2-Korintia

Fobitro Injil Shorif 8 nombor sifara

dusra Korintia

Forisiti

Fobitro asmani kitabor ou sifara Alla Pakor hukume Hozrot Isa al-Mosir sahabi Hozrot Pauluse (ra:) siṭir aḳare leḳsoin. Ikan oilo Korint zomator gese tan leḳa dusra sohifa. Onuman ḳora oe, Hozrot Isae behesto toshrif neoar 21 bosor bade ikan leḳa oise.

Korint zomator loge zebla Hozrot Paulusor shomporko bala asil na, ou shomoe tain zomator gese i siṭi leḳsila. Paulusor sahabi fod loia Korint zomator ḳoezon manshe kub birudita ḳorsil. Ou sifarar maze tain itar zuaf disoin.

Hozrot Paulusor leḳa ou sohifar mazdi tanre aro bala ḳori sina zae. Leḳoke tan monor ḳota, Allai kush-ḳobri tobligor befare tan utshaho, duk-mosibotor ḳota, ar foela Isaei zomator maze ṭeḳa-foeshar obabor shomoe eḳe-oinne kila shaijjo ḳorsoin, ita ou sifarar maze leḳsoin. I sifarar maze ullek kora Asiya desh oḳonkur Turoshko deshor bitre, ar Makidonia oḳonkur Gris deshor bitre. Hou shomoe ita shadin desh asil.

Ermaze ase,

(1) Bumiḳa 1:1-11 aeat

(2) Korint zomator loge Hozrot Paulusor shomporko 1:12—7:16

(3) Ehudiar Isaei imandar oḳolor lagi dan 8—9 ruku

(4) Sahabi hishabe Hozrot Paulusor odikar 10—13 ruku

Bumika (1:1–11)

Salam zanani

¹Ami Paulus, Alla Pakor morzi mafik Hozrot Isa al-Mosir eḳzon sahabi. Korint ṭaunor Isaei zomat ar asta Gris deshor maze Allar zoto pak bonda oḳol boshot ḳoroin, erar gese ami ar amrar mumin bai Timotie ou sohifaḳan leḳram.

²Amrar gaibi baf Alla Pake ar malik Isa al-Mosie afnara hoḳolor ufre rohomot ar shanti nazil ḳoroukka.

Buz deoar malik Alla

³Amrar malik Isa al-Mosir gaibi baf Alla Pakor tarif ouk. Tainu rohmanur rohim Alla, hokkolor dilor buz deora Alla. ⁴Hoḳol zat duk-mosibotor shomoe tain amrare buz dein, zate tan ges taki buz faia, oinnor duk-mosibotor shomoe amra-o tarare buz ditam fari. ⁵Al-Mosir laḳan amra zela bout duk-mosibot shoijjo ḳoriar, oula tan usillae bout buz-shantio faiar. ⁶Amra ze duk-mosibot shoijjo ḳori, ita to tumrar monor shantona ar nazator lagiu ḳori. Tumrare buz deoar nioteu Allae amrare buz dein. Tumra zebla amrar laḳan duk-mosiboto foṛbae, ou shomoe amrar deoa buz mafik tumrar ḳoshṭore shoijjo ḳorte shaijjo ḳorbo. ⁷Tumrar ufre amrar mozbut ekin ase, tumra zela amrar duk-mosiboto shorik aso, oula Allar deoa buz-shantonar mazeo shorik aso.

⁸Turoshkor Asiya desho amra ze mosiboto foṛslam, ota tumrare zanaitam sai. Hino taḳte amrar ufre ze azab aisil, ou azab ola marattoḳ asil, erlagi amra zanor maea saṛi dislam. ⁹Mono ḳorslam, amra nichchit mara zaimu. Te amrar i halot oisil, zate amra nizor ufre borosha na ḳoria, ze Allae murdare zinda ḳori tuloin, ou Allar ufre borosha ḳori. ¹⁰Eḳ bezuita moutor at taki tain amrare basaisoin, ar oḳono basaira. Amra tan ufre borosha ḳortam fari, tain hamesha-u amrare olaḳan basaiba. ¹¹Tumrao dua-munazat ḳoria amrare shaijjo ḳorrae, erlagi bout zonor duar ḳatire amra ze rohom faisi, otar fol dekia boute Allar shukria adae ḳorba.

Korint zomator loge Hozrot Paulusor shomporko (1:12–7:16)

Hozrot Paulusor soforor deri

¹²Amra zeta loia gourob ḳoriar, amrar bibeḳeo ola ḳoe, Allar deoa fobitro ar shorol mon loia hoḳol manshor maze zindegi ḳaṭaisi, ḳas ḳori tumrar mazeu ḳaṭaisi. I zindegi amra duniabi aḳol-hekmote nae, ḳali Allar rohomotor bole ḳaṭaisi. ¹³Amra to tumrar gese lukai-safai kunuta lekiar na, tumra ze leḳa foṛrae ar buzrae, ḳali ou befareu lekiar. Ar asha ḳoriar, tumra hamesha-u ola buzat roibae. ¹⁴Ashole amrar befare tumra tuṛa kisu zaniau, amrare loia zela boṛai ḳorrae, malik Isae toshrif anar shomoe tumrare loia amra-o ola boṛai ḳormu.

¹⁵Ar ou ḳotar ufre borosha ḳoria ami kub kiali oislam, ami aoa-zaoar foto duiobar tumrar gese zaimu, gele tumra duiobaru rohom-niamot faibae. ¹⁶Ami mono ḳorslam, Makidoniat zaoar fote tumrar loge deḳa ḳormu ar hon taki hirbar tumrar gese aimu, zate Ehudia zilat zaoar ḳalo tumra amare aguaia deo. ¹⁷Oile ami na aoae tumra mono ḳorrae ni, ami ita ḍong ḳorslam? Zogotor manshe zela eḳbar ḳoe “Oe, oe” aroḳbar ḳoe “Na, na”, amio ola ni?

¹⁸Alla Pak to hok ar ḳaṭi, ikan zela hasa, oula eoḳano hasa, tumrar gese amrar zoban eḳbar “Oe” ar aroḳbar “Na” oe na. ¹⁹Ami, Silas, ar bai Timotie tumrar gese zar ḳota toblig korsi, hou Isa al-Mosiu oila Allar ḳas maear zon Ibnulla, tain eḳbar “Oe” ar eḳbar “Na” nae, tain to hoḳol shomoe-u “Oe.” ²⁰Alla Pakor hoḳol oadau to al-Mosir mazdi fura oe. Erlagi munazator shomoe Allar gourobor lagi al-Mosir namor usillae amra “Amin” mani “Oe” ḳoi. ²¹Ar al-Mosir lagi amrare ar tumrare zein mozbut ḳori ṭikai raḳsoin, tan nam Alla. Tainu amrare ḳelafoti disoin. ²²Tan nizor don hishabe amrare sil-sappoṛ maria raḳsoin, ar tain zeta amrare dibar oada ḳorsoin, itar foela kisti hishabe amrar dilor maze Allai Pak Ruh dan ḳorsoin.

²³Ami Allare shakki rakia amar zindegir ḳosom ḳaia ḳoiram, tumrar bae doya-maea taḳae tumrare basanir kiale ami Korint ṭauno zaoa bond raḳsi. ²⁴Amra nizore tumrar imanor malik mono ḳorram na, borong tumrare kushi-bashie raḳar lagi tumrar loge roia ḳam ḳorram. Ḳaron tumra imane mozbut aso.

