1-Tishol:

Fobitro Injil Shorif 13 nombor sifara

foela Tisholonikia

Forisiti

Alla Pakor hukume ou sifara leḳsoin, Hozrot Isa al-Mosir sahabi Hozrot Paulus (ra:). Hozrot Isae behesto toshrif neoar onuman 17 bosor bade Tisholoniki zomator gese ou foela bar siṭir aḳare ikan leḳa oise. Tisholoniki asil Makidonia deshor razdani. Hozrot Paulus ḳoieḳ hafta ou zagat asla, tan loge asla Timoti namor eḳ imandar. Ou ṭauno Hozrot Isar ummot oḳolor eḳ zomat oisil, Hozrot Timotie ou zomator deḳa-huna ḳorta (Sahabi Nama 17 ruku deḳba).

Zulumor lagi Hozrot Paulus i zaga taki horia zaoar bade Hozrot Timotie ou zomator hal-hokikoto tanre zanaisoin, zania tain i sohifa leḳsoin. I sifarar 4 ruku 14 aeato ase, “Hozrot Isae dusrabar toshrif anle, Isar ufre iman ania zerar mout oise, Allae tarareo Isar loge milon ḳoria tan loge niba.” Otar lagi tarare shaosh deoa or.

Ermaze ase,

(1) Tisholoniki zomator iman 1 ruku

(2) Tisholoniki ṭauno Hozrot Paulusor agor sofor 2:1-16 aeat

(3) Tisholonikir muminre hirbar deḳar kial 2:17—3:13

(4) Shorilre fobitro rakia hushiar ro 4:1-12

(5) al-Mosi dusrabar aibar hal-hokikot 4:13—5:11

(6) Kuṛiami bad dia nek kam ḳoro 5:12-28

¹Ami Paulus, bai Silas ar Timotie Tisholoniki ṭaunor zomator gese leḳram. Tumra amrar gaibi baf Alla Pak ar Hozrot Isa al-Mosir afon zon oiso. Tumrar ufre rohomot ar shanti nazil ouk.

Tisholoniki zomator iman

²Amra dua ḳorar bala hamesha tumrar zomator hoḳolor nam mono ḳoria Allar shukria adae ḳori. ³Imanor lagi tumra ze ḳam ḳorrae, mohobbotor lagi tumra ze menot ḳorrae ar Hozrot Isa al-Mosir ufre asha-borosha ḳoria tumra ze sobor ḳorrae, ita amrar gaibi baf Allar dorbaro dua ḳorar shomoe hamesha mono ḳori.

⁴O bai oḳol, Allar maear bonda oḳol, amra zani, Allaeu tumrare fosond ḳorsoin. ⁵Amrar kush-ḳobrir toblig kam to tumrar gese ḳali mukor ḳotau roise na, borong Allai bol, Pak Ruh, ar nichchit boroshar ufre salu oise. Tumrar balair lagi amra zebla tumrar loge roitam, ou shomoe kilan solchi, ita to tumra zano-u. ⁶Tumra bout zulum-mosibotor mazeo Pak Ruhur deoa kushie amrar toblig kobul ḳoria, amrar ar malikor fote solrae. ⁷Oula solia tumra Makidonia ar Gris deshor mumin oḳolor gese eḳ nishana oigeso. ⁸Malikor kalam tumrar mazdi ḳali Makidonia ar Gris deshou sitrise na, borong Allar ufre tumrar imanor ḳota hoḳol zagatu sitrigese. I befare amra kunta matar zorur nae. ⁹Hoḳol mansheu to amrare ḳoira, tumra ḳoto ador ḳoria amrare ḳobul ḳorsilae, tara eoḳan ḳoira, tumra kila deb-debintor fuza bad dia Allar foti oia, zinda hok Allar ebadot ḳorat aiso. ¹⁰Ar murda oḳolor maz taki zenre zinda ḳori tula oise, hou Isa duniat aoar bar saitae faro. Tain oila Allar ḳas maear zon Ibnulla, behest taki lamia aira, Allar ze gozob aia lamer, i gozob taki ou Isae amrare basaiba.

