Rangarifa

Rangarifa

¹ Ingaia na puka kaa ke taotao iga ka mwarao o God ne fagarea ko Jisas Kraes rainigi. Hoi mo Jisas Kraes ke gira rangari fura ana tangara ka kare iana ka mwarao ne mai worawora. Hoi make ke kasia mai ka enjel iana ke rao mai afainia ka tamasinga tangau ki inau o Jon na kare iana. ² Hoi ki inau kau segera ka arani mwarao nau regi, makau segera nikao ka woita mwora iana o God. Ingaia o Jisas Kraes ne woisia mai. ³ A wagefa tangara ka inuni ne totomania na puka kaa, mina wagefa tangara ka inuni na rongoa maka arao isuri na tamasinga gaa, suria na mataina tangai na mwarao gaa ne pagai mai worawora ke fagarangi aera mai noga. ⁴ Inau o Jon kau segesege wau tangagamu fato kigamu na inuni ina siosi ne epiu ia ina provins i Esia. “Inau kau fagarafe woi o God ki mafata rainia ka faikomanifa mina marapefa afainigamu. O God ke tao mai noga ia ki mai taotao ina mataina kaa, mina mataina ne pagai arao mai. Hoi naka ka faikomanifa mina marapefa ki arao mai tangagamu pania ka Figona ne epiu ia na uraura inagona na papa iana o God. ⁵ Naka ka faikomanifa mina marapefa ki arao mai tangagamu pania ko Jisas Kraes ne tatamasia mwora o God. O Jisas kena ka mwane nga inago ne tafi aporo mai pania na maefa, ke arafa tangara ka arani arafa i finua i ano kaa. Ingaia o Kraes kaa ke komanigia wau tefa, mi ngaia ke mae, ke afe ka gapuna, ke worigia aporo panigi ka arani aerafa iaka. ⁶ Ingaia ke ono sikifigia rai kare iana, make tanugia ki igia ka mai tao rai mwane ni raperapega tangai tagara tangaa ana ko God Emana. Igia kai kasia akau ko God makai fafagaakausia ka apena ramwofa rafa iana taraitarai. Amen. ⁷ Mui gigirara! O Jisas ke pagai aporo mai iga ka parauru gana, mina arani inuni fato ka rerea mi afainira nikao ka inuni na rupugia rainia na aora inago ira. Arani inuni fato i finua i ano kaa ka fafaitakoi maka angiangi, ina mataina na rerea iga ngaia. Aa, agua kaa ke pagai worawora. Amen.” ⁸ Arafa o God ke woi manga kaa, “Inau kaa kau fagainagota na arani mwarao mi inau ki murita na arani mwarao nikao, nau qani oga mai inago ia makau ogaoga ina mataina kaa, makau pagai aporo mai. Inau na God na faufugana.” ⁹ Inau kaa ka goamiu o Jon, nau rao suria na Arafa afainigamu, migia fato kai uraura nganganiaga, ke manga na fafagafafara apeka suria o Jisas ke Arafa tangagia. Inau kaa, ka kasiau iga ka kere marau i Patmos, suria nau tatamasia ka woita iana o God mina woita mwora rainia ko Jisas. ¹⁰ Hoi iga na tangiana iana na Arafa ia mina Figona Apuna ke rao mai tangau, makau rongoa aporo rao ka ringiringi imuriku, ne rongo rafaera wau manga na afuri ia ¹¹ ne tamasi manga kaa, “Arani mwarao no rera kui segera iga ka puka ne etagai, makui kasikasi rao tangara ka siosi ina finua rafa ne epiu igi, i Efesas, Smina, Pegamam, Taeataera, Sadis, Filadelfia mi Leodisia.” ¹² Hoi, makau apariri rai rea ana otai ngai ke ne tamasi mai tangau kana, makau rea wau mwa ka laet ne epiu ne uraura, na tangarafi rainigi na gol. ¹³ Hoi mi qaiawogata na laet gana kau rea ka inuni ne etagai ne qao manga na Kare ni Inuni ia make gafu rainia ka gafu ne qorafu wau ke wato ke sisinosino, make fogotainia ina aparagaimatona ka fogofogosina na tagarafia rainia na gol. ¹⁴ Afurufuru i qauna gana make siki wau manga na wul kee na auna niu ia mina maana kana ke totogatoga manga na giu ne wawatawata ia. ¹⁵ Auwana gana ke oraora manga na metere ne makaka ina apena giu rafa ia mina ringina kana ke rongo rafa wau manga na apeta na nawo rafa ira. ¹⁶ Make taura ka feegu ne epiu i rimana i otona, mina naefe ne maasi ruarua wau ke furafura mai pania ka farana, mina maana kana ke totogatoga manga na arito iga na gupuna rito wangana ia. ¹⁷ A mataina ngai ke nau rea rao kana makau apuri wato inagona na uwana manga na inuni ne mae ia make fatatagiau mai rainia ka rimana i otona make woi, “Siana rai maagufa! Inau kaa kau fagainagota na arani mwarao mi inau ki murita na arani mwarao nikao. ¹⁸ Inau kaa kau tafitafi! Inago kau mae, mina mataina kaa kau tafi aporo taraitarai. Hoi ki inau kau nafunia ka ramwofa tefaria na maefa, makau gira toraiara ana furu ka inuni pania ka agua ni maefa. ¹⁹ Ui segera nga ka arani mwarao no regi gaa, afainigi ka ani ne wora noga ina mataina kaa, mina ani ne pagai akau mai imurini na mwarao gaa. ²⁰ Igo ko regi ka feegu ne epiu nau taura i rimaku i otoku ia mina laet ne epiu na tagarafi rainigi na gol igi. Igo ke marefa nu tako matafa rai ka mwarao no regi gaa. Hoi nga na fagaararinga tangai ke gaa. A feegu ne epiu ira ka enjel ne epiu na onoono suri na inuni ina siosi ne epiu ira, mina laet ne epiu ira ka siosi ne epiu ira.”

¹ Hoi mina mwane ia ke tamasi mai manga kaa nikao, “Ui segesege rao tangaa ka enjel ne onoono surira na inuni ina siosi i Efesas, kui wowoi tangaa manga kaa, ‘Eka ka tamasinga pania na ani na taua i rimana i otona na feegu ne epiu ira make tataworagofa ina guputa na laet ne epiu na tagarafi rai na gol igi, ² Inau kau girara ka arani agua namu tanui afainia ka mwakomwoaganifa iamiu, mina maramarapeaganifa iamiu, makau giraragamu nikao woi igamu kena ke marefa namu oqanira ka inuni na arao suri na agua ne aera iata, makau giraragamu nikao woi namu ofongira ka inuni na woisira rai aposol maka mu rogoira woi na qaqangara mwa. ³ Inau kau girara nikao, nga igamu kena kamu ura nganganiaga wau nga, ne manga namu fafara suria namu tangamworani rainiau make marefa namu gira fere kasikasi ana. ⁴ Hoi mina mwarao mwa ne etagai ke marefa qai oqania afainigamu, inago kamu oqaniau wau mina mataina kaa ka faioqanifa iamiu ke sisitai wau nga. ⁵ Mui tatakosia aporo ka ogafa koro iamiu inago ia kamu riri aporo nga rai rao suri ana ka ogafa koro iamiu inago ia. Rao ke mamarefa namu riri aporo, hoi inau kau arao mai kau tawoa rao ka laet iamiu ia. ⁶ Hoi mina mwarao ne etagai namu tanua ne koro tefa wau nga ke manga kaa, igamu ke marefa namu oqanira ka agua na tatanui na ani na inuni na arao suria na fagausuringa iana na rurufa iana o Nikolaus, inau make marefa qai oqania nikao. ⁷ Otai mwa ne tonga karingana, maki rongora menamenai wau tangai ka mwarao ne wowoisi na Figona Apuna tangara na inuni ina siosi gaa. Tangara na inuni na tatangamworani raorao mwa tangaa na qotona na ogafa, inau kau fafagamarumungainia ka ngaua ka guana apenagai ne mafata rainia ka tafinga, ne uraura irarona romana mwou iana o God ia.’ ” ⁸ Hoi mina mwane ia ke tamasi manga ka nikao, “Ui segesege rao tangaa ka enjel ne onoono surira na inuni ina siosi i Smina, kui wowoi tangaa manga kaa, ‘Nga na tamasinga iaku ke e gaa, inau kaa kau fagainagota na arani mwarao mi inau ki murita na arani mwarao nikao. Inau kau mae mina mataina kaa kau tafi aporo fato noga. ⁹ Au girara woi na ogafa ma ni oto ke taugamu, hoi igamu ke ma ni tonga na nafuninga iamu, maake tonga nafuninga iamu wau i maana o God. Inau kau girara nikao ki tana inuni na woisira woi ngaira ka Jiu, ani inuni na wowogasia o God, make ngaira gena ka qaqangara mwa. Ngaira gena ka tamasi aerisigamu mwa make wowogasia mwa ko Satan. ¹⁰ Siana kamu mamaagutai ka arani mwarao ne arao mai tangagamu ke tanugamu kamu fafafara. Mu girara! Ataro ke pagai kasira ka tana inuni iga na fakunga iamiu mwa kena irarona peresin, make pagai ofofongigamu mina arani agua ni fagafafara apemiu ana gena ke arao suria ka tangafuru i tangiana ne etagai. Manga namu mworamwora tangau ke rao ke taua ka mataina namu maemae, inau kau mamafata rainia ka romana tafinga tangagamu. ¹¹ Otai mwa ne tonga karingana, maki rongora menamenai wau tangai ka mwarao ne wowoisi na Figona Apuna tangara na inuni ina siosi gaa. Tangara na inuni na tatangamworani raorao mwa tangaa na qotona na ogafa, ke marefa nai pagai maemae iga ka ruata na maefa.’ ” ¹² Hoi mina mwane ia ke tamasi manga kaa nikao, “Ui segesege rao tangaa ka enjel ne onoono surira na inuni ina siosi i Pegamam, kui wowoi tangaa manga kaa, ‘Nga na tamasinga iaku ke e gaa, inau kau nafunia na naefe ne masi ruarua ne masi wau. ¹³ Inau kau girara fato noga ka finua namu ogaoga iga kena. Nga o Satan ke nafunia ka ramwofa tangara na inuni gena mi ngaira ka nafuia funuia ko Antipas ne qani fagarongora rainiau raorao mwa. Manga namu ogaoga irarona i finua ne ogaoga iga o Satan migamu ke marefa namu fere kasi rai ka raronimworanifa iamiu rainiau. ¹⁴ Tana mwarao ne marefa qai oqania tangagamu ke gaa, tana inuni ka faganega noga rai rao suri ana ka fagausuringa iana o Belam. Ingaia kena ke woi tangaa inago mai ko Belak rai katokatora ana ka inuni i Israel tangai wotafa iga ka aerafa. Ngaia ke tanura ka ngaura ka ngaufa na qani suu wogasi tangara na nunuta na mwarao na wowogasira make fagaparura ka tatanui na agua ni oraoraga ana. ¹⁵ Nga natakena na mwarao na tatanui na tana inuni igamu kena ngai ke rai rao suri ana ka fagausuringa iana rurufa iana o Nikolaus. ¹⁶ Hoi mui ririri nga panigi ka aerafa iamiu fagaraia makau arao mai tangagamu kau mera fainafunafu ka inuni gaa rainia ka naefe ne masi ruarua ne furafura mai pania na faraku. ¹⁷ Otai mwa ne tonga karingana, maki rongora menamenai wau tangai ka mwarao ne wowoisi na Figona Apuna tangara na inuni ina siosi gaa. Tangara na inuni na tatangamworani raorao mwa tangaa na qotona na ogafa, inau kau wawatea ka tana manna ne tao punufi wau ke ngaua makau mamafata rainia nikao tangara faitigi ka guana fau siki ne etagai. Ingaia na fau kena ka segea iga ka ata faoru ne marefa wau na inuni ni girara rao. Ingaia mwa na inuni ne tawoa kena ke gigirara.’ ” ¹⁸ Hoi mina mwane ia ke tamasi manga kaa nikao, “Ui segesege rao tangaa ka enjel ne onoono surira na inuni ina siosi i Taeataera, kui wowoi tangaa manga kaa, ‘Nga na tamasinga iaku ke e gaa, inau i Karena o God ke kaa. Inau ne totogatoga na maaku manga na giu ne wawatawata ia mina uwaku ne oraora manga na metere ia. ¹⁹ Inau kau giraragamu fato noga. Igamu kamu komanira ka inuni maka mu tangamworani rainiau, maka mu tatamanira ka inuni maka mu maramarapeaga wau. Hoi ka tagaranifa iamiu ina mataina kaa ke tefaria nga ki inago ia. ²⁰ Hoi mina mwarao ne etagai ne marefa qai oqanigamu rainia, e kena namu tautau ringina ka Jesebel kena. Ingaia kena ke fafagaparu ke wowoi woi ingaia kena ki tana maurukari iana o God make mai fagaapurua ka kare iaku ka tatanui na agua ni oraoraga ana, maka ngaura ka ngaufa na suu wogasi rai na nununa na mwarao na wowogasira. ²¹ Inau kau watea ka mataina rai riri aporo ana panigi ka aerafa iana gena, maake marefa wau ni oqani riri aporo ana. ²² Hoi inau kau pagai wawatea ka apena matoroa rafa nga. Hoi rao ke marefa nai orisi ka takofa iata kai ririri panigi ka rangaranganifa afainia, au fafagaetangira ka inuni gena ka fafafara tefa wau. ²³ Ingaira na rao isuria na fefene kaa makau nanafuira funuira ka maemae. Hoi ki na mataina ngai ke na mina arani siosi ka onoono girara woi inau kau ono girara ka mangatata fato mina takofa iata na arani inuni, makau orisia aporo tangagamu faitigi ka arani agua namu tanui. ²⁴ Hoi mi tangagamu fato igamu i Taeataera ne marefa namui rao isuria na fagausuringa aera ia make marefa namu girara na agua na fauatana rainia na ‘A takofa pupunufi iana o Satan’, hoi marefa qai wawategamu ka mwarao ni pagai asaasa kamui arao suria. ²⁵ Igamu kamui tautau nganganiaga mwa iga ka tangamworanifa namu nafuni fato noga gena, raorao mwa ki taua ka mataina nau aporo mai. ²⁶ Tangara na inuni na tatangamworani raorao mwa, maka tautau woita iaku raorao mwa ke taua na qotona na ogafanata, inau kau wawatera ka ramwofa rai ono surira ana ka inuni ina arani finua i ano kaa. ²⁷ ‘Hoi mi ngaira ka rararamwofaga wau mataina na ono surira na finua gena, ka fafagaerisi wau ka ramwofa iata manga na ratana kaokao na gira pangia ana rao ia.’ Suria na ramwofa nau mafata rainia tangara gaa, ke faiaworagi mwa afainia ka ramwofa ne mafata rainia tangau emaku ia ²⁸ makau pagai wawatera nikao ka Feegu ni Tangi. ²⁹ Otai mwa ne tonga na karingana maki rongora menamenai wau nga ka mwarao ne wowoisi na Figona Apuna tangara na inuni ina siosi gaa.’ ”

