1-Korintia

Fobitro Injil Shorif 7 nombor sifara

foela Korintia

Forisiti

Fobitro asmani kitabor ou sifara Alla Pakor hukume Hozrot Isa al-Mosir sahabi Hozrot Pauluse (ra:) siṭir aḳare leḳsoin. Ikan oilo Korint zomator gese tan leḳa foela sohifa. Onuman ḳora oe, Hozrot Isae behesto toshrif neoar 20 bosor bade ikan leḳa oise.

Ruman bashshair bitre Gris deshor razdani Korint asil ḳae-ḳarbaror lagi nami-dami ṭaun. I ṭauno bout beshabazi shoho nanan nomunar zinar ḳam asil.

Sahabi Hozrot Pauluse dusrabar tobligi soforor ḳalo foelau ou ṭauno toshrif anchila (Sahabi Nama 18 ruku deḳoukka). Tain Korint ṭaun taki firia aoar tin bosor bade zebla Ifis ṭauno toblig korat aila, ou shomoe Korint zomator murobbi oḳole ḳobor dila, zomator maze nanan nomunar gonḍogul ar bul talime bori gese.

Zomator ebadot-bondegir maze era gaibi bashae matare bout dam dira. Teu Hozrot Pauluse tarare foramish dila firaki mat matar lagi. Ou duio niamotu Allai Pak Ruhur dan, ta-o firaki mat matare tain beshi dam disoin, ḳaron ou mate manshe Allai munsha, hedaeot ar hushiari fae.

Aro ḳobor faila, imandar oḳolor maze kub beshi doladoli, zinar ḳam, mamla-mokoddoma, bishringkola, mod ḳaoa, ar bonḍami soler. Tain ou zogoinno ḳam-ḳazre, Hozrot Musa (a:)-or zomanar naforman Boni Israilor loge tulona ḳorsoin (10 ruku deḳoukka). Tarare touba ḳorar foramish dia ou mulloban siṭi leḳsoin, zate imandar oḳole gunar ḳam saṛia, Allar ḍor-ḳofe fak-fobitro zindegir fote firia ain, ar tara fobitro mohobbotor ashik oin. Mohobbotu oilo hoḳol taki boṛo don.

Ermaze ase,

(1) Salam zanani 1:1-9 aeat

(2) Allar zomator dae-daeitto 1:10—4:21

(3) Manshor zoubon ar foribaror talim 5—7 ruku

(4) Isaei mumin ar deb-debir fuza 8:1—11:1 aeat

(5) Zomato Allar ebadot-bondegi 11:2—14:40

(6) Murda taki zinda oia uṭa 15 ruku

(7) Bidaei foramish ar dua 16 ruku

Salam zanani

¹Ami Paulus, Alla Pakor morzie Allai daot faia Hozrot Isa al-Mosir eḳzon sahabi oisi. Ami ar amar mumin bai Susine, ²Korint ṭaunor Allar zomator manshor gese, mani tumrar gese leḳram. Hozrot Isa al-Mosir torika ḳobul ḳorae Allae tumrare fak-fobitro ḳorsoin ar tan afon bonda oibar lagi daot disoin. Tumrar gese ar oinnainno zagar zoto manshe amrar Hozrot Isa al-Mosire malik koia manoin, tara hoḳolor gese amra ou siṭikan leḳram. Tain tararo malik, amraro malik.

³Amrar gaibi baf Alla Pake ar Hozrot Isa al-Mosie tumrare rohomot ar shanti dan ḳoroukka.

⁴Ami hamesha tumrar lagi amar Allar dorbaro shukria adae ḳori, ḳaron Isa al-Mosir torika ḳobul ḳorae tumra Allar rohomotor tole aiso. ⁵Ou rohomot oilo, Hozrot Isa al-Mosir loge shorik oia tumra hoḳol nomunae mat-ḳota mata ar aḳol-ilime doni oiso. ⁶Oḳon deḳa zar, al-Mosir befare amra zeta talim dislam, ita tumrar dilo gatia raḳso. ⁷Ar Hozrot Isa al-Mosie dusrabar toshrif anar lagi tumra bar sairae, ermaze Allar deoa batuni ḳemotar zekunu niamot faite tumrar obab or na. ⁸Ami zani, amrar Hozrot Isa al-Mosie tumrare aḳer forzonto imane mozbut raḳba, zate tain aibar ag forzonto tumra furafur nikut roibae. ⁹Alla Pak to hok ar ḳaṭi, tain zela ḳoin ola oe. Tain tumrare daot disoin, tumra zanu tan ḳas maear zon Isa Ibnullar loge ḳatir-shomporko raḳo, einu al-Mosi, amrar malik.

Allar zomator dae-daeitto (1:10–4:21)

Zomator maze doladoli

¹⁰Te bai oḳol, Hozrot Isa al-Mosir oia ami tumrare zuṛ ate minot ḳoriar, tumra hoḳol eḳ o. Tumrar maze kunu doladoli na rouk, eḳ mon ar eḳ mot o. ¹¹Huno, Kulua Bibir baṛir manshor ges taki zanlam, tumrar maze ḳaijja-fosad soler. ¹²Ami hunlam, tumrar maze ḳeu ḳoe, “Ami Paulusor dolor,” ḳeu ḳoe, “Ami Apollosor dolor,” ḳeu ḳoe, “Ami Fitoror dolor,” ar keu ḳoe, “Ami al-Mosir dolor.”

¹³Te ḳo sain, al-Mosire kita baṭa-baṭi ḳora oigese ni? Ami Paulusre tumrar lagi solibo loṭḳaia mara oise ni? Tumra kita amar name toubar gusol ḳorso ni? ¹⁴Ami Allar dorbaro shukria zanai, ḳali Kirispo ar Gous saṛa, dusra kunu manshore ami toubar gusol ḳoraisi na. ¹⁵Zate ḳeu ḳoito na fare, tumra amar name toubar gusol ḳorso. ¹⁶Astifan bair foribaror manshoreo ami toubar gusol ḳoraisi, esaṛa ar kunu manshore gusol ḳoraisi ḳoria amar mono or na. ¹⁷Al-Mosie to amare toubar gusol ḳoranir lagi faṭaisoin na, ḳali kush-ḳobri tobligor lagiu faṭaisoin. Ar ou kush-ḳobrio kunu aḳoldari fonḍiti bab-bongie toblig korat faṭaisoin na, zate solibor ufre al-Mosir kurbani oa beḳama na bone.

al-Mosiu Allai aḳol ar bol

¹⁸Zara gozobi fotedi douṛar, al-Mosir solibor uforor kurbani tarar gese to ḳali be-aḳoli mono oe, oile amra zara nazator fote douṛairam, amrar gese ita oilo Allai bol. ¹⁹Asmani kitabo leḳa ase, “Ami aḳoldar oḳolor aḳolre beḳama ḳormu, ar buddiman oḳolor buddire bifol ḳormu.”

²⁰Te ou aḳoldar oḳol kuai? Alim oḳolu ba kuai? Ar ou zomanat torko ḳorar ḳemota zar ase, he oḳon kuai? Duniabi aḳol to ḳali be-aḳoli, ita Allaeu deḳaira. ²¹Allae tan nizor aḳol dia foesala ḳorsoin, zate duniae zanu tar aḳol dia tanre sinto na fare. Erlagi be-aḳolir ou kush-ḳobri tobligor mazdi Allae mumin oḳolor zan basaita saila. ²²Ihudi oḳole ḳali keramoti ḳam deḳta sain, Iunani oḳole aḳolor tallash ḳoroin, ²³oile amra toblig kori solibor ufre kurbani oa al-Mosir ḳota. Ita oilo Boni Israilor gese eḳṭa be-dini ḳam ar bin zati oḳole mono ḳoroin be-aḳoli ḳam. ²⁴Oile Boni Israil oukka ba Iunani oukka, Allar daoti bonda oḳolor gese ou al-Mosiu oila Allai aḳol ar Allai bol. ²⁵Allai be-aḳoli manshor aḳol taki bout boṛo aḳoldar, ar Allai ḳomzuri manshor shokti taki bout shobol.

²⁶Bai oḳol, sinta ḳori deḳo, tumrare zebla daot deoa oisil, hi shomoe tumra kilaḳan aslae. Tumrar mazor bout zonu manshor sokut aḳoldar, ḳemotaban ba nami-dami bongshor aslae na. ²⁷Oile duniae zetare be-aḳoli ḳoia mono ḳore Allae otareu fosond ḳorsoin, zate duniar aḳoldar oḳole shorom fain. Ar duniae zetare ḳomzur mono ḳore, Allae otare fosond ḳorsoin, zate duniar boloban hoḳolta shorminda oin. ²⁸Duniar manshe zetare kub tuchcho mono ḳore, duniar bukut zetar kunu dam nai, Allae otareu fosond ḳorsoin, zate duniar sokut zeta nami-dami, ita be-dami oizae. ²⁹Tain itare fosond ḳorsoin, zate duniar kunu manshe tan samne boṛai deḳanir shuzug na fain. ³⁰Ar tumra zera Isa al-Mosir afon zon boncho, ita to Alla takiu oise. Al-Mosiu oila amrar gese Allar deoa aḳol, pak-forezgari, fobitrota ar azadir kuṭi. ³¹Erlagi asmani kitabo leḳa ase, “Ze manshe boṛai ḳore, he Mabudre loiau boṛai ḳorouk.”

¹Bai oḳol, Allar deoa kush-ḳobri tumrar gese toblig korat gia ami to shundor shundor bashae matisi na, ba boṛo kunu alim-ulamar laḳan boean ḳorsi na. ²Ami mone mone ṭik korslam, tumrar loge taḳar ḳalo ami ḳali ou Isa al-Mosir bishoye matimu, ze Isare solibor ufre loṭḳaia mara oise, ita saṛa ar kunta mattam nae. ³Ami zebla tumrar loge roitam, ou shomoe nizore ḳomzur mono ḳortam ar ḍoraia ḳafitam. ⁴Amar toblig ar amar boeanor maze manshor mon zoe ḳorar moto kunu aḳol-hekmot ar zukti asil na, ḳali Allai Pak Ruhu ar kudroti bol deḳa gesil. ⁵Ami sailam, tumrar iman manshor aḳol-ilimor ufre borosha na ḳoria, ḳali Allai bolor ufre borosha ḳore.

Allai Pak Ruhur deoa aḳol

⁶Ta-o zera imane kamil, tarar gese amra aḳolor mat mati. Oile ou aḳol to i zogotor nae ba zogotor neta oḳolor laḳano nae, tara to borbad oar foti. ⁷Ashole amra ḳali Allai aḳol-hekmotor batuni gufon befare mati. Ou batuni befar to dunia foeda ḳorar ageu Allae tan nizor morzie ṭik koria raḳsoin, zate amra tan gourobor bagi oi. ⁸Oile ou zogotor neta oḳole ita buzra na. Ita buzle tara, hou gourobor don amrar malik Isare solibor ufre loṭḳaia marlo na one.

