Galesia

Galesia

¹ Inau Pol na aposol kau segesege wau tangagamu kaa. Marefa ki tana inuni ni ono sikifiau rai aposol, ngairaurua mwa o Jisas Kraes mo God o Mama ne ragaia akau ko Jisas pania na maefa. ² Inau mina goaku fato e gaa kami oqania woi na ogafa koro afainigamu ki igamu na rurufa ni inuni ina provins i Galesia, namu rao suria o Jisas Kraes. ³ Au fagarafe woi o God emaka mina Arafa o Jisas Kraes karu koro tangagamu, mwarao maka mui ogaoga iga ka marapefa. ⁴ Ngaia o Kraes ke tau woita iana ko God Emaka, ke mafata rainia mereana ke mae tangai ka aerafa iaka make fagatafigia pania ka mataina aera kaa. ⁵ Ai fagaakausia ko God rainia ka rarafa ana tarai tarai. Amen. ⁶ Au panga rainigamu namu riri farufaru wau pania o God kena, rainia ngaia ke ono sikifigamu kena, suria na oqa korofa iana o Kraes tangagamu, maka mu tangamworani rainia ka tarofa koro getea kena, ⁷ minga na agua mwora ka tarofa koro ne etagai togo kaa. Maki tana inuni mwa ka tanua na agua aera tangagamu kena ka katofi ririgamu ana pania ka tarofa koro rainia ko Kraes. ⁸ Make araria woi o God ki fafagaetangira fato ko otai na inuni na tatamasia na tarofa koro getea pania na tarofa koro iamami tangagamu! Manga na tamamami kee na enjel pania i Heven. ⁹ Igami kami woisia noga inago, makau wowoisia nikao. Au oqania ko God ne fafagaetangia ko otai mwa ne tatamasia na tarofa koro getea pania na tarofa koro namu tangamworani fato noga rainia ia. ¹⁰ Marefa qai katofia woi qai tanua ka agua ni korokoro i mangatata na inuni. Au oqania woi qai tanua ka agua ni koro i mangatana o God. E fea, igamu kamu takosiau woi inau kau oqania rai tanua ana ka agua ni qao koro i maata na inuni? I manga woi inau qai tanua ka agua ngai ke, inau ke marefa ka kare iana o Kraes. ¹¹ A goaku, inau kau oqania qai woisia wau tangagamu ka tarofa koro nau tatamasia kaa, ke ma ni rao mai pania ka inuni. ¹² Marefa ki tana inuni woi ni wateau ka tarofa koro, make marefa nikao tana inuni woi ni fagausuriau rainia. Ngaia mwa o Jisas Kraes ke wateau ina mataina ne fagaqao mereana tangau. ¹³ Igamu kamu qani girara ki takena nga na ogafa iaku manga na Jiu ia. Au tau mamaramwanega rainia ka siosi iana o God, makau ofongia rai fagaerisia ana. ¹⁴ Inau kau tefarira fato ka Jiu na ani na farisita manga inau kaa, suria nau rao suri fato ka arani ogafa naka na wategia iuraka. ¹⁵ Mako God ke takoiau tefa, make ono sikifiau, mataina nau taotao maunga i oqana enaku. Make takosia ¹⁶ rai fagaqao ana tangau rainia ki Karena, suria ne oqaniau qai tatamasia ka tarofa koro tangara ka inuni marefa na Jiu. Marefa qai tamasia ka agua kaa afainia ki tana inuni. ¹⁷ Mi inau ke marefa qai tamasi afainira ka mwane i Jerusalem na mai tao rai aposol inagoku. Minga kau oto rao i Arabia, mi murina mai au aporo i finua rafa Damaskas. ¹⁸ Imurina na farisi ne eoru kau rao tangaa ko Pita i Jerusalem, makau oga afainia suria ka tangafurui i tangiana matara erima (15). ¹⁹ Inau ke marefa qai rea ki tana aposol getea. Inau kau rea mwa ko Jemas, esina na Arafa. ²⁰ Mi maana o God au fagatapusi, woi inau kau tamasi mwora. ²¹ Imurina mai au rao ina provins i Siria mi Silisia. ²² Ina mataina ngai kena ka inuni ina siosi ina provins i Jiudia ke marefa nai reau. ²³ Nga na rongoa mwa, woi na mwane ne katofi fagaerisira ana inago ira, make rapasia rai fagafatongia ana ka tarofa koro ia, maki ina mataina kaa ke tatamasia ka tamasinga ngaia! ²⁴ Ngaira ka fagaakausia ko God rainia ka agua ne tanua tangau.

