Rom

Rom

¹ Inau o Pol na kare iana o Kraes Jisas. O God ke ono sikifiau rai aposol, make fagatorau tangai tarofainia ana ka tarofa koro iana. ² A tarofa koro kaa, God ke qani fagatapusi rainia inago mai tangara ka maurukari iana iga ka segea wato irarona na Segesegefa Apuna. ³ A tarofa koro kaa ki rainia ka Karena, Arafa iaka o Jisas Kraes mi nga i takena ne tao rai ape ni inuni, ngaia ke wora manga na aorisina o Deved, ⁴ Mi ngaia ka mwane apuna iana o God suria o God ke fagatafia aporo iga ka ramwofa iana ne tefa, rai fagaqao ana rainia woi i ngaia ka Karena. ⁵ Suria ngaia, suria o God ke oqanira ka inuni fato nai takotako fagafigaia ko Jisas Kraes, o God ke koro tangagami, ke ono sikifigami rai aposol tangai totoraira ana mai ka inuni iga na arani finua tangai raronimwora ana mina tau woita ana. ⁶ Igamu nikao na inuni i Rom mo God ke ategamu tangai kare iana o Jisas Kraes manga ngai ke. ⁷ Hoi a leta nau segea wau kaa tangagamu fato kigamu na inuni i Rom ne oqanigamu tefa o God make ono sikifigamu tangai inuni na apuna ana tangaa. Inau kau nongiraurua o God Emaka mo Jisas Kraes na Arafa iaka karu korokoro tangagamu makaru wategamu ka marapefa. ⁸ Inagonagona, iga Jisas Kraes au mafata rainia ka tangasifa iaku tangaa ko God rainigamu fato, suria na tarofa rainia na raronimworanifa iamiu iga o God, ke taua fato noga ka arani finua. ⁹ O God ke girara woi nau tatakosigamu tatarau mwa iga ka fagarafenga iaku, o God nau tatagara tangaa afainia ka maurifaku fato, iga na tarofainia ana na tarofa koro rainia i Karena. ¹⁰ Au fagarafe tangaa ko God manga ne oto iga na takofa iana, ngaia ki fafagamwatakua tangau nai taugamu ana. ¹¹ Au oqania nai regamu ana, qai tatamanigamu kamu taura ki tana mafatanga pania na Figona Apuna, ki nganganiaga ka raronimworanifa iamiu. ¹² A rarona na agua nau tatamasia kaa woi na raronimworanifa iaku ki tatamanigamu mina raronimworanifa iamiu ki tatamaniau. ¹³ A goaku igamu, au oqanigamu mu gigirara woi fagaerako noga kau takosia rai mai regamu ana, make tana mwarao ke taotao pusiau raorao mwa rai tanua ana. Au tamanira ka inuni ne marefa na Jiu rai raronimwora ana rainia ko Kraes, makau oqani tanua ana ka agua kaa i finua iamiu nikao. ¹⁴ Ke araria inau kau tatarofainia nga fato nga tangara ka arani inuni, ani na oga ina taon, ani na oga i toro, ani na tako matafa mina ani ne qeka. ¹⁵ Ngaia ngai ke nau oqani tarofainia ana na tarofa koro kaa tangagamu igamu na ani namu ogaoga i Rom kaa nikao. ¹⁶ Inau marefa wau qai fatami mamaakiga rainia ka tarofa koro kaa, suria nga na ramwofa iana o God ngai ke tangai fagatafira ana ka inuni na raronimwora rainia. Inago ki ngaira na Jiu ka rongoa ka agua kaa, mi imuri mai ka inuni marefa na Jiu ka rongoa nikao. ¹⁷ Suria na tarofa koro kaa ke fafagaqao rainia nga i takena o God ne nanakara na inuni ka ogaoga otooto afainia. Nga na agua kaa ke fafaganega afainia ka raronimworanifa make fatofato afainia ka raronimworanifa. Manga ne tamasia fato noga na Segesegefa Apuna ia ke woi, “Ainuni na ogaoga otooto afainia ko God iga na raronimworanifa, ngaira ka nanafunia ka tafinga.” ¹⁸ O God ke fagaqao mai pania ki Heven woi ne mangaringari tangara ka arani aerafa mina aoraoraganifa iata na inuni na tanui ke ura pusia ka tamasinga mwora rai girara ana. ¹⁹ Ngaira ka girara ka giraranifa rainia ko God, suria o God mereana ke fagaqao rainia tangara. ²⁰ Marefa nai gira rea ana ko God, tefa wau nikao ka ramwofa iana mina taufanana. Mina mataina God ne fagaworaia ano kaa, arani mwarao ne tanui ke fagaqao rainia ka taufa iana, ki mwarao ka arani inuni ki gira mwataku ana tangara rai tako matafa ana rainia ka taufa iana. Hoi marefa ko otai ni gira fagarigi ana woi ngaia marefa ni tako matafa rainia ka taufa iana o God. ²¹ A girara mwa ko God, make marefa nai takotako fagaakausia kee nai mafata rai ka tangasifa iata tangaa. A takofa iata ke qao mara qeka, mina mangatata ke tao iga ka rotorotoaganifa. ²² A woi mereata woi na girara wau, maka qeka wau. ²³ Marefa nai wowogasia ko God na rara na tafinga tarai, maka wogasi mwa ka mwarao na tagarafi ke qao manga na inuni ne ma nai tafitafi tarai, mina manu, mina mwaa, mina arani mwarao manga na uwani ne efai ira. ²⁴ Ngaia ngai ke o God ne nakara wau ka rao suri na takofa ne aera irarona maurifata gena, ngaira ka tanui ka atani wau mwa ka aerafa fainira ka apeta fairifui. ²⁵ Ngaira ke marefa noga nai tangamworani rainia na tangamworanifa mwora rainia ko God ia maka orisia iga ka tamasinga ni qaqanganifa. Ngaira ka oga tangai wogasira ana ka arani mwarao o God ne fagaworai, maka qono rainia ki ngaia o God ne fagaworai na arani mwarao gaa. Ngaia o God ke araria na inuni gaa nai fafagaakausia tatarau mwa. Amen. ²⁶ Suria nga rainigi na agua gaa o God ke nakara wau tangai tanui ana ka mwarao ne aera wau nga suria ka takofa ne aera iata. Ngaira nikao na fefene gena maka mauru atani wau mwa afainira mereata. ²⁷ Ngaira na mwane gena maka manga ngai gena nikao, a kasigi wau ka agua iga na mauru mwora ana afainira na fefene maka oqani mauru atani wau ana mwa afainira mereata. Ngaira na mwane gaa ka tanui ka mwarao ne aera tangara mereata. Nga na rogufanani ko God ke fafagaetangira isuri ka mwarao aera na tatanui gaa. ²⁸ Suria na inuni gena ka ngaroi rai oga ka takosia ana i mangatata ka giraranifa mwora rainia ko God, make nakara wau mwa ko God ka rao suria ka takofa ne aera iata mereata. Suria nga rainigi na agua gaa, ngaira ka taniu ka mwarao ma ni ararira na inuni ni tatanui. ²⁹ E wonusira ka arani aerafa, maka oqani tawora ana ka arani mwarao tangara mereata, maka fafagaerisira ka inuni, maka fafairaroni, maka nanafuira ki tana inuni, maka fafaitogiri mwa, maka fafagaqekaqekara ka arani inuni, maka tatakosi tatarau ka agua ne aera rainira tana inuni, maka tamatamasi aera punufi rainira. ³⁰ Ngaira ka maerongania ko God, maka fagaerisia ka atana tana inuni, maka qaqaqaeaga, maka kasikasira akau mereata mwa. Ngaira ka gira takosi ana ka anita mwa na tara rai tanui ana na mwarao ne aera, make ma nai tautau woita iata ke enata me emata. ³¹ Ngaira ke ma nai nafunia ka takofa ne koro, maka fafagaqekaqeka mwa, make ma nai korokoro tangara ki tana inuni makai tatakoira. ³² Ngaira ka girara fato noga ka woita mwora iana o God ne woi ngaira na inuni na tatanui na agua manga ngai gena ke araria nai mae mwa. E manga ngai kena mi ngaira ka oga tangai tanui ana ka mwarao manga ngai ge, maka wawagewage wau rainira ki tana inuni na tatanui na mwarao manga ngai gena.

¹ Igamu na inuni mu usuusu i maata tana inuni gena, ke marefa wau ka taa mu gira fura ana iga. Mataina igamu mu fafagagetara tana inuni nga, mu fafaganafu mereamiu mwa rainigamu ngai kena, suria igamu maka mu tatanui nikao ka mwarao manga ngaira na tatanui gena. ² Igia ka girara o God ke oto wau rai fagagetara ana ka inuni na tatanui na agua manga ngai gena. ³ Hoi mi igamu namu tatanui na agua manga ngaira gena ke manga ifai? Mu takosia woi o God ke marefa ni fafagaetangigamu naa? ⁴ Efea, mu tako qau wato rainia ka parongana taufa iana o God, ngaia ke koro tefa wau, make ma ni mangariaga mafarufaru make maramarapeaga isurigia mwa? Igamu ke ma mu ono girara woi o God ke koro tefa wau tangagamu, suria ne oqanigamu mui tako orisi. ⁵ Mi igamu kena ke marefa wau mu rongorongo, kamu orisi ka takofa iamiu. Hoi igamu kamu tanui ka fagaetangifa iamiu ke akau rafa mai nikao, ne mai taugamu iga ka tangiana o God ne fagaqao rainia na mangariaga iana make fafagagetara menamenai wau ka arani inuni fato. ⁶ Suria o God ke mamafata rainia ka maeta na arani inuni isuri ka arani mwarao na tatanui. ⁷ Ani na inuni na tataniu mwa na tagaranifa ne korokoro, maka oqania ko God rai fagaakausira ana, maki takotako fagafigaira, maki wawatera ka tafinga marefa ni tonga qotona, ngaira na inuni gaa ko God ke mamafata rainia tangara ka tafinga fuu. ⁸ Hoi ngaira na inuni na tatakosira mereata mwa, maka ngangaroitainia na agua ne mwora, maka oqania mwa na ogafa ne aera, ngaira na inuni ngai ge ka tatarafua ka mangariaga iana o God mina fagaetangifa iana. ⁹ Arani inuni na tanua na arani agua ne aera, ngaira ka tatarafua ka ogafa ne aera, mina fafaranifa. Agua kaa ke taura ka Jiu, mina inuni marefa na Jiu nikao. ¹⁰ Hoi mina inuni na tatanui na agua ne otooto ko God ke fafagaakausira make takotako fagafigaira make mamafata rainia tangara ka marapefa. Agua kaa ke taura ka Jiu, mina inuni marefa na Jiu nikao, ¹¹ suria o God ke marefa ni fafaitamani tagapasi. ¹² Arani inuni ma nai girara na Lo iana o Mosis maka tatanui na agua ne aera, o God ke pagai fafagaetangira suri ka aerafa iata. Mina arani inuni na nafunia na Lo iana o Mosis, maka tatanui na agua ne aera nikao, mo God ke pagai fafagaetangira rainia ka Lo ia. ¹³ Ngaira na inuni na tanua na taa ne tamasia na Lo kena ka oto i maana o God, marefa ki ngaira na inuni na rongoa mwa make marefa na mwarao nai tanua rainia gena. ¹⁴ Rao ka inuni ma nai nafunia na Lo iana o Mosis, maka tatanui suri ka takofa iata ka mwarao manga ne tamasia na Lo kena, ka takofa iata gena ke manga na Lo ia tangara mereata. ¹⁵ A mwarao na tatanui gena ke fagaqao rainia woi na taa ne tamasia na Lo kena ke taotao mwa i mangatata. A takofa iata gaa ke fagaqao rainira, woi na parongata ke oto, kee ne marefa wari. ¹⁶ Hoi rainia na tarofa koro nau tatamasia kaa ki ngatakena na tangiana iga o God rainia ko Jisas Kraes, ne pagai fafagageta fato na arani takofa iata na arani inuni ne taotao punufi maungai ngai ke. ¹⁷ Manga ifai tangagamu na inuni namu onigamu rai Jiu? Mu fagauguria woi namu tafitafi suria namu nafunia ka Lo, maka mu tawatawarasigamu woi na kare iana o God ki igamu. ¹⁸ Mu girara ka taa o God ne oqanigamu mu tatanui, make fagausurigamu ka Lo rainia ka ogafa ne oto. ¹⁹ Mu takosia woi igamu kamu fafagaotora ka inuni na guru, maka mu manga na mawetana ia tangara ka ani iga na rotorotoaga ana. ²⁰ Mu takosia kamu gira fagausurira ana ka inuni na qeka, mina ani ne ma nai girara, nga na Lo ke tonga takofa iga mina mworanifa. ²¹ Hoi mu fafagausurira ki tana inuni mi igamu mereamiu ke marefa mu fagausurigamu kena. Igamu kamu tatawatawa kamu wowoi siana rai fanago ana. Ke manga ifai igamu nikao maka mu fafanago, naa? ²² Mu fagausuri kamu woi, “Siana kamu qaqagararanga” mi igamu ke fea, ma mui qaqagararanga? Mu ngaroitainira ka nunuta na mwarao na wogasira mi igamu ke fea, ma mui fafanago irarona raperape apuna iata? ²³ Mu tawatawarasigamu woi mu nafunia ka Lo iana o God, mi igamu kamu fea? Ma mui fafagaerisia ka atana o God namu tofea na Lo iana kena. ²⁴ A Segesegefa Apuna ke woi, “Suria rainigamu na Jiu, ngaira na inuni marefa na Jiu ira ka tamasi aerisia ko God.” ²⁵ Manga mu tautau woita iana ka Lo kena, ka fara fagagiraragamu ana kena ke mworamwora tangagamu, make manga mu tofea ka Lo kena ka fara fagagiraragamu ia ke tanu mwa manga na mwarao purua ia. ²⁶ Ainuni ma nai fara fagagirarara make tautau woita isuria ka tamasinga iga na Lo kena, ki ngaira ka taotao mwa manga na inuni na fara fagagirara ira i maana na Arafa. ²⁷ Hoi mi igamu na Jiu kamu pagai usuusu maamiu ka inuni marefa na Jiu suria ngaira ke ma nai fara fagagirara maka tau woita isuria ka tamasinga iga na Lo, mi igamu kamu nafunia ka Lo, maaka fara fagagiraragamu make ma mui tau woita isuria ka tamasinga iga na Lo kena. ²⁸ Ainuni ke ma nai taotao rai Jiu mwora manga na fara fagagirara ana kena ki iga ka apena i metara mwa. ²⁹ Nga na Jiu mwora ka inuni na Jiu irarona mangatana, ngaia ka fara fagagirara ana kena ki rarona maurifana. E kaa ka tagaranifa iana na Figona Apuna iana o God, marefa ki iga na Lo na segea kena. Ainuni manga ngai ge ka nafunia ka fagaakaufinga pania ko God, marefa ka inuni.

