1-Timoti

Fobitro Injil Shorif 15 nombor sifara

foela Timoti

Forisiti

Alla Pakor hukume Hozrot Isa al-Mosir sahabi Hozrot Pauluse (ra:) siṭir aḳare ou sohifa leḳsoin. Onuman ḳora oe, Hozrot Isae behesto toshrif neoar 27–28 bosoror maze ikan leḳa oise.

Timoti name eḳzon zuan manush asla, tain Hozrot Paulusre (ra:) toblig kamo shaijjo ḳorta. Tan ma asla Boni Israil zatir ar baf asla Iunani zatir. Tan baṛi asil Asiya desho, ikan oḳonkur Turoshko deshor bitre (Sahabi Nama 16–20 ruku deḳba). Leḳok Hozrot Pauluse ou Timotir gese i sohifaḳan leḳsoin.

Tain buzaita saira, Allar zomator mumin oḳolor sal-cholonor eḳṭa mafḳaṭi ase, zomat salani ar zomator talimoro eḳṭa niom-niti ase. Zomator lagi zorur oilo, bul talim taki hushiar roa, zoiggo manshor ato zomat salanir daeitto deoa, ar zomator beṭi manush, ḳas ḳori ṛaṛi beṭintor befare zomator dae-daeitto batail oise.

Ou sifarar 2 ruku 4–6 aeato ase, “Alla Pakor kial oilo, zate hoḳol manshe nazat fain, ar al-Mosir torikar hokkolta shullo-ana buzoin. I hokikoti oilo, Alla ḳali eḳzon, Alla ar manshor maze shafaeatḳari mazor manusho ḳali eḳzonu asoin, en nam Isa al-Mosi, eino manush. Duniar hoḳol manshor zanor bodla hishabe, tain nizor zan kurbani disoin.”

Ermaze ase,

(1) Bonḍo mullain taki zomatre basao 1 ruku

(2) Zomat salanir niom-ḳanun 2—3 ruku

(3) Ḳaṭi ḳadim oar foramish 4 ruku

(4) Mumin oḳolor bae dae-daeitto 5:1—6:2 aeat

(5) Souk raḳo Allar aroshor bae 6:3-21

¹Ami Paulus to amrar toraneala Alla Pak ar amrar asha-borosha Hozrot Isa al-Mosir hukume tan sahabi oisi. ²Mumin hishabe amar ḳas aolad, Timotir gese leḳram.

Gaibi baf Alla Pake ar amrar malik Isa al-Mosie tumare rohomot, meherbani ar shanti dan ḳoroukka.

Bonḍo mullaintor befare hushiari

³O Timoti, ami Makidonia desho zaoar bala tumare ḳoislam, oḳon hirbar minoti ḳori ḳoiram, huno, tumi Ifis ṭaunou ro, roia onor ola kisu mullaintore hukum deo, tara zanu manshore ar bul talim na dey. ⁴Tarare ḳoio, tara zate banoaṭ kichcha ar lamba lamba ḳandanor lisṭor bae kiali na oin. Itae to nanan nomunar doladolir zonom dey, Allar ḳamor kunu faeda oe na, Allai faeda mile ḳali imanor mazdi. ⁵Borong shoṭik talimor fol oilo, maea-mohobbot, ita to ḳaṭi dil, forishkar bibeḳ ar hasaror iman taki foeda oe. ⁶Oile kisu manshe ita bad dia banoaṭ mat-ḳotar bae mon dilaise. ⁷Tara zudio nizeu nizor mator mani buze na, ar ze befar loia boṛo golae mater, i befareo balamonte zane na, tebou tara Musa nobir batail shoriotor ustad oito sae.

⁸Amra zani, shoriot bala zinish, ḳeu zudi ṭik moto ita ḳamo lagae. ⁹Amra to zani, i shoriot kunu forezgar manshor lagi deoa oise na. Ikan deoa oise, zetae Allar ain manoin na, Allare ḍorain na, naformani ḳoroin, gunagar, kuni, nafaḳ ar be-din, ma-bafor kuni, ^10-11zinakur, shomoḳami, bandi-gulamor ḳarbari, misa matra, misa shakki deora, ek kotae gunogane doni Alla Pakor mohan kush-ḳobrir talimor birudi zeta manush, otar lagiu i shoriot deoa oise. Ar ou mohan kush-ḳobri tobligor bar tain amare dan ḳorsoin.

