Sahabi Nama

Fobitro Injil Shorif 5 nombor sifara

Sahabi Nama

Torikar ḳezmoto sahabi oḳol

Forisiti

Fobitro asmani kitabor ou Sahabi Nama sifarar maze amra faimu, Hozrot Isa al-Mosir sahabi ar ummot oḳol Allai Pak Ruhur bole foela Zeruzalem ṭaun, bade bortoman Filistin deshor Ehudia ar Shomoria elaḳa, heshe Eshia ar Iurup mohadeshor bout zaga oia Ruman bashshair razdani Rum ṭaun forzonto aia kila Allai kush-ḳobri toblig korsoin, ar kila ou hoḳol zagat noea noea Isai zomat zonmise.

Ou sifarat ase, toblig kamor soforo baroia sahabi oḳole ar Hozrot Isar ummot oḳole ḳoto beshi zulum-mosibot faisoin, nizor zati taki, bin zati taki ar nanan nomunar murti-fuzarir ges taki ou duk-mosibot, zel-zulum, sabukor mair shoijjo ḳorsoin. Ta-o tara toblig kam ḳorsoin ar Alla Pake tarare hamesha ḳoto boṛo boṛo shaijjo ḳorsoin, tarar mazdi nanan nomunar keramoti zair oise. Erlagi manush dole dole aia iman anche.

Amra ou sifarar 1 ruku 8 aeato faimu, Hozrot Isae sahabi oḳolre ḳoira, “Pak ruh tumrar ufre ḳaim oia harle tumra gaibi bol faibae, ou bole Zeruzalem, asta Ehudia ar Shomoria elaḳa, ar duniar hesh shimana forzonto amar shakki oibae.”

Leḳok forisiti ar shomoe

Alla Pakor hukume ou Sahabi Nama sifara leḳsoin Hozrot Luk (ro:). Fobitro Injil Shorif taki zana zae, Hozrot Lukor fesha asil hekimi ḍaktor. Tain Hozrot Isar sahabi Hozrot Paulusor ḳezmoto roia nanan deshor nanan zatir gese Allar kalam toblig korta. Hozrot Isa dunia taki behesto toshrif neoar onuman 30 bosor bade ou sifara kitab aḳare leḳa oise. Ou Sahabi Nama sifara oilo Hozrot Lukor leḳa dui nombor sifara, er age tain al-Luk namor sifara leḳsla.

Ermaze ase,

(1) Hozrot Isar behesto firot zaoa 1:1-11 aeat

(2) Zeruzalem Isaei zomator zonom 1:12—5:42

(3) Ehudia ar Shomoria elaḳat Isaei zomat 6—12 ruku

(4) Hozrot Paulusor (ra:) foela tobligi sofor 13:1—15:35 aeat

(5) Hozrot Paulusor duara tobligi sofor 15:36—18:28

(6) Hozrot Paulusor tin nombor sofor 19:1—21:14

(7) Bondi halote Hozrot Paulus 21:15—28:31

Hozrot Isar behesto firot zaoa (1:1-11)

¹Mohamainno Tiofilas,

Hozrot Isare behesto tulia neoar ag forzonto tain zeta talim disoin ar zeta zeta ḳorsoin i hoḳolta-u ami agor kitabo leḳsi. ²Ze sahabi oḳolre tain basia loisla, tanre tulia neoar age Pak Ruhu dia erar gese osiot ḳorai gesoin. ³Tan toklif ḳaimor bade tain zen zinda asoin iṭar bout kisimor alamot deḳaisoin. Sallish din dori tain sahabi oḳolre deḳa dia Allar bashshair bishoye batchit ḳorsoin. ⁴Isae tara hokkolor loge ekkano shorik oia ou hukum dila, “Tumra Zeruzalem taki zaio na, amar gaibi bafor oada ḳora ze danor ḳota tumra age amar gese huncho, er lagi ono bar sao. ⁵Hozrot Ehiae to fanir maze toubar gusol ḳoraita, oile besh deri oito nae Allae tumrare Pak Ruhu dia gusol ḳoraiba.”

⁶Tara hokkol ekkano dola oia Isare zikaila, “Huzur, i shomoe kita Boni Israil oḳolor ato raijjo firot anba ni?” ⁷Isae zuaf dila, “Ze oḳt ba zomana amar gaibi bafe tan nizor eḳtiaro raḳsoin, ita tumra zanar goroz nai. ⁸Oile Pak Ruhu tumrar ufre ḳaim oia harle tumra gaibi bol faibae, ou bole Zeruzalem, asta Ehudia ar Shomoria elaḳa, ar duniar hesh shimana forzonto amar shakki oibae.” ⁹Ou mator badeu sahabi oḳolor soukor samne Isare tulia neoa oilo, ar tain megor ṭukrar aoṛ oigela. ¹⁰Isa zebla asmano uṭira i shomoe sahabi oḳole souk na firaia asmanor bae sairoila, ou shomoe dola ḳafoṛ finda duizon beṭa manush tarar ḳandat ubaia ¹¹ḳoila, “O Galilor manush oḳol, ikano ubaia asmanor bae sairiso ḳene? Zare tumrar ges taki tulia neoa oilo, ou Isare zelaḳan tumra behesto zaite deḳlae, ou laḳan tain firiao aiba.”

Zeruzalem Isaei zomator zonom (1:12–5:42)

Noea sahabi fosond ḳora

¹²Ou sahabi oḳol Zoetun namor faṛo taki Zeruzalemo firia aila. I faṛ Zeruzalem ṭaun tone tuṛa duroi. ¹³Ṭauno firia tara ze goror uforor talat roita hou goro gela. Tara oila Fitor, Hannan, Iakub, Andrias, Filif, Tumas, Bortolmoe ar Moti, Alfir fua Iakub, muktizudda Saimon, ar Iakubor fua Ihuda. ¹⁴Goro hamaia hoḳole milia ḳas dile dua ḳorat roila, erar loge asla imandar beṭin, Isar ma Moriom ar tan baiain.

¹⁵Hou shomoe eḳdin Fitore onuman eḳ-sho bishzon mumin oḳolor maze ubaia ḳoila, ¹⁶“Bai oḳol, Isare zera dorat aisil tarare fot sinaia nisil Ihuda, tar befare bout age Daud nobir muko Pak Ruhe zeta ḳoisla, pak kalamor i ḳota fura oar dorḳar asil. ¹⁷He to amraru eḳzon asil, ar amrar loge torikar ḳezmotor lagi tareo sahabi hishabe fosond ḳora oisil.” ¹⁸Ou nafaki ḳamor ṭeḳa dia he eḳzora zomi loisil, ar ou zomino ufoit oia foṛia tar feṭ faṭia at-boṛ baroilo. ¹⁹Zeruzalemor hoḳol manshe ita hunchil, erlagi hoḳole ou zominre ḍaḳoin ‘Aḳeldama’ ba lour zomin.

Fitore aro ḳoila, ²⁰“Ou ḳota Fobitro Zobur Shorifo ase:

Tar boshot ḳana ḳali rouk,

hono roar ḳeu na taḳouk.

Tar godi aroḳzone fauk.

^21-22Erlagi Ehiae zebla toubar gusol ḳoraita hou shomoe taki, Isare amrar ges tone tulia neoar ag forzonto, zotodin Isa amrar loge sola-fira ḳorsila, otodin zera amrar dolo asil, erar maz tone Isa zen murda taki zinda oia uṭsoin, er shakki hishabe oinno aroḳzonre amra sahabi oḳolor dolo harani lagbo.”

²³Teu tara ou duizonre uba ḳoraila, Iusuf Barshabba, tan aroḳ nam Iustus; ar Matias. ^24-25Bade tara dua ḳorla, “O Mabud, tumi hoḳolor dilor ḳobor zano, Ihudae to tar nizor zagat zaoar lagi ḳezmot ar sahabi fodor ḳam bad dilaise, Ihudar bodla i duizonor maze tumi ḳare fosond ḳoro amrare sinaia deo.” ²⁶Heshe tara duizonor name loṭari marle Matiasor nam uṭlo; teu Matias ou egarozon sahabir loge zug oila.

Ummot oḳole Pak Ruhu faila

¹Fonchaisha Idor din tara hoḳol eḳ zagat dola asla. ²Ou shomoe asman taki tufanor laḳan eḳ aoaz oilo, tara ze goro boat asla i aoaze asta gor borigelo. ³Tara deḳla, aguinor lukkar laḳan kitar ṭukrain aise, ar i lukkain tara hoḳolor ufre aia boilo. ⁴Teu tara hoḳole Pak Ruhe kamil oila, ar ruhur gaibi bole tara alog alog bashae matta lagla.

⁵I shomoe duniar hokkol deshor forezgar Ihudi oḳol Zeruzalemo asla. ⁶I aoazor loge logeu tara aia biṛ ḳorilla ar be-aḳol oigela, ḳaron erare zarzir nizor bashae mat-ḳota matte deḳla. ⁷Dekia tara taijjub oia mata-mati ḳorla, “Ou zera matra era hoḳolu kita Galilor manush nae ni? ⁸Zudi oe te amra kila zarzir nizor bashar buli erar ges taki hunram? ⁹Amra to Fartio, Madio, Ilamio, ar Meshofotamiar bashinda, Ehudia, Kappadokia, Fonto, Asiya, ¹⁰Forugia, Pamfulia ar Mishor deshor mansheo; Libiar Kurini elaḳar manshe, ino gurat aisoin oula Ruman oḳole, ¹¹zera Ihudi zati ba Ihudi dormor manush, ar Kritio, Arobi, amra hoḳoleu to zarzir nizor bashae Allar kudroti ḳamor ḳota erar muk taki hunram!” ¹²Ou laḳan tara taijjub ar be-aḳol bonia eḳe-oinnoe zikaila, “Er mani kita?” ¹³Ar baki oḳole ṭaṭṭa ḳoria ḳoilo, “Era to mod ḳaia matlami ḳorer!”

Hozrot Fitoror boean

¹⁴Ita hunia Fitore ou egaro zon sahabir loge ubaia zure zure tarare ḳoila, “O Ihudi oḳol ar Zeruzalemor bashinda oḳol, afnara zania raḳoukka ar mon dia amar boean hunoukka. ¹⁵Afnara mono ḳorra era matal oigese, na, ashole ṭik nae, oḳon to ḳali shoḳal noeṭa bazer. ¹⁶Iṭa to ou goṭona zar befare nobi Zuele ḳoisla:

¹⁷Allae formaira,

aḳeri zomanat oula goṭbo,

ami amar ruh hokkolor maze bezimu;

teu tumrar fua-fuṛinte nobir laḳan batuni mat matba,

tumrar zuan oḳole gaibi alamotor deḳa faiba,

murobbi oḳole kuab deḳba.

¹⁸Ou shomoe amar bonda-bandir ufre

amar ruh bezimu,

tara nobir laḳan ohi ḳoiba.

¹⁹Ami ufre asmano bout keramoti deḳaimu,

ar tole duniat bout nishana goṭaimu,

lou, aguin ar ḳala-duma deḳaimu.

²⁰Mabudor i mohan ar ḳas din aibar age,

shuruz andair oizibo,

sand lour laḳan oizibo.

²¹Ar oulan oibo,

zekunu manshe Mabudor name ḍakile,

he nazat hasil ḳorbo.

²²O Boni Israil oḳol, hunoukka, Nasarotor Isar mazdia Allae tan kudroti ar keramoti ḳam ḳoraia, afnaintor gese forman ḳorsoin, tainu Isare faṭaisla, ar ita to afnarao zanoin. ²³Alla, zein ageu zanoin ar foesalao ḳoria raḳsoin, Isare afnaintor ato shofiba. Ar afnara be-din oḳolor atane tanre duk-koshṭor solibo dia ḳatol ḳorsoin. ²⁴Oile Allae moutor azab taki tanre ḳalas ḳoria zinda ḳorsoin, ḳaron moutor ḳemota asil na tanre ḳobza ḳorar. ²⁵Daudeo tan ḳota ḳoisoin:

Ami hamesha munibre amar samne deḳtam,

tain amar ḍain galat asoin,

ami zanu ostir na oi.

²⁶Erlagi amar dil kushi oe,

amar muk taki furti baroe,

amar ḳaea ou ashae zita roibo,

²⁷ḳaron tumi amar zanre

fatalo falaia toitae nae,

tumar pak bondar shorilre

fosa-gola oite ditae nae.

²⁸Tumi amare zindegir fot zanaiso.

Tumar didaror maze ase furafur furti.

²⁹Bai oḳol, ou mohan-baf Daudor befare ami afnarare kula-kuli ḳoiram, tain mara gesoin, tanre dafon ḳora oise, ar tan ḳoebor aizo oḳano ase. ³⁰Tain eḳzon nobi asla ar tain zanta, Allae ḳosom ḳoria i oada ḳorsoin zen, tanu oarishor eḳzonre tan godit boaiba. ³¹Erlagi ag tone dekiau tain Allar oada ḳora bashsha, mani al-Mosir murda taki zinda oia uṭar befare ou ḳota ḳoisla, enre fatalo falaia toa oito nae, en ḳaeao fosto nae. ³²Allae ou Isareu zinda ḳoria tulchila, amra hokkol er shakki. ³³Allar ḍainor toḳto boibar takkot tanre-u deoa oise, gaibi bafor oada ḳora Pak Ruh tainu faisla, ar oḳon afnara zeta deḳra ar hunra ita tainu ḳorsoin. ³⁴Daud to nize behesto hamaisoin na, oile tain ḳoisoin:

Mabude amar munibre ḳoila,

tumi amar ḍain galat bo,

³⁵ami tumar dushmon oḳolre

tumar faor tolat falani forzonto bo.

³⁶Erlagi hokkol Boni Israile ou ḳota bala ḳori zanoukka, afnara zenre solibo gatisla, Allae ou Isareu malik ar al-Mosi duio toḳt disoin.”

³⁷Ita hunia manshor dilo sel hamailo, tara Fitor ar sahabi oḳolre zikailo, “Baiainre, amra kita ḳortam?” ³⁸Fitore zuaf dila, “Mon firaukka, afnara hoḳole gunar mafir lagi Isa al-Mosir name toubar gusol ḳoroukka, teu afnara dan hishabe Pak Ruhu faiba. ³⁹I oada afnaintor lagi, afnaintor aolador lagi, zera duroi ase tarar lagi, zoto manshore amrar Mabud Allae tan ḳas bonda oibar lagi daot diba tara hokkolor lagi.”

⁴⁰Aro boutta ḳoia Fitore hushiar ar minot ḳori ḳoila, “I zomanar naforman oḳolor ges taki afnaintor zan basaukka.”

Mumin oḳolor sal-cholon

⁴¹Tan boean hunia zera iman anla tara toubar gusol ḳorla, onuman tin azar manush i din ummot oḳolor loge shorik oila. ⁴²Tara sahabi oḳolor talim huna, tarar loge shorik oia al-Mosir mezbani ḳaoa, ar dua ḳorat hamesha ḳaim roita.

⁴³Teu hoḳole ḍoraito ḳaron sahabi oḳole bout keramoti ar muzeza ḳam deḳaita. ⁴⁴Hokkol imandar oḳol ekkano roita ar zarzir dorḳari samana on taki nita. ⁴⁵Tarar zomi-zoma don-doulot besia zar zela dorḳar oula baṭia dita. ⁴⁶Tara forteḳ din Baetul-Mukaddoso ekkano milta, ar kushi oia eḳloge shorol mone goro goro gia ḳana-fina ḳorta. ⁴⁷Tara Allar tarif ḳorat roita ar hokkol manshor mohobbotor manush oila. Zera nazat hasil ḳorta, Allae tarareo ania dine dine erar loge shorik korta.

Lengṛa hokirre shifa ḳora

¹Eḳdin asor oḳtor nomazor lagi Fitor ar Hannan Baetul-Mukaddoso zaoat asla; ²manshe forteḳ din eḳzon manshore boia ania Baetul-Mukaddosor ‘Shundor’ namor geiṭor gese toita, he zonmogoto lengṛa-atur asil, zera Baetul-Mukaddoso zain tarar gese bik saoar lagi tare hikano toa oito. ³Fitor ar Hannanre Baetul-Mukaddoso hamanit dekia he tarar gese minot-ḳajji ḳori bik kuzilo. ⁴Fitor ar Hannan tar bae dian dori saia ḳoila, “Amrar bae sao.” ⁵Teu he tarar ges taki kunta faoar lalose dian dori sairoilo. ⁶Fitore tare ḳoila, “Amrar gese to shuna-rufa kunta nai reba, oile zeta ase tumare dan ḳorram. Nasarotor Isa al-Mosir name aṭia zao.” ⁷Ḳoia hari tain er ḍain ato doria usa ḳorla, ar loge logeu tar fao ar gusit bol ailo. ⁸He faldi uṭia ubailo ar aṭa shuru ḳorlo, aṭi aṭi falai falai Allar tarif ḳorte ḳorte erar loge oia Baetul-Mukaddoso hamaigelo. ⁹Hokkol manshe tare aṭat ar Allar tarif ḳorat dekia ¹⁰ere sinililo, igu deki ou manush, zegue Baetul-Mukaddosor Shundor namor geiṭo boia bik korto! Tar halot dekia manush asanok taijjub oigelo.

Baetul-Mukaddoso Hozrot Fitor ar Hannan

¹¹Oile lengṛa hokire Fitor ar Hannanor ḳore oia gurae, manshe Fitoror i ḳame taijjub oia douṛia Sulaiman namor barindat tan gese ailo. ¹²Ita dekia Fitore manshore ḳoila, “O Boni Israil oḳol, ere dekia afnara taijjub oigela ḳene? Amrar nizor firaki ba forezgarir gune tare solar shokti disi mone ḳoria, ḳene amrar bae dian dori sairoiso? ¹³Ibrahim, Isʼhak ar Iakubor Alla, amrar baf-dada oḳolor Alla, tan afon bonda Isar mohima zair ḳorsoin, zenre afnara dushmonor ato shofi disla. Ar hakim Filate zebla tanre saṛi dita ḳori niot ḳorsla, i shomoe afnara Isare duroi horai disoin. ¹⁴Afnara ou pak-forezgar manshore horai dia eḳzon kunire saṛanir lagi sufarish disoin. ¹⁵Zein zindegi dan ḳoroin tanre afnara ḳatol ḳorsoin, oile Allae tanre murda taki zinda ḳorsoin, amra er shakki. ¹⁶Ar tan ufre iman anae, ou ze beṭare afnara sinra ar deḳra, hou Isar namu tare bolala ḳorse. Isar mazedi zeta iman foeda oe, ou imanor boleu afnara hoḳolor samne tare bala ḳora oise.

¹⁷“O bai oḳol, ami oḳon zani afnaintor murobbi-salish oḳolor laḳan afnarao na-buzia i ḳam ḳorilisoin. ¹⁸Oile Allae tan tamam nobi oḳolor mazdi al-Mosir toklifor befare age zotota zanaisoin, i hokkolta ou laḳan ḳori fura ḳorsoin. ¹⁹Erlagi afnara mon firaukka ar Allar muki oukka, zate afnaintor guna oḳol fusia saf ḳora oe. ²⁰Te ou laḳan oḳt aibo, zebla Mabude hou Isare mani tan fosond ḳora al-Mosire bezia afnaintore tortaza ḳorba. ²¹Allae hoḳoltare agor haloto firaiba, ita bout din ageu pak nobi oḳolor zoban dia ḳoisoin. Zotodin tan i oada fura na ḳorba, otodin Isao behestor maze roiba. ²²Musae to ḳoisla, ‘Mabud Allae tumrar lagi tumrar nizor manush oḳol taki amar laḳan eḳ nobi foeda ḳorba, tain tumrare zeta ḳoiba, tumra i hoḳolta-u amol ḳorio. ²³Zegue tan ḳota hunto nae, Allae ere nizor bondar ḳata taki fusia falai diba.’ ²⁴Ar [Bashsha Daudor amolor] Samuel nobi taki shuru ḳori zoto nobi oḳole kalam bataisoin, era hoḳoleu i oḳtor ḳota ḳoisoin. ²⁵Afnara to i nobi oḳolor oarish, ar hou ḳanunoro oarish zeta Allae afnaintor baf-dada oḳolor loge ḳaim ḳorsila. Allae Hozrot Ibrahimre ḳoisla, ‘Tumar oarishor mazedi duniar hokkol zatie borkot faiba.’ ²⁶Hou oarish, mani tan ḳas gulam Isare, Allae foelau afnaintor gese bezisoin, zate tain afnarare be-dini ḳam oḳol taki firaia hari borkot dein.”

Hozrot Fitor ar Hannanre aṭok kora

¹Fitor ar Hannane zebla manshore boean ḳorra ou shomoe imam oḳol, Baetul-Mukaddosor boṛo daroga ar Siddekia mozobor manush aḳtau tarar gese aila. ²Fitor ar Hannane manshore talim dira ar Isar maz diau murda oḳol hirbar zinda oia uṭar befare toblig korra dekia tara kub naraz oisla. ³Tara Fitor ar Hannanre aṭok korla ar hainja oigesil ḳori erare bador din forzonto bondi ḳori toila. ⁴Zera Fitoror boean hunchila erar maze boute iman anla, teu imandar beṭaintor foriman fas azaror laḳan oilo.

⁵Bador din Ihudir neta oḳol, murobbi-salish ar moulana oḳol eḳloge Zeruzalemo dola oila. ⁶Hikano fordan imam Hanon, Kaeafa, Iuhonna, Sikondor ar fordan imamor ḳesh-kuṭum oḳolo azir asla. ⁷Tara Fitor ar Hannanre tarar mazḳano uba ḳoraia zikaila, “Tumra kun bole ar ḳar name i ḳam ḳorrae?” ⁸Teu Fitore Pak Ruhe kamil oia tarare ḳoila, “O murobbi saebain ar deshor buzurg oḳol, ⁹eḳzon lengṛa-atur manshor balai ḳorsi ḳori afnara aiz amrare zera ḳorra, manushgu kila bala oilo. ¹⁰Te afnara hoḳole ar Boni Israil oḳoleo hunoukka, Nasarotor Isa al-Mosir name, zenre afnara solibo gatia ḳatol ḳorsla, zenre Allae murda taki zinda ḳorsoin, tan boleu i manushgu afnaintor samne bala oia ubaise. ¹¹Tain hou fattor, zetare raz-mestoir oḳole, mani afnara elami ḳori bad dilaisla, pak kitabor ḳota mafik hou fattoru aiz ian kunar hoḳol taki zoruri kuṭi oise. ¹²Toranir ḳemota ar ḳeuror gese nai, ḳaron asmanor tole ar zominor ufre oula ar kunu nam deoa oise na, zen name amra rehai faimu.”

¹³Fitor ar Hannanor shaosh dekia, era zen oshikkito shamainno manush ita zania tara taijjub oigela, ar era Isar loge asla ḳorio sinla. ¹⁴Ze beṭa bala oisil, he erar loge ubairoise dekia erare ar kunta ḳoar shaosh oilo na. ¹⁵Bade mozlis taki erare bare zaoar hukum dia tara hoḳole foramish ḳorat boia ¹⁶ḳoila, “I manshore loia amra kita ḳortam? Era to bout boṛo ek keramoti ḳam ḳorse ar ita to asta Zeruzalemor hoḳole zane, ar amra-o iṭare oshikar ḳortam fariar na. ¹⁷Oile manshor gese zanu i ḳota ar zana-zani na oe, erlagi erare ḍor deḳail ouk, zate i zonor name tara ar ḳeuror gese kunta na ḳoe.” ¹⁸Bade tara Fitor ar Hannanre hirbar anaia ou hukum dila, “Tumra Isar name ar kunudin eḳdom kichchu ḳoio na, kunuzat nosioto ḳorio na.” ¹⁹Fitor ar Hannane tarare zuaf dila, “Amra afnaintor hukum mantam, na Allar hukum mantam? Allar nozoro kunḳan ṭik, ita afnarau bisar ḳoroukka. ²⁰Amra zeta deḳsi ar hunchi, ita na ḳoia to taḳtam fari na.” ²¹Teu tara Fitor ar Hannanre aro ḍor deḳaia saṛi dila. Manshore ḍoraia tara erare kunu shaza dita farla na, ḳaron zeta goṭsil ita dekia hoḳol manshe Allar proshongsha ḳorat asil. ²²Ze manushgu keramoti ḳamor mazdi bala oisil tar boeosh sallish bosoror beshi asil.