¹Erlagi mone mone ṭik korlam, tumrar mono duk deoar lagi ami ar tumrar gese zaitam nae. ²Ḳaron ami tumrare duk dile amare kushi ḳorbo ḳe? Ar ami zarare duk dimu, ou tumra saṛa amare kushi ḳorar ar to ḳeu nai. ³Amar ila leḳar ḳaron oilo, ami zebla zaimu, ou shomoe zera amare kushi ḳorar ḳota, tarar ges taki zanu kunu duk na fai. Tumrar ufre amar i bishash ase, ami zetat kushi oimu, tumrao itat kushi oibae. ⁴Amar mono boṛo duk loia, sokur fani falaia age tumrar gese leḳslam. Ashole ami tumrare duk deoar lagi leḳsi na, borong tumrar lagi amar ze ḳoto mohobbot, oḳan zananir lagiu leḳsi.

Oforadire maf ḳora

⁵Amare zudi ḳeu duk dia taḳe, te he ḳali amare nae, tuṛa oileo tumra hoḳolreu duk dise. ⁶Tumra beshir bag zone milia tare ze shaza diso, otau tar lagi zotesṭo. ⁷Oḳon tumra tare maf ḳori dilao, tare buz deo, zate beshi duke he ḳator na oe. ⁸Erlagi ḳas ḳori tumrare ḳoiram, tumra zen tare maea ḳoro, ita forman ḳori deḳao. ⁹Ami forikka ḳori deḳtam saislam, tumra hoḳol befare baiddo aso ki na, erlagiu ami tumrar gese leḳsi. ¹⁰Tumra zudi kunu befare ḳeurore maf ḳori dilao, te amio tare maf ḳori dei. Ar hasau zudi ami kunta maf ḳoria taki, te al-Mosir samne tumrar lagiu ḳoriar, ¹¹zate shoetane amrare duka dito na fare. Tar ku-motlobor ḳota to amrar ozana nae.

al-Mosire sinau to geranor laḳan

¹²Ami Toruas ṭauno al-Mosir befare kush-ḳobri toblig korat gia deḳlam, hono ḳam ḳorar lagi malike amare eḳṭa shuzug kori disoin. ¹³Oile amar imandar bai Titasre hono na faoae amar mono kub oshanti asil. Erlagi Toruas ṭaunor manshor ges taki bidae loia Makidoniat gelamgi.

¹⁴Oile amra Allar shukria zanai, tain amrare hamesha al-Mosir bizoeor moha furtir misilor loge salaira. Al-Mosire sina to eḳ geranor laḳan. Allae tan zoe-zatrae ou geran amrar mazdi hoḳol zagat sitrai dein. ¹⁵Zera nazat hasil ḳorra ar zera binash oira, ou duio dolor lagi amra oilam al-Mosir eḳ geran, ou geranre al-Mosie Allar dorbaro kurbanir laḳan shofia dira. ¹⁶Zera binash oizar, tarar gese amrar geran oilo morar gondo, zar fol oilo nichchit moron. Ar zera nazat hasil ḳorra, tarar gese amra oilam zindegir geran, er fol oilo aḳerator zindegi. I oto boṛo nek kam ḳorar lak kun zon? ¹⁷Nizor labor lagi zela bout zone Allar kalam loia bebsha ḳore, amra to itar laḳan nae. Amra borong Allar faṭail zon hishabe shorol mone al-Mosir name Allare azir-nazir rakia toblig koriar.

Allar loge milonor noea eḳ usillar ḳadim

¹Tumra kita mono ḳoro, amra ita ḳoia hirbar amrar nizor shunam gaoat lagsi ni? Kunu kunu manshor zela oinnor ges taki sonod neoa lage, amra-o olaḳan tumrar gese ba tumra taki sonod faoa lagbo ni? Na, muṭeu na. ²Tumrar nam to amrar dilor maze leḳa ase, tumrau oilae amrar sonod. Ar ou sonodor ḳota to hoḳoleu zane ar hoḳoleu foṛe. ³Ikan to forishkar buza zae, al-Mosir leḳa sonod oilae tumrau, tumrau amrar menotor fol. I sonod to kunu ḳali-ḳolom dia leḳa oise na, ḳali Allar Pak Ruhu dia leḳa oise. Ikan to Tur faṛo faoa shoriotor laḳan kunu fattoror ufre leḳa nae, borong manshor dilor mazeu leḳa oise.

⁴Ou befare al-Mosir usillae Allar dorbaro amrar furafur nichchoeota ase, ⁵ta-o amra ze nizor gune hoḳolta ḳoriltam farmu, ila kunu ḳota nae. I ḳezmoti gun to ḳali Allar ges takiu fai. ⁶Allar loge milonor noea usillar ḳota zananir lagi, tainu amrare i ḳezmoti gun dan ḳorsoin. I usilla to okkore okkore shoriot manar befar nae, borong Pak Ruhur porichalonae dilor iman-akidar befar. Ḳaron okkore mout, ar ruhe zindegi.

⁷Fattoror ufre leḳa shorioti ze ḳezmote moron ae, ou shoriot nazilor shomoe to Allar mohima zair oisil. Ou shomoe Hozrot Musar seharao Allar mohimae nurani oigesil. Tan mukor nurani surot zudio aste aste ḳomi zaoa dorsil, tebou Boni Israil oḳole tan seharar bae saoar takkot oise na. ⁸Ou shoriotor ḳezmoti fol zudi oto mohima-ala oe, te Pak Ruhur ḳezmoti fol ḳoto beshi mohima-ala! ⁹Ou ze okkori shoriote manshore dushi shaibosto ḳore, tar ḳezmoti ḳam zudi oto mohima-ala oe, te ze ḳezmote be-ḳosur ḳalas ḳoia goinno ḳore, i ḳezmot to aro ḳoto beshi mohima-ala! ¹⁰Buzrae ni, age zeta mohima-ala asil, oḳon itar kunu mohima nai ḳoileu sole, tar tulonae oḳonkur noea ḳezmotor mohima bout beshi. ¹¹Ze nuranir tez ḳoma dorsil, ita zebla oto mohima-ala, te zeta siroḳal roibo, ita to aro ḳoto beshi mohima-ala!

¹²Amrar mono olaḳan asha ase gotikeu amra kula-kuli mati. ¹³Amra to Hozrot Musar laḳan nae, tain forda dia tan muk guria toisla, zate tan mukor ḳomi zaoa nurani surot Boni Israile na deḳoin. ¹⁴Oile tarar dil fashan oigesil. Ar oḳono Tourat Shorifo leḳa, Allar loge milonor hou furana usillar ḳota tilaot ḳorle, tarar dilor maze forda taḳe. Ḳali Isa al-Mosir ufre iman anle ou forda hori zae. ¹⁵Ar oḳon forzonto Hozrot Musar Tourat Shorif tilaot ḳorar shomoe Boni Israil oḳolor dil forda dia gura taḳe. ¹⁶Tarar maze ḳeu zebla malikor ufre iman ane, ou shomoe hou forda hori zae. ¹⁷Ou malik oila Pak Ruhu, ar malikor ruh zeno ase, onou shadinota ase. ¹⁸Aenar samne zela forda saṛa muk shorashori deḳa zae, oula amra hoḳolu al-Mosir nurani mohima deki deki aro beshi mohima-ala bonia tan laḳan mohima-ala oiram. Amrar malik Isa, mani Pak Ruhur kudroti boleu ila or.

