze deshor malikana dira, tumra ila guna ḳoria i deshre nafaḳ banaio na.

⁵“Noea bia ḳora kunu beṭare zuddot faṭaio na, zur-zobordosti ḳoria tare kunu ḳamor bar dio na. He fura eḳ bosor ḳam-ḳaz na ḳoria, tar bour loge kushi-bashi ḳorar shuzug dio.

Shomazo solar hukum-ahkam

⁶“Aolati malor bondok hishabe tumra ḳeuror gail-sia, ba ḳali so bondok rakio na. Ila ḳorle tar zan basanir ḳani-kurakir fot bond oizibo.

⁷“Kunu manshe zudi Boni Israilor aroḳ baire suri ḳoria nia gulam banailae, ba dusra zagat besia hari dora ḳae, te tare ḳatol ḳorbae. Ou nomunae tumrar shomaz taki ila naformanire fusia falaibae.

⁸“Ḳeuror gotro fosa-kushṭo bemar deḳa dile, Lebi ḳandanor imam oḳolor foramish mafik solio. Ami tarare zeta hukum disi, tumra kub kiali oia ita manio. ⁹Mishor desh taki bar oia aibar foto, tumrar Mabud Allae amar boin Moriomor ze dosha goṭaisla, ita tumra mono rakio.

¹⁰“Tumar ari-forire kunta aolat dile, tar ges taki kunu mal bondok nibar niote, tumi tar goro hamaio na. ¹¹Tumi goror bare ubaio, ar zare aolat diso, he tar gor taki bondoki mal ania tumare dibo. ¹²Aolat neora zon gorib-duki oile, tar deoa bondoki ḳeta-komoli nia tumi rait gumaio na. ¹³Hainja bala tumi tar mal firai dio, ota uṛia he rait gumaia tumare dua dibo. Teu tumar balai oibo, ar bondoki samana firot deoa to, tumrar Mabud Allar nozoro nekir ḳam.

¹⁴“Tumrar Boni Israil shomazor kunu bai24:14 “Boni Israil shomazor kunu bai.” Hibru bashae, tumrar baiaintor maze ḳeu. ba tumrar desho roura bin zatir kunu manshor gese faona taḳle, ar he gorib-duki, ruzi ḳamla zon oile, tar ufre zulum ḳorio na. ¹⁵Shuruz ḍubar age tumra tar faona mozuri dilaio, he to gorib manush, ou mozuri diau tar zindegi sole. Arnae mozurir lagi he Mabudor dorbaro foriad ḳorle, tumra gunar bagi oibae.

¹⁶“Fua-fuṛir oforador lagi tarar ma-bafore, ba ma-bafor oforade fua-fuṛire ḳatol ḳora zaito nae. Forteḳ zone nizor oforador shaza nize faibo.

¹⁷“Kunu bideshi musafir ba etimor ufre na-hok bisar oite dio na. Kunu ṛaṛi beṭir findibar ḳafoṛ bondok rakio na. ¹⁸Mono rakio, Mishor desho tumra gulam aslae, tumrar Mabud Allae tumrare hon taki azad ḳori anchoin. Erlagi ami tumrare ita ḳam ḳorar hukum diram.

¹⁹“Tumrar zominor dan ḳaṭar bade, danor kunu muiṭ fauria gelegi, iṭa anar lagi ar firot zaio na. Bideshi musafir, etim ar ṛaṛi beṭintor lagi iṭa dilaio, teu tumrar Mabud Allae tumrar hoḳol ḳam-ḳazo rohom-borkot diba. ²⁰Zoetun gasor fol faṛibar ḳalo eḳoi ḍalor fol duibar faṛio na. Eḳbar faṛar bade zeta roe, ita bideshi musafir, etim ar ṛaṛi beṭintor lagi toio. ²¹Tumrar angur baganor eḳ lot taki dui bar angur faṛio na, eḳbar faṛar bade zeta roe, ita bideshi musafir, etim ar ṛaṛi beṭintor lagi toi dio. ²²Faurio na, tumra to age Mishor desho gulam aslae. Erlagi ami tumrare ita ḳorar hukum diram.”

¹Musa nobie tarare aro ḳoira, “Manshor maze ḳaijja-fosad lagia zudi ita hakimor adaloto zae, te hakim oḳole oforadi zonre dushi shaibosto ḳorba, ar ni-oforadire ḳalas diba. ²Ou bisaro dushi zonre singladi marar rae dile, hakime tare maṭit hutaia tar faona mair tan nizor samne maraiba, ³oile sallishṭar beshi mara zaito nae. Arnae nizor zatir eḳ baire shomazor samne beijjot ḳora oibo.

⁴“Dan maṛa dibar ḳalo gorur muko hufi lagaio na.

Niaoladi ṛaṛi beṭir bia

⁵“Eḳ foribaror hoḳol baiain ekkano roar ḳalo zudi biati kunu bai morizae, ar tar kunu fuain na taḳe, te tar ṛaṛi boue tair deor saṛa dusra ḳeuror gese bia boito farto nae. Tair deore taire bia ḳoria tar ufre bortail daeitto adae ḳorbo. ⁶Tarar foela fuar zonom oile, i fua ou mora bair oarish hishabe goinno oibo, teu ou bair nam Boni Israil taki musi zaito nae. ⁷Oile tair deore zudi taire bia ḳorto razi na oe, te tai hou gau ba ṭaunor fainchaitor gese gia honor murobbi oḳolre ḳoibo, amar deore amare bia ḳorto razi nae, he tar mora bair nam Boni Israilor maze zinda raḳto sae na. Amar befare tar ufre bortail dae-daeitto adae ḳorer na. ⁸Teu hou murobbi oḳole tare anaia buzaiba, erbadeo he nika ḳorte razi na oile, ⁹ou ṛaṛi beṭie hou murobbi oḳolor samne, tar ḳasat gia tar faor ekkan zuta nize kulia nibogi, ar tar muko sef falaia ḳoibo, afon bair bongsho zegie basaito sae na, ogur dosha ola ouk. ¹⁰Bade ou beṭar bongshore Boni Israilor maze, zuta araorar bongsho name ḍaḳa oibo.

Shomazor aro hukum-ahkam

¹¹“Dui beṭae mara-marir ḳalo zudi, eḳzonor bou gia tair zamaire hou beṭar at taki basanir niote, hou beṭar furushali nofso sifia dore, ¹²te tumra hou beṭir at ḳaṭia falai dio. Taire kunu doya ḳorio na.

¹³“Mafo ṭogibar lagi tumrar tolir maze eḳoi mafor huru-boṛo dui fattor rakio na. ¹⁴Tumrar goro eḳoi mafor huru-boṛo duiṭa her-feṭu rakio na. ¹⁵Tumrar Mabud Allae tumrare ze deshor doḳoldari dira, hono lamba haeati faibar lagi, tumrar mafibar fattor ar her-feṭur uzon shoṭik rakio. ¹⁶Ḳaron zegie mafor maze ṭoga-ṭogi ḳore, tumrar Mabud Allae tare gin ḳoroin.

¹⁷“Mishor desh taki tumra bar oia aibar foto, Amaleki oḳole tumrar loge ze bebohar ḳorsil, ita faurio na. ¹⁸Aṭite aṭite tumrar ḳeu ḳeu zebla heran oia fise foṛi gesil, ou shomoe Amaleki oḳole aia hamla ḳorsil, tara to Allareo ḍoraise na. ¹⁹Tumrar Alla Mabude tumrare ze deshor malikana dira, hou deshor ash-fashor dushmon oḳol taki tain zebla tumrare shanti diba, hou shomoe tumra dunia taki Amaleki oḳolor nam miṭailibae. I hukum ḳan tumra kunu dinu faurio na.

Foela foshol ar dosh baṭor eḳ baṭ dibar niom

¹“O Boni Israil huno, tumrar Mabud Allae tumrare ze deshor malikana dira, tumra zebla hou deshor doḳol faia hono boshoti ḳorbae, ²ou shomoe tumrar Mabud Allar deoa zominor hoḳol zator foshol taki, foela faoa fosholor eḳṭa ongsho eḳ ṭukrit boria algaia toio. Ar tumrar Mabud Allae Baetulla Shorif hishabe ze zagare fosond ḳorba, ou foshol loia hono zaio. ³Gia hono azir imam sabre ḳoio, amrar Mabud Allae amrar moe-murobbir gese ḳosom ḳaia ze deshḳan dibar oada ḳorsla, amra oḳon ono aisi, aia tan samne azir oisi. ⁴Teu imam sabe tumrar at taki folor ṭukri nia Alla Mabudor kurbani ḳanar samne toiba. ⁵Bade tumra forteḳe tumrar Mabud Allar samne ubaia ḳoio, amrar ḳandanor mul murobbi Hozrot Iakub asla eḳzon Irami musafir, tain tuṛa ḳoezon manshore loge loia Mishor desho geslagi. Gia Mishor desho musafir halote boshot ḳorar ḳalo tan usillae tara eḳ mohan zati, ar bout boṛo bolala zati bonla. ⁶Bade Mishoror manshe amrar loge bozzati ḳorla, amrare duk-koshṭo dia, amraredi ḳoṭin gulami ḳorailo. ⁷Amra duk faia amrar moe-murobbir Mabud Allar dorbaro ḳandilam. Teu Mabude amrar foriad hunia, amrar duk-koshṭo, ḳoṭin gulami, ar amrar uforor zulumor bae nozor dila. ⁸Ar tan bolala-mozbut at baṛaia, kub ḍor-ḳof deḳaia, kudroti lila-ḳela dia ar asanok gozob ḍalia Mishor desh taki amrare bar ḳori anla. ⁹Tainu amrare ou desho anchoin, dud ar mour banḍar ala aramor ou desh amrare dan ḳorsoin. ¹⁰Erlagi O amrar Mabud, tumar deoa zominor fosholor foela baṭ loia ami tumar samne azir oisi. Oḳan ḳoia, tumrar Mabud Allar samne ou ṭukri toio, toia tanre soizda ḳorio. ¹¹Tumrar Mabud Allae tumrare ar tumrar foribarre zoto nomunar balai ḳorsoin, ota mono ḳoria tumra nize, Lebi ḳandanor hoḳole, ar tumrar loge roura bideshi musafir oḳole kushi-bashi ḳorio.