⁹Oile amra zani, Allar kalame ḳoe,

Zara Allare mohobbot ḳoroin,

tarar lagi tain zeta raḳsoin,

ita ḳeu souke deḳse na, ḳaneo hunche na,

dilor maze kunudin sintao ḳorse na.

¹⁰Ita oḳon tan Pak Ruhur mazdi amrar gese zair ḳorsoin. Pak ruhur ozana kuntau nai, tain Allar hoḳol batuni befaro zanoin. ¹¹Manshor maze ola ḳeu ase ni, zera eḳzone aroḳzonor monor ḳobor zanoin? Ḳali nizor ruheu tar monor ḳobor zane. Ṭik ou laḳan, Allar Pak Ruh saṛa dusra ḳeu tan gaibi befar zane na. ¹²Ar amra to duniabi ruh faisi na, borong Allar torof taki tan ruhu faisi, erlagi tan deoa niamot oḳol amra sini. ¹³Ar ou niamotor befareu amra ḳoi, ita ḳoar shomoe amra manshor aḳol bebohar ḳori na, ḳali Pak Ruhur mazdi talim faia ḳoi. Ruhani hokikotre zair ḳorar lagi, amra ruhani mat mati. ¹⁴Ze manush ruhani monobabor nae, Allai Pak Ruhur mazdi zeta mile he itare ḳobul ḳore na, ḳaron tar gese ita beḳama. Ita befar he buzeo na, ḳaron ita ruhani zogotor befar, ḳali ruhdi zasai ḳora zae. ¹⁵Ze zonor maze Pak Ruhu ase, he hokkolta zasai ḳoria deḳe, tare ḳeu zasai ḳorto fare na. ¹⁶Zela Allar kalamo ase,

Mabudor mon ḳegie buzto farse,

tanre foramish dibar shaiddo ḳar?

Oile al-Mosir mon amrar dilo taḳae, amra ita buzram.

Toblig kam oilo Allai ḳezmot

¹Bai oḳol, ruhanik zonor loge zelaḳan mata usit, ami tumrar loge ila mattam farsi na. Borong duniabi manshor loge zela mata usit, tumrar loge olau matisi. Tumra to Isaei torikat ekkere huruttaintor laḳan, erlagiu oula matilam. ²Foela ami tumrare shokto ḳani na dia ḳali dud ḳabaislam, hi shomoe shokto ḳani ḳaoar zuka aslae na, ar otodin badeo tumra i befare hurutta roiso. ³Ḳaron tumra oḳono duniabi roḳto-mangshe solrae. Tumrar maze oḳono ingsha, ḳaijja-fosad lagailu ase. Te tumra roḳto-mangshor boshe roiso na ni? ⁴Tumrar maze ḳeu zebla ḳoe, he Paulusor dolor, ḳeu ḳoe Apollosor dolor, te tumra duniabi manshor laḳan nae ni?

⁵Apollos ḳe? Ar Paulusu ba ḳe? Amra to shamainno ḳezmotḳari, amrar mazdi tumra imanor fote aiso. Allaeu amrare zarzir i daeitto disoin. ⁶Ami bis lagaisi, Apollose fani disoin, ar Allae itare boṛo ḳorsoin. ⁷Erlagi zein bis lagain ar zein fani dein, era ashole kuntau nae, oile zein itare boṛo ḳori tuloin, tainu hokkolta. ⁸Bis lagaora ar fani deorar eḳoi uddesho. Era forteḳe zarzir menot mafik kamor fol faiba. ⁹Oile amra duiozoneu Allar ḳam ḳoriar.

Tumra Allaru ḳet, tan banail bilḍing. ¹⁰Allar ges taki ze ḳas rohomot ami faisi, ou rohomotor boleu ami aḳoldar raz-mestorir laḳan ian kuṭi gaṛsi. Ar ou kuṭir ufre oinno zone bilḍing banaira. Oile ḳe kila banaira, i befare tara hushiar ouk. ¹¹Ze ian kuṭi ageu gaṛa oigese, malik Isa al-Mosiu oila hou kuṭi, ikṭa bad dia ar kunu noea kuṭi ḳeu gaṛto farto nae. ¹²Oḳon i kuṭir ufre shuna, rufa, dami fattor, laḳṛi ar son dia ḳeu zudi gor banae, ¹³te ḳe kila banaisoin, ita bala ḳori deḳa zaibo. Ruz hashoror din ita zair oibo, hou din ogni-forikkar mazdi ita kula-mela oibo. ¹⁴Zein zeta banaisoin, ita zudi ṭikia roe, te ein furushkar faiba. ¹⁵Oile ita zoli gele furushkar taki bad foṛbo, ta-o tar nizor zan basibo. Tare deḳle buza zaibo, he aguinor mazdi faṛi dia aise.

¹⁶Tumra zano na ni, tumra oilae Allar kaba gor, tumrar maze tan Pak Ruhu boshot ḳoroin? ¹⁷Ḳeu zudi Allar kaba gor binash ḳore, te Allae-o tare binash ḳorba. Ḳaron tan taḳar gor oilo fobitro, ar tumrau oilae hou gor.

¹⁸Tumra ḳeu nizore faki dio na. Tumrar mazor ḳeu zudi duniar aḳol-ilime nizore aḳoldar mono ḳore, te he be-aḳol bonouk zate ashol aḳoldar oito fare. ¹⁹Ḳaron i zogotor aḳol-buddi, Allar nozoro ḳali be-aḳoli. Asmani kitabo ase, “Allae aḳoldar oḳolre tarar salakit doroin.” ²⁰Aroḳ aeato ase, “Aḳoldar oḳolor hoḳol sintau beḳama, ita to Mabude zanoin.” ²¹Erlagi amar ḳota oilo, hokkoltau to tumrar, te tumra kunu manshore loia boṛai ḳorio na. ²²Paulus, Apollos, Fitor, i dunia, zindegi, mout, bortoman, bobishot, hokkoltau tumrar. ²³Tumra oilae al-Mosir, ar al-Mosi oila Allar.

al-Mosir sahabir zindegir nomuna

¹Amrare dekia manshe buzouk, amra al-Mosir ḳadim, Allai batuni banḍaror ḳazanchi. ²Ar zerar ufre banḍaror ḳazanchir bar deoa oe, tara to forman deḳani lagbo, tara hok-halal. ³Te ami hok-halal ki na i bisar tumra ḳoro ba adaloteu ḳorouk, ete amar kunta zae ae na. Ami to amar nizor bisaru ḳori na. ⁴Amar mon shada oileo forman ḳora zar na ami nirdush. Te malik Isaeu amar bisar ḳorba. ⁵Erlagi shoṭik shomoyor ag forzonto, mani malik Isa hirbar na aoa forzonto tumra kunu bisar ḳorio na. Andairo zeta lukail ase, tain aia itare foro anba ar manshor dilor gufon niot oḳol zair ḳorba. Hou shomoe Allar ges taki hoḳole zarzir faona tarif faiba.

⁶Bai oḳol, tumrar balair lagi ami amar nizor ar Apollosor udahoron dia tumrare ḳoilam, zate tumra amrar ges taki ou talim neo, asmani kitabo zeta leḳa ase, itar bare zaoa ṭik nae. Te tumra eḳzonre toia areḳzonre loia boṛai ḳorio na. ⁷Ḳeu zanu mono na ḳore tumi alada kunta bonigeso. Tumar nizor emon kun don ase, zeta tumi Allar ges taki lilla faiso na? Ar ita zudi lilla faia taḳo, te lilla faiso na ḳoia beṭagiri ḳorrae ḳene?

⁸Tumrare dekia to mono or, tumra ageu hokkolta faia doni oigeso, amrare bad diau tumra bashsha bonigeso! Tumra hasaror bashsha oile balau oito, amra-o tumrar loge bashsha oitam fartam. ⁹Zuddo-bondi oḳolre marilibar niote, zuddor bizoe misilor ḳoror ḳataro zarare raḳa oe, amar mono oe Allae amrar laḳan sahabi oḳolreo ola hoḳolor ḳore raḳsoin. Amra asta zogotor gese, hoḳol manshor gese, ar firista oḳolor geseo tamshar naeok bonigesi. ¹⁰Amra to al-Mosir lagi be-aḳol oisi, ar tumra bule al-Mosir name aḳoldar bonigeso. Amra ḳomzur, tumra boloban, tumra bule ijjoti bonigeso, amrar to kunu ijjot nai. ¹¹Amra oḳono feṭor buke, fanir fiase, ḳafoṛ-sufoṛor obabe ḳoshṭo ḳoriar, baṛi-gor nai ḳori boitolor laḳan roiar ar mair-doir ḳaiar. ¹²Hamesha nizor ate menot ḳori ḳaiar. Manshor gail-mondo huniao, tarar balai saiar, zulum-nirjaton, humki-damkire sobor ḳoriar. ¹³Bodnam-gibot shoijjo ḳori ḳori, norom shure tarare buzaiar. Oḳon forzonto amra asta zogotor ḳasrar laḳan, hoḳoltar gese-u zoinjal bonigesi.

¹⁴Huno, tumrare shorom deoar niote ita leḳram na, ḳali amar maear aolad hishabe hushiar ḳorar lagi leḳram. ¹⁵Mono rakio, al-Mosir befare talim deoar lagi tumrar azar azar ustad taḳta faroin, oile tumrar baf to otozon nae. Kush-ḳobri tobligor mazdi Isaei zindegit eḳmatro amiu oilam tumrar baf. ¹⁶Oḳon ami tumrare minot ḳoria ḳoiar, ami zela soli, tumrao ola solo. ¹⁷Ou niote ami Timotire tumrar gese faṭailam, malikor name ein to amar maear hok-halal fut. Malik Isa al-Mosire ami kila mania soliar, ar hoḳol zagar hoḳol zomato kila talim diar, ita tain mono ḳorai diba.

¹⁸Tumrar mazor ḳeu ḳeu mono ḳorer, ami ar tumrar gese aitam nae, erlagi tara boṛai-beṭagiri deḳaira. ¹⁹Inshalla ami kub zoldiu aimu. Zetae boṛai-beṭagiri deḳaira, tarar mat hunat nae, ḳali tarar mul ḳemota deḳat aimu. ²⁰Allar bashshai to mat-ḳotar befar nae, ita oilo kudroti ḳemotar befar. ²¹Tumrar ichcha kita? Ami tumrar gese kita loia aitam? Singla loia ni, na maea-momota ar norom mizaz?

Manshor zoubon ar foribaror talim (5:1–7:40)

Naforman ḳobis oḳolor bisar

¹Ami hunram, tumrar maze zelaḳan zogoinno zinar ḳam soler, ila ḳam bidormi oḳoleo ḳore na. Tumrar mazor eḳzone nizor haton mareo bour laḳan raḳse. ²Erbadeo tumra boṛai ḳoro kila? Itar lagi tumra fana manga zorur na ni? Ar zegie ita ḳorse, tare zomat taki bar ḳori deoa usit na ni? ³Ami sho-shorile tumrar maze na taḳleo ruhe to tumrar loge asi, erlagi zegie ita ḳorse, samne taḳa bisarir laḳan amio ageu tar bisar ḳoria raḳsi. ⁴Amar bisar oilo, tumra malik Isar name eḳ zagat dola o, ou shomoe amio ruhe tumrar loge roimu ar malik Isar bol-shoktio amrar loge taḳbo. ⁵Ar ou naformanor shorilre binash ḳorar lagi shoetanor ato dilaite oibo, zate malik Isa aibar ḳalo tar ruhe nazat fae.

