আল-মালাখি

আছমানি কিতাব

হজরত মালাখি নবীর ছহিফা

পরিচিতি

নাজিলর সময়: হজরত ইছা আল-মসীর জন্মর ৪৭০-৪৬০ বছর আগে।

হজরত মালাখি (আঃ) আছলা একজন নবী। তান উপরে নাজিল অওয়া অউ ছহিফা, পবিত্র কিতাবুল মুকাদ্দছর ইঞ্জিল শরিফ নাজিল অওয়ার আগ পর্যন্ত, নবী অকলর কিতাব-ছহিফার আখেরি ছহিফা। অউ ছহিফা নাজিল অইছে ছওয়াল-জুয়াপ করার লাখান, আলাদা এক কায়দায়।

ই ছহিফা নাজিল অওয়ার বউত বছর আগে বাবিলর বাদশায় জেরুজালেম টাউনরে দখল করছিলা। তাইন জেরুজালেমর বাসিন্দা বনি ইছরাইল অকলরে দেশান্তরি আর বন্দি করিয়া তান বাবিল দেশো নিছলাগি। অউ সময় পবিত্র বায়তুল-মুকাদ্দছরে ভাংগিয়া বিনাশ করছিলা। বনি ইছরাইলর গুনা আর নাফরমানির দায় আল্লায় তারারে অউ সাজা দিছলা। বাদে ইরান দেশর বাদশায় বাবিলর বাদশারে যুদ্ধত আরাইয়া, তারারে বন্দি থাকি আজাদ করিয়া হিরবার জেরুজালেমো আনছইন। তাইন বায়তুল-মুকাদ্দছরেও হিরবার বানানির ইজাজত দিলা যাতে আল্লার ঘরর লিল্লা-ছদগা, কুরবানি, এবাদত-বন্দেগি আগর নমুনায় চালু অয়।

অইলে এরবাদেও আল্লাওয়ালা অউ ইহুদি জাতি আস্তে আস্তে হিরবার আল্লার এবাদত-বন্দেগি থাকি দুনিয়ার বায় ফিরিগেলা, ইমানর কমজুরি পয়দা অইলো। অউ বয়ানি হজরত মালাখি (আঃ) নবীর ছহিফার লাখান, হজরত নহিমিয়া (আঃ) নবীর ছহিফার মাজেও মিলে। তারার নাফরমানির মাজে দেখা যায়, কাফির-মুশরিকর লগে বিয়া-শাদি, না-হক পথে টেকা-পয়সার লেন-দেন, যকাতর টেকা-পয়সা পবিত্র বায়তুল-মুকাদ্দছো না দেওয়া আর রুহানি আমল-তালিমর বেয়াপারে খাম-খিয়ালি করা। আছমানি ছহিফা অকলর মাজদি মাবুদে তান বন্দা অকলরে যেলা হুশিয়ার করছইন, এর আখেরি হুশিয়ারি অইলো অউ মালাখি (আঃ) ছহিফা। হজরত মালাখি (আঃ) অর উফাতর বাদ থাকি, হজরত এহিয়া (আঃ) আর হজরত ইছা আল-মসীয়ে তশরিফ আনার আগ পর্যন্ত, অনুমান চাইরশো বছর ই দুনিয়াত আর কুনু নবীর আওয়াজ হুনা গেছে না।

এরমাজে আছে,

(ক) বনি ইছরাইলর বায় মাবুদর মহব্বত ১:১-৫ আয়াত

(খ) ইমাম অকলর নাফরমানি ১:৬—২:৯

(গ) আম মানষর নাফরমানি ২:১০—৩:১৮

(ঘ) মাবুদর বদলাইর দিন ৪ রুকু

¹মালাখি নবীর উছিলায় বনি ইছরাইলর গেছে মাবুদর ওহী।

বনি ইছরাইলরে আল্লার মহব্বত

²ও বনি ইছরাইল, আমি মাবুদে কইরাম, আমি তো হামেশা তুমরারে মহব্বত করি।

অইলে তুমরা কইরায়, “তুমি কিলা আমরারে মহব্বত করলায়?”