¹²“Forti tin bosor bade bade tumra foe-fosholor dosh baṭor eḳ baṭ Lebi ḳandanor manshore, bideshi musafir oḳolre, etim ar ṛaṛi beṭintor maze bilai dio. Teu era feṭ bori ḳaia tumrar deshor maze arame roiba. Erlagi ikṭar nam oilo doshmangshor bosor.26:12 Ashole fosholor dosh baṭor eḳ baṭ forti bosor deoa oe, oile ou tin bosor bade bade ou doshmangshor bosor oilo eḳṭa bishesh niom.¹³Bade tumra forteḳe tumrar Mabud Allare ḳoio, Mabud, ami tumar hukum mafik amar ruzir fobitro baṭre, amar gor taki nia Lebi ḳandanre, musafir oḳolre, etim ar ṛaṛi beṭintore bilai disi. Ami tumar kunu hukumor ḳelaf ḳorsi na, ba faurisi na. ¹⁴Murdar lagi ḳanda-ḳaṭi ar ahazari ḳorar shomoe ami ou fobitro ongshor kunuta ḳaisi na, ba nafaḳ halote ita baṛir bare nisi na, ar itar kunu ongsho murdar name dan-ḳoerato ḳorsi na. Ami amar Mabud Allar hukum mafik solchi, tumar hukum mafik hoḳol ḳam ḳorsi. ¹⁵Oḳon, O Mabud, tumar fobitro boshot ḳana taki, tumar arshe-azimo taki toledi saia deḳo, ar tumar ḳas proza Boni Israilre rohom-borkot deo. Amrar moe-murobbir loge ḳosom ḳora oada mafik, tumi amrare dud ar mour banḍar ala ou ze deshḳan dan ḳorso, er maṭit tumi rohom-borkot nazil ḳoro.

Allai apush-chukti

¹⁶“Tumrar Mabud Allae aiz tumrare ou hukum dira, tumra tan batail niom-ḳanun ar hukum-ahkam mania solio. Tumra dile-zane ashik bonia ita amol ḳorio. ¹⁷Tumra to aiz shikar ḳorso, ou Allau oila tumrar Mabud, tumra tan fote solbae, tan hukum-ahkam, tan shoriot ar niom-ḳanun manbae, tan ḳota hunbae. ¹⁸Erlagi Mabudeo aiz shikar ḳorsoin, tan oada mafik tumra oḳon tan proza, tumrau tan ḳas shompod, tumra tan hoḳol hukum-ahkam amol ḳorbae. ¹⁹Tain aro ḳoira, tan foeda ḳora tamam zatir ufre tumrare boṛo ḳorba. Tumrar ijjot, shunam ar tarif, hoḳol zatir ufre roibo. Tan oada mafik tumra oibae tumrar Mabud Allar name eḳ fobitro proza.”

Ibal faṛo kurbani ḳana banaio

¹Musa nobie Boni Israilor murobbi oḳolre loia manshore ḳoila, “Ami tumrare aiz zeta zeta hukum diram, tumra ita furafur amol ḳorio. ²Tumrar Mabud Allae tumrare ze desh dan ḳorra, Zordan gang far oia hari tumra zebla hou desho zaibae, zaoar bade ḳoekṭa boṛo boṛo fattor ḳaṛa ḳori hazaia, itare suna dia faḳa ḳorio. ³Ar otar ufre ou Tourator tamam hukum-ahkam leḳio. Buzrae ni, tumrar moe-murobbir Mabud Allae, dud ar mour banḍar ala ze deshḳan tumrare dibar oada ḳorsoin, in taki hou desho gia harle, ⁴Zordan gang far oia Ibal faṛor ufre uṭia, amar batail aizkur hukum mafik tumra hou fattor oḳol hazaia ḳaṛa ḳorio, ar itare suna dia faḳa ḳorio. ⁵Ar hono tumrar Mabud Allar name fattordi ekkan kurbani ḳana banaio. Ou fattoror maze luar kunu atiar lagaio na. ⁶Asta asta fattor dia tumrar Mabud Allar ou kurbani ḳana banaio, banaia er ufre tumrar Mabud Allar name zalail kurbani adae ḳorio. ⁷Ar salamoti kurbanio adae ḳorio. Ou kurbanir gust ḳaia tumrar Mabud Allar samne kushi-bashi ḳorio. ⁸Ar suna lefa hou fattoror ufre Tourator ou hukum-ahkam oḳol kub shundor ḳori leḳio.”

⁹Bade Musa nobie Lebi ḳandanor imam oḳolre loia hoḳol Boni Israilre ḳoila, “O Boni Israil, nirai o, ar amar ḳota huno, oḳon to tumra nizor Mabud Allar ḳas proza bonigese. ¹⁰Te tumra tan hukume solio, ar ami aiz zeta niom-ḳanun, hukum-ahkam zanailam, ita amol ḳorio.”

Ibal faṛ taki lannoti buli

¹¹Musa nobie ou din manshore hukum dila, ḳoila, ¹²“Zordan gang far oia harle ou shomoe Shimion, Lebi, Ehuda, Isaḳor, Iusuf, ar Bin-Iamin ḳandanor manush oḳol gia nek duar nishana hishabe Gorisim faṛor ufre uṭio. ¹³Ar bodduar nishana hishabe Ruben, Sadu, Ashir, Sobulon, Dan ar Noftali ḳandanor manush gia Ibal faṛor ufre uṭio. ¹⁴Bade Lebi ḳandanor manush oḳol ubaia, Boni Israilor tamam manshore zure zure sillaia ḳoibae,

¹⁵“Ze manshe laḳṛi ba fattor kudia, ba datu golaia kunu murti banae, ar fuza ḳorar niote ogure nia lukail zagat toe, he to lannoti. I murtire to Mabude gin ḳoroin, ita ḳali ḳamaror ator ḳam. Ikan hunia hoḳole ḳoio, Amin.

¹⁶“Ma-bafore zegie beijjot ḳore, he lannoti. Ikan hunia hoḳole ḳoio, Amin.

¹⁷“Doḳoldarir niote zominor ail ba shimana kuṭi zegie horae, he lannoti. Ikan hunia hoḳole ḳoio, Amin.

¹⁸“Anda manshore zegie bul fot deḳai dey, he lannoti. Ikan hunia hoḳole ḳoio, Amin.

¹⁹“Bideshi musafir, etim, ar ṛaṛi beṭintor bisar-shalishit zegie be-insafi ḳore, he lannoti. Ikan hunia hoḳole ḳoio, Amin.

²⁰“Haton maʼr loge zegie zina ḳore, he afon bafore beijjot ḳore. He to lannoti. Ikan hunia hoḳole ḳoio, Amin.

²¹“Kunu foshur loge zegie zina ḳore, he to lannoti. Ikan hunia hoḳole ḳoio, Amin.

²²“Zegie nizor boinor loge, haton maʼr, ba haton bafor torofa boinor loge zina ḳore, he to lannoti. Ikan hunia hoḳole ḳoio, Amin.

²³“Nizor hoṛir loge zegie zina ḳore, he to lannoti. Ikan hunia hoḳole ḳoio, Amin.

²⁴“Zegie lukaia kunu manshore kun ḳore, he to lannoti. Ikan hunia hoḳole ḳoio, Amin.

²⁵“Ni-oforadi manshore kun ḳorar chuktie zegie ṭeḳa ḳae, he to lannoti. Ikan hunia hoḳole ḳoio, Amin.

²⁶“Ou shoriotor kunu hukum-ahkam zegie mane na, zegie ita amol ḳore na, he to lannoti. Ikan hunia hoḳole ḳoio, Amin.

Allar baiddotar lagi rohomot

¹“O Boni Israil, ami aiz tumrare zeta hukum-ahkam diram, ota amol ḳorar niote tumra zudi nizor Mabud Allar kalamre kial ḳori mano, te tumrar Mabud Allae duniar hokkol zatir ufre tumrare usa ḳorba. ²Tumrar Mabud Allar kalam mania solle, tumra ou rohomot faibae, ar ou rohomot oḳol hamesha tumrar loge loge roibo,

³“Tumrar boshot-baṛi ar ḳet-ḳamaror maze rohom-borkot faibae.

