Taetas

Taetas

¹ Inau o Pol, na kare iana God mina aposol iana Jisas Kraes. Au fagafaufaura ka kare iana o God kai nanafunia ka fagauguringa makai takotako girara ka fagausuringa mwora rai rao suria ana ka taufa iana o God. ² God ke marefa ni gira qaqanga ana. Inago mai noga, o God ke qani surua woi na kare iana ira ka tafitafi tarai, maka fafagauguria raorao mwa. ³ E taua ka mataina ne usuia, o God ke fagatafigia make wateau ka woita iana make woi qai tatarofainia. ⁴ Au segesege tangago o Taetas. Igo kena ko manga i kareku ia, iga na fagauguringa ia ka kaa. Au fagarafe woi o God Emaka mo Kraes Jisas na fagatafi ia ka fato ki korokoro tangago kui ogaoga marape. ⁵ A takotakofa nau nakago wau aporo rainia i Kriti ia ke manga kaa, woi nui fafagaotoa ka tagaranifa marefa ni ofu kena makui atera ka mwane rafa ina arani siosi irarona finua gena, manga nau woi tangago ia. ⁶ A mwane rafa no atea ka mwane ne marefa nai susufia rainia na agua, a mwane ne auragi fagaetagai mwa, mi kareta ka tatangamworani rainia ka Arafa make marefa nai rongorongo kee nai tofetofe. ⁷ E araria na inuni na onoono isuria na tagaranifa iana na Arafa, ka inuni na otooto, marefa nai fafagaakaufira mereata, marefa nai mangaringari mafarufaru, marefa nai totono kai qekaqeka, marefa nai gira fainafunafu ana, me marefa ni parapara na rurugua i mangatana. ⁸ Hoi maka gira wagewagesira ana ka inuni na arao mai i ruma ia ta, mina inuni na mangata koro, mina inuni na gira tau suri ana mereata, a otooto, a arao suria ka faioqanifa iana o God, maka gira fagatogora ana mereata. ⁹ Make tautausuria menamenai wau nga ka mworani na fagausuringa kaa, ki ngaia ki tatamanira ki tana inuni, maki fafagaotoa tangara ka inuni na uraura pusia na fagausuringa kaa. ¹⁰ Hoi inau kau oqanigo nui usuusuira ki tana mwane rai tao ana rai mwane rafa ina siosi suria tana inuni afainigamu gena ka inuni na totofeqao maka tamasi purua mwa ka qaqaqangara wau. Tana inuni ngaira gena ka oqaoqanira nai arao suri ka taufa ia ta na Jiu. ¹¹ Ainuni gena kui uraura pusira ki siana kai fafagausuri, suria na fagaerisira ka afaikarena gena rainigi ka mwarao ne marefa ni araria nai fafagausuringai, maka fafagausuri mwa rai tawo rurugua ana. ¹² Nga ngai ke tana maurukari ia ta ne woisia ia, “Igia na ai Kriti gaa ka inuni na qaqaqangagia, ne wonusigia na aerafa mina ngau aera ana mina maemaega ana.” ¹³ A woita ngai kana ka woita mwora. Make araria mui tamasi rafaera nga tangara ka inuni manga ngai gana, rai tamanira ana kai akau mai kai otooto iga ka tangamworanifa ia ta. ¹⁴ Makai marape mwa kai fufufukaringa tangai ka tamatamasinga iga na qaqanganifa ia ta na Jiu gena mina lo ia ta na inuni na ngaroitainia na mworanifa kaa. ¹⁵ Ainuni ne taragani na mangatata ka gira ono girara ana ka arani mwarao ne korokoro. Hoi mina inuni aera ne ma ni tangamworani rainia na Arafa, ki ngaia kena ke takosi mwa ka arani mwarao ke aera. A takofa iana ke fagaerisia, ke ma ni gira ono girara ana ka korofa mina aerafa. ¹⁶ Ki ngaira ka woi, woi ngaira ka girara ka Arafa o God, mina fagaqaonga i apeta ke fagarigira. Ainuni gana ka aerataga wau, maka tofeqao wau, make marefa wau ka korofa i apeta.

