2-Timoti

Fobitro Injil Shorif 16 nombor sifara

dusra Timoti

Forisiti

Alla Pakor hukume Hozrot Isa al-Mosir sahabi Hozrot Pauluse (ra:) moutor tuṛa age torikar shagrid Hozrot Timotir (ro:) gese ou sohifaḳan siṭir aḳare leḳsoin. Hozrot Isae behesto toshrif neoar onuman 31 bosor bade ikan leḳa oise.

Isa al-Mosir kush-ḳobri toblig kamo bout duk-koshṭo faite faite murobbi boeosho tan shoril kub durbol oigesil. Bidormi Ruman bashshar zel ḳanat bondi halote tain zebla nizor gordan zaoar lagi bar saira, ou shomoe tain ikan leḳsoin. I sohifar 4 ruku 7–8 aeato tain ḳoisla, “Ami to al-Mosir lagi zane-forane laṛai ḳorsi, amare batai deoa fotor hesh mata forzonto douṛaisi, amar iman ṭikaia raḳsi. Te amar forezgarir furushkar to zoma ase, hou hok-insafḳari malike Ruz Hashoror din amare joeor mala furushkar diba. Ita ḳali amare nae, zoto manush ashik oia tan lagi bar saira, tara hoḳolre-u diba.”

Er ḳoieḳ bosor age ou Hozrot Timotir gese tain ‘foela Timoti’ name aroḳ sohifa leḳsila. Ar oḳon tain Timotire minoti zanaira agor talim oḳol mono raḳar lagi. Ou sifarar 2 ruku 15 aeato ase, “Tumi Allar kushi mafik nizore forezgar halote tan samne azir ḳoro, ou laḳan ḳamla bono, ze ḳamlae Allar dorbaro shorom faoar kunu ḳaron nai. Ze ḳamlae shoṭik babe hok kalam talim dein, ou laḳan o.”

Ermaze ase,

(1) Ruhani aguin zalao 1 ruku

(2) Ḳaṭi ummotor jihad 2 ruku

(3) Aḳeri zomanar naformani 3:1-9 aeat

(4) Bondi Paulusor osiot 3:10—4:22

¹Ami Paulus to Alla Pakor morzie Hozrot Isa al-Mosir sahabi. Al-Mosir usillae Allar oada ḳora aḳeri zindegir ḳota tobligor lagi sahabi fod faisi. ²Ami amar maear aolad Timotir gese leḳram.

Gaibi baf Allae ar amrar malik Isa al-Mosie tumare rohomot, meherbani ar shanti dan ḳoroukka.

Ruhani aguin zalao

³O Timoti, huno, amar moe-murobbie zela eḳ Allar ebadot korta, amio oula forishkar bibeḳe Allar ebadot ḳori. Ami dua ḳorar bala dine-raite hamesha tumar lagi Allar shukria adae ḳori. ⁴Tumar hou ḳandonor ḳota mono ḳoria tumare deḳar lagi mone kub ṭaner, tumare deḳle amar bitor kushie borizibo. ⁵Amar mono ase, tumar dilḳan hok imane bora, tumar nani Luis ar tumar amma Unikir bitreo ola hok iman asil. Ami nichchit zani, tumar bitreo ola iman ase. ⁶Erlagi oḳon tumare mono ḳorai diram, ami tumar shorilo at rakia ḳelafoti deoae, Allae tumare ze ḳas niamot dan ḳorsoin, i aguin zalaia tulo. ⁷Allae to amrare bitu-ḍoralukor monobab disoin na. Borong bol-shokti, maea-mohobbot ar nizore shamlanir ḳemota dan ḳorsoin.

⁸Erlagi amrar malik Isar befare shakki dite shormaio na, ar tan namor lagi ami zen zelo bondi asi, amare loiao shormaio na. Borong Allar deoa bole kush-ḳobri tobligor ḳamo amar loge roia duk-koshṭo shoijjo ḳoro. ⁹Allae amrar zan basaisoin, ar fak-fobitro oia zindegi ḳaṭanir lagi daot disoin. Ita to amrar kunu nek kamor gune nae, borong tan morzi ar rohomotor guneu ḳorsoin. Amrare i rohomot dan ḳorsoin to, dunia foeda ḳorar age Hozrot Isa al-Mosir usillae. ¹⁰Ar Allae oḳon ou rohomot zair ḳorsoin, amrar toraneala Isa al-Mosie duniat toshrif anar mazdi. Al-Mosie to moutor ḳemotare surmar ḳorsoin, tan kush-ḳobrir mazdi siroḳalin nurani zindegir fot kula-mela ḳorsoin.