⁴“Tan rohomote tumra bout aolad faibae, zomino bout foshol folibo, goru-sagole bout baichcha diba.

⁵“Tumar ugaro ar tumar saulor moṭkit boroḳot faibae.

⁶“Hoḳol halote hoḳol ḳamo tumi rohom-borkot faibae.

⁷“Dushmonir niote zetae tumrar loge lagba, Mabude itare tumrar gese araiba. Tara eḳ duaredi tumrare marat aile, shat duaredi bagiba.

⁸“Tumrar ugaror maze Mabude boroḳot diba, tumra ze ḳamo at dibae, ou ḳamou tain boroḳot diba. Tumrar Mabud Allae tumrare ze desh dan ḳorra, hono tumrare rohom-borkot diba.

⁹“Tumra zudi tumrar Mabud Allar hukum-ahkam mania, tan batail fote solo, te tain ḳosom ḳaia zela oada ḳorsoin, ola tan nizor fobitro proza hishabe tumrare ḳaim ḳorba. ¹⁰Ar asta duniar hoḳol zatie deḳba, tumrau oilae Mabudor ḳas manush, dekia tara hoḳole tumrare ḍoraiba.

¹¹“Tumrar Mabud Allae tumrar moe-murobbir gese ze desh dibar lagi ḳosom ḳaisla, ou desho tain tumrar bout balai ḳorba, tumrare bout aolad diba, tumrar foshur falainte bout baichcha diba, zomino bout foshol folibo. ¹²Tumrar Mabud Allae tan asmani rohomotor duar kulia diba, zorur mafik meg-fani dia tumrar ator hoḳol ḳamor maze rohom-borkot diba, bout zatire tumra ṭeḳa-foesha aolat dibae, oile tumra kunu aolat nibar dorḳar oito nae. ¹³Mabude tumrare ola banaiba, zate tumra hoḳolor matar ufre ro, ḳeuror faor tolat na taḳo. Tumra ḳali tumrar Mabud Allar ou hukum-ahkam oḳol kub zoton ḳoria amol ḳorio, zeta aiz ami tumrare ḳoiar, teu tumra hoḳolor ufre roibae, tole foṛtae nae. ¹⁴Ar aiz ami tumrare zeta hukum diar, amar ou talim taki tumra ḍaine-baue horio na. Kunu deb-debir ḳoredi douṛaia itar fuza ḳorat lagio na.

Naformanir lagi lannot

¹⁵“Oile tumra zudi tumrar Mabud Allar hukum na mano, tan zeta hukum-ahkam ar niom-ḳanun aiz ami zanaisi, tumra kub kiali oia ita na manle, tumrar ufre ou lannot oḳol foṛbo, ita hamesha tumrar loge loge roibo:

¹⁶“Tumrar boshot-baṛi, ḳet-ḳamar hoḳol zagat lannot foṛbo.

¹⁷“Tumrar ugaro ar saulor moṭkit lannot foṛbo.

¹⁸“Tumrar hurutta ḳom zonmiba, zomino foe-foshol ḳomizibo, goru-sagole baichcha ḳom diba, ou nomunae tumrar ufre lannot foṛbo.

¹⁹“Goro ba baira hoḳol ḳano tumra forti din lannot faibae.

²⁰“Naformani ḳam ḳoria Mabudor ges taki hori zaoae, tumrar hoḳol ḳam-ḳazor maze tain lannot diba. Bala-mosiboto foṛia, Allai gozobor zatae, tumra ekkere binash oar ag forzonto, aste aste ḳali ḳoe oibae. ²¹Tumra ze deshor doḳoldari fairae, Mabude hono tumrar ufre bemar saṛiba, bemare tumra morte morte hou desho taki binash oibae. ²²Mabude tumrar shorilo nosṭo oa bemar, bakka taf ar jola-fura, ota bemardi tumrar ufre gozob diba. Ar moṛki, hukna gorom batash, fosholor huna-ḳani hukai zaoar bemar ar fata mora, ota gozob oḳol tumrar zomino diba. Tumra moria fuṛanir ag forzonto i gozob tumrar ḳore ḳore roibo. ²³Tumrar matar uforor asman oibo fitolor laḳan shokto, ar faor tolor zomin oibo luar laḳan ḳoṭin. ²⁴Mabude megor bodla tumrar desho asman taki duil saṛiba, tumra binash oar ag forzonto ita hamesha foṛat roibo.

²⁵“Mabude tumrar dushmon oḳolor mukabilat tumrare araiba, erare eḳ fotedi marat gele shat fotedi bagibae. Tumrar dosha dekia zogotor hoḳol zatie ḍoraia ḳafiba. ²⁶Tumrar lash oibo foshu-fakintor kuraḳ. Itare ḳedanir lagi ḳeu roito nae. ²⁷Mabude hou Mishori oḳolor laḳan tumrar gotro gozobi bish-furi, ṭiumar, fuṭ-kauzoli bemar diba, ita taki ḳeu tumrare shifa ḳorar ḳemota nai. ²⁸Tain tumrare fagol, anda ar bedisha banaiba. ²⁹Andae zela andarir maze atai atai aṭe, tumra dinor bala ola aṭibae, tumrar kunu ḳamu kamiab oito nae. Tumrar ufre hamesha zulum ar luṭ-toraz solbo, ita taki basanir lagi ḳeu aito nae.

³⁰“Shadi ḳorar lagi ze ḳoinar loge tumar aḳt oibo, aroḳ beṭae aia ou ḳoinar ijjot luṭibo. Tumi gor banaibae, oile goro boshot ḳortae fartae nae. Anguror bagan ḳoria, fol ḳaoa ḳofalo zuṭto nae. ³¹Tumrar sokur samne tumrar goru zobo ḳora oibo, oile eḳ ṭukra gusto tumrar feṭo zaito nae. Tumrar gadare tumrar at taki ḳaṛia neoa oibo, ita ar firot faitae nae. Tumrar meṛa-sagol tumrar dushmonor ato zaibo, ota bifod taki basanir lagi ḳeu aguai aito nae. ³²Tumrar fua-fuṛin dusra zatir ato aṭok oiba, tarar ashae bar saite saite tumrar sokur zuti nosṭo oibo, oile kunta ḳorar shuzug oito nae. ³³Tumrar osina bin zatie tumrar ḳetor foe-foshol, ar tumrar menotor hoḳol mozuri luṭia nibogi, tumra hara zindegi ḳali zulum-mosibot faibae ar surmar oibae. ³⁴Tumrar souke i laḳan aro zeta deḳbae, dekia mata ḳaraf oibo. ³⁵Mabude tumrar urato ar aṭut shuru ḳoria, faor tola taki matar talu forzonto asta gotro bish-furi diba, itar kunu shifa nai.

³⁶“Tumrar ufre bashshai ḳorar lagi tumra zare godit boaibae, Mabude hou bashsha ar tumrare bondi ḳoraia omon eḳ zatir ato falaiba, zetar namu tumra huncho na, tumrar moe-murobbieo hunchoin na. Hono gia tumra fattor ar laḳṛidi banail murtir fuza ḳorbae. ³⁷Mabude tumrare zeta zatir maze ḳedai diba, hotae tumrare dekia somkiziba, tumrar dosha siṛ ar ṭaṭṭa-mosḳarar bishoe oibo.

³⁸“Tumra ḳet ḳorbae bout, oile foshol faibae tuṛa, ḳaron fongofale ḳailiba. ³⁹Tumra anguror bagan ḳoria zae-zoton ḳorbae, oile kiṛa ar fuke bagan ḳailibo, erlagi tumra anguro faitae nae, er shorboto ḳaitae fartae nae. ⁴⁰Tumrar hara desh zoetun gase bora roileo, zoetun fol zoria foṛizibo, erlagi tumrar shorilo tel maḳa oito nae. ⁴¹Tumrar zoto aolad oiba, ita tumrar gese roita nae, itare bondi ḳori neoa oibo. ⁴²Gozobi moua-fukor fal aia tumrar gas-gasali ar foshol ḳailiba.

⁴³“Tumrar maze boshot ḳorra bin zatir manush oḳol aste aste ufredi uṭba, ar tumra toledi lambae. ⁴⁴Tara tumrare ṭeḳa-foesha aolat diba, tumra tarare aolat dibar shaiddo oito nae. Tara roiba tumrar matar ufre, tumra roibae tarar faor tolat.

⁴⁵“Ou tamam lannot tumrar ufre foṛbo. Tumrar Mabud Allar kushi mafik na solae, tan hukum-ahkam ar niom-ḳanun na manae ou lannot oḳol tumrar loge lagail roibo. Itae tumrare zatia doria binash ḳorilaibo. ⁴⁶Ou lannot oḳol tumra ar tumrar aolador ufre, zug zug dori kudroti hushiari hishabe roibo. ⁴⁷Tumra nizor shudinor ḳalo monor kushie ashik bonia nizor Mabud Allar gulami ḳorso na, ⁴⁸erlagi Mabude tumrar ḳoredi dushmon lagaiba, tumra feṭor buke, fanir fiase, obab-onoṭone hokir bonia tarar gulami ḳorbae. Mabude tumrar ḳando luar zual findaiba, ou zualir tole tumrar binash oibo.