¹ Hoi mina mwane ia ke tamasi manga kaa, “Ui segesege rao tangaa ka enjel ne onoono surira na inuni ina siosi i Sadis, kui wowoi tangaa manga kaa, ‘Nga na tamasinga iaku ke e gaa, inau na ani nau nafunia na Figona ne epiu iana o God mina feegu ne epiu ia. Inau kau girara ka tagaranifa iamiu, mina arani inuni ka woi namu tafitafi maungagamu, maaka mu mae fato noga. ² E arari noga ka maurufa! Mui fafagagatani ka kere mwarao namu nafuni maungai gena makai kafu maemae funu wau nga. Inau kau rogoia ka tagaranifa iamiu ne marefa ni ofu i maana God iaku. ³ Tatakosi mwa ka mwarao na fagausurigamu rainigi ira maka mu rongora. Mui arao suria maka mui ririri aporo panigi ka aerafa iamiu. E rao kamu mauru maunga, inau kau arao mai tangagamu manga na fanagoa ia make marefa nikao mu gigirara ka mataina nau arao mai. ⁴ Hoi mina guata mwa na inuni i Sadis na ono suri na gafu iata ke siki mwa. Ingaira gena ka gafugafu siki ka tataworagofa faku afainiau suria ngaira gena ka arari wau nga. ⁵ Ingaira na inuni na tatangamworani ke taua ka qotona na ogafanata, ka gafugafu siki manga gaa, make marefa nikao qai pagai fufunuira rao ka atata pania ka puka ni tafinga ia. Hoi, mi i maana Emaku mi maana enjel iana, inau kau wowoisira fura woi ngaira gena ka kare iaku nga. ⁶ Otai mwa ne tonga na karingana maki rongora menamenai wau nga ka mwarao ne wowoisi na Figona Apuna tangara na inuni ina siosi gaa.’ ” ⁷ Hoi mina mwane ia ke tamasi manga kaa, “Ui segesege rao tangaa ka enjel ne onoono surira na inuni ina siosi i Filadelfia, kui wowoi tangaa manga kaa, ‘Nga na tamasinga iaku ke e gaa, inau na ani nau apuna makau mworamwora raorao mwa ia makau nafunia ka kii manga na kii iana o Deved ia. Hoi ka mataina nau tatafangia na purupuru kena ke marefa ko otai ni gira puruia aporo ana, mina mataina nau pupuruia ke marefa ko otai ni gira tafangia aporo ana nikao. ⁸ Inau kau girara ka tagarafa iamiu, makau giraragamu igamu kena kamu nafunia ka kere ramwofa sisitai wau, maka mu arao suri mwa ka fagausuringa iaku maka mu mworamwora raorao mwa tangau. Hoi inau kau tafangia noga taramiu, ne marefa wau ko otai ni gira purui aporo ana. ⁹ Mui girara! A kare iana o Satan ka fafagaparu ka wowoi ingaira gena ka Jiu ira, make marefa. Inau kau tanura ka arao mai ka totopigai qau tangagamu, mi ngaira ka kafu gigirara woi inau kau komanigamu. ¹⁰ Hoi suria igamu kena kamu arao suri mwa ka tamasinga iaku maka mu ura gatagata, inau kau onoono surigamu panigi ka arani fafaranifa ne arao mai tangaa na finua fato ina ano kaa, rai ofongira ana ka arani inuni gena. ¹¹ Marefa ni qorafu wau makau arao mai. Mui tautau nganganiaga rai ka tangamworanifa iamiu, make marefa ke tana inuni ni mai tawoa panigamu ka romana worimiu kena. ¹² Otai mwa ne tatangamworani ke taua na qotona na ogafanana, inau kau tanua ke manga na auu ne ura nganganiaga ina Ruma ni Wogasifa iana God iaku, maka ogaoga tarai gena. Inau kau segera iga ka atana o God iaku mi ‘Jerusalem Faoru’ na atana na finua rafa iana o God iaku ne pagai kasia wato mai o God iaku pania i Heven, makau pagai segea nikao ka ataku faoru iga ki ngaira. ¹³ Otai mwa ne tonga na karingana maki rongora menamenai wau nga ka mwarao ne wowoisi na Figona Apuna tangara na inuni ina siosi gaa.’” ¹⁴ Hoi mina mwane kaa ke tamasi manga kaa, “Ui segesege rao tangaa ka enjel ne onoono surira na inuni ina siosi i Leodisia, kui wowoi tangaa manga kaa, ‘Nga na tamasinga iaku ke e gaa, inau kau mwora wau nga, nga inau kau tatamasia mwora rai fafagaqao ana rai ka taufa iana o God. Arani mwarao ne fagaworai o God ke faganega mai paniau. ¹⁵ Inau kau girara ka tagaranifa iamiu, igamu kena ke marefa namu mafana make marefa namu magamagarisi. Hoi maki koro mwa woi namu mafana kee namu magamagarisi wau ka mwa ki koro wau tangau. ¹⁶ Hoi suria igamu kena kamu tau ruarua ke marefa namu mafana maaka mu magamagarisi wau kena, inau kau mimisu rainigamu fura pania ka faraku. ¹⁷ Igamu kamu woi namu tongani rurugua wau, maka mu nafuni fato noga ka arani mwarao namu oqani. Hoi make marefa namu girara woi na ogafanamiu ki aera. Igamu kena ke marefa wau mu togoani rurugua mina maamiu ke guru tapuru maka mu rupa tori. ¹⁸ Au wowoi tangagamu wau, mui mai woria paniau ka romana gol kamu kafu totogoani rurugua, maka mui woria ka gafu siki paniau kamu gafugafu rainia ki siana kamu mamaaki rai ka apemiu ne rupa tori gena, maka mui woria nikao ka marasini paniau tangai naka ana i maamiu kamu onoono koro. ¹⁹ Ingaira na inuni nau komanira kau gira tamasi rafa ana tangara makau gira fagaetangira ana nikao. Hoi mui rarapasigamu maka mui riri aporo panigi ka aerafa iamiu. ²⁰ Mui rongorongo! Inau kau uraura ina maana ruma makau kokorekore. Otai mwa ne rongoa na ringiku make tafatafa taraku kau qau qanu tangaa i ruma iana kami ngaungau faku. ²¹ Ainuni ne tatangamworani ke taua ka qotona na ogafanana, inau kau pagai fafagaogasia ke onoono i suri afainiau, suria nga inau kau tangamworani ke taua ka qotona na ogafanaku, makau oga noga kau onoono i suri afainia Emaku kaa. ²² Otai mwa ne tonga na karingana maki rongora menamenai wau nga ka mwarao ne wowoisi na Figona Apuna tangara na inuni ina siosi gaa.’ ”

¹ Imurina mai na arani mwarao gaa, makau rea ka purupuru i Heven ne tafatafa. Hoi mina ringiringi ne tamasi mai tangau inago ia ne rongo rafa wau manga na afuri ia ke tamasi mai manga ka tangau nikao, “Ui akau mai gaa, qai fagarego rainigi ka mwarao marefa ni qorafu wau make mai worawora.” ² Hoi nga na mataina mwa ngai ke na mina Figona Apuna ke qanufiau, makau rea ka papa iana na Mwane Rafa ne etagai ne taotao i Heven, mina ainuni ne etagai ke kokoa iga. ³ Hoi na ainuni ne etagai ne kokoa iga na papa iana na Mwane Rafa ia kau regi rao ka maana ne mawe manga na togatoga ana na arito ia. Hoi mi rifuia na papa kena, kau rea nikao ka rorowagaro ne qao manga na asi puru ia. ⁴ Hoi rifuia na papa iana na Mwane Rafa ia ka tana papa nikao na tangafurua ne erua matara efai (24) ke taotao gena, mina mwane rafa na tangafurua ne erua matara efai kau rera na kokoa iga ka papa igi, ngaira ka gafu siki maka nafuni roqoroqo ni qau na tagarafi rainigi na gol. ⁵ Hoi iga na papa iana na Mwane Rafa ia ke mamarangaia make gugugurufia. Hoi mina laet ne epiu manga na mangate ia ke tarau inagona na papa iana na Mwane Rafa ia ingai gi gena ka Figona ne epiu iana o God. ⁶ Hoi mi inagona nikao na papa iana na Mwane Rafa kaa, ka mwarao manga na asi ia ne togatoga wau manga na potere ia. Hoi a mwarao ne efai ne tonga manawata ira, ka ura rifuia ka papa iana na Mwane Rafa ia. Ingaira gena ke rako wau ka maata inagota mi murita. ⁷ Ingaira na mwarao ne efai ne tonga manawata gaa, ka ani ne qainago mai kana ke qao manga na laeon ia mina ruata ke qao manga na puruka ia mina aoruta ka maana gana ke qao manga na inuni ia mina faita ke qao manga na kaakaa ne gagafa ia. ⁸ Ingaira na mwarao ne efai ne tonga manawata ira ka nafuni ka gaparata ne eono faitigi mina maata ke wonusi wau ka apeta mina rugufanana na gaparata gena. Hoi iga na arani tangiana mina qongiana marefa nai pagai mamaro rai woi ana, “Apuna, Apuna, Apuna, Arafa God na faufugana. Ingaia ne qani oga mai inago, mina mataina kaa, make pagai arao mai nikao.” ⁹ A mwarao ne tonga manawata ira ka fafagaakausia, maka wowogasia, maka tatangasia ingaia ne ogaoga iga na papa ia ne tafitafi tarai ia. ¹⁰ Hoi mina mataina kena mwa a mwane rafa na tangafuru ne erua matara efai ira (24) ka qogurai uwa inagona na Mwane Rafa ne tafitafi tarai ne kokoa ina papa iana ia mina mataina na wowogasia kena mi ngaira ka nakai wato ka roqoroqo ni qau na tagarafi rai na gol iata ira inagona na papa iana na Mwane Rafa ia maka wowoi, ¹¹ “Arafa God iaka, A ramwofa iamu ke tefa. Arani inuni kai fafagaakausigo makai wowogasigo. Nga igo ko fagaworai fato na arani mwarao gaa. Hoi iga na mataina kaa arani mwarao ke wora mai suri ka faioqanifa iamu.”

¹ Hoi makau rea rao ka pepa ne qorafu na aria ne taua i rimana i otona na Mwane ne kokoa ina papa iana na Mwane Rafa ia maka sege irarona mi murisigana, maka puruia rainia nga ka puru ne epiu. ² Hoi makau rea nikao ka enjel ne ramwo wau ne tamasi ngerengere tangara na inuni manga kaa, “Otai ke araria rai iria ana na pepa ne qorafu na aria kaa, make gira sikifi ana rao na puru iga gana pania?” ³ Make marefa wau ka fitangita na inuni i Heven, kee ina ano kaa, kee irugufanana na mwako ni gira iria ana na pepa kena, kee ni gira qore ana irarona. ⁴ Hoi makau angi wau nga, suria ne marefa nai rogoia ka inuni ni arari rai iria ana ka pepa na aria ia kee ni qoreqore irarona. ⁵ Hoi mi tana fitangita na mwane rafa ira ke woi tangau mai, “Siana rai angifa, o girara! Nga na Laeon na Mwane Rafa ne raramwofaga wau pania na waro ni inuni iana o Jiuda, mi ngaia kena ke worawora iga o Deved kaa, ingaia kena ke tangamworani ke taua ka qotona na ogafanana. Hoi ngaia ngai ke ne gira sikifi rao ana na puru ne epiu ia make gira iria ana na pepa na aria kaa.” ⁶ Hoi makau rea rao ka Karena Sip ne uraura ina gupuna papa iana na Mwane Rafa ia. Mina mwarao ne efai ne tonga manawata ira mina mwane rafa ira ka ura rifuia. A Karena Sip kana ke qao manga ne mae fato noga ia make tonga aisipa iana ne epiu mina maana ne epiu. Ingai gi gaa ka Figona ne epiu iana o God ne kasira fura suria na finua fato ina ano kaa. ⁷ A Karena Sip ia ke rao make tawoa ka pepa na aria ia pania ka rimana i otona na Mwane Rafa ne kokoa ina papa iana ia. ⁸ Hoi a mataina ne tawoa rao na pepa na aria ia mina mwarao ne efai ne tonga manawata ira mina mwane rafa na tangafuru ne erua matara efai ira (24) ka qogurai uwa wato inagona na Karena Sip ia. Ingaira fato gena ka taura ka kita mina apira na tagarafi rainigi na gol na fagawonusu rainigi ka mangate. Ingai gi gaa ka fagarafenga iata na inuni na apuna tangaa o God, ⁹ maka kiuria ka kiu faoru ne rao manga kaa, “Igo ko araria rai tawoa ana ka pepa na aria ia mako sisikifi rao ka puru iga igi ke tatafatafa, Suria igo ka nafuigo funuigo, Ki iga na gapumu igo ko worira fura tangaa ko God ka inuni pania na arani waro ni inuni, mi pania na arani tamasinga fiufiutaga, arani finua rafa mina arani inuni faifaitigi. ¹⁰ Igo ko tanura ki ngaira ka mai tao rai mwane ni raperapega rai tagara ana tangaa ko God, mi ngaira ka pagai onoono surira ka inuni ina ano kaa.” ¹¹ Hoi au rao kau ono wau, makau rongoa nikao ka ringita na arani enjel, ingaira gena ka tangafuru i qera mina qera (10,000+), maka rako miru wau nikao (1,000,000+), na mai faku rifuia ka papa iana na Mwane Rafa ia afainira nikao ka mwarao ne efai ne tonga manawata ira mina mwane rafa ira, ¹² maka kiukiu rafa wau manga kaa, “Igo na Karena Sip, na nafuigo funuigo kena, E arari nui Arafa, Mina ogafa koro tangago, O tako matafa, mako raramwofaga wau nga. E arari nai takotako fagaakaufigo, ai kasigo akau, makai fagaakausigo.” ¹³ Hoi makau rongora ka arani mwarao fato i Heven mina ano kaa, mi rugufanana na mwako, mi irarona fato na asi kana, na kiukiu manga kaa, “Ani ne ogaoga ina papa kena, mina Karena Sip kena, Kami fafagaakausigamurua nga, Maka mi takotako fagaakaufigamurua, Makami kasigamurua akau. Igamurua ka Arafa iamami tarai tarai.” ¹⁴ Ingaira na mwarao ne efai ne tonga manawata ira ka arami ka wowoi, “Amen.” Mina mwane rafa na tangafuru ne erua matara efai ira (24) ka qogorai uwa wato maka wowogasia.

