2-Tishol:

Fobitro Injil Shorif 14 nombor sifara

dusra Tisholonikia

Forisiti

Alla Pakor hukume ou sifara leḳsoin Hozrot Isa al-Mosir sahabi Hozrot Paulus (ra:). Hozrot Isae behesto toshrif neoar onuman 18 bosor bade Tisholoniki zomator gese siṭir aḳare ou dusra sifara leḳsoin.

Tarar ufre ze zae-zulum soler, ou zulumor maze shantona dibar lagi tarar gese leḳra. Ar ḳoira, zeta ustade ḳoin Hozrot Isae lukai lukai dusrabar toshrif ania dunia saṛi gesoingi, otar bul talim taki zomatre basao. Aro foramish dira, Hozrot Isae dusrabar zebla toshrif anba, er tuṛa age dushmon Ḳane-Dorjalo aibo. Erlagi bul fot taki basia imanor mozbuti zorur.

Ermaze ase,

(1) Muminor furushkar ar be-dinor shaza 1 ruku

(2) Ḳane-Dorjal taki hushiar 2:1-12 aeat

(3) Nazat faia imane mozbut ro 2:13—3:5

(4) Olosh-kuṛiare hushiar ḳoro 3:6-18

¹Amrar gaibi baf Alla Pak ar Hozrot Isa al-Mosir loge shorik, Tisholoniki ṭaunor zomator gese ami Paulus, bai Silas ar Timotie ou sohifaḳan leḳram.

²Gaibi baf Allae ar Hozrot Isa al-Mosie tumrare rohomot ar shanti dan ḳoroukka.

Muminor furushkar ar be-dinor shaza

³Bai oḳol, amra hamesha tumrar lagi Allar shukria adae ḳora zorur. Tumrar imani bol bout baṛer ar eḳe-oinne maea-mohobboto baia foṛer, erlagi amra shukria adae ḳora dorḳar. ⁴Amra to Allar zomat oḳolor samne tumrare loia boṛai ḳoriar, ḳaron oto zulum-mosibot ar duk-koshṭo faiao tumra sobor ḳorso ar imane ṭikia roiso.

⁵Tumrare zate Allar bashshair zoiggo ḳoia gona oe, otar lagiu tumra oto duk-mosibot shoijjo ḳorrae, ita oilo Allar hok-insafor forman, ⁶tan hok-insaf oilo, zetae tumrare ḳoshṭo dein, tain itare ḳoshṭo diba. ^7-8Ar tumra zera oḳon ḳoshṭo fairae, Allae amrar loge tumrareo i ḳoshṭo taki rehai diba. Hozrot Isae zebla tan shoktishali firista oḳol loia, zalail agunir kunḍolit oia behest taki lamia aiba, ou shomoe oula oibo. Zeta manshe Allare sine na ar Hozrot Isar kush-ḳobrir ḳota mane na, Allae itare tarar faona shaza diba. ⁹Malik Isae zebla toshrif anba, ou shomoe tarare omon shaza deoa oibo, zate tara tan didaror ar moha kudrotir bare foṛia hor-hamesha lannoti shaza faibo. ¹⁰Hou din tan nizor pak bonda oḳol, zera tan ufre iman anche tarar mazdi, tan gourob mohima zair oibo. Erar maze tumrao aso, ḳaron amrar toblig hunia tumra iman ancho.

¹¹Erlagi amra hamesha tumrar lagi dua ḳori, amrar Allae zanu tumrare tan daotor zuka mono ḳoroin, tan ḳemotar bole tumrar hoḳol nek kamor asha furon ḳoroin, ar iman ania hari tumra zeta ḳam ḳorrae, i ḳamo zanu tain fura ḳoroin. ¹²Teu amrar Alla ar Hozrot Isa al-Mosir rohomotor lagi, tumrar mazdi amrar malik Isar gourob zair oibo, ar tan mazdi tumrao gourobor bagi oibae.

Ḳane-Dorjal taki hushiar

¹O bai oḳol huno, amrar Hozrot Isa al-Mosi to hirbar aiba, aia amra hoḳolre ekkano dola ḳoria tan gese niba. Te ou befare tumrare minot ḳori ḳoiram, ²ḳeu zudi aia ḳoe malik Isar din aia harse, he kunu gaibi doroshon deḳse, ba ohi nazil oise, ba amrar leḳa siṭi mono ḳoriao tumra ḍoraia ostir oio na. ³Ḳeu zanu kunumonte-u tumrare ṭogia iman luṭito na fare. Ḳaron hou din aoar age beshir bag manush Alla Pakor birudde zaibo, tara Allar ges taki duroi horizibo, ar duzoki zon, hou naforman Ḳane-Dorjal bar oibo. ⁴Baroia “Allar name” zotota ase, ita hokkoltar bifokke ar ebadoti ḳorar zuka hokkoltar bifokke gia, he nizore boṛo mono ḳorbo. He olao ḳorbo, Allar ebadot-ḳanat boia nizore Alla ḳoia dabi ḳorbo.