⁴⁹“Mabude bout duroi taki, zogotor hesh shimana taki, ola eḳ zatire silor nomunae uṛaia anba, zetar mukor buli tumra buztae nae. ⁵⁰Itar goṭon oibo bodsurot, itae kunu buṛa-buṛire ijjot dita nae, ar huruttareo maea ḳorta nae. ⁵¹Tara tumrar foshur baichcha ar ḳetor foshol ḳailiba, hesh-mesh tumra binash oibae. Tara kunuzat foshol, noea kunu anguror shorbot, tel, goru-sagolor baichcha, kuntau tumrar lagi toita nae, hesh-mesh tumra binash oizibae. ⁵²Tara tumrar ṭaun oḳol beria raḳba, ar tumra zetar ufre borosha ḳorrae, tumrar hou usa usa mozbut baunḍorir oal oḳol hesh-mesh bangia foṛizibo. Tumrar Mabud Allae tumrare ze deshor doḳoldari dira, hou deshor hokkol gau ar ṭaun tara beriliba.

⁵³“Ar dushmone beria raḳar ḳalo tumra oto boṛo mosiboto foṛbae, erlagi tumrar nizor fua-fuṛire ḳailibae, tumrar Mabud Allar deoa aolador gust nize ḳaibae. ⁵⁴Hou shomoe tumrar maze zera bala manush, zera shuke ar aram-ayeshe ase, tarar mon-mizazo olaḳan oizibo, tara afon baire, nizor boure ar baki fua-fuṛire kunu doea-maea ḳorto nae. ⁵⁵He tar ze aolador gust ḳaibo, itar ekkan ṭukrao tarare dito nae. Ḳaron dushmone zebla tumrar ṭaun oḳol beria raḳba, ou shomoe tumrar feṭor buk miṭanir lagi nizor huruttar gust saṛa ar kunutao milto nae. ⁵⁶Tumrar mazor kub norom dilor ze beṭi manush ase, ze beṭie shukila zindegir dae kunudin maṭit fao falaise na, hou beṭieo tair zanor ṭukra zamai ba aolador bae kunu doea-maea ḳorto nae. ⁵⁷Dushmone tumrare beria raḳae feṭor bukor zalae aolador zonom deoar loge loge, ou maʼe nizor aolador gust, ar feṭo taki bar oilo fuati-fol forzonto nize nize lukaia ḳailibo.

⁵⁸“Ou kitabor maze shoriotor zoto hukum-ahkam leḳa ase, ita zudi tumra kub kial ḳoria amol na ḳoro, tumrar Mabud Allar mohima ar ḍor-ḳof ala namor ijjot na ḳoro, ⁵⁹te Mabude tumra ar tumrar aolad oḳolre bezuita bemar diba, ou bemare tumra lamba shomoe buganti ḳorbae. ⁶⁰Mishoro taḳte bezuita zoto bemar-azar dekia tumra ḳafitae, hou bemar-azar oḳon tumrar ufre diba, itae tumrar fis saṛto nae. ⁶¹Ar ou Tourat kitabo zeta bemaror nam leḳa nai, ola ḳoṭin gozobi aro bout bemar-azar Mabude tumrar ufre saṛiba, tumra binash oar ag forzonto ita salu roibo. ⁶²Tumra nizor Mabud Allar hukum na manae, tumrar manshor foriman oḳon asmanor terar laḳan bout beshi oileo, ita moria kub tuṛa basia roiba. ⁶³Mabude kushi oia tumrare zela ae-unnoti dia baṛaisla, tumrar manshor foriman boṛo ḳorsla, hou laḳan kushi ḳoria oḳon hirbar tumrare binash ḳoria nifat ḳorba. Tumra oḳon ze deshor doḳoldari fairae, hou desh taki tumrare ḳaṛia neoa oibo.

⁶⁴“Bade zogotor eḳ kinara taki aroḳ kinara forzonto, hoḳol zatir maze tumrare sitrai diba. Hono roia tumra ar tumrar moe-murobbir osina deb-debir sheba ḳorbae, laḳṛi ar fattoror murtire fuza dibae. ⁶⁵Hou zati oḳolor loge roia tumrar shanti milto nae, tumrar aramor lagi kunu zaga roito nae. Hono Mabude tumrar monor maze hae-hutash baṛaiba, tumrar sokur hoḳol asha-borosha, ar dilor shokre tain nirash, nistez ḳorba. ⁶⁶Kita goṭibo ba na goṭibo ota sintae tumrar din guzoribo, din-rait hamesha ḳali zanor ḍor-boye oshantit roibae, basia roar kunu nichchoyota faitae nae. ⁶⁷Tumra monor ḍore, zanor mair, souke kunu kul-kinar na dekia ḳali hae hae ḳorbae. Bian oile ḳoibae zoldi rait ouk, ar rait oile ḳoibae zoldi din ouk. ⁶⁸Hou ze Mishor deshor befare ami ḳoislam, tumra hino ar zaoa oito nae. Oile hou gozobor shomoe Mabude tumrare zazo ḳori hirbar Mishor desho neoaiba, nia harle tumra gulami ḳorar lagi hono biki ḳaitae saibae, oile ḳeu tumrare kinto nae.”

Hozrot Musa (a:)-or tin nombor nosiot (29-30 ruku)

¹Mabude Musa nobir marfote Tur faṛor ufre, Boni Israil zatir loge age eḳ apush-chukti ḳorsla, oḳon Muab desho Mabude dusra apush-chukti boail ḳorla. Ita oilo ou apush-chuktir shorto oḳol.

Hozrot Musae hirbar Allai apush-chukti boail ḳorla

²Musa nobie hoḳol Boni Israilre anaia ḳoila, “Alla Mabude Mishoror Feraunor loge, tar uzir-naziror loge, ar Mishoror hokkoltar loge zeta ḳorsila, ita to tumra deḳso. ³Boṛo boṛo azob goṭonat zoyi oa, Mabudor nanan lila-ḳela, ar kudroti ḳam to tumra nizor souke deḳso. ⁴Oile itar mormo buzar moto mon, deḳar moto souk, hunar moto ḳan, Mabude oḳono tumrare disoin na. ⁵Ami sallish bosor dori tumrare ou morubumir maze sofor ḳoraisi, ermaze tumrar finnor ḳafoṛ nosṭo oise na, faor zutao siṛse na. ⁶Kunu bat-ruṭio ḳaiso na, anguror shorbot ba kunuzat shorab tumra ḳaitae faiso na. Ita hoḳolta to tainu ḳorsoin, zate tumra buzo, tainu tumrar Mabud Alla.

⁷“Tumra hou zagat zaoar bade, Hishbonor bashsha Sihun ar Bashonor bashsha Uze amrar loge laṛai ḳorat aisla, aile amra tarare arai dilam. ⁸Tarar deshre doḳolo ania amra asta Ruben ḳandan, asta Sadu ḳandan ar Manosha ḳandanor ordeḳ manshore baṭia dilam. ⁹Erlagi tumra ou apush-chuktir hoḳol hukum-ahkam kub kiali oia manio, manle hoḳol ḳam-ḳazo tumrar faeda oibo.

¹⁰“Tumrar Mabud Allar samne aiz tumra hoḳol aia azir oiso, tumrar ḳandanor amir oḳol, moe-murobbi oḳol, ofisar oḳol, ar Boni Israilor hoḳol beṭain. ¹¹Tumrar loge oia tumrar bou, fua-fuṛin, ar bin zatir hou manush oḳol zetae tumrar daru faṛoin ar fani boia anoin tarao aisoin. ¹²Tumra hoḳol ono aia azir oiso, tumrar Mabud Allae ḳosom ḳaia ze apush-chukti aiz boail ḳorra, ou apush-chuktit tumra nize nize aiz hamaira. ¹³Ar Mabude agor amolor tumrar moe-murobbi Ibrahim, Isʼhak, ar Iakub nobir loge ḳosom ḳaia ze oada ḳorsla, hou oada mafik oḳon taki tain tumrar Alla, ar tumra tan ḳas proza bonia roite razi aso, oḳan mana aiso. ¹⁴Te ami oḳon ze apush-chukti ar oada boail ḳorram, ita ḳali tumrar loge nae, ¹⁵borong tumra zoto zon oḳon amrar Mabud Allar samne azir aso, tumrar loge, ar tumrar zeta aolador zonom oḳono oise na, tarar logeo ou apush-chukti zari roibo.

¹⁶“Tumra nizeu to zano, Mishor desho amra kila din ḳaṭaisi, bade ḳoto desh ar ḳoto fot-gaṭ far oia ono aia azisi. ¹⁷Tumra to ota deshor manshore shuna, rufa, fattor ar laḳṛidi banail zogoinno deb-debir murti oḳolor fuza ḳorte deḳso. ¹⁸Tumra kuz-ḳobor loia deḳo, tumrar maze zanu ou laḳan kunu beṭa ba beṭi, kunu bongsho ba ḳandan na taḳe, zetae tumrar Mabud Allare bad dia hota deb-debir fuza ḳorar lagi kiali oizae. Zudi ila kunugu taḳe, te ogu oilo ola bishakto gasor zoṛ, ze zoṛor ḍem ou bishakto titta gas bonbo. ¹⁹Zeta manshe ou ḳosom ḳaoar ḳota huniao zudi tar nizore kub ḳofali mono ḳore, ar beforua oia solleo kunu shomoshsha nai ila mono ḳore, te tumrar bala-bura duioṭar ufre ota manshe shorbonash ḍakia anbo. ²⁰Mabude kunumonte-u erare mafi dita nae, erar ufre tan gusar aguin dau dau ḳori zolia uṭbo. Ar ou kitabor maze zoto laḳan lannotor ḳota leḳa ase, ita hokkolta erar ufre ḍaliba, Mabude asta dunia taki tarar nam miṭailiba. ²¹Tain duk-mosiboto falanir lagi hokkol Boni Israil taki tarare basia alog ḳorba, ou Tourat kitabor hukum-ahkamor maze zoto laḳan lannotor ḳota leḳa ase, ita ota manshor ufre saṛiba.