তে হুনো, ঈষ কিতা ইয়াকুবর ভাই আছিল না নি? অইলে আমি তো তুমরার খান্দানর মুরব্বি ইয়াকুবরে মহব্বত করছি, ³আর ঈষʼরে হরাইয়া রাখছি। আমি তার পাড় অকল বিনাশ করছি, তার ভিটা-মাটি মরুভুমির হিয়ালর আখড়া বানাইছি।

⁴ঈষʼর আওলাদ ইদোমী অকলে কইতো পারে, “আমরারে চুরমার করা অইলেও আমরা ই চুরমার করা হকলতা হিরবার বানাইলিমু।”

অইলে আমি আল্লা রাব্বুল আলামিনে কইয়ার, তারা ইতা বানাইলেও আমি ভাংগিলিমু, ইখানরে কওয়া অইবো, “নাফরমানির দেশ, যে দেশর মানষর লগে মাবুদে হামেশা গুছা করইন।”

⁵ই হালত তুমরার নিজর চউখে দেখিয়া কইবায়, “ইছরাইল দেশর সীমানার বারেও মাবুদর তাক্কত কাইম আছে।”

ইমাম অকলর গাফলতি

⁶ও ইমাম অকল হুনো, আমি আল্লা রাব্বুল আলামিনে কইয়ার, পুয়াইন্তে তারার বাফরে ইজ্জত করইন, চাকরেও তারার মালিকরে ডরাইন। অউ লাখান আমি একজন মালিক অইলে, আমার বায় ডর-খফ কুয়াই? আর আমি একজন বাফ অইলে আমার পাওনা ইজ্জত কুয়াই? তুমরাউ তো আমারে বেইজ্জত করছো।

অইলে তুমরা হিরবার কইরায়, “আমরা কিলা তুমারে বেইজ্জত করলাম?”

⁷তুমরা তো আমার কুরবানি খানার উপরে নাপাক কুরবানি দিরায়।

দিয়া কইরায়, “আমরার কুরবানি নাপাক অইলো কিলা?”

তুমরা বুজাইরায় মাবুদর কুরবানি খানা কুন্তাউ নায়। ⁸আমি আল্লা রাব্বুল আলামিনে জিকাইরাম, কুরবানির নিয়তে তুমরা যেবলা আন্দা পশু লইয়া আও, ইতা কুনু ঠিক অয় নি? আর লুলা-লেংড়া, বেমারি পশু কুরবানি দেও, ইতা ঠিক নি? তুমরার দেশর রাজারে অউলা পশু উপহার দিয়া দেখোছাইন, তাইন খুশি অইন নি? আর তুমরার আবদার রাখইন নি?

⁹হুনো, আল্লা রাব্বুল আলামিনে কইরাম, তুমরা আমার দরবারো রহমত মাংগিলে কুনু লাভ অইবো নি? তুমরা যেবলা নিজর আতেউ অলাখান কুরবানি দেও, তে আমি আর তুমরারে রহম করমু কিলা? ¹⁰হায়রে হায়! তুমরার মাজে একজনেও যুদি আমার বায়তুল-মুকাদ্দছর গেইট খানাইন বন্দ করিলতো, তুমরা আমার কুরবানি খানার উপরে বেকামায়া আগুইন না জালাইতায়, তে আমি খুশি অইলাম অনে। অখন তো আমি মাবুদ তুমরার উপরে খুশি নায়, আর তুমরার আত থনে কুনু লিল্লা-ছদগাও কবুল করতাম নায়।

¹¹হুনো, আল্লা রাব্বুল আলামিনে কইয়ার, দুনিয়ার এক মাথা থাকি আরক মাথা পর্যন্ত তামাম জাতির মাজে আমার কুদরতি শান কাইম অর। তামাম জমিনো আমার নামে আগর-খুশবয় জালানি অর, মানষে পাক-ছাফ লিল্লা-ছদগা দিরা। হকল জাতির মাজেউ তো আমার শান-শওকত কাইম আছে।