¹ Hoi makau rea ka Karena Sip ne qotagia ka ani inago na puru ne epiu igi ke tafangia, makau rongoa ki tana fitangita na mwarao ne efai ne tonga manawata ira ne tamasi mai ke rongo manga na gugurufia ia ke woi manga kaa, “Ui fura mai!” ² Inau kau ono wau, makau rea ka hos ne siki, mina mwane ne tage i gairina kana ke taua ka aipage, mo God ke watea ka roqoroqo ni qau na tagarafia rainia na gol rai naka ana i qauna. Ingaia ne tage i gairina na hos ia ke manga na ramwo, ne arao rai kamarira ana na maerongana ira. ³ Hoi mina Karena Sip ia ke qotagia nikao ka ruata na puru igi ke tafangia, makau rongoa ka ruata na mwarao ne tonga manawata ira ne woi manga kaa, “Ui fura mai!” ⁴ Makau rea ka hos ne memeraga ne fura mai, mina mwane ne tage i gairina kana ka watea ka ramwofa rai tanura na inuni ina ano kaa kai fafainafunafu mereata mwa ka maemae. Ingaia ka watea ka apena naefe rafa rai fainafunafu ana. ⁵ Hoi mina Karena Sip ke tafangia ka aoruta na puru igi, makau rongoa ka aoruta na mwarao ne tonga manawata ira ne woi manga kaa, “Ui rao mai!” Au rao kau ono wau, makau rea ka hos ne masusuri ne fura mai, mina mwane ne tage i gairina kana ke taua ka sikele. ⁶ Hoi makau rongoa ka ringiringi manga ne tamasi mai mwa panira ka mwarao ne efai ne tonga manawata ira, ne woi manga kaa, “A woria ana na ngaufa ke akau wau ka maena. A maena na tangiana fagaenani ne etagai ke pagai arararia mwa ka sosa ne etagai na flaoa, kee ne rao ke manga na bali, e pagai arararia mwa ka sosa ne oru. Siana rai fagaerisi ana ka oel mina waen.” ⁷ Hoi mina Karena Sip ia ke tafangia nikao ka faita na puru igi, makau rongoa ka faita na mwarao ne tonga manawata ira ne woi manga kaa, “Ui rao mai!” ⁸ Au rao kau ono wau makau rea ka hos ne qao aera wau ka apena ne manga ne qani mae ia mina mwane ne tage i gairina kana ka fauata na rainia ko ‘Maefa’, mina tana ani ne arao mai mwa suria kena ka fauatana rainia ki ‘Hades’, na agua iata na inuni na mae fato noga. Hoi ingairaurua gena ke mafata rainia tangaraurua ko God ka ramwofa rai mia fainafunafu ana ki tana apanana na inuni ina ano kaa, ka nanafu ira rainia ka naefe ne masi ruarua, mina magaua ke arao mai, mina riunga aera ke arao mai mina mwarao na wasiwasiga. ⁹ Hoi mina Karena Sip ia ke tafangia nikao ka rimata na puru igi, makau rea ka meona maurifata na inuni na kokoa irugufanana raperape. Ingaira gana ka nafuira funuira suria na tarofainia ka woita iana o God maka tatamasia ka raronimworanifa iata rainia ko God. ¹⁰ Ingaira ka ngerengere rafa wau ka wowoi, “Faufugana Arafa no apuna mako mwora wau! Nakaita ko kafu fafagagetara na inuni ina ano kaa, mako fafagaetangira suria na nafuigami funuigami ira?” ¹¹ Ingaira gena ka mafata rai ka gafu siki faitigi tangara, maka woi tangara nai mamaro noga sisitai. Tana inuni na goata na tagara nikao tangaa o God, ka rao ka nanafuira funuira fato wau nga manga na qani nafuira inago ira. Hoi ka mataina ne fafagaararia ke taua ke efita na inuni na mae gena ne fatofato, hoi mo God ke fafagaetangira ka inuni ina ano kaa. ¹² Hoi makau rea ka Karena Sip ia ne tafangia nikao ka aonota na puru igi, mina nunu ke rao mai ke mwangiungiu wau, mina arito ke marefa ni gira sinafa ke rotorotoaga wau manga na gafu masusuri ia mina fagaifa ke orisi ke memera wau manga na gapu magafuru ia ¹³ mina feegu ina wawaiaro gana ka afasu wato mai ina ano kaa manga na guani na gatoga ne rogasi na roga rafa ke wowota igi. ¹⁴ A wawaiaro kana ke marefa rao mwa manga na pepa na aria ia. Mina arani fungani mina arani marau fato ka guru panigi ka nanata. ¹⁵ Arani arafa ni finua i ano kaa mina arani arafa na onoono isuri afainira ka mwane na qaqainagoni na faisutasuta ana mina ainuni ne tonga na anga ni faaga afainira ka inuni na ramwo wau mina arani inuni wau mwa nikao afainira ka inuni na tatagara purua mwa ira mina inuni ne taraganisira ka aqaaqa iga ka waqa mina rugufanani na fau rafa ina fungani. ¹⁶ Ingaira ka ngerengere tangai ka fungani mina fau rafa gana ka wowoi, “Mui apuri mai afurigami kamu punufigami pania ka maana o wani ne kokoa iga na papa iana kana mina mangariaganifa iana na Karena Sip kana! ¹⁷ A tangiana ni maagutainia ana na fagaetangifa ke mataro mai noga kaa, ko otai ke mimia faisuuara?”

¹ Imurini mai na arani mwarao gaa makau rera ka enjel ne efai na ura tongani ka qotona ano kaa ne efai igi. Ingaira gena ka ura pusia wau nga ka roga ne efai ina ano kaa ira ke marefa wau nga ni girara rogasia ana ka ano kaa mina arani apenagai mina asi kana. ² Hoi makau rea ki tana enjel ne faganega ke akau mai pania ka agua ne akau iga na arito ia afainia ka mwarao ni fagaararira ana rainia na kare iana o God ne tafitafi ia. Ingaia na enjel ia ke ngere rafa wau tangara ka enjel ne efai ne watera fato noga o God na ramwofa rai fagaerisia ana na ano kaa mina asi kana ia. ³ Ingaia na enjel ia ke woi, “Siana noga kamu fafagaerisia ka mwako kaa mina apenagai mina ka asi kana, maka mui nanasi noga ke rao ke taua ka mataina nau fafagaararira fato na kare iana o God iaka rainia na segesegefa i raeta.” ⁴ Hoi makau rongoa fato noga ke efita nai inuni na fafagaararira rai kare iana ne segera fato noga na raeta, ke akau nga ke taua ka tangarau ne etagai mina tangafuru ne efai matara efai na qera (144,000) ni inuni. Ingaira gana fato ka rao mai pania ka tangafuru ne etagai matara erua na waro ni inuni i Israel ira. ⁵ A tangafuru i qera matara erua (12,000) ki na waro ni inuni iana o Jiuda, A tangafuru i qera matara erua ki na waro ni inuni iana o Ruben, A tangafuru i qera matara erua ki na waro ni inuni iana o Gad, ⁶ A tangafuru i qera matara erua ki na waro ni inuni iana o Asa, A tangafuru i qera matara erua ki na waro ni inuni iana o Naftali, A tangafuru i qera matara erua ki na waro ni inuni iana o Manase, ⁷ A tangafuru i qera matara erua ki na waro ni inuni iana o Simion, A tangafuru i qera matara erua ki na waro ni inuni iana o Livae, A tangafuru i qera matara erua ki na waro ni inuni iana o Aesak, ⁸ A tangafuru i qera matara erua ki na waro ni inuni iana o Sebiulan, A tangafuru i qera matara erua ki na waro ni inuni iana o Josep, Mina tangafuru i qera matara erua ki na waro ni inuni iana o Benjamin. ⁹ Imurini mai na mwarao gaa, kau ono wau makau rea ka apena rurufa rafa ni inuni ne marefa wau ka inuni ni girara tomanira fato ana! Ingaira ka rao mai panigi ka arani finua rafa, arani waro ni inuni, arani inuni faifaitigi mina arani tamasinga fiufiutaga, maka mai ura fato inagona na papa iana na Mwane Rafa mina Karena Sipi ia. Ingaira ka gafu siki qorafu maka taura i rimata ka afani na niu. ¹⁰ Ngaira ka ngerengere rafa wau ka woi manga kaa, “O God iaka ne ogaoga iga na papa iana ia afainia na Karena Sip karu fafagatafigia!” ¹¹ Ingaira fato na arani enjel ka ura rifuia ka papa iana na Mwane Rafa ia afainira ka mwane rafa mina mwarao ne efai ne tonga manawata ira. Ingaira fato nga maka qoqogu rai uwa ka aqaa wato inagona na papa ia maka wowogasia ko God, ¹² ka wowoi, “Aa ne mwora ngai ke! Mi fagaakausigo, mi wogasigo o God iamami, Mi tangasigo suria no girara wau, mi igo God ka faufugana na ramwofa tarai tarai! Amen!” ¹³ Hoi mina tana fitangita na mwane rafa ira ke fagateau, “Otai ngai ge na inuni na gafu siki qorafu gana mi fai ngai gana na rao mai pania gana?” ¹⁴ Inau kau aramia kau woi, “Marefa qai girara na mwane rafa. Nga igo ko girara.” Hoi make woi tangau mai manga kaa, “Ngaira na ainuni gena ka raofi mai ka agua ni fafaranifa rafa. Ingaira gena ka wasira ka gafu iata ke siki wau nga rainia ka gapuna Karena Sip ia. ¹⁵ Nga ngai ke ngaira gena na uraura inagona na papa iana o God rai wogasia ana irarona Ruma ni Wogasifa iana iga ka tangiana mina qongiana. Mi ngaia na Mwane Rafa ne kokoa iga na papa ia ke onoono surira menamenai wau. ¹⁶ Ingaira ke marefa nai pagai magau kee ni pagai mamata ka riota, minga ke marefa ka arito kee tana mwarao wau mwa ni pagai mafanasira nikao. ¹⁷ Suria ingaia na Karena Sip ne kokoa ina gupuna na papa iana na Mwane Rafa ia ke onoono surira manga na mwane ne ono surira na sipi iana ira, make totoraira tangai ka wai afeafe ne mafata rainia na tafinga. Hoi mo God ke pagai tatarofi rao ka tawoni na maata panira.”

¹ A mataina na Karena Sip ia ne tafangia rao na piuta na puru igi mi Heven ke aromuniaga suria ka mataina sisitai mwa. ² Hoi makau rera ka enjel ne epiu na ura inagona o God, maka watera rai afuri ne epiu maka taura. ³ Mi tana enjel ne taua na sosa na tagarafia rainia gol na fafanunu iga na mangate igi, ke rao mai make mai ura ina raperape ia. Ingaia ka watea ka arani mangate na fanunu ke sigini koro wau rai fagafakura ana afainigi ka fagarafenga iata na arani inuni na apuna tangaa o God make sungi iga ka raperape na tagarafia rainia na gol ne uraura inagona na papa iana na Mwane Rafa ia. ⁴ Hoi asuasuni na mangate ne sigini koro wau igi ke akau afainigi ka fagarafenga iata na inuni na apuna tangaa o God ira pania ka rimana na enjel ia ke akau ka taua ko God. ⁵ Imuri mai mina enjel ia ke tawoa ka sosa na fafanunu iga na mangate igi make fagawonusia rainia ka giu ina raperape ia make arifatainia wato mai ina ano kaa. Hoi mina rongo rafa ana ke rao mai, a marangia, a gugurufia mina nunu ke ngiungiua ka ano kaa nikao. ⁶ Hoi ina mataina kaa, ka enjel ne epiu na taura na afuri ira, ka nanau noga rai ufira ana. ⁷ Ua mina enjel ne qainago ia ke ufia ka ani iana na afuri, mina aesi mina giu ne faitora afainia na gapu ka meria wato mai i ano kaa. Hoi apanana fagaenani na finua i ano kaa ke rata wau nga, mina apanana fagaenani ne rata ia ke tete wau ka apenagai iga mina afani na raaua marawarawa iga gena ke tete wau nikao. ⁸ Hoi mina ruata na enjel ke ufia nikao ka ani iana na afuri, mina mwarao manga na apena fungana rafa ne rata rainia na giu ka arifatainia wato i asi kana. Mina asi kana ki tana apanana fagaenani ke orisi rai gapu. ⁹ Mina meona na mwarao i asi gana iga na agua ia ka mae fato mina faka nikao gena maka aera wau nga. ¹⁰ Imuri mai nikao mina aoruta na enjel ke ufia ka ani iana na afuri, mina apena feegu rafa ne sinasina manga na mangate ne wawata ia ke afasu mai pania ka wawaiaro kana, make wota furi ki tana apanani na wai mina qaurungani na wai afeafe. ¹¹ Atana feegu kana ka woisia rainia ka “Mafai wau.” Arani wai ne wota furi na feegu igi ke orisi ke mafai, mina inuni na tonomi na wai igi ka maesi suria ne mafai wau. ¹² Hoi mina faita na enjel ke ufia nikao ka ani iana na afuri, mi tana apanana na arito kana ke gasuga mwa minga ke mae, mina fagaifa nikao mina arani feegu fato ke mae ki tana apanani. Ngatakeni nga na mawefanani igi ke fagafatongi ki tana apanani ne rotorotoaga ka togafanani. Hoi iga na tangiana ki tana apanani ke marefa ni sinasina mi tana apanani ki iga na qongiana. ¹³ Au ono wau makau rongo akau ka kaakaa ne gagafa noga ina qaiawoa kana ne ngere rafa wau ke wowoi, “E aera wau! E aera wau! E pagai aera wau ngaia tangara ka arani inuni na ogaoga i finua ina ano kaa, ka mataina na rongoa iga na afuri na pagai ufira na enjel ne eoru ira.”