⁶Baiainre, boṛai ḳora tumrar lagi ṭik nae. Zano na ni, moedar ḳair boṛo gamlareo tuṛa ḳamire fulailae? ⁷Te tumrar dil takio hou furan ḳamiror bab falai deo, zate ḳamir saṛa moedar ḳai bono, ar asholeu to tumra ḳamir saṛa zon. Azadi Idor kurbanir meṛar baichchar laḳan amrar lagi al-Mosireo kurbani deoa oise. Zano to, hou ido hoḳol laḳan ḳamir raḳa haram. ⁸Erlagi ao, amra-o hou furan ḳamir, mani ingsha ar ḳarafire bad dilai, er bodla ḳamir saṛa ruṭi, mani hok ar shada dile id adae ḳori.

⁹Ami age tumrare leḳslam, tumra naforman ḳobis oḳolor loge shong dorio na. ¹⁰Ami ḳoiram na, i zogotor ḳobis manush, lubi, doḳolbaz ar deb-debir fuza ḳorrar shongo-o ekkere saṛi ditae. Ila oile to tumra zogotor bare aro kunuḳano zaitegi oibo. ¹¹Oile ami ḳali oḳan ḳoitam sairam, ḳeu zudi nizore mumin ḳoia dabi ḳore, ar he zinakur, lubi, deb-debir fuzari, gibot gaora, modkur, ba sur-ḍaḳait oe, te tar shong dorio na, tar loge ḳana-finao ḳaio na.

^12-13Huno, amar ola ṭeḳa foṛse ni, Isar torikar bairor manshor bisar ḳortam? Itar bisar Allaeu ḳorba. Oile torikar bitoror manshor bisar ḳora tumrar ḳam na ni? Tourat kitabo ase, “Hou naformanre tumrar shomaz taki bar ḳori deo.”

Mamla-mokoddomar befare hushiar

¹Tumra ḳeuror zudi kunu imandar bair bifokke nalish taḳe, te Allar pak bonda oḳolor gese na gia, he kun shaoshe baira manshor gese bisar sae? ²Tumra zano na ni, ou pak bonda oḳoleu asta zogotor bisar ḳorba? Ar asta zogotor bisar ḳorte farle ou mamuli befaror foesala ḳortae faro na ni? ³Tumra zano na ni, amra firista oḳoloro bisar ḳormu? Te duniar befar to kuntau nae! ⁴Tumrar zebla ou laḳan bisar-asaror zorur oe, ou shomoe zomator baira manshore ḳene bisaror salish banao? ⁵Ami to tumrare shorom deoar lagiu leḳram, tumrar maze ila aḳoldar salish eḳzono nai ni, zein tumrar nizor mazor gonḍogul miṭ-maṭ korta faroin? ⁶Ami deḳram, bisaror mozliso boiao tumra baie baie ḳaijja ḳorrae. Ta-o abar o-imandaror samne! ⁷Ashole tumra baie baie ou zela bisar salish salairae, itae to tumrar nizoru ḳeti or. Tumra ita shoijjo ḳoro na ḳene ba nize nize ṭoga ḳao na ḳene? ⁸Borong tumra nizeu to oinnae ḳorrae, manshore ṭogirae, ar ita nizor bair logeu ḳorrae!

⁹Ashole tumra zano na ni, Allar bashshait naforman ḳobis oḳolor kunu ṭai nai. Te tumrar bul sinta dur ouk, zeta manshor shobab ḳaraf, zetae zina ḳoroin, murtifuza ḳoroin, gaṭua nasain, shomoḳami, ¹⁰suri, lub-lalchi, modkur, gibot gaora ar doḳolbaz, ita manshe to Allar bashshait ṭai faita nae. ¹¹Tumrar mazor kunu kunu zono age ola aslae, oile malik Isa al-Mosir usillae ar amrar Allar ruhe tumrare doia saf ḳorse, tumrare fobitro ḳora oise ar be-ḳosur ḳalas ḳoia goino ḳora oise.

Hoḳol nomunar zina taki hushiar

¹²Kunu kunu manshe ḳoin, “Amar lagi kuntau haram nae, hokkoltau zaiz.” Oile hokkolta zen manshor lagi ufoḳari, ila sinta ṭik nae. Amar lagi hokkolta zaiz oileo, ami kuntar gulam oitam nae. ¹³Ḳeu ḳeu ḳoin, “Feṭor lagi ḳani ar ḳanir lagi feṭ deoa oise.” Kub shundor ḳota, oile Allae to i duiotau binash ḳoriliba. Mono rakio, shoril to zina ḳorar lagi nae borong malik Isar lagiu, ar malik Isa shorilor lagi. ¹⁴Allae tan kudroti bole malik Isare murda taki zinda ḳorsoin, ar ou bole amrareo zinda ḳorba. ¹⁵Tumra zano na ni, tumrar shoril oilo al-Mosir shorilor ongo? Te al-Mosir shorilre ami bodmaish beṭir shorilor loge milaitam ni? Nauzubilla, kunumonte-u na! ¹⁶Tumra buzo na ni, ze beṭae bodmaish beṭir loge mila-misha ḳore, tar shoril to ou beṭir loge ekkano milizae. Zela Fobitro Tourat Shorifo leḳa ase, “Tara duiozon eḳ shoril oiba.” ¹⁷Oile ze zon malik Isar loge milizae, he tan loge ruheo eḳ oizae.

¹⁸Baiainre, tumra hoḳol zator zina taki zan basao. Manshe bad-baki zoto guna ḳore, ita shorilor bare ḳore, oile zegie zina ḳore, he tar nizor shorilor birudde guna ḳore. ¹⁹Tumra buzo na ni, tumrar shoril oilo Allai Pak Ruhur kaba gor, ou ruhre tumra Allar ges taki faiso, ein tumrar dilo boshot ḳoroin. Tumar shoril to tumar nizor shompod nae. ²⁰Bout dam dia tumare ḳorid ḳora oise. Erlagi tumar shorilre Allar gourobor ḳamo lagao.

Bia-shadir befare talim

¹Baiainre, tumra zeta fotua zanar lagi amar gese leḳso, oḳon ou befare ḳoiram. Tumrar ḳota ṭik ase, manshor lagi bala ḳam oilo bia-shadi na ḳora. ²Oile shomazor halot dekia ami ḳoiram, zina taki basibar lagi forteḳ beṭaintor bou taḳle bala, ar forteḳ beṭintoro zamai taḳle bala. ³Hoḳol zamaie tar bour faona hok adae ḳorouk, ar boueo ola zamair faona adae ḳorouk. ⁴Bour shoril to tair nizor nae, tair zamair. Olaḳan zamair shorilo tar nizor nae, tar bour. ⁵Zamai-boue eḳe-oinnore nirash ḳorio na, ḳali ḳas kunu dua-munazator lagi duiozone foramish ḳoria kisu shomoe alada roitae faro. Bade hirbar milizio, zate shorilor ḳaishor lagi shoetane tumrare gunar fote ṭanar shuzug na fae. ⁶Te i befare ami tumrare kunu hukum diram na, ḳali izazot diram. ⁷Ta-o amar monor asha oilo, hoḳol manush amar laḳan abiati rouk! Oile Allar ges taki to eḳo manshe eḳo nomunar rohom-niamot faisoin.

⁸Te ṛaṛi beṭintore ar bou mora beṭaintore ami foramish diram, tara zudi amar laḳan roita faroin, te bala. ⁹Oile nizore shamlaite na farle tara bia-shadi ḳorouk. Ḳaron shorilor ḳaishe zolia-fuṛia mora taki bia-shadi ḳorau bala.

¹⁰Ar zamai-boure ami ou hukum diram, boue zanu tair zamai saṛia na zae. I hukum ḳali ami diram na, shoeong malikeu dira. ¹¹Ar zudi tai horia zaegi, te dusra bia na bouk, borong zamair gese firia auk. Ola kunu zamaieo tar boure talaḳ na deuk.

¹²Oḳon zeta ḳoiram, ita to shorashori malikor hukum nae, tan fokke ami ḳoiram, kunu mumin bair bou zudi Isaei torikar na oin ar tain zamair loge shongshar ḳorta sain, te zamaie tanre talaḳ na deuk. ¹³Ou laḳan kunu beṭi manshor zamaio zudi Isaei torikar na oin, ar zamai tan loge roita sain, te boue i zamaire talaḳ na deuk. ¹⁴Ḳaron ou bour usillae Allae tair zamaire fak-fobitro ḳorsoin ar ou zamair usillae tar boureo fak-fobitro ḳorsoin. Ila na oile tumrar huruttain to nafaḳ oilo one. Ashole to Allae oḳon tarareo fak-fobitro mono ḳoroin. ¹⁵Oile Isaei torikar baira hou bou ba zamai zudi emneu alog oizita sain, te oita farba. Ila halote hou mumin bai ba boin biar kunu bandonor maze taḳoin na. Buzrae ni, amra shantie roar lagi Allaeu amrare daot disoin. ¹⁶O bou oḳol, tumi kila buzlae, tumar zamair zan tumi basaitae fartae nae? O zamai oḳol, tumiu ba kila buzlae, tumar bour zan tumi basaitae fartae nae?

¹⁷Zai ouk, malik Isae zare zela raḳsoin, Allae zare zela daot disoin, he ola solouk. Hoḳol Isaei zomatre ami ou eḳoi hukum diar. ¹⁸Zela, mosolmani ḳam ḳorail kunu manshe Isaei torika ḳobul ḳorle he tar ou mosolmanire oshikar na ḳorouk, ar mosolmani na ḳorail kunu manshe Isaei torika ḳobul ḳorle, he mosolmani na ḳorouk. ¹⁹Mosolmani ḳam ḳorani ba na ḳorani ita kunu boṛo befar nae, Allar hukum-ahkam mana-u oilo ashol ḳota. ²⁰Allae zare ze halote daot disoin, he ou haloteu taḳouk. ²¹Isaei torikat aibar ḳalo tumi gulam aslae ni? Te itar lagi bezar oio na, ar shadin oite farle shadin o. ²²Gulami ḳora halote malik Isae zare daot ḳori anchoin, he to tan dorbaro shadin oigese. Ar shadin halot taki zare daot ḳori anchoin, he to al-Mosir gulam bonigese. ²³Baiainre, tumrare bout damdi ḳorid ḳora oise, erlagi manshor gulam bonio na. ²⁴Allae zare ze halote daot disoin, Allar dorbaro he olau rouk.

