Tito

Su Sulat ni Pablo dini

TITO

Mendadi, kini si Tito, sala di ngag limbang ni Pablo begudiin. Su kekpetuud ni Tito, begu getaw pain, laak ndaꞌ maiben, mibaal kaunutan nu nga samasakupen. Binilin ni Pablo ditu puluꞌ Creta, adun megabang di nga pikumpungan nu nga sakup ni Kristu dia. Piwitan ni Pablo sinulat kini, puꞌ adun tituluꞌ ni Pablo saꞌ taꞌ alanduni gempia pegbetaden nu nga pemiliꞌen kaunutan di nga pikumpungan nu nga sakup, mukaꞌ tituluꞌen diniin dadema su gempia pegbetaden nu nga sakup sampay gempia kepemaag di nga memilas.

¹Diniꞌa Tito,

Naan si Pablo, tinduꞌu sesuguꞌen nu Megbebayaꞌ mukaꞌ peneligan ni Isukristu.

Iini tinduꞌu dun nu Megbebayaꞌ, adun penggengeten ku pai kesalig nu nga getaw tinduꞌen sumakup diniin, mukaꞌ pesuun ku dinilan su metuud tituluꞌan mekatag di kekpetuud ta. ²Puun tu kekpetuud ta, pedetengen nu nga sakupen puꞌ metubuꞌ ita di ndaꞌi tamanen. Kia, pinasad dinita nu Megbebayaꞌ su ndaꞌ pa mbaali gekleb langit buꞌ lupaꞌ. Naa ndiꞌ metau megbalus su Megbebayaꞌ. ³Ki pinasaden kia di ketubuꞌ, su gendaw bantang pesuunenen, pisuun tuꞌu nu Megbebayaꞌ ditu nga sesuguꞌenen, adun petenday nilan pelum tu nga getaw. Sampay naan, pisaligen dadema dinaan, adun ukitan ku dun dema su nga getaw. Kaas megukitu puun tu kesuguꞌ dinaan nu Megbebayaꞌ, su Meglegawen dinita.

⁴Yaꞌa Tito, maꞌniin ka tantu bataꞌu puun di keksalabuuk ta di kekpetuud ta.

Penenebiin ku tu Gamaꞌ ta Megbebayaꞌ mukaꞌ dini Kristu Isus su Meglegawen dinita, begayan ka niin tulung mukaꞌ pianan ginaa.

Sug Baalen ni Tito ditug Benwa Creta

⁵Naa Tito, iini binilin ku yaꞌa dun ditug benwa Creta, puꞌ adun peksibaꞌan mu su ndaꞌu pa metubus peksibaꞌay, mukaꞌ adun tenduꞌen mui nga kaunutan nug launan pikumpungan nu nga sakup dia ngag lunsud. Kelelaat, ndiꞌ mu selingaway ki tinituluꞌu diniꞌa kini. ⁶Ki nga kaunutan nu pikumpungan, iin subayi metenduꞌ, su kanaꞌ medangat, sala tawan laaki sawanen, mukaꞌ su ngag bataꞌen, mekpetuud ilan dini Kristu sampay kanaꞌ ilan megdedengeg mesungal atawaka medupang. ⁷Kagina megbayaꞌ tu pibaal nu Megbebayaꞌ su meguit tu pikumpungan, subay kanaꞌ medangat. Saꞌitada, kanaꞌ nu mekpelabawlabaw atawaka sempaun, kanaꞌ nu megbebulek, kanaꞌ nu melisualen mukaꞌ kanaꞌ nu mauyaꞌanen dumatuꞌ. ⁸Iin sungkini gempia metenduꞌ, su metau menembaꞌ di memenaikan, penggengetenen dig delendemanen su gempia, su metau meguit tug delendemanen, mukaꞌ mekesuun, ndaꞌi melamug dun melaat, sampay metau megbayaꞌ di gayaken. ⁹Subay pektalentenan gusay nu meguit tu samasakupen su meseligan petenday mesanguꞌ gupia nu tituluꞌan ku, puꞌ adun metituluꞌen su ngag duma mekatag di metuud mukaꞌ pengmetuudanen su nga kuminuntra tu metuud mekatag di gembagel sayep nilan.