Maṭir bashono raḳa don

¹Ou ḳarone, Allae meherbani ḳoria ou noea ḳezmoti ḳamor daeitto amrar ato disoin ḳori, amra nirash oi na. ²Toblik kamo manshe lukaia zeta be-haeami ḳoroin, ita amra muṭeu ḳori na. Amra kunu ḳamo sol-soturi ḳori na, Allar kalamo bezal mishai na. Borong hok kotare kula-mela ḳoia hoḳol manshor gese ar Allar dorbaro amrare zoiggo hishabe forman ḳori. ³Amrar kush-ḳobri zudi lukail taḳe, te lannoti fote zera zaira, tarar gese-u lukail taḳe. ⁴Ou zogotor devta Iblise o-imandar oḳolor dilre anda banailise, zate tara kush-ḳobrir nur na deḳe. Ou kush-ḳobrir mazdi al-Mosir gourob zair oise, ar ou al-Mosiu oila Allar obikol surot. ⁵Amra to nizor befare toblig korram na, ḳali Isa al-Mosire toblig korram, tainu malik, tan lagiu amra tumrar gulam bonchi. ⁶Amra ita toblig korram, ḳaron ze Allae ḳoisoin, “Andair taki for ouk,” hou Alla Pake tan nur amrar dilo zalaisoin, zate al-Mosir seharar maze Allar nuror mohima zair oe.

⁷Allai ou nuror don to maṭir bashono raḳa oise, ou bashon oilam amrau. Maṭir bashono raḳa oise, zate manshe buzto fare ou kudroti mohashokti amrar nizor ges taki aise na, borong Allar ges takiu aise. ⁸Hoḳolbae taki amrar ufre bout laḳan saf aileo, amra surmar oisi na. Amra bedisha lagleo furafur nirash oisi na. ⁹Amrar ufre zulum ḳora oileo Allae to amrar log saṛsoin na. Maṭit falaia asaṛleo amra binash oisi na. ¹⁰Hamesha malik Isar moutor duk-koshṭor nishana amrar shorilo loia guriar, zate amrar shorilor maze tan zindegio deḳa zae. ¹¹Ar amra zoto shomoe basia asi, malik Isar lagi amrare to hor-hamesha-u moutor ato tuli deoa or, zate ou moutor odin shorilo tan zindegi zair oe. ¹²Ou nomunae amrar maze ḳam ḳorer moute, ar tumrar maze ḳam ḳorer zindegie.

¹³Fobitro Zobur Shorifo ase, “Ami iman anchi gotikeu ḳoilam.” Ou eḳoi imanor bagi oia amra-o ola ḳoi. ¹⁴Ḳaron amra zani, ze Allae malik Isare zinda ḳorsla, hou Allae tan loge amrareo zinda ḳorba, ar amrar loge ḳori tumrareo tan samne azir ḳorba. ¹⁵Ita hoḳolta tumrar balair lagiu oise, zate manshor ufre Allar ze rohomot nazil oise, hou rohomotor ḳatire boute aro beshi ḳori Allar shukria adae ḳore ar Allar gourob oe.

Imane zindegi ḳaṭani

¹⁶Erlagi amra nirash oi na. Zudio amrar roḳto-mangshor shoril ḳoe oizar, tebou amrar ruh din din taza oia uṭer. ¹⁷Oḳon amra ze ḳoedinor lagi shamainno ḳoshṭo ḳoriar, i ḳoshṭor bodla amra siroḳalor lagi ofuronto shan-mohima lab ḳormu. ¹⁸Soukdi zeta deḳa zae, amra to itar bae sairam na, borong zeta deḳa zae na, otar bae sairam. Souke zeta deḳa zae, ita to tuṛa ḳoedinor, oile zeta deḳa zae na, ita siroḳalor.

¹Amra zani, amra i duniabi ze ḍera-goro boshot ḳori, mani ze ḳomzur shoril loia asi, ikan zudi binasho oizae, tebou Allar deoa ekkan gor amrar ase. I gor kunu manshor ator banail nae, ikan to hamesha behesto ase. ²Ou ḍera-goro boshot ḳora halote amra lamba ḳori dom falaiar ar dile-zane asha ḳoriar, zate behesti hou noea goror maze amrare gura oe. ³Ta-o ḳota oilo, ou ḍera-gor bangar bade amrare zanu lemṭa deḳa na zae. ⁴Ou ḍera-goro roia bar-buza boite boite amra ahazari ḳoriar. Erbadeo amra roḳto-mangshor i ḍera-gor saṛtam sai na, ta-o bala goror lagi bar sairam, zate oḳonkur ou moutor odin ḍera-gor falaia, siroḳal zinda taḳar zuka gor fai. ⁵Otar lagiu Allae amrare zuit ḳorsoin ar itar baenama hishabe amrare Pak Ruh dan ḳorsoin.

⁶Erdae amrar shaoshor kunu ḳomti nai. Amra to buzilisi, zotodin ou roḳto-mangshor shoril loia boshot ḳormu, otodin amra malikor ges taki horail roimu. ⁷Amra to sokur deḳa kuntar boroshae soli na, ḳali imanor boleu soli. ⁸Ashole amrar bitor bora shaosh ase, ar amra roḳto-mangshor shorilo roa taki malikor loge boshot ḳoraḳanu bala mono ḳori. ⁹Erlagi amra shorilor maze taki ba na taki, amrar niot oilo malikre kushi ḳora. ¹⁰Ḳaron al-Mosir adaloto amra hoḳoleu ubani lagbo, zate duniabi ou shorile amra zoto nomunar bad-bala ḳam ḳorsi, ou ḳamor bodla fai.

Allar loge milonor kush-ḳobri toblig

¹¹Amra to Alla Pakre ḍoraia soli, erlagi manshore buzanir sesṭa ḳorram. Amrar befar to Allar dorbaro forishkar, asha ḳori tumrar geseo ola forishkar asi. ¹²Ikan ḳoia amra hirbar nizor tarif gairam na, borong amrare loia tumrar boṛair ḳaron zanairam. Te zeta manshe bitor na dekia, ḳali manshor bargala loia boṛai ḳore, tumra tarare eḳṭa zuaf ditae faro. ¹³Amra zudi fagol oi, te Allar fagol oisi, ar zudi mata bala taḳe, te tumrar lagiu bala ase. ¹⁴Al-Mosir mohobbote amrare fush manaia salae. Amra nichchit buzchi, hoḳolor torof taki eḳzonor mout oisil, erlagi hoḳoloru mout oise. ¹⁵Tain hoḳolor lagi mara gesla, zate zera zinda asoin, tara zanu ar nizor lagi na basoin. Borong tarar lagi zein mara gesla ar hirbar zinda oisla, tan lagiu tara basoin.

¹⁶Erlagi oḳon taki amra ar manshor bairor surot dekia bisar ḳori na. Amra to age al-Mosire olaḳan mono ḳorslam, oile oḳon ar ila ḳori na. ¹⁷Ḳeu zudi al-Mosir torika ḳobul ḳore, te he noea foeda oilo. Tar furan hoḳolta fusia hari ekkere noea bonigelo. ¹⁸Ita to Alla takiu oe. Tain al-Mosir usillae tan loge amrar milon goṭaisoin, ar amrare ou ḳezmotor daeitto disoin, bad-baki hoḳol manshore tan loge milai ditam. ¹⁹Er mani oilo, Allae manshor gunar bae na saia, al-Mosir usillae tan loge manshor milon goṭaisoin. Ar ou milonor kush-ḳobri tobligor daeitto amrare disoin.