¹ Imurina na tangafurui farisi matara efai (14) inau kau aporo nikao i Jerusalem afainia ko Banabas, makau toraia nikao afainiau ko Taetas. ² Inau kau rao, suria ko God ne oqaniau, woi qai arao. Mataina nau mira tamasi punufi na mwane rafa iga na siosi, inau kau tamasia menamenai aera tangara ka tarofa koro nau tamasia tangara ka inuni ne marefa na Jiu. Iga na tagarafa iaku inago mina mataina kaa inau ke marefa qai oqania woi qai tagara purua mwa. ³ Hoi, Taetas ke rao i Jerusalem afainiau. Ngaia kena ka Grik, minga ke marefa nai girua rai fara fagagirara ana. ⁴ Mi rao kana suria tana inuni na katofi fagaparu ana woi na rao suria ka Arafa, ka qanufigami punufi, minga ka katofi gafia mwa ka ogafa ne taragani iamami. Arao mai rai fagaerisia ana mwa panigami ka ogafa ne taragani ne wategami o Kraes Jisas, maka katofigami rai tagara purua ana tangara. ⁵ Ua igami kami oqania woi na tawatawanifa rainia na tarofa koro ne mwora ki taotao afainigamu, nga ngai ke mi uraura pusira tarai mwa gaa. ⁶ Marefa qai tako rafaera wau rainia ko otai na mwane rafa ne tefa iga na siosi, suria o God ke marefa ni girara fagagetara ana ka qaofanata na inuni. Hoi ngaira na mwane rafa, ka inuni ka tako fagafigaira wau, ngaira ke marefa wau nai wowoisi tangau qai tatanui ki tana mwarao ni qao getigi, ⁷ maka ono girara woi o God ke kasiau mai afainia ka tarofa koro tangara ka inuni marefa na Jiu make kasia ko Pita afainia ka tamasinga mwa ne etagai kaa tangara ka Jiu. ⁸ God ke qani kasia ko Pita ke rao tangara ka Jiu, mi inau ke kasiau mai kau tamasi tangara ka inuni marefa na Jiu. ⁹ Jemas, Pita mo Jon ka ono girara woi o God ke qani mafata rainia tangau ka tamasinga rainia na oqa korofa iana. Mina mwane gaa ka takosira woi na mwane rafa ina siosi, maka marumusigamirua ko Banabas mi inau, rainia woi igamirua kamuru tatagara afainira ka inuni marefa na Jiu, mi ngaira ka tatagara afainira ka Jiu. ¹⁰ A nongigamirua mwa rai takosira ana ka inuni marefa ni tonga nafuninga iata, minga na agua nau marumusia wau rai tanua ana ngai ke. ¹¹ - ¹⁴ Hoi ina mataina o Pita ne rao mai i Antiok ke ngaungau afainira ka inuni ne marefa na Jiu. Hoi o Jemas ke kasira ki tana Jiu na tangamworani ka rao. O Pita ke maagutainira ka Jiu make fato rai ngau afainira ka inuni marefa na Jiu. Tana inuni nikao ina siosi i finua kena, ngaira afainira iga ka agua marefa ni oto. Mo Banabas nikao maka tanua ke rao surira iga ka agua ne aera kena. Ina mataina nau rea ne marefa ni rao suria na tarofa koro, au susura ira suria na agua na tanua ke marefa ni oto. Au tamasi i maana o Pita mi maata fato na arani inuni ira, hoi makau woi manga kaa, “O Pita, igo kena ka Jiu, mako oga mangara na inuni ne marefa na Jiu gena, ke tanu fea ko girura na inuni marefa na Jiu woi nai ogaoga mangara na Jiu? ¹⁵ E mwora woi igia ka wora mai mangara na Jiu make marefa nai aera mangara na inuni ne marefa na Jiu gena. ¹⁶ Igia ka girara, woi na inuni ke korokoro make otooto i maana o God, suria mwa ka tangamworanifa rainia ko Jisas Kraes. Marefa kai ainuni ni girara tanua ana na agua ni qaqao koro i maana o God ni arao suria na fagausuringa iata na Jiu. Hoi kigia ka naka ka raronimworanifa iaka iga ko Kraes Jisas, mo God ke kafu fagaotogia suria ka tangamworanifa iaka. ¹⁷ A mataina igia na Jiu nami girara woi o God ke fagaotogami suria igami kami faku fainia ko Kraes, makami rogoia woi igami makami aera manga na inuni ne marefa nai rao suria na Lo. Mi tana Jiu ka woi, Kraes ke tanugia ka aera. Hoi maka agua ngai ke ke marefa ni mwora. ¹⁸ E rao kau katofi rao suria ana aporo ka Lo nikao, ke fafagaqao rainia woi inau kau tanua ka agua marefa ni oto iga na fagausuringa kaa. ¹⁹ - ²⁰ Mataina nau rao suria na Lo, kau kafu girara ne qara woi qai tanua makau kasia imuriku ka Lo ia. Mina agua mwora ka mataina o Kraes ne mae iga na taotao woro ke manga woi inau kau mae afainia, ke marefa qai arao suria mwa ka Lo ina mataina kaa, qai tafitafi tangaa ko God. Inau mereaku kau mae, mo Kraes ke tafi afainiau. Kina mataina kaa kau tafi iga ka tangamworanifa rainia i karena o God, ne komaniau make wateau na tafinga iana. ²¹ Marefa qai riri pania ka oqa korofa iana God ne wateau purua. E rao ki igia ka oto i maana o God suri igia ka arao suria na Lo, ke qao manga na maefa iana o Kraes ke mae purua.”