²²“Ar Mabude ou deshor ufre zoto nomunar lannoti gozob ar bemar-azar ḍaliba, ita dekia tumrar aolad oḳole ar bin desh taki aoa musafir oḳole tumrar i dosha dekia ḳaron zikaiba. ²³Nun ar gondoḳe asta deshor maṭi zolizibo, i maṭit kunta folito nae, kunta lagaile oito nae, maṭir ufre kunuzator gash, lota-fata zonmito nae. Ikan hou lannoti desh Sadum, Amura, Odma ar Soboyimor laḳan bonizibo, Mabudor gusar aguin zolia uṭae tain to itare binash ḳorilisla. ²⁴Ota dekia hoḳol zatir manshe zikaiba, Mabude i deshor halot ḳene ila ḳorla? Tain ḳene oto boṛo gusa ḳorla?

²⁵“Teu manshe zuaf diba, ou zatir manshe tarar moe-murobbir Mabud Allar boail ḳora hou apush-chukti bad dilaise, Mishor desh taki tarare bar ḳori anar bade ze chukti boail ḳora oisil. ²⁶Tara hou Mabudre bad dia tarar gese noea, ota deb-debir fuzat lagse, zeta deb-debir ḳota Mabude ḳoisoin na, otar gese mata nuaia soizda ḳorat lagse. ²⁷Erlagi ou deshor ufre Mabudor gusar aguin zolia uṭse, tain ou kitabo leḳa hoḳol nomunar lannoti gozob i desho nazil ḳorsoin. ²⁸Gusar aguine zolia, tarar ufre bezuita gozob ḍalia tarare ou desh taki zoṛe-foṛe tulia tarare bin desho nia asaṛ mari falaisoin, ar oḳono tara hono asoin.

²⁹“Batuni hoḳolta-u to amrar Mabud Allar ato, oile zair ḳora hoḳolta siroḳalor lagi amra ar amrar aolad oḳolor ato, zate amra ou shoriotor hoḳol hukum-ahkam amol ḳortam fari.”

Alla Mabudor gese firia aoar fol

¹Hozrot Musae ḳoira, “O Boni Israil huno, ami tumrar samne ze rohomot ar lannotor fot deḳaisi, ita hoḳolta tumrar ufre folibo. Folia harle tumrar Mabud Allae tumrare zeta zati oḳolor maze sitrai diba, tarar loge boshot ḳorar bala tumra ita kial ḳorio. ²Hou shomoe tumra ar tumrar aolad oḳol zudi tumrar Mabud Allar gese firia ao, ar aiz ami tumrare zeta hukum-ahkam zanairam, ita dile-zane amol ḳoro, ³te hou shomoe Mabude tumrare bondi halot taki azad ḳorba. Tain tumrare maea-momota ḳorba, ar tain zeta zatir maze tumrare sitraia disla, ota taki hirbar tumrare tukaia anba. ⁴Duniar aḳeri kinarato zudi tumrare falail oe, te hono taki tumrar Mabud Allae tumrare tukaia anba. ⁵Tumrar moe-murobbir desho tumrare firaia anba, ita hirbar tumra doḳol ḳorbae. Tain tumrare bout baṛai diba, ar tumrar moe-murobbir saiteo tumrar aolador foriman aro baṛaiba. ⁶Tumra zate furafur dile-zane Allar mohobbotor ashik bonia basia ro, ou niote tumra ar tumrar aolad oḳolor dilor mosolmani tain nize diba. ⁷Ar ou lannot oḳol tumrar Mabud Allae tumrar hou dushmonor ufre falaiba, zetae tumrare ingsha ar zulum ḳoroin. ⁸Hou shomoe tumra hirbar tumrar Mabudor hukum mafik zindegi ḳaṭaibae, tan batail zeta hukum-ahkam aiz ami tumrare zanairam, ota hoḳolta amol ḳorbae.

⁹“Hou shomoe tumrar Mabud Allae hoḳol nomunae tumrare ae-unnoti diba, tain tumrar ḳam-ḳazo boroḳot diba, tumrar aolador foriman baṛaiba, tumrar goru-sagolor baichchain ar zominor foshol baṛai diba. Tumrar moe-murobbir ufre tain zela kushi asla, tumrar ufreo ola kushi oia tumrare hoḳol nomunae baṛaiba. ¹⁰Ḳali tumra nizor Mabud Allar kushi mafik solia, ou Tourat kitabo leḳa tan hoḳol hukum-ahkam ar niom-ḳanun manle, asta dile-zane tan bae firle, tain ou rohom-borkot diba.

Zindegir fot ar moutor fot

¹¹“O Boni Israil huno, aiz ami tumrare zeta hukum diram, ita mania sola tumrar lagi beshi ḳoshṭor kunu ḳam nae, ita tumrar lagalor bareo nae. ¹²Ita to behesto tulia toa kunu siz nae zen tumra ḳoitae, behesto taki ḳegie lamai ania ita amrare hunaito, ar amra amol ḳortam? ¹³Ita doriar hofaror kunu sizo nae zen tumra ḳoitae, doria far oia ḳegie gia ita ania amrare hunaito, ar amra amol ḳortam? ¹⁴Borong Mabudor kalam to tumrar logeu ase, tumrar mukor maze ar dilor bitre ita ase, zate ita amol ḳoro.

¹⁵“Huno, aiz ami tumrar samne zeta tulia dorsi, ita oilo zindegi ar balai, ba mout ar duk-mosibot. ¹⁶Aiz ami tumrare ou hukum diram, tumra nizor Mabud Allare mohobbot ḳorio, tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio. Teu tumra zane basbae, forimane baṛbae, ar ze deshḳan tumra doḳol ḳorat zairae, hou desho tumrar Mabud Allae tumrare rohom-borkot diba.

¹⁷“Oile tumrar mon zudi Alla Mabudor bae taki firizae, tan hukum na mania tumra zudi kunu deb-debir fuzat lagia otare fornam ḳoro, ¹⁸te aiz ami tumrare zanai diram, tumra nischito binash oizibae. Zordan gangor hofaro ze desh tumra doḳol ḳorat zairae, hino tumra beshi din bastae nae.

¹⁹“Ou asman-zominre tumrar birudde shakki rakia ḳoiar, aiz ami tumrar samne zindegi ar mout, rohomot ar lannotre tulia dorsi. Erlagi O baiain, tumra zindegire fosond ḳorilao, teu tumra ar tumrar aolad oḳolor zan basibo. ²⁰Tumra nizor Mabud Allare mohobbot ḳorio, tan hukum-ahkam manio, tan ashik bonia tanre ainja ḳori doria rakio, otar mazeu tumrar zindegi. Tain ze deshor doḳoldari dibar lagi tumrar moe-murobbi Ibrahim, Isʼhak, ar Iakubor loge ḳosom ḳaia oada disoin, hou desho ota hukum-ahkam manar mazeu tumrar zindegi.”

Hozrot Musa (a:)-or shesh halot (31-34 ruku)

Hozrot Musa (a:)-e daeitto shomzaila

¹Erbade Musae hoḳol Boni Israilre ḳoila, ²“O Boni Israil huno, amar boeosh to eḳ-sho bish bosor oigese, ami ar amar ḳam ḳortam fariar na, ḳaron Mabude amare zanaisoin, ami Zordan gangor hifaro zaitam fartam nae. ³Te tumrar Mabud Alla nize tumrar age age roia Zordan gang far oia zaiba. Tain tumrar samne taki honor hoḳol zatire binash ḳorba, teu tumra hou desh doḳol ḳorbae. Ar Mabudor ḳota mafik Hozrot Iusae tumrare loia hofaro tumrar age age zaiba. ⁴Mabude Amuri oḳolor bashsha Sihun ar Uzre zelaḳan binash ḳorsila, hou zati oḳolreo ola binash ḳorba. ⁵Tain hitare tumrar ato shofia diba, hou shomoe tumra amar batail hukum mafik ḳam ḳorio. ⁶Tumrar bukut bol raḳo ar shaosh ḳoro. ḍoraio na, tarare dekia gabṛaio na. Mono rakio, tumrar Mabud Alla tumrar loge loge zaira, tain kunumonte-u tumrare saṛta nae, kunu haloteu tumrare falaita nae.”

⁷Bade Musa nobie hoḳol Boni Israilor samne Iusa nobire anaila, anaia ḳoila, “Tumi bukut bol raḳo ar shaosh ḳoro. Ou manush oḳolre loia tumi gang far oia hou desho zaibae, hou desh dibar lagi Mabude to tarar moe-murobbir gese oada ḳorsla. Tumi tarare hono nia honor zomi-zoma tarare baṭia dio. ⁸Shoeong Mabud tumar age age roiba, tumare shaijjo ḳorba, tain tumareo saṛta nae ar tumare falaitao nae, te tumi ḍoraio na, shaosh araio na.”

