al-Kolosia

Fobitro Injil Shorif 12 nombor sifara

al-Kolosia

Forisiti

Fobitro asmani kitabor ou al-Kolosia sifara, Alla Pakor hukume Hozrot Isa al-Mosir sahabi Hozrot Pauluse (ra:) leḳsoin. Hozrot Isae behesto toshrif neoar onuman 27 bosor bade ikan leḳa oise.

Hozrot Paulus nize kunu shomoe ou Kolosi ṭauno gesoin na, oile Allar kalam hunia ou ṭaunor bout manshe Hozrot Isar torika ḳobul ḳorsoin. Ou ḳobor hunia tan mono kub kushi asil. Ermaze tain ḳobor faila, Kolosi ṭaunor kunu kunu ustade Hozrot Isar name bul talim toblig korra, tara ashol talimor loge tarar mongoṛa kisu motobad, riti-reoazo hikaira, erlagi Hozrot Pauluse mono kub ḳoshṭo faia siṭir nomunae ou sohifa leḳla.

Tain zanaila, guna taki nazat faoar lagi hou ustad oḳolor hikail talimor kunu zorur nae. Tara hikaita, firista oḳolor name ebadot ḳora, mosolmani ḳam ḳorani, nanan nomunar haram-halal ḳanir ḳota. Erdae leḳoke zanaila, guna taki nazat faoar lagi ita ustador talimor kunu zorur nae. Tain Kolosiar mumin oḳolre bout utshaho zugaisoin, Hozrot Isar ufre imane mozbut oar lagi.

Ermaze ase,

(1) Hozrot Paulusor salam, shukria, munazat 1:1-14 aeat

(2) Allar morzi-munshae al-Mosir ḳam 1:15—2:19

(3) al-Mosir mazdiau aḳeri zindegi 2:20—4:6

(4) Aḳeri munazat ar salam 4:7-18

Hozrot Paulusor salam, shukria ar munazat

^1-2Ami Paulus, Alla Pakor morzie Hozrot Isa al-Mosir eḳzon sahabi. Kolosi ṭaunor maze al-Mosir torikar pak bonda ar mumin oḳolor gese ami ar bai Timotie ou sohifaḳan leḳram. Amrar gaibi baf Alla Pake tumrar ufre rohomot ar shanti nazil ḳoroukka.

^3-4Hozrot Isa al-Mosir ufre tumrar iman ar Allar pak bonda oḳolre maea ḳorar ḳota amra hunchi. Erlagi zeblau tumrar lagi dua ḳori, ou shomoe amrar malik Isa al-Mosir gaibi baf Alla Pakor shukria adae ḳori. ⁵Tumra age ze kush-ḳobri mani Allar hok kalam faiso, ou kalam hunia-u tumrar mono eḳ asha zonmise. Ou asha takiu tumrar iman ar maea foeda oise. Ar tumra asha ḳorrae ze saman faitae, ita to behesto raḳa ase. ⁶I kush-ḳobri duniar hoḳolbae sitria bala folala oia din din baṛer. Ze din tone tumra ou kush-ḳobri ar Allar rohomotor befare furafur huncho, ou din toneu itae tumrar bitreo furafur ḳam ḳorer. ⁷Ou kush-ḳobrir ḳota tumra amar logor maear bai Abu-Farasor gese huncho. Tain tumrar torof taki al-Mosir eḳzon hok kezmotḳari. ⁸Pak ruhur bole tumrar dilor maze ze maea foeda oise, ou befare Abu-Farase amrare zanaisoin.

⁹Erlagi tumrar befare hunar bad takiu amra hamesha tumrar lagi dua ḳori. Ruhani ilim ar buddi dia tumra zanu Allar munsha furafur buztae faro. ¹⁰Amra Allar dorbaro ou duau ḳorram, tumra zate hoḳol befare al-Mosir morzi zugaia solo ar tan ufozukto ummotor laḳan zindegi ḳaṭao. Hok kam ḳori ḳori foloban o, ar Alla Pakre aro bala ḳori sino. ¹¹Allae tan moha kudroti bole hoḳol nomunar bol dia tumrare boloban ḳoroukka. Bala-mosiboto foṛleo kushi-bashi roia sobor ḳorar tofik deukka. ¹²Ar hoḳol shomoe behesti baf Alla Pakor shukria zanao. Allar pak bonda oḳole nuror bashshait ze odikar faiba, itar bagi oar lagi to tainu tumrare ufozukto banaisoin. ¹³Tainu amrare andairor bashshai taki uddar ḳoria, tan ḳas maear zonor bashshait anchoin. ¹⁴Ou maear zonor ufre iman anae amra rehai faisi, mani guna taki mafi faisi.