¹ Igamu na inuni i Galesia, mu qeka! Otai ke fagaqekaqekagamu kena? E tanu fea? Suria inau kau qani woisia wau menamenai wau tangagamu ki takena nga o Jisas Kraes na rapusia ina taotao woro. ² Hoi agua ne etagai mwa kau fafagategamu rainia. E manga ifai, ka Figona Apuna iana o God na wategamu suria na taua ana na Lo, kee na rongoa ana na agua rainia ko Kraes mina tangamworani ana rainia? ³ Igamu kamu faganega ka ogafa faoru afainia ka Figona Apuna minga kamu qeka rai katofi rai rao pania ana, kamu arao suria na Lo kena. ⁴ Rako wau ka mwarao ne wora tangagamu iga na ogafa namiu. E fea namu kato woi na mwarao purua mwa? E qara qai tangamworani rainia ka agua kena. ⁵ Manga ifai ki na mataina kaa, ko God ke wategamu na Figona iana, make tanui na agua ne qao riariaga tangagamu? Ke manga ifai, suria igamu kamu rao suria ka Lo, kee suria namu tangamworani rainia ka tarofa koro kaa namu rongoa rainia ko Kraes kena? ⁶ Takosia ko Ebraham. Na Segesegefa Apuna ke woisia, “Woi ngaia ke tangamworani rainia ko God. Hoi, o God ke ono girara, woi na mwane ne oto i maana.” ⁷ Hoi, igamu ke araria namui girara, woi na inuni na tangamworani rainia ko God manga o Ebraham, ngaira ki karena mwora. ⁸ Iga na mataina inago, a Segesegefa Apuna ke qani tamasia fato, woi o God ke pagai fafagaotora ka inuni ne marefa na Jiu, ka akau mai menamenai iga ka tangamworanifa iata. Hoi iga na agua kena Ebraham ke rongoa ka tarofa koro inago ne woi, “God ke pagai tatagara i apemu ina mataina kaa rai fagakorofira ana ka arani inuni ina ano kaa.” ⁹ Ka agua kaa ke manga kaa, o God ke fagaapunarira ka arani inuni na tangamworani suria ne fagaapunaria o Ebraham ne tangamworani inago. ¹⁰ Arani inuni na taua nganganiaga rai rao suria ana na Lo gaa, o God ke pagai fafagaetangira, manga na Segesegefa Apuna ne woisia, “Otai na inuni ne marefa ni arao suri na arani mwarao na segera iga na puka iga na Lo, mo God ke fafagaetangia.” ¹¹ E mwora wau, o God ke marefa ni tawoa ka inuni woi ne oto rai rao suria ana ka Lo. Au wowoisia ka agua kaa, suria na Segesegefa Apuna ne woi, “Ainuni ne fagauguria o God, ngaia ke oto i maana make tawoa ka tafinga.” ¹² Mina agua tangai rao suria ana na Lo ke marefa ni tao nganganiaga iga ka tangamworanifa mwa. Marefa wau! A Segesegefa Apuna ka woi, ainuni ne tanui nga na arani mwarao, na Lo ne woisi, ngaia ne pagai tafitafi tarai. ¹³ Hoi, ka rao suria ana na agua kaa ne qara wau, mako Kraes mwa ke tawogia pania ka agua ne asa iga na Lo. Kraes, ke mai mae manga na inuni aera ia tangagia, ina mataina ne mae iga na taotao woro. Manga na Segesegefa Apuna ne woi, ‘A mwane na nafuia funuia iga na mata, ke mae suria ne tawoa ka fagaetangifa iana o God.’ ¹⁴ Kraes Jisas ke worigia fura manga kaa, woi ni tataraganisigia panigi ka aerafa, hoi ko otai na inuni ne marefa na Jiu, ngaira ki mwataku nikao tangara rai tawoa ana ka ataa o God ne surua tangaa o Ebraham woi ne wawatea. Ki iga na agua kaa, igia na inuni na tangamworani, igia ka gira tawoa ana ka Figona Apuna God ne qani surua, woi ne wawategia. ¹⁵ A goaku, qai fagaregamu wau rainia ki takena nga na agua ngai kena tangagamu. Mataina na inuni ne erua naru tawatawaria faku tana mwarao, makaru suru faitangai rainia, e apu wau tangaa ki tana inuni ni fagaerisia. ¹⁶ Hoi, o God ke suru tangaa ko Ebraham mi tangaa ka mwane ne etagai iga na aorisina kena. A Segesegefa Apuna ke marefa ni woi, ‘tangara ka aorisina gena’ woi na inuni ni rako aera, minga ke woi mwa, ‘tangaa ka mwane ne etagai iga na aorisina kena,’ e woi, ainuni ne etagai togo mwa, ngaia ko Kraes. ¹⁷ Agua nau takosia ke kaa, inago o God ke surua ka agua tangaa ko Ebraham. A tangarau i farasi ne efai mina tangafuru ne eoru pupu (430) imurina mai, God ke mafata rainia ka Lo tangaa ko Mosis, maka Lo ia ke marefa ni fagaerisia kee ni orisia ka surufa iana o God tangaa ko Ebraham. ¹⁸ God ke mafata rainia ka mafata iana purua mwa tangaa ko Ebraham manga ne qani surua tanga. Make marefa ka agua ni rao suria ana na Lo. ¹⁹ Nga ne fea ko God ke watea na Lo o Mosis? A Lo kena ke fagaqao rainia ka aerafa iata na inuni. A Lo ia ka toraia mai ka enjel tangaa ko Mosis rai mafata rainia ana tangara ka inuni. A Lo ke tao raorao make taua ka mataina na Aorisina o Ebraham ne wora mai, manga o God ne qani woisia rainia. ²⁰ Mo Mosis ke toraia mai ka tamasinga kena pania ko God tangara ka inuni. Hoi mo God ke suru mereana tangaa ko Ebraham. ²¹ Ke manga ifai, a Lo kena ke tamasia ka agua rai fagaerisia ana ka agua ne surua o God ia? Marefa wau! Make rao ko God ke mafata rainia mai ka faifataninga ne etagai ne girara mafata rainia ana na tafinga mwora, ke ararigia nai otooto rai rao suria ana ka faifataninga kena, ²² maka agua kena ke asa wau, suria na Segesegefa Apuna ke fagaqao rainia ka ano kaa fato ke rakua ka aerafa. Hoi agua ne surua o God ia ke taotao tangara ka fitangimiu ne tangamworani iga o Jisas Kraes. ²³ A mataina ne mamaunga ni arao mai na tangamworanifa kena, a Lo kaa ke taugia nganganiaga wau. Igia ke marefa ni taraganisigia ke taua ka mataina o God ne fagaqao rainia na tara tangagia ni tangamworani ana ne rao mai. ²⁴ Hoi ka Lo ke arafa tangagia ke taua na mataina o Kraes ne arao mai. Ki imurina o Kraes ne rao mai, ki igia ke araria na fafagaotoa ka ogafanaka iga ka tangamworanifa iaka. ²⁵ Mi ngaeka, ka mataina na tangamworanifa iga o Kraes ne qani rao mai fato noga, a Lo ke fato rai arafa ana tangagia. ²⁶ Igamu fato kena ki karena o God, suria mu tangamworani rainia ko Kraes Jisas. ²⁷ Hoi, ki igamu mu qanu afainia noga ko Kraes ina fagamaanu apuna ana, maka mu manga na ogafanana ia. ²⁸ Hoi ke marefa ki tana mwarao nikao ni qao getea rainira na ani ngai ge na inuni na qanu afainia noga o Kraes Jisas gaa, manga woi ngaira ka Jiu kee ne marefa na Jiu, kee na ainuni tagara purua, kee ainuni ne taraganisira, a mwane, kee na fefene. ²⁹ Hoi ki igamu na ani iana o Kraes, igamu kamu tao rai karena Ebraham ina mataina kaa, maka mu tawoa ka mwarao o God ne surua tangagamu, woi ne wawategamu.