²⁰Erlagiu amra al-Mosir naib hishabe tan fokke matiram. Ashole Allaeu amrar mazdi manshore minoti ḳorra. Ar al-Mosir fokke amra-o minot ḳorram, tumra Allar loge milito o. ²¹Hozrot Isa al-Mosie to kunu guna-naformani ḳorsoin na. Oile amra hoḳolor gunar shaza Allae tan ḳando tuli dila, zate tan ufre iman anar mazdi Allai fobitrotae amra forezgar hishabe ḳobul oi.

¹Allar ḳadim hishabe amra ou minot ḳoriar, tumra zebla Allar rohomot faiso, te ikṭare bifol oite dio na. ²Pak kalamo Allae bataisoin,

Ami shoṭik shomoye tumar arzi hunchi,

nazat faoar din tumare shaijjo ḳorsi.

Huno, oḳonu shoṭik shomoe, oḳonu nazat faoar din.

Hozrot Paulusor ḳezmot ḳamor halot

³Al-Mosir name amra ze toblig kori, ou tobligor bodnam na oar lagi amra ila kunu ḳam ḳori na, ze ḳame manshor mono bada ae. ⁴Borong hoḳol befare amra forman deḳairam, amra Allar ḳezmotḳari. Bout duk-koshṭo, zulum-mosibot, ar bifod-afod shoijjo ḳoria itar forman diram. ⁵Amrare bout bar mair-doir ḳora oise, bout bar zelo harani oise, bout danga-hangama amrar ufredi gese, bout menot ḳorsi, na gumaia rait ḳaṭaisi ar ufash-ḳafash roisi. ⁶Ita saṛa amrar pak-forezgar zindegi, aḳol-buddi, soborgari, doya-maea, dilor Pak Ruhu, ḳaṭi mohobbot, ⁷hok kota ḳoa ar Allar kudroti bol, duio ate forezgarir atiar bebohar ḳoriar. ⁸Manshe amrare dam deuk ba na deuk, amrar shunam gauk ba bodnam gauk, itae amrar zae ae na. Manshe ḳoira, amra bule ṭog, ashole to amra hok fote soli. ⁹Manshe ḳoin, amrare sinoin na, tebou hoḳole amrare sine. Amra morar laḳ oigeleo basia asi. Amrare mair-doir ḳora or, oile zane mara or na. ¹⁰Bout dukor mazeo amra hamesha kushi-bashi asi. Amra nize gorib oia-o boutre doni banaisi. Amrar to kuntau nai, tebou hokkoltar malik. Ou laḳan amra forman ḳorsi, amra Allar ḳezmotḳari.

¹¹O Korint zomator mumin bai oḳol, tumrar gese to kula-melau matisi, tumrar lagi amrar mon uzaṛ ḳori disi. ¹²Amrar dil tumrar lagi kulia raḳsi, oile tumrar dil amrar lagi bond ḳori toiso. ¹³Te amar aolad hishabe tumrare ḳoiram, amra zela tumrar lagi dil kulia raḳsi, tumrao ola amrar lagi tumrar dilḳan kulia deo.

Bidormir loge kuṭumita ḳorio na

¹⁴Tumra bidormi manshor loge ḳeshi-kuṭumita ḳorio na. Forezgaror loge naformanor mil kuai? Allar nuror loge andarir kunu ḳatir ase ni? ¹⁵Iblisor loge al-Mosir kunu ḳatir ase ni? Muminor loge bidormi shorik oibo kila? ¹⁶Zano to, pak kalamo Allae ḳoira,

Ami tarar bitre boshot ḳormu,

tarar logeu sola-fira ḳormu.

Ami oimu tarar Alla,

tara oiba amar proza.

Te amrau oilam zinda Allar boshot ḳana. Allar kaba goror bitre murtir kunu zaga ase ni? ¹⁷Pak kalamo aro bataisoin,

Erlagi tumra bidormir ges taki horo,

tarar ges taki alog ro,

nafak kunu zinish soio na,

teu ami tumrare ḳobul ḳormu.

¹⁸Ami oimu tumrar gaibi baf,

tumra oibae amar aolad,

ikan ami Alla Rabbul Alamine ḳoiram.

¹O maear bai oḳol, ou oada oḳol to amrar lagiu ḳora oise, te ao amra shorilor ar dilor nafaki dur ḳoria nizore pak-saf ḳori, ar Allar ḍor-ḳofe furafur fak-fobitro zindegir fote soli.

Touba ḳorar bade kushi-bashi

²Bai oḳol, amra to kunu manshor loge oinnae ḳorsi na, ḳeuror ḳetio ḳorsi na ar ḳeurore ṭogaisio na. Erlagi amrare tumrar dilor maze ṭai deo. ³Tumrare dushibar lagi ikan ḳoiram na. Ami ageu ḳoisi, tumra to amrar zanor zan ḳoiljar ṭukra, amra morleo eḳloge mormu, basleo eḳloge basmu. ⁴Tumrar ufre ami kub borosha ḳori, tumrare loia boṛai ḳori. Erlagi oto duk-mosibotor maze roiao amar zano shanti asil, amar mon kushi-bashie bora.

⁵Huno, ou Makidoniat aiao amrar shorilo kunu shuk faisi na, hoḳolbae takiu amra ḳoshṭo faisi, baire asil gonḍogul ar zanor bitre asil ḍor-ḳof. ⁶Oile Alla Pak, zein duki zonre buz dein, tain amrare buz dibar lagi Titas baire ono anaila. ⁷Ḳali ikan nae, Titas baie tumrar ges taki ze buz faisla, ou buze tain amrareo buz dila. Tain tumrar monor eshki, tumrar ḳanda-ḳaṭir ḳota zanaila, amar befare tumra bule kub agrohi. Ou hoḳolta hunia ami kub kushi oisi.

⁸Baiainre, amar agor siṭir maze zudio tumrare duk dislam, tebou amar mono kunu ḳoshṭo nai. Ami zebla buzlam, ou siṭie tumrar monor maze tuṛa ḳoedin duk dise, ou shomoe amio kisu duk faislam, ⁹oile oḳon ami kushi. Tumrare duk deoae kushi oisi na, borong duk faia tumra touba ḳorso dekia kushi oisi. Ou duk faislae tumra Allar morzie, zate amrar dara tumrar kunu ḳeti na oe. ¹⁰Allar deoa monor ḳoshṭoe manshe touba ḳoroin, ar zan basain. Te ou ḳoshṭoe to duk nai. Oile duniabi monor ḳoshṭoe manshor moron ane. ¹¹Tumra buzrae ni, Allar deoa monor ḳoshṭoe tumrar ḳoto balai ḳorse, tumrare naformani taki basaise, gunar bae tumrar ginna zonmaise, mone mone ḳoto ḍor ḍoraiso, Allar bae ḳoto aguaiso, naformani ḳamor bisar ḳorso. Ou befare tumra hoḳol monteu forman diso, tumra nikut. ¹²Ami zudio ou siṭi leḳsilam, oile ze manshe oinnae ḳorse ba zar ufre oinnae ḳora oise tar lagi nae, borong Allar dorbaro zate tumrar ou halotḳan zair oe zen, tumra hasau amrare mohobbot ḳoro, otar lagiu leḳsi. ¹³Erlagi amra buzo faisi.

