দুছরা-বয়ানি

পবিত্র তৌরাত শরিফ পাচ নম্বর ছিপারা

দুছরা-বয়ানি

পরিচিতি

অউ ছিপারা হজরত মুছা (আঃ) অর উপরে নাজিল অওয়া পবিত্র তৌরাত শরিফর শেষ ছিপারা মানি, পাচ নম্বর ছিপারা। অউ ছিপারা নাজিল অওয়ার মুল কারন অইলো, মরুভুমির মাজে ছফরর হালতো জনম অওয়া বনি ইছরাইলর আওলাদ অকলরে, পবিত্র তৌরাত শরিফ আর আল্লার দেওয়া হুকুম-আহকাম অকল আরকবার মনো করাই দেওয়া। এরলাগি ইখানর নাম অইলো, দুছরা-বয়ানি।

আগর চাইরো ছিপারার লগে অউ ছিপারাত নয়া বউত হুকুম আছে, আর অউ ছিপারার বউত আয়াত পবিত্র ইঞ্জিল শরিফর মাজেও উল্লেখ করা অইছে। এরমাজে খুব মুল্যবান অউ আয়াতও আছে, “তুমরা পরতেকে তুমরার আস্তা দিল, আস্তা জান আর হকল বল-শক্তি দিয়া তুমরার মাবুদ আল্লারে মহব্বত করিও। আইজ আমি তুমরারে যে হুকুম দিয়ার, ইতা তুমরার দিলো গাথিয়া রাখিও।” (৬:৪-৬)

অউ ছিপারাত হজরত মুছা (আঃ) অর তিনটা খাছ নছিয়ত আছে, তাইন তান উফাতর আগে বনি ইছরাইলরে ইয়াদ করাই দিলা। অউ সময় তারা কেনান দেশর সীমানাত আইয়া হারি আল্লার ওয়াদা করা হউ আরামর কেনান দেশো হামানির লাগি জুইত আছলা। এর আগে তো তারা চাল্লিশ বছর মরুভুমির নানান জাগাত ঘুরতে ঘুরতে বউত হেরান অইছইন।

এরমাজে আছে,

(ক) হজরত মুছা (আঃ) অর পয়লা নছিয়ত ১:১—৪:৪৩ আয়াত

(খ) হজরত মুছার দুছরা নছিয়ত ৪:৪৪—২৮:৬৮ আয়াত

(গ) হজরত মুছার তিন নম্বর নছিয়ত ২৯—৩০ রুকু

(ঘ) হজরত মুছা (আঃ) অর শেষ হালত ৩১—৩৪ রুকু

হজরত মুছা (আঃ) অর পয়লা নছিয়ত (১:১—৪:৪৩)

তুর পাড় ছাড়ার কথা

¹মুছা নবীয়ে জর্দান গাংগর পুব পারর আরাবা নামর মরুভুমিত বনি ইছরাইল জাতিরে অউ বয়ান করছলা, তাইন সুফ গাউর ছামনে উবাইয়া তারার লগে মাতিলা। এর একবায় আছিল ফারান, আর অইন্যবায় আছিল তোফল, লাবন, হাজিরুত আর দিজাহাব, অউ চাইর গাউ।

²সেয়ীরর পাড়িয়া পথেদি তুর পাড় থাকি কাদেশ-বর্নেয়া পর্যন্ত আটিয়া যাইতে খালি এগারো দিন লাগে। ³অইলে বনি ইছরাইল মিসর থাকি বার অইয়া উনচাল্লিশ বছর এগারো মাস পর্যন্ত, অর্থাত ছফরর চাল্লিশ বরছ চলার কালো, অনো ঘুরিলা। বাদে অউ মাসর পয়লা তারিখো মুছা নবীয়ে তারারে জানাইলা মাবুদে তানরে যেতা কইছলা। ⁴তাইন লাড়াই করি আমোরী অকলর বাদশা সীহোনরে আর বাশন দেশর বাদশা উজরে আরাইয়া হারলে ইতা কইলা। অউ সীহোনে বাদশাই করতা হিশবন টাউনো, আর উজে বাদশাই করতা অষ্টারোত আর ইদরি টাউনো।

⁵জর্দান গাংগর পুব পারর মোয়াব দেশো, মুছা নবীয়ে আল্লার দেওয়া তৌরাতর তালিম বয়ান করিয়া বুজাইলা। তাইন কইলা, ⁶“ও বনি ইছরাইল, হুনো, আমরা তুর পাড়র গালাত থাকার কালো মাবুদ আল্লায় আমরারে কইছলা, অউ পাড়র গালাত তুমরার বউত দিন গুজরি গেছে। ⁷তে অখন তুমরা হকলে তাম্বু তুলিয়া আমোরী অকলর পাড়িয়া এলাকা আর অউ এলাকার কান্দা-কাছার হকল জাগাত যাওয়ার লাগি রওয়ানা অও। ই জাগা হকলতা অইলো গিয়া: আরাবা মরুভুমি আর অউ মরুভুমির কান্দা-কাছার উচা পাড়িয়া জাগা আর নিচা পাড়িয়া জাগা, নেগেভ মরুভুমি আর দরিয়ার কিনারা, মানি কেনান দেশ থাকি আরম্ভ করিয়া লেবানন দেশ অইয়া ফোরাত গাং পর্যন্ত ইতা হকল জাগা। ⁸মনো রাখিও, ইতা হকল জাগা আমি তুমরারে দিলাইছি। আমি মাবুদে তুমরার বাফ-দাদাইন ইব্রাহিম, ইছহাক, ইয়াকুব আর তারার খান্দানরে যে দেশ দেওয়ার ওয়াদা করছলাম, তুমরা অখন গিয়া ইতা হকল জাগা দখল করিলাও।

হজরত মুছায় আরো কয়জনরে নেতা বানাইলা

⁹“তে ভাইয়াইনরে, হউ সময় আমি তুমরারে কইছলাম, তুমরা হকলর ভার তো আমি একলা বইবার সাইধ্য নাই। ¹⁰তুমরার মাবুদ আল্লায় তুমরারে অতো আওলাদ বাড়াই দিছইন, এরলাগি তুমরা আইজ আছমানর তেরার লাখান অইছো, গনিয়া ফুড়াইল যায় না। ¹¹তুমরার বাফ-দাদার মাবুদ আল্লায় তুমরারে আরো আজার আজার গুন বাড়াউক্কা, আর তান ওয়াদা মাফিক তুমরারে রহম করউক্কা। ¹²অইলে আমি একলা কেমনে তুমরার কাইজ্জা-ফসাদ মিটাইতাম, আর তুমরার জিম্মাদারির ভার বইতাম? ¹³এরলাগি তুমরার পরতেক খান্দান থাকি কয়জন আখলদার, জানরা-হুনরা আর হকল মানষর গেছে ইজ্জতি জনরে পছন্দ করো, আমি তুমরার জিম্মাদারি এরার আতো সমজাইমু।

¹⁴“তুমরা জুয়াপ দিছলায়, আইচ্ছা, আপনে যেলা কইরা, অলাউ ভালা অইবো। ¹⁵তেউ আমি তুমরার পরতেক খান্দান থাকি আখলদার, বুদ্ধিমান আর জানরা-হুনরা জনরে নিয়া তুমরার আজার জনর উপরে, শ জনর উপরে, পইঞ্চাশ জনর উপরে, দশ জনর উপরে সর্দার বানাই দিছলাম, আর অফিসারও বওয়াল করছলাম।

¹⁶“হউ সময় আমি তুমরার হাকিম অকলরে হুকুম দিছলাম, কইছলাম, কাইজ্জা-ফসাদর বিচারো বাদি-বিবাদি দুইও পক্ষর মাত হুনিয়া হক ইনছাফ করিও, ইতা নিজর জাতির অউক বা ভিন জাতির অউক। ¹⁷বিচারর সময় তুমরা কেউরর পক্ষ লইও না, ধনি-গরিব হকলর কথা হুনিও। আসলে বিচারর মালিক তো আল্লা, এরলাগি তুমরা কুনু মানষরে ডরাইও না। যে বিচারর মিমাংসা করা তুমরার লাগি কঠিন অয়, ইখান আমার গেছে আনিও, আমি দেখমু। ¹⁸আর তুমরা কিলা কিতা করতায়, ইতা তো আমি হউ সময় কইয়া দিছলাম।

গুইয়া পাঠাইয়া দেশর খবর জানা

¹⁹“বাদে আমরা মাবুদ আল্লার হুকুম পাইয়া, তুর পাড় ছাড়িয়া আমোরী অকলর পাড়িয়া এলাকা মুখা রওয়ানা অইলাম। তুমরা তো দেখছো, কতো বড় আর কতো মারাত্মক মরুভুমি পার অইয়া আমরা কাদেশ-বর্নেয়া আইয়া আজিলাম। ²⁰আজিয়া হারি আমি কইছলাম, অখন তো তুমরা আমোরী অকলর হউ পাড়িয়া এলাকাত আইয়া পৌছি গেছো, ই দেশখান আমরার মাবুদ আল্লায় আমরারে দিলাইরা। ²¹হুনো, তুমরার মাবুদ আল্লার দান করা অউ আস্তা দেশউ তুমরার ছামনে পড়ি রইছে। অখন যাও, গিয়া তুমরার বাফ-দাদার মাবুদ আল্লার ওয়াদা করা অউ দেশরে দখল করো। কেউ ডরাইও না, নিরাশ অইও না।

²²“অউ সময় তুমরা হকল আইয়া আমারে কইলায়, তে পয়লা কয়জন গুইয়ারে অউ দেশো পাঠাইল অউক, তারা গিয়া দেশখান দেখিয়া আইয়া আমরারে কইবা, কুন পথে যাওয়া আমরার লাগি ভালা আর যাওয়ার পথো কুন কুন টাউন পড়বো।

²³“তুমরার পরামিশ আমার পছন্দ অইলো, এরলাগি পরতেক খান্দান থাকি একজন করি মোট বারো জনরে আলগ করলাম। ²⁴তারা তুমরারে অনো থইয়া অউ পাড়র উপরে উঠলো, আর আশকুল নামর পাড়িয়া খালো গিয়া ভালা করি হকলতা দেখিয়া আইলো। ²⁵তারা হউ দেশ থাকি কিছু ফল-মুল আনিয়া আমরারে দেখাইয়া কইলো, আমরার মাবুদ আল্লায় আমরারে যে দেশখান দান কররা, ইখান তো বড় ভালা জাগা।

²⁶“অইলে তুমরা অউ দেশো যাইতে রাজি অইলায় না। তুমরা নিজর মাবুদ আল্লার হুকুমর বিরুধিতা করলায়। ²⁷তুমরা যারযির তাম্বুত হামাইয়া বকা-জকা শুরু করলায়, আর কইলায়, মাবুদে আমরার লগে দুশমনি করইন, এরলাগিউ আমরারে বিনাশ করার নিয়তে, আমোরী অকলর আতো ফালাইয়া মারার খিয়ালে, মিসর দেশ থাকি তাইন আমরারে বার করি আনছইন। ²⁸আমরা কিলা হিনো যাইমু? আমরার গুইয়া ভাইয়াইন্তে আইয়া জানো ডর হারাই দিছইন। তারা কইছইন, হিনর মানুষ বুলে আমরা থাকি বউত উচা-মোটা পয়লোয়ান। তারার টাউন অকলও বড় বড়, ইতার চাইরোবায় উচা উচা ওয়াল দিয়া বাউন্ডরি করা, আছমানো ছইলার লাগের। আর পয়লোয়ান আনাকী অকলরেও বুলে হনো দেখছইন।

²⁹“ইতা হুনিয়া আমি তুমরারে কইছলাম, তুমরা মন ঘাবড়াইও না, ইতারে ডরাইও না। ³⁰তুমরার মাবুদ আল্লা তো তুমরার আগে আগে যাইরা। তাইন তুমরার পক্ষ লইয়া তুমরার চখুর ছামনে মিসর দেশো যেলা যুদ্ধ করছলা, অখনও অউলা করবা। ³¹আর অউ মরুভুমির মাজেও তো তুমরা দেখছো, অনো আইয়া পৌছার আগ পর্যন্ত, বাফে যেলাখান আপন পুতরে কুলো করি বইয়া নেইন, অউলাখান আল্লা মাবুদে তুমরারেও আস্তা পথ বইয়া আনছইন। ³²অততা হুনার বাদেও তুমরা তান উপরে ভরসা করলায় না। ³³তাইনেউ তো তাম্বু গাড়িবার জাগা চিনানির লাগি আর পথ চিনাইয়া নিবার লাগি, রাইতকুর সময় আগুনির খুটি আর দিনকুর সময় মেঘর খুটির নমুনা অইয়া তুমরার আগে আগে গেছইন।

³⁴“অইলে তুমরার ইতা জুয়াপ হুনিয়া মাবুদে খুব গুছা করলা, তাইন কছম খাইয়া কইলা, ³⁵আমি মাবুদে তুমরার বাফ-দাদার গেছে কছম খাইছলাম অউ দেশখান দিতাম করি, তা-ও অখনকুর ইতা নাফরমান অকলে ই ভালা জাগা খান দেখার নছিব অইতো নায়, ³⁶খালি যিফুন্নির পুয়া কালুত ছাড়া। ইখান দেখার সৌভাইগ্য অউ কালুতে পাইবো, হে আমার কথারে পুরাপুর মানছে, হে যেতা জাগা পাওদি পাড়াইয়া আইছে, ইতা জাগা আমি তারে আর তার আওলাদ অকলরে দিমু।

³⁷“ভাইয়াইনরে, তুমরার কারনে মাবুদে আমার উপরেও গুছা করলা, গুছা করি আমারে কইলা, তুমি মুছাও হউ দেশো হামাইতায় পারতায় নায়। ³⁸খালি তুমার খাদিম নূনর পুয়া ইউছা গিয়া হনো হামাইবো। তুমি তারে সাওস দিও, হে বনি ইছরাইলরে ই দেশর দখলদারি দিয়া মালিক বানাইবো। ³⁹তুমরা কইছলায়, আমরার বেবুজ নাবালিক হুরুতাইন্তরে হউ দেশর মানষে ধরিয়া নিবোগি। অইলে আমি মাবুদে এরারেউ অউ কেনান দেশর মালিক বানাইমু, এরা ইখান দখল করবা। ⁴⁰তে অখন তুমরা হিরবার পিছাইয়া গিয়া নীল দরিয়ার পারেদি মরুভুমির বায় রওয়ানা দেও।

⁴¹“ইখান হুনিয়া তুমরা কইছলায়, আমরা তো মাবুদর দরবারো গুনাগার অইগেছি। তা-ও আমরার মাবুদ আল্লার হুকুম মাফিক অখন গিয়া যুদ্ধ করমু। অখান কইয়া তুমরা অস্ত্র-শস্ত্র লইলায়, আর মনো করছলায়, পাড়ি এলাকাত উঠিয়া যুদ্ধ করাও খুব সুজা।

⁴²“অইলে মাবুদে আমারে কইলা, তুমি তারারে কও, তারা যানু যুদ্ধর লাগি পাড়ো না উঠে, কারন আমি তারার লগে রইতাম নায়, আর আমারে ছাড়িয়া যুদি তুমরার নিজর ইচ্ছায় যাও, তে দুশমনর গেছে আরিবায়। ⁴³আমি তুমরারে হুশিয়ারি দেওয়ার বাদেও তুমরা ইতা মানলায় না। তুমরা মাবুদর হুকুমর উল্টা গিয়া বুক ফুলাইয়া অউ পাড়ো উঠাত লাগলায়। ⁴⁴তেউ পাড়র বাসিন্দা আমোরী জাতিয়ে তুমরারে দেখিয়া পাল বান্দি বার অইলো, মউচাকর মউ-পুকর লাখান পাল বান্দিয়া তুমরার খরে খরে আইলো, আর মারতে মারতে সেয়ীরর হর্মা টাউন পর্যন্ত খেদাইয়া নিলো। ⁴⁵বাদে তুমরা আইয়া মাবুদর গেছে কান্দন লাগাইলায়, অইলে মাবুদে কান বন্দ করিল্লা, ই কান্দন হুনলা না। ⁴⁶অউ নমুনায় তুমরা বউত দিন কাদেশ এলাকাত রইলায়, লাম্বা সময় অনো গুজরিলো।”

বনি ইছরাইলে দেশে দেশে ঘুরা

¹হজরত মুছায় আরো কইলা, “মাবুদে আমারে যেলা হুকুম দিছলা, অউলা আমরা পিছাইয়া গিয়া মরুভুমির মাজেদি নীল দরিয়ার মুখা রওয়ানা দিলাম। সেয়ীরর পাড়িয়া এলাকা চক্কর দিয়া যাইতে আমরার বউত দিন গেলগি। ²বাদে মাবুদে আমারে কইলা, ³তুমরা বাক্কা দিন থাকি অউ পাড়িয়া এলাকাত চক্কর দিরায়, অখন উত্তর মুখা রওয়ানা দেও। ⁴এরবাদে তাইন আমারে কইলা, আমি তুমরারে জানাইতাম তুমরা অখন শেখ ঈষʼর আওলাদর দখলে থাকা সেয়ীর দেশর ভিতরেদি যাইতে অইবো। গেলে তুমরারে দেখিয়া তারা ডরাইবা, অইলে তুমরা খুব হুশিয়ার রইও, এরা তো তুমরার ভাইয়াইন। ⁵তারার লগে কাইজ্জা-ফসাদ করিও না। মনো রাখিও, তারার দেশর এক ইঞ্চি জমিও আমি তুমরারে দিতাম নায়। কারন আস্তা সেয়ীর পাড়র মালিকানা আমি শেখ ঈষʼরে দিলাইছি। ⁶তারার অউ দেশ পার অইয়া যাইবার কালো তুমরার খানি-খুরাকি লাগলে টেকাদি লইয়া খাইবায়, অউলা পানিও লইয়া খাইবায়।

⁷“তুমরার মাবুদ আল্লায় হকল কামর মাজেউ তুমরারে রহম-বরকত দিছইন। অউ অতো বড় মরুভুমি পারনির বালা তাইন তুমরারে হেফাজত করছইন। অউ চাল্লিশ বছর ধরি তুমরার মাবুদ আল্লা তুমরার লগে লগে আছইন, এরলাগি কুনু লাখান অভাব অইছে না।

⁸“তেউ আমরা ফাতারি পথে আটিলাম, আটিয়া আমরার ভাই সেয়ীরর বাসিন্দা ঈষʼর আওলাদর দেশ ফালাইয়া গেলাম। আমরা আরাবা তলভুমির যে রাস্তা এলাত আর ইজিয়ন-গেবর থাকি বার অইয়া আইছে, অউ পথেদি না গিয়া মোয়াবর মরুভুমির মুখা আটা ধরলাম। ⁹আর মাবুদে আমারে কইলা, তুমরা মোয়াবী অকলরে ছাতাইও না, কুনু যুদ্ধর ভাব-সাব দেখাইও না। মনো রাখিও, তারার দেশর কুনু জমিউ আমি তুমরারে দিতাম নায়। তারার রাজধানি আউর টাউনর মালিকানা আমি লুত নবীর আওলাদ মোয়াবী অকলরে দিলাইছি।”

¹⁰(আগে এইমী জাতির মানুষ অউ এলাকাত রইতা, ইতা আছলা পয়লোয়ান জাতি, তারা পরিমানে আছলা বউত জন, আর দেখতে আনাকী জাতির লাখান উচা-মোটা লাম্বা। ¹¹আনাকী অকলর লাখান এইমী অকলরেও রফায়ী নামে ডাকা অইতো, অইলে মোয়াবী অকলে ইতারে এইমী কইয়া ডাকিতা। ¹²সেয়ীর পাড়ো হোরীয় অকলে বসত করতা, বাদে ঈষʼর আওলাদ অকলে তারারে খেদাইয়া দিয়া ইখান দখল করলা। মাবুদর আতে বনি ইছরাইলে যেলা কেনান দেশর মালিকানা পাইয়া কেনানী অকলরে খেদাইবা, ঠিক অলা ঈষʼর আওলাদ অকলেও করছলা। তারা হোরীয় অকলরে বিনাশ করিয়া হকল জমি-মাটি দখল করিয়া নিজে হনো বসত করলা।)

¹³মুছা নবীয়ে আরো কইলা, “বাদে মাবুদে হুকুম দিলা, তুমরা জলদি করি রওয়ানা অও, আর জেরেদ পাড়িয়া খাল পার অইয়া হপারো যাও। তেউ আমরা পার অইলাম। ¹⁴আর কাদেশ-বর্নেয়া থাকি বার অইয়া হারি জেরেদ গুল্লা পার অইয়া আইতে আমরার আটতিশ বছর লাগছিল। এরমাজে অউলা অইলো, মাবুদে আগে কছম খাইয়া যেলা কইছলা, অউলা কাদেশ-বর্নেয়া থাকি বারনির কালো আমরার যতো সিপাই আছলা, এরা হকলউ অউ আটতিশ বছরে মরিগেলা। ¹⁵বনি ইছরাইল সমাজ থাকি তারারে বিনাশ করার আগ পর্যন্ত মাবুদ তারার বিপক্ষে আছলা।

¹⁶“অউ হকল সিপাই মরিয়া শেষ অইয়া হারলে, ¹⁷মাবুদে আমারে কইলা, ¹⁸আইজ তুমরা মোয়াবী অকলর দেশর সীমানা পার অইবায়, তারার রাজধানি আউর টাউনর কান্দাবায় যাইবায়। ¹⁹অইলে তুমরা যেবলা বনি-আম্মান দেশর কাছাত যাইবায়গি, গিয়া তারারে ছাতাইও না, তারারে যুদ্ধর ভাব-সাব দেখাইও না। মনো রাখিও, তারার দেশর কুনু জাগাউ আমি তুমরারে দিতাম নায়, ইখানর মালিকানা তো আমি লুত নবীর আওলাদ বনি-আম্মানরে দিলাইছি।”

²⁰(আগে রফায়ী অকল অনো রইতা, এরলাগি ইখানরে রফায়ী অকলর দেশ কইয়া ডাকা অইতো। আর বনি-আম্মানে ইতারে জাম-জামিমী কইয়া ডাকিতা। ²¹রফায়ী জাতি পয়লোয়ান আছলা, দেখতে আনাকী জাতির লাখান উচা-মোটা লাম্বা আর পরিমানেও বউত বেশি আছলা। মাবুদে বনি-আম্মান জাতির আতো ইতারে বিনাশ করাইলা, বনি-আম্মানে রফায়ী জাতিরে খেদাই দিয়া অউ দেশ দখল করলা। ²²মাবুদে ঈষʼর আওলাদ অকলরেদি অউ একই কাম করাইলা, তাইন এরার আতো হোরীয় জাতিরে বিনাশ করলা। এরা হোরীয় অকলরে খেদাইয়া দিয়া, তারার সেয়ীর দেশ দখল করিয়া বসত কররা। ²³এরমাজে কপ্তোর দ্বীপ থাকি কপ্তোরী জাতিয়ে আইয়া অব্বী জাতিরে বিনাশ করলা, তারার মাটিরে দখল করিয়া বসত করলা। অউ অব্বী অকল গাজা টাউনর ধারো বসত করতা, হনর হকল গাউ-গেরামো তারা রইতা।)

²⁴“এরবাদে মাবুদে কইছলা, ও বনি ইছরাইল, তুমরা বারঅও, বার অইয়া অরনন খালর হপারো যাও। হুনো, আমোরী জাতির বাদশা সীহোন আর তার হিশবন দেশরে আমি তুমরার আতো সপি দিছি। ইখান দখল করাত গিয়া বাদশারে যুদ্ধর ফিল্ডো লামাও, ²⁵তেউ দেখবায়, আমি মাবুদে আইজ থাকি জগতর হকল জাতির দিলো ডর হারাই দিমু, তুমরার ডরে তারা কাপিবা। তুমরার আওয়াজ হুনলেউ তারার জানো ধড়-ফড় শুরু অইবো।”

বাদশা সীহোন আর তার জাতির বিনাশ

²⁶মুছা নবীয়ে বনি ইছরাইলরে আরো কইলা, “বাদে আমি আপোস-চুক্তি করার খিয়ালে খাদিমোত মরুভুমি থাকি হিশবনর বাদশা সীহোনর গেছে খবরিয়া পাঠাইলাম, কইলাম, ²⁷আমরা আপনার দেশর ভিতরেদি পার অইয়া যাইতাম চাই, অনুমতি দিবা নি? আমরা আতারে-ফাতারে কুনুবায় যাইতাম নায়, খালি মুল সড়কেদি আটিয়া যাইমু। ^28-29আমরা নগদ টেকাদি আপনার গেছ থাকি খানি-খুরাকি বা পানিও খরিদ করিয়া খাইমু। আমরার মাবুদ আল্লায় আমরারে যে দেশখান দিতা চাইরা, জর্দান গাং পার অইয়া হউ দেশো যাইবার আগ পর্যন্ত, আপনার দেশর উপরেদি আমরারে আটিয়া যাইতে দেউক্কা। সেয়ীরর পাড়িয়া এলাকার বাসিন্দা ঈষʼর আওলাদ অকলে, আর আউর টাউনর বাসিন্দা মোয়াবী অকলেও আমরারে অলা পার অইতে দিছইন।

³⁰“অইলে হিশবনর বাদশা সীহোন রাজি অইলো না, আমরারে যাইতে দিলো না। তুমরার মাবুদ আল্লায়উ তার দিলরে পাষান বানাইল্লা, তার মনর ভাব লুয়ার লাখান অইগেল, যাতে তুমরার আতো তার বিনাশ অয়, আর ঠিকউ অলা অইলো। ³¹তেউ মাবুদে আমারে কইলা, ও মুছা, সীহোন আর তার বাদশাইরে আমি তুমার আতো সপি দিলাম। অখন তুমি হনো যাও, গিয়া অউ দেশ দখলে আনাত লাগো, আর হনো বসত করো।

³²“তেউ ইয়াহাজ এলাকাত সীহোনে তার হকল সিপাই দল লইয়া আমরার লগে লাড়াই করাত আইলো, ³³অউ সময় আমরার মাবুদ আল্লায় তারে আমরার আতো ফালাইলা। আমরা বাদশারে, তার পুয়াইন্তরে, তার সিপাই দলরে নিপাত করলাম। ³⁴আর আমরা তার হকল টাউন, গাউ-গেরাম হকলতা দখল করলাম, তারার হকল বেটাইন-বেটিন আর হুরুতারে বিনাশ করলাম। একজনও জিন্দা রইছে না। ³⁵খালি তারার পশুর পাল আর গনিমতর মাল-ছামানা আমরার লাগি আনলাম। ³⁶অরনন খালর সীমানার আরোয়ার টাউন, আর অউ এলাকার এক গাউ থাকি আরক গাউ দখল করি করি, গিলিয়দ পর্যন্ত কুনু জাগা আমরার দখলর বাইরে রইলো না। আমরার মাবুদ আল্লায় ইতা হকলতা আমরার আতো দিলা। ³⁷খালি বনি-আম্মান জাতির দেশ, জাব্বোক পাড়িয়া খালর কান্দা-কাছার হকল জিলা, পাড়র উপরর গাউ-গেরাম, আর আমরার মাবুদ আল্লায় যেতা জাগা দখল করতে নিষেধ করছইন, অউ জাগা খানাইন তুমরার দখলর বাইরে রইলো।”

বাশন দেশর বাদশা উজরে আরাইলা

¹হজরত মুছায় বনি ইছরাইলরে আরো কইলা, “হিশবন দেশ থাকি আমরা বাশন দেশো যাওয়ার পথে রওয়ানা অইলাম। বাশনর বাদশা উজে খবর পাইয়া যুদ্ধ করার লাগি তার হকল সিপাই দল লইয়া ইদরি টাউনো আইলো। ²আর মাবুদে আমারে কইলা, ও মুছা, ই বাদশারে তুমি ডরাইও না। হুনো, আমি তারে, তার আস্তা দেশরে, তার সিপাই দলরে তুমার আতো তুলিয়া দিলাইছি। তুমি হিশবন দেশো আমোরী জাতির বাদশা সীহোনর যে দশা ঘটাইছো, অগুরেও অউলা করিও।

³“অউ নমুনায় আমরার মাবুদ আল্লায় বাশন দেশর বাদশা উজরে, তার হকল মানষরে আমরার আতো সমজাই দিলা। আমরাও ইতা হক্কলটিরে বিনাশ করলাম, কুনুগুরে জিন্দা রাখছি না। ⁴আমরা তার দেশর হকল গাউ-গেরাম, টাউন-বন্দর দখল করলাম। তারার ষাইট খান টাউনউ দখল করিল্লাম, কুন্তা বাদ রইলো না। আস্তা অরগুব এলাকা, মানি বাশনর বাদশা উজর পুরা বাদশাই আমরার দখলো নিলামগি। ⁵অউ টাউন অকলো উচা উচা ওয়াল দিয়া বাউন্ডরি করা আছিল, ইতার গেইটো আছিল বড় বড় খিল। আর বাউন্ডরি ছাড়াও বউত গাউ-গেরাম আছিল। ⁶আমরা হকল টাউন আর গাউ-গেরামরে এক্কেবারে বিনাশ করছি। আগে হিশবনর বাদশা সীহোনর যে দশা ঘটাইছি, অখন বাশন দেশর বেটাইন-বেটিন, হুরুতাইন, হকল গাউ-গেরাম আর টাউনরেও একই লাখান বিনাশ করছি। ⁷অইলে তারার হকল পশুর পাল আর গনিমতর মাল-ছামানা আমরা লইয়া আইছি।

⁸“আমরা অউ সময় জর্দান গাংগর পুব পারর আমোরী জাতির দুইও বাদশার দখলর, অরনন খাল থাকি হর্মোন পাড় পর্যন্ত কবজা করছলাম। ⁹(সিদনর মানষে অউ হর্মোন এলাকারে সিরিয়ন কইয়া ডাকইন, আর আমোরী জাতিয়ে কইন ছনির।) ¹⁰পাড়িয়া এলাকার অউ থল জাগার হকল টাউন আর গাউ-গেরাম, আস্তা গিলিয়দ এলাকা, বাদশা উজর ছুলখা আর ইদরি টাউন সহ আস্তা বাশন দেশরে আমরা দখল করলাম।” ¹¹(পুরা রফায়ী জাতির মাজে খালি বাশন দেশর বাদশা উজ জিতা রইছলা। অউ বাদশা লুয়ার পালংগো হুতিতা, ইখান লাম্বায় নয় আত আর ফাড়ে চাইর আত। বনি-আম্মান জাতির রাব্বা টাউনো ইখান অখনও থওয়া আছে।)

বনি ইছরাইলর জমির ভাগ-বাটুরা

¹²হজরত মুছায় আরো কইরা, “আমরার দখল করা অরনন খালর পারো আরোয়ার টাউনর বাইরর উতরর এলাকা, আর পাড়িয়া গিলিয়দ এলাকার অর্ধেক জাগা, হনর হকল টাউন আর গাউ-গেরাম অকল, বনি ইছরাইলর রুবেন আর ছাদু খান্দানরে দিলাইলাম। ¹³গিলিয়দ দেশর বাকি অংশ আর বাদশা উজর গেছ থাকি আনা আস্তা বাশন দেশরে আমি মানশা খান্দানর অর্ধেক মানষরে দিলাম।” (বাশন দেশর আস্তা অরগুব এলাকারে রফায়ী জাতির দেশ কইয়া ডাকা অইতো। ¹⁴মানশা খান্দানর এক জনর নাম আছিল যায়ীর, হে আস্তা অরগুব এলাকা মানি, গশুরী আর মাখাতী জাতির সীমানা পর্যন্ত দখল করিয়া তার নিজর নামর মিলে অউ বাশন দেশর নাম দিলো হাব্বুত-যায়ীর। এরলাগি অখনও ইখানরে অউ নামে ডাকা অয়।)

¹⁵“আর গিলিয়দর পাড়িয়া এলাকা আমি মাখীররে দিলাম। ¹⁶অইলে গিলিয়দ থাকি অরননর পাড়িয়া খালর মাজামাজি পর্যন্ত হকল জাগা, আর হন থাকি বনি-আম্মান জাতির সীমানা জাব্বোক খাল পর্যন্ত আমি রুবেন আর ছাদু খান্দানরে দিলাম। ¹⁷তারার দেশর পইচমর সীমানা আছিল, আরাবা মরুভুমিত জর্দান গাংগর যে অংশ গালিল আওরর ধারেদি, পিছগা নামর পাড়িয়া এলাকার আরাবা সাগর বা লোনা সাগর পর্যন্ত গেছে, অউ জাগা।

¹⁸“অউ জাগা অখনাইন সমজাই দিয়া তারারে কইলাম, ইখনাইন ভোগ-দখল করার লাগি তুমরার মাবুদ আল্লায় তুমরারে দিছইন। অইলে তুমরার যেতা বেটাইন্তর শরিলো বল আছে, যেরা যুদ্ধ করার লাখ, এরা জুইত-জাইত অইয়া বনি ইছরাইলর আগে গিয়া গাং পার অও। ¹⁹অইলে তুমরারে দেওয়া টাউন আর গাউ-গেরামো তুমরার বউ, পুয়া-পুড়িন আর গরু-ছাগল হকলতা রইবা। আমি জানি তুমরার বউত পশু আছইন। ²⁰বাদে মাবুদে যেবলা তুমরার জাতির ভাইয়াইনরে তুমরার লাখান আরামর জাগা দিলাইবা, তুমরার মাবুদ আল্লায় জর্দান গাংগর হপারো তারারে যে দেশ দান কররা, অখানর দখল পাইয়া হারলে, তুমরা হিরবার আমার দেওয়া অউ জাগাত ফিরিয়া আইও।”

হজরত মুছা (আঃ) অর গাং পার অওয়া নিষেধ

²¹হজরত মুছায় তারারে কইরা, “অউ সময় আমি ইউছারে কইলাম, তুমরার মাবুদ আল্লায় অউ দুইও বাদশার কুন দশা ঘটাইছইন, ইতা তো নিজর চউখে দেখছো। তে অখন জর্দান পার অইয়া তুমরা যতো দেশাইন্তো যাইরায়, মাবুদে ইতা হক্কল দেশাইন্তর দশাও অউ লাখান ঘটাইবা। ²²এরলাগি তুমরা ইতারে ডরাইও না, স্বয়ং আল্লা মাবুদ তুমরার পক্ষ অইয়া তারার লগে যুদ্ধ করবা।

²³“আর অউ সময় আমি মাবুদর দরবারো আরজ করলাম, ²⁴ও মাবুদ মউলা, তুমার গুলামরে তো অখনউ দেখানি ধরছো, তুমি কতো মহান আর কতো বলবান। তুমি অউ যততা করছো, ইতা করার সাইধ্য কার আছে, আছমানো বা জমিনর কুনু দেবতার তাক্কত আছে নি, তুমার লাখান দাপট দেখাইতো? ²⁵মউলা গো, আমার বড় শখ অইলো, জর্দান গাংগর হপারো গিয়া তুমার ওয়াদা করা অউ সুন্দর পাড়িয়া এলাকা আর লেবানন দেশ দেখতাম, মেহেরবানি করি যাইতে দিবা নি? ²⁶অইলে মাবুদে না করলা, তাইন আমার আরজি হুনলা না, তুমরার কারনেউ তাইন আমার উপরে নারাজ আছলা। মাবুদে জুয়াপ দিলা, তুমি বউত কইছো, ই বেয়াপারে আর মাংগিও না। ²⁷আইচ্ছা, তুমি অউ পিছগা টিল্লার উপরে উঠো, উঠিয়া উতরে-দউকনে আর পুবে-পইচমে চউখ ফালাও। জর্দান গাং পারনি নিষেধ অইলেও, অন থাকি উবাইয়া হউ দেশরে দেখিলাও। ²⁸আর তুমার খাদিম ইউছারে হিকাই দেও, কিতা কিতা করা লাগবো। তার হিম্মত বাড়াও, ভিতরে সাওস দেও, কারন হকল মানষর আগে রইয়া হে গাং পার করাইবো, আর তুমি অন থাকি যে দেশ দেখরায়, হে এরারেদি অউ দেশ দখল করাইবো। ²⁹অখান হুনিয়া আমরা বায়ত-পিয়োরর ছামনর নিচা জাগাত রইগেলাম।”

আল্লার কালাম মানিয়া চলা

¹হজরত মুছায় তারারে কইলা, “ও বনি ইছরাইল, আমি অখন যে শরিয়ত আর হুকুম-আহকাম কইমু, ইতা তুমরা খিয়াল করি হুনো। তেউ তুমরা জানে বাচবায় আর তুমরার বাফ-দাদার মাবুদ আল্লায় তুমরারে যে দেশ দান কররা, হউ দেশো গিয়া দখল করতায় পারবায়। ²আমি তুমরারে যে হুকুম দিয়ার, ই হুকুমর লগে দুছরা কুন্তা বাড়াইও না বা কমাইও না। আমি যেলাখান কইরাম, তুমরা ঠিক অলাউ তুমরার মাবুদ আল্লার হকল হুকুম-আহকাম মানিয়া চলিও।

³“তুমরা তো নিজর চউখে দেখছো, আগে মাবুদে বাআল-পিয়োরর বেয়াপারে কিতা করছইন। তুমরার মাজর যতো জনে পিয়োর এলাকার বাআল দেবতার পুজা করছিল, আল্লা মাবুদে তুমরার ছামনে ইতা হক্কলটিরে বিনাশ করছইন। ⁴অইলে তুমরা যেরা দিলে-জানে আল্লা মাবুদর আশিক আছলায়, তুমরা হকলউ অখনও জিন্দা রইছো।

⁵“অখন হুনো, আমার মাবুদ আল্লায় আমারে যেলাখান হুকুম-আহকাম দিছলা, আমি তুমরারে ঠিক অউ হুকুম-আহকাম আর নিয়ম-কানুন হিকাইছি। যাতে তুমরা অখন যে দেশ দখল করাত যাইরায়, হউ দেশো ইতা কামো লাগাও। ⁶এরলাগি তুমরা খুব হুশিয়ার অইয়া ইতা মানিও, আর কামো লাগাইও। তেউ বাদ-বাকি তামাম জাতির গেছেউ ইতা তুমরার আখল-বুদ্ধি হিসাবে জাইর অইবো। অউ হুকুম-আহকামর কথা হুনলে তারা কইবা, হাছাউ এরা খুব বড় জাতি আর আখল-বুদ্ধি আলা জাতি। ⁷আর আমরার মাবুদ আল্লা যেলা আমরার লগে লগে রইন, তানরে ডাকিলে যেলা ধারো পাই, অউ দুনিয়ার বুকুত দুছরা কুনু বড় জাতি আছইন নি, যেতার দেবতা অলা লগে লগে রইন? ⁸বা আমি অখন যে শরিয়তর কথা কইরাম, ইতা দুছরা কুনু বড় জাতির আছে নি? ইলা নিয়ম-কানুন আর নিখুত হুকুম-আহকাম তারার আছে নি?