¹⁰Puꞌ ki nga kuminuntra kia, metibaꞌ mailan. Memilas ilan tu metuud, pegyegaan nilan su ndaꞌi gatagen, mukaꞌ peglimbungan nilan su nga samataw nilan. Labi na duuni nga getaw Judea suminakup na dini Kristu kuminuntra tu metuud. ¹¹Naa, subay pemaag mu ilan, puꞌ kanaꞌ laak santaꞌ enlangan peglibulengen nilan pebian di nga tituluꞌan nilan kanaꞌ gempia tituluꞌan. Pektituluꞌ nilan dun, adun laak tindanan nilan selapiꞌ. Iini melengas, mpiid ilan dun! ¹²Ndaꞌ ba metaluꞌ nu suunan, sama nilan getaw Creta, “Ita nga getaw Creta! Belusen ita, maaꞌ ita nu nga malig metetubuꞌ, melelaꞌ ita, mukaꞌ medalu ita maan.” ¹³Metuud daan su tinaluꞌen kiin. Kaas, subay peligetan niu ilan tituluꞌay, puꞌ adun gempageni kekpetuud nilan, ¹⁴mukaꞌ adun ndiꞌ na nilan pektalentenani nga sagya guksugan nu getaw Judea, mukaꞌ nga pinalinta nu kilawan memilas tu metuud. ¹⁵Naa, ki mekesuun getaw, pemilangenen mekesuun sug launanen. Su getaw pasiꞌ kanaꞌ mekesuun sampay ndaꞌ pekpetuud dini Kristu Isus, mekesalaꞌ tu Megbebayaꞌ, puꞌ migelaꞌ melemuꞌayig delendemanen sampay ndiꞌ metau megbiksuꞌ di melaat gulaulanen. ¹⁶Laung nu getaw maꞌnia puꞌ suminambat tu Megbebayaꞌ, laak kumalenged melaati gulaulanen, ndiꞌen sembaten. Mesina dadema mukaꞌ memilas gupia tu Megbebayaꞌ, ndiꞌen pa padun megaga baalay su gempia gulaula.

Su Melegdeng Tituluꞌan

¹Laak yaꞌa, subay petuꞌun mu su medunut di melegdeng tituluꞌan. ²Naa maꞌantu, su nga megulang laki, tituluꞌ mu ilan diadia puꞌ subay mekesuun, gembasa, mukaꞌ metau meguit tug delendemanen. Teluꞌay mu dadema penggengetenen gupia su kesaligen dini Kristu, su kepetailen tug duma, sampay su kektigelen di kelegenayen. ³Maꞌantu dadema su nga megulang libun pelum, tituluꞌ mu ilan puꞌ subay pegbetaden nilan sug leliagen dun su Megbebayaꞌ. Ndiꞌ ilan mpia menlibak, mukaꞌ ndiꞌ ilan mpia penenatan meginum. Subay tituluꞌen nilan di gempia su ngag libun begu getaw pa, ⁴adun meglegintau dailan dema mekpetail diadia tu sawanen mukaꞌ tu ngag bataꞌen. ⁵Tituluꞌen nilan su ngag libun begu getaw pa, adun meglegintau dailan pagid, diadia megbayaꞌ tug delendemanen, megliaw gupia di melaat gulaula, mekesuun, mektagikul tug baalenen diag balay, sampay petuudenen su sawanen, adun pia taway dun, ndaꞌi getaw mekesudiꞌ di Gempia Petenday pimuun dinita nu Megbebayaꞌ.

⁶Naa, su ngag laki pelum begu getaw pa, tituluꞌ mu ilan puꞌ subay metau dailan dema megbayaꞌ tug delendeman nilan. ⁷Mukaꞌ yaꞌa Tito, baal mu gusay gempia lendasanig lawas mu dig launan gempia pegbetaden. Selian mu mektituluꞌ, subay pektinantua mektituluꞌ mukaꞌ gembasaa. ⁸Pektituluꞌ mu su melegdeng adun ndaꞌi meketaluꞌ puꞌ kanaꞌ daw melegdeng, adun mpiid su kuminuntra diniꞌa, puꞌ ndaꞌiduni metaluꞌen melaat mekatag dinita.

⁹Naa su nga gulipen, tituluꞌ mu ilan puꞌ subay petuuden nilan su gegalen nilan mukaꞌ peleliagen nilan dig lumaun pibaal dinilan. Subay ndiꞌ nilan sungalen su gegalen nilan, ¹⁰mukaꞌ ndiꞌ nilan pegleksapen elapay sug danu gegalen nilan. Segaga penemalan nilan petuuday su gegalen nilan, adun mpaitaꞌ nilan puꞌ meseligan ilan gusay mukaꞌ mekesuun. Ki tibaꞌanen kia, puꞌ adun mesuunan nu nga getaw puꞌ melengasi tituluꞌan ta mekatag di Megbebayaꞌ, su Meglegawen dinita.

¹¹Maꞌantu, tituluꞌ mu su nga samasakup mu, puꞌ su tulung nu Megbebayaꞌ, biwasanen na adun mesuꞌat na megawen su kelaun kilawan. ¹²Pebian di tulungen, miktituluꞌ dinita su Megbebayaꞌ puꞌ belengen tai pigbetad ta mpauk dun su Megbebayaꞌ mukaꞌ ndiꞌ ta na pekpelasen su melaat gayak ta puun tu kekilawan ta, segaga meglegintau ita meksikesuun mukaꞌ meguit ita delendeman ta, sampay pegbetaden ta sug leliagen dun su Megbebayaꞌ saanan ta sumala megleketubuꞌ di nga kilawan nemun. ¹³Meglegintau ita dun saanan ta mekpelab di gendaw pedetengen ta medayag na tuꞌu su kelengas nu pegbayaꞌ nu tampusan Megbebayaꞌ pektemuyen ta, si Isukristu su Meglegawen dinita. Leliagen ita gupia di gendaw kia puꞌ mateng main. ¹⁴Si Isukristu kini, bigayenig lawasen matay gumantiꞌ di salaꞌ ta, adun lekaten ita dig launan limbung ta, mukaꞌ adun baalen ita niin gegulingen piglegetawanen, mekesuun ita mukaꞌ mauyaꞌan ta gupia penggulaulaan su gempia.