Toblik kamor shaoshor lagi dua

²³I bisar taki tarare saṛar bade Fitor ar Hannan tarar afon manshor gese gelagi, gia boṛo imam oḳole ar murobbi-salish oḳoleo tarare zeta zeta ḳoisla, ita hokkolta zanaila. ²⁴Ita hunar bade tara hoḳole eḳ dile Allar gese zure zure dua ḳorla, “O malik, tumi asman, zomin, doria ar itar maze zotota ase hokkolta foeda ḳorso. ²⁵Tumi tumar gulam, amrar ḳandanor baf Daudor zobano Pak Ruhur mazdia oula ḳoiso,

Hokkol zatie ḳene ostir oia sillaira?

Kior lagi manshe behuda fondi ḳorer?

²⁶Zogotor bashsha oḳol ubailo,

raza oḳol ekkano oilo,

Malikor birudde ar tan al-Mosir birudde.

²⁷Tumar fobitro gulam Isa, zenre tumi al-Mosi ḳoria duniat faṭaiso, tan birudde Raza Herud ar Fontio Filat, ou shohoro o-Ihudi ar Boni Israilor loge ekkano oisil. ²⁸Tumar morzi ar tumar kudrote zeta goṭar lagi tumi ageu ṭik kori raḳsilae, tara outau goṭaise. ²⁹Oḳon O malik, tara amrare kila ḍor deḳaira, tumi kial ḳoro, tumar gulam oḳolre oula takkot deo zate, furafur shaosh ḳoria tumar kalam toblig kortam fari. ³⁰Bemari oḳolor shifar lagi tumar at mubarok baṛai deo, ar tumar pak gulam Isar name muzeza ar keramoti deḳanir tofik deo.”

³¹Tarar dua ḳorar bade ze zagat tara dola oisla, hi zaga ḳafia uṭlo. Ar tara hoḳole Pak Ruhe kamil oia shaosh ḳoria Allar kalam toblig korat roila.

Imandaror mohobbot

³²Zera al-Mosir ufre iman anchila, tarar eḳ mon ar eḳ dil asil. Tara eḳzoneo nizor don-doulotre nizor ḳoia dabi ḳorta na, hokkoltau hoḳolor dorḳar moto ḳoros ḳorta. ³³Sahabi oḳole kub himmot ḳoria, Hozrot Isar murda taki zinda oia uṭar bishoye toblig korta, ar tara hokkolor ufre Allar ḳas rohomot asil. ³⁴Tarar maze ḳeu obabi asla na, ḳaron zerar zomin ba baṛi asil tara ita hoḳolta besia, ³⁵sahabi oḳolor gese ania dan ḳorilita, bade zar zela goroz tare oula deoa oito.

³⁶Ar Iusuf name Lebir bongshor eḳzon manush asla, tan baṛi Saipras dif, sahabi oḳole tanre ḍakita Barnabas, mani utshaho zugaora, ³⁷tan eḳzora zomin asil, taino tan zominḳan besia ṭeḳa ania sahabi oḳolor ḳodomo dan ḳorla.

Ononio ar Safirar beimanir fol

¹Ou shomoe Ononio name eḳzon manush ar tar bou Safirae tararo eḳzora zomin besila, ²besia tar bour zana monteu zominor kisu ṭeḳa nizor lagi lukaia, baki ṭeḳa sahabi oḳolor faot dila. ³Teu Fitore ḳoila, “Ononio, shoetane ḳemne tumar dilre doḳol ḳorlo, tumi Pak Ruhur gese kila misa matlae, ar zomin besar ṭeḳa kisu lukai raḳlae? ⁴Besar age zominḳan kita tumar asil na ni? Ar besar badeo to i ṭeḳa tumar eḳtiaro asil, te ḳene tumar bitre ita hamailo? Tumi to manshor gese misa matso na, Allar gese-u misa matlae.” ⁵Ita hunar loge logeu Ononio maṭit foṛia morigelo. Ar zera i goṭona hunlo tara hoḳoleu kub ḍoraigelo. ⁶Bade zuan oḳole aia tare ḳafon findaia bare nia maṭi dila.

⁷Onuman tin gonṭa bade tar bouo hono ailo, oile age kita goṭse tai zanto na. ⁸Teu Fitore taire zikaila, “Amare ḳo sain, tumra i zomin oto ṭeḳae besislae ni?” Tai ḳoilo, “Ji-oe oto ṭeḳaeu.” ⁹Ou Fitore ḳoila, “Mabudor ruhre forikka ḳorar lagi tumra ḳene eḳmot oilae? Deḳo, zera tumar zamaire dafon ḳorse tara oḳon dorozar samne aior, tara tumareo bare loia zaibo.” ¹⁰Loge logeu Safira Fitoror faot foṛia morigelo, ar ou zuan oḳole goro aia taire mora dekia bare nia zamair ḳandat maṭi dila. ¹¹Teu hokkol zomat, ar zoto manshe ita hunlo, hoḳoleu kub ḍorailo.

Sahabi oḳolor keramoti ḳam

¹²Sahabi oḳolor atane manshor maze bout muzeza ar keramoti nishana zair oito, tara hoḳole eḳ dil oia Baetul-Mukaddosor Sulaimanor barindat dola oita. ¹³Zudio manshe tarare ijjot ḳorta, ta-o ar ḳeu tarar loge mishte shaosh ḳorlo na. ¹⁴Ar dine dine bout beṭain-beṭinte iman ania Allar dolo hamanit lagla. ¹⁵Ar manshe bemari oḳolre bare ania fotor ḳandae ḳandae hutaia ar bisna fatia boaia toita, zate Fitore sola-firar shomoe ontoto tan seba ḳano tara ḳeuror ufre foṛe. ¹⁶Ar Zeruzalemor ḳanda-ḳasar gauain taki manshe tarar bemari oḳolre ar zinor asorala manshore loia aia biṛ zomaito, tara hokkolu bala oito.

Hokkol sahabire aṭok kora

¹⁷Ita dekia fordan imam ar tan logor Siddekia oḳol ingshae zoli-fuṛi uṭla, ¹⁸ar sahabi oḳolre doria shorḳari zelo haraila. ¹⁹Oile raitku Mabudor eḳzon firistae zelor duar kulia tarare bare ania ḳoila, ²⁰“Tumra zao, Baetul-Mukaddoso ubaia manshor gese noea zindegir ḳota ḳo.” ²¹Ita hunia tara kub shoḳale Baetul-Mukaddoso hamaia manshore nosiot ḳorat lagla. Ibae fordan imam ar tan logor hoḳole aia deshor fotua komiṭire ar Boni Israilor murobbi oḳolre ekkano dola ḳorla, ar sahabi oḳolre anar lagi zel ḳanat manush faṭaila. ²²Oile tara gia erare zel ḳanat faila na. Ou tara firia aia ḳobor ḳoila, ²³“Amra deḳsi, zelor doroza shokto ḳori lagail, ar duaro duaro faradar ubai roisoin, oile duar kulia bitre ḳeurore failam na.” ²⁴Ita hunia Baetul-Mukaddosor boṛo darogae ar boṛo imam oḳole beokuf oia sintat foṛla, er fol kita oibo. ²⁵Ermaze kunu eḳzone aia tarare ḳobor dilo, “Deḳoukka, afnara ze manshore zelo haraisla, tara Baetul-Mukaddoso ubaia manshore nosiot ḳorer.” ²⁶Teu boṛo darogae tan sifai dolre loia hono gia sahabi oḳolre doria anla, oile zur-zobordosti ḳorla na ḳaron tara ḍoraigela, manshe tarare fattordi marta faroin.

²⁷Bade sahabi oḳolre ania tara fotua komiṭir samne uba ḳoraila, ar fordan imame erare zikaila, ²⁸“Amra tumrare doṛaia hukum dislam, i name kunu nosiot na ḳorar lagi, ta-o asta Zeruzalem zuṛi tumrar talime boriliso, ar ou zonor kunor bar amrar ufre falaitae sairae.” ²⁹Teu Fitor ar tan logor sahabi oḳole zuaf dila, “Manshor hukum manar saite Allar hukum mana to forz. ³⁰Amrar baf-dadar Allae hou Isare murda taki zinda ḳorsoin, zenre afnara gaso loṭḳaia ḳatol ḳorsla, ³¹Allae tanre-u toraneala ar bashsha banaia nizor ḍain galat boibar ijjot dan ḳorsoin, zate tain Boni Israil oḳolre touba ḳorar shuzug, ar gunar mafi dita faroin. ³²Amra i hoḳoltar shakki, ar Allae tan nizor hukum manra bonda oḳolre ze Pak Ruh disoin, hou Pak Ruho er shakki.”

³³Ita hunia tara gusae aguin oigela, ar sahabi oḳolre zane marar lagi niot ḳorla. ³⁴Oile ou mozlis taki Gomoliel name Forishi mozobor eḳzon manush ubaila, tain eḳzon namḳora moulana asla, hokkole tanre ijjot ḳorto, tain sahabi oḳolre tuṛa bare neoar hukum dila. ³⁵Bade tain fotua komiṭir manshore ḳoila, “O Boni Israil oḳol, i manush oḳolre tumra zeta ḳortae sairae i befare hushiar o. ³⁶Huno, ou ḳoedin age Tuda name eḳzon manush aia kub boṛo-manshi deḳaisil, ar onuman sair-sho manush tar dolo hamaisil. Tare kun ḳora oilo, ar tar dolor hoḳol manush sairobae sitrigese, ḳeu dolo roise na. ³⁷Bade Galilor Ehuda aia deshor manush gononar bosor, eḳdol manshore tar dolo haraia fitna ḳaṛa ḳorlo, he-o morigelo, ar tar logor hokkolo sitrigese. ³⁸Ita dekia ami tumrare ḳoiram, tumra i manush oḳolre kunta ḳorio na, tarare saṛi deo, tarar ḳam-ḳaz ar niot zudi manush taki oe, te ita emneu binash oizibo. ³⁹Ar zudi Alla taki oe, te tumra tarare tamaitae fartae nae, ki zani heshe deḳa zaibo zen, tumrau Allar birudde jihad ḳorrae.” Gomolielor mate neta oḳol razi oila, ⁴⁰tara sahabi oḳolre ḳasat anaia singladi marla ar ḳoila, “Tumra Isar name kunta matio na.” Heshe tarare saṛi dila.

⁴¹Teu sahabi oḳole, Isar namor lagi beijjoti ḳamanir zuka oisoin gotike kushi oia furti ḳori ḳori mozlis taki baroia gela. ⁴²Sahabi oḳole forteḳ din Baetul-Mukaddoso ar baṛie baṛie gia nosiot ḳorta, ar Isau zen al-Mosi ikan toblig kora bad dita na.

Ehudia ar Shomoria elaḳat Isaei zomat (6:1–12:25)

Shat zon ḳadimdar

¹Hi shomoe ummot oḳolor foriman baṛteu asil, ar ummot oḳolor maze zeta Ihudi oḳole Iunani bashae matta, tara Ibrani bashae matra Ihudi oḳolor loge ḳaijja ḳorta lagla. Tara dush deḳaila, forteḳ din ḳani bilanir shomoe tarar ṛaṛi beṭinte kunta fain na. ²Teu hou barozon sahabie hoḳol ummotre eḳ zagat dola ḳoria ḳoila, “Amra Allar kalamor toblig bad dia, ḳana-finar befare besto oaḳan ṭik nae. ³Oile bai oḳol, tumrar maz taki oula shatzon shunamala manshore fosond ḳoro, zera Pak Ruhe ar hekmote fura kamiab ase, amra tarar ufre i ḳamor zimma dilaimu. ⁴Ar amra kalamor ḳezmot ar dua ḳorar ḳamo ḳaim roimu.” ⁵Teu hokkol manush shanti oila, tara Pak Ruh ar imane kamil Stifanre fosond ḳorla, tan loge Filif, Foḳor, Nikanor, Timun, Farmina ar Antiokia ṭaunor noea Ihudi Nikulaere basia nila. ⁶Bade tara ou shatzonre sahabi oḳolor gese loia aile, sahabi oḳole dua ḳoria tarar ufre at raḳla.

⁷Ar Allar kalam sitria sairobae fousigelo, teu Zeruzalemo ummotor foriman kub zoldi ḳori baṛto laglo, Ihudi imam oḳolor mazeo bout zone al-Mosir ufre iman anla.

Hozrot Stifanor halot

⁸Stifan Allar rohomot ar himmote kamil oia, manshor maze bout keramoti ar muzeza ḳam ḳorta lagla. ⁹Ihudir ze mosidre azad-oa gulam oḳolor mosid ḍaḳa oito, hou mosidor ḳoezon manush, kunu kunu Kurini, Alekzandria, Kilikia ar Asiya deshor kisu manshe Stifanor loge ḳaijja-torko ḳorat lagla. ¹⁰Oile Stifane Pak Ruhur bole kub aḳoldar manshor laḳan tarar loge matae, tara tan loge matia kulaito farsil na. ¹¹Teu tara ḳoezon baze manshore gush dia oḳan hikai dilo, “Tumra ḳoio, amra hunchi ou beṭae Hozrot Musa ar Allar birudde kufuri mat mater.” ¹²Ota ḳori tara manshore, murobbi oḳolre, ar alim shomazre Stifanor birudde bigṛailo, ar tanre zobordosti ḳori doria deshor fotua komiṭir samne bisaro anlo. ¹³Ar misa shakki oḳole ḳoila, “Ou beṭae hamesha Musar shoriotor birudde ar ou fobitro mukamor biruddeo mate. ¹⁴Amra hunchi he ḳor, hou Nasarotor Isae i Baetul-Mukaddos bangilibo ar Musa nobie amrar lagi ze shoriot toia gesoin, ita bodlailibo.” ¹⁵I shomoe zera fotua komiṭit boat asla tara hoḳole dian dori Stifanor bae saia deḳla, tan muk firistar mukor laḳan oigese.

Hozrot Stifanor aḳeri boean

¹Teu fordan imame Stifanre zikaila, “Ita kita hasau ni?” ²Stifane zuaf dila, “O bai oḳol, baba oḳol, hunoukka, amrar mul baf Ibrahim zebla Haran shohoro roar age Mesofotamiat asla, hou shomoe Allae tanre didar dia ḳoisla, ³‘Tumi tumar desh ar ḳesh-kuṭum saṛia roana deo, ami tumare ze desh deḳaimu hou desho zao.’ ⁴Ou tain Kolodio oḳolor Babil desh taki baroia, Haran shohoro boshot ḳorla; ar tan bafor moutor bade Allae tanre hon taki i desho anchoin, zeḳano afnara oḳon boshot ḳorra. ⁵Ta-o Allae ino Ibrahimre tan nizor bolte kuntau dila na, fao toibar zaga ḳano na, oile Allae tan loge oada ḳorla, tanre ar tan oarish oḳolre ou zominor malikana diba, zudio i shomoe Ibrahimor kunu aolad oisoin na. ⁶Allae tanre ḳoila, ‘Tumar aolad oḳol bidesho musafir roiba, manshe tararedi gulami ḳoraiba, ar sair-sho bosor tarar ufre zulum solbo.’ ⁷Allae eoḳano ḳoila, ‘Ze zatie tararedi gulami ḳoraiba, ami hi zatir bisar foesala ḳormu; bade tara hi desh taki baroia aia, ou zagat amar ebadot ḳorba.’ ⁸Allae tanre mosolmani ḳorar hukum dila; heshe Ibrahimor fua Isʼhakor zonom oilo, ar tain aṭ dinor din tar mosolmani ḳoraila. Bade Isʼhake Iakubre, ar Iakube tan fuain baro ḳandanor barozon bafor mosolmani ḳoraila.

⁹“Hou ḳandanor baf oḳole ingsha ḳoria Iusufre besilaile, tanre Mishor desho neoa oilo. Oile Alla Iusufor loge loge asla, ¹⁰tain Iusufre hoḳol toklif taki hefazot ḳorla, Mishoror bashsha Feraunor nozoro doya ar kamiabi dan ḳorla; teu Feraune tanre Mishoror hakim ar asta razbaṛir deḳa-hunar bar dila. ¹¹Bade fura Mishor ar Kenan desho nidan deḳa dilo erlagi manshor kub durgoti oisil, ar amrar baf-dada oḳolo ḳanir obabo foṛla. ¹²Oile Mishoro foshol ase hunia, Iakube amrar baf-dada oḳolre foela bar hikano faṭaila. ¹³Bade dusrabaror bala Iusufe tan baiainre zanaila tain ḳe, ar Feraune Iusufor foribaror sin faila. ¹⁴Iusufe tan baba Iakub ar nizor ḳesh-kuṭum milaia hokkoltae fosottoir zonre ḳobordi anaila. ¹⁵Iakub Mishoro aila, heshe tain ar amrar baf-dada oḳolo mara gela. ¹⁶Tarar lash Shikimo ania ḳoebor deoa oilo, i ḳobrostan Ibrahime Shikim shohoror Homuror ḳandanor ges taki rufar ṭeḳa dia ḳorid ḳorsla.

¹⁷“Ibrahimor gese Allae zeta oada ḳorsila, hi oada furon oar shomoe zebla ḳasai gelo, i shomoe Mishoro amrar manshor foriman bout oigese. ¹⁸Heshe Mishoro eḳ noea bashsha oila, ein Iusufor befare kunta zanta na. ¹⁹Hi bashshae amrar manshore ṭogaita ar amrar baf-dada oḳolor ufre kub zulum ḳorta, tan niot asil erar huruttain zonmor badeu zate bare falai deoa oe, ar tara mori zain. ²⁰Hou shomoe Hozrot Musar zonom oilo, Allar nozoro tain kub shundor asla. Tin mash forzonto tain tan ma-bafor baṛit asla. ²¹Bade tanre bare falai deoa oile, Feraunor fuṛie tanre nia nizor fua banaia falia boṛo ḳorla. ²²Musa Mishorie ilim ar adob-ḳaislote boṛo oila, tain ḳotae ar ḳame himmoti asla. ²³Bade Musar boeosh zebla sallish bosor oilo, ou tan dilor maze nizor Boni Israili bai oḳolre deḳa-huna ḳorar kial oilo. ²⁴Tain baroia deḳla, eḳzon Mishorie eḳ Israilir ufre zulum ḳorer, tain hou Israilire shaijjo ḳorat gela, ar Mishorire ḳatol ḳoria er bodla loila. ²⁵Musae mone ḳorsila tan zatir manshe buzba zen, Allae tanre diau tarare uddar ḳorba; oile tara ita buzla na. ²⁶Bador din Musae duizon Israilire mair ḳorat dekia, tarare mil-mish ḳorar niote ḳoila, ‘Oi tumra to bai bai, te tumra ḳene eḳzon aroḳzonor loge mara-mari ḳorrae?’ ²⁷Oile ze manshe bad bebohar ḳorat asil, he Musare ṭela mari falaia ḳoilo, ‘Oba, tumare ḳegie amrar ufre salish ar hakim banaise? ²⁸Ḳail zela hou Mishorire kun ḳorso, amareo ola ḳortae sao ni?’ ²⁹Ikan hunia-u Musae bagia Madian desho gelagi, ar hikano tan dui fuar zonom oilo.

³⁰“Bade aro sallish boros guzori gele, Tur faṛor ḳandat morubumit, aguin zalail zonglar maz tone eḳ firistae Musare doroshon dila. ³¹Musae ita dekia ekkere taijjub bonigela, ar bala ḳori deḳar niote ḳandat zaira, ou shomoe Mabudor aoaz hunla, ³²‘Ami tumar baf-dadar Alla, Ibrahim, Isʼhak ar Iakubor Alla.’ Teu Musae ḍoraia ḳafa shuru ḳorla, ar bala ḳori deḳar shaosh faila na. ³³Mabude tanre ḳoila, ‘Tumar faor zuta kulilao, ḳaron tumi zeno ubaiso ikan pak zaga. ³⁴Huno, ami Mishor desho amar proza oḳolor toklif deḳsi, ami tarar ahazari hunchi, tarare uddar ḳorar lagi lamia aisi, oḳon ami tumare Mishor desho firot faṭaimu.’

³⁵“Ein hou Musa, zare Israili oḳole ou ḳota ḳoia firot disil, ḳe tumare salish ar hakim banaise? Tanreu Allar ze firistae zonglar maze deḳa disla, hou firistar atane Boni Israilor salish ar toraneala banaia faṭaila. ³⁶Ar ou Musaeu Mishoror Nil doria ar morubumit sallish boros bout keramoti ar muzeza ḳam ḳoria, Mishor desh taki Israili oḳolre bar ḳori ansla.

³⁷“Ein hou Musa, zein Boni Israilre ḳoisla, Allae tumrar lagi tumrar nizor manush taki, amar laḳan eḳzon nobire beziba. ³⁸Ou Musau to morubumit amrar baf-dada Boni Israilor loge asla. Ar ze firistae Tur faṛo batchit ḳorsila, ou Musar logeu tain matisla. Ar amrare dibar lagi zinda-kalam ou Musar gese-u deoa oisil.

³⁹“Oile amrar baf-dada oḳole Musar hukum manta saila na, tara Musare horai toia mone mone hirbar Mishoror bae niot ḳoria Harunre ḳoila, ⁴⁰‘Amrare fot sinaia loia zaoar lagi devta banai deukka. Ḳaron ze Musae Mishor desh taki amrare bar ḳori anchoin, tan dosha kita oise, amra to zani na.’ ⁴¹Ou shomoe tara gorur basuror laḳan eḳ murti banaila, ar ou murtir name boli dila, nizor ator banail murtire loia tara furti-amud ḳorla. ⁴²Oile Allae naraz oia tarar log saṛi dila, ar tarare asmanor san-shuruz, terar fuzat buṛai toila; zela nobi oḳolor kitabo leḳsoin:

O Israil zati, morubumit hi sallish boros,

tumra amar name kunu foshu kurbani dislae ni?

⁴³Na, tumra to Mulok devtar murti,

ar Rifon devtar tera banai ḳando loia gurso.

Hou duio futul to fuza ḳorar niote banaislae,

erlagi ami tumrare Babil deshor hofaro bonobash dimu.

⁴⁴Te shahadot tambur kaba shorif morubumit amrar baf-dadaintor gese asil. Tain Musare hukum disla, tumi zelaḳan noḳsha deḳlae, ou laḳan ḳori iṭa tiar ḳoro. ⁴⁵Amrar baf-dada oḳole hi kaba shorif faia, tarar amir Iusar atane nizor loge ḳori amrar i desho anchila, tara zebla hi desho hamaisil i shomoe Allae tarar samon taki hinor manshore ḳedai disla. Hi tambu Hozrot Daudor amol forzonto ou desho asil.

⁴⁶“Daude Allar rohomot hasil ḳorsila, ar Iakubor Allar name ekkan gor banaibar arzi ḳorsla. ⁴⁷Oile Hozrot Sulaimane tan lagi hi gor banaisla. ⁴⁸Ta-o Allatala to manshor ator banail goro boshot ḳoroin na; zela nobie ḳoisoin, ⁴⁹Mabude ḳoin,

Behest amar toḳt,

dunia amar fao toibar zaga,

tumra amar lagi kizat gor banaibae?

Amar ziranir zaga kuai?

⁵⁰I hokkolta kita amar nizor ate

banaisi na ni?

⁵¹“O gaṛteṛar zat! Ḳan ar dilor mosolmani na ḳorail zat! Tumra hamesha Pak Ruhur duar bond ḳori to. Tumrar baf-dadain zela asla, tumrao oula oiso. ⁵²Tumrar baf-dadainte kun nobir ufre zulum ḳorsoin na? Tara to hou nobi oḳolre ḳatolo ḳorse, zera age i dindar zon aibar ḳota elan ḳorsoin. Ou dindar zonre oḳon tumrao dushmonor ato shofia ḳatol ḳoraiso. ⁵³Firista oḳolor mazdi nazil oa shoriot tumrare deoa oisil, oile ita amol ḳorso na.”