Tourat kitab tilaotor hukum

⁹Bade Musa nobie Tourator ou hukum-ahkam oḳol leḳla, lekia Lebi ḳandanor hou imam oḳol, zara Mabudor shahadot shonduḳ boia nita, tarar ato ar Boni Israilor moe-murobbir ato dila. ¹⁰Dia tarare hukum dila, “Forteḳ shat bosor bade bade, aolat mafir bosoror ḳalo, ḍera-goror idor oḳto, ¹¹hoḳol Boni Israil zebla tumrar Mabud Allar fosond ḳora zagat gia tan samne azir oiba, hou shomoe tumi tara hoḳolor samne ou Tourat kitab tilaot ḳoria hunaio. ¹²Beṭain, beṭin, huruttain, ar tumrar loge boshot ḳorra gau ba ṭaunor bin zatir hoḳol manshore eḳ zagat dola ḳoria ita hunaio, ita hunia tara tumrar Mabud Allare ḍoraiba, ar ou shoriotor hoḳol hukum-ahkam zoton ḳori amol ḳorba. ¹³Ar tarar zeta huruttae Tourator ou hukum-ahkam hunchoin na, Zordan gangor hofaro tumra ze deshor doḳoldari fairae, tumra hono gia harle tarao hara zindegibor tumrar Mabud Allar ḍor-ḳofe sola hikba.”

Naformani ḳorar agam ḳobor

¹⁴Bade Mabude Musa nobire ḳoila, “Tumar haeati to ar beshi nai, mout daro aichche, te tumi Iusare anao, anaia duio zon milon-tambur samne ao, ami tar ufre tar noea ḳam shomzai dimu.” Teu tara duio zon gia milon-tambur samne azir oila.

¹⁵Ou shomoe Mabude megor kuṭir maze takia milon-tambur duaror samne aia tarare doroshon dila, ou kuṭi tambur duaror ufre ubai roilo. ¹⁶Ar Mabude Musare ḳoila, “Huno, tumi to tumar baf-dadaintor gese aram ḳorat zairaegi, oile ou manush oḳol ze desho hamaira, hamanir tuṛa badeu amar loge tarar apush-chuktire tara bongo ḳorba, tara amare bad dia honor deb-debir ato nizore shofi diba. ¹⁷Tara ita ḳoria harle amar gusar aguin zolibo, ami tarar log saṛi dimu, tarar bae taki amar muk firailimu, teu tara binashor foto zaiba. Tarar ufre nanan bala-mosibot aibo. Hou shomoe tara ḳoiba, amrar dosha ila oilo ḳene? Nischoe, amrar Alla amrar loge nae ḳoriu, ita goṭer. ¹⁸Ashole tarar hou deb-debintor gese gia zeta ku-ḳam ḳorsoin, otar lagiu ami hou shomoe tarar ges taki amar muk firailisi.

¹⁹“Te tumra ou gozolṭa lekilao, lekia Boni Israilre hikao ar tara gaiba. Ou gozol to tarar birudde amar shakki oia roibo. ²⁰Buzrae ni, ami tarare ze desh dibar lagi tarar moe-murobbir gese oada ḳorsi, dud ar mour banḍar ala aramor hou desho tarare nia harleu, tara ḳana-fina ḳaia muṭa-taza oiba. Oia honor deb-debir fuza ḳorat lagba, hotar bozona ḳorba, amare elami ḳoria amar logor apush-chukti bangiba. ²¹Teu tarar ufre zebla nanan nomunar bala-mosibot ar bifod-afod aibo, hou shomoe ou gozole tarar samne shakki dibo, ou gozol to tarar aolad oḳole faurita nae. Hasa ḳota oilo, amar oada ḳora hou desho nibar ageu, tara mone mone kita sinta ḳorer, ita to amar zana ase.” ²²Musae loge loge ou gozol lekia Boni Israilre hikaila.

²³Ar Mabude Nunor fua Iusare tan noea ḳamor lagi oula hukum dila, “Tumi bukut bol raḳo ar shaosh ḳoro. Ami ḳosom ḳaia Boni Israilre ze desh dibar lagi oada ḳorsi, tumi tarare loia hou desho zaibae, ami tumar loge loge roimu.”

²⁴Shoriotor ou hukum-ahkamor hoḳolta Musae shullo-ana leḳla, ²⁵lekia Mabudor shahadot shonduḳ boia neora Lebi ḳandanor manshore hukum dila, ²⁶“Ou Tourat kitab ḳan nia tumra Alla Mabudor shahadot shonduḳor ḳasat toio. Ikan Boni Israilor birudde shakki hishabe hono roibo. ²⁷Tumra ḳoto boṛo gaṛteṛa ar naforman, ita amar zana ase. Ami zinda halote tumrar loge roiteu tumra zebla Mabudor naformani ḳorso, te amar moronor bade tumra ar kita na ḳorbae! ²⁸Tumra hoḳole zarzir ḳandanor murobbi ar ofisar oḳolre amar gese ano, ami nize tarar gese ota kulasa ḳoria ḳoia zaimu, asman-zominre tarar birudde shakki raḳtam sai. ²⁹Ami to zani, ami souk muzar bade tumra ekkebare be-foti bonizibae, amar batail fot taki tumra horizibae, teu tumrar ufre gozob lambo. Ḳaron Mabude zeta gin ḳoroin, tumra ota ḳam ḳoria, nizor ate murti banaia, tan gusa tulaibae.”

³⁰Bade Musa nobie hoḳol Boni Israilor samne ou gozolor foela taki aḳer forzonto hunaila; tain gaila,

Hozrot Musa (a:)-or gaoa gozol

¹O asman, ḳan fatia huno ami zeta gai,

O zomin, tumio huno ami za batai.

²Amar talim lamuk megor fuṭar laḳan,

kuar moton foṛouk amar mukor boean.

Ḳesma gashor ufre fuṭa fuṭa meg oia foṛouk,

noea sera gasor ufre shantir meg oia lamuk.

³Ami to elan ḳormu amar Mabudor nam,

tumrao gaio Allar mohima gan.

⁴Tainu to ashroe ṭilla, nikut tan ḳam,

hok-hasa tan fot shoṭik tamam.

Sol-soturi nai tan, hok-halal ase shorboda,

hok insaf forezgari ase shotota.

⁵Ta-o tan ḳobis bondae32:5 mul Hibru bashat, “Fut oḳol.” age Allae ḳoisla, Boni Israil to amar foela futor laḳan. (Hizrot 4:22 aeat) Iṭa eḳṭa rupoḳ baikko, mane ḳas maear bonda oḳol. ḳorse beimani,

dilor ḳarafie tara bonche kolonkini.

⁶Haere ammok nadan, haere be-aḳol,

ouni tumra bodla dilae, Mabudor danor?

Taineu tumrar foeda ḳorra foroar digar32:6 “Foeda ḳorra foroar digar.” Hibru bashat, foeda ḳorra baba. Baba oilo eḳṭa rupoḳ shobdo. ni?

Boail ḳorla tumrar Israil zati.

⁷Iad ḳoro tumra hou agor amolor mat,

mono raḳo kita oisil furan zomanat.

Baf-dadare zikar ḳori itihash huno,

buṛa-buṛir muk taki hoḳolta zano.

⁸Allatalae dila zebla zomin baṭia,

nanan zatire dila bag-baṭura ḳoria.

Boni Israilor foriman to zana asil tan,

erar ongsho algai toia baki ḳorla dan.

⁹Mabudor ḳas shompotti to tan nizor proza,

Iakub bongsho Israil zati afon samana.

¹⁰Tarare tain tukai faila morubumir desho,

nirai-nirzon desh ar bag-shinghor gorzono.

Kudroti ḍaḳnadi guria zoton ḳorila,

sokur monir laḳanu tarare basaila.

¹¹Sile zela nizor badar baichchare nasae,

aste aste uṛi uṛi ḍaḳnare laṛae,

ḍaḳna melia baichchainre ufre tule,

tulia hari uṛal dia loia loia gure,

¹²Mabude eḳla oula ḳori tarare nila,

kunuzator deb-debi tan loge asil na.

¹³Faṛe faṛe uṛai uṛai nila tarare,

faṛia deshor doḳol dila Boni Israilre.

Ḳetor bala foshol dila ḳaibar lagi,

faṛia saḳor mou ḳabaila faṭa-sifa taki.

Ḳabaila malike zoetunor tel,

luar laḳan shokto maṭit tel foli gelo.

¹⁴Ḳabaila tarare tain gorur dudor doi,

sagol-meṛar dudo ḳaila zanio nichchoe.

Muṭa-taza meṛar gust ḳaila moza ḳori,

Bashon deshor goru-ḳoshi ḳaila ruṭidi.

Taza-fusṭo gomor ruṭi anguror shorbot,

ḍemdi uṭa angur oilo Allar niamot.

¹⁵Bade tara lat marila feṭla bonia,

Boni Israile lat marla tarar fao dia.

Ḳaia ḳaia feṭ fulaia marlo oḳon lat,

faurililo hou Allare zein dila bat.