¹ A taa ki koro tefa iga na inuni ni wora mai rai Jiu? Kee na taa ka korofana fara fagagirara ana? ² A mwarao ne erua gaa karu koro fato iga ka arani agua. Inago mworamwora ki ngaira na Jiu ke taura ka tamasinga iana o God. ³ Maka taa manga tana fitangita ke ma nai raronimwora? Efea, a mwarao kaa ke tanua ko God ke ma ni mworamwora? ⁴ Marefa wau nga! Manga na arani inuni ka qaqaqangara, mo o God ke mworamwora tatarau mwa. Manga na Segesegefa Apuna ne woisia noga rainia ko God ia, “Igo ko fafagaqao rainia ka mworanifa mataina no tamasi, Mina inuni na fafagatewoteworigamu ira kamu pagai tetefarira.” ⁵ Make manga na oga qao aera ana iaka, ke fafagaqao taragani rainia ka ogafa otooto ana iana o God, efea, igia ka gira woi ana woi o God ke ma ni oto mataina ingaia ne fafagaetangigia iga? (A taa ka fafagageta mara qeka rainia ke.) ⁶ Marefa wau! Manga o God ke ma ni fafagagetara ka inuni ina ano kaa ke manga ifai rainia? ⁷ Tana inuni ki toge ki woi, ‘Manga na ogafa ni qaqanganifa iaku ke fafagaqao rainia ka ogafa mwora iana o God, make fafagaakausia, ke manga ifai ke fafagaetangiau rainigi na aerafa iaku gaa?’ ⁸ Efea ke ma nai woi mwa, ‘Nakagia kai tanui ka taufa ne aera, mwarao maki rao mai ka agua ni koro.’ Tana inuni ka fafagaparu rainigami, woi nga igami kami woisia na agua kaa. Make koro mwa, suria o God ke pagai fafagaetangira rainigi. ⁹ A taa kai woisia? Igia na Jiu ka koro tefa rao panira ka inuni marefa na Jiu? Marefa wau! Igia ka rea fato noga woi na Jiu mina inuni marefa na Jiu ka faiaworagi mwa, ngaira fato kina rugufanana ramwofa iga na aerafa. ¹⁰ Manga na segea iga na Segesegefa Apuna, ke woi ia, “Marefa wau nga ka inuni ni oto, woi etagai mwa make marefa, ¹¹ Marefa wau ke etagai ni tako matafa, marefa wau ke etagai ni garigari tangaa ko God, ¹² Arani inuni ka riri pania, ngaira fato ka tao rai mwarao purua, Marefa wau ka inuni ni koro na taufa iana, marefa wau nga ke etagai. ¹³ A tawatawanifa iata na inuni gaa ke marefa qai oqani suria ne manga mwa na gafua ne mapu ia, Mina meata ke gira tamasi qaqanganifa mwa. A woita iata ke gira nafuia ana ka inuni, ¹⁴ mina farata ke wonusia ka rotafa. ¹⁵ A maafarufaru wau ka rao tangai nafunga. ¹⁶ Iga na agua na arao iga ka fafagaerisira ka inuni maka fafagafafara apeta. ¹⁷ Marefa wau nai girara ka ogafa iga na marapefa. ¹⁸ Make ma nai takotako fagafigaia ko God.” ¹⁹ Hoi igia ka girara woi na taa mwa ne tamasia na Lo kena, ke tamasia mwa tangara ka Jiu woi nai arao suria nga. Ki mwarao maki siana ka inuni ni fafagarigia woi ngaira ke marefa ka inuni ni aera. Hoi mo God ke fafagaqao woi na arani inuni ka nafunia ka aerafa. ²⁰ Rao ke manga na inuni gena ka arao suria mwa ka Lo, ngaira gena ke marefa nai oto i maana o God, suria na Lo ia ke fagaqao rainigi ka aerafa iaka igi. ²¹ Mi ina mataina kaa o God ke fagaqao noga rainia ka tara ni oga otooto ana afainia, manga na Lo iana o Mosis mina Maurukari ka tatamasia mai ia, a tara ni oga otooto ana kaa ke marefa woi nai arao suria ka Lo. ²² Ainuni na fagauguri iga o Jisas Kraes ka oga otooto i maana o God. Agua kaa ke mafata rainia tangara ka inuni na Jiu mina inuni marefa na Jiu. ²³ Igia fato ka aera maka fagatau wau pania ka taufa koro iana o God. ²⁴ Hoi mo God ke oqa koro tangagia rainia ko Kraes Jisas, make mai nakagia ka oto afainia make fagataraganisigia panigi ka aerafa iaka. ²⁵ O God ke kasia mai ko Kraes tangai suu wogasifa iaka. Hoi rainia na gapuna ne afe iga na maefa iana ia, ngaia ke fafagataraganisi ka aerafa iaka, na inuni na fafagauguria. O God ke tanua ka mwarao kaa tangai fagaqao ana woi ngaia ke oto, suria inago mai noga ingaia ke maramarapeaga, make naka wau noga ka aerafa iata na arani inuni. ²⁶ Mina mataina kaa, ngaia ke qore tangai ka aerafa iata, tangai fagaqao ana rainia ka oga otooto ana iana, mi ngaia mwa nikao ke nanakara otooto na arani inuni na fafagauguri iga o Jisas. ²⁷ A taa kai qaqaqaeaga rainia? Marefa wau! Suria ne marefa nai arao isuria ka Lo, marefa nai gira qaqaqaeaga ana. Igia ka fafagauguria mwa. ²⁸ Igia ka rea woi na inuni ke ogaoga otooto afainia ko God iga mwa ka raronimworanifa iaka, marefa mwa ki iga na tanui ana na taa ne tamasia na Lo ia. ²⁹ Ke manga ifai o God kaa ka God iata mwa na Jiu? Marefa! Ngaia nikao kena maka God iata na inuni marefa na Jiu. ³⁰ Suria o God mwa ne etagai ngai kena. Hoi na arani inuni na raronimwora rainia, manga ngaira ka Jiu, kee na inuni marefa na Jiu, maka ogaoga afainia iga mwa ka raronimworanifa iata. ³¹ Make manga ngai kena ki igia ka fea, fafagafatongia ka Lo ia? Marefa! Suria igia nga na kafu fafaganganganiaga wau ngai kena.

¹ A taa kai woisia igia rainia iuraka o Ebraham woi ni rogoia iga na mwarao kaa? ² I manga o Ebraham ki tanui ka mwarao ni koro maki mai oto tangaa i maana o God, ke araria ne tamasi qaqaqaeaga tangaa, maake marefa ni araria ni tamasi qaqaeaga i maana o God. ³ A Segesegefa Apuna ke woi, “O God ke marumusia ko Ebraham, suria Ebraham ke fagauguria ko God.” ⁴ Mataina na woria na inuni ne tatagara, ka maena kena ke marefa ka mafatanifa tangaa, suria na maena kena ka woria isuria mwa ka tagaranifa iana. ⁵ Hoi maki igo ke marefa nui gira tanu ana o God ke marumusigo suria rainigi ka agua no tanui, ngaia ke marumusira ka inuni aera suria na tangamworani rainia. ⁶ Irarona na Segesegefa Apuna ke tamasira iga o Deved na inuni na wagewagesira ira, ani na inuni ne marefa nai tatagara tangaa ko God, make marumusira mwa. O Deved ke woi ia, ⁷ “Wagefa tangara ka ani na inuni o God ne qono rainia na aerafa iata. ⁸ Wagefa tangara ka inuni marefa ni tatakosi na aerafa na Arafa iata.” ⁹ Efea, a tara iga na wagefa kaa ki tangara mwa ka ani na Jiu, kee i tangara nikao ka ani marefa na Jiu? Suria igia ka rea ka Segesegefa Apuna ne woi ia, “O God ke naka ko Ebraham ke oto i maana suria o Ebraham ke tangamworani rainia.” ¹⁰ Mataina taa ke ono girara iga woi na mwane ne oto ia? Mataina na fara fagagirara fato noga ngaia, kee ne mamaunga? O God ke tanua ka agua kaa mataina ne mamaunga nai farafara fagagirara. ¹¹ Ngaia kena ka kafu fara fagagirara imuri mai. E kaa ke fagaqao rainia woi o God ke naka ko Ebraham ne oto i maana suria ka tangamworanifa iana, maka kafu fara fagagirara imuri mai. Hoi o Ebraham ke ura rai emata fato na arani inuni marefa na Jiu mo God ke nakara ka oto i maana suria ka tangamworanifa iata. ¹² Ngaia Ebraham kena nikao ke emata na ani na fara fagagirara maka tangamworanifa rainia, manga iuraka o Ebraham ne tangamworani maka kafu fara fagagirara imuri mai. ¹³ Mataina o God ne fagatapusi tangaa o Ebraham woi ingaia mina aorisina ka nanafunia ka ano kaa, ke tanua manga ngai kena marefa isuria ko Ebraham ki tau woita iga ka Lo, maki suria mwa ngaia ke tangamworani rainia, mo God ke marumusia. ¹⁴ Suria woi ni manga na mwarao koro iana o God ki tangara ka ani na arao suria na Lo mwa, ka tangamworanifa mina fagatapusinga kena ka mwarao purua fato. ¹⁵ O God ke mangariaga mataina igia na tofea na Lo iana kena. Maki manga marefa ka Lo, ke marefa nikao ka tofenga iga na Lo kena. ¹⁶ Ngaia ngai ke na fagatapusinga kaa ke rao mai iga ka tangamworanifa kaa, rainia na agua kaa ke mafata rainia purua mwa ko God. Mina fagataupusinga ia ke taura fato ka arani inuni iurata fato o Ebraham. Marefa mwa tangara ka ani na nafunia na Lo, maki tangara ka ani na tangamworani rainia ko God, manga o Ebraham ia, suria o Ebraham kena ke emaka igia fato. ¹⁷ Manga na Segesegefa Apuna ne woi ia, “Au tanugo rai emata na arani waro ni inuni.” A fagataupusinga kaa ke tangaa ko Ebraham suria ngaia kena ke tangamworani rainia ko God ne fagatafira aporo na inuni na mae, make tamasi rao mwa mina mwarao ke wora. ¹⁸ O God ke woi tangaa ko Ebraham, “Aorisimu ka pagai rakorako wau.” E asa tangaa ko Ebraham, make tangamworani ke nanasi mwa, hoi imuri mai make tao rai emata fato na waro ni inuni na rako wau. ¹⁹ Ngaia kena ke sugui taua mwa ka farisina na tangarau ne etagai (100), make marefa ni gira aparafa noga mika kani iana ka Sera ke ma ni gira aparafa noga nikao, minga ke marefa ni mwarumwarusiga ka tangamworanifa iana. ²⁰ A tangamworanifa iana ke ma ni fagamarefaga, mo God ke faganganganiaga ka tangamworanifa iana. Hoi Ebraham ke fagaakausia wau rainia. ²¹ Ngaia ke girara woi o God ke gira tanui ana mwa ka mwarao ne fagatapusi rainia. ²² Ngaia ngai ke o God ke marumusia wau ko Ebraham, ²³ manga na Segesegefa Apuna ne qani woisia ia. Hoi ka Segesegefa kaa ke marefa tangaa ki ngaia mwa mereana. ²⁴ A woita gaa ka segera nikao tangagia, igia na ani o God ne marumusigia suria na tangamworanifa iaka rainia ko God, ne ragaia afaraga na Arafa iaka o Jisas pania na maefa. ²⁵ God ke mafata rainia ko Jisas ke mae suria igia ka tanui ka agua ne aera, make ragaia afaraga aporo tangai fagaqao ana woi o God ke marumusigia.