¹²অইলে তুমরা আমার নামরে বেইজ্জত কররায়। তুমরা তো কইরায়, “মাবুদর কুরবানি খানা কুন্তাউ নায়, ই কুরবানির কুনু দামউ নাই।” ¹³আমারে বেইজ্জতির নিয়তে কইরায়, “ইতা তো খামোখা কষ্ট দেওয়া!”

তে আল্লা রাব্বুল আলামিনে কইয়ার, তুমরা ডাকাতি করা, আর লুলা-লেংড়া, বেমারি পশু আনিয়া কুরবানি দিরায়, আমি কুনু অতা কুরবানি তুমরার আত থনে কবুল করমু নি?

¹⁴আমি আল্লা রাব্বুল আলামিনে কইয়ার, কেউরর পালর মাজে নিখুত মেদা পশু আছে, অগুরে কুরবানি করার লাগি হে নিয়তও করছে, অইলে বাদে টগামি করি কুনু খুত আলা পশু মাবুদর নামে কুরবানি দেয়, তার উপরে লান্নত পড়উক! আমি তো মহান বাদশা, তামাম জাতিয়ে আমারে তাজিম করে।

ইমাম অকল হুশিয়ার

¹আমি আল্লা রাব্বুল আলামিনে ইমাম অকলরে হুশিয়ার করি কইরাম, ²তুমরা যুদি আমার কথা না হুনো আর আমার ইজ্জত-তাজিমর বায় পুরাপুর খিয়াল না করো, তে আমি তুমরার উপরে লান্নত ফালাইমু। তুমরার হকল রহমতরেও গজব বানাইলিমু। আসলে তুমরা আমার কথা মানছো না করি অউ লাখান গজব অখনও ঢালিয়া আইয়ার। ³তুমরার লাগি তুমরার আওলাদ অকলরেও সাজা দিমু। তুমরার ইদর কুরবানির পশুর গুফর-চেনা আমি তুমরার মুখো মাখাইমু, অতা মাখাইল হালতে মানষে তুমরারে হরাইয়া ফালাইবা।

⁴আমি আল্লা রাব্বুল আলামিনে কইরাম, বুজিলাও, আমি তুমরার গেছে অউ হুশিয়ারি পাঠাইলাম, যাতে তুমরার খান্দানর মুরব্বি লেবির লগে আমার কাইম করা নিয়ম জারি রয়। ⁵তান লগে আমি যে নিয়ম করছলাম, ইকটা অইলো জিন্দেগি আর শান্তির নিয়ম। এরমাজে ডর-খফর বেয়াপারও আছিল, যাতে তাইন আমারে তাজিম করইন, আসলেও তাইন আমারে তাজিম করতা।

⁶মিছা না-হক কুন্তা কইতা না,

তান মুখো আছিল হক তালিম।

ষোলআনা খাটি রইয়া আমার এবাদতি করতা,

বউতরে নাফরমানি থাকি ফিরাইতা।

⁷আসলে ইমামর কাম অইলো পাক কালাম হেফাজতে রাখা,

যাতে মানষে গিয়া তান গেছ থাকি অউ কালাম তালিম করে।

ইমাম অকল তো আল্লা রাব্বুল আলামিনর পেগাম্বর।

⁸অইলে আমি আল্লা রাব্বুল আলামিনে কইরাম, তুমরা তো ই পথ ছাড়িয়া, মনগড়া তালিম দিয়া বউত মানষরে আছাড় খাওয়াইছো। ইতা করিয়া তুমরা লেবির খান্দানর লাগি কাইম করা আমার নিয়ম বরফেলাফ করছো। ⁹তুমরা আমার পথে না চলিয়া মানষর মুখ চাইয়া বিচার করছো। এরদায় আমিও তুমরারে তামাম মানষর ছামনে নীচা আর বেইজ্জত করছি।