²⁵Oḳon ami abiati fuṛintor muslar befare ḳoiram. I befare malikor ges taki ami shorashori kunu hukum faisi na, oile Allar rohomote hok-halal roia ami amar motamot zanairam. ²⁶Ou aḳeri zomanat zela mosibot aia azise, amar mone or tumra zein zela aso, olau ro. ²⁷Tumar zudi bou taḳe, te taire talaḳ dio na, ar bou na taḳle bia-shadi ḳorato lagio na. ²⁸Oile bia ḳorle kunu guna oito nae, ar kunu abiati fuṛi bia boile tairo guna oito nae. Ḳali zogoto tarar ḳoshṭo baṛibo, ou ḳoshṭo taki ami tumrare basaitam sairam.

²⁹Bai oḳol, ami ḳoitam sairam, malik Isae kub zoldi toshrif anra, beshi deri nae. Erlagi oḳon taki oula mono ḳorio, zerar bou-baichcha ase, mono ḳorio bou-baichcha nai. ³⁰Zera duk-mosiboto asoin, tara mone ḳoroukka kunu duk-mosibot nai, zera kushi-bashi ḳorra, tara mone ḳoroukka kunu kushi-bashi nai, ar zara ḳorid-biki ḳorer, tarao mone ḳoroukka, ita malor ufre tarar kunu dabi-daoa nai. ³¹Zera zogot-shongshar loia besto, tarar bab zanu furafur shongshari na oe, ḳaron bobor bazar to shango oizar.

³²Ami sairam, tumrare hoḳol nomunar sinta-babna taki horai raḳtam. Ḳaron abiati beṭainte sinta ḳoroin malikor befare, kila Malik-Moulare kushi raḳa zae. ³³Oile biati manshe sinta ḳoroin shongsharor befare, kila goror bou-baichchare kushi raḳa zae, ³⁴erlagi tarar mon du-ṭanat foṛizae. Oula abiati beṭi ar fuṛinte sinta ḳoroin malikor befare, kila Malik-Moulare kushi raḳa zae, zate tarar shoril ar mon fak-fobitro taḳe. Oile biati beṭinte sinta ḳoroin shongsharor befare, kila zamaire kushi raḳa zae. ³⁵Buzrae ni, ou talim oḳol to tumrar balair lagi ḳoiram. Ami tumrar golat kunu fash lagaitam sairam na, ḳali ḳoitam sairam, tumra nek fote solo ar dile-zane Malik-Moular ashik o.

³⁶Kunu manshe zudi mono ḳore, he tar abiati fuṛir dae-daeitto adae ḳorer na, fuṛir biar boeosh faroizar ḳori, he fuṛire bia deoa zorur mono ḳore, te tar kushi mafik fuṛire bia deuk. Ete kunu guna oito nae. ³⁷Oile ze manshor mon tir ase, zar mono kunu oshanti nai, he tar nizor monre shamlaia ḳam ḳore, i manshe zudi mone ḳore tar fuṛir bia-shadi zorur nae, te he ṭik kamu ḳorer. ³⁸Oḳon buza zar, ze zone tar fuṛire bia-shadi dey, he nek kam ḳore ar ze zone tar fuṛire abiati halote raḳe, he aro beshi nek kam ḳore.

³⁹Zamai zotodin zinda taḳoin, otodin bou zamair bandono taḳoin. Oile zamai mara gele boue ḳalas fain, ar nizor fosond mafik Isaei torikar zekunu zonor gese bia boita faroin. ⁴⁰Ta-o ami mono ḳori, tain ṛaṛi halote roileu aro bala. Ami buzram, ami ou hokkolta Allai ruhur bole ḳoiram.

Isaei mumin ar deb-debir fuza (8:1–11:1)

Devtar namor foshad ḳaoa

¹Huno, oḳon ami devtar name bilai deoa foshador muslar ḳota ḳoiram. Amra to zani, amra hoḳoloru aḳol-buddi ase. Oile aḳole boṛai baṛe, ar mohobbote manush goṛe. ²Ḳeu zudi nizore shian mono ḳore, te zotoḳan shian oa zorur, otoḳan to oise na. ³Oile ze zone Allare mohobbot ḳore, Alla Pake to tare sinoin. ⁴Te devtar name bilai deoa foshador befare ḳoiram, amra zani, devta bolte i zogoto kuntau nai, eḳ Alla saṛa dusra kuntau nai. ⁵Asmano ba zomino zekunu zagat, deb-debi name zudi kunta takia taḳe, te bout devta ar bout munib asoin. ⁶Oile amrar zana mote ḳali eḳ Alla asoin, tainu amrar gaibi baf. Tan ate hokkolta foeda oise, tan lagiu amra basia asi. Ṭik oula amrar maliko ḳali eḳzon, tan nam Isa al-Mosi. Tan usillae hokkolta foeda oise, amra ḳali tan lagiu ṭikia asi. ⁷Ita buzar aḳol to hoḳol manshor nai. Kunu kunu zone age devtare bozona ḳorto, erlagi tara oḳon devtar name bilai deoa foshad ḳaile, tarar bibeḳor ḳomzurie tare ḳolonki banae. ⁸Ashole kunu nomunar ḳanir boleu amra Allar dorbaro ḳobul oi na. Ḳani na ḳaileo amrar imanor ḳeti oe na, ar ḳaileo kunu lab oe na.

⁹Oile hushiar roio, tumrar ou shadinota kunumonte-u zanu ḳomzur imandaror lagi gunar ḳaron na oe. ¹⁰Tumar to aḳol-bibeḳ ase, oile zar bibek komzur, he zudi tumare devtar mondiro boia foshad ḳaoat deḳe, te he-o ou foshad ḳaito nae ni? ¹¹Ar ou ḳomzur baire basanir lagiu to al-Mosie zan kurbani disla, oḳon tumar ou aḳole tar imanor shorbonash or. ¹²Olaḳan tumra zebla tumrar mumin baiaintor loge gunar ḳam ḳoro, tarar ḳomzur bibeḳre duk deo, ou shomoe tumra al-Mosir biruddeu guna ḳoro. ¹³Erlagi ami ḳoiram, ḳana-finar ḳarone zudi amar bair imanor ḳeti oe, te tare guna taki basanir lagi ami gust ḳaoao ekkere bad dilaimu.

Sahabi oḳolor odikar

¹Baiainre, ami kita shadin nae ni? Ami kunu sahabi nae ni? Ami kunu amrar malik Isare deḳsi na ni? Malikor lagi ami ze toblig kam ḳorsi, itar fol tumra nae ni? ²Oinno ḳeu amare sahabi ḳoia na manleo tumra to manbae, amar sahabi ḳamor sil-sappoṛ tumrau, ḳaron amar mazdi tumra tan ummot oiso.

³Te amar sahabi fod loia zera shondoe ḳoroin, tara amar ou zuaf hunoukka. ⁴Ami ar sahabi Barnabase kita ḳana-finar beton faibar odikar nai ni? ⁵Mumin kunu boinre shadi ḳorar odikar amrar nai ni? Oinno sahabi oḳole, malik Isar baiainte ar sahabi Fitore zela zarzir bibire loia soforo zain, amra-o ola fari na ni? ⁶Ḳali ami ar Barnabaseu nizor ate ḳamai ḳoria ḳaitam ni? ⁷Nizor gaṭṭir ṭeḳa bangia ḳeu sifair saḳri ḳore ni? Ze giroste folor bagan ḳore, he itar fol ḳae na ni? Ze raḳale foshu fal raḳe, he itar dud ḳae na ni? ⁸Ami to ḳali manush aḳole matiar na, Musa nobir shorioteo ola ḳoise. ⁹Shorioto ase, “Dan maṛa deoar shomoe gorur muko hufi lagaio na.” Te Allae ḳali gorur ḳotau sinta ḳoroin ni? ¹⁰Tain ashole amrar ḳotau ḳoisoin, ikan hasa nae ni? Nichchoe, ita amrar lagiu leḳa oisil, ḳaron zein ḳet ḳoroin ar zein dan maṛa dein, fosholor baṭ faoar ashaeu tarar ita ḳora usit. ¹¹Te amra zela tumrar maze ruhanik bisi ruisi, oula zudi tumrar ges taki duniabi ḳani-fani zugai, te beshi kunta niram ni? ¹²Ar ou befare zudi tumrar ufre oinno manshor dabi ḳaṭe, te amra aro beshi dabi ḳaṭaitam fari na ni? Oile amra ila dabi na ḳaṭaia shoijjo ḳoriar, zate al-Mosir befare kush-ḳobri toblig kamo amra ḳeuror fotor ḳaṭa na oi.

¹³Tumra zano na ni, fobitro Baetul-Mukaddoso zera ḳam ḳoroin, tara oḳan takiu ḳana-fina fain, ar kurbani ḳanat zera ḳam ḳoroin, tara ou kurbanir mal taki baṭ fain. ¹⁴Ṭik olaḳan malik Isar hukum ase, zara kush-ḳobri toblig koroin, tara zanu ou ḳamor usillae ḳaoa-finda fain.

¹⁵Oile ami to er kuntau nisi na. Ar oḳon tumrareo ita lekiar na, amar lagi otar bebosta ḳortae ḳori. Oḳon amar ou boṛaire zudi ḳeu beḳama banailae, te amar mori zaoau bala. ¹⁶Ami ze kush-ḳobri toblig koriar, ete amar boṛai deḳanir kunta nae, ita amar lagi forz. Toblik na ḳorle amar ufre lannot foṛouk! ¹⁷Oile ami zudi kushi mone toblig kori, te to amar furushkar ase, ar zudi nizor kushie na-o ḳori, te malikor deoa zimmadar hishabe to ḳoriar. ¹⁸Oḳon amar i ḳamor furushkar kita? I furushkar oilo, kush-ḳobri toblig koria hari faona beton nei na, bina foeshae toblig korau amar beton.

¹⁹Ami zudio kunu beṭar gulam nae, tebou bout manshor zan basanir lagi nizore hoḳolor gulam banaia raḳsi. ²⁰Ihudi oḳolor mon zoe ḳorar lagi Ihudi shomazo ami Ihudir laḳan oisi. Ami to Musa nobir shoriotor odine nae, oile zara tan shoriot mane, tarare zoe ḳorar lagi ami tarar laḳan oisi. ²¹Ar zara shoriotor baira, tarare zoe ḳorar lagi ami shoriotor baira manshor laḳan oisi. Ashole ami Allar deoa shoriotor bare nae, al-Mosir shoriotor odine asi. ²²Zera ḳomzur, tarar gese ami ḳomzuror laḳan oisi, tarareo zoe ḳorar lagi. Befar oilo, zekunu monte kisu manshor zan basanir lagi ami hoḳol shomazor mon zugai soliar. ²³Ḳali kush-ḳobrir lagiu ami ita ḳoriar, zate er rohomotor bagi oi.

²⁴Tumra zano na ni, douṛor ḳelat uṭia hoḳoleu douṛae, oile furushkar ḳali eḳzoneu fae. Oḳon tumrao oula douṛao zate furushkar fao. ²⁵Douṛor ḳelat douṛaia hari manshe ola eḳ mala fae, ze mala bade nosṭo oizae, ar ou mala faoar lagi era bout ḳoṭin niom-ḳanuno mane. Oile amra to ashol okkoe mala faoar lagi ita ḳorram. ²⁶Erlagi uddesho saṛa ami douṛairam na. Zeta beṭainte batashor loge kila-kili ḳoroin, ami to itar laḳan nae. ²⁷Borong ami nizor shorilre ḳoshṭo dia gulamor laḳan raḳsi, zate oinnor gese kush-ḳobri toblig koria hari, furushkar taki nize bad na foṛi.