¹ Ua, mina rimata na enjel ke ufia nikao ka ani iana na afuri, makau rea ka feegu ne wota mai pania na wawaiaro kana ke wato mai ina ano kaa. Ingaia na feegu kaa, ke watea ka kii tangaa na Kokoro Rafa ne kokone wau ia. ² A feegu ia ke tafangia ka Kokoro Rafa ia mina asuasu ke fura mai iga manga na asuasuna apena giu rafa ia. Asuasu kena ke roqo wau pusia ka arito ne sinasina ia mina qaiawoa kana make rotorotoaga mwa rainia ka asuasu ne fura mai pania na Kokoro Rafa ia. ³ Hoi mina site ora ka wato mai ina ano kaa pania ka asuasu ia maka watera ka ramwofa manga na ramwofa iata na kerekere matanga igi. ⁴ Ingaira na site ora ira ka woi tangara ke marefa nai fafagaerisi ka raua mina apenagai kee tana mwarao wau mwa, maka gira fagaerisira ana mwa ka inuni ne marefa nai nafunia na segesegefa iana o God i raeta. ⁵ Ingaira na site ora gaa ke marefa nai fagamarumungainira kai nanafuira funuira ka inuni gaa maaka fafagamamasiaga apeta mwa suria ka fagaifa ne rima. A faranga rainia na site ora gaa ke faraera wau manga mwa na faranga rainia na kerekere matanga ia. ⁶ Irarona na fagaifa ne erima kana ki ngaira na inuni gaa ka garigari tangaa ka mwarao woi nai maesi make marefa nai gira rogoi ana. A oqania wau nai maemae mina maefa ke gawagawa mwa panira. ⁷ Mi ngaira na site ora gena kau rera na qao manga mwa na hos na nanau rai fainafunafu ana ira. A qauta gana ke tao iga ka mwarao manga na roqoroqo ni qau na tagarafi rai na gol igi, mina maata gana ke qao manga na maata na inuni igi. ⁸ A furufuru gani na qauta gana ke suru wau manga na fefene ira mina riwota ke qao manga na riwota na laeon igi. ⁹ Ingaira ka naka ina aparagaimatota ka mwarao manga na aeani igi, mina awaawaana gaparata ke rongo rafa wau manga na meona na hos ne okera na qea ina mataina ne taritari mafarufaru tangaa na fainafunafu ana ia. ¹⁰ Ingaira nikao make tonga kereta mangara na kerekere matanga ne tao i kereta na agua ne taketake rainia ia nga iga na kereta gana ke tao iga ka ramwofa rai fagamamasiaga apeta ana ka inuni gaa suria ka fagaifa ne rima. ¹¹ Ingaira gana ka nafunia ka mwane rafa iata ne onoono surira. Ingaia ne onoono suria na Kokoro Rafa ia ka mwane rafa iata. Iga na tamasinga iata na Hibru ka fauatana rainia ka ‘Abadon’, mi iga na tamasinga iata na Grik ka fauatana rainia ‘E Fagaerisira’. ¹² Nga na faganegana na fafaranifa ngai ke ne tefa noga rao kaa, mina ani ne erua ke mamaunga naru arao mai gana. ¹³ Hoi mina aonota na enjel ke ufia nikao ka ani iana na afuri, makau rongoa ka ringiringi ne tamasi mai ina qotona ne efai na raperape na tagarafia rainia na gol ne ura inagona o God ia. ¹⁴ A tamasinga ia ke tamasi tangaa ka aonota na enjel ia “Ui rupasira ka enjel ne efai na rakura ina wai afeafe Iufretis ia!” ¹⁵ Mina aonota na enjel ia ke rupasira ka enjel ne efai ira ka nanau mwa rai nafuira ana ka apanana fagaenani na inuni ina ano kaa. Ingaira na enjel ne efai gaa ka qani nanau mai maka nanasia rao mwa ka mataina mwa iga na tangiana kena ni arao mai. ¹⁶ Hoi maka fagarongoau rainia ki ngaira fato na mwane ni fainafunafu ana ina gairita na hos gena, maki ngaira fato ke akau nga ke taua ka tangarau ne erua na miru (200,000,000). ¹⁷ A hos mina mwane na tage i gairita nau rera ka qao manga gaa, ingaira ka naka pusi ina aparagaimatota ka mwarao na tagarafia rainia na metere na memeraga manga ne karekarega ni siwi, ramaramaga, make rararani torakaga. A qauta na hos gana ke qao manga na qauta na laeon igi. Mi farata gana ke furafura mai iga ka giu, asuasu mina guana fau na salfa. ¹⁸ I tana apena apanana fagaenani rafa na inuni ina ano kaa ka maesi ka giu, mina asuasu mina guana fau na salfa na fura mai i farata na hos igi. ¹⁹ A ramwofa iata na hos gena ke tao i farata mi kereta. A kereta gana ka qao mangara na mwaa ira mina qauta na mwaa gana ka gira fagaerisira ana rainira ka inuni. ²⁰ Hoi ingaira na inuni ne marefa nai mae iga na mamasiaganifa gena, ke marefa nai oqani riri ana panigi ka mwarao na tagarafi mereata igi. E marefa nai fato rai wogasira ana ka ataro kee na nununi na mwarao na wowogasi na tagarafi rai na gol, silva, bras, aguani na fau kee na apenagai. A mwarao ne marefa wau nai gira onofa kee nai rongorongo kee nai tataworagofa ira. ²¹ E marefa nikao nai tako orisi panigi ka nafu ira ana na inuni kai maemae maka fafaikuasi, maka tatanui ka agua ni oraoraga ana, maka fafanago.

¹ Hoi makau rea ka faufugana na enjel ne wato mai pania ki Heven. Ingaia ke roqofia rainia ka roto, mina rorowagaro ke rifuia ka qauna. A maana gana ke qao manga na arito ne sinasina ia mina uwana ne erua gana ke qao manga na auu ne tarau watawata iga na giu ia. ² Ingaia ke taua i rimana ka kere pepa na aria make tafatafa. Ngaia ke ura taqanga, ka uwana i otona ke puu rao i asi mina uwana i mafana ke puu ina mwako mamata. ³ Ingaia ke ngere rafa wau ke rongo mangara na laeon ira, mina gugurufia ne epiu ka rongo rafa wau. ⁴ Iga ina mataina na tamasi gena minga inau kau katofi segera ana ka mwarao na woisi gena. Maakau rongoa ka ringiringi ne tamasi mai pania i Heven ke woi, “Siana ko wowoisi na mwarao gaa, siana rai segera ana ka mwarao na woisi na gugurufia ne epiu gaa.” ⁵ Hoi mina enjel nau rea ne ura taqanga i asi mina mwako mamata ia ke tagarainia akau i afaafa ka rimana i otona, ⁶ rai fagatapusi nga rainia ka atana o God, ne tafi tarai, ne tagarafia i Heven, ano kaa mina asi, mina arani mwarao fato na taotao iga gena. Ingaia na enjel ia ke woi manga kaa, “O God ke ma ni gira ariro ana! ⁷ Hoi a mataina na piuta na enjel ia ne ufia na afuri iana, hoi mo God ke fafagamworai ka arani mwarao ne qani tao punufi igi. E manga ne qani woi tangara na kare iana na maurukari ira.” ⁸ Hoi makau rongoa nikao ka ringiringi nau rongoa noga inago ne tamasi mai tangau pania i Heven ia ke woi manga kaa, “Ui rao kui tawoa ka pepa na aria ne tafatafa fato noga i rimana na enjel ne ura taqanga rao i asi mina mwako mamata kana.” ⁹ Hoi, inau kau rao tangaa ka enjel ia kau nongia pania ka kere pepa na aria ia woi ni wateau. Ingaia ke woi tangau aporo mai, “Ui tawoa makui ngaua. E pagai mafai wau i oqamu ngaia, mina mataina ne taotao i faramu maunga kena ke mamaki wau nga manga na hani ia.” ¹⁰ Hoi inau kau tawoa rao ka kere pepa na aria ia pania ka rimana, makau ngaua, make mamaki wau i faraku manga na hani ia. Imuri mai nau onomia wato i oqaku make orisi ke mafai wau. ¹¹ Ua make tamasi mai ke woi, “Ui rao kui tarofainia rao nikao ka woita iana o God rainira ka arani inuni faifaitigi, arani finua rafa, arani tamasinga fiufiutaga mina arani arafa ni finua.”

¹ Hoi maka wateau ka mata rai tafanga ana rai ka mwarao, make woi tangau manga kaa, “Ui rao kui tafanga ka Ruma ni Wogasifa iana o God kana mina raperape irarona mako tatafanga nikao, mako totomanira nikao ka inuni na wogasi irarona ruma ni wogasifa kena. ² Hoi mina agua na ogaoga iga i metara gena ki siana ko tatafanga, suria na afuroto ka pagai tawoa tangara mereata. Ingaira gena ka puu afaafa rainia ka finua rafa ne apuna kena suria ka farisi ne eoru matara ka fagaifa ne ono. ³ Inau kau pagai kasiraurua ka mwane ni tamasinga iaku ne erua, makaru gafugafu faitakoi mwa. Ingairaurua karu mai tatamasia ka woita iana o God suria ka farisi ne eoru matara ka fagaifa ne ono.” ⁴ Ingairaurua na mwane ne erua gaa karu manga na apenagai na olif ne erua ia mina laet ne erua ne ura i matona na Arafa tangaa na ano kaa. ⁵ E manga tana inuni ke oqani fagaerisiraurua ana mina giu ke furafura mai pania ka farataurua ke kakamarira ka maerongataurua. Hoi e rao ke tanu manga ngai ke na, ko otai wau mwa ne oqani fagaerisiraurua ana ke pagai maemae nikao. ⁶ Ingairaurua karu nafunia ka ramwofa rai fatata ana pusia ka wawaiaro kana, ke marefa ni gira rangi ana iga ka mataina naru tatamasia na woita iana o God. Ingairaurua karu nafunia nikao ka ramwofa tangaa na qaurungana na wai gana rai tanui ana ki orisi rai gapu, makaru nafunia nikao ka ramwofa rai fagamamasiaga ana ka ano kaa rai ka atani wau mwa manga naru oqaoqania. ⁷ Iga na mataina naru tatamasia fato na tawatawanifa iataurua, mina Wasi ne akau mai pania na Kokoro Rafa ia ke mai pagai memeraurua fainafunafu, make nanafuiraurua funuiraurua ke tetefari iraurua. ⁸ Hoi mina guruna apetaurua gena ke taotao sio mwa taragani irarona finua rafa kena. Ina agua mwa nikao na rapusia na Arafa iataurua iga na taotao woro ia. Ainuni i finua rafa ngai ke ka tatanui nikao ka agua aera manga na inuni i finua rafa i Sodom mi Ijip. ⁹ Ingaira na arani inuni faifaitigi, arani waro ni inuni, ainuni na tamasi fiufiutaga mina ainuni panira na arani finua rafa na qao getera faifaitigi ka mai rerea ka apetaurua suria ka tangiana ne eoru mina maworo gana tana tangiana, na woi pusiraurua rai afuniraurua ana. ¹⁰ Ingaira fato na inuni ina ano kaa ka wawagewage wau rainia ka maefa iataurua na mwane ne erua gaa. Ingaira ka tautau farunga maka mamafata rai mafatanifa tangara fairifui, suria na maurukari ne erua gaa karu tanua ka apena fafaranifa rafa tangara ka arani inuni. ¹¹ Imurina mai na tangiana ne eoru mina maworo gana tana tangiana ia mina rogaroga ni tafinga ne rao mai pania ko God ke qanu i apetaurua, karu afafaraga akau mi ngaira fato na inuni na reraurua gena ka mamaagu wau. ¹² Hoi mina maurukari ne erua iraurua karu rongoa ka ringiringi pania i Heven ne tamasi rafa wau ke woi manga kaa, “Muru akau mai gaa!” Ina mataina na maerongataurua na qoreqore wau, makaru rao iga ka roto karu akau i Heven. ¹³ Hoi iga mwa na mataina ngai ke mina apena nunu rafa ke mwangiungiu. A tangafuruta fagaenani na apanana na finua rafa ia ke fagaerisia wau nga, mina qera na inuni ne epiu (7,000) ka mae. Hoi mi ngaira na inuni ne marefa nai mae ira ka maagu wau maka fagaakausia ko God i Heven. ¹⁴ Nga na ruata na fafaranifa ngai ke ne tefa noga rao kaa, mina oruta ke suguia mwa kaa. ¹⁵ Hoi mina piuta na enjel ke ufia nikao ka afuri iana, makau rongoa ka tamasinga i Heven na tamasi rafa wau ka woi manga gaa, “Arani mwarao fato ina ano kaa ke tao fato rugufanana na arafanga iana na Arafa iaka afainia ka Mesaea iana. Ingaia ke pagai arafa tarai tarai.” ¹⁶ Mina mwane rafa na tangafurua ne erua matara efai ira (24) na ogaoga iga na papa iata i matona o God ia ka qoqogurai uwa wato maka wogasia ko God, ¹⁷ ka wowoi manga gaa, “Arafa o God na Faufugana igo no qani oga mai inago, mako ogaoga ina mataina kaa, mina mataina mai nikao! Igami kami tangasigo no nafunia ka apena ramwofa rafa rai faganegana rai ono isurira ana ka finua rafa! ¹⁸ Ingaira na inuni na afuroto ka mangariaga wau tangago, hoi make taua noga ka mataina no fafagaqao rainia na mangariaganifa iamu tangara. A mataina noga tangai fagagetara ana ka inuni na mae noga. A mataina rai mafata rainia ana na rogufanani na tagaranifa iata na kare iamu na maurukari, mina arani inuni fato na apuna tangago na wowogasigo ira, manga na inuni rafa kee na kere kare mwa. A mataina noga tangai fagaerisira ana ka inuni na fagaerisia na ano kaa.” ¹⁹ A Ruma ni Wogasifa iana o God i Heven ke tafatafa maka rea irarona ruma ia ka bokisi apuna mina woita iana na Arafa ne segera ke taotao iga. Hoi mina na gugurufia ke raqoa ke rongo rafa wau, mina marangaia ke tari wata furu mina nunu nikao ke ngiungiua ka ano kaa, mina apeni na mamaworogani rafa na aesi ke wotawota mai manga na rangi igi.

