1-Fitor

Fobitro Injil Shorif 21 nombor sifara

foela Fitor

Forisiti

Alla Pakor hukume Hozrot Isar sahabi Hozrot Fitore (ra:) ou sohifa Ruman bashshair razdani Rum ṭaun taki leḳsoin, ou Rum ṭaunre mumin oḳole naforman Babil ṭaun ḳoia ḍakita. Tain nanan deshor maze sitria taḳa Isaei imandar oḳolor gese siṭir aḳare leḳsoin. Hozrot Isae behesto toshrif neoar onuman 28–30 bosor bade ikan leḳa oise.

Zulum ar duk-mosibotor shomoe imandar oḳolre buz deoar lagi tain i sohifa leḳsoin. Ou shomoe zera Hozrot Isar ufre iman ansla, tara shadaron manshor gese ṭaṭṭa-moshkorar siz bonigesla. Erlagi Hozrot Fitore ou sohifar mazdi tarare shaosh zugaisoin.

Ou sifarar 2 ruku 5 aeato ase, “Tumra tan torika ḳobul ḳorae, tumrare zinda fattoror laḳan Alla Pak roibar fobitro kaba gor banani or. Erlagi Allai imam sab hishabe tumrare alada ḳori raḳa oise, zate tumra oula ruhani kurbani deo, zeta Isa al-Mosir ḳatire Allae ḳobul ḳoroin.”

Ermaze ase,

(1) Nazator asha ar fobitro oar daot 1:1—2:3 aeat

(2) Allar goror zinda fattor bonia zindegi ḳaṭao 2:4-25

(3) Zamai-bour lagi hukum3:1-7

(4) Duk-koshṭor bade moha furushkar 3:8—4:19

(5) Gulamir beshe ḳezmot ḳoro 5 ruku

¹Allar fosond ḳora zoto bonda oḳol Fonto, Galatia, Kappadokia, Asiya ar Bitunia desho sitria bin-deshi hishabe boshot ḳorra, tarar gese ami al-Mosir sahabi Fitore ou sohifaḳan leḳram. ²Gaibi baf Allae tan munshae tumrare fosond ḳorsoin ar Pak Ruhe fobitro ḳorsoin. Er uddesho oilo, tumra zate Isa al-Mosir baiddo o ar tan lou siṭaia tumrare pak-saf ḳora oe.

Allae tumrare besh ḳori rohomot ar shanti dan ḳoroukka.

Imandar oḳolor nazator asha

³Hou Alla Pakor tarif ouk, zein amrar malik Isa al-Mosir Mabud ar gaibi baf. Tain Isa al-Mosire mora taki zinda ḳoria, tan moha doyae amrare noea zonom dan ḳorsoin, ete amra eḳ zinda asha faisi. ⁴Mani amra ola eḳ donor asha faisi, ze don kunudin nosṭo oito nae, hara zibon noea taḳbo, ermaze ḳaraf kunta taḳto nae. Nazator i don tumrar lagi behesto raḳa oise. ⁵Tumra furafur nazat na faoa forzonto, Allai shoktie imanor mazdi tumrare hefazote raḳa oise. Ou nazat ṭik kora oise, aḳerator shomoe zair oar lagi. ⁶Zudio ḳoe dinor lagi nanan zat forikkar mazdi tumra oḳon duk-koshṭo ḳorrae, ta-o ou nazator ashae to tumrar mon kushie bora. ⁷Ou forikka oḳol soler, tumra zen imane ḳaṭi oḳan forman ḳorar lagi. Ar Isa al-Mosir zair oar shomoe, tumra zanu tarif, gourob ar shomman fao. Ze shuna ḳoe oizae, ou shunareo agunit fuṛia zasai ḳora oe. Ar tumrar imanor dam to ou shunar saiteo bout beshi, erlagi ou forikka soler. ⁸Zudio al-Mosire tumra deḳso na, tebou tumra tanre mohobbot ḳorrae. Ar oḳono tanre souke na deḳleo, kushi oia tanre ekin ḳorrae, i kushi to bashae ḳoa zae na, ita ḳali behesti kushi. ⁹Ḳaron tumrar imanor aḳeri fol fairae, ikṭa oilo tumrar zanor furafur nazat.

