Og tagnaꞌ Sulat ni
Jan
Og Piuna Taluꞌ paꞌali sog tagnaꞌ Sulat ni Jan
Si Jan, ion sala kotow sog sopuluꞌ bu duaꞌ sosuguꞌonanan ni Isukristu nog dinondag non mogustal paꞌali dianon. Ngon tolu buk sulat ni Jan nog pinoit non sog poktanudanan dia ni Isukristu. Mogulang na ion og kosulat non nog tolu buk sulatanan non koni.
Og tiganaꞌ sulat non koni, pinoit non dia sog glam nog gotowanan kituꞌ nog tinumud na dia ni Isukristu sog ainain nog bonuaanan. Sog tang koyon, modakol og gotowanan mikpanad nog diꞌ motud. Og duma, mikpoktaluꞌ ilan nog og Bataꞌ dow nog Mikpongon ondaꞌ solug nog glawas nog kilawan, otawaka ondaꞌ dow botaꞌoy nog sagyaotow, sugaꞌid non, tinumonaꞌ dow tibua ion dini sog glupaꞌan.
Dadi, pilogdong ni Jan bianan sog sulat non koni dia sog ain mingandol na dia ni Isukristu, nog si Isus, ion og tantu Bataꞌ nog Mikpongon, bu ion og tantu gotow dosop. Bu pidonsamaꞌ non dosop tumaluꞌ sog ain og mikokunut na dia ni Isus nog mogolig ilan tokodoy nog pikpanad nog duma gotowanan koyon nog diꞌ dumalan sog pikpanad nog miktidu dia ni Isukristu. Bu ondiꞌ ilan tokodoy tumud nog pikpanad nog gotowanan koyon nog diꞌ motud.
Sog sulat koni, mitampal dosop nog ain sinumalig na dia ni Isukristu, molalam dia sog Gamaꞌ nog Ion og Mikpongon, bu molalam dosop dia sog pakasiotow non.
1. Og bokna nog sulat koni, 1:1-4.
2. Og dolag bu og kodoloman, 1:5–2:29.
3. Og gombataꞌanan nog Mikpongon bu og gombataꞌanan ni Kindagow, 3:1-24.
4. Og motud bu og glopangan, 4:1-6.
5. Og polosukuꞌan nog ain molalam, 4:7-21.
6. Og kopomondag nog bianan sog kopongandol, 5:1-21.
1Og Taluꞌ nog pitongow nog Mikpongon dianita
1Sinumulat ami dianiu paꞌali sog Taluꞌ nog piktiduan nog kotubuꞌ nog donsamaꞌ na miongon tidu pa sog tolipunan. Og Taluꞌ koyon nog pogolongon nami, ion non ion og midongog nog dili tolinga nami, bu mitongow nog dili mata nami, bu mituyok nog dili komot nami, bu kitimaꞌanan nami. 2Bu og piktiduan nog kotubuꞌ koni, linogdoy non og ginungod, bu mitongow nami ion. Dadi, tinoksiꞌan nami ion dianiu, nog ion og mogbogoy nog kotubuꞌ nog daꞌ kopus non. Sog donsamaꞌ pa, dia na ion sog Gamaꞌ ta nog Mikpongon, bu pitongow na dianami. 3Saꞌan ituꞌ pikpulonag nami dianiu paꞌali sog mitongow nami, bu midongog nami kituꞌ, bagun amu mokopoksolabuk dianami, bu og kopoksolabuk ta koni bianan dia sog kosolabuk ta dia sog Gamaꞌ ta nog Mikpongon, bu dia sog Bataꞌ non nog si Isukristu. 4Sinumulat ami ini dianiu bagun da motoktub og daꞌdaꞌan ta.