Ou buz faia ar bai Titasor kushi dekia amra aro beshi kushi oisi, ḳaron tumra hoḳolor ges taki tain kub aram faisoin. ¹⁴Ashole ami tumrare loia tan gese boṛai ḳorslam, ete kunu shormindao oisi na. Tumrar gese amrar batail hoḳol ḳota zela hasa asil, oula tumrare loia amrar boṛai ḳoraḳano tan gese hasa forman oise. ¹⁵Tumra hoḳole zela tan nosiot mancho, monor ḍor-ḳofe ḳafi ḳafi tanre ḳobul ḳorso, oḳan mono oae tumrar bae tan maea kub beshi baṛise. ¹⁶Ar amio kub kushi, tumrar ufre ami oḳon furafur borosha ḳortam fari.

Ehudiar Isaei imandar oḳolor lagi dan (8:1–9:15)

Makidonia deshor zomat oḳolor dan-ḳoerat

¹Bai oḳol, ami tumrare zanairam Makidonia deshor zomat oḳole Allar ges taki ḳoto niamot faisoin. ²Zudio bout duk-mosibot dia tarare forikka ḳora oisil, tara kub gorib halote asla, tebou tarar monor maze bout furti asil, tara kula ate Allar name dan-ḳoerat ḳorsoin. ³Ami tarar fokke ḳoiram, tara kushi oia nizor tofik mafik, emonki tofik taki aro beshio dan ḳorsoin. ⁴Ar kub kiali oia amrare minot ḳorsila, zate Allar ze bonda oḳol obabor maze asoin, erare obab taki basanir lagi tara shorik oita faroin. ⁵Amra zotoḳan asha ḳorslam, tara er saiteo beshi dan ḳorsoin. Ḳali ikan nae, tara foela nizore malik Isar ato shofisoin, bade Allar morzie amrar geseo shofa oisoin. ⁶Ita dekia amra Titas baire kub minot ḳorslam, dan-ḳoerat ḳorar ze ḳam tain tumrar maze salu ḳorsoin, ita zanu shesho ḳoroin. ⁷Tumra zela hoḳol befareu aguail aso, tumrar shobol iman, ḳota-barta, aḳol-hekmot, monor eshki, ar amrar bae zela kub maea-mohobbot ase, ṭik ou laḳan dan-ḳoerat ḳorar nek amolo zanu tumrar maze baia foṛe.

⁸Ita lekia ami tumrare kunu hukum diram na, ḳali forikka ḳori deḳram, Erlagi oinno mumin oḳolor nek kamor eshkir ḳota zanairam. Deki, tumrar mohobbot ḳotoḳan nikut. ⁹Amrar malik Isa al-Mosir rohom-niamotor ḳota to tumra zano-u, tain to Allai done doni asla, oile tumrar lagi gorib bonla, zate tain gorib bonar ḳarone tumra doni oitae faro. ¹⁰Te ami tumrare foramish diram, ita manle tumrar balai oibo, tumra kub kushi oia goto bosor dan-ḳoerat tulat lagsilae, ¹¹oḳon ou ḳam shesh ḳoro. Monor ze eshki loia tumra i ḳam shuru ḳorsilae, oula eshkie zarzir tofik mafik dan-ḳoerat dia ita shesh ḳoro. ¹²Dan-ḳoerat dibar niot ḳorle, Allae to niot mafik kobul ḳoroin, te tofik taḳle deo, na taḳle nai.

¹³Baiainre, ami sairam na, oinno manshe aram ḳorouk ar tumra ḳoshṭo ḳoro, borong tumra hoḳolor halot eḳ laḳan ouk, oḳanu asha ḳorram. ¹⁴Tumrar zeta don-doulot oḳon baṛti ase, otae tarar obab miṭauk, ar tarar zebla beshi oibo, ou shomoe tarao tumrar obab miṭaiba. Olaḳan hoḳolor halot eḳoi laḳan ouk. ¹⁵Zela Tourat Shorifo ase, “Zein beshi tukaisla tano beshi oise na, ar zein tuṛa tukaisla tano ḳom oise na.”

Dan-ḳoerat baṭibar ḳalo hushiari

¹⁶Huno, ami Allar shukria adae ḳori, amar monor maze tumrar bae zela kial ase, Allae ou eḳoi laḳan kial dan ḳorsoin bai Titasor mazeo. ¹⁷Tain amrar onurud mania tumrar gese zaira, ar ashol ḳota oilo tain nizeu kushi oia zaira. ¹⁸Tan loge ḳori amra hou baireo faṭaiar, kush-ḳobri tobligor lagi hoḳol zomateu i bair tarif ḳoroin. ¹⁹Zomator manshe ḳali tan tarif ḳorse na, amrar loge oia dan-ḳoerat loia zaibar lagi tarau tanre fosond ḳorse. Te malik Isar gourobor lagi, ar oinno mumin oḳolre shaijjo ḳorar lagi, amra ou dan-ḳoerat nibar bebosta ḳorsi. ²⁰Amra kub hushiar oia soliar, zate boṛo aḳaror ou rilif bilanir bade ḳeu amrar bodnam ḳorar shuzug na fae. ²¹Mono rakio, amra ḳali malik Isar gese nae, manshor samneo hok-halali roar sesṭa ḳoriar.

²²Ar erar loge ḳori amra aroḳ baire faṭairam, enre amra bout bar bout laḳan forikka ḳoria deḳsi, tan kub eshki ase. Oḳon deḳram, tain tumrare kub bishash ḳoroin, erlagi tumrar bae tan eshki aro baṛise. ²³Oḳon Titas bair befare ami ḳoiram, ein to amar loge roin, ar tumrar lagi ḳam ḳoroin. Bad-baki hoḳol baiaintor befare ḳoiram, hoḳol zomator manshe fosond ḳoria tarare faṭaira, tarar mazdi al-Mosir gourob oe. ²⁴Erlagi ḳoiram, tumrar bitoror mohobbot, ar tumrare loia amra ze boṛai-beṭagiri deḳai, itar forman deḳaio. Teu hoḳol zomator manshe buzba, tumra ḳe.

Dan-ḳoerator befare nosiot

¹Baiainre, Allar pak bonda oḳolre shaijjor lagi dan-ḳoerat tular ze ḳam soler, ita befare to tumrare kunta leḳar zorur nae. ²Ou befare tumrar monor kial to amar zana ase. Makidoniar manshor gese ami tumrar shunam gaia ḳoiram, Gris deshor manush mani tumra, goto bosor takiu dan-ḳoerat loia zuit aso. Tumrar i eshki dekia, Makidoniar bout manush hozag oisoin. ³Erlagi ami ou baiainre faṭairam, zate tumrare loia amra ze boṛai deḳai, tara gia nizor souke ita dekia forman fain. Te ami zela boṛai ḳorsi tumrao olaḳan zuit roio. ⁴Arnae amar loge oia Makidoniar kunu baiain gia zudi deḳoin tumra zuit nae, te tumrar ufre oto boṛo borosha ḳorae, amra shorom faimu ar tumrao shorminda oibae. ⁵Erlagi ou mumin oḳolre onurud ḳorlam, tara zanu amar age tumrar gese zain. Rilif ḳamor lagi dan-ḳoerat dibar ze oada ḳorsilae, tara gia oguin zuit ḳorat shaijjo ḳorba. Te tumrar ges taki zur-zobordosti ḳoria kunta adae ḳora oito nae, ḳali monor kushie deoa dan-ḳoerat neoa oibo.