Meherbanir lagi shukria

¹²Hozrot Isa al-Mosi, zein amrar malik, tain amare bol zugaisoin, amare hok-halal mono ḳoria tan ḳamo boail ḳorsoin, erlagi ami tan dorbaro shukria zanairam. ¹³Zudio ami age al-Mosir bodnam gaitam, tan manshor ufre zulum ḳortam, bod-mizaz deḳaitam. Ta-o tain amare rohomot dan ḳorsoin, ḳaron hou shomoe ami iman anchilam na. ¹⁴Amrar munibe amare ḳoto boṛo meherbani ḳorsoin, Isa al-Mosir torika ḳobul ḳorle ze iman ar mohobbot foeda oe, ita to amare furafur dan ḳorsoin.

¹⁵Ashole i ḳota to hok-kaṭi ar shullo-ana manar laḳ, gunagar oḳolor zan basanir lagiu Isa al-Mosie i duniat toshrif anchila. Ou gunagaror maze amiu fordan. ¹⁶Otar lagiu Allae amare doya ḳorsoin, zate amar moto fordan gunagaror mazdi Isa al-Mosie tan shima saṛa soborgari deḳaita faroin, ar tan ufre iman anae zera aḳeri zindegi faiba, tara zanu amare dekia Allai fot buzoin. ¹⁷Zein siroḳalin bashsha, zein niraḳar, eḳmatro Alla, zan kunu ḳoe nai, tan ijjot ar gourob hor-hamesha zari rouk. Amin.

¹⁸O maear fut Timoti, tumar befare age zeta batuni mat mata oisil, ou mafik ami tumare minot ḳori ḳoiram, tumi ita mono rakia al-Mosir lagi dile-zane laṛai ḳorat ro. ¹⁹Erloge nizor iman ar forishkar bibeḳre basaio. Kunu kunu manshe bibeḳor buli na mania, nizor imanre nosṭo ḳorilise. ²⁰I dolo asoin, Huminas ar Sikondor. Erlagi ami itare Iblisor ato shofi disi, zate tara buzta faroin, kufuri mat mata ṭik nae.

Dua-munazator niom-ḳanun

¹Ami foelau zanairam, forteḳ manshor lagi tumra Allar dorbaro ḳakuti-minoti, dua-munazat, foriad zanao ar shukria adae ḳoro. ²Olaḳan raza-bashsha oḳol ar usa fodor hoḳol ofisaror lagi munazat ḳora zorur, zate amra Allar ḍor-ḳof mono rakia, hok-halal fote roia, nirafode shantie zindegi ḳaṭaitam fari. ³Ita to amrar toraneala Allar nozoro nek kam, itae tain kushi oin. ⁴Alla Pakor kial oilo, zate hoḳol manshe nazat fain, ar al-Mosir torikar hokkolta shullo-ana buzoin. ⁵I hokikoti oilo, Alla ḳali eḳzon, Alla ar manshor maze shafaeatḳari mazor manusho ḳali eḳzonu asoin, en nam Isa al-Mosi, eino manush. ⁶Duniar hoḳol manshor zanor bodla hishabe, tain nizor zan kurbani disoin. Ou befare to Allar ṭik kora shomoye shakki deoa oise. ⁷Ar ou shakki dibar lagi Allae amare toblig kamo, sahabi fodo boail ḳorsoin, tain amare daeitto disoin, bin zatir gese iman ar Allai hokor ustad hishabe. Ami ita hok mat matiar, misa kunta nae.

⁸Ami sairam, hoḳol zagar beṭainte ḳalis niote duio at tulia munazat ḳorouk. Tarar monor maze kunuzat rag-gusa ba ḳaijja-fosador bab na rouk.