al-Mosiu hokkoltar fordan

¹⁵Ou maear zonu oila, batuni Allar zairi surot; hokkolta foeda ḳorar age tain asla, ar foeda oa hokkoltar maze tainu fordan. ¹⁶Asman-zominor maze deḳa ar a-deḳa zotota ase, ita bashshai ouk ba bahaduri, shashon kiba ḳemota ouk, hokkoltau tan ator foeda. Ita to ḳali tan lagiu foeda ḳora oise. ¹⁷Hokkoltar foela tain asla ar tan mazdiau hoḳolta ṭikia ase. ¹⁸Tainu tan shorilor mata, mani zomator mata. Tainu hokkoltar foela, ar tainu foela murda taki zinda oisoin, zate hoḳol befare tainu fordan oita faroin. ¹⁹Allae saila, tan Allai gunor hokkolta zanu al-Mosir maze taḳe. ²⁰Ar duniat ba behesto zenou oe na ḳene, ou al-Mosir mazdia zanu hokkoltar loge tan milon oe. Tain saila, solibor ufre al-Mosir kurbanir lour bodla shanti ḳaimor mazdi ou milon ouk.

²¹Tumra to eḳ shomoe Allar ges taki duroi aslae, ar tan befare tumrar dilo dushmoni bab asil. Ita tumrar bod ḳamor mazdi zair oise. ²²Oile al-Mosir zan kurbanir mazdi Allae tumrareo tan loge milon goṭaisoin, zate tumrare fak-fobitro, nikut ar ni-oforadi halote tan samne azir ḳorta faroin. ²³Te al-Mosir befare kush-ḳobri taki ze nichchit asha tumra faiso, ḳali ou ashar ufre imane tir roio, in taki loṛio na. Tumra to zano, i kush-ḳobri hara duniat toblig kora oise, ami Pauluso ou kush-ḳobri tobligor ḳadim oisi.

Zomator lagi Hozrot Paulusor ḳam

²⁴Tumrar lagi ami duk-mosibot shoijjo ḳorae kub anondo fairam. Zano to, al-Mosir shoril mani zomator lagi tan ze duk-mosibot oḳono baki ase, ita oḳon amar shoril dia fura ḳoriar. ²⁵Alla Pake tan fobitro kalam tumrar gese furafur toblig korar bar amare disoin, gotikeu ami zomator eḳzon ḳezmotḳari oisi. ²⁶Allar kalamor ze batuni befar agor zomanar manshor gese zug zug dori lukail asil, ita oḳon tan pak bonda oḳolor gese zair ḳora oise. ²⁷Allae saisoin, bin zati oḳolor geseo tan batuni munshar gourob ze kita, ita zenu tan hoḳol bonda oḳole zanta faroin. Ashole al-Mosi tumrar dilo asoin, gotike tumra gourob faoar asha faiso. ²⁸Ar ou al-Mosir befare amra toblig koriar, Allar deoa aḳol-hekmot dia manshore hushiar ḳoriar ar talim diar zate al-Mosir torikat furafur kamil halote tarare Allar dorbaro azir ḳortam fari. ²⁹Ou niote Allar ze kudroti bol amar maze ḳam ḳorer, ou kudroti boleu ami dile-zane menot ḳoriar.