⁹“অইলে তুমরা যতদিন বাচিয়া রইবায়, অতদিন নিজর বেয়াপারে খুব হুশিয়ার রইও, নিজর দিলরে সাবধানে রাখিও, আরনায় নিজর চখুর দেখা ঘটনা অকল ফাউরিলিবায়, ইতা তুমরার দিল থাকি খুয়াইলিবায়। আর অউ হুকুম-আহকাম তুমরার পুয়া-পুড়িনরে হিকাও, তারাও অলা তারার আওলাদরে হিকাইবা। ¹⁰আর তুমরা হউ দিনর ঘটনা মনো করো, যে দিন তুমরা তুর পাড়ো আপন মাবুদ আল্লার ছামনে আজির অইছলায়। যেবলা তাইন আমারে কইছলা, আমার কালাম হুনার লাগি তুমি হক্কল মানষরে দলা করিয়া আমার ছামনে আনো, তেউ তারা হিকবা, ই জগতো তারা যতদিন জিন্দা রইবা, অতদিন আমারে ডরাইয়া রইতা, আর তারার হুরুতাইনরেও অলা চলার তালিম দিতা। ¹¹অউ সময় তুমরা কান্দাত গিয়া অউ পাড়র লামাত উবাইছলায়, উবাইয়া দেখলায়, আস্তা পাড়ো দাউ দাউ করি নুরর আগুইন জলের, আগুইনে গিয়া আছমান ছইলিছে, আর গইন ঘনো মেঘর কালনিয়ে আন্দাইর আছিল। ¹²হউ নুরর আগুনির ভিতরে থাকি, মাবুদে তুমরারে তান কালাম হুনাইলা। তুমরা তান মুখর আওয়াজ হুনলায়, অইলে তান কুনু ছুরত-আকার দেখাইছইন না, খালি তান গলার আওয়াজ হুনছো। ¹³তাইন নিজে তুমরারে তান লগে মিলনর উছিলার আল্লাই আপোস-চুক্তির খাছ দশটা হুকুম-আহকাম দিলা, আর কইলা অগুইন মানিয়া চলার লাগি। তান কুদরতি আতে দুই টুকরা পাথরর উপরে ইতা লেখিয়াও দিলা। ¹⁴হউ সময় মাবুদে আমারে হুকুম দিলা, আমি তুমরারে তান শরিয়তর হুকুম-আহকাম হিকাইতাম, যাতে জর্দান গাংগর হপারো তুমরা যে দেশ দখলো যাইরায়, হনো গিয়া হারলে অতা মানিয়া চলো।

মুর্তিপুজা থাকি হুশিয়ার

¹⁵“মাবুদে যেবলা নুরর আগুনির মাজ থাকি তুর পাড়ো তুমরার লগে বাতচিত করছলা, হউ দিন তো তুমরা তান কুনু ছুরত-আকার দেখছো না। এরলাগি তুমরা নিজর বেয়াপারে খুব হুশিয়ার রইও ¹⁶যাতে কুনু মুর্তি না বানাও, বে-পথি বনিয়া পুজা করার খিয়ালে কুনু বেটা বা বেটির ছুরতে মুর্তি বানাইও না। ¹⁷মাটির উপরে চলরা কুনু জীব-জানুয়ারর ছুরতে, আছমানো উড়রা কুনু পাখির ছুরতে, ¹⁸বুক ছেছরাইয়া চলরা কুনু জানদারর ছুরতে, বা পানিত রওরা কুনু জানদারর ছুরতে মুর্তি বানাইও না। ¹⁹আছমানেদি চাইয়া হারি চান্দ, সুরুজ, তেরা অকল দেখিয়া অউ নামর দেব-দেবী বা ফিরিস্তার পুজা করিও না, এরার খেজমতো লাগিও না। ইতারে তো তুমরার মাবুদ আল্লায় আছমানর তলর হকল জাতির লাগি দান করছইন। ²⁰মনো রাখিও, মাবুদে তুমরারে পছন্দ করছইন লুয়া গলানির গরম আগুনির গাতো থাকি, তাইন মিসর দেশ থাকি তুমরারে বার করি আনছইন, যাতে তুমরা তান আপন প্রজা অও, আর অখন তো হাছাউ তান প্রজা অইছো।

²¹“ও বনি ইছরাইল, তুমরার কারনে মাবুদে আমার উপরেও গুছা করছইন। তাইন কছম খাইয়া কইছইন, আমারে জর্দান গাংগর হপারো যাইতে দিতা নায়, তুমরার মাবুদ আল্লায় তুমরারে যে দেশর মালিকানা দিরা, অউ আরামর দেশো আমার যাওয়া নিষেধ। ²²আমার মউত অনোউ অইবো। জর্দান গাং পারনির হুকুম নাই। অইলে তুমরা গাং পার অইয়া হউ আরামর দেশ দখল করাত যাইরায়। ²³তে তুমরা নিজর বেয়াপারে হুশিয়ার রইও, তুমরার মাবুদ আল্লায় তুমরার লগে যে আপোস-চুক্তি কাইম করছইন, ইতা ফাউরিও না। তুমরার মাবুদ আল্লার নিষেধ অমাইন্য করিয়া কুনু জিনিসর মুর্তি বানাইও না। ²⁴মনো রাখিও, তুমরার মাবুদ আল্লা তো মহা ধ্বংসর আগুনির লাখান, তাইন তান নিজর পাওনা এবাদত চাইনউ চাইন।”

²⁵হজরত মুছায় তারারে এওখান কইলা, “হউ আরামর দেশো গিয়া হারি, তুমরা পুয়া-পুড়িন, নাতি-পুতির জনম দিয়া বউত দিন বসত করার বাদেও যুদি কু-পথে যাওগি, আর কুনু জিনিসর ছুরতে মুর্তি বানাও, তুমরার মাবুদ আল্লায় যেতারে ঘিন্না করইন, তুমরা অতা করো, ²⁶তে আমি অখন আছমান-জমিন সাক্ষি রাখিয়া তুমরার বিরুদ্ধে কইয়ার, জর্দান গাং পার অইয়া যে দেশ দখল করাত যাইরায়, হিনো খুব জলদি তুমরার নাম মিটিযিবো। বেশি দিন টিকতায় পারতায় নায়, নিচ্চিত বিনাশ অইবায়। ²⁷মাবুদে তুমরারে নানান জাতির মাজে ছিতরাই দিবা, তাইন খেদাই দিয়া যেখানো পাঠাইবা, হনো তুমরার খুব কম মানুষ জিন্দা রইবা। ²⁸অউ হালতে তুমরা মানুষ-আতে বানাইল মুর্তির পুজা করবায়, যেতায় চউখে দেখে না, কানে হুনে না, খাইতো পারে না, কুনুজাত ঘেরানও হুংগিতো পারে না, লাকড়ির আর পাথরর অতা মুর্তির পুজা করবায়। ²⁹তা-ও হনো রইয়া যুদি তুমরা নিজর মাবুদ আল্লার তালাশ করো, তে তাইন তুমরারে দিদার দিবা। কথা অইলো, দিলে-জানে কাতর অইয়া তানে ডাকিতে অইবো। ³⁰হেশ-মেশ তুমরা মছিবতো পড়িয়া হিরবার তৌবা করিয়া, তুমরার মাবুদ আল্লার নাম লইবায়, আর তান খুশি মাফিক চলবায়। ³¹মনো রাখিও, তুমরার মাবুদ আল্লা রহমানুর রহিম, তাইন তুমরারে ফালাইতা নায় বা বিনাশ করতা নায়। আর তাইন কছম খাইয়া তুমরার ময়-মুরব্বির লগে যে ওয়াদা আর চুক্তি করছইন, ইতাও ফাউরিতা নায়।”

আল্লা ছাড়া দুছরা কুনু মাবুদ নাই

³²হজরত মুছায় তারারে এওখান কইরা, “আল্লা পাকে জমিনো মানুষ পয়দা করার বাদ থাকি অখন পর্যন্ত, তুমরার আগর হক্কল জমানার ইতিহাস তুকাও, আস্তা আছমান-জমিনর এক মাথা থাকি আরক মাথা তুকাইয়া দেখো, বনি ইছরাইলর উপরে যতো আজব ঘটনা ঘটিছে, ইতা লাখান দুছরা কুনু ঘটনা ঘটছে নি? বা ইলা কুন্তা কুনুদিন হুনা গেছে নি? ³³আর নুরর আগুইন থাকি আল্লা পাকর বুলি হুনার বাদে, খালি তুমরা ছাড়া দুছরা কুনু জাতি জিন্দা রইছে নি? ³⁴তুমরা তালাশ করি দেখো, তুমরার মাবুদ আল্লায় তুমরার চখুর ছামনে মিসর দেশো তুমরার লাগি যততা করছইন, আস্তা জগতর কুনু দেব-দেবীয়ে ইলা করতো পারছে নি? ইলা পরিক্ষা লওয়া, কুদরতি নিশানা দেখানি, লাড়াই-যুদ্ধ করা, মজবুত আতর বল দেখানি, বড় বড় তাইজ্জুবি লিলা-খেলা আর ডর-খফ দেখাইয়া, যেকুনু জাতিরে অইন্য জাতির ভিতরে থাকি বার করি আনিয়া নিজর প্রজা বানাইতো পারছে নি?

³⁵“তে তুমরা যাতে পুরাপুর বুজো, অউ আল্লাউ অইলা মাবুদ, তাইন ছাড়া আর কুনু মাবুদ নাই, অখান বুজানির লাগিউ তুমরারে অততা দেখানি অইছিল। ³⁶তুমরারে হেদায়ত করার খিয়ালে তাইন বেহেস্তর আরশ থাকি তান নিজর বুলি হুনাইলা, আর জমিনর উপরে দেখাইলা নুরর আগুনির কুন্ডলি। অউ আগুনির মাজ থাকি বার অইল আল্লাই বুলি তুমরা হুনছো। ³⁷তাইন তুমরার ময়-মুরব্বি অকলরে মহব্বত করতা, এরলাগি এরার মউতর বাদে তারার আওলাদ অকলরেও পছন্দ করছইন। আর তাইন স্বয়ং আজির অইয়া তান মহা কুদরতি খেমতা খাটাইয়া তুমরারে মিসর দেশ থাকি বার করি আনছইন। ³⁸তান খিয়াল আছিল, তুমাতান থাকি বড় আর বলবান জাতি অকলরে তুমরার ছামন থাকি খেদাইয়া হারি, তারার দেশো নিয়া হউ হকল দেশর মালিকানা তুমরারে দিতা। অখন দেখরায় নি, তাইন তো ইতা করছইন।

³⁹“তে অখনকুর অউ তালিম মনো রাখিও, দিলর মাজে গাথিয়া থইও, হুনো, খালি অউ আল্লাউ উপরে আছমান আর তলে জমিনর মালিক, তাইন ছাড়া দুছরা কুনু মাবুদ নাই। ⁴⁰এরলাগি আমি অখন যে শরিয়ত আর হুকুম-আহকাম জানাইরাম, তুমরা ইতা মানিয়া চলিও, তেউ তুমরা আর তুমরার আওলাদ অকলর ভালাই অইবো। তুমরার মাবুদ আল্লায় চিরকালর লাগি তুমরারে যে দেশ দান কররা, অউ দেশো তুমরার হায়াতি লাম্বা অইবো।”

আশ্রয় টাউন ঠিক করা

⁴¹বাদে মুছা নবীয়ে জর্দান গাংগর পুব-পারর তিনখান টাউন আলগাইলা, ⁴²যাতে কুনু খুনি মানুষ বাগিয়া গিয়া অউ টাউনো জান বাচাইতো পারে। যে মানষে খুন করার কুনু চিন্তা বা দুশমনি ভাব আছিল না, খালি আখতা অনিচ্ছায় কেউররে মারিলায়, হে বাগিয়া বনবাসি বনিয়া অনো রইতো পারবো। ⁴³তিনো টাউন অইলো, রুবেন খান্দানর লাগি মরুভুমির কিনারার পাড়িয়া থল জাগার বাছির নামর টাউন। ছাদু খান্দানর লাগি গিলিয়দ এলাকার রামোত টাউন। মানশা খান্দানর লাগি বাশন দেশর গোলান টাউন।

হজরত মুছা (আঃ) অর দুছরা নছিয়ত (৪:৪৪—২৬:১৯)

শরিয়তর হুকুম-আহকাম জানানি

⁴⁴মুছা নবীয়ে বনি ইছরাইলর ছামনে শরিয়তর অউ হুকুম বয়ান করলা, ⁴⁵মিসর দেশ থাকি বার অইয়া আওয়ার বাদে, হকল হুশিয়ারির কথা, শরিয়তর নিয়ম-কানুন আর হুকুম-আহকাম বনি ইছরাইলরে জানাইলা। ⁴⁶তাইন জর্দান গাংগর পুবর পারো, হিশবন এলাকার আমোরী জাতির রাজা সীহোনর দেশর বায়ত-পিয়োরর ছামনর তল জাগাত ইতা কইলা। মিসর থাকি বার অইয়া আইয়া হারলে মুছা নবীয়ে আর বনি ইছরাইলে যুদ্ধ করি অউ বাদশা সীহোনরে আরাইছলা। ⁴⁷তারা বাদশা সীহোনর দেশ আর বাশনর বাদশা উজর দেশ দখল করছলা। আমোরী জাতির অউ দুইও বাদশার বাদশাই আছিল জর্দান গাংগর পুবর পারো। ⁴⁸অরনন খালর পারর আরোয়ার টাউন থাকি সিরিয়ন পাড়, মানি হর্মোন পাড় পর্যন্ত অউ দুইও রাজার সীমানা আছিল। ⁴⁹এর ভিতরে আছে জর্দান গাংগর পুবর পারর আস্তা এলাকা। ইকটা পিছগা পাড়র টিল্লার তলেদি আরাবা সাগরর কিনারা পর্যন্ত গেছে।

আল্লার দেওয়া খাছ দশ হুকুম

¹মুছা নবীয়ে তামাম বনি ইছরাইলরে দলা করাইলা, তারারে কইলা, “ও বনি ইছরাইল, আমি অখন যেতা হুকুম-আহকাম আর আইন-কানুন তুমরারে জানাইমু, ইতা তুমরা খিয়াল করি হুনিও, হুনিয়া দিলো গাথিয়া রাখিও আর আমল করিও। ²আমরার মাবুদ আল্লায় তুর পাড়ো আমরার লগে এক আপোস-চুক্তি বওয়াল করছইন। ³অউ চুক্তি তাইন আমরার ময়-মুরব্বির লগে না করিয়া, আমরার লগে করছইন, আমরা যতো জন অনো জিন্দা আছি, আমরার লগে করছইন। ⁴মাবুদে অউ পাড়র উপরে নুরর আগুনির মাজ থাকি তুমরার লগে ছামনা-ছামনি বাতচিত করছইন। ⁵তুমরা আগুনির ডরে হউ সময় পাড়র উপরে উঠলায় না, এরলাগি আমি তুমরা আর মাবুদর মাজখানো উবাইয়া, তান মুখর বুলি তুমরারে হুনাইছি। তাইন কইছলা,

⁶“আমি আল্লাউ তুমরার মাবুদ। মিসর দেশর গুলামি থাকি আমিউ তুমরারে খালাছ করি আনছি।

⁷“আমার বদলা তুমরা দুছরা কুনু দেবতা মানিও না।

⁸“পুজা করার খিয়ালে তুমরা কুনু মুর্তি বানাইও না, আছমান, জমিন বা পানির তলে যততা আছে, ইতা কুনুতার ছুরতে মুর্তি বানাইও না। ⁹তুমরা ইতার পুজা করিও না। ইতার সেবা-যতন করিও না। মনো রাখিও, আমি আল্লাউ তুমরার মাবুদ। আমার পাওনা এবাদত আমি চাইউ চাই। আমারে যেরা মানে না, আমি তারার গুনার সাজা দেই, তারার পয়লা ছিড়ি থাকি চাইর ছিড়ি আওলাদ পর্যন্ত5:9 মুল ইব্রানী: তিছরা ছিড়ি পর্যন্ত আর চাইর নম্বর ছিড়ি পর্যন্ত সাজা দেই। ¹⁰অইলে যেরা আমার আশিক বনিয়া আমার হুকুম-আহকাম আমল করে, আমি তারার আজার আজার ওয়ারিশ পর্যন্ত আমার অবিরাম মায়া-মহব্বত দেখাইমু।

¹¹“বেকামা কুনু কারনে তুমরার মাবুদ আল্লার নাম মুখো লইও না। কেউ যুদি খামোখা মাবুদর নাম লয়, তে কুনুমন্তেউ আমার সাজা থাকি রেহাই পাইতো নায়।

¹²“আর তুমরার মাবুদ আল্লার হুকুম মাফিক, জুম্মাবাররে পবিত্র দিন মানিও। ¹³হাপ্তার ছয়দিন তুমরা কাম-কাজ করিও, তুমরার দরকারি হকল কাম সারিও। ¹⁴অইলে সাত নম্বর দিন অইলো জুম্মাবার, তুমরার মাবুদ আল্লার নামে জিরাইবার দিন। ই দিন তুমরা, তুমরার পুয়া-পুড়িন, গুলাম-বান্দিন, গরু-গাধাইন, তুমরার গাউত বা টাউনো রওরা মুছাফির বা ভিন-দেশি, কেউ কুনুজাতর কাম-কাজ করিও না। তুমার গুলাম-বান্দিয়েও তুমার লাখান জিরাইবা। ¹⁵মনো রাখিও, মিসর দেশো থাকতে তুমরাও অলা গুলাম আছলায়, আর তুমরার মাবুদ আল্লায় তান বলআলা-মজবুত কুদরতি আতদি তুমরারে আজাদ করি আনছইন। এরলাগি তাইন হুকুম দিছইন, তুমরা জুম্মাবাররে পবিত্র দিন মানতায়।

¹⁶“তুমরার মাবুদ আল্লার হুকুম মাফিক তুমরার মা-বাফরে ইজ্জত করিও। তেউ তুমরার মাবুদ আল্লায় যে দেশ দিরা, হউ দেশো তুমরার হায়াতি বাড়িবো আর তুমরার ভালাই অইবো।

¹⁷“খুন করিও না।

¹⁸“জিনা করিও না।

¹⁹“চুরি করিও না।

²⁰“কেউরর বিরুদ্ধে মিছা সাক্ষি দিও না।

²¹“পরর বউর বায় লালছ করিও না। পরর ঘর-বাড়ি, জমি-মিরাস, গুলাম-বান্দি, গরু-গাধা, বা কুনু জিনিসর বায় লালছ করিও না।

²²“মনো রাখিও, স্বয়ং মাবুদে তুমরারে তুর পাড়র উপরর হউ নুরর আগুইন থাকি, মেঘ আর গইন আন্দারির ভিতরে থাকি, খুব জুরে জুরে অউ হুকুম দিছইন। খালি অউ হুকুম-আহকাম ছাড়া তুমরারে আর কুনুতা কইছইন না। বাদে অউ কালাম অকলরে দুই টুকরা পাথরর উপরে তান কুদরতি আতে লেখিয়া আমার আতো দিছলা। ²³অইলে তান নুরর তজল্লিয়ে যেবলা পাড় জলের, এরমাজে তুমরা নিজর কানে হুনলায়, হউ আন্দারির ভিতরে থাকি মাবুদর গলার আওয়াজ, হুনিয়া তুমরার হকল খান্দানর আমির অকল, তুমরার ময়-মুরব্বি অকল আমার গেছে উঠিয়া আইলা, ²⁴আইয়া কইলা, আমরার মাবুদ আল্লায় দিদার দিয়া তান জালাল আর মহিমা আমরারে দেখাইছইন, নুরর আগুইন থাকি বার অইল তান গলার আওয়াজ আমরা হুনছি। আর অখন আমরা বুজলাম, কুনু আদম জাতে আল্লা পাকর লগে বাতচিত করার বাদেও, ই আদম বাচিয়া রয়। ²⁵অইলে অখন কেনে আমরা ইনো মরতাম? কুদরতি ই আগুইনে তো আমরারে জালাইলিবো, আমরা যুদি আরো বেশ করি আমরার মাবুদ আল্লার গলার আওয়াজ হুনাত রই, তে তো নির্গাত মরন অইবো। ²⁶আমরার লাখান ইলা আর কুনু আদম জাত আছইন নি, যেরা নুরর আগুইন থাকি জিন্দা আল্লা পাকর গলার আওয়াজ হুনার বাদেও জিতা আছে? ²⁷তে আমরার মাবুদ আল্লায় যততা বাতাইছইন, তান কান্দাত গিয়া আপনেউ অতা হুনিয়া আইউক্কা। তাইন আপনার গেছে যেতা জানাইবা, আপনে আইয়া অতা আমরারে হুনাইবা। তেউ আমরা অতা আমল করমু।

²⁸“আর হউ সময় তুমরা যেবলা আমার লগে মাতিরায়, স্বয়ং মাবুদে ইতা হুনলা, হুনিয়া আমারে কইলা, অউ মানুষ অকলর মাত-কথা তো আমি হুনছি, তারা তুমারে যেতা কইছইন ইতা হকলতাউ ভালা। ²⁹হাছাউ যুদি তারা আমারে অলা ডরাইন, হামেশা আমার হুকুম-আহকাম মানিয়া চলার খিয়ালি অইন, তে তারা আর তারার আওলাদ অকলর চিরকালিন ভালাই অইবো।

³⁰“অখন তুমি লামাত যাও আর তারারে কও, তারার তাম্বুত ফিরিয়া যাইতাগি। ³¹অইলে তুমি অনো আমার কান্দাত রইও। আমি তুমারে আমার হকল হুকুম-আহকাম, আইন-কানুন আর শরিয়ত বাতাইমু, তুমি গিয়া তারারে অতা হিকাইবায়। তেউ আমি তারারে যে দেশর দখলদারি দিয়ার, হউ দেশো গিয়া হারি তারা অতা আমল করবা।

³²“এরলাগিউ তুমরার মাবুদ আল্লায় তুমরারে যেতা হুকুম-আহকাম দিছইন, ইতা যতন করিয়া আদায় করিও, ইতার তিল পরিমান হের-ফের করিও না। ³³তাইন যে পথে চলার লাগি হুকুম দিছইন, ঠিক অউ পথে চলিও, তেউ তুমরা জানে বাচবায়, তুমরার ভালাই অইবো, আর তুমরা যে দেশর দখলদারি পাইবায়, হউ দেশো তুমরার হায়াতি বউত লাম্বা অইবো।

আল্লার হুকুম-আহকাম মানার লাগি মিনতি

¹“তুমরারে হিকানির নিয়তে তুমরার মাবুদ আল্লায় আমারে অউ হুকুম-আহকাম, শরিয়ত আর আইন-কানুন দিছইন, যাতে হউ যে দেশ দখল করার নিয়তে তুমরা জর্দান গাং পার অইয়া যাইরায়, হনো গিয়া হারি তুমরা ইতা আমল করো। ²তেউ তুমরা, তুমরার হুরুতাইন আর তারার আওলাদ অকলে হারা জিন্দেগি আল্লা মাবুদরে ডরাইয়া তান দেওয়া নিয়ম আর হুকুম অকল আমল করিও। অলা করলে তুমরা বউত দিন বাচিয়া রইবায়। ³ও বনি ইছরাইল, তুমরা আমার কথা হুনো আর হুশিয়ার অইয়া ইতা আমল করো, তেউ তুমরার বাফ-দাদা অকলর মাবুদ আল্লার ওয়াদা মাফিক, হউ দুধ আর মউর ভান্ডার আলা দেশো তুমরার ভালাই অইবো আর তুমরা বউত বাড়িবায়।

⁴“ও বনি ইছরাইল, হুনো, আল্লা আমরার মাবুদ, তাইনউ এক। ⁵তুমরা পরতেকে তুমরার আস্তা দিল, আস্তা জান আর হকল বল-শক্তি দিয়া তুমরার মাবুদ আল্লারে মহব্বত করিও। ⁶আইজ আমি তুমরারে যে হুকুম দিয়ার, ইতা তুমরার দিলো গাথিয়া রাখিও। ⁷তুমরা হকলে তুমরার হুরুতাইনরে ইতা খিয়াল করি হিকাইও। আর ঘরো বইয়া, পথে-ঘাটে চলার সময়, ঘুমানির সময়, ঘুম থাকি উঠার বাদেও অতা বেয়াপারে মাতা-মাতি করিও। ⁸মনো রাখার নিশানা হিসাবে ইতা আতো বান্দিয়া রাখিও আর কপালর মাজে লাগাইও। ⁹তুমরার দুয়ারর চৌকাঠো আর মুল গেইটো লেখিয়া রাখিও।

¹⁰“তুমরার বাফ-দাদা ইব্রাহিম, ইছহাক আর ইয়াকুবর গেছে তুমরার মাবুদ আল্লায় কছম খাইয়া যে দেশ দেওয়ার ওয়াদা করছইন, হউ দেশ তাইন তুমরারে নিবা। হিনো সুন্দর সুন্দর আর বড় বড় টাউন অকল আছে, যেতা তুমরা বানাইছো না, খালি এমনেউ পাইবায়। ¹¹আর মাল-ছামানায় ভরা হাজাইল-পাড়াইল ঘর-দুয়ার পাইবায়, যেতা তুমরা যুগাইছো না, পানির কুয়া পাইবায় যেতা তুমরা খুদিছো না, আংগুরর বাগান আর জয়তুনর বাগান পাইবায় যেতা তুমরা লাগাইছো না। ¹²অইলে তুমরা হুশিয়ার রইও, ইতা হকলতা পাইয়া হারি মালদার বনিয়া তুমরার হউ আল্লা মাবুদরে ফাউরিও না, যেইন তুমরারে মিসর দেশর গুলামি থাকি খালাছ করিয়া আনছইন।

¹³“তুমরার মাবুদ আল্লারে ডরাইয়া চলিও, খালি তান এবাদত করিও, আর তান নামে কছম খাইও। ¹⁴তুমরা আরি-ফরি জাতির দেব-দেবীর পুজা করিও না। ¹⁵জানো তো, তুমরার মাবুদ আল্লা যেইন তুমরার লগে আছইন, তাইন নিজর পাওনা এবাদত পাইতা চাইনউ চাইন। এরলাগি হুশিয়ার রইও, ইতার পুজা করলে তাইন গুছায় আগুইন অইয়া তুমরারে দুনিয়া থাকি ফুছিলিবা। ¹⁶তুমরার মাবুদ আল্লারে পরিক্ষা করাত লাগিও না, যেলা আগে হউ মাছা নামর জাগাত করছলায়। ¹⁷তুমরার মাবুদ আল্লায় তুমরারে যতো হুকুম-আহকাম, হুশিয়ারি আর নিয়ম-কানুন দিছইন, ইতা তুমরা খিয়াল করি মানিও। ^18-19আর মাবুদর নজরো যেতা সঠিক, তাইন যেতা ভালা পাইন, তুমরা অতাউ করিও, তেউ তুমরার ভালাই অইবো। মাবুদে তুমরার বাফ-দাদার গেছে যে দেশ দিবার কছম করছইন, হউ দেশ থাকি তুমরার দুশমনরে তাইন খেদাইয়া দিবা। আর মাবুদর ওয়াদা মাফিক হউ আরামর দেশর দখলদারিও তুমরা পাইবায়।

²⁰“ভবিষ্যতে যেবলা তুমরার আওলাদ অকলে তুমরারে জিকাইবা, আমরার মাবুদ আল্লায় অউ যেতা হুকুম-আহকাম, নিয়ম-কানুন, আর হুশিয়ারি দিছইন ইতার মানি কিতা? ²¹অউ সময় জুয়াপ দিও, মিসর দেশো আমরা ফেরাউনর গুলাম আছলাম, অইলে আল্লায় তান বলআলা কুদরতি আত দিয়া আমরারে বার করিয়া আনছইন। ²²মাবুদে আমরার চখুর ছামনে ফেরাউন আর তার বাড়ির হকলর উপরে, আস্তা মিসর দেশর উপরে বড় বড় গজবি নিশানা, বেজুইতা বালা-মছিবত আর কুদরতি কাম দেখাইলা। ²³অইলে আমরারে তাইন হউ দেশ থাকি বার করিয়া আনলা, যাতে যে দেশ দিবার লাগি আমরার বাফ-দাদা অকলর গেছে কছম খাইছলা, হউ দেশো আমরারে পার করিয়া দখলদারি দেইন। ²⁴আর তাইন হুকুম দিলা, আমরা যানু তান হকল হুকুম-আহকাম মানি, তানরে ডরাইয়া চলি, তেউ আমরার ভালাই অইবো আর আমরা অখনকুর লাখান হামেশা বাচিয়া রইমু। ²⁵অখন আমরা যুদি আমরার মাবুদ আল্লার হুকুম মাফিক তান দেওয়া নিয়ম-কানুন খিয়াল করিয়া মানি, তে ইটাউ অইলো আমরার পরেজগারি।”

দেশর বিধর্মীর লগে দুস্তি করিও না

¹হজরত মুছায় আরো কইলা, “হুনো, তুমরা যে দেশ দখল করাত যাইরায়, তুমরার মাবুদ আল্লায়উ তুমরারে হনো নিবা আর বউত জাতিরে তুমরার ছামনে থাকি খেদাইয়া হারি ইতা দখল করাইবা। তাইন হিট্টী, গির্গাশী, আমোরী, কেনানী, ফারিজী, হিব্বী আর যিবুজী জাতিরে খেদাই দিবা, ই সাতো জাতিউ পরিমানে তুমরা থাকি বড় আর বলআলা। ²তুমরার মাবুদ আল্লায় যেবলা ইতারে তুমরার আতো সপিয়া দিবা, অউ সময় তুমরা তারারে এক্কেবারে বিনাশ করিলিও, তারার লগে কুনু চুক্তি করিও না, আর কুনু দয়া-মায়া দেখাইও না। ³ইতার লগে বিয়া-শাদির বেয়াপারে কুনু চুক্তি করিও না। তুমরার পুড়িন্তরে তারার পুয়াইন্তর গেছে বিয়া দিও না, আর তারার পুড়িনরেও তুমরার পুয়াইন্তর লাগি আনিও না। ⁴কারন ইতায় তুমরার পুয়া-পুড়িনরে আমার গেছ থাকি হরাইয়া দেব-দেবীর পুজা করাইবো। তেউ আল্লা মাবুদে তুমরার উপরে গুছা অইয়া, লগে লগেউ তুমরারে বিনাশ করবা। ⁵এরলাগি তুমরা তারার হকল পুজা-মন্ডপ ভাংগিলিও, পুজার জাগা অকল বিনাশ করিও, আশেরা-দেবীর নিশানা খুটি কাটিয়া ফালাইও, আর হকল জাতর মুর্তিরে আগুইনদি জালাইও। ⁶মনো রাখিও, তুমরাউ অইলায় আল্লা মাবুদর পবিত্র প্রজা। দুনিয়ার হকল জাতির মাজ থাকি তাইনউ তুমরারে নিজর প্রজা আর খাছ সম্পদ হিসাবে আলগ করছইন।

⁷“কেনে আলগ করছইন? অইন্য জাতি থাকি তুমরার মানুষ বেশি অতার লাগি নি? না, মোটেউ না। তুমরা তো হকল জাতি থাকি কম আছলায়। ⁸তা-ও তাইন তুমরারে খুব মায়া-মহব্বত করইন, আর তুমরার বাফ-দাদা অকলর গেছে যে কছম করছলা, অতার লাগিউ তুমরারে আলগ করছইন। মাবুদে তান কুদরতি আত লাগাইয়া তুমরারে বার করিয়া আনছইন, মিসরর বাদশা ফেরাউনর আত থাকি আর গুলামির দেশ থাকি তুমরারে আজাদ করছইন। ⁹অখন তুমরা মনো রাখিও, তুমরার মাবুদ আল্লাউ অইলা আসল মাবুদ। তাইনউ চিরকালিন হক-হালাল। যেরা আশিক অইয়া তানে মহব্বত করে আর তান হুকুম-আহকাম মানে, তাইন তারার আজার আজার ছিড়ি পর্যন্ত নিজর ওয়াদা করা জবান আর দয়া বওয়াল রাখইন। ¹⁰অইলে যেতায় বদ সাওস করিয়া তান বায় পিছ দিলায়, তাইন ইতারে বিনাশ করিয়া জলদি করি বদলা দেইন। ¹¹এরলাগি আইজ তুমরারে যে হুকুম-আহকাম, নিয়ম-কানুন আর শরিয়ত দিরাম, ইতা খুব খিয়াল করিয়া আমল করিও।