⁹Ami eoḳano sairam, beṭinte tarar haea-shorom rakia shomazor ufozukto beshe bodro ḳafoṛ-sufoṛ findouk. Tara zanu nanan nomunae sulor beni bolia, shuna-rufa ar moni-muktar goena lagaia ar dami dami ḳafoṛ findia nizore na hazain. ¹⁰Borong Allar forezgar bandie zela nek kamor maze zindegi ḳaṭani usit, tarao ola oin. ¹¹Ḳortar furafur baiddo roia, ar nirai-zirai roia ilim ḳamai ḳoroukka. ¹²Ustadi ḳora ar beṭaintor ufre musoddori ḳorar odikar ami kunu beṭire dei na. Tara nirai-zirai roa zorur. ¹³Zano to, hoḳol foela Adomre ar bade Bibi Haoare foeda ḳora oisil. ¹⁴Adom to Iblis-shoetanor dukat foṛsoin na, oile Haoa Iblisor dukat foṛia Allar hukumor borkelaf ḳorsoin. ¹⁵Oḳon zudi beṭinte tarar haea-shorom rakia iman, mohobbot ar fak-fobitro oia soloin, te hurutta zonom deoar mazdi tara rehai faiba.

Zomator saloḳdar ar ḳadim

¹Huno, ashol hok kota oilo, ḳeu zudi zomator saloḳdar oita sain, te tain to nek kam ḳorar kiali oisoin. ²Zomator saloḳdar manshor sokut nikut oite oibo. Tan ḳali eḳ bou oibo. Tain nizore shamlaia raḳba, tan bala aḳol-buddi roibo, shobab oibo bodro, ar memandari ḳorte bala faiba. Manshore talim deoar ḳemota taḳte oibo. ³Tain zanu modkur ar bod-mizazi na oin, borong tan shobab oibo norom, tain zanu mair-danga ḳorra ba ṭeḳa-foeshar lalchi na oin. ⁴Tain zanu shoṭik babe tan nizor foribaror hokkolta salain, tan huruttain oiba baiddo ar adob-ḳaeda manra. ⁵Ze manshe tar nizor gor shamlaito fare na, he Allar zomatre kila deḳa-huna ḳorbo? ⁶Kunu noea imandar bai zomator saloḳdar oa ṭik nae, ila oile tain hoeto boṛai-beṭagirie bahaduri ḳorba, ar Iblisor lagi ṭik kora shazar bagi oiba. ⁷Zomator bairor manshor gese tan shunam taḳa dorḳar, zate aḳta kunu bodnamor bagi na oin ar Iblisor fando na foṛoin.

⁸Oula zomator ḳadim oḳolo ijjoti ar ek kotar manush oa zoruri. Era zate modkur ar haram lub-lalchi na oin. ⁹Tara zanu hok bibeḳe Isaei imanor batuni befarre mozbut ḳori dilo raḳoin. ¹⁰Erlagi foela tarare zasai ḳori deḳa zorur, zasait zudi tara nikut oin, te zomator ḳadim oita farba.

¹¹Ṭik olaḳan beṭi manusho zanu ijjoti oin. Era manshor bodnam na gain, nizore shamlaia raḳoin, ar hoḳol befare bishashi oin.

¹²Ḳadim sab ḳali eḳ bouala manush oiba. Tain zanu balamonte tan bou fua-fuṛin ar shongsharor deḳa-huna ḳoroin. ¹³Ze ḳadime balamonte ḳezmot ḳoroin, ein shunam fain, ar Hozrot Isa al-Mosir ufre iman taḳae tan dil shaoshe bora roe.

Isaei imanor batuni befar

¹⁴O Timoti, ami asha ḳorram kub zoldiu tumar gese aitam. Oḳan mono ḳoria tumare ita leḳram. ¹⁵Zudi kunu ḳarone amar aite deri oizae, te i leḳa foṛle tumi buzbae, Allar foribaror manshor sal-cholon kila oito. I foribar to zinda Allar zomat, Allai hokikotor bit ar ian kuṭi. ¹⁶Isaei imanor marifoti ḳoto mohan, ita to oshikar ḳora zae na. Ou marifoti oula zair oilo,

Tain manush surote zair oila,

Pak Ruhe forman oila be-ḳosur,

firista oḳole tan doroshon faila.

Tan befare hokkol zatir gese toblig kora oilo,

asta duniar manshe tan ufre iman anla,

gourob-mohimae tanre ufre tuli neoa oilo.

