Kolosas

Og Sulat ni Paul dia sog Poktanudanan dituꞌ sog

Kolosas

Og Piuna Taluꞌ paꞌali sog Sulatni Paul dia sog Poktanudanan dituꞌ sog Kolosas

Og sulat ni Paul koni posunguꞌ sog poktanudanan dia ni Isukristu nog dituꞌ sog Kolosas. Og koliwagan bonua nog Kolosas koni, dituꞌ sog bukid nog Epasis. Og poktanudanan koyon dion, tinumabuk ilan dia ni Isus konaꞌ poꞌ si Paul og mikuna mogustal dun dianilan. Tibua, misakup ion dia sog bonua kituꞌ nog pigboyaꞌan ni Paul sog tang nog kopogonong non kituꞌ sog Epasis poꞌ ngon og poktanudanan sog Episus nog pipangoy non dituꞌ sog Kolosas. Miobonobon tidu dituꞌ, kisunan ni Paul nog ngon og polopanadanan nog diꞌ motud dion sog glumpuk nog poktanudanan koyon sog Kolosas nog mikpanad nog bila og gotow moleg mokosun nog Mikpongon bu mogawon tidu sog dusaanan non, sumboy tumamuy ion dow dia sog duma kounutananan nog diwataanan. Bu sumboy dosop inangon non og polomotadon mamaꞌ nog moktuk, bu sumboy unuton dow og gliꞌinan nog pongonganon, bu og duma polomotadon.

Saꞌan ituꞌ sinulat ni Paul ini, poꞌ og susion non og pikpanad nilan koyon bianan sog motud nog gustalan paꞌali sog kopoktanud dia ni Isukristu. Og tabal non nog pikpanad nilan koyon maꞌ nini: Si Isukristu da og mokogawon dia sog gotowanan tidu sog bayaꞌ nog dusa. Bu ain og pikpanad nog mosuoy dion, daꞌidun og sagnat non. Poꞌ bianan dia ni Kristu, og dunya koni inimung nog Mikpongon, bu bianan dosop dianon pitiguliꞌ non dia sog dili non. Daꞌidun lual og bianan dun nog motabang nog dunya koni dia sog bayaꞌ nog dusa, daꞌ lual bianan da dia ni Kristu. Tubus nituꞌ, ustalon ni Paul bog olo maꞌana nini sog gotowanan, sog ain sinumolabuk na dia ni Kristu.

Og sulat koni, og sinoligan mokpitang dun dituꞌ sog Kolosas si Tikikus ilan ni Onesimus. Og Onesimus koni, og gulipon kituꞌ nog pingingolotan ni Paul dia ni Pilimon bianan sog sulat non kituꞌ.

1. Og bokna nog sulat koni, 1:1-8.

2. Og glangkalangka bu og ginang ni Kristu, 1:9–2:19.

3. Og bogu kotubuꞌ nog ain sinumolabuk dia ni Kristu, 2:20–4:6.

4. Og doksuꞌan nog sulat koni, 4:7-18.

¹Akon si Paul, og mikpoit nog sulat koni, og sosuguꞌon ni Kristu Isus bianan sog bayaꞌ nog Mikpongon. Og sulat koni tidu dianakon bu dia ni Timuti nog gilug ta sog tanud.

²Og sulat nami koni posunguꞌ dia sog pigotowan nog Mikpongon dia sog koliwagan bonua nog Kolosas, ain og pigilugananan nami sog tanud nog mipagon na dia sog kosolabuk nilan dia ni Kristu.

Og tulung bu kotiknaꞌ nog pikilan mongon dianiu tidu sog Gamaꞌ ta nog Mikpongon.