আল্লার হুকুম মানার পুরুস্কার

¹²“ও বনি ইছরাইল, তুমরা অউ হুকুম-আহকামর কথা কান পাতিয়া হুনো, আর ইতা খিয়াল করি আমল করো। তেউ তুমরার মাবুদ আল্লায় তুমরার বাফ-দাদাইন্তর লগে, তান দয়া-মায়ার বেয়াপারে কছম খাইয়া যে আপোস-চুক্তি করছলা, ইতা তুমরার লগে বওয়াল রাখবা। ¹³তাইন তুমরারে মায়া-মহব্বত করবা, রহম-বরকত দিবা আর তুমরার মানষর পরিমান বাড়াইবা। তুমরারে যে দেশ দিবার লাগি তুমরার ময়-মুরব্বির গেছে কছম খাইছলা, অউ দেশো তুমরারে রহম-বরকত দিবা। তুমরারে আওলাদ বাড়াই দিবা, তুমরার বাগানর ফল-মুল, খেতর ফসল, আংগুরর রস, জয়তুনর তেল, গরু-বাছুর, মেড়া-ছাগল হকলতারে বাড়াই দিবা। ¹⁴হকল জাতি থাকি তুমরা বেশি রহম-বরকত পাইবায়, তুমরার বেটাইন-বেটিন বা তুমরার পশুর পালর কেউ আটখুরা রইতো নায়। ¹⁵আল্লা মাবুদে তুমরারে হকল লাখান বেমার থাকি বাচাইবা। মিসর দেশো তুমরা যেতা কঠিন বেমার-আজার দেখছো, ইতা তুমরারে দিতা নায়, খালি তুমরার দুশমন অকলরে দিবা। ¹⁶তুমরার মাবুদ আল্লায় যতো জাতির মানষরে তুমরার আতো সপিবা, ইতারে তুমরা এক্কেবারে শেষ করিলাইও, কুনু দয়া করিও না, আর তুমরা ইতার দেবতারে পুজা করিও না, আরনায় ইতা তুমরার পথর কাটা অইবা।

¹⁷“তুমরা হয়তো মনে মনে কইবায়, আমরা কিলাখান তারারে খেদাইয়া দিমু? ইতা জাতির মানুষ তো পরিমানে আমরা থাকি বাক্কা বেশি। ¹⁸অইলে তুমরা ইতারে ডরাইও না। ফেরাউন আর আস্তা মিসর দেশর উপরে তুমরার মাবুদ আল্লায় কিতা করছইন, ইতা তুমরা ফাউরিও না। ¹⁹মাবুদে কতো বড় বড় গজব-মছিবত ঢালিয়া তারারে বিনাশ করছইন, ইতা তো নিজর চউখেও দেখছো। তাইন বউত কুদরতি কাম, বউত লাখান নিশানা আর তান বলআলা মজবুত আত দিয়া তুমরারে বার করিয়া আনছইন, ইতা মনো রাখিও। আর তুমরা অখন যেতা জাতি অকলরে দেখিয়া ডরাইরায়, ইতার উপরেও তুমরার মাবুদ আল্লায় ঠিক অউলা ঘটাইবা। ²⁰এরবাদেও তুমরার গেছ থাকি লুকাইয়া যেগুইন জিতা রইযিবা, তুমরার মাবুদ আল্লায় ভিংগুলর পাল পাঠাইয়া ইতা হকলটিরে বিনাশ করবা। ²¹তে তুমরা ইতারে ডরাইও না, জানো তো, তুমরার মাবুদ আল্লা যেইন তুমরার লগে বসত করইন, এইন বড় ভয়ংকর আর মহান। ²²তুমরার মাবুদ আল্লায় তুমরার ছামনে থাকি আস্তে আস্তে অতা জাতিরে খেদাই দিবা। অইলে হকলটিরে তো তুমরা একলগে খেদাইতায় পারতায় নায়, খেদাইলে জংলি জানুয়ারে তুমরার চাইরোবায় ভরিযিবা। ²³তা-ও তারা এক্কেরে বিনাশ অওয়ার আগ পর্যন্ত তুমরার মাবুদ আল্লায় তারারে বেজুইতা অশান্তিত ফালাইয়া তুমরার আতো সপিয়া বিনাশ করাইবা। ²⁴তারার রাজা-বাদশা অকলরেও তুমরার আতো সপিবা, তুমরা দুনিয়া থাকি ইতার নাম মিটাইলিবায়, ইতারে বিনাশ করার আগ পর্যন্ত কেউ আইয়া তুমরার ছামনে উবানির তাক্কত অইতো নায়।

²⁵“তুমরা ইতার মুর্তি অকলরে আগুনিত ফালাইয়া জালাইলিও। তারার গতরর সোনা-রুপার বায় লালছ করিও না, আরনায় ফান্দো পড়বায়। মনো রাখিও, তুমরার মাবুদ আল্লায় ইতারে ঘিন্নাইন। ²⁶ঘিন্নার কুনু জিনিস তুমরার ঘরো হারাইলে তুমরাও অতার লাখান বনিযিবায়। বরং তুমরাও ইতারে খুব ঘিন্নাইও আর তুচ্ছ করিও, ইতা তো লান্নতি।

সুদিনর কালো আল্লারে ফাউরিও না

¹“অখন আমি তুমরারে যে হুকুম দিরাম, তুমরা খুব খিয়ালি অইয়া ইতা আমল করিও, তেউ তুমরা বাচিয়া রইবায়, তুমরার আওলাদ বাড়িবো, আর তুমরার ময়-মুরব্বির গেছে মাবুদে কছম খাইয়া যে দেশ দিবার ওয়াদা করছইন, হউ দেশো হামাইয়া দখল করতায় পারবায়। ²আর তুমরা মনো রাখিও, তুমরার মাবুদ আল্লায় অউ চাল্লিশ বছরে মরুভুমির মাজদি তুমরারে কিলা লইয়া আইছলা, তুমরার বড়াই-বেটাগিরি ভাংগিবার লাগি, আর তুমরা তান হুকুম-আহকাম মানবায় কি না অখান পরিক্ষা করার নিয়তে, তুমরার দিলর খবর জানার লাগি তাইন তুমরারে নতো করছইন। ³তুমরার ময়-মুরব্বিরে খানি-খুরাকি না দিয়া উপাস রাখলা, বাদে যে খানি তারা চিনতা না, মান্না নামর অউ খানি খাওয়াইয়া তাইন তুমরার বড়াই-বেটাগিরি ভাংগিছইন। তাইন তুমরারে হিকাইতা চাইলা, খালি রুটি খাইলেউ মানুষ বাচে না, বরং আল্লার পরতেক কালামেউ মানষর জান বাচে। ⁴অউ চাল্লিশ বছরর মাজে তুমরার গতরর কাপড়-চুপড় নষ্ট অইছে না, দিন-রাইত আটিলেও তুমরার পাও ফুলছে না। ⁵অখন তুমরার দিলো গাথিয়া রাখিও, বাফে যেলা নিজর পুয়ারে শাসন করে, তুমরার মাবুদ আল্লায় তুমরারেও অলা শাসন করইন।

⁶“তুমরা নিজর মাবুদ আল্লার হুকুম-আহকাম আমল করিও, তান পথে চলিও, আর তানরে ডরাইও। ⁷তুমরার মাবুদ আল্লায় তুমরারে যে আরামর দেশো নিরা, ই জাগাত পাড়-পর্বত, পাড়িয়া গাং, পানির ঝরনা আছে, আর মাটির তলেও পানি আছে। ⁸হিনো গম, বার্লি, আংগুর, ডুমুর গাছ, আনুয়ার ফল, জয়তুনর তেল আর মউ আছে। ⁹হি দেশো বউত খানি-পানি পাইবায়, কুন্তার অভাব তুমরার অইতো নায়। হিনোর পাথরর মাজে লুয়া আছে, হনর পাড় খুদিলে তুমরা তামা-পিতল পাইবায়। ¹⁰হউ দেশো পেট ভরিয়া খানা-পিনা খাইয়া হারলে তুমরার মাবুদ আল্লার দেওয়া অউ আরামর দেশর লাগি তান শুকরিয়া আদায় করিও।

¹¹“তা-ও তুমরা হুশিয়ার রইও, তুমরার মাবুদ আল্লারে কুনু সময় ফাউরিও না, আর আমি অখন তুমরারে যেতা হুকুম-আহকাম, নিয়ম-কানুন, আর শরিয়ত জানাইরাম, ইতা আমল করতে কুনু গাফলতি করিও না। ¹²হনো গিয়া পেট ভরি খানা-পিনা খাইয়া, সুন্দর করি ঘর-বাড়ি বানাইয়া, ¹³তুমরার গরু-ছাগলর পাল বড় করিয়া, সোনা-রুপা জমাইয়া, হকল মন্তে ধন-ছামানা বাড়িয়া হারলে হুশিয়ার রইও। ¹⁴তুমরার দিলরে বড়াই-বেটাগিরি করতে দিও না। আর হউ আল্লা মাবুদরে ফাউরিও না, যেইন তুমরারে মিসর দেশ থাকি, হউ গুলামি থাকি বার করিয়া আনছইন। ¹⁵তাইন তো তুমরারে বেজুইতা বিপদ-আপদে ভরা বিরাট মরুভুমি থাকি, কঠিন বিষাক্ত হাফ, বিষাক্ত কাকড়া-বিছায় ভরা পথেদি তুমরারে পার করি আনছইন। শক্ত পাথরর ভিতর থাকি তুমরার লাগি পানি বার করছইন। ¹⁶তাইন হউ মরুভুমির মাজে তুমরারে মান্না খাবাইছইন, যেতার নাম তুমরার ময়-মুরব্বি অকলে হুনছইনও না। তুমরার ভিতরর বড়াই-বেটাগিরি ভাংগিবার লাগি, আর তুমরারে পরিক্ষা করার নিয়তেউ ইতা করছইন, যাতে হেশে তুমরার ভালাই অয়। ¹⁷তুমরা মনে মনে কইও না, আমার নিজর বল-শক্তিয়ে নিজর কামাই দিয়া ধনি অইছি। ¹⁸অইলে তুমরার নিজর মাবুদ আল্লায় তুমরার ময়-মুরব্বির গেছে কছম খাইয়া যেতা ওয়াদা করছলা, অতা অখন পুরাপুর করার লাগি তুমরারে ই ধন-ছামানা দিছইন, এরলাগি তানরে মনো রাখিও।

¹⁹“তুমরা যুদি কুনু দিন তুমরার মাবুদ আল্লারে ফাউরিলাও, আর দেব-দেবীর পুজা করাত লাগো, অতার খেজমত বা ভজনা করো, তে আমি অখন তুমরারে হুশিয়ারি দিয়ার, তুমরা নিচ্চিত বিনাশ অইযিবায়। ²⁰তুমরার মাবুদ আল্লার হুকুম-আহকাম না মানলে, তুমরার ছামনে হউ যেতা জাতি অকলরে তাইন বিনাশ করছইন, তুমরারেও অলা বিনাশ করবা।”

বনি ইছরাইলর কাইজ্জা আর নাফরমানি

¹হজরত মুছায় আরো কইলা, “ও বনি ইছরাইল হুনো, তুমরা থাকি বউত বলআলা আর পরিমানে বউত বেশি, বড় বড় জাতির দেশরে দখল করার লাগি অখন জর্দান গাং পার অইয়া যাইবায়, তারার টাউন অকলও বড় বড়, অউ টাউনর বাউন্ডরির ওয়াল আছমানো ছইলিছে। ²তারা অইলা উচা-মোটা পয়লোয়ান, এরা হকলউ আনাকী বংশর মানুষ। তুমরা তো আগেউ তারার বেয়াপারে হুনছো, আনাকী অকলর লগে লাগার তাক্কত কার আছে? ³অইলে তুমরা অখান মনো রাখিও, তুমরার মাবুদ আল্লা তো তুমরার আগে আগে যাইরা, তাইন জালাইয়া ছারখার কররা আগুনির লাখান। তাইনউ ইতারে দমাইয়া তুমরার তলুয়া বানাইবা। তেউ মাবুদে আগে যেলাখান কইছলা, তুমরা অলাউ তারারে খেদাই দিয়া জলদি করি বিনাশ করবায়।

⁴“তুমরার মাবুদ আল্লায় যেবলা তুমরার ছামনে থাকি তারারে খেদাইয়া দিবা, হউ সময় তুমরা মনে মনে কইও না, আমরার পরেজগারির ফল হিসাবে মাবুদে আমরারে অউ দেশ দখল করার লাগি আনছইন। আসলে হউ জাতি অকলর নাফরমানির লাগিউ মাবুদে তারারে তুমরার ছামনে থাকি খেদাই দিবা। ⁵তুমরার পরেজগারি বা সততার লাগি তো হি দেশর দখলদারি পাইরায় না, বরং হউ জাতির নাফরমানির লাগি, আর তুমরার মাবুদ আল্লায় তুমরার ময়-মুরব্বি ইব্রাহিম, ইছহাক আর ইয়াকুবর গেছে যে ওয়াদা করছলা, অখান পুরন করার লাগি, তাইনউ তুমরার ছামনে থাকি ইতারে খেদাইয়া দিবা। ⁶এরলাগি তুমরা জানিয়া রাখিও, তুমরার পরেজগারি দেখিয়া তো তুমরার মাবুদ আল্লায় অউ আরামর দেশর দখলদারি তুমরারে দিরা না, তুমরা অইলায় গাড়তেড়া-একগুইয়া জাতি।

সোনার বাছুরর পুজা

⁷“আর হউ মরুভুমির মাজে তুমরা কিলা নিজর মাবুদ আল্লার গুছা তুলাইছলায়, ইখান মনো রাখিও, কুনুদিন ফাউরিও না। মিসর দেশ ছাড়িয়া আওয়ার দিন থাকি অখানো আওয়া পর্যন্ত, হামেশা তুমরার মনর ভিতরে মাবুদর বিরুধিতা আছে। ⁸তুর পাড়র মাজেও তুমরা মাবুদর গুছা তুলাইছলায়, এরলাগি তাইন তুমরারে বিনাশ করিলতা চাইলা। ⁹মাবুদে তুমরার লগে যে আপোস-চুক্তি বওয়াল করছইন, অউ চুক্তি নামা লেখা দুইও খান পাথর আনার লাগি আমি পাড়ো উঠিছলাম, চাল্লিশ দিন চাল্লিশ রাইত কুনু দানা-পানি না খাইয়া আমি রোজা আছলাম। ¹⁰আর মাবুদে তান পবিত্র আতর আংগুইলদি লেখা হউ দুইও খান পাথর আমারে দিলা। তুমরা হকল যেদিন তুর পাড়ো আইয়া দলা অইলায়, অউ দিন মাবুদে জালাইল আগুনির মাজ থাকি তুমরারে যেতা বাতাইছলা, অউ দুইও পাথরর মাজে তো অতা লেখা আছিল।

¹¹“হউ চাল্লিশ দিন আর চাল্লিশ রাইতর বাদে মাবুদে অউ চুক্তি নামা লেখা পাথর দুইও খান আমার আতো দিলা। ¹²দিয়া কইলা, যাও, তুমি জলদি করি লামাত যাও, কারন তুমি যেতা মানষরে মিসর থাকি বার করিয়া আনছো, ইতা কু-পথে গেছইনগি। আমার বাতাইল পথ থাকি তারা অতো জলদি বে-পথি অইগেছে, তারা পুজা করার লাগি সোনা গলাইয়া এক মুর্তি বানাইছে। ¹³মাবুদে আমারে আরো কইলা, আমি তো ইতা মানষরে দেখলাম, ইতা বড় গাড়তেড়া-একগুইয়া জাতি। ¹⁴অখন তুমি আমার গেছ থাকি হরি যাও, কুনু বাধা দিও না, আমি ইতারে বিনাশ করিলিমু, দুনিয়া থাকি ইতার নাম মিটাইলিমু। আর তুমার মাজ থাকি এক নয়া জাতি পয়দা করমু, ইতা আরো বড় আরো বলআলা জাতি অইবো।

¹⁵“তেউ আমি পাড় থাকি লামিয়া আইলাম, পাড়র উপরে আগুইন জলের, আর আমার আতো আছিল চুক্তি নামা লেখা হউ দুইও খান পাথর। ¹⁶বাদে আমি চাইলাম, চাইয়া দেখি তুমরা নিজর মাবুদ আল্লার দরবারো গুনা কররায়। তুমরা পুজা করার লাগি সোনা গলাইয়া ফর্মাত ঢালিয়া এক গরুর বাছুর বানাইলায়। মাবুদর বাতাইল পথ ছাড়িয়া তুমরা অতো জলদি বে-পথে গেলায়গি! ¹⁷এরলাগি আমি অউ দুইও খান পাথর আমার আত থাকি ফালাই দিলাম, তেউ ইতা ভাংগিয়া তুমরার চখুর ছামনে টুকরা টুকরা অইগেল।

¹⁸“মাবুদে যেতারে নাপছন্দ করইন, অলাখান গুনা করিয়া তুমরা তান গুছা তুলাইলায়, এরলাগি আমি আগর লাখান হিরবার চাল্লিশ দিন চাল্লিশ রাইত কুনু দানা-পানি না খাইয়া, তান ছামনে সইজদাত পড়ি রইলাম। ¹⁹মাবুদর বেজুইতা গুছারে আমি খুব ডরাইলাম, তাইন গুছায় আগুইন অইয়া তুমরারে বিনাশ করিলতা চাইলা, অইলে অউবারও তাইন আমার ফরিয়াদ হুনলা। ²⁰মাবুদে হারুনর উপরেও খুব গুছা অইয়া তানরে শেষ করিলতা চাইলা, তেউ আমি হারুনর লাগিও তান দরবারো মিনতি করলাম। ²¹আর তুমরার গুনার আতিয়ার মানি তুমরার বানাইল হউ বাছুরর মুর্তিরে আগুনিত ফালাইয়া জালাইয়া ছারখার করলাম। অগুর জালাইল টুকরারে পিষিয়া ছালি বানাইয়া পাড়িয়া গাংগর পানির ফুতর মাজে ফালাইলাম।

²²“তুমরা তো তাবেরাত, মাছাত আর কিবরুত-হুতাবা নামর জাগাত মাবুদর গুছা তুলাইছলায়। ²³এরবাদে কাদেশ-বর্নেয়া থাকি রওয়ানা অওয়ার কালো মাবুদে যেবলা কইলা, আমি তুমরারে আরামর যে দেশ দান করছি, তুমরা গিয়া অখান দখল করো, হউ সময়ও তুমরা নিজর মাবুদ আল্লার হুকুমর বিরুধিতা করলায়, তানরে মানলায় না, তান কথারেও একিন করলায় না। ²⁴আসলে আমি যেদিন থাকি তুমরারে চিনি, হউ দিন থাকিউ দেখিয়ার, তুমরা হামেশা মাবুদর হুকুমর উল্টা চলরায়।

²⁵“যাই অউক, মাবুদে তুমরারে বিনাশ করার কথা কওয়ায় আমি চাল্লিশ দিন চাল্লিশ রাইত, তান ছামনে সইজদাত পড়ি রইলাম। ²⁶আমি তান দরবারো মিনত করি কইলাম, ও মাবুদ মউলা, তুমি এরারে বিনাশ করিও না, এরা তো তুমারউ বন্দা, তুমারউ খাছ সম্পদ। তুমার কুদরতি কাম দিয়া, তুমার নিজর বলআলা আতদি যেতারে মিসর দেশ থাকি বার করি আনছো, ইতারে মারিও না। ²⁷ইতার বৈতলগিরি, নাফরমানি আর গুনার বায় না চাইয়া, তুমি খালি তুমার গুলাম ইব্রাহিম, ইছহাক আর ইয়াকুবর কথা মনো করো। ²⁸অখন তুমি যুদি ইতারে মারিলাও, তে তুমি যে দেশ থাকি আমরারে বার করিয়া আনছো, হউ দেশর মানষে কইবো, মাবুদে তান ওয়াদা করা দেশো ইতারে নিতা পারছইন না, বা তারারে ইংসা করিয়া জানে মারার লাগি অউ মরুভুমিত নিছইন। ²⁹আসলে এরা তো তুমারউ বন্দা, তুমার নিজর সম্পদ। তুমার আপন কুদরতি আত লাগাইয়া, তুমার বল-তাক্কত খাটাইয়া এরারে মিসর থাকি বার করিয়া আনছো।”

আল্লাই চুক্তি নামার পাথর হিরবার দিলা

¹হজরত মুছায় তারারে কইরা, “হউ সময় মাবুদে কইলা, তুমি পাথর কাটিয়া আগর লাখান দুখান টুকরা বানাও, আর অখনাইন লইয়া পাড়র উপরে উঠিয়া আমার ধারো আও। এরলগে লাকড়িদি একটা সন্দুকও বানাইও। ²তুমি আগে যে দুই টুকরা পাথর ভাংগিলিছো, হউ পাথরর উপরে যেতা লেখা আছিল, অতা আমি অউ দুইও পাথর টুকরার উপরে হিরবার লেখিয়া দিমু, বাদে তুমি অখনাইন নিয়া হউ সন্দুকর ভিতরে থইবায়।

³“হুকুম পাইয়া আমি বাবলা লাকড়িদি এক সন্দুক বানাইলাম, আর দুগু পাথর কাটিয়া আগর লাখান দুই টুকরা করলাম, বাদে অউ দুইও টুকরা আতো লইয়া আমি পাড়র উপরে উঠলাম। ⁴উঠিয়া হারলে মাবুদে হউ পয়লা দুইও পাথর টুকরার উপরে যেতা লেখিছলা, অতা হিরবার অউ দুইও টুকরার উপরে লেখিয়া আমারে দিলা, অউ লেখা আয়াত অইলো, শরিয়তর খাছ দশ হুকুম। আগে যেদিন তুমরা হকল তুর পাড়ো আইছলায়, হউ দিন মাবুদে জালাইল আগুনির মাজ থাকি তুমরারে অউ হুকুম-আহকাম বাতাইছলা। ⁵বাদে আমি পাড় থাকি লামাত লামিয়া আইয়া আমার বানাইল হউ সন্দুকর ভিতরে দুইও খান পাথর থইলাম, যেলা মাবুদে হুকুম দিছলা। ইতা অখনও হনো আছে।”

⁶(বনি ইছরাইলে বিরুত-বনি-ইয়াকান থাকি রওয়ানা অইয়া মুছেরাত গেলাগি। অউ জাগাত হারুন নবীর উফাত অওয়ায়, তানরে অনো দাফন করা অইলো। বাদে তান বদলা তান পুয়া আলি-আজর পরধান ইমাম অইলা। ⁷বাদে বনি ইছরাইলর কাফেলা গুদগুদাত গেলাগি, হন থাকি জতবাতাত গেলা, ই জাগাত পানির ফুত আলা বউত খাল-নালা আছিল। ⁸অউ সময় থাকি মাবুদে লেবি খান্দানরে পছন্দ করলা শাহাদত সন্দুক বইয়া নিবার লাগি, মাবুদর এবাদত-বন্দেগি করার নিয়তে তান ছামনে আজিরা দিবার লাগি, আর তান নামে মানষরে দোয়া দিবার লাগি। অউ ইমামতি কাম তারা অখনও কররা। ⁹অতার লাগি লেবি খান্দানর মানষে বনি ইছরাইলর দুছরা খান্দান অকলর লাখান জমি-জমার কুনু বাট বা কুনু মিরাসদারি পাইলা না। তুমরার মাবুদ আল্লার জবান মাফিক স্বয়ং মাবুদউ অইলা তারার মিরাস।)

¹⁰হজরত মুছায় তারারে কইলা, “আগর বারর লাখান ইবারও আমি চাল্লিশ দিন চাল্লিশ রাইত তুর পাড়র উপরে আছলাম, ইবারও মাবুদে আমার ফরিয়াদ কবুল করলা, তাইন তুমরারে বিনাশ করা বাদ দিলাইলা। ¹¹বাদে মাবুদে আমারে কইলা, তুমি উঠো, উঠিয়া আগেদি আগুয়ানির লাগি অতা মানষরে জুইত করিয়া তারার আগ অইয়া রওয়ানা দেও, আমি তারার ময়-মুরব্বি অকলর গেছে যে দেশ দিবার লাগি কছম খাইয়া ওয়াদা করছি, তারা হউ দেশো গিয়া ইতা দখল করউক।

আল্লার আশিক অইয়া তান হুকুম-আহকাম মানো

¹²“ও বনি ইছরাইল, হুনো, তুমরার মাবুদ আল্লায় তুমরার গেছে কিতা চাইন। তাইন চাইরা, তুমরা খালি তান ডর-খফ ভিতরে রাখো, তান পথে চলো, তানরে মহব্বত করো, তুমরার আস্তা দিল-মন দিয়া তান এবাদত-বন্দেগি করো। ¹³আর তুমরার ভালাইর লাগি আইজ আমি তুমরারে মাবুদর যে হুকুম-আহকাম আর শরিয়ত দিরাম, ইতা পুরাপুর আমল করো।

¹⁴“জানো তো, আছমান আর আছমানি হক্কলতা, জমিন আর জমিনর তামাম ছামানা তো তুমরার মাবুদ আল্লার। ¹⁵তা-ও তুমরার ময়-মুরব্বির বায় তান টান থাকায়, তাইন এরারে মহব্বত করতা। তারার বাদে তারার আওলাদ অকলরে মানি, অখনকুর জমানার দুনিয়ার হকল জাতির মাজ থাকি খালি তুমরারে পছন্দ করছইন। ¹⁶এরলাগি তুমরার যারযির দিলর মছলমানি করাও, গাড়তেড়া নাফরমান বনিয়া রইও না। ¹⁷মনো রাখিও, তুমরার মাবুদ আল্লা তো হকল দেব-দেবীর উপরে, মুনিব অকলর মুনিব, তাইনউ মহান, বলবান আর ডর-খফ পয়দা কররা আল্লা। তাইন কুনু পক্ষপাতি করইন না, ঘুষ খাইন না। ¹⁸এতিম অকল আর ড়াড়ি বেটিন্তর বায় হক ইনছাফ করইন, আর তুমরার লগে বসত কররা ভিন-দেশি অকলরে খাওয়া-ফিন্দার হকলতা দিয়া তান মহব্বতর পরমান দেখাইন। ¹⁹আগে তো মিসর দেশো তুমরাও অলা ভিন-দেশি আছলায়, এরলাগি ভিন-দেশি মানষরে তুমরা মায়া-মহব্বত করিও। ²⁰তুমরা নিজর মাবুদ আল্লারে ডরাইয়া চলিও, তান এবাদত-বন্দেগি করিও, তান আশিক বনিয়া রইও, আর খালি তান নামে কছম খাইও। ²¹তাইনউ তুমরার তারিফর খুটি, তাইনউ তুমরার আল্লা। তুমরা নিজর চউখে যতো আচানক তাইজ্জুবি আর বেজুইতা কুদরতি কাম দেখছো, ইতা হক্কলতা তো তুমরার লাগি তাইনউ করছইন। ²²তুমরার যেতা ময়-মুরব্বি মিসর দেশো গেছলা, এরা আছলা মোট সত্তইর জন, আর অখন তুমরার মাবুদ আল্লায় তুমরারে আছমানর তেরার লাখান করছইন, যেতা গনিয়া ফুড়াইল যায় না।

¹“এরলাগি, ও বনি ইছরাইল, তুমরা নিজর মাবুদ আল্লারে মহব্বত করিও, আর তান মর্জি যুগাইয়া চলিও, তান দেওয়া শরিয়ত, হকল নিয়ম-কানুন, হুকুম-আহকাম হর-হামেশা মানিও। ²তুমরা অখন মনো রাখিও, ইতা আমি তুমরার হুরুতাইন্তরে না কইয়া খালি তুমরার গেছে কইয়ার, তারা তো তুমরার মাবুদ আল্লার হেদায়ত দেখছে না, ইতা চিনেও না। তুমরার গেছে তান আপন মহিমা, তান কুদরতি আতর বাহাদুরি, ³আর মিসরর বাদশা ফেরাউনর উপরে, তার আস্তা দেশর উপরে তাইন যতো নমুনার কুদরতি লিলা-খেলা দেখাইছইন ইতা তো তারা দেখছে না। ⁴তারা মিসরর সিপাই দল, ইতার ঘোড়া, ঘোড়ার গাড়িন আর ইতারে তাইন কিলা নীল দরিয়াত বুড়াইয়া মারিয়া এক্কেরে বিনাশ করছইন, ইতাও তো দেখছে না, ⁵অউ জাগাত আইয়া তুমরা পৌছিবার আগে মরুভুমির মাজে তাইন তুমরার উপরে যততা ঘটাইছইন, তুমরার হুরুতাইন্তে ইতাও দেখছে না। ⁶তাইন রুবেন খান্দানর ইলিয়াবর পুয়া দাথন আর আবিরামরে যে সাজা দিছইন মানি, দুনিয়ার মাটি ফাটিয়া আ করিয়া আস্তা বনি ইছরাইলর মাজখান থাকি তারারে গিলিলিলো, তারার বউ-বাইচ্চাইন সুদ্দা আস্তা পরিবার, তারার ঘর-দুয়ার, আর হেমান-জানুয়ার সহ হকল মাল-ছামানা মাটির তলে হামাইগেল, ইতাও এরা দেখছে না। ⁷অইলে তুমরা নিজর চউখে মাবুদর হকল কুদরতি লিলা-খেলা দেখছো।

আল্লার হুকুম-আহকাম মানলে দেশর লাভ

⁸“তে অখন আমি তুমরারে যেলা হুকুম দিরাম, তুমরা ইতা হক্কলতা মানিও, তেউ জর্দান গাং পার অইয়া যে দেশ দখলর লাগি যাইরায়, তুমরা বলআলা বনিয়া হনর দখলদারি পাইবায়। ⁹মাবুদে তুমরার ময়-মুরব্বি অকলরে আর তারার আওলাদ অকলরে যে দেশ দিবার লাগি কছম খাইছলা, দুধ আর মউর ভান্ডার আলা হউ আরামর দেশো তুমরার হায়াতি লাম্বা অইবো। ¹⁰ই দেশখান তো হউ মিসর দেশর লাখান নায় যেখান থাকি তুমরা বার অইয়া আইছো, মনো অর নি, হাগ-তরকারির খেতো যেলা পানি দেইন, হউ দেশো বিচি বাইন দিয়া হারলে তুমরা পাওর নাওড়া দিয়া অলা পানি হিচিতায়? ¹¹অইলে গাং পার অইয়া যে দেশ তুমরা দখল করাত যাইরায়, ই দেশো পাড়িয়া তল জাগা আর পাড়-পর্বতে ভরা, ই জমিনে আল্লার দেওয়া মেঘর পানি খায়। ¹²তুমরার মাবুদ আল্লায় ই দেশর খিয়াল রাখইন। বছরর পয়লা থাকি হেশ পর্যন্ত তান দয়ার নজর থাকে ই জমিনর উপরে।

¹³“তে আমি আইজ তুমরারে যেলা হুকুম দিয়ার, ইতা তুমরা খুব খিয়ালি অইয়া মানিও, তুমরার মাবুদ আল্লারে মহব্বত করিও, আর পুরাপুর দিলে-জানে তান এবাদত-বন্দেগি করিও। ¹⁴তেউ মাবুদে জরুর মাফিক বছরর পয়লা আর শেষেও রহমতি মেঘ দিয়া, তুমরার খেতর ফসল, আংগুরর রস, জয়তুনর তেল হক্কলতা যুগান দিবা। ¹⁵তুমরার পশুর পালর লাগি জমিনো ঘাস দিবা, তুমরা তুষ্ট অইয়া খানি-পানি খাইবায়।

¹⁶“তা-ও তুমরা হুশিয়ার রইও, আরনায় তুমরার মন কু-পথে যাইবোগি, আর তুমরা বে-পথি বনিয়া দেব-দেবীর পুজা করবায়, ইতারে ভক্তি করবায়। ¹⁷ইলা করলে তুমরার উপরে মাবুদর গুছার আগুইন গরম অইবো, তাইন আছমানর রহমতি দুয়ার বন্দ করিলিবা, তেউ মেঘ-পানি বন্দ অইয়া জমিনো আর ফসল ফলিতো নায়, আর মাবুদে তুমরারে যে দেশ দান কররা, হউ আরামর দেশ থাকি তুমরারে জলদি করি ফুছিয়া ফালাইল অইবো। ¹⁸এরলাগি তুমরার মনর মাজে, তুমরার দিলর ভিতরে আমার অউ হুকুম খান গাথিয়া রাখিও, তুমরার দুইও আতো ইতা নিশানা হিসাবে বান্দিয়া থইও, আর কপালর মাজেও লাগাইও। ¹⁹তুমরার হুরুতাইন্তরেও ইতা হক্কলতা তালিম দিও। তুমরা ঘরো রওয়ার সময়, পথে-ঘাটে আটিবার সময়, হুতিবার সময় আর হুতনো থাকি উঠিয়া হারলে হামেশা অতা বেয়াপারে বাতচিত করিও। ²⁰ইতা লেখিয়া তুমরার বাড়ির গেইটো আর দুয়ারর চৌকাঠো লাগাইও। ²¹ইতা মানলে মাবুদে তুমরার ময়-মুরব্বির গেছে যে দেশ দিবার কছম খাইছলা, হউ দেশো তুমরা আর তুমরার আওলাদর হায়াতি অতদিন রইবো, যতদিন ই দুনিয়ার উপরে আছমান রইবো।

²²“আইজ আমি তুমরারে যেতা হুকুম-আহকাম দিয়ার, তুমরা যুদি খুব খিয়ালি অইয়া ইতা মানো, তুমরার মাবুদ আল্লারে মহব্বত করো, তান বাতাইল পথে চলো আর তান আশিক বনিয়া রও, ²³তে মাবুদে তুমরার ছামনে থাকি হউ দেশর হকল জাতিরে বার করি দিবা, তেউ তুমরা নিজর থাকি আরো বড় বড় আর বলআলা জাতিরে খেদাইয়া হনর দখলদারি পাইবায়। ²⁴তুমরার পাওদি যেতা জাগার উপরে আটিবায়, ইতা হকল জাগা তুমরার দখলো আইবো। দউকনর মরুভুমি থাকি লেবানন পর্যন্ত, ফোরাত গাং থাকি পইচমর দরিয়া পর্যন্ত দখলদারি পাইবায়। ²⁵কুনু বেটা তুমরার ছামনে উবানির তাক্কত অইতো নায়, তুমরা হউ দেশর যেখানো যাইবায়, অখানর মানষেউ তুমরারে ডরাইবা, তারার ভিতরে কাপিবো, ইতা তুমরার মাবুদ আল্লায় তান নিজর ওয়াদা মাফিকউ করাইবা।

²⁶“হুনো, আইজ আমি তুমরার ছামনে রহমত আর লান্নত দুইওতা দেখাইলাম। ²⁷আমি অখন তুমরারে যেলা হুকুম দিলাম, তুমরার মাবুদ আল্লার অউ হুকুম-আহকাম যুদি তুমরা মানো, তে তুমরা অউ রহমত পাইবায়। ²⁸আর ইতা না মানিয়া তুমরা যুদি তুমরার মাবুদ আল্লার হুকুমর উল্টা চলো, ই পথ থাকি হরিয়া কুনু দেব-দেবীর খরে খরে যাও, তে তুমরা লান্নতি অইবায়।

²⁹“তুমরা যে দেশ দখল করার লাগি যাইরায়, তুমরার মাবুদ আল্লায় যেবলা তুমরারে হউ দেশো নিয়া হারাইবা, হারাইয়া হারলে তুমরা অউ রহমতর কথা গরিছিম পাড়র উপরে উঠিয়া এলান করবায়, আর অউ লান্নতর কথা এলান করবায় ইবাল পাড়র উপরে উঠিয়া। ³⁰তুমরা তো চিনো, জর্দান গাং পার অইয়া পথর পইচমেদি গিলগলর ধারো অউ দুইও পাড় আছে, আরাবা নামর তল জাগার বাসিন্দা কেনানী অকলর দেশর মোরির এলন বনর কান্দার অউ দুইও পাড় চিনো না নি? ³¹মনো রাখিও, তুমরার মাবুদ আল্লায় তুমরারে যে দেশর দখলদারি দিরা, জর্দান গাং পার অইয়া হউ দেশো হামাইয়া হারি তুমরা যেবলা হনো বসত করবায়, ³²হউ সময় তুমরা অউ হুকুম-আহকাম আর নিয়ম-কানুন খুব খিয়াল করিয়া আমল করিও, যেতা অখন তুমরারে কইলাম।