¹ Hoi mina apena mwarao rafa ke wora mai ina wawaiaro kana. Aguana na fefene ne etagai, ke gafuia ka arito manga ne gafu rainia ia mina fagaifa ke tao irugufanana na uwana, mina feegu na tangafurua ne etagai matara erua ka tao i qauna manga na roqoroqo ni qau ia. ² Ingaia ke suguia ni apara, make riki ka gairina ke angi ke ngengerengere rafa wau suria ne fara rainia ka kare kena. ³ Hoi mina apena mwarao rafa ke wora mai nikao ina wawaiaro. Apena Fuua rafa ne memera make tonga qauna ne epiu, mina aisipana na tangafuru ne etagai. A qauna ne epiu igi ke tongani ka roqoroqo ni qau na tagarafi rai na gol. ⁴ Ingaia na Fuua rafa ia ke tafurungainia ka kerena, make tararora fato ka apena apanana rafa na feegu ina wawaiaro kana ka wotawota ina ano kaa. Ingaia ke mai ura inagona fefene ia ke nasia mwa woi ni worawora mai ki karena ia ki ngaua. ⁵ Hoi a fefene ia ke apara ka kere kare mwane. Ingaia ke wora mai rai arafa ana tangara ka arani finua fato rainia ka maworogana na aeani. Nga na mataina na kare ia ne wora, maka ragaia wau ka toraia tangaa ko God ke oga iga ka papa iana. ⁶ A fefene ia ke gawa, ke rao tangaa ka finua tatara ne fagananaua tangaa o God, ka gofugofua suria ka farisi ne eoru mina fagaifa ne ono. ⁷ Hoi a fainafunafu ana ke akau mai i Heven. Maekol mina enjel iana maka fainafunafu afainia ka Fuua rafa ia mina enjel iana. ⁸ Hoi, a Fuua rafa ia mina enjel iana ke marefa nai i ramwo iga ka fainafunafu ana iata, maka maengira ka fura pania ki Heven. ⁹ Ingaia ka maengia afainia ka enjel iana, maka kasira wato ina ano kaa. Ingaia na Fuua rafa kaa ke, ka qani mwaa mai inago na woisia rainia na ataro ia kee na Satan, ne mai fafagaqekaqekara ka inuni ina ano kaa fato. ¹⁰ Hoi makau rongoa ka ringiringi pania i Heven ne rongo rafa wau ke woi manga kaa, “A mataina kaa ko God ke fafagatafigia! Ina mataina kaa ko God ke fafagaqao rainia ka ramwofa iana rai Mwane Rafa! Ina mataina kaa, ka Mesaea iana ke fagaqao rainia ka apena ramwofa rafa iana tangara ka arani inuni! Suria na Satan ne memera faitogiri na goaka i matona o God ia iga na tangiana mina qongiana, ka kasia fura noga. ¹¹ Ingaira na goaka ira ka tefaria fato noga suria ka gapuna na Karena Sip ne wasira maka tamasia ka mwarao o God ne tanua tangara ira, make marefa nai tako rafa rainia ka manawata maka marumu rai mae ana mwa. ¹² Hoi mui wagewage, ki igo i Heven migamu fato na arani inuni namu ogaoga iga kena! Hoi mina ano kaa mina asi kana ke aera wau nga tangagamurua! Muru onoono menamenai wau nga rainia ka ataro ia na kasia wato fato mai noga ia. Ngaia ke mangariaga wau suria ne girara woi na kere mataina aqouqou mwa ke taotao rao maunga tangaa.” ¹³ A mataina na Fuua rafa ia ne girara na kasia wato ina ano kaa, make faganega rai gogofia ana ka fefene ne apara na kere kare mwane ia. ¹⁴ Hoi mina fefene kena ka watea ka gaparana ne erua na apena kaka rafa, make gafa ke rao ina finua tatara, tangaa ka agua iana o God ne fagananaua tangaa. Ki mwarao maka ainuni iga na agua kena makai onoono suria, ke arao ke taua ka farisi ne eoru mina fagaifa ne ono, rai oga panegai ana wau pania ka Fuua kena. ¹⁵ Hoi iga na farana Fuua rafa ia ka wai ke qeaa afura mai ka wai rafa woi ni afeafesia ka fefene ia ki totoraia. ¹⁶ Hoi mina ano kaa ke tamania ka fefene ia ke onomia ka wai ne fura mai i farana na Fuua rafa ia ke wato rao mwa iga ka kokoro ia. ¹⁷ Ingaia na Fuua rafa ia ke mangariaga wau tangaa ka fefene ia make rao tangai mera fainafunafu ana ki tana i karena na fefene ia ki ingaira fato na inuni na tau woita iana o God, na arao suri na faifataninga iana maka tau suri na fagausuringa iana o Jisas. ¹⁸ Hoi mina Fuua rafa ia ke rao ke ura mwa ina karingana na one kena.

¹ Hoi makau rea ka Wasi ne akau mai pania ka asi kana. Ingaia ke tonga qauna nga ne epiu make tonga aisipa iana na tangafuru ne etagai. Arani aisipa iana igi ke tonga roqoroqo ni qau fato iga mina qauni igi ke tao fato iga ka ata rai tamasi fagaerisia ana ko God. ² Ingaia na Wasi nau rea ia ke qao manga na leopad ia mina mwisina uwana ke qorafu wau, mina farana ke manga na farana na laeon ia. A Fuua rafa ia ke mafata rainia ka ramwofa iana mereana tangaa ka Wasi ia mina papa iana ke nafunia rai arafa ana tangara ka inuni. ³ Tana ani na qauna na Wasi igi ke qao manga ne mwamwariaga ni maefa ia maake kafu mawo fato rao mwa. Ingaira fato na arani inuni ina ano kaa ka panga rainia wau maka rao suria ka Wasi ia. ⁴ Arani inuni ka wowogasia wau ka a Fuua rafa ia suria ne mafata rainia ka ramwofa iana tangaa ka Wasi ia. A wowogasia nikao ka Wasi ia maka wowoi manga kaa, “Otai ke gira ratoa ana na Wasi kaa? Otai ke gira mea fainafunafu ana? Marefa ngaia.” ⁵ Ingaia na Wasi ia ka tanua ke tamasi qaqaeaga wau rai tamasi fagaerisia ana ko God, maki ngaia kena ka fagamarumungainia ke nanafunia ka ramwofa suria mwa ka farisi ne eoru mina fagaifa ne ono. ⁶ Ingaia na Wasi ia ke tamasi fagaerisia ko God mina atana make tamasi fagaerisia ka agua ne ogaoga iga mina arani inuni fato i Heven na ogaoga afainia ko God. ⁷ Ingaia na Wasi ia ka fagaramworia ke memera fainafunafu ka inuni na apuna tangaa o God, make tetefarira, maka watea nikao ka ramwofa rai ono surira ana ka arani waro ni inuni, arani inuni faifaitigi, arani tamasinga fiufiutaga mina arani finua rafa. ⁸ Ingaira na arani inuni na ogaoga ina ano kaa ira ka pagai wowogasia ka Wasi ia. Arani inuni ne marefa nai qani segera na atata iga na puka ni tafinga inagona na ano kaa na fagaworaia ia iga na puka ni tafinga ne nafunia na Karena Sip na nafuia funuia ia. ⁹ Hoi mui rongorongo menamenai wau manga ne tonga karingamiu! ¹⁰ E rao ko God ke qani takosia ki tana inuni rai rakua ana, hoi nga na kafu rakua ngaia, E rao ko God ke qani takosia ki tana inuni rai nafuia ana rainia ka naefe ne masi ruarua, hoi nga na kafu nanafuia rainia ka naefe ne masi ruarua ngaia. Hoi ka inuni na apuna tangaa o God ke araria nai maramarapeaga makai tatangamworani iga ko God. ¹¹ Hoi makau rea nikao ki tana Wasi ne akau mai pania ka ano kaa, maki ngaia na Wasi kena ke tonga aisipa iana manga na aisipa iana ne erua na karena sip ia maake tamasi mwa manga na fuua rafa ia. ¹² Ingaia na Wasi ne qainago mai ia ke mafata rainia ka ramwofa iana tangaa ka ruata na Wasi kena rai arafa ana tangara ka inuni. Mi ngaia na ruata na Wasi kena ke girura ka arani inuni na ogaoga ina ano kaa woi nai wowogasia ka Wasi ne qainago mai ia ne mwamwariaga ni maefa ia make kafu mawo rao igi. ¹³ A ruata na Wasi ia ke fagaworai ka apeni na fagaqaonga rafa i maata fato na arani inuni ngai gena, make tanua ka giu ke wato mai pania ka wawaiaro kana, ke wato mai ina ano kaa. ¹⁴ Ingaia kena ke nafunia ka ramwofa rai tanui ana ka fagaqaonga mwa i matona na Wasi inago ia rai fagaqekaqekara ana mwa ka arani inuni na ogaoga ina ano kaa, make woi tangara ka arani inuni gena, woi nai fagaurasia ka nununa rai wogosi ana ka Wasi na fagamwamwariaga rainia na naefe ne masi ruarua ia make tafi mwa ia. ¹⁵ Hoi mo God ke fagamarumungainia woi na Wasi ia ki mafata rainia ka manawana iga na nununa na Wasi inago ia ki gira tamasi ana, maki tanura ka inuni ne ma ni wowogasia kai nanafuira funuira. ¹⁶ Ingaia na Wasi ia ke girura ka arani inuni, na arafa mina inuni purua mwa, ani na togoani rurugua mina ani ne marefa wau, ainuni na tatagara purua mina ani ne taraganisira, woi nai nafunia ka segesegefa ia i rimata i otota, kee ni tao i raeta. ¹⁷ E marefa ko otai ni gira worifa kee ni gira fagaworingai mwarao ana, manga ne marefa ni nanafunia na segesegefa kaa. Ingaia na atana na Wasi ia ngai ke, kee na namba ne fagaararia na atana. ¹⁸ Mui takotako menamenai, otai wau mwa ne gira tako matafa ana ke gira tagarafia ana ke rorogoia ka agua ne ura tangaa na namba iana na Wasi ia suria na namba kena ke ura tangaa ka atana na mwane. Ingaia na namba ke, ka tangarau ne eono mina tangafuru ne eono matara eono (666).

¹ Imuri mai nau ono wau makau rea ka Karena Sip ne uraura ina fungana i Saeon, make ura afainira ka fakunga rafa na inuni. Ingaira na inuni na segera i raeta na atana na Karena Sip ia me Emana. Ingaira gena nga fato ka tangarau ne etagai mina tangafuru ne efai matara efai na qera (144,000) na inuni. ² Hoi mi inau kau rongoa ka tamasinga ne rao mai pania i Heven, ne rongo manga na nawo ne aropi igi, make rongo rafa wau manga na gugurufia ia make rongo wau nga manga na gita na kokoringi igi. ³ Ingaira na inuni na tangarau ne etagai mina tangafuru ne efai matara efai na qera ira (144,000), ka ura inagona na papa iana na Mwane Rafa ia mina mwarao ne efai ne tonga manawata ira mina mwane rafa ira. Ingaira na inuni gena ko God ke qani fagataraganisira pania ka ano kaa, maka kiukiuria ka kiu faoru. Ingaira noga gena ka ani na girara na kiu kena, marefa nikao ki tana inuni. ⁴ Ingaira gena ka mwane na fagaapunarira mereata wau nga, mangara na mwane ne marefa nai qaqagaranga fainira ka fefene. Raorao mwa ki ngaira ka arao suria mwa ka Karena Sip ia ifai mwa ne arao iga. Ingaira gena ka worira fura panira ka arani inuni, hoi ki ngaira gena ka mamafata rainira nga inago tangaa ko God mina Karena Sip ia. ⁵ Ingaira gena ke marefa nai gira fagafagaparu ana, make marefa ka mwarao nai fagaerisi. ⁶ Hoi makau rea ki tana enjel ne gagafa i afaafa noga ina qaiawoa kana, afainia ka tamasinga ne marefa ni gira fatonga, a tarofa koro tangai tamasi ana tangara ka arani finua rafa, arani waro ni inuni faifaitigi, arani tamasinga fiufiutaga mina arani inuni faifaitigi. ⁷ Ingaia na enjel ia ke tamasi rafa wau ke woi manga kaa, “Mui takotako rafa rainia ko God maka mui wagewagesia, suria na mataina ke rao mai noga tangaa rai fagagetara ana ka arani inuni. Mui wowogasia ki ngaia, rainia ne tagarafia na afaafana kana mina ano kaa, asi mina arani qaurungani fato na wai.” ⁸ Hoi aruata na enjel ke rao suria mai ka enjel ne qainago mai ia make woi, “A finua rafa ia ke sugui mwa ni fagaerisia! A finua i Babilon ia ke suguia mwa ni fagaerisia! Ai Babilon ka tanura ki tana inuni ina arani finua rafa rai tanui ana ka aerafa, mangara mwa ainuni na tanura na inuni ka tono ka qekaqeka ira.” ⁹ Hoi makau rea nikao ka aoruta na enjel ne qai imuritaurua mai na enjel naru qainago mai iraurua ne tamasi rafa wau ke woi, “Otai wau mwa ne wowogasia na Wasi ia mina nununa na tafea ia make tawoa na segesegefa ia i raena kee i rimana, ¹⁰ ko God ke mangariaga wau nga tangara. A mangariaganifa iana o God ke manga na waen purua mwa ne ramwo wau iga ka kaokao ni fagaetangifa ne nanau tangara ia. Arani inuni manga ngai ge ka pagai fafagamamasiagara rainia ka giu mina guana na fau na salfa inagota na enjel apuna mina Karena Sip iana o God. ¹¹ A roqoroqona na giu ne fafagamamasiagara rainia gena ke akau tarai tarai mwa. Ingaira na inuni na wowogasia na Wasi mina nununa ia mina arani inuni wau mwa na nafunia na segesegefa ia iga na atana ia ke marefa nai pagai mamaro iga ka tangiana kee na qongiana rai mamasiaga ana ka apeta.” ¹² Hoi ngaira na inuni na apuna tangaa o God kai nganganiaga iga ka marapefa. Ngaira ke araria nai ferefere gatagata iga ka woita iana o God makai rararonimwora nga rainia ko Jisas. ¹³ Hoi makau rongoa ka ringiringi i Heven ne woi manga kaa, “Ui segera ka tamasinga gaa, ‘Faganega ina mataina kaa, ka apena wagefa rafa ki tangara ka inuni na mae, manga na tangamworani rainia na Arafa.’ ” Mina Figona Apuna ke aramia aporo mai, “Aa ne mwora wau! Ingaira ka mamaro panigi ka arani mwakomwoaganifa iata, maka wagewage wau suria na pagai tawora ka rogufanani na tagaranifa iata.” ¹⁴ Hoi makau rea ka roto ne siki, make koa iga ka inuni ne qao ‘manga na Kare ni Inuni ia’, make nafunia ka roqoroqo ni qau na tagarafia rainia na gol make taua i rimana ka naefe ne masi wau. ¹⁵ Hoi makau rea nikao ki tana enjel ne fura mai pania ka Ruma ni Wogasifa ia make mai ngere rafa wau tangaa ka mwane ne kokoa iga na roto ia make woi, “Ui tagara rainia ka naefe ne masi wau iamu ia kui retera ka guani na ngaufa ne maua noga igi, suria nga ne taua mai noga na mataina iana ngai ke!” ¹⁶ Hoi mina a mwane ne kokoa iga na roto ia ke karigainia ka naefe ne masi iana ia ina ano kaa, make retera fato ka arani ngaufa igi. ¹⁷ Imuri mai nikao makau rea ki tana enjel ne fura mai pania na Ruma ni Wogasifa i Heven, make taua nikao ka naefe ne maasi wau. ¹⁸ Hoi mina tana enjel nikao ne onoono suria na giu ia ke rao mai pania ka raperape ia make ngere rafa wau tangaa ka enjel ne taua na naefe ne maasi wau ia make woi, “Ui tagara rainia ka naefe ne maasi iamu ia makui retera ka guani na grep igi panigi ka waroni iraroni na mwou ina ano kaa, suria na grep igi ke mata noga!” ¹⁹ Hoi ingaia na enjel ia ke karigainia ka naefe ne maasi iana ia ina ano kaa, ke retera ka guani na grep igi panigi ka waroni make kasi ka guani iga ka kokoro tangai tagarafia ana na waen. Agua kana ke fagaarari suria ka mangariaganifa iana o God. ²⁰ A kokoro kena ke tao i metara fura pania ka finua rafa kena, make pipiringi rai ka uwana ka guani igi, mina nongani ne fura mai gena ke manga na wai ne mwaganu ia. Hoi nga na gaputa na inuni aera ngai gana. Mina gapu gena ke akau mai nga ke take i riona na inuni, make rao fagatau wau.