Og gyakin nog kopokposolamat

³Giap nog pogyokinan nami amu, moksolamat ami dia sog Mikpongon nog og Gamaꞌ nog Kounutan ta nog si Isukristu ⁴poꞌ midongog nami paꞌali sog kopongandol niu dia ni Kristu Isus bu asta dosop sog kolalam niu dia sog glam nog pigotowan nog Mikpongon. ⁵Bu og kopongandol niu bu glolaman niu koyon dia piingkod sog dodomaan niu kituꞌ nog molongas, nog sinimpan dianiu dituꞌ sog glangit. Bu dia niu ituꞌ midongog sog motud nog taluꞌ nog ion non ion og Gombaꞌis nog Guksugan nog midopot dianiu. ⁶Bu og Gombaꞌis nog Guksugan koni pikpulonag na dia sog gliwag nog dunya nog boyaꞌan modakol tinumud dun bu miksop og polomotadon nilan mamaꞌ niu, dangan midongog niu bu misabut niu bog andun kotud og tulung nog Mikpongon. ⁷Bu og Guksugan koni kionadan niu dia ni Epapras, ion dosop og duma nami nog kololaman bu ion siꞌoy og sosoligan ni Kristu nog sinumoliu dianami mangoy dion niu. ⁸Bu piguksugan non dianami paꞌali sog glolaman niu nog miktidu sog Bolakat nog Mikpongon.

⁹Dadi saꞌan ituꞌ, tidu sog gondow kituꞌ nog kodongog nami dun asta sog numun koni, pogyokinan nami amu. Bu pokpongonion nami sog Mikpongon nog mosabut niu tokodoy og glegan non bianan sog sabut bu og kotalus nog miktidu sog Bolakat non ¹⁰bagun niu molangka ain kolegan nog Pogbayaꞌ nog ginangon niu nog mondom kosuꞌatan ion dianiu kobon non. Og doksuꞌan non, minang niu og glam nog molongas nog kohinangan, bu posisayaꞌ pogdungag og sabut niu paꞌali sog Mikpongon. ¹¹Bu pongoningonion nami dosop nog popogonon non amu tokodoy bianan sog dasig nog Bolakat non nog diꞌ kolobian bagun amu mokogaga dunut ompayat og ponutus niu sog glam non. Bu pogdaꞌdaꞌ amu ¹²kobon niu mokposolamat dia sog Gamaꞌ ta nog Mikpongon poꞌ ion og migbogoy dianiu nog kopatut bagun amu dosop mosunuꞌ sog sinimpan non kituꞌ nog pusakaꞌ dia sog pigotowan non. Og sinimpanan non dun, ain misakup dia sog pigdotuꞌan non, nog ion non ion og kodolagan. ¹³Ginawon non na ita tidu sog kopogbayaꞌ ni Kindagow, nog ion non ion og kodoloman. Bu linalin non na ita dia sog pigdotuꞌan nog Bataꞌ non nog kololaman non. ¹⁴Poꞌ bianan dianon milokat ita. Og maꞌana non, inompunan non na og dusaanan ta.

Og kotas ni Kristu

¹⁵Poꞌ si Kristu, ion og glimbagan nog Mikpongon nog diꞌ ta motongow. Ion og mikuna sog glam nog piongon. ¹⁶Bu glam non miongon bianan dianon, sog glangit bu sog glupaꞌan, ain motongow, bu ain diꞌ motongow, og pogbayaꞌanan bu og kounutananan nog diwataanan, bu bolakatanan nog konaꞌ sagyaotow asta sog kilawan. Glam non miongon bianan dia ni Kristu, bu glam non ion gapuꞌ non. ¹⁷Sog daꞌidun pa og miongon, ion donsamaꞌ na. Bu glam non miksiningkotoy bianan sog kosolabuk nilan dianon. ¹⁸Bu inimung ion nog Kounutan nog pinonggiꞌ ion dia sog gulu. Og glawas non, ion non ion og tibuk nog pigotowanan non. Ion og poktiduan nog kotubuꞌ nilan. Bu ion dosop og mikuna motubuꞌ tidu sog patoy bagun da ion mimung nog motas sog glam non. ¹⁹Poꞌ kolegan nog Mikpongon og kodiwata non bu og kodiwata ni Kristu, ion non da. ²⁰Bu kolegan non dosop nog bianan dia ni Kristu, og glam non motiguliꞌ dianon, glam nog gotowanan dituꞌ sog glangit bu dini sog glupaꞌan. Poꞌ bianan sog duguꞌ ni Kristu nog miglayas dia sog kudus, miglogomigus og glam non dianon.