Foela shohid Hozrot Stifan

⁵⁴Ita hunia-u tara gusae aguin oigela, ar dat kiṛi-miṛi ḳora dorla. ⁵⁵Oile Stifane Pak Ruhe kamil oia behestor bae dian dori saia Allar shan-tozolli deḳla, ar Isare Allar ḍain bazut uba deḳla. ⁵⁶Teu tain ḳoila “Deḳoukka, ami deḳram behest kula ase, ar Isa Bin-Adom Allar ḍaine ubai roisoin.” ⁵⁷Ar tara ḳano angul dia eḳloge sillaia Stifanor ufre uṛia gia foṛla. ⁵⁸Tanre ṭania shohoror bare nia fattor marat lagla; ar badi oḳole zarzir ḳafoṛ kulia Shoul namor eḳ zuanor faor ḳandat toila. ⁵⁹Manshe zebla Stifanre fattor marra, ou shomoe tain dua ḳoria ḳoila, “O malik Isa, amar ruhre ḳobul ḳoroukka.” ⁶⁰Ḳoiau tain aṭu gala dia zure sillaia ḳoila, “Malik, erar i gunare amolo dorio na.” Oḳan ḳoiau tain aḳeri dom saṛi dila.

Ar Shoule hono Stifanor kunor hukumor loge shae dila.

Zomator ufre zulum

¹Hidin taki Zeruzalemor zomator ufre kub zulum-mosibot ḳaṛa oilo, erlagi ḳali sahabi oḳol bade ar hoḳoleu Ehudia ar Shomoria elaḳar zagae zagae sitri gela. ²Ḳoezone milia allaraia manush Stifanre dafon ḳorla ar tan lagi bout ahazari ḳorla. ³Oile Shoule zomatre binash ḳorar niote, goro goro hamaia imandar beṭain-beṭinre bondi ḳori ṭania sesṛaia zel ḳanat haranit lagla.

Shomoriat Hozrot Filifor toblig

⁴Teu zera sairobae sitri gesil, tara hokkol zagat guri guri Injilor kush-ḳobri toblig korla. ⁵Ar Filif Shomoriar eḳ shohoro gia al-Mosir befare toblig korla. ⁶Manshe Filifor boean hunia ar tan keramoti ḳam oḳol dekia, dian dori eḳ dile tan nosiot hunla. ⁷Ḳaron boutor ges taki but oḳol zure zure sillaia saṛia gelo, ar bout ordong bemari ar lengṛa oḳol bala oila. ⁸Ita dekia hi shohoror manush kub kushi oila.

⁹Oile hikano Saimon namor eḳzon manshe bout din dori zadu-ṭunar ḳam ḳorto, Shomoriar manshore danda lagaia he nizore eḳzon kamil fir ḳoia dabi ḳorto. ¹⁰Ar huru-boṛo hoḳole tar ḳotar dam dito, manshe ḳoito, Allar ze kudrotre ḳas kudrot ḳoin, i beṭa oilo hou ḳas kudroti beṭa. ¹¹Mansheo tar ḳota moto solto ḳaron bout din dori he tar zadu-ṭuna deḳaia tarare taijjub banaisil. ¹²Oile Filife zebla Allar bashshai ar Isa al-Mosir befare kush-ḳobri toblig korla, ar manshe tan toblige iman anla, i shomoe beṭain-beṭinte aia toubar gusol ḳorla. ¹³Hou Saimono iman ania toubar gusol ḳoria Filifor ḳore ḳore roila, bout keramoti ar boṛo boṛo kudroti ḳam hasil or dekia taijjub oigela.

¹⁴Zeruzalemor sahabi oḳole zebla hunla, Shomoriar manush oḳole Allar kalamor ufre iman anchoin, teu tara Fitor ar Hannanre erar gese faṭaila. ¹⁵Fitor ar Hannan aia tarar lagi dua ḳorla, zate tara Pak Ruhu fain. ¹⁶Ḳaron oḳono tarar ufre Pak Ruhu nazil oise na, tara ḳali Hozrot Isar name toubar gusol ḳorsoin. ¹⁷Fitor ar Hannane tarar ufre at raḳla, teu tara Pak Ruhu faila. ¹⁸Ar Saimone zebla deḳla, sahabi oḳolor at raḳar ḳarone Pak Ruhu miler, ou tain ṭeḳa ania erar gese dia ḳoila, ¹⁹“Amareo ou ḳemota deukka, zate ami ḳeuror ufre at raḳle he-o ou Pak Ruhu fae.” ²⁰Fitore tare ḳoila, “Tumar rufa tumar logeu binash ouk, tumi mono ḳorso Allar dan ṭeḳadi ḳorid ḳora zae. ²¹Amrar i ḳamo tumar kunu bag nai, ḳaron Allar nozoro tumar dil shorol nae. ²²Erlagi i nazaiz ḳam taki tumar dil firao. Ar Allar gese minot-ḳajji ḳoro, kiba tumar dilor i nazaiz kial tain maf ḳorilta faroin. ²³Ami deḳram, tumar dil lifshae bora ar tumi gunar maze bondi oiroiso.” ²⁴Teu Saimone ḳoila, “Afnara Allar gese amar lagi dua ḳoroukka, zate afnara zeta zeta ḳoisoin ita zanu amar ufre na ae.” ²⁵Bade Fitor ar Hannane malikor kalam toblig koria Zeruzalemo firot zaoar foto, Shomoriar bout gaut kush-ḳobri toblig kori ḳori gela.

Hozrot Filif ar raz ḳazanchi

²⁶Eḳdin Allar eḳ firistae Hozrot Filifre ḳoila, “Uṭo, douknor ze fot Zeruzalem taki Gaza ṭaunor bae gese hou fote roana deo.” I fot asil morubumit. ²⁷Teu Filif uṭia hobae roana dila, zaite zaite foto Itiofia deshor Kandaki ranir eḳzon boṛo raz ḳazanchir loge tan mulaḳat oilo, hi ḳazanchi asla na-mord, ar ranir hokkol don-rotnor zimmadar. Allar ebadot-bondegi ḳorar lagi ein Zeruzalemo aisla. ²⁸Bade baṛit zaoar bala foto tan nizor guṛar garit boia Ishaea nobir kitab tilaot ḳorat asla. ²⁹Ou shomoe Pak Ruhe Filifre ḳoila, “Ou garir ḳandat zao, ar en loge log doro.” ³⁰Teu Filife douṛia ou garir ḳandat gia hunla, ein Ishaea nobir kitab tilaot ḳorra; Filife tanre zikaila, “Afne zeta tilaot ḳorra itar mani buzra ni?” ³¹Hein ḳoila, “Ḳeu buzaia na dile ami ḳemne buzmu?” Ou tain Filifre garit uṭia tan ḳandat boar lagi minot ḳorla. ³²Hein kitabor ze aeat tilaot ḳorat asla, ita oilo,

Zobo ḳorar lagi meṛare zela nein,

marar niote tanre oula neoa oilo,

ruma ḳaṭrar samne meṛar baichcha zela nirai roe,

oula taino zoban kulla na.

³³Tain beijjot oila,

tanre be-insaf ḳora oilo.

Tan oarishor ḳota ḳegie ḳoito farbo?

Tan zanre dunia taki ḳaṛia neoa oisil.

³⁴Hou ḳazanchie Filifre ḳoila, “Ḳoukka sain, nobie ḳar befare ita ḳoisoin? Nizor befare na ar ḳeuror?” ³⁵Filife zoban kulia pak kalamor ou aeat taki loia Isar kush-ḳobri forzonto tan gese toblig korla. ^36-37Foto zaite zaite tara faniala eḳ zagat aia fousla, teu hi ḳazanchie ḳoila, “Ou deḳoukka ono fani ase, te ami toubar gusol ḳorte kunu bada ase ni?” ³⁸Ḳoia tain guṛar gari uba ḳorar hukum dila, Filif ar hou na-mord ḳazanchi duiozon fanit lamla, ar Filife tanre toubar gusol ḳoraila. ³⁹Tara zebla fani taki uṭia aila, ou shomoe Mabudor ruhe aḳtau Filifre aoṛe nilagi. Hi na-morde ar Filifre deḳla na, teu tain furti ḳori ḳori tan nizor fote gelagi. ⁴⁰Oile Filifre Ashdud ṭauno deḳa millo; tain gaue gaue kush-ḳobri toblig kori ḳori heshe Ḳoisoria shohoro gela.

Zalim Shoulor dil bodlani

^1-2I shomoyo Shoule al-Mosir ummot oḳolre ḳatol ḳorta ḳori ḍor deḳanit roisoin. Ar Damesk shohoror Ihudir mosidainto deoar lagi tain fordan imamor ges taki siṭi saila, zoto beṭain-beṭin Isar fote soloin, tarare bandia Zeruzalemo anta ou ḳemota faoar lagi siṭi saila. ³Foto zaite zaite zebla Damesk ṭaunor ḳandat aila, teu aḳtau asman taki tan sairo galabae for oia somḳaia uṭlo. ⁴Ou tain maṭit foṛigela ar gaibi aoaz hunla, ḳe zanu tanre ḳor, “Shoul, Shoul, ḳene amare zulum ḳorrae?” ⁵Shoule zikaila, “Malik, afne ḳe?” Tain ḳoila, “Ami Isa, zenre tumi zulum ḳorrae. ⁶Tumi oḳon uṭia shohoro zao, tumi kita ḳortae tumare zanail oibo.” ⁷Oile zera Shoulor loge zaoat asla tara somki gela, tara i aoaz ṭiku hunchila, oile ḳeurore deḳla na. ⁸Bade Shoul maṭi taki uṭla, ar souk melia harle kuntau deḳla na; tan logor manshe tanre ato doria Damesko loia gela. ⁹Shoule tin din dori souke kuntau deḳla na ar kunuzat ḳana-finao ḳaila na.

¹⁰Damesk shohoro Ononio name eḳzon mumin asla, ¹¹Mabude tanre doroshon dia ḳoila, “Ononio!” Tain zuaf dila, “Malik, ounu ami.” Mabude tanre ḳoila, “Shuza namor ze soṛok ase, tumi hou soṛoke zao, gia honor Ehudar baṛit Tarsho shohoror Shoul namor eḳzon manshor tallash ḳoro. ¹²Hono he dua ḳorer, ar he doroshon faise, Ononio namor eḳzon manush aia tar shoril ataia dibo, teu he hirbar souke deḳbo.” ¹³Ononioe ḳoila, “Malik, ami bout manshor gese i manushgur ḳaislot hunchi, he Zeruzalemo tumar pak bonda oḳolor ufre bout zulum ḳorse. ¹⁴Ar ou zagato zoto manshe tumar fote sole, erare bandia neoar ḳemota he boṛo imam oḳolor ges taki faise.” ¹⁵Oile malike tanre ḳoila, “Tumi zao, ḳaron o-Ihudi oḳol, tarar raza oḳol, ar Boni Israilor gese amar nam tobligor lagi ami tare fosond ḳorsi. ¹⁶Ami tare deḳaimu, amar namor lagi tare ḳoto zala-zontrona shoijjo ḳora lagbo.” ¹⁷Teu Ononio baroia hou baṛit gia hamaila, ar Shoulor gotro at dia ḳoila, “Bai Shoul, ono aoar foto zein tumare doroshon disoin tain Hozrot Isa, tain amare faṭaisoin, zate tumi hirbar souke deḳtae fao ar Pak Ruhe kamil o.” ¹⁸Ar loge logeu tan souk taki masor-foiror laḳan kita foṛigelo, tain deḳta farla ar uṭia fanit gia toubar gusol ḳorla; ¹⁹ḳaoa-daoar bade shorilo hirbar bol faila.

Ar tain kisudin Dameskor ummot oḳolor loge roila. ²⁰Shoule ar deri ḳorla na, tain zagae zagae mosidainto gia toblig korat lagla, Hozrot Isau Allar hou ḳas maear zon, Ibnulla. ²¹Zera tan boean hunto tara hoḳoleu taijjub oia mata-mati ḳorto, “Ein hou manush nae ni zein Zeruzalemo Isar ummot oḳolre zulum ḳorta? Ar ono-o to otar lagiu aisoin, zera Isar fote sole tarare bandia boṛo imam oḳolor gese loia zaita?” ²²Oile Shoul din din aro himmotala oila, ar Dameskor Ihudi oḳolre la-zuaf banaita lagla, tain forman deḳaila, ou Isau hi al-Mosi.

²³Er bout bade Ihudi oḳole tanre marar lagi solla-foramish ḳorla, ²⁴ar Shoule i ḳobor faila. Tara tanre marar lagi shohoro hamani baronir hokkol duaro dine-raite sokidar boaila. ²⁵Eḳdin rait ummot oḳole Shoulre eḳ ṭukrir bitre haraia, baunḍori oalor kiṛkibae far ḳori bare lamaia dila.

Hozrot Shoul Zeruzalemo aila

²⁶Bade tain Zeruzalemo aia ummot oḳolor loge shorik oita saila; oile hokkole tanre ḍorailo, tain zen hasau iman anchoin tara bishash ḳorla na. ²⁷Teu Barnabase tanre ato doria sahabi oḳolor gese loia gela, ar Damesko zaoar foto kila tain al-Mosir didar faila, ar kila malike tan loge batchit ḳorla, Damesko kila tain shaosh ḳori Isar name toblig korsoin hoḳolta erare zanaila. ²⁸Bade Shoul Zeruzalemo erar loge loge roita, tain Zeruzalemor hoḳol zagat guria firia shaosh ḳori Isar name toblig korta. ²⁹Tain Iunani bashae matra Ihudi oḳolor loge dini batchit ar torko ḳorta; Ihudi oḳole tanre zane marilita saila. ³⁰Mumin oḳole i ḳobor hunia tanre Ḳoisoria shohoro loia gela, hon taki tanre Tarsho shohoro faṭai dila. ³¹Hi shomoe Ehudia, Galil ar Shomoria elaḳar zomat oḳol shantir maze toiar oilo, i zomat oḳol Mabudor ḍore ar Pak Ruhur isharae soli soli bout forimane baṛlo.

Hozrot Fitoror sofor ar keramoti

³²Fitore hokkol zagat gurte gurte Ludda gaur mumin oḳolor gese aia azila. ³³Hou gaut Oinio name eḳzon manush asil; he ordong bemare aṭ boros dori bisnat foṛono asil. ³⁴Fitore tare dekia ḳoila, “Oinio, Isa al-Mosi tumare bala ḳorla, uṭo, tumar bisna tulilao.” Ar loge logeu Oinio uṭia ubai gelo. ³⁵Teu Ludda gau ar Sharun elaḳar hoḳol manshe Oinior halot dekia Allar bae firla.

³⁶Zafa shohoro Ṭabita name eḳzon mumin beṭi asla, Iunani bashae Ṭabita namor orto Dorka, mani horini, tain hoḳol shomoe bala ḳam ḳorta ar goribre shaijjo ḳorta. ³⁷Tain bemar foṛia mara gela, ar manshe tanre gusol deoaia uforor kuṭat nia toila. ³⁸Zafa shohor Luddar ḳasat asil gotike, ummot oḳole zebla hunla, Fitor Luddat asoin, ou tara duizon manshore tan gese faṭaia minot ḳorla, “Afne zoldi ḳori amrar gese aukka.” ³⁹Teu Fitor tarar loge roana dila, tain hono zaoar bade tara tanre uforor kuṭat loia gelo, hoḳol ṛaṛi beṭinte Fitoror sairobae ubaia ḳandon shuru ḳorla ar Dorka zita taḳte zeta ḳafoṛ-sufoṛ banaisla, ota Fitorre deḳaila. ⁴⁰Fitore tara hokkolre kuṭa taki bar ḳori dia zanu faṛia dua ḳorla; bade mora beṭir lashor bae firia ḳoila, “Ṭabita, uṭo.” Loge loge Dorkae souk kulla, ar Fitorre dekia uṭia boila. ⁴¹Fitore tan ato doria uba ḳorla, bade hi ṛaṛi beṭin ar mumin oḳolre ḍakia deḳaila, Dorka zita oisoin. ⁴²I ḳobor Zafa shohoror hoḳol zagat uṛigelo ar bout manshe al-Mosir ufre iman anla. ⁴³Fitor bout din Zafa shohoro Saimon namor eḳ samaror baṛit roila.

Subedar Kornilus ar Hozrot Fitoror doroshon

¹Ḳoisoria shohoro Kornilus name eḳzon manush, Itali namor sifai dolor subedar asla. ²Tain eḳzon forezgar manush, tan foribaror hoḳoleo Allare ḍoraita. Tain gorib oḳolre bout ṭeḳa-foesha dan-ḳoerat ar hamesha Allar gese dua ḳorta. ³Eḳdin onuman tinṭar shomoe tain eḳ saf doroshon faila. Deḳla, Allar eḳ firistae tan gese aia ḍakira, “Kornilus!” ⁴Korniluse ḍoraia hi firistar bae saia ḳoila, “Malik, ḳoukka, hunram.” Firistae tanre ḳoila, “Tumar munazat ar gorib oḳolre danor ḳota behesto fousise ar Allae ita ḳobul ḳorsoin. ⁵Oḳon tumi Zafa shohoro manush faṭao, ar Saimon urfe Fitorre tallash ḳorai anao. ⁶Ein doriar faro aroḳ Saimonor baṛit taḳoin, hi Saimone samṛar ḳarbar ḳore.” ⁷Ze firistae Kornilusor loge batchit ḳorsila, tain zaoar bade Korniluse tan baṛir duizon ḳamla ar tan shaijjoḳari eḳzon forezgar sifaire ḍaḳ dila. ⁸Tain erare hoḳolta buzai dia Zafa shohoro faṭaila.

⁹Bador din zebla hou manush oḳol zaite zaite Zafa shohoror ḳasat aila, i shomoe beil onuman duifor, Fitore dua ḳorar lagi hou shomoe sato uṭsoin. ¹⁰Tan kub buk lagsil, teu kunta ḳaita saila ar manshe ḳani tiar ḳorra, ou shomoe gume tan ungani ailo. ¹¹Ou haloto tain deḳla, asman kuligese ar kub boṛo saddoror laḳan eḳ sizor sair kunat doria duniat lamai deoa or; ¹²ar i saddoror maze duniar hokkol zator foshu, buke solra zandar ar fakin ase. ¹³Bade tain ou aoaz hunla, ḳe zanu tanre ḳor, Fitor, uṭo, maria ḳao. ¹⁴Fitore ḳoila, na, na, malik, kunumonte-u na, ami kunu shomoe-u nafaḳ ar haram kunta ḳai na. ¹⁵Tain hirbar ou aoaz hunla, Allae zeta halal ḳorsoin, itare tumi haram ḳoio na. ¹⁶Oula tinbar oar bade hou saddorḳan asmano tulia nilagi.

¹⁷Fitore ze batuni doroshon deḳla, er mani kita oito fare tain dian ḳorra, ou shomoe Kornilusor faṭail hi manush oḳol Saimonor baṛi tukaia faia, baṛir duaror samne aia ubaila. ¹⁸Tara ḍakia zikaila, “Saimon zenre Fitor ḳoia ḍaḳoin, tain ikano asoin ni?” ¹⁹Fitore hou doroshonor ḳota sinta ḳorra, ou shomoe Pak Ruhe tanre ḳoila, “Deḳo, tinzon manshe tumare tukanit aisoin. ²⁰Tumi lamat lamo ar tarar loge roana deo, kunu shondoe ḳorio na, tarare amiu faṭaisi.” ²¹Teu Fitor lamia gia tarare ḳoila, “Afnara zare tukaira amiu hein; ḳoukka sain, kitallagi aisoin?” ²²Tara ḳoila, “Sho-sifair subedar Korniluse Allar firistar hukum faia amrare faṭaisoin, tain eḳzon forezgar manush, Allar hukum mafik soloin, Ihudi oḳole tanre kub tazim ḳoroin. Firistae tanre ḳoisoin, zate afnare tan baṛit neoaia afnar nosiot hunoin.” ²³Ou Fitore tarare bitre ḍakia nia, tarar memandari ḳorla.

Bador din uṭia Fitor tarar loge roana dila, ar Zafa shohoror ḳoezon imandaro tan loge gela. ²⁴Er bador din tara Ḳoisoriat fousla; ou shomoe Korniluse tan ḳesh-kuṭum ar bondu-bandob oḳolre dola ḳoria tarar bar saira. ²⁵Ar Fitor gia zebla goro hamaila, i shomoe Korniluse tan ḳasat gia faot foṛia soizda ḳorla. ²⁶Oile Fitore tanre tulia ḳoila, “Uṭoukka, ami nizeo to eḳzon manush.” ²⁷Bade Kornilusor loge mati mati bitre hamaia Fitore deḳla, bout manush dola oiroise. ²⁸Ou tain ḳoila, “Afnara to zanoin, eḳzon Ihudi manshe kunu o-Ihudir ḳasat zaoa ba mila-misha ḳora amrar shoriotor nazaiz. Oile Allae amare deḳaisoin zen, kunu manshore nafaḳ ba ofobitro ḳoa amar lagi nazaiz. ²⁹Erlagi afnara zebla amare ḳobor disoin, te ami kunu omot na ḳoria-u aisi. Oḳon ami afnarare zikairam, amare kitallagi anaisoin?”

³⁰Korniluse zuaf dila, “Aiz taki sair din age omon bala mani tinṭar shomoe ami amar goro dua ḳorat aslam, ou shomoe somḳail ḳafoṛ finda eḳ beṭa manush amar samne aia ubaila, ³¹tain ḳoila, Kornilus, Allae tumar dua ḳobul ḳorsoin. Ar tumar dan-ḳoerato ḳobul ḳorsoin. ³²Oḳon tumi Zafa shohoro manush faṭao ar Saimon urfe Fitorre anao. Tain doriar faro Saimon namor eḳ samṛar ḳarbarir baṛit asoin. ³³Erlagi ami zoldi ḳori afnare anat manush faṭailam. Afne toshrif anchoin dekia kub kushi oilam. Oḳon amra hoḳol Allar samne azir asi, Allae afnare zeta hukum ḳorsoin, amra hokkolta zanmu.”

Bidormir dilo Hozrot Fitoror nosiotor fol

³⁴Teu Fitore zoban kulia ḳoila, “Ami oḳon hasaror buzlam, Allar nozoro hoḳolu homan. ³⁵Hoḳol zatir maze zera tanre ḍorae ar tan hukum mania sole, tarare tain ḳobul ḳoroin. ³⁶Afnara to zanoin, tain Boni Israilor gese kushir ekkan ḳobor zanaisoin. Hozrot Isa al-Mosi, zein hoḳolor malik, tan usillae shanti faoa zae. ³⁷Manshor lagi toubar gusol ḳora zorur, Ehiae ikan toblig korar badeu Galil taki asta Ehudia zuṛi zeta goṭsil, ita hoḳolta-u afnara hunchoin. ³⁸Allae Nasarotor Isare Pak Ruhu ar kudrote kila ḳas ḳolifa banaisla; tain bala ḳam ḳori ḳori sofor ḳorta, ar zine dora bemari oḳolre bala ḳorta, Alla Pak to tan loge asla. ³⁹Tain Ihudi oḳolor zomino ar Zeruzalemo zeta ḳorsila, amra ita hoḳoltar shakki; ar manshe tanre gaso loṭḳaia marlo. ⁴⁰Allae tanre tin din bade zinda ḳori uṭaila, ar mansheo tanre deḳla. ⁴¹Ta-o hokkole tane deḳar nosib oise na, ḳali Allae zerare age fosond ḳorsila, hou shakki oḳolre, mani amrare deḳaila, ar murda taki tain zinda oia uṭar bade amra tan loge ḳana-finao ḳaisi. ⁴²Tain amrare hukum disoin, amra zanu Ihudi oḳolor gese toblig kori ar shakki dei zen, tanre-u Allae zinda ar murda oḳolor hakim banai faṭaisoin. ⁴³Hoḳol nobieo tan befare oula shakki disoin zen, zera tan ufre iman ane, tara hoḳoleu tan namor usillae gunar mafi fae.”

⁴⁴Fitore boean ḳorra, i shomoe zera tan boean hunat asil, tara hoḳolor ufre Allai Pak Ruh nazil oilo. ⁴⁵Ar Fitoror loge oia mosolmani ḳorail zeta imandar oḳol aisla, tara ita dekia somkia uṭla, ḳaron o-Ihudi oḳolor ufreo Pak Ruh borshisoin. ⁴⁶Tara deḳla, ou o-Ihudi oḳole nanan gaibi bashae matira, ar Allar tarif ḳorra. ⁴⁷Teu Fitore ḳoila, “Ou zeta manshe amrar laḳan Pak Ruh hasil ḳorsoin, era fanit toubar gusol ḳorte kita ḳeu bada dito farbo ni?” ⁴⁸Bade tain erare Isa al-Mosir name toubar gusol ḳorar hukum dila. Ar tara Fitorre minot ḳorla, tarar gese ḳoeḳan din roar lagi.