¹ Taetas, ui fafagausuringainia nga ka mwora na fagausuringa. ² Fagausurira ka mwane rafa gena kai maramarapeaga, makai kokoa menamenai. Kai tau surira mereata, tangai taua nganganiaga ana ka raronimworanifa mina oqa koro ana tangara tana inuni ki siana kai fafagakaka rao mwa. ³ Manga ngai ke nikao, ui fafagausurira ka fefene rafa gena kai mangata koro kai kokoa menamenai. Siana ka tamatamasira ki tana inuni, siana ka totono waen rafaera. Makai fafagausurira mwa rainia ka korofa. ⁴ Ki ngaira nikao makai fafagausurira ka fefene faoru kai kokomanira ko wani ia ta mi kareta. ⁵ Ka fefene faoru gena kai tautau surira mereata makai ogaoga menamenai, makai tataraga tangara mereata kai onoono suri ka ruma ia ta, makai korokoro, makai tautau woita ia ta ko wani ia ta, manga ngai kana ka inuni ke marefa ni gira tamasi fagaerisi ana ka tarofa koro iana o God. ⁶ Manga ngai ke nikao, ko fafagagatanira ka mwane faoru ka tautau surira otooto mereata. ⁷ Iga na arani agua no tatanui, kui fafagaqao rainia ka fagaqaonga koro rai tanua ana ka korofa. Rainia ka fagausuringa ia mu, fafagaqao rainia ka korofa mina takofa koro. ⁸ Tatamasia ka tawatawanifa koro, ka inuni na mamaeronganigo gaa makai mamaaki suria marefa ka mwarao nai gira woisia ana rainigia. ⁹ Ui fafagausurira ka mwane ni tagara purua ana gena kai tautau woita ia ta ka mwane rafa ia ta gaa, ka arani agua na tatanui kai wagewagesi ka mwane rafa ira, make marefa nai gira togirira ana aporo ka mwane rafa ia ta ira. ¹⁰ Siana kai fafanago panira ka mwane rafa ia ta. Makai tatagara menamenai tangara ka mwane rafa ia ta ira maaki fafagaugurira nikao. Ngatakena nikao na inuni na rerea na tatanui na tagaranifa koro maka oqani ka fagausuringa mwora rainia ko God ne fafagatafigia nikao. ¹¹ O God ke fagaregia rainia ka korofa iana tangai mai fagatafira ana ka arani inuni. ¹² A korofa iana o God ke fagausurigia rai rao panigi ana ka agua marefa ni koro i maana o God make marefa nikao nai arao suri ka faioqanifa iga na ano kaa. Iga na mataina kaa igia ke araria nai tautau surigia otooto maka ogaoga otooto, maka arao suri ka taufa iana o God. ¹³ Suria igia kaa ka nanasia rao maunga ka tangiana ni wagefa iga na raofa iana mai Jisas Kraes afainia na arafanga iana. Ngaia kena ka romana God ne fafagatafigia. ¹⁴ E mafata rainia mereana rai toraigia ana panigi ka arani mwarao aera make fafagaapunari ka maurifaka. E oqanigia nai tao rai kare iana makai aganaria raorao mwa tangai tanu ana ka korofa. ¹⁵ Nga ngai gana ka mwarao ne araria no fafagausuri ngai. Ui tamasi fagagatanira makui tamasi rafaera tangara suria na mwane rafa ki igo. Siana ko pagai nanaka na fitangita ke onoono qau wato rainigo.

¹ Ui fafagakanukanura ka arani inuni kai takotako fagaakaufira ka mwane rafa ina kafamanu mi tana mwane rafa rao gana nikao. Kai tautau woita ia ta makai nanau raorao mwa tangai tagarafi ana ka korofa. ² Siana ka tamasi aerisira ki tana inuni, siana ka fafaitogiri. Make marefa nai qaqaqaeaga, maaka maramarapeaga mwa afainira ka arani inuni. ³ Inago wau noga ki igia nikao ka qeka maka tofe wau, maka fafagaqekaqekagia wau. Igia ka wawanasi ka mwarao na oqani maka wawagewage rainigi ka agua marefa ni koro na tatanui igi. Igia ke ataroga ka mangataka maka fairafai wau. Arani inuni ka maeronganigia, mi igia nikao maka maeronganira ka arani inuni. ⁴ Hoi mo God na fagatafi ia ka ke fagaregia rainia ki ngatakena ngaia ne koro make kokomanigia. ⁵ Ngaia ke fagatafigia suria mwa ka faikomanifa iana, mina tagaranifa koro na tatanui gaa ke marefa, Make manufi ka mangataka, tangai mafata raini ana tangagia ka worafa faoru make fagafaorugia iga ka ramwofa iana na Figona Apuna. ⁶ God ke kasia wato mai ko Jisas Kraes na fagatafi ia ka, rai wategia ana ka Figona Apuna iana. ⁷ Hoi igia ka oto i maana o God, suria ingaia ke oqaoqa koro raorao mwa tangagia. Igia kaa ki karena mwora o God, ka nanasia rao maunga na tafinga fuu na wawategia. ⁸ Ka tamasinga gaa ke mwora wau. Au oqania nui wowoisi nga ka tamasinga gaa, ka inuni na fagauguria o God aira kai rarapasia kai tatanui ka agua koro. Arani mwarao gaa ke korokoro wau make gira tamanira ana ka arani inuni. ⁹ Siana kui tatamanira kui tamasi mara qeka afainira, makui tatamasia ka woraworanifa gena, mina faitogiri ana, mina faitewotewo ana rainia na taufanata na Jiu gena. Afaitogiri ana manga ngai gana ke marefa ni koro make ma ni gira faitamani ana. ¹⁰ Ainuni ne tataka rainira na inuni na tangamworani, ke araria nui mimia tamasi fagaetagai, rao ke tanua mwa makui fafagaruatania kui mimia tamasi rao nikao, rao ke tanua mwa maunga mako kafu nanaka wau. ¹¹ Igia ka girara ka inuni manga ngai kena ke marefa ni taua ka fagausuringa mwora, ka aerafa ia ta ke fagaqao rainia ka aerafanata. ¹² Au takotako rai kasia ana wau ko Atemasi kee Tikikas tangago. A mataina ne mataro wau na tana fitangitaurua, makui rarapasia kui arao mai tangau i Nikopolis, suria nau takosia woi nau wau ogaoga iga ka mataina iga na tangi aera kana. ¹³ Ui wau tatamaniraurua ko warua naru rao wau noga gena karu taura ka mwarao naru oqani taura ana, tangai uruia ana nikao na raofa ia taurua gena, o Senasi na mwane ne girara na lo mo Apolos. ¹⁴ Ui fafagausurira ka inuni na tangamworani ira kai tatanui ka tagaranifa koro, makai tatamanira ka inuni na oqani na mwarao, marefa ni araria nai ogaoga purua. ¹⁵ Tamasi koro ana tangagamu panira ka arani inuni fato i finua gaa. Tamasi koro ana tangara ka arani tamamami koro na girara na Arafa. Inau kau fagarafe woi na korofa iana Arafa ki afainigamu fato.