Boni Israilor itihash taki hushiari

¹Bai oḳol, ami sairam, morubumir maze amrar moe-murobbi oḳolor goṭona tumrar mono rouk. Era hoḳol to gaibi megor kuṭir tole roita, hoḳole faoe aṭia Nil doria faroia gesla. ²Hoḳoleu hou megor kuṭi ar Nil doriar maze Hozrot Musar torikae pak gusol ḳorsla. ³Tara Allar deoa eḳoi laḳan gaibi ḳani ḳaisoin, ⁴eḳoi laḳan gaibi fanio ḳaisoin, hoḳole ola ek kudroti fattor taki fani ḳaita, ze fattor tarar loge loge roito, ou fattoru oila al-Mosi. ⁵Ta-o era beshir bag manshor ufre Alla Pak kushi asla na. Erlagiu tarar lash morubumir maze foṛi roilo.

⁶Ita goṭona oilo amrar talimor lagi eḳ itihash, zate ota dekia amra hushiar oi ar tarar laḳan ku-fotor ashik na oi. ⁷Tarar maze ḳeu ḳeu zela murtifuza ḳorsil, tumra ila ḳorio na. Tourat Shorifo ase, “Hoḳol manush ḳanit boila, bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.” ⁸Aroḳbar tarar mazor bout zone zina ḳorae, eḳoi dine teish azar manush mara gesla. Te amra zanu olaḳan zina taki basia roi. ⁹Tarar mazor boute Malik-Moulare forikka ḳorat lagia hafor ḳamoṛ ḳaia morsoin. Amra zanu tanre ila forikka na ḳori. ¹⁰Tarar mazor boute na-kush oia boḳa-zoḳa ḳorae, Allar gozobor firistae tarare binash ḳorsoin. Erlagi tumra ila ḳorio na.

¹¹Tarar ufre ita goṭisil nishana hishabe, zate ota dekia amra hushiar oi. Amra zera ou aḳeri zomanar manush, ou leḳa foṛia amra zanu shabdane roi. ¹²Erlagi kunu manshe zudi mono ḳore, he mozbut ase, te he hushiar rouk zate tar iman na ale. ¹³Manshor zindegit zelaḳan forikka ae, otar baira noea kunu forikka to tumrar ufre or na. Alla Pak to hok-halal, tain tumrare shoijjor otirikto kunu forikkat falaita nae, borong forikka taki basibar foto batai diba, zate tumra ita shoijjo ḳortae faro.

¹⁴O maear dust oḳol, erlagi ami tumrare ḳoiram, deb-debir fuza taki zan basao. ¹⁵Tumrare aḳoldar zaniau ami ḳoiram, ami zeta ḳoiram tumra ita zasai-basai ḳoria deḳo. ¹⁶Al-Mosir mezbanir shomoe, shukria adae ḳoria fiala taki amra ze shorbot ḳai, itar mazdi amra al-Mosir lour loge shorik oi na ni? Ar ze ruṭi siṛia ḳai, i ḳanir mazdi tan shorilor loge shorik oi na ni? ¹⁷Amra hoḳole zebla eḳ ruṭi baṭia ḳai, te buza zae, amra bout zon oileo amra ḳali eḳ shoril.

¹⁸Huno, Boni Israilor halot sinta ḳoro, tarar zeta manshe kurbanir gust ḳain, tara hou kurbani ḳanar hoḳol ḳamo-o shorik oizain na ni? ¹⁹Ar ami kunu ḳoiram ni, devtar namor foshadre hishabo dora zae, ba ou devtare hishabo dora zae? ²⁰Na, muṭeu na. Ta-o bidormi oḳole zoto nomunar boli dein, ita deo-danob, but-ferotor nameu dein, Allar name nae. Te ami sai na, ou but-ferotor loge tumrar kunu ḳatir-dusti rouk. ²¹Huno, malik Isar mezbani ar but-ferotor mezbani, i duio ḳamo shorik oa tumrar lagi ṭik nae. Malikor fiala ar butor fiala, duiota taki eḳloge ḳaoa ṭik nae. ²²Te amra kita ḳoriar, amra malik Isar dilo aguin lagaitam ni? Tan loge laṛai ḳoria zittam farmu ni?

Ḳana-finar befare hushiari

²³Mono or ni, ami to age ḳoisi, kunu kunu zone ḳoin, “Amar lagi kuntau haram nae, hokkoltau zaiz.” Oile hokkolta zen manshor lagi ufoḳari, ila sinta to ṭik nae. Zudio era ḳoin, hokkoltau halal, oile hoḳoltae to manshor iman baṛae na. ²⁴Te kunu zoneu nizor sharto loia fagol oio na, borong oinnor balai ḳorar sesṭa ḳoro. ²⁵Bazar-aṭo zekunu gust biki oile ita ḳaio, nizor bibeḳre shanti raḳar lagi kunu shondoe ḳorio na. ²⁶Fobitro Zobur Shorife to ḳoe, “I zogot ar zogotor hokkoltau Mabudor.”

²⁷Erlagi amrar torikar bairor kunu manshe zudi tumrare daot dein, ar tumra zaitae sao, te bibeḳre ṭanḍa raḳar lagi kunu shondoe na ḳoria zeta samne dein otau ḳaio. ²⁸Oile ḳeu zudi tumrare zanai dey, i ḳani kunu devtar namor foshad, te ze zone ikan ḳoise, tar balair lagi ar bibeḳor aramor lagi ita ḳaio na. ²⁹Ami to tumrar bibeḳor ḳota ḳoiram na, hou dusra manshor bibeḳor ḳota ḳoiram. Ḳaron oinno manshor bibeḳ-bisare, amar ichcha-onichchar shadinotat ḳene naḳ golaito? ³⁰Ami zudi Allar shukria adae ḳoria ḳana-fina ḳai, te ze ḳanir lagi shukria adae ḳorlam, ou ḳanir lagi ar bodnam oito ḳene?

³¹Erlagi tumra ḳana-fina ḳoro ba zetau ḳoro na ḳene, hoḳolta-u Allar gourobor niote ḳorio. ³²Boni Israil ba bin zati, ba Allar zomator kunu manshor fotor ḳaṭa bonio na. ³³Ami zela hoḳol nomunar manshore hoḳol befare kush raḳar sesṭa ḳori, tumrao oula ḳorio. Ami to nizor shartor sinta ḳori na, shob manshor balair sesṭa ḳori, zate tara nazat hasil ḳoroin.

¹Te ami zela al-Mosir laḳan soliar, tumrao oula amar laḳan solo.

Zomato Allar ebadot-bondegi (11:2–14:40)

Niom mania ebadot ḳoro

²O bai oḳol, tumra amar deoa talim mono rakia solrae, ar hoḳol befareu amare iad raḳrae, erlagi ami tumrar tarif ḳoriar. ³Te ami sairam, tumra oḳan buzo, al-Mosiu oila hoḳol beṭaintor mata, beṭain oila beṭintor mata, ar Alla Pak oila al-Mosir mata. ⁴Ebadot-bondegir shomoe ze beṭae mata guria dua-munazat ḳore, ba firaki mate, he to tar matare oshomman ḳore. ⁵Olaḳan ze beṭie mata na guria dua-munazat ḳore, ba firaki mate, ou beṭieo tair matar oshomman ḳore, tai mata ḳamail beṭintor laḳan bonizae. ⁶Kunu beṭie zudi mata na gure, te tair sul ḳamailauk. Oile beṭintor sul ḳamani shoromor bishoe mono oile, tair mata guria raḳouk. ⁷Ebadot-bondegir shomoe mata guria raḳa beṭaintor lagi ṭik nae, Allae to beṭaintore tan nizor surote foeda ḳorsoin ar beṭaintor mazdiu Allar mohima zair oe, oile beṭintor mazdi beṭaintor mohima zair oe. ⁸Foela beṭa manush Baba Adom to beṭi taki foeda oisoin na, oile foela beṭi manush mai Haoa nichchoe beṭa takiu foeda oisoin. ⁹Ar beṭintor lagi beṭain foeda oisoin na, borong beṭaintor lagiu beṭin foeda oisoin. ¹⁰Ou talim mafik firista oḳolor ḳota kial rakia, tabedari manar nishana hishabe hoḳol beṭinte mata guria raḳa zorur. ¹¹Ta-o malik Isar torikar beṭi manshe goror beṭar ufre borosha ḳoroin, ar beṭaeo ola beṭir ufre borosha ḳoroin. ¹²Ḳaron, foela beṭa Adom taki zudio foela beṭi mai Haoa foeda, ta-o beṭin takiu hirbar beṭaintor zonom oe. Ashole hokkoltau to Allar foeda.

¹³Tumra nizeu bisar ḳori deḳo, matat ḳafoṛ na dia kunu beṭie dua-munazat ḳora ṭik ni? ¹⁴Ar shomazor hal-sal takiu to buza zae, beṭaintor matat lamba sul raḳa shoromor befar, ¹⁵oile beṭinte lamba sul raḳle tarar shunam baṛe na ni? Nizore guria raḳar lagiu to tara i lamba sul faisoin. ¹⁶Te ita loia ḳeu torko-bitorko ḳorle, amar forishkar zuaf oilo, ita saṛa dusra kunu niom amrar maze nai ar Allar zomator mazeo nai.

Isa al-Mosir mezbanir befare

¹⁷Oḳon ami ze befare foramish ditam sairam, i befare to tumra muṭeu tarif faoar zuka nae. Tumra zomato zela shorik o, itae tumrar kunu faeda oe na, borong ḳeti oe. ¹⁸Ami huniar, tumra zebla zomato shorik o, ou shomoe tumrar maze doladoli taḳe, ar ita kisu ami bishasho ḳori. ¹⁹Ashole to tumrar maze motor omil taḳbou, zate tumrar mazor ḳaṭi nikut manshor forisoe mile. ²⁰Huno, tumra zebla ekkano milia ebadot-bondegi ḳoro, ou shomoe to al-Mosir mezbanir niote ḳani bilani oe na. ²¹Ḳaron tumra eḳzone aroḳzonor bae kial na ḳoria-u ḳani ḳailao. Tumrar eḳzonor feṭo buk taḳe, ar aroḳzon ḳaia ṭal oizae. ²²Ḳana-fina ḳaibar lagi tumrar kunu gor-baṛi nai ni? Tumra ichcha ḳoria Allar zomatre elami ḳorrae ni? Ar zerar ḳanir kunta nai, tarare shorom dirae ni? Oḳon ami ar kita ḳoitam? Tumrar tarif ḳortam ni? Nauzubilla!