খাছ এবাদত খানা বানানি

¹“ও বনি ইছরাইল, তুমরার ময়-মুরব্বির মাবুদ আল্লায় তুমরারে যে দেশর দখলদারি দিছইন, হউ দেশো গিয়া আমার বাতাইল অউ হুকুম-আহকাম আর নিয়ম-কানুন হর-হামেশা মানিয়া চলিও। ²হনর যতো জাতিরে খেদাইয়া হারি তুমরা দখলদারি পাইরায়, তারার হুরু-বড় হকল পাড়-পর্বতর উপরে, ডালপালা মেলাইল তরতাজা হকল গাছর তলে তারা যেতা দেব-দেবীর পুজা করইন, তুমরা ইতা দেব-দেবীর আস্তানা ভাংগিয়া এক্কেবারে চুরমার করিলাইও। ³তারার হকল বলি খানা ভাংগিলিও, পুজার পাথর অকল চুরমার করিও, আশেরা-দেবীর নিশানা খুটি অকল আগুইনদি জালাইলিও, তারার বানাইল মুর্তি অকল ভাংগিলিও, ইতার নাম হি জমিন থাকি পুরাপুর ফুছিয়া ফালাইও।

⁴“আর তারার দেব-দেবীর পুজার নমুনায় তুমরার মাবুদ আল্লার এবাদত-বন্দেগি করিও না। ⁵অইলে তুমরার মাবুদ আল্লায় তুমরারে দিদার-দরশন দিবার খিয়ালে, তান নিজর বসত খানা হিসাবে, তুমরার হকল খান্দানরে দেওয়া জাগা থাকি, তাইন যে জাগারে পছন্দ করবা, তুমরা তান এবাদতির লাগি হউ জাগাত আজির অইও। ⁶তুমরা যারযির জালাইল কুরবানি, হকল জাতর পশু কুরবানি, হকল রুজি-রুজগারর দশ বাটর এক বাট, লিল্লা-ছদগা, মান্নতর কুরবানি, দান-খয়রাত আর তুমরার পশুর পয়লা বাইচ্চারে অউ জাগাত আনিও। ⁷অখানো তুমরার পরিবারর হকলরে লইয়া, তুমরার মাবুদ আল্লার ছামনে খানা-পিনা করিও, আর তান রহম-বরকত পাওয়া হকল লাখান কামাই-রুজগারর লাগি খুশি-বাসি করিও।

⁸“আর অখন আমরা যেলা যেমনে খুশি অমনেউ চলরাম, হনো গিয়া হারলে তুমরা ইলা করিও না। ⁹তুমরা সুখ-শান্তিয়ে বসত করার লাগি তুমরার মাবুদ আল্লায় যে জাগার দখলদারি দিরা, তুমরা তো অখনও হিনো গেছো না। ¹⁰তা-ও তুমরা যেবলা জর্দান গাং পার অইয়া, তুমরার মাবুদ আল্লার দেওয়া দেশো গিয়া বসতি করবায়, হউ সময় মাবুদে তুমরার চাইরো গালার দুশমনর আত থাকি শান্তি দিয়া হারলে, ¹¹তাইন নিজর বায়তুল্লা শরিফ হিসাবে যে জাগারে পছন্দ করবা, হউ জাগাত তুমরা আমার বাতাইল হকলতা লইয়া আজির অইও। তুমরার জালাইল কুরবানি, হকল জাতর কুরবানির পশু, হকল রুজি-রুজগারর দশ বাটর এক বাট, লিল্লা-ছদগা, দান-খয়রাত আর হকল নমুনার মান্নতর কুরবানি লইয়া অনো আইও। ¹²আইয়া তুমরার মাবুদ আল্লার ছামনে তুমরা নিজে, তুমরার পুয়া-পুড়িন, তুমরার বান্দি-গুলাম, তুমরার গাউ আর টাউনর লেবি খান্দানর মানুষ অকল, যেরা তুমরার লাখান কুনু জাগা-জমি পাইছে না, তুমরা হকলে মিলিয়া খুশি-বাসি করিও। ¹³আর খুব হুশিয়ার রইও, তুমরা নিজর পছন্দ মত যেছা জাগাত জালাইল কুরবানি দিও না। ¹⁴বরং তুমরার খান্দান অকলরে দেওয়া জমিন থাকি তাইন যে খান্দানর জাগা পছন্দ করবা, খালি হউ জাগাত জালাইল কুরবানি আদায় করিও, আর হউ জাগার লাগি আমার বাতাইল হকল কাম-কাজ করিও।

¹⁵“তা-ও তুমরার মনর শখ অইলে পাক-নাপাক হালতেও হকলেউ যেকুনু জাতর জংলি অরিনর গোস্ত খাওয়া যেলা জাইজ আছে, অলা তুমরার মাবুদ আল্লার রহম-বরকতে পাওয়া পশুরে জবো করিয়া, তুমরার এলাকার গাউ বা টাউনো খাইতায় পারবায়। ¹⁶খালি তুমরা কুনু লউ খাইও না, লউরে পানির নমুনায় মাটিত ঢালি দিবায়।

¹⁷“তুমরার হকল জাতর ফয়-ফসলর, আংগুরর শরবতর আর তেলর দশ বাটর এক বাট, তুমরার গরু-ছাগলর পয়লা বাইচ্চা, তুমরার মান্নতর হকলতা, তুমরার লিল্লা-ছদগা, দান-খয়রাত, ইতা কুন্তাউ তুমরার বসতি এলাকার কুনু গাউত বা টাউনো খাইও না। ¹⁸ইতা খালি তুমরার মাবুদ আল্লার পছন্দ করা জাগাত নিয়া তান ছামনে খাইও। তুমরা নিজে, তুমরার পুয়া-পুড়িন, তুমরার গুলাম-বান্দি, আর তুমরার গাউ বা টাউনর লেবি খান্দানর মানষে খাইবা। তুমরার হকল নমুনার কাম-কাজর মাজে নিজর মাবুদ আল্লার ছামনে খুশি-বাসি করিও। ¹⁹তা-ও তুমরার দেশো যতদিন বসত করবায়, অতদিন লেবি খান্দানর মানষর উপরে খিয়াল-নজর রাখিও।

²⁰“তুমরার মাবুদ আল্লায় তান ওয়াদা মাফিক তুমরার দেশর সীমানা বাড়াইয়া হারলে, তুমরা যেবলা গোস্ত খাইবার নিয়তে কইবায়, গোস্ত খাইতাম মনে চার, হউ সময় তুমরার মনর শখ মিটাইয়া গোস্ত খাইও। ²¹তুমরার মাবুদ আল্লায় বায়তুল্লা শরিফ হিসাবে যে জাগা পছন্দ করবা, হি জাগা যুদি তুমরার বসত খানা থাকি বাক্কা দুরই অয়, তে তুমরা আমার বাতাইল হুকুম মাফিক তুমরার মাবুদর দেওয়া গরু-ছাগলর পাল থাকি পশু নিয়া জবো করিও, আর যারযির গাউ বা টাউনো নিজর খুশিয়ে গোস্ত খাইও। ²²শিকারর জংলি অরিনর গোস্তর লাখান তুমরা ইতা খাইও, পাক-নাপাক হালতে হকলেউ খাইও। ²³অইলে হুশিয়ার রইও, লউ খাইও না, লউ অইলোগি জান, তুমরা গোস্তর লগে জান খাইও না। ²⁴তুমরা কুনুমন্তেউ লউ খাইও না, ইতারে পানির নমুনায় মাটিত ঢালি দিও। ²⁵তুমরা লউ খাইও না, মাবুদর নজরো যেকটা সঠিক, অকটা আমল করলে তুমরা আর তুমরার ভবিষ্যত আওলাদ অকলর ভালাই অইবো।

²⁶“মাবুদর পছন্দ করা জাগাত তুমরার পাক-পবিত্র জিনিস আর মান্নতর জিনিস লইয়া যাইও। ²⁷তুমরার মাবুদ আল্লার কুরবানি খানার উপরে তুমরার জালাইল কুরবানির গোস্ত আর লউ জালাইও। অইলে তুমরার অন্য হকল কুরবানির লউ কুরবানি খানার মাজে ঢালিও আর ই কুরবানির গোস্ত তুমরা খাইও। ²⁸তুমরা আর তুমরার ভবিষ্যত আওলাদ অকলর যাতে হর-হামেশা আয়-উন্নতি অয়, অতার লাগি তুমরা আমার বাতাইল অউ হুকুম খানাইন যতন করি মানিও, ইলা চললে তুমরা আল্লা মাবুদর নজরো যেতা সঠিক আর ভালা, অটাউ তুমরা করবায়।

²⁹“তুমরা যতো জাতিরে বে-দখল করবায়, তারারে তুমরার মাবুদ আল্লায় তুমরার ছামন থাকি খেদাইয়া হারলে, তুমরা যেবলা হউ দেশর দখলদারি পাইয়া হনো বসত করবায়, ³⁰হউ সময় তুমরা হুশিয়ার রইও, আরনায় তুমরাও তারার ফান্দো পড়িয়া তারার দেবতার ভজনা করিয়া যুদি কও, অতা মানষে যেলা তারার দেব-দেবীর পুজা করইন, আমরাও অলা তারার লাখান পুজা করতাম। ³¹খবরদার! তুমরার মাবুদ আল্লার এবাদত-বন্দেগি তারার পুজার নমুনায় করিও না। তারা তো যারযির দেব-দেবীর নামে মাবুদর নাপছন্দর হকল নমুনার আকাম-কুকাম করে, এমনকি তারার দেব-দেবীর নামে নিজর পুয়া-পুড়িনরে আগুনিত জালাইয়া বলি দিলায়।

³²“তে আমি তুমরারে যেতা হুকুম-আহকাম জানাইলাম, তুমরা খালি অতাউ মানিও। ইতার লগে দুছরা কুন্তা বাড়াইও না, আর কুন্তা বাদও দিও না।

ভন্ড পীর-দরবেশ আর মুর্তি পুজাকারীর বিচার

¹“অখন তুমরার মাজর কুনু পীর-দরবেশে বা ইস্তেখারা কররায় কুন্তা ঘটিবো কইয়া যুদি আগাম খবর জানায়, আর কুনু কেরামতির কথা কয়, ²কওয়ার বাদে হাছাউ যুদি অলা ফলি যায়, আর অউ জনেউ কুনু দেব-দেবীর কথা হুনাইয়া তুমরারে কয়, চলো, আমরা গিয়া হউ দেবতার পুজা করি, ³তে তুমরা অউ পীর-দরবেশ বা ইস্তেখারা কররার কথা মানিও না। মনো রাখিও, তুমরা জানে-পরানে তুমরার মাবুদ আল্লারে মহব্বত কররায় কি না, অউখান যাচাই করার লাগি তুমরার মাবুদ আল্লায় তুমরারে পরিক্ষা করইন। ⁴তুমরা নিজর মাবুদ আল্লার হুকুম মাফিক চলিও, খালি তানরেউ ডরাইও, তান হুকুম-আহকাম মানিও, তান কালাম হুনিয়া আমল করিও, তান এবাদত-বন্দেগি করিও, আর তান আশিক বনিয়া রইও। ⁵এরলাগি হউ ভন্ড পীর-দরবেশ বা ইস্তেখারা কররারে জানে মারি লাইও। মনো রাখিও, তুমরার যে আল্লা মাবুদে তুমরারে মিসর দেশ থাকি বার করিয়া আনছইন, গুলামি থাকি তুমরারে আজাদ করছইন, অউ ভন্ডয় তো তুমরারে হউ মাবুদর বিরুদ্ধে নাফরমানির লাগি টানের, তুমরার মাবুদ আল্লার বাতাইল পথ থাকি বে-পথি বানাইতো চার। এরলাগি তুমরার মাজ থাকি অউ খারাপিরে বিনাশ করিলাইবায়।

⁶“অখন তুমরার আপন ভাই, তুমরার নিজর পুয়া বা পুড়ি, তুমরার জানর টুকরা বউ, বা তুমরার মায়ার বন্ধু আইয়া যুদি নিরালায় কয়, চলো, আমরা গিয়া দেব-দেবীর ভজনা করি। ইতা দেবতাইন তুমার বা তুমার বাফ-দাদার অচিনা, ⁷তুমার আশ-পাশ এলাকার বা দুরইর দেশর কুনু দেবতা অউক, দুনিয়ার এক সীমানা থাকি আরেক সীমানার যেকুনু জাতির যেকুনু দেবতা অউক, ⁸হে যুদি তুমারে হনো নিতো চায়, তে তুমি যাইও না, তার কথা হুনিও না, তারে দয়া দেখাইও না, তার জান বাচাইও না, আর লুকানির জাগা দিও না। ⁹তারে নিচ্চিত জানে মারিলাইও। জানে মারি লাওয়ার লাগি পয়লা তুমার নিজর আতদি শুরু করো, বাদে হকলে আইয়া শরিক অইবা। ¹⁰অগুরে পাত্বরদি ইটাইয়া জানে মারিলিও, হে তো তুমারে হউ আল্লা মাবুদর এবাদতি থাকি হরাইয়া কু-পথে নিতো চার, যেইন তুমারে মিসর দেশর গুলামি থাকি আজাদ করিয়া আনছইন। ¹¹অগুরে মারি লাওয়ার খবর হুনিয়া হকল বনি ইছরাইলে ডরাইবা, এরবাদে ইলা নাফরমানি করার সাওস আর কেউরর অইতো নায়।

¹²“তুমরার মাবুদ আল্লায় তুমরার বসত খানার লাগি যে গাউ আর টাউন অকল দান কররা, ইতা কুনু জাগার বেয়াপারে তুমরা যুদি হুনো, ¹³হনর বনি ইছরাইলর মাজর কুনু নাফরমানর দল বার অইয়া, হউ জাগার মানষরে বে-পথে নিবার লাগি কর, চলো, আমরা গিয়া নয়া নয়া দেব-দেবীর পুজা করি। ¹⁴তে তুমরা খুব ভালামন্তে খুজ-খবর লইও আর তদন্ত করিও। তদন্ত করিয়া যুদি ইতা জঘন্য কামর পরমান মিলে, ¹⁵তে হনর হকল বাসিন্দারে জানে মারিলিও। হউ গাউ বা টাউনর হকল মানুষ আর পশু-পংকিরে তলোয়ারদি কাটিলিও। ¹⁶হিন থাকি আনা হকল মাল-ছামানা বন্দর মাজে নিয়া জালাইলিও। হউ আস্তা গাউরে বা টাউনরেও জালাইল কুরবানির লাখান জালাইয়া ছালি করিও। হউ জাগারে চিরকালর লাগি বিনাশ করিও, কেউ যানু কুনুদিন হিনো কুন্তা বানাইতো না পারে। ¹⁷মাবুদর বেজুইতা গুছা থাকি রেহাই পাওয়ার লাগি, হনর কুনু মাল-ছামানা যানু তুমরার গেছে না রয়, ইতা তো লান্নতি মাল। তেউ মাবুদে তুমরারে রহম-বরকত, আর দয়া-মায়া করবা, তুমরার বাফ-দাদার লগর ওয়াদা মাফিক তাইন তুমরার আওলাদ-ওয়ারিশ বাড়াইবা। ¹⁸খালি আইজ আমি তুমরারে যেতা হুকুম-আহকাম জানাইয়ার, অতা হকলতা মানিও, আল্লা মাবুদর খুশি মাফিক চলিয়া তুমরার জিন্দেগি কাটাইও।

হালাল হারাম খানি

¹“তুমরা তো তুমরার মাবুদ আল্লার খাছ প্রজা। এরলাগি তুমরা কুনু মুর্দার লাগি কান্দা-কাটি বা আহাজারি করাত গিয়া, নিজর শরিলরে কাটা-চিরা করিও না, আর মাথার ছামনর গালার চুল কামাইও না। ²মনো রাখিও, তুমরা অইলায় নিজর মাবুদ আল্লার খাছ পবিত্র জাতি। দুনিয়ার হকল জাতির মাজ থাকি, মাবুদে তান খাছ প্রজা আর তান নিজর সম্পদ হিসাবে তুমরারে আলগ করছইন।

³“তে কুনুজাত নফরতি খানি তুমরা খাইও না। ⁴অউ লাখান পশুর গোস্ত খাইতায় পারবায়: গরু, মেড়া, ছাগল, ইতা তো হালাল। ⁵আর অরিন, মায়া-অরিন, চিতরা-অরিন, জংলি ছাগল, লাম্বা হিংগি রাম-ছাগল, পিছনে ধলা অরিন আর পাড়িয়া মেড়া খাইও। ⁶যেতা পশুর খুরা পুরাপুর দুই অংশ লাখান চিরা, আর যেতা পশুইন্তে খানিরে পাজাইন, ইতার গোস্ত জাইজ। ⁷অইলে যেতা পশুর খালি খুরা চিরা, বা যেতা পশুইন্তে খালি খানিরে পাজাইন, অতা পশুর গোস্ত তুমরা খাইও না। তে তুমরা উট, খরগুশ বা শাফন-উন্দুরর গোস্ত খাইও না, ইতায় খানিরে পাজাইন অইলে ইতার খুরা চিরা নায়, এরলাগি হারাম। ⁸আর শুয়রর গোস্তও হারাম, ইতার খুরা চিরা অইলেও ইতায় খানিরে পাজাইন না। ইতা পশু অকলর মরা লাশ ধরা-ছোয়াও নাজাইজ।

⁹“পানির মাজে বসত কররা যেতা জানদারর ফইর আর ডাখনা আছে, ইতা তুমরার লাগি হালাল। ¹⁰অইলে যেতার ফইর আর ডাখনা নাই, ইতা নাজাইজ। ইতা তুমরার লাগি হারাম।

¹¹“হকল জাতর পাক-পবিত্র পাখি তুমরার লাগি হালাল। ¹²অইলে বড় চিল, হকুন, হাফ-খাউরি, ¹³হকল জাতর চিল, ¹⁴হকল জাত কাউয়া, ¹⁵উটপাখি, নিম পাখি, গাংচিল, হকল নমুনার বাজ পাখি, ¹⁶হকল জাত পেচা, হকল জাতর কুড়া, ¹⁷ছলা-কাক, বলুয়া পাখি, পানি-খাউরি, ¹⁸হকল জাতর জাটিয়া, হকল জাতর বগলা, মন-চুরা পাখি আর বাদুর তুমরার লাগি হারাম।

¹⁹“আর ডাখনা আলা হকল জাতর পুক-জুক, যেতায় ঠেং দিয়া আটইন, ইতা তুমরার লাগি হারাম, ইতা তো নাপাক। ²⁰অইলে ডাখনা আলা হকল জাতর পাক-পবিত্র ফরিং তুমরার লাগি হালাল।

²¹“তুমরা অইলায় তো তুমরার মাবুদর নামে একটা পাক-পবিত্র জাতি, এরলাগি অমনে অমনে মরি যাওয়া কুনু জীব-জানুয়ারর গোস্ত তুমরা খাইও না, ইতা তুমরার লাগি হারাম। অইলে তুমরার গাউত বা টাউনো বসত কররা দুছরা যেকুনু জাতির মানষরে ইতা খাবাইতায় পারবায়, ভিন জাতির গেছে বেচতায়ও পারবায়।

“আর হুনো, তুমরা বকরির বাইচ্চারে তার মাʼর দুধ দিয়া রান্দিও না।

যকাত দিবার নিয়ম-কানুন

²²“পরতেক বছর তুমরার জমিনো যেতা ফয়-ফসল পাও, ইতার দশ বাটর এক বাট আতরা করি থইও। ²³আর তুমরার মাবুদে তান বায়তুল্লা শরিফ হিসাবে যে জাগারে পছন্দ করবা, হউ জাগাত অতা লইয়া আইও। তুমরার খেতর ফসল, আংগুরর শরবত, জয়তুনর তেলর দশ বাটর এক বাট আনিও। ইতা ফসলর লগে তুমরার পালা গরু-ছাগলর পয়লা বাইচ্চারে জবো করিয়া হক্কলতা মাবুদর ছামনে খাইও, অউ লাখান তুমরা হামেশা নিজর মাবুদ আল্লারে ডরাইয়া চলা হিকিও। ²⁴অইলে তুমরার মাবুদ আল্লার পছন্দ করা জাগা যুদি বাক্কা দুরই অয়, আর মাবুদর রহম-বরকতে পাওয়া অউ ছামানা লইয়া হিনো যাইতায় না পারো, ²⁵তে অউ ছামানা বেচিয়া ইতার টেকা লইয়া তুমরার মাবুদ আল্লার পছন্দ করা হউ জাগাত যাইও। ²⁶গিয়া অউ টেকাদি তুমরার খুশি মাফিক গরু-ছাগল, আংগুরর শরবত, তাড়ি, বা তুমরার পছন্দর যেকুনুতা কিনিলাইও। বাদে পরিবারর হকলরে লইয়া ইতা খানি-দানি খাইয়া হারি, আল্লা মাবুদর ছামনে খুশি-বাসি করিও। ²⁷অউ সময় তুমরার গাউ বা টাউনো বসত কররা লেবি খান্দানর মানষরে ফাউরিও না। কারন তুমরার তো জাগা-জমিন আছে, অইলে তারার ইতা কুন্তা নাই।

²⁸“পরতেক তিন বছর বাদে বাদে তুমরার খেতর ফসলর দশ বাটর এক বাট আনিয়া টাউনো দলা করিও। ²⁹তেউ লেবি খান্দানর মানষে, যেরা জাগা-জমিন বা ধন-ছামানার বাট পাইছে না এরা, আর বিদেশি মুছাফির অকলে, এতিম অকলে, ড়াড়ি বেটিন্তে ইতা পেট ভরিয়া খাইবা। আর তুমরার মাবুদ আল্লায় তুমরার হকল কামর মাজে রহম-বরকত দিবা।

আওলাত মাফ করার হুকুম

¹“তুমরার হকল জাতর পাওনা পরতেক সাত বরছ বাদে বাদে মাফ করি দিও। ²ইতা অউ লাখান মাফি দিও, বনি ইছরাইলর মাজে পরতেকে একে-অইন্যর পাওনারে মাফি দিও। মাবুদে হুকুম দিছইন পাওনা মাফি দিবার লাগি, এরলাগি আর কুনু পাওনা দাবি করিও না। ³ভিন জাতির মানষর গেছর পাওনা দাবি বওয়াল থাকতো পারে, অইলে নিজর জাতির ভাইর গেছে হকল জাতর পাওনা মাফ করি দিও। ⁴আসলে তুমরার মাবুদ আল্লায় তুমরারে যে দেশর দখলদারি দিরা, হউ জমিনো তাইন নিচ্চিত তুমরারে রহম-বরকত দিবা, এরলাগি তুমরার মাজে কেউ গরিব রওয়ার কথা নায়। ⁵তাইন তো ইলা রহম-বরকত দিবা তুমরা মাবুদ আল্লারে খুশি করার খিয়ালে আইজ আমার বাতাইল ইতা হুকুম অকল খালি তুমরা যুদি পুরাপুর মানিয়া চলো। ⁶তুমরার মাবুদ আল্লায় তান ওয়াদা মাফিক যে সময় রহম-বরকত দিবা, অউ সময় তুমরা বউত জাতিরে আওলাত দিবায়, অইলে তুমরার আওলাত করার কুনু দরকার অইতো নায়। আর তুমরা হকল জাতির উপরে রাজত্ব করবায়, অইলে তুমরার উপরে কেউ রাজত্ব করতো নায়।

⁷“তুমরার মাবুদ আল্লায় তুমরারে যে দেশ দিরা, হউ দেশর কুনুখানো তুমরার ভাইয়াইন্তর মাজে কেউ যুদি গরিব অয়, তে তার বায় তুমরার দিল পাষান করিও না, তার লাগি তুমরার আত মুইট করিয়া রাখিও না। ⁸আত খুলা রাখিয়া তার জরুর বুজিয়া আওলাত দিও। ⁹হুশিয়ার রইও, সাত নম্বর বছর মানি, আওলাত মাফির বছর কান্দাত আইচ্চে দেখিয়া মনর কু-মতলবে তুমরার অভাবি ভাইরে খালি আতে ফিরাই দিও না, আরনায় হে মাবুদর দরবারো ফরিয়াদ করলে তুমরা গুনার ভাগি অইবায়। ¹⁰মনর মাজে কুনুজাত বেজারি না আনিয়া তারে দিও, তেউ তুমরার মাবুদ আল্লায় তুমরার হকল কামো রহম-বরকত দিবা, তুমরা যে কামো আত দিবায়, অউ কামোউ রহম-বরকত পাইবায়। ¹¹দেশর মাজে তো হর-হামেশা গরিব মানুষ রইবা, এরলাগি আমি তুমরারে অউ হুকুম দিরাম, তুমরার ভাইয়াইন্তর বায়, দেশর গরিব-দুখি, অভাবি মানষর বায় নিজর আত খুলা রাখিও।

গুলাম-বান্দিরে আজাদ করার হুকুম

¹²“তুমরার সমাজর কুনু ইবরানি বেটা বা বেটিয়ে যুদি নিজরে তুমরার গেছে বেচি লায়, তে ছয় বরছ কাম করানির বাদে সাত নম্বর বরছ আরম্ভ অওয়ার কালো তারে আজাদ করি দিও। ¹³আজাদ করবার কালো তারে খালি আতে বিদায় দিও না। ¹⁴তুমরা তারে খুলা আতে তুমরার পালো থাকি মেড়া-ছাগল, খেত-খামার থাকি ফসল আর আংগুর মাড়ার জাগা থাকি আংগুরর শরবত দিও। তুমরার মাবুদ আল্লায় তুমরারে যেলা রহম-বরকত দিছইন, তুমরাও তারে অলা করিও। ¹⁵মনো রাখিও, তুমরাও আগে মিসর দেশো গুলাম আছলায়, আর তুমরার মাবুদ আল্লায় তুমরারে আজাদ করছইন। এরলাগিউ আইজ আমি তুমরারে অলা হুকুম দিরাম।

¹⁶“অইলে হউ গুলামে তুমরার গেছে সুখ পাইয়া, তুমরার পরিবারর মানষরে ভালা পাওয়ায় যুদি কয়, তুমরার গেছ থাকি যাইতো নায়, ¹⁷তে তুমরা তার কানর লতিরে দুয়ারর কপাটো লাগাইয়া শিক দিয়া ফুড় করি দিবায়, তেউ হে জিন্দেগিভর তুমরার গুলামিত রইবো। ই হুকুম গুলাম বা বান্দির লাগি এক হমান। ¹⁸গুলাম বা বান্দিরে আজাদ করি দিতে তুমরার মনো কষ্ট আনা ঠিক নায়, হে তো ছয় বরছ ধরি বেতনদারি কামলার চাইতেও ডাবল কাম করছে। অখন তারে আজাদ করলে তুমরার মাবুদ আল্লায় তুমরার হকল কামো রহম-বরকত দিবা।

পশুর পয়লা মেদা বাইচ্চা কুরবানির নিয়ম

¹⁹“তুমরার গরু-ছাগলর পরতেক পয়লা মেদা বাইচ্চারে তুমরার মাবুদ আল্লার নামে আলগাইয়া থইও। গরুর পয়লা বাইচ্চাদি কাম-কাজ করাইও না, মেড়া-ছাগলর পয়লা বাইচ্চার রুমা কাটিও না। ²⁰ইতারে তুমরার মাবুদ আল্লার পছন্দ করা জাগাত নিয়া, পরিবারর হকলরে লইয়া তান ছামনে পরতেক বছর অতার গোস্ত খাইও। ²¹অইলে ইতার মাজে যুদি কুনু লাখান খুত থাকে, ইতা লেংড়া, আন্দা বা আরো কুনু জাতর খুত থাকে, তে ইগুরেউ তুমরার মাবুদ আল্লার নামে কুরবানি দিও না, ²²অইলে ইতা খুতআলা পশু তুমরার নিজর এলাকাত জবো করি খাইতায় পারবায়। শিকারর অরিনর লাখান জবো করিয়া পাক-নাপাক হালতে যেকুনু জনে খাইতায় পারবায়। ²³খালি লউ খাইও না, লউরে পানির লাখান মাটিত ঢালি দিও।

আজাদি ইদর নিয়ম-কানুন

¹“ও বনি ইছরাইল, আবীব মাসর চান্দো তুমরা মাবুদ আল্লার নামে আজাদি ইদ আদায় করিও। কারন অউ চান্দর একদিন তুমরার মাবুদ আল্লায় রাইতকুর বালা মিসর দেশ থাকি তুমরারে বার করিয়া আনছইন। ²তুমরার মাবুদ আল্লায় নিজর বায়তুল্লা শরিফ হিসাবে যে জাগারে পছন্দ করবা, অউ জাগাত তুমরা তান নামে গরু-ছাগলর পাল থাকি পশু নিয়া আজাদি ইদর কুরবানি দিও। ³কুরবানির পশুর গোস্ত তুমরা খামির আলা নান রুটিদি খাইও না। মিসর দেশ থাকি তাড়া-উড়া করি যেমনে খামির ছাড়া হালতে বার অইয়া আইছলায়, অখন তুমরা মিসর দেশর দুখ-মছিবতর কথা ইয়াদ করার লাগি পুরা সাত দিন তুমরা অলা খামির ছাড়া রুটি খাইও। হউ দিনরে হারা জিন্দেগিভর মনো রাখার লাগি তুমরা অলা করিও। ⁴অউ সাতো দিন তুমরার কুনু জাগাত যানু খামির আলা কুনুজাত খানি না মিলে। পয়লা দিন হাইঞ্জা বালা যে পশু কুরবানি দিবায়, ইতার গোস্ত যানু ফজরর সময় পর্যন্ত না রয়।

⁵“তুমরার মাবুদ আল্লায় তুমরারে যে টাউন অকল দান করবা, ইতা কুনু টাউনর মাজে তুমরা আজাদি ইদর কুরবানি দিও না। ⁶খালি বায়তুল্লা শরিফ হিসাবে তাইন যে জাগারে পছন্দ করবা, হউ জাগাত কুরবানি দিও। চান্দর যে তারিখো তুমরা মিসর দেশ থাকি বার অইয়া আইছলায়, পরতেক বছর অউ তারিখর হাইঞ্জা বালা তুমরা আজাদি ইদর পশু কুরবানি দিও। ⁷তুমরার মাবুদ আল্লার পছন্দ করা জাগাত কুরবানির গোস্ত রান্দিয়া খাইও। বাদে বিয়ান অইলে যারযির ঘরো ফিরিয়া যাইও। ⁸পুরা ছয় দিন তুমরা খামির ছাড়া রুটি খাইও, আর সাত নম্বর দিন তুমরা আল্লা মাবুদর নামে মিলন-মাহফিল করিও, অউ দিন কুনুজাত কাম-কাজ করিও না।

ফসল দাওয়ার ইদর নিয়ম-কানুন

⁹“খেতর ফসল কাটাত পয়লা কাচি লাগানির দিন থাকি তুমরা সাত হাপ্তা গনা শুরু করিও। ¹⁰বাদে তুমরার মাবুদ আল্লার রহম-বরকতে যত ফসল পাইছো, অতা থাকি নিজে খুশ অইয়া লিল্লা দিয়া তান নামে ফসল দাওয়ার ইদ আদায় করিও। ¹¹তুমরার মাবুদ আল্লায় বায়তুল্লা শরিফ হিসাবে যে জাগারে পছন্দ করবা, তুমরা হউ জাগাত তান ছামনে তুমরার পুয়া-পুড়িন, গুলাম-বান্দি, তুমরার লগে বসত কররা লেবি খান্দানর মানুষ, ভিন-দেশি অকল, এতিম হুরুতাইন আর ড়াড়ি বেটিন, হক্কলে মিলিয়া ইদর খুশি-বাসি করিও। ¹²তুমরা মনো রাখিও, আগে তুমরা মিসর দেশো গুলাম আছলায়, তে খুব খিয়ালি অইয়া অউ নিয়ম-কানুন আদায় করিও।

ডেরা-ঘরর ইদর নিয়ম-কানুন

¹³“তুমরার খেতর ফসল আর আংগুর মাড়ার জাগা থাকি হকলতা উগারো তুলিয়া হারলে, পুরা সাত দিন তুমরা ডেরা-ঘরর ইদ আদায় করিও। ¹⁴ইদর কালো তুমরার পুয়া-পুড়িন, গুলাম-বান্দি, তুমরার লগে বসত কররা লেবি খান্দানর মানুষ, ভিন-দেশি মুছাফির, এতিম হুরুতাইন আর ড়াড়ি বেটিন হকলে মিলিয়া খুশি-বাসি করিও। ¹⁵মাবুদর পছন্দ করা জাগাত গিয়া আল্লা মাবুদর নামে পুরা সাত দিন তুমরা অউ ইদ আদায় করিও। মাবুদে তো তুমরার হকল জাতর ফসলর মাজে, তুমরার হকল কাম-কাজো রহম-বরকত দিছইন, এরলাগি তুমরা হকলে খুশি-বাসি করবায়।

¹⁶“তুমরার মাজর হকল বেটাইন্তে তুমরার মাবুদ আল্লার পছন্দ করা জাগাত গিয়া বছরো তিন বার, তান দিদারো আজির অইও, খামির ছাড়া রুটির ইদর কালো, ফসল দাওয়ার ইদর কালো আর ডেরা-ঘরর ইদর কালো আজির অইও। খিয়াল রাখিও, কেউ যানু খালি আতে মাবুদর ছামনে না আয়। ¹⁷তুমরার মাবুদ আল্লায় যারে যে লাখান রহম-বরকত দিছইন, অউ হিসাবে নিজর তৌফিক মান পরতেক জনে মাবুদ আল্লার নামে লিল্লা দিলাউক্কা।

হাকিম-সালিশর দায়িত্ব

¹⁸“তুমরার মাবুদ আল্লায় তুমরারে যেতা গাউ আর টাউন অকল দান কররা, ইতা হকল টাউনো হকল খান্দান থাকি হাকিম-সালিশ আর অফিসার বওয়াল করিও। এরা হক বিচার-সালিশ করবা। ¹⁹তুমরা না-হক বিচার করিও না, কেউরর মুখ চাইয়া মছলমানি করিও না। ঘুষ খাইও না, ঘুষে তো আখলদারর চউখরেও আন্দা বানাইলায়, আর পরেজগারর মুখর জবানও বদলাইলায়। ²⁰হকল নমুনায় যেটা সঠিক, তুমরা খালি অউ পথে চলিও। তেউ তুমরার মাবুদ আল্লায় তুমরারে যে দেশ দান কররা, অতা দখল করিয়া লাম্বা হায়াতি পাইবায়।”

আল্লার নিষেধ করা পুজা-এবাদত

²¹হজরত মুছায় আরো কইলা, “তুমরার মাবুদ আল্লার নামে তুমরা যে কুরবানি খানা বানাইবায়, এর কান্দা-কাছাত লাকড়িদি বানাইল আশেরা-দেবীর কুনু নিশানা খুটি থইও না। ²²পুজার নিয়তে পাথরর কুনু খুটি গাড়িও না, কারন তুমরার মাবুদ আল্লায় ইতারে ঘিন করইন।”

¹হজরত মুছায় আরো কইলা, “আর তুমরার মাবুদ আল্লার নামে ইলাখান কুনু গরু-ছাগলরে কুরবানি দিও না, যেতার গতরো খুত আছে, তাইন তো খুত আলা কুরবানিরে ঘিন করইন।