Bonḍo boiragir talim taki hushiar

¹O Timoti, Allai Pak Ruhe forishkar ḳori ḳoira, aḳeri zomanat kisu manush Isaei iman taki horizibo, tara na-hok ruhu ar zin-butor talimor ashik oibo. ²Zeta beiman oḳolor bibeḳ-buddi oshaṛ oigese, otar bonḍamir dae ola oibo. ³Itae manshore ḳoṛaḳoṛi hukum dein bia-shadi na ḳorar lagi, ar kunu kunu ḳani ḳaiteo nished ḳoroin. Oile Allae to i ḳani foedau ḳorsoin, zera iman anche, zera Allar hokre zanilise, tara zate Allar shukria adae ḳoria ita ḳain. ⁴Allar foeda ḳora hoḳol zinishu bala. Haram mono ḳoria kunuta bad deoa ṭik nae, borong Allar shukria adae ḳoria ḳaoa zae. ⁵Ḳaron Allar kalam ar i munazator mazdi ita fak-fobitro oizae.

Hozrot Isar ḳaṭi ḳadim o

⁶O Timoti, tumi zudi ou talim oḳol mumin baiainre buzaia deo, te Isaei imanor ze hok ar nirbul talim mania solrae, i befare tumi faḳa-fukto oia al-Mosir eḳzon ufozukto ḳadim oibae. ⁷Tumi aze-baze kichcha-ḳahini taki horia roio, ita to dadi-nanir ḳoa banail kichchar laḳan. Erlagi ita bad dia dilor imani beam ḳorat ro. ⁸Shorilor beam ḳorle kisu faeda oe, oile dilor imani beame hokkol bae taki faeda oe. Ermaze to ḳali i dunia nae, aḳerator ashao ase. ⁹Ita to furafur hok ar ḳaṭi, shullo-ana ḳobul ḳorar laḳ. ¹⁰Erlagiu amra zane-forane imanor menot ḳoriar ar kiali oia ḳam ḳoriar. Ḳaron amra to zinda Allar ufre borosha ḳori. Tainu hoḳol manshor toraneala, ḳas ḳori zera tan ufre iman ane.

¹¹Te tumio ou befare hukum ar talim deo. ¹²Tumi zuan beṭa mono ḳoria ḳeu zanu tumare ela na ḳore, erlagi mat-ḳotae, sal-cholone, mohobbote, imane ar fak-fobitrotae tumi mumin oḳolor gese eḳṭa nishana bonizao. ¹³Ar ami aibar ag forzonto tumi mumin oḳolre pak kalam tilaot ḳora, shu-foramish deoa, ar talim deoat lagail roio. ¹⁴Mono rakio, zomator murobbi oḳole tumar ufre at rakia, nobir laḳan gaibi buli matia tumare ḳelafoti disoin, te tumi i niamotre elami ḳorio na. ¹⁵Ita befare kiali o, nizore otar maze furafur ḍubaia raḳo, teu hoḳolor sokut foṛbo tumi agedi aguairae. ¹⁶Tumar nizor befare ar tumar talimor befare hushiar roio. Teu tumi nizore basaibae, ar zera tumar boean hunbo, tarareo basaitae farbae.

Mumin oḳolor bae dae-daeitto

¹O Timoti, huno, kunu murobbi manshor dush deḳanit gia ḳoṛa bashae matio na. Tarar loge nizor bafor laḳan bebohar ḳorio. Ar zuan oḳolre nizor bai mono ḳoria hedaeot ḳorio. ²Murobbi beṭinre nizor ma ar fuṛintore boin mono ḳoria, monor bab fak-fobitro rakia tarare hedaeot ḳorio.

³Zeta ṛaṛi beṭintor ḳeu nai, tarare kub zoton ḳori deḳa-huna ḳorio. ⁴Oile kunu ṛaṛi beṭintor zudi fua-fuṛin ba nati-natni taḳoin, te Allar ḍore erau zanu foela zarzir foribaror deḳa-huna ḳore. Ou nomunae tarar moe-murobbir maea-momotar rin shud korta farba, ar ita ḳame to Alla kushi oin. ⁵Ze ṛaṛi beṭintor ḳeu nai, tara ḳali Allar ufre borosha rakia, dine-raite tan dorbaro munazat ar ḳanda-ḳaṭi ḳorat roin. ⁶Oile zeta ṛaṛi beṭinte zemne mone sae emne soloin, ita to zinda haloteu mora. ⁷Ou befare hukum deo, zate ḳeu tarare dushi ḳoar shuzug na fae. ⁸Ze zone afon zonre, ḳas ḳori nizor foribaror manshor deḳa-huna ḳore na, he ashole Isaei imanreu oshikar ḳorlo. Igu to bidormi takio bad.