¹Ami tumrare zanaitam sairam, ami to tumrar lagi, Laodikea ṭaunor zomator lagi, ar zera amare deḳse na tarar lagio ḳoto menot ḳorram. ²Ami sairam, tarar dilo borosha faia mohobbote eḳ ouk. Ar furafur aḳole aḳoldar bonia nichchit ouk. Teu Allar lukail batuni bed buzbo, mani al-Mosire tara sinbo. ³Al-Mosir mazeu hoḳol aḳol-hekmot lukail ase. ⁴Ami ita ḳoilam, zate ḳeu banoaṭ mat-ḳota matia tumrare be-fote nito na fare. ⁵Ami sho-shorile tumrar maze na taḳleo ruhur bole ṭiku tumrar maze azir asi. Tumrar bala sal-cholon ar al-Mosir ufre mozbut iman dekia amar kub bala lager.

al-Mosir mazeu ashol zindegi

⁶Isa al-Mosire tumra malik hishabe zela ḳobul ḳorso, ou laḳan tan loge roia zindegio ḳaṭao. ⁷Al-Mosir maze shullo-ana ḍub dia tumrar zindegire goṛia tulo. Tumra talim faia ze iman ancho, ou imane mozbut ro ar hamesha Alla Pakor shukria adae ḳoro.

⁸Tumra hushiar roio, ḳeu zanu tumrare manshor banail mongoṛa talimdi bandia be-fote ṭania nito na fare. Al-Mosir loge i talimor kunu mil nai, ita to manshor mongoṛa rosumot ar duniabi nanan asar-beboharor ufre borosha ḳore. ⁹Allar hokkol laḳan gunagun al-Mosir ḳaear bitre ase. ¹⁰Erlagi al-Mosir loge shorik oia tumrao hoḳol gune kamil oiso, tan ashon to hoḳol nomunar shashonḳari ar ḳemota-ala hokkoltar ufre.

¹¹Al-Mosir ufre iman anae to tumrare mosolmani ḳam ḳorail oise. Ou mosolmani kunu manshor ate ḳorail oise na, al-Mosie nizeu ita ḳorsoin, mani dilor maze ze bod ḳaish asil, ou bod ḳaishre dil taki ḳaṭia falaisoin. ¹²Toubar gusolor mazdi al-Mosir loge tumrareo maṭi deoa oisil, ar zein al-Mosire murda taki zinda ḳorsoin, hou Allar kudroti bole imanor mazdi tumrareo al-Mosir loge zinda ḳora oise. ¹³Tumrar guna ar dilor bod ḳaish na horanie murda aslae, oile Allae tumrare al-Mosir loge zinda ḳorsoin. Tain amrar hoḳol gunar mafi disoin. ¹⁴Ar amrar bod amol-nomar ze dolil asil, ou dolilre hoḳol zator dabi-daoa shudda fusia falaisoin. Laḳṛidi banail ze solibo Isare ḳatol ḳora oise, ou solibo i dolilre fereg maria batil ḳorsoin. ¹⁵Al-Mosie bod shashonḳari ar ḳemota-ala hokkolor ḳemotare binash ḳorsoin. Solibo tan nizor zan kurbanir mazdi tarar ufre zoei oisoin ar hoḳolor samne tarar muk nisa ḳorsoin.

Noḳol talimor befare hushiari

¹⁶Erlagiu shinni-shokhat, fuza-proshad omaboisha-funnima, id ba Zummabaror niom-ḳanun loia tumrare dushi ḳorar eḳtiar ḳeuror nai. ¹⁷Ita to asil, bobishote zeta aibo otar eḳṭa nomuna matro, oile asholta to al-Mosir mazeu ase. ¹⁸Zera nizor shorilre ḳoshṭo deoa ar firista oḳolor ebadot ḳorare zoruri mono ḳore, era zanu tumrare furushkaror fot taki horaito na fare. Ou nomunar manshe zeta deḳse ḳoia ḳamoḳa boṛai-beṭagiri ḳore, ar ota loia boṛo boṛo gof mare, ashole erar ontor to ḳali duniabi sintae bora. ¹⁹Tara to matare, mani Isa al-Mosire mozbut ḳori doria raḳe na, ou matar ḳemotae asta shorilor aḍḍi-mangsho bol-shokti faia ekkano roe, ar Allai bole baṛe.