²“তুমরার মাবুদ আল্লায় তুমরারে যে গাউ আর টাউন অকল দান করবা, অউ জাগাত যুদি ইলাখান কুনু বেটা বা বেটি মিলে, যেগুয়ে তুমরার মাবুদ আল্লার আপোস-চুক্তির উল্টা গিয়া তাইন যেতা কাম ঘিন করইন অতা কাম করে, ³অগুয়ে যুদি আল্লা ছাড়া দুছরা কুনু দেব-দেবীর পুজা করে, চান্দ, সুরুজ, তেরার পুজা করে, ⁴আর ইতা তুমরারে জানাইল অয়, তে তুমরা খুব সাবধানে তালাশ করিয়া দেখিও ইতা হাছা না মিছা। হাছা অইলে বনি ইছরাইলর ভিতরে ইলা লান্নতি কাম করায়, ⁵হউ বেটা বা বেটিরে সাজা দিও। অগুরে ধরিয়া গাউ বা টাউনর পাইঞ্চাইতি বৈঠক খানাত আনিও, আনিয়া পাত্বর মারিয়া মারিলিও। ⁶অইলে মরার জুকা অপরাধ পরমানর লাগি দুই বা তিন জনর সাক্ষি লাগবো, একলা এক জনর সাক্ষিয়ে মারা যাইতো নায়। ⁷তারে মারার বালা পয়লা সাক্ষি অকলে পাত্বর মারবা, বাদে হকল মানষে মারবা। অউ নমুনায় তুমরার সমাজর ভিতর থাকি অলাখান নাফরমানিরে খেদাইবায়।

কঠিন বিচার-সালিশর ফয়ছালা

⁸“তুমরার গেছে যুদি ইলাখান কঠিন কুনু নালিশ আয়, যেতার বিচার করার খেমতা তুমরার আদালতর নাই, তে ইতা লইয়া আল্লা মাবুদর পছন্দ করা জাগাত যাইও। ধরিলাও, কুনু খুন-খারাপি, মারা-মারি, জবর-দখলদারির পরমান-তদন্তর বিচার-আচার। ⁹গিয়া লেবি খান্দানর ইমাম অকল আর হউ আমলর পরধান হাকিম ছাবর দরবারো নালিশ হুনাইও, হুনাইলে তারা তুমরারে বিচারর রায় বাতাই দিবা। ¹⁰আর মাবুদর পছন্দ করা জাগাত তারা যে রায় জানাইবা, অউ রায়র মর্ম বুজিয়া তুমরা কাম করবায়, তারা যেতা হিকাই দিবা, খুব খিয়াল করিয়া ইতা মানিও। ¹¹আল্লাই শরিয়তর হুকুমর বেয়াপারে তারা যেলা তালিম দিবা, তারা যেলাখান বিচারর রায় দিবা, অতার মর্ম বুজিয়া তুমরা কাম করিও, তারার কথা থাকি উন্নিশ-বিশ কিচ্ছু করিও না। ¹²কুনু মানষে বেটাগিরি দেখাইয়া যুদি হউ হাকিমর রায় না মানে, বা আল্লা মাবুদর খাদিম অউ ইমাম ছাবর হুকুম না মানে, তে তারে নিচ্চিত জানে মারিলিও। বনি ইছরাইলর ভিতরে থাকি অউ নমুনায় নাফরমানি খেদাইও। ¹³তেউ ইতা হুনিয়া হকল মানষে ডরাইবা, তারা আর বেটাগিরি দেখানির সাওস পাইতা নায়।

রাজা-বাদশার লাগি নিয়ম-কানুন

¹⁴“তুমরার মাবুদ আল্লায় তুমরারে যে দেশর দখলদারি দিরা, হনো গিয়া বসত করিয়া হারলে তুমরা কইবায়, আও, আমরার আশ-পাশর জাতি অকলর লাখান আমরার নিজর জাতির লাগিও একজন বাদশা বানাই। ¹⁵হউ সময় তুমরার মাবুদ আল্লায় যারে পছন্দ করবা, তারেউ তুমরার বাদশা বানাইও। হে যানু তুমরার নিজর জাতির ভাই অয়, কুনু ভিন জাতির মানষরে তুমরার বাদশা বানাইও না। ¹⁶ই বাদশায় তার নিজর লাগি বউত ঘোড়া যানু না জমায়, ঘোড়া যুগানির নিয়তে হে যানু বনি ইছরাইলর মানষরে মিসর দেশো না পাঠায়। মনো রাখিও, মাবুদে আগে হুকুম দিছইন, তুমরা আর কুনুদিন হি পথেদি যাইও না। ¹⁷ই বাদশায় যানু বউত বিয়া-শাদি না করে, আরনায় তার দিল বে-পথে যাইবোগি। হে যানু নিজর লাগি বেশ করি সোনা-রুপা না জমায়।

¹⁸“তারে রাজ-গদিত বওয়ানির কালো লেবি খান্দানর ইমাম ছাব অকলর গেছে যে তৌরাত কিতাব থাকবো, অউ কিতাবর আরো এক কপি লেখিয়া তার নিজর লাগি নিতে অইবো। ¹⁹ইখান তার নিজর গেছে রইবো, তার দিলো আল্লা মাবুদর ডর-খফ রাখার লাগি অউ তৌরাত আর এর ভিতরর হকল হুকুম-আহকাম পুরাপুর মানিয়া চলার নিয়তে, হে জিন্দেগিভর অউ কিতাব তিলাওত করবো। ²⁰তেউ তার জাতির ভাইয়াইন থাকি নিজরে বড় মনো করতো নায়, হে তৌরাতর হুকুম-আহকামর উন্নিশ-বিশ করতো নায়। তেউ হে আর তার আওলাদ অকলর গদি স্থায়ী অইবো, তারা বউত দিন বনি ইছরাইলর উপরে বাদশাই করবা।

ইমাম ছাব আর লেবি খান্দানর ভরন-পোষন

¹“লেবি খান্দানর ইমাম অকলে আর আস্তা লেবি খান্দানর মানষে, বনি ইছরাইলর আরো খান্দানর লাখান কুনু জমি-মিরাস বা ধন-ছামানা পাইতা নায়। মাবুদর নামে দেওয়া হকল জাতর কুরবানির গোস্ত আর হকল লিল্লা-ছদগার বাটও তারা খাইবা। ²তারা নিজর বনি ইছরাইলর জাতির ভাইয়াইন্তর লাখান কুনু জমি-মিরাস পাইতা নায়। স্বয়ং আল্লা মাবুদউ তারার মিরাস, তাইন নিজেও তারারে ই ওয়াদা দিছইন।

³“মানষে যতো গরু-ছাগল কুরবানি দিবা, ইতার কান্দর গোস্ত, দুইও গাল আর পেটর ভিতরর হক্কলতা ইমাম ছাবরে দিবায়, ইতা তান পাওনা। ⁴তুমরার খেতর পয়লা ফসল, বাগানর আংগুর থাকি বানাইল পয়লা শরবত আর জয়তুন থাকি বানাইল তেলর পয়লা অংশ, ছাগল-মেড়ার পয়লা বার কাটা রুমা ইমাম ছাবরে দিবায়। ⁵জানো তো, তুমরার মাবুদ আল্লায় তুমরার হকল খান্দানর মাজ থাকি লেবি খান্দানরে পছন্দ করিয়া আলগ করছইন, যাতে তারা হর-হামেশা মাবুদর এবাদত-বন্দেগির কামো রইন।

⁶“আর ইছরাইল দেশর যেকুনু টাউন থাকি লেবি খান্দানর কুনু আওলাদ যুদি মাবুদর আশিক বনিয়া মাবুদর পছন্দ করা জাগাত আয়, ⁷তে হে-ও তার খান্দানর ভাইয়াইন্তর লাখান আল্লা মাবুদর দরবারো এবাদত-বন্দেগির কাম করবো। ⁸বাকি ইমাম অকলর লাখান হে-ও তার খানা-পিনার বাট পাইবো, এরলগে তার মৌরসি ছামানা বেচার টেকা-পয়সাও পাইবো।

যাদু-মন্ত্র থাকি পবিত্র রওয়া

⁹“তুমরার মাবুদ আল্লায় তুমরারে যে দেশ দিরা, হউ দেশর বাসিন্দা অকলে যেলা জঘইন্য নাফরমানি করইন, তুমরা ইতা হিকিও না। ¹⁰তুমরার মাজে যানু ইলা কুনু মানুষ না মিলে, যেগুয়ে তার নিজর আওলাদরে আগুনিত ফালাইয়া বলি দেয়, তাবজাতি মন্ত্র পড়ে, গনা-বাছা করে, যাদু-টুনা করে, ¹¹যেগুয়ে তন্ত্র-মন্ত্র চালায়, জিন-ভুত-পেরত সাধন করে আর মুর্দার রুহুদি আজিরাত করে। ¹²ইতা নাফরমানি কাম যেগুয়ে করে, মাবুদে তারে ঘিন করইন। অতা কাম করায় মাবুদে হউ জাতি অকলরে, তুমরার ছামনে থাকি খেদাই দিরা। ¹³এরলাগি তুমরা নিজর মাবুদ আল্লার ছামনে নির্দুষি রইও।”

হজরত মুছা (আঃ) অর লাখান এক নবী

¹⁴হজরত মুছায় আরো কইলা, “মনো রাখিও, তুমরা যেতা জাতি অকলরে খেদাইয়া দিরায়, ইতা তো যাদুগির আর গনক অকলর কথায় চলে, অইলে তুমরার মাবুদ আল্লায় তুমরার লাগি ইতা নিষেধ করছইন। ¹⁵তুমরার মাবুদ আল্লায় তুমরার সমাজ থাকি, তুমরার ভাইয়াইন্তর মাজ থাকি18:15 “তুমরার ভাইয়াইন্তর মাজ থাকি” মানি, খালি বনি ইছরাইল জাতি থাকি, অন্য আর কুনু জাতি থাকি নাই। ১৫:৭ আর ২৪:১৪ আয়াত দেখো।, আমার লাখান একজন নবী পাঠাইবা, তুমরা হকল এন হুকুমে চলতে অইবো। ¹⁶হউ তুর পাড়র ধারো তুমরা হকল যে দিন মাবুদর ছামনে আজির অইছলায়, হউ দিন তো তুমরা আল্লা মাবুদর গেছে মাংগিয়া কইছলায়, আমরা আর আল্লা মাবুদর মুখর আওয়াজ হুনতাম চাই না, তান নুরর আগুইনও আর দেখতাম চাই না, আরনায় আমরা মরিযিমু।

¹⁷“তেউ মাবুদে আমারে কইলা, তারা ঠিক মাতউ মাতিছইন। ¹⁸আমি তারার লাগি তারার নিজর ভাইয়াইন18:18 “তারার নিজর ভাইয়াইন।” মানি, বনি ইছরাইল জাতি। ১৮:১৫ আয়াতর নোট দেখো। থাকি তুমার লাখান একজন নবী পাঠাইমু, এন মুখো আমার কালাম শরিফ দিমু, আর আমি এনরে যেতা যেতা হিকাই দিমু, এইন তুমরারে অতা জানাইবা। ¹⁹আর আমার নাম লইয়া তাইন আমার কালাম অকল বাতাইবা, না-মানরা অকলরে আমি দায়ী করমু। ²⁰অইলে আমি যেতা কইছি না কুনু নবীয়ে যুদি বদ সাওস করি আমার নামে ইলা কুনু কালাম বাতায়, বা কুনু দেব-দেবীর নাম লইয়া ইলাখান মাত মাতে, তে হে মরতেউ অইবো।

²¹“অখন কুনু বুলি হুনার বাদে তুমরার মনর মাজে চিন্তা আইতো পারে, ইখান মাবুদে বাতাইছইন কি না, কিলা বুজমু? ²²এরলাগি হুনো, মাবুদর নাম লইয়া কুনু নবীয়ে কুন্তা কওয়ার বাদে যুদি ইতা না ফলে, বা অলা না ঘটে, তে বুজিলিও ইখান মাবুদর কথা নায়। হউ নবীয়ে তার বদ সাওসে ইতা কইছে, ইলাখান জনরে তুমরা ডরাইও না।”

খুনি অকলর আশ্রয় টাউন

¹মুছা নবীয়ে তারারে আরো কইলা, “তুমরার মাবুদ আল্লায় যেতা দেশর দখলদারি দিরা, হনর বাসিন্দা অকলরে তাইন বিনাশ করিয়া হারলে, তুমরা যেবলা তারার বাড়ি-ঘর আর টাউনো হামাইয়া বসত করবায়, ^2-3হউ সময় তুমরার মাবুদ আল্লার দেওয়া অউ জমিনরে তিন বাটে বাটিও, আর একটা একটা করি মোট তিনটা টাউনরে পছন্দ করিয়া আলগ করিও, আর অতা টাউনো যাইবার লাগি রাস্তা জুইত-জাইত রাখিও। তেউ তুমরার মাজর কেউ যুদি অনিচ্ছায় কেউররে খুন করিলায়, তে অউ নমুনার খুনি বাগিয়া গিয়া হউ টাউনো বনবাসি অইয়া আশ্রয় লইবো।

⁴“মনর মাজে কুনুজাত ইংসা-দুশমনি ছাড়া ইচ্ছা না করিয়া আখতা যুদি একজনে আরক জনরে খুন করিলায়, তে জান বাচানির লাগি অউ খুনি বাগিয়া গিয়া তার কান্দা-কাছার বনবাসি টাউনো আশ্রয় লইবো। ⁵মনো করো, একজন মানুষ দুছরা জনর লগ অইয়া জংগলো লাকড়ি কাটাত গেল, গিয়া কুড়ালদি গাছ কাটিবার বালা আখতাউ কুড়ালর আছাড়ি থাকি কুড়াল ছুটিয়া, দুছরা জনর গতরো লাগিয়া হে মরিগেল, অউ হালতে খুনি গিয়া তার কান্দা-কাছার আশ্রয় টাউনো জান বাচানির সুযোগ পাইবো। ⁶আরনায় খুন অওয়া জনর আপন মানষে গুছা করিয়া বদলা লইবার নিয়তে অউ মানষরে ধরতো চাইবো, আর জান বাচানির আশ্রয় টাউন ধারো না রইলে তারে ধরিয়া মারিলতো পারে। আসলে তো হি বেটায় ইচ্ছা করিয়া খুন করছে না, হে সাজা পাইবার কথা নায়। ⁷এরলাগি আমি তুমরারে হুকুম দিরাম, তুমরার লাগি তিনটা আশ্রয় টাউন আলগ করি রাখিও।

⁸“তুমরার মাবুদ আল্লায় তুমরার বাফ-দাদার লগে কছম মাফিক জাগা বাড়াইয়া যেবলা তুমরারে আস্তা দেশর মালিকানা দিবা, ⁹অউ সময় তুমরা আরো তিনখান আশ্রয় টাউন আলগ করি রাখবায়। খালি আইজ আমি তুমরারে যেতা হুকুম দিছি তুমরা যুদি খুব খিয়ালি অইয়া ইতা মানিয়া চলো আর যুদি হর-হামেশা আল্লারে মহব্বত করো আর তান পথে চলো, তে তাইন নিচ্চয় তুমরারে আস্তা দেশর মালিকানা দিবাউ। ¹⁰অউ আশ্রয় টাউন রাখার কারন অইলো, তুমরার মাবুদ আল্লায় তুমরারে যে দেশর মালিকানা দিরা, হউ জমিনো যানু কুনু নি-অপরাধির লউ না পড়ে, আর তুমরা কুনুজাত খুনর দায়ী না অও।

¹¹“অইলে কেউ যুদি রাগ-গুছা, ইংসা করিয়া আরক জনরে খুন করার নিয়তে উত পাতিয়া রয়, বাদে হামলা করিয়া খুন করিলায়, আর অউ খুনি গিয়া কুনু আশ্রয় টাউনো হামাই যায়, ¹²তে তার গাউ বা টাউনর মুরব্বি-সালিশ অকলে, মানুষ পাঠাইয়া তারে ধরাই আনিয়া, অগুরে কাতল করার লাগি খুন অওয়া জনর আপন মানষর আতো সপি দিবা। ¹³অউ খুনিরে তুমরা কুনু দয়া-মায়া করিও না। তুমরা বনি ইছরাইলর মাজ থাকি নি-অপরাধিরে খুনর দায়-ভার ফুছিয়া ফালাইও, তেউ তুমরার ভালাই অইবো।

জমিনর সীমানা খুটি

¹⁴“তুমরার মাবুদ আল্লায় তুমরারে যে দেশর দখলদারি দিরা, হউ দেশর জমিনর পুরান আমলো গাড়া আরিপরির কুনু সীমানা খুটি উন্নইশ-বিশ করিও না।

বিচারর সাক্ষি পরমানর নিয়ম-কানুন

¹⁵“কেউরর বেয়াপারে কুনুজাত গুনা বা অপরাধর নালিশ আইলে, তে খালি একজনর সাক্ষি হুনিয়া রায় দিও না, দুই বা তিন জনর সাক্ষি পরমান লইয়া বিচার-সালিশর রায় দিও।

¹⁶“কুনু মানষে যুদি আরক জনর খেতি করার নিয়তে কুনু নালিশ দেয়, ¹⁷তে অউ বাদি আর বিবাদি দুইও পক্ষ হউ আমলর হাকিম আর ইমাম ছাব অকলর গেছে গিয়া মাবুদর ছামনে আজির অইবা। ¹⁸বাদে সালিশ অকলে খুব খিয়াল করিয়া ইতার তালাশ করবা, তাল্লাশি কালো যুদি ধরা পড়ে হে তার আপন জাতির ভাইর বেয়াপারে মিছা নালিশ দিছে, ¹⁹তে অউ নালিশ দিয়া হে হউ জনর যেতা খেতি করতো চাইছিল, তুমরা অগুর অউলা খেতি করিও। অউ নমুনায় তুমরা নিজর সমাজ থাকি নাফরমানিরে ফুছিয়া ফালাইও। ²⁰ইতা হুনিয়া বাকি হকল বনি ইছরাইলে ডরাইবা, তেউ ইলা কাম আর কেউ করতো নায়। ²¹ইলা অপরাধিরে তুমরা কুনু লাখান দয়া-মায়া করিও না, জানর বদলা জান, চউখর বদলা চউখ, দাতর বদলা দাত, আতর বদলা আত, পাওর বদলা পাও আদায় করিও।

লাড়াই-যুদ্ধ করার নিয়ম-কানুন

¹“তুমরার দুশমনর লগে লাড়াই করাত গিয়া যুদি দেখো, তারার ঘোড়া, ঘোড়ার গাড়ি, তারার সিপাই তুমরা থাকি বেশি, তে ডরাইও না। জানো তো, তুমরার মাবুদ আল্লা, যেইন তুমরারে মিসর দেশ থাকি বার করিয়া আনছইন, তাইন নিজে তুমরার লগে আছইন। ²লাড়াইর নিয়তে বারনির আগে ইমাম ছাবে আইয়া সিপাই অকলরে কইবা, ³ও বনি ইছরাইল, হুনো, তুমরা আইজ তুমরার দুশমনর লগে লাড়াই করাত যাইরায়, অখন তুমরার মনরে কমজুর বানাইও না, ডরাইও না, ডরাইয়া নিরাশ অইও না, দুশমনর ডরে কাপিও না। ⁴দুশমনর লগে লাড়াইত জিতানির লাগি, তুমরার মাবুদ আল্লা তো তুমরার লগে অইয়া যাইরা।

⁵“বাদে তারার অফিসার অকল আইয়া সিপাই অকলরে জিকাইবা, তুমরার মাজে ইলা কুনু সিপাই আছে নি, যেগুয়ে নয়া ঘর বানাইয়া হারি, অউ ঘরো বসত করার লাগি দোয়ার অনুষ্ঠান বাকি রাখছে? তে তুমি নিজর বাড়িত যাওগি, আরনায় লাড়াইত গিয়া মরিগেলে দুছরা মানুষ আইয়া অউ অনুষ্ঠান করিলাইবো। ⁶আর কুনু সিপাই আছে নি, যেগুয়ে আংগুরর বাগান করিয়া পয়লাকুর ফল না খাইয়া লাড়াইত আইছে? তে তুমিও বাড়িত যাওগি, আরনায় লাড়াইত গিয়া মরিগেলে দুছরা মানষে আইয়া তুমার বাগানর ফল খাইলিবো। ⁷আর তুমরা কেউরর আখত করিয়া হারি বাসর রাইত বাকি রইছে নি? তে তুমিও বাড়িত যাওগি, আরনায় লাড়াইত গিয়া মরিগেলে দুছরা বেটায় আইয়া অউ কইনারে বিয়া করিলিবো। ⁸অউ অফিসার অকলে আরো জিকাইবা, তুমরার মাজে ইলা কুনু সিপাই আছে নি, যেগুর জানো ডর করের, মনে কাপের? তে তুমিও তুমার বাড়িত যাওগি, আরনায় তুমারে দেখিয়া লগর সিপাই অকলও কমজুর অইযিবা। ⁹অউ নমুনায় অফিসার অকলর জিকানি শেষ অইলে, তারা সিপাই দল অকলর উপরে কামান্ডার বওয়াল করবা।

¹⁰“তুমরা কুনু গাউ বা টাউনর লগে লাড়াই করার নিয়তে যেবলা হউ জাগার ধারো যাইবায়, গিয়া হনর মানষর গেছে খবরিয়া পাঠাইয়া কইও, তারা যানু আপোসে তুমরার তাবেদারি মানিলাইন। ¹¹তারা যুদি রাজি অইয়া টাউনো হামানির গেইট খুলিয়া দিলাইন, তে তারা হকল তুমরার রাইয়ত বনিয়া খাজনা দিবা আর তুমরার গুলামি করবা। ¹²আর রাজি না অইয়া লাড়াই করতো চাইলে, তুমরা অউ টাউনরে বেরিয়া রাখিও। ¹³বাদে তুমরার মাবুদ আল্লায় হউ জাগারে তুমরার আতো সপিয়া হারলে, তুমরা হকল বেটাইন্তরে কাতল করিও। ¹⁴অইলে হনর বেটি মানুষ, হুরুতাইন, পশুর পাল আর হউ জাগার হক্কলতা গনিমতর মাল হিসাবে তুমরা নিতায় পারবায়। দুশমনর জমিন থাকি গনিমতর মাল হিসাবে তুমরার মাবুদ আল্লায় তুমরারে যততা দান করবা, ইতা তুমরা ভোগ-দখল করতায় পারবায়। ¹⁵যেতা টাউন অকল তুমরার দেশ থাকি বাক্কা দুরই আর তুমরার কান্দা-কাছার জাতি অকলর টাউন নায়, অতা টাউনর মানষর লগে অউ লাখান বেবহার করিও।

¹⁶“অইলে তুমরার কান্দা-কাছার যেতা জাতি অকলরে তুমরার মাবুদ আল্লায় তুমরার আতো দিরা, ইতা কুনুগুরেউ জিন্দা রাখিও না। ¹⁷তুমরা নিজর মাবুদ আল্লার হুকুম মাফিক, হিট্টী, আমোরী, কেনানী, ফারিজী, হিব্বী আর যিবুজী অকলরে পুরাপুর নিপাত করবায়। ¹⁸আরনায় তারা নিজর দেব-দেবীরে পুজা করার বালা যতো জঘইন্য নাফরমানি করইন, তারার অতা তুমরাও হিকিবায়, হিকিয়া নিজর মাবুদ আল্লার দরবারো গুনার কাম করবায়।

¹⁹“কুনু গাউ বা টাউনর লগে লাড়াইত গিয়া তুমরা যেবলা বউত লাম্বা সময় ধরি বেরিয়া রাখো, অউ সময় হনর ফলদার কুনুজাত গাছ-পালা কুড়ালদি কাটিও না। তুমরা ইতার ফল খাইও, অইলে গাছ কাটিও না। গাছ-গাছালি তো তুমরার দুশমন নায় যেন অতারে হামলা করতায়। ²⁰তা-ও যেতা গাছ কুনু ফল-ফলাদির গাছ নায়, ইতা কাটিয়া হনর বাসিন্দা অকলরে লাড়াইত আরানির আগ পর্যন্ত, অতা দিয়া আতিয়ার বানাইয়া হামলা করতায় পারবায়।

অজানা খুনর বেয়াপারে হুকুম

¹“তুমরার মাবুদ আল্লায় তুমরারে যে দেশর দখলদারি দিরা, হনো বন্দর মাজে যুদি কুনু মানষর লাশ পড়ি রইছে দেখা যায়, আর তার খুনির কুনু পরিচয় না মিলে, ²তে তুমরার ময়-মুরব্বি আর হাকিম-সালিশ অকল বার অই আইয়া, মাপিয়া দেখবা অউ লাশর গেছ থাকি কুন গাউ কতখান দুরই। ³দেখিয়া হকল থাকি কাছার গাউর মুরব্বি অকলে অউ লাখান এক গাই-বাছুর পছন্দ করবা, যেটা দিয়া কুনুজাত কাম-কাজ, আল-চাষ করা অইছে না। ⁴বাদে হনর মুরব্বি অকলে অউ বাছুর লইয়া অমন এক জাগাত যাইবা, যেখানো পানির ফুত আলা খাল আছে, আর খালর পারর জমিনো কুনুজাত আল-চাষ বা আলি ফালাইল অইছে না। হনো গিয়া অউ বাছুরর গর্দনা ভাংগিলিবা। ⁵বাদে লেবি খান্দানর ইমাম অকল অউ জাগাত আইবা। কারন তুমরার মাবুদ আল্লায় তারারে পছন্দ করছইন, তান এবাদত-বন্দেগি করা, তান নামে মানষর লাগি দোয়া-দুরুদ করা, আর হকল নমুনার ফিতনা-ফসাদ, মারা-মারির বিচার করার লাগি। ⁶বাছুরর গর্দনা ভাংগিয়া হারলে কান্দা-কাছার গাউর হউ মুরব্বি অকলে, অউ খালর পানিদি বাছুরর উপরে তারার আত ধইবা। ⁷ধইয়া কইবা, অউ মানুষ খুন অইতে আমরা কেউ দেখছি না, আমরার আতে তারে মারছিও না। ⁸ও মাবুদ, তুমার আজাদ করা বনি ইছরাইলরে তুমি অখন মাফি দেও, খুন অওয়া অউ নি-অপরাধি জনর লাগি তুমার ই বন্দা অকলরে তুমি দায়ী করিও না। অখান কইয়া হারলে হউ খুনর দায় থাকি তারা রেহাই পাইবা। ⁹অউ নমুনায় তুমরার সমাজ থাকি নি-অপরাধি মানষর খুনর দায়-ভার হরাইতায় পারবায়, কারন আল্লা মাবুদে যেলা পছন্দ করইন, তুমরা অলাউ করছো।

যুদ্ধত বন্দি বেটিরে বিয়া করা

¹⁰“দুশমনর লগে লাড়াইত গিয়া হারলে, তুমরার মাবুদ আল্লায় যেবলা দুশমন অকলরে তুমরার আতো সপিয়া দিবা, আর তুমরা তারারে বন্দি করবায়, ¹¹অউ সময় তারার মাজর কুনু সুন্দরি বেটিরে দেখিয়া তুমরার মাজে কেউ যুদি আশিক বনি যায়, আর অউ বেটিরে বিয়া করার খিয়াল অয়, ¹²তে তাইরে নিজর বাড়িত আনবায়। বাদে তাই নিজর মাথার চুল কামাইবো, নউক কাটিবো, ¹³আর বন্দি কালিন হালতর কাপড়-চুপড় ফালাইয়া, তুমার বাড়িত রইয়া তাইর মা-বাফর লাগি পুরা এক মাস কান্দা-কাটি, আহাজারি করবো। অউ এক মাস বাদে তাইরে বিয়া করিয়া হারলে, তুমরা জামাই-বউ অইবায়। ¹⁴বিয়া-শাদির বাদে যুদি তুমি অউ বেটির উপরে খুশি না অও, তে তাইরে তাইর খুশি মাফিক ছাড়ি দিতে অইবো। তাইরে বান্দি হিসাবে রাখা বা বেচার এখতিয়ার তুমার নাই, কারন তুমি তাইর ইজ্জত নষ্ট করছো।

বড় পুয়ার পাওনা হক

¹⁵“কুনু বেটার যুদি দুই বউ অয়, আর বেটায় এক বউরে মায়া করে, দুছরা বউরে মায়া না করে। অউ দুইও বউর ঘরো যুদি পুয়াইন অইন, এর মাজর বড় পুয়া যুদি হউ মায়া না করা বউর ঘরো অয়, ¹⁶তে তান জমি-মিরাস বাটিয়া দিবার কালো, তান মায়ার বউর ঘরর পুয়ারে বড় পুয়ার হক দিতা পারতা নায়। ¹⁷বরং বড় পুয়ারে তান অইন্য পুয়াইন থাকি ডাবল দিতে অইবো। হে তো অইলো তান জুয়ানকির পয়লা ফল, বড় পুতর দাবিদার খালি হে-উ।

নাফরমান পুতর বিচার

¹⁸“কেউরর কুনু পুয়ায় যুদি মা-বাফর কথা না হুনে, মা-বাফর হুকুমর উল্টা চলে, তারার বুজ-শাসন না মানিয়া কু-পথে যায়গি, ¹⁹তে তার মা-বাফে তারে ধরিয়া মুরব্বি অকলর গেছে নিবা, তারার গাউ বা টাউনো হামানির গেইটর গেছে পাইঞ্চাইতি বৈঠক খানাত নিবা। ²⁰নিয়া হউ মুরব্বি অকলরে কইবা, আমরার অউ পুয়া খুব নাফরমান আর কু-পথি বনিগেছে, হে আমরার কথা মানে না, মদ খাইয়া মাতলামি করে, আর টেকা-পয়সা উড়ায়। ²¹তেউ হউ টাউনর হকল বেটাইন্তে পাত্বর মারিয়া তারে কাতল করবা। অউ নমুনায় তুমরার মাজ থাকি অলাখান নাফরমানি ফুছিয়া ফালাইবায়। আর ইতা হুনিয়া হকল বনি ইছরাইলে ডরাইবা।

গাছো লটকাইল লাশর বেয়াপারে

²²“কুনু মানষে যুদি মউতর সাজা পাওয়ার জুকা অপরাধ করে, আর তারে মারার বাদে লাশ গাছো লটকাইল অয়, ²³তে তার লাশরে রাইত পর্যন্ত গাছো লটকাইয়া রাখিও না, দিন থাকতেউ তারে মাটি দিলাইও। জানো তো, গাছো লটকাইল মানুষ আল্লার লান্নতি। খিয়াল রাখিও, তুমরার মাবুদ আল্লায় তুমরারে যে দেশর মালিকানা দিরা, ইতা তুমরা নাপাক বানাইও না।

¹“তুমরার জাতির কুনু ভাইর গরু-ছাগল যুদি পথ আরাইয়া যাওয়াত দেখো, তে তুমরা নিরাই না থাকিয়া, ইটারে ফিরাইয়া আনিয়া তার মালিকর গেছে দিও। ²অউ মালিক যুদি তুমরার আরি-ফরির কেউ নাও অয়, বা অচিনা কুনু জন অয়, তে ইটা তুমরা নিজর বাড়িত নিবায়গি, নিয়া হে যেবলা তুকানিত আইবো, অউ সময় তারে দিবায়। ³তুমরার জাতির কুনু ভাইর গাধা, তার ফিন্নর কাপড়, বা তার আরাইল যেকুনু ছামানা পাইলে তুমরা অলা করিও, নিরাই হরিয়া যাইও না।

⁴“তুমার জাতির ভাইর কুনু গরু-গাধা পথর মাজে পড়িগেছে দেখিয়া তুমি হরিয়া যাইও না, ইটা উবানির লাগি তুমি ধরিয়া সাইয্য করিও।

⁵“বেটিন্তে বেটাইন্তর কাপড় আর বেটাইন্তে বেটিন্তর কাপড় ফিন্দিও না। যেগিয়ে ইলা কাম করে, তুমরার মাবুদ আল্লায় তারে ঘিন করইন।

⁶“পথেদি আটিয়া যাইতে সময় কুনু গাছর ডালো, বা মাটির উপরে কুনু পাখির বাদা দেখলে, বাদাত কুনু পাখিয়ে ডিমো উম দের, বা তার বাইচ্চার লগে আছে, তে বাইচ্চার লগে তার মাʼরে ধরিয়া নিও না। ⁷শখ অইলে বাইচ্চা নিওগি, অইলে তার মাʼরে নিচ্চিত ছাড়িয়া যাইও। তেউ তুমার ভালাই অইবো, তুমার হায়াতি বাড়িবো।

⁸“নয়া ঘর বানাইলে তুমরা ঘরর ছাতর উপরে চাইরো গালাবায় বেড়া দিবায়, আরনায় ছাতর উপরে থাকি কেউ পড়িয়া মরিগেলে তুমরা খুনর দায়ী অইবায়।

⁹“তুমরার আংগুরর বাগানো দুই জাতর বিচি লাগাইও না, ইলা করলে আংগুর ফল আর দুছরা জাতর বিচির ফলও তুমরার লাগি হারাম অইযিবো।

¹⁰“গরু আর গাধারে এক জুয়ালো লাগাইয়া আল-চাষ করিও না।

¹¹“তুমরা দুই জাতর সুতাদি বানাইল কাপড় ফিন্দিও না।

¹²“তুমরার উড়িবার চাদ্দরর চাইরো কুনাত সুতাগেছা দিও।

বউর লগে মিলা-মিশা করার নিয়ম

¹³“কুনু বেটায় বিয়া করিয়া বাসর ঘর করার বাদে যুদি বউরে পছন্দ না অয়, ¹⁴হে যুদি বউর নামে বদনাম রটাইয়া তাইর গিবত গাইয়া কয়, আমি তো অউ বেটিরে বিয়া করছি ঠিকউ, অইলে তাইর সতীত্বর কুনু চিন্নত পাইছি না। ¹⁵তে অউ কইনার মা-বাফে তারার পুড়ির সতীত্বর চিন লাগাইল বিছনার কাপড় লইয়া, হনর গাউ বা টাউনো হামানির গেইটর মুখো মুরব্বি-সালিশ অকলর গেছে যাইবা। ¹⁶গিয়া কইনার বাফে মুরব্বি অকলরে কইবা, আমি তো অউ দামান্দর লগে আমার পুড়িরে শাদি দিছলাম, অখন হে আমার পুড়িরে পছন্দ করে না। ¹⁷আর হে বদনাম রটাইয়া কইছে, হে বুলে আমার পুড়ির সতীত্বর চিন্নত পাইছে না, অইলে আপনারা দেখউক্কা, আমার পুড়ির সতীত্বর চিন্নত লইয়া আমি আজির অইছি। অখান কইয়া হে অউ বিছনার কাপড় মেলিয়া মুরব্বি অকলরে চিন্নত দেখাইবো। ¹⁸তেউ হি মুরব্বি অকলে অউ দামান্দরে সাজা দিবা। ¹⁹তার জরিমানা বাবত একশো তোলা রুপা আদায় করিয়া কইনার বাফরে দিবা, কারন অউ দামান্দে বনি ইছরাইলি এক সতী কইনার বদনাম রটাইছে। আর অউ কইনারে লইয়া হে সংসার করতে অইবো, জিন্দেগিয়ে কুনুদিন তাইরে ছাড়ার কুনু পথ নাই।

²⁰“আর দামান্দর কথা হাছা অইলে, অউ কইনার সতীত্বর চিন্নত না পাইলে, ²¹কইনারে তাইর বাফর বাড়ির গেইটর গেছে নিয়া, হনর বেটাইন্তে পাত্বর মারিয়া তাইরে মারিলিবা। তাই তো বাফর বাড়িত থাকার কালো জিনার কাম করিয়া, বনি ইছরাইলর মাজে জঘইন্য নাফরমানি করছে। অউ নমুনায় তুমরা নিজর সমাজ থাকি অলা নাফরমানিরে ফুছিয়া ফালাইবায়।