Og glangka nog gotow, ain sinumolabuk nadia sog Mikpongon
5Og gustalan nog midongog nami dia ni Isukristu, ion non ini og pokpolotason nami koni dianiu nog, og Mikpongon, dianon og dolag. Daꞌidun nododaꞌ og dolom dianon. 6Dadi, bila moktaluꞌ ita nog sinumolabuk ita na dia sog Mikpongon nog saka, og poginangon ta og kohinangan da dia sog kodoloman, og maꞌana non, migloput ita bu daꞌ ta longkaoy og motud. 7Tibua, bila og poginangon ta og kohinangan nog dia sog kodolagan mamaꞌ non, nog ion dia sog dolag, mokopoksolabuk ita nog dumaanan ta bu kiugasan na og glam nog dusaanan ta nog duguꞌ ni Isus nog miglayas sog kudus, nog ion og Bataꞌ nog Mikpongon.
8Bu bila moktaluꞌ ita nog daꞌidun dusa ta, piglimbungan ta og dili glawas ta, bu daꞌ ta tolimaꞌoy og motud. 9Tibua, bila moglilaꞌ ita nog dusaanan ta dia sog Mikpongon, ompunan non ita sog glam nog dusaanan ta kituꞌ poꞌ ion kopongondolan bu diꞌ mogbigyaꞌ, bu ugasan non og glam nog kohinangan ta kituꞌ nog molaton. 10Tibua, bila moktaluꞌ ita nog daꞌ ita pokodusa, og maꞌana non pingingloput ta og Mikpongon, bu daꞌ ta pa tolimaꞌoy og taluꞌ non.
2Si Isus og mingingolot dianita
1Amu, og gombataꞌanan ku nog kololaman ku, sinulat u ini dianiu bagun amu bosia ondiꞌ na mokinang nog dusa. Tibua, bila ngon og mokopoginang nog dusa, ngon sala kotow og mingingolot dianon dia sog Gamaꞌ ta nog Mikpongon. Bu og mongingolot koyon, ion non ion si Isukristu, nog ion og midulus. 2Ion miimung pomalas. Og maꞌana non, bianan dia sog kopalas kituꞌ dianon, kiugasan dun og glam nog dusaanan ta. Bu konaꞌ tibua og dusaanan ta, sugaꞌid non, asta dosop og dusaanan nog glam nog gotow.
3Bila mikokunut ita sog dondagananan nog Mikpongon, motintu dianita nog sunan ta ion. 4Bila ngon gotow nog moktaluꞌ nog kosunan non og Mikpongon, saka ondaꞌ non unutoy og dondagananan non kituꞌ, og gotow koyon migloput bu ondaꞌ non tolimaꞌoy og motud nog miktidu sog Mikpongon. 5Tibua, simasima og mikokunut dia sog taluꞌ nog Mikpongon, og glolaman nog gotow koyon sog Mikpongon mituman na. Og gindanan nog sinumolabuk ita na dia sog Mikpongon maꞌ nini. 6Ain og miktaluꞌ nog sinumolabuk na dia sog Mikpongon, sumboy moglogiling dia sog polomotadon ni Isukristu.
Og dondagan nog Mikpongon
7Glokoleanan ku nog kololaman ku, og dondagan koni nog sinulat u dianiu konaꞌ amu na og sobuꞌ dun. Bu kisunan niu na ini tidu pa sog tolipunan. Poꞌ donsamaꞌ niu na midongog bianan sog gustalan kituꞌ dianiu. 8Tibua, minsan siꞌoy donsamaꞌ niu na midongog og dondagan koni, mamaꞌ da nog bogu pa dianiu poꞌ og kotud nog dondagan koni, motongow dia ni Kristu bu motongow dosop dianiu. Poꞌ og dolom mayaꞌmayaꞌ na mawaꞌ bu og tantu nog dolag sinumilow na.
9Bila ngon gotow nog moktaluꞌ nog ion dia na sog kodolagan, saka pokongitan non pa og gilug non sog tanud, og gotow koyon dia pa sog kodoloman. 10Tibua, og gotow nog mololat dia sog pigilugan non, kobon non dia ion sog kodolagan. Bu diꞌ ion kotongowan nog boyaꞌan mokodusa ion. 11Bigyaꞌ non, ain og gotow kituꞌ nog mangit pa sog gilug non sog tanud, dia pa ion migliuꞌliuꞌ sog kodoloman. Bu og poginangon non, og kohinangan pa nog kodoloman. Diꞌ non sunan ain ion posunguꞌ poꞌ miimung nog ondiꞌ na ion mokotongow kobal nog modolom.