¹ Ua a tamasinga iaku wau tangagamu ke manga kaa, a mataina na kare ne araria woi ne nanafunia na nafuninga iana emana ke marefa nai wawatea na mataina ne sisitai maunga, maka oqania ne tautau woita iata mwa, maka mataina ne rafarafa minga ka kafu wawatea. ² A mataina ne sisitai maunga, ngaia ke araria ni tautau woita iata ka inuni na onoono i suria, maka mataina ne taua na farisina ne naka emana ia, minga ke kafu arararia ne nanafuni. ³ Ki takena nikao, a mataina mamaunga nai tangamworani rainia ko Kraes, igia ke manga na kere kare ia, maka tau woita iata nga ka ataro ina ano kaa. ⁴ Maka iga mataina ne oto nga tangaa, o God ke kasia mai ki Karena, ne apara ka fefene na Jiu, mina kare kena ke tau woita iana ka Lo. ⁵ God ke tanua ka agua kaa, rai fagataraganisira ana ka inuni ne arafa tangara na Lo, suria ne oqanigia woi nai tao rai karena. ⁶ Ki igamu ki karena o God. Nga ngai ke ne kasia na Figona iana i Karena ke qanu i mangataka kaa, a Figona ne oni ke wowoi, “Mama, Mama iaku.” ⁷ Kina mataina kaa, ki igo ke marefa nui tatagara purua, igo ki karena o God, mo God ke wawatego ka agua ne qani surua, suria igo ki karena. ⁸ Inago, ina mataina ne mamaunga mu gigirara o God, igamu kamu tautau woita iata nga ka ataro, ne marefa woi ngaira ka god, ⁹ maaka mataina kaa, ki igamu kamu girara ko God, make koro wari qai woi, God ke giraragamu menamenai wau nga. Hoi manga ifai kamu oqani qau aporo ana tangara nikao na ataro iga ano kaa na mwarumwarusiga gena? Nga ne fea, igamu kamu oqani rakugamu ana nikao iga na ogafa purua? ¹⁰ Raorao mwa kigamu kamu ofongi aerisia rai rao suri ana ka arani agua iga ka tangiana rafa, mina fagaifa, mina tana tangini rafa iga na farisi, ¹¹ mi inau kau tako rafaera wau rainigamu, make marefa ni koro woi na mwakomwoaga ana iaku ki arao purua rainigamu. ¹² A goaku igamu, iga na mataina nau oga afainigamu inago wau, au rao suri ka taufa iamiu. Hoi mina mataina kaa, au nongigamu wau mu arao suri ka taufa iaku. Ki tangagamu igamu ke marefa mui tanua ka mwarao ni aera tangau inago, ¹³ maki igamu kamu qani girarau woi inau kau matoro rafaera wau, nga ngai ke inau nau rao mai tangagamu iga na nagonagona rai tamasia ana tangagamu na tarofa koro kaa. ¹⁴ Fenaka na matoroa iaku ke tanua ka agua marefa ni koro tangagamu, mi igamu ke marefa mui ono aerisiau maka mui susuraiau. Marefa wau! Igamu kamu ono suriau menamenai aera wau manga na mwane ni tora tamasinga iana o God ia, maka mu ono suriau manga inau ko Kraes Jisas ia. ¹⁵ Igamu kamu wagewage tefa wau ina mataina kaa! Maki fai ngaia na wagefa igi? Au woi mwora wau tangagamu, igamu kena kamu oqani aerisia wau woi namui tanua ka atani wau mwa na mwarao koro ina mataina ia, make manga woi namui girara