Zeruzalemo Hozrot Fitor

¹Bade sahabi oḳole ar Ehudia zilar hokkol mumin baiainte hunla, o-Ihudi oḳoleo Allar kalamor ufre iman anchoin. ²Erlagi Fitor zebla Zeruzalemo aila, i shomoe mosolmani ḳorail imandar oḳole tane dushi shaibosto ḳoria ḳoila, ³“Afne to mosolmani na ḳorail manshor goro hamaisoin, ar tarar loge ḳanao ḳaisoin.” ⁴Teu Fitore foela taki zeta zeta goṭsil, tarar gese eḳ ek kori buzaia ḳoila, ⁵“Ami Zafa shohoro dua ḳorat aslam, omon shomoe Pak Ruhur doroshon failam, ami deḳlam, asman taki boṛo saddoror laḳan ekkan sizor sair kunat doria amar gese lamaia deoa or. ⁶Ami dian dori saia sintat foṛigelam, ar deḳlam, ermaze hoḳol zator foshu, faki, zongli zanuar ar buke solra zandar oḳol asoin. ⁷Bade eḳ aoaz hunlam, Fitor, uṭo, maria ḳao. ⁸Ami ḳoilam, na, na malik, kunumonte-u na, nafaḳ ba haram kunta ami kunudin muko disi na. ⁹Bade dusrabar asman taki ou aoaz hunlam, Allae zeta halal ḳorsoin, tumi itare haram ḳoio na. ¹⁰Oula tinbar ḳoar bade hoḳolta asmano tulia neoa oilo. ¹¹Ar er loge logeu, ami ze baṛit aslam ou baṛit aia tinzon manush hamailo, tarare Ḳoisoria taki faṭail oisil. ¹²Teu Pak Ruhe amare ḳoila, kunu shondoe na ḳoria tarar loge oia zaoar lagi. Ar ou soezon baio amar loge gesla. Bade amra ou o-Ihudir baṛit hamailam. ¹³Tain kila tan baṛit eḳzon firistar doroshon faisla ita amrare hunaila. Hou firistae to tanre ḳoisla, Saimon urfe Fitorre anar lagi Zafa shohoro manush faṭao. ¹⁴He tumare oula nosiot ḳorbo, zeta mania tumi ar tumar foribaror hoḳole nazat faibae. ¹⁵Ar ami boean shuru ḳorar bade, Pak Ruhu foela zela amrar ufre aisla, ekkere oula tarar ufreo aila. ¹⁶Ougi al-Mosir talim amar mono oilo, tain ḳoisla, Ehiae toubar gusol ḳoraisoin fanit, ar tumrar gusol oibo Pak Ruhe. ¹⁷Te bai oḳol, Isa al-Mosir ufre iman anae Allae amrare zela dan disoin, hou eḳoi dan zebla tarareo dila, te ami aroḳzon ḳe, Allare na ḳortam?” ¹⁸Ikan hunar bade Ehudiar imandar oḳole ar kunu afotti na ḳoria, Allar tarif ḳora dorla, tara ḳoila, “Te Allae o-Ihudi oḳolreo guna taki mon bodlaia, zindegi faoar tofik disoin.”

Antiokiat foela Isaei ufadi

¹⁹Stifanor moutor goṭonar bade zeta imandar oḳol zulumor lagi sitri gesla, tara Foinikia, Saipras ar Antiokia forzonto gia ḳali Ihudi oḳolor gese Allar kalam toblig korla. ²⁰Oile erar maze ḳoezon asla Saipras dif ar Kurini elaḳar manush, era Antiokiat gia Iunani oḳolor geseo Hozrot Isar kush-ḳobri toblig korla. ²¹Ar Allae tan kudroti bole tarare shaijjo ḳorla, teu bout manush iman ania tan muki oila. ²²I ḳobor Zeruzalem zomator mumin oḳolor ḳano ailo, ḳobor hunia tara Barnabasre Antiokiat faṭaila. ²³Tain hono fousia Antiokiat Allar meherbani dekia kub kushi oila, ar manshore asha dita taḳla, zate tara dile-zane malikor name imane mozbut roin. ²⁴Barnabas eḳzon hok manush, tain Pak Ruh ar imane kamil asla. Ar bout manush malikor muki firia aisil. ²⁵Bade Barnabas Shoulor tallashe Tarsho ṭauno gela, ²⁶ar tanre faia Antiokiat loia aila. Barnabas ar Shoul fura eḳ boros hono zomator loge milia bout manshore talim dila. Ou Antiokiatu al-Mosir ummot oḳolre foela Isaei name ḍaḳa oilo. ²⁷Ou shomoe ḳoezon nobi Zeruzalem taki Antiokiat aila. ²⁸Erar maze Agabus namor eḳ nobie Pak Ruhur zoriae ḳaṛa oia ḳoila, asta duniai zuṛia eḳ bezuita nidan deḳa dibo; Bashsha Keladusor razottor ḳalo ikan fura oilo. ²⁹Erlagi mumin oḳole niot ḳorla, Ehudia zilar imandar oḳolor ḳezmotor lagi, tara zarzir ḳemota mafik shaijjo faṭaita. ³⁰Ar niot mafik kamo tara ḳorla, tara Barnabas ar Shoulor atane Ehudiar zomator murobbi oḳolor gese shaijjo faṭaila.

Hozrot Iakubre ḳatol ar Fitoror ḳalas

¹Hi shomoe Raza Herude zomator ḳoezon manshore dorai ania zulum ḳorla. ²Tain Hannanor bai Iakubre toluar dia ḳaṭilila. ³Erlagi Ihudi oḳol kushi oisoin dekia, tain Ḳamir Saṛa Ruṭir Idor oḳto Fitorreo aṭok korla. ⁴Ar tanre zelo haraila, zelo-o fahara deoar lagi sairzon ḳori, sair dol sifaire hukum dila. Herudor niot asil Azadi Idor bade Fitorre manshor samne bar ḳori bisar ḳorba. ⁵Fitor zel ḳanat bondi roila, oile zomator manshe Fitoror lagi dile-zane Allar dorbaro dua ḳorat roila.

⁶Bisaror lagi zedin Fitorre bare anaita, er agor rait tain duizon sifair mazḳano duigesa cheindi banda halote gumo asla, ar bare sifai oḳole duaro fahara dira. ⁷Omon shomoe aḳtau Mabudor eḳzon firista hono aia ubaila, ar zelor bitor for oigelo. Firistae Fitoror gotro ṭela dia tanre hozag kori ḳoila, “Zoldi uṭo!” Teu Fitoror duio at taki sein kulia foṛigelo. ⁸Bade firistae tanre ḳoila, “Tumar ḳomoro ḳafoṛ findo ar zuta faot deo.” Tain oula ḳorla. Firistae ḳoila, “Tumar saddor gotro dia amar ḳore ḳore ao.” ⁹Fitor firistar ḳore ḳore zelḳana taki baroi aila, oile firistae zeta ḳorla, ita zen hasaroru or, ita kuntau Fitore buzta farla na, tain mono ḳorla ita kunu doroshon deḳra. ¹⁰Tara foela ar dui nombor faradaror dolre faroia zebla shohoro hamaibar luar geiṭor gese aila, geiṭ nize nizeu kuligelo. Tara baroia eḳ gollir hesh galat aia azila, ar ou shomoe firista Fitoror log taki gelagi. ¹¹Teu Fitoror hush oilo ar tain ḳoila, “Oḳon ami hasaroru buzlam zen, Mabude tan firistare faṭaia, Herudor at taki ar Ihudi oḳolor bod ḳaish taki amare hefazot ḳorsoin.” ¹²Tain mone mone ita mati mati Moriomor baṛir muka gela, i Moriom oila Hannan urfe Markusor ma. Ono bout manush dola oia dua ḳorat asla. ¹³Fitore geiṭo ṭuka marar bade Ruda namor eḳ bandi beṭie geiṭ kulat ailo; ¹⁴Ar Fitoror golar shur hunia kushie tai geiṭ na kulia douṛia gia hoḳolor gese ḳoilo, Fitor bare geiṭo ubai roisoin. ¹⁵Tara ita hunia hi beṭire ḳoila, “Tumar mata ḳaraf oise ni?” Beṭie tarar loge niae ḳoria ḳoilo, “Na, hasau Fitoror gola hunchi!” Teu hoḳole ḳoila, “Te ein mone oe Fitoror surote kunu firista.” ¹⁶Ibae Fitore geiṭo ṭukanit roila. Ou tara kulia Fitorre dekia taijjub oigela. ¹⁷Fitore atdi ishara dila tarare nirai oar lagi, ar zelḳana taki Mabude kila tanre bar ḳori anla, outa hoḳolta ḳoila. Bade tain ḳoila, “I ḳoborḳan tumra Iakub ar baki baiaintoreo zanaio.” Heshe tain on taki baroia aroḳ zagat gelagi. ¹⁸Rait fuanir bade Fitor kuai gela, i mat loia sifai oḳolor maze ulustul foṛigelo. ¹⁹Herude tanre tukaia na faoae faradar oḳolre zera ḳorla, ar tarare zane marar hukum dila, bade Herud nizeo Ehudia saṛia ḳoedinor lagi Ḳoisoriat gelagi.

Raza Herudor lannoti mout

²⁰Hi shomoe Herude Shur ar Sidonor manshor ufre kub gusa asla. Oile Raza Herudor desh taki tarar desho ḳanir samana aito ḳori, hinor hoḳol manshe eḳloge milia Herudor gese aila, tara razar hutibar goror Belastos namor eḳ boṛo gulamre at ḳoria razar loge afush ḳorat aila. ²¹Ar Herude eḳ din ṭik koria, hidin tan raz lebas findia shinghashono boia tarar samne bashon deoat asla. ²²Tan ḳota hunia tara sillaia ḳoila, “Ita to manshor buli nae, kunu devtar buli!” ²³Ar loge loge Mabudor eḳ firistae tanre marla, ḳaron Herude Allar ijjot raḳla na. Teu kirmir kuraḳ bonia tan dom baroilo.

²⁴Oile Allar kalam hoḳolbae aro beshi sitrilo, ar bout manshe iman anla. ²⁵Ibae Barnabas ar Shoulor toblig kam shesh oae tara Hannan urfe Markusre loge loia Zeruzalemo firot gela.

Hozrot Paulusor foela tobligi sofor (13:1–15:35)

Hozrot Barnabas ar Shoulre faṭani

¹Antiokia zomato ḳoezon nobi ar ustad asla, erar nam Barnabas, Samaun urfe Ḳalabai, Kurini shohoror Lukias, Raza Herudor ḳatiror manush Monohem, ar Shoul. ²Era zebla ruza rakia Mabudor ebadot ḳorat asla, ou shomoe Pak Ruhe erare ḳoila, “Barnabas ar Shoulre ami ze ḳamor lagi fosond ḳorsi, ou ḳamor lagi tarare alog kori deo.” ³Teu era ruza rakia, hou duiozonor ufre at toia dua ḳoria bidae dila.

⁴Ou laḳan ḳori Pak Ruhe Barnabas ar Shoulre Silukiat faṭai dila, ar hikan taki zazo ḳoria tara Saipras difo gela. ⁵Ar Salamis gia harle tara Ihudi oḳolor mosidainto hamaia Allar kalam toblig korla. Tarar ḳam ḳorar lagi Hannan urfe Markus tarar loge asla. ⁶Tara asta dif guria harle Fafus ṭauno aila, ar hino Bor-Jishu namor eḳ Ihudi zadugiror loge deḳa oilo, he asil bonḍo nobi. ^7-8Tar aroḳ nam asil Iluma, mani zadugir. He oilo hi deshor hakim Sergio Paulusor dust, oile hi hakim asla eḳzon aḳoldar manush, tain Allar kalam hunar lagi Barnabas ar Shoulre ḳobordi anaila. Ilumae hakimre iman ante dito na ḳori Barnabas ar Shoulre bada dilo. ⁹Ar Shoul, zenre Paulus ḳoiao ḍaḳoin, tain Pak Ruhe kamil oia Ilumar bae dian dori saia ḳoila, ¹⁰“O Iblisor baichcha, hoḳol mumini ḳamor dushmon, tor bitre hoḳol laḳan sol-soturi ar naformanie bora, tui Mabudor sohi fotre teṛa ḳorar fikir bad dite nae ni? ¹¹Hun, Mabudor at tor birudde lagse. Tui anda oizibe, ar ḳoedin shuruz deḳte nae.” Loge logeu kua ar andaire tare gurililo, ar he at baṛaia ḍaine-baue ḳeurore tukailo, tare ato doria neoar lagi. ¹²Ita dekia hi hakime malikor bishoye ze talim faila, ete tain taijjub oia iman anla.

Fisidia desho toblig

¹³Bade Hozrot Paulus ar tan logor hoḳole Fafus saṛia zazo ḳori Pamfulia deshor Forga shohoro fousla. Ar Hannan urfe Markuse tarare toia Zeruzalemo firot gelagi. ¹⁴Bade tara Forga taki aguaia Fisidia deshor Antiokia shohoro fousla ar Zummabare Ihudir mosido hamaia boila. ¹⁵Musar shoriot ar nobi oḳolor kitab taki tilaot ḳora shesh oile, mozlisor neta oḳole tarare ḳoila, “O baisab oḳol, manshore nosiotor lagi kunta boean ḳorar kial oile, ḳoroukka.” ¹⁶Ou Pauluse ubaia atdi ishara ḳori ḳoila,

“O Boni Israil oḳol, ar Allare ḍoraora o-Ihudi oḳol afnara hunoukka. ¹⁷Ou Israil zatir Allae amrar baf-dada oḳolre fosond ḳorsla, zebla tara Mishor desho musafirit asla, ou shomoe tarare mohan ḳorsila, ar tan moha kudrote tarare hikan taki bar ḳori anchila. ¹⁸Onuman sallish boros dori tain morubumir maze huruttar ma-bafor laḳan tarar be-adobi sobor ḳorsla. ¹⁹Bade tain Kenan deshor shatṭa zatire binash ḳoria, tan nizor bonda oḳolre hou deshaintor malikana dan ḳorla. Ou laḳan onuman sair-sho foinchash boros guzori gelo. ²⁰Heshe Samuel nobir amol forzonto Allae ḳoezon amir bezisla. ²¹Oile manshe eḳzon bashsha sailo. Teu Allae sallish bosoror lagi Bin-Iamin bongshor Kishor fua Talutre bashsha banaila. ²²Bade Allae Talutre horaia Hozrot Daudre tarar bashsha banaila. Tain Daudor befare ḳoila, ‘Ami Iasor fua Daudre faisi, he amar monor moto manush. Amar hoḳol morzi amol ḳorbo.’ ²³Allae tan oada mafik ou manshor oarish taki eḳzon toraneala, mani Hozrot Isare Boni Israil oḳolor gese azir ḳorsila; ²⁴Ou Isa aoar age hokkol Boni Israilor gese Hozrot Ehiae toblig korsila, ‘Guna taki dil firaia hari manshe toubar gusol ḳora dorḳar.’ ²⁵Ar Ehiae tan toblig kamor aḳer ḳalo ḳoila, ‘Tumra kita mono ḳoro, ami ḳe? Ami to hi oada ḳora al-Mosi nae; tain amar bade toshrif anra. Tan faor zutar fita kular laḳo ami nae.’

²⁶“Te O baiain, Ibrahimor oarish oḳol, ar Allare ḍoraora o-Ihudi oḳol, amra hokkolor gese-u nazator i kalam nazil oise. ²⁷Zeruzalemor manshe ar tarar neta oḳole Isare na sinae, ar forteḳ Zummabare nobi oḳolor ze boean tilaot oe eota na buzae, tara Isare dushi shaibosto ḳoria hou ḳota oḳol fura ḳorla. ²⁸Ar zane marar lak kunu dush na faileo tara hakim Filator gese dabi zanaila, tanre zane marar lagi. ²⁹Tan bishoye asmani kitab oḳolo zeta leḳa asil, ita hoḳolta fura oar bade tara tanre gaso loṭḳail halot taki, mani solib taki lamaia dafon ḳorlo. ³⁰Oile Allae tanre murda taki zinda ḳori tulla. ³¹Ar Galil taki zera tan loge Zeruzalemo aisla, tarar gese tain bout din dori deḳa dila; erau oḳon amrar gese tan befare shakki dira. ³²Ar amrar baf-dada oḳolor gese Allae zeta oada ḳorsila, amra afnaintor gese hou kush-ḳobri zanairam, ³³Allae Isare murda taki zinda ḳoria tarar oarish oḳol, mani amrar gese tan oada fura ḳorsoin, ar i befare Zobur kitabor dusra rukut oula leḳa ase:

Tumi amar fut,

aiz taki ami oilam

tumar gaibi baf.

³⁴Allae zen tanre murda taki zinda ḳorsoin, ar tain zen kunudino ḳoe oita nae, i befare Allae ḳoisoin:

Ami Daudor gese ze pak oada oḳol ḳorsi,

ita ami tumrare dan ḳormu.

³⁵Tain Zobur Shorifor aroḳ aeato ḳoisoin:

Tumi nizor pak bondare ḳoe oite ditae nae.

³⁶Daud to hi amolor manshor maze Allar kial-kushi fura ḳorar bade inteḳal ḳorla, ar tan moe-murobbi oḳolor gese tanre dafon ḳorar bade ḳoe oigela, ³⁷oile Allae zenre murda taki zinda ḳorsoin, ein to ḳoe oisoin na. ³⁸Erlagi amar bai oḳol, afnarao zania raḳoukka, ou Isar maz diau guna taki mafi faoar ḳota afnaintor gese toblig kora or. ³⁹Afnara Musar shoriotor usillae gunar shaza taki rehai faisoin na, oile zekunu zone Isar ufre iman anle, tan usillae he gunar shaza taki rehai fae. ⁴⁰Erlagi afnarao hushiar oukka, zate nobi oḳolor kitabo zeta boean ḳora oise, ita zanu afnaintor ufre na goṭe:

⁴¹Tumra zera Allare loia ṭaṭṭa ḳoro,

tumra kial ḳoro,

tumra somkaia uṭo ar binash o;

ḳaron tumrar amolou ami oula ek kam ḳormu,

ze ḳamor ḳota ḳeu tumrar gese ḳoileo,

tumra kunumonte-u bishash ḳortae nae.”

⁴²Paulus ar Barnabas mosid taki zaoar bala manshe tarare minot ḳori ḳoila, bador Zummabareo tara i befare aro boean ḳorar lagi. ⁴³Mosid taki manush oḳol baroia zaoar bade, bout Ihudi ar Ihudi dormo manra forezgar oḳole Paulus ar Barnabasor ḳore ḳore gela. Era Paulus ar Barnabasor loge batchit ḳorla, tara erare utshaho dila, era Allar rohomotor ufre ḳaim roita ḳori.

⁴⁴Bador Zummabare ṭaunor manush dole dole Allar kalam hunar lagi aila. ⁴⁵Oile oto manshor biṛ dekia Ihudi oḳole ingshae bori gela, ar Pauluse zeta boean ḳorla tara er ninda gaia tan birudita ḳorla. ⁴⁶Teu Paulus ar Barnabase shaosh ḳoria zuaf dila, “Allar kalam foela afnaintor gese toblig kora dorḳar asil; oile afnara zebla ita ṭelia horai dira, ar aḳeri zindegi ḳamai ḳora dorḳar mono ḳorra na, te amra-o o-Ihudi oḳolor bae nozor firaillam. ⁴⁷Ḳaron Mabude amrare oula hukum ḳorsoin,

Ami tumare o-Ihudi oḳolor gese

nur hishabe bezisi,

zate tumi duniar hesh shimana forzonto

nazator usilla o.”

⁴⁸O-Ihudi oḳole ita hunia kushi oila ar malikor kalamor tarif ḳorla; ar zoto manshore Allae aḳeri zindegi hasilor lagi fosond ḳori raḳsila, tara iman anla. ⁴⁹Malikor kalam hi deshor hoḳol zagat fousi gelo. ⁵⁰Oile Ihudi oḳole tarar forezgar ḳandani beṭintore ar ṭaunor boṛo boṛo murobbi oḳolre uskaia dilo tara Paulus ar Barnabasor ufre zulum ḳoraia, tarar shimana taki ḳedaia bar ḳori dilo. ⁵¹Teu Paulus ar Barnabase hi manshor birudde tarar faor duil zaṛia falaia Ikonia ṭauno gelagi. ⁵²Ar hinor ummot oḳol kushie ar Pak Ruhe furafur kamil oila.

Ikonia ṭauno toblig

¹Ikonia ṭauno aiao ou laḳan Paulus ar Barnabas Ihudir mosido gia hamaila, hamaia tara omon laḳan toblig korla, ita hunia bout Ihudi ar o-Ihudi oḳole iman anla. ²Oile zeta Ihudie iman anla na, tara o-Ihudi oḳolre uskai dia, mumin oḳolor bae bigṛaila. ³Paulus ar Barnabas hi ṭauno bout din roila, tara shaosh ḳoria malikor befare toblig korla. Ar malikeo tan rohomotor kalamor fokke Paulus ar Barnabasor mazdi, bout muzeza ar keramoti oḳol zair ḳoraila. ⁴Bade asta ṭaunor manush dui dol oigelo, eḳ dol Ihudi oḳolor fokke, aroḳ dol sahabi oḳolor fokke. ⁵Oile Ihudi ar o-Ihudi kisu manshe tarar neta oḳolor loge milia, Barnabas ar Paulusre mair-doir ar fattor marar fondi ḳorla. ⁶Paulus ar Barnabase ita ṭer faia Luḳaenia deshor Lushra ar Dorbi shohoro, ar er ḳanda-ḳasat bagia roila; ⁷tara hono Injilor kush-ḳobri toblig korla.

⁸Lushra ṭauno eḳzon manush boat taḳto, tar faot kunu bol asil na, he maʼr feṭ takiu lengṛa, kunudino aṭto farse na. ⁹He Paulusor boean hunat asil; Pauluse tar bae dian ḳori saila, ar bala oar lagi tar iman ase buzia, ¹⁰tare zure ḍaḳdi ḳoila, “Tumar faot bordi shida oia ubao!” Teu loge logeu manushgu faldi uṭia aṭto laglo. ¹¹Paulusor i keramoti dekia manshe Luḳaenia bashae sillaia ḳoilo, “Devta oḳole manshor surot doria amrar gese lamia aisoin!” ¹²Ar manshe Barnabasor nam dilo ‘Zius deb’ ar Paulus boṛo boean ḳorra gotike, tan nam dilo ‘Harmis deb’. ¹³Shohoror baira mul geiṭor ḳandat Zius devtar mondiror babon ṭakure bisal ar mala loia ailo, ḳaron hi ṭakure ar hokkol manshe Paulus ar Barnabasor niote foshu boli dito sailo. ¹⁴Oile sahabi Barnabas ar Pauluse ita hunia be-ḳorar bonia zarzir finnor ḳafoṛ siṛia douṛia manshor gese gela, ar zure sillaia ḳoila, ¹⁵“O sab oḳol, afnara ḳene ita ḳorra? Amra to ḳali afnaintor laḳanu duki-shuki manush, amra afnaintor gese ou kush-ḳobri toblig korram, zate i oshar hoḳolta bad dia zinda Allar bae firoin, zein asman-zomin, doria ar ermaze zotota ase hokkolta foeda ḳorsoin. ¹⁶Agor amolor hoḳol zatire tain zarzir ichchamoto fote solte disoin; ¹⁷ta-o tain hamesha nizore zair ḳorsoin, tain asman taki meg dia, shomoe moto foshol dan ḳoria tan meherbani deḳaisoin, afnaintor feṭ bora ḳani ar dilor aram zugaisoin.” ¹⁸I mat oḳol matar badeo bout ḳoshṭo ḳoria erar foshu boli deoa bond ḳoraila.