12Sinulat u ini dianiu, amu og gombataꞌanan ku sog tanud, poꞌ og dusaanan niu kiompunan na bianan sog ngalan ni Kristu.
13Sinulat u ini dianiu, amu og mokogulanganan sog tanud, poꞌ kisunan niu na ion, ion donsamaꞌ na tidu pa sog tolipunan.
Sinulat u dosop ini dianiu, amu og boguotowanan pa, poꞌ dinag niu na si Kindagow.
Sinulat u ini dianiu, amu og gombataꞌanan ku, poꞌ kisunan niu na og Gamaꞌ ta nog Mikpongon.
14Sinulat u ini dianiu, amu og mokogulanganan sog tanud, poꞌ kisunan niu na ion, ion donsamaꞌ na tidu pa sog tolipunan.
Sinulat u ini dianiu, amu og boguotowanan pa, poꞌ ompagon amu na dia sog Mikpongon. Bu og taluꞌ non miungod na dianiu. Bu dinag niu na Kindagow.
15Naꞌ amu mima nog dinunya otawaka og gininisan nog dini sog dunya. Poꞌ bila og gotow mima nion, og maꞌana non, ondaꞌ ion kolalam nog Gamaꞌ ta nog Mikpongon. 16Poꞌ og glam nog dinunya, ion non ion og mokodusa kituꞌ nog glegan nog ginungod, bu ain motongow non kituꞌ nog ilakad gimaan non dun, bu og mogbonsag nog gakod non. Og glam nog kohinangan koni, ondaꞌ poktidu sog Gamaꞌ ta nog Mikpongon, sugaꞌid non, dini da miktidu sog dunya koni. 17Og dinunya bu og glam nog gimaan nog gotowanan nog dinunya, solianlian da. Tibua, og gotow nog mikokunut sog glegan nog Mikpongon, motubuꞌ ion asta sog daꞌ kopus non.
Og minanta dia ni Isukristu
18Gombataꞌanan ku, daliꞌ na og bungkas. Dadi, og midongog niu kituꞌ nog ngon posunguꞌ matong og mongantu dia ni Kristu, minsan numun koni modakol na og minatong nog polongantu dia ni Kristu. Dadi, saꞌan ituꞌ kosunan ta nog daliꞌ nododaꞌ og bungkas. 19Og gotowanan koyon, konaꞌ ta nododaꞌ ilan og sakup. Saꞌan minawaꞌ ilan dianita. Poꞌ somoꞌ sakup ta da ilan, ondaꞌ ilan bosia pokulog dianita. Tibua, saꞌan ion minawaꞌ ilan poꞌ maꞌana non, konaꞌ ta ilan sakup.
20Tibua amu, kosunan niu nog binogayan amu nog Bolakat nog Mikpongon tidu dia ni Kristu. Dadi glam niu, mokosun amu na nog motud. 21Dadi akon, saꞌan sinumulat u dianiu, konaꞌ poꞌ sabap nog ondiꞌ niu kosunan og motud, sugaꞌid non, sabap sog kosunan niu na, bu sabap dosop nog daꞌidun og gloput nog moktidu sog motud. 22Sima ma buan og moloput? Og moloput koyon, ain og ondiꞌ tumud nog si Isus, nog ion og Kristu.2:22 Somoꞌ ita da, si Isus, ion og tantu Diwata. Dadi, ain og ondiꞌ tumud, ion non ion og mongantu dia ni Kristu, bu daꞌ non tolimaꞌoy og Gamaꞌ ta nog Mikpongon bu og Bataꞌ non nog si Isus. 23Poꞌ simasima ompok tumolimaꞌ dia sog Bataꞌ, og maꞌana non, ondaꞌ non dosop tolimaꞌoy og Gamaꞌ. Tibua, simasima og tinumolimaꞌ dia sog Bataꞌ, og maꞌana non, tinolimaꞌ non dosop og Gamaꞌ ta nog Mikpongon.