²⁰Al-Mosir loge mara gia tumra zebla duniabi hoḳol sal-cholon taki horia aiso, te hirbar ḳene duniabi manshor laḳan duniabi niom-nitir gulam oirae? ^21-22Huno, ze zinish bebohar ḳorte ḳorte borbad oizae, ou zinishor befare ola niom ase, ita dorio na, soio na, ḳaio na. Ita to ḳali manshor mongoṛa hukum ar talim. ²³Ḳemne ebadot ḳora, nizore nisa ḳora, ḳemne nizor shorilre ḳoshṭo deoa, ou niom-nitie ota hikae. I niom-niti deḳle mono oe, ita kub aḳolor ḳam, oile dilor bod ḳaishre domon ḳorar lagi itar kunu damu nai.

al-Mosir ummotor noea zindegi

¹Huno, tumra to al-Mosir loge mora taki zinda oiso, ar al-Mosi to behesto Allar ḍainor toḳto boat asoin, erlagi tumrao oula behesti befar loia ashik o. ²Duniabi befare ashik na bonia, behesti befare ashik o. ³Tumra to mara geso, tumrar zindegi al-Mosir loge Allar dorbaro lukail ase. ⁴Zein tumrar zindegi, hou al-Mosi zebla hoḳolor samne zair oiba, ou shomoe tumrao tan mohimar bagi oia tan loge zair oibae.

⁵Erlagi gunar zeta rifu oḳol tumrar zindegit ase, itare eḳdom binash ḳorilao. Ita oilo hokkol nomunar zina, nafaki, bod ḳaish, ku-sinta, ar lub-lalos, i lub-lalos oilo eḳ laḳan murtifuza. ⁶Zara Allar naformani ḳore, otar ḳaroneu tarar ufre Allar gozob lamia ae. ⁷Tumrao age ou laḳan naformanir maze zindegi ḳaṭaitae. ⁸Oile oḳon rag-gusa, bitori dushmoni, ingsha-ninda, gala-gali ar ḳobisi mat-ḳota tumrar ges taki horailao. ⁹Eḳe-oinne misa matio na, ḳaron tumrar zindegir furan ‘ami’re tar hoḳol amol shudda furan ḳafoṛor laḳan falai diso, ¹⁰ar Allar deoa noea ‘ami’re noea ḳafoṛor laḳan findiso. Ou noea ‘ami’ aro noea oia tar foeda ḳorra malikor laḳan boner, zate ou foeda ḳorrare tumra furafur sino. ¹¹Ou halote Ihudi kiba bin zati, mosolmani ḳam ḳorail ba na ḳorail, oshikkito borbor, nisa zati, gulam ba azad manshor maze kunu tofat nai. Ita hoḳoltar maze al-Mosiu fordan, hoḳolor mazeu tain asoin.

¹²Te Allae zarare fosond ḳoria tan nizor lagi alog korsoin, tan hou maear bonda hishabe tumrar dilor maea-momota, doya, norom bebohar, norom shobab ar sobor dia nizore hazao. ¹³Eḳe-oinnore shoijjo ḳoro, ḳeuror birudde tumrar kunu nalish taḳle tare maf ḳori deo. Malike zela tumrare maf ḳorsoin, tumrao oula eḳe-oinne maf ḳora zorur. ¹⁴Ar ita hokkoltar loge maea-mohobbotdi nizore hazao. Mohobbote to hoḳolre furafur eḳloge bandia raḳe. ¹⁵Al-Mosie ze shanti dan ḳoroin, ou shanti tumrar dilo roia tumrare salauk. Eḳ shoril oia shantir maze roitae ḳoriu to tumrare daot deoa oise. Tumra shukur-guzar ḳorat ro. ¹⁶Al-Mosir kalamre tumrar dilor maze furafur boshot ḳorte deo. Allar deoa aḳol ḳaṭaia eḳe-oinnore talim ar foramish deo. Allar shukria adae ḳorar mazdi tan name hamd, ḳaoali ar Zobur Shorifor gozol gao. ¹⁷Tumra mukdi zeta mato ar shoril dia zotota ḳoro, ita Hozrot Isar name ḳoro, tan usilla loia gaibi baf Alla Pakor shukria zanao.

Foribaror lagi foramish

¹⁸Tumra zera bou oiso, tumra forteḳe zarzir zamair hukum mania solo, malikor bonda hishabe to ola sola zorur. ¹⁹Tumra zera zamai oiso, tumrao zarzir boure mohobbot ḳorio, bour loge ḳoṭu bebohar ḳorio na.

²⁰Tumra zera fua-fuṛi, tumra hoḳol befare ma-bafor baiddo roio, ila solle malik kushi oin. ²¹Ar tumra zera baf oiso, tumra nizor fua-fuṛintor monre titta ḳorio na, zate tarar mon na bange.