¹ Suria igia ka tangamworani rainigi ka mwarao ne tanui na Arafa iaka o Jisas Kraes, igia ka oto i maana o God, maka faku aporo afainia iga ka marapefa. ² Rainia iga na tangamworanifa, Kraes ke toraigia rai girara ana ka oqa korofa iana, nai ogaoga iga kaa. Hoi igia ka wawagewage wau suria igia ka pagai ogaoga fainia ko God i Heven. ³ Mina tana mwarao nikao, igia ka wawagewage suria na fafaranifa iaka ia, ke tanugia ka maramarapeaga. ⁴ Mina maramarapeaganifa ke tanui ka mangataka ke akau mai ke korokoro, hoi ki igia kai takotako nganganiaga wau nga. ⁵ A tako nganganiaga ana kaa ke marefa nai nanasi purua mwa rainia, suria o God ke mafata rainia tangagia ka Figona Apuna iana tangai fagaqao ana rainia tangagia ka faikomanifa rafa iana. ⁶ Hoi iga na mataina ne atea o God, o Kraes ke mae tangagia mataina na aera maungagia, make ma nai gira tamanigia mereaka ana. ⁷ E qara wau ki tana inuni ni mae tangaa na inuni koro, wari tana inuni ke gira mae ana mwa tangaa ka inuni ne oto wau. ⁸ Mina faikomanifa iana o God ne fagaqao rainia tangagia ia ke manga kaa, mataina igia na aera maungagia, mo Kraes ke mai mae tangagia. ⁹ O God ke marumusigia rainia ka gapuna Kraes ne afe ia, migia ka girara nikao ne marefa ni pagai fafagaetangigia. ¹⁰ Inago igia ka maerongana o God, maaki iga na maefa iana Karena, igia ka naku aporo afainigia. Hoi ke nga ne taragani wau ngai ke, Kraes ke gira fagatafigi ana pania ka fagaetangifa suria ne tafi aporo mo God ke qani taugia aporo rai goana. ¹¹ Tana mwarao nikao, igia ka wawagewage rainia ko God suria na Arafa iaka o Jisas Kraes ia ne fagafakugia aporo fainia ko God. ¹² Aerafa ke rao mai na ano kaa iga ka mwane etagai mwa. Hoi ka aerafa ia ke toraia mai ka maefa tangagia. Hoi suria arani inuni ka aera, ngaira fato ka maemae. ¹³ Aerafa ke tao fato noga ina ano kaa mina Lo ke kafu mataro mai. Hoi mataina ne mamaunga mai na Lo, o God ke marefa ni takosi ka aerafa igi. ¹⁴ Make faganega ina mataina iana o Adam ke mai taua o Mosis ka arani inuni ka maemae mwa, mi ngaira ke ma nai aera manga o Adam ne tofea na woita iana o God ke aera kena. Adam kena nikao ke manga mwa o Kraes ne rao mai murina mai ia. ¹⁵ Maaki ingairaurua gena ke ma naru faiaworagi, suria na mafatanga purua iana o God ke ma ni manga na aerafa iana o Adam. E mwora woi ne rako wau ka inuni na mae isuria ka aerafa iana o Adam, minga na apena mwarao rafa ke nikao ke kaa, Jisas Kraes mereana ke toraia mai na mafatanga purua rainia na oqa korofa iana o God tangara ka inuni rako wau nikao. ¹⁶ Hoi a rogufanana na aerafa iana o Adam ke rao getea nga pania ka rogufanana na mafatanga rainia na oqa korofa iana o God. Suria na aerafa iana na mwane mwa ne etagai Adam kena, ke totoraigia rao tangaa ka fagaetangifa, hoi fenaka ne manga ngai kena mi igia ke rako wau ka aerafa na tanui, mina mafatanga rainia na oqa korofa iana o God ke fafagamwatakugia ka otooto i maana. ¹⁷ Aa ne mwora, a maefa ke taura fato ka arani inuni isuria na aerafa iana o Adam. Mina rogufanana tagaranifa iana o Jisas Kraes tangagia ke tefa wau, suria God ke oqa koro wau tangagia make marumusigia suria o Jisas ke mae tangagia. Hoi igia nikao maka pagai ogaoga afainia ko Kraes maka pagai onoono isuri afainia. ¹⁸ Hoi o God ke araria ne fafagaetangira ka arani inuni suria ka aerafa ne etagai iana Adam ia. Manga ngai kena nikao, pania na mwarao koro ne etagai ne tanua o Jisas ia, ko God ke marumusigia make wawategia ka tafinga fuu. ¹⁹ Me manga nikao na arani inuni ka aera isuria ka rogufana tofenga iana na mwane ne etagai Adam kena. Manga nikao ngai kena, mo God ke mamarumusira ka arani inuni isuria mwa ka rogufana tau woita ana iana na mwane ne etagai togo Jisas kaa. ²⁰ God ke watea ka Lo tangaa ko Mosis kena, woi ngaira gena kai gigirara ngaira ka aera wau nga. Mataina na arani inuni na tataniu na arani agua aera, mina oqa korofa iana o God ke rafa wau tangara. ²¹ Hoi inago ka gigirara ka aerafa maka maemae. Imuri mai maka gigirara woi nga na oqa korofa iana o God ia ke mamarumusigia rainia maka tafitafi tarai, rainia nikao ka mwarao koro ne tanua na Arafa iaka o Jisas Kraes ia.

¹ Tana inuni wari ka wowoi, “Ai aera tatarau mwa, ko God maki fafagaoria ka oqa korofa iana.” ² Marefa ni araria nai tanua ka agua manga kaa! Igia kaa, ka tanu manga mwa na mae fato noga ia, ka tautanu fea maka fato noga pania na aerafa kaa. ³ E ararigamu namu girara menamenai wau woi nga na mataina na maanu apuna ia, ka qanu ka faku afainia ko Kraes Jisas ia, ke tanu mwa manga na mae afainia ia nikao. ⁴ Iga na maanu apuna ana iaka kena ka afunigia afainia, ka fato noga pania ka aerafa manga na inuni ne mae ke fato noga pania na aerafa ia, maka ogaoga mwa iga ka tafinga faoru manga o Kraes ne ragaia afaraga aporo o God Emaka rainia na apena ramwofa rafa iana pania na maefa ia. ⁵ Rainia igia ka faku afainia iga ka maefa iana kaa, igia nikao maka fakufaku afainia iga ka afaraga aporo ana iana kena. ⁶ Inago ia, ke nga na ogafa aera iaka ke arafa wau tangagia, manga na inuni ni tagaranifa iana ia. Hoi igia ka girara woi nga ina mataina kaa, ka ogafa aera iaka igi ka nafui afainia ko Kraes iga ka taotao woro iana ia, ke fagafatongi wau nga ka mwarao na oqani rao suria ana wau nga inago igi. ⁷ Igia ka girara fato noga woi na inuni ne mae fato noga kena ke tataragani pania ka ramwofa iga na aerafa. ⁸ Hoi ki igia na mae afainia ko Kraes, ka tangamworani woi na tafitafi nikao afainia. ⁹ Igia ka girara woi o Kraes ke afaraga aporo pania ka maefa make marefa ni pagai maemae nikao. A maefa ke marefa noga ni arafa tefaria. ¹⁰ Mataina o Kraes ne mae ia, ke rao fato nga pania ka aerafa iga na ano kaa igi, make tafitafi mwa i maana o God. ¹¹ Manga ngai kena nikao, ki igia nikao make marefa nai arao suri ka faioqanifa ne aera igi, manga na inuni na mae fato noga ne marefa ni gira rao suri ana igi, mina mataina kaa igia ka oga iga ka tafinga faoru rai tagara ana tangaa ko God, suria na faku noga afainia ko Kraes Jisas. ¹² Siana kui tanua ka faioqanifa ne aera iamiu ki arafa tangai na apemiu. Apeka gaa ke pagai maemae, hoi siana rai rao suri ana ka faioqanifa ne aera gena. ¹³ Siana kamui tanua ki tana apanani na apemiu tangaa ka aerafa, maaka mui mafata rainigamu mwa tangaa ko God mangara na inuni na toraigamu mai pania na maefa tangaa na tafinga, maka mui mafata rainigamu fato nga tangaa rai tanui ana ka agua ne oto. ¹⁴ A faioqanifa ne aera igi ki siana ki arafa tangagamu, suria igamu kena ke marefa mu oga irugufanana na Lo iana o Mosis, maka mu oga irugufanana mwa na oqa korofa iana o God. ¹⁵ Hoi ki igia ina mataina kaa ki na rugufanana noga na oqa korofa iana o God, hoi tana inuni wari ka wowoi, “Ai oga tangai tanui ana mwa ka aerafa, suria igia kaa ke marefa noga nai kokoa irugufana na Lo iana o Mosis ngaia.” Marefa, marefa ni oto! ¹⁶ Igamu kena ke marefa mu girara? Ina mataina namu nakagamu mereamiu irugufanata tana inuni ira kamu tautau woita iata, igamu kamu tatagara mwa tangara. Rao kamu nakagamu mereamiu irugufanata na faioqanifa ne aera iamiu, ki nga namu rao faitigi noga tarai pania ko God ngaia. Rao kamu mafata rainigamu tangai tau woita iana ana o God, ka rogufanana kamu ogaoga otooto wau nga. ¹⁷ Inago ia kamu oga rai inuni ni tagara ana mwa tangaa na faioqanifa ne aera. Mina mataina kaa, kau tangasia wau ko God rainia igamu kamu tau woita wau rai ka fagausuringa na naka wato noga tangagamu igi. ¹⁸ Hoi ki igamu ina mataina kaa, ka fagataraganisigamu pania ka faioqanifa ne aera, kamu tao noga rai ainuni nga ni oga otooto ana. ¹⁹ Inau kau tamasi rai fagatake ana rai ka tamasinga gaa suria igamu kena ke asa wau namu tako matafa rainia. Inago kamu fagamarumungai ki tana apanani na apemiu rai tagara ana isuri ka faioqanifa ne aera iamiu. Mina mataina kaa, e araria nga namu nakai fato wau nga ka arani apanani na apemiu rai tagara ana nga tangaa ko God, ki mwarao maka mu apuna fato nga tangaa. ²⁰ Mataina namu oga maungagamu irugufanana faioqanifa ne aera iamiu igi, mu gira atani wau ana mwa. ²¹ Igamu kena kamu maaki wau rai ka mwarao namu qani tanui igi, a rogufanana ki nga namu rao tangaa ka maefa ngai kena. ²² Hoi ki na mataina kaa, ka fagataraganisigamu noga pania ka faioqanifa ne aera igi, migamu ka inuni ni tagara ana noga iana o God. Nga na rogufanana na agua kaa, ke fafagaapunarigamu, make totoraigamu ina tafinga fuu. ²³ A maena na aerafa ka maefa, mina mafatanga purua iga na oqa korofa iana o God ka tafinga fuu ne arao mai pania ko Kraes Jisas na Arafa iaka.