24Dadi, sumboy ungodon niu sog pikilan niu og midongog niu kituꞌ nog gustalan nog tidu pa sog kotabuk niu dia ni Isukristu. Poꞌ bila inungod niu na ituꞌ, dia amu na kobon non sog Mikpongon bu dia sog Bataꞌ non. 25Bu motabuk ta og pinasad ni Kristu kituꞌ dianita nog kotubuꞌ nog daꞌ kopus non.
26Sinulat u ini dianiu paꞌali dia sog polopanadanan kituꞌ nog diꞌ motud poꞌ bagun nilan da amu ondiꞌ moit. 27Tibua si Kristu, binogoy non na dianiu og Bolakat nog Mikpongon nog kobon non mogonong ion dianiu. Dadi, minsan daꞌidun siꞌoy lumual og mokpanad dianiu, og Bolakat non na og mokpanad paꞌali sog glam nog motud. Poꞌ og pikpanad non koyon motud. Konaꞌ og gloput. Dadi, pokokunut amu dia sog pikpanad nog Bolakat nog Mikpongon koyon dianiu. Bu kobon non singkot amu dia ni Kristu.
28Dadi gombataꞌanan ku, kobon non singkot amu dianon poꞌ bagun bila matong na ion, ondiꞌ ita mondok bu ondiꞌ ita mosipog dianon. 29Dadi, kisunan niu noma nog si Kristu midulus, sumboy kosunan niu dosop nog ain og moginang nog kodulusan, og bataꞌ dosop ion nog Mikpongon.
3Og gombataꞌanan nog Mikpongon
1Kosunan ta nog landuꞌ og glolaman nog Mikpongon dianita, poꞌ tontong niu poloꞌma, iningolanan non tanan ita nog gombataꞌanan non! Bu gombataꞌanan non dodaꞌ ita! Tibua, og gotowanan nog daꞌ pokokunut sog Mikpongon, ondaꞌ nilan ita kilolaoy poꞌ ondaꞌ nilan dosop kilolaoy og Mikpongon. 2Glokoleanan ku nog kololaman ku, numun koni og gombataꞌanan ita na dodaꞌ nog Mikpongon. Tibua, ondaꞌ pa siꞌoy potompaloy dianita bog olo bayuꞌbayuꞌ nog poktimoluyan ta sog gunanunan koyon, kosunan ta da, nog bila tumuaꞌ na ion, mimung ita na mamaꞌ non, poꞌ motongow ta na ion bog olo bayuꞌbayuꞌ non. 3Dadi, simasima migdodama nog maꞌ nituꞌ, polonuꞌon non og pikilan non bu og polomotadon non bagun ion mimung mamaꞌ ni Isukristu nog molonuꞌ.
4Ain og gotow nog moginang nog dusa, og maꞌana non, sinoksug non og botad nog miktidu dia sog Mikpongon. Poꞌ og ginang koyon nog daꞌ kunut dia sog botad, ion non ion og dusa. 5Kisunan niu nog saꞌan si Kristu minangoy dini, poꞌ bagun non mawaꞌ og dusaanan ta. Poꞌ ion, daꞌ og dusa non. 6Dadi, ain og sinumolabuk na dia ni Kristu, diꞌ na ion tumibabaꞌ moginang nog dusa. Tibua, ain og gotow nog kobon non moginang da nog dusa, og maꞌana non, ondaꞌ non pa kilolaoy si Kristu, bu ondiꞌ non pa ion kosunan.
7Gombataꞌanan ku, naꞌ amu moleg kobigyakan nog minsan sima otowoy. Poꞌ ain og moginang nog kodulusan, modulus ion mamaꞌ ni Kristu. 8Tibua, ain og moginang kobon non nog dusa, og sakup ion ni Kindagow. Poꞌ si Kindagow, tidu pa sog tolipunan, mikodusa na. Saꞌan og Bataꞌ nog Mikpongon minangoy dini poꞌ inangoy non loꞌatoy og ginang ni Kindagow. 9Simasima binataꞌ nog Mikpongon, ondiꞌ na tumibabaꞌ moginang nog dusa poꞌ dianon na og kotubuꞌ nog miktidu sog Mikpongon. Bu sabap sog binataꞌ na ion nog Mikpongon, mologon nododaꞌ nog tumibabaꞌ ion moginang nog dusa. 10Og gindanan bog olo og piktingkaan nog gombataꞌanan nog Mikpongon bu og gombataꞌanan ni Kindagow maꞌ nini. Ain og ondiꞌ moginang nog kodulusan otawaka ondiꞌ mololat sog pakasiotow non, konaꞌ og gombataꞌ nog Mikpongon.