²¹Poꞌ amu, dini kituꞌ daꞌidun singkot niu dianon. Bu mibanta niu ion sabap sog kolaton nog kohinangan bu pomikilan niu. ²²Tibua numun koni, bianan sog kopatoy nog glawas ni Kristu, tiniguliꞌ non amu bagun amu mokindog dia sog sunguꞌan non nog modulus bu daꞌ na silaꞌon dianiu. ²³Tibua, naꞌ niu kiankianon og tud niu dianon, somoꞌ ita da ompagon amu dianon bu diꞌ amu mogduaꞌduaꞌ sog dodomaan niu nog miktidu sog Gombaꞌis nog Guksugan. Ion non ion og Gombaꞌis nog Guksugan nog midongog niu na bu mipulonag na sog gliwag nog dunya. Bu akon, si Paul, og sinoligan dosop mokpulonag dun.

Og polosukuꞌan ni Paul sog poktanudanan

²⁴Migdaꞌdaꞌ u tanan sog sinsaan ku koni numun koni sabap sog kopogustal u koni dianiu. Poꞌ og sinsaan nog glawas u koni miimung og pongoktub sog sinsaan ni Kristu dia sog pigotowan non nog ion non pinonggiꞌ dia sog glawas non. ²⁵Poꞌ akon siꞌoy, miimung u dosop nog sosoligan nog pigotowan nog Mikpongon bianan sog ginang nog piinang nog Mikpongon dianakon mogustal mahatul dianiu nog taluꞌ non. ²⁶Og taluꞌ non koyon nog pigolong, ion non og milimod kituꞌ tidu pa sog kobon nituꞌ dia sog gotowanan. Tibua, numun koni pitampal na dia sog pigotowan non. ²⁷Poꞌ og kolegan nog Mikpongon, potompalon non dia sog ain pigotowan non bagun motampal dia sog glam nog binonsaan bog andun kobaꞌis non kituꞌ, nog milimod bosia. Og maꞌana non, si Kristu mogonong dianita. Bu bianan dianon ngon landuꞌ gloliag nog pigdodomaan ta.

²⁸Dadi, si Kristu og pikpulonag nami sog glam nog gotow. Bu pimali bu pikpanad nami sog glam nog gotow bianan sog dalom nog kotoan nog binogoy non poꞌ bagun da ilan og monala kotow dianilan muakil nami nog mihurup ilan dia ni Kristu. ²⁹Bagun ini minang, monamal u moginang bianan sog dasig nog binogoy ni Kristu kituꞌ dianakon nog kituꞌ og mimung og pagas u moginang dun.

¹Saꞌan ini toluꞌon ku dianiu bog andun og bayuꞌ nog koponamal u bagun amu koboꞌisan dun, bu ilan siꞌoy sog bonua nog Laudisia, bu asta og glam nog dumaanan kituꞌ nog daꞌ ilan pa sibon pokolumpak dianakon. ²Saꞌan inangon ku ini poꞌ bagun glam niu kopondoloꞌisogan dun, bu bagun amu moksolabuk dia sog kopokilolamoy niu poꞌ bagun amu kongonan nog sabut nog boyaꞌan mosabut niu tokodoy og pikilan nog Mikpongon nog milimod dini kituꞌ nog ion non si Kristu. ³Poꞌ dianon tinaguꞌ og glam nog kotoan bu dalom nog sabut nog Mikpongon. ⁴Toluꞌon ku ini dianiu bagun amu ondiꞌ kolimbungan nog pomali kituꞌ nog maꞌ nog migusoy migukpatukpat og kopoktaluꞌ nilan dun nog saka ondiꞌ dumalan. ⁵Poꞌ minsan daꞌ dion og dili glawas u, dion da niu og pikilan ku. Bu doma, migdaꞌdaꞌ u nog midongog u og kopoksolabuk niu bu og kopagon nog kopongandol niu dia ni Kristu.

Og gustalan nog dumalan sog motud

⁶Dadi, bila maꞌ nion tinumabuk amu noma dia ni Kristu Isus nog ion og Kounutan niu, sumboy motongow dia sog glangkalangka niu og kosolabuk niu dianon. ⁷Ponginggamut amu dianon, bu singkot niu og polomotadon niu dianon bagun ompagon og tud niu sog piktonudan kituꞌ nog pianad dianiu. Bu koponuꞌ amu kobon non nog kopokposolamat dianon.