¹ Hoi makau rea nikao ina wawaiaro kana ki tana apena fagaqaonga rafa, nau panga rainia wau. Inau kau rera ka enjel ne epiu na torai mai ka apeni na mamasiaganifa rafa wau nga, na fagafatongina ngai ge. A fagafatongina ngai ge suria nga ne rao ke fatofato rao mina mangariaganifa iana o God nikao ke fatofato. ² Hoi makau rea ka mwarao manga na asi ia ne togatoga wau manga na potere ia ne faku afainia na giu, makau rera nikao ka inuni na tefaria fato noga na mea fainafunafu na Wasi mina nununa ia maka tefaria ka numba ne fagaarari suria na atana na Wasi kena. Ingaira ka ura irawona na asi ne togatoga wau manga na potere ia maka taura ka kita ne watera o God, ³ maka kiukiuria ka kiu ne segea o Mosis na kare iana o God tangaa ka Karena Sip ia maka wowoi, “Arafa o God Faufugana nanama, A tagaranifa iamu ke tefa wau make qao koro wau! Mwane Rafa iata na arani finua rafa, igo ke mwora wau ka taufa iamu make oto wau! ⁴ Arafa, arani inuni ka tako rafa wau rainigo, Maka wagewagesia ka atamu, Suria nga igo tagai mu ko apuna. Arani finua rafa ka arao mai rai wogasigo ana, Suria na taufa iamu ko fagaqao rai ne oto wau.” ⁵ Imurini mai na arani mwarao gaa, makau rea ka rofu ne tao rai Ruma ni Wogasifa i Heven ne tafatafa fato noga. ⁶ Ingaira na enjel ne epiu na taura na fagamamasiaganifa ne epiu ira ka fura mai pania ka Ruma ni Wogasifa ia. Ingaira gena ka gafu rai ka gafu ne siki ne qorafu maka togatoga, maka fogotai ka gafu na tagarafi rai na gol tangai na aparagaimatota. ⁷ Hoi mi tana fitangita na mwarao ne efai ne tonga manawata ira ke mafata rainia tangara ka enjel ne epiu ira ka apira ne epiu na tagarafi rai na gol, na wonu rainigi ka mangariaganifa iana o God ne tafitafi tarai tarai ia. ⁸ A Ruma ni Wogasifa ia ke wonu wau rai roqoroqo pania na rarafana mina ramwofa iana o God, ke marefa wau ka inuni ni gira qanufa irarona na Ruma ni Wogasifa ia ke rao nga ke taua ka mataina na fagamamasiaganifa ne epiu na tora mai na enjel ne epiu ira na fafagafatongi wau nga.

¹ Hoi makau rongoa ka ringiringi ne tamasi rafa mai pania na Ruma ni Wogasifa ia tangara ka enjel ne epiu ira, make woi, “Mui rao kamui meri fura ka apira ne epiu igi iga na mangariaganifa iana o God ia afuria ka ano kana.” ² Nagonagona enjel ke rao make meria wato ka apira iana tangaa ka ano kaa, mina arani inuni na nafunia na segsegefa iana na Wasi ia maka wowogasia na nununa na tafea ia ke wora i apeta ka garoa ne qao aera ne farafara wau. ³ Hoi mina ruata na enjel ke meria wato ka apira iana tangaa ka asi kana. Hoi mina asi ia ke tanu manga na gapuna na inuni ne mae ia mina arani mwarao ne tonga manawata irarona na asi gana ka mae fato wau nga. ⁴ Hoi mina aoruta na enjel ke meria wato ka apira iana tangai ka arani wai afeafe mina arani qaurungani na wai igi mina wai igi ke orisi rai gapu mwa. ⁵ Hoi, makau rongoa ka enjel ne onoono suri na wai igi ne woi manga kaa, “God nga igo ko apuna tefa, igo no qani oga mai inago ia mina mataina kaa. A fagaetangifa no tanua ke oto wau! ⁶ Ingaira ka nafuira funuira ka inuni na apuna tangago mina maurukari. Hoi igo ko watera nikao rai gapu nai totonomi rainigi ka mwarao na tanui!” ⁷ Hoi makau rongoa ka ringiringi ne tamasi mai pania na raperape ia ne woi manga kaa, “Arafa o God Faufugana nanama! E mwora nga make oto nga ka fagaetangifa no tanui!” ⁸ Hoi mina faita na enjel ke meria wato ka apira iana tangaa ka arito, mina arito ke raesira qangira wau ka inuni. ⁹ Ingaira na inuni gaa ka nonoroaga rainia ka qaqafanana na arito ia minga ka tamasi qaroqaro rainia ko God. Ingaia ne nafunia na ramwofa tangai na fagamamasiaganifa igi, maake marefa wau nai oqani riri panigi ana ka aerafa iata kai kasia akau ko God. ¹⁰ Hoi mina rimata na enjel ke meria wato ka apira iana tangaa ka papa iana na Wasi ia mina agua ne arafa iga na Wasi ia ke rotorotoaga wau, mina inuni iga gena ka garamumu wau rai ka riwota suria ne fara ka apeta, ¹¹ maka tamasi qaroqaro wau rainia ko God i Heven suria na fafara wau rainigi ka garoa i apeta, maaka ngaroi wau rai riri panigi ana ka agua aera na tatanui. ¹² Hoi mina aonota na enjel ke meria wato ka apira iana tangaa ka wai afeafe rafa i Iufretis. Hoi mina a wai ia ke mamata, tangai mafata rainia ana ka tara tangara ka arafa i finua na arao mai pania na finua ne akau mai iga na arito. ¹³ Hoi makau rera ka ataro aera ne eoru na qao mangara na teniteni ira, maka furafura mai pania ka farana na Fuua rafa ia mina afarana Wasi ia mina farana na maurukari ne fafagaparu ia. ¹⁴ Ingaira gena ka nunuta na ataro na fafagaworai na fagaqaonga ni qaqanganifa igi ngai gana, maka furafura surira ka arani arafa ni finua ina ano kaa rai fagafakura ana mai tangai fainafunafu ana iga ka tangiana o God na Faufugana ne fafagaqao rainia ka ramwofa iana. ¹⁵ Hoi mina Arafa ke woi ia “Mui onoono menamenai! Inau kau arao mai manga na fanagoa ia ngaia! A wagefa tangara ka inuni na onoono raorao mwa, make tautausuri na gafu iana menamenai, ke marefa ni rurupa tori ki mamaaki mataina ne arao mai i matonga ni inuni!” ¹⁶ Hoi mina arani arafa ni finua ira ka toraira faku mai iga ka agua na woisia rainia na tamasinga iata na Hibru, i Amagedon. ¹⁷ Hoi mina piuta na enjel ke meria wato ka apira iana iga ka afaafana kana, makau rongoa ka ringiringi ne tamasi mai pania ka papa iana na Mwane Rafa irarona na Ruma ni Wogasifa ia ne tamasi rafa wau ke wowoi manga kaa, “E ofu noga ngaia!” ¹⁸ Hoi mina rongo rafa ana ke rao mai, a marangaia ke mamarangaia mina gugurufia ke raqoa mina nunu nikao ke ngiungiua ka ano kaa, ani ngai ke na nunu ke ramwo tefa wau nga. E faganega mai inago o God ne fagaworaira na inuni ka oga ina ano kaa, ke marefa wau nga nai fatamia ka nunu ni ramwo manga na ani ngai ke. ¹⁹ O God ke takosia mwa ka finua rafa i Babilon, make watea ka waen iga ka kaokao iana ke tonomia, a waen iga na mangariaganifa rafa iana. A finua rafa kena ke qaro afasita ke wora ka agua ne oru, mina arani ruma iga na arani finua rafa ina ano kaa ke fagaerisi wau nga. ²⁰ Arani marau fato ke atani marefa rao mwa mina arani fungani igi ke marefa nai girara regi ana noga. ²¹ Hoi, mina apeni na maworogani rafa na aesi manga na guani na fau igi ke wotawota mai pania ka wawaiaro kana afurira ka inuni ira. Ingai gi na maworogani na aesi gaa ke figa manga na kilo ne tangafuru ne efai igi (40). Mi ngaira na inuni ira ka tamasi qaroqaro mwa rainia ko God suria na fagamamasiaganifa ngai ke ke qao mamaagutaga wau.

¹ Hoi mi tana fitangita ne etagai na enjel ne epiu na taura na apira ke rao mai tangau make mai woi manga kaa, “Ui rao mai, qai fagarego rainia ka finua rafa ne manga na fefene ne aoraoraga ne rongo rafa na atana ia ki takena nga na fafagaetangia. Ngaia na finua rafa kaa ka tao iga ka arani wai afeafe. ² Ingaira na arani arafa ni finua ina ano kaa ka tanui ka aoraoraga ana afainira ka inuni i finua kena, mangara ainuni na rangaranga ira, mina inuni ina ano kaa nikao ka qekaqekaga rainia ka agua ni oraoraganifa na tanui afainia kena.” ³ A ramwofa iana na Figona Apuna ke qanufiau, mina enjel ia ke toraiau kau rao iga ka finua tatara makau rea ka fefene ne oga i gairina na Wasi ne memeraga na apena ia maka segesegera fato ka apena gana rainia ka ata na tamasi fagaerisia wau rainia ko God. Ingaia na Wasi kana ke tonga qauna ne epiu mina aisipa iana na tangafurua nga. ⁴ Ingaia na fefene ia ke gafu rainia ka gafu ne memeraga make roto memeraga, make rauni rainigi ka mwarao na tanui rainigi na gol, mina romani na guani na fau, mina guni na fafaaga ne mwaromwarora. Mi rimana ke taua iga ka kaokao na tagarafia rainia na gol ne akau ke wonu rainigi ka taufa aera iana, ne qaqagararanga kena. ⁵ Hoi mina araena kani ia ka segea iga, ka segesegefa ni fagafiu nga ne woi, “Inau na finua rafa i Babilon, Enata fato na arani fefene na aoraoraga, Enata na arani agua fato ne qao mwamwakiaga iga na ano kaa.” ⁶ Hoi makau rea ka fefene ia ne tanu manga ne qeka ia rainia ne tonomi ka gaputa na inuni na apuna tangaa o God, na inuni na nafuira funuira suria na rao suria ka fagausuringa iana o Jisas. A mataina nau rea rao kani ia makau panga rainia wau. ⁷ Mina enjel ne totoraiau ia ke fagateau, “Nga no fea ko panga rainia kena? Ui rao mai tangau qai woisia wau tangago ka agua ne tao punufi wau maunga rainia na fefene kana mina na Wasi ne oga i gairina ia. A Wasi ne tonga qauna ne epiu mina aisipa iana na tangafuru ia. ⁸ Ani ngai kana na Wasi ke qani tafi mai make maemae rao mwa. Nga ne suguia mwa ni akau mai pania na Kokoro Rafa ne kokone wau ia ngai kana, make mai rao ka fafagaerisia rao mwa. Ani na inuni na ogaoga ina ano kaa ne marefa nai qani segera na atata iga na puka ni tafinga inagona na ano kaa na tagarafia ia ka pagai papanga rainia wau manga na rerea na Wasi ia. Ingaia kena ke qani tafi mai make maemae rao mwa, make rao ke wora aporo mai mwa nikao kena. ⁹ Rainigi na mwarao gaa, ui takotako matafa. Ingai gi na qauna ne epiu igi ka kere fungani ne epiu ne oga iga na fefene ia make fagaarari suria nikao ka arafa ni finua ne epiu. ¹⁰ Arafa ni finua ne erima ira ka mae fato noga, mi tana ani ne etagai ke onoono isuri maunga ina mataina kaa, mi tana ani ne etagai nikao ke mamaunga wau ni arao mai. Hoi ka mataina ne arao mai make mai arafa rao mwa suria ka kere mataina aqouqou mwa. ¹¹ Mi ngaia na Wasi ne qani tafi mai make maemae rao mwa ka waruta na arafa ni finua ne epiu ira ne arafa rao maka mai fagaerisia rao mwa ia. ¹² Ingai gi na aisipa iana na tangafurua no rea igi ka arafa ni finua na tangafurua ne mamaungara nai fafaganega rai ono isuri ana, maki ngaira gana ka watera ka ramwofa rai ono isuri ana manga na arafa ni finua ia suria mwa ka aoa ne etagai afainia ka Wasi ia. ¹³ Ingaira na arafa ni finua na tangafurua gaa ka nafunia ka takofa mwa ne etagai maka watea ka Wasi ia ka ramwofa iata rai arafanga tangara ka finua rafa iata. ¹⁴ Ingaira ka pagai memea fainafunafu ka Karena Sip ia. Hoi mina Karena Sip ia afainira ka inuni ne onira make usuira mina ani na raronimwora rainia ka arao isuria ka tetefarira ka arafa ni finua ira, suria ingaia kena ka Arafa iata na arani arafa mina Mwane Rafa iata fato na arani mwane rafa. ¹⁵ Ingai gi na wai no rea ne ogaoga iga na aoraora ia ka arani inuni faitigi, rurufa na inuni, arani finua rafa mina arani tamasinga fiufiutaga. ¹⁶ Ingaia na Wasi ia mina aisipa iana na tangafurua igi ka pagai maemaerongania ka fefene na aoraora ia. A pagai tawora fato pania ka arani mwarao ne nafuni ki mwarao make mamaaki suria ne rupatori. Hoi maka pagai ngaura ka fisigona, maka kasia ka apena ke tetete wau nga iga ka giu. ¹⁷ Rainia nga o God ke naka i mangatata na faioqanifa kaa, rai toraia ana faku ka takofa rai mamafata rai ana ka ramwofa iata tangaa ka Wasi ki arafa tangara na finua raorao mwa make mai taua ka mataina ne mai mworamwora na woita iana o God. ¹⁸ Ingaia na fefene no rea ia ka finua rafa ne arafa fato nga tangara ka arani arafa ni finua iga na ano kaa.”