tanua ana, ka ki igamu kamui marumu mwa rai tawoa fura ana ka maamiu, maka mui wateau mai rai tamaniau ana. ¹⁶ Manga ifai, kamu mai tao rai maerongaku ina mataina kaa, suria inau nau woisia wau tangagamu na agua mwora tangagamu kaa? ¹⁷ Ainuni gena ka oqanigamu mwa woi mui arao surira, maka agua ngai kena ke marefa ni koro tangagamu. A oqani girugamu ana mwa woi nai ririgamu panigami kamui rao surira mwa. ¹⁸ E koro tefa woi nai tanura ka inuni kai marumusira, make manga na takofa iata ke koro. Ka agua ngai ke ke mwora ina mataina nau ogaoga afainigamu mina mataina nau arao panigamu. ¹⁹ Kareku igamu, au fatamia nikao ka faranga tangagamu manga na fefene ne fara rai apara kare ana ia. A faranga iaku kaa ke taotao ke taua ka mataina namu mangara na inuni rafa kamui tawoa ka ogafa manga o Kraes. ²⁰ Au oqania woi inau ki afainigamu ina mataina kaa, ke araria wari qai orisia sisitai ka tamasinga iaku tangagamu. Suria nau takou rainigamu rafaera wau. ²¹ E fea, igamu namu oqani rao suria ana na Lo, kamu girara wau ka agua ne woisia na Lo? ²² - ²³ Iga na Segesegefa Apuna ka rongoa woi o Ebraham ke apara ka kare mwane ne erua. Enana tana mwane ka fefene ni tagarafa purua ana mwa, make wora mwa manga na arani inuni. Me enana tana mwane ia ka inuni iana o Ebraham na fefene ne taraganisia. A kere mwane kena ke apara ka Sera suria na agua ne surua o God tangaa Ebraham. ²⁴ A tamasinga kaa ke tamasi nununa ka fakunga ne erua iana o God, iga karua gaa. A Lo o God ne mafata rainia ina fungana i Saenae mina aorisina ka Heka ke manga ne inuni ke tau woita nga ina Lo kena. ²⁵ Ka Heka kena ke manga na fungana i Saenae ia i Arabia ke tamasi nununa ka finua iata na Jiu i Jerusalem ina ano kaa. Ainuni i finua gena ka tagara purua ina rugufanana na Lo. ²⁶ Mina finua i Jerusalem i Heven i afaafa, ke manga na fefene ne taragani ia. Ngaia enaka ngai kena. ²⁷ Manga na Segesegefa Apuna ne woisia ia, “Igo na fefene, no gamara, marefa nui apara kare, ui wagewage mwa. Igo na fefene ne marefa nui fatamia na faranga ni kare, ui wawagewage makui ngengerengere! Suria igo ke tonga i karemu ne rako aera wau, tefaria ki karena na fefene ne qani auragi ia.” ²⁸ A goaku, o God ke suru tangaa ko Ebraham rainia ki karena, mi nga igia kaa ki karena, manga o Aesak ia. ²⁹ Ani na kare mwane ne wora manga na arani kare ia, ke fagamamasiaga apena ki tana kare mwane ne wora iga na Figona Apuna, ke manga ngai kena nikao ngaeka. ³⁰ A Segesegefa Apuna ke woi, “Ui maengia ka fefene ne tatagara purua pania ki karemu! Ke marefa nai wawatea ki tana mwarao. I karena na fefene ne taraganisia ke tawoa ka arani mwarao.” ³¹ A goaku igamu, igia kaa ki karena na fefene ne taraganisia, marefa ka fefene ne tagara purua ia.