¹⁰Ze dua tumrar faoar ḳota, i befare bout age nobi oḳole bataisoin. Tara ou nazator befar zanar lagi bout kuz-ḳobor ḳorsoin. ¹¹Tarar dilo al-Mosir ruhe ageu shakki dia ḳoisoin, tanre ḳoshṭo ḳorte oibo ar bade tain mohima faiba. Nobi oḳole zanta saisla, al-Mosir ou ruhe kun shomoekur ar kun halotor ḳota tarare zanaira. ¹²Oile Allae tarare deḳaia disoin, tara zeta bataira ita dia tarar nizor ḳezmot na ḳoria, tumrar ḳezmot ḳorra. Asman taki faṭail Pak Ruhu dia, zera tumrar gese al-Mosir befare kush-ḳobri toblig korsoin, tara tumrare nobi oḳolor ḳotau zanaisoin. Firista oḳoleo ita befar zanar lagi kiali.

Fak-fobitro oar daot

¹³Erlagi tumrar monre hozag koro ar nizore shamlaia raḳo. Al-Mosi zair oar bade ze rohomot tumra faibae, ou rohomoti nazat faoar lagi furafur asha loia tumra bar sao. ¹⁴Tumrar agor obuz halotor ḳaraf ḳam-ḳaz mafik zindegi ḳaṭaio na, borong Allar hukum manra aolad hishabe din ḳaṭao. ¹⁵Zein tumrare daot disoin, tain zela fobitro, tumrao oula hoḳol sola-firat fobitro o. ¹⁶Pak kitabo Allae ḳoisoin, “Ami fobitro, erlagi tumrao fobitro o.”

¹⁷Allae forteḳ manshor amol-noma dekia bisar ḳoroin, ḳeuror mukor bae saia bisar ḳoroin na. Erlagi tanre zudi tumra gaibi baf ḍaḳo, te zotodin tumra ou duniat musafir halote taḳbae, otodin tumra tanre ḍoraia zindegi ḳaṭao. ¹⁸Tumra zano, tumrar baf-dada taki faoa beḳama sal-cholonor fot taki, ḳoe oar zuḳa shuna-rufar laḳan kunuta dia tumrare azad ḳora oise na. ¹⁹Borong tumrare azad ḳora oise, al-Mosir moha dami lou dia, nikut-niskolonko meṛar baichchar lou dia. ²⁰Dunia foeda oar ageu Allae tanre ṭik kori raḳsoin, oile ou hesh-mesh shomoe tain tumrar lagiu zair oisoin. ²¹Allae enre mora taki zinda ḳori tulia mohima dan ḳorsoin ar tan mazdi tumra Allar ufre iman ancho. Erlagiu tumrar iman ar asha Allar ufreu ase.

²²Oḳon hok-halali mania, tumrar dilre pak-saf ḳorso ar imandar bai oḳol zebla tumrar gese maear manush oisoin, te ami ḳoiram, tumra eḳe-oinnore dile-zane maea ḳoro. ²³Ze bis nosṭo oizae, tumrar zonom to ila bisor nae. Borong zeta nosṭo oe na, ota takiu tumrar noea zonom oise. Ou bis oilo Allar siroḳalin zinda kalam. ²⁴Allar kalamo leḳa ase,

Hoḳol manushu gashor laḳan,

gash fulor laḳan tara shundor;

gash hukai zae, fulo zori zae,

²⁵ḳali Allar kalam roe siroḳal.

Ar ou kalamu oilo kush-ḳobri, zeta tumrar gese toblig kora oise.

¹Erlagi oinno manshor ḳeti ḳorar hoḳol zat ku-motlob, sol-soturi, bonḍami, ingsha, ar hoḳol zat nindar mat-ḳota tumrar dil taki horai deo. ²Geda huruttaintor dudor fiasor laḳan tumra ḳaṭi ruhani dudor kiali o, ar ou dud ḳaia ḳaia zanu tumra boṛo oia nazat fao. ³Malik Isar meherbanir moza to tumra faisou.