Tisholoniki ṭauno Hozrot Paulusor agor sofor

¹Bai oḳol, tumra to nizeu zano, tumrar gese amrar zaoaḳan beḳama gese na. ²Tumra eoḳano zano, er age amra Filifi ṭauno zulum-mosiboto foṛslam ar beijjot oislam. Bade tumrar ono-o bout bada-nished ḳaṭaia amra Allai shaoshe shaoshi oia dile-zane tan kush-ḳobri kula-mela toblig korsilam. ³Amrar daot to kunu bul talim taki nae, kunu bod nioteo nae ba kunu ṭoga-ṭogir nioteo nae. ⁴Ḳali Allae amrare zoiggo mono ḳoria zela kush-ḳobri tobligor daeitto disoin, amra olau toblig korram. Kunu manshore kush ḳorar niote amra ita ḳoiram na, ḳali zein amrar dilre zasai ḳoria deḳoin, hou Allare kush ḳorar lagiu toblig korram. ⁵Tumra to zano, amra kunu shomoe-u ḳeuror gese tel-malish ḳoria ḳota matsi na, ar kunu lub-laloso foṛia dandabazir ḳamo ḳorsi na, eḳ Allau itar shakki. ⁶Kunu manshor ges taki ijjot faite asha ḳorsi na, tumrar ges takio na, ba baira manshor ges takio na. Amra ichcha ḳorle to al-Mosir sahabi hishabe tumrar ufre dabi ḳaṭaitam farlam one. ⁷Oile er bodla, maʼe zela nizor huruttainre zoe-zoton ḳoroin, tumrar loge taḳar shomoe amra-o ola norom bebohar ḳorsi. ⁸Tumrar lagi kub beshi maea-mohobbot oae, ḳali Allai kush-ḳobri toblig nae, amrar nizor zan diteo razi aslam. Zano to, tumra oilae kub maear manush.

⁹Baiainre, ashole to amrar menot ar aṭni-ḳaṭnir ḳota, nichchoe tumrar mono ase. Allai kush-ḳobri tobligor faḳe faḳe amra dine-raite ruzi-ruzgar ḳorsi, zate amrar ḳorsa-fati tumra ḳeuror lagi buza na oe. ¹⁰Ar tumra zera iman ancho, tumrar loge to amrar asar-bebohar asil fobitro, hok ar nikut. Tumrau itar shakki, ar Alla Pako shakki asoin. ¹¹Tumra to zano, bafe zela nizor forteḳ aoladre utshaho, shantona ar mozbut foramish dein, amra-o tumra hoḳolre oula foramish ditam, ¹²zate Allar bonda hishabe tumra ufozukto oia solo. Allae tumrare daot dira, tan nizor bashshai ar gourobor bagi oar lagi.

¹³Mono rakio, amra hamesha Allar shukria adae ḳorram, ḳaron amrar ges taki Allar kalam hunia tumra zebla iman anchilae, hou shomoe kunu manshor mukor ḳota nae, borong Allar kalam hishabeu tumra ita ḳobul ḳorsilae, ar hasau ita Allar kalam. Tumra zera iman ancho, hou kalameu tumrar dilo ḳam ḳorer. ¹⁴Bai oḳol, Hozrot Isar torikae solra Allar zoto zomat oḳol Ehudia zilat ase, tumrar hal-hokikot to tarar laḳanu. Ḳaron tara zela nizor Ihudi zatir ato duk-mosibot faisoin, tumrao oula nizor zatir manshor ges taki duk-mosibot faiso. ¹⁵Mono rakio, Ihudi oḳole Hozrot Isa ar nobi oḳolre ḳatol ḳorsil, tara amrar ufreo zulum ḳorse. Te Alla Pak tarar ufre kushi nae, hoḳol manshor logeo tarar dushmoni bab ase. ¹⁶Tara amrare nished dira, zate bin-dormi manshor gese amra Allai nazator kush-ḳobri toblig na ḳori. Ou laḳan tara zarzir gunar buza boṛo ḳorra. Erlagi tarar ufre Allar ḳaṛa gozob lamse.