⁶Kial rakio, ze giroste tuṛa ḳori zala bain dey, he tuṛa foshol daibo, ar ze giroste besh ḳori zala bain dey, he besh ḳori foshol daibo. ⁷Te tumrao ola forteḳe zarzir niot mafik dan-ḳoerat deo. Monor maze ḳoshṭo loia ba deoa lagbo ḳori dio na. Ḳaron dilor kushie dan ḳorle, Allae maea ḳoroin. ⁸Allae tumrare hoḳol laḳan rohom-borkot dita faroin. I ḳemota tan ase, zate tumrar dorḳari hoḳolta hamesha tumrar gese taḳe, ar nek kamor lagi kula ate ita bilaitae faro. ⁹Zela Fobitro Zobur Shorifo ase,

He to kula ate bilai dise,

gorib oḳolre dan ḳorse,

tar forezgari siroḳal staei.

¹⁰Mono rakio, girostor lagi zein bis zugaia dein, ar ḳaibar lagi zein dana-fani zugaia dein, tain tumrareo bis zugai diba, itat borkot diba, tumrar nek kamor foshol bout baṛai diba. ¹¹Ou laḳan tumra hoḳolmonte doni oibae, ar kula ate dan-ḳoerat bilaibae, teu amrar mazdi Allar shukur-guzar adae oibo.

¹²Ou rilif ḳame ḳali Allar bonda oḳolor obabo shaijjo oito nae, borong bout zonor torof taki Allar shukur-guzaro baia foṛer. ¹³Tumra al-Mosir kush-ḳobrir ufozukto ou ḳezmot ḳorso dekia, tara Allar shukur-guzar adae ḳorba. Tumra duio ate dan-ḳoerat bilanie, Makidoniar manshe ar baki hoḳoleu Allar gourob ḳorba. ¹⁴Tumra dan-ḳoerat deoae Allar ges taki ou ze asanok niamot faiso, ota dekia tara tumrar lagi dile-zane dua ḳorba. ¹⁵Allar ze danor ḳota mukdi ḳoia fuṛanir shaiddo nai, hou danor lagi tan tarif ouk.

Sahabi hishabe Hozrot Paulusor odikar (10:1–13:14)

Allar ḳezmoto Hozrot Paulus

¹O mumin baiain, al-Mosir norom ar doyalu babor ḳota iad ḳoria, ami Pauluse tumrare minot ḳoriar, manshe ḳoin, ami zebla tumrar loge roi, ou shomoe ami bule ḍorai ḍorai taki, ar horia gia harle shaoshi oizai. ²Te zera mono ḳore, amra duniabi manshor laḳan zindegi ḳaṭaiar, tarar loge zotoḳan shaosh deḳani dorḳar, ami sairam, ami aoar bade zanu otoḳan shaosh deḳani na lage. ³Amra zudio roḳto-mangshor manush, oile amra ze laṛai ḳorram, ita to kunu roḳto-mangshor laṛai nae. ⁴Duniabi sifaie zeta ostro-shostro dia laṛai ḳoroin, amra to ita dia laṛai ḳori na, Allai bole amrar ostro-shostroe faṛor uforor bangkaro bangilto fare. ⁵Amrar ostrodi manshor banoaṭ zukti binash ḳori, ar Allare sinar fote zoto laḳan bada-bignoe dilre aṭḳaia raḳe, itareo binash ḳori. Manshor monor hoḳol ku-sintare ḳedaia hari al-Mosir tole ani. ⁶Te tumra zebla shullo-ana baiddo oia tan tole aibae, hou shomoe zeta obaiddo roiba, itare shaza dibar lagi amra zuit oimu.

⁷Tumra to ḳali amrar bairor surot deḳso. Kunu manshe zudi nizore al-Mosir ummot mono ḳore, te tar sinta ḳora zorur, he zan ummot, amra-o to tan ummot. ⁸Ashole malik Isae amrare ze odikar disoin, i befare ami kisu boṛai deḳaileo to shorminda oitam nae. Ḳaron i odikaror uddesho oilo, tumrare goṛia tula, kunu ḳeti ḳora nae. ⁹Amar i leḳa foṛia mono ḳorio na, ami siṭi dia tumrare ḍor deḳairam. ¹⁰Kunu kunu manshe matoin, “Tan leḳa siṭinte dilo ḍekka mare, ita shoktishali siṭi, oile tain ḳandat aile deḳa zae, tain ḳomzur ar oaz-nosioto muṭeu gorom nae.” ¹¹Ota manshore zananir lagi ḳoiram, amra duroi taki siṭir mazdi zeta leḳram, samne aile ṭik olau ḳormu.

¹²Tumrar mazor kunu kunu zone tar nizor tarif gae. Tarar loge to amrar tulona sole na, ba tarar dolor shodoishsho oiteo shaosh ḳori na. Tara to nize nize zeta bala mono ḳoroin, otar logeu tarar tulona ḳoroin, otadiu bisar ḳoroin, buzrae ni, ita ḳoto boṛo ammok! ¹³Huno, amrar zotoḳan boṛai ḳora usit, er beshi ḳortam nae, borong Allae amrar ḳamor ze shimana ṭik kori disoin, amra er bitre roiau boṛai ḳormu, i shimanar bitre tumrao aso. ¹⁴Erlagi amra zebla tumrar gese geslam, ou shomoe shimar bara to gesi na. Tumrar gese to hoḳol foela amrau al-Mosir kush-ḳobri toblig korat geslam. ¹⁵Esaṛa foror ḳam loia amra gourob ḳoriar na, ita ḳorle shimar bara oilo one. Amra asha ḳoriar, tumrar imani bol baṛar loge loge tumrar maze aro bout ḳam ḳortam farmu. ¹⁶Hou shomoe tumrar ges taki aro duror deshainto gia kush-ḳobri toblig kortam farmu. Teu kunu manshe ḳoito farto nae, foror ḳam loia amra boṛai ḳoriar. ¹⁷Oile Allar kalamo ase, “Ze manshe boṛai ḳore, he Malik-Moulare loia boṛai ḳorouk.” ¹⁸Ḳaron nizor shunam nize gaileu forman oe na he bala manush, borong Malik-Moulae zar shunam gain, he-u bala hishabe forman oe.

Bonḍo sahabi taki hushiar

¹O mumin bai oḳol, ami sairam, amar tuṛa be-aḳoli tumra shoijjo ḳoro, ar hasau tumra amare shoijjo ḳorraeo. ²Allai eshkir zalae amar dilo tumrar lagi eḳ zala foeda oise. Te ami eḳzon noshar loge tumrar biar mat-ḳota ṭik kori raḳsi, en nam al-Mosi. Ami sairam, shoti ḳoina hishabe tumrare tan ato shomzai ditam. ³Oile ami ḍoraiar, hou hafe zela ku-buddi dia Bibi Haoare be-fote nisilgi, olaḳan tumrareo al-Mosir ges taki horailito fare, he tumrar dilor ḳaṭi bab ar monor nishana alailibo. ⁴Ḳaron amra ze Isar befare toblig korsi, oinno zone zebla tanre saṛa dusra kunu Isar ḳota toblig kore, tumra ita manrae. Ar tumra ze Pak Ruh faiso, ou Pak Ruh saṛa dusra kunu ruh faile, ba ze kush-ḳobri tumra manrae, i kush-ḳobri saṛa dusra kunu kush-ḳobri hunle, kub kushi oiau manilirae. ⁵Oile ami mono ḳori na, hou nam-ḍaki sahabi dol taki ami kunumonte-u huru. ⁶Ami zudio kub miṭa miṭa shure oaz ḳortam fari na, tebou amar to aḳol-buddir ḳomti nae, ita to ami hoḳol nomunae hoḳol halote tumrare deḳaisi.