¹ Kraes ke fagataraganisigia woi igia ki tataraganisigia raorao mwa! Hoi ki igamu mui uraura nganganiaga, maki siana kamu nanaka ki tana inuni ki tanugamu kamu mai taotao rai ainuni ni tagara purua ana nikao. ² Mui rongo mai! Inau o Pol, kau wowoi tangagamu wau kaa, rao kamu fafagamarumungainigamu mereamiu rai fara fagagiraragamu rai oto ana i maana o God, o Kraes ke marefa ni pagai fafagatafigamu. ³ Au wowoisia aporo wau nikao tangagamu, ani mwa na mwane ne fafagamarumungainia mereana ka fafara fagagirara, e ararira nga ngaira ka rao suria ka arani Lo gena. ⁴ Hoi ki igamu na inuni namu ofongia woi namui oto i maana o God, rainia woi namu arao suri ka arani Lo iata na Jiu, igamu kamu rao pania fato noga ko Kraes Jisas. Igamu kamu fura pania noga ka korofa iana. ⁵ Maki igami kami nanaua woi o God ke fafagaotogami, suria ka Figona Apuna iana o God ke tamanigami rainia na tangamworanifa iamami. ⁶ Suria na mataina na inuni ne qanu fato noga afainia ko Kraes Jisas, marefa ni tanua ka agua ni rao fea getea, manga woi igamu ka fafara fagagiraragamu ke marefa, mwarao kena ka mwarao purua mwa. Minga na apena mwarao rafa ka tangamworani ana rainia ko Kraes mina komaniana tana inuni. ⁷ Mu rao suria ka agua ne oto wau inago ia, motai ke mai ririgamu pania na agua mwora kena? ⁸ God ke marefa ni tanua ka agua kena tangagamu, suria ngaia ke onigamu ia. ⁹ Mui onoono menamenai aera suria na kere fagausuringa ne aera ke manga na, “a kere agua na iist ne gira tanua ana ka flaoa ke fungafunga.” ¹⁰ Suria iga ka faku afainia noga ko Kraes iga ka fagauguringa iaka, inau kau tako nganganiaga woi igamu ke marefa mu tatangamworani rainia ka fagausuringa ne aera. O God ke pagai fafagaetangia ka inuni ne fafagaerisi na takofa iamiu, manga woi otai ki ngaia. ¹¹ A goaku, ma qai fagausurigamu woi nai fara fagagiraragamu. Maakau tarofainia mwa tangagamu ka tara iga na maefa iana o Jisas iga na taotao woro. Nga ngai ke ngaira na Jiu na maerongani na woita iaku maka ono aerisiau kaa. ¹² Au oqania woi na arani inuni na girugamu kai farasira mereata. ¹³ A goaku igamu, a ono sikifigamu rai oga taragani ana. Make marefa mu taragani rai rao suria ana ka arani taufa aera, maka mu taragani mwa rai komanira ana mina tamanigamu ana faitangai. ¹⁴ Arani agua iga na Lo ke woisia mwa iga ka tamasinga rai komanira ana ki tana inuni manga namu kokomanigamu mereamiu. ¹⁵ Mui onoono menamenai aera wau, manga namu rao kamu fafainafunafu mereamiu, mangara na qoo wasi ira, mu fagaresigamu mereamiu ngaia! ¹⁶ Hoi, a takofa iaku ke manga kaa, a Figona Apuna ke araria ni fagaotora ka maurifamiu, maki siana kamu arao suri na agua aera i mangatamiu. ¹⁷ Rainia na agua aera i mangatana na inuni ke uraura pusi ka mwarao na Figona Apuna ne oqani, mina a mwarao na Figona Apuna ne oqani, ke uraura pusi na agua aera i mangatana na inuni. Ngairaurua gena karu faimaerongai, marefa naru girara tagara faku ana. Hoi ngai ke marefa nui giri tanua ka taa na mangatamu ne oqani tanua ana, ¹⁸ maka Lo ke marefa woi ni girara tefarigamu ana, suria mu arao suria ka Figona Apuna. ¹⁹ Arani inuni na qani girara na mwarao gaa, ne worawora mai panigi ka agua aera i mangatata na inuni, suria na takofa aera ngai ge i mangatata na inuni ke tanua ka agua ni oraoraga ana, maka paronga aera, make tanu manga na aoo ia, ²⁰ maka wowogasira ka nunuta na mwarao, maka tatanui ka agua ni farikua ana. Ngaia ke tanura ka inuni ka fafaimaerongai, maka fafaimangari, maka fafairafai, maka mangaringari, maka tatakosira mereata mwa. Ngaia ke tanura ka fafainafunafu maka fafariwoa, ²¹ mina wanasi ana na mwarao iata tana inuni, maka tono ka qekaqeka, maka tanui ka farunga rai tanui ana ka mwarao aera, mina tanui ana tana mwarao aera manga ngai ge. Inau kau woi tangagamu wau, manga nau qani woi tangagamu inago ia, ainuni na tatanui na agua ngai ge, marefa nai nanafunia ka arafanga iana o God. ²² Mina Figona Apuna ke tamanira ka inuni rai komanira ana ki tana inuni, maka wawagewage rainia ko God, maka marape tangara ka inuni, maka fagagatagata, maka tatakoira ka inuni, maka korokoro tangara ka inuni, maka tautau woita, ²³ maka oga marumuaga maka tautau surira mereata. Hoi mina lo ke marefa ni woi pusia ka fitangita na agua gaa. ²⁴ Mina arani inuni na nafunia o Kraes Jisas ka fagafatongia ka agua ni mamaongoaga na i mangatata gena. ²⁵ A Figona Apuna ke wategia ka tafinga kigia ke araria woi nai arao suria ka Figona Apuna. ²⁶ Siana rai tako afagaakaufigia ana mereaka, siana kamu woiwoi woi igamu gena kamu koro tefarira ki tana inuni suria tana inuni gena ka pagai rarafai igamu.