হজরত মালাখি নবীর হুশিয়ারি

বনি ইছরাইলর এহুদা গুষ্টির নাফরমানি

¹⁰আমরা হকল এক বাফর আওলাদ নায় নি? এক আল্লায়উ আমরারে পয়দা করছইন না নি? তে আমরা কেনে একে-অইন্যর লগে বেইমানি করিয়া, আমরার ময়-মুরব্বির উপরে কাইম করা নিয়মর বরখেলাফ করি? ¹¹এহুদা গুষ্টিয়ে তো বেইমানি করছে। জেরুজালেম টাউন সহ আস্তা ইছরাইল দেশো বেজুইতা নফরতি কাম করাইছে। এহুদার মানষে মুর্তিপুজা কররা পুড়িন্তরে বিয়া করিয়া, মাবুদর মায়ার জাগারেও নাপাক বানাইছে। ¹²যতো জনে ইতা কাম করে, তারা আল্লা রাব্বুল আলামিনর নামে লিল্লা-কুরবানি লইয়া আইলেও, মাবুদে তান খাছ বন্দা অকলর খাতা থনে তারার নাম মিটাইলিবা।

¹³আর তুমরা তো আরকটা কাম করো। চউখর পানিয়ে খালি কুরবানি খানারে ভিজাও, কান্দা-কাটি আর আহাজারি করো। অইলে তুমরা যেতা লিল্লা-ছদগা দেও, ইতার বায় মাবুদে তো খিয়াল করইন না, খুশি মনে কবুলও করইন না। ¹⁴এরবাদেও তুমরা জিকাও, “কেনে কবুল করইন না?” কারন অইলো, তুমরার জুয়ানকি কালর বিবির বিয়ার আখতো মাবুদ তো সাক্ষি অইছলা। অউ বিবিউ তুমরার জিন্দেগির লগি, তুমরার কাবিন করা বউ। অততা বাদেও তুমরার ই বউর লগে বেইমানি করছো। ¹⁵মাবুদে কিতা জামাই-বউরে এক কায়া বানাইছইন না নি? রুহে আর কায়ায় তারা তো তানউ ছামান। তারারে কেনে একখানো করা অইছে? তান খিয়াল আছিল, তারার মাজদি আল্লাওয়ালা এক খান্দান কাইম রইতো। এরদায় তুমরার দিলর বেয়াপারে হুশিয়ার অও, জুয়ানকির বিবির লগে বেইমানি করিও না। ¹⁶বনি ইছরাইলর মাবুদ আল্লায় কইরা, “বউরে তালাক দেওয়া আমি ঘিন করি।” আল্লা রাব্বুল আলামিনে আরো কইরা, “জুলুমরে ফিন্নর কাপড়র লাখান ফিন্দিয়া, জালিমি ছুরতে যে মানুষ হাজে, তার কামরেও আমি ঘিন করি। এরদায় তুমরা তুমরার দিলর বেয়াপারে হুশিয়ার অও, বউর লগে বেইমানি করিও না।”

¹⁷তুমরা নিজর জবানদি মাবুদরে তেখতো করিলিছো। এরবাদেও তুমরা জিকাইরায়, “আমরা কেমনে তানরে তেখতো করছি?” তুমরা তো কইছো, যেতায় নাফরমানি করইন, ইতা হক্কলটি মাবুদর নজরো ভালা মানুষ, তাইন অতার উপরে খুশি। আরনায় কইছো, কুয়াই হউ আল্লা, যেইন হক ইনছাফ করইন?