Moglinolatoy ita
11Koni og pomali nog midongog niu tidu pa sog tolipunan, nog sumboy moglinolatoy ita. 12Naꞌ amu moglogiling dia ni Kain. Poꞌ ion og sakup ni Kindagow. Bu binunuꞌ non og kongudan non. Iduma gidoy buan binunuꞌ non ma? Saꞌan ituꞌ binunuꞌ non, poꞌ og kongudan non kituꞌ, midulus og kohinangan non saka ion, molaton og kohinangan non. 13Dadi pigilugan ku, naꞌ amu mosobuꞌ dun bila pokongitan amu nog gotowanan dini sog dunya. 14Poꞌ kisunan ta nog mikawaꞌ ita na tidu sog patoy bu minangoy ita na sog kotubuꞌ nog daꞌ kopus non. Saꞌan kisunan ta poꞌ sabap sog milolat ita sog pigilugan ta. Poꞌ simasima ondiꞌ mololat, og maꞌana non, og gotow koyon dia pa ion sog patoy. 15Bu ain og gotow nog mangit sog gilug non, mamaꞌ da nog binunuꞌ non na. Bu kosunan niu nog og polomunuꞌ, daꞌidun og kotubuꞌ non nog daꞌ kopus non.
16Dadi, maꞌ nini og kosabut niu dun bog olo dodaꞌ og glolat, si Isukristu, inatas non matoy sabap sog glolatan non dianita. Dadi ita siꞌoy, sumboy bosia mongatas ita dosop sumoliu dia sog pigilugan ta minsan sog kopotayan. 17Bila ngon sala kotow dianita nog ngon ngon da bosia dianon, saka mitongow non og gilug non nog kilogonan, saka ondiꞌ non ion tobangan, ondiꞌ buan og motud nog dianon og glolat nog Mikpongon. 18Dadi gombataꞌanan ku, sumboy konaꞌ tibua sagya moktaluꞌ ita nog mololat ita. Sugaꞌid non, og tantu mololat sumboy motongow bianan dia sog kohinangan ta. 19Dadi, maꞌ nituꞌ og kisunoy ta dun nog ita, dia ita na dodaꞌ sog motud, bu bianan dituꞌ mimung nog motiknaꞌ og pikilan ta dia sog sunguꞌan nog Mikpongon. 20Minsan siꞌoy mogdialominawa ita nog ukumon ita sabap sog mikodusa ita, og glolat nog Mikpongon labi pa sog pikilan ta kituꞌ. Bu ion, kosunan non og glam non.
21Dadi glokoleanan ku nog kololaman ku, bila ondaꞌidun na og dialominawa ta nog maꞌ nituꞌ, ondiꞌ ita na modapaꞌ mongadap sog Mikpongon. 22Bu motabuk ta ain pongonion ta dianon poꞌ mikokunut ita dia sog dondagananan non. Bu ininang ta og sosuku nog kosuꞌatan ion dun. 23Bu og dondagan non maꞌ nini. Sumboy tumud ita dia sog ngalan nog Bataꞌ non nog si Isukristu. Bu sumboy moglinolatoy ita mamaꞌ nog dinondag non kituꞌ donsamaꞌ dianita. 24Simasima og mokokunut sog dondagananan nog Mikpongon, og maꞌana non, kobon non dia ion sog Mikpongon, bu og Mikpongon kobon non dianon. Saꞌan kosunan ta nog og Mikpongon dia na nita, sabap sog Bolakat non nog binogoy non dianita.