⁸Dadi, pokpotubud amu bagun amu diꞌ moit nog minsan sima nog gotow bianan sog glimbung bu pomali nilan nog daꞌ doksuꞌ non. Poꞌ og pagon nog pomali nilan koyon nog maꞌ nion sagya da og pikilan nog sagyaotow, bu sagya da og solosila, otawaka sagya da og polomotadon nog dinunya. Konaꞌ dia miktidu ni Kristu. ⁹Poꞌ dia sog dili ni Kristu kotongow og tibuk nog kodiwata nog Mikpongon. ¹⁰Bu bianan sog kosolabuk niu dia ni Kristu, mohurup amu dosop. Bu ion motas pa sog glam nog kodotuꞌananan nog kodiwotaan.

¹¹Dadi, bianan sog kosolabuk niu dianon, tinuk non na amu. Konaꞌ tuk nog sagya gotow, sugaꞌid non, og maꞌana non, inawaꞌ ita na ni Kristu dia sog bayaꞌ nog dusa. ¹²Dangan binunyagan amu, misunuꞌ amu na sog kolobong dianon bu sog kotubuꞌ non tidu matoy bianan sog kopongandol niu dia sog dasig nog Bolakat nog Mikpongon nog mikpotubuꞌ dianon tidu matoy. ¹³Poꞌ dini kituꞌ, sog motaan nog Mikpongon, og kotubuꞌ niu daꞌ pa kosingkot dia sog Mikpongon poꞌ daꞌ amu pa tukoy ni Kristu. Og maꞌana non, pigboyaꞌan amu pa nog dusa. Tibua numun koni, og Mikpongon, sinunuꞌ non na amu sog kotubuꞌ ni Kristu tidu matoy. Inompunan non na ita sog glam nog dusaanan ta. ¹⁴Dadi, diꞌ ita na mosugat nog polihalaꞌ nog Mikpongon minsan siꞌoy daꞌ ta kunut og dan Botad kituꞌ. Poꞌ inawaꞌ non na ituꞌ bianan sog kolansang dia ni Kristu sog kudus. ¹⁵Bu bianan sog kopatoy non sog kudus, inimung non na nog diꞌ mokpondag og bayaꞌ nog kodotuꞌan bu og glam nog kodiwotaan. Bu pitampal non na ilan bagun kotoksiꞌan nog ion dodaꞌ og pondag sog glam non, bianan sog kopatoy non sog kudus.

¹⁶Dadi bila maꞌ nituꞌ, naꞌ niu potiangon ain sumilaꞌ dianiu kobal nog diꞌ amu mogbilang nog pomali nilan koyon nog paꞌali sog pongonganon, otawaka ginumon, otawaka paꞌali sog minsan olo kologyaꞌanoy dun, maꞌ nog kologyaꞌan nilan koyon sog bataꞌ bulan, otawaka og gliꞌinan nilan koyon paꞌali sog Gondow nog Pogulali. ¹⁷Poꞌ glam nog polomotadon koyon sagya da og nuni nog ngon pusunguꞌ matong nog ion non ion si Kristu. ¹⁸Bu naꞌ amu moit dun poꞌ sagya ilan da mokpotopoto sabap sog ponoginopon nilan. Poꞌ sagya ilan da og mokpopotongow. Bu sagya ilan tibua sumugyut dia sog moloikatanan. Poꞌ dianilan koyon miktidu da sog sagya pikilan nog gotow bu daꞌ doksuꞌ non ¹⁹poꞌ daꞌ ilan na singkot dia ni Kristu. Poꞌ si Kristu og Pogbayaꞌ, pinonggiꞌ ion sog gulu bu ita og glawas non. Dadi, bianan sog gokbitan non, og glam ta miksiningkotoy ita bu miimung ita maꞌ nog glegan nog Mikpongon dianita.