²³Ashole ami malik Isar ges taki ze talim faisi, ou talimu ami tumrare disi. Malik Isare ze rait dushmonor ato dorai deoa oisil, hou rait tain ḳanir ruṭi ato loila, ²⁴ar Allar shukria adae ḳorla, bade ou ruṭi ṭukraia ḳoila, “Ita to amar shoril, ou shoril tumrar lagi bilai deoa or, te amare mono raḳar lagi oula ḳorio.” ²⁵Ola ḳaoar bade tain shorbotor fiala loia ḳoila, “Amar lour zoriae Allar loge milonor ze noea usilla ḳaim oibo, ou fiala oilo er nishana. Tumra ou fiala taki ḳaoar shomoe amare iad ḳorar lagi hamesha ola ḳorio.” ²⁶Te tumra zotobar ou ruṭi ḳaibae ar ou fialar shorbot ḳaibae, malik Isa hirbar na aoa forzonto otobaru tan moutor ḳota elan ḳorrae.

²⁷Erlagi ḳam-ḳeali ḳoria ḳeu zudi i ruṭi ḳae ar fialar shorbot ḳae, te he malik Isar shoril ar lour birudde guna ḳoria dushi bonizae. ²⁸Ou ruṭi ḳaibar age ar fialar shorbot ḳaibar age, manshe nizore zasai ḳori deḳouk. ²⁹Ḳaron ita ḳaoar shomoe he zudi malik Isar shorilor befare na buze, te ita ḳaia he nizor ufre gozob ḍakia ane. ³⁰Otar lagiu tumrar mazor bout manush ḳomzur ar bemari asoin, emonki ḳeu ḳeu morsoin. ³¹Amra nizor bisar nize ḳorille, malikor ator bisar taki rehai faimu. ³²Oile malike zebla amrar bisar ḳoroin, ou shomoe tain amrare shashon ḳoroin, zate duniar hoḳolor loge aḳerator din amrare dushi shaibosto ḳora na oe.

³³Erlagi O bai oḳol, tumra zebla mezbani ḳaoar lagi ekkano dola o, ou shomoe eḳe-oinnor bae kial ḳorio. ³⁴Eḳzonor zudi feṭo buk lagizae, te he baṛi taki ḳaia auk, zate tumra ekkano oae kunu shaza na fao. Te ami zebla tumrar gese aimu, ou shomoe bad-baki befare nosiot ḳormu.

Allai Pak Ruhur nanan laḳan niamot

¹O bai oḳol, ami sairam Allai Pak Ruhur dan-niamotor befare tumrar kuntau ozana na rouk. ²Tumrar zana ase, age zebla tumra Allar ebadot ḳortae na, hou shomoe tumrare olaḳan deb-debir bae ṭania neoa oito, zetae kunta matito fare na. ³Oile ami tumrare zanairam, Allar ruhur bole matile kunu manshe ikan ḳoe na, “Isar ufre lannot foṛouk.” Ar Allai Pak Ruhur bol saṛa ḳeu ḳoito-o fare na, “Hozrot Isau malik.”

⁴Ou eḳoi Pak Ruhur nanan nomunar dan-niamot ase. ⁵Amra nanan niome eḳoi malikor ḳezmot ḳori. ⁶Amra forteḳ zonre nanan nomunar ḳam-ḳaz deoa oise, oile Alla Pak to eḳzonu, tain nanan ufae-e amrar maze ḳam ḳoroin. ⁷Hoḳolor faedar lagi ou Pak Ruhu eḳo zonor maze eḳo nomunae zairoin. ⁸Ou Pak Ruhur bole kunu kunu zonre gian-buddir mat mata, ar ḳeurore aḳoldari mat matar niamot deoa oe. ⁹Eḳzone ou ruhur bole gaibi borosha fain, ar ou ruhur bole dusra zone bemarire bala ḳorar ḳemota fain, ¹⁰ḳeu ḳeu keramoti ḳam ḳorar ḳemota, ḳeu ḳeu firaki matar ḳemota, ḳeu ḳeu bad-bala ruh oḳol ar zin-butre sinar ḳemota, ḳeu ḳeu nanan nomunar gaibi bashae matar ḳemota ar ḳeu ḳeu itar mani buzaia dibar ḳemota fain. ¹¹Ita hoḳol ḳam to ou eḳoi Pak Ruhe ḳoroin. Ou dan-niamot oḳol tan nizor kushi mafik forteḳ muminre baṭia dein.

Eḳ shorilor maze bout ongo

¹²O baiain oḳol, eḳ shorilor zela bout ongo taḳe, ola bout ongo milia eḳ shoril oe, al-Mosio to ṭik olaḳan. ¹³Amra Boni Israil oi ba bin zati oi, azad ba gulam oi, ou eḳoi Pak Ruhe hoḳolor torikabondi oise eḳ shoril oar lagi. Hoḳoleu to ou eḳoi Pak Ruh faisi.

¹⁴Kunu manshor shorilre ḳali eḳ ongo dia banail oise na, borong bout ongo zuṛa deoa oise. ¹⁵Oḳon faoe zudi ḳoe, “Amar nam to at nae, te ami shorilor ongo-o nae,” erlagi fao zen shorilor ongo nae, ikan to ṭik nae. ¹⁶Oula ḳane zudi ḳoe, “Amar nam to souk nae, te ami shorilor ongo-o nae,” erlagi ḳan zen shorilor ongo nae, ikan to ṭik nae. ¹⁷Manshor asta shorilu zudi souk oizito, te hunbar ḳemota ḳoi failo one? Ar zudi shara shorilu ḳan oizito, te geran hungibar ḳemota ḳoi roilo one? ¹⁸Te Allae tan kial-kushi mafik shorilor nanan ongore eḳ ek kori hazaisoin. ¹⁹Hoḳol ongo zudi eḳ laḳan oizito, taile shorilor kun halot oilo one? ²⁰Shorilo bout ongo ase, ta-o shoril to eḳṭau.

²¹Souke atre ḳoito fare na, “Tumare amar dorḳar nai,” ar matae duio faore ḳoito fare na, “Tumrare amar dorḳar nai.” ²²Ashole shorilor ze ongore ḳomzur mono oe, oguinu beshi dorḳari. ²³Shorilor ze shoromor ongore amra huru-muru mono ḳori, itare amra beshi dam dei, mani ze ongore bare deḳani zae na, itare amra ijjot ḳoria guria raki. ²⁴Oile ze ongore bare deḳani zae, itare guria raḳar dorḳar oe na. Ashole Allae ou huru-muru ar ḳomzur ongore beshi ijjot dia, hoḳol ongore zuṛa lagaia eḳ shoril banaisoin, ²⁵zate shoril baga-bagi na oe, borong eḳ ongoe aroḳ ongore nizor laḳan mono ḳore. ²⁶Shorilor eḳ ongor zudi ḳoshṭo oe, te shara shorile ḳoshṭo fae, ar eḳ onge ijjot faile, asta shorile kushi-bashi ḳore.

²⁷Te tumrau oilae al-Mosir shoril, tumra eḳo zon ou shorilor eḳo ongo. ²⁸Zano ni, Allae to zomator bitre foela sahabi, bade firaki mat matra, bade ustad oḳol boail ḳorsoin. Erbade boail ḳorsoin zera keramoti ḳam ḳorra, bemar bala ḳorra, shaijjo-shohaeta ḳorra, Isaei zomatre salaora ar nanan gaibi bashae matra zon. ²⁹Te era hoḳoleu kunu sahabi fod faisoin ni? Hoḳoleu firaki matoin ni? Hoḳolu ustad ni? Ar hoḳole kunu keramoti ḳam ḳorar ḳemota faisoin ni? ³⁰Hoḳole kunu bemar shifa ḳorta faroin ni? Hoḳoleu gaibi bashae matoin ni? Hoḳoleu itar mani buzaia dita faroin ni? Nichchoe na. ³¹Ta-o ami ḳoiram, tumra hoḳol taki dami niamot oḳol faoar lagi ashik o.

Ar kial ḳoro, oḳon ami tumrare aro bala ekkan fot deḳairam.

Mohobbotu oilo hoḳol taki boṛo don

¹Ami zudi zogotor manush ba asmani firistar gaibi bashae mati, ar amar bitre kunu mohobbot na taḳe, te to ami zure zure bazail fitolor gonṭi ba zonzon ḳora ḳortalor laḳan oigesi. ²Amar zudi firaki matibar ḳemota taḳe, hoḳol batuni befar buzi, hoḳol nomunar aḳol-buddie kamil oi, ar amar imani boldi usa faṛoreo eḳ zaga taki aroḳ zagat horailitam fari, oile amar dilo kunu mohobbot na taḳe, te Allar nozoro ami kuntau nae. ³Amar hoḳol don-samana zudi gorib-dukire bilai dei, emonki amar shorilreo zudi zalanir lagi dan ḳorilai, ar amar bitre zudi mohobbot na taḳe, te kunu faeda nai.

⁴Mohobbot hoḳol shomoe sobor ḳore, doya-maea ḳore, ingsha ḳore na, boṛai ḳore na, ohonkar ḳore na, ⁵bad bebohar ḳore na, nizor shartor sesṭa ḳore na, rag-gusa ḳore na, ḳeu kunu ḳeti ḳorle mono raḳe na, ⁶naformanit kushi oe na, borong hokikotie kushi ḳore. ⁷Mohobbote hokkolta shoijjo ḳore, hoḳolta bishash ḳore, hoḳol befare monor maze asha zugae ar hoḳol befare sobor ḳoria doijjo dore.

⁸Huno, hoḳol firaki mat eḳdin fuṛaizibo, nanan bashao shesh oizibo ar aḳoldaror aḳolo fuṛaizibo, oile mohobbot kunu shomoe fuṛae na. ⁹Te oḳon amra to kunutau shullo-ana zani na, firaki mato shullo-ana ḳoitam fari na. ¹⁰Oile amra zani, shullo-ana oar shomoe zebla aibo, ou shomoe banga-sura hoḳolta fuṛaizibo.

¹¹Ami zebla huru aslam, ou shomoe huruttar laḳan matitam, huruttar laḳan sinta-babna ḳortam, ar huruttar laḳan bisar-bibesona ḳortam. Oile oḳon to boṛo oigesi, erlagi huruttar laḳan asar-bebohar bad dilaisi. ¹²Oḳon to amra zafsa aenar maze hoḳolta forishkar deḳram na, bade hou shullo-ana oar shomoe aile amra hoḳolta samna-samni deḳmu. Oḳon ami hokkolta furafur zani na, hou shomoe aile ami hoḳolta furafur zanmu, Allae amare zela furafur sinoin, ola amio hoḳolta zanmu.

¹³Buzrae ni, iman, asha, ar mohobbot, ou tino don hor-hamesha roibo, itar maze mohobbotu hoḳol taki boṛo.

