Jiud

Jiud

¹ Inau o Jiud na kare iana o Jisas Kraes, me esina o Jemas. Au sege tangagamu, kigamu na inuni ne usuigamu o God. O God Emaka ke komanigamu wau, mo Jisas Kraes ke ono surigamu koro wau. ² Au fagarafe woi na faitakoifa, marapefa mina faikomanifa ki afainigamu wau nga. ³ A goaku koro, au oqania wau qai sege tangagamu rainia ka tafinga ne mafata rainia tangagia, maaki na mataina kaa kau oqania qai sege wau tangagamu qai nongigamu kamu uraura nganganiaga iga ka tangamworanifa o God ne qani wategamu inago, ke mai taua na mataina kaa, tangagamu na inuni namu apuna tangaa. ⁴ Suria tana inuni ne ma nai rao isuria o God ka qanufigia fato noga ka topai wau ka tamatamasinga rainigi na arani korofa iana o God woi ne koro mwa tangara nai tanui ana ka agua ni oraoraganifa iata. Suria i ngaira gaa ka fagarigia ko Jisas Kraes na mwane rafa mina Arafa iaka. Maki inago mai noga ke wosia ka Segesegefa Apuna woi na inuni ma nai rao suria o God ira ke fafagaetangira. ⁵ Igia fato ka girara ka mwarao ne wora tangara na inuni mataina ne toraira na Arafa pania Ijip ira. Tana fitangita ke ma nai rarononimwora, make kamarira imurina mai. ⁶ Mu girara nikao woi na enjel ne ma nai tanui na tagaranifa iata, maka rao fato panigi ka agua iata. O God ke rakura rainia ka seni ne ma ni pagai mwoumwou, make kasira iga ka rarona na kokoro ne rotorotoaga wau, ka rerea ka tangiana rafa wau ni fagaetangifa. ⁷ Ka apena mwarao rafa ke wora nikao tangara na inuni i Sodom mi Gomora mina arani finua na tao i aworona igi. Ainuni i finua gena maka tanui nikao ka agua ni oraoraga ana maka tanui ka agua afainira ki tana inuni rao. Hoi mo God ke fagaetangira rainia ka giu ne ma ni pagai arofu rai fagaqaonga tangagia. ⁸ Ainuni na fafagaparu nau tatamasira gaa ke rao faku mwa ka taufanata mangara nai inuni na fafagafunu ka fafagaerisi rao mwa na apeta mereata igi. Ngaira na inuni gena ka ngaroitaingi wau ka arani fagausuringa ne watera, maka tamasi aerisira ka arani enjel fato. ⁹ Hoi mo Maekol na qauta na enjel, make ma wau ka woita woi ni woisia aerisia rainia ka ataro iga ka mataina naru faitogiri rainia na apena o Mosis ia. Ngaia noga na mwarao ne woisia tangaa ke woi, ‘Arafa ke pagai fafagaetangigo ngaia.’ ¹⁰ Mina ainuni gaa ka tewo qau wato wau rainigi ka arani mwarao ne ma nai girara mereata. Ngaira gaa ke mamangara na wasi ne marefa na takofa i qauta ira na atani wau mwa mina takofa aera iata gena tangai funuira ana sio mwa. ¹¹ E aera wau nga tangara ngaia. Ngaira gaa ka rao suria mwa ka agua iana o Kein, maka manga o Belam ne tako rafa mwa rai ka rurugua ia. Hoi ngaira gaa nikao maka tofega wau manga o Kora ia make pagai fafagaetangira ka maemae manga ngaia ia. ¹² Mataina namu tanua na ngaufa rai fagaqao ana ka faikomanifa iamiu, ainuni na fagafagaparu gena ki afainigamu mwa, ne ma nai maaki rai ngau aera ana, maka qao mangai na roto ne mai rorogasi rao mwa na roga ne ma nai gira rangi ana igi. A mangara na apenagai ne ma ni kasi guana iga na mataina ne araria ne gugua. Apenagai kena ke maria make afaraga akau fato ka wagana. ¹³ Ainuni gena ka mangara na nawo rafa ne aropi i asi ke magofu rai ka mwani tokotoko aera igi, maka mangara na feegu na afasu panigi na nanata ira, hoi mo God ke qani naka mai tangara ka agua ne rotorotoaga nai taotao tarai iga. ¹⁴ Inok ka piuta na mwane ne wora ina woraworanifa iana o Adam make tamasia ka woita iana o God rainira ka inuni gena ke woi, “Na Arafa ke pagai arao mai afainira ka qera mina qera na enjel apuna iana ¹⁵ nai fagagetara ana ka arani inuni, make fafagaetangira ka inuni na ma nai girara o God rainigi ka agua aera na tanui mina arani woita na tamasia aerisia rainia.” ¹⁶ Ainuni gaa ka fafarau wau, maka tangatangaerata ka inuni, maka oqani rao suri ana mwa ka agua aera na wawanasi gena, maka tamasi fagaakausira mereata wau, maka fafagakoro maata mwa ka inuni rai tamanira ana mwa mereata. ¹⁷ A goaku koro igamu, mui tatakosi rafaera wau ka mwarao na qani woisi tangagamu na aposol iana na Arafa iaka o Jisas Kraes igi. ¹⁸ Ngaira ka woi ina mataina ne fafagarangi na aporofa iana na Arafa ka pagai arao mai ka inuni na mamaongoga make ma nai oqani rongo ana ko God, maka fafagamamana rainia ko God. ¹⁹ Ngaira na inuni gaa ka tatakara rainigamu, ngaira gaa ka tatakosi sio mwa ka ogafa na oqani, make ma nai nafunia ka Figona Apuna. ²⁰ A goaku koro, siana kamu tanua ka agua manga ngai kana. A tangamworanifa ke apuna wau, hoi mui fagagatanigamu iga ka tangamworanifa iamiu. Mui fafagarafe iga ka ramwofa iana na Figona Apuna, ²¹ maka mui uraura nganganiaga afainia ka faikomanifa iana o God manga namu nanaua na Arafa iaka o Jisas Kraes nai fagaregamu ana rainigi ka korofa iana rainia ne wategamu na tafinga fuu. ²² Mui tatamanira ka inuni na mwarumwarusiga iga na tangamworanifa iata. ²³ Mui okera aporo ka ani pania ka giu, rai fagatafira ana. Mui tatakoira ki tana ani maaka mui mamaagu. Mui maerongani ka gafu iata na fagaapunigara rainigi na aerafa na tanui. ²⁴ O God ke gira ono surigamu ana menamenai pania ka apuri ana iga na aerafa, make gira fagaurasigamu ana afainia. Iga na mataina kena marefa ka aerafa afainigamu, maka mu wawagewage wau. ²⁵ Hoi kai fagaakaufia ko God na faufugana nanama. Ngaia ke kasia ko Jisas Kraes na Arafa iaka rai fagatafigia ana. Nga mwa o God tagaina ke nafunia ka ramwofa tefarira ka arani mwarao mai inago, ina mataina kaa, mi taraitarai. Amen.