²⁰Dadi bila maꞌ nituꞌ, misunuꞌ amu noma dia sog kopatoy ni Kristu nog boyaꞌan daꞌ amu na pogboyaꞌoy nog pikilan nog sagya og ginungod otawaka og kinilawan, iduma mokokunut amu poma dia sog polomotadon nilan koyon? Maꞌ nion koyon, maꞌ pa nog dia amu sog dinunya. ²¹Og dondagan nilan koyon nog maꞌ nog diꞌ tumuyok, bu diꞌ mogaid, bu diꞌ minam. ²²Og polomotadon nilan koyon nog maꞌ nion, sagya da miktidu sog botad bu sog pogonadan nog gotow. Poꞌ glam nog maꞌ nion koyon, daꞌ kotodayan non. ²³Tibua, og bayuꞌbayuꞌ nog polomotadon nilan mamaꞌ da nog molongas, poꞌ polomotadon nilan koyon sagya da og dili glegan nilan sumugyut dia sog moloikatanan, bu mokpopotongow ilan nog kopokpobabaꞌ nilan, bu og gliꞌinan nilan dia sog glawas nilan ompihit, saka ondiꞌ bololagaꞌ dianilan og moktigol nog napsu nilan.

Og polomotadon nog modulus

¹Dadi, bila maꞌ nion nog sinunuꞌ amu noma dia ni Kristu sog kopotubuꞌ dianon tidu sog patoy, ngon na og bogu kotubuꞌ niu. Dadi, sumboy og pogdopoton niu kobon non ain dia sog ditas, sog pigdotuꞌan nog Mikpongon poꞌ dituꞌ si Kristu pogingkud sog dapit glintu non. ²Sumboy kobon non tigbungon niu og pomikilan niu sog ain pigdotuꞌan nog Mikpongon konaꞌ dia sog ain dini sog dinunya, ³poꞌ minatoy amu na sog dinunya. Sugaꞌid non, og kotubuꞌ niu tinaguꞌ na dia ni Kristu nog dia sog Mikpongon. ⁴Dadi, og tantu kotubuꞌ niu si Kristu. Bu bila ion mokpotongow mokpuliꞌ dini, ita siꞌoy motongow ita dosop sumolabuk sog kotas non.

⁵Dadi, bila maꞌ nion minatoy amu noma dia sog glegan niu kituꞌ nog dinunya, sumboy diꞌ amu na momabal bu moginang nog duma kosipogsipog. Bu sumboy kotigolan niu og napsu niu. Bu naꞌ amu mogabak, poꞌ og maꞌana non mimung nog kituꞌ na og piktamuy niu. ⁶Poꞌ sabap sog kohinangan nog maꞌ nion koyon, ngon gondow non nog poliholaꞌon nog Mikpongon ain moglokohinangan dun poꞌ daꞌ ilan pokokunut dianon. ⁷Dini kituꞌ, og glangka niu dia da sog polomotadon koyon nog maꞌ nion. ⁸Tibua, numun koni sumboy lumotaꞌ amu na moglokohinangan nog maꞌ nog bululokowon, bu moglolingit, bu moksina, bu monompolaꞌ nog pakasi niu, bu moglambas. ⁹Bu naꞌ amu dosop moglinoputoy nog pakasi niu poꞌ og maꞌ nion koyon, og polomotadon nog kinilawan. Poꞌ diꞌ amu na bosia doꞌitan mokokunut sog kohinangan kituꞌ nog pigboyaꞌan nog dusa. ¹⁰Poꞌ sinuklian na og dan polomotadon niu kituꞌ nog pigboyaꞌan nog dusa, nog bogu polomotadon. Dadi, og bogu pikilan niu koyon nog daꞌ pogboyaꞌoy nog dusa, miongon ion tidu sog Mikpongon bu kobon non pongimboguan non nog maꞌ nog bantuk non, bagun mosabut niu tokodoy paꞌali dianon. ¹¹Og doksuꞌan non, mimung daꞌ na pogbigyaꞌoy og gotowanan bila pingimboguan nog Mikpongon poꞌ glam non migbatuk da, og Hudyu otawaka konaꞌ Hudyu, bu ain mituk otawaka daꞌ kotuk, bu ain mikopongadiꞌ otawaka daꞌ pokopongadiꞌ, bu motas nog gotow otawaka og gulipon. Poꞌ miksolabuk ilan dia ni Kristu bu ion dia dosop sog glam nilan.

