1-Hannan

Fobitro Injil Shorif 23 nombor sifara

foela Hannan

Forisiti

Alla Pakor hukume Hozrot Isa al-Mosir sahabi Hozrot Hannane (ra:) siṭir aḳare ou sohifa leḳsoin. Hozrot Isae dunia taki behesto toshrif neoar onuman 50–60 bosor bade ikan leḳa oise.

Tan leḳa ou sohifar maze, Alla Pakor maear bonda oḳolor befare boeani ase. Zogotor manshor aolad oḳol zelaḳan tarar ma-bafor laḳan oin, oula Allar maear bonda oḳolo tan laḳan oin. Hozrot Isa al-Mosir ufre iman ania zera aḳeri zindegi failise, tarar zindegir maze nanan nomunae Allai gunagun deḳa zae. Tara Allar hukum-ahkam mania sole, ar gunar ḳam taki horia roe. Alla Pakor bae tarar mohobbot ase ar oinnainno imandar oḳolreo mohobbot ḳore.

Ou sifarar 3 ruku 16 aeato ase, “Al-Mosie amrar lagi tan nizor zan bilai disla, oḳan takiu amra buzchi, mohobbot ḳare ḳoe. Oḳon amrar bair lagio amrar zan bilai deoa zorur.”

Ermaze ase,

(1) Hozrot Isau Allar deoa zindegi kalam 1:1-4 aeat

(2) Guna saṛia Allar nure ar mohobbote solo1:5—2:17

(3) Ḳane-Dorjal taki shabdan 2:18-27; 4:1-6

(4) Allar nuror aolad bonia nekir ashik o2:28—3:10

(5) Alla nizeu mohobbot, te mohobbote solo 3:11-24; 4:7-21

(6) Isau Allar ḳas maear zon mania zoei o 5 ruku

Hozrot Isau Allar deoa zindegi kalam

¹Hoḳol foela takiu zein asla, zanre nizor souke deḳsi, zan mukor aoaz amra hunchi, kub kial ḳori azmaia saisi ar nizor ate dora-soa ḳorsi, hou zindegi kalamor boeani leḳram. ²Ou zindegi to i duniat zair oisla, amrar nizor souke i zindegire deḳsi, dekia hari tan befare shakki diram. Behesti baf Alla Pakor gese zein asla ar amrar maze zair oisla, aḳeri ou zindeganir ḳotau tumrare zanairam. ³Ou ze zonre amra deḳsi, zan mukor buli hunchi, tan befareu tumrare ḳoiram. Zate ota hunar bade amrar loge tumraro ḳatir-dusti oe. Amrar ou ḳatir oilogi, gaibi baf Alla Pak ar tan ḳas maear zon Ibnulla Isa al-Mosir loge. ⁴Te amra ita leḳram, zate amra ar tumrar kushi-bashi fura oe.

Guna saṛia Allar nure ar mohobbote solo

⁵Amra al-Mosir muk taki ita hunia hari, oḳon tumrareo zanairam, Alla Pak to nur. Tan maze andarir kunu siṭa-fuṭao nai. ⁶Ar amra andarir maze solia zudi ḳoi, Alla Pak ar amrar maze ḳatir-dusti ase, te to amra misa matram, shoṭik kam ḳorram na. ⁷Oile Alla Pak zela nuror maze boshot ḳoroin, oula amra-o zudi nuror fore soli, te amra eḳe-oinne ḳatir-dusti ase, ar tan ḳas maear zon Isa Ibnullar fobitro loue amrar tamam guna-ḳosuri pak-saf ḳore. ⁸Oḳon amra zudi ḳoi, amra muṭeu gunagar nae, te amra nize nizore ṭogiar, ete forman oe amrar maze Allai hokikoti nai. ⁹Amra zudi zarzir gunar shikarukti dilai, te tan afon hok-halali ar pak-forezgarir gune, loge loge gunar mafi dilain, tamam naformani taki amrare pak-saf ḳorilain. ¹⁰Oḳon amra zudi ḳoi, amra kunu guna ḳorsi na, te amra tanre-u misa matra banailam, ete forman mile, amrar dilor maze tan kalam nai.