¹¹Ou kush-ḳobri tobligor lagiu to amare tobligkari, sahabi ar ustad hishabe boail ḳora oise. ¹²Erlagiu ami ola duk-koshṭo faiar, ta-o ami shorminda nae. Ḳaron ami zani, ami ḳar ufre borosha ḳorsi. Amar furafur ekin ase, ami tan dorbaro zeta zoma ḳorsi, itare hefazote raḳar ḳemota tan ase, al-Mosie dusrabar toshrif anar din forzonto ita roibo. ¹³Te tumi amar muk taki zoto talim huncho, ou hok talimre zanor ḳoboz mono ḳoria, al-Mosir uforor iman ar mohobbote doria raḳo. ¹⁴Allae ze samana hefazote raḳar lagi tumar zimmae disoin, amrar dilor mazor Allai Pak Ruhur bole tumi itar hefazot ḳoro.

¹⁵Tumi to zano, Turoshkor Asia elaḳar hoḳol manush amar ges taki algi gesoin, Fugilas ar Hamaginaso tarar loge gesoingi. ¹⁶Bai Anisor foribaror ufre malik Isae rohom-borkot deukka. Ein bout bar amar zano aram disoin, ami zelo hamaileo tain kunu shorom mono ḳorsoin na. ¹⁷Tain ou Rum ṭauno aia bout tallash ḳori amare bar ḳorsoin. ¹⁸Ami Ifis ṭauno taḳte tain kila amar ḳezmot ḳorsla, ita to tumi balamonteu zano. Malik Isae ola ḳoroukka, zate tan toshrif anar din ein meherbani fain.

Ḳaṭi ummotor jihad

¹O amar aolad Timoti, Isa al-Mosir usillae faoa rohomote tumi boloban o. ²Ar bout shakkir samne amar mukor zeta talim huncho, ou talimre olaḳan hok-halal manshor ato deo, zera oinno manshoreo talim deoar ufozukto. ³Tumi Isa al-Mosir ḳaṭi sifai oia duk-koshṭot shorik o. ⁴Kamanḍarre kushi raḳar lagi zuddor ḳalo kunu sifai shongsharor maea-zalo hamae na. ⁵Ou laḳan ḳelat lagia ḳeu zudi niom moto na ḳelae, te zoeor mala he fae na. ⁶Ar ze giroste menot ḳore, fosholor foela baṭ to he-u fae, itau niom. ⁷Te ami zeta buzaitam sairam, ita sinta ḳori deḳo, malik Isae tumare ita hoḳolta buzar aḳol diba.

⁸Isa al-Mosir befare tumi oḳan mono rakio, tanre murda taki zinda ḳora oisil, tain oila Bashsha Daud nobir bongshodor, amar ḳoa kush-ḳobrir mazeo ikan ase. ⁹Ar ou kush-ḳobri toblig korae-u ami duk-koshṭo faiar. Dagi ashamir laḳan amare bondi raḳa oise, oile Allar kalam to bondi oise na. ¹⁰Allae zerare fosond ḳoria alog korsoin, tarar lagi ami hokkolta shoijjo ḳoriar, zate al-Mosir usillae tara nazat fain, loge siroḳalin gourob-mohimao fain. ¹¹Ou ḳota to ekin ḳorar zoiggo,

Al-Mosir loge zebla amrar moron oise,

te amra zindao oimu tan loge.

¹²Amra sobor ḳoria shoijjo ḳorle,

tan loge bashshai ḳormu.

Ar tanre oshikar ḳorle to,

taino amrare oshikar ḳorba.

¹³Amra beiman oigeleo,

tain hamesha hok-halali roin.

Tain kunumonte-u nizore oshikar ḳorta faroin na.

Aze-baze torko taki hushiar

¹⁴O Timoti, tumi mumin oḳolre amar ou talimḳan mono ḳorai deo. Allar samne tarare hushiar ḳoro, zate aze-baze mat loia torka-torki na ḳoroin, ita mator to kunu dam nai, ita zera hune, tarar shorbonash oe. ¹⁵Tumi Allar kushi mafik nizore forezgar halote tan samne azir ḳoro, ou laḳan ḳamla bono, ze ḳamlae Allar dorbaro shorom faoar kunu ḳaron nai. Ze ḳamlae shoṭik babe hok kalam talim dein, ou laḳan o. ¹⁶Allar birudi aze-baze mat taki duroi ro. Ila mate Allar bae manshor ḍor-ḳof ḳoma dorbo. ¹⁷Ila aze-baze talim to fosa-gar laḳan sairobae sitre. I dolo ase, Huminas ar Filitas. ¹⁸Iguin to Allai hok taki ku-fote gesoingi. Itae ḳoin, mumin oḳol bule murda taki zinda oia harsoin. Ola aze-baze matia tara kunu kunu zonor iman nosṭo ḳorilise. ¹⁹Tebou Allar banail mozbut bit uba roise, er ufre sil-sappoṛor laḳan ou ḳota leḳa ase, “Malike zanoin, ḳe ḳe tan,” ar “Ze zone al-Mosire malik koia shikar ḳore, he hoḳol zator guna taki horail rouk.”