Firaki mat ar gaibi bashae mator tofat

¹Erlagi O bai oḳol, tumrao mohobbotor lagi ashik o, Pak Ruhur deoa dan-niamotor lagi kiali o, ḳas ḳori firaki matibar ḳemota faite kiali o. ²Ḳaron ze manshe gaibi kunu bashae mate, he ita manshor loge mater na, Allar logeu mater. Tar mator basha kunu manshe buze na, he ḳali Pak Ruhur bole batuni buli ḳoe. ³Oile zein firaki matoin, ein manshor gese-u matoin, en mate manshor zindegire goṛia tule, manshor dilo asha ar shantona zugae. ⁴Te ze zone gaibi bashae mate, he ḳali nizore goṛia tule, oile zein firaki matoin, ein to Allar zomatre goṛia tuloin. ⁵Erlagi ami sairam, tumra hoḳoleu gaibi bashae mato, oile aro beshi sairam, tumra hoḳole firaki mat mato. Mono rakio, kunu manshe zudi gaibi bashae mate, ar mator bade zomator manshore goṛia tular lagi dusra ḳeu itar mani buzaia na dey, te hou zein firaki matoin einu boṛo.

⁶Baiainre, ami zudi tumrar gese aia ḳali gaibi kunu bashae mati, oile er mazdi Allar batuni munshar ḳota, aḳol-hekmotor ḳota, firaki kunu mat ba kitabi nosiot na zanai, te amaredi tumrar kunu faeda oibo ni? ⁷Mone ḳoro, bashi, sharinda, ar zeta baiddo-bazonar bitre kunu zan nai, ita zudi ganor shoṭik shur-tal na mania baze, te ou bazonat kita bazer, manshe ita ḳemne buzbo? ⁸Zuddot zaoar lagi fouzi shingae zudi forishkar aoaz na dey, te kunu sifai reḍi oibo ni? ⁹Olaḳan tumi zebla ozana bashae mato, te tumi kita ḳoirae, tara ḳemne buzbo? Tumar i mat ḳali batashor loge matrae ni? ¹⁰I duniat nanan zator buli ase, ita kunuṭau mani saṛa nae. ¹¹Ar ami zudi ou buli na buzi, te ze zone matira, tan gese to ami bideshi manshor laḳan, ar taino amar gese bideshi. ¹²Ikan to tumrar belaeo ṭik. Tumra zebla Pak Ruhur deoa dan-niamotor lagi kiali oirae, te ze niamot dia zomatre goṛia tula zae, ou niamot faoar lagiu beshi sesṭa ḳorio.

¹³Erlagi ze manshe gaibi bashae mate, he Allar gese mangouk, zate itar mani buzaia dito fare. ¹⁴Ami zudi gaibi bashae dua ḳori, te ashole amar ruhe dua ḳorer, amar nizor mone kunta ḳorer na. ¹⁵Oḳon ami kita ḳortam? Ami ruh dia dua ḳortam, ar buddi diao ḳortam. Ami ruh dia git-gozol gaimu, buddi diao git-gozol gaimu. ¹⁶Ar tumi zudi ḳali ruh dia shukria adae ḳoro, te mozlisor manshe kila amin ḳoito? Tara to buzeru na tumi kita ḳoirae, tara to osina zonor laḳan roila. ¹⁷Tumi hoeto ṭik babeu shukria adae ḳorrae, oile ou manshore to goṛia tula or na.

¹⁸Ami Alla Pakor shukria adae ḳori, ḳaron ami gaibi bashae tumrar saite bout beshi mati. ¹⁹Ta-o zomator mahfilor maze gaibi bashae azar azar ḳotar bodla, manshor talimor lagi ami aḳol ḳaṭaia ḳali fasḳan ḳota ḳoimu.

²⁰Baiainre, tumrar aḳol-buddi huruttar laḳan na oia boeosko manshor laḳan ouk. Oile ingsha-nindar befare tumrar mon masum baichchar laḳan ouk. ²¹Asmani kitabo ase,

Osina bashae matra manushdi,

bideshi manshor mukdi,

ami ou zatir loge matimu.

Ta-o amar mat tara hunto nae,

ikan ami Mabude ḳoiram.

²²Te buza zae, gaibi bashae mata imandar oḳolor lagi kunu nishana nae, borong o-imandar oḳolor lagi ita eḳṭa nishana. Ar firaki mat mata o-imandaror lagi kunu nishana nae, oile imandaror lagi to ita eḳṭa nishana.

²³Zomator hoḳol manush eḳ zagat milar bade, hoḳole zudi eḳloge gaibi bashae mate, ar ou shomoe zomator bairor ba o-imandar kunu manush ino ae, te tara tumrare fagol ḳoiba na ni? ²⁴Ar hoḳole zudi firaki matoin, omon shomoe kunu o-imandar aia ino hamae, te ou hoḳolor mator mazdi he nizor gunar halot buzilibo, ou mat hunae tar nizor bisar nize ḳorbo. ²⁵Tar monor lukail bishoe kula-mela oibo, teu he soizdat foṛia Allar gourob-tarif ḳoria ḳoibo, “Afnarar maze nichchoe Alla Pak azir asoin.”

Isaei zomator niom-ḳanun mana

²⁶Baiainre, kita oito? Tumra zebla eḳ zagat zomato dola o, ou shomoe ḳeu git-gozol gain, ḳeu nosiot ḳoroin, ḳeu batuni befare ḳoin, ḳeu gaibi bashae matoin, ar keu itar mani buzaia dein. Te zein zetau ḳoroin na ḳene, ita zanu zomatre goṛia tular niote oe. ²⁷Ḳeu zudi gaibi bashae kunta mate, te ekozon ḳori dui-tinzone matouk ar eḳzone itar mani buzaia deuk. ²⁸Mani buzai dibar ḳeu na taḳle, tara zomato sufsaf taḳouk, ḳali nize nize Allar loge matouk. ²⁹Ar firaki matra oḳole ola dui-tinzone matouk ar baki hoḳole zasai-basai ḳorouk. ³⁰Oile zomato zera boat asoin, tara ḳeuror gese zudi kunu ohi ba batuni ḳobor nazil oe, te zein boean ḳorra, tain nirai oizaukka. ³¹Olaḳan tumra hoḳoleu eḳ ek kori firaki matio, zate hunra oḳole talim ar utshaho fae. ³²Firaki matrar ruh to tarar nizor boshe taḳe, ³³Alla Pake nichchoe gulmal fosond ḳoroin na, borong shanti fosond ḳoroin.

³⁴Allar pak bonda oḳolor hoḳol zomator niom-ḳanun oilo, zomator maze beṭi manush nirai roa usit, gof-shof ḳora tarar lagi ṭik nae. Shoriotor niom mafik tara odinta manouk. ³⁵Tara kunu talim zanar kiali oile baṛit gia nizor zamair ges taki zanouk. Ḳaron zomator maze beṭinte gof-shof ḳora shorom.

³⁶Aichcha ḳo sain, Allar kalam kunu tumrar ges taki baroise ni? Ḳali tumrar gese-u aise ni? ³⁷Mono rakio, kunu manshe zudi nizore fir-dorbesh ba batuni ḳemota-ala mono ḳore, te he ikan buzilauk, ami tumrar gese zeta leḳlam, ita hokkoltau malik Isar hukum. ³⁸Ar keu ita na manle, tareo mainno ḳora oito nae.

³⁹Erlagi O bai oḳol, tumra firaki mat matibar lagi kiali o, ar gaibi bashae matiteo bada dio na. ⁴⁰Ta-o zomator hoḳol ḳamu furafur adob-ḳaeda ar niom-ḳanun mania ḳora zorur.

Murda taki zinda oia uṭa (15:1–58)

Isa al-Mosi murda taki zinda oisoin

¹O mumin bai oḳol, ami age ze kush-ḳobri toblig korsilam, hou ḳota oḳon iad ḳorai diram. Tumra to ita ḳobul ḳorslae ar imane ṭikiao roiso. ²Ami ze kalam toblig korsi, ita zudi tumra mozbut ḳori doria raḳo, te ou kush-ḳobrir mazdi nazat fairae, ar na faile tumrar iman anau beḳama. ³Ashole ami nize ze talim faisi, ou talimre kub zoruri mono ḳoria tumrareo zanaisi. Allar kalam mafik amrar gunar mafir lagi al-Mosie nizor zan kurbani disoin. ⁴Tanre dafon ḳora oisil, ar Allar kalam mafik moutor tin dinor din tain murda taki zinda oisoin. ⁵Zinda oar bade tain foela sahabi Fitorre, bade tan hou barozon sahabire deḳa disoin. ⁶Erbade tain eḳloge fas-shoro beshi mumin baire deḳa disoin. Erar maze ḳeu ḳeu mara geleo, oḳono beshir bag zinda asoin. ⁷Erbade tan bai Iakubre, bade hoḳol sahabire deḳa disoin. ⁸Ar ami to hoḳolor heshor zuli-zaṛa fut, ou amareo tain deḳa disoin. ⁹Sahabi oḳolor maze amiu hoḳol taki nogoinno, ami to sahabi ḳoia forisoe dibar laḳ nae, age ami Allar zomator ufre zulum ḳortam.

¹⁰Oile oḳon ami zela oisi, ita Allar rohomoteu oisi. Amar ufre tan i rohomot beḳama gese na, ami oinno sahabi oḳol taki beshi menot ḳorsi. I menot to ami nize nize ḳortam farsi na, borong Allar rohomoteu ita ḳoraise. ¹¹Erlagi ami ba oinno kunu sahabie zeinu toblig kori na ḳene, amra ou eḳoi befareu toblig koriar, ita hunia tumrao iman ancho.

Amra moron bade zinda oimu

¹²Te al-Mosire murda taki zinda ḳora oise ḳoia zebla toblig kora oe, taile tumrar mazor ḳeu ḳeu ḳemne ḳoe, manush morigele ar zinda oita nae? ¹³Moron bade zinda oia uṭte na farle to, al-Mosio zinda oisoin na. ¹⁴Ar al-Mosi zinda oia na uṭle to amrar tobligo beḳama ar tumrar iman anao beḳama. ¹⁵Emonki oḳano buza zar zen, Allar befare amra zeta toblig koriar ita misa, ḳaron amrar toblig oilo, Allae al-Mosire murda taki zinda ḳorsoin. Oile murda oḳolre zudi zinda ḳora na oe, te to tain al-Mosireo zinda ḳorsoin na. ¹⁶Ar murda oḳol zudi zinda oia na uṭoin, te to al-Mosio zinda oia uṭsoin na. ¹⁷Al-Mosire zudi zinda ḳora na oiau taḳe, te to tumrar iman beḳama, ar tumra oḳono gunar maze habu-ḍubu ḳairae. ¹⁸Taile al-Mosir torikar zerar mout oigese, tarao to binash oigesoin. ¹⁹Al-Mosir ufre amrar ze asha, i asha zudi ḳali ou duniabi zindegir lagi oe, te to hoḳol taki amraru beshi bod nosib.