⁹Erlagi ṛaṛi beṭintor namor lisṭ ḳorar bala age deḳte oibo, i beṭir boeosh shaiṭ bosor oise ni, ar zamair bae tain furafur hok-halali asla ni. ¹⁰Esaṛa nek kamor lagi tan shunam taḳte oibo, ou nek kam oilo, fua-fuṛin manush banani, memandari ḳora, Allar bonda oḳolor fao doani, duk-mosiboti manshore shaijjo ḳora, ar hoḳol nomunar nek kamo shorik oa.

¹¹Kunu zuan ṛaṛi beṭir nam i lisṭo tulio na. Ḳaron tarar zoubonor lagi shorilor gorome zebla utal-fatal ḳoroin, ou shomoe al-Mosir bae tarar ḍor-boe ḳomi zae, teu tara hirbar bia boita sain. ¹²Erlagi tara Allar logor agor oada bongo ḳoroin, nizor ufre gozob ḍakia anoin. ¹³Ar tara baṛie baṛie aḍḍa maria kuṛia bonizain. Ḳali kuṛia nae, zeta mat-ḳota tarar lagi zaiz nae, ota baze mat-ḳotao matoin ar foror gibot gaoat roin. ¹⁴Erlagi ami ou nosiot ḳoriar, zuan ṛaṛi beṭinte bia-shadi ḳorau bala, tara huruttar ma ouk, nizor shongsharor deḳa-huna ḳorouk, ar dushmonre kunu laḳan bodnam gaoar shuzug na deuk. ¹⁵Ḳoezon ṛaṛi beṭin ermazeu to be-foti bonia shoetanor fote sola-fira ḳorra.

¹⁶Kunu Isaei imandar beṭi manshor goro zudi ṛaṛi beṭin taḳoin, te ou beṭie zanu erar deḳa-huna ḳoroin. Erare deḳa-hunar bar zomator ufre na deoa bala. Teu zeta ṛaṛi beṭin eḳdom lasar, zomate tarar deḳa-huna ḳorte shubida oibo.

¹⁷Zomator ze fordan murobbi oḳole zomatre balamonte salain, ḳas ḳori zera Allar kalam toblig ar talim deoar lagi menot ḳoroin, tara ḍabul ijjot faoa zorur. ¹⁸Allar kalamo to ase, “Dan maṛa deoar shomoe gorur muko hufi lagaio na.” Aroḳ aeato ase, “Ḳamlae tar beton faoar zoiggo.” ¹⁹Mono rakio, dui ba tin zon shakkir ḳota saṛa, zomator murobbir birudde kunu nalish shomzio na. ²⁰Oile ze murobbi oḳole guna ḳoratu taḳoin, zomator manshor gese tarar dush zair ḳorio, zate oinno hoḳole ḍorain.

²¹Huno, Alla Pak, malik Isa al-Mosi, ar Allar maear firista oḳolre shakki rakia tumare ou hukum diram, tumi nirofokko roia ita ḳam ḳorio, ḳeurore for ba afon mono ḳorio na. ²²Soṭ ḳori ḳeurore ḳelafoti dia, kunu fodo boail ḳorio na. Oinno manshe zebla gunar ḳam ḳore, tumi tarar loge shorik oio na, nizore nikut rakio.

²³Ar ḳoedin bade badeu tumar bemar oe, erlagi tumi ḳali fani ḳaio na, tuṛa tuṛa anguror shorboto ḳaio, teu ozom oibo.

²⁴Kial rakio, kunu kunu manshor guna ola forishkar deḳa zae, erlagi tar bisar ageu oizae. Ar kunu kunu manshor guna bade dora foṛe. ²⁵Olaḳan nek kam forishkar deḳa zae, ar kunu nek kam forishkar deḳa na geleo, ita lukail roe na.

¹Huno, ze gulam-bandie munibor gulami ḳoroin, tara hoḳoleu zarzir munibre ijjoti zon mono ḳorouk, zate ḳeu Allar namre ba amrar talimre ḳaraf ḳoar shuzug na fae. ²Ze zone Isaei imandar kunu munibor gulami ḳoroin, ein zanu imandar bai hishabe tan munibre elami na ḳoroin borong aro bala ḳori tan ḳezmot ḳoroin. Ḳaron gulamor ḳezmote ze munibe ufoḳar faira, tain to maear imandar bai. Te ota befare tumi talim ar hukum deo.

