Filipae

Filipae

¹ Inau o Pol afainia o Timoti, na kare iana o Kraes Jisas. Igamirua kamuru sege wau tangara ka arani inuni na apuna tangaa o God na faku afainia ko Kraes Jisas i Filipae, maka muru sege wau tangara ka mwane rafa mina ani na fafaitamani ina siosi kena. ² Au fagarafe woi o God emaka mina Arafa o Jisas Kraes ki koro tangagamu, mwarao maka mui ogaoga iga ka marapefa. ³ Au tangasia ko God iaku ina arani mataina nau tatakosigamu. ⁴ Mina mataina mwa nau tatamasigamu fato ina fagarafenga iaku, e tanuau kau wagewage wau, ⁵ suria igamu kamu tamaniau rai tarofainia ana ka tarofa koro ina faganegana na mataina inago raorao make taua na mataina kaa. ⁶ Au girara nga o God ke faganega na tagarafa koro i maurifamiu, make tatagarafia raorao make fafagaofua iga ka tangiana ne aporo mai o Kraes Jisas. ⁷ Inau kau tatakosigamu raorao mwa, hoi make arariau rai takosigamu ana manga ke, suria igamu fato kena kamu tamaniau iga ka tagarafa ne wateau o God. Manga na kasiau ina peresin, kee i metara makau fafakania ka tarofa koro mina ura pusia ana. ⁸ Aa o God mereana ke girara woi inau kau komanigamu wau, manga o Kraes Jisas ne oqa koro tangagamu ia. ⁹ Au fagarafe woi na oqa korofa iamiu ki rafarafa wau nga rai tanui ana ka giraranifa iamiu ke rafarafa maka mu onoono girara ana ka tarani koro. ¹⁰ Ngatakena namu gira ono girara ana ka tarana ne oto wau nga. Hoi ina mataina o Kraes ne aporo mai, maka mu tataragani make marefa ka mwarao afainigamu. ¹¹ Hoi o Jisas Kraes ke tatamanigamu kamu arao suri ka taufa iana ne oto, rai tako fagaakaufia ana ko God mina fagaakausia ana ka atana. ¹² A goaku koro igamu, au oqanigamu mu gigirara ka agua ne wora tangau gaa, nga ngai gi ke tatamania ka tarofa koro ke qau mwa ke arao kaa. ¹³ Arani mwane i Rom na onoono suria na peresin kaa mi tana mwane rao gaa ka girara woi inau kaa, ka kasiau ina peresin suria nau tatagara tangaa ko Kraes. ¹⁴ Hoi ki suria na ogafanaku ina peresin kaa, ke tanura ka arani goaka iga na Arafa gaa ke susu wau ka mangatata make marefa nai maagu rai tarofainia ana ka woita iana o God. ¹⁵ Ua tana mwane gaa ka tarofainia ko Kraes suria na kikisiau maka maeronganiau. Hoi mi tana mwane gaa ka tarofainia suria na nafunia ka takofa ne oto rai tagara ana. ¹⁶ Ngaira ka oqa koro tangau maka girara woi o God ke kasiau mai kaa tangai fagaqao ana rainia ka tarofa koro ne mwora. ¹⁷ Hoi nga mwa na mwane na kikisiau gaa ke marefa nai mwora. Ngaira ka tarofainia ka taufanana o Kraes maaka oqani tanua ana mwa ka agua ni asa tangau ina peresin kaa. ¹⁸ Tana inuni gaa ka mwora mi tana ani ke marefa. Hoi make manga na manga ngai ge, mi inau kau wagewage mwa na mataina na tatarofainia na taufa iana o Kraes. Nga na mwarao nau takosia kaa ngai ke. Au wawagewage raorao mwa, ¹⁹ suria nau girara woi na fagarafenga iamiu mina faitamaninga ne rao mai pania na Figona iana o Jisas Kraes, ke gira tanua ana kau tataragani. ²⁰ Au oqania wau makau tako nganganiaga woi inau ke marefa qai oqani tanu ana ka agua qai mamaaki rainia i maana o Kraes. Hoi ina