Foeda ḳorra Allar log tara saṛi dilo,

ashroe ṭilla Allare tara huru mono ḳorlo.

¹⁶Deb-debir fuza ḳoria zalailo aguin,

eḳ Alla saṛia tara bozilo hoguin.

Gusar aguin zalailo tan aroshor maze,

murti fuza gin ḳoroin mohan Alla Pake.

¹⁷Butor name boli dilo tanre saṛia,

but to kunu Alla nae ta-o failo fuza.

Noea noea devta zeta ḳoedin taki sine,

baf-dadar osin devta oḳon tara boze.

¹⁸Zonom data bafor laḳan zein ashroe ṭilla,

tanre tumra fauria hari ḳorlae obohela.

¹⁹Aolador ou halot dekia muk firailla Mabude,

rage-gusae aguin oila tararu bod amole.

²⁰Gusa ḳori Mabude ḳoila muk firailam ami,

tarar hesh dosha kita ami nichchit zani.

Deḳmu saia tarar hoḳol beimanir shaza,

be-foti beiman zate buzba nizor dosha.

²¹Zeṭa Alla nai ila devtar fuza ḳoria,

amar bitre dise tara gusa tulia.

Zeṭa zati nai ila zati dia ingsha ḳoraimu,

ammok zati dia tarar gusa tulaimu.

²²Amar gusar aguin oḳon dau dau ḳori zoler,

maṭir tolor fatalreo zalaia sarḳar ḳorer.

Hara zogot ar foe-foshol zalai ḳorbo sali,

faṛor tolat aguin zolbo, zolbo duil bali.

²³Laḳo laḳo bifod dimu hoḳoltar ufor,

amar tamam tir marmu feṭor buke ḳormu ḳator.

²⁴Ufashi nidane tara hukai hukai morba,

gozobi bemaror loge duk-toklif faiba.

Datala zongli foshu faṭaimu ami,

bishakto shob hafor fale diba ḳamṛani.

²⁵Bare gele morba tara toluaror tole,

goro roile morba hoḳol zanor ḍor-ḳofe.

Zuan fua zuan fuṛin dudor hurutta,

binashi gozobe morba daṛi sul faḳna.

²⁶Ḳoislam ami uṛai marmu Boni Israilre,

itar nam fusilaimu manshor mon tone.

²⁷Oile amar zana ase dushmonor bab-shab,

beṭagiri ḳorba tara oibo tarar lab.

Na buzia ḳoibo tara zitse nizor bole,

Mabud ita kuntat nae zitsi ḳole-bole.

²⁸Bisar-bibek kuaia oḳon name Israil zati,

aḳol-buddi araia tara oise be-foti.

²⁹Aḳol taḳle buzto tarar nizor durdosha,

bibeḳ ḳaṭai zan basaia roito hamesha.

³⁰Eḳ dushmone aia kila azar zon ḳedae,

dui sifaire dekia ḳene dosh azar douṛae.

Nizor ashroe ṭilla zudi tarare na besita,

shoeong Mabude zudi saṛia na dita.

³¹Dushmonor ashroe ṭilla oto mozbut nae,

tarau ikan shikar ḳori hoḳolre hunae.

Amrar ṭilla nichchoe bout boṛo boloban,

tarar muke gaia ita zofe tan shunam.

³²Mabude bataira oḳon tarar ḳetor ḳota,

Sadum ṭaun taki aise itar anguror lota,

Amura shohor taki itae angur fol faise,

bish ar tittae i folor soṛi furafur oise.

³³Anguror shorbot zela rag-naginir bish,

alod hafor bisho ola marattoḳ zinish.

³⁴Amar gese ita gozob tumrar lagi ḳaṛa,

amar banḍaro toa sob sil-sappoṛ mara.

³⁵Naformanir shaza deoa amaru ḳam,

amol mafik bodla dimu tamam insan.

Shomoe oile fislizibo dushmonor fao,

mosibotor din tarar nozdik zanilao.

Ṭik ḳori toa ase tarar ḳamor bodla,

zoldi ḳori faiba nizor amol-noma zela.

³⁶Mabude deḳba zebla bol-shokti nai,

tan bondar bol-takkot gesegi fuṛai.

Gulam kiba azad bonda hoḳolu mazur,

dekia tain fokko loiba afon gulamor.

Maea-doea ḳorba Allae tan gulamre,

mazur taki shobol ḳorba doea-rohome.

³⁷Ḳoiba tain hou shomoe kuai gela hita,

otodin bozisla tara zeta devta.

Bagia gelogi kuai tarar ashroe faṛ,

tarar hoḳol deb-debi oshaṛor oshaṛ.

³⁸Ḳoi gela hou deb-debi zetae ḳaisla sorbi,

sorbi ala bolir gust ḳaisil besh ḳori.

Zeta devtain ḳaisil sodgar shorbot,

oḳon tara basauk aia tarar ummot.

Shaijjo ḳoroukna aia tumrar hou ṭakur,

ashroe dey na ḳene naforman bodkur.

³⁹Sinta-babna ḳoria deḳo hou tainu ami,

ami saṛa Mabud nai ikan zancho ni.

Amiu marilai amiu basai,

amiu to zoḳom ḳori ami dei balai.

Ama taki basailito shaiddo ase ḳar,

haeat moutor malik ami Allahu akbar.

⁴⁰Aroshor bae at tulia ḳosom ḳaia ḳoi,

siroḳalin zinda ami zanio nichchoe.

⁴¹Dar zebla dimu amar soḳsoḳa toluar,

ḳaim ḳorat lagmu zebla amar rae-bisar.

Hou shomoe shaza dimu amar hoḳol dushmonre,

amare ginnanir bodla dimu tarare.

⁴²Tir-donuke lou ḳaia ḳorbo matlami,

amar toluareo to lou ḳaibo zani.

Murda ar bondi oḳolor lou he ḳaibo,

dushmonor gust ḳaia feṭ fulaibo.

Lamba-suli sifair ḳolla ḳaibore muke,

tarar ḳolla sibai ḳaibo amar donuḳe.

⁴³Maear prozar loge oia asman kushi o,

behestor hoḳol firistae tane soizda deo.

Zogotor tamam zatie gao gunogan,

Allar hoḳol bondar loge lo tan moha nam.

Tan gulamor lour bodla oḳon loiba tain,

dushmonre shaza dia saf ḳorba zomiḳan.

Tan bondae Kenan desho failiba rehai,

gunar kofora dia diba tar bodla.

⁴⁴Musa nobi ar tan ḳadim Nunor fua Iusa gia hoḳol manshor gese ou gozolor shob ḳota zanaila. ⁴⁵Musae hoḳol Boni Israilor gese gia ita hoḳolta ḳoia hari, ⁴⁶ḳoila, “Ami ou zoto hushiarir ḳota tumrare zanaisi, ita tumrar dilo gatia rakio, ita to tumrar birudde shakki bonia roibo. Ar tumrar aolad oḳolre hukum dio, ou shoriotor hoḳol hukum-ahkam kiali oia amol ḳorta. ⁴⁷Ita to aze-baze kunu mat-ḳota nae, ita oilo tumrar zindegi! Zordan gang far oia hari tumra ze deshor doḳoldari fairae, ota amol ḳorle hono tumra lamba haeati faibae.”

Hozrot Musa (a:)-or aḳeri halot

⁴⁸Hou dinu Mabude Musa nobire ḳoila, ⁴⁹“Tumi gia ou Abarim faṛo uṭo, iṭa to Muab deshor Ziriho ṭaunor samne ase. Hono uṭia Nobo namor hou usa ṭillar ufre zao, ar Boni Israilre ami ze deshor malikana diram, ou Kenan desh eḳbar deḳilao. ⁵⁰Tumar bai Harun zela Hur faṛor ufre uṭia harle ufat oisil, bade tar baf-dadar ḳataro gia azisil, ou Nobo faṛo uṭar bade oula tumaro ufat oibo, ar tumar baf-dadar gese gia oulaḳan tumio azibae. ⁵¹Mono ase ni, hoḳol Boni Israilor samne tumra duio baie amare fak-fobitro ḳoia mainno ḳorso na, hou Zin morubumir Kadesh elaḳar Meriba namor zagat fanir gese tumra amar name zaliati ḳorslae. ⁵²Hono uṭia harle tumar sokur samne hou desh deḳbae, ze deshḳan ami Boni Israilre dan ḳorram, tumi ḳali soukdi deḳbae, oile hi desho hamaibar shuzug tumar oito nae.”

Hozrot Musa (a:)-or aḳeri dua

¹Allar ḳas bonda Musa nobir ufator age, Boni Israilre tain ou dua dila:

²Toshrif anla Mabud Allae Tur faṛ taki,

amra hoḳole deḳa failam nure Elahi.

Seir ar Faran faṛ taki deḳain nuror tez,

laḳo laḳo firista kiba aro besh.

Didar dila Mabude erar maz tone,

ḍain ato bora asil nuror aguine.

³Hasau tain maea ḳoroin nizor bondare,

tamam forezgar bonda tan hukume sole.

Soizda ḳorat asoin tara tan faor tolat,

hukum faile tamil ḳoroin roin tan ḳotat.

⁴Musa nobie ze shoriot disla amrare,

Boni Israilor don ita zane hoḳole.