¹ A goaku igamu, e ararigamu mwa mu tako matafa rainia ka mwarao nau tatamasia kaa, suria igamu kena kamu girara fato noga ka Lo. A Lo ke arafa tangaa ka inuni iga mwa ka mataina na tafitafi maunga. ² A fagaararinga ke kaa, manga na fefene ki auragi mo wani iana ki tafitafi maunga, ka lo iga na auragifa ke tanu manga ne rakua ia ki kani kena afainia ko wani iana kena. Make manga o wani iana kena ke mae fato noga, ki kani kena ke taragani noga pania ka lo iga na auragifa ne rakuraurua ia. ³ Hoi ke manga kani kena ki auragia ki tana mwane mo wani iana kena ki tafitafi maunga, ki kani kena nga ne qagararanga fato noga ngai kena. Make manga o wani iana kena ke mae fato noga mi kani kena ki auragia ki tana mwane, ki kani kena ke taragani mwa pania ka lo iga na auragifa make marefa ni qaqagararanga ngai kena. ⁴ Hoi ke manga ngai ke nikao, ki tangagamu na goaku, suria iga na fakunga iamiu afainia na maefa iana o Kraes igamu nikao maka mu mae fato noga, maka mu fagataraganisigamu pania ka Lo. O Kraes ne tafi aporo pania na maefa ki nakagamu kamui tatagara tangaa ko God. ⁵ Mataina igia na oga suria na oqanifa tangai na apeka, a Lo ke fagaapurui ka arani takofa aera iaka, ka mai fagaqao rai iga ka taufa iaka. Nga na qotona na agua na tanui gaa ka maefa mwa tangagia. ⁶ A Lo ke marefa noga ni arafa tangagia, igia ka mangara na inuni na mae ira, ke ma ni nafunia ka ramwofa tefarigia. A tara faoru ni tagara ana tangaa o God ina mataina kaa ki iga ka tau woita iana ana na Figona Apuna, marefa noga ki iga ka qani tara iga na tau woita iana ana na Lo na segea kena. ⁷ Hoi ka taa kai woisia? A Lo kena ka mwarao ne aera? Marefa ni manga ngai kena suria nga na Lo ngai ke ne fagagirarau rainia na aerafa kaa. Afagaararinga ke kaa, manga siana ka Lo ni woi “Siana kamui wawanasi ka mwarao iata tana inuni,” ka ke asa mwa qai girara ka mwarao manga ngai gena. ⁸ Nga na aerafa ngai ke ne tagara iga na faifataninga kaa, woi inau kau nafuni takofa ne aera. Maaki siana ka faifataninga kaa, ka aerafa kena ke na mwarao ne mae mwa ke taotao. ⁹ Inago ne mamaunga qai gigirara na Lo, ki inau kau tafi mwa mi iga na mataina nau mai girara na Lo, ka aerafa ke mai tafi mi inau kau mae. ¹⁰ Hoi ka faifataninga ne ariria ne totoraiau tangaa na tafinga ia, ke toraiau rao mwa tangaa ka maefa. ¹¹ Aerafa ne tagara iga ka faifataninga kena ke fagaqekau make nafuiau funuiau. ¹² Hoi ka Lo kena ke apuna mina faifataninga kena ke apuna, aru oto mwa karu taotao makaru koro wau. ¹³ Maka taa ka rarona na agua kaa? Nga na mwarao ne koro kena ngai ke ne mai tanua tangau na maefa kaa? Marefa ni manga ngai kena! Nga na aerafa ne tagara iga na mwarao ne koro kaa, ke tanua na maefa tangau kaa. Kai ono girara nga ka aerafa ka mwarao ne aerataga wau nga. ¹⁴ Igia ka girara woi na Lo kaa, ka Lo iana o God, mi inau kaa ka inuni mwa, makau oga mwa irugufanana na ramwofa iana na aerafa. ¹⁵ Marefa qai girara ka taa nau tatanui, suria ne marefa qai tatanui ka taa nau oqani tanui ana, makau tatanui mwa ka taa marefa qai oqani tanui ana. ¹⁶ Nga nau tatanui na taa ne marefa qai oqani tanui ana gaa, ke fagaqao rao nga woi na Lo kaa ke oto wau nga. ¹⁷ Hoi ke marefa ki inau mwora ngai ke qai tatanui na mwarao gaa, maaki nga na aerafa ne taotao i apeku kaa ke tatanui gaa. ¹⁸ Au girara woi na faioqanifa iaku mereaku ke aera, marefa ni koro. Manga woi inau qai oqani taniu ana ka mwarao ni koro, make asa tangau. ¹⁹ Inau ke marefa qai tatanui ka mwarao koro nau oqani tanui ana, makau oga tangai tanui ana mwa ka mwarao aera ne marefa qai oqani tanui ana. ²⁰ Manga inau qai tatanui ka mwarao ne marefa qai oqani tanui ana, ke marefa ki nga inau mwora ngai ke qai tatanui gena, maaki ngaia na aerafa ne taotao i apeku kaa ngai ke ne tatanui gaa. ²¹ Hoi kau rogoia manga kaa i maurifaku, mataina nau oqani taniu ana na mwarao ne koro makau tatanui mwa ka mwarao ne aera. ²² Irarona mwora nga na mangataku au marumusia wau nga ka Lo iana o God. ²³ Mi inau kau rogoia ki tana taufa iga na apeku ia, a taufa kena ke mimia fainafunafu ka takofa iaku, e giruau woi qai arao suri ka aerafa ne arafa i apeku. ²⁴ Inau nga nau aerataga wau noga ngai ke! Otai ke fafagatafiau pania na apeku ne totoraiau tangaa na maefa kaa? ²⁵ Ai fagakorokoro tangaa ko God ne fafagatafiau iga na Arafa iaka o Jisas Kraes. Hoi ki inau mereaku iga na mangataku kau arao suri ka Lo iana o God, mina faioqanifa iaku mereaku ne aera gaa ke giruau qai arao suri ka taufa iga na aerafa.

¹ Hoi ke manga ngai kena, ka inuni na oga iga na fakunga afainia ko Kraes Jisas, ke marefa noga ko God ni wowoi woi na inuni gena ka aera. ² Suria na tara koro iana na Figona Apuna ne wategia na tafinga iga na fakunga afainia ko Kraes Jisas ke fafagataraganisira noga pania ka tara aera iga na aerafa mina maefa. ³ Lo ke marefa ni nafunia ka ramwofa tangai fagafatongi ana ka aerafa iaka, suria igia kaa, ke marefa nai gira tau woita ana iana ka lo. Hoi mi ngaia mwa o God ke tanua ka agua kaa mataina ne kasia mai karena ke mai wora rai ape ni ainuni na gira tanui ana na aerafa igi. Ki ngaia ke kasia mai ki karena manga na suu wogasifa ia tangai fagaetangi ana ka aerafa. Ngai ke, mi takena nikao ne fagafatongia na aerafa ngai ke. ⁴ O God ke tanua ka agua kaa, kai fafagamworai nga ka rarona mwora na tamasinga iga na Lo tangagia ki igia mwa na inuni na arao isuria na tara iana na Figona Apuna, mi igia na ani ne ma nai arao isuria na taa ne oqania na aerafa iga na apeka. ⁵ Otai na ogaoga isuria na taa ne tamasia tangara na aerafa iga na apeta, ka nakai nga ka takofa iata isuria ka taa ne oqania na apeta. Mo otai na ogaoga isuria na taa ne tamasia tangara na Figona Apuna, ka nakai nga ka takofa iata isuria ka taa ne oqania na Figona Apuna. ⁶ Manga no takotako rai rao isuria ana na taa ne oqania na aerafa iga na ape, ka rogufana ki iga ka maefa, manga no takotako rai rao isuria ana na taa ne oqania na Figona Apuna, ka rogufana ki iga ka tafinga mina marapefa. ⁷ Mataina na inuni na takotako rao isuria na mwarao ne oqania na aerafa iga na apeta, ki ngaira gena ka taotao rai maerongana o God, suria ne marefa wau nga nai gira tau woita iana ana ka lo iana kena, make mwora, suria ne qara wau nga tangara rai tanua ana. ⁸ Ainuni na arao isuria na taa ne oqania na aerafa iga na apeta, ko God ke ma ni wawagewage rainira. ⁹ Mi igamu kena ke marefa noga mu ogaoga isuria ka taa ne oqania na aerafa iga na apemiu, maaka mu ogaoga isuria mwa ka taa ne oqania na Figona Apuna, ke manga, na Figona Apuna iana o God ke ogaoga mwora afainigamu. Otai wau mwa ne marefa ni nafunia na Figona Apuna iana o Kraes ke marefa ni fakufaku afainia ko Kraes. ¹⁰ Apemiu gena ke maemae ngai gi, isuria ka aerafa iamiu, maaki manga woi o Kraes ke ogaoga afainigamu, ka Figona Apuna kena ke tanugamu kamu tafitafi, suria o God ke regamu namu oto fato noga i maana. ¹¹ Manga na Figona Apuna iana o God ne ragaia afaraga Jisas aporo pania ka maefa, ne taotao afainigamu, hoi ngaia God nikao make pagai raragaigamu afaraga aporo pania ka maefa rainia ka ramwofa iga na Figona Apuna iana ne taotao afainigamu. ¹² Hoi, na goaku igamu, igia kaa ke tonga mwarao ne ararigia nai tanua nga tangaa o God. Hoi ka mwarao na tanua kena woi igia ki siana kai arao isuria ka taa ne oqania na aerafa iga na apeka. ¹³ Rao ke manga igamu kamu arao isuria ka taa ne oqania na aerafa iraroni na apemiu, ki igamu kena kamu maemae, maake manga namu arao isuria ka mwarao ne oqania ka Figona Apuna, kamu nanafui funui ka taufa aera iraroni na apemiu, ki igamu kena kamu tafitafi. ¹⁴ Ainuni ne fafagaotora mwa na Figona Apuna iana o God, ke ngaira gena ki karena o God. ¹⁵ Suria na Figona Apuna iana o God ne wategamu fato noga kena ke ma ni tanugamu kamu mamaagutainia na faifataninga, make tanugamu mwa kamu ogaoga mwa rai karena o God. Mi rainia nikao na ramwofa iana na Figona Apuna kena, igia ka ngerengere fura tangaa ko God ka wowoi “Mama! Emaku!” ¹⁶ A Figona Apuna iana o God ke mai fakufaku mereana afainia ka maurifaka rai tamasia ana fura, woi igia kaa ki karena o God. ¹⁷ Manga igia na qani tao mai rai karena o God fato noga kaa, nga igia ka nanafuni mwora wau nga ka arani mwarao koro ne manimanira tangaa na kare iana, mi igia ka tawoa mwora wau nga afainia ko Kraes ka taa o God ne manimania tangaa. Rao ki igia ka fafara afainia ko Kraes, ki igia nikao maka wategia afainia ka romana tafinga iana. ¹⁸ Inau kau girara menamenai wau, woi na fafaranifa iaka ina mataina kaa, ka mwarao purura mwa, marefa wau nga nai gira fagatakea ana afainia ka romana tafinga ne pagai worawora tangagia. ¹⁹ Arani mwarao na fagaworai ka oga mwa ka nananaua rao ka mataina ngaia o God ne fafagaqao rainia ko otai ngai ge i karena gaa. ²⁰ Suria na arani mwarao na fagaworai gaa ka faimwataka rai, marefa isuria woi ingaira mereata kai oqania ni manga ngai kena, maki suria mwa ngatakena o God ne oqania, ²¹ woi iga na tangiana ne etagai ka arani mwarao ne fagawora igi ka pagai taotao menamenai aporo panigi ka arani mwarao ne fafagaerisi igi, maka mai tawoa ka ogafa ne taragani wau nga rai karena o God. ²² Igia ka girara woi ne raorao ke mai taua na mataina kaa, ka arani mwarao na fagaworai gaa, ka awarawara rafa wau isuria na fafara tefa wau, manga na fefene ne riki na gairina ia. ²³ Maake marefa ki ngaira mwa na mwarao na fagaworai gena kai gegege gaa. Igia nikao na ani na nafunia na Figona Apuna manga na anegana mafatanga iana o God igi maka gegege iraroni na mangataka mereaka, maka nananaua rao ko God rai taugia ana rai karena make fafagataraganisi fato wau nga ka apeka. ²⁴ Suria nga iga na tako nganganiaga ana ki igia na nafunia na tafinga kena, maki manga nai rea fato noga ka taa na tako nganganiaga rao tangaa kena ke marefa ki ngaia mwora nga na tako nganganiaga ana ngai kena, suria otai igia ki tako nganganiaga rao tangaa na mwarao nai rea fato noga? ²⁵ Maki manga woi nai tako nganganiaga rao tangaa ka taa ne ma nai rea, ki igia ka oga marape mwa ka nananaua rao. ²⁶ Iga na tara nikao manga ngai kena ka Figona Apuna ke mai tatamanigia, isuria ka mwarumwarusiga ana iaka. Igia ke ma nai girara ngatakena nai fafagarafe, hoi nga na Figona Apuna kena mereana ke mimia tamasi ko God tangagia ka woita ne ma nai girara tamasia ana mereaka. ²⁷ Mo God ne girara fato na arani mwarao irarona mangataka gana, ke girara rao ka takotakofa iana na Figona Apuna kena, suria na Figona Apuna kena ke fafagarafe tangara ka arani inuni na apuna tangaa o God, takena nga ne oqania. ²⁸ Igia ka girara woi iga na arani agua ne taugia, o God ke tatagara tangaa ka korofa iata na inuni na kokomania ko God. Ngaira gena ka inuni ne usuira o God suria na katofa iana. ²⁹ God ke qani girara fato noga ka ani ne usuusuira, ke nakara ka mai tao manga i Karena ia. Ki Karena kena ki mai taotao rai kare inago tangara na arani kare. ³⁰ Hoi ki ngaira na inuni o God ne nakara rao getera inago ira, ki ngaia ke atera, mina inuni ne atera gena ki ngaia ke fafagaotora i maana, mi ngaia ke tongania afainira ka romana tafinga. ³¹ Iga na ono tarafua ana na arani mwarao gaa, ka taa kai gira woisia ana?I manga o God ki tangagia, ko otai ke tatanui na agua rainigia? ³² O God ke ma ni ruia aporo panigia ki karena mereana, maake mafata rainia mai mwa tangagia. Hoi ki ngaia ne tanua na agua kaa ke fea, ma ni gira mafata rainia ana purua mai nikao tangagia ka arani mwarao? ³³ Otai ke totogirira na kare iana o God ne qani atera gena? Ngaia o God mereana make tamasia woi ngaira gena ka oto fato noga i maana. ³⁴ Ke tana inuni ke gira togirira ana woi ingaira ka aera? Marefa wau nga! O Kraes Jisas ne mae make tafi aporo ia ke oga irawona rimana iotona o God ke fafagarafe rao tangaa o God tangagia. ³⁵ Otai ke gira tawogia ana rao pania na faikomanifa iana o Kraes? E fea, aogafa iga na fafaranifa ke gira tanua ana, kee na ogafa ne qara, kee na tau fagaqao aerisigia ana, kee na magaua, kee na ogafa marefa iga na nafuninga, kee na perenga, kee na maefa? ³⁶ A Segesegefa Apuna ke qani woisia manga kaa ia, “Suria no nafunigami, Arani tangiana kaa ka inuni gaa na oqani nafuigami funuigami ana mwa. A takoisigami mwa manga na sip na nanafuia ia.” ³⁷ Mi igia ki siana kai osiosi kai kasikasi wau isuria ka agua manga ngai gena, rainia ko Kraes ne komanigia tefa ke tatamanigia ka uraura tefari ka agua manga ngai ge. ³⁸ Inau kau girara menamenai wau, woi ne marefa wau nga ka mwarao ni gira tawogia fura rao ana pania na faikomanifa iana o God. Marefa wau ka mwarao manga na tafinga ia, kee na maefa, marefa ka mwarao manga na enjel ira, kee na ataro, mi tana ramwofa rao nikao, marefa wau ka mwarao woi ni taotao ina mataina kaa, kee na mataina ne mamaunga rao kana, ³⁹ marefa ka ramwofa woi manga i afaafa noga kana, kee na finua rugufanana i ano kaa, marefa menamenai wau nga woi na fitangita na mwarao na fagaworai gaa na mwataku rai tawogia ana fura rao pania na faikomanifa iana o God ne wategia iga o Kraes Jisas na Arafa iaka.