mataina kaa ki inau kau oqania woi qai gatagata rai fagaakaufia ana ko Kraes iga ka arani mwarao nau tatanui, manga nau tafitafi kee nau maemae. ²¹ Rao ki inau kau tafitafi makau tafitafi tangaa ko Kraes, hoi make manga nau maemae makau nanafuni tefa wau nga. ²² Inau ke marefa qai girara ka agua nau oqania. Hoi ke manga nau tafitafi mwa makau tatagara tangaa ko Kraes. ²³ Au tako fairuagai ngai ke. Au oqania qai mae rai rao tangaa ana ko Kraes, suria nga na mwarao ne koro tefa wau nga ngai ke. ²⁴ Hoi makau oqania mwa qai tafi rai tamanigamu ana. ²⁵ Au girara menamenai, au ogaoga rai tamanigamu ana kamu arao suria mwa ko Kraes, ki mwarao maka mu wawagewage iga ka tangamworanifa iamiu. ²⁶ Ua suria nau aporo wau tangagamu, igamu kamu qaqaqaeaga wau rainia ko Kraes Jisas. ²⁷ Tefa wau nikao, mui arao suria nga ka tarana ne oto suria na tarofa koro rainia o Kraes. Hoi ke manga nau arao wau, kee nau rongogamu mwa rainigi ka taufa iamiu, makau gigiraragamu woi igamu kamu ura gatagata mwa iga ka ramwofa iana Figona Apuna maka mu tagara faku rai tangamworani ana rainia ka tarofa koro. ²⁸ I sususu ka mangatamiu tangara ka inuni na totogirigamu. Nga na nganganiaganifa iamiu ke fafagaqao tangara woi o God ke tatamanigamu make pagai fafagaerisira. ²⁹ O God ke usuigamu, make marefa mwa woi namu tatangamworani mwa rainia ko Kraes, maka mu apeape mamasiaga tangaa nikao. ³⁰ Igamu kamu reau nau ape mamasiaga maka mu rongoau nau apeape mamasiaga kaa. Hoi ki igamu maaka mu apeape mamasiaga iga ka tarana mwa ngai ke.

¹ Igamu kamu faku afainia ko Kraes make fagagatagata mangatamiu, mina oqa korofa iana ke fagakoro mangatamiu. A Figona Apuna ke faku afainigamu, maka mu nafunia ka korofa tangai takosira ana rao ka inuni. ² Mui oga iga ka fakunga rai fagaqao ana rainia ka oqa korofa tangagamu faitangai maka mui faku iga ka taa mu tatakosi manga na inuni ne etagai mwa ki igamu. E kena kamu tanuau kau wagewage wau nga! ³ Siana rai tako faikekesi ana mina qaqaeaga ana wau, maaka mui fagamwarufigamu mina takosira rafa ana ki tana inuni tefarigamu mereamiu. ⁴ Siana rai takosi ana ka apanana iamiu mereamiu mwa maaka mui tatakosira ka apanana iata rao na inuni nikao. ⁵ A takofa iamiu ki manga na takofa iana o Kraes Jisas ia, ⁶ Inago mai, ko Kraes ke manga wau nga o God ia. Ngaia ke faiaworagi afainia ko God maake marefa woi ni rapasia rai nafunia ana. ⁷ Ngaia ke fagawatofia mereana, make mai wora mwa manga na inuni ni fagatagarafa, na mataina ne mai oga maraigia. ⁸ Ngaia o Kraes ke fagamwarufia mereana, make tau woita iana ko God, raorao make mae nikao ina taotao woro. ⁹ Iga na agua ngai ke, o God ke toraia akau ko Kraes rai oga ana iga ka agua ne akau tefa nga, make mafata rainia tangaa ka aata ne rafa tefarira ka arani ata. ¹⁰ Hoi ka arani inuni i Heven kee ina ano kaa mina arani inuni na ogaoga iga na agua iata na inuni na qani mae, ka qoqogurai uwa rai wogasia ana ko Jisas. ¹¹ Hoi rai kasia akau ko God emaka, ngaira fato ka wowoi, “Ngaia o Jisas Kraes ka Arafa!” ¹² A goaku koro igamu, igamu kamu tautau