¹⁵Kaas ki ngag launan tinituluꞌu kini, tituluꞌay mu dun su nga mikpetuud sampay pemaag mu su nga memilas tu metuud, gikteb nu pegbayaꞌ mu. Ndiꞌ mu begay petuyangen ka nu nga mikedengeg diniꞌa, pia taꞌ taway dun.

Pektituluꞌ mukaꞌ Pegad

¹Naa, su nga samasakup ta duma niu ditu, pektegyung mu ilan gupia puꞌ subay petuuden nilan gusay su nga kaunutan meguit dig benwa, mukaꞌ adin su gempia baalen, subay mauyaꞌ nailan menggulaula dun. ²Tituluꞌay mu ilan pagid puꞌ subay ndiꞌ nilan peksudiꞌan su ngag duma, pia taꞌ taway dun. Subay metau ilan mekpepia ginaa nug duma nilan, mukaꞌ melilelaaten ilan, sampay mesumayaꞌ ilan di tibaꞌan getaw. ³Puꞌ ndiꞌ ba metuud, begudiin pia ita, metegas gupiai gulu ta, mimilas ita mukaꞌ piglimbungan ita nug duma? Maꞌniin ita gulipen nu melaat gayak ta, kaas ndaꞌi gikteb nu gininisan melaat gulaula ta, ndiꞌ ba? Gebii gendaw sempaun ita mukaꞌ mingimbegu ita, binanta ita nug duma, migbanta daita dema dinilan. ⁴Laak pia maꞌantu, ki Megbebayaꞌ su Meglegawen dinita, duuni gendaw pinitaꞌen dinita sug lelaaten mukaꞌ petailanen dinita, ⁵puꞌ ginawen ita niin di salaꞌ ta. Ginawen ita niin sabaꞌ nug lelaaten, kanaꞌ nu gempia gulaula ta. Ginawen ita niin pibian di kepawaꞌ nug Balakat nu Megbebayaꞌ tu kelemuꞌay dig delendeman ta, mukaꞌ pibian dadema di kebegay dinita nug Balakat nu Megbebayaꞌ begu ketubuꞌ. ⁶Puꞌ bigayen dinita tantu sug Balakat nu Megbebayaꞌ pibian dini Isukristu, su Meglegawen dinita. ⁷Kaas pimilang ita niin mekesuun puun tu tulungen, sampay mpeduunan ita ketubuꞌ ndaꞌi tamanen, su ketubuꞌ pedetengen ta. ⁸Meseligan tuꞌui sinulatu kini.

Naa, ki tituluꞌan ku kini, mauyaꞌan ku tituluꞌ mu gupia tu nga mikpetuud na ditu Megbebayaꞌ, puꞌ adun pektalentenan nilan baalay lelayun su gempia, su melengas mukaꞌ su gembagel dademai pantagen dig launan getaw. ⁹Laak pegliaw mu sug lantugiꞌ, su metaas yaga mekatag di gesalan, su sualan mukaꞌ samuk mekatag di Palinta nu Megbebayaꞌ tu nga getaw Judea. Kia, ndaꞌiduni gatagen. ¹⁰Naa ki mikesabaꞌ di kekpesuay di nga samasakup, pegaday mu. Saꞌ puliꞌanen pa dinilan mainsan, pegaday mu pa mainsan peluman. Genat nitu saꞌ ndiꞌ mesikpaꞌ, utiday mu iin di pikumpungan niu. ¹¹Puꞌ mesuunan niu, mipenulay main, mpalas diniin su salaꞌen.

Katapusan Tituluꞌ

¹²Naa si Artemas, suguꞌen ku iin meditu niꞌa. Saꞌ kanaꞌ ni Artemas, si Tiquico. Saꞌ mateng dia niꞌa, pegdedaliꞌa panaw, puꞌ dia ita peksungkak lunsud Nicopolis, puꞌ pigdelendemu megbebenwau ditu selian metegdawig benwa. ¹³Si Senas su gabugadu mukaꞌ si Apolos, saꞌ mpanaw ilan, ebangay mu ilan gikteb nu megaga mu meksangkap dig launan penguiten nilan, adun ndaꞌi kulang dinilan. ¹⁴Su nga samasakup ta ditu niu, subay meglegintau ilan meksituges menggulaula di gempia, adun mpegebangan nilan sug duma melauni kulangen. Saꞌ maꞌantu, duun nai pantag nilan.

¹⁵Kig launan dumau dini, sinambaya nilan. Sambay mu dami dema di nga sambat nami miksalabuuk dinita di kekpetuud ta.

Penenebiin ku, mbianan nug launan niu su tulung nu Megbebayaꞌ.

Daal daitu.

Pablo