Tisholonikir muminre hirbar deḳar kial

¹⁷O bai oḳol, monor dik taki na oileo, shorilor dik taki to amra tuṛa dinor lagi, tumrar ges taki horail asi. Erlagi amrar kub kial ase, zate tumrar mukkan hirbar deḳtam fari. ¹⁸Amra hoḳolu, ḳas ḳori ami Pauluse bar bar sesṭa ḳorsi tumrar gese aitam. Oile shoetane amrare aṭḳailise. ¹⁹Hasau amrar malik Isae zebla toshrif anba, ou shomoe tan samne amrar asha, anondo ar gourobor zoeor mala hishabe kita faimu? Ita to tumrau nae ni? ²⁰Ashole tumrau amrar gourob, tumrau amrar anondo.

¹Bade amra zebla ar shoijjo ḳortam farlam na, ou shomoe amra niot ḳorlam, amra eḳlau Atinia ṭauno roia, ²amrar bai Timotire faṭaimu, zate tain gia tumrar iman mozbut ḳoroin ar monor shaosh zugain. Tain to al-Mosir kush-ḳobrir toblig kamo Allar ḳadim, amrar logor bai, tanre faṭailam, ³zate ou duk-mosibotor mazeo tumra ḳeu ḳoredi na zao. Tumrar zana ase, duk-mosibot amrar ufre ṭiku aibo, ar ita shoijjo ḳora lagbo. ⁴Ami age zebla tumrar loge aslam, hou shomoe tumrare ḳoisi, duk-mosibot amrar ufre aibou, ar ṭiku olaḳan aise. ⁵Te ami zebla ar shoijjo ḳortam farlam na, ou shomoe tumrar imanor halot deḳar lagi Timoti baire faṭailam. Amar mono ḍor asil, kizanu shoetane tumrare lalos deḳaise ar amrar hoḳol menot beḳama gesegi.

⁶Oile Timoti bai tumrar ges taki firia aia amrare zanaisoin, tumrar iman ar maea mohobbotor halot bout bala. Tain ḳoisoin, tumra hamesha maea-mohobbote amrare mono ḳoro, ar amra zela tumrare deḳtam sairam, tumrao oula amrare deḳar asha ḳorrae. ⁷O bai oḳol, erlagiu tumrar imanor mozbutir ḳota hunia, amrar oto duk-mosibotor mazeo dilo shanti faisi. ⁸Tumra malikor ufre imane mozbut roileu, amrar zindegikan doinno. ⁹Tumrare loia Allar dorbaro amra ze kushi-bashi ḳoriar, itar lagi amra kila Allar shukria zanaitam, zanram na. ¹⁰Amra mon dia dine-raite hamesha dua ḳorram, zate tumrar mukkan hirbar deḳar shuzug fai, ar tumrar imanor bad-baki hoḳolta fura ḳortam fari.

¹¹Te gaibi baf Allae ar Hozrot Isa al-Mosie zanu tumrar gese zaoar lagi amrare shuzug dein. ¹²Amra zela tumrar bae maea-mohobbotor maze ḍubi gesi, ṭik oula malik Isae tumrareo eḳe-oinne, ar hoḳolor bae maea-mohobbote habu-ḍubu ḳaoaukka. ¹³Ou laḳan tain tumrar dil furafur mozbut ḳoroukka, zate amrar Hozrot Isae zebla tan nizor pak bonda oḳol loia toshrif anba, ou shomoe amrar gaibi baf Allar nozoro tumra fobitro ar nikut ro.