⁷Tumrar unnoti deḳanir lagi ami bina betone Allar deoa kush-ḳobri toblig koria nizore nisa ḳorsi, ita kunu faf ḳorsi ni? ⁸Tumrar ḳezmotor lagi ami oinno zomat oḳolor ges taki shaijjo anchi, ḳoite gele tarare luṭia anchi. ⁹Tumrar gese roar ḳalo ami zebla obabo foṛlam, hou shomoyo ami ḳeuror buza oisi na. Ḳaron Makidonia taki zeta baiain aisla, tara amare shaijjo ḳorsoin. Te kunu haloteu ami tumrar buza oisi na, oitamo nae. ¹⁰Al-Mosir ze hokikoti amar bitre ase ou hokor boleu ami ḳoiram, asta Gris deshor kunu zagatu amar i beṭagiri ḳeu bond ḳorto farto nae. ¹¹Ami ila matar ḳaron kita? Ami tumrare maea ḳori na ni? Eḳ Allaeu zanoin, ami tumrare ḳoto maea ḳori.

¹²Nizor boṛai-beṭagiri deḳaia zeguin amrar homani oita sain, itae zanu i shuzug na fain, otar lagi ami zeḳan ḳorat asi, ikan ḳorat roimu-u. ¹³Ashole to ita oila bonḍo sahabi ar ṭog kamlain. Tara nizore al-Mosir sahabi deḳaito ḳori nizor surot bodlilae. ¹⁴Ete taijjub oar kunta nae, Ibliseo to nizore nuror firista deḳanir lagi tar surot bodlae. ¹⁵Erlagi zeguinte Iblisor ḳezmot ḳoroin, tarao zudi nizor surot bodlaia deḳain tara nek kam ḳorra, te taijjub oar kita ase? Tarar ḳamor fol tara aḳerato faibo.

Sahabi ḳamor lagi Hozrot Paulusor zulum-ḳoshṭo

¹⁶Ami aroḳbar ḳoiram, amare zanu ḳeu fagol mono na ḳore. Ar zudi ila mono ḳorilao, te amare eḳ fagol hishabeu shomzilao, zate amio tuṛa boṛai ḳorar shuzug fai. ¹⁷Ami oḳon zeta ḳoiram, ita malik Isar hukume ḳoiram na, ḳali nizor boṛai deḳanit gia faglami ḳorram. ¹⁸Bout zone zebla duniabi bishoe loia boṛai deḳaira, te ami ḳene deḳaitam na? ¹⁹Tumra to beshi aḳoldar, erlagi be-aḳol oḳolre kush dile shoijjo ḳoro. ²⁰Ḳali ikan nae, ḳeu zudi tumrare nizor gulam banaia raḳe, tumrare tar shikar banailae, fando falae, tumrar ufre ustadi ḳore ba tumrar galo soṛ mare, ta-o to tumra kushi oia shoijjo ḳorrae. ²¹Oile ami kub shorminda oia shikar ḳoriar, ita befare tumrar gese amra boṛo ḳomzur aslam, ila netagiri ḳortam farsi na.

Oinno manshe zeta loia boṛai ḳorar shaosh fae, amaro shaosh ase ita befare boṛai deḳanir, ami ḳali fagolor laḳan ita matiram. ²²Zetae boṛai-beṭagiri deḳain, tara kita Ibrani zatir ni? Amio to tarar laḳan. Tara Boni Israil zatir ni? Amio ola. Tara Hozrot Ibrahimor aolad ni? Amio to. ²³Tara al-Mosir ḳezmotḳari ni? Ami aro boṛo ḳezmotḳari. Mono rakio, ami fagolor laḳan matiram. Ami al-Mosir ḳezmoto lagia tara taki bout beshi menot ḳorsi. Bout bar zel ḳaṭsi, bout bar mair-doir ḳaisi, ar bout bar moutor mukabila oisi. ²⁴Ihudi oḳole amare fasbar durra marsoin, forteḳ bar unusallishṭa ḳori durra ḳaisi. ²⁵Tinbar amare singladi mara oise. Eḳbar amare ḳankoṛ mara oise. Tinbar amar zaz ḍubi gesil, ar eḳ din eḳ rait doriar fanit bashail aslam. ²⁶Ami bout desh sofor ḳorsi. Ban-fanir ato, sur-ḍaḳaitor ato, nizor zatir ato ar bin zatir ato ami mosiboto foṛsi. Esaṛa ṭauno, morubumit, doriat, ar bonḍo mumin oḳolor ato-o ami mosiboto foṛsi. ²⁷Ou duk-mosibotor mazeo zane-forane menot ḳorsi, bout rait uzagori ḳorsi, ḳani-fanir lagi ḳoshṭo faisi, bout ufash-ḳafash roisi, shit ar ḳafoṛ-sufoṛor obabeo ḳoshṭo faisi. ²⁸Ita saṛao al-Mosir zomat oḳolor lagi ami forteḳ din sinta ḳori. ²⁹Ḳeu ḳomzur oile ami nizeo tar ḳomzurir bagi oi na ni? Kunu ku-shongir talo foṛia ḳeu gunar fote gelegi, ami oshanti ḳori na ni?

³⁰Ami zudi boṛai deḳaitam sai, te ou ḳomzuri loiau boṛai ḳormu. ³¹Amrar Alla Pak ar malik Isa al-Mosir gaibi baf, zein hamesha gourob faoar laḳ, tain nizeu zanoin, ami kuntau misa matram na. ³²Dameskor bashsha Aritar hakim sabe amare dorar lagi Damesk ṭauno fara deoar hukum disla. ³³Oile ṭaunor baunḍorir oalor maze ze kiṛki asil, mumin baiainte eḳ ṭukrit ḳori ou kiṛki baedi amare maṭit lamai disla, ou nomunae ami tan at taki bagisi.

Hozrot Paulusor ḳas doroshon

¹Te amar aro kisu boṛai ḳora dorḳar, i boṛaie kunu faeda nai, oile malik Isae ze doroshon deḳaisoin ar zeta zanaisoin, ita oḳon ḳoiram. ²Hozrot Isar eḳzon ḳadimre ami sini, oḳon taki souddo bosor age meraz shorifor lagi tanre behesto tulia neoa oisil. Tain zannatul-ferdouso gela, i shomoe tain sho-shorile gesoin ki na zani na, ḳali Allaeu zanoin. ³Te enre ami sini, oile tane sho-shorile neoa oise ki na ami zani na, ḳali Alla Pake zanoin. ⁴Meraz shorifo nia harle tan loge bout batchit ḳora oise, ita batchit manshore hunani ṭik nae. ⁵Oula manshore loia ami boṛai ḳormu. Amar nizore loia kunu boṛai nae, ḳali amar ḳomzurir lagi boṛai ḳormu. ⁶Ou boṛai deḳaite saileo, ami kunu be-aḳoli ḳortam nae, ḳali hasa mat matimu. Ta-o ami boṛai deḳani bad dilailam, kizanu amar ḳam-ḳaz dekia ba amar mukor zobanbondi hunia, manshe oḳon amare zotoḳan mono ḳoroin, er saite beshi mono ḳorilain.