¹ Inau kaa kau wowoi mwora, ko Kraes ke nafuniau, make marefa qai qaqaqangau. A Figona Apuna ne arafa iga na takofa iaku kaa make rea mai afainiau woi na mwarao nau tatamasia kaa ke mwora. ² Inau kau faitakoi wau, mina takofa iaku tangara na Jiu ke rafa wau ³ Ngaira gena ka goaku mereaku. Au fagafunu mwa woi, tangaa na korofa iata ki inau mereaku qai tawoau fura rao pania ko Kraes mi inau mereaku nikao qai tao rai maerongana o God. ⁴ A kare iana o God ngai gena, e taura rai karena, make fagaqao rainia tangara ka romana tafinga, e tamasi faku afainira make watera ka lo, ngaira mereata ka girara ka wogasifa mwora maka taura ka arani suru iana o God. ⁵ Ngaira gena ka wora mai panira ki iurata inago ne tonga na atata ira, mo Kraes ne mai wora iga na ape ni inuni ia. Naka ko God ne arafa tangai na arani mwarao kai fagaakausia tarai. Amen. ⁶ Inau kaa ke marefa qai wowoi ngai ke woi o God ke marefa ni fagamworaia ka suru iana, suria marefa ki ngaira fato nga na inuni i Israel gena ka kare iana o God. ⁷ Marefa ki ngaira fato nga nikao na aorisina o Ebraham gena ka kare iana o God. O God ke woi tangaa ko Ebraham, “Nga iga o Aesak ke totonga aorisimu manga nau qani suru tangago ia.” ⁸ Nga na rarona agua kaa ke manga kaa, e marefa ki ngaira fato nga na kare na wora mai manga arani kere kare ira ki karena o God, ngaira mwa na arani kere kare na wora mai isuria mwa na suru iana o Ebraham ki karena mwora o God. ⁹ Mi iga na suru iana o God ia ke woi manga kaa, “Iga na mataina nau naka wau kaa kau aporo mai mika Sera ke apapara ka kere kare mwane.” ¹⁰ Hoi ke ma ni fato mwa kaa, suria na kere kare mwane ne erua ne apararaurua ka Rebeka kena ke emataurua, ka mwane mwa ne etagai, iuraka o Aesak ia. ¹¹ - ¹² Mataina ne mamaungaraurua naru worawora, ke naru tatanui na taa ne aera ke ne koro mo God ke qani fagarongoa ka Rebeka woi i karena na mwane ne worawora inago kena ke mai fafagaarafa ka mwane ne wora imuri ia. O God ke tanua ka mwarao kaa rai fagaqao ana woi ingaia ke arao suri ka katofa iana, marefa woi suria ka taa woi naru tanui o warua gena. ¹³ Takosia rao ka woita iana na Arafa iga na Segesegefa Apuna ne woi ia, “Nga o Jekob kau oqania, mo Iso kau ngaroitainia.” ¹⁴ Hoi ka taa ka wowoisia igia, e fea, a taa ne tanua o God kena ke ma ni oto? Marefa wau ni manga ngai kena! ¹⁵ Suria ngaia ke woi tangaa ko Mosis manga kaa, “Inau kau tatakoia mwa ko otai nau oqani takoia ana. Makau tatamania mwa ko otai nau oqani tamania ana.” ¹⁶ Arani mwarao gaa ke tatagarafi mwa isuria ka faitakoifa iana o God, marefa woi suria ka taa woi na inuni nai oqani ke ne tatanui. ¹⁷ Iga na Segesegefa Apuna ia, ka Arafa ke woi tangaa ko Fero, “Au nakago ko tao rai Arafa ni finua i Ijip rai fagarego ana rainia ka ramwofa iaku, ka arani inuni ina ano kaa ki fafagaakausia ka ataku.” ¹⁸ Hoi ka arani mwarao gaa ke tatagarafi i suria mwa ka taa o God ne takosia rai tanua ana. E tatakoira ko otai ne oqani takoira ana, make tanura ki tana inuni ke marefa nai rongorongo. ¹⁹ Tana fitangimiu wari ki woi tangau mai manga kaa, “Rao ke mwora manga ngai ke make tanu fea ko God ke rorogoia woi na inuni ka aera? Marefa wau nga ko otai ni gira togiria ana o God.” ²⁰ Mako otai ki igo na goaku ko araramia aporo o God? A koki na tagarafia rainia na mwako ia ke asa mwa ni fagatea ko wani ne tagarafia kena, “Nga ne fea ko tagarafiau manga kaa?” ²¹ Nga mwa o wani ne tagarafia na koki gena ke oto tangaa rai tagarafia ana pania ka mwako kena rainia ka koki ne erua, etagai kena ki tangaa mwa ka tana mataina mwa, tanani tangai iga ka arani tangiana. ²² Agua rainia nikao manga ngai kena make mwora iga ka taa ne tanua o God, e oqani fagaqao ana rainia ka mangariaga iana make oqani fagagirara ana rainia ka ramwofa iana, e maramarapeaga mwa rai tangara ka inuni na tatanui na agua ni mangariaga tangaa gena mina ani ne araria ne kakamarira fato wau nga. ²³ Make oqania nikao ni fagaqao rainia fato nga ka arani ramwofa iana tangagia, igia na ani ne takoigia make fagananaua tangagia na romana tafinga rai tawoa ana ia. ²⁴ Nga igia ko God ke ono sikifigia panira ka inuni na onira rai Jiu, kee na inuni marefa na Jiu. ²⁵ Manga ne tamasia iga na Segesegefa iana o Hosea ia, “Ainuni marefa qai nafunira inago ira, inau kau onira rai kare iaku. Ainuni marefa qai komanira inago ira, inau kau onira rai ainuni nau kokomanira. ²⁶ Mi iga na agua na woi tangara iga, ‘Igamu kena marefa ka kare iaku.’ E kena ka onira rai karena o God tafi tarai.” ²⁷ O Aesaea nikao make tamasia ka agua rainia na inuni i Israel ke woi, “I manga woi nai inuni gena kai rako tefa wau manga na guna aone i rawona asi igi, mi tana fitangita mwa ka rorogoia ka tafinga. ²⁸ Suria ne ma ni qorafu rafaera wau mo God ke fafagagetara ka arani inuni.” ²⁹ Manga o Aesaea ne qani woisi inago ia, “Manga woi siana ka Arafa na faufugana ramwofa ni fagatafira ki tana waro ni inuni iaka kaa, kai fato wau nga manga na inuni i Sodom mi Komora ira.” ³⁰ Hoi igia ka woi manga kaa, woi na inuni marefa na Jiu ne ma nai rapasia rai nakara otooto ana afainia ko God, ka nakara ka oto afainia iga ka raronimworanifa iata. ³¹ Mi ngaira na Jiu na garia na Lo ni nakara otooto ana afainia ko God ke marefa nai rogoia. ³² Nga ne fea ke marefa nai rogoia na Lo ni nakara otooto ana? Suria ngaira ke ma nai fagauguria ko God, maaka fagauguria mwa ka mwarao na tanui. Hoi ngaira ka tapasu iga ka fau ni tapasu ana ³³ ne woisia na Segesegefa Apuna ia, “Mu rea, Inau kau naka i Jerusalem ka fau ne tanura na inuni ka tatapasu. A fau ne tanura ka apuri. Mo otai mwa ne raronimwora rainia ke asa mwa ni maaki.”

¹ A goaku igamu, inau kaa kau fagafunu wau woi na goaku mereaku na Jiu kai rorogoia ka tafinga mi iga nikao na fagarafenga iaku tangaa o God, makau oqania ni manga ngai kena. ² Ainuni gena kau girarara menamenai wau na mafata rainira mereata wau nga tangaa ko God, maaka mafata rainira ana kena ke marefa iga ka mworana giraranifa rainia. ³ E ma nai girara ka tara ni nakara otooto ana na inuni afainia ko God, maaka katofi tanui ana mwa ka tara iata mereata, hoi ngaira ka ngaroitainia ko God ni fafagaotoa tangara kai mai kokoa otooto i maana. ⁴ Ngaia o Kraes mereana ke fafagafatongia na tara iga na Lo kena, ka arani inuni na tangamworani ke nanakara ka mai otooto i maana o God. ⁵ O Mosis ke tamasia ki ngatakena na Lo ne nanakara na inuni ka otooto i maana o God ke manga kaa, “Otai mwa ne tautau woita rainia na faifataninga iga na Lo ke tafitafi.” ⁶ Hoi minga na taa ne tamasia na inuni na nafunia na fagauguringa ne oto i maana o God ke marefa nai gira fagate ana, “Otai ke akau i Heven rai toraia ana wato mai o Kraes?” ⁷ Make marefa nai gira fagate ana, “Otai ke gira wato ana ina finua iata na inuni na mae rai fagatafia ana o Kraes aporo?” ⁸ Hoi nga na taa ne tamasia kena ke e kaa, “A tamasinga iana o God ke fagarangigo wau, nga ki na wirifaramu mi rarona mangatamu.” Hoi ngaia ngai ke ka tamasinga iga na tangamworanifa mi tatarofainia kaa. ⁹ Rao ko rangaria fura woi o Jisas ka Arafa mako raronimwora woi o God ke ragaia afaraga aporo pania ka maefa, igo ko rorogoia ka tafinga. ¹⁰ Mu raronimwora i mangatamiu, hoi o God ke fafagaotogamu i maana, maka mu tatamasia fura i faramiu, ngaia ke fafagatafigamu. ¹¹ A Segesegefa Apuna ke woi manga kaa, “Otai wau mwa ne raronimwora rainia ke asa ni maaki.” ¹² E marefa wau nga ko otai ni qao getea manga ngaia ka Jiu kee na inuni marefa na Jiu suria o God ka Arafa mwa ne etagai, mi ngaia nikao kena ka Arafa iata fato na arani inuni, make ono korofira tefa wau ka arani inuni na onia. ¹³ Manga na Segesegefa Apuna ne woi ia, “Arani inuni na onioni tangaa na Arafa rai tamanira ana, ke fafagatafira.” ¹⁴ Make tautanu fea ka onia rai tamanira ana manga ngaira ke ma nai raronimwora? Make tautanu fea ka raronimwora manga ne ma nai rongoa na tamasinga rainia? Make tautanu fea ka rongoa na tamasinga rainia manga ne ma nai tarofainia tangara? ¹⁵ Make tautanu fea ka tamasinga kena ka tatarofainia manga na inuni ni tarofainia ana ke ma nai kasira kai rao? Manga na Segesegefa Apuna ne woi ia, “E qao koro wau ka raofa iata mai na inuni na toraia mai na tarofa koro.” ¹⁶ Hoi, make marefa ki ngaira fato nga gena kai tawoa na tarofa koro kena, o Aesaea mereana ke woi, “Arafa, otai ke raronimwora rainia na tamasinga iaka?” ¹⁷ Hoi ka tangamworanifa ke arao mai pania ka tamasinga kena na rongorongo fato noga, mina tamasinga kena ke arao mai iga ka tarofainia ana o Kraes. ¹⁸ Mi inau kau fafagate, “Efea, ne mwora woi ngaira ke ma nai rongoa ka tamasinga kena?” Ngaira ka rongoa fato noga, manga ne woisia na Segesegefa Apuna ia, “A tamasinga iata ka tarofainia fato noga tangara ka arani inuni ina ano kaa. Tamasinga iata ke taua fato noga ka arani finua ina ano kaa.” ¹⁹ Mi inau kau fafagate nikao, e fea, ainuni i Israel gena ke ma nai ono girara ka tamasinga kena? O Mosis mereana ke aramia ka fagatenga kaa mataina ne segea wato na woita iana na Arafa ne woi ia, “Inau kau tanura ka inuni i Israel ka fafaikekesi rainira ka inuni marefa wau nai rongorongora na atata, Inau kau tanura ka mangariaga rainira ka inuni marefa wau nai girara na taa.” ²⁰ O Aesaea nikao make ma ni mamakuga ke tamasi wau rainia ka tamasinga iana o God manga kaa, “Ainuni marefa wau nai gariau ka rogoiau. Au fagaqao mereaku tangara ka ani ne marefa nai fafagate tangau.” ²¹ Mina agua rainira na inuni i Israel ke woi manga kaa, “Arani tangiana kau onira mai ka inuni ne ma ni rongorongo, maka togeaga.”