কিয়ামতর লাগি হুশিয়ারি

¹হুনো, আমি আল্লা রাব্বুল আলামিনে ওয়াদা করিয়ার, আমি আমার পেগাম্বররে বেজিমু, তাইন আইবা, আইয়া আমার আগে গিয়া পথ ঠিক-ঠাক করবা। আর তুমরা যে মালিকর লাগি বার চাইরায়, তাইনও আখতাউ তান ঘরো তশরিফ আনবা। যে জনর লাগি তুমরা আশিক অইগেছোগি কইরায়, আমার নিয়মর হউ পেগাম্বরে তশরিফ আনরা।

²অইলে তান তশরিফ আনার দিন, সইয্য করার হিম্মত অইবো কার? তান ছামনে উবানির খেমতা কার? তাইন তো হুনারর আগুনির লাখান, ধুপার সাবনর লাখান। ³হুনারে যেলা সোনা-রুপারে জালাইয়া খাটি বানায়, তাইনও অউ বেশে বইবা। আর সোনা-রুপার নমুনায় লেবির খান্দানরে পাক-ছাফ করবা, খাটি বানাইবা। বাদে অউলা মানুষ থাকবা, যারা মাবুদর নামে ছহি নিয়তে পাক-ছাফ লিল্লা-কুরবানি আদায় করবা। ⁴তেউ আগর আমলর লাখান জেরুজালেম আর এহুদা দেশর মানষর লিল্লা-কুরবানিরে মাবুদে খুশি অইয়া কবুল করবা।

⁵আমি আল্লা রাব্বুল আলামিনে কইয়ার, হউ সময় আমি বিচার করার লাগি তুমরার গেছে আইমু। আইয়া যাদুগির, জিনাকুর, মিছা সাক্ষি দেওরা, কামলার বেতন টগরা, ড়াড়ি বেটিন আর এতিমর উপরে জুলুম কররা, মুছাফিরর বায় হক ইনছাফ না কররা, মানি যতো জনে আমারে ডরায় না, তারা হক্কলর বিপক্ষে সাক্ষি দিতে আমি কুনু দেরি করতাম নায়।

আল্লার পাওনা আদায় না করার সাজা

⁶ও ইয়াকুবর আওলাদ অকল, আমি মাবুদ, আমার জবানর কুনু রদ-বদল নাই, এরদায়উ তুমরা বিনাশ অইরায় না। ⁷তুমরার বাফ-দাদার জমানা থাকিউ আমার হুকুম-আহকাম মানছো না, আর আমলও করছো না। তে তুমরা আমার গেছে ফিরিয়া আইও, আমিও তুমরার গেছে আইমু।

অইলে তুমরা কইরায়, “আমরা কিলা ফিরিয়া আইতাম?”

⁸কুনু আদমে আল্লারে টগিতো পারে নি? অইলে তুমরা তো আমারে টগিরায়।

টগিয়া হিরবার কইরায়, “আমরা কেমনে তুমারে টগাইলাম?”

হুনো, তুমরা তো যকাত আদায় আর লিল্লা-কুরবানির বেয়াপারে আমারে টগিরায়। ⁹তুমরার আস্তা জাতিয়ে মিলিয়া আমারে টগিরায়, এরদায়উ তুমরা লান্নতর মাজে গাড়ি রইছো। ¹⁰তুমরার হকল রুজির দশ বাটর এক বাট আমার ভান্ডারো যকাত দেও, যাতে আমার ঘরো খানি-খুরাকি রয়। ই বেয়াপারে তুমরা আমারে পরিক্ষা করিয়া দেখিলাও, আমি আল্লা রাব্বুল আলামিনে আছমানর হকল দুয়ার খুলিয়া, তুমরার দরকারর চাইতেও বেশি, বেহিসাব বরকত দেই কি না। ¹¹আমি খেতি কররা পুক অকলরে বাধা দিমু, ইতায় তুমরার জমিনর ফসল খাইয়া বিনাশ করতা নায়। আর তুমরার ক্ষেতর আংগুর ফলও জরিয়া পড়তো নায়। ¹²আমি আল্লা রাব্বুল আলামিনে কইয়ার, অলা করলে দুনিয়ার হকল জাতিয়ে তুমরারে মুবারক কইবো, তুমরার দেশ অইবো আরাম আর খুশি-বাসির দেশ।

¹³অইলে আমি মাবুদে কইয়ার, তুমরা তো আমার বিপক্ষে কড়াকড়ি মাত মাতিছো।

মাতিয়া হিরবার কইরায়, “আমরা তুমার বিপক্ষে কিতা মাতিলাম?”