4Sumboy pokilailaon ta og poktiduan nog bolakat
1Glokoleanan ku nog kololaman ku, naꞌ amu mogdodaliꞌ tumud sog gotowanan koyon nog moktaluꞌ ilan nog ngon og bolakat nilan nog miktidu dia sog Mikpongon. Sugaꞌid non, pokilaila niu pa poguna bog dia taꞌ dodaꞌ miktidu sog Mikpongon. Poꞌ modakol og polopanadanan nog momali ilan nog diꞌ motud nog mikponuaꞌ dini sog dunya koni. 2Bu og gindanan niu dun nog og bolakat koyon nog miktidu dia sog Mikpongon, maꞌ nini. Simasima og gotow nog mokpanad nog si Isukristu miktimaluy gotow, ion non ion og gindanan niu dun nog, og bolakat non koyon ion non nion og miktidu sog Mikpongon. 3Tibua, ain ondiꞌ maꞌ nituꞌ og gustalan non dun nog si Isus miktimaluy gotow, og pikpanad non koyon, ion non ion og gindanan nog og bolakat non kituꞌ daꞌ dia miktidu sog Mikpongon. Sugaꞌid non, og bolakat koyon nog dion non, miktidu ion dia sog minanta kituꞌ dia ni Kristu. Ion non ion og midongog niu kituꞌ nog posunguꞌ pa matong saka, numun koni dini na.
4Tibua amu, og gombataꞌanan ku, og sakup amu na nog Mikpongon. Saꞌan dinag na dianiu og polopanadanan koyon nog diꞌ motud, poꞌ og Bolakat nog Mikpongon og migonong dianiu. Bu og kopogbayaꞌ non labi pa dia sog kopogbayaꞌ nog bolakat nilan koyon dini sog dunya. 5Og polopanadanan koyon nog diꞌ motud, sakup ilan nog dunya. Saꞌan ituꞌ og pogustalon nilan ain da og dini sog dunya. Bu og gotowanan dini sog dunya koni, mokinongog dianilan. 6Tibua ita, og sakup ita na nog Mikpongon. Dadi, ain og kisunan non na og Mikpongon, mokinongog ion dianita. Tibua, ain og konaꞌ sakup nog Mikpongon, ondiꞌ ion mokinongog dianita. Dadi, maꞌ nituꞌ og kiindanoy ta dun og bolakat koyon nog motud bu og bolakat koyon nog diꞌ motud.
Og glolat dia kotongow sog Mikpongon
7Glokoleanan ku nog kololaman ku, sumboy kobon non moglinolatoy ita. Poꞌ og Mikpongon, ion og poktiduan nog glolat. Og gotow nog milolat sog pakasiotow non, ion binataꞌ nog Mikpongon bu kosunan non na og Mikpongon. 8Simasima ondiꞌ mololat, diꞌ non kosunan og Mikpongon. Poꞌ og Mikpongon og poktiduan nog glolat. 9Og kopokpotongow nog Mikpongon nog glolaman non dianita maꞌ nini. Dinondag non og Bataꞌ non nog boktung mangoy dini sog dunya bagun ita kongonan nog kotubuꞌ nog daꞌ kopus non bianan dianon. 10Og glolat kituꞌ nog pogolongon ku, konaꞌ og glolaman ta sog Mikpongon, sugaꞌid non, og glolaman nog Mikpongon dianita nog boyaꞌan lamig non tanan binogoy og Bataꞌ non mimung nog pomalas bagun ita kompunan sog dusaanan ta.
11Glokoleanan ku nog kololaman ku, bila maꞌ nituꞌ ma og glolaman nog Mikpongon dianita, ita siꞌoy, sumboy moglinolatoy ita. 12Poꞌ daꞌidun og gotow nog mikotongow nog Mikpongon. Tibua, bila moglinolatoy ita, og Mikpongon kobon non mogonong dianita. Dadi bila maꞌ nituꞌ, og glolaman nog Mikpongon, mituman na dianita.
13Kisunan ta nog dia ita na sog Mikpongon bu ion siꞌoy dia na nita poꞌ sabap sog Bolakat non nog binogoy non dianita. 14Bu ami, mitongow nami ion bu pigustal nami sog gotowanan nog, og Gamaꞌ ta nog Mikpongon, dinondag non og Bataꞌ non mangoy dini bagun ion mimung nog Polonabang nog gotowanan dini sog dunya. 15Og gotow nog mogustal nog si Isus og Bataꞌ nog Mikpongon, kobon non og Mikpongon mogonong dianon. Bu ion siꞌoy, kobon non dia dosop sog Mikpongon. 16Dadi, sumalig ita dia sog glolaman nog Mikpongon poꞌ kibianan ta na.