²²Tumra zera gulam, tumra hoḳol befare tumrar zogotor munib oḳolor baiddo roio. Tara samne roia zebla tumrar ḳam-ḳaz deḳoin, ḳali ou shomoe tarare kushi raḳar sesṭa na ḳoria, borong malikor ḍor-ḳof bitre rakia ḳaṭi dile tarar baiddo roio. ²³Tumra zetau ḳoro na ḳene, ita manshor lagi nae, borong malikre kushi ḳorar niote dile-zane ḳorio. ²⁴Mono rakio, malike tan bonda oḳolor lagi zeta raḳsoin, ita to furushkar hishabe tan ges takiu tumra faibae. Tumra to ḳali Hozrot Isa al-Mosir ḳezmot ḳorrae. ²⁵Ar ze zone naformani ḳore, he to tar ḳamor fol faibo. Mono rakio, malike ḳeuror muk saia bisar ḳoroin na.

¹Tumra zera munib, tumrar gulam oḳolor loge niae ar hok insaf ḳorio. Mono rakio, behestor maze tumraro eḳzon munib asoin.

Aḳeri foramish

²Tumra mon dia shukria adae ḳoria dua ḳorat roio. ³Amrar lagio dua ḳorio, zate Allae amrare al-Mosir befare batuni hok kalam toblig korar tofik dein. Ou batuni hok kalamor lagiu to amare bondi ḳora oise. ⁴Dua ḳorio, manshore zela forishkar ḳori buzani zorur, ami zanu ṭik oula buzaitam fari. ⁵Al-Mosir torikar bairor manshor loge aḳol ḳaṭaia solio, ar toblig korar hokkol shuzug kamo lagaio. ⁶Tumrar mukor zoban hamesha miṭa ar roshail ouk, zate ḳare kila zuaf ditae, ita tumra buzo.

Aḳeri munazat ar salam

⁷Amrar maear bai, bishashi ḳadim ar malikor ḳezmoto amrar logor tobligkari Tukiko baie, amar bistarito ḳobora-ḳobor tumrare zanaiba. ⁸Tan marfote amrar hal-hokikot zanbae, tain tumrare shaosh diba. Erlagi ami tanre tumrar gese faṭailam. ⁹Tukikor loge amrar maear imandar bai Onisimreo faṭailam. Ein to tumraru eḳzon. Tara inor hoḳol ḳobor-antor tumrare zanaiba.

¹⁰Amar logor bondi bai Aristakus ar Barnabasor kuṭum Markuseo tumrare salam disoin. Ou Markusor befare tumra to ag takiu ḳobor faiso, tain zudi tumrar gese zain, te kushi mone tanre ḳobul ḳorio. ¹¹Ar Isa urfe Iustuseo tumrare salam disoin. Allar bashshair lagi Ihudi oḳolor maze ḳali ou tin zoneu amar loge ḳam ḳoroin, tara amare bout shaosh disoin. ¹²Abu-Faraseo tumrare salam disoin, tain to tumrar afon manush ar Isa al-Mosir gulam. Ein hamesha tumrar lagi dile-zane munazat ḳorra, tumra zate kamil o, ar Allar morzi-munsha buzia mozbut oia ubao. ¹³Tan befare ami ou shakki ditam fari, tumrar lagi ar Laodikea, Hiorapoli ṭaunor manshor lagio Abu-Farase kub menot ḳoroin. ¹⁴Amrar maear ḳobiraz Luk ar bai Dimaseo tumrare salam disoin.

¹⁵Laodikear imandar bai oḳolre, ar Nimufa ar tan baṛir zomator hoḳolor geseo salam zanaio. ¹⁶Tumra ou siṭikan foṛia harle Laodikear zomator manshore foṛar lagi dio ar Laodikea zomatre dusra ze siṭi deoa oise, ou siṭio tumra foṛio. ¹⁷Arkipasre oḳan ḳoio, “Malikor ḳezmoto tumare ze ḳam deoa oise, ou ḳam shesh ḳorar niote mon dia ḳam ḳoro.”

¹⁸Ami Pauluse nizor ate ou salamor ḳota leḳlam. Mono rakio, ami zelo bondi asi. Allae tumra hoḳolor ufre rohomot nazil ḳoroukka. Amin.