woita raorao mwa ina mataina inau afainigamu, hoi ki na mataina kaa nau ogaoga fagatau panigamu maka mui tautau woita. Ua mui tatagara afainia ka maagufa mina gisigisi ana rai fagaofua ana menamenai ka tagarafa iana o God, namu nafunia na tafinga kena, ¹³ suria o God ke tagarafigamu woi igamu kamu oqani rai tanui ana na takofa koro iana. ¹⁴ Siana rai taniu ana ka tagaranifa afainia ka fafarau ana mina faimangari ana, ¹⁵ ki mwarao maka mu tataragani make marefa ka taa nai rorogoi afainigamu, woi i karena o God ki igamu. Ua kamu oga afainira ka inuni ne marefa ni oto na ogafanata make aera. Igamu kamu mangara na feegu na togatoga ina wawaiaro kana ia rainia namu fagaqao rainigamu woi igamu kamu qao getegamu panira ka inuni iga na ano kaa, ¹⁶ maka mu tamasi tangara na woita ne mafata rainia na tafinga. Hoi ki gaa na mataina ne aporo mai o Kraes, au qaqaeaga wau rainigamu, suria nau girara woi na tagaranifa iaku ke marefa qai maromwoaga purua. E manga na taritari ana nau tefa iga ia. ¹⁷ A fagauguringa iga na Arafa mina tagaranifa iamiu ke mangai na mafatanifa na susungi tangaa igi. Manga na nafuia funuiau, mina gapuku ka meria afainia ka fagauguringa iamiu afuria ka raperape ia. Rao ki manga ngai kana, inau kau wawagewage wau afainigamu. ¹⁸ Iga na tarana nikao ngai kana maka mu wawagewage afainiau nikao. ¹⁹ Hoi manga ne koro iga na Arafa Jisas, inau kau oqani kasia wau ana ko Timoti tangagamu, suria nau oqani girara ana menamenai ki ngatakena nga na maurifamiu, maki inau qai wawagewage nikao. ²⁰ Nga ngaia mwa kaa ke takotako rafa rainigamu, make marefa ki tana inuni iga ni manga ngaia kaa. ²¹ Tana mwane gaa ka tatakosi mwa ka apanana iata mereata, marefa ka taa ne oqani o Jisas Kraes. ²² Hoi igamu kamu qani girara ka taufa iana o Timoti. Ngaia kaa ke tagara afainiau rai tarofainia ana ka tarofa koro manga na kare ne tatagara afainia emana ia. ²³ Manga nau gigirara ka taa ka tanuau rainia, au tako gatagata rai kasia ana wau tangagamu. ²⁴ Manga ne koro tangaa mwa ka Arafa, inau mereaku kau pagai arao mafarufaru wau tangagamu. ²⁵ Au takosi kasia ana wau ko Epafrotaetas na goaku koro wau tangagamu. Ngaia kaa ka mwane ne tatagara afainiau make qanu afainiau iga na mae kaa, na mwane namu kasia ke mai onoono suriau ia. ²⁶ Hoi ki na mataina kaa ke oqani wau regamu ana. Ngaia ke tako rafa wau suria namu rongoa woi ne matoro wau ia. ²⁷ Hoi make mwora wau ngaia, e matoro rafa wau make fagani mae. Nga mwa o God ke takoia, make fagakorofia. Mo God ke takoiau nikao, suria manga ni mae ka qai mae wau rai faitakoi ana. ²⁸ Hoi kina mataina kaa, kau oqania wau rai kasia aporo ana nikao, woi igamu kamu wawagewage namu wau rerea, mi inau ki siana qai takotako rafa raini_gamu. ²⁹ Mui wawagewage rai kanakanasia ana manga namu kanakanasira na arani goaka iga na Arafa, maka mui takotako fagafigaira ka ani na manga o Epafrotaetas. ³⁰ Suria ngaia ke fagani mae iga ka tagarafa tangaa o Kraes, make kasi manawana mereana tangai tamaniau ana rainia ka faitamaninga ne marefa mu gira tanua ana tangau.