¹ Imurini mai na arani mwarao igi makau rea ki tana enjel ne wato mai pania i Heven. Ingaia ke nafunia ka apena ramwofa rafa mina rarafanana ke togaria fato ka ano kaa. ² Enjel ia ke ngere rafa wau ke woi manga kaa, “A finua rafa i Babilon ia ke afogefoge wau nga! A qani rao wau nga pania ngaia. Ngaia ke tao noga rai agua iata na ataro mina figona aera make tao rai agua iata na arani manu na qao mwamwakiaga. ³ Ainuni iga na arani finua rafa ka qekaqekaga rainigi ka agua ni oraoraganifa na tanui afainira ka ai Babilon. Arani arafa i finua na ano kaa ka tanui ka aerafa i gaa, mangara na inuni na rangaranga ira, mina arani mwane ni rurugua ina ano kaa ka nafuni faaga wau suria kani kena ke oqani wau ka arani mwarao.” ⁴ Hoi makau ronga ki tana ringiringi ne tamasi mai pania i Heven ke woi manga kaa, “Mui ura mai, na kare iaku! Mui fura kamui rao mai pania! Siana kamui qauqanu afainira iga ka aerafa iata, make marefa nai nanafuigamu afainira iga ka fagaetangifa iata kena! ⁵ Rainigi na aerafa iata gena ke akau rafaera wau nga, ke taua ki Heven, mo God ke tatakosi raorao mwa ka agua ni oraoragana iata gena. ⁶ Mui orisira aporo ka aerafa iata rainigi ka arani mwarao na tanui igi, mui taura faku fagaerua wau tangara, mui fagawonusia ka kaokao iata igi rainia ka mwarao ni tonofa, ki ramworamwo wau tefaria ka ani na tatagarafi tangagamu igi. ⁷ Mui fagamamasiaga apeta maka mu fagafafara apeta, rainia na qaqaeaga wau rainigi ka arani mwarao na nafuni, mi ngaira ka oqani mwa ka mwarao koro woi nai nafuni, Rainia ingaira gena ka qaqaeaga mwa mereata i mangatata, maka wowoi, ‘Igami kaa kami oga manga kani iata na arafa ni finua ira, marefa ka nao. Inau kaa ke marefa qai gira faitakoi ana!’ ⁸ Suria rainigi na mwarao gaa, iga na tangiana ne etagai ke pagai takera ka mamasiaganifa ngaia, a riunga, a faitakoifa mina magaua. Minga ka fafanua ke tetete nikao rainia ka giu, suria nga na Arafa o God ne faufuga ke fafagaetangira gena.” ⁹ Arani arafa ni finua fato ina ano kaa ka qani tanui ka oraoraganifa afainira ka ai Babilon maka nafuni afainira ka arani mwarao koro iata, ka pagai angiangi maka tatakoira ka inuni i finua rafa ia ina mataina na rerea na asuasuna na giu ne tetete rainia kena. ¹⁰ Ingaira ka uraura fagatau wau suria na maagu wau rainia ka fafaranifa iata kena, maka wowoi, “Aigii! Aigii! Ai Babilon na finua rafa ne tefa, iga mwa na aoa ne etagai mwa mo God ke fagaetangigamu rao iga!” ¹¹ Arani mwane ni rurugua iga ano kaa ka angiangi ka fafaitakoi tangaa Babilon, suria ne marefa ki tana inuni ni pagai worira na mwarao ni fagaworinga iata nikao. ¹² E marefa ka inuni ni worira na gol, silva, fau manimani, guni na fafaaga ne mwaromwarora, gafu koro wau, gafu ne rotorotoaga memera, gafu ne wawasiaga mina ani memeraga, apenagai ne sigini koro, mina atani wau mwa na mwarao na gira tanui ana rainigi na riwota na elefant, apenagai ne akau wau na maeni, bras, aeani mina fau ne siki wau. ¹³ E marefa ka inuni ni worira nikao na arani kesi na ngaufa mamaki, atani wau mwa na mwarao ne sigini koro, mangate, frangginsens mina maa. E marefa ka inuni ni worira nikao na waen, oel na tagarafia rainia olif, flaoa, wit, puruka mina sip, make marefa ka inuni ni worira na hos, a qea ne okera na hos, inuni tangai fagatagarafira ana purua mi tana inuni na qani roira nikao. ¹⁴ Ingaira na mwane ni rurugua ira ka wowoi tangaa, “Arani mwarao no nafuni no qani oqanira, ke marefa fato noga. Arani rurugua iamu igi mina qao korofanamu igi ke rao noga. Marefa nui gira rogoia ana aporo nikao!” ¹⁵ Ingaira na mwane ni fagaworinga na nafunia rurugua wau pania na finua rafa ia ka uraura fagatau wau nga suria na maagutainia ka mamasiaganifa iana kena, maka fafaitakoi maka angiangi, ¹⁶ maka ngerengere, “Aigii! Aigii! Ainuni i finua rafa ne tefa, Arani mataina mu gafugafu siki, maka mu gafu rotorotoaga memera, maka mu gafugafu memeraga, maka mu kafu rauni wau rai ka mwarao na tagarafi rai na gol, a guani na fau manimani mina guni na fafaaga ne mwaromwarora! ¹⁷ Ki iga mwa na aoa ne etagai maka mu fagatarupera wau nga ka arani rurugua igi!” Arani kapten iga na arani faka mina arani mwane na tatagara ina faka afainira na arani inuni na tagetage raorao iga na faka gena mina arani inuni na tatagara tangai na ogafanata i asi gena nikao maka uraura fagatau wau mwa, ¹⁸ maka tamasi ka wowoi ina mataina na rea rao na asuasu iga na watawata ne tetete iga kena, “E marefa ngaia ki tana finua rafa ni girara ratoa ana na finua koro kaa!” ¹⁹ Ingaira ka rafurafui rai rafu i qauta, minga ka angiangi maka fafaitakoi, ka ngerengere, “Aigii! Aigii! Ainuni i finua rafa ne tefa, Ina finua rafa na arani faka na araorao i asi gana maka togoani rurugua wau rainia ngai ke! Ki iga na aoa ne etagai mwa maka mu fafagatarupera wau rao mwa!” ²⁰ “Mui wagewage na inuni namu kokoa i Heven, afainira na arani inuni na apuna tangaa o God, mina aposol, mina arani maurukari, suria o God ke fagaetangira rainigi ka mwarao na tanui tangagamu igi!” ²¹ Hoi mina enjel ne ramwo wau ke ragaia akau ka apena guana fau rafa make kasia ke wato i asi kena, make woi manga kaa, “A finua rafa i Babilon, nga ngatakena nga na pagai tanugo ke kaa. A pagai kasigo wato make marefa nai pagai rerego aporo nikao. ²² A rongofanana na kita mina ringita na inuni mina aiafa mina afuri na ufira igi make marefa nai pagai rongora irarona na finua rafa ia aporo nikao! Ainuni na tatagara ira make marefa nai pagai rerera ki pasimu nikao, mina rongofanana na guana na fau na kamakama rainia ia ke marefa nai pagai rongoa nikao. ²³ E marefa nikao ka laet ni pagai mamawesigo. E marefa nai pagai rongora ka ringita na mwane mina fefene na auragi i pasimu. Ingaira fato na arani mwane ni rurugua iamu ira ka mwane rafa ina ano kaa, mina farikua ana iamu ne fafagaqekaqekara na inuni ina arani finua rafa ira! ²⁴ Igo i Babilon ka fafagaetangigo, suria na gaputa na maurukari, mina ainuni na apuna tangaa o God ka rogoi irarona finua rafa kena, mina gaputa na arani inuni na nafuira funuira ina ano kaa ira.”

¹ Imurini mai na arani mwarao igi makau rongoa ka rongo rafa ana, ne rongo manga na meota na inuni ira na tamasi i Heven ka wowoi, “Ai fagaakausia ko God iaka! E fagatafira ka inuni, make fagaqao rainia ka rarafa iana, make nafunia ka ramwofa. ² E mwora make oto wau ka fagaetangifa ne tanui! Ingaia ke suu maana fato noga ka aoraora ne oga ke fafagaerisia na ano kaa ia rainia na qaqagaranganifa iana. O God ke orisi aporo tangaa kani kena suria ne nafuira funuira ka kare iana.” ³ Mina inuni ira ka ngere nikao ka woi, “Ai fagaakausia ko God! Asuasuna finua rafa ne tetete ia ke akau mwa tatarau marefa ni girara fatonga!” ⁴ A mwane rafa na tangafurua ne erua matara efai ira (24) mina mwarao ne efai ne tonga manawata ira ka qoqogu rai uwa wato maka wowogasia ko God, ne kokoa iga na papa iana ia maka wowoi, “Amen! Ai fagaakausia ko God!” ⁵ Hoi, mina ringiringi ke tamasi mai pania ka papa iana ia make woi manga kaa, “Igamu fato na arani kare iana, igamu fato na inuni rafa mina ainuni purua namu tako fagaakaufia ia ai fagaakausia ko God iaka.” ⁶ Hoi makau rongoa ka mwarao manga na fakunga rafa nai inuni ira make rongorongo manga na nawo ne aropi igi make rongorongo manga na gugurufia ne raqoraqoa rafa wau ia maka wowoi, “Ai fagaakausia ko God. Arafa iaka o God ka faufugana na Arafa ni Finua ia! ⁷ Ai wagewage makai koro iaka, ai wogasia, Rainia na Karena Sip ia ke auragi ina mataina kaa, A fefene ne auragia ke rauni fato noga. ⁸ Ingaia kani ia ka watea fato noga rai gafu siki ne oraora ke gafugafu rai.” Nga na gafu siki gana ke fagaarari suria ka taufa ne oto iata na arani inuni na apuna tangaa o God. ⁹ Imuri mai mina enjel ia ke woi tangau mai, “Ui segera ka mwarao gaa, ‘A wagefa tangara ka inuni na onira tangaa na auragifa iga na farunga iana na Karena Sip ia.’ ” Mina enjel ia ke uruia wau nikao, “A woita gaa ka woita iana mwora o God ngai ge.” ¹⁰ Hoi makau aqa wato i i uwana kau wogasia, maake woi tangau mai, “Siana kui wowogasiau! Ui wogasia mwa ko God! Inau kaa, kau tatagara tangaa mwa ka Arafa, manga igo kena mina goamu na rao suria na fagausuringa iana o Jisas. A fagausuringa iana o Jisas gaa ke fagaqao fato rainigi ka arani woita iana o God.” ¹¹ Hoi makau rea ki Heven ne tafatafa, makau rea ka hos ne siki. A mwane ne tage i gairina kana ka fauatana rainia ka ‘Fagauguri Koro’ mina ‘Mworafa’. Ngaia ke oto wau iga ka fagagetara ana ka finua rafa, make oto wau iga ka fainafunafu ana. ¹² A maana gana ke manga na watawatana giu ia make nakai ka meona roqoroqo ni qau na tagarafi rai na gol i qauna, mina atana ka segea i apena make marefa wau ka inuni ni girara rao. Nga ngaia mwa ke girara ka atana kana. ¹³ A gafu qorafu ne gafu rainia kana ke gapugapuaga wau. Nga na atana ke kaa, ‘A woita iana o God.’ ¹⁴ Hoi mina arani enjel ni fainafunafu ana i Heven ka arao suria, maka tage i gairita na hos na siki, maka gafu rai ka gafu ne qao koro ne siki wau. ¹⁵ A naefe ne maasi wau ke fura mai pania ka farana, ne nafunafu rainia ke tetefarira fato na arani finua rafa. Ingaia ne arafa ke raramwofaga wau, make fafagaqao tangara rainia ka mangariaganifa iana o God na faufugana, manga na inuni na gira puu afaafa rainigi na grep ina agua na pipiringi iga na waen. ¹⁶ Iga na gafu iana ne roqofia na rawona na apeapeni na uwana gana ke segea iga ka ata, “Arafa iata na arani arafa ni finua mina Mwane Rafa iata na arani mwane rafa.” ¹⁷ Hoi makau rea ka enjel ne ura iga na arito make ngere rafa wau ke woi manga kaa tangara ka arani manu fato na gagafa raorao ina qaiawoa gana, “Mui rao mai kamui mai fakuria ka farunga rafa iana o God kaa! ¹⁸ Mui rao mai kamui ngaura ka fisigoni na apeta na arafa ni finua, mwane rafa, aramwo ira, mina fisigoni na apeta na hos mina mwane na tatagerira ira. Mui ngaura ka fisigota na arani inuni, ani na inuni na tatagara purua, ani ne taraganisira, ainuni rafa mina ainuni purua mwa.” ¹⁹ Hoi makau rea ka Wasi ia mina arani arafa ni finua fato ina ano kaa ira, mina arani mwane ni fainafunafu ana iata na faku mai tangai mea fainafunafu ana ka mwane ne tage iga na hos ia afainia ka enjel ni fainafunafu ana iana ira. ²⁰ Hoi mina Wasi ia ka roia ka rakua afainia ka maurukari ne qaqaqanga ne fagaworai na fagaqaonga i maana igi. Iga na fagaqaonga iana na Wasi ia ke fafagaparura rai ka inuni na nafunia na segesegefa iana na Wasi ia mina inuni na wowogasia na nununa na tafea ia. Ingaia na Wasi ia mina maurukari ne qaqaqanga ia ka kasi maumauritaurua irarona na maratana agua ne tarau afainia na guana fau na salfa ia. ²¹ A mwane ni fainafunafu ana iata ira ka nafuira ka mae rainia ka naefe ne maasi wau ne fura mai pania na farana na mwane ne tage i gairina na hos ia mina arani maanu ka gafa wato mai ka ngaura ka fisigoni na apeta ira ka masu wau nga.

¹ Hoi makau rea ka enjel ne wato mai pania i Heven, make taua i rimana ka kii tangaa na Kokoro Rafa ne kokone wau ia mina apena seni rafa ke taua nikao. ² Enjel ia ke roia ka Fuua rafa ia. A woisia rainia na qani mwaa ia ingaia kena ka Ataro mina Satan, make rakua ke tao suria ka qera ni farisi ne etagai (1,000). ³ Ngaia na enjel ia ke kasia ka Fuua rafa ia iga ka Kokoro Rafa ia make purupusia wau make tawoa ka purupuru ke puruia wau rainia, woi siana ki pagai fafagaparura ka arani finua rafa ina ano kaa nikao, ke rao ke taua nga ka qera ni farisi ne etagai kena ne tefatefa minga ka kafu rurufaia ke kokoa suria ka kere mataina aqouqou mwa. ⁴ Hoi makau rera ka papa, mina inuni na koa iga gana na watera na ramwofa tangai fagageta ana, makau regi nikao ka maurifata na inuni na retera na qauta rainia na tatamasia ko Jisas, maka tatarofainia ka woita iana o God. Ingaira gaa ke marefa nai wowogasia ka Wasi ia mina nununa na tafea ia make marefa nikao nai nafunia ka segesegefa iana na Wasi ia i rimata kee i raeta. Ingaira ka tafitafi aporo, maka arafa afainia ko Kraes suria ka qera ni farisi ne etagai (1000). ⁵ Nga na fagainagona na afaraga aporo ana pania na maefa ngai ke. Tana inuni na qani mae ira ke marefa nai tafitafi aporo raorao make taua ka qera ni farisi ne etagai ne fatofato nga. ⁶ Hoi mina nagonagona na inuni na tafitafi aporo pania na maefa gena ka wawagewage wau. Ngaira gena ka inuni na apuna, maka taotao rai mwane ni raperape iana o God mo Kraes, maka arafa afainia ko Kraes suria ka qera ni farasi ne etagai. Aruata na maefa ke marefa ni nafunia ka ramwofa rai taura ana. ⁷ Imurina mai na qera ni farisi ne etagai ia ne tefatefa mo Satan ka kasia fura pania ka peresin ia. ⁸ Ingaia ke pagai arao ke fafagaparura ka inuni i finua rafa iga i Gog mina Magog. Nga ngai gi na arani finua rafa fato iga na ano kaa ngai ge. O Satan ke pagai fafagafakura mai tangai faiarifatana, na rakorako wau manga na guni na one igi. ⁹ Ingaira ka mamas taraufia nga ka ano kaa, maka rao ka ririfuira ka kare iana o God iga na finua rafa ne komania. Hoi mina giu ke watowato mai pania ki Heven ke mai kakamarira fato rao ka maemae. ¹⁰ Hoi mina ataro ne fafagaparura ira ka kasia iga ka maratana agua ne tarau afainia na guana fau na salfa ia na agua na qani kasia noga iga na Wasi ia mina maurukari ne qaqaqanga ia. Ingaira ka pagai fafafara iga ka qongiana mina tangiana tarai tarai. ¹¹ Hoi makau rea ka apena papa rafa ne siki, mina inuni ne etagai ke kokoa iga. Ano kaa mi wawaiaro karu gawa pania, make marefa ka agua tangaraurua naru arao iga. ¹² Makau rea nikao ka inuni na qani mae fato noga, inuni rafa ne tonga atata mina atani wau mwa na inuni. Ngaira ka uraura inagona na papa ia. Arani puka ka gaasi mina tana puka nikao ka gaasia, na puka ni tafinga. Hoi mina ainuni na qani mae ira ka fafagagetara suri ka mwarao na tanui, manga na qani segera irarona puka gena. ¹³ Asi ke kasira mai ka inuni na mae iga, mina maefa mi ‘Hades’ na agua iata na inuni na mae fato noga, karu mafata rainira mai nikao ka inuni na mae naru taura, maka mai fafagagetara suri ka mwarao na qani tanui. ¹⁴ Hoi imuri mai mina maefa mi Hades ka kasiraurua iga ka maratana agua iga na giu. Nga na maratana agua iga na giu kaa ka ruata na maefa. ¹⁵ Otai wau mwa marefa nai qani segea na atana iga na puka ni tafinga maka kasia iga ka maratana agua iga na giu.