²²“কুনু বেটায় যুদি আরক বেটার বউর লগে জিনা করাত ধরা খায়, তে অউ বেটা-বেটি দুইও জনরে মারিলিতে অইবো। বনি ইছরাইল থাকি তুমরা ই লাখান নাফরমানির নাম মিটাইবায়।

²³“বিয়া ঠিক অইগেছে ইলা কুনু পুড়িরে কেউ টাউনর মাজে পাইয়া যুদি তাইর লগে জিনা করে, ²⁴তে তারা দুইওগুরে হউ জাগার মেইন গেইটর গেছে নিয়া পাত্বর মারিয়া মারিলিবায়। পুড়িরে কাতল করার কারন অইলো, তাই তো হনো থাকি সাইয্যর লাগি কুনু চিক-চিল্লানি দিছে না, আর বেটারে কাতলর কারন অইলো, হে আরক বেটার বউর ইজ্জত মারছে। অউ নমুনায় তুমরা বনি ইছরাইল থাকি অলা নাফরমানি ফুছিয়া ফালাইবায়।

²⁵“বিয়া ঠিক অইগেছে অমন কুনু পুড়িরে কেউ কুনু নিরাই জাগাত পাইয়া হারি, জুর করিয়া তাইর লগে মিলা-মিশা করলে, তুমরা খালি অউ বেটারে কাতল করবায়। ²⁶আর অউ পুড়িরে ছাড়ি দিবায়, তাই তো কাতল অওয়ার জুকা গুনা করছে না। ইতা তো একজনে দুছরা জনরে খুন করার লাখানউ। ²⁷কারন অউ বেটায় তাইরে নিরাই জাগাত ধরছে, চিক-চিল্লানি দিলেও তাইরে বাচানির কেউ তো ইনো আছিল না।

²⁸“বিয়া-শাদি ঠিক অইছে না, অমন কুনু পুড়িরে পাইয়া কেউ যুদি জুর করিয়া তাইর লগে মিলা-মিশা করে, আর তারা ধরা খায়, ²⁹তে অউ বেটায় পুড়ির বাফরে পইঞ্চাশ তোলা রুপা দিবো, আর পুড়ির ইজ্জত মারায় তাইরে বিয়া করতে অইবো। জিন্দেগিয়ে কুনুদিন তাইরে তালাক দিতো পারতো নায়।

³⁰“কুনু বেটায় তার হাতন মাʼরে বিয়া করা জাইজ নায়, ইলা করলে হে তার বাফর বউর লগে জিনা করিয়া বাফরে বেইজ্জত করবো।”

বনি ইছরাইলর মাহফিলো হামানির নিয়ম

¹হজরত মুছায় আরো কইরা, “কুনু বেটার যুদি অন্ডকুস ছেছা অয়, বা তার পুরুষালি নফছ কাটিয়া ফালাইল অয়, তে হি বেটা মাবুদর বন্দা অকলর মাহফিলো হামানির সুযোগ নাই।

²“কুনু ফুংগা মানুষ মাবুদর বন্দা অকলর মাহফিলো হামানির সুযোগ নাই, তার চৌদ্দ ছিড়ির কেউরর হামানির পথ নাই।

³“বনি-আম্মান বা মোয়াবী জাতির কুনু মানুষ মাবুদর বন্দা অকলর মাহফিলো হামানির সুযোগ নাই, তারার চৌদ্দ ছিড়ির কেউ হামানির পথ পাইতো নায়। ⁴মনো আছে নি, তুমরা মিসর দেশ থাকি বার অইয়া আইবার কালো, পথর মাজে তারা তুমরার খানি-পানি লইয়া আগুয়াই আইছে না, বরং তুমরারে বদদোয়া দিবার লাগি বালাম বিন বাউর নামর এক পীররে তারা ঘুষ দিছিল, দিয়া ইরাম-নহরয়িম দেশর ফতুর টাউন থাকি তারে ভাড়া করি আনছিল। ⁵অইলে তুমরার মাবুদ আল্লায় অউ বালামর আরজিত সায় দিছইন না, তাইন তো তুমরারে মহব্বত করইন, এরলাগি হউ বালাম পীরর বদদোয়ারে বদলাইয়া তাইন নেক-দোয়া বানাইলা। ⁶অখন তুমরা জিন্দেগিয়ে কুনুদিন ইতার কুনু ভালাই বা উপকার করিও না।

⁷“তা-ও ইদোমী অকলরে তুমরা ইংসা করিও না, এরা তো তুমরার ভাই। মিসরী মানষরে ইংসা করিও না, তুমরা মুছাফির হালতে আগে তারার দেশো বসত করছো। ⁸তুমরার লগে বসত করার তিন ছিড়ি থাকি তারা মাবুদর বন্দা অকলর মাহফিলো হামাইতা পারবা।

সিপাই অকলর কেম্প পাক-পবিত্র রাখিও

⁹“দুশমনর লগে লাড়াইত বার অইয়া তুমরা হকল নমুনার নাপাকি থাকি বাচিয়া রইও। ¹⁰রাইতর বালা কুনু সিপাইর যৌবনর পানি বার অইয়া নাপাক বনিগেলে, হে কেম্পর বারে যাইতে অইবো। ¹¹বাদে বিয়ালি বালা হে নাইয়া হারি, সুরুজ ডুবিয়া হারলে কেম্পো আইয়া হামাইবো।

¹²“পায়খানা করার লাগি তুমরা কেম্পর বারে এক জাগা বানাইবায়। ¹³তুমরার আতিয়ার-পত্রর লগে মাটি খুড়িবার কুদাল রাখিও। পায়খানা করিয়া হারলে কুদালদি গাত খুদিয়া মাটির তলে হারাইও। ¹⁴খিয়াল রাখিও, তুমরারে বাচানির লাগি, আর দুশমনরে তুমরার আতো সপিবার খিয়ালে তুমরার মাবুদ আল্লা তুমরার কেম্পর ভিতরে ঘুরা-ফিরা করইন। এরলাগি তুমরার কেম্পরে পাক-পবিত্র রাখিও, আরনায় তুমরার নাপাকি দেখিয়া মাবুদে তুমরার উপরে থাকি মুখ ফিরাইলিবা।

নানান লাখান হুকুম-আহকাম

¹⁵“কুনু মানষর কিনা গুলাম বাগিয়া আইয়া যুদি তুমরার গেছে আশ্রয় লয়, তে তারে তার মালিকর গেছে ফিরাই দিও না। ¹⁶হে তুমরার দেশর যেখানো রইতো চায়, অনোউ তারে জাগা দিও, তারে দুখ দিও না।

¹⁷“বনি ইছরাইলর কুনু বেটিন্তে যানু মন্দির-আখড়ার নটিগিরি না করে। কুনু বেটায়ও যানু অলা নটাগিরি না করে। ¹⁸নটি বেটি বা নটা বেটার রুজি-রুজগারর টেকা-পয়সার কুনুজাত মান্নত-কুরবানি তুমরার মাবুদ আল্লার ঘরো আনিও না। ইলাখান বেটা-বেটিন্তরে তো মাবুদে ঘিন করইন।

¹⁹“তুমরার জাতির কুনু ভাইর গেছ থাকি সুদ খাইও না, ইতা টেকা-পয়সা, খানি-খুরাকির জিনিস বা আরো কুনুতা অইলেও কুনুজাত সুদ লইও না। ²⁰অইন্য জাতির গেছ থাকি সুদ নিতায় পারবায়, অইলে বনি ইছরাইল থাকি সুদ খাওয়া হারাম। ইতা মানিয়া চললে তুমরা যে দেশর দখলদারি পাইরায়, হউ জাগাত গিয়া হারলে তুমরার মাবুদ আল্লায় তুমরার হকল কাম-কাজো রহম-বরকত দিবা।

²¹“তুমরা নিজর মাবুদ আল্লার নামে কুনুতা মান্নত করলে, ইতা জলদি করি আদায় করিও, ইতা আদায় না করলে তুমরার গুনা অইবো। আর ই হিসাব তো তুমরার মাবুদ আল্লায় বাদ দিতা নায়। ²²অইলে কুনুজাত মান্নত না করলে গুনা নায়। ²³তুমরার জবান থাকি যে মান্নত করছো, ইটা নিচ্চিত আদায় করবায়, কারন তুমার নিজর জবানে, নিজর খুশিয়ে আল্লা মাবুদর নামে ইতা মানছো, এরলাগি আদায়ও করবায়।

²⁴“তুমরার আরি-ফরির আংগুরর বাগানো হামাইলে নিজর হাউছ মিটাইয়া আংগুর খাইও, অইলে কুনু বউল বা বস্তাত করি কুন্তা নিতায় পারতায় নায়। ²⁵কেউরর জমিনো গিয়া আতদি কুনুজাত ফয়-ফছলর ছড়া ছিড়িতায় পারবায়, অইলে কাচি দিয়া দাইয়া নিতায় পারতায় নায়।”

বিয়া-শাদির বেয়াপারে

¹হজরত মুছায় আরো কইরা, “বিয়ার বাদে যুদি কুনু জামাইয়ে তার বউর মাজে খুত পায়, পাইয়া তাইর উপরে নারাজ অয়, আর তালাক নামা লেখিয়া তাইর আতো দিয়া বিদায় করি দেয়। ²আর অউ বউয়ে গিয়া যুদি দুছরা জামাইর গেছে বিয়া বয়, ³বাদে হউ দুছরা জামাইয়েও তাইরে নাপছন্দ করিয়া যুদি অলা তালাক দিলায়, বা হউ জামাই মরিযায়, ⁴তে তাইর হউ পয়লা জামাইয়ে তাইরে আর বিয়া করতো পারতো নায়, তাই তো এনলাগি নাপাক অইগেছে। ইলাখান বিয়া-শাদিরে মাবুদে ঘিন করইন। তুমরার মাবুদ আল্লায় তুমরারে যে দেশর মালিকানা দিরা, তুমরা ইলা গুনা করিয়া ই দেশরে নাপাক বানাইও না।

⁵“নয়া বিয়া করা কুনু বেটারে যুদ্ধত পাঠাইও না, জুর-জবরদস্তি করিয়া তারে কুনু কামর ভার দিও না। হে পুরা এক বছর কাম-কাজ না করিয়া, তার বউর লগে খুশি-বাসি করার সুযোগ দিও।

সমাজো চলার হুকুম-আহকাম

⁶“আওলাতি মালর বন্দক হিসাবে তুমরা কেউরর ঘাইল-ছিয়া, বা খালি ছিয়া বন্দক রাখিও না। ইলা করলে তার জান বাচানির খানি-খুরাকির পথ বন্দ অইযিবো।

⁷“কুনু মানষে যুদি বনি ইছরাইলর আরক ভাইরে চুরি করিয়া নিয়া গুলাম বানাইলায়, বা দুছরা জাগাত বেচিয়া হারি ধরা খায়, তে তারে কাতল করবায়। অউ নমুনায় তুমরার সমাজ থাকি ইলা নাফরমানিরে ফুছিয়া ফালাইবায়।

⁸“কেউরর গতরো পচা-কুষ্ঠ বেমার দেখা দিলে, লেবি খান্দানর ইমাম অকলর পরামিশ মাফিক চলিও। আমি তারারে যেতা হুকুম দিছি, তুমরা খুব খিয়ালি অইয়া ইতা মানিও। ⁹মিসর দেশ থাকি বার অইয়া আইবার পথো, তুমরার মাবুদ আল্লায় আমার বইন মরিয়মর যে দশা ঘটাইছলা, ইতা তুমরা মনো রাখিও।

¹⁰“তুমার আরি-ফরিরে কুন্তা আওলাত দিলে, তার গেছ থাকি কুনু মাল বন্দক নিবার নিয়তে, তুমি তার ঘরো হামাইও না। ¹¹তুমি ঘরর বারে উবাইও, আর যারে আওলাত দিছো, হে তার ঘর থাকি বন্দকি মাল আনিয়া তুমারে দিবো। ¹²আওলাত নেওরা জন গরিব-দুখি অইলে, তার দেওয়া বন্দকি খেতা-কমলি নিয়া তুমি রাইত ঘুমাইও না। ¹³হাইঞ্জা বালা তুমি তার মাল ফিরাই দিও, অতা উড়িয়া হে রাইত ঘুমাইয়া তুমারে দোয়া দিবো। তেউ তুমার ভালাই অইবো, আর বন্দকি ছামানা ফিরত দেওয়া তো, তুমরার মাবুদ আল্লার নজরো নেকির কাম।

¹⁴“তুমরার বনি ইছরাইল সমাজর কুনু ভাই24:14 “বনি ইছরাইল সমাজর কুনু ভাই।” হিব্রু ভাষায়, তুমরার ভাইয়াইন্তর মাজে কেউ। বা তুমরার দেশো রওরা ভিন জাতির কুনু মানষর গেছে পাওনা থাকলে, আর হে গরিব-দুখি, রুজি কামলা জন অইলে, তার উপরে জুলুম করিও না। ¹⁵সুরুজ ডুবার আগে তুমরা তার পাওনা মজুরি দিলাইও, হে তো গরিব মানুষ, অউ মজুরি দিয়াউ তার জিন্দেগি চলে। আরনায় মজুরির লাগি হে মাবুদর দরবারো ফরিয়াদ করলে, তুমরা গুনার ভাগি অইবায়।

¹⁶“পুয়া-পুড়ির অপরাধর লাগি তারার মা-বাফরে, বা মা-বাফর অপরাধে পুয়া-পুড়িরে কাতল করা যাইতো নায়। পরতেক জনে নিজর অপরাধর সাজা নিজে পাইবো।

¹⁷“কুনু বিদেশি মুছাফির বা এতিমর উপরে না-হক বিচার অইতে দিও না। কুনু ড়াড়ি বেটির ফিন্দিবার কাপড় বন্দক রাখিও না। ¹⁸মনো রাখিও, মিসর দেশো তুমরা গুলাম আছলায়, তুমরার মাবুদ আল্লায় তুমরারে হন থাকি আজাদ করি আনছইন। এরলাগি আমি তুমরারে ইতা কাম করার হুকুম দিরাম।

¹⁹“তুমরার জমিনর ধান কাটার বাদে, ধানর কুনু মুইট ফাউরিয়া গেলেগি, ইটা আনার লাগি আর ফিরত যাইও না। বিদেশি মুছাফির, এতিম আর ড়াড়ি বেটিন্তর লাগি ইটা দিলাইও, তেউ তুমরার মাবুদ আল্লায় তুমরার হকল কাম-কাজো রহম-বরকত দিবা। ²⁰জয়তুন গাছর ফল পাড়িবার কালো একই ডালর ফল দুইবার পাড়িও না। একবার পাড়ার বাদে যেতা রয়, ইতা বিদেশি মুছাফির, এতিম আর ড়াড়ি বেটিন্তর লাগি থইও। ²¹তুমরার আংগুর বাগানর এক লত থাকি দুই বার আংগুর পাড়িও না, একবার পাড়ার বাদে যেতা রয়, ইতা বিদেশি মুছাফির, এতিম আর ড়াড়ি বেটিন্তর লাগি থই দিও। ²²ফাউরিও না, তুমরা তো আগে মিসর দেশো গুলাম আছলায়। এরলাগি আমি তুমরারে ইতা করার হুকুম দিরাম।”

¹মুছা নবীয়ে তারারে আরো কইরা, “মানষর মাজে কাইজ্জা-ফসাদ লাগিয়া যুদি ইতা হাকিমর আদালতো যায়, তে হাকিম অকলে অপরাধি জনরে দুষি সাইবস্তো করবা, আর নি-অপরাধিরে খালাছ দিবা। ²অউ বিচারো দুষি জনরে ছিংলাদি মারার রায় দিলে, হাকিমে তারে মাটিত হুতাইয়া তার পাওনা মাইর তান নিজর ছামনে মারাইবা, ³অইলে চাল্লিশটার বেশি মারা যাইতো নায়। আরনায় নিজর জাতির এক ভাইরে সমাজর ছামনে বেইজ্জত করা অইবো।

⁴“ধান মাড়া দিবার কালো গরুর মুখো হুফি লাগাইও না।

নিআওলাদি ড়াড়ি বেটির বিয়া

⁵“এক পরিবারর হকল ভাইয়াইন একখানো রওয়ার কালো যুদি বিয়াতি কুনু ভাই মরিযায়, আর তার কুনু পুয়াইন না থাকে, তে তার ড়াড়ি বউয়ে তাইর দেওর ছাড়া দুছরা কেউরর গেছে বিয়া বইতো পারতো নায়। তাইর দেওরে তাইরে বিয়া করিয়া তার উপরে বর্তাইল দায়িত্ব আদায় করবো। ⁶তারার পয়লা পুয়ার জনম অইলে, ই পুয়া অউ মরা ভাইর ওয়ারিশ হিসাবে গইন্য অইবো, তেউ অউ ভাইর নাম বনি ইছরাইল থাকি মুছি যাইতো নায়। ⁷অইলে তাইর দেওরে যুদি তাইরে বিয়া করতো রাজি না অয়, তে তাই হউ গাউ বা টাউনর পাইঞ্চাইতর গেছে গিয়া হনর মুরব্বি অকলরে কইবো, আমার দেওরে আমারে বিয়া করতো রাজি নায়, হে তার মরা ভাইর নাম বনি ইছরাইলর মাজে জিন্দা রাখতো চায় না। আমার বেয়াপারে তার উপরে বর্তাইল দায়-দায়িত্ব আদায় করের না। ⁸তেউ হউ মুরব্বি অকলে তারে আনাইয়া বুজাইবা, এরবাদেও হে নিকা করতে রাজি না অইলে, ⁹অউ ড়াড়ি বেটিয়ে হউ মুরব্বি অকলর ছামনে, তার কাছাত গিয়া তার পাওর একখান জুতা নিজে খুলিয়া নিবোগি, আর তার মুখো ছেফ ফালাইয়া কইবো, আপন ভাইর বংশ যেগিয়ে বাচাইতো চায় না, অগুর দশা অলা অউক। ¹⁰বাদে অউ বেটার বংশরে বনি ইছরাইলর মাজে, জুতা আরাওরার বংশ নামে ডাকা অইবো।

সমাজর আরো হুকুম-আহকাম

¹¹“দুই বেটায় মারা-মারির কালো যুদি, একজনর বউ গিয়া তাইর জামাইরে হউ বেটার আত থাকি বাচানির নিয়তে, হউ বেটার পুরুষালি নফছো চিপিয়া ধরে, ¹²তে তুমরা হউ বেটির আত কাটিয়া ফালাই দিও। তাইরে কুনু দয়া করিও না।

¹³“মাপো টগিবার লাগি তুমরার থলির মাজে একই মাপর হুরু-বড় দুই পাথর রাখিও না। ¹⁴তুমরার ঘরো একই মাপর হুরু-বড় দুইটা হের-পেটু রাখিও না। ¹⁵তুমরার মাবুদ আল্লায় তুমরারে যে দেশর দখলদারি দিরা, হনো লাম্বা হায়াতি পাইবার লাগি, তুমরার মাপিবার পাথর আর হের-পেটুর উজন সঠিক রাখিও। ¹⁶কারন যেগিয়ে মাপর মাজে টগা-টগি করে, তুমরার মাবুদ আল্লায় তারে ঘিন করইন।

¹⁷“মিসর দেশ থাকি তুমরা বার অইয়া আইবার পথো, আমালেকী অকলে তুমরার লগে যে বেবহার করছিল, ইতা ফাউরিও না। ¹⁸আটিতে আটিতে তুমরার কেউ কেউ যেবলা হেরান অইয়া পিছে পড়ি গেছিল, অউ সময় আমালেকী অকলে আইয়া হামলা করছিল, তারা তো আল্লারেও ডরাইছে না। ¹⁹তুমরার আল্লা মাবুদে তুমরারে যে দেশর মালিকানা দিরা, হউ দেশর আশ-পাশর দুশমন অকল থাকি তাইন যেবলা তুমরারে শান্তি দিবা, হউ সময় তুমরা দুনিয়া থাকি আমালেকী অকলর নাম মিটাইলিবায়। ই হুকুম খান তুমরা কুনু দিনউ ফাউরিও না।

পয়লা ফসল আর দশ বাটর এক বাট দিবার নিয়ম

¹“ও বনি ইছরাইল হুনো, তুমরার মাবুদ আল্লায় তুমরারে যে দেশর মালিকানা দিরা, তুমরা যেবলা হউ দেশর দখল পাইয়া হনো বসতি করবায়, ²অউ সময় তুমরার মাবুদ আল্লার দেওয়া জমিনর হকল জাতর ফসল থাকি, পয়লা পাওয়া ফসলর একটা অংশ এক টুকরিত ভরিয়া আলগাইয়া থইও। আর তুমরার মাবুদ আল্লায় বায়তুল্লা শরিফ হিসাবে যে জাগারে পছন্দ করবা, অউ ফসল লইয়া হনো যাইও। ³গিয়া হনো আজির ইমাম ছাবরে কইও, আমরার মাবুদ আল্লায় আমরার ময়-মুরব্বির গেছে কছম খাইয়া যে দেশখান দিবার ওয়াদা করছলা, আমরা অখন অনো আইছি, আইয়া তান ছামনে আজির অইছি। ⁴তেউ ইমাম ছাবে তুমরার আত থাকি ফলর টুকরি নিয়া আল্লা মাবুদর কুরবানি খানার ছামনে থইবা। ⁵বাদে তুমরা পরতেকে তুমরার মাবুদ আল্লার ছামনে উবাইয়া কইও, আমরার খান্দানর মুল মুরব্বি হজরত ইয়াকুব আছলা একজন ইরামী মুছাফির, তাইন থুড়া কয়জন মানষরে লগে লইয়া মিসর দেশো গেছলাগি। গিয়া মিসর দেশো মুছাফির হালতে বসত করার কালো তান উছিলায় তারা এক মহান জাতি, আর বউত বড় বলআলা জাতি বনলা। ⁶বাদে মিসরর মানষে আমরার লগে বজ্জাতি করলা, আমরারে দুখ-কষ্ট দিয়া, আমরারেদি কঠিন গুলামি করাইলো। ⁷আমরা দুখ পাইয়া আমরার ময়-মুরব্বির মাবুদ আল্লার দরবারো কান্দিলাম। তেউ মাবুদে আমরার ফরিয়াদ হুনিয়া, আমরার দুখ-কষ্ট, কঠিন গুলামি, আর আমরার উপরর জুলুমর বায় নজর দিলা। ⁸আর তান বলআলা-মজবুত আত বাড়াইয়া, খুব ডর-খফ দেখাইয়া, কুদরতি লিলা-খেলা দিয়া আর আচানক গজব ঢালিয়া মিসর দেশ থাকি আমরারে বার করি আনলা। ⁹তাইনউ আমরারে অউ দেশো আনছইন, দুধ আর মউর ভান্ডার আলা আরামর অউ দেশ আমরারে দান করছইন। ¹⁰এরলাগি ও আমরার মাবুদ, তুমার দেওয়া জমিনর ফসলর পয়লা বাট লইয়া আমি তুমার ছামনে আজির অইছি। অখান কইয়া, তুমরার মাবুদ আল্লার ছামনে অউ টুকরি থইও, থইয়া তানরে সইজদা করিও। ¹¹তুমরার মাবুদ আল্লায় তুমরারে আর তুমরার পরিবাররে যতো নমুনার ভালাই করছইন, অতা মনো করিয়া তুমরা নিজে, লেবি খান্দানর হকলে, আর তুমরার লগে রওরা বিদেশি মুছাফির অকলে খুশি-বাসি করিও।

¹²“পরতি তিন বছর বাদে বাদে তুমরা ফয়-ফসলর দশ বাটর এক বাট লেবি খান্দানর মানষরে, বিদেশি মুছাফির অকলরে, এতিম আর ড়াড়ি বেটিন্তর মাজে বিলাই দিও। তেউ এরা পেট ভরি খাইয়া তুমরার দেশর মাজে আরামে রইবা। এরলাগি ইকটার নাম অইলো দশমাংশর বছর।26:12 আসলে ফসলর দশ বাটর এক বাট পরতি বছর দেওয়া অয়, অইলে অউ তিন বছর বাদে বাদে অউ দশমাংশর বছর অইলো একটা বিশেষ নিয়ম।¹³বাদে তুমরা পরতেকে তুমরার মাবুদ আল্লারে কইও, মাবুদ, আমি তুমার হুকুম মাফিক আমার রুজির পবিত্র বাটরে, আমার ঘর থাকি নিয়া লেবি খান্দানরে, মুছাফির অকলরে, এতিম আর ড়াড়ি বেটিন্তরে বিলাই দিছি। আমি তুমার কুনু হুকুমর খেলাফ করছি না, বা ফাউরিছি না। ¹⁴মুর্দার লাগি কান্দা-কাটি আর আহাজারি করার সময় আমি অউ পবিত্র অংশর কুনুতা খাইছি না, বা নাপাক হালতে ইতা বাড়ির বারে নিছি না, আর ইতার কুনু অংশ মুর্দার নামে দান-খয়রাতও করছি না। আমি আমার মাবুদ আল্লার হুকুম মাফিক চলছি, তুমার হুকুম মাফিক হকল কাম করছি। ¹⁵অখন, ও মাবুদ, তুমার পবিত্র বসত খানা থাকি, তুমার আরশে-আজিম থাকি তলেদি চাইয়া দেখো, আর তুমার খাছ প্রজা বনি ইছরাইলরে রহম-বরকত দেও। আমরার ময়-মুরব্বির লগে কছম করা ওয়াদা মাফিক, তুমি আমরারে দুধ আর মউর ভান্ডার আলা অউ যে দেশখান দান করছো, এর মাটিত তুমি রহম-বরকত নাজিল করো।

আল্লাই আপোস-চুক্তি

¹⁶“তুমরার মাবুদ আল্লায় আইজ তুমরারে অউ হুকুম দিরা, তুমরা তান বাতাইল নিয়ম-কানুন আর হুকুম-আহকাম মানিয়া চলিও। তুমরা দিলে-জানে আশিক বনিয়া ইতা আমল করিও। ¹⁷তুমরা তো আইজ স্বীকার করছো, অউ আল্লাউ অইলা তুমরার মাবুদ, তুমরা তান পথে চলবায়, তান হুকুম-আহকাম, তান শরিয়ত আর নিয়ম-কানুন মানবায়, তান কথা হুনবায়। ¹⁸এরলাগি মাবুদেও আইজ স্বীকার করছইন, তান ওয়াদা মাফিক তুমরা অখন তান প্রজা, তুমরাউ তান খাছ সম্পদ, তুমরা তান হকল হুকুম-আহকাম আমল করবায়। ¹⁹তাইন আরো কইরা, তান পয়দা করা তামাম জাতির উপরে তুমরারে বড় করবা। তুমরার ইজ্জত, সুনাম আর তারিফ, হকল জাতির উপরে রইবো। তান ওয়াদা মাফিক তুমরা অইবায় তুমরার মাবুদ আল্লার নামে এক পবিত্র প্রজা।”

ইবাল পাড়ো কুরবানি খানা বানাইও

¹মুছা নবীয়ে বনি ইছরাইলর মুরব্বি অকলরে লইয়া মানষরে কইলা, “আমি তুমরারে আইজ যেতা যেতা হুকুম দিরাম, তুমরা ইতা পুরাপুর আমল করিও। ²তুমরার মাবুদ আল্লায় তুমরারে যে দেশ দান কররা, জর্দান গাং পার অইয়া হারি তুমরা যেবলা হউ দেশো যাইবায়, যাওয়ার বাদে কয়েকটা বড় বড় পাথর খাড়া করি হাজাইয়া, ইতারে চুনা দিয়া পাকা করিও। ³আর অতার উপরে অউ তৌরাতর তামাম হুকুম-আহকাম লেখিও। বুজরায় নি, তুমরার ময়-মুরব্বির মাবুদ আল্লায়, দুধ আর মউর ভান্ডার আলা যে দেশখান তুমরারে দিবার ওয়াদা করছইন, ইন থাকি হউ দেশো গিয়া হারলে, ⁴জর্দান গাং পার অইয়া ইবাল পাড়র উপরে উঠিয়া, আমার বাতাইল আইজকুর হুকুম মাফিক তুমরা হউ পাথর অকল হাজাইয়া খাড়া করিও, আর ইতারে চুনা দিয়া পাকা করিও। ⁵আর হনো তুমরার মাবুদ আল্লার নামে পাথরদি একখান কুরবানি খানা বানাইও। অউ পাথরর মাজে লুয়ার কুনু আতিয়ার লাগাইও না। ⁶আস্তা আস্তা পাথর দিয়া তুমরার মাবুদ আল্লার অউ কুরবানি খানা বানাইও, বানাইয়া এর উপরে তুমরার মাবুদ আল্লার নামে জালাইল কুরবানি আদায় করিও। ⁷আর ছালামতি কুরবানিও আদায় করিও। অউ কুরবানির গোস্ত খাইয়া তুমরার মাবুদ আল্লার ছামনে খুশি-বাসি করিও। ⁸আর চুনা লেপা হউ পাথরর উপরে তৌরাতর অউ হুকুম-আহকাম অকল খুব সুন্দর করি লেখিও।”

⁹বাদে মুছা নবীয়ে লেবি খান্দানর ইমাম অকলরে লইয়া হকল বনি ইছরাইলরে কইলা, “ও বনি ইছরাইল, নিরাই অও, আর আমার কথা হুনো, অখন তো তুমরা নিজর মাবুদ আল্লার খাছ প্রজা বনিগেছ। ¹⁰তে তুমরা তান হুকুমে চলিও, আর আমি আইজ যেতা নিয়ম-কানুন, হুকুম-আহকাম জানাইলাম, ইতা আমল করিও।”

ইবাল পাড় থাকি লান্নতি বুলি

¹¹মুছা নবীয়ে অউ দিন মানষরে হুকুম দিলা, কইলা, ¹²“জর্দান গাং পার অইয়া হারলে অউ সময় শিমিয়ন, লেবি, এহুদা, ইছাখর, ইউছুফ, আর বিন-ইয়ামিন খান্দানর মানুষ অকল গিয়া নেক দোয়ার নিশানা হিসাবে গরিছিম পাড়র উপরে উঠিও। ¹³আর বদদোয়ার নিশানা হিসাবে রুবেন, ছাদু, আশির, সবুলন, দান আর নপ্তালি খান্দানর মানুষ গিয়া ইবাল পাড়র উপরে উঠিও। ¹⁴বাদে লেবি খান্দানর মানুষ অকল উবাইয়া, বনি ইছরাইলর তামাম মানষরে জুরে জুরে চিল্লাইয়া কইবায়,

¹⁵“যে মানষে লাকড়ি বা পাথর খুদিয়া, বা ধাতু গলাইয়া কুনু মুর্তি বানায়, আর পুজা করার নিয়তে অগুরে নিয়া লুকাইল জাগাত থয়, হে তো লান্নতি। ই মুর্তিরে তো মাবুদে ঘিন করইন, ইতা খালি কামারর আতর কাম। ইখান হুনিয়া হকলে কইও, আমিন।

¹⁶“মা-বাফরে যেগিয়ে বেইজ্জত করে, হে লান্নতি। ইখান হুনিয়া হকলে কইও, আমিন।

¹⁷“দখলদারির নিয়তে জমিনর আইল বা সীমানা খুটি যেগিয়ে হরায়, হে লান্নতি। ইখান হুনিয়া হকলে কইও, আমিন।

¹⁸“আন্দা মানষরে যেগিয়ে ভুল পথ দেখাই দেয়, হে লান্নতি। ইখান হুনিয়া হকলে কইও, আমিন।

¹⁹“বিদেশি মুছাফির, এতিম, আর ড়াড়ি বেটিন্তর বিচার-সালিশিত যেগিয়ে বে-ইনছাফি করে, হে লান্নতি। ইখান হুনিয়া হকলে কইও, আমিন।

²⁰“হাতন মাʼর লগে যেগিয়ে জিনা করে, হে আপন বাফরে বেইজ্জত করে। হে তো লান্নতি। ইখান হুনিয়া হকলে কইও, আমিন।

²¹“কুনু পশুর লগে যেগিয়ে জিনা করে, হে তো লান্নতি। ইখান হুনিয়া হকলে কইও, আমিন।

²²“যেগিয়ে নিজর বইনর লগে, হাতন মাʼর, বা হাতন বাফর তরফা বইনর লগে জিনা করে, হে তো লান্নতি। ইখান হুনিয়া হকলে কইও, আমিন।

²³“নিজর হড়ির লগে যেগিয়ে জিনা করে, হে তো লান্নতি। ইখান হুনিয়া হকলে কইও, আমিন।

²⁴“যেগিয়ে লুকাইয়া কুনু মানষরে খুন করে, হে তো লান্নতি। ইখান হুনিয়া হকলে কইও, আমিন।

²⁵“নি-অপরাধি মানষরে খুন করার চুক্তিয়ে যেগিয়ে টেকা খায়, হে তো লান্নতি। ইখান হুনিয়া হকলে কইও, আমিন।

²⁶“অউ শরিয়তর কুনু হুকুম-আহকাম যেগিয়ে মানে না, যেগিয়ে ইতা আমল করে না, হে তো লান্নতি। ইখান হুনিয়া হকলে কইও, আমিন।

আল্লার বাইধ্যতার লাগি রহমত

¹“ও বনি ইছরাইল, আমি আইজ তুমরারে যেতা হুকুম-আহকাম দিরাম, অতা আমল করার নিয়তে তুমরা যুদি নিজর মাবুদ আল্লার কালামরে খিয়াল করি মানো, তে তুমরার মাবুদ আল্লায় দুনিয়ার হক্কল জাতির উপরে তুমরারে উচা করবা। ²তুমরার মাবুদ আল্লার কালাম মানিয়া চললে, তুমরা অউ রহমত পাইবায়, আর অউ রহমত অকল হামেশা তুমরার লগে লগে রইবো,

³“তুমরার বসত-বাড়ি আর খেত-খামারর মাজে রহম-বরকত পাইবায়।

⁴“তান রহমতে তুমরা বউত আওলাদ পাইবায়, জমিনো বউত ফসল ফলিবো, গরু-ছাগলে বউত বাইচ্চা দিবা।

⁵“তুমার উগারো আর তুমার চাউলর মটকিত বরকত পাইবায়।

⁶“হকল হালতে হকল কামো তুমি রহম-বরকত পাইবায়।

⁷“দুশমনির নিয়তে যেতায় তুমরার লগে লাগবা, মাবুদে ইতারে তুমরার গেছে আরাইবা। তারা এক দুয়ারেদি তুমরারে মারাত আইলে, সাত দুয়ারেদি বাগিবা।

⁸“তুমরার উগারর মাজে মাবুদে বরকত দিবা, তুমরা যে কামো আত দিবায়, অউ কামোউ তাইন বরকত দিবা। তুমরার মাবুদ আল্লায় তুমরারে যে দেশ দান কররা, হনো তুমরারে রহম-বরকত দিবা।

⁹“তুমরা যুদি তুমরার মাবুদ আল্লার হুকুম-আহকাম মানিয়া, তান বাতাইল পথে চলো, তে তাইন কছম খাইয়া যেলা ওয়াদা করছইন, অলা তান নিজর পবিত্র প্রজা হিসাবে তুমরারে কাইম করবা। ¹⁰আর আস্তা দুনিয়ার হকল জাতিয়ে দেখবা, তুমরাউ অইলায় মাবুদর খাছ মানুষ, দেখিয়া তারা হকলে তুমরারে ডরাইবা।