¹O amar sabal oḳol, ami tumrar gese ita leḳram, zate tumra gunar ḳam taki basia ro. Erbadeo ḳeu zudi kunu guna ḳorilae, te behesti babar dorbaro amrar eḳzon pak-forezgar shafaeatḳari asoin, tan nam Isa al-Mosi. ²Zano ni tain kita ḳorsoin? Amrar gunar kofora hishabe tan nizor zan kurbani disoin. Ḳali amrar nae, borong duniar hoḳol manshor gunar koforar lagi disoin.

³Oḳon amra tanre sini ni? Nichchoe sini, amra tan hoḳol hukum-ahkam manle buza zaibo, amra tanre sini. ⁴Ar ze manshe ḳoe tanre sine, siniao tan hukum-ahkam mane na, he misa mate, tar dilo hokikoti nai. ⁵Oile ze zone tan kalam mafik sole, tar dilor maze nichchoe Allai mohobbot shullo-ana folise. Te amra tan maze boshot ḳori ni? Oe, ou monte buza zae amra tan maze boshot ḳori: ⁶ar tan maze boshot ḳori ḳoile, amrar lagi zorur oilo, tain zela solchoin, amra-o ola sola.

⁷O shuna oḳol, ami to tumrar gese noea kunu hukumor ḳota leḳram na, borong ola eḳ hukumor ḳota leḳram, zeta foela takiu asil. Tumra age taki ze kalam huncho, oṭau oilo hou furana hukum. ⁸Itare furana ḳoileo ashole ita noea. Ou hukumor hokikotie Isa al-Mosi solta, ar tumrar zindegito ita ase. Deḳrae ni, andair ḳaṭi zar, ashol nur oḳon zair or.

⁹Kunu manshe zebla ḳoe, he Allai nuror foro ase, otoso tar baire ginnae, he ashole andarit roise. ¹⁰Ar ze manshe tar baire maea-mohobbot ḳore, he nuror foro boshot ḳore, erlagi he asaṛ ḳaoar ḍor nai. ¹¹Oile zegie tar baire ginnae, he to andarit foṛi roise, andarir maze sola-fira ḳore. Ashole andaire tare anda banailise, erlagi he zaneu na, he kun fotedi zar.

¹²O sabal oḳol, ami tumrar gese leḳram,

zano ni, al-Mosir namor ḳatire,

tumrar tamam guna-ḳosuri maf ḳora oigese.

¹³O baf oḳol, ami afnaintor geseo leḳram,

foela takiu zein asoin,

afnara to tanre sinoin.

O zuan oḳol, ami tumrare leḳram,

Iblisor logor moha-laṛait to,

tumitain ziti geso.

¹⁴O hurutta oḳol, ami tumrare leḳlam,

tumra to behesti bafore siniliso.

O baf oḳol, ami afnaintore leḳlam,

afnara to tanre sinilisoin,

zein hokkoltar foela takiu asoin.

O nouzuan oḳol, ami tumrare leḳlam,

tumrau boloban, Allar kalam tumrar dilo gata,

Iblisor logor moha-laṛait tumra zitso.

¹⁵Oḳon kial ḳori huno, tumra i dunia ar zogot-shongsharor kunutar maeat foṛio na. Ze manush duniar maeat foṛizae, he to nizor behesti bafore mohobbot ḳore na. ¹⁶Zano to, duniat zeta mile, ita oilo, roḳto-mangshor ḳaish, soukor lub-lalos ar shongsharor bahaduri, ita kunuṭau behesti bafor ges taki ae na, ḳali dunia taki ae. ¹⁷Te duniabi zogot-shongsharor hokkol bahadurir din fuṛai zar, oile ze bondae Allar morzi zugai sole, he to siroḳal ṭikia roibo.