¹²Dadi, bila maꞌ nituꞌ og pigotowan amu noma nog Mikpongon nog kololaman non nog piniliꞌ non, sumboy motongow dia sog glangka niu og glolat niu bu og tabang niu dia sog pakasi niu. Bu kobon non sungod niu ilan bu dunut kobabaꞌ nog bolotabat niu, bu kopayat nog ponutus niu. ¹³Bu poglinonggungoy amu bu poginompunoy amu minsan olo og susian niu, maꞌ nog kopongampun nog Kounutan ta dianiu. ¹⁴Bu og kosolag non, sumboy mokilolamoy amu poꞌ bianan sog glolaman, og glam non koni mimung ompagon og kopoksolabuk niu. ¹⁵Bu sog kopoksolabuk niu dia sog solabuk glawas ni Kristu, binogoy non na dianiu moglogomigus. Bu sumboy og kopoglogomigus niu koyon og mogbayaꞌ dianiu poꞌ saꞌan ituꞌ inonggat non amu. Bu kobon non pokposolamat amu dianon. ¹⁶Og pomali ni Kristu sumboy monginggamut dianiu bu mogokbit dianiu kobon niu momali bu mokpanad sog pakasi niu bianan sog dalom nog sabut niu. Bu bobat niu og kosanglit bu og solamat niu dia sog Mikpongon, bu og duma bobatanan paꞌali sog kinodiwata. ¹⁷Bu minsan olo ponginangon niu otawaka og poktoluꞌon niu, sumboy inangon niu bianan dia sog ngalan nog Kounutan ta nog si Isus. Bu bianan dianon, pokposolamat amu dia sog Gamaꞌ ta nog Mikpongon.

Og gombaꞌis nog polomotadon nog poktanudanandia sog baloy

¹⁸Dadi amu kolibunanan nog sinumolabuk na dia ni Kristu, sumboy sumangkan amu sog duoy niu.

¹⁹Bu amu siꞌoy kolokianan, sumboy kololamoy niu dosop og duoy niu bu naꞌ amu omboluꞌ dianilan.

²⁰Bu amu siꞌoy gombataꞌanan, sumboy kobon non mokokunut amu dia sog mokogulang niu poꞌ maꞌ nituꞌ og mosulut sog Kounutan ta.

²¹Bu amu siꞌoy mokogulang nilan, sumboy naꞌ niu inangan og gombataꞌanan niu nog boyaꞌan mosingmal ilan dun.

²²Bu amu siꞌoy og guliponanan, sumboy mokokunut amu sog glam non sog gapuꞌ niu nog dini sog glupaꞌan. Bu konaꞌ tibua sagya mokpopotongow amu nog ginang niu dianilan bagun amu kodongyaꞌan, sugaꞌid non, potongow niu dianilan og kopoktantu niu sog glam nog ginang niu poꞌ maꞌ nituꞌ og kosugyut niu dia sog Kounutan ta. ²³Bu minsan olo ponginangon niu, tigbung niu dituꞌ og pikilan niu mamaꞌ nog dia niu ininang sog Kounutan ta, konaꞌ sog sagyaotow. ²⁴Poꞌ kisunan niu na donsamaꞌ nog mokotabuk amu nog tumbas non dianiu nog kotubuꞌ nog daꞌ kopus non. Poꞌ og tantu Kounutan niu sog ginang niu, si Kristu. ²⁵Bu ain og moglokohinangan nog molaton, ongon dosop og tumbas non dun. Poꞌ og Mikpongon, bila mukum, ondiꞌ nododaꞌ mogbigyaꞌ.

¹Bu amu siꞌoy nog togo gulipon, sumboy molongas og kopogokbit niu sog gulipon niu. Poꞌ kisunan niu na nog amu siꞌoy, ngon dosop og Kounutan niu dituꞌ sog glangit.

Og dungag nog pomali sog glam nog poktanudanan

²Dadi og glam niu, sumboy kobon non pogyakin amu. Bu pongmohilat amu kobon niu mogyakin dunut kopoksolamat niu dia sog Mikpongon. ³Bu pogyokinoy niu dosop ami dini poꞌ bagun ami kobogayan nog dalan mogustal, poꞌ bagun nami mustal og milimod kituꞌ tidu pa sog kobon nituꞌ paꞌali dia ni Kristu. Poꞌ, sabap sog kopogustal u koni, mikolobusu u tanan dun. ⁴Saꞌan ituꞌ sumboy pogyokinan niu akon, poꞌ bagun ku da ompodolag tokodoy og gustalan ku dun. Poꞌ maꞌ nituꞌ og polosukuꞌan ku.