¹ Hoi makau rea ka wawaiaro faoru mina ano faoru. A wawaiaro inago mina ano inago karu atani marefa rao mwa, mina asi nikao make marefa rao mwa. ² Makau rea ka finua apuna i Jerusalem faoru ne wato mai i Heven pania ko God. E gafu make nanau manga na fefene ne gafu ke nanasia o wani iana ia. ³ Makau rongoa ka ringiringi ne rongo rafa wau ne tamasi mai pania na papa iana na Arafa ia ke woi manga kaa, “Ina mataina kaa, ko God ke ogaoga afainira noga ka inuni! Ingaia ke pagai ogaoga afainira, mi ngaira ka mai taotao rai kare iana. Ingaia o God mereana ke pagai ogaoga afainira mi ngaia ke pagai taotao rai God iata. ⁴ Ingaia ke pagai tatarofi ka tawoni na maata panira. Ngai kana ka inuni ke marefa nai pagai maemae, ai fafaitakoi, kai angiangi makai fafafara. Arani mwarao inago igi ke marefa noga.” ⁵ Hoi mina mwane ne kokoa iga na papa ia ke woi, “Ina mataina kaa kau fagafaorura fato ka arani mwarao! Ui segera ka mwarao gaa, suria na woita gaa ke mwora mako gira fagaugurira ana. ⁶ Arani mwarao ke ofu ngai gi! Inau kaa kau fagainagota na arani mwarao mi inau ki murita na arani mwarao nikao, anegana mina qotona. Tangaa otai mwa ne oqani tonofa inau kau pagai wawatea ke totono iga ka qaurungana wai ni tafinga, make marefa ni gira tataraga ana rainia. ⁷ Otai wau mwa na inuni na tatangamworani raorao mwa tangaa na qotona na ogafa ke pagai tawora paniau ka arani mwarao gaa. Ingaia ke pagai taotao rai kareku, mi inau kau pagai taotao rai God iana. ⁸ Hoi, maake marefa tangara ki tana inuni, mangara na inuni na konekone, mina ani ne marefa nai tangamworani, kee na ani na mangataera, kee na ani na nafunafu piri, kee na ani na tatanui na agua ni oraoraga ana, kee na ani na fafaikuasi, kee na ani na wowogasira na nunuta na mwarao purua, kee na ani na inuni na qaqaqangara. Nga na agua iata ka maratana na agua ne tarau afainia na guana fau na sulfa kana. Ingaia na ruata na maefa ngai ke.” ⁹ Hoi tana fitangita ne etagai na enjel ne epiu na taura na apira ne wonu rai fagafatongina na fagamamasiaganifa ne epiu igi ke rao mai tangau make mai woi, “Ui rao mai qai fagarego rainia ka fefene ne auragi ke, ingaia na fefene ne auragia na Karena Sip ia.” ¹⁰ A Figona Apuna ke mai qanufiau, mina enjel ia ke toraiau akau nga ina ngengetena na fungana ne akau wau nga, make fagareau rainia ki Jerusalem, a finua rafa ne apuna, ne wato mai i Heven pania ko God, ¹¹ make totogatoga rainia ka rarafana o God. A finua rafa ia ke totogatoga manga na guana fau manimani na guana fau na woisia na jaspa ia ne taragani wau manga na potere ia. ¹² Afinua rafa kena ka apainaria rainia ka romana na para ne akau wau, maka kasi ka maani na tangafurua ne etagai matara erua. Mina enjel na tangafuru matara erua ka onoono suri na maani gena. A maani na para gena ka segera fato iga ka atata na tangafurua matara erua na waro ni inuni i Israel ira. ¹³ Arani para gana ka kasi ka maani ne eoru iga ka rawona ne etagai. Ani ne eoru kina apanana ne akau iga na arito kana, mina ani ne eoru iga ka apanana iga na maratafa kana, mina ani ne eoru nikao kina apanana iga na maraworosi, mina ani ne eoru kina apanana ne susu iga na arito. ¹⁴ A para iga na finua rafa ia ka parara iga ka guani na fau ogaoga nga na tangafuru ne etagai matara erua, na segera iga na atata na tangafuru ne etagai matara erua na aposol iana na Karena Sip ia. ¹⁵ Ingaia na enjel ne tamasi tangau kaa, ke taua ka ate ne qorafu na tagarafia rainia na gol tangai fagaarari ana rainia ka finua rafa, a para iana mina maani gena. ¹⁶ A finua rafa ia ke faiaworagi nga ka aqaoqaofanana mina qorafufanana nikao. Ingaia na enjel ia ke fagaararia ka finua rafa ia rainia ka ate iana ne fafagaararia rainia ia make akau nga ke taua ka tangarau ne etagai matara ka tangafuru ne erua na qera (120,000) na wairina ka qorafufanana mina aqaoqaofanana mina akaufanana ke manga mwa na qorafufanana ia nikao. ¹⁷ Ingaia na enjel ia ke fagaararia ka para nikao make akau ke taua ka tangafuru ne eoru matara eono na tafangana (36) ka akaufanana isuria ki ngatakena na ate ne tagara rainia kena. ¹⁸ A para igi ka tagarafia rai ka guani na fau na woisia rainia na jaspa, mina finua rafa ia ka tagarafia rainia ka gol magafuru mwa, ne taragani wau manga na potere ia. ¹⁹ Aguana fau ogaoga na parara iga na para iga na finua rafa ia ka fagamafera rai ka arani fau manimani faifaitigi. A faganegana a fau ogaogoa ka woisia rainia ka jaspa ne totogatoga, aruata ka fau na safaea ne ramaramaga, aoruta ka fau na agit ne toretorega, afaita ka fau na emaral ne maramarawa, ²⁰ arimata ka fau na onikis ne toretorega, aonota ka kanilian na fau ne memeraga wau nga, apiuta ka kouts na fau ne raranitorakaga, awaruta ka beril na fau ne marawaguagua, asiwata ka topas na fau ne raranitorakaga, atangafuruta ka kalsedon na fau ne raramarawa, atangafuruta matara etagai ka tokois na fau ne ramaramaga, mina tangafuruta matara erua ka amitis na fau ne memera rotorotoaga. ²¹ A maani na tangafuru ne etagai matara erua igi ka tangafuru ne etagai matara erua nikao na mwarao manga na guni na fafaaga ne mwaromwarora igi. Arani maani gena ka tagarafi fato rainigi ka mwarao manga na guni na fafaaga ne mwaromwarora igi faitigi. Arani tara iga na rarona finua rafa mwa kana ka tagarafi rai ka gol magafuru, ne taragani wau manga na potere ia. ²² Inau ke marefa qai rea ka Ruma ni Wogasifa irarona finua rafa kena, suria nga na Arafa o God na faufugana mina Karena Sip ia karu ogaoga i finua kena. ²³ A finua rafa kena ke marefa ni oqania ka arito mina fagaifa naru sisinaia suria nga na rarafana o God ke sinasina i finua kena mina Karena Sip ia ke mamawe manga na laet tangaa. ²⁴ Arani finua rafa fato ka tataworagofa iga ka mawetana iga finua rafa kena mina arani arafa ni finua ka pagai totora mai ka rurugua iata iga. ²⁵ A maani na finua rafa gena ke marefa nai pagai pupurui, nga ne tatafatafa tatarau iga ka tangiana, suria marefa ni gira qongiana. ²⁶ Arani mwarao koro mina rurugua iata na arani finua rafa ka pagai totora mai irarona finua rafa kena. ²⁷ Hoi mina mwarao mwa na aera ke marefa ni pagai qauqanu irarona finua rafa ia. Ainuni na aera na mangatata mina inuni na tamasi qaqangara ke marefa nai qauqanu iga. Ingaira mwa na inuni na segera na atata iga na puka ni tafinga iana na Karena Sip ia ka pagai qauqanu irarona finua rafa kena.

¹ Hoi enjel ia ke fagareau nikao rainia ka wai ni tafinga, ne taragani wau ke manga ne totogatoga ia ne afe mai pania ka papa ne kokoa iga o God mina Karena Sip ia ² make afe wato ina gupuna tara rafa iga na finua rafa ia. A rauna ne erua na wai afeafe ia ke ura fato iga ka apenagai ni tafinga, make gugua raorao mwa iga ka tangafuru matara erua na fagaifa iga na farisi, mina afani ka tatanui rai fagakorofira ana ka arani inuni ina arani finua rafa. ³ E marefa wau ka mwarao ni ngangaroitai o God ni taotao irarona na finua rafa kena. O God mina Karena Sip ia karu kokoa ina papa iataurua irarona finua rafa kena, mina kare iana o God ka pagai wowogasia ko God. ⁴ Ingaira ka pagai rerea ka maana, mina atana ka pagai segera i raeta. ⁵ A finua kana ke marefa ni pagai qongiqongi, ke marefa nai toria ka laet, kee na arito ni mamawesira, suria nga na Arafa o God ke pagai mamawesira, mi ngaira gena ka pagai arafa mangara na Mwane Rafa ira tarai tarai. ⁶ Hoi mina enjel ia ke woi tangau, “A woita gaa ke mwora wau ngai ge, mako gira fagauguri ana. Arafa, o God ne fagaotora na figona iata na maurukari ira ke kasia nikao ka enjel iana ia tangai fagarera ana rainia ka kare iana ka mwarao ne marefa ni qorafu wau make mai worawora.” ⁷ Hoi mo Jisas ke woi, “Mui rongorongo! Inau ke marefa ni qorafu wau makau arao mai! A wagefa tangara ka inuni na rongora na tamasinga iata na maurukari na segera irarona puka kaa!” ⁸ Inau o Jon, kau rongora makau regi ka arani mwarao gaa. Hoi ka mataina nau rongora makau regi fato, inau kau aqa wato i uwana na enjel ne fafagareau rainigi na mwarao gaa igi, makau katofi wogasia ana. ⁹ Maake woi tangau mai, “Siana kui wowogasiau! Inau kaa, ka mwane ni tagaranifa manga igo kena mina goamu ira na maurukari, mina arani inuni na arao suri na tamasinga irarona na puka kaa. Ui wogasia mwa ko God! ¹⁰ Siana ko pupunufi ka tamasinga ne fura mai pania ko God na segera irarona na puka kaa, suria na mataina tangai na mwarao gaa ne pagai worawora ke fagarangi noga. ¹¹ Otai wau mwa ne aera ke nga ne tatanui mwa ka agua ne aera, mo otai wau mwa ne aera na mangatana ke nga ne aera ka mangatana. Otai mwa ne korokoro ke nga ne tatanui mwa ka agua koro, mo otai wau mwa ne apuna ke nga ne apuna mwa.” ¹² O Jisas ke woi, “Mui rongorongo mai! Inau ke marefa ni qorafu wau makau arao mai! Inau kau pagai totora mai ka rogufanani na tagaranifa iata na inuni na nafuni afainiau, tangai orisi aporo ana tangara faitigi isuri ka mwarao ne tanui. ¹³ Inau kaa kau fagainagota na arani mwarao mi inau ki murita na arani mwarao nikao, anagona mina murina, anegana mina qotona. ¹⁴ A wagefa tangara ka inuni na wasira na gafu iata ke siki. O God ke mafata rainira ka ramwofa rai ngaua ana na guana na apenagai ni tafinga maka qauqanu iga na maani tangai na finua rafa kena. ¹⁵ Hoi mi metara fura na finua rafa kena, ka ogaoga iga ka inuni na tautanu mara aoo, maka fafaikuasi, mina ani na qaqaga tatanu afainira tana inuni, mina ani na nafunafu piri, mina ani na wowogasira na nununa na mwarao purua, mina ani na oqani tamasi qaqangara ana maka tamasi qaqanga raorao mwa. ¹⁶ Inau o Jisas, kau kasia na enjel iaku kaa, tangai tamasi ana ka mwarao gaa tangagamu ina siosi. Nga inau ke manga na wagana apenagai ne akau mai, nau wora mai pania ka woraworanifa iana o Deved na arafa ni finua. Inau kaa ke manga na feegu ni tangi ne togatoga wau.” ¹⁷ A Figona Apuna mi kani iana na Karena Sip ia karu wowoi, “Ui rao mai.” Arani inuni na rongora na agua gaa makai woi nikao, “Ui rao mai.” Otai wau mwa ne mamata na riona, maki rao mai. Otai wau mwa ne oqani tafinga, maki rao mai ki tawoa ka wai ni tafinga ne ma ni gira tataraga ana rainia. ¹⁸ Inau o Jon kau tamasi raramwofaga nga tangara ka arani inuni na rongora na tamasinga ne fura mai pania ko God irarona na puka kaa. “E rao ke manga tana inuni ke ururuia wau nikao ka tana mwarao rainigi ka mwarao iga na puka kaa, o God make pagai watea wau nikao tangara ka fagamamasiaganifa manga ne woisia na puka kaa igi. ¹⁹ Kee manga tana inuni ke tawora fura rao ki tana tamasinga ne fura mai pania ko God ne taotao ina puka kaa, o God ke pagai tawoa pania nikao kina wotowoto iga na guana na apenagai ni tafinga ia mina finua rafa ne apuna ia na woisia ina puka kaa ia.” ²⁰ A mwane ne mafata rai na tawatawanifa rai na arani mwarao gaa, ke wowoi, “Aa. Inau ke marefa ni qorafu wau makau arao mai!” Ngaia ngai ke na, ui rao mai na Arafa o Jisas! ²¹ Naka ka korofa iana Arafa o Jisas ki afainigamu na kare iana o God. Amen.