¹ Hoi goaku igamu, a fagafatongina, mui wagewage suria namu faku afainia na Arafa. Marefa ka mwarao ni aera tangau rai segera ana nikao ka mwarao nau qani segera wau igi, suria na woita iaku gaa ke gira tamanigamu ana ke marefa ko otai ni gira fagaerisia ana na tangamworanifa iamiu. ² Mui fifinarura ka aoo ira! Ngaira gena ka inuni na tanui ka mwarao ne aera wau maka fagausuri rai retera ana ka apeta rai fagaqao ana woi ngaira ka kare iana na Arafa . ³ Hoi nga igia ka kare iana mwora na Arafa, suria na wogasi iga ka ramwofa iana na Figona iana o God maka qaqaeaga suria na faku afainia ko Kraes Jisas. Marefa nai fafagauguri ka mwarao na tanui rai na apeka. ⁴ Fenaka nau fagaararari, maake ma qai fagauguria woi ni fafagatafiau. Hoi ke rao ko otai ne qaqaeaga rai na mwarao na tanui rai na apeta, nga inau qai qaqaeaga nga tefarira. ⁵ Inau kaa ka mwane Israel nau wora iga na waro ni inuni iana o Benjamin, mina arani inuni iga na waro ni inuni iaku gaa ka ai Hibru. Ina mataina na tangiana ne ewaru ne tefa nau wora ka wateau ka fara fagagirara kena. Makau rao suri menamenai ka Lo iata na Jiu suria inau ka Farasi. ⁶ Inago ki inau kau gatagata nga rai tagara ana tangaa ko God, makau fafagaqao maata ka inuni ina siosi. Rai oga otooto ana isuri ka mwarao na Lo ne woisi, inau ke marefa ka aerafa qai tanua. ⁷ Hoi ki inago ka mwarao gaa kau woi ne koro tangau, hoi mina mataina kaa, ka mwarao gaa ka mwarao purua mwa tangau, suria nau tangamworani mwa iga ko Kraes. ⁸ Mina arani mwarao ne koro tangau gaa ka mwarao purua, make ma qai tako rafa rainigi. Nga na mwarao ne tefa nga, ki inau qai gigirara nga menamenai ko Kraes Jisas na Arafa iaku. Au kasi wau ka arani mwarao rai rao suri ana, qai taua ko Kraes ⁹ mina faku mwora ana afainia. Marefa woi qai oto iga ka apanana iana na Lo. Inau kau oto mwa suria nau tangamworani iga ko Kraes. Au tangamworani make nga o God ke fagaotoau kau oto iga ka faioqanifa iana. ¹⁰ Nga mwa na arani mwarao nau oqania, kau oqani girara ana ko Kraes mina ramwofa ne ragaia ke tafi, makau oqani ape mamasiaga ana mina mae ana manga ngaia ia. ¹¹ Hoi ki inau nikao minga qai afafaraga pania ka maefa, manga ngaia ia. ¹² Inau ke marefa qai woi nau qani taua fato noga ka taufa ne oto iana o Kraes Jisas. Marefa ngaia. Hoi makau rapasia rai tawo ana ka woriku ne qani fagananaua tangau kana. ¹³ A goaku igamu, marefa qai woi inau qai tawoa noga. Hoi maka mwarao mwa nau tanua, kau qono rai ka agua imuriku makau fagaeramwo mwa tangaa ka woriku inagoku kana. ¹⁴ Au rapasia mwa qai taua rao mwa ka woriku. Suria rainia o Kraes Jisas, God ke oniau rai rao ana tangaa i Heven rai oga tarai ana afainia. Nga ngaia na woriku ngai kana. ¹⁵ Igia fato na akau mai koro noga, ke araria nai takotako manga ngai ke. Make rao ki igamu kamu takotako getegamu rainia, ua nga o God ke fafagaotoa ka agua kaa tangagamu. ¹⁶ Hoi make manga ne manga ifai, igia kai arao suria nga ka mworafa na qani girara kaa. ¹⁷ A goaku igamu au oqanigamu namu arao suri ka fagaqaonga iaku maka mu qaoqaofagagara rai ka taufa iata na inuni na rao isuri na fagaqaonga nami wategamu gena. ¹⁸ Au qani megamu tamasi rainia noga ia makau faitakoi wau nau woiwoisia wau nikao kaa, na arani inuni ka maerongania wau ka taotao woro iana o Kraes. ¹⁹ Ina mataina na inuni ngai ge na maemae, o God ke fafagaerisira wau nga, suria ngaira ka tatakosi mwa ka mwarao tangai mwa na apeta mereata maka qaqaqaeaga mwa rainigi ka mwarao na tatanui ne aera. Arani mwarao na tatakosi gena ka mwarao mwa tangaa na ano kaa. ²⁰ Hoi mi igia ka inuni mwora tangaa i Heven, ka marumu mwa rai nasia ana ka fagatafi iaka ko Jisas Kraes na Arafa ne arao mai kana. ²¹ Ngaia ke nafunia ka ramwofa rai ono suri ana ka arani mwarao, make pagai orisi ka apeka i ano kaa ka qaoqao manga na apena mereana i afaafa.