Og Mikpongon og poktiduan nog glolat. Dadi, simasima og pigboyaꞌan nog glolat, maꞌana non, dia ion kobon non sog Mikpongon bu og Mikpongon siꞌoy kobon non mogonong dianon. 17Dadi bila maꞌ nituꞌ, dia noma nita og glolat, mituman na ituꞌ dianita. Saꞌan ondiꞌ ita na mondok bila matong na og gondow kituꞌ nog ukumon og glam nog gotow. Poꞌ minsan siꞌoy dini ita pa sog dunya koni, piglogilingan ta da og polomotadon ni Kristu. 18Bila dia ita sog glolat, ondiꞌ ita mondok. Poꞌ og glolat koyon nog mituman, og mokawaꞌ nog gondok ta. Bila mondok ita, og maꞌana non, ondaꞌ pa kotuman og glolat kituꞌ dianita. Poꞌ saꞌan og gotow mondok poꞌ og dodomaan non poliholaꞌon ion.
19Saꞌan mololat ita poꞌ og Mikpongon milolat poguna dianita. 20Bila ngon gotow moktaluꞌ nog ion molalam sog Mikpongon saka mangit ion sog gilug non, og gotow koyon moloput. Poꞌ bila ondiꞌ ion mololat dia sog gilug non nog saka kobon non motongow non, olo ma og mogandun kolalam non dia sog Mikpongon nog saka ondiꞌ non motongow? 21Dadi, koni og dondagan nog binogoy non dianita, simasima og gotow nog molalam sog Mikpongon, sumboy molalam dosop dia sog gilug non.
5Momondag ita bianan sog kopongandol
1Simasima og tumud nog, si Isus og Kristu,5:1 Somoꞌ ita da, si Isus, ion og tantu Diwata. binataꞌ na ion nog Mikpongon. Bu simasima og molalam sog gamaꞌ, molalam dosop ion sog bataꞌ non. 2Og gindanan nog mololat ita sog gombataꞌanan nog Mikpongon maꞌ nini. Molalam ita sog Mikpongon bu mokokunut ita dia sog dondagananan non. 3Poꞌ og glolaman ta dia sog Mikpongon motongow bianan sog kopokokunut ta dia sog dondagananan non. Bu og dondagananan non koyon ondiꞌ mologon pogunuton. 4Poꞌ simasima binataꞌ na nog Mikpongon mimondag na sog dinunya. Bu saꞌan mikopondag ita poꞌ bianan sog kopongandol ta. 5Dadi, sima mobuan og mokopomondag sog dinunya? Og mokopondag sog dinunya, ain da og tinumud nog si Isus og dili Bataꞌ nog Mikpongon.