²⁰O Timoti, zomidar baṛit to ḳali shuna-rufar zinish taḳe na, laḳṛir zinish ar maṭir tal-bashono taḳe. Ermaze kunuṭa shommani ḳamo ar kunuṭa nisa ḳamo bebohar oe. ²¹Te zeta manush ou nisa ḳamor ashbabor laḳan, itar ges taki horia aia ḳeu zudi nizore pak-saf ḳorilae, te he shommani zinish bonizae. Tare fobitro hishabe alada ḳori raḳa oibo. He tar malikor ḳamo lagbo ar hoḳol nomunar nek kamor lagi zuit oibo. ²²Timoti hushiar o, zoubonor bod ḳaish taki tumar zan basao, ar zera ḳas dile malikor nam loe, tarar loge shorik oia forezgari, iman, mohobbot ar shantir lagi kiali o. ²³Aze-baze be-aḳoli torka-torkit shamil oio na, tumar zana ase, itae ḳali ḳaijja-fosad baṛae. ²⁴Malik Isar gulame ḳaijja-fosad ḳora ṭik nae, ein borong hoḳolor bae doyal oite oibo, ein manshore talim deoar ḳemota ar sobor-shokti taḳte oibo. ²⁵Tain nizor birudi manshoreo norom mone buz diba. Ou ashae talim diba, hoetoba Allae tarare touba ḳorar shuzug diba, zate tara Allai hokre balamonte sinoin. ²⁶Teu tara seton faia Iblisor fando taki zan basaiba, ou Iblise tar gulam bananir lagi erare dorsil.

Aḳeri zomanar naformani

¹O Timoti, ou hushiari ḳanain mono rakio, aḳeri zomanat kub mosibotor din aibo. ²Manush shartofor oizibo, ṭeḳa-foeshar lalchi, boṛai-beṭagiri deḳani, manshore elami ḳora, durnam gaoa, ma-bafor obaiddo, nimoḳ-harami ḳorbo ar Allar naformani ḳorbo. ³Maea-momota ḳomizibo, ḳaijja-fosad ḳorle afush ḳorto nae. Foror bodnam gaibo, nizore shamlaito farto nae, manush omanush oizibo ar hoḳol nomunar nek kamor dushmoni ḳorbo. ⁴Manshe beimani, fuṭani ar beforua bab deḳaibo, Allar ashik na oia duniabi aram-ayeshor ashik oibo. ⁵Bairor bab-surote buza zaibo kub allaoala fak-musolli, oile muloto lebasdari bonḍo. Te tumi itar ges taki horia roio.

⁶Otar mazor ḳeu ḳeu duka dia manshor goro hamaia ḳom imani beṭintore ku-fote ṭane. Ita beṭintor mogoz oilo gunar banḍar. Tara nanan nomunar furti-amudor boshe sole. ⁷Tara hamesha Allai fotor talim hune, oile kunudino Allai hokikot tarar bitre hamae na. ⁸Mishoror Feraunor zadugir-gunin Zanni ar Zambrie zela Musa nobir birudita ḳorsila, ṭik ou laḳan oguinteo Allai hokor birudita ḳore. Itar bibeḳ fosi gese, tarar bitre imanor balai nai. ⁹Oile tara ar aguaito farto nae, hou zadugir Zanni ar Zambrir be-aḳoli zela hoḳolor gese dora foṛsil, itar be-aḳolio ola dora foṛbo.

Allar kalamu muminor kuraḳ

¹⁰O Timoti, tumi amar talim, amar sal-cholon, amar uddesho, iman, soborgari, mohobbot, ar amar doijjor ḳota furafur kial ḳorso. ¹¹Antiokia, Ikonia ar Lushra ṭauno ami ḳoto zulum-mosibot shoijjo ḳorsi, ita to tumi zano. Oile malike amare rokka ḳorsoin. ¹²Ashole Allar ḍor-ḳof bitre rakia, Isaei imandar bonia zera zindegi ḳaṭaito sae, tara to zulum-mosiboto foṛbou. ¹³Oile bonḍo ar ḳobis oḳol din din aro ḳaraf oibo. Tara nizeo be-fote solbo, ar aroḳzonreo be-foti banaibo. ¹⁴Te tumi zeta talim faiso, faia dile-zane ekin ḳorso, er ufre tir taḳo, ḳaron tumi nize zano, i talim ḳar ges taki faiso. ¹⁵Tumi to huruman toneu Allar kalamor talim faiso, ar ou kalameu tumare Isa al-Mosir ufre iman anar usillae, nazat hasilor fot batai dibo. ¹⁶Huno, Allar kalamor forteḳṭa horof Allar ges takiu aise. Ita to talim, hushiari, hedaeot, ar hok zindegi goṛibar kuraḳ, ¹⁷zate Allar bonda oḳol ufozukto bonia hoḳol nek kamor lagi zuit oin.