¹ A goaku koro igamu, au oqanigamu namu mworamwora tangaa ka Arafa. Au oqa koro tangagamu makau oqania wau rai regamu ana. Igamu kena ka wagefa rafa tangau, maka mu fagaqao rainia ka tagarafa iaku ne koro. ² Euodia mika Sindiki, au nongigamurua rai oga menamenai ana faitangai, mangara na kare iana na Arafa ira. ³ Hoi mi igo no qani tagara faku mai afainiau ia, kau nongigo rai tamaniraurua ana. Nga na fefene na tamaku na qani tagara afainiau rai tarofainia ana na tarofa koro afainia ko Klemen mi tana inuni rao nikao gena. Na atata na inuni gena na segera noga ina puka ni tafinga. ⁴ Mui wawagewage raorao mwa rainia ka Arafa. Hoi kau woi tangagamu nikao, mui wagewage. ⁵ Mui ogaoga mamarapeaga afainira ki tana inuni suria na Arafa ke suguia mwa ni rao mai. ⁶ Siana rai tako rafa ana rai ki tana mwarao, hoi maka mui fagarafe mwa tangaa ko God. Afainia ka tangasifa i maurifamiu mui nongia rai ka faioqanifa iamiu. ⁷ Hoi o God ki ono fagakorofigamu afainia ka marapefa ne marefa ko otai ni gira tako matafa ana rainia. Nga na marapefa ne taotao i maurifamiu mina mangatamiu ke tanugamu ke ma mu gira tako rafaera ana, rainia igamu namu faku afainia ko Kraes Jisas. ⁸ Hoi na fagafatongina woita iaku, na goaku igamu, mui nakai ka mangatamiu mwa iga ka taa mwa ne mwora mina mwarao rafa. Mui tatakosi ka mwarao ne oto mina mwarao ne taragani. Mui tatakosi ka farigoatanifa mina agua ne qao koro. Siana rai marape ana rai takosi ana ka taa ne koro wau mina agua na rongora na inuni ne koro na oqani. ⁹ Ua mui arao isuri ka taa nau qani fagausurigamu rai, mina mwarao namu rongora paniau, maka mu regi nau tanui. Hoi mo God ne mamafata rainia na marapefa, ki ogaoga afainigamu. ¹⁰ Inau kau wagewage wau makau tangasia ka Arafa suria namu takosiau nikao kena. E mwora wau ngaia, igamu kamu tatakosiau raorao mwa, hoi make marefa mu nafunia ka mataina rai tamaniau ana. ¹¹ Inau ke marefa qai farau rainia woi nau nafuni sisitai mwa. Inau ke koro mwa tangau, manga na taa mwa ne akau mai tangau. ¹² Inau kau girara ka taa manga ne mamarefa ka mwarao qai nanafunia kee nau nanafuni mwarao rako. Hoi make koro mwa tangau ka ani mwa na mataina. Au girara ngatakena nau ogaoga marape mwa manga nau masumasu kee nau magau. Ngatakena mwa nikao manga na ogafa koro tangau, kee ne mamarefa. ¹³ Ngaia o Kraes ke wateau ka ramwofa rai qanufi ana ka agua ne takeau. ¹⁴ Hoi ke koro wau namu tamaniau iga na mataina nau nafuni ne qara tangau gaa. ¹⁵ A goaku igamu i Filipae, mu takosia ka mataina nau tarofainia na tarofa koro tangagamu ia. Ina mataina nau rao pania i Masedonia ia, ke marefa wau ki tana siosi gena nai tamaniau, nga igamu mwa ka siosi ne etagai namu tamaniau rainigi na mafatanifa iamiu. ¹⁶ Iga na mataina nau ogaoga i Tesalonaeka maka mu tatamaniau raorao mwa, iga na mataina ne marefasiau na mwarao. ¹⁷ Inau ke marefa qai rarapasia rai tawora ana ka mwarao panigamu, makau oqanigamu namu tawora ka korofa rainigi ka mafatanifa iamiu gaa. ¹⁸ Arani mwarao nau oqani kau tawora fato noga afainigi ka matarani nikao, rainia ka mafatanifa iamiu ne torai mai o Epafrotaetas ia. A mafatanifa ngai ge ke manga na mafatanifa ne sigini mamaki igi ne qao koro i maana o God. ¹⁹ Hoi o God ke gira wategamu ana ka arani mwarao namu oqani, iga na arani mwarao koro ne tefa iana, tangagia na ani na faku afainia ko Kraes Jisas. ²⁰ Ai tagarainia akau ka atana o God emaka tarai tarai mwa. Amen. ²¹ Mui mafata rainia ka tamasinga koro tangara ka inuni na apuna tangaa o God na faku afainia ko Kraes Jisas. A kare iana na Arafa afainiau gaa maka kasigi wau nikao ka tamasinga koro iata. ²² Arani inuni na apuna tangaa o God ka kasigi wau ka tamasinga koro iata, tefa wau nikao panira ka ani na tatagara ina ruma iana na Mwane Rafa i Rom. ²³ Au fagarafe woi na korofa iana na Arafa o Jisas Kraes ki afainigamu.