²⁰Oile ashol ḳota oilo, al-Mosire to hasau murda taki zinda ḳora oise. Tainu foela foshol, murda taki zoto zonre zinda ḳora oibo, erar maze tanre-u foela zinda ḳora oise. ²¹Buzrae ni, eḳzon manshor mazdi zela mout aise, ola zinda oia uṭao eḳzon manshor mazdi aise. ²²Baba Adomor aolad hishabe hoḳol manshor zela moron oe, al-Mosir ummot hishabe oula hoḳolre zinda ḳora oibo. ²³Oile ermaze ḳota ase, Allae tan morzi mafik dafe dafe hoḳolta ḳoraiba. Ḳeto taki foela tula fosholor laḳan foela dafo al-Mosire zinda ḳora oise, bade tain dusrabar toshrif anar ḳalo tan ummot oḳolreo zinda ḳora oibo. ²⁴Erbade kiamotor ḳalo al-Mosie duniabi hoḳol shashon, odikar ar ḳemotare binash ḳoria gaibi baf Allar ato bashshai shomzaiba. ²⁵Ḳaron, Allae zoto shomoe forzonto al-Mosir hoḳol dushmonre tan faor tolat na falain, oto shomoe forzonto tain bashshai ḳorte oibo. ²⁶Ar shesh dushmon moutreo tain binash ḳorba. ²⁷Fobitro Zobur Shorifo ase, “Tain hokkoltareu al-Mosir faor tolat raḳsoin.” Te buza zae, hokkoltare al-Mosir odine raḳar mani oilo, Allae tan nizore bad rakia oinno hoḳoltareu al-Mosir tole raḳsoin. ²⁸Ar hokkolta tan odine aia harle, hokkoltare loia ou ḳas maear zon Ibnullao Alla Pakor odin oiba. Zate zein hoḳolta tan odine raḳsila, hou Alla Paku hokkoltar uforala oin.

²⁹Aichcha doro, murda oḳolor lagi zera toubar gusol ḳorer, murda oḳolre zudi kunudinu zinda ḳora na oe, te erar faeda kita? ³⁰Ar amra sahabi oḳolo ḳene gonṭae gonṭae bifodor mukamuki oiar? ³¹Oe, bai oḳol, ami to forteḳ dinu moutor mukamuki oiar! Amrar malik Isa al-Mosir name tumrare loia ze boṛai deḳai, ou boṛair lagiu ami tumrare ita zanairam. ³²Ifis ṭauno zongli zanuar falor loge ami ze laṛai ḳorsi, ita zudi ḳali duniabi niote ḳoria taki, te amar kunu lab oise ni? Murda oḳolre zudi zinda ḳora na oe, te ao, ola ḳoi, “Ao, ḳao-dao furti ḳoro, ḳail to nichchit moron oibo.” ³³Baiainre, tumra bul ḳorio na, ola eḳ silleḳ ase, “Ku-shongie bala manshoreo naṭailae.” ³⁴Erlagi tumra bod nisha taki hozag o, ar guna ḳorio na. Tumrar mazor ḳeu ḳeu to shoeong Allareu sine na, ita boṛo shoromor befar.

³⁵Kunu kunu manshe zikaito fare, “Murda oḳol ḳemne zinda oiba? Tarar shorilor goṭon kilaḳan oibo?” ³⁶Haere be-aḳol! Tumar nizor ḳetor maze ze bisi bain ḳoro, i bisi na morle to sera uṭe na. ³⁷Ar tumar bain ḳora bisi taki ze sera baroe, tumi to i sera bain ḳoro na, tumi ḳali bisi bain ḳoro dan ba oinno kunu fosholor, ogu moriau sera baroe. ³⁸Bade Allae tan morzi mafik itar surot-aḳar goṭon ḳoroin. Tain forteḳ bisreu tar zat mafik serar surot-aḳar dein. ³⁹Buzo na ni, hoḳol zandaror gust to eḳ shoman nae. Manshor gust eḳ laḳan, foshur eḳ laḳan, fakir eḳ laḳan ar masor aroḳ laḳan. ⁴⁰Oula asmano-o bout nomunar shoril ase, duniato bout shoril ase, ta-o behesti shorilor tez eḳ laḳan, ar duniabi shorilor tez aroḳ laḳan. ⁴¹Shuruzor tez eḳ laḳan, sandor tez aroḳ laḳan ar terar tez dusra laḳan. Emonki eḳ tera taki aroḳ terar tezo alada.

⁴²Moron bade zinda oia uṭao ou laḳan. Lash maṭi dia harle fosizae, oile ou lashre zebla zinda ḳora oibo, ita ar fosto nae. ⁴³Oshommani halote maṭi deoa oe, shommani halote tula oibo. Maṭi deoa oe durbol halote, ar tula oibo boloban halote. ⁴⁴Maṭi deoa oe roḳto-mangshor shoril, oile tula oibo ruhanik shoril. Roḳto-mangshor shoril zebla ase, te to ruhanik shorilo ase. ⁴⁵Zela Baba Adomor befare Fobitro Tourat Shorifo ase, “Ou foela Adom zinda zandar oila.” Te shesh Adom, zein al-Mosi, tain kita oila? Tain to oila zindegi deora ruh. ⁴⁶Oile ruhanik ze shoril, ikan to foela oe na, foela oe roḳto-mangshor shoril, bade oe ruhanik shoril. ⁴⁷Zela foela Adom maṭi taki aila, bade dusra Adom, al-Mosi aila behest taki. ⁴⁸Zogotor manush oila ou maṭir banail manshor laḳan, ar behesti manush oila hou behesti zon al-Mosir laḳan. ⁴⁹Te Baba Adomor laḳan amra zela maṭir ḳaear surot faisi, ṭik oula hou behesti zonor laḳan behesti suroto faimu.

⁵⁰Baiainre ami tumrare ḳoiram, roḳto-mangshor kunu shoril Allar bashshair odikar fae na. Zetar binash ase, ita kunumonte-u sirostaei bone na. ⁵¹Te ami tumrare eḳṭa batuni ḳota zanairam, zano ni, amra hoḳolor to mout oito nae, oile hoḳoloru surot bodlizibo. ⁵²Kiamotor ḳalo eḳ muhurtor maze, sokur foloḳe, shingat fu deoar loge logeu amra bodlizimu. Ou shinga bazia harle, hoḳol murda ola surote zinda oiba, zeta kunudin binash oito nae, ar amra-o hou surote bodlizimu. ⁵³Erlagi ze shoril binash oizae, itae ola surot faite oibo, zeta kunudin fosito nae, ar zeta morizibo, itae ola surot faite oibo, zeta kunudin morto nae. ⁵⁴Ar ze shoril fosi zae, i shorile zebla sirostaei surot faibo, ze shorilor mout oe, itae zebla siroḳalin zindegi faibo, hou shomoe Allar kalamor ou leḳa folibo,

Moutor binash oia zoe aise.

⁵⁵O mout, tor zoe kuai?

Moutre, tor bish dat kuai?

⁵⁶Moutor bish dat oilo guna, ar gunare ḳemota zugae Musa nobir shoriot. ⁵⁷Oile Alla Pakor shukria adae ḳori, amrar malik Isa al-Mosir usillae tain amrare zoe dan ḳoroin.

⁵⁸Te, O amar maear baiain, tumra imane mozbut o, zate kuntae tumrare alaito na fare. Malikor ḳezmotor lagi nizore hor-hamesha furafur bilai deo, tumra to zano, tan lagi menot ḳorle i menot kunumonte-u beḳama zae na.

Bidaei foramish ar dua (16:1–24)

Rilif sanda tular befare

¹O bai oḳol, Allar pak bonda oḳolre shaijjor lagi sanda tular befare ami oḳon ḳoiram. Galatia deshor Isaei zomat oḳolre ami zela hukum disi, tumrao oula ḳoro. ²Tumra forteḳ zone zarzir tofik onuzaei haftar foela din kisu ṭeḳa-foesha dola ḳoro, zate ami zebla aimu, ou shomoe kunu sanda tula na lage. ³Ami aia harle tumrar dola ḳora ou dan-ḳoerat Zeruzalemo loia zaoar lagi, tumra zerare fosond ḳorbae, ami siṭi dia tarare faṭaimu. ⁴Ar tumra zudi mono ḳoro amio zaoa zorur, te tara amar loge oia zaiba.

Hozrot Pauluse Korint soforor niot

⁵Amar kial oilo Makidonia oia aitam, erlagi ami Makidonia deshor bitredi tumrar gese aimu. ⁶Aia hoeto tuṛa ḳoedin tumrar gese roimu ba asta shitkal tumrar gese-u ḳaṭaimu, zate ami zenou zai na ḳene tumrau amare ou soforor lagi hoḳolta zuit-zait ḳoria dibae. ⁷Fotor kuṭumor laḳan ami ḳali fotedi zaoar ḳalo tumrar loge deḳa ḳortam sai na, ami sairam, Allar morzi oile bakka ḳoedin tumrar loge taḳmu. ⁸Oile Fonchaisha Id forzonto ami ou Ifis ṭaunou roimu, ⁹ḳaron amar samne oula boṛo eḳṭa shuzug ase, i shuzuge boṛo bala fol mile. Ta-o bout manshe itar birudita ḳorra.

¹⁰Kial rakio, Timoti bai tumrar ono aile tain zanu shantie-nirboye roita faroin. Zano to, ami zela malikor ḳezmot ḳoriar, taino ṭik oula ḳorra. ¹¹Erlagi ḳeu zanu tanre elami na ḳore. Bade tain zela amar gese aita faroin, oula shanti moto tanre aguaia dio. Ami to tan lagi bar saiar, asha ḳori baiaintor loge taino aiba.

¹²Ar Apollos bair befare ḳoiram, tanre bout minot ḳorslam, baiaintor loge oia oḳon tumrar gese zaita, ta-o kunumonte-u razi oila na. Te shomoe-shuzug oile bade zaibane.

Bidaei salam

¹³Baiainre, tumra hoḳol hushiar o, imane mozbut o, shaoshi bab deḳao ar boloban o. ¹⁴Tumra zototau ḳoro, mohobbotor shohit ḳorio.

¹⁵Ar tumrar to zana ase, asta Gris deshor maze Astifan bair foribaru oila foela imandar. Allar pak bonda oḳolor ḳezmotor lagi tara nizore shofi disoin. ¹⁶Erlagi minot ḳoriar, ilaḳan manshore tumra ijjotor shohit bozio, aro zoto zone ola ḳezmot ḳoroin, Allar name menot ḳoroin, tarareo ola bozio. ¹⁷Ou Astifan bai, Fatunat bai ar Akik bai aisoin dekia ami kub kushi oisi, era aoae tumrar obab furon oise. ¹⁸Era amar ar tumrar dilo aram disoin. Tumra ou laḳan manshore ḳas ijjot ḳorio.

¹⁹Turoshkor Asiya deshor zomator manshe tumrare salam zanaira. Akil ar Fiskila, ar tarar goror zomator manshe malikor mohobbotor shohit tumrare salam zanaira. ²⁰Hoḳol mumin baiainte tumrare salam zanaira. Tumra eḳe-oinne fobitro golagoli ḳorio.

²¹Ami Pauluse nizor ate ou salamor ḳota leḳlam. ²²Malik Isare zudi ḳeu mohobbot na ḳore, te tar ufre lannot foṛouk. Marana ta! Mani, O amrar malik, toshrif anoukka! ²³Malik Isar rohomot tumrar ufre zari rouk. ²⁴Tumra hoḳolor lagi amar Isaei mohobbot roilo. Amin.