Bul talim ar ashol don

³Ḳeu zudi ita bad dia dusra kunu talim dey, ar amrar malik Isa al-Mosir ḳaṭi talim ar Allar ḍor-ḳofor talimre na mane, ⁴he to misa ohonkari, he kuntau buze na, motobed ḳora, behuda uftami ḳora tar eḳṭa bemar. Otar ḳarone ingsha-ninda, ḳaijja-fosad, ku-shondoe foeda oe. ⁵Ar oshaṛ bibeḳala manshor maze hamesha gulmal lagailu taḳe. Ita manshor maze Allai hok nai. Tara Isaei imanre duniabi labor ufae mono ḳore.

⁶Ashole monor tusṭie Isaei iman mafik zindegi ḳaṭaile kub beshi lab oe. ⁷Amra duniat aibar ḳalo to kuntau loge loia aisi na, ar zaoar ḳalo-o kunta nitam fartam nae. ⁸Erlagi ḳali ḳani-ḳafoṛ faileu amra kushi roimu. ⁹Oile duniat zera doni oito sae, tara nanan nomunar forikkat ar fando foṛe, tarar mono kub bod ḳaish foeda oe, zetae tarar zindegire shorbonashor gato falae. ¹⁰Ḳaron hoḳol nomunar bod ḳamor zonom oilo ṭeḳa-foeshar maea. Kunu kunu zon ṭeḳa-foeshar lalche Isaei iman taki horia gia, nizor ufre boṛo duk-mosibot ḍakia anche.

Souk raḳo Allar aroshor bae

¹¹Oile tumi to Allar bonda, tumi ita bod ḳam taki horia ro. Tumi pak-forezgar zindegi, Allar ḍor-ḳof, iman, mohobbot, sobor, ar norom shobabor bae kiali o. ¹²Imani laṛai ḳorat ro. Aḳerator ze zindegir lagi Alla Pake tumare daot disoin, hou zindegire tumi mozbut ḳori doro. Tumi to imani shakki dislae bout manshor samne. ¹³Oḳon Alla Pakor name, zein hokkoltar zan dein, ar zein hakim Fontio Filator samne nizor befare hok shakki disla, hou Isa al-Mosir nameo tumare ou minoti ḳorram, ¹⁴amrar malik Isa al-Mosi zair oar ag forzonto tumi furafur nikut ar bodnam saṛa roia hukum adae ḳoro. ¹⁵Ar gunogane doni hou Alla, zein eḳmatro shomraṭ, bashsha oḳolor bashsha ar malik oḳolor malik, tainu tan ufozukto shomoye al-Mosire zair ḳorba. ¹⁶Ḳali Alla Pakreu moute ḳobza ḳorto fare na. Tain ola eḳ nuror foro boshot ḳoroin, hino kunu Adom zat zaito fare na. Kunu Adome kunudin tanre deḳseo na, deḳar takkoto nai. Ijjot ar ḳemota siroḳal ḳali tanu. Amin.

¹⁷Huno, ou duniar doni oḳolre hukum deo, tara zanu boṛai na ḳoroin, ar duniabi ostaei donor ufre borosha na ḳoria, Allar ufre borosha ḳoroin. Amrar balair lagi tainu hoḳolta kula ate dan ḳoroin. ¹⁸Ar tarare ḳo, tara zanu oinnor balai ḳore, nek kam ḳorat roe, mon kulia dan-ḳoerat ḳore, ar tarar don-doulotor baṭ oinno manshore dey. ¹⁹Teu tara nizor lagi emon don zoma ḳorbo, zeta bobishote tarar lagi ekkan mozbut bitor laḳan oibo. Ete hasaror zindegire tara shokto ḳori doria raḳto farbo.

²⁰O Timoti, tumar zimmae ze shompod deoa oise, i shompod tumi balamonte hefazot ḳoro. Aze-baze aḳolor beḳama biddar bulir du-nosla talim taki horia ro. ²¹Kunu kunu zon ota beḳama aḳol deḳanit gia, ashol iman taki be-fote gesegi.

Alla Pake tumrare rohomot dan ḳoroukka. Amin.