Ḳane-Dorjal taki shabdan

¹⁸Baba oḳolre, kiamot daro aichche. Te tumra nichchoe huncho, Ḳane-Dorjal aoar shomoe oigese. Ar ashol ḳota oilo, ermaze bout Dorjal aia harsoin. Ota dekia amra buziar, hasau kiamot daro aichche. ¹⁹Ou Dorjal oḳol to amrar maz takiu baroisoin. Ta-o era ashole amrar torikat asil na, amrar torikar oile to amrar loge roilo one. Tara baroia gesegi ḳoriu buza zae, tara ḳeu amrar nae.

²⁰Oile tumra to hou fobitro zonor ges taki ḳelafoti faiso ar hoḳoleu hok aḳol faiso. ²¹Tumra hokikoti sino na mono ḳoria ami tumrar gese leḳram ni? Na, ila kunta nae. Ashole tumra hokikoti sino, ar hok taki kunumonte-u na-hok baroe na, erlagiu tumrare leḳlam. ²²Hozrot Isau Allar oada ḳora al-Mosi, ikan zegie shikar ḳore na, he to nichchit misa matra. Gaibi baf ar tan ḳas maear zon Ibnullare zegie oshikar ḳore, he-u hou Dorjal. ²³Ou maear zonre zegie oshikar ḳore, behesti bafor loge tar kunu ḳatir-shomporko nai, ar ze manshe maear zonre shikar ḳore, tar loge to behesti baforo ḳatir-shomporko ase. ²⁴Te foela taki tumra zeta hunia airae, ita zanu tumrar dilo gata roe. Ita dilo roile, behesti baf ar tan ḳas maear zonor loge tumrao gata roibae. ²⁵Ar itau oilo hou aḳeri zindegi, ze zindegi al-Mosie amrare dibar oada ḳorsoin.

²⁶Huno, tumrare zeguinte be-foti banaito sae, otar forisoe zananir lagi ami ita leḳlam. ²⁷Ashole al-Mosi taki tumra ze ḳelafoti faiso, ou ḳelafoti to tumrar dilo boshot ḳore. Erlagi dusra ḳeuror ges taki talim nibar kunu zorur nae, ou ḳelafotir ruhe tumrare dorḳari hoḳolta hikaiba. Tain to hok, tan maze na-hok kunta nai. Oḳon al-Mosir maze boshot ḳorar lagi tain zela talim disoin, tumra ṭik oula ro.

Allar nuror aolad bonia nekir ashik o

²⁸O sabal oḳol, amar foramish oilo, tan maze boshot ḳorat ro, teu tain zebla hirbar zaira oiba, ou shomoe amra shaosh faimu, tan samne aite shorom ḳorto nae. ²⁹Ar tumra zebla ekin ḳoro tain shullo-ana pak-forezgar, te eoḳano ekin ḳorio, ze bonda nek kamor ashik, tar zonom to shoeong Allar nur taki.

¹Huno, behesti bafe amrare ḳoto beshi maea ḳoroin! Tain amrare tan aolad ḳoia ḍaḳoin, ar asholeo amra tan aolad. Ta-o i zogote amrare sine na, ḳaron zogote ou gaibi bafreo sine na. ²O shuna oḳol, oḳon to amra Allar aolad bonchi, erbade kita bonmu, ikan oḳono zani na. Ḳali zani, al-Mosi zebla dusrabar zair oiba, hou shomoe amra-o tan laḳan oimu. Amra to tanre tan ashol surote deḳar shuzug faimu. ³Ar zoto manshe al-Mosir ufre ila asha ḳore, tara nizore al-Mosir laḳan ḳaṭi bananit roe.

⁴Ze manshe guna ḳore, he Allar hukum-ahkam bange, Allar hukum bangau to guna. ⁵Tumrar zana ase, al-Mosi oila be-guna masum, tain gunare ḳedanir lagi duniat zair oila. ⁶Erlagi zera tan maze boshot ḳore, tara gunar fote sole na. Gunar gato zeguin foṛi roin, iguinte tanre deḳseo na, sincheo na.

⁷O sabal oḳol, tumrare zanu ḳeu be-fote nito na fare. Al-Mosi to pak-forezgar, ar nek kamor ashik oḳolo tan laḳan forezgar oe. ⁸Oile gunar fotor ashik zera, tara shoetanor murid, Iblis-shoetane to foela takiu guna ḳorer. Tar ḳamre binash ḳorar niote, oḳon Allar ḳas maear zon Ibnulla i duniat zair oila.