¹ Hoi inau kau fagatea nikao, e fea, o God ke ngaroitainira ka kare iana mereana? Marefa wau! Nga inau mereaku kaa maka ai Israel, aorisina o Ebraham mina qaunga ni inuni iana o Benjamin. ² O God ke marefa ni ngaroitainira ka kare iana ne qani atera mai inago wau noga kena. Igamu kamu girara fato noga ka tamatamasinga rainia ko Elaeja iga na Segesegefa Apuna ne fagarafe tangaa o God rainia na inuni i Israel ne woi manga kaa ia, ³ “Arafa ngaira ka nafuira fato wau nga ka maurukari iamu maka taka rainigi ka raperape iamu. Nga inau etagai togo kau ogaoga maunga kaa, mi nga inau kaa ka katofi nafuiau ana nikao.” ⁴ O God ke aramia aporo manga kaa, “Inau kau nafunira maunga ka qera ni mwane ne epiu (7,000) ne ma nai wogasia o god Baal ma ni mwora kena.” ⁵ Nga ne manga ngai kena nikao kina mataina kaa. Tana inuni na ogaoga maungara ina mataina kaa ko God ke atera suria ka apena faikomanifa rafa iana. ⁶ Ngaia ne onoono sikifia na inuni ki iga mwa ka faikomanifa rafa iana, marefa isurira ka taa woi ngaira na tatanui, suria manga ni ono sikifira mwa rainigi ka tagaranifa koro iata, ka faikomanifa rafa iana kena ke ma ni mwora. ⁷ Hoi ke manga kaa, ngaira na inuni i Israel gena ke ma nai rogoia ka taa na garia kena. Ngaira gena ka togeaga wau mina tana inuni ne qani atera o God gena mwa ka rogoia. ⁸ Manga na Segesegefa Apuna ne tamasia, “O God ke tanura ke ma ni matafa ka takofa iata. E mai taua ina mataina kaa ke ma ni onoono ka maata make ma ni rongorongo ka karingata.” ⁹ O Deved make woi nikao, “Nakara kai roira iga ka tou rainigi ka ngaufa rafa iata! Ui qarua aporo rainigi ka tofenga iata. ¹⁰ Nakara ki guru ka maata ki siana kai onoono, nakara kai fafara wau nga iga ka arani ogafa iga na fafaranifa.” ¹¹ Hoi inau kau fagate nikao, mataina ngaira na Jiu na tapasu ka apuri gena, e fea, ingaira ka aera tarai nga? Marefa wau! Suria na aerafa iata gena ka fagatafinga kena ke mai taura nikao ka inuni marefa na Jiu, rai tanura ana ka Jiu gena kai fafaikekesi rainira. ¹² Nga isuria na aerafa iata na Jiu gena ka apena korofa rafa ke rao mai tangaa ka arani inuni ina ano kaa. Aerafa iata na Jiu gena ke toraia mai ka apena korofa rafa tangaa ka arani inuni marefa na Jiu, ka watowato rao mi tani ka akau mai. Hoi aporo ana mai iata na Jiu gena tangaa o God ka apena korofa rafa iga ke tefatefa wau nga tangaa ka arani inuni. ¹³ Mataina kaa kau tamasi tangagamu kigamu na inuni marefa na Jiu. Inau kau fagaakaufia wau ka tagarafa iaku, e kaa inau nau aposol rai tagara ana tangagamu igamu na inuni marefa na Jiu kena. ¹⁴ Qao manga nau tanura ka goaku mereaku gena ka fafaikekesi ngaira, mwarao maki tana fitangita kai mai rogoia ka tafinga. ¹⁵ Suria na mataina o God ne ngaroi tamanira ana na Jiu gena ke mai tanura rai goana ki tana inuni rao nikao ina ano kaa. Hoi ke manga ifai iga ka mataina na Jiu gena na aporo mai tangaa o God? A tautanu manga na inuni na mae maka tafi aporo ira. ¹⁶ Manga na matopigana nikao na purete kena ka mafata rainia tangaa ko God, maki ngaia fagaenani na purete kena make nafunia nikao, hoi ke manga na wagana apenagai kena ke apuna ngaia fato na apena kena make apuna nikao. ¹⁷ Tana arani na apenagai na fauatana rainia na olif kena ka qarogia rao mina arana wasi na olif kena ka mai ratoa rao iga ka agua na qarogia rao pania kena. Igamu na inuni marefa na Jiu gena kamu manga na arani na wasi na olif kena, hoi kina mataina kaa kamu mai tawora ka mwarao ne koro wau nga ne araria ne arao mai tangara na Jiu gena. ¹⁸ Hoi igamu ki siana kamu onoono qau wato rainira ka arani na apenagai na qarogi rao gena, suria igamu kena ke marefa mu mamafata rainia ka tafinga tangaa ka wagana na olif kena, nga na wagana na olif kena ke mamafata rainia na tafinga tangagamu kena. ¹⁹ Ua igamu wari kamu pagai tako kamu wowoi, “Arani igi ka qarogi rao noga ngai gi. Mi igami ka ratogami qanu i nanata ira.” ²⁰ Aa, e mwora. Ingaira gana ka qarogi rao ngai gana suria ingaira gana ke marefa nai nafunia ka tangamworanifa. Igamu kamu rato rao i nanana na apenagai na olif kena suria na tangamworanifa iamiu. Hoi e araria mu maagutainia mwa, siana rai qaqaeaga ana. ²¹ I manga o God ki qarogi rao ka arani na olif ia, igamu ke marefa ni tanua ka agua manga ngai kena nikao tangagamu ki nanakagamu wau naa? ²² Hoi, kamu rea ki ngatakena na korofa iana o God mina raramwofaga iana. I ngaia o God ke raramwofaga tangara ka ani na inuni na totora getera, mi igamu ke korokoro tangagamu ki ngaia, e manga namu fafagauguria mwa tatarau ka korofa iana, ki ngaia nikao minga ke korokoro mwa tatarau tangagamu. Make rao ke marefa kigamu nikao minga ka qaqarogigamu ka kasigamu rao nikao. ²³ Ua e manga na Jiu ira ki faganega aporo rai nafunia ana ka tangamworanifa, nga na mai taotao aporo nikao rai arani na apena olif ia ngaia. Ingaia o God ke nafunia ka ramwofa rai nakara ana aporo. ²⁴ Igamu na inuni ne marefa na Jiu kamu manga na arana na wasi na olif ia na qarogia rao pania na apena ka ratoa aporo iga na apena olif mwora ia. Ingaira na Jiu ke mangara na olif mwora ira, ingaia o God ke mwataku mwa tangaa rai ratora ana aporo ka arani na qaro panigi na apeni igi ke ratorato aporo nikao. ²⁵ A goaku igamu, inau ke marefa qai oqanigamu ki igamu na inuni ne marefa na Jiu namu qaqaqaeaga rainigamu mereamiu. Hoi kau tatamasia wau tangagamu ka agua ne tao punufi maunga ne wora noga tangara na inuni Israel ira. Tana inuni gena ka togeaga wau nga maka oga manga gana raorao make taua mai ka mataina namu qauqanu fato mai kigamu na inuni ne marefa na Jiu. ²⁶ Nga na mataina ngai ke ko God ke fafagatafira fato ka arani inuni Israel, manga na Segesegefa Apuna ne woisia ia, “A Fagatafi ke pagai arao mai pania ki Sion tangai mai fagataraganisira ana ka arani aorisina Jekob panigi ka arani agua aera na tanui. ²⁷ Ina mataina inau nau tawora panira iga na aerafa iata, inau kau pagai tanua ka fagatapusinga kaa afainira.” ²⁸ Ingaira na Jiu gena na tofea na tarofa koro gena, nga na tao noga manga na maerongana o God ira ngai gena. Hoi ka agua ngai ke ka inuni marefa na Jiu ira make tamanira. Mingaia o God ne usuira na Jiu gaa, ingaira gena nikao maka tamana o God, suria ne qani suru tangara o wauwata ira. ²⁹ O God ke marefa ni tawora aporo ka korofa ne mafata rai noga igi make ma ni qono rainira ka inuni ne usuira ira. ³⁰ Inago ia ki nga igamu na inuni ne marefa na Jiu kamu ngaroitainia ko God ia. Hoi kina mataina kaa, mina inuni Israel ira ka kafu ngaroitainia nikao ko God, ingaia ngai ke o God ne takoigamu wau ke. ³¹ Hoi faitakoifa na fagaqao rainia tangagamu ia ki ngaira nikao maka pagai fafaitakoi. ³² God ke nakara wau ka arani inuni ka tofe mwa, ki mwarao maki pagai tatakoira fato wau nga. ³³ Otai ka inuni ne gira fagaarari ana na rurugua iana o God mina giraranifa iana mina takotakofa iana? Otai ke gira tako matafa ana rainigi na katofa iana kee ne fafakani na taufa iana? ³⁴ “Efea tana inuni wari ke girara ka mangatana na Arafa ke fafagaotoa wari? ³⁵ Efea tana inuni wari ka mafata rainigi ka tana mwarao tangaa na Arafa ki pagai orisi aporo wari?” ³⁶ Arani mwarao ke arao mai pania ko God, make tagarafi ka arani mwarao rainia ki ngaia mereana, mina arani mwarao igi ki pagai aporo tangaa ki ngaia. Igia kai fagaakausia ka Arafa tarai tarai! Amen.

¹ A goaku koro igamu, o God ke koro wau nga. Ki inau kau nongigamu ki igamu woi namu mamafata rainigi ka apemiu tangaa ko God manga na suu wogasifa ne mauri ia, i tataragani wau nga maki mamarumusia. Nga na tara menamenai tangai tagara ana tangaa o God ngai ke. ² Siana kamu mangara na inuni iga na ano kaa ira, maaka mu nanaka wau tangaa ko God ki orisigamu rai orisi ana faoru ka takofa iamiu. Imuri mai mi igamu kamu pagai gigirara ka faioqanifa iana o God, woi ne koro make oto wau, make wawagewage wau rainigi. ³ Inau kau ono girara ki ngatakena na korofa iana o God tangau, hoi inau kau wowoi tangagamu wau, siana kamu takotako rai kasikasigamu akau ana. Mui tatanui ka takofa iamiu ki araria mwa ka tangamworanifa iamiu ne mafata rai tangagamu o God igi. ⁴ Igia kaa ke rako wau ka arani kere agua iga na ape mwa ne etagai, ani iana noga na kere agua ni tatagarafia na ani ana mereana. ⁵ Ngatakena igia fato ka ngai ke. Igia kaa, ka rako wau, igia kaa ka apanana nikao iga na apena o Kraes na faku faitangai mai. ⁶ Igia kaa ka nafuni mafatanifa faitigi ne mafata rai tangagia o God na tatagara rainigi. E rao ke manga o God ke mafata rainia tangaa ki tana inuni ka woita iana qai tatamasi, ngaira kai tanua nga suria ka tangamworanifa na nafunia ira. ⁷ E rao ke manga igia ka gira tagara ana tangara ki tana inuni, ai tatagara nga, kee manga na fafagausuri makai tanua nga. ⁸ E rao ke manga igia ka gira tamasi rai fagagatanira ana ka inuni, igia kai tamasi fagagatanira nga, kee ne rao ke manga igia ka gira mafata ana, ai mamafata wau nga. E rao ke manga igia ka inuni ni qainago ana, ai tanua nga kai mamanirania. Kee ne rao ke manga igia ka korokoro tangagia fairifui, igia kai tanua nga iga ka wagefa. ⁹ Igamu kamu fafaioqani mwora nga tangagamu faitangai, mui ngangaroitainia ka arani mwarao ne aera maka mu tautau nganganiaga nga iga ka arani taufa ne korokoro. ¹⁰ Igamu kamu oqaoqanigamu faitangai mangara o wafari goani ira, maka mu takotako fagafigaigamu fairifui nga. ¹¹ Siana nga maka mui maemaega, mui mamarumu nga kamui tatagara tangaa ka Arafa. ¹² Mui nanaka ka tako fagaetagai ana iamiu ki tanugamu kamui wawagewage. A mataina ne arao mai tangagamu na arani agua tangai fagaerisigamu ana maka mui marape mwa, maki siana kamu fatofato rai fagarafe ana. ¹³ Mu wowoto rainigi nga ka mwarao namu nafuni gena afainira ka kare iana o God, ina mataina ne marefasira iga, maka mui kanakanasira ka inuni na arao mai i ruma iamiu. ¹⁴ Igamu kamui nongia ko God ki korokoro tangara ka inuni na tanugamu aerisigamu. Mui nongia ki korokoro tangara mwa, siana ki fagaerisira. ¹⁵ A mataina na fitangimiu na wawagewage, mi igamu nikao kamu wawagewage afainira. Hoi ka mataina na fafaitakoi mi igamu nikao kamu fafaitakoi. ¹⁶ Mui kokoa menamenai faku. Siana kamu qaqaeaga minga kamu mamarumu mwa kamu tatagarafi ka tagaranifa wau mwa. Siana kamu qaqaqaeaga kamu wowoi namu girara wau. ¹⁷ Siana kamui orisi aporo tangara ka inuni na tatanui na agua aera tangagamu, maka mui ofofongia mwa ka mwarao ne oto i maata na arani inuni, ¹⁸ maka mui mamanirania kamui kokoa iga ka marapefa afainira ka arani inuni. ¹⁹ A goaku koro igamu, siana rai takosia ana ka agua igi. Mui nakai wau tangaa ko God ki orisi aporo tangara ka inuni ira. Irarona na Segesegefa Apuna ke woi iga na Arafa ia, “Nga inau kau orisi aporo na agua igi makau riri aporo tangara.” ²⁰ A Segesegefa Apuna ke woi nikao ia, “E rao ke manga na maerongamiu ira ka magau, mui watera ka ngaufa kai ngaua. Kee ne rao ke mamata ka roita, mui watera kai tono. Rainia mu tanua ka agua manga kena tangara, ki ngaira gena ka pagai mamaaki wau ngaia.” ²¹ Siana kamu tanua na aerafa ki rarafasigamu, maka mu naka mwa ka korofa ki tetefaria ka aerafa ia.