¹⁴তে হুনো, তুমরা কইরায়, “আল্লার এবাদত করা তো খামোখা কষ্ট করা। তান হুকুম-আহকাম আমল করলে, আল্লা রাব্বুল আলামিনর গেছে মাথা নোয়াইয়া চললে আমরার লাভ কিতা? ¹⁵তে অখন আও, আমরা বেটাগিরি দেখাওরা মানষরে ধইন্য দেই। অয়, অয়, খারাপ মানষেউ তো উন্নতি কররা। তারা আল্লারে পরিক্ষা করিয়াও তো রেহাই পাইলিরা।”

¹⁶বাদে তারার মাজে যারা মাবুদরে ডরাইতো, তারা একে-অইন্যয় বাতচিত করলো, আর মাবুদে ইতা খিয়াল করি হুনলা। মাবুদর ডর-খফ যেরার ভিতরে আছিল, যেরা খাছ দিলে তান ধিয়ান করতো, তারার নাম মাবুদর ছামনে এক খাতাত লেখা অইলো।

¹⁷আমি আল্লা রাব্বুল আলামিনে তারার বেয়াপারে কইরাম, আমার ঠিক করি রাখা দিন আইলে তারা আমার খাছ ছামানা অইবা, তারা আমারউ বন্দা অইবা। বাফে তার খেজমত কররা পুয়ারে যেলা মায়া করে, অউ লাখান আমিও তারারে মায়া করমু। ¹⁸হউ সময় আরকবার তুমরা দেখবায়, পরেজগার আর নাফরমানর মাজে, আমার এবাদত কররা, আর না কররার মাজে আমি কত বেবধান করি।

মাবুদে বদলা দিবার দিন

¹হুনো, আমি আল্লা রাব্বুল আলামিনে কইরাম, হউ দিন আইওর, যে দিন ডমকার আগুনির লাখান দাউ-দাউ করি জলবো। ই দিন হক্কল বড়াই কররা আর নাফরমান অকল নেরার লাখান জলবা, তারার জড় বা ডালপালা কুন্তাউ জলার বাকি রইতো নায়।

²অইলে তুমরা যেরা আমারে ডরাও, তুমরার উপরে দীনদারির সুরুজ উঠিবো, ই সুরজর তেজর মাজে থাকবো শিফা। তুমরা গোয়ালা থনে ছাড়া পাওয়া গরুর বাইচ্চার লাখান নাচিবায়। ³আমি যেদিন অউ কাম করমু, ই দিন তুমরা নাফরমান অকলরে পাওদি উড়িবায়, তারা অইবা তুমরার পাওর তলর ছালি। ইখান আমি আল্লা রাব্বুল আলামিনে কইলাম।

⁴তুমরা আমার বন্দা মুছার শরিয়তর কথা ইয়াদ রাখো, আমি তুর পাড়র উপরে তামাম বনি ইছরাইলর লাগি যে হুকুম-আহকাম তান গেছে দিছলাম, অতা মনো রাখিও।

⁵হুনো, মাবুদর হউ মহান আর বেজুইতা ডর-খফর দিন আইবার আগে, আমি মাবুদে ইলিয়াছ নবীরে তুমরার গেছে বেজিমু। ⁶তাইন আইয়া মা-বাফর দিল তারার পুয়া-পুড়িন্তর বায়, আর পুয়া-পুড়িন্তর দিল তারার মা-বাফর বায় ফিরাইবা, যাতে আমি আইয়া হারি তারার দেশরে লান্নত ঢালিয়া বিনাশ না করি॥

খতম॥