⁹Te ze bondar zonom oise Allar nur taki, tar bitre Allar nuror bis boshot ḳore, erlagi he gunar gato foṛi roe na. Allai nur taki zonom oise ḳori, he gunar ḳamo foṛi roito fare na. ¹⁰Ar zarzir amol deḳleu buza zae, ḳe Allar aolad, ḳe shoetanor fut: zeta manush nek fote sole na, tar mumin baire mohobbot ḳore na, he to Allar manush nae.

Mohobbote solo

¹¹Tumra mulo takiu ikan hunia airae, amrar lagi forz oilo, eḳe-oinnore mohobbot ḳora. ¹²Te amra zanu Baba Adomor fut Kabilor laḳan na oi. He asil Iblisor murid, ingsha ḳoria tar afon baire kun ḳorsil. Zano ni ḳene kun ḳorsil? He hamesha naformani ḳam ḳorto, oile tar baie nek kam ḳorto. ¹³O bai oḳol, duniar manshe zudi tumrare ginnae, te taijjub oio na. ¹⁴Amra to amrar mumin baire mohobbot ḳori, erlagi buzram, amra moron taki basia zindegit aisi. Zera mohobbot ḳore na, tara to moronor gato foṛi roise. ¹⁵Nizor baire zegie ginnae, he to kuni. Ar tumrar zana ase, kunu kunir dilo aḳeri zindegi boshot ḳore na.

¹⁶Al-Mosie amrar lagi tan nizor zan bilai disla, oḳan takiu amra buzchi, mohobbot ḳare ḳoe. Oḳon amrar bair lagio amrar zan bilai deoa zorur. ¹⁷Shongsharo ḳaia-findia basar bebosta zar ase, he tar bair obab dekiao zudi souk muzia boiroe, te tar bitre kila Allai mohobbot boshot ḳore?

¹⁸Baba oḳolre, amra ḳali mukor maea na deḳaia, ḳamor mazdi zanu ashol mohobbot deḳai. ¹⁹Teu amra buzmu, amra hokor loge asi. Ar hok Allar samne amrar dilor tosolli aibo. ²⁰Ḳaron amrar dileu zudi amrare dushi ḳoia rae dey, te Alla Pak to i dil taki bout mohan, hokkoltau zanoin.

²¹Erlagi ḳoiram, O shuna oḳol, amrar afon dile zudi amrare dushi shaibosto na ḳore, te shaosh ḳoria Allar dorbaro azira ditam farmu. ²²Ar tan gese amra zeta mangimu, ita tain diba. Ḳaron amra tan hukum-ahkam mania soli, ar ze ḳam ḳorle tain kushi oin, ḳali ou ḳam ḳori. ²³Tan hukum oilo, amra zanu tan ḳas maear zon Ibnulla Isa al-Mosir ufre iman ani, ar eḳe-oinnore mohobbot ḳori. Ou hukumu tain amrare disoin. ²⁴Ar ze bondae tan hukum mania sole, he tan mazeu boshot ḳore, ola taino tar maze boshot ḳoroin. Oḳon tain amrare ze Pak Ruh dan ḳorsoin, ou ruhur mazdi amra buziar, tain amrar dilo boshot ḳoroin.

Ḳane-Dorjal taki hirbar shabdan

¹O shuna oḳol, duniat bout bonḍo nobi baroisoin. Erlagi ḳeu zudi aia ḳoe, ami ruhur bole matiram, te tumra zoldi bishash ḳorio na, borong zasai ḳoria deḳo, i ruh Allar ges taki aise ki na. ²Allai ruhre sinar niom oilo, ze ruhe shikar ḳore manush surote Isa al-Mosie duniat toshrif anchoin, ou ruh Allar ges taki aise. ³Oile ze ruhe ou Isare shikar ḳore na, i ruh Allar ges taki aise na. Ita oilo Ḳane-Dorjalor ruh, ou Dorjalor ruh aibar ḳota tumra age huncho, ar oḳono he ou zogoto ase.