⁵Te ami zebla tumrar gese roitam, hou shomoe ami i befare mattam, ita tumrar mono or na ni? ⁶Hou naforman zate shomoe fura oar age bar oito na fare, erlagi kitae tare aṭḳaia raḳse, ikan to tumra zano-u. ⁷Tumra eoḳano zano, hou naformanor lukail ḳam-ḳaz oḳono soler. Oile zein tare aṭḳaia raḳra, tain horia zaoar ag forzonto tare aṭḳanit roiba. ⁸Tain hori gele hou naforman Ḳane-Dorjal bar oibo. Hozrot Isae mukdi fu dia tare binash ḳorba, ar tan kudroti mohimae azir oia tar bol-shoktire ḳotom ḳorba. ⁹Hi Ḳane-Dorjal zebla aibo, tar loge roibo shoetani ḳemota. Ou shoetani ḳemotae he hoḳol misa keramoti ar muzeza ḳam deḳaibo. ¹⁰Tar hoḳol nomunar beimani ḳaṭaia beiman manshore ṭogibo. Ita manush binash oiziba, ḳaron zan basanir lagi tara Allai hokre fosond ḳorse na, ar ḳobulo ḳorse na. ¹¹Erlagi Allae tarare shoktishali ek ku-dandat falaiba, zate tara misa befarre ekin ḳore. ¹²Ete Allai hokor ufre iman na ania zetae naformanire fosond ḳorsoin, tarare kiamotor din dushi shaibosto ḳora oibo.

Nazat faia imane mozbut ro

¹³O bai oḳol, O malik Isar maear zon oḳol, tumrar lagi amra hamesha Allar dorbaro shukria adae ḳora dorḳar, Allae to tumrare foela takiu basia alog korsoin nazat faoar lagi. Pak ruh dia tumrare fobitro ḳorar mazdi, ar Allai kush-ḳobrir hokor ufre iman ania tumra nazat faiso. ¹⁴Amra ze kush-ḳobri toblig korsi, er usillae nazat faoar lagi Allae tumrare fosond ḳorsoin, zate tumra amrar malik Isa al-Mosir mohimat shorik o. ¹⁵Te O bai oḳol, tumra imane tir ro ar muke muke ba siṭir marfote amra ze talim disi, ita balamonte mono rakio.

^16-17Amrar gaibi baf Alla Pake ar shoeong Isa al-Mosie tumrar dilo nek utshaho dan ḳoroukka, hoḳol nomunar nek kam ar mat-ḳotar maze tir raḳoukka. Tainu amrare mohobbot ḳorsoin, tain rohom ḳoria siroḳalin utshaho ar kushi-bashir asha dan ḳorsoin.

¹O bai oḳol, hesh-mesh ḳoiram, amrar lagi dua ḳorio, Hozrot Isar kush-ḳobri tumrar maze zela zoldi zoldi sitrisil, oula zanu din din sitrat roe ar gourob faoat roe. ²Ar ou duaḳano ḳorio, amra zanu bibeḳ saṛa naforman oḳolor at taki rehai fai. Shob manush to ar imandar nae. ³Oile malik Isa to hok ar ḳaṭi, tainu tumrare imane tir raḳba ar shoetanor at taki hamesha hefazot ḳorba. ⁴Malikor ufre iman ancho ḳori tumrar ufre amrar i ekin ase, amra zela hukum disi, tumra ou laḳan ḳam ḳorrae ar ḳorat roibaeo. ⁵Malik Isae zanu tumrar dilre Allar mohobbotor fote ar al-Mosir soboror fote salu raḳoin.

Olosh-kuṛiare hushiar ḳoro

⁶Bai oḳol, amrar Hozrot Isa al-Mosir name ou hukum diram, tumrar zomator kunu imandar baie zudi kuṛiami ḳore ar amra zeta talim disi, ita na mane, te tar loge sola-fira bad dilao. ⁷Huno, amrar laḳan ḳemne soltae, ita to tumra zano-u. Amra zebla tumrar loge roitam, ou shomoe to kunuzat kuṛiami ḳorsi na, ⁸magna kunu ḳani ḳaisi na. Amra dine-raite menot ḳoria ruzi-ruzgar ḳorsi, zate tumra ḳeuror buza na oi. ⁹Oile amra zen tumrar ges taki shaijjo nibar odikar nai, ila to nae, ta-o amra ola ḳoria deḳaisi, zate tumrao amrar laḳan solo. ¹⁰Tumrar gese taḳar ḳalo talim dislam, kunu zone zudi ḳam ḳorto na sae, te he ḳanio bad dilauk. ¹¹Amra oḳono hunram, tumrar maze ḳeu ḳeu kuṛiami ḳorer ar kunuzat ḳam-ḳaz ḳorer na, borong hamesha foror kichcha gaia din ḳaṭae. ¹²Te amrar malik Isa al-Mosir oia ita manshore nosiot ar hukum diar, tara zanu shanti oia ruzi-ruzgar ḳoria ḳae, ar nizor ḳani nize zugae.

¹³Baiainre, nek kamo heran oio na. ¹⁴Ou siṭir bashae leḳa amrar foramish zudi ḳeu na mane, te tare sinia raḳo, tar loge sola-fira bad dilao, teu he shorminda oibo. ¹⁵Oile kial rakio, tare dushmon mono ḳorio na, borong bai hishabe hushiar ḳoro.

Bidaei salam

¹⁶Shanti deora malike tumrare hamesha hoḳol nomunar shanti dan ḳoroukka. Malik Isa tumra hoḳolor loge loge roukka.

¹⁷Huno, i salamor ḳota ami Pauluse nizor ate leḳsi. Oḳṭau amar forteḳ siṭir alamot, ami ou nomunae siṭi leki. ¹⁸Tumra hoḳolor ufre amrar malik Isa al-Mosir rohomot zari rouk. Amin.