¹¹“তুমরার মাবুদ আল্লায় তুমরার ময়-মুরব্বির গেছে যে দেশ দিবার লাগি কছম খাইছলা, অউ দেশো তাইন তুমরার বউত ভালাই করবা, তুমরারে বউত আওলাদ দিবা, তুমরার পশুর পালাইন্তে বউত বাইচ্চা দিবা, জমিনো বউত ফসল ফলিবো। ¹²তুমরার মাবুদ আল্লায় তান আছমানি রহমতর দুয়ার খুলিয়া দিবা, জরুর মাফিক মেঘ-পানি দিয়া তুমরার আতর হকল কামর মাজে রহম-বরকত দিবা, বউত জাতিরে তুমরা টেকা-পয়সা আওলাত দিবায়, অইলে তুমরা কুনু আওলাত নিবার দরকার অইতো নায়। ¹³মাবুদে তুমরারে অলা বানাইবা, যাতে তুমরা হকলর মাথার উপরে রও, কেউরর পাওর তলাত না থাকো। তুমরা খালি তুমরার মাবুদ আল্লার অউ হুকুম-আহকাম অকল খুব যতন করিয়া আমল করিও, যেতা আইজ আমি তুমরারে কইয়ার, তেউ তুমরা হকলর উপরে রইবায়, তলে পড়তায় নায়। ¹⁴আর আইজ আমি তুমরারে যেতা হুকুম দিয়ার, আমার অউ তালিম থাকি তুমরা ডাইনে-বাউয়ে হরিও না। কুনু দেব-দেবীর খরেদি দৌড়াইয়া ইতার পুজা করাত লাগিও না।

নাফরমানির লাগি লান্নত

¹⁵“অইলে তুমরা যুদি তুমরার মাবুদ আল্লার হুকুম না মানো, তান যেতা হুকুম-আহকাম আর নিয়ম-কানুন আইজ আমি জানাইছি, তুমরা খুব খিয়ালি অইয়া ইতা না মানলে, তুমরার উপরে অউ লান্নত অকল পড়বো, ইতা হামেশা তুমরার লগে লগে রইবো:

¹⁶“তুমরার বসত-বাড়ি, খেত-খামার হকল জাগাত লান্নত পড়বো।

¹⁷“তুমরার উগারো আর চাউলর মটকিত লান্নত পড়বো।

¹⁸“তুমরার হুরুতা কম জন্মিবা, জমিনো ফয়-ফসল কমিযিবো, গরু-ছাগলে বাইচ্চা কম দিবা, অউ নমুনায় তুমরার উপরে লান্নত পড়বো।

¹⁹“ঘরো বা বাইরা হকল খানো তুমরা পরতি দিন লান্নত পাইবায়।

²⁰“নাফরমানি কাম করিয়া মাবুদর গেছ থাকি হরি যাওয়ায়, তুমরার হকল কাম-কাজর মাজে তাইন লান্নত দিবা। বালা-মছিবতো পড়িয়া, আল্লাই গজবর জাতায়, তুমরা এক্কেরে বিনাশ অওয়ার আগ পর্যন্ত, আস্তে আস্তে খালি ক্ষয় অইবায়। ²¹তুমরা যে দেশর দখলদারি পাইরায়, মাবুদে হনো তুমরার উপরে বেমার ছাড়িবা, বেমারে তুমরা মরতে মরতে হউ দেশো থাকি বিনাশ অইবায়। ²²মাবুদে তুমরার শরিলো নষ্ট অওয়া বেমার, বাক্কা তাপ আর জ্বলা-পুড়া, অতা বেমারদি তুমরার উপরে গজব দিবা। আর মরকি, হুকনা গরম বাতাস, ফসলর হুনা-কানি হুকাই যাওয়ার বেমার আর পাতা মরা, অতা গজব অকল তুমরার জমিনো দিবা। তুমরা মরিয়া ফুড়ানির আগ পর্যন্ত ই গজব তুমরার খরে খরে রইবো। ²³তুমরার মাথার উপরর আছমান অইবো পিতলর লাখান শক্ত, আর পাওর তলর জমিন অইবো লুয়ার লাখান কঠিন। ²⁴মাবুদে মেঘর বদলা তুমরার দেশো আছমান থাকি ধুইল ছাড়িবা, তুমরা বিনাশ অওয়ার আগ পর্যন্ত ইতা হামেশা পড়াত রইবো।

²⁵“মাবুদে তুমরার দুশমন অকলর মুকাবিলাত তুমরারে আরাইবা, এরারে এক পথেদি মারাত গেলে সাত পথেদি বাগিবায়। তুমরার দশা দেখিয়া জগতর হকল জাতিয়ে ডরাইয়া কাপিবা। ²⁶তুমরার লাশ অইবো পশু-পাখিন্তর খুরাক। ইতারে খেদানির লাগি কেউ রইতো নায়। ²⁷মাবুদে হউ মিসরী অকলর লাখান তুমরার গতরো গজবি বিষ-ফুরি, টিউমার, ফুট-খাউজলি বেমার দিবা, ইতা থাকি কেউ তুমরারে শিফা করার খেমতা নাই। ²⁸তাইন তুমরারে পাগল, আন্দা আর বেদিশা বানাইবা। ²⁹আন্দায় যেলা আন্দারির মাজে আতাই আতাই আটে, তুমরা দিনর বালা অলা আটিবায়, তুমরার কুনু কামউ কামিয়াব অইতো নায়। তুমরার উপরে হামেশা জুলুম আর লুট-তরাজ চলবো, ইতা থাকি বাচানির লাগি কেউ আইতো নায়।

³⁰“শাদি করার লাগি যে কইনার লগে তুমার আখত অইবো, আরক বেটায় আইয়া অউ কইনার ইজ্জত লুটিবো। তুমি ঘর বানাইবায়, অইলে ঘরো বসত করতায় পারতায় নায়। আংগুরর বাগান করিয়া, ফল খাওয়া কপালো জুটতো নায়। ³¹তুমরার চখুর ছামনে তুমরার গরু জবো করা অইবো, অইলে এক টুকরা গোস্তও তুমরার পেটো যাইতো নায়। তুমরার গাধারে তুমরার আত থাকি কাড়িয়া নেওয়া অইবো, ইতা আর ফিরত পাইতায় নায়। তুমরার মেড়া-ছাগল তুমরার দুশমনর আতো যাইবো, অতা বিপদ থাকি বাচানির লাগি কেউ আগুয়াই আইতো নায়। ³²তুমরার পুয়া-পুড়িন দুছরা জাতির আতো আটক অইবা, তারার আশায় বার চাইতে চাইতে তুমরার চখুর জুতি নষ্ট অইবো, অইলে কুন্তা করার সুযোগ অইতো নায়। ³³তুমরার অচিনা ভিন জাতিয়ে তুমরার খেতর ফয়-ফসল, আর তুমরার মেনতর হকল মজুরি লুটিয়া নিবোগি, তুমরা হারা জিন্দেগি খালি জুলুম-মছিবত পাইবায় আর চুরমার অইবায়। ³⁴তুমরার চউখে ই লাখান আরো যেতা দেখবায়, দেখিয়া মাথা খারাপ অইবো। ³⁵মাবুদে তুমরার উরাতো আর আটুত শুরু করিয়া, পাওর তলা থাকি মাথার তালু পর্যন্ত আস্তা গতরো বিষ-ফুরি দিবা, ইতার কুনু শিফা নাই।

³⁶“তুমরার উপরে বাদশাই করার লাগি তুমরা যারে গদিত বওয়াইবায়, মাবুদে হউ বাদশা আর তুমরারে বন্দি করাইয়া অমন এক জাতির আতো ফালাইবা, যেতার নামউ তুমরা হুনছো না, তুমরার ময়-মুরব্বিয়েও হুনছইন না। হনো গিয়া তুমরা পাথর আর লাকড়িদি বানাইল মুর্তির পুজা করবায়। ³⁷মাবুদে তুমরারে যেতা জাতির মাজে খেদাই দিবা, হতায় তুমরারে দেখিয়া চমকিযিবা, তুমরার দশা চিড় আর টাট্টা-মশকরার বিষয় অইবো।

³⁸“তুমরা খেত করবায় বউত, অইলে ফসল পাইবায় থুড়া, কারন পংগপালে খাইলিবা। ³⁹তুমরা আংগুরর বাগান করিয়া জায়-যতন করবায়, অইলে কিড়া আর পুকে বাগান খাইলিবো, এরলাগি তুমরা আংগুরও পাইতায় নায়, এর শরবতও খাইতায় পারতায় নায়। ⁴⁰তুমরার হারা দেশ জয়তুন গাছে ভরা রইলেও, জয়তুন ফল জরিয়া পড়িযিবো, এরলাগি তুমরার শরিলো তেল মাখা অইতো নায়। ⁴¹তুমরার যতো আওলাদ অইবা, ইতা তুমরার গেছে রইতা নায়, ইতারে বন্দি করি নেওয়া অইবো। ⁴²গজবি মউয়া-পুকর পাল আইয়া তুমরার গাছ-গাছালি আর ফসল খাইলিবা।

⁴³“তুমরার মাজে বসত কররা ভিন জাতির মানুষ অকল আস্তে আস্তে উপরেদি উঠবা, আর তুমরা তলেদি লামবায়। ⁴⁴তারা তুমরারে টেকা-পয়সা আওলাত দিবা, তুমরা তারারে আওলাত দিবার সাইধ্য অইতো নায়। তারা রইবা তুমরার মাথার উপরে, তুমরা রইবায় তারার পাওর তলাত।

⁴⁵“অউ তামাম লান্নত তুমরার উপরে পড়বো। তুমরার মাবুদ আল্লার খুশি মাফিক না চলায়, তান হুকুম-আহকাম আর নিয়ম-কানুন না মানায় অউ লান্নত অকল তুমরার লগে লাগাইল রইবো। ইতায় তুমরারে জাতিয়া ধরিয়া বিনাশ করিলাইবো। ⁴⁶অউ লান্নত অকল তুমরা আর তুমরার আওলাদর উপরে, যুগ যুগ ধরি কুদরতি হুশিয়ারি হিসাবে রইবো। ⁴⁷তুমরা নিজর সুদিনর কালো মনর খুশিয়ে আশিক বনিয়া নিজর মাবুদ আল্লার গুলামি করছো না, ⁴⁸এরলাগি মাবুদে তুমরার খরেদি দুশমন লাগাইবা, তুমরা পেটর ভুকে, পানির পিয়াছে, অভাব-অনটনে হকির বনিয়া তারার গুলামি করবায়। মাবুদে তুমরার কান্দো লুয়ার জুয়াল ফিন্দাইবা, অউ জুয়ালির তলে তুমরার বিনাশ অইবো।

⁴⁹“মাবুদে বউত দুরই থাকি, জগতর হেশ সীমানা থাকি, অলা এক জাতিরে চিলর নমুনায় উড়াইয়া আনবা, যেতার মুখর বুলি তুমরা বুজতায় নায়। ⁵⁰ইতার গঠন অইবো বদছুরত, ইতায় কুনু বুড়া-বুড়িরে ইজ্জত দিতা নায়, আর হুরুতারেও মায়া করতা নায়। ⁵¹তারা তুমরার পশুর বাইচ্চা আর খেতর ফসল খাইলিবা, হেশ-মেশ তুমরা বিনাশ অইবায়। তারা কুনুজাত ফসল, নয়া কুনু আংগুরর শরবত, তেল, গরু-ছাগলর বাইচ্চা, কুন্তাউ তুমরার লাগি থইতা নায়, হেশ-মেশ তুমরা বিনাশ অইযিবায়। ⁵²তারা তুমরার টাউন অকল বেরিয়া রাখবা, আর তুমরা যেতার উপরে ভরসা কররায়, তুমরার হউ উচা উচা মজবুত বাউন্ডরির ওয়াল অকল হেশ-মেশ ভাংগিয়া পড়িযিবো। তুমরার মাবুদ আল্লায় তুমরারে যে দেশর দখলদারি দিরা, হউ দেশর হক্কল গাউ আর টাউন তারা বেরিলিবা।

⁵³“আর দুশমনে বেরিয়া রাখার কালো তুমরা অতো বড় মছিবতো পড়বায়, এরলাগি তুমরার নিজর পুয়া-পুড়িরে খাইলিবায়, তুমরার মাবুদ আল্লার দেওয়া আওলাদর গোস্ত নিজে খাইবায়। ⁵⁴হউ সময় তুমরার মাজে যেরা ভালা মানুষ, যেরা সুখে আর আরাম-আয়েশে আছে, তারার মন-মিজাজও অলাখান অইযিবো, তারা আপন ভাইরে, নিজর বউরে আর বাকি পুয়া-পুড়িরে কুনু দয়া-মায়া করতো নায়। ⁵⁵হে তার যে আওলাদর গোস্ত খাইবো, ইতার একখান টুকরাও তারারে দিতো নায়। কারন দুশমনে যেবলা তুমরার টাউন অকল বেরিয়া রাখবা, অউ সময় তুমরার পেটর ভুক মিটানির লাগি নিজর হুরুতার গোস্ত ছাড়া আর কুনুতাও মিলতো নায়। ⁵⁶তুমরার মাজর খুব নরম দিলর যে বেটি মানুষ আছে, যে বেটিয়ে সুখিলা জিন্দেগির দায় কুনুদিন মাটিত পাও ফালাইছে না, হউ বেটিয়েও তাইর জানর টুকরা জামাই বা আওলাদর বায় কুনু দয়া-মায়া করতো নায়। ⁵⁷দুশমনে তুমরারে বেরিয়া রাখায় পেটর ভুকর জালায় আওলাদর জনম দেয়ার লগে লগে, অউ মাʼয় নিজর আওলাদর গোস্ত, আর পেটো থাকি বার অইল পুয়াতি-ফুল পর্যন্ত নিজে নিজে লুকাইয়া খাইলিবো।

⁵⁸“অউ কিতাবর মাজে শরিয়তর যতো হুকুম-আহকাম লেখা আছে, ইতা যুদি তুমরা খুব খিয়াল করিয়া আমল না করো, তুমরার মাবুদ আল্লার মহিমা আর ডর-খফ আলা নামর ইজ্জত না করো, ⁵⁹তে মাবুদে তুমরা আর তুমরার আওলাদ অকলরে বেজুইতা বেমার দিবা, অউ বেমারে তুমরা লাম্বা সময় ভোগান্তি করবায়। ⁶⁰মিসরো থাকতে বেজুইতা যতো বেমার-আজার দেখিয়া তুমরা কাপিতায়, হউ বেমার-আজার অখন তুমরার উপরে দিবা, ইতায় তুমরার পিছ ছাড়তো নায়। ⁶¹আর অউ তৌরাত কিতাবো যেতা বেমারর নাম লেখা নাই, অলা কঠিন গজবি আরো বউত বেমার-আজার মাবুদে তুমরার উপরে ছাড়িবা, তুমরা বিনাশ অওয়ার আগ পর্যন্ত ইতা চালু রইবো। ⁶²তুমরা নিজর মাবুদ আল্লার হুকুম না মানায়, তুমরার মানষর পরিমান অখন আছমানর তেরার লাখান বউত বেশি অইলেও, ইতা মরিয়া খুব থুড়া বাচিয়া রইবা। ⁶³মাবুদে খুশি অইয়া তুমরারে যেলা আয়-উন্নতি দিয়া বাড়াইছলা, তুমরার মানষর পরিমান বড় করছলা, হউ লাখান খুশি করিয়া অখন হিরবার তুমরারে বিনাশ করিয়া নিপাত করবা। তুমরা অখন যে দেশর দখলদারি পাইরায়, হউ দেশ থাকি তুমরারে কাড়িয়া নেওয়া অইবো।

⁶⁴“বাদে জগতর এক কিনারা থাকি আরক কিনারা পর্যন্ত, হকল জাতির মাজে তুমরারে ছিতরাই দিবা। হনো রইয়া তুমরা আর তুমরার ময়-মুরব্বির অচিনা দেব-দেবীর সেবা করবায়, লাকড়ি আর পাথরর মুর্তিরে পুজা দিবায়। ⁶⁵হউ জাতি অকলর লগে রইয়া তুমরার শান্তি মিলতো নায়, তুমরার আরামর লাগি কুনু জাগা রইতো নায়। হনো মাবুদে তুমরার মনর মাজে হায়-হুতাশ বাড়াইবা, তুমরার চখুর হকল আশা-ভরসা, আর দিলর শখরে তাইন নিরাশ, নিস্তেজ করবা। ⁶⁶কিতা ঘটিবো বা না ঘটিবো অতা চিন্তায় তুমরার দিন গুজরিবো, দিন-রাইত হামেশা খালি জানর ডর-ভয়ে অশান্তিত রইবায়, বাচিয়া রওয়ার কুনু নিচ্চয়তা পাইতায় নায়। ⁶⁷তুমরা মনর ডরে, জানর মাইরে, চউখে কুনু কুল-কিনার না দেখিয়া খালি হায় হায় করবায়। বিয়ান অইলে কইবায় জলদি রাইত অউক, আর রাইত অইলে কইবায় জলদি দিন অউক। ⁶⁸হউ যে মিসর দেশর বেয়াপারে আমি কইছলাম, তুমরা হিনো আর যাওয়া অইতো নায়। অইলে হউ গজবর সময় মাবুদে তুমরারে জাজো করি হিরবার মিসর দেশো নেওয়াইবা, নিয়া হারলে তুমরা গুলামি করার লাগি হনো বিকি খাইতায় চাইবায়, অইলে কেউ তুমরারে কিনতো নায়।”

হজরত মুছা (আঃ) অর তিন নম্বর নছিয়ত (২৯-৩০ রুকু)

¹মাবুদে মুছা নবীর মারফতে তুর পাড়র উপরে, বনি ইছরাইল জাতির লগে আগে এক আপোস-চুক্তি করছলা, অখন মোয়াব দেশো মাবুদে দুছরা আপোস-চুক্তি বওয়াল করলা। ইতা অইলো অউ আপোস-চুক্তির শর্ত অকল।

হজরত মুছায় হিরবার আল্লাই আপোস-চুক্তি বওয়াল করলা

²মুছা নবীয়ে হকল বনি ইছরাইলরে আনাইয়া কইলা, “আল্লা মাবুদে মিসরর ফেরাউনর লগে, তার উজির-নাজিরর লগে, আর মিসরর হক্কলতার লগে যেতা করছিলা, ইতা তো তুমরা দেখছো। ³বড় বড় আজব ঘটনাত জয়ী অওয়া, মাবুদর নানান লিলা-খেলা, আর কুদরতি কাম তো তুমরা নিজর চউখে দেখছো। ⁴অইলে ইতার মর্ম বুজার মতো মন, দেখার মতো চউখ, হুনার মতো কান, মাবুদে অখনও তুমরারে দিছইন না। ⁵আমি চাল্লিশ বছর ধরি তুমরারে অউ মরুভুমির মাজে ছফর করাইছি, এরমাজে তুমরার ফিন্নর কাপড় নষ্ট অইছে না, পাওর জুতাও ছিড়ছে না। ⁶কুনু ভাত-রুটিও খাইছো না, আংগুরর শরবত বা কুনুজাত শরাব তুমরা খাইতায় পাইছো না। ইতা হকলতা তো তাইনউ করছইন, যাতে তুমরা বুজো, তাইনউ তুমরার মাবুদ আল্লা।

⁷“তুমরা হউ জাগাত যাওয়ার বাদে, হিশবনর বাদশা সীহোন আর বাশনর বাদশা উজে আমরার লগে লাড়াই করাত আইছলা, আইলে আমরা তারারে আরাই দিলাম। ⁸তারার দেশরে দখলো আনিয়া আমরা আস্তা রুবেন খান্দান, আস্তা ছাদু খান্দান আর মানশা খান্দানর অর্ধেক মানষরে বাটিয়া দিলাম। ⁹এরলাগি তুমরা অউ আপোস-চুক্তির হকল হুকুম-আহকাম খুব খিয়ালি অইয়া মানিও, মানলে হকল কাম-কাজো তুমরার ফায়দা অইবো।

¹⁰“তুমরার মাবুদ আল্লার ছামনে আইজ তুমরা হকল আইয়া আজির অইছো, তুমরার খান্দানর আমির অকল, ময়-মুরব্বি অকল, অফিসার অকল, আর বনি ইছরাইলর হকল বেটাইন। ¹¹তুমরার লগে অইয়া তুমরার বউ, পুয়া-পুড়িন, আর ভিন জাতির হউ মানুষ অকল যেতায় তুমরার দারু ফাড়ইন আর পানি বইয়া আনইন তারাও আইছইন। ¹²তুমরা হকল অনো আইয়া আজির অইছো, তুমরার মাবুদ আল্লায় কছম খাইয়া যে আপোস-চুক্তি আইজ বওয়াল কররা, অউ আপোস-চুক্তিত তুমরা নিজে নিজে আইজ হামাইরা। ¹³আর মাবুদে আগর আমলর তুমরার ময়-মুরব্বি ইব্রাহিম, ইছহাক, আর ইয়াকুব নবীর লগে কছম খাইয়া যে ওয়াদা করছলা, হউ ওয়াদা মাফিক অখন থাকি তাইন তুমরার আল্লা, আর তুমরা তান খাছ প্রজা বনিয়া রইতে রাজি আছো, অখান মানাত আইছো। ¹⁴তে আমি অখন যে আপোস-চুক্তি আর ওয়াদা বওয়াল কররাম, ইতা খালি তুমরার লগে নায়, ¹⁵বরং তুমরা যতো জন অখন আমরার মাবুদ আল্লার ছামনে আজির আছো, তুমরার লগে, আর তুমরার যেতা আওলাদর জনম অখনও অইছে না, তারার লগেও অউ আপোস-চুক্তি জারি রইবো।

¹⁶“তুমরা নিজেউ তো জানো, মিসর দেশো আমরা কিলা দিন কাটাইছি, বাদে কতো দেশ আর কতো পথ-ঘাট পার অইয়া অনো আইয়া আজিছি। ¹⁷তুমরা তো অতা দেশর মানষরে সোনা, রুপা, পাথর আর লাকড়িদি বানাইল জঘইন্য দেব-দেবীর মুর্তি অকলর পুজা করতে দেখছো। ¹⁸তুমরা খুজ-খবর লইয়া দেখো, তুমরার মাজে যানু অউ লাখান কুনু বেটা বা বেটি, কুনু বংশ বা খান্দান না থাকে, যেতায় তুমরার মাবুদ আল্লারে বাদ দিয়া হতা দেব-দেবীর পুজা করার লাগি খিয়ালি অইযায়। যুদি ইলা কুনুগু থাকে, তে অগু অইলো অলা বিষাক্ত গাছর জড়, যে জড়র ডেম অউ বিষাক্ত তিত্তা গাছ বনবো। ¹⁹যেতা মানষে অউ কছম খাওয়ার কথা হুনিয়াও যুদি তার নিজরে খুব কপালি মনো করে, আর বেপরোয়া অইয়া চললেও কুনু সমস্যা নাই ইলা মনো করে, তে তুমরার ভালা-বুরা দুইওটার উপরে অতা মানষে সর্বনাশ ডাকিয়া আনবো। ²⁰মাবুদে কুনুমন্তেউ এরারে মাফি দিতা নায়, এরার উপরে তান গুছার আগুইন দাউ দাউ করি জলিয়া উঠবো। আর অউ কিতাবর মাজে যতো লাখান লান্নতর কথা লেখা আছে, ইতা হক্কলতা এরার উপরে ঢালিবা, মাবুদে আস্তা দুনিয়া থাকি তারার নাম মিটাইলিবা। ²¹তাইন দুখ-মছিবতো ফালানির লাগি হক্কল বনি ইছরাইল থাকি তারারে বাছিয়া আলগ করবা, অউ তৌরাত কিতাবর হুকুম-আহকামর মাজে যতো লাখান লান্নতর কথা লেখা আছে, ইতা অতা মানষর উপরে ছাড়িবা।

²²“আর মাবুদে অউ দেশর উপরে যতো নমুনার লান্নতি গজব আর বেমার-আজার ঢালিবা, ইতা দেখিয়া তুমরার আওলাদ অকলে আর ভিন দেশ থাকি আওয়া মুছাফির অকলে তুমরার ই দশা দেখিয়া কারন জিকাইবা। ²³নুন আর গন্ধকে আস্তা দেশর মাটি জলিযিবো, ই মাটিত কুন্তা ফলিতো নায়, কুন্তা লাগাইলে অইতো নায়, মাটির উপরে কুনুজাতর ঘাস, লতা-পাতা জন্মিতো নায়। ইখান হউ লান্নতি দেশ ছাদুম, আমুরা, অদমা আর ছবয়িমর লাখান বনিযিবো, মাবুদর গুছার আগুইন জলিয়া উঠায় তাইন তো ইতারে বিনাশ করিলিছলা। ²⁴অতা দেখিয়া হকল জাতির মানষে জিকাইবা, মাবুদে ই দেশর হালত কেনে ইলা করলা? তাইন কেনে অতো বড় গুছা করলা?

²⁵“তেউ মানষে জুয়াপ দিবা, অউ জাতির মানষে তারার ময়-মুরব্বির মাবুদ আল্লার বওয়াল করা হউ আপোস-চুক্তি বাদ দিলাইছে, মিসর দেশ থাকি তারারে বার করি আনার বাদে যে চুক্তি বওয়াল করা অইছিল। ²⁶তারা হউ মাবুদরে বাদ দিয়া তারার গেছে নয়া, অতা দেব-দেবীর পুজাত লাগছে, যেতা দেব-দেবীর কথা মাবুদে কইছইন না, অতার গেছে মাথা নোয়াইয়া সইজদা করাত লাগছে। ²⁷এরলাগি অউ দেশর উপরে মাবুদর গুছার আগুইন জলিয়া উঠছে, তাইন অউ কিতাবো লেখা হকল নমুনার লান্নতি গজব ই দেশো নাজিল করছইন। ²⁸গুছার আগুইনে জলিয়া, তারার উপরে বেজুইতা গজব ঢালিয়া তারারে অউ দেশ থাকি জড়ে-ফড়ে তুলিয়া তারারে ভিন দেশো নিয়া আছাড় মারি ফালাইছইন, আর অখনও তারা হনো আছইন।

²⁹“বাতুনি হকলতাউ তো আমরার মাবুদ আল্লার আতো, অইলে জাইর করা হকলতা চিরকালর লাগি আমরা আর আমরার আওলাদ অকলর আতো, যাতে আমরা অউ শরিয়তর হকল হুকুম-আহকাম আমল করতাম পারি।”

আল্লা মাবুদর গেছে ফিরিয়া আওয়ার ফল

¹হজরত মুছায় কইরা, “ও বনি ইছরাইল হুনো, আমি তুমরার ছামনে যে রহমত আর লান্নতর পথ দেখাইছি, ইতা হকলতা তুমরার উপরে ফলিবো। ফলিয়া হারলে তুমরার মাবুদ আল্লায় তুমরারে যেতা জাতি অকলর মাজে ছিতরাই দিবা, তারার লগে বসত করার বালা তুমরা ইতা খিয়াল করিও। ²হউ সময় তুমরা আর তুমরার আওলাদ অকল যুদি তুমরার মাবুদ আল্লার গেছে ফিরিয়া আও, আর আইজ আমি তুমরারে যেতা হুকুম-আহকাম জানাইরাম, ইতা দিলে-জানে আমল করো, ³তে হউ সময় মাবুদে তুমরারে বন্দি হালত থাকি আজাদ করবা। তাইন তুমরারে মায়া-মমতা করবা, আর তাইন যেতা জাতির মাজে তুমরারে ছিতরাইয়া দিছলা, অতা থাকি হিরবার তুমরারে তুকাইয়া আনবা। ⁴দুনিয়ার আখেরি কিনারাতও যুদি তুমরারে ফালাইল অয়, তে হনো থাকি তুমরার মাবুদ আল্লায় তুমরারে তুকাইয়া আনবা। ⁵তুমরার ময়-মুরব্বির দেশো তুমরারে ফিরাইয়া আনবা, ইতা হিরবার তুমরা দখল করবায়। তাইন তুমরারে বউত বাড়াই দিবা, আর তুমরার ময়-মুরব্বির চাইতেও তুমরার আওলাদর পরিমান আরো বাড়াইবা। ⁶তুমরা যাতে পুরাপুর দিলে-জানে আল্লার মহব্বতর আশিক বনিয়া বাচিয়া রও, অউ নিয়তে তুমরা আর তুমরার আওলাদ অকলর দিলর মছলমানি তাইন নিজে দিবা। ⁷আর অউ লান্নত অকল তুমরার মাবুদ আল্লায় তুমরার হউ দুশমনর উপরে ফালাইবা, যেতায় তুমরারে ইংসা আর জুলুম করইন। ⁸হউ সময় তুমরা হিরবার তুমরার মাবুদর হুকুম মাফিক জিন্দেগি কাটাইবায়, তান বাতাইল যেতা হুকুম-আহকাম আইজ আমি তুমরারে জানাইরাম, অতা হকলতা আমল করবায়।

⁹“হউ সময় তুমরার মাবুদ আল্লায় হকল নমুনায় তুমরারে আয়-উন্নতি দিবা, তাইন তুমরার কাম-কাজো বরকত দিবা, তুমরার আওলাদর পরিমান বাড়াইবা, তুমরার গরু-ছাগলর বাইচ্চাইন আর জমিনর ফসল বাড়াই দিবা। তুমরার ময়-মুরব্বির উপরে তাইন যেলা খুশি আছলা, তুমরার উপরেও অলা খুশি অইয়া তুমরারে হকল নমুনায় বাড়াইবা। ¹⁰খালি তুমরা নিজর মাবুদ আল্লার খুশি মাফিক চলিয়া, অউ তৌরাত কিতাবো লেখা তান হকল হুকুম-আহকাম আর নিয়ম-কানুন মানলে, আস্তা দিলে-জানে তান বায় ফিরলে, তাইন অউ রহম-বরকত দিবা।

জিন্দেগির পথ আর মউতর পথ

¹¹“ও বনি ইছরাইল হুনো, আইজ আমি তুমরারে যেতা হুকুম দিরাম, ইতা মানিয়া চলা তুমরার লাগি বেশি কষ্টর কুনু কাম নায়, ইতা তুমরার লাগালর বারেও নায়। ¹²ইতা তো বেহেস্তো তুলিয়া থওয়া কুনু চিজ নায় যেন তুমরা কইতায়, বেহেস্তো থাকি খেগিয়ে লামাই আনিয়া ইতা আমরারে হুনাইতো, আর আমরা আমল করতাম? ¹³ইতা দরিয়ার হপারর কুনু চিজও নায় যেন তুমরা কইতায়, দরিয়া পার অইয়া খেগিয়ে গিয়া ইতা আনিয়া আমরারে হুনাইতো, আর আমরা আমল করতাম? ¹⁴বরং মাবুদর কালাম তো তুমরার লগেউ আছে, তুমরার মুখর মাজে আর দিলর ভিতরে ইতা আছে, যাতে ইতা আমল করো।

¹⁵“হুনো, আইজ আমি তুমরার ছামনে যেতা তুলিয়া ধরছি, ইতা অইলো জিন্দেগি আর ভালাই, বা মউত আর দুখ-মছিবত। ¹⁶আইজ আমি তুমরারে অউ হুকুম দিরাম, তুমরা নিজর মাবুদ আল্লারে মহব্বত করিও, তান মর্জি যুগাইয়া চলিও, তান দেওয়া শরিয়ত, হকল নিয়ম-কানুন, হুকুম-আহকাম হর-হামেশা মানিও। তেউ তুমরা জানে বাচবায়, পরিমানে বাড়বায়, আর যে দেশখান তুমরা দখল করাত যাইরায়, হউ দেশো তুমরার মাবুদ আল্লায় তুমরারে রহম-বরকত দিবা।

¹⁷“অইলে তুমরার মন যুদি আল্লা মাবুদর বায় থাকি ফিরিযায়, তান হুকুম না মানিয়া তুমরা যুদি কুনু দেব-দেবীর পুজাত লাগিয়া অতারে পরনাম করো, ¹⁸তে আইজ আমি তুমরারে জানাই দিরাম, তুমরা নিশ্চিত বিনাশ অইযিবায়। জর্দান গাংগর হপারো যে দেশ তুমরা দখল করাত যাইরায়, হিনো তুমরা বেশি দিন বাচতায় নায়।

¹⁹“অউ আছমান-জমিনরে তুমরার বিরুদ্ধে সাক্ষি রাখিয়া কইয়ার, আইজ আমি তুমরার ছামনে জিন্দেগি আর মউত, রহমত আর লান্নতরে তুলিয়া ধরছি। এরলাগি ও ভাইয়াইন, তুমরা জিন্দেগিরে পছন্দ করিলাও, তেউ তুমরা আর তুমরার আওলাদ অকলর জান বাচিবো। ²⁰তুমরা নিজর মাবুদ আল্লারে মহব্বত করিও, তান হুকুম-আহকাম মানিও, তান আশিক বনিয়া তানরে আইঞ্জা করি ধরিয়া রাখিও, অতার মাজেউ তুমরার জিন্দেগি। তাইন যে দেশর দখলদারি দিবার লাগি তুমরার ময়-মুরব্বি ইব্রাহিম, ইছহাক, আর ইয়াকুবর লগে কছম খাইয়া ওয়াদা দিছইন, হউ দেশো অতা হুকুম-আহকাম মানার মাজেউ তুমরার জিন্দেগি।”

হজরত মুছা (আঃ) অর শেষ হালত (৩১-৩৪ রুকু)

হজরত মুছা (আঃ)-এ দায়িত্ব সমজাইলা

¹এরবাদে মুছায় হকল বনি ইছরাইলরে কইলা, ²“ও বনি ইছরাইল হুনো, আমার বয়স তো একশো বিশ বছর অইগেছে, আমি আর আমার কাম করতাম পারিয়ার না, কারন মাবুদে আমারে জানাইছইন, আমি জর্দান গাংগর হিপারো যাইতাম পারতাম নায়। ³তে তুমরার মাবুদ আল্লা নিজে তুমরার আগে আগে রইয়া জর্দান গাং পার অইয়া যাইবা। তাইন তুমরার ছামনে থাকি হনর হকল জাতিরে বিনাশ করবা, তেউ তুমরা হউ দেশ দখল করবায়। আর মাবুদর কথা মাফিক হজরত ইউছায় তুমরারে লইয়া হপারো তুমরার আগে আগে যাইবা। ⁴মাবুদে আমোরী অকলর বাদশা সীহোন আর উজরে যেলাখান বিনাশ করছিলা, হউ জাতি অকলরেও অলা বিনাশ করবা। ⁵তাইন হিতারে তুমরার আতো সপিয়া দিবা, হউ সময় তুমরা আমার বাতাইল হুকুম মাফিক কাম করিও। ⁶তুমরার বুকুত বল রাখো আর সাওস করো। ডরাইও না, তারারে দেখিয়া ঘাবড়াইও না। মনো রাখিও, তুমরার মাবুদ আল্লা তুমরার লগে লগে যাইরা, তাইন কুনুমন্তেউ তুমরারে ছাড়তা নায়, কুনু হালতেউ তুমরারে ফালাইতা নায়।”

⁷বাদে মুছা নবীয়ে হকল বনি ইছরাইলর ছামনে ইউছা নবীরে আনাইলা, আনাইয়া কইলা, “তুমি বুকুত বল রাখো আর সাওস করো। অউ মানুষ অকলরে লইয়া তুমি গাং পার অইয়া হউ দেশো যাইবায়, হউ দেশ দিবার লাগি মাবুদে তো তারার ময়-মুরব্বির গেছে ওয়াদা করছলা। তুমি তারারে হনো নিয়া হনর জমি-জমা তারারে বাটিয়া দিও। ⁸স্বয়ং মাবুদ তুমার আগে আগে রইবা, তুমারে সাইয্য করবা, তাইন তুমারেও ছাড়তা নায় আর তুমারে ফালাইতাও নায়, তে তুমি ডরাইও না, সাওস আরাইও না।”