Nanan ṭauno toblig

¹⁹Bade Antiokia ar Ikonia taki ḳoezon Ihudi aia, Paulusor birudde manshore uskaia dia tanre fattor marlo, ar tain morigesoin mone ḳoria, ṭaunor bare sesṛaia loia gelo. ²⁰Oile mumin oḳol tan sairobae eḳloge dola oar bade, tain uṭia ṭauno firia gela. Bador din tain Barnabasor loge oia Dorbi shohoro gelagi. ²¹Dorbit gia harle hono kush-ḳobri toblig koria Paulus ar Barnabase bout manshore imandar banaila, bade tara Lushra, Ikonia ar Antiokiat firot gela; ²²hono gia tara mumin oḳolor imani bol baṛaia tarare imane mozbut roar lagi tagid dila, tara ḳoila, bout duk-toklifor fot faroia amra Allar bashshait hamani lagbo. ²³Tara zomatre salanir lagi forteḳ zomator murobbi-komiṭi banaila. Ar ze malikor ufre tara iman anchoin, en name ruza rakia dua ḳoria ou Isar ato erare shofia dila. ²⁴Bade Paulus ar Barnabase Fisidia deshor bitredi Pamfulia desho gela. ²⁵Tara Forga shohoro Allar kalam toblig koria Antulia zaz gaṭo gela; ²⁶Antulia taki zazo uṭia Antiokiat firot aila. Tara i soforo zeta ḳam oḳol injam ḳorsila, i ḳamor lagi tarare ou Antiokia takiu Allar rohomotor hefazoto shofi deoa oisil. ²⁷Antiokiat fousia zomator hoḳolre ekkano dola ḳorla, ar Allae tarar i ṭauno tarar loge roia zeta zeta ḳam oḳol ḳorsoin, ar tain kila o-Ihudi oḳolor maze iman anar duar kulia disoin, i hokkolta zanaila. ²⁸Heshe tara mumin oḳolor loge hikano bout din roila.

Zeruzalem boiṭokor foesala

¹Ehudia taki ḳoezon manush Antiokiat aila ar imandar oḳolre ou talim hikanit lagla, “Musar shoriot mafik tumrar mosolmani ḳorail na oile, kunumonte-u guna taki nazat faitae nae.” ²Ita loia Hozrot Paulus ar Barnabasor loge ou manush oḳolor kub ḳota ḳaṭaḳaṭi oilo. Bade ṭik oilo, Paulus ar Barnabas Antiokiar ḳoezon imandarre loge loia Zeruzalemo zaiba, gia tara sahabi ar zomator murobbi oḳolor loge i bishoye batchit ḳorba. ³Antiokiar zomate tarar zaoar bondobost ḳori dila, Foinikia ar Shomoria elaḳar bitredi zaite zaite Paulus ar Barnabase manshore zanaila o-Ihudi oḳol kila Allar bae firer, ita hunia tara kub kushi oila. ⁴Paulus ar Barnabas Zeruzalemo aia fousar bade zomator manshe, sahabi ar murobbi oḳoleo tarare maear nozore ḳobul ḳorla. Ar tarar usillae Allae zeta ḳam ḳorsoin, ita hoḳolor gese zanaila. ⁵Ou shomoe Forishi dolor ḳoezon imandare ubaia ḳoila, “O-Ihudi oḳolor mosolmani ḳorani zorur, ar tara zanu Hozrot Musar shorioto amol ḳore, erlagi tarare hukum deoa ouk.”

⁶Teu i bishoer foesala ḳorar lagi sahabi oḳol ar zomator murobbi oḳol eḳ zagat dola oila. ⁷Bout batchitor bade Hozrot Fitore ubaia ḳoila, “Baiain oḳol, afnara to zanoin, bout din age afnaintor maz takiu Allae amare fosond ḳori nisoin, zate o-Ihudi oḳoleo amar muk taki kush-ḳobri hunia iman anoin. ⁸Allae to hoḳolor dilor ḳobor zanoin, te tain amrare zelaḳan Pak Ruh dan ḳorsoin, o-Ihudi oḳolreo oula Pak Ruh dan ḳoria deḳaisoin, tarao nazat hasil ḳorse. ⁹Tain amrar ar tarar maze alada kunta raḳsoin na, ḳaron tara iman anchoin ḳori, tarar dilo saf ḳorilisoin. ¹⁰Te amrar baf-dada oḳole ba amra-o ze bar boitam farsi na, hi bar o-Ihudi ummot oḳolor ḳando tulia dia, ḳene afnara Alla Pakre forikka ḳorra? ¹¹Amra to mono ḳori, Hozrot Isar meherbanie amra zela guna taki mafi faisi, tarao oula mafi faisoin.”

¹²Teu hokkol nirai oigela; Paulus ar Barnabasor zoriae Allae o-Ihudir maze zeta muzeza ar keramoti ḳam oḳol ḳoraisoin, tarar muk taki ota hunla. ¹³Tarar boean shesh oar bade Iakube ḳoila, “Baisab oḳol, hunoukka, ¹⁴Allae tan nizor bonda oar lagi o-Ihudi oḳol taki eḳdol manshore fosond ḳori nia deḳaisoin, o-Ihudi oḳolor baeo tan kial ase, ar ou ḳotau Saimon-Fitore oḳon boean ḳorsoin. ¹⁵I boeanor loge nobi oḳolor kalamoro mil ase; zela leḳa ase,

¹⁶Erbade ami aia Daudor foṛi zaoa gor

hirbar tiar ḳormu,

zeta binash oigese ita hirbar gatimu,

hirbar noea ḳoria banaimu,

¹⁷zate baki hoḳol manshe Mabudor tallash ḳoroin,

ar zoto o-Ihudir nam

amar bondar ḳatat leḳa ase,

tarao tallash ḳoroin.

Mabudeu ou kalam ḳoira,

¹⁸Ita bout din ag takiu

tan malum asil.”

¹⁹Iakube aro ḳoila, “Te amar foesala oilo, o-Ihudi taki zera Allar foti or, tarare amra kunu duk ditam nae. ²⁰Tarar gese ḳali ou hukumḳan lekia zanai dei, tara zanu devtar namor hokkol ḳam taki, zinar ḳam taki, ar gola ṭifia mara zandaror gust ḳaoa ar lou ḳaoa taki duroi roin. ²¹I hukum oḳol tarare zananikan bala, ḳaron Musae zeta talim disoin, ita bout zomana taki forteḳ ṭauno manshe toblig korra, ar tain zeta lekia toia gesoin, ita to forteḳ Zummabare mosidainto tilaot ḳora or.”

²²Teu sahabi oḳol, zomator murobbi oḳol, ar zomator hoḳol am manshe eḳmot oila, tarar nizor maz taki ḳoezonre fosond ḳoria Paulus ar Barnabasor loge Antiokiat faṭai diba. Ou tara Silas ar Ehuda urfe Barshabba namor ou dui murobbire fosond ḳorla. ²³Tarar ato ou siṭi lekia faṭaila: “Antiokia, Shiria ar Kilikiar o-Ihudi mumin baiaintor gese, sahabi oḳole, zomator murobbi oḳole, ar mumin oḳole i salam zanairam. ²⁴Amra hunlam zen, amrar maz taki ḳoezon manush gia tarar zobandi afnarare ostir banaia fereshani ḳorar; oile amra to tarare ila ḳamor kunu hukum disi na. ²⁵Erlagi amra hoḳole eḳmot oia ḳoezonre fosond ḳoria, amrar maear manush Barnabas ar Paulusor loge ḳori tarare afnaintor gese faṭailam, ²⁶Barnabas ar Paulus to amrar Hozrot Isa al-Mosir namor lagi morar zuka oigesla. ²⁷Amra Ehuda ar Silasreo faṭailam, tara ita muke mukeo zanaiba. ²⁸Pak ruh ar amra milia oṭau bala mono ḳorlam zen, ou zoruri talim oḳol saṛa ar kunu bar afnaintor ufre na gosai. ²⁹Te afnara devtar namor mana kunu ḳani, lou, ar gola ṭifia mara zandaror gust ḳaiba na, ar zinar ḳam taki duroi roiba; ita taki hefazot roile afnaintor balai oibo. Iti, assalamu alaikum.”

³⁰Bade tara bidae loia Antiokiat aila, hino tara zomator manshore ekkano dola ḳori siṭikan shomzai dila. ³¹Manshe siṭikan foṛia i shantir nosiot hunia kushi oila. ³²Ehuda ar Silas, era duiozon nobi asla, era hinor mumin oḳolre bout laḳan oaz-nosiot ḳoria utshaho dila ar tarar imani bol mozbut ḳorla. ^33-34Hono bakka ḳoedin roar bade, zera tarare faṭaisla erar gese hirbar firot aita ḳori, Antiokiar mumin oḳolre salam zanaia bidae loila. ³⁵Oile Paulus ar Barnabas Antiokiat roigela, tara hino aro boutor loge malikor kalamor talim ar kush-ḳobri toblig korat roila.

Hozrot Paulusor duara tobligi sofor (15:36–18:23)

Paulus ar Barnabasor omil

³⁶Ḳoedin bade Pauluse Barnabasre ḳoila, “Amra zeta zagainto age malikor kalam toblig korslam, ao, hou zagainto hirbar gia deḳa ḳori. Dekia ai baiaintor hal-hokikot kita.” ³⁷Teu Barnabasor kial oilo, Hannan urfe Markusre loge loia zaita; ³⁸oile Pauluse enre loge neoa bala mono ḳorla na, ḳaron Markuse age Pamfuliat tarare falaia geslagi, tarar loge ḳam ḳora bad dilaisla. ³⁹Erlagi Paulus ar Barnabasor maze motor omil oigelo erdae tara zarzir fote alog oigela. Barnabase Markusre loia zazo ḳori Saipras difo gela; ⁴⁰ar Pauluse Silasre fosond ḳoria, Antiokiar mumin oḳolor zoriae Mabudor rohomotor ato shofa oia roana dila. ⁴¹Tain Shiria ar Kilikiar mazedi roana ḳoria fote fote zomat oḳolre aro mozbut ḳorla.

Dorbi ar Lushra ṭauno Hozrot Paulus

¹Hozrot Paulus foela Dorbi ar bade Lushra ṭauno gia azila. Lushrat Timoti name eḳzon ummot asla, tan ma imandar, ma to Ihudi zator, oile baf Iunani zator. ²Lushra ar Ikonia ṭaunor hoḳol imandare Timotir bout tarif ḳorta. ³Pauluse Timotire loge nita ḳori kial ḳorla; tain Timotire mosolmani ḳoraila, ḳaron hi zagaintor Ihudi oḳole zanta Timotir baf oila Iunani zator manush. ⁴Zeruzalem zomator sahabi ar murobbi oḳole zeta hukum disla, tara ṭaune ṭaune sofor ḳori ḳori ita mumin oḳolor ato shomzaila ar manar tagid dila. ⁵Oula zomator mumin oḳolor iman mozbut oilo, ar dine dine tarar foriman aro baṛilo.

Makidoniat Hozrot Paulus

⁶Pak ruhe Hozrot Paulus ar tan logor hoḳolre Asiya desho kalam toblig korte mana ḳorla, teu tara Forugia ar Galatia deshor bitredi faroia gela. ⁷Gia Mushiar shimanat aia harle Bitunia desho zaita saila, oile Isar ruhe tarare hikano zaite dila na, ⁸erdae tara Mushia desh falaia Toruas ṭauno gelagi. ⁹Raitor bala Pauluse gaibi eḳ doroshon faila; tain deḳla, Makidonia deshor eḳ beṭae ubaia tanre minot ḳori ḳoira, “Makidoniat faroia aia amrare shaijjo ḳoroukka.” ¹⁰Tain i alamot deḳar badeu amra Makidoniat zaoar lagi tiar oilam, amra buzlam, Makidoniar manshor gese kush-ḳobri toblig korar lagi Allae amrare faṭaira.

¹¹Ou amra Toruas saṛia zazo ḳori shuza Samtraki difo gelam, hin taki bador din Niafoli ṭauno gia azilam. ¹²Niafoli taki amra Filifi ṭauno gelam. Iṭa oilo Makidoniar hoḳol taki boṛo ṭaun, ino Ruman razar manush boshot ḳorta. Amra ḳoedin ono roilam. ¹³Eḳ Zummabare amra ṭaunor baira gangor faro gelam, mono ḳorlam, hikano Ihudi dormor dua ḳorar kunu zaga ase. Hino gia amra beṭintor eḳ dol dekia tarar loge mato boilam. ¹⁴Ar erar maze Tuatira ṭaunor Ludia namor o-Ihudi allaraia eḳ beṭi manush asla, ein baingoni rongor ḳandani ḳafoṛor ḳarbar ḳorta. Tain amrar boean hunat asla, ar Mabude tan dilor duar kulia dilaila, zate tain Paulusor boean dil dia hunoin. ¹⁵Tain ar tan goror hoḳole toubar gusol ḳoria harle tain minot ḳori ḳoila, “Afnara zudi amare malikor ufre imandar mono ḳoroin, te amar baṛiḳano aia roukka.” Ḳoia tain zure zatia amrare tan baṛit nilagi.

Zel ḳanat aṭoḳ ar gaibi ḳalas faoa

¹⁶Eḳdin amra zebla hou dua ḳorar zagat zaoat aslam, ou shomoe zinnat sadoki eḳ bandi beṭi aḳtau amrar samne ailo. Tai baiggo gonia tair girost oḳolre bout lab ḳoraito. ¹⁷Tai amrar ḳore ḳore aia sillaia ḳoilo, “I manushguin uforalar shebok, era tumrare toranir fot deḳai dira.” ¹⁸Tai bout din dori ita ḳorsil, eḳdin Pauluse biroḳto oia tair bae muk firaia hou zinre ḳoila, “Ami Isa al-Mosir name tumare i hukum diram, tumi i beṭir ges taki baroia zaogi!” Ar loge logeu hi zin baroia gelogi.

¹⁹Oile tair munib oḳole tarar lab fuṛaigelo dekia, Paulus ar Silasre doria ṭania shodoro loia gela. ²⁰Bade hakim oḳolor gese shomzai dia ḳoila, “I manushguinte amrar ṭauno aia betaea gonḍogul baṛai dise. Era to Ihudi ar amra oilam Ruman manush. ²¹Era ou zator ḳaeda-ḳanunor ḳota manshore hikaira, zeta ḳora amrar lagi be-aini.” ²²Ar hinor aro manush eḳloge dol bandia Paulus ar Silasor birudita ḳorlo, teu hakim oḳole erar ḳafoṛ-sufoṛ kulia singladi marar hukum dila. ²³Ar kub balaṭike singladi maria tarare zelo harai toia, zelor ofisarre hukum dila ḳoṛaḳoṛi fahara deoar lagi. ²⁴Zelor ofisare i hukum faia hari tarare zelor bitoror kuṭat harai toila, ar tarar faot ḍanḍa-beṛi lagaila.

²⁵Ada raitkur bala Paulus ar Silase Allar hamd-gozol gaite gaite dua ḳorat asla, zelor ḳoedi oḳole ḳan fatia tarar gozol hunla. ²⁶Ou shomoe aḳtau boṛo eḳ boisal oilo, asta zelḳanar bit ḳafia uṭlo. Zelor hoḳol duar ar ḳoedi oḳolor sikol kuligelo. ²⁷Teu zelor ofisaror gum banglo ar zelor hoḳol duar kula dekia tan toluar bar ḳoria nize nize kun oizita saila, tain mono ḳorla, hoḳol ḳoedi bagia gesoingi. ²⁸Ou Pauluse dekia sillaia ḳoila, “Dom lo, dom lo, nizor ḳeti ḳorio na, amra hoḳolu ikano roisi.” ²⁹Teu ofisare eḳzonre batti anar hukum dia, tain douṛaia gia bitre hamaila, ar ḍoror suṭe ḳafi ḳafi Paulus ar Silasor faot foṛla; ³⁰bade Paulus ar Silasre bare ania zikaila, “Sab oḳol, ami kita ḳorle zane bastam farmu?” ³¹Tara zuaf dila, “Hozrot Isar ufre iman anoukka, teu afne ar afnar baṛir hoḳol zane basba.” ³²Paulus ar Silase zelor ofisar ar tan baṛir hoḳolre malikor kalam hunaila. ³³Ar hou raitu tain Paulus ar Silasre loia gia tarar shorilor ḳaṭa-sira doia dila, bade tain ar tan baṛir hoḳole loge loge toubar gusol ḳorla. ³⁴Ar tarare tan nizor goro nia ḳana ḳaite dila. Baṛir hoḳole mili Allar ufre iman ania bout kushi oila.

³⁵Bador din biane hakim oḳole fulish faṭaia zanaila, i ḳoedi oḳolre saṛi deo. ³⁶Teu zelor ofisar sabe Paulusre zanaila, “Hakim oḳole hukum disoin afnarare saṛi dibar lagi, te afnara baroia aukka ar sohi-salamote toshrif neukka.” ³⁷Pauluse tarare ḳoila, “Amra Ruman manush, amrar kunu bisar na ḳoria hoḳolor samne singladi marsoin ar zelo haraisoin. Oḳon hakim oḳole amrare lukaia saṛi dita saira? Ita oito nae, tara nize aia amrare bar ḳori neukka.” ³⁸Fulishe gia hakim oḳolre ou ḳota zanaila, hakim oḳole Paulus ar Silasre Ruman manush hunia ḍoraigela. ³⁹Tara Paulus ar Silasor gese aia maf saila, ar tarare bare nia ṭaun taki hori zaoar lagi minot ḳorla. ⁴⁰Teu tara zelḳana taki baroia aia Bibi Ludiar baṛit hamaila. Hikano mumin oḳolor loge deḳa-shakkat ḳoria tarare utshaho dila, bade hon taki roana oila.

Tisholoniki ar Biroea ṭauno sofor

¹Hozrot Paulus ar Silas Amfipuli ar Apollunia ṭaunor mazedi gia Tisholonikit aila. Hino Ihudi oḳolor ekkan mosid asil; ²Paulus tan niom motou hi mosido gela, ar laga laga tin Zummabare manshore pak kalam taki buzaila. ³Tain buzaila ar formano deḳaila, toklif shoijjo ḳora ar murda taki zinda oia uṭa al-Mosir lagi zorur asil. Tain ḳoila, ou ze Isar ḳota ami afnarare buzairam, einu al-Mosi. ⁴Ita hunia erar maz taki ḳoezone iman ania Paulus ar Silasor loge shorik oila. Bout allaraia Iunani beṭain ar ḳandani beṭino tarar loge shorik oila. ⁵Oile Ihudi oḳole ingsha ḳoria bazari gunḍain ania dol banailo ar ṭaunor maze gulmal lagai dilo. Tara Zasunor baṛit hamla ḳoria Paulus ar Silasre tukaia manshor samne anto sailo. ⁶Oile erare na faia tara Zasun ar aro ḳoezon muminre ṭania sesṛaia ṭaunor shordar oḳolor gese loia gelo, ar sillai sillai ḳoilo, “Ou beṭainte asta duniare lonḍo-bonḍo ḳoria oḳon ono-o aise. ⁷Ar ou Zasune tar nizor baṛit erare memandari ḳorse; era hoḳole amrar bashsha Ḳoisoror hukum na mania ḳoira, tain saṛa Isa name aroḳzon bashsha asoin.” ⁸Ou laḳan mat matia tara shordar oḳolre ar am manshoreo uslaia dilo. ⁹Shordar oḳole Zasun ar tan logor hokkolor zamanot loia zamine saṛi dila.

¹⁰Rait oar bade mumin oḳole zoldi ḳori Paulus ar Silasre Biroeat faṭai dila. Hikano gia harle tara Ihudir mosido aila. ¹¹Tisholonikir Ihudi oḳol taki Biroea ṭaunor Ihudi oḳol bout kula-mela asla. Tara Allar kalam hunia kub gorzi oia ḳobul ḳorla, ar Pauluse zeta talim dira ita hasa ki na deḳar lagi tara forteḳ din asmani kitab kulia milaita. ¹²Tarar maz taki bout Ihudie, ar Iunani takio bout ḳandani beṭain-beṭinte Isar ufre iman anla. ¹³Oile Tisholonikir Ihudi oḳole zebla hunlo, Pauluse Biroeat aiao toblig korra, ou tarao Biroeat aia hinor manshore uslaia gulmal lagailo. ¹⁴Ita hunia-u mumin oḳole Paulusre doriar faro faṭai dila, oile Silas ar Timoti Biroeatu roila. ¹⁵Paulusre loia zera roana oisil, tara tanre loia Atiniat gela. Gia harle Pauluse tarare ḳoila, Silas ar Timotire kub zoldi ḳori tan gese faṭanir lagi, ḳoia tarare bidae dilaila.

Atinia ṭauno toblig

¹⁶Atiniat aia Hozrot Pauluse zebla Silas ar Timotir lagi bar saira, ou shomoe tain deḳla hi ṭaunor maze murtie bora, dekia tan monor maze kub ḳoshṭo faila. ¹⁷Ou tain Ihudi mosido gia Ihudi ar allaraia Iunani oḳolre, ar fortidin bazaro giao zerar loge deḳa oito, tarar logeo Hozrot Isar befare batchit ḳorta. ¹⁸Teu Ifikuri ar Stuiki motobador ḳoezon fonḍite tan loge torko lagaila, tara ḳoezone ḳoila, “I bok-bok korrae kita hikaito sae?” Ar ḳeu ḳeu ḳoilo, “Mone ḳoe he kunu bideshi devtaintor ḳota zanaito sar.” Ḳaron Pauluse Hozrot Isa ar murda taki zinda oar kush-ḳobrir ḳota toblig korsila. ¹⁹Bade tara Paulusre ania Areo-fagor mozliso nia azir ḳorla, ar tanre zikaila, “Ou zeta noea shikka afne ḳoira, ita kita amrareo hunaiba ni? ²⁰Afne to kisu azgubi mat matira, te amra zantam sairam er ashol maniḳan kita.” ²¹Atinia ṭaunor manshe ar hino roura musafir oḳoleo ḳali noea noea befaror mat matia ba hunia tarar din ḳaṭaita.

²²Teu Hozrot Pauluse Areo-fagor mozlisor mazḳano ubaia ḳoila, “O Atiniar manush oḳol, ami deḳram, afnara hoḳol ḳamou kub devta bozoin. ²³Ami zebla faḳanit geslam, ou shomoe afnaintor fuzar hoḳolta guria deḳlam, ami deḳlam eḳ fattoror maze leḳa ase, ‘Osina devtar name.’ Te hunoukka, afnara na-sinia zen fuza ḳorra, ami tan ḳotau afnaintor gese toblig korram. ²⁴Alla Pak, zein i dunia ar er mazor hoḳolta foeda ḳorsoin, tain behest ar duniar malik, tain to manshor banail kunu mondiro boshot ḳoroin na. ²⁵Tan kunu obab nai gotike manshor ges taki kunuta neoaro goroz nai, tainu to hokkol manshor zan, dom, ar hoḳolta dan ḳoroin. ²⁶Tain eḳzon manush taki hokkol zator manush foeda ḳorsoin, asta duniai zuṛi boshot ḳorar lagi. Tara kun amolo kunano boshot ḳorba iṭao tain foesala ḳori disoin. ²⁷Allae i ḳam ḳorsoin zate manshe tanre tallash ḳoroin, ar tukai tukai tan didar fain. Otoso tain amra ḳeuror ges taki duroi nae. ²⁸Afnaintor ḳoezon ḳobieo ḳoisoin, ‘Tan kudroteu amrar zindegi, goti, ar ṭai,’ ar, ‘Amra-o tan oarish.’

²⁹“Ar amra zebla Allar oarish, te Allar surotre manshor kial-morzie banail shuna-rufa ba fattoror murti mono ḳora amrar lagi usit nae. ³⁰Agor zomanar manshe ita zanta na gotike Allae itare ḳosur mono ḳorsoin na, oile oḳon tain hoḳol zagar hokkol manshore mon bodlaia touba ḳorar lagi hukum dira. ³¹Tain to oula eḳ dino ṭik korsoin, zedin tan fosondor hokkani manshor atane din-duniar hok bisar ḳoraiba. Iṭare ekin ḳorar lagi tain hou manshore murda taki zinda ḳoria er formano deḳaisoin.”

³²Murda oḳol hirbar zinda oia uṭba ikan hunia ḳeu ḳeu asha-ashi ḳorlo, ar ḳeu ḳeu ḳoilo, “Afnar i befarḳan amra aroḳbar hunmu.” ³³Ou laḳan ḳori Pauluse hi mozlis taki uṭia gelagi. ³⁴Oile ḳeu ḳeu tan loge eḳmot oila ar imano anla. Erar maze Dionusio name Areo-fagor eḳzon membar, Damaris namor eḳzon beṭi manush ar aro ḳoezone iman anla.

