Filimon

Filimon

¹ Inau o Pol nau kokoa irarona peresin suria nau tagara tangaa ko Jisas Kraes. Inau afainia ka goaka o Timoti. Igamirua kamuru sege wau tangago Filimon, na goamirua koro na tagai tatagara faku tangaa o God. ² Migamirua kamuru sege wau nikao tangaa ka siosi na fakufaku i ruma ia mu ia, afainia ka Apia na goaka, mi afainia ko Akipas ne tatagara tangaa na Arafa manga igamirua kaa ia. ³ Inau kau fagarafe woi o God Emaka mina Arafa ia ka o Jisas Kraes karu oqa koro tangagamu makaru mafata rainia ka marapefa afainigamu. ⁴ O Filimon, arani mataina kau fafagarafe tangago inau kau tatangasia ko God rainigo, ⁵ suria nau rongoa ka tangamworanifa ia mu tangaa na Arafa ia ka o Jisas, mina faikomanifa ia mu tangara ka arani inuni na apuna tangaa o God. ⁶ Au fagarafe woi igo kui mamafata tangara tana inuni suria na tangamworanifa ia mu, mako gigirara menamenai nga ka mwarao ne tatamanigamu rai o Kraes kamu tatanui. ⁷ A goaku koro, taufa ia mu tangai komani ana ka inuni na apuna tangaa o God ira ke tanua ka takofa ia ta ke korokoro. Ngaia ngai ke igo no tanua tangau kau wawagewage wau, no fafagagataniau kaa. ⁸ Suria igaurua fato karu tangamworani rainia ko Kraes, make araria mwa qai girugo ngai ke, ⁹ maaki suria inau kau faikomani wau tangago, inau kau oqania qai nongigo mwa ngai ke. Inau ko Pol na mwane rafa nau tatamasia fura na tamasinga iana o Jisas Kraes, mina mataina kaa inau kau kokoa irarona na peresin suria inau kau tangamworani rainia ko Jisas Kraes, ¹⁰ inau kau nongigo ki igo makui korokoro tangaa ko Onesimas. Suria ina mataina nau ogaoga irarona na peresin, kau fagagirara rainia ko Kraes, hoi ngaia ke manga i kareku ia ina mataina kaa. ¹¹ Inago ia ke marefa ni gira tamanigo ana, mina mataina kaa ke gira tamanigaurua ana fato. ¹² Fenaka nau komania wau, makau kasia aporo wau tangago kaa. ¹³ Mwora wau inau nikao makau oqania ni oga afainiau ki tawoa ka nanamu rai tamaniau ana iga ka mataina nau kokoa irarona peresin kaa suria nau tatarofainia ka tarofa koro. ¹⁴ Mi inau ke marefa qai ruruia sio manga ne marefa nui marumusia. Mi inau kau oqanigo nui rao suria ka takofa ia mu mereamu rainia ka korofa ia mu, ke marefa qai girugo rainia. ¹⁵ Wari o Onesimas ne rao panigo suria ka kere mataina aqouqou mwa kaa, ki mwarao maki aporo mai ke mai ogaoga afainigo mwa, ¹⁶ maake marefa ni taotao rai mwane ni tagara ana purua mwa. Onesimus ke tefarira rao nikao ka mwane ni tagaranifa purua ira. Ngaia kaa ka tamaku mi inau kau oqania rafaera wau, migo wari ko oqania tefa wau, suria ngaia ka mwane ni tagara ana purua ia mu mina goamu koro nikao ne rao suria na Arafa. ¹⁷ Hoi, ke manga no tatakosiau manga woi inau ka goamu koro, makui kanakanasia ko Onesimas manga no kanakanasiau ia. ¹⁸ Mina taa mwa manga ne qani tanui ne marefa ni koro tangago, mina mwarao ne kaonimu panigo, ko nanakai tangau kau mai orisi ka mwarao gena. ¹⁹ Inau o Pol, kau segea ka tamasinga kaa, rainia ka rimaku mereaku. NGA INAU O POL KAU ORISI APORO WAU TANGAGO. Migo ki siana ko qoqono rainia ka kaoni iamu paniau suria nau qani tamanigo rai tawoa ana ka tafinga faoru. ²⁰ A goaku koro, naru arao suria o Kraes na Arafa ia ka, au oqanigo no kanakanasia ko Onesimas ke tanua ka takofa ia ku ki korokoro. ²¹ Inau kau segea ka tamasinga ke rao wau tangago suria nau tako nganganiaga no tanua ka agua nau nongigo rainia, makau girara nikao no gira tanui ana ka mwarao koro tefaria ka tamasinga ia ku gaa. ²² Tana mwarao nikao. Inau kau oqanigo nui fagananaua ka agua tangau qai kokoa iga, suria nau tangamworani o God ke rongoa ka fagarafenga ia miu, ke tanua kau taugamu aporo nikao. ²³ O Epafras ke ogaoga irarona peresin afainiau kaa suria ngaia ke tagara tangaa ko Jisas Kraes, mi ngaia ke woisia ka tamasinga koro tangago. ²⁴ O Mak mo Aristakas mo Demas mo Luk, ngaira nikao maka tanua ka tagaranifa faku afainiau, maka woisia ka tamasinga koro tangago nikao. ²⁵ Inau kau fagarafe woi na Arafa ia ka o Jisas Kraes ki korokoro tangagamu fato.