2-Fitor

Fobitro Injil Shorif 22 nombor sifara

dusra Fitor

Forisiti

Alla Pakor hukume hoḳol Isaei imandar oḳolor gese, Hozrot Isa al-Mosir sahabi Hozrot Fitore (ra:) kub mosibotor halote tan shohid oar tuṛa age i sohifa siṭir aḳare leḳsoin. Hozrot Isae behesto toshrif neoar onuman 32 bosor bade ikan leḳa oise.

I sohifa leḳar mul uddesho oilo, bonḍo ustad oḳolor bul talimor mazdi ze ku-ḳam shuru oisil, er birudita ḳora. Tain i sohifar maze bataisoin, Alla Pak ar Hozrot Isa al-Mosire furafur sinle, ita taki basa zae. Ou bonḍo ustad oḳole ḳoita, Hozrot Isa dusrabar duniat aoar kunu nichchoeota nai. Oile leḳoke ḳoira, Hozrot Isae toshrif ante deri ḳora to Allar soborgarir nishana, ashole tain aibau aiba, aia hoḳoltar bisar ḳorba ar oḳonkur hoḳolta binash oibo. Te ou ustad oḳolor talim taki hushiar roia, forezgar hishabe zindegi ḳaṭanir lagi foramish disoin.

Ermaze ase,

(1) Salam zanani 1:1-2 aeat

(2) Mumin oḳolre daot ar fosond ḳora 1:3-15

(3) al-Mosir gourob ar nobi oḳolor buli 1:16-21

(4) Bonḍo ustad 2 ruku

(5) Hozrot Isar firia aoar befare 3 ruku

Salam zanani

¹Ami Saimon-Fitor, Hozrot Isa al-Mosir eḳzon gulam ar sahabi. Tumra zera amrar laḳan, amrar Alla ar toraneala Isa al-Mosir pak-forezgarie eḳoi laḳan moha dami iman hasil ḳorso, ami tumrar gese leḳram. ²Alla Pak ar amrar malik Hozrot Isare furafur sinar mazdi, tumrar ufre besh ḳori rohomot ar shanti nazil ouk.

Mumin oḳolre daot ar fosond ḳora

³Zein tan nizor mohima ar gune amrare daot disoin, tanre furafur sinar mazdi tan kudrote amra ola niamot faisi, zate amra forezgar bonia zindegi ḳaṭai. ⁴Tan mohima ar gune amrar loge moha dami ar bout boṛo boṛo oada ḳorsoin, zate tumra duniabi hoḳol bod ḳaish taki basia Allai gunor bagi o.

⁵Erdae tumra kub kiali oia, imanor loge nek kaislot, nek kaislotor loge al-Mosire sinar aḳol, ⁶I aḳolor loge nizore shamlani, shamlanir loge doijjo ar doijjor loge forezgari, ⁷forezgarir loge eḳe-oinne maea, ar eḳe-oinne maear loge Allai mohobbote baṛo. ⁸Tumrar maze zudi ita gunagun taḳe, ar ita boria foṛat roe, te amrar malik Isa al-Mosire furafur sinaḳan tumrar beḳama-behuda zaito nae. ⁹Oile ze zonor maze ita gunagun nai, he to anda, he kuntau buze na. Ḳaron agor ze guna taki tare pak-saf ḳora oise, ikan he faurilise.

¹⁰Erlagi bai oḳol huno, Allae zen hasau tumrare daot disoin ar fosond ḳorsoin, ita nichchit ḳorar lagi aro beshi kiali o. Ila ḳorle tumra kunu shomoe usṭa ḳaitae nae. ¹¹Ar amrar malik toraneala Isa al-Mosir hameshakur bashshait tumrare ador ḳori harail oibo.

¹²Erlagi, ami hamesha tumrare ota befare mono ḳorai diram, zudio ita tumrar zana ase ar tumrar gese ze hokikot aise, itat tiro aso. ¹³Ashole ami mono ḳorram, ami zotodin tambur laḳan ou shorile basia roimu, otodin tumrare ota mono ḳorai dia hozag raḳa usit. ¹⁴Ḳaron ami to ar beshi din ou shorile roitam nae, amrar malik Isa al-Mosie ikan amare forishkar zanai disoin. ¹⁵Te amar moutor badeo hamesha zate ota mono raḳtae faro, ami ou menoto ḳormu.

al-Mosir gourob ar nobi oḳolor buli

¹⁶Amrar malik Hozrot Isa al-Mosir kudroti shokti ar tan hirbar toshrif anar ḳota zananit gia, amra kunu banail kichcha ḳoisi na. Amra to nizor souke tan mohima deḳsi. ¹⁷Asman taki zalal ar shanor ze aoaz ailo, “Einu amar ḳas maear zon Ibnulla, en ufre ami kub kushi,” ou aoazor mazdi al-Mosie tan gaibi baf Allar ges taki ijjot ar gourob faisoin. ¹⁸Amra zebla tan loge hou fobitro faṛo aslam, ou shomoe nizor ḳane behestor ou gaibi aoaz hunchi.