Korint ṭauno Hozrot Paulus

¹Bade Hozrot Paulus Atinia saṛia Korint ṭauno aila. ²Hino aia harle Akil namor eḳzon Ihudir loge tan deḳa oilo. En baṛi Fonto desho, Ruman bashsha Keladuse Ihudi oḳolre Rum taki hori zaoar hukum disla gotike, Akile tan bou Fiskilare loge loia tuṛa ḳoedin age Itali taki Korintot aisla. Paulus tarar ḳandat gela. ³Taino tarar laḳan tambu bananir ḳam ḳorta gotike tain tarar loge roia ou ḳamo lagla. ⁴Forteḳ Zummabare Paulus Ihudi mosido gia Isar befare batchit ḳorta, tain Iunani ar Ihudi oḳolre iman anar lagi tagid dita.

⁵Hozrot Silas ar Timoti Makidonia taki aia harle, Pauluse ḳali Allar kalamor toblig korta. Tain Ihudi oḳolre buzaita, Hozrot Isau oila al-Mosi mani Allar ḳas fosond ḳora zon. ⁶Oile Ihudi oḳole zebla Paulusor birudita ar bodnam gaoat lagla, i shomoe tain nizor lebasor duil zaṛia falaia ḳoila, “Afnaintor lour dae afnaintor matatu rouk. Ami amar daeitto taki ḳalas failam. Oḳon taki O-Ihudi oḳolor muka fot dorlam.” ⁷Ḳoia hari hon taki Titio-Iustus namor eḳzon allaraia manshor baṛit gela. En baṛi asil mosidor loge. ⁸Mosidor mutolli Kirispo sab ar tan baṛir hoḳole malikor ufre iman anla. Ar Paulusor boean hunia Korintio oḳolor maze boute iman ania toubar gusol ḳorla. ⁹Raitor bala Mabude Paulusre doroshon dia ḳoila, “Ḍoraio na, toblig salaia zao, muk bond ḳorio na. ¹⁰Ami tumar loge loge asi, ḳeu tumare hamla ḳoria tumar ḳeti ḳorto nae. Ḳaron i ṭauno amar bout proza asoin.” ¹¹Ou Paulus deṛ boros dori hono roia manshore Allar kalam talim dila.

¹²Bade Galion zebla Gris deshor hakim asla, ou shomoe Ihudi oḳol eḳloge milia Paulusre doria bisar ḳoranir lagi raz dorbaro nia ḳoila, ¹³“Ou beṭae amrar shoriotor hukumor ulṭa talim dia ḳor, amra-o oula Allar ebadot ḳortam.” ¹⁴Oile Pauluse zebla zobanbondi dita saila, ou shomoe Galione Ihudi oḳolre ḳoila, “O Ihudi oḳol, iṭa zudi kunu oinnae ba dushor ḳam oito te tumrar nalish ami hunlam one. ¹⁵Oile iṭa zebla kunu ḳas buli ba nam ba tumrar shoriotor firka, te ita bishoe-ashoe tumrau foesala ḳorilao, ita mator lagi ami bisar ḳortam sai na.” ¹⁶Ḳoia hari tain adalot taki itare bar ḳori dilaila. ¹⁷Teu manshe Ihudi mosidor ḳadim Susinre doria adalotor samne mair-doir ḳorla. Oile Galione imuka firiau saila na.

Tobliki sofor heshe hirbar Antiokiat

¹⁸Paulus aro bout din Korintot roar bade, mumin oḳolor ges taki bidae loia Shiria desho zaita ḳori Kinkria namor zaz gaṭo aila, Akil ar Fiskilao tan loge aila. Paulusor eḳ mannot asil ḳori ono aia tan matar sul ḳamaia zazo uṭla. ¹⁹Bade Ifis ṭauno aia Pauluse hi duiozonre ono toia, tain mosido hamaia Ihudi oḳolor loge Hozrot Isar befare batchit ḳorla. ²⁰Ihudi oḳole tanre ḳoedin tarar gese roar lagi minot ḳorleo, tain razi oila na. ²¹Tain erar ges taki bidae loia ḳoila, “Inshalla, ami hirbar aimu.” Ḳoia tain Ifis taki zazo ḳori roana oigela.

²²Ar Ḳoisoriat aia harle zaz taki lamia Zeruzalemo gela, gia zomator manshor loge mulaḳat ḳoria hon taki Antiokiat aila. ²³Antiokiat ḳoedin ḳaṭanir bade hikan taki roana dia, Galatia ar Forugia deshor zagae zagae guria mumin oḳolor imani bol mozbut ḳorla.

Hozrot Apollosor toblig kam

²⁴Er maze Apollos namor eḳzon Ihudi Ifis ṭauno aila. Tan baṛi Alekzandria ṭauno, tain shundor ḳori oaz ḳoroin, ar asmani kitabo kub bala buzoin. ²⁵Malikor torikar ilimo tan asil, tain ruhe gorom oia Hozrot Isar befare sohi-shuddo oaz-nosiot ḳorta ar talim dita. Oile tain ḳali Hozrot Ehiar torikar toubar gusol saṛa ar kunu toubar gusolor ḳota zanta na. ²⁶Tain kub himmot ḳoria mosido gia oaz ḳorta. Fiskila ar Akile tan oaz hunia tanre tarar baṛit daot dila, ar Allar rasta aro bala ḳori buzaia dila. ²⁷Bade Apollos zebla Gris desho zaita saila, i shomoe imandar oḳole tanre utshaho dila, ar tanre ḳobul ḳorta ḳori ummot oḳolor gese siṭio dila. Teu tain gia Griso azir oila, ar Allar rohomote zera iman anchila tarar bout faeda oilo. ²⁸Ar Hozrot Isau zen al-Mosi, ou ḳota to tain pak kitab taki forman deḳaia, manshor samne himmot ḳori Ihudi oḳolre ekkere la-zuaf banaila.

Hozrot Paulusor tin nombor sofor (19:1–21:14)

Ifis ṭauno Hozrot Paulus

¹Apollos zebla Korintot asla, ou shomoe Hozrot Paulus Asiya deshor mazedi Ifis ṭauno aila. Hikano ḳoezon ummotor loge deḳa oae, ²tain erare zikaila, “Afnara iman anar shomoe kita Pak Ruh hasil ḳorsla ni?” Tara zuaf dila, “Pak ruh aroḳta kita, ita to amra hunchiu na.” ³Pauluse tarare ḳoila, “Te afnara kun torikae toubar gusol ḳorsla?” Tara ḳoila, “Ehia nobir torikae.” ⁴Ou tain ḳoila, “Guna taki mon bodlaile ze gusol ḳorail oe, oṭau oilo Hozrot Ehiar torikar gusol, oile Ehiae to talim disla, tan bade zein toshrif anra, mani Hozrot Isar ufreo iman ana lagbo.” ⁵I nosiot hunar bade tara Hozrot Isar name toubar gusol ḳorla. ⁶Bade Pauluse tarar ufre at raḳle tara Pak Ruhu faila, teu era nanan gaibi bashae matila ar firaki mat mata dorla. ⁷Era hoḳole milia onuman barozon asla.

⁸Bade tain Ihudir mosido gia eḳ lagare tin mash himmot ḳoria toblig korla, Allar bashshair befare zukti-torko deḳaia tarare buzaila. ⁹Erar maze ḳoezonor dil na-humar oae tara iman anla na, tara hoḳolor gese Isar torikar gibot gaita. Teu Pauluse erar ges taki horia ummot oḳolre algaia tan loge raḳla, ar forteḳ din Turanno namor eḳ ustador ṭongit gia tarare talim dila. ¹⁰Oula dui bosor guzorar bade Asiya deshor Ihudi ar Iunani, hokkolor ḳanou Mabudor kalam fousi gelo.

¹¹Allae Hozrot Paulusor atane asanok keramoti ḳam zair ḳoraila. ¹²Heshe oulao oilo zen, tan gotror ḳafoṛ ba gamsaḳano kunu bemari manshor ḳasat nileu bemar bala oizito, ar zin-buteo bemari saṛia bagita. ¹³Ermaze ḳoezon guria faḳaia ḳaora Ihudi tabzati mullaeo Hozrot Isar nam loia zin-but saṛaito sailo, tara oula ḳoito, “Pauluse zen name toblig koroin, hou Isar duai dia, ami tumrare baroia zaoar hukum diram.” ¹⁴Erar maze Skiba namor eḳzon Ihudi fordan imamor shat fuaeo oula ḳorto. ¹⁵Teu eḳdin bute tarare zuaf dilo, “Ami Isareo sini, Paulusreo sini, oile tumra ḳe?” ¹⁶Ḳoiau ze beṭare bute dorsil hi beṭae tarar ufre fal dia foṛia mair-doir ḳoria tara shato zonre arailo. Maire tarar shoril siṛia-biṛia zoḳom oigelo, tara lemṭa oia i baṛi taki bagila. ¹⁷I ḳobor zebla Ifisor Ihudi ar Iunani oḳole zanla, te tara hokkole ḍoraigela, ar sairobae Hozrot Isar namor mohima zair oilo. ¹⁸Zera Hozrot Isar ufre iman anchil, era boute aia hari kula-mela ḳori tarar bad ḳamor ḳota shikar ar zair ḳorla. ¹⁹Ar zera zadu-ṭunar ḳam ḳorto, tarar mazeo boute tarar zadu-ṭunar boiain ania dola ḳori hoḳolor samne zalailila. I boiaintor dam hishab ḳoria deḳa gelo foinchash azar rufar dinar. ²⁰Ou laḳan ḳori malikor kalam bout baṛilo ar manshor maze kub ḳam ḳorlo.

²¹Ita goṭar bade Pauluse mone mone niot ḳorla, tain Makidonia ar Gris oia Zeruzalemo zaitagi, tain ḳoila, “Zeruzalem zaoar bade ami Rum ṭauno-o zaoa zorur.” ²²Bade tain Timoti ar Irastas namor tan duio ḳadimre Makidoniat faṭaia, nize aro ḳoedin Asiya desho roila.

²³Ou shomoe Isar torikar bishoe loia bout gonḍogul laglo. ²⁴Ḳaron Dimitri name eḳzon baniae Artemis debir mondiror nomunae rufadi huru huru mondir banaito, aro bout baniaeo ou ḳam ḳoria bout lab ḳorto. ²⁵He ou bania oḳolre ar tarar logi oḳolreo ekkano dola ḳoria ḳoilo, “Bai oḳol, tumra to zanrae, i ḳarbar taki amra bala lab fairam. ²⁶Oile tumra deḳrae ar hunraeo, Paulus namor ou beṭae ḳali amrar Ifisou nae, ḳoite gele asta Asiya zuṛi bout manshore ḳoise ar ekin ḳoraise, ator banail deb-debi oḳol bule kunu devtau nae. ²⁷Erlagi oḳon ḍor ḳorer, ḳali amrar ḳarbaroru bodnam oibo ila nae, oile mohadebi Artemisor mondiro beḳama oizibo, ar Asiya deshor hokkol manshe ar hara duniaie milia zen fuza ḳore, taino nizor ijjot araiba.”

²⁸Ita hunia tara gusae aguin oia zure zure sillaia ḳoila, “Ifisiar Artemis debi, zindabad!” ²⁹Loge loge asta ṭauno gonḍogul lagigelo; manshe Makidoniar Gous ar Aristakus namor Paulusor logor duizonre doria, eḳloge fal bandia douṛaia sṭeḍiamo loia gela. ³⁰Hozrot Paulus ou biṛor samne zaita saila, oile mumin oḳole tanre aṭḳailla. ³¹Asiya deshor shorḳari ofisaror maze ḳoezon asla Paulusor dust, era ḳobriadi tanre zanaila, tain hi biṛor samne gia nizor mosibot ḍakia anta na. ³²Biṛor maze manshe kub silla-silli ar geinjam lagaila. Beshir bag manshe zantau na ino kita oise, tara eḳzone eḳ laḳan, aroḳzone aroḳ laḳan matila. ³³Teu ḳoezon Ihudie Sikondor namor eḳzonre samne ṭelia dilo bashon dibar lagi. Tain atdi ishara dila, zate manush nirai oia tan boktita hunoin. ³⁴Oile manshe zebla buzla, eino Ihudi, teu tara aro zure zure onuman dui gonṭa dori sillaia ḳoila, “Ifisiar Artemis debi, zindabad!” ³⁵Heshe ṭaunor searmane manshore nirai ḳoraia ḳoila, “O Ifisia oḳol, ḳoukka sain, kun manushgue na zane zen, i Ifis ṭaun oilo mohan Artemis debir mondir ar asman taki tan zeta murti lamat foṛse er roikka ḳoroneala? ³⁶Ar i hasa ḳota ḳeu zebla ḳonḍaito farto nae, te bebutar laḳan kunu ḳam na ḳoria tumra nirai o. ³⁷Ou manshe to amrar mondiro surio ḳorse na, amrar debir kunu bodnamo ḳorer na, ta-o tumra erare doria ancho. ³⁸Te huno, Dimitri ar tar logor bania oḳolor zudi kunu nalish taḳe, te adalot to kula ase, hakim oḳolo asoin, tara hono gia zarzir mamla-mokoddoma ḳorouk. ³⁹Oile tumrar ar kunu dabi-daoa taḳle ita niom mafik mozliso boia miṭ-maṭ ḳora oibo. ⁴⁰Ashole aizkur i geinjam laganir lagi amrar ufreu dush foṛto fare, i gonḍogul laganir kunu ḳaron deḳaitam fartam nae.” ⁴¹Oḳan ḳoia tain mozlis bangi dila.

Makidonia ar Gris desho duara sofor

¹Geinjam shesh oar bade Hozrot Pauluse mumin oḳolre ḳobordi anaila, tara aia harle tain tarare utshaho dia, sohi-salamote bidae loia Makidoniat zaita ḳori roana oila. ²Makidoniar mazedi zaite zaite mumin oḳolre bout utshaho dia, Gris desho aia azila. ³Ono aia tin mash roar bade zebla zazo ḳori Shiria desho zaita saila, ou shomoe Ihudi oḳole tan bifokke ku-motlob ḳorer hunia, tain Makidoniar mazedi zaita ḳori niot ḳorla. ⁴Ar Biroea ṭaunor Furosor fua Sufatos, Tisholonikir Aristakus ar Sikundos, Dorbi shohoror Gous, Timoti, ar Asiya deshor Tukik ar Tofim, era hokkol Paulusor loge gela. ⁵Era age oia Toruas ṭauno gia amrar lagi bar saoat asla. ⁶Bade Ḳamir Saṛa Ruṭir Id shesh oigele amra zazo ḳori Filifi taki roana dia, fas din bade Toruas aia tarar loge millam, ono shatdin roilam.

Hozrot Pauluse eḳ murdare zinda ḳora

⁷Haftar foela din Isar mezbani ḳaoar lagi amra ekkano dola oile, Paulus bador din zaitagi ḳori maz rait forzonto mumin oḳolor gese oaz ḳorla. ⁸Amra uforor talar ze goro boislam hikano bout batti asil. ⁹Ar Utuḳ namor eḳ zuan fua kiṛkir ufre boat asil, Pauluse bout shomoe dori oaz ḳorae he huni huni gumai gesil, aḳtau he tin tala taki lamat foṛigelo. Teu manshe tare mora halote tulla. ¹⁰Paulus lamat lamia fuar ufre ḳait oia ainja ḳori doria ḳoila, “Tumra uloistol ḳorio na, tar bitre to zan ase.” ¹¹Bade tain hirbar uforor talat gia mezbani ḳaila, ḳaia harle fozor forzonto batchit ḳoria bidae loila. ¹²Er maze ou fuare manshe zita halote baṛit nia zar for nai kushi oila.

¹³Amra age gia zazo ḳori Asus gaṭor bae roana oilam, mono ḳorlam Paulusre hon taki tulmu. Ḳaron tain kial ḳorsla aṭia hikano gia uṭta. ¹⁴Asus aia tain amrar loge milar bade, amra tanre zazo tulia Mitulinit ailam. ¹⁵Bador din amra zaz kulia hikan taki roana oia Kius difor ḳandat ailam; er bador din amra Samus difo roilam, tar bador din gia amra Milita gaṭo biṛilam. ¹⁶Asiya desho Pauluse deri ḳorar kial na oae tain mone mone ṭik korsla, Ifiso na hamaia er galabae zaibagi, tain zoldi ḳori Zeruzalemo gia hari Fonchaisha Id hono adae ḳorta saila.

Ifis zomato aḳeri boean

¹⁷Milita taki Pauluse ḳobria faṭaia Ifisor zomator murobbi oḳolre anaila. ¹⁸Tara aia fousar bade Pauluse ḳoila, “Afnara to zanoin, Asiya desho aia harle ami foela din takiu kila afnaintor loge shomoe ḳaṭaisi. ¹⁹Ihudi oḳolor bout zator ku-foramish taki, tarar fatail fondir mazeo ami furafur norom dile, soukor fani falaia Mabudor gulami ḳorsi. ²⁰Afnarar faeda oibo ila kunu talimu na lukaia furafur zanaisi, kula-mela mozliso ar goro goro gia talim diteo na ḳorsi na. ²¹Ihudi ar Iunanir gese toblig koria buzaisi, tarar gunar mon bodlaia Allar foti oita, ar amrar malik Hozrot Isar ufre iman anta. ²²Ar oḳon Pak Ruhur hukumbondi oia ami Zeruzalemo zairam, hikano amar kun dosha oibo, zani na. ²³Ḳali ou ḳoborḳan zani, Pak Ruhe hokkol ṭauno amare ou ḳota zanaira, toklif ar zel ḳaṭa amar lagi barsar. ²⁴Oileo amar nizor zanor forua ḳori na, amar zanre oto mulloban mono ḳori na. Ami irada ḳora fotor hesh ṭikana forzonto douṛaitam sairam. Allar rohomotor kush-ḳobrir toblig ar ḳezmotor ou ze bar Hozrot Isar ges taki faisi, er injam ditam sairam. ²⁵Oḳon ami eoḳano zani, afnara zerar maze ami Allar bashshair ḳota toblig korram, ou afnaintor logeo ar kunudin deḳa oito nae. ²⁶Erlagi ami aiz afnaintor gese ou zobanbondi diram, hokkolor lour dae taki ami ḳalas. ²⁷Ami Alla Pakor hoḳol laḳan morzir ḳota afnaintor gese boean ḳorte ḳoredi gesi na. ²⁸Afnara zarzir befare hushiar oukka. Pak ruhe afnarare zerar saloḳdar banaisoin, tarar befare hushiar oukka. Allae tan nizor zonredi zerare ḳorid ḳorsoin, hi zomatre furafur deḳa-huna ḳoroukka, zela raḳale tar meṛar falor deḳa-huna ḳore, imam oia afnarao oula ḳoroukka. ²⁹Ami zani, ami zaoar bade tumrar maze fagola bagor surotor manush aia hamaiba, tara nirdoe oia falor bout ḳeti ḳorba. ³⁰Ar afnaintor nizor maz takio ḳeu ḳeu mumin oḳolre tar ḳore neoar lagi, hasa talimre misa ḳoia noea talim bar ḳorbo. ³¹Erlagi afnara hozag roukka, ar mono raḳba, ami tin boros doria rait-din soukor fani falaia afnarare hushiar ḳorte dom loisi na. ³²Oḳon Alla ar tan rohomotor kalamor zimmae ami afnarare shofilam. Allar i kalame afnarare goṛia tulbo ar tan pak bonda oḳolor lagi oada ḳora behesti monjilo fousai dibo. ³³Ami to ḳeuror shuna-rufa ba ḳafoṛ-sufoṛor bae lalos ḳorsi na. ³⁴Afnara nizeu to zanoin, amar ar amar logi oḳolor obab miṭanir lagi ami duio ate ḳam ḳorsi. ³⁵Ami hoḳol laḳan ḳamor maze nomuna deḳaisi, ou laḳan ḳam ḳoria durbol oḳolre shaijjo ḳora zorur. Hozrot Isar talimre mono raḳo, tain nize bataisoin, neoar saite deoa doinno.”

³⁶Oḳan ḳoia harle, Pauluse aṭu gaṛia hoḳolor loge dua ḳorla. ³⁷Bade zomator hoḳole milia kub ḳandon ḳandila, ar Paulusre ainja ḳori doria hunga dila. ³⁸Ḳas ḳori Paulusor ou ḳotar lagi beshi ḳandila, tain ḳoisla, tan muk tara ar deḳta nae. Bade tara tan loge oia gia zazo tulia dila.

Zeruzalemo aḳeri sofor

¹Ifisor zomator murobbi oḳolor ges taki bidae loia, zaz kulia hari amra shuza fote Kus namor difo ailam, bador din amra Rudos difo ailam, hon taki Fatara namor ṭauno gelam. ²Hono gia harle Foinikiat zaora ekkan zaz failam, amra hou zaze roana dilam. ³Ar zebla Saipras dif deḳlam, ou shomoe difor ḍain galabae gia amra Shiria deshor Shur ṭauno aia lamlam. Hikano zazor mal-samana lamai dilo. ⁴Honor mumin oḳolre tukaia hari amra shat din tarar gese roilam; tara Pak Ruhur marfote Paulusre minot ḳorla, tain zanu Zeruzalemo na zain. ⁵Ino ḳoedin ḳaṭanir bade amra hirbar roana oilam, teu tara hokkole bou-baichcha loia ṭaunor bare aia amrare aguai dila. Bade doriar faro amra aṭu gaṛia dua ḳorlam. ⁶Duar bade zarzir fote bidae loia amra zazo uṭlam, ar tara nizor baṛit gelagi.

⁷Shur taki roana oia amra zazor sofor shesh ḳoria Tolimait azilam, honor mumin oḳolre bala-bura zikanir bade amra tarar loge eḳdin roilam. ⁸Bador din amra bidae loia Ḳoisoriat ailam, ar toblig kamor buzurg Filifor baṛit gelam. Ein to Zeruzalemor hou shat ḳadimdaror eḳzon. ⁹Tan sairzon abiati fuṛin asla, era nobir laḳan ohi ḳoita. ¹⁰Bakka ḳoedin hono roar bade Agabus namor eḳzon nobie Ehudia taki toshrif anla. ¹¹Tain aia hari Paulusor ḳomoror taga kulilila, ar iṭadi nizor at-fao bandia ḳoila, “Pak ruhe oula ḳoira, Zeruzalemor Ihudi oḳole ou ḳomoror taga-alare oula banba, ar o-Ihudi oḳolor ato shofia diba.” ¹²Ita hunia hinor manshe ar amra-o Paulusre bout minot ḳorlam, tain zanu Zeruzalemo zaoa bad dilain. ¹³Pauluse ḳoila, “Tumra ita kita lagailae? Ḳandia amar mon bangi dirae ḳene? Hozrot Isar lagi ami Zeruzalemo ḳali bondi oau nae, morteo tiar asi.” ¹⁴Tanre ḳota hunaitam na faria amra nirai oigelam, ar ḳoilam, “Mabudor morzi ḳaim ouk.”

Bondi halote Hozrot Paulus (21:15–28:31)

Hozrot Paulus Zeruzalemo aṭoḳ

¹⁵Bade amra mal-samana gaiṭ bandia Zeruzalemo roana dilam. ¹⁶Ḳoisoria ṭaunor ḳoezon mumino amrar loge aila, ar Saipras difor Menason namor eḳzon furana imandaror baṛit amrare loia gela. En baṛitu amra roar ḳota asil.