¹ Arani inuni kai tautau woita iata ka mwane rafa iana kafamanu na onoonosurira ira. Ingaia mwa o God ke gira mafata rainia ana na ramwofa tangaa ka mwane rafa gaa make ono sikifira rai mwane rafa ni onosuri ana. ² Ainuni na tofea na kafamanu ka tofea nikao ko God ne tagarafia ia nikao, ki ngaira gena ka pagai fafagaetangira. ³ Ingaira na mwane rafa ira ka fafagamaagusira ka inuni na tatanui na agua ne aera igi, marefa mwa ka inuni na kokoa menemenai ira. Igia kaa, ke marefa ni araria nai mamaagutainia ka kafamanu, ingaira gana ka wawagewage wau rainigamu manga mu tatanui na mwarao ne otooto. ⁴ Ingaira fato gana ka mwane ni tagaranifa iana o God, ki ngaira gana ka tatanui ka tagaranifa iata rai tamanigamu ana mwa. E rao ke manga namu tanua na mwarao ne marefa ni koro, igamu ke araria namu mamaagu rainia, suria na mwane rafa ira ka nafuni ka otofana rai fagaetangigamu ana rainia ka agua kena. Ingaira gana ka mwane ni tagaranifa iana o God na mai fafagaqao rainia ngatakena na mangariaganifa iana o God tangara na inuni na aoraoraga na fafagaetangaira. ⁵ Igamu kamu tau woita iata na mwane rafa suria igamu kena kamu maagutainia ka fagaetangifa, maka mu tautau woita suria ne araria nga namu tanua ka agua ne otooto. ⁶ Igamu nikao make araria namu worira nga ka takesi iamiu. A mwane rafa iana kafamanu gana ka mwane ni tagaranifa iana o God, ki nga na tagaranifa iata ngai ge rai onosuri ana ka agua manga ngai ge. ⁷ Mu takotako fagafigaira maka mu tautau woita iata maka mu worira ka arani takisi mina fii ne araria namu worira. ⁸ Mui naka mwa ka faioqanifa ki manga mwa nga na kaoni iamiu mwa ne etagai togo ia! E rao ki manga mu fafaioqani faitangai, nga mu rao suri wau na mwarao ne woisi na Lo igi ngaia. ⁹ Iga na Lo ia ke rako wau ka agua ne woisi igi, tana ani ke woi manga kaa ia, “Mui mworamwora iga ka auragifa. Siana kamu nanafuia funuia ka inuni. Siana kamu fafanago. Siana rai wanasi ana ka nafuninga iata na tana fitangimiu.” Maka arani faifataninga gaa fai nikao ki tana ani ke qanu fato iga ka Lo ne woi ia, “Mui fafaioqani faitangai tangagamu manga igo mereamu no oqaoqanigo wau ia.” ¹⁰ Ainuni ne fafaioqani kaa, ke marefa ni pagai fafagaerisira aporo ka tana inuni ia. Hoi nga na faioqanifa tangara tana inuni ka tara rai rao suria ana Lo iana o God. ¹¹ Igamu kamu girara fato noga ka mataina na ogaoga iga kaa, ke araria nga na ogaoga menemenai ngaia. Mu rite, suria na mataina tangai fagatafigia ana ke fagarangi mai noga tefaria rao ka mataina na kafu faganega rao mwa rai tangamworani ana rainia na Arafa ia. ¹² A qongiana kaa ke fatofato rao noga kaa mina tangiana ke suguia mwa ni rao mai kaa. Igia kaa kai fato rao nga rai koa ana mangara na inuni iga na rotorotoaganifa ira, kai nanau kai kokoa iga ka mawetana. ¹³ Hoi mui kokoa menamenai mangara na inuni na kokoa iga na tangiana ira. Siana rai rao ana tangai ka farunga marefa ni koro, kee nai tono kai qekaqeka, siana kamu nafuni mangata aera kee na tanui na agua ni oraoraga ana, siana kai fafaitewotewo, kee nai fafairafai. ¹⁴ Mui naka ka Arafa o Jisas Kraes ki fagarangi wau tangagamu manga na gafu namu gafugafu rai gena, make marefa mu arao suri ka takofa ne takosi na apemiu mereamiu mwa gena.

¹ Mui wagewagesira ka arani inuni na arao isuria na Arafa. Ani na mwarumwarusiga iga na tangamworanifa maka mu wagewagesira nikao. Siana rai tangatangaerata ana, woi ingaira gena ke marefa nai tangamworani faku afainigamu. ² A tana inuni ka takosia ne koro mwa na ngaura ka arani mwarao ni ngaufa mina inuni ne mwarumwarusiga na tangamworanifa ka ngaroi rai ngaua ana ka fisigona. ³ Igamu ki siana rai tangatangaerata ana ki tana inuni woi ngaira gena ka ngaungau kee na ngaroitainia mwa. Imurini na arani mwarao gaa ko God ke wagewagesira fato nga. ⁴ Mu katofia woi otai kigamu kamu tangatangaerata na kare iata na tana inuni gaa? Ingaia mwa na mwane rafa iata ira ke gira woisi ana na agua na tanua gena ne otooto, mina Arafa ia ke pagai tatamanira nga woi i ngaira gena ka tatanui ka agua ne oto. ⁵ Tana guata na inuni na kare iana na Arafa ira ka takosia woi na tangiana ne etagai ia ke tefa wau panigi ka tana tangiani igi rao, mina tana inuni ka takosi ka arani tangiani gaa ke faiaworagi mwa. Nga igamu mereamiu ke araria namu tatakosia i mangatamiu. ⁶ Ainuni wau mwa na takosia na tangiana ne etagai ne tefa wau panigi na tana tangianigi rao gena ka tanua rai tako fagafigaia ana rainia ka Arafa ira, mina inuni wau mwa na ngaroi rai ngaura ana ka fisigona ira ka tamasi korokoro tangaa ko God, tautanu manga nikao ngaira na inuni na ngaura na arani mwarao ni ngaufa igi. ⁷ Igia kaa ke marefa ka inuni ni tafitafi tangaa ingaia mereana, marefa nikao ka inuni ni maemae tangaa mereana. ⁸ Ke rao ke manga na tafitafi nga na Arafa ka tafitafi tangaa ia, kee ne rao ke manga na maemae nga na Arafa ka maemae tangaa ia. Ke rao ke manga na tafitafi kee na maemae mina Arafa ke nafunigia maunga. ⁹ Agua kaa ke tanu manga kaa suria o Jisas ke mae make afaraga aporo ne tafi. Hoi ingaia ke tao rai Arafa tangara na inuni na mae fato noga mina Arafa tangara na inuni na tafitafi maungara. ¹⁰ Nga mu fea kamu tangatangaerata na tana inuni na arao suria na Arafa gaa? Nga mu fea kamu onoono qau wato mwa rainira gena? Igia fato kaa ko God ke pagai fafagagetagia fato iga ka tangiana ne pagai arao mai. ¹¹ Irarona na Segesegefa Apuna ia ke woi iga o God ia, “Inau kaa, ka God nau tafitafi, arani inuni ka pagai mai qoqogurai uwa wato maka fafagaakausia ka ataku!” ¹² Igia fato kaa, ka ania noga na inuni ni wowoisi mereana tangaa o God na arani mwarao na tanui. ¹³ Igia kaa kai fato nga rai oga ka tangatangaerata ana ki tana inuni gaa. Make marefa ni araria nai fafagaerisi ka tangamworanifa iata tana inuni. ¹⁴ Arafa o Jisas ke fagaqao noga tangau kau girara woi o God ke tanui ka arani ngaufa ke koro na ngaura. Make rao ke manga igamu kamu tatakosia woi ne marefa ni araria nai ngaua, hoi nga igamu meremiu ngaia mu naka ke marefa ni araria mu ngaua ia. ¹⁵ E rao ke manga mu fafagaerisira ki tana inuni rainigi ka ngaufa namu ngaura gena, afaioqanifa ia ke marefa ni taotao afainigamu ngaia. Siana kamu tanua na ngaufa namu ngaua ke watowato i oqamiu kena ki tanugamu kamu fafagaerisira tana inuni ne mae tangara nikao o Kraes gena. ¹⁶ Siana kamu tanua tana inuni ka tamasi fagaerisira rainia na mwarao ne oto mwa kena. ¹⁷ Arafanga iana o God ke marefa woi nga nai koa mwa kai ngaungau makai koa mwa kai totono makai arao iga, maka tatanui ka mwarao ne oto, maka kokoa iga ka marapefa maka wawagewage mwora nga. Arani mwarao gaa ke rao mai panigi ka Figona Apuna. ¹⁸ Ainuni ne rao ke tatagara manga ngai ke tangaa o Kraes, ko God ke wawagewage rainia mina inuni ka takotako rafa wau rainia. ¹⁹ Igia ke araria nai ofongia kai oga iga ka marapefa mina tangamworanifa iaka ke araria nai tamanigia faitangai rainigi ki nganganiaga. ²⁰ Siana kamu tanua na ngaufa namu ngaura gena ki fafagaerisi na mwarao ne tagarafi o God. Arani ngaufa namu ngaura gena ke koro mwa namu ngaura, minga na mwarao mwa ne aera ke, ki siana rai toraira ana tana inuni kai tatanui ka aerafa rainia ka ngaufa namu ngaura gena. ²¹ Make marefa ni araria nai ngaura ka fisigoni na ngaufa make marefa ni araria nai totono waen manga ne totoraira tana inuni kai apuri iga ka aerafa. Make marefa nikao ni koro nai tatanui ka agua ne totoraira na inuni na arao isuria o Kraes ira kai apuri iga ka aerafa. ²² Ata mwa namu tangamworani rainigi na arani mwarao gaa igi ngaia mwa o God mi igamu kamuru gigirara maka mu mai marape sio, igamu kena kamu wagewage wau manga na mwarao namu tatanui gena ka tanugamu ke marefa namu takotako fagaerua. ²³ Make rao ke manga igamu nikao maka mu takotako fagaerua rainigi ka ngaufa namu ngaura igi nikao, nga ne marefa ni oto isuria na tangamworanifa iamiu ngaia. Hoi igamu kamu girara noga woi na agua kena ke marefa ni oto, suria na taa ne marefa ni otooto isuria na tangamworanifa iamiu ia ki nga na aerafa noga ngaia.