Og gininisan nog taksiꞌ paꞌali sog kodiwata ni Isukristu
6Si Isukristu koni, minangoy ion dini. Saꞌan kisunan ta poꞌ bianan sog kobunyag dianon sog tubig bu sog kopatoy non kituꞌ nog miglayas og duguꞌ non. Konaꞌ tibua bianan sog tubig, sugaꞌid non, bianan dosop sog duguꞌ non. Bu og Bolakat nog Mikpongon og mikotaksiꞌ dia sog gotowanan paꞌali dianon, bu og koponaksiꞌ nog Bolakat non koyon motud. Poꞌ og Bolakat non koyon, og poktiduan nog motud. 7Dadi, ngon tolu ginis og mokotaksiꞌ paꞌali dianon, nog si Isus, ion non og Bataꞌ nog Mikpongon. 8Saꞌ, bianan sog kotaksiꞌ dianon nog Bolakat nog Mikpongon. Koduaꞌ, bianan sog kobunyag dianon sog tubig. Bu kotolu non, bianan sog duguꞌ non nog miglayas sog kudus. Og tolu ginis koni nog taksiꞌ paꞌali dianon miksolabuk ilan. 9Bila tudon ta og koponaksiꞌ nog sagyaotow, labi ita na tud sog koponaksiꞌ nog Mikpongon poꞌ og koponaksiꞌ nog Mikpongon motud nododaꞌ, bu tinoksiꞌan non paꞌali sog Bataꞌ non. 10Dadi, simasima og tumud nog si Isus og Bataꞌ nog Mikpongon, kitoksiꞌan dianon paꞌali dia ni Isus. Tibua, ain og ondiꞌ tumud sog Mikpongon, piloput non og Mikpongon poꞌ daꞌ ion tud sog koponaksiꞌ non kituꞌ paꞌali sog Bataꞌ non. 11Koni og taksiꞌ kituꞌ nog pogolongon. Og Mikpongon, binogayan non ita nog kotubuꞌ nog daꞌ kopus non. Bu og kotubuꞌ koyon nog daꞌ kopus non, dia poktidu sog Bataꞌ non. 12Dadi, simasima sinumolabuk dia sog Bataꞌ non, ngon og kotubuꞌ non dia sog Mikpongon. Tibua, simasima og ondiꞌ sumolabuk dia sog Bataꞌ nog Mikpongon, ondaꞌidun og kotubuꞌ non dia sog Mikpongon.
Og kotubuꞌ nog daꞌ kopus non
13Sinulat u ini dianiu, poꞌ bagun ain tinumud na dia sog Bataꞌ nog Mikpongon, motantu dianiu nog binogayan amu na nog kotubuꞌ kituꞌ nog daꞌ kopus non. 14Dadi, ondiꞌ ita na modapaꞌ mongadap sog Mikpongon. Poꞌ kosunan ta nog bila mongoni ita dianon nog ain dumalan dia sog glegan non, bogoyon non dianita. 15Bu bila kosunan ta na nog inongogan non og gyakin ta, kosunan ta dosop nog motabuk ta da og minsan olo pongonion ta dianon.
16Bila ngon og sala kotow, nog mitongow non og gilug non sog tanud moginang nog dusa nog ondiꞌ da mogdoksuꞌan sog patoy nog daꞌ kopus non, og mikotongow koyon dun, sumboy pogyokinan non og gilug non koyon nog mitongow non moginang nog dusa poꞌ umpianan da nog Mikpongon og kotubuꞌ non kituꞌ. Og pogolongon ku koni, ain og gotowanan kituꞌ nog mikodusa nog ondiꞌ mogdoksuꞌan sog patoy nog daꞌ kopus non. Poꞌ ngon og gininisan nog dusa nog mogdoksuꞌan sog patoy nog daꞌ kopus non. Tibua, ondaꞌ u poktaluꞌ nog pogyokinan niu paꞌali sog dusa kituꞌ nog mogdoksuꞌan sog patoy nog daꞌ kopus non. 17Og glam nog kohinangan nog diꞌ dumalan sog motud, og dusa da. Tibua, ngon da og dusa nog ondiꞌ mogdoksuꞌan sog patoy nog daꞌ kopus non.
18Kosunan ta nog ain binataꞌ na nog Mikpongon, ondiꞌ ilan na tumibabaꞌ moginang nog dusa. Poꞌ og Bataꞌ nog Mikpongon og mogipat dianilan, bu si Kindagow ondiꞌ na mokopongulaꞌat dianilan. 19Bu kosunan ta nog ita, og gombataꞌanan ita na nog Mikpongon. Bigyaꞌ non, og gotowanan nog misakup dini sog gliwag nog dunya koni, pigboyaꞌan ilan ni Kindagow. 20Kosunan ta dosop nog, og Bataꞌ nog Mikpongon minatong na dini sog dunya bu binogoy na dianita og sabut bagun ta kosunan og motud nog Diwata. Bu sinumolabuk ita na dia sog motud nog Diwata, sog Bataꞌ non nog si Isukristu. Ion og tantu Diwata, bu ion og poktiduan nog kotubuꞌ kituꞌ nog daꞌ kopus non.
21Dadi gombataꞌanan ku, pogolig amu nog glatdiwataanan otawaka monglodawan.