¹⁷Zeruzalemo aoar bade mumin oḳole kushi oia amrare ḳobul ḳorla. ¹⁸Bador din Pauluse amrare loia Hozrot Isar bai Iakubor loge mulaḳat ḳorla. Hikano zomator murobbi oḳolo aila. ¹⁹Pauluse erare bala-bura zikaia harle, tan tobligor mazdi Allae kilan o-Ihudi oḳolor maze dini ḳam hasil ḳorsoin, ita hoḳolta eḳ ek kori tarar gese boean ḳorla. ²⁰Ita hunia murobbi oḳole Allar tarif ḳorla ar tanre ḳoila, “Bai, tumi to deḳrae, azar azar Ihudie Hozrot Isar ufre iman anchoin, ar tara hoḳoleu Hozrot Musar shoriotre amol ḳorar kial ase. ²¹Oile tara ou ḳoboro faisoin, o-Ihudi oḳolor loge zeta Ihudi oḳol taḳoin, tarare tumi talim diso Musar shoriot bad dilaita ḳori, tara zanu huruttaintor mosolmani ḳorani bad dilain ar Ihudi oḳolor reoazo na manoin. ²²Te kita ḳora zae? Tara to nichoe hunba tumi aiso. ²³Oḳon amra tumare zela ḳoi, tumi oula ḳorilao. Amrar maze sairzon beṭain asoin, tara ekkan mannot ḳorsoin; ²⁴Tumi tarare loge loia zao, tarar loge gia tumi ar tarar pak-saf oar ḳoros ar matar sul ḳamanir foeshao dilao. Teu hoḳole zanba, tumar name tara zeta ḳobor faisoin, ita kuntau nae, ashole tumi nizeo Musar shoriot ar reoaz manrae. ²⁵Oile zeta o-Ihudi oḳole iman anchoin, tarare amrar ou foesala lekia zanai disi, devtar name niot ḳora ḳani ḳaita na, lou ḳaita na ar gola ṭifia mara kunu zandaror gust ḳaita na, kunu zator zinar ḳamo zaita na.” ²⁶Teu Pauluse hou manush oḳolre loge loia gia, tarar loge nizoreo pak-saf ḳorla. Bador din Baetul-Mukaddoso hamaila, ar tarar pak-saf oar lagi foshu kurbani kundin deoa oibo, eo tariḳ zanai dila.

²⁷Fak-saf oar niomor hi shat din shesh na oiteu, Asiya deshor ḳoezon Ihudie Paulusre Baetul-Mukaddoso dekia, manshore uskaia dia tane dorla. ²⁸Tara sillaia ḳoila, “O Boni Israil oḳol, aguao! Asta duniar manshor gese zegue amrar zatir, amrar shoriotor ar Baetul-Mukaddosor bifokke talim dia gure, ogu hou beṭa! He Iunani oḳolre ono haraia i pak zagaḳanreo nafaḳ banaise.” ²⁹Er age to Ifisor Tofimre Paulusor loge ṭauno sokkoro dekia tara mone mone shondoe ḳorsoin, Pauluse tanre Baetul-Mukaddoso-o haraisoin. ³⁰Teu asta ṭaunor manush gorom oigela, ar eḳloge douṛia aia Paulusre doria Baetul-Mukaddos taki ṭania bare anla, ar loge logeu er duar oḳol bond ḳorilla. ³¹Tara Paulusre marilita saila, oile ou shomoe Ruman sifai oḳolor fordanor gese ḳobor gelo, asta Zeruzalemor maze uloistol lagigese. ³²Loge logeu tain subedar oḳol ar sifai dol loia douṛia tarar gese aila. Manshe sifai ar sifair fordanre dekia Paulusre mair-doir ḳora bond ḳorla. ³³Teu hi ofisare aia Paulusre aṭok koria duigesa sikoldi bandar hukum dila, bade zikaila, “I manushgu ḳe, he kita dush ḳorse?” ³⁴Gonḍogulor maze sillaia ḳeu eḳ laḳan, ḳeu ḳeu aroḳ laḳan ḳoilo. Oile tain balamonte kunta shomzita na faria Paulusre nia kenṭonmenṭo haraia toar hukum dila. ³⁵Paulus siṛir muko zaiteu manshor at taki basanir lagi, sifai oḳole tanre usa ḳoria boia nilagi. ³⁶Manshe ḳore oia misil dita lagla, “Ogure marilao!”

³⁷Sifai oḳole tanre kenṭonmenṭo harai dita saira, ou shomoe tain fordan ofisarre Iunani bashae soal ḳorla, “Ami afnar gese kunta mattam farmu ni?” Ofisare ḳoila, “Tumi kita Iunani basha zano ni? ³⁸Te tumi kita hou Mishori beṭa ni, zegue ḳoedin age laṛai ḳoria, sair azar shontrashire loge loia morubumit gesil?” ³⁹Pauluse zuaf dila, “Sab, ami eḳzon Ihudi, Kilikiar Tarsho shohoror manush, ami zeta mone ḳoe ita ṭaunor manush nae. Ami afnare minot ḳorram, doya ḳori manshor gese amare matar shuzugkan deukka.” ⁴⁰Tain shuzug deoar bade Pauluse siṛir ufre ubaia, manshore nirai oar lagi atdi ishara dila, tara nirai oia harle tain Ibrani bashae ḳoat lagla.

Zeruzalemo Hozrot Paulusor zobanbondi

¹Pauluse ḳoila, “O baba oḳol, bai oḳol, ami oḳon amar nizor zobanbondi diram, afnara hunoukka.” ²Tain Ibrani bashae matra dekia manush ekkere nirai oigela. Ou tain ḳoila,

³“Ami eḳzon Ihudi. Kilikiar Tarsho shohoro amar zonom oise; oile ou Zeruzalem ṭauno aia ami manush oisi, allama Gomolielor faor ḳandat boia ami amrar moe-murobbi oḳolor shoriot ar ḳaeda-ḳanunor shullo-ana talim faisi. Ar aiz afnara zela allaoalagiri deḳaira, ami nizeo age oula allaoala aslam. ⁴Ami Isar foti oḳolre zan-foran shofia zulum ar ḳatol ḳortam, beṭain-beṭinre bandia nia zel ḳanat haraitam. ⁵Ita to fordan imam sab ar deshor fotua komiṭir hokkol moe-murobbi oḳoleo bala ḳori zanoin. Ami tarar ges taki siṭi loia, Damesk shohoror amrar baiainre dibar lagi roana oislam. Hono zera Isar torikat aisla, tarare bondi ḳoria Zeruzalemo ania shaza deoar lagi hono zaoat aslam. ⁶Zaite zaite Dameskor ḳandat gia harle beil duifor oigelo, aḳtau amar sairo galabae asmani for somḳaia uṭlo. ⁷Ami maṭit foṛigelam ar hunlam, amare ḳeu ḍakia ḳoira, Shoul, Shoul, tumi amare ḳene toklif dirae? ⁸Ami zikailam, Huzur, afne ḳe? Tain ḳoila, Ami Nasarotor Isa, zenre tumi toklif dirae. ⁹Zera amar loge asil tara hoḳoleu i for oise ḳori deḳla, oile zein amar loge batchit ḳorsila, tan buli tara hunla na. ¹⁰Bade ami ḳoilam, Malik, te ami kita ḳortam? Tain ḳoila, Uṭo, Damesko roana deo, tumar zeta zeta ḳorar goroz ase, ita tumare hono zanail oibo. ¹¹Ar hi somḳanie amar souk anda oigesil gotike, amar logi oḳole amar ato doria Dameskor bae loia roana dila.

¹²“Hono Ononio namor eḳzon manush asla, tain Hozrot Musar shoriot mafik kub forezgar manush. Hikanor hoḳol Ihudir gese tain kub ijjoti zon. ¹³Tain aia amar ḳasat ubaia ḳoila, bai Shoul, tumar deḳar takkot firot auk. Ar loge logeu ami tanre deḳlam. ¹⁴Ou tain ḳoila, amrar baf-dada oḳolor Allae tumare fosond ḳorsoin, tumi zanu tan morzi zantae faro, ar hou masum bonda Hozrot Isareo deḳtae faro, ar tan zobanor bulio huntae faro. ¹⁵Tumi tan shakki oibae, zeta zeta deḳso ar huncho ita hokkolta tamam duniare zanaibae. ¹⁶Oḳon ar deri ḳorrae ḳene? Uṭo, tane ḍaḳo, ar toubar gusol ḳoria tumar hoḳol guna doia falao.

¹⁷“Bade ami Zeruzalemo firot aia harle eḳdin Baetul-Mukaddosor bitre dua ḳorat aslam, ou shomoe unganir haloto aḳtau tan doroshon failam. ¹⁸Ami deḳlam, tain amare ḳoira, zoldi ḳori uṭo, oḳonu Zeruzalem saṛia baro, ḳaron amar befare tumar mukor kunu shakki inor manshe hunto nae. ¹⁹Ami ḳoilam, Malik, i hoḳol mansheu to zanoin, zera tumar ufre iman anta, erare zelo harani ar mair-doir ḳorar lagi, ami hokkol mosidainto zaitam; ²⁰tumar shakki Stifanre zebla mara oisil, hi shomoe ami nize hikano ubaia shae deoat aslam, ar zera tanre marsil, ami tarar ḳafoṛ-sufoṛ fara dislam. ²¹Teu Malike amare ḳoila, Tumi roana deo, ami duroir bin zati oḳolor gese tumare bezimu.”

²²Manshe oto shomoe dori Paulusor boean hunat asla, bade o-Ihudir nam hunia-u tara sillaia ḳoila, “Ogure dunia taki horai deo, igu basia roar zuka nae!” ²³Manshe zebla sillani dorla ar ḳafoṛ-sufoṛ falaia, asmano duil uṛanit lagla, ²⁴ou shomoe fordan ofisare Paulusre kenṭonmenṭo loia zaoar hukum dila, ar ḳoila, “Ere sabuk maria zera ḳoro, ḳene manshe tar birudde ila silla-silli ḳorer.” ²⁵Paulusre zebla sabuk marar lagi bandila, i shomoe sho-sifair eḳ subedar hikano ubat asla, teu Pauluse tanre ḳoila, “Oḳono zare dushi shaibosto ḳora oise na, ila eḳzon Ruman manshore sabuk mara afnaintor lagi ṭik or ni?” ²⁶Ikan hunia hi subedare fordan ofisarre gia ḳoila, “Sar, afne ita kita ḳorat lagsoin? I beṭa to Ruman manush.” ²⁷Teu tain Paulusor daro gia zikaila, “Ḳo sain, tumi Ruman ni?” Pauluse ḳoila, “Ji-oe.” ²⁸Ofisare ḳoila, “Ami bout ṭeḳa-foesha ḳoros ḳoria Ruman siṭizen oar shuzug loisi.” Pauluse ḳoila, “Ami zonom shutreu Ruman.” ²⁹Ikan hunia-u ze sifaie tanre zera ḳorat zaoat asla, loge logeu tara hon tone horia gelagi. Ar tain Ruman manush oileo tanre bandisla ḳori fordan ofisareo ḍoraigela.

³⁰Oile bador din hirbar Paulusre zikaita saila, kitar lagi Ihudi oḳole tanre dush dira, teu fordan ofisare Paulusor band kuli dila, boṛo imam oḳol ar fotua komiṭir hoḳolre ekkano dola oar hukum dila. Bade Paulusre lamaia tarar samne azir ḳorla.

¹Pauluse fotua komiṭir manshor bae dian dori saia ḳoila, “O baisab oḳol, ami to oḳon forzonto amar bibeḳ forishkar rakia, Allar bonda hishabe daeitto adae ḳorram.” ²Ikan hunia fordan imam Ononioe, Paulusor galat zera ubat asil, tarare ḳoila, “Ogur muko soṛ maro.” ³Teu Pauluse tanre ḳoila, “O bonḍo, Allae tumareo soṛ marba. Tumi shoriotor aine amar bisar ḳorat boia, shoriotor borkelaf ḳoria amare soṛ marar hukum dirae?” ⁴Zera Paulusor ḳandat ubaisil, tara tanre ḳoilo, “Tumi Allar goror fordan imam sabre beijjot ḳorrae ni?” ⁵Pauluse ḳoila, “Bai oḳol, ami to zani na ein fordan imam ḳori. Arnae ila ḳoilam na one, Allar kalamo to leḳa ase, Tumar nizor zatir murobbire kunu gali dio na.”

⁶Pauluse zebla buzla hi mozlisor kisu manush Siddekia mozobor ar kisu oila Forishi mozobor, ou tain mozlisor maze zure zure ḳoila, “O bai oḳol, ami eḳzon Forishi ar Forishir aolad. Murda oḳol hirbar zinda oia uṭba, ou mator lagi oḳon amar bisar ḳora or.” ⁷Tain ikan ḳoar loge logeu Forishi ar Siddekia oḳolor maze ḳaijja lagigelo, mozlisor maze dui dol oigela. ⁸Ḳaron Siddekia oḳolor ekin oilo, murda oḳol ar zinda oita nae, firista ba ruh ita kunuta nai. Oile Forishi oḳole ekin ḳoroin ita hoḳolta-u asoin. ⁹I gonḍogul bout boṛo oigelo, teu Forishi dolor ḳoezon moulanae ubaia torka-torki ḳori ḳoila, “Amra to i manshor kunu dush deḳram na. Kunu ruh ba firistae to tar loge ila batchit ḳorta faroin.” ¹⁰Ou laḳan ḳori betaea gonḍogul laglo, erdae fordan ofisare ḍoraigela, manshe Paulusre ṭukra ṭukra ḳori siṛilaiba, ou tain sifai oḳolre hukum dila, tara lamia gia Paulusre manshor ges taki horaia nia kenṭonmenṭo haraila.

¹¹Bade raitor bala malik Isae Paulusor gese ubaia ḳoila, “Himmot ḳoro, amar name Zeruzalemo zela shakki diso, Rum ṭauno-o oula shakki dite oibo.”

Hozrot Paulusre marar shoṛozontro

¹²Bador din fozoror oḳto Ihudi oḳole eḳ dagabazi ḳorla, tara ḳosom ḳaia ḳoila, Paulusre marar ag forzonto tara dana-fani kunta muko dita nae. ¹³Sallish zonoro beshi manush ekkano oia i dagabazir ḳosom ḳaila. ¹⁴Tara boṛo imam ar murobbi oḳolor gese gia ḳoila, “Amra ḳoṛaḳoṛi ḳosom ḳaisi, Paulusre na mara forzonto dana-fani kunta muko ditam nae. ¹⁵Oḳon afnara ar fotua komiṭir hoḳole fordan ofisaror gese ou abdar ḳoroukka zen, afnara aro balaṭike i bisaror todonto ḳorta saira, ou usillae he afnaintor gese aoar ageu, fotor maze amra tare marilimu.”

¹⁶Oile Paulusor bagnae tarar i dagabazir ḳobor hunia, kenṭonmenṭo gia Paulusre ita zanaila. ¹⁷Teu Pauluse sho-sifair eḳzon subedarre anaia ḳoila, “Ou fuagure fordan ofisar sabor gese loia zaukka, he tanre kita ḳoito aise.” ¹⁸Ou hi subedare tare loia fordan ofisaror gese gia ḳoila, “Bondi Pauluse amare anaia ḳoila, ou fuagure afnar gese loia aitam, he afnar gese kita ḳoito sar.” ¹⁹Fordan ofisare tar ato doria eḳ galabae loia gia ḳoila, “Tumi amare kita ḳoitae sairae?” ²⁰He ḳoilo, “Ihudi oḳole niot ḳorsoin, tara afnar gese ou abdar ḳorba, Paulusor bisar aro balaṭike todonto ḳorar lagi afne zanu samnor ḳail tanre deshor fotua komiṭir samne azir ḳorain. ²¹Afne tarar ḳotae razi oin na zanu, era sallish zonoro beshi manshe lukaia Paulusor lagi bar saira, tara ḳosom ḳaise, tanre na mara forzonto dana-fani kunta muko dito nae. Tara oḳon tiar oia foto boise, ḳali afnar razi oar bar saira.” ²²Fordan ofisare tare ou hukum dia bidae dila, “Tumi amar gese i ḳobor ḳoiso ḳori ḳeurore hunaio na.”

Hozrot Paulusre Ḳoisoriat faṭani

²³Bade tain sho-sifair duizon subedarre anaia ḳoila, “Dui-sho zon sifai, shottoir zon guṛa-ala sifai, ar dui-sho zon sulfi-ala sifai aiz rait noeṭat Ḳoisoriat zaoar lagi tiar ḳoro. ²⁴Ar Paulusor lagio guṛar bondobosto ḳoro, tare zanu nirafode deshor fordan hakim Filiksor gese fousail oe.” ²⁵Ḳoia, tain ou siṭi leḳla,

²⁶“Manonio fordan hakim sab, ami Keladus Lusias, afnare salam zanairam. ²⁷Ihudi oḳole ou manushgure doria zane marilita saisla, ami hunlam he eḳzon Ruman manush, hunia amar sifai oḳol loia gia tare basailam. ²⁸Bade ami huntam sailam manshe tar kita dush faisoin, erdae tare nia tarar mozliso azir ḳorlam. ²⁹Teu ami buzlam, tarar shoriotor kunu fotuar lagi er ufre dush dira, oile zelo harani ba zane marar zuka kunu nalish faisi na. ³⁰Ar ami hunlam, tar birudde dagabazi ḳora or, teu zoldi ḳori tare afnar gese faṭai dilam. Tar birudde zera nalish dise, tarareo ḳoisi, tarar kunu nalish taḳle afnar gese gia hunaita.”

³¹Sifai oḳole fordan ofisaror hukum mafik Paulusre loia raitor bala Antifatri ṭauno gela. ³²Bador din guṛa-ala sifai oḳolor loge Paulusre bidae dia baki sifai oḳol kenṭonmenṭo guria aila. ³³Guṛa-ala sifai oḳole siṭi ar Paulusre loia Ḳoisoriat fousia harle deshor fordan hakimor ato shomzai dila. ³⁴Tain i siṭi foṛia Paulusre zikaila, “Tumi kun deshor manush?” Paulus Kilikiar manush ikan hunia tain ḳoila, ³⁵“Tumare zera dusher tara ikano aia harle, ami tumar zobanbondi hunmu.” Bade tain hukum dila, Paulusre nia Raza Herudor baṛir zelo haranir lagi.

Adaloto Hozrot Paulus

¹Fas din Bade fordan imam Ononioe ḳoezon Ihudi murobbi ar Tortullo namor eḳzon ukilre loia Ḳoisoriat gela, gia fordan hakimor adaloto Hozrot Paulusor birudde nalish dakil ḳorla. ²Paulusre ania adaloto azir ḳora oilo. Bade ukil Tortulloe ou nalish gaila,

“Manonio hakim sab, afnar shashono roia amra bout din taki boṛo shantie asi. Afne afnar aḳol-hekmot dia i zatir bout balai ḳorra. ³Erlagi amra hamesha hoḳol zagat afnar gunogan gai. ⁴Amra afnar mulloban shomoe nosṭo ḳortam sairam na, meherbani ḳoria hunle, amrar nalishḳan dui-sair ḳotae ḳoilimu. ⁵Sab, amra deḳsi, ou manushgu boṛo eḳ afod oia azise. He Nasara namor eḳ bidormi dolor ustad. Hamesha ḳali hangama lagae, duniar hoḳol Ihudir maze doladoli laganiu tar ḳam. ^6-7He amrar Baetul-Mukaddosreo nafaḳ banaito saisil, erdae amra tare aṭok korsi. ⁸Ar ou zeta nalish dilam, afne nize tare zera ḳorleu ita hoḳolta baroizibo.” ⁹Ukilor loge oia Ihudi oḳoleo ita hokkolta hasa ḳoia shae dila.

¹⁰Teu fordan hakim sabe Paulusre ishara dila, Pauluse ḳoila, “Sab, afne bout boros dori i Ihudi zatir bisar ḳoria aira, iṭa hunia ami kub kushi oia amar zobanbondi diram. ¹¹Afne tallash ḳorleu zaniliba, oḳono baro din oise na, ami ebadot ḳorar lagi Zeruzalemo geslam. ¹²Ou zera amar befare nalish dira, tara ḳeu amare Baetul-Mukaddoso kunu manshor loge hangama ḳorat deḳsoin na. Ṭaunor kunuḳano ba kunu mosido-o manshore uskaia deoat amare faisoin na. ¹³Oḳon tara amar zeta dush deḳaira, itar kunu formano tara dita farta nae. ¹⁴Oile ami afnar gese shikar ḳorram, era zeḳṭare bidormi dol ḳoira, hou Isa al-Mosir torikae ami amar moe-murobbi oḳolor Allar ebadot ḳori. Tourat kitabor batail hoḳol hukum-ahkam ar tamam nobi oḳolor kitabre ami ekin ḳori. ¹⁵Ar era zelan ekin ḳoroin, amio oula Allar ufre ekin ḳori, forezgar ba gunagar hoḳolreu morar bade hirbar zinda ḳora oibo. ¹⁶Erdae ami Allar gese ar manshor geseo hamesha amar bibeḳ forishkar raḳtam sai. ¹⁷Bout boros bade ami Zeruzalemo geslam, kurbani ditam ar amar nizor zatir gorib oḳolre dan-ḳoerat bilaitam ḳori. ¹⁸Te ami pak-saf oia zebla Baetul-Mukaddoso hamailam, ou shomoe tara amare deḳsoin. Amar gese kunu biṛo oise na, ba kunu gonḍogulo oise na. ¹⁹Ḳali Asiya deshor ḳoezon Ihudi hono asla. Amar ufre kunu nalish taḳle hou Ihudi oḳole afnar gese aia nalish dita asil. ²⁰Arnae ono zera aisoin erau ḳoukka, ami zebla fotua komiṭir samne ubaislam, ou shomoe tara amar kita dush faisla? ²¹Kuntau na, ḳali ekkan mat ami zure zure matislam zen, murda oḳol hirbar zinda oia uṭar musla loia aiz afnaintor samne amar bisar ḳora or.”

²²Hakim Filikse Hozrot Isar torikar befare kub bala ḳori zanta, erdae tain bisar bond ḳoria ḳoila, “Sifair fordan ofisar Lusias aia harle ami tumrar bisaror foesala ḳormu.” ²³Tain sho-sifair subedarre hukum dila, “Paulusre aṭoḳ raḳo, oile tare maear nozore rakio, tar ḳesh-kuṭume tar ḳezmot ḳorat aile bada dio na.”

²⁴Ḳoedin bade Filikse tan Ihudi bou Drusillare loge loia aia Paulusre ḳobordi anaila, ar Paulusor muk taki Isa al-Mosir ufre iman anar boeani hunla. ²⁵Pauluse zebla hok fote sola, nizore domaia raḳa, ar hashoror bisaror ḳota boean ḳorla, Filikse ita hunia ḍoraigela. Ḍoraia ḳoila, “Tumi oḳon zaogi, shomoe shuzug oile ami tumare ḳobordi anaimu.” ²⁶Tan mone mone asil, Pauluse tanre kisu gush diba, erlagi tain bare bare Paulusre anaia gof ḳorta. ²⁷Dui boros faronir bade Forkio Fistos aia Filiksor godit boila. Filikse Ihudi oḳolre kushi ḳorta ḳori Paulusre zelo toia gelagi.

Adaloto Hozrot Paulusor afil

¹I desho aoar tin din bade Fistos Ḳoisoria taki Zeruzalemo gela. ²Ou shomoe boṛo imam ar Ihudi neta oḳole tan gese aia Paulusor befare nalish dila. Tara Fistosor gese kub minot-ḳajji ḳori ḳoila, ³tain zanu meherbani ḳori Paulusre Zeruzalemo anain. Tarar motlob asil, Paulusre anar shomoe fotor maze lukaia roia marilita. ⁴Hakim Fistose tarare ḳoila, “Paulusre to Ḳoisoriat aṭoḳ raḳa oise, ar amio kub tagda ḳori hikano zairam. ⁵Te tumrar maz taki buzdar ḳoezon amar loge aio, he kunu dush ḳorle er nalish dibae.”

⁶Fistos tarar loge aṭ-dosh din roia harle Ḳoisoriat gelagi. Gia bador din tain adaloto boia, Paulusre tan samne azir ḳorar hukum dila. ⁷Zeta Ihudi oḳol Zeruzalem taki aisla, Paulus hino azir oar bade tara tanre sairobae beria ubaia kub dusha-dushi ḳorla, oile itar kunu forman dita farla na. ⁸Ou Pauluse nizor zobanbondi dila, “Ami to Ihudi oḳolor shoriot, Baetul-Mukaddos, ba Ruman bashsha Ḳoisoror birudde kunu dush ḳorsi na.” ⁹Oile Fistose Ihudi oḳolre kushi ḳorar kial oae tain Paulusre zikaila, “Ou mamlar bisar ami Zeruzalemo ḳortam sairam, tumi hikano zaite razi aso ni?” ¹⁰Pauluse zuaf dila, “Ami to Ruman adalotor samne azir oisi, ar ou adalotou amar bisar oaḳan zorur. Afne nizeo bala ḳori zanoin, ami Ihudi oḳolor loge kunu oinnae ḳorsi na. ¹¹Ta-o amar kunu ḳosur oile, moutor shaza faoar zuka kunu dush faile, ami morte razi asi. Oile era amar birudde zeta dush dira, ita zudi hasa na oe, te amare tarar ato saṛi deoar eḳtiar ḳeuror nai. Erdae ami bashsha Ḳoisoror gese afil ḳorram.” ¹²Ikan hunia Fistose tan uzir-naziror loge foramish ḳori ḳoila, “Tumi zebla bashshar gese afil ḳorlae, te bashshar gese-u zaibae.”