⁴Oile O sabal oḳol, tumra to Allar manush, hou bonḍo oḳolor ufre tumra zitiso. Tumrar dilo ze ruh asoin, ein to i zogotor ruh taki bout mohan. ⁵Ashole ou bonḍo oḳol to ou zogotor, erlagi tara ḳali zogotor buli bule, ar zogoteo tarar buli mane. ⁶Ar amra oilam Allar manush. Allare zera sine, tara amrar buli mane. Oile zera Allar nae, tara amrar ḳota hune na. Ou nomunae amra dukabaz ruhu ar Allai hok ruhure sini.

Alla nizeu mohobbot, te mohobbote solo

⁷O shuna oḳol, Allar deoa dan oilo mohobbot, erlagi amra zanu eḳe-oinne mohobbot ḳori. Ze bondar dilo mohobbot ase, tar zonom oise Allar nur taki, he Alla Pakre sine. ⁸Ar zegur bitre mohobbot nai, he to Alla Pakre sine na, ḳaron Alla nizeu to mohobbot. ⁹Alla Pakor mohobbot amrar maze ou nomunae zair oise, tain tan ḳas maear zon Ibnullare ou duniat bezisoin, zate en usillae amra aḳeri zindegi hasil ḳortam fari. ¹⁰Ar amra zen Alla Pakre mohobbot ḳorslam ila kunta nae, borong tain nizeu amrare mohobbot ḳoria, amrar gunar kofora oibar lagi, tan ḳas maear zon Ibnullare zogoto faṭai dila, oḳṭareu ḳoe mohobbot.

¹¹O shuna oḳol, Alla Pake zebla amrare ola mohobbot ḳorla, te amrar lagio zorur oilo eḳe-oinnore mohobbot ḳora. ¹²Allare to ḳeu kunudin deḳse na. Oḳon amra zudi eḳe-oinnore mohobbot ḳori, te buza zaibo, tain amrar dilo boshot ḳoroin, tan mohobbote amrar dilo furafur fol dorse. ¹³Amrare tan ruhu mubarok dan ḳorsoin, erlagi buzram, amra tan maze boshot ḳori, ar taino amrar maze boshot ḳoroin. ¹⁴Amra nize deḳsi, dekia hari ou shakki diram, zogotor toraneala ḳanḍari hishabe, gaibi bafe tan ḳas maear zon Ibnullare bezisoin. ¹⁵Erlagi ze zone shikar ḳore, Hozrot Isau oila Allar ḳas maear zon Ibnulla, tar dilo shoeong Alla Pak boshot ḳoroin, ar he-o Allar maze boshot ḳore. ¹⁶Amrar loge Allar ze mohobbot ase, ikan amra zani, zania ekino ḳori.

Ashole Alla nizeu mohobbot. Mohobbotor maze ze bonda boshot ḳore, he Allar mazeu boshot ḳore, ar Alla Pako tar maze boshot ḳoroin. ¹⁷Ou nomunae mohobbot amrar dilor maze furafur folala oe. Teu kiamotor din amra shaoshi boni, ḳaron ou zogoto amra tan ronge rongi gesi. ¹⁸Mohobbotor maze kunu ḍor-boe nai, shullo-ana mohobbote borong ḍor-boere ḳedai dey. Ḍor-boer maze to shaza faoar bab-shab ase, erlagi ḍor-boe zar bitre, he mohobbotor shullo-ana fol dorse na.

¹⁹Te amra Alla Pakre mohobbot ḳori, ḳaron tain amrare foela mohobbot ḳorsoin. ²⁰Ar ze manshe ḳoe, he Alla Pakre mohobbot ḳore, ḳoia tar mumin baire ginnae, he to misa matra. Ḳaron nizor souke deḳa baire zegie mohobbot ḳore na, a-deḳa Allare kila mohobbot ḳorbo? ²¹Amra to tan ges taki ou hukum faisi, ze bondae Alla Pakre mohobbot ḳore, he zanu tar baireo mohobbot ḳore.