¹⁹Ar amrar lagi aro boṛo forman oilo, pak kitabo nobi oḳole zotota batai gesoin. Andarir maze tumrar souk zelaḳan rushonir bae taḳe, ṭik olaḳan zoto shomoe bian oise na ar tumrar dilo fozoror shuk-tera uṭse na, oto shomoe tumra nobi oḳolor ḳotae kiali o, teu tumrar bala oibo. ²⁰Ar ḳas ḳori mono rakio, kitabor mazor kunu ḳota nobi oḳolor mongoṛa nae. ²¹Ḳaron nobi oḳole tarar ichchamoto kunu ḳota ḳoisoin na, ḳali Pak Ruhur bole Allar deoa buli bataisoin.

Bonḍo ustad

¹Mono rakio, Boni Israilor maze zela bonḍo nobi oḳol asla, tumrar mazeo oula bonḍo ustad oḳol taḳba. Tara lukai lukai omon bul talim dibo, ze talime manshore binash ḳore ar ze malike tarare azad ḳorar lagi ḳorid ḳorsoin, ou malikre forzonto tara oshikar ḳorbo. Olaḳan kub zoldi tara nizor ufre binash ḍakia anbo. ²Tarar deḳa-deki bout manush ḳobisi fote zaibo, tarar lagiu Isaei hok fotor bodnam oibo. ³Lub-lalos ḳoria sol-soturir mat matia, nizor labor ashae tara tumrare ḳamo lagaibo. Tarar faona shaza to bout din taki bar sar, tarar binasho beshi deri nae.

⁴Emonki agor firista oḳole zebla guna ḳorsla, ou shomoe Allae tarare rehai disoin na, borong duzoḳor andairor gato falaia tarar bisar ḳorar lagi raḳsoin. ⁵Ar tain hou agor duniareo rehai disoin na, borong ou be-din oḳolre boinnar fanidi marsoin. Oile Nuh nobi ar oinno shatzonre tain basaisoin. Ḳaron Nuh nobie forezgarir ḳota toblig korta. ⁶Ar Allae Sadum ar Amura ṭaunre aguin dia zalaia sali ḳoria, onor manshore shaza disla. Ou nomunae tain deḳaisla, be-din oḳolor dosha kilaḳan oe. ⁷Ta-o Lut nobire tain basaisoin. Ein to forezgar manush asla, hinor naforman oḳolor beshamal bab dekia tain kub ḳoshṭo faita. ⁸Din din tarar aḳam-kuḳam ar ḳota-barta hunta. Shoriotor bifokke tarar naformani dekia, ou forezgar zonor mono kub duk lagto. ^9-10Ota taki deḳa zar, Allae to forezgar manshore forikkar maz takio basaita faroin. Oile zera be-dini ḳam ḳore, ḳas ḳori zera ḳobisi ḳore, kunu shashon mane na, tarare shaza deoaṭa kiamot forzonto raḳtao faroin.

I bonḍo ustad oḳol kub bod-shaoshi. Tara nizor ichchamoto sole ar batuni shordar oḳolor bodnam gaite ḍorae na. ¹¹Firista oḳol shokti ar ḳemotae era taki bout boṛo oileo, ou batuni shordaror bifokke Mabudor dorbaro bodnam gaia kunu nalish dein na. ¹²Be-aḳol zongli zanuar oḳole na buzia zela nizor kushie sole ar dora ḳaia more, ou bonḍo ustad oḳolo otar laḳan. Tara zeta buze na, otaro bodnam gae. Erlagi ou zongli zanuaror laḳan tarar binash ase, ¹³ḳarafir bodla babot tarar lagio ḳarafi ase. Dinor belaeo mouz-furti ḳoria mod ḳaite tarar bala lage. Tara to tumrar ḳanir talor tu ar gu. Tara zebla tumrar loge boia mezbani ḳae, ou shomoe tara bonḍami ḳorte kub aram fae. ¹⁴Tarar souk zinae bora, gunar ḳam kunu shomoe bond ḳore na. Ostir manshore be-fote ṭania ney. Tarar mon lub-lalosor ustad. Iguin to lannoti! ¹⁵Tara Balam bin Bauror laḳan sohi fot saṛia be-fote gesegi. Ou bonḍo pir Balam to haram ḳamai-ruzgaror fagol asil, ¹⁶oile ola bod ḳamor lagi he buba gadar domok kaise. Ou gadae manush bulie matia tar faglamit bada dise.