তৌরাত কিতাব তিলাওতর হুকুম

⁹বাদে মুছা নবীয়ে তৌরাতর অউ হুকুম-আহকাম অকল লেখলা, লেখিয়া লেবি খান্দানর হউ ইমাম অকল, যারা মাবুদর শাহাদত সন্দুক বইয়া নিতা, তারার আতো আর বনি ইছরাইলর ময়-মুরব্বির আতো দিলা। ¹⁰দিয়া তারারে হুকুম দিলা, “পরতেক সাত বছর বাদে বাদে, আওলাত মাফির বছরর কালো, ডেরা-ঘরর ইদর অখতো, ¹¹হকল বনি ইছরাইল যেবলা তুমরার মাবুদ আল্লার পছন্দ করা জাগাত গিয়া তান ছামনে আজির অইবা, হউ সময় তুমি তারা হকলর ছামনে অউ তৌরাত কিতাব তিলাওত করিয়া হুনাইও। ¹²বেটাইন, বেটিন, হুরুতাইন, আর তুমরার লগে বসত কররা গাউ বা টাউনর ভিন জাতির হকল মানষরে এক জাগাত দলা করিয়া ইতা হুনাইও, ইতা হুনিয়া তারা তুমরার মাবুদ আল্লারে ডরাইবা, আর অউ শরিয়তর হকল হুকুম-আহকাম যতন করি আমল করবা। ¹³আর তারার যেতা হুরুতায় তৌরাতর অউ হুকুম-আহকাম হুনছইন না, জর্দান গাংগর হপারো তুমরা যে দেশর দখলদারি পাইরায়, তুমরা হনো গিয়া হারলে তারাও হারা জিন্দেগিভর তুমরার মাবুদ আল্লার ডর-খফে চলা হিকবা।”

নাফরমানি করার আগাম খবর

¹⁴বাদে মাবুদে মুছা নবীরে কইলা, “তুমার হায়াতি তো আর বেশি নাই, মউত ধারো আইচ্ছে, তে তুমি ইউছারে আনাও, আনাইয়া দুইও জন মিলন-তাম্বুর ছামনে আও, আমি তার উপরে তার নয়া কাম সমজাই দিমু।” তেউ তারা দুইও জন গিয়া মিলন-তাম্বুর ছামনে আজির অইলা।

¹⁵অউ সময় মাবুদে মেঘর খুটির মাজে থাকিয়া মিলন-তাম্বুর দুয়ারর ছামনে আইয়া তারারে দরশন দিলা, অউ খুটি তাম্বুর দুয়ারর উপরে উবাই রইলো। ¹⁶আর মাবুদে মুছারে কইলা, “হুনো, তুমি তো তুমার বাফ-দাদাইন্তর গেছে আরাম করাত যাইরায়গি, অইলে অউ মানুষ অকল যে দেশো হামাইরা, হামানির থুড়া বাদেউ আমার লগে তারার আপোস-চুক্তিরে তারা ভংগ করবা, তারা আমারে বাদ দিয়া হনর দেব-দেবীর আতো নিজরে সপি দিবা। ¹⁷তারা ইতা করিয়া হারলে আমার গুছার আগুইন জলিবো, আমি তারার লগ ছাড়ি দিমু, তারার বায় থাকি আমার মুখ ফিরাইলিমু, তেউ তারা বিনাশর পথো যাইবা। তারার উপরে নানান বালা-মছিবত আইবো। হউ সময় তারা কইবা, আমরার দশা ইলা অইলো কেনে? নিশ্চয়, আমরার আল্লা আমরার লগে নায় করিউ, ইতা ঘটের। ¹⁸আসলে তারার হউ দেব-দেবীন্তর গেছে গিয়া যেতা কু-কাম করছইন, অতার লাগিউ আমি হউ সময় তারার গেছ থাকি আমার মুখ ফিরাইলিছি।

¹⁹“তে তুমরা অউ গজলটা লেখিলাও, লেখিয়া বনি ইছরাইলরে হিকাও আর তারা গাইবা। অউ গজল তো তারার বিরুদ্ধে আমার সাক্ষি অইয়া রইবো। ²⁰বুজরায় নি, আমি তারারে যে দেশ দিবার লাগি তারার ময়-মুরব্বির গেছে ওয়াদা করছি, দুধ আর মউর ভান্ডার আলা আরামর হউ দেশো তারারে নিয়া হারলেউ, তারা খানা-পিনা খাইয়া মোটা-তাজা অইবা। অইয়া হনর দেব-দেবীর পুজা করাত লাগবা, হতার ভজনা করবা, আমারে এলামি করিয়া আমার লগর আপোস-চুক্তি ভাংগিবা। ²¹তেউ তারার উপরে যেবলা নানান নমুনার বালা-মছিবত আর বিপদ-আপদ আইবো, হউ সময় অউ গজলে তারার ছামনে সাক্ষি দিবো, অউ গজল তো তারার আওলাদ অকলে ফাউরিতা নায়। হাছা কথা অইলো, আমার ওয়াদা করা হউ দেশো নিবার আগেউ, তারা মনে মনে কিতা চিন্তা করের, ইতা তো আমার জানা আছে।” ²²মুছায় লগে লগে অউ গজল লেখিয়া বনি ইছরাইলরে হিকাইলা।

²³আর মাবুদে নূনর পুয়া ইউছারে তান নয়া কামর লাগি অউলা হুকুম দিলা, “তুমি বুকুত বল রাখো আর সাওস করো। আমি কছম খাইয়া বনি ইছরাইলরে যে দেশ দিবার লাগি ওয়াদা করছি, তুমি তারারে লইয়া হউ দেশো যাইবায়, আমি তুমার লগে লগে রইমু।”

²⁴শরিয়তর অউ হুকুম-আহকামর হকলতা মুছায় ষোলআনা লেখলা, ²⁵লেখিয়া মাবুদর শাহাদত সন্দুক বইয়া নেওরা লেবি খান্দানর মানষরে হুকুম দিলা, ²⁶“অউ তৌরাত কিতাব খান নিয়া তুমরা আল্লা মাবুদর শাহাদত সন্দুকর কাছাত থইও। ইখান বনি ইছরাইলর বিরুদ্ধে সাক্ষি হিসাবে হনো রইবো। ²⁷তুমরা কতো বড় গাড়তেড়া আর নাফরমান, ইতা আমার জানা আছে। আমি জিন্দা হালতে তুমরার লগে রইতেউ তুমরা যেবলা মাবুদর নাফরমানি করছো, তে আমার মরনর বাদে তুমরা আর কিতা না করবায়! ²⁸তুমরা হকলে যারযির খান্দানর মুরব্বি আর অফিসার অকলরে আমার গেছে আনো, আমি নিজে তারার গেছে অতা খুলাছা করিয়া কইয়া যাইমু, আছমান-জমিনরে তারার বিরুদ্ধে সাক্ষি রাখতাম চাই। ²⁹আমি তো জানি, আমি চউখ মুজার বাদে তুমরা এক্কেবারে বে-পথি বনিযিবায়, আমার বাতাইল পথ থাকি তুমরা হরিযিবায়, তেউ তুমরার উপরে গজব লামবো। কারন মাবুদে যেতা ঘিন করইন, তুমরা অতা কাম করিয়া, নিজর আতে মুর্তি বানাইয়া, তান গুছা তুলাইবায়।”

³⁰বাদে মুছা নবীয়ে হকল বনি ইছরাইলর ছামনে অউ গজলর পয়লা থাকি আখের পর্যন্ত হুনাইলা; তাইন গাইলা,

হজরত মুছা (আঃ) অর গাওয়া গজল

¹ও আছমান, কান পাতিয়া হুনো আমি যেতা গাই,

ও জমিন, তুমিও হুনো আমি যা বাতাই।

²আমার তালিম লামউক মেঘর ফুটার লাখান,

খুয়ার মতন পড়উক আমার মুখর বয়ান।

খেছমা ঘাসর উপরে ফুটা ফুটা মেঘ অইয়া পড়উক,

নয়া চেরা গাছর উপরে শান্তির মেঘ অইয়া লামউক।

³আমি তো এলান করমু আমার মাবুদর নাম,

তুমরাও গাইও আল্লার মহিমা গান।

⁴তাইনউ তো আশ্রয় টিল্লা, নিখুত তান কাম,

হক-হাছা তান পথ সঠিক তামাম।

ছল-চতুরি নাই তান, হক-হালাল আছে সর্বদা,

হক ইনছাফ পরেজগারি আছে সততা।

⁵তা-ও তান খবিছ বন্দায়32:5 মুল হিব্রু ভাষাত, “পুত অকল।” আগে আল্লায় কইছলা, বনি ইছরাইল তো আমার পয়লা পুতর লাখান। (হিজরত ৪:২২ আয়াত) ইটা একটা রুপক বাইক্য, মানে খাছ মায়ার বন্দা অকল। করছে বেইমানি,

দিলর খারাপিয়ে তারা বনছে কলংকিনি।

⁶হায়রে আম্মক নাদান, হায়রে বেআখল,

অউনি তুমরা বদলা দিলায়, মাবুদর দানর?

তাইনেউ তুমরার পয়দা কররা পরোয়ার দিগার32:6 “পয়দা কররা পরোয়ার দিগার।” হিব্রু ভাষাত, পয়দা কররা বাবা। বাবা অইলো একটা রুপক শব্দ। নি?

বওয়াল করলা তুমরার ইছরাইল জাতি।

⁷ইয়াদ করো তুমরা হউ আগর আমলর মাত,

মনো রাখো কিতা অইছিল পুরান জমানাত।

বাফ-দাদারে জিকার করি ইতিহাস হুনো,

বুড়া-বুড়ির মুখ থাকি হকলতা জানো।

⁸আল্লাতালায় দিলা যেবলা জমিন বাটিয়া,

নানান জাতিরে দিলা ভাগ-বাটুরা করিয়া।

বনি ইছরাইলর পরিমান তো জানা আছিল তান,

এরার অংশ আলগাই থইয়া বাকি করলা দান।

⁹মাবুদর খাছ সম্পত্তি তো তান নিজর প্রজা,

ইয়াকুব বংশ ইছরাইল জাতি আপন ছামানা।

¹⁰তারারে তাইন তুকাই পাইলা মরুভুমির দেশো,

নিরাই-নির্জন দেশ আর বাঘ-সিংহর গর্জনো।

কুদরতি ডাখনাদি ঘুরিয়া যতন করিলা,

চখুর মনির লাখানউ তারারে বাচাইলা।

¹¹চিলে যেলা নিজর বাদার বাইচ্চারে নাচায়,

আস্তে আস্তে উড়ি উড়ি ডাখনারে লাড়ায়,

ডাখনা মেলিয়া বাইচ্চাইনরে উপরে তুলে,

তুলিয়া হারি উড়াল দিয়া লইয়া লইয়া ঘুরে,

¹²মাবুদে একলা অউলা করি তারারে নিলা,

কুনুজাতর দেব-দেবী তান লগে আছিল না।

¹³পাড়ে পাড়ে উড়াই উড়াই নিলা তারারে,

পাড়িয়া দেশর দখল দিলা বনি ইছরাইলরে।

খেতর ভালা ফসল দিলা খাইবার লাগি,

পাড়িয়া চাকর মউ খাবাইলা ফাটা-চিপা থাকি।

খাবাইলা মালিকে জয়তুনর তেল,

লুয়ার লাখান শক্ত মাটিত তেল ফলি গেল।

¹⁴খাবাইলা তারারে তাইন গরুর দুধর দই,

ছাগল-মেড়ার দুধও খাইলা জানিও নিচ্চই।

মোটা-তাজা মেড়ার গোস্ত খাইলা মজা করি,

বাশন দেশর গরু-খসি খাইলা রুটিদি।

তাজা-পুষ্ট গমর রুটি আংগুরর শরবত,

ডেমদি উঠা আংগুর অইলো আল্লার নিয়ামত।

¹⁵বাদে তারা লাথ মারিলা পেটলা বনিয়া,

বনি ইছরাইলে লাথ মারলা তারার পাও দিয়া।

খাইয়া খাইয়া পেট ফুলাইয়া মারলো অখন লাথ,

ফাউরিলিলো হউ আল্লারে যেইন দিলা ভাত।

পয়দা কররা আল্লার লগ তারা ছাড়ি দিলো,

আশ্রয় টিল্লা আল্লারে তারা হুরু মনো করলো।

¹⁶দেব-দেবীর পুজা করিয়া জালাইলো আগুইন,

এক আল্লা ছাড়িয়া তারা ভজিলো হগুইন।

গুছার আগুইন জালাইলো তান আরশর মাজে,

মুর্তি পুজা ঘিন করইন মহান আল্লা পাকে।

¹⁷ভুতর নামে বলি দিলো তানরে ছাড়িয়া,

ভুত তো কুনু আল্লা নায় তা-ও পাইলো পুজা।

নয়া নয়া দেবতা যেতা কয়দিন থাকি চিনে,

বাফ-দাদার অচিন দেবতা অখন তারা ভজে।

¹⁸জনম দাতা বাফর লাখান যেইন আশ্রয় টিল্লা,

তানরে তুমরা ফাউরিয়া হারি করলায় অবহেলা।

¹⁹আওলাদর অউ হালত দেখিয়া মুখ ফিরাইল্লা মাবুদে,

রাগে-গুছায় আগুইন অইলা তারারউ বদ আমলে।

²⁰গুছা করি মাবুদে কইলা মুখ ফিরাইলাম আমি,

তারার হেশ দশা কিতা আমি নিচ্চিত জানি।

দেখমু চাইয়া তারার হকল বেইমানির সাজা,

বে-পথি বেইমান জাতে বুজবা নিজর দশা।

²¹যেটা আল্লা নাই ইলা দেবতার পুজা করিয়া,

আমার ভিতরে দিছে তারা গুছা তুলিয়া।

যেটা জাতি নাই ইলা জাতি দিয়া ইংসা করাইমু,

আম্মক জাতি দিয়া তারার গুছা তুলাইমু।

²²আমার গুছার আগুইন অখন দাউ দাউ করি জলের,

মাটির তলর পাতালরেও জালাইয়া ছারখার করের।

হারা জগত আর ফয়-ফসল জালাই করবো ছালি,

পাড়র তলাত আগুইন জলবো, জলবো ধুইল বালি।

²³লাখো লাখো বিপদ দিমু হকলতার উপর,

আমার তামাম তীর মারমু পেটর ভুকে করমু কাতর।

²⁴উপাসি নিদানে তারা হুকাই হুকাই মরবা,

গজবি বেমারর লগে দুখ-তকলিফ পাইবা।

দাত আলা জংলি পশু পাঠাইমু আমি,

বিষাক্ত সব হাফর পালে দিবা কামড়ানি।

²⁵বারে গেলে মরবা তারা তলোয়ারর তলে,

ঘরো রইলে মরবা হকল জানর ডর-খফে।

জুয়ান পুয়া জুয়ান পুড়িন দুধর হুরুতা,

বিনাশি গজবে মরবা দাড়ি চুল পাকনা।

²⁶কইছলাম আমি উড়াই মারমু বনি ইছরাইলরে,

ইতার নাম ফুছিলাইমু মানষর মন থনে।

²⁷অইলে আমার জানা আছে দুশমনর ভাব-সাব,

বেটাগিরি করবা তারা অইবো তারার লাভ।

না বুজিয়া কইবো তারা জিতছে নিজর বলে,

মাবুদ ইতা কুন্তাত নায় জিতছি কলে-বলে।

²⁸বিচার-বিবেক খুয়াইয়া অখন নামে ইছরাইল জাতি,

আখল-বুদ্ধি আরাইয়া তারা অইছে বে-পথি।

²⁹আখল থাকলে বুজতো তারার নিজর দুর্দশা,

বিবেক খাটাই জান বাচাইয়া রইতো হামেশা।

³⁰এক দুশমনে আইয়া কিলা আজার জন খেদায়,

দুই সিপাইরে দেখিয়া কেনে দশ আজার দৌড়ায়।

নিজর আশ্রয় টিল্লা যুদি তারারে না বেচিতা,

স্বয়ং মাবুদে যুদি ছাড়িয়া না দিতা।

³¹দুশমনর আশ্রয় টিল্লা অতো মজবুত নায়,

তারাউ ইখান স্বীকার করি হকলরে হুনায়।

আমরার টিল্লা নিচ্চয় বউত বড় বলবান,

তারার মুখে গাইয়া ইতা জপে তান সুনাম।

³²মাবুদে বাতাইরা অখন তারার খেতর কথা,

ছাদুম টাউন থাকি আইছে ইতার আংগুরর লতা,

আমুরা শহর থাকি ইতায় আংগুর ফল পাইছে,

বিষ আর তিত্তায় ই ফলর ছড়ি পুরাপুর অইছে।

³³আংগুরর শরবত যেলা নাগ-নাগিনির বিষ,

আলদ হাফর বিষও অলা মারাত্মক জিনিস।

³⁴আমার গেছে ইতা গজব তুমরার লাগি খাড়া,

আমার ভান্ডারো থওয়া ছব সীল-চাপ্পড় মারা।

³⁵নাফরমানির সাজা দেওয়া আমারউ কাম,

আমল মাফিক বদলা দিমু তামাম ইনছান।

সময় অইলে পিছলিযিবো দুশমনর পাও,

মছিবতর দিন তারার নজদিক জানিলাও।

ঠিক করি থওয়া আছে তারার কামর বদলা,

জলদি করি পাইবা নিজর আমল-নমা যেলা।

³⁶মাবুদে দেখবা যেবলা বল-শক্তি নাই,

তান বন্দার বল-তাক্কত গেছেগি ফুড়াই।

গুলাম কিবা আজাদ বন্দা হকলউ মাজুর,

দেখিয়া তাইন পক্ষ লইবা আপন গুলামর।

মায়া-দয়া করবা আল্লায় তান গুলামরে,

মাজুর থাকি সবল করবা দয়া-রহমে।

³⁷কইবা তাইন হউ সময় কুয়াই গেলা হিতা,

অতদিন ভজিছলা তারা যেতা দেবতা।

বাগিয়া গেলগি কুয়াই তারার আশ্রয় পাড়,

তারার হকল দেব-দেবী অসাড়র অসাড়।

³⁸কই গেলা হউ দেব-দেবী যেতায় খাইছলা চর্বি,

চর্বি আলা বলির গোস্ত খাইছিল বেশ করি।

যেতা দেবতাইন খাইছিল ছদগার শরবত,

অখন তারা বাচাউক আইয়া তারার উম্মত।

সাইয্য করউকনা আইয়া তুমরার হউ ঠাকুর,

আশ্রয় দেয় না কেনে নাফরমান বদকুর।

³⁹চিন্তা-ভাবনা করিয়া দেখো হউ তাইনউ আমি,

আমি ছাড়া মাবুদ নাই ইখান জানছো নি।

আমিউ মারিলাই আমিউ বাচাই,

আমিউ তো জখম করি আমি দেই ভালাই।

আমা থাকি বাচাইলিতো সাইধ্য আছে কার,

হায়াত মউতর মালিক আমি আল্লাহু আকবার।

⁴⁰আরশর বায় আত তুলিয়া কছম খাইয়া কই,

চিরকালিন জিন্দা আমি জানিও নিচ্চয়।

⁴¹দার যেবলা দিমু আমার চকচকা তলোয়ার,

কাইম করাত লাগমু যেবলা আমার রায়-বিচার।

হউ সময় সাজা দিমু আমার হকল দুশমনরে,

আমারে ঘিন্নানির বদলা দিমু তারারে।

⁴²তীর-ধনুকে লউ খাইয়া করবো মাতলামি,

আমার তলোয়ারেও তো লউ খাইবো জানি।

মুর্দা আর বন্দি অকলর লউ হে খাইবো,

দুশমনর গোস্ত খাইয়া পেট ফুলাইবো।

লাম্বা-চুলি সিপাইর কল্লা খাইবোরে মুখে,

তারার কল্লা চিবাই খাইবো আমার ধনুকে।

⁴³মায়ার প্রজার লগে অইয়া আছমান খুশি অও,

বেহেস্তর হকল ফিরিস্তায় তানে সইজদা দেও।

জগতর তামাম জাতিয়ে গাও গুনগান,

আল্লার হকল বন্দার লগে লও তান মহা নাম।

তান গুলামর লউর বদলা অখন লইবা তাইন,

দুশমনরে সাজা দিয়া ছাফ করবা জমিখান।

তান বন্দায় কেনান দেশো পাইলিবা রেহাই,

গুনার কফরা দিয়া দিবা তার বদলাই।

⁴⁴মুছা নবী আর তান খাদিম নূনর পুয়া ইউছা গিয়া হকল মানষর গেছে অউ গজলর সব কথা জানাইলা। ⁴⁵মুছায় হকল বনি ইছরাইলর গেছে গিয়া ইতা হকলতা কইয়া হারি, ⁴⁶কইলা, “আমি অউ যতো হুশিয়ারির কথা তুমরারে জানাইছি, ইতা তুমরার দিলো গাথিয়া রাখিও, ইতা তো তুমরার বিরুদ্ধে সাক্ষি বনিয়া রইবো। আর তুমরার আওলাদ অকলরে হুকুম দিও, অউ শরিয়তর হকল হুকুম-আহকাম খিয়ালি অইয়া আমল করতা। ⁴⁷ইতা তো আজে-বাজে কুনু মাত-কথা নায়, ইতা অইলো তুমরার জিন্দেগি! জর্দান গাং পার অইয়া হারি তুমরা যে দেশর দখলদারি পাইরায়, অতা আমল করলে হনো তুমরা লাম্বা হায়াতি পাইবায়।”

হজরত মুছা (আঃ) অর আখেরি হালত

⁴⁸হউ দিনউ মাবুদে মুছা নবীরে কইলা, ⁴⁹“তুমি গিয়া অউ আবারীম পাড়ো উঠো, ইটা তো মোয়াব দেশর যিরিহো টাউনর ছামনে আছে। হনো উঠিয়া নবো নামর হউ উচা টিল্লার উপরে যাও, আর বনি ইছরাইলরে আমি যে দেশর মালিকানা দিরাম, অউ কেনান দেশ একবার দেখিলাও। ⁵⁰তুমার ভাই হারুন যেলা হুর পাড়র উপরে উঠিয়া হারলে উফাত অইছিল, বাদে তার বাফ-দাদার কাতারো গিয়া আজিছিল, অউ নবো পাড়ো উঠার বাদে অউলা তুমারও উফাত অইবো, আর তুমার বাফ-দাদার গেছে গিয়া অউলাখান তুমিও আজিবায়। ⁵¹মনো আছে নি, হকল বনি ইছরাইলর ছামনে তুমরা দুইও ভাইয়ে আমারে পাক-পবিত্র কইয়া মাইন্য করছো না, হউ জীন মরুভুমির কাদেশ এলাকার মেরীবা নামর জাগাত পানির গেছে তুমরা আমার নামে জালিয়াতি করছলায়। ⁵²হনো উঠিয়া হারলে তুমার চখুর ছামনে হউ দেশ দেখবায়, যে দেশখান আমি বনি ইছরাইলরে দান কররাম, তুমি খালি চউখদি দেখবায়, অইলে হি দেশো হামাইবার সুযোগ তুমার অইতো নায়।”

হজরত মুছা (আঃ) অর আখেরি দোয়া

¹আল্লার খাছ বন্দা মুছা নবীর উফাতর আগে, বনি ইছরাইলরে তাইন অউ দোয়া দিলা:

²তশরিফ আনলা মাবুদ আল্লায় তুর পাড় থাকি,

আমরা হকলে দেখা পাইলাম নুরে এলাহি।

সেয়ীর আর ফারান পাড় থাকি দেখাইন নুরর তেজ,

লাখো লাখো ফিরিস্তা কিবা আরো বেশ।

দিদার দিলা মাবুদে এরার মাজ থনে,

ডাইন আতো ভরা আছিল নুরর আগুইনে।

³হাছাউ তাইন মায়া করইন নিজর বন্দারে,

তামাম পরেজগার বন্দা তান হুকুমে চলে।

সইজদা করাত আছইন তারা তান পাওর তলাত,

হুকুম পাইলে তামিল করইন রইন তান কথাত।

⁴মুছা নবীয়ে যে শরিয়ত দিছলা আমরারে,

বনি ইছরাইলর ধন ইতা জানে হকলে।

⁵দলা অইয়া আইলা যেবলা ময়-মুরব্বির দল,

লগ অইয়া আইছলা ইছরাইলর খান্দানর হকল,

হউ সময় তো মাবুদ আছলা তারার উপরর বাদশা,

এরা হকল তান প্রজা তাইনউ শাহানশা।

বারো খান্দানরে দোয়া দিলা

⁶রুবেন খান্দানর বেয়াপারে হজরত মুছায় কইলা:

রুবেন খান্দান জিন্দা রউক, নিপাত নায় কুনুদিন,

তা-ও তার ঘরো পয়দা অইবো কম পুয়া-পুড়িন।

⁷এহুদা খান্দানর বেয়াপারে কইলা:

ও মাবুদ, তুমি অখন এহুদার ফরিয়াদ হুনো,

ভাই-বিরাদরর ধারো তারে ফিরাইয়া আনো।

দুইও আত তার সবল রাখো লাড়াইর সময়,

সাইয্য করো তুমি তারে দুশমনরে দেও আরাই।

⁸লেবি খান্দানর বেয়াপারে কইলা:

তুমার আশিকর আতো আছে তুম্মিম আর উরিম33:8 তুম্মিম আর উরিম অইলো দুই জিনিস আল্লার মর্জি বুজার লাগি। ধারনা করা অয়, ইতা অইলো বিশেষ দুই পাথর বা দুই মনি। হিজরত ২৮:৩০ দেখউক্কা।,

কুদরতি হউ দুই ছামানার মালিক খালি অউ লেবিন।

মাছা নামর জাগাত লইছো তার পরিক্ষা,

মেরীবা নামর পানির জাগাত অইছিল অউ কাইজ্জা।33:8 মাছা আর মেরীবা। হিজরত ১৭:৭ দেখউক্কা।

⁹মা-বাফরেও তুলছে না হে তুমার উপরে,

গুনার সাজা দিছে তার মাʼর পেটর ভাইরে।

দাবি ছাড়িয়া সপি দিছে আপন পুয়া-পুড়ি,

জিন্দেগি কুরবানি দিছে তুমার আইন মানি।

তুমার কালাম পারা দিছে মানছে শরিয়ত,

আপোস-চুক্তি মানিয়া চলছে, না করি খিয়ানত।

¹⁰তুমার হুকুম তারা হিকায় ইয়াকুব বংশরে,

তুমার শরিয়ত বুজায় তারা ইছরাইল জাতিরে।

আগর-খুশবয় জালায় তারা তুমার ছামনে আইয়া,

জালাইল কুরবানি দেয় কুরবান-গাত গিয়া।

¹¹তার ছামানাত বরকত দেও গো ও আমার মাবুদ,

রাজি-খুশি রও তুমি তার উপরে বউত।

তার দুশমনর কমর তুমি ভাংগি-চুরি দেও,

ঘিন্না কররার কমর ভাংগি বরবাদ করিলাও।

¹²বিন-ইয়ামিন খান্দানর বেয়াপারে তাইন কইলা:

মাবুদর মায়ার বন্দা সায়-শান্তিয়ে রইবো,

নিরাপদে রইবো হে তান ডাখনার তলো।

হারা দিন হারা রাইত ছায়াত রাখবা তারে,

জিন্দেগি গুজরিবো তার তান বগল তলে।

¹³ইউছুফ খান্দানর বেয়াপারে তাইন কইলা:

রহম-বরকত করো মাবুদ তার দেশখানরে,

আছমান থাকি দামি দামি জিনিস দেও তারে।

খুয়া দিয়া ভিজাই দেও উপরর আছমান থাকি,

আরো দেও তার জমিনো মাটির মুরর পানি।

¹⁴সুরুজর তেজে পাকাইয়া দেও ভালা ফল,

চান্দে চান্দে দেও তারে মজার ফসল।

¹⁵পুরানা পাড় থাকি ধন-ছামানা দেও,

চিরকালিন পাড়িয়া মাল তার জমিনো নেও।

¹⁶জমিন থাকি দেও গো মাবুদ ভালা ভালা মাল,

জালাইল জংলার নুরর মালিক রহম করো চিরকাল33:16 জালাইল জংলা। হিজরত ৩:১-৪ দেখউক্কা।,

ইউছুফর মাথাত লামউক আমার অউ দোয়া,

ভাইয়াইন থাকি মহান জনর তালুত লামউক ইতা।

¹⁷ডেকা বাইচ্চার মতো অউক তার বল-শক্তি আর শান,

তার মাথার হিং জুড়া তো জংলি বয়রার লাখান।

হিং দিয়া গুতাইবো হে হারা জগতরে,

পুব পচিম উত্তর দক্ষিন দৌড়াইবো হকলরে।

আফরাইমর অইবা অলা লাখো লাখো জন,

আজার আজার জন অইবা মানশার মুল ধন।

¹⁸সবুলন আর ইছাখরর খান্দানর বেয়াপারে তাইন কইলা:

সবুলনে খুশি করউক বাইরর কাম-কাজ লইয়া,

ইছাখর খুশি রউক ঘরর কামো রইয়া।

¹⁹ডাকি ডাকি পাড়র ধারো আনবো মানষরে,

কুরবানি দিবো হনো খাছ ছহি দিলে।

দরিয়া থাকি তুলবা তারা দরিয়ার পেটর ধন,

বালি থাকি তুলিয়া আনবা লুকাইল সব রতন।

²⁰ছাদু খান্দানর বেয়াপারে তাইন কইলা:

মুবারক হউ জন, ছাদুর জায়গা বাড়াই দিবা যেইন,

ছাদু তো সিংহর লাখান খাপ ধরি রয়,

দুশমনর আত আর কল্লা ছিড়িয়া ফালায়।

²¹হকল থাকি সরস জমি নিজর লাগি নিছে,

যোইগ্য মুরব্বির আসন তার লাগি থওয়া অইছে।

জাতির সর্দার অকল দলা অওয়ার কালো,

মাবুদর ন্যায় বিচার হে তামিল করি দিলো,

বনি ইছরাইলরে দেওয়া হুকুম পুরা মাইন্য করলো।

²²দান খান্দানর বেয়াপার তাইন কইলা:

ফুরফুরা সিংহর বাইচ্চা অইলো দান খান্দান,

বাশন দেশ থন ফালদি আইয়া করে বড়াই শান।

²³নপ্তালি খান্দানর বেয়াপারে তাইন কইলা:

নপ্তালি তো মাবুদর মায়া-মমতাত হাবু-ডুবু খার,

তান রহম-বরকতো হে হাতার কাটের।

তুমি তারে তার আপন সীমানাত আনো,

ছই-ছালামতে গালিল আওর আর দউকনর দেশো নেও।

²⁴আশির খান্দানর বেয়াপারে তাইন কইলা:

আশিরে পাইবো রহমত অইন্য থাকি বেশি,

হকল ভাইয়ে মায়া করবা তারে রাশি রাশি।

অতো রহম বরকত পাইয়া খুশি থাকার কালো,

দুই পাও তার ডুবাইল রইবো জয়তুনর তেলো।

²⁵তার গেইট অকল বান্দাইল অউক লুয়া আর তামাদি,

হে বলআলা মজবুত রউক তার পুরা জিন্দেগি।

²⁶মুছা নবীয়ে আরো কইলা:

বনি ইছরাইলর আল্লার হমানি দুছরা কেউ নাই,

তুমরারে সাইয্যর লাগি আছমানো বেড়াইন।

তান নিজর শান-মহিমায় মেঘর চাকাত চড়িয়া,

সাইয্যকারি অইতা চাইন তুমরার লাগিয়া।

²⁷হকল পয়লাকুর এক আল্লাউ অইলা আশ্রয় ঠিকানা,

তান চিরকালিন আত দিয়া তুমরারে রাখছইন ধরিয়া।

তুমরার ছামনর হকল দুশমন তাইনউ খেদাই দেইন,

ইতারে বিনাশ করো হুকুম দিছইন তাইন।

²⁸এরলাগি ইছরাইল জাতি ভালা-আফতা রইন,

ইয়াকুব বংশর পানির ঝরনা নিরাপদ থাকইন।

হিনো রইবো ফয়-ফসল আর আংগুর রসে ভরা,

তার উপরে লামবো আছমানি খুয়া।

²⁹ও বনি ইছরাইল, মুবারক আওলাদ তুমি!

তুমি অইলায় মাবুদ আল্লার আজাদ করা জাতি।

স্বয়ং মাবুদ অইলা তুমার জান বাচানির ঢাল,

তাইনউ অইলা তুমার জয়র ধারাইল তলোয়ার।

দুশমন তুমার ছামনে আইলে থর-থরাইয়া কাপে,

তুমি তারার বুকুর উপরে মাড়া দিবায় নে।

হজরত মুছা (আঃ) অর উফাত

¹বাদে মুছা নবী মোয়াব দেশর তল জাগা থাকি, নবো পাড়র টিল্লার উপরে উঠিলা, অউ টিল্লা তো যিরিহো টাউনর ছামনে পিছগা পাড়র হকল থাকি উচা টিল্লা। হনো মাবুদে তানরে হকল দেশ দেখাইলা, গিলিয়দ থাকি দান পর্যন্ত, ²আস্তা নপ্তালি দেশ, আফরাইম আর মানশা দেশ, আর পইচমর দরিয়ার পার পর্যন্ত পুরা এহুদা দেশ, ³দউকনর নেগেভ মরুভুমি, খেজুরি টাউন যিরিহো, আর এর কান্দার জর্দান গাংগর দউকনর মরুভুমি থাকি সোয়ার গাউ পর্যন্ত হকল জাগা। ⁴অতা দেখানির বাদে মাবুদে তানরে কইলা, “ইখান অইলো হউ দেশ, যেখানর বেয়াপারে আমি ইব্রাহিম, ইছহাক আর ইয়াকুবর গেছে কছম খাইছলাম। তারারে কইছলাম, দেশখান আমি তুমার ওয়ারিশরে দিমু। তে ইতা আমি তুমারে সরাসরি দেখাইলাম, অইলে তুমি জর্দান গাং পার অইয়া হিনো হামাইতায় পারতায় নায়।”

⁵মাবুদর জবান মাফিক, তান গুলাম মুছা নবীর উফাত অউ মোয়াব দেশোউ অইলো। ⁶মোয়াব দেশর বায়ত-পিয়োরর ধারো পাড়িয়া তল জাগাত আল্লার কুদরতি আতে তানরে দাফন করলা। অইলে তান রওজা শরিফরে অখনও কেউ চিনে না। ⁷উফাতর কালো তান বয়স আছিল একশো বিশ বছর। হউ সময়ও তান চউখর পাওয়ার কমছে না, তান শরিল কমজুর অইছে না। ⁸উফাতর বাদে বনি ইছরাইলে তিশ দিন ধরি মোয়াব দেশর নীচা তল জাগাত তান লাগি কান্দা-কাটি আর আহাজারি করলা। অউ তিশ দিন বাদে তারার দুখ-আহাজারি শেষ অইলো।

⁹হজরত মুছায় নূনর পুয়া ইউছার মাথার উপরে আত রাখার কারনে, অউ সময় থনে ইউছা আখলর রুহে পুরাপুর কামিল অইগেলা। তেউ বনি ইছরাইল অকল তান পরামিশে চললা, আর মুছা নবীর মারফতে মাবুদর বাতাইল হুকুম মাফিক তারা জিন্দেগি কাটাইলা।

¹⁰হজরত মুছার লাখান ইলা কুনু নবী অখন পর্যন্ত বনি ইছরাইলর মাজে জনম লইছইন না, যান লগে মাবুদে ছামনা-ছামনি অইয়া বাতচিত করতা। ¹¹মাবুদে মুছা নবীরে বেজিয়া মিসরর বাদশা ফেরাউন আর তার উজির-নাজির, তার আস্তা দেশর উপরে যতো লাখান কুদরতি নিশানা আর কেরামতি কাম দেখাইছইন, ইতাও আর কেউ করছইন না। ¹²তামাম বনি ইছরাইলর চউখর ছামনে মুছা নবীয়ে যেলা কুদরতি মহা তাইজ্জুবি আর ডর-খফর নানান কেরামতির কাম করছইন, ইলা কাম দুছরা কেউ করার তাক্কত অইছে না।

খতম॥