Bondi Paulusor osiot

¹Ami Alla Pakre shakki rakia, ar zein tamam zinda-murdar bisar ḳorba, hou al-Mosire shakki rakia, duniat tan dusrabaror toshrif ana ar tan bashshair duai dia tumare ou ḳoṛa hukum diar. ²Tumi Allar kalam toblig koro, shomoe-oshomoe kunta nai, hamesha toblig koro, kub beshi doijjo doria talim deo ar manshor oforad deḳai deo, tarare hushiar ḳoro ar buzao. ³Agedi ola shomoe aibo, zebla hasa talim manshor shoijjo oito nae, borong nizor monor ḳaish furaita ḳori tara olaḳan ustad dorba, zetae tarar mon zugaia mongoṛa talim diba. ⁴Tara hok talim taki muk firaia, mongoṛa kichcha-ḳahinir ḳore douṛaiba. ⁵Oile tumi hoḳol befare nizore shamlaia raḳo, duk-koshṭo shoijjo ḳoro, al-Mosir befare kush-ḳobri toblig korat ro, Allar deoa daeitto adae ḳoro.

⁶Amar moutor din aia azigese, amar nizor loure kurbani hishabe ḍali deoa or. ⁷Ami to al-Mosir lagi zane-forane laṛai ḳorsi, amare batai deoa fotor hesh mata forzonto douṛaisi, amar iman ṭikaia raḳsi. ⁸Te amar forezgarir furushkar to zoma ase, hou hok-insafkari malike ruz hashoror din amare zoeor mala furushkar diba. Ita ḳali amare nae, zoto manush ashik oia tan lagi bar saira, tara hoḳolreu diba.

Adalotor maze shaijjo

⁹O Timoti, tumi sesṭa salaia zoto zoldi faro amar gese ao. ¹⁰Ḳaron Kirisken bai Galatia desho, Titas bai Dalmatia desho gesoin. Ar Dimas bai duniabi maear dandat foṛia, amare saṛia Tisholoniki ṭauno gesoingi. ¹¹Ḳali Luk bai amar gese asoin. Erlagi Markus baire loia tumi zoldi ao, amar ḳam-ḳazo tain bout shaijjo ḳoroin. ¹²Tukik baire ami Ifiso faṭaisi. ¹³Ami aibar shomoe Toruas ṭaunor Ḳarfus bair gese, amar ekkan saddor toia aisi, tumi aibar fote oḳanta anio, ar amar kitabḳanain, ḳas ḳori samṛar ufre leḳa kitabḳanaino anio.

¹⁴Huno, tama-fitolor ḳam ḳore ze Sikondor, ogie amar bout ḳeti ḳorse, oile malik Isae tare ufozukto bodla diba. ¹⁵Te tar befare tumi hushiar roio, he ḳomor bandia amrar toblig kamor birudita ḳorsil.

¹⁶Zano ni, amare foela bar zebla adaloto neoa oilo, ou shomoe ḳeu amare shaijjo ḳorse na, hoḳoleu amare saṛia bagise. Ta-o Allae zanu tarar i bishoeḳan hishabo na doroin. ¹⁷Ḳali malik Isa amar fokke ubaila, tain amare bol zugaila. Erlagi ami bin zatir samne shullo-ana kush-ḳobri toblig korar shuzug faisi, tara hoḳole ita hunche. Ou bisaro tarar shinghor mukor kuraḳ oa taki Allae amare basaisoin. ¹⁸Ou malik Isae hoḳol nomunar bod ḳam takio amare hefazote raḳba ar sohi-salamote behesti bashshait far ḳorba. Zuge zuge siroḳal tan tarif ouk. Amin.

Bidaei salam

¹⁹Amrar mumin bai Akilre, tan bibi Fiskila ar Anis bair foribarre amar salam zanaio. ²⁰Irastas bai Korint ṭauno roisoin, ar Tofimre bemar halote ami Milita bondoro toia aisi. ²¹Te tumi kub sesṭa salao, shitor age aibar lagi. Bai Abul, Bodis, Olinis, boin Kuludia shoho aro hoḳol bai-boine tumare salam disoin.

²²Malik Isa tumar loge loge roukka. Allar rohomot tumrar loge taḳouk. Amin.