¹ E rao ki manga na tangamworanifa iaka ke nganganiaga, make araria na marape surira mwa ka kare iana na Arafa na arao suria ne mwarumwarusiga na tangamworanifa iata ira. E araria na taufa iaka ki tana inuni nikao makai wagewagesia, siana ki igia mwa mereaka. ² Igia kaa ke araria na tatakosia ka taa ne koro tangara kai ofofongia kai tatamanira rainia kai wagewagesia. ³ Rainia ko Kraes nikao make marefa ni tanui ka agua ni wagewagesia mereana rainigi, make manga mwa na Segesegefa Apuna ne woi ia, “Ainuni na tamasi aerisigo ira ki inau nikao ngaira maka tamasi aerisiau ira.” ⁴ A Segesegefa Apuna na segea mai kaa tangai fagauisurigia ana mi tangai fagagatanigia ana kai nanafunia ka tako nganganiaganifa. ⁵ Ingaia o God etagai ana ke tanugia ka marape maka wawagewage. Inau kau fagarafe woi ingaia ki pagai tatamanigamu kamu kokoa iga ka marapefa tangagamu faitangai, manga igamu namu arao isuria o Kraes Jisas ia. ⁶ Imuri mai migamu na inuni fato kamu kasia akau ko God Emana na Arafa iaka o Jisas ia. ⁷ Mui takotako fagafigaia ko God kamui mamarumusigamu faitangai, manga ingaia o Kraes ne marumusigamu nikao igamu ia. ⁸ Au woi tangagamu wau, o Jisas ne rao mai ia ke tanu mwa manga na inuni ni tagaranifa iata na Jiu ira, tangai fagaqao ana tangara rainia ka agua ne qani naka sio o God tangara iurata ira. Kraes nikao make rao mai, ⁹ ki mwarao maki ngaira nikao na inuni marefa na Jiu ira makai kasia akau nga nikao ko God rainia ne koro wau tangara ira. Nga ne tanu mwa nikao manga na Segesegefa Apuna ne woi ia, “Inau kau pagai wowoisigo tangara ka arani inuni, makau pagai kiukiu fagaakausia ka atamu.” ¹⁰ A Segesegefa Apuna ke woi nikao tangara na inuni marefa na Jiu ira, “Mui rao mai kamui wagewage afainira fato ka arani kare iana o God.” ¹¹ A Segesegefa Apuna ia ke woi aporo nikao, “Arani inuni marefa na Jiu, mui fagaakausia ka Arafa. Igamu fato na arani inuni, kamu rao mai kamu mai wogasia.” ¹² O Aesaea nikao ke woi ia, “A tana mwane ne etagai iga na waro ni inuni iga o Jesi ke pagai mai taotao rai mwane ni ono isuri ana tangara ka inuni marefa na Jiu. Mingaira nikao ka gira fagauguri ana woi ne tatamanira.” ¹³ O God ke gira tanu ana na tangamworanifa ia ka fafagauguria rainia. Inau kau fagarafe woi ni gira mafata rainia ana tangagamu ka wagefa mina marapefa mataina na tatangamworani rainia, mina ramwofa iana Figona Apuna ke fafagaramwori ka tangamworanifa iamiu kamu fafagauguria tatarau mwa ko God. ¹⁴ A goaku igamu, inau kaa kau giraragamu wau woi igamu kena kamu koro wau maka mu nafuni ka arani giraranifa ne araria igamu namu fafagausuringainia tangagamu faitangai. ¹⁵ Inau kaa, ko God ke koro wau tangau! Ngaia ngai ke nau tatamasi wau tana agua gaa tangai fagatakosigamu ana rainigi. ¹⁶ O God ke usuiau tangai mwane ni tagaranifa iana o Kraes Jisas kau tatagarafira ka inuni marefa na Jiu makau tatarofainia ka woita iana o God manga na mwane ne raperape ia. Ki mwarao maka Figona Apuna ki fafagaapunarira ka inuni marefa na Jiu ira kai mai taotao rai wogasifa ne apuna make wagewagesia. ¹⁷ Iga na fakunga iaku afainia ko Kraes Jisas kaa, ki inau kau qaqaeaga wau rainia ka tagaranifa nau tanua tangaa o God kaa. ¹⁸ Nga mwa na mwarao nau tatamasi gaa ko Kraes ne fafagamwatakua tangau rai tamasi ana mina taniu ana rai tanura ana ka inuni marefa na Jiu kai tautau woita iana ko God. ¹⁹ Hoi makau tatamasia ko Kraes ngatakena ne tataniu na fagaqaonga iga na ramwofa iana na Figona Apuna. Au tamasia ka tarofa koro rainia ko Kraes kaa, faganega pania ki Jerusalem ke raorao make tau ki Iririkum. ²⁰ Ua ki inau kau oqani tamasi ana wau tangara ka inuni ne ma nai rongoa noga o Kraes. Inau ke marefa qai oqani tagara ana iga ka agua na qani tagara fato noga iga. ²¹ E manga ngai ke, suria na Segesegefa Apuna ne woi ia, “Arani inuni ne ma nai qani tamasia tangara noga kai rongoa, ka pagai rerea, Mina inuni ne ma nai rongoa noga, ka pagai gigirara.” ²² Nga na tagarafa iaku gaa ke ura pusiau ke ma qai rao mai rai regamu ana kaa. ²³ Hoi kina mataina kaa kau fagafatongi noga ka tagaranifa iaku iga na arani agua igi. Iga na arani farisi gaa ki inau kau oqani rao mai rai regamu ana. ²⁴ Ua ki inau kau oqani wau regamu ana ina mataina nau arao tangaa i Spen. Inau kau oqani wau oga sisitai ana, qai wagewage afainigamu. Hoi kau girara nga igamu kamu kasiau kau arao i Spen. ²⁵ - ²⁶ Ina mataina kaa kau arao noga tangaa ki Jerusalem ngai ke rai mafata rainia ana ka sirani iata na inuni na apuna tangaa o God i Masedonia mi Akaea na fakua tangara na inuni na apuna tangaa o God ne ma ni tonga nafuninga iata. ²⁷ Ngaira mereata ka oqani tanua ana na agua kaa. Hoi ka woto rai ana na sirani iata afainia na Jiu gaa ke manga na orisi aporo mwa ka mwarao iata na Jiu, suria na Jiu ka qani woto rai ka mwarao koro iata ne rao mai pania ko God, tangara ka inuni marefa na Jiu. ²⁸ Imurina nau mamafata rainia menamenai na sirani kaa, makau wau reregamu makau wau arao tangaa ki Spen. ²⁹ Hoi kau girara, nau mataro wau i Rom, au mimigi rao wau ka arani korofa iana o Kraes. ³⁰ A goaku igamu, iga na ramwofa iana na Arafa o Jisas Kraes mina faikomanifa ne rao mai pania na Figona Apuna, au nongigamu namu fafagarafe afainiau, maka mu fafagarafe tangau. ³¹ Mu fafagarafe tangaa ko God ki ura pusiau panira ka inuni ma nai tangamworani i Jiudia ki siana kai fafagaerisiau, maka mu fagarafe nikao woi na inuni na apuna tangaa o God i Jerusalem kai wawagewage rainia ka mwarao nau tanua kana. ³² Mu nongia ko God qai arao wau tangagamu qai wau wawagewage wau, mina mamaro ana afainigamu. ³³ Au fagarafe tangaa ko God ni wategia ka marapefa, ki ogaoga afainigamu fato. Amen.

¹ Inau kau oqani woisi ana wau tangagamu ka fefene na goaka ia ka Fibi, ingaia kena ke tatagarafira ka inuni ina siosi i Senseria. ² Igamu na inuni na apuna tangaa o God, kamui kanakanasia menamenai ka fefene kaa, mi ngaia kena nikao ka kare iana o God. A taa wau mwa ne oqaoqania maka mu tatamania rainia, suria kani ngai ke make qani tatamanira na inuni na rako wau mi inau nikao. ³ Mui mamafata rainia ka tamasinga iga na wagefa iaku tangaa ka Prisila mo Akuila, suria ingairaurua mi inau kami tagai tatagara faku tangaa o Kraes Jisas ia. ⁴ Ngairaurua nikao makaru fani mae rai tamaniau ana. Inau kau wagewage wau rainiraurua, marefa ki inau mwa maka arani siosi iata na inuni marefa na Jiu ira maka wagewage wau nikao. ⁵ Tamasinga iga na wagefa tangara ka siosi na fakufaku iga na ruma iataurua ira. A romana tamaku nikao o Epaenetus ia maka tamasinga iga na wagefa tangaa, rainia ingaia kena ka mwane nga inago ne nafunia na tangamworanifa rainia ko Jisas Kraes ina provins i Esia. ⁶ Ka Meri nikao ne oga ke mwakomwoaga rainigamu ia maka mu mamafata rainia nikao tangaa kani kena na woita iga na wagefa tangaa. ⁷ A goaku iraurua nikao maka mu mamafata rainia nikao ka tamasinga iga na wagefa tangaraurua Andronikus mika Junias, ngairaurua nikao gena makau oga afainiau irarona na peresin ia. Arani aposol maka tako fagafigairaurua wau, mingairaurua gaa nikao karu tao rai raoisuri iana o Kraes inago mi inau kau kafu tao rai raoisuri iana imuri. ⁸ A tamasinga iga na wagefa iaku tangaa na goaku koro o Amplitus, ingaia make nafunia ka tangamworanifa iga o Kraes. ⁹ A tamasinga iga na wagefa tangaa ko Obanas, ingaia kena nikao maka tamaka na tagai tatagara faku tangaa o Kraes ia. Mina romana tamaku koro nikao o Stakis maka mu mamafata rainia nikao ka tamasinga iga na wagefa tangaa. ¹⁰ A tamasinga iga na wagefa tangaa ko Apelis, ingaia kena make qani fagaqao noga woi ngaia make arao suria ko Kraes. Aristobiulas mi karena ira nikao maka mu mamafata rainia nikao ka tamasinga iga na wagefa tangara. ¹¹ A tamasinga iga na wagefa tangaa ka goaku o Herodion, mi tangara nikao na goana mi karena o Nasisas na arao isuria o Kraes ira. ¹² A tamasinga iga na wagefa tangaraurua ka Traefina mika Traefosa, ngairaurua na fefene ngai ge makaru mwakomwoaga wau rai tagara ana tangaa ka Arafa. Hoi mina romana tamaku ia nikao ka Pesis maka mu mamafata rainia nikao ka tamasinga iga na wagefa tangaa suria ingaia kena nikao make mwakomwoaga rafa wau kena tangaa na Arafa. ¹³ A tamasinga iga na wagefa tangaa ko Rufas. Ingaia kena ka romana mwane ne arao suria na Arafa nikao, tamasinga iga na wagefa maka mu mamafata rainia nikao tangaa ke enana suria na fefene ngai kena ke tanu wau manga enaku ia. ¹⁴ A tamasinga iga na wagefa tangaa ko Asinkritasi, mo Filegon, mo Hemes, mo Patrobas, mo Hemas mina ani na inuni na tangamworani rainia ko Kraes na ogaoga afainira gena. ¹⁵ A tamasinga iga na wagefa tangaa ko Filologus mika Julia mo Nereus mika goana na fefene, mo Olimpas mina arani inuni na apuna tangaa o God na kokoa afainira gena. ¹⁶ Mui kanakanasigamu fairifui manga iga na kastom iaka, namu sisiginigamu mangara mwa na afarigoata ira. Arani siosi fato iana o Kraes ngai ge na kasi wau na tamasinga iga na wagefa tangagamu gaa. ¹⁷ A goaku igamu, au wowoi tangagamu wau menamenai mu fifinarura ka inuni na tatanui na agua marefa ni koro maka tanua na siosi ke fafariwoa rainia ne marefa nai taura na agua na fafagausuringainigi tangagamu gaa. Siana kamu kokoa afainira. ¹⁸ Ainuni na tautanu manga ngai gana ka oqani tagarafira ana mwa mereata mina Arafa o Kraes woi nai tagara tangaa ke marefa. Ngaira gana ka tatakosi rao mwa ka romani na woita maka tatamasi tangara ka inuni na tako magafuru ira ka fafagaqekaqekara rainigi. ¹⁹ Arani inuni ka rongogamu fato noga, woi igamu kena maka mu tautau woita iana ka Arafa. Mi inau kau wagewage wau rainigamu, namu tatanui na agua manga ngai ge. Inau kau oqanigamu woi mui takotako purua rai ka mwarao ni aera mina mwarao woi ni korokoro kamu takotako matafa rai. ²⁰ Imuri mo God ne mamafata rainia na marapefa ia ke wawategamu ka ramwofa rai fagaerisia ana nga ko Satan. Au fafagarafe woi na Arafa o Jisas ki korokoro tangagamu. ²¹ A tamaku nami tagai tatagara faku ka kasigi wau na tamasinga iga na wagefa iata gaa, o Timoti mo Lusias mo Jason, mo Sosipata na goaku ngai ge. ²² Inau nikao o Tosius makau kasi wau na tamasinga iga na wagefa gaa. Nga inau kau segea na leta kaa. ²³ - ²⁴ O Gaius make kanakanasiau wau mina siosi ne faku i ruma iana, ngaia make kasi wau na tamasinga iga na wagefa iana gaa. O Erastus, a mwane ne onoono isuri na sirani iana finua rafa kaa mina goaka nikao o Kotus karu kasi wau nikao na tamasinga iga na wagefa iataurua nikao gaa. ²⁵ Ai mafata rainia ka fagaakausinga iaka tangaa ko God, ingaia mwa ngaia kena ke gira fagaurasigamu ana nganganiaga iga na tangamworanifa iamiu i suria na tarofa koro nau tatamasia wau rainia ko Jisas Kraes ia. A rangarifa rainia na mwarao ne qani tao punufi wau noga mai inago igi. ²⁶ Hoi kina mataina kaa ki ngaia o God ne tafi tarai ia ke fagaregia fato noga rainia ka tamasinga iata na maurukari na segera igi. Make woi tangagia nikao woi nai tatamasia fura ka woita gaa ki mwarao maka arani finua kai tatangamworani rainia makai tautau woita iana. ²⁷ Hoi, rainia Jisas Kraes, igia ka gira fagaakausia ana tarai ke ngaia ne etagai o God ne girara wau. Amen.