Raza Agrippor gese Hozrot Paulusor zobanbondi

¹³Ḳoedin bade Ihudi oḳolor raza Agrippo ar tan boin rani Bornikie, noea hakim Fistosre salam zananir lagi Ḳoisoriat aila. ¹⁴Tara ikano ḳoedin roiba gotike, Fistose Paulusor mamlar ḳota razare zanaila. Tain ḳoila, “Filikse eḳzon manshore zelo toia gesoin. ¹⁵Ami zebla Zeruzalemo geslam, ou shomoe honor boṛo imam ar Ihudi murobbi oḳole ou beṭar birudde nalish dia tar shaza saisoin. ¹⁶Ami tarare ḳoislam, zar birudde nalish deoa oe, ar zera i nalish dein, hi badi-bibadir mukamuki zobanbondi ar zera na oile, ashamire kunu shaza deoar eḳtiar Ruman aino nai. ¹⁷Teu tara hoḳol ono aia harle, ami bador dinu adaloto boia hou ashamire samne anar hukum dilam. ¹⁸Zera tar birudde nalish disla tarar zobanbondi hunlam, oile ami zela onuman ḳorslam, ila kunu nalish tara disoin na. ¹⁹Ḳali tarar nizor dormor ḳota, ar Isa namor kunu eḳzon mora manshor ḳota, Pauluse enre zinda ḳoia dabi ḳorer, ota loia tara adaloto nalish dise. ²⁰Ar ita kila tallash ḳortam, ikan malum na oae ami tare zikailam, he Zeruzalemo gia i mamlar foesala ḳorte razi ase ni. ²¹He razi na oia, afil ḳoria bashshar raeor lagi bar saoae, ami tare bashsha Ḳoisoror gese faṭanir ag forzonto aṭoḳ raḳar hukum disi.” ²²Ou raza Agrippe Fistosre ḳoila, “Ami nize tar zobanbondi huntam sai.” Fistose zuaf dila, “Te ḳail hunbane.”

²³Bador din raza Agrippo ar rani Borniki bout dumdam ḳori aila, tain sifair fordan ofisar oḳol, ṭaunor goinno-mainno manshore loia adaloto hamaila. Fistose hukum dia Paulusreo ono anaila. ²⁴Bade Fistose ḳoila, “Mohan raza Agrippo, ar adaloto azir goinno-mainno sab oḳol, afnara hoḳole ou besaṛare deḳra. Hoḳol Ihudie milia Zeruzalem ar Ḳoisoriat amar gese tar bisar saia misil dia ḳoisoin, tare ḳotom ḳoro. ²⁵Oile ami deḳlam, moutor shaza deoar zuka kunu dush tar nai. Ta-o he nize bashshar gese afil ḳorae, ami tare tan gese faṭanir kial ḳorsi. ²⁶Oile mohan bashshar gese leḳtam, ila kunu dush fairam na gotike, ami shroddeo raza Agrippo ar afnara hoḳolor samne tare azir ḳorsi. Afnara zera ḳorle leḳar zuka kunta faimu ḳori mono ḳorram. ²⁷Ḳaron ami mono ḳori, kunu bondire salan deoar bala tar dush oḳol zananikan zorur.”

Razar samne Hozrot Paulusor zobanbondi

¹Ikan hunia raza Agrippe Paulusre ḳoila, “Tumar zobanbondi ḳoar lagi onumoti dilam.” Teu Pauluse at zuṛ ḳoria nizor zobanbondi ḳoila, ²“Manonio raza namdar, Ihudi oḳole amar birudde zeta nalish disoin, ita befare aiz afnar gese amar zobanbondi hunanir shuzug faia, ami nizore baiggoman mono ḳorram. ³Ḳas ḳori, Ihudi oḳolor hoḳol laḳan sal-cholon ar tarar fitna oḳol afnar zana ase. Erdae aroz ḳorram, meherbani ḳori afne amar matḳanain hunba.

⁴“Huruman toneu nizor elaḳat amar sal-cholon kila asil, bade Zeruzalemo aia kilaḳan solchi, ita to tamam Ihudi oḳole zanoin. ⁵Tara to bout din dori amare sinoin gotike, tara kial ḳorle i shakki dita farba, amrar dormor maze Forishi namor ze moulobadi dol ase, ami ou Forishi torikae zindegi ḳaṭaitam. ⁶Allae amrar moe-murobbi oḳolor gese zeta oada ḳorsila, hou oadae ami borosha ḳori, erlagi aiz amar bisar or. ⁷Amrar baro ḳandanor manshe rait-din dile-zane ebadoti ḳoria, hou oadar fol deḳar ashat asoin. Raza namdar, hou ashar lagiu Ihudi oḳole amare dushira. ⁸Allae murdare zinda ḳoria tuloin, ikan ḳene afnara bishash ḳorta faroin na?

⁹“Ami to mono ḳortam, Nasarotor Isa namor birudde, hoḳol nomunar ḳam ḳora amar lagi forz. ¹⁰Ar Zeruzalemo ami ola ḳorsio. Boṛo imam oḳolor onumoti loia Isar ummot oḳolre ami zelo haraitam. Tarare ḳatol ḳorar bala ami tarar birudde buṭ ditam. ¹¹Ami hoḳol mosidainto gia bare bare tarare shaza ditam. Isar torika taki tarare firaia, Isar name lannot dita ḳori tarar ufre zur-zulum ḳortam. Erar ufre amar oto gusa asil zen, erare zulum ḳorar lagi ami bara deshor ṭauno-o zaitam.

¹²“Oula eḳbar boṛo imam oḳolor ges taki ḳemota ar hukumzari loia ami Damesko zaoat aslam. ¹³Ar raza namdar, ou shomoe beil duifor oigese. Aḳtau deḳlam, amar ar amar logor hoḳolor sairobae shuruz taki aro beshi forala eḳ rushoni, asman tone zoli uṭlo. ¹⁴Ou amra hoḳol maṭit foṛigelam ar ami hunlam, Ibrani bashae ḳeu amare ḳoira, Shoul, Shoul, tumi ḳene amar ufre zulum ḳorrae? Suḳa faizono lat maria nizor ḳeti ḳorrae na ni? ¹⁵Teu ami zikailam, munib, afne ḳe? Munibe zuaf dila, ami Isa, zenre tumi zulum ḳorrae. ¹⁶Oḳon uṭo, faot bordi ubao. Tumi oḳon zeta deḳso ar zeta tumare deḳaimu, ita hoḳoltar shakki ar ḳezmotgar bananir kiale, ami nize tumare deḳa dilam. ¹⁷Ami tumare o-Ihudi oḳolor gese faṭaiar, tarar ar tumar nizor zatir at taki ami tumare basaimu. ¹⁸Tumi tarar souk kulia dibae, tara zanu andair taki nuror bae, shoetanor doḳol taki Allar bae firia ain, amar ufre iman ania gunar mafi faia, forezgar bonda oḳolor maze tarao dakil oin.

¹⁹“Manonio raza namdar, behesti i doroshonre ami falaitam farlam na. ²⁰Erdae foela Dameskor manshor gese, bade Zeruzalemo, Ehudia zilar hoḳol zagat ar o-Ihudi oḳolor geseo toblig korlam. Tarare ḳoilam, touba ḳoria Allar bae firo, ar ou laḳan amol ḳoro, zeta dekia forman mile tumra hasaror touba ḳorso. ²¹Ou ḳarone Ihudi oḳole Baetul-Mukaddoso doria amare marilita saisoin. ²²Oile Allar shaijjoe ami oḳon forzonto ṭikia asi, ar huru-boṛo hoḳolor samne ubaia shakkio diram. Hozrot Musae ar tamam nobi oḳole zeta goṭibo ḳori bataia gesoin, itar bara ami kuntau ḳoiram na. ²³Era ḳoisoin, al-Mosie toklif shoijjo ḳorba, tainu foela murda taki zinda oia uṭia hari tan nizor zati, ar o-Ihudi oḳolor geseo nuror torikar ḳota toblig korba.”

²⁴Pauluse zebla ou laḳan zobanbondi dira, aḳtau Fistose tanre zure damki mari ḳoila, “Paulus, tumi to fagol oigeso. Tumi bout leḳa-foṛa ḳorso, ou leḳa-foṛae tumare fagol banailise.”

²⁵Pauluse zuaf dila, “Ji na, hakim sab, ami fagol nae. Ami to hok ar zuktir mat matram. ²⁶Raza namdare to ita hokkoltau zanoin, ar ami himmot ḳoria tan samne kula-mela matiram. Ami furafur zani, ita hokkoltau raza namdaror malum ase, ita to kunu andarir maze lukaia goṭse na.

²⁷“Te manonio raza namdar, afne kita nobi oḳolre ekin ḳoroin ni? Ami to zani, afneo ḳoroin.” ²⁸Ou Agrippe ḳoila, “Tumi kita oto zoldi amareo al-Mosir torikat nitaegi sairae ni?”

²⁹Pauluse ḳoila, “Ami Allar gese ou dua ḳorram, zoldi ouk ba derie ouk, ḳali afne nae, zoto manshe amar aizkur i zobanbondi hunra, era hokkolu amar laḳan bonizaukka. Ḳali ou sikol bad dia.”

³⁰Teu raza, deshor fordan hakim, rani Borniki ar tarar loge adalotor hoḳol manush ubai gela. ³¹Bade tara baronir fote eḳe-oinne ḳoila, “I besaṛae to moutor shaza ba zel ḳaṭar zuka kuntau ḳorse na.” ³²Raza Agrippe Fistosre ḳoila, “He zudi bashshar gese afil na ḳorto, te tare oḳon ḳalas deoa gelo one.”

Hozrot Paulus Rum ṭaunor muka roana

¹Hakimor foesala mafik zazo ḳoria amrare Itali desho faṭanir shomoe aile, Paulus ar aro ḳoezon ḳoedire Zulio namor eḳzon sho-sifair subedaror ato shomzai dila. Zulio asla bashsha Ḳoisoror afon sifai dolor eḳzon subedar. ²Bade amra Adramuttio gaṭor oula eḳ zazo oia roana dilam, zeḳan Asiya deshor bout zaz gaṭo zaoar lagi zuit ḳora oise. Ar Makidonia deshor Tisholoniki ṭaunor Aristakus amrar loge asla. ³Bador din amrar zaz gia Sidono biṛlo. Subedar Zulioe Paulusor loge kub bala bebohar ḳorla. Tain tan dust oḳolor gese gia, nizor zoruri goroz kulanir izazot dila. ⁴Bade hi zaga taki hirbar zaz saṛlo, ar amrar ulṭamuka batash deoae, amra Saipras difor zebae batash asil na hobaedi gelam. ⁵Gia Kilikia ar Pamfuliar samnor shagor faroia Lukia deshor Mura ṭauno aia azilam. ⁶Subedare hikano Itali desho zaora, Alekzandriar ekkan zaz faia, hou zazo ḳori amrare loia roana dila. ⁷Amrar zazḳan kub aste aste solia bout din bade ḳoshṭo ḳori Klid ṭaunor ḳandat aia azilo, oile batashor lagi amra ar shohoze aguaitam farlam na. Teu amra ḳom batashedi Salmunar ḳandabae gia Kriti difor aoṛedi zaoat laglam. ⁸Ar doriar faror ḳandabae ḳoshṭo ḳoria zaite zaite, ‘Shundor Longorḳana’ namor eḳ huru zaz gaṭo ailam, er ḳandat asil Lasea ṭaun.

⁹Ou laḳan bout din guzori gelo, ruzar idor din shesh oia tuṛa tuṛa shit aise. I shomoe zaze sofor ḳora kub bifod. Teu Pauluse zazor manshore foramish dila. ¹⁰Tain ḳoila, “Sab oḳol, ami deḳram, i soforo amrar bout mosibot ar ḳeti oibo. Ita ḳali zaz ba mal-samanar nae, amrar zanoro ḳeti oibo.” ¹¹Oile subedare Paulusor ḳota na mania, zazor malik ar kefṭinor ḳota hunla. ¹²Ar i longorḳanat shitor dino roite shubida oito nae gotike, beshir bag manshe hin taki zaoar lagi foramish dila. Tara saila kunumonte Finiks gaṭo fousia shitor din ḳaṭaita. I gaṭ asil Kriti difo, er uttor-fochchim ar dokkin-fochchim dik kula asil.

Doriar tufane bedisha zaz

¹³Bade zebla aste aste douknor batash salu oilo, ou tara mono ḳorla, tara zela asha ḳorsla olau oise. Erdae tara zazor longor kulia Kriti difor galabae roana dilo. ¹⁴Oile tuṛa badeu hi faro taki ian-kuni namor kub bezuita eḳ tufan ailo. ¹⁵Amrar zaz tufanor maze foṛlo, tufanor ṭela mukabila ḳortam na faria, zazre batashor tale tale baṭiol dilam. ¹⁶Bade Kouda namor eḳ huru difor aoṛedi gia, zazor logor barki naoḳanre amra bout ḳoshṭo ḳori banga taki basailam. ¹⁷Manshe naore ṭania nia zazor ufre tulla, ar zazor toḳtainre doṛi dia doṛo ḳori bandila, zate tufane na bange. Bade Surti namor shagoror soro zaz lagizibar ḍore, fal lamaia zazre emne batash baṭiole saṛi dilam. ¹⁸Tufane zazre omon laḳan goṛa-goṛi shuru ḳorlo, erdae tara bador din zazor mal-samana fanit falai dila. ¹⁹Tin dinor din tara nizor ate zazor shaz-shoronjamo fanit falai dila. ²⁰Bout din taki san-shuruz kun zinish ita na deḳae, ar tufanor zur kub beshi oae, amra zane basar asha saṛi dilam.

²¹Zazor manush bout din dori ufash roae Pauluse ubaia tarare ḳoila, “O baisab oḳol, amar ḳota hunia Kriti dif taki zazḳanre na saṛle, i mosibot ar ḳeti taki afnara basla one. ²²Oile oḳon ami afnarare ou foramish diram, afnara monor maze bol raḳoukka, amra ḳeu zane mortam nae, ḳali zazḳan binash oizibo. ²³Ami ze Allar ebadot-bondegi ḳori, hou Allar eḳ firistae goto rait amar ḳandat ubaia ḳoisoin, ²⁴Paulus, ḍoraio na, bashsha Ḳoisoror samne tumar ubani lagbo. Ar i zazo ḳori zera tumar loge oia zaira, Allae tumar ḳatire meherbani ḳoria era hokkolor zan basaisoin. ²⁵Te sab oḳol, afnara monor maze bol raḳoukka. Ami ekin ḳori, Allae amare zela ḳoisoin, olau oibo. ²⁶Oile amra kunu difor ufre gia foṛmu.”

Zaz buṛi gelo

²⁷Ou laḳan ḳori amra Adria shagoror ufredi zaoat roilam, bade tufanor souddo dinor din ada raitkur bala naia oḳole andaz ḳorla, tara faror ḳandat aisoin. ²⁸Tara fani mafia deḳla ḳali ashi at goin ase, tuṛa bade hirbar mafia deḳla, shaiṭ at ase. ²⁹Erdae soror fattoror maze gia zaz dakka lagar ḍore, tara zazor ḳoredi sairgesa longor falaia, shuruzor for deḳar lagi dua ḳorat boila. ³⁰Naia oḳole zaz taki bagia zaoar motlob ḳori, samnor goloir tuṛa age longor falanir ḳota ḳoia, zazor barki naore doriat lamaila. ³¹Teu Pauluse subedarre ar sifai oḳolre ḳoila, “Naia oḳol zaz taki bagi gele afnara hoḳol mara zaiba.” ³²Ikan hunia sifai oḳole naor doṛi ḳaṭi dila, teu nao fanit bashia gelogi.

³³Fotabala Pauluse hoḳolre minot ḳorla kunta ḳaoar lagi, tain ḳoila, “Aiz souddo din dori kita oibo na oibo ou sintae afnara kunta ḳaisoin na. ³⁴Ami afnarare minot ḳorram, kunta ḳaukka. Zan basaite oile to afnara ḳaite oibo. Deḳbane, afnaintor matar eḳsa suloro ḳeti oito nae.” ³⁵Ikan ḳoia hari Pauluse tara hoḳolor samne ruṭi ania Allar shukria zanaia, ruṭi siṛia ḳaoat lagla. ³⁶Teu hoḳole monor maze bol faia ḳani ḳaila. ³⁷I zazor maze amra hoḳole milia dui-sho siottoir zon aslam. ³⁸Hoḳole feṭ boria ḳaoar bade zazor bar ḳomanir lagi hokkol gom doriat falai dila.

³⁹Bian oia harle tara sinla na, i zaga ashole kun zaga. Oile oula eḳ baḳ deḳa gelo, i baḳor sor balue bora. Dekia tara foramish ḳorla, farle zazre nia hou soro tulilita. ⁴⁰Teu tara longorain ḳaṭia doriat falai dila, ar ḳanḍarir boiṭar doṛino ḳaṭi dila. Bade batash baṭiole samnor fal ṭangaia hou balur soror muka gelam. ⁴¹Oile zaz tole lukail kuntat aṭki gelo. Ar samon gala aṭki zaoae, ḳoror goloit ḍeur baṛi lagia banga dorlo. ⁴²Teu sifai oḳole foramish ḳorla bondi oḳolre marilita, arnae ḳeu ḳeu hatraia bagizito fare. ⁴³Oile sho-sifair subedare Paulusre basanir kiale sifai oḳolor i foramish manla na. Tain hukum dila, zera hatar zane, tara age zaz taki falaia foṛia huknat uṭouk. ⁴⁴Ar hatar na zanra oḳole zazor toḳta ba aro kuntat doria huknat farouk. Ou laḳan hoḳole huknat uṭia zan basaila.

Malṭa difo hafor ḳamoṛ

¹Amra hefazote faro uṭia harle zanlam, i difor nam oilo Malṭa. ²Hinor manshe amrar loge kub bala-manshi ḳorla, meg ar shit asil ḳori tara aguin zalaia amrare ḍakia nia ḳatir-zoton ḳorla. ³Ermaze Pauluse eḳ aṭa hukna laḳṛi tukaia dola ḳori ania agunir maze deoar bade, agunir teze ek ḳalnag baroia hari Paulusor ato ḳamoṛ mari dorlo. ⁴Ḳalnage Paulusor ato ḳamoṛdi loṭki roise dekia, hinor manshe mata-mati lagaila, “I manushgu nichoe kunu kuni, doriar at taki he basigeleo niae-devtae tare baste dila na.” ⁵Oile Pauluse at zaṛa dia ḳalnagre aguino falai dila, ar tan kunu ḳeti oilo na. ⁶Manshe mone mone bar saoat asil, Paulusor gotor fulizibo, ba tain aḳtau maṭit foṛia moriziba. Bout shomoe bar saia harle tan kunu bifod oise na dekia, tarar mot bodlaia ḳoila, “Ein to kunu devta.”

⁷I zagar ḳandat hou difor Fublio namor ek kandani manshor zomidari asil. Tain amrare tan baṛit daot dila ar tindin dori amrare kub ḳatir-zoton ḳorla. ⁸Ou shomoe Fublior baf taf ar ḳamṛi bemare bisnat falail asla. Pauluse bitre hamaia tan ḳandat boia dua ḳorla, tan gotro atai dia bemar shifa ḳorla. ⁹Ita dekia hari hi difor zoto bemari asla, tarao aia bala oila. ¹⁰Tara amrare bout laḳan ijjot ḳorla, bidae bala zaz saṛar age amrar dorḳari hoḳol siz zugaia zazo ania boria dila.

Razdani Rum ṭauno Hozrot Paulus

¹¹Tin mash bade amra Alekzandriar eḳ zazo ḳori roana dilam. I zazḳan ou difo roia shitor din ḳaṭaisil, er samnor goloi kudia Zuṛ devtar murti lagail asil. ¹²Bade amra Surakusho aia tin din roilam. ¹³Hikan taki roana dia guri guri Italir Riziot ailam. Bador din douknor batash saṛlo, teu dusra din amra Futioli zaz gaṭo ailam. ¹⁴Hino ḳoezon muminor loge mulaḳat oilo, tara minot-ḳajji ḳorae tarar loge eḳ hafta roilam. Ota ḳori ḳori amra Rum ṭauno aia azilam. ¹⁵Rumor mumin oḳole amra aoar ḳobor hunsla, tara amrar loge mulaḳat ḳorta ḳori kunu kunu zone Appior bazar, ḳeu ḳeu Tin-Shoraiḳanar gau forzonto aguai aila. Erare dekia Pauluse Allar shukria adae ḳorla, ar dilor maze bout bol faila.

¹⁶Amra Rumo aoar bade Pauluse tan nizor fosond mafik roibar onumoti faila. Ḳali eḳzon sifaie tane fara dito.

Bondi halote Rum ṭauno toblig

¹⁷Tindin bade Pauluse Ihudi oḳolor boṛo boṛo murobbire dola ḳoria ekkano ḳoraila. Tara dola oia harle tain ḳoila, “O baisab oḳol, zudio ami nizor zator ba moe-murobbir batail niom-ḳanunor ulṭa kuntau ḳorsi na, ta-o Zeruzalem taki amare aṭok koria, Ruman oḳolor ato shomzail oise. ¹⁸Ruman oḳole amare zera ḳoria moutor shaza deoar zuka kunu dush na faoae, amare ḳalas dilaita saisla. ¹⁹Oile Ihudi oḳole bada deoae nirufae oia ami bashshar gese afil ḳorsi. Ta-o ami amar nizor zator ufre kunu laḳan dush ditam saisi na. ²⁰Te sab oḳol, tamam Boni Israilor dilor maze ze asha ase, hou ashar lagiu amare i sikol findail oise, erlagiu ami afnaintor loge mulaḳat ar batchit ḳortam sairam.” ²¹Tara ḳoila, “Amra to afnar befare Ehudia taki kunu siṭi faisi na. Ar zeta Ihudi baiain hon taki aisoin, tarao afnar name kunu nalish disoin na, ba bura kunta ḳoisoin-o na. ²²Oile amra afnar muk taki motamot huntam sairam. Ḳaron amra zani, hoḳol zagar mansheu i torikar bifokke matoin.”

²³Paulusor loge hirbar mulaḳat ḳorar lagi eḳ tariḳ ṭik korla. Hou din tarar loge aro bout manush Paulusor goro aila. Pauluse fozor taki hainja forzonto haradin Allar bashshair ḳota tarar gese bangia boean ḳorla. Hozrot Musar Tourat kitab ar nobi oḳolor kitabor aeat deḳaia, Isar befare tarar dilo ekin zonmaita saila. ²⁴Tan boean hunia kunu kunu zone iman anla, ar kunu kunu zone ita ekin ḳorla na. ²⁵Boean hunar bade tarar maze motor omil oigelo, tara hikan taki bidae oita saila. Zaoar age Pauluse tarare ḳali ou nosiotḳan ḳorla, “Pak ruhe Hozrot Ishaea nobir zoriae afnaintor baf-dada oḳolre ou ḳotaḳan ṭiku ḳoisla,

²⁶Ou manush oḳolor ḳasat gia ḳo,

tumra ḳane hunleo kunta buztae nae,

souke deḳleo kunta sintae nae.

²⁷Ḳaron ita manshor dil oshaṛ oigese,

tarar ḳano tala lagigese,

tara zarzir souk muzi boiroise.

Zate souke na deḳe,

ḳane na hune,

dil dia na buze,

kizanu tara touba ḳoria,

amar bae firizain,

ar ami tarar shifa ḳorilai.

^28-29Erlagi afnarao zania raḳoukka, oḳon taki Allai nazator kush-ḳobri o-Ihudi oḳolor gese zanail oibo, tara ita kush oia hunba.”

³⁰Hozrot Paulus fura dui boros dori tan nizor baṛa ḳora bashat roila. Ar zoto manush tan gese aita tarare ḳobul ḳoria, ³¹furafur himmot ḳori Allar bashshair ḳota toblig korta. Ar malik Isa al-Mosir befare bina badae kula-mela talim dita.