¹⁷Ita manush to fanir hukna kuar laḳan ar batashor kuṛular laḳan. Tarar lagi goin andair zoma raḳa ase. ¹⁸Tara boṛo boṛo beḳama mat mate. Ar zera tuṛa age ku-fot saṛia zan basanir lagi bagisoin, ota manshore shorilor ḳaishe solia bodmaishi ḳorar indon dey. ¹⁹Hou bonḍo ustad oḳole ḳosom ḳaia ḳoe manshore azad ḳorto, oile tara nizeu noforoti ḳamor gulam. Zano to, ḳeu zudi kuntar gese arizae, te he itar gulam. ²⁰Te amrar malik ar toraneala Isa al-Mosire sinia hari zogotor ḳarafi taki horia aiao, ḳeu zudi hirbar gia ou ḳarafir zalo aṭḳae, te tarar foela dosha taki hesh dosha aro mondo. ²¹Forezgarir fot sinar badeo tarar gese shomzail ou fobitro hukumor ulṭa gese, er taki aro bala asil i fot na sina. ²²Tarar befare ou silleḳu shoṭik, “Kukre nizor bomi firia ḳae,” ar “Shuorre naoaileo feḳo foṛia goṛiae.”

Hozrot Isaor firia aoar befare

¹Maear bai oḳol, ikan oilo tumrar gese leḳa amar dui nombor siṭi, i duio siṭitu ami tumrare kial ḳorai diram ar tumrar dilre hozag korram. ²Ami sairam, fobitro nobi oḳole age zotota bataisoin, ar amrar toraneala malike tumrar gesor sahabi oḳolor mazdi ze hukum disoin, ota mono raḳo.

³Kub kial ḳori buzio, aḳeri zomanat rong-tamsha ḳorra oḳole rong-tamsha loia aziba, tara zarzir ḳaishe solba. ⁴Tara ḳoiba, “Kita ba, hein aibar lagi ze oada asil, itar kita oilo? Duniar shuru taki zelaḳan solchil, amrar baf-dadar moronor bad taki oḳono to olaḳan-u soler.” ⁵Ashole itae to ichcha ḳoriu faurilae, bout din age Allar kalamor bole asman foeda oise ar fanire horai dia zomin bar ḳora oisil, fanire zominor sairo galabae dola ḳora oisil. ⁶Bade hou fanie boinna oia hi zomanar duniare binash ḳorsil. ⁷Ar hou kalamor bole, oḳonkur asman-zominre aguindi zalaibar lagi raḳa or. Aḳeri bisar din forzonto itare ola rokka ḳora or, hou din be-din oḳolor shorbonash oibo.

⁸Ta-o bai oḳol, tumra ikan faurio na, malikor gese eḳ din eḳ azar bosoror homan ar eḳ azar bosor eḳ dinor homan. ⁹Kunu kunu manshe mono ḳoroin, malike tan oada furon ḳorte deri ḳorra, ikan ṭik nae. Ashole tain tumrar bae sobor ḳoria roisoin, tain saira na ḳeu binash ouk, borong hoḳolre touba ḳorar shuzug dira.

¹⁰Oile malik Isa aibar din to suror laḳan aḳtau aibo. Hou din asmane hu hu aoaz ḳoria binash oibo ar foeda ḳora hoḳolta aguine golia milai zibo. Dunia ar ermaze zotota ḳora oise, hokkolta zair oibo.

¹¹Olaḳan hokkolta binash oibo zania, tumra kilaḳan roa zorur? Tumra fak-fobitro roia forezgar zindegi ḳaṭaia, ¹²Allar ṭik kora dinor lagi ashik oia bar sao. Hou din to asman zoli zoli binash oibo ar foeda ḳora hoḳolta aguine golizibo. ¹³Oile amra Alla Pakor oada ḳora noea asman, noea zominor bar sairam, zeḳano ḳali forezgarir ṭikana.

¹⁴Erlagi bai oḳol, tumra zebla ou dinor lagi bar saoat aso, te kub kial ḳoro, ou din tain zanu tumrare nikut-niskolonko halote shantir maze deḳoin. ¹⁵Ar amrar malikor lamba soborgarire manshor zan basanir shuzug mono ḳorio. Ou eḳoi ḳota Allar deoa aḳole amrar maear bai Pauluseo tumrar gese leḳsoin. ¹⁶Tan hokkol siṭitu ou befare leḳoin. Er maze kisu befar ase zeta buza ḳoṭin, ḳali be-aḳol ar bedisha zone oinnainno kitabor laḳan itar manio bodlaia, nizor shorbonash ḍakia ane.

¹⁷Bai oḳol, ou ḳota oḳol tumra ageu zancho, erlagi hushiar o zate ou naforman manshor bule tumrare bul fote na ney, ar imani bit taki na horae. ¹⁸Tumra amrar malik ar toraneala Isa al-Mosir rohomote ar tanre sinar takkote baṛia uṭo. Oḳon ar hor-hamesha tan mohima zari rouk. Amin.