Isau Allar ḳas maear zon mania zoei o

¹Hozrot Isau oila Allar oada ḳora hou al-Mosi, ikan zera ekin ḳore, tarar zonom oise Allar nur taki. Zano ni, ze manshe kunu ma-bafore mohobbot ḳore, he erar aoladreo mohobbot ḳorbo. ²Te Alla Pakor aoladre mohobbotor befar kila buzaitam? Alla Pakre mohobbot ḳoria tan hukum-ahkam mania solleu buza zae, amra hasau tan aoladre mohobbot ḳori. ³Allar hukum-ahkam mania solau oilo Allare mohobbot ḳora. Ar tan hukum-ahkam mana to kub ḳoṭin kunu ḳam nae. ⁴Ḳaron Allar nuror aolad oḳol i zogotor ufre zoei oin, ar zogotor laṛait ze zinishor bole zoei oisi, ikṭa oilo amrar iman. ⁵Hozrot Isau oila Allar ḳas maear zon Ibnulla, ikan zera ekin ḳore, i zogotor laṛait tarau ḳali zoei oe.

⁶Isa al-Mosi oila hou zon, zein fani ar lour bole duniat aisoin. Tain ḳali fanir zoriae nae, borong hou pak gusolor fani ar solibo zan kurbanir lour bole aisoin. Ita befare Allai Pak Ruhe shakki dira, ar ou ruh to hok. ⁷Ashole tino shakkie shakki dira: ⁸ruh, fani ar lou, ou tin shakkir shakki eḳ shoman. ⁹Manshor mukor shakki zebla amra mani, te Allar deoa shakki to aro mozbut, tan ḳas maear zon Ibnullar befare tain ola shakki disoin. ¹⁰Ar ou maear zonor ufre zera iman ane, tarar dileo oula shakki dey. Oḳon Allai shakkire zera manche na, tara to shoeong Allareu misa matra banailise, ḳaron Allae nize tan maear zonor befare ze shakki disoin, tara ita manche na. ¹¹Tan shakki oilo, tain nize amrare aḳerator zindegi dan ḳorsoin, ou zindegi tan ḳas maear zonor gese ase. ¹²Ze manshe ou maear zonre faise, he zindegio faise. Ar Allar hou maear zonre zera faise na, tara i zindegio faise na.

¹³Baiainre, tumra zera Isa Ibnullar ufre iman ancho, tumrare zananir lagi ami ita leḳlam, tumra aḳerator zindegi failiso. ¹⁴Oḳon amra tan dorbaro ou shaosh faisi, tan morzi mafik amra kunta magile, ita tain hunba. ¹⁵Amra zebla zani, amra zeta magi ita tain hunoin, te eoḳano zani, tan dorbaro amra zeta magisi, ita nichchit failisi.

¹⁶Ḳeu zudi kunu mumin baire ola eḳ guna ḳorat deḳe, ze guna moutor foti nae, te he aroz ḳorle Allae hou baire hefazot ḳorba. Ami ino ou laḳan gunar ḳota ḳoiram, zerar guna moutor foti nae. Oile mono rakio, moutor foti gunao ase, ila gunar befare aroz ḳorar lagi ami ḳoiram na. ¹⁷Ashole hoḳol zator naformaniu guna, oile hoḳol guna to moutor foti nae.

¹⁸Amra zani, Allar nur taki ze bonda oḳolor zonom oise, era gunar ḳamo bondi roe na. Borong Allar nure zonom loa hou ḳas maear zone tarar zanor hefazot ḳoroin, Iblise tarare ḳobza ḳorto fare na. ¹⁹Ar amra to zani, ḳali amrau oilam Allar manush, bad-baki asta zogotu Iblisor faor tole. ²⁰Amra eoḳano zani, Allar ḳas maear zon aia hari amrare ou aḳol disoin, zate hok Allare amra sini. Te hok Allar loge amrar milon oise, mani tan ḳas maear zon Isa al-Mosir loge amrar milon oise. Tainu to hok Alla, tainu aḳeri zindegi.

²¹O sabal oḳol, hoḳol nomunar murtifuza taki basia ro. Amin.