Allar goror zinda fattor

⁴Te tumra tan gese ao. Tainu oila agor nobi oḳolor ḳoa hou “Zinda fattor”, ze fattorre manshe dam dise na, oile Allar gese ikṭa moha dami ar fosondor fattor. ⁵Ar tumra tan torika ḳobul ḳorae, tumrareo zinda fattoror laḳan Alla Pak roibar fobitro kaba gor banani or. Erlagi Allai imam sab hishabe tumrare alada ḳori raḳa oise, zate tumra oula ruhani kurbani deo, zeta Isa al-Mosir ḳatire Allae ḳobul ḳoroin. ⁶Allar kalamo ase:

Huno, ami eḳṭa moha dami fattor fosond ḳorsi;

ikṭare Zeruzalemo ian kuṭi hishabe gaṛisi.

Ze zone tan ufre iman ane,

he kunumonte-u shorminda oito nae.

⁷Ar tumra iman anae, tumrar gese hou fattor moha dami oigese. Oile zera iman anche na, tarar belae kitabor ou ḳotau ḳaṭe:

Raz-mestoir oḳole ze fattorre beḳama ḳoia falai disil,

oḳṭa diau goror ian kuṭi oilo.

⁸Ar,

Ikṭa oula fattor, ze fattoro manshe usṭa ḳaibo,

tarar asaṛ ḳaia foṛar ḳaron oibo.

Manshe Allar kalam mane na, gotikeu usṭa ḳae. Ita to tarar ḳofali dosha.

⁹Oile tumra to ila nae, tumra oilae Allar fosond ḳora ḳandan, bashshai imamor dol, fobitro zati, tan afon proza. Tain tumrare andair taki nizor nuror foro daot ḳori anchoin, tan gunogan ḳorar lagi. ¹⁰Age to tumra Allar proza aslae na, oile oḳon oiso. Age tan maea-mohobboto faiso na, oḳon faiso.

al-Mosir nomunae zindegi ḳaṭao

¹¹Bai oḳol, i duniat tumra musafir hishabe ami tumrare minot ḳori ḳoiram, tumra shorilor bod ḳaish taki basia ro, itae to tumrar ruhur bifokke zuddo ḳore. ¹²Zera Allare sine na, tarar maze tumra hok fote solo. Teu tara tumrare dushi ḳoia ninda ḳorleo, tumrar hoḳol bala ḳam dekia kiamotor din Allar gourob ḳorbo.

¹³Tumra malik Isar ḳatire manshor banail shashon-bebosta manio. Deshor razare manio, ein to deshor fordan. ¹⁴Tan montri ar hakimre manio, oforadir shaza ar bala zonre furushkar dibar lagi tain erare raḳsoin. ¹⁵Allar munsha oilo, tumra bala ḳam ḳoria buṛboḳ manshor beḳama mat-ḳota bond ḳoro. ¹⁶Tumra nichchoe shadin, ta-o naformanire guria raḳar lagi i shadinota bebohar ḳorio na. Borong nizore Allar gulam mono ḳoro. ¹⁷Hoḳol manshore ijjot ḳoro, tumrar imandar bai oḳolre mohobbot ḳoro, Allare ḍorao ar deshor razare ijjot deo.

¹⁸Ar baṛir gulam oḳolre ḳoiram, tumra munibre ijjot deo ar tarar ḳotat ro. Ze munib bala ar doyalu, ḳali zen tarar ḳotat taḳtae, ila kunta nae. Oile zera ḳoṭu bebohar ḳore, tarar ḳotato ro. ¹⁹Ola ḳeu zudi ḳamoḳa duk-koshṭo fae ar Allare mono rakia ita shoijjo ḳorilae, te furushkar faibo. ²⁰Oboshsho oforador lagi mair ḳaia tumra zudi shoijjo ḳoro, te tarif ḳorar kunta ase ni? Oile bala ḳamor lagi tumra zudi ḳoshṭo faiao shoijjo ḳorilao, te ita Allar dorbaro tarifor laḳ, ²¹Allae tumrare otar lagiu daot disoin. Al-Mosieo ḳoshṭo shoijjo ḳoria nomuna deḳaisoin, te tumrao tan faor tale tale solo.

²²Tain kunu guna ḳorsoin na,

tan muko asil na kunu sol-soturi.