⁵Bu kobon non potubudoy niu og polomotadon niu dia sog ain daꞌ pa kituꞌ tabuk dia ni Kristu. Bu kobon non pongimakat amu moginang nog ombaꞌis. ⁶Bu og kopoktaluꞌ niu siꞌoy, sumboy kobon non mosuꞌat bu ombaꞌis pokinongogan poꞌ bagun niu da ilan motabal nog motud ain moksak kituꞌ dianiu.

Og ponogina ni Paul

⁷Dadi, dinondag u si Tikikus mangoy dion niu. Ion og kololaman ta bu og gilug ta dosop sog tanud. Bu ion siꞌoy og duma nami nog sosoligan dia sog ginang nog binogoy dianita nog Kounutan ta. Ion og moguksug dianiu paꞌali sog glam nog kibianbianan ku dini. ⁸Saꞌan ini sinuguꞌ u ion mangoy dion, poꞌ bagun niu modongog bog olo botangbotang nami dini bu doma, bagun amu dosop kopondoloꞌisogan dun dianon. ⁹Og duma non mangoy dion niu si Onisimus. Bu ion siꞌoy og gilug ta dosop sog tanud, nog kololaman ta nog tidu dion sog glumpuk niu. Ilan og moguksug dianiu nog glam nog bianbian nami dini.

¹⁰Bu si Aristarkus, og duma u dini sog kolobusuan, minogina ion dianiu. Bu si Mark siꞌoy, og goguapuꞌ ni Barnabas, minogina dosop ion dianiu dion. (Bu mitabuk niu da bayuꞌ og pomali u paꞌali dianon nog bila mian ion dion, sumboy tolimaꞌon niu.) ¹¹Bu si Josua nog koduaꞌ ngalan non si Justus, ion siꞌoy minogina dosop dianiu. Og tolu kotow da koni og salu bansa u nog bansa Hudyu nog tinumabuk na dia ni Kristu, og dinumuma dianakon mokpulonag nog gustalan paꞌali sog pigdotuꞌan nog Mikpongon. Bu kipongomuꞌan u sabap dianilan. ¹²Bu si Epapras siꞌoy nog tidu sog glumpuk niu, minogina dosop ion dianiu. Ion og sosoligan dosop ni Kristu Isus. Bu kobon non monamal ion mogyakin paꞌali dianiu nog bagun amu ompagon sog glam nog glegan nog Mikpongon, bu bagun dumalom og sabut niu, bu motintu na tokodoy og tud niu. ¹³Bu kitoksiꞌan ku da bog andun koponamal non moginang nog koboꞌisan niu. Bu konaꞌ tibua dianiu, sugaꞌid non, asta dosop dianilan dituꞌ sog bonua nog Laudisia, bu bonua nog Hirapolis. ¹⁴Bu si Luk, og polomulung kituꞌ nog kololaman ta dosop, bu si Dimas siꞌoy, minogina ilan dosop dianiu. ¹⁵Bu akon siꞌoy, polatas niu pa og sogina u koni dia sog pigilugan ta kituꞌ sog tanud dituꞌ sog Laudisia, bu dosop dia ni Nimpa bu og pigilugan ta sog tanud nog mokpoglumpuk moktamuy dia sog Mikpongon dituꞌ sog baloy non.

¹⁶Bu bila motubus niu pogbostaoy og sulat u koni, pitang niu dosop dituꞌ sog Laudisia sog pigilugan ta sog tanud dituꞌ. Bu og sulat u kituꞌ dituꞌ nilan, alap niu dosop bu basta.

¹⁷Bu taluꞌ niu dia ni Arkipus nog sumboy doksuꞌon non tokodoy og ginang nog binogoy nog Kounutan ta dianon.

¹⁸Bu akon siꞌoy, monogina u dosop dianiu. (Akon, dili si Paul, og sinumulat nog ponogina u koni dianiu.) Naꞌ niu tokodoy poksolingowan nog dia u sog kolobusuan.

Og tulung nog Mikpongon mongon dianiu.