⁷Allae amare oto batuni befar zananie amar dilo zanu ohonkar na ae, ou niote tain amar shorilo eḳṭa rifu dila, amare ḳoshṭo dibar lagi, ou rifu oilo Iblisor sela. ⁸Malik Isar dorbaro ami tinbar aroz ḳorslam, ou rifugu amar ges taki horaia nitagi. ⁹Oile tain zuaf dila, “Amar rohomotu tumar boutta, amar bol-shokti mile ḳali ḳomzur halote.” Erlagi amar ḳomzurir befare ami kushi moneu boṛai ḳormu, zate al-Mosir ou bol-shokti amar maze boshot ḳore. ¹⁰Te al-Mosir namor lagi nanan laḳan ḳomzuri, beijjoti, obab-onoṭon, zulum-mosibot, ar be-fanat foṛleo ami kushi oi. Ḳaron ḳomzur haloteu ami boloban oi.

Korint zomator lagi sinta-babna

¹¹Ami fagol oisi ṭiku, oile tumrau amare fagol oite baiddo ḳorso. Tumrar usit asil amar tarif ḳora. Ami zudio kub shadaron manush, tebou tumrar hou nam-ḍaki sahabi dol taki kunumonte-u huru nae. ¹²Ami nizore eḳzon hok sahabi hishabe forman ḳorsi, bout shoijjo ḳoria tumrar maze nanan nomunar keramoti ḳam, kudroti nishana ar muzeza deḳaisi. ¹³Aichcha ḳo sain, oinno zomat oḳol taki tumra kunumonte huru ni? Oe, ḳali eḳṭa befare huru aso, ita oilo, ami tumrar gese buza oisi na. I bulor lagi amare mafi deo.

¹⁴Huno, ami tumrar gese zaoar lagi ou tin nombor bar zuit oilam, te ami kunu buza oitam nae, tumrar gese kunu don-samana sairam na, ḳali tumrare sairam. Ma-bafor lagi don-samana zomani to aolador forz nae, borong ma-bafor usit oilo aolador lagi don zomani. ¹⁵Te ami kub kushi oiau tumrar lagi amar hoḳolta ḳoros ḳormu, amar nizoreo bilai dimu. Ami zebla tumrare besh ḳori maea-mohobbot ḳoriar, te tumra ḳene amare ḳom maea ḳorrae?

¹⁶Zai ouk, ami tumrar ufre buza oisi na, arnae ḳeu ḳoilito fare, ami salaki ḳoria tumrare duka disi. ¹⁷Ar tumrar gese ami zerare faṭaislam, eraredi tumrare ṭogaisi ni? ¹⁸Titas baire ami minot ḳorlam tumrar gese zaoar lagi, tan loge hou baireo faṭailam. Te ou Titase tumrare ṭogisoin ni? Ami ar Titas, amra duiozone to eḳoi ruhe ar eḳoi niote ḳam ḳori. ¹⁹Aichcha, tumra mono ḳorrae ni, ou siṭi lekia amra nizor dush ḳaṭairam? Na, ikan ṭik nae, O dust oḳol, amra al-Mosir ḳadim hishabe Alla Pakre azir-nazir rakia leḳram, tumrare goṛia tular nioteu ita ḳoiram. ²⁰Ashole amar kub ḍor ḳorer, ami zebla tumrar gese aimu, aia hari tumrare zela deḳtam sairam, tumra zudi ilaḳan zuit na o, ar tumrao amar ze ruf deḳtae sao na, ami zudi hou ruf deḳani lage. Ba aia deki tumrar maze ḳaijja-fosad, ingsha-ninda, rag-gusa, doladoli, foror bodnam gaoa, gibot gaoa, boṛai-beṭagiri ar gulmal ase. ²¹Amar bitre ḍor ḳorer, ami aroḳbar zebla tumrar gese aimu, ou shomoe amar Allae ni tumrar samne amare shorminda banailain, zeta manshe guna ḳorsoin, zetae nafaki ḳam, zina, ar bodmaishi ḳoria touba ḳorse na, otare dekia ni ami monor maze ḳoshṭo fai.

Korint zomatre aḳeri hushiari

¹Baiainre, ami ou tin nombor bar tumrar gese airam. Zano to, Allar kalamo ase, “Dui ba tin zon manshe eḳoi laḳan shakki dile ou befar hasa forman oe.” ²Te ami zebla dusrabar tumrar gese geslam, hou soforor age zera guna-ḳosuri ḳorsil, ami tarare ar bad-baki hoḳolre hushiar ḳori dislam. Ar oḳon ami nize azir na oileo tarare ola hushiar ḳori diram, ami aroḳbar aile tara ḳeu rehai faita nae. ³Tumra bule forman sairae, amar muk dia al-Mosie matira ni. Ashole al-Mosi to tumrar befare kunumonte-u ḳomzur nae, tan nizor bol-shokti tumrar maze azir ase. ⁴Zudio tanre ḳomzur halote solibor ufre loṭḳaia zane mara oisil, ta-o Allar kudroti bole tain oḳon zinda asoin. Ar amra-o ola tan laḳan ḳomzur asi, oile tan loge zinda roae Allai kudroti bole tumrar gese aia mukabila oimu.

⁵Tumra nizore zasai ḳori deḳo, al-Mosir ufre hasaror iman ase ni? Tumra buzo na ni, Isa al-Mosi tumrar dilo asoin. Kial rakio, zasai ḳorat gia zanu tumrar maze bezal na mile. ⁶Ar ami asha ḳori tumra buzbae, amra to ḳaṭi hishabe forman oigesi. ⁷Amra Allar dorbaro munazat ḳorram, tumra hoḳol laḳan bod ḳam taki basia ro. Amra nizor forezgarir forman deḳanir lagi ikan ḳoiram na. Ar manshe amrare forezgar mono na ḳorleo, tumra hamesha nek kam ḳorat ro. ⁸Amrar ḳemota oilo hokor fokke, na-hokor fokke amrar kunu bol nai. ⁹Te amra zebla ḳomzur ar tumra boloban, ita deḳle amra kushi. Amra dua ḳoriar, tumra touba ḳoria hari furafur ḳaṭi o. ¹⁰Erlagi ami tumrar ges taki duroi roia ita leḳram, zate tumrar samne aia harle malik Isar deoa ḳemota ḳaṭaia ḳoṭu bebohar ḳora na lage. Malike amare i ḳemota disoin tumrare goṛia tular lagi, ḳeti ḳorar lagi nae.

Bidaei salam ar dua

¹¹O bai oḳol, hesh-mesh ḳoiram, tumra kushi-bashi ḳoro, nizore kamil banao, eḳe-oinnore nosiot ḳoro, eḳoi monobabe ro, shantie boshot ḳoro. Teu shantir ar mohobbotor Allao tumrar loge loge roiba.

¹²Tumra eḳe-oinne fobitro golagoli ḳorio. ¹³Allar hoḳol pak bondae tumrare salam zanaira.

¹⁴Malik Isa al-Mosir rohomot, Alla Pakor mohobbot, ar Pak Ruhur ḳatir-zoton tumra hoḳolor dilo rouk. Amin.