Shorilre fobitro rakia hushiar ro

¹O baiain huno, Allare kushi ḳorar lagi ḳemne zindegi ḳaṭani lage, i talim to tumra amrar ges taki ageu faiso ar tumra ola solraeo. Erbadeo Hozrot Isar oia tumrare minot ḳoriar ar hushiar ḳoriar, tumra zela solrae, oula aro besh ḳori solo. ²Hozrot Isar deoa eḳtiare amra zeta hukum disi, ita to tumrar zana ase.

³Ashole Allae saira, tumra zanu fak-fobitro o, mani hoḳol nomunar zina taki horia ro. ^4-5Ar zeta manshe Allare sinoin na, hou bin-dormir laḳan shorilor ḳaishor boshe na solia, tumra forteḳ zone zarzir shorilre fak-fobitro rakia man-shommane zina taki hushiar ro. ⁶I befare ḳeu zanu nizor bair loge gaddari na ḳore. Mono rakio, amra ageu tumrare ḳoisi ar hushiaro ḳorsi, ita naformani ḳorle malik Isae shaza diba. ⁷Allae kunu amrare daot disoin ni naformanir fote solar lagi? Tain to amrare fak-fobitro oia solar lagi ḳoisoin. ⁸Erlagi zegie i talim mane na, he ḳali duniar manshore mane na ikan nae, he ashole hou Allareu maner na, zein tumrare Pak Ruhu dan ḳorsoin.

⁹Te baie baie kila maea-mohobbot taḳa zorur, i befare tumrare kunta leḳar goroz nai, ḳaron Allae tumrare hikaisoin, eḳe-oinne maea-mohobbot ḳortae. ¹⁰Ar hasau tumra asta Makidonia deshor bai-boinre oula maea ḳorrae. Oile amrar ḳas onurud oilo, tumrar i mohobbot zanu dine dine aro baṛe. ¹¹Huno, amra age zela ḳoisi, ou ḳota mafik shantie zindegi ḳaṭao, foror ḳamo naḳ na golaia nize ḳam ḳoria ḳao. ¹²Teu baira manshor sokut tumrar sal-cholon bodro oibo, ar oinno zonor ruzir ufre tumrar borosha ḳora lagto nae.

al-Mosi dusrabar aibar hal-hokikot

¹³O bai oḳol, huno, murda oḳolor kun halot oibo, amra sairam ita tumra zano, zate moron bade kita oibo ikan na zanae zera nirash oizae, tumrar mon zanu ilaḳan na oe. ¹⁴Huno, amra zebla ekin ḳori, Hozrot Isar mout oisil oile tain zinda oia uṭsoin, te eoḳano ekin ḳori, Hozrot Isae dusrabar toshrif anle Isar ufre iman ania zerar mout oise, Allae tarareo Isar loge milon ḳoria tan loge niba. ¹⁵Erlagi malikor kalam mafik tumrare ḳoiram, amra zera zinda asi ar malike toshrif anar ag forzonto zinda roimu, amra kunumonte-u hi murda oḳolor age zaitam fartam nae. ¹⁶Ḳaron Allai shingar aoazor loge loge, fordan firistar ḍaḳor loge, malik Isae zure haukdi hukum diba, tain nizeu behest taki lamia aiba. Ar al-Mosir ummot bonia zerar mout oigese, tarau foela zinda oia uṭba. ¹⁷Erbade amra zera duniat zinda taḳmu, amrar malikor loge mulaḳat ḳorar lagi amrareo megor kuṭit ḳori asmano tulia neoa oibo. Olaḳan amra siroḳal malikor loge roimu. ¹⁸Erlagi tumra ota zanaia eḳzone aroḳzonre utshaho deo.

¹Baiainre, kun zomanat kun shomoe kita goṭibo, ita tumrar gese leḳar zorur nai. ²Tumra nizeu to bala ḳori zano, raitkur bala zela aḳtau sur ae, malik Isa aibar dino ṭik olau aibo. ³I zogotor manshe zebla ḳoiba, “Hoḳolta shanti oigese, kunu ḍor-boe nai,” ou shomoe, beṭintor hurutta oar bedona zela aḳtau dore, oula ota manshor shorbonash aḳtau oibo. Tara kunumonte-u rehai faito nae.