⁵Dola oia aila zebla moe-murobbir dol,

log oia aisla Israilor ḳandanor hoḳol,

hou shomoe to Mabud asla tarar uforor bashsha,

era hoḳol tan proza tainu Shahansha.

Baro ḳandanre dua dila

⁶Ruben ḳandanor befare Hozrot Musae ḳoila:

Ruben ḳandan zinda rouk, nifat nae kunudin,

ta-o tar goro foeda oibo ḳom fua-fuṛin.

⁷Ehuda ḳandanor befare ḳoila:

O Mabud, tumi oḳon Ehudar foriad huno,

bai-biradoror daro tare firaia ano.

Duio at tar shobol raḳo laṛair shomoe,

shaijjo ḳoro tumi tare dushmonre deo arai.

⁸Lebi ḳandanor befare ḳoila:

Tumar ashikor ato ase tummim ar urim33:8 Tummim ar urim oilo dui zinish Allar morzi buzar lagi. Darona ḳora oe, ita oilo bishesh dui fattor ba dui moni. Hizrot 28:30 deḳoukka.,

kudroti hou dui samanar malik ḳali ou Lebin.

Masa namor zagat loiso tar forikka,

Meriba namor fanir zagat oisil ou ḳaijja.33:8 Masa ar Meriba. Hizrot 17:7 deḳoukka.

⁹Ma-bafreo tulche na he tumar ufre,

gunar shaza dise tar maʼr feṭor baire.

Dabi saṛia shofi dise afon fua-fuṛi,

zindegi kurbani dise tumar ain mani.

Tumar kalam fara dise manche shoriot,

apush-chukti mania solche, na ḳori kianot.

¹⁰Tumar hukum tara hikae Iakub bongshore,

tumar shoriot buzae tara Israil zatire.

Agor-kushboe zalae tara tumar samne aia,

zalail kurbani dey kurban-gat gia.

¹¹Tar samanat boroḳot deo go O amar Mabud,

razi-kushi ro tumi tar ufre bout.

Tar dushmonor ḳomor tumi bangi-suri deo,

ginna ḳorrar ḳomor bangi borbad ḳorilao.

¹²Bin-Iamin ḳandanor befare tain ḳoila:

Mabudor maear bonda shae-shantie roibo,

nirafode roibo he tan ḍaḳnar tolo.

Hara din hara rait saeat raḳba tare,

zindegi guzoribo tar tan bogol tole.

¹³Iusuf ḳandanor befare tain ḳoila:

Rohom-borkot ḳoro Mabud tar deshḳanre,

asman taki dami dami zinish deo tare.

Kua dia bizai deo uforor asman taki,

aro deo tar zomino maṭir muror fani.

¹⁴Shuruzor teze faḳaia deo bala fol,

sande sande deo tare mozar foshol.

¹⁵Furana faṛ taki don-samana deo,

siroḳalin faṛia mal tar zomino neo.

¹⁶Zomin taki deo go Mabud bala bala mal,

zalail zonglar nuror malik rohom ḳoro siroḳal33:16 zalail zongla. Hizrot 3:1-4 deḳoukka.,

Iusufor matat lamuk amar ou dua,

baiain taki mohan zonor talut lamuk ita.

¹⁷Ḍeḳa baichchar moto ouk tar bol-shokti ar shan,

tar matar hing zuṛa to zongli boerar laḳan.

Hing dia gutaibo he hara zogotre,

fub fosim uttor dokkin douṛaibo hoḳolre.

Afraimor oiba ola laḳo laḳo zon,

azar azar zon oiba Manoshar mul don.

¹⁸Sobulon ar Isaḳoror ḳandanor befare tain ḳoila:

Sobulone kushi ḳorouk bairor ḳam-ḳaz loia,

Isaḳor kushi rouk goror ḳamo roia.

¹⁹Ḍaki ḍaki faṛor daro anbo manshore,

kurbani dibo hono ḳas sohi dile.

Doria taki tulba tara doriar feṭor don,

bali taki tulia anba lukail shob roton.

²⁰Sadu ḳandanor befare tain ḳoila:

Mubarok hou zon, Sadur zaega baṛai diba zein,

Sadu to shinghor laḳan ḳaf dori roe,

dushmonor at ar ḳolla siṛia falae.

²¹Hoḳol taki shorosh zomi nizor lagi nise,

zoiggo murobbi ashon tar lagi toa oise.

Zatir shordar oḳol dola oar ḳalo,

Mabudor niae bisar he tamil ḳori dilo,

Boni Israilre deoa hukum fura mainno ḳorlo.

²²Dan ḳandanor befar tain ḳoila:

Furfura shinghor baichcha oilo dan ḳandan,

Bashon desh ton faldi aia ḳore boṛai shan.

²³Noftali ḳandanor befare tain ḳoila:

Noftali to Mabudor maea-momotat habu-ḍubu ḳar,

tan rohom-borkoto he hatar ḳaṭer.

Tumi tare tar afon shimanat ano,

soi-salamote Galil aor ar douknor desho neo.

²⁴Ashir ḳandanor befare tain ḳoila:

Ashire faibo rohomot oinno taki beshi,

hoḳol baie maea ḳorba tare rashi rashi.

Oto rohom boroḳot faia kushi taḳar ḳalo,

dui fao tar ḍubail roibo zoetunor telo.

²⁵Tar geiṭ oḳol bandail ouk lua ar tamadi,

he bolala mozbut rouk tar fura zindegi.

²⁶Musa nobie aro ḳoila:

Boni Israilor Allar homani dusra ḳeu nai,

tumrare shaijjor lagi asmano beṛain.

Tan nizor shan-mohimae megor saḳat soṛia,

shaijjoḳari oita sain tumrar lagia.

²⁷Hoḳol foelakur eḳ Allau oila ashroe ṭikana,

tan siroḳalin at dia tumrare raḳsoin doria.

Tumrar samnor hoḳol dushmon tainu ḳedai dein,

itare binash ḳoro hukum disoin tain.

²⁸Erlagi Israil zati bala-afta roin,

Iakub bongshor fanir zorna nirafod taḳoin.

Hino roibo foe-foshol ar angur roshe bora,

tar ufre lambo asmani kua.

²⁹O Boni Israil, mubarok aolad tumi!

Tumi oilae Mabud Allar azad ḳora zati.

Shoeong Mabud oila tumar zan basanir ḍal,

tainu oila tumar zoyor darail toluar.

Dushmon tumar samne aile tor-toraia ḳafe,

tumi tarar bukur ufre maṛa dibae ne.

Hozrot Musa (a:)-or ufat

¹Bade Musa nobi Muab deshor tol zaga taki, Nobo faṛor ṭillar ufre uṭila, ou ṭilla to Ziriho ṭaunor samne Fisga faṛor hoḳol taki usa ṭilla. Hono Mabude tanre hoḳol desh deḳaila, Giliod taki Dan forzonto, ²asta Noftali desh, Afraim ar Manosha desh, ar foismor doriar far forzonto fura Ehuda desh, ³douknor Negeb morubumi, ḳezuri ṭaun Ziriho, ar er ḳandar Zordan gangor douknor morubumi taki Suar gau forzonto hoḳol zaga. ⁴Ota deḳanir bade Mabude tanre ḳoila, “Ikan oilo hou desh, zeḳanor befare ami Ibrahim, Isʼhak ar Iakubor gese ḳosom ḳaislam. Tarare ḳoislam, deshḳan ami tumar oarishre dimu. Te ita ami tumare shorashori deḳailam, oile tumi Zordan gang far oia hino hamaitae fartae nae.”

⁵Mabudor zoban mafik, tan gulam Musa nobir ufat ou Muab desho-u oilo. ⁶Muab deshor Baet-Piuror daro faṛia tol zagat Allar kudroti ate tanre dafon ḳorla. Oile tan rouza shorifre oḳono ḳeu sine na. ⁷Ufator ḳalo tan boeosh asil eḳ-sho bish bosor. Hou shomoyo tan soukor faoar ḳomse na, tan shoril ḳomzur oise na. ⁸Ufator bade Boni Israile tish din dori Muab deshor nisa tol zagat tan lagi ḳanda-ḳaṭi ar ahazari ḳorla. Ou tish din bade tarar duk-ahazari shesh oilo.

⁹Hozrot Musae Nunor fua Iusar matar ufre at raḳar ḳarone, ou shomoe tone Iusa aḳolor ruhe furafur kamil oigela. Teu Boni Israil oḳol tan foramishe solla, ar Musa nobir marfote Mabudor batail hukum mafik tara zindegi ḳaṭaila.

¹⁰Hozrot Musar laḳan ila kunu nobi oḳon forzonto Boni Israilor maze zonom loisoin na, zan loge Mabude samna-samni oia batchit ḳorta. ¹¹Mabude Musa nobire bezia Mishoror bashsha Feraun ar tar uzir-nazir, tar asta deshor ufre zoto laḳan kudroti nishana ar keramoti ḳam deḳaisoin, itao ar ḳeu ḳorsoin na. ¹²Tamam Boni Israilor soukor samne Musa nobie zela kudroti moha taijjubi ar ḍor-ḳofor nanan keramotir ḳam ḳorsoin, ila ḳam dusra ḳeu ḳorar takkot oise na.

Ḳotom.