²³Manshe tanre gali dileo, tain firia gali disoin na. Ḳoshṭor shomoe er bodla loiba ḳoia ḍor-boeo deḳaisoin na, borong zein hok bisar ḳoroin tan ato nizore shofi disoin. ²⁴Tain nizor shoril dia amrar gunar buza boisoin gasor ṭukrar solibo, zate gunar babote amra moria hari, pak-forezgarie zinda roi. Tan shorilor ḳaṭa-sirae tumrar shifa oise. ²⁵Age to tumra be-fote zaoa meṛar laḳan aslae, oile ze raḳale tumrar dilor deḳa-huna ḳoroin, oḳon tan gese-u firia aiso.

Zamai-bour lagi hukum

¹Olaḳan, zamair goror hoḳol bouaintore ḳoiram, tumra zarzir zamair ḳotae solo. Zudio kunu kunu zamaie Allar kalamre dam dey na, ta-o tumrar sal-cholone zanu tarare al-Mosir bae ṭania ane. Teu i befare tumrar ekkan ḳotao mata lagto nae. ²Tumrar fobitro zindegir halot dekia, ar Allar ḍor-ḳofe sola dekia tara nizeu aibo. ³Nanan nomunae hazi-faṛi sulor kufa bandia, shuna-rufar goena lagaia, ar dami dami ḳafoṛ findia nizore hazanit roio na. ⁴Borong ze shundor kunudin nosṭo oito nae, hou nomunae sola-fira ar shantir ḳaislot dia nizor dilre hazao. Allar nozoro otau to moha dami. ⁵Ṭik olaḳan agor zomanar allaoala beṭinte, Allar ufre borosha ḳoria zamair baiddo roia nizore hazaita. ⁶Hozrot Ibrahimor bibi Saerao tan zamair baiddo asla ar tanre munib ḳoia ḍakita. Tumrao manshore na ḍoraia zudi nek kam ḳoro, te oḳṭau forman oibo, tumra bibi Saerar zoiggo aolad.

⁷Ar zamai oḳolreo ḳoiram, tumra bibeḳ-buddi ḳaṭaia bour loge solo. Tarao to tumrar logor ḳomzur manush ar Allar rohomotor dan hishabe tarao tumrar loge zindegi faibo. Erlagi tarare ijjot deo, zate Allar dorbaro tumrar munazat beḳama na zae.

Nek kamor lagi duk-koshṭo ḳoro

⁸Heshe hoḳolre ḳoiram, tumra hoḳol eḳ-dila o, eḳe-oinnor duke duki o, baiaintore maea ḳoro, doyalu ar norom dilor manush o. ⁹Oinnaer bodla oinnae ḳorio na, ḳeu gali dile firia gali dio na. Borong tarar lagi dua saio, ola solar lagiu Allae tumrare daot disoin, ila ḳorle tumra rohomot faibae. ¹⁰Zela Zobur Shorifo ase,

Ze zone shuki zindegi ḳaṭaito sae

ar shudin deḳar asha ḳore,

he bad ḳota taki tar zifrare,

sol-soturi taki ṭuṭre shamlauk.

¹¹Bad ḳam taki firia bala ḳam ḳorouk,

shantir ashik oia er ḳore ḳore rouk.

¹²Forezgaror ufre to Mabudor nozor,

tarar dua hunar lagi tan ḳan ḳaṛa,

oile bad ḳam ḳorrar ufre,

Malik-Moular bod nozor.

¹³Tumra zudi bala bala ḳamor ashik o, te ḳe tumrar ḳeti ḳorbo? ¹⁴Forezgarir fote solar lagi zudio tumrar ḳoshṭo oe, ta-o tumra mubarok. Ar tumrare zetae ḍor deḳain itare ḍoraio na, ostir oio na, ¹⁵borong al-Mosire nizor dilo malik hishabe ḳobul ḳoro. Tumrar asha-borosha zudi ḳeu zanto sae, te tar zuaf dibar lagi hamesha zuit roio. ¹⁶Oile i zuaf norom shure dio. Tumrar dil saf rakio, Isaei ummot hishabe zera tumrar bala sal-cholonor ninda ḳore, tara zanu shorminda oe. ¹⁷Bod ḳam ḳoria ḳoshṭo faoa taki to, Allar morzi oile nek kam ḳoria ḳoshṭo faoa bout bala.