⁴Bai oḳol, tumra kunu andarir maze boshot ḳorrae ni zen, hou din aḳtau suror laḳan tumrar ufre aito? ⁵Tumra hoḳolu to Allar nuror ar dinor foror manush. Amra to andarir ba raitor balar manush nae. ⁶Erlagi ao, oinno manshor laḳan amra na gumaia borong hozag roi ar nizore shamlaia raki. ⁷Zano to, zera gumae, tara raitor balaeu gumae ar zera modkur, rait oile tara mod ḳaia ṭal oe. ⁸Oile amra to dinor foror manush, erlagi nizore shamlaia raki. Amrar buk basanir lagi iman ar mohobbot dia buk guri, ar matare basanir lagi Allai nazator ashare sifair kefor laḳan matat lagai. ⁹Mono rakio, Allae amrare shaza dibar lagi ḍakia anchoin na, borong amrar malik Isa al-Mosir usillae nazat faoar lagiu ḍakisoin. ¹⁰Ar al-Mosir mout oise to amrar lagiu, zate amra basi ba mori, tan logeu hamesha zinda roi. ¹¹Erlagiu tumra oḳon zela ḳorrae, hamesha ola eḳe-oinnore shaosh deo ar goṛia tulo.

Kuṛiami bad dia nek kam ḳoro

¹²Te baiain, amra minot ḳoria ḳoiar, tumrar lagi zera aṭni-ḳaṭni ḳaṭoin, malikor oia tumrare salain ar nosiot ḳoroin, tumra erare ijjot ḳorio. ¹³Tara zera ḳezmot ḳorra, otar bae saia dilor mohobbote tarare ḳas ijjot dio. Ar tumra eḳe-oinne mili-mishi roio. ¹⁴O bai oḳol, tumrare ou nosiotḳan ḳoriar, zeta manush kuṛia, tumra itare hushiar ḳori deo, ḍoraluk zonre shaosh deo, ḳomzur oḳolre shaijjo ḳoro, ar doijjo doria hokkolre shoijjo ḳoro. ¹⁵Kial rakio, oinnaer bodla ḳeu zanu oinnae na ḳore. Tumra hamesha eḳe-oinnor, ar hoḳoloru balai ḳorar sesṭa ḳorio.

¹⁶Hoḳol shomoe kushi-bashi ḳorat roio, ¹⁷hamesha dua-munazat ḳorio ¹⁸Ar hoḳol haloto Allar shukria adae ḳorio. Ḳaron Alla Pakor kial oilo, Hozrot Isa al-Mosir loge imane tumra olaḳan solo. ¹⁹Pak ruhure dilor bitor taki nibaio na. ²⁰Ar zera Allar oli hishabe batuni ḳoin, tarar ḳotare elami ḳorio na, ²¹borong hoḳolta zasai ḳori dekia, balaḳan bitre haraio. ²²Ar hoḳol nomunar naformani taki horia roio.

²³Shanti deora Allae nize tumrare furafur fak-fobitro ḳoroukka, amrar malik Isa al-Mosie toshrif anar ḳalo tumrar asta shoril, ruh ar dilre furafur nikut raḳoukka. ²⁴Ar tain nichchit olau ḳorba. Zano to, zein tumrare daot ḳori anchoin, tan ufre furafur borosha ḳora zae.

²⁵O baiain, amrar lagi dua ḳorio. ²⁶Tumra eḳe-oinne fobitro golagoli ḳorio. ²⁷Amrar malikor name ami tumrare ou hukum diar, ou siṭikan foṛia zanu hoḳol baiaintore hunail oe.

²⁸Amrar malik Isa al-Mosir rohomot tumrar loge rouk. Amin.