¹ A goaku, manga na inuni ne tanua na agua marefa ni oto iga na maurifana, hoi ki igamu na inuni mu tanui na mwarao na Figona Apuna ne oqani, nga igamu kamu fafagaotoa maka mu totoraia aporo mai menamenai, maka mui onoono menamenai aera, kigamu, maka mu tanui mwa ka agua marefa ni oto gena nikao. ² Mataina igamu tatamanigamu fairifui, igamu ke mwora woi mu rao suria ka lo iana o Kraes. ³ Manga tana inuni ke takosia mereana woi ngaia ka inuni rafa, ngaia kena kai inuni purua mwa, hoi mi ngaia kena ke fagaqekaqeka mereana mwa. ⁴ Arani inuni ke araria woi ne qoqoretainia mereana menamenai wau iga ka tagarafa ne tanua, manga woi na tagarafa iana ke koro, ke marefa. Manga ne koro, ua ne araria ne wawagewage rainia ka tagarafa iana. Maki siana ke tatakosia mereana woi ne koro tefarira ki tana inuni. ⁵ Suria na arani inuni ke araria ne onoono suria ka tagarafa iana mereana. ⁶ Mui mamafata rai ka mwarao koro mu nafuni tangaa ka inuni ne fafagausurigamu rainia na agua ne woisia o God. ⁷ Igamu ki siana kai fafagaqekaqekagamu, qara wau tangaa kai inuni ni fagaqekaqeka ana ko God. Igia ka pagai opaoparia ka taa igia na fasia i mwou iaka. ⁸ God ke fafagaetangia ka inuni na arao suria na agua aera i mangatata. Mako otai na arao suria na Figona Apuna ke tawoa ka tafinga fuu. ⁹ Siana rai maemaegana ana rai tanui ana ka agua koro, e rao ke marefa nai mwamwarao ni tangainigi, igia pagai arao mai mataina rai oparia ana ka taa ne koro. ¹⁰ E araria nai tatamanira ka inuni ina arani mataina manga ne mwataku tangagia, maki tefa wau nga tangara ka ani na tangamworani rainia na Arafa. ¹¹ Mui qoretainigi ka apena segesege rafa gaa. Inau kau sege mereaku wau tangagamu kaa! ¹² Ainuni na aofongigamu maka girugamu, woi nai fara fagagiraragamu, ngaira gena ka inuni na kasikasira akau mereata wau. Ngaira gena, nga na mangatata ngai ke, suria ngaira ke marefa nai oqania woi nai fafatamia ka fafara ana i suria o Kraes iga ka taotao woro. ¹³ Mina ainuni na oqania woi nai fara fagagiraragamu, ke marefa nai rao suria nikao ka Lo. Suria ngaira ka oqania mwa, woi nai fara fagagiraragamu, ki tanura ki ngaira kai qaqaqaeaga rainia, woi igamu kamu fagamaarumungainigamu ka fara fagagiraragamu. ¹⁴ Tangau inau mereaku, kau qaqaeaga mwa rainia ka taotao woro iana na Arafa iaka o Jisas Kraes. Rainia na agua ne tanua o Kraes ina mataina ne mae iga na taotao woro, marefa qai tako rafa noga rainigi ka agua iga na ano kaa, mina ainuni ina ano kaa ke ma nai tako rafa rainiau. ¹⁵ Fenaka, na inuni manga na fara fagagirara, kee ne marefa nai fara fagagirara, a mwarao ngai ke ka mwarao purua mwa. Ka agua ne etagai mwa ne tefa, ngaia o God ke fafagafaorugia. ¹⁶ Makau fagarafe woi na marapefa mina faitakoifa ki afainira ka arani inuni na rao suria na takofa kaa. Ainuni ngai ge ka kare iana mwora o God. ¹⁷ Iga na fagafatongina, ki siana ka inuni ni tanua na fagafafara apeku ana, suria inau ke tonga aorena maara noga i apeku na tanui tangau, rainia nau tagara tangaa ko Jisas. ¹⁸ A goaku koro igamu, au fagarafe woi na korofa iana Arafa iaka o Jisas Kraes ki afainigamu. Amen.