¹⁸Mono rakio, amrar gunar mafir lagi al-Mosieo eḳbar ḳoshṭo ḳorsoin, naformanre basanir lagi hou forezgar zone zan disoin, amrare Allar dorbaro fousanir lagi. Shorile tanre mara oisil, oile ruhe zinda ḳora oise. ¹⁹Ar ruhe tain bondi ruh oḳolor gese gia toblig korsoin. ²⁰Ou ruh oḳol to Nuh nobir zomanar obaiddo manshor ruh. Tan zaz bananir shomoe, Allar lamba soborgarir ḳalo era obaiddo roisoin, ou zazo uṭia ḳali aṭzon manshe gozobi fani taki zan basaisil. ²¹I fani oilo al-Mosir name torikabondir eḳṭa nishana, zetae oḳon tumrar zan base. Torikabondie tumrar shorilor moela saf oe na, ḳali Allar dorbaro saf dilor shae dey. Hozrot Isa al-Mosi mora taki zinda oia uṭae tumrar zan base, ²²tain behesto gesoin ar Alla Pakor ḍain galar toḳto boat asoin. Asmanor firista oḳol, ḳemotar malik oḳol ar raza oḳol tan odine asoin.

Allai donor ḳazanchi oia ḳezmot ḳoro

¹Al-Mosie nizor shorilo ḳoshṭo shoijjo ḳorsoin ḳori, tumrar dilor babreo olaḳan ḳoro. Shorilo zar ḳoshṭo oise, he to gunar zalo bondi roise na. ²Erlagi he zotodin duniat ase, otodin bod ḳaishe na solia ḳali Allai munshae zindegi ḳaṭae. ³Allare zera sine na, tarar laḳan tumrao age zina-bodmaishi, mouz-furti, matlami, hoi-hulla ar zogoinno murtifuza ḳoria din ḳaṭaitae. ⁴Oile oḳon tumra tarar loge oia olaḳan beshamal naformani ḳorrae na dekia, tara taijjub bonia tumrar ninda gaira. ⁵Ta-o zein zinda ar murda oḳolor bisaror lagi zuit asoin, tara tan gese-u hishab-nikash dite oibo. ⁶Erlagiu murda oḳolor geseo kush-ḳobri toblig kora oisil, zate manush hishabe tarar shorili bisar oileo, ruhani zogoto tara Allar laḳan zinda roin.

⁷Oḳon to hokkoltar hesh shomoe aichche. Erlagi tumrar monre ṭik koro, nizore shamlaia raḳo, zate munazato kamiab o. ⁸Ashol ḳota oilo, tumra eḳe-oinnore dil taki mohobbot ḳoro, ḳaron maea-mohobbote bout guna guria raḳe. ⁹Kunuzat bitishna na deḳaia, tumra eḳe-oinnor memandari ḳoro.

¹⁰Allar ges taki zein zelaḳan niamot faiso, ou donor ḳaṭi ḳazanchi hishabe itare eḳe-oinnor ḳezmoto lagao. ¹¹Ḳeu zudi toblig koroin, te ou laḳan ḳoroukka zate buza zae, ita Allai buli. Ar zein ḳezmot ḳoroin, ein Allar deoa bol-shoktie ḳezmot ḳoroukka, zate hokkoltatu al-Mosir usillae Allar tarif oe. Tarif ar kudroti ḳemota hor-hamesha tanu. Amin.

Isaei imandar hishabe ḳoshṭobug

¹²Bai oḳol, tumra oḳon zibon-moron forikkat foṛia taijjub oio na, mono ḳorio na ita asanok kunta goṭer. ¹³Borong tumra zen al-Mosir ḳoshṭor bagi oirae ḳori kushi ḳoro, zate tan mohima zair oar shomoyo tumra amud-furtie kushi-bashi ḳortae faro. ¹⁴Al-Mosir namor lagi tumra zudi beijjot o, te tumra nek-kofali. Ḳaron Allar mohima-ala Pak Ruh tumrar ufre ase. ¹⁵Tumrar mazor ḳeu zanu suri, kun, ba kunuzat oforadi hishabe, emonki foror ḳame nak golaia ḳoshṭo na ḳorouk. ¹⁶Oile ḳeu zudi Isaei imandar hishabe duk-koshṭo ḳore, te he shorminda na ouk, borong Isaei forisoer lagi Allar tarif ḳorouk. ¹⁷Bisaror shomoe aichche, ar Allar fosond ḳora bonda oḳolrediu bisar shuru oibo. Ita zudi amrar maz takiu shuru oe, te zera Allar kush-ḳobri manche na, tarar dosha kilan oibo? ¹⁸Allar kalamo ase,

Allaraia manshor zanor sodma oile,

gunagar ar be-dine muk lukaibo kuai?

¹⁹Oile Allar morzie zera duk-koshṭo ḳorer, tara nek kam ḳori ḳori nizor zanre hou hok-halal foeda ḳorrar ato shofi deuk.

Gulamir beshe ḳezmot ḳoro

¹Oḳon zomator murobbi oḳolre ḳoiram, amio to eḳzon murobbi, ami nizor souke al-Mosir duk-koshṭo deḳsi, ar tan ze mohima zair oibo, ou mohimato shorik oimu. Ami minot ḳori ḳoiram, ²Allai ze meṛar fal tumrar aotae asoin, erar raḳali ḳoro. Tarar imamoti ḳoro, ḳora lagbo ḳori na ḳoria ba duniabi labor ashae na ḳoria, kush dile ḳoro. Allae to ola imamotiu asha ḳoroin. ³Tumrar aotae zera ase, erar ufre musoddori ḳorio na, borong falor raḳali ḳoria tarar gese nomuna bono. ⁴Teu hou fordan raḳal Isae zebla duniat hirbar toshrif anba, ou shomoe tumra furushkar hishabe ola eḳ zoeor mala faibae zeta kunudin binash oito nae. ⁵Ou laḳan zuan oḳoleo tumrar murobbire mania solo. Gulamir beshe hoḳoleu eḳe-oinnor ḳezmot ḳoro, zela Allar kalamo ase,

Allae ohongkarir birudde taḳoin,

norom dilor manshore rohom ḳoroin.

⁶Erlagi Allar ḳemotar samne tumra noto o, teu shomoe moto Allae tumrare usa ḳorba. ⁷Allae to tumrare loiau sinta ḳoroin, erlagi hoḳol sinta-babnar bar tan ufre dilao.

⁸Tumra nizore shamlaia raḳo ar hushiar o. Ḳaron tumrar dushmon Iblise gorzon ḳorra bagor laḳan, tumrare ḳailito ḳori ḳaf doria gurer. ⁹Erlagi imane mozbut roia tar mukabila ḳoro. Tumra to zano, duniar hoḳol zagat tumrar imandar baiainte eḳoi laḳan duk-koshṭo ḳorer.

¹⁰Rohmanur rohim Alla Pake tumrare daot disoin al-Mosir loge oia tan sirostaei mohimar bagi oar lagi. Tuṛa ḳoedin duk-koshṭo ḳoria harle, tain nizeu tumrare ṭik-ṭak korba ar tir raḳba, tumrare boloban ḳoria mozbut kuṭir ufre ḳaṛa ḳoraiba. ¹¹Tan raz-ḳemota hor-hamesha zari rouk. Amin.

Shesh ḳota

¹²Ou siṭikan ami Silas mohrir sabredi kub ḳom ḳotae tumrar gese leḳaisi, ami tanre hok-halal bai mono ḳori. Ami sairam Allar ḳas rohomotor ou shakki hunia tumrar shaosh baṛouk, ar tumra ono tir oia ro.

¹³Allae tumrar loge zerare fosond ḳorsoin, hou Babil ṭaunor mumin oḳole tumrare salam zanaira, ar amar dormor fua Markuseo tumrare salam zanaira. ¹⁴Tumra eḳe-oinne mohobbote golagoli ḳorio. Tumra zera al-Mosir afon zon